home English Version
 
   
 
Betanya Enggau Pastor
 
KEBUAH JESUS PATUT MATI

Mayuh orang enda arap ke pemati Tuhan Jesus ba kayu regang, nya jalai Allah Taala nyelamatka mensia ari dosa enggau ukum dosa.  Jesus mati ngambika barang orang ti arap ke Iya deka bulih pengelepas lalu dosa Iya diampun.  Mayuh orang ngumbai nya enda masuk akal.  Ari nya sida enda merening serius pekara tu lalu enda peduli.  Mayuh mega nitihka ke petara tauka pengarap bukai.  Indah sida ti udah nyadi kristian tau ngalih ke bukai.  Bisi mega sekeda penemu ti madahka semua pengarap sama magang lalu nuju ngagai siti tuju.  Orang ti bempu ke penemu tu madahka semua pengarap ngajar utai ti manah lalu mai kitai semak ngagai Allah Taala.  Ku sida, mayuh jalai tang nuju ngagai endur ti sama.

Tang pengarap kristian enda sebaka enggau pengarap bukai laban pengarap bukai enda arapka Tuhan Jesus ti udah pemati, angkat idup baru lalu diatu ba serega.  Tu meh siti pekara ti ngasuh pengarap kitai enda tau disamaka enggau pengarap bukai.  Lalu pekara tu ukai semina chara dikena kitai ngaga bida tang tu meh pelasar pengarap kitai kristian.  Ditu, aku deka mai kitai beratika pekara tu:  Nama kebuah Tuhan Jesus patut mati ba kayu regang?  Tuhan Jesus mati ba kayu regang laban kitai bulih pengampun dosa sereta pengelepas semina ulih darah aja!  Enti kitai macha Bup Kudus berengkah ari Pemungkal, lebuh Adam enggau Awa labuh dalam dosa, Allah Taala munuh siku jelu kena nutup pemalu seduai tauka kena ngari seduai (Pemungkal 3:21).  Darah dipansutka!  Pia mega dalam cherita Kain enggau Abel dalam Pemungkal 4.  Allah Taala rinduka piring jelu ti diberi Abel (Pemungkal 4:4-5) tang enda rinduka piring Kain, asil ari utai ti diketau, lalu madahka pengawa Kain jai sereta enda ngena (Pemungkal 4:7).  Darah mesti dipansut enti ka bebaik enggau Allah Taala.   Pia mega enti kitai macha cherita pemansut orang Israel ari menua Ejip dalam Bup Pemansut.  Allah Taala ngasuh sida ngelai pintu sida enggau darah jelu (anak domba tauka anak kambin) ngambika Tuhan enda munuh anak lelaki sida begulai enggau anak lelaki orang Ejip lalu sida ulih pansut enggau selamat ari menua Ejip.  Darah dikena Tuhan ti Allah Taala nebus sida ari menua Ejip.

Adat Lewi 17:11 madahka “Seput semua utai ti idup endang dalam darah.  Nya kebuah Tuhan udah bejaku ngasuh semua darah dituang magang ba alta kena muai dosa orang mayuh.  Darah, iya nya nyawa, muai dosa.”  Tu ngenang pasal piring ti dikena orang Israel menya muai dosa sida.  Tang prinsip tauka atur Allah Taala ari pun iya nya darah mesti pansut dikena muai dosa enda kala berubah.  Laban nadai jalai bukai mensia tau nerima pengampun atas dosa lalu nerima pengelepas.  Semina ulih darah aja!  Lalu darah tu ukai darah jelu sebarang tang enda tau enda darah jelu ti “nadai bepetik”.  Orang Israel enda tau enda mai darah jelu nyadika piring ngambika dosa sida diampun (Hebrew 9:7).  Tu enda tau enda suah dikereja sereta dikereja belama-lama laban mensia majak bedosa.  Darah enda tau enda dipansut belama!

Ketegalnya, Allah Taala udah nyendiaka jalai ti lebih manah ke kitai nengah Jesus Kristus.  Iya udah meri diri empu ngambika kitai bulih pengelepas ti meruan belama iya (Hebrew 9:12).  Pemati Iya ba kayu regang nyadika genselan kitai, sekali aja ungkup ke belama iya.  Ku Jesus, “laban darah tu darah Aku kena nanggam sempekat baru Allah Taala, ti dituang ke orang mayuh ke pengampun dosa.” (Matthew 26:28).  Allah Taala udah ngemaruka sempekat ti digaga Iya enggau orang Israel.  Sempekat ti baru nya, kitai nerima pengampun atas dosa ulih darah Jesus.  Dalam 1 John 1:7 madahka, “darah Jesus, nuchi kitai ari semua dosa.”  Kitai enda begunaka darah jelu agi nyadika piring.  Darah Jesus udah chukup menyana.

Jangka kitai agi nanya, nama kebuah darah Jesus, ukai darah orang bukai?  Pia mega bisi sekeda orang sanggup ngemedis tauka ngenelihka diri empu, ngicha Tuhan meda lalu tau ngampun penyalah.  Nama kabuha mesti darah Tuhan Jesus ti dipansutka?  Dulu menya, enti orang Israel mai piring jelu, jelu nya enda tau jelu ti bisi penyakit, timpang tauka bepetik.  Bakanya mega orang ti patut nebus kitai ari dosa enda tau enda orang ti lurus sereta nadai dosa.  Dalam Rome 3:23 madahka semua mensia bela udah bedosa magang.  Nya alai nadai siku mensia ti ulih nyadika penebus kitai.  Kitai empu enda ulih nebus diri empu laban kitai mega udah bedosa.  Nya kebuah Allah Taala datai ke dunya nyadi mensia, idup begulai enggau kitai lalu lebuh datai maya iya, mati ungkup kitai.   Nya kebuah Jesus mati atas kayu regang ketegal kitai.  Iya nadai dosa, enda ngaga dosa lalu dosa kitai diengkah Allah Taala ba Iya (Hebrew 4:15, 1 Peter 2:22, 2 Kor 5:21).  Lebuh ba atas kayu regang iya nyebut leka jaku tu “udah tembu!” (John 19:30), retinya misi Iya ba dunya udah ditembuka Iya.

Tu ti ngasuh pengarap kristian enda ulih disamaka kitai enggau pengarap bukai.  Kitai arapka Jesus ti penebus sereta udah nyelamatka kitai ari dosa.  Arinya kitai ngaku diri empu orang ti bedosa lalu minta Iya ngampun kitai.  Iya nyadika pengelepas enggau Tuhan kitai.  Dalam John 14:6 iya madah, “Aku tu meh jalai, pemendar enggau pengidup.  Nadai orang ulih datai ngagai Apai enti enda nengah Aku.”  Atur Allah Taala enda kala berubah lebuh Iya ngeletak darah mesti dipansut ngambika dosa diampun.  Tuhan Jesus udah ngerejanya ungkup kitai. Amen!

 
 
Pilih Bup enggau Bagi Bup:
© The Bible Society of Malaysia 2011.
 

Content on this page requires a newer version of Adobe Flash Player.

Get Adobe Flash player

Lagu Puji & Sembah ulih Pr. Delly Amera. Sapa ti deka betanya pasal lagu ditu tau email dellyamera@yahoo.com