KUNSI KUASA SAMPI
Pilipi 4:6 “Anang irauka utai, tang dalam semua utai, bantaika semua peminta kita ngagai Allah Taala ngena sampi, sampi peminta, enggau sampi terima kasih.”

(Begambar 5 minggu udah bekau beputong. Bediri ari kiba : Hajjah Anon & Haji Gazali. Duduk ari kiba : Chelingga Rampai , Luke Antas  & Denys Antas)
Leboh doktor ke madahka apai bisi penyakit kanser perut besai dalam peringkat 2, asai penangi enggau penakut ati enda ulih disema. Runding aku tusah bendar dikelimpang ari pekara ti jai, iya nya "pengujung pejalai tau ka pemati".

Doktor Bedah nerang semina dua chara aja ulih ngubat iya. Keterubah, diputung muai utai ke jai ba senentang perut. Udah nya kena munoh sel kanser ditandu enggau Chemotherapy tauka Radiotherapy. Kenu ko penemu doktor, peluang iya ulih nembuka operation sereta lalu ulih gerai kiraka 70:30. Laban umur iya ke sunggak, 87 Tahun, maioh bendar risiko baka penusah maia beputung ti tau ngujung ka iya terus enda ngeleda. Doktor sigi enda rikomen Chemotherapy laban nemu iya sigi enda tan, nyadi manah agi enda diuji.

Dalam kandang 5 hari , ari  maia doktor ke udah meri pemutus deka mutong iya ngagai maia iya ke deka beputung kena 16/7/2011, ari berasai bendar panjai. Tu meh maia aku ngasai ka pengarap enggau kaul, kelebih agi aku empu enggau Tuhan, betul- betul diuji.

Tang aku meda semangat apai ke deka gerai sigi nadai berubah. Iya selalu temegah madahka diri gayu, serta udah diberi Tuhan berkat & bonus, panjai umur. Baka selama, tiap lemai iya nguluka kami dua besampi. Dalam sampi, iya minta Tuhan ngeraika iya ngambi ka enda iboh beputong. Makin semak ari ngagai maia ke deka beputong, makin bejarit agi aku mai iya besampi. Kenyauka aku minta ngagai iya aku ka nyilih ngulu ka kami duai besampi.

Dalam umur iya ke 87 tahun, enti di rumah, leboh maia besampi sebedau tindok iya enggai enda besugang nitih ka chara orang "Anglican". Pia mega enti maia deka makai, leboh iya besampi, iya enggai enda bediri.  Batang pengarap iya balat bendar betumboh ketegal iya ngasaika pengidup iya udah diberkat ketegal iya ke orang ti dulu besekula ba Mission School (St. Augustine Betong, 1931-1937). Pia mega, iya gawaka mission nyadi pengajar dalam pengalama 30 tahun. Dalam pengingat iya empu, iya siku "last survivor" sida ke sama sekelas.

Sahari sebedau iya ka beputong chukup bendar nguji aku empu dalam pengarapka Tuhan. Aku ngirumka SMS ngagai bala menyadi dalam Kristus, minta sida sama besampi, ngambika apai ulih mujur beputong. Aku nemu sida iya betul-betul besampika iya, keba Tuhan deka ninga. Maioh jaku Tuhan ari Bup Kudus dikirum ulih sida ngagai aku ti negapka semengat enggau pengarap  aku empu. Maioh mega bala ari Gerija datai ngabas kami duai di sepital serta besampi.

Pagi kenaka 16/7/11, kami duai dani pukul 5 pagi, lepas mandi lalu besampi. Leboh ka besampi aku enda ulih nagang ai mata aku laboh  laban bangat sinu. Dalam ati aku, nyangka tu meh pengabis iya mandi, pengabis aku berandau enggau iya.  Nganti jam ka pukul 8.00 pagi, nganti bala nas ke narit iya ngagai Operation Theatre, iya macha  Masmor lagu Raja David ti diberi Rev. Wity pagi nya.

Iya diputong doktor dalam pukul 8.00 pagi, lalu udah tembu kira ka pukul 11.30 pagi. Leboh ke udah tembu, doktor ngiga aku, laban lantang ati deka madahka potong iya bejalai lanchar 100%. Iya ditan, natka diri disepital selama seminggu. Puji Tuhan, iya nadai komplain apa nama pasal potong iya. Ba minggu ke ketiga udah beputong iya ulih datai ka Gerija St. Francis Sungai Buloh besembiang enggau bala maioh.

Puji enggau muliaka Tuhan, laban Iya udah nyaut sampi enggau peminta kitai semua. Apai aku, Mr. Luke Antas Anak Julin udah mujur beputong lalu gerai sampaika diatu.

Denys Anak Antas
6/10/2011