Tuhan bekerja ba kami sebilik nengah kuasa Sampi

Kenaka 17th Januari, 2011, tu tadi apai aku (Labon ak Gisang) bisi kena penyakit kulit ti balat bendar. Umur iya nyau manggai 85 taun. Maia nya kemari, tubuh iya ambis ngerupai ari tunjuk kaki sampaika punjung pala. Iya mega balat gatal. Laban ke selalu digaru, dia kulit iya nyau maioh bakal lalu penyakit maioh datai.

Bekau nya tadi iya lalu kena tabin ke balat bendar. Macam ubat ke dipakai iya tang tabin nya enda nemu badu. Tuboh iya nyau begetar laban chelap ku iya. Maia malam iya enda ulih tindok laban ke balat chelap. Iya semampai bekerumbong ngena pua ke tebal ari pagi nyentokka iya tindok.

Tudah iya tu tadi, laban ke ngasaika diri nyau tuai, iya madah anang kiroh beranjung ka iya ngagai sepital; awak ka aku mati, pia ko iya. Bala sida indai aku enggau bala menyadi aku maia nya puas ngumbok iya ngagai sepital. Tang iya kieh amat madah ka diri enggai. Kaban belayan ari Sri Aman enggau semak Pantu diasoh apai aku padahka magang, sebedau iya mati ku iya!

Nyadi leboh ninga berita ke bakatu tadi, aku lalu mulai ka diri ke menoa. Aku endang semampai besampi ka iya. SMS maioh dianjung ngagai semua pangan ke bisi dalam telepon binching aku. Aku mega bisi ngasaika Tuhan deka bekerja.

Leboh aku datai di menoa din, aku tekenyit bendar laban enda nyangka penyakit apai aku nya naka ia pemalat. Nyau takut meda kulit iya ngerupai serta kembai nyau merah. Kerupai kulit becerayan sebelah bilik enggau atas tilam. Nyau puas besapu ka kerupai kulit iya. Sekeda nyau keji meda.

Aku lalu madah ngagai apai aku nya deka mai iya ke sepital. Tang iya endang kieh amat; awakka ka aku mati meh anak, enggai ka kita tusah laban aku, pia ku iya. Aku madah ngagai iya aku enda nemu ngubat enggau ngibun nuan di rumah panjai tu, pia ku aku. Aku besampi dalam ati aku minta Tuhan muka ati iya serta minta Roh Kudus bekerja ngasoh Iya ngelemika ati apai aku nya awakka iya berubah ati deka dibai ngagai sepital. Malam nya bendar aku besampi. Aku nemu nadai chara bukai ulih mai apai aku nya ngagai sepital, semina ngena kuasa sampi!

Nyau pagi siti, iya agi bedau tabin. Nyau majak bekerumbong ngiga pua ke tebal agi. Iya nyau mengkakai madahka diri pedis. Bala ke ngusong nyau enggau sabak-sabak sinu ka iya ke merinsa bakanya. Aku besampi dalam ati diri minta Roh Kudus bekerja kemaia nya. Aku madahka apai aku nya aku deka pulai laban enda nemu ngintu iya di rumah panjai (Roh Kudus bisi meri aku penemu ke munyi nya). Tekala nya Apai aku nya lalu bejaku lalu nanya kali ka aku nya bebendar deka mai serta ngibun iya ba sepital. Aku endang madah deka ngintu serta ngibun iya. Aku udah ngasaika Roh Kudus udah berengkah bekerja.

Udah nya Apai aku lalu nguji ngangkatka diri laban iya ke selalu gali enda dapat angkat. Ku iya, enti munyi nya tau meh nuan nganjung aku ngagai sepital di Kuching. Haleluyah!!!!

Datai di Sepital Besai Kuching, iya lalu dipasukka ba wad. Iya lalu diberi “antibiotic” enggau “drip” laban iya udah balat kena “infection”. Iya mega diberi bala nurse mandi ngena siti losion ke ngasoh semua kerupai kulit iya nya tekupas lalu tebererak. Aku nganjung sms ngagai bala ngasuh sida meruan besampi awakka apai aku nya gerai.

Dalam kandang dua hari udah nya, apai aku nadai agi tabin. Kulit iya nadai agi ngerupai, gatal pan nyau kurang. Ba ari ke-empat, iya lalu keluar ari sepital. Aku lalu mulai ka diri ke Kuala Lumpur.

Seminggu udah nya aku ninga apai aku nyau deka amat makai, kulit nyau majak manah. Kira sebulan udah nya, dia iya bisi talipon ngagai aku madahka diri udah gerai amat. Kulit iya nyau baka kulit asal iya suba.

Nya meh menyadi dalam Kristus, aku bedau kala ngasai Roh Kudus bekerja bakatu ba kami sebilik. Enti enda ketegal Roh Kudus ke bekerja, apai aku udah lama ninggalka kami. Sigi nyau deka mati meh iya maia nya; semina nganti hari aja. Puji Tuhan ti udah bekerja. Iya Tuhan ti bendar….Haleluyah!!!

Ditulis ulih Patrick Labon.
13/10/2011