1 SAMUEL
 
Jaku Pemuka
Bup 1 Samuel* madahka pasal utai ti nyadi entara rambau menua Israel dipegai bala pengulu enggau dipegai raja. Ubah ti nyadi ba pengidup orang Israel besangkut-paut enggau tiga iku orang: Samuel, ti nyadi pengulu ti penudi; Saul, ti nyadi raja ti keterubah; enggau David. Utai ti dikereja David sebedau iya nyadi raja berasuk enggau cherita pasal pengidup Samuel seduai Saul.

Tema bup tu, baka jerita bukai dalam Sempekat Lama, madahka penetap ati mensia ngagai Allah Taala tau ngasuh pengidup orang nya mujur. Tang pengidup ti enda ngasika Allah Taala mai pengerusak. Tu terang amat disebut dalam pesan ngagai imam Eli dalam 2.30: “Aku deka bebasaka orang ke ngemesaika Aku, lalu Aku enggai bebasaka orang ke enda ngemesaika Aku.”

Bup tu madahka pasal orang ke minta diri dipegai raja, enggau orang ke enggai dipegai raja. Iya ti bendar, TUHAN Empu ti nyadi Raja orang Israel. Tang laban orang Israel minta TUHAN meri sida raja, Iya lalu milih siku raja ke sida. Tang utai ti enda tau enda ditemu nya, raja ke megai sida, enggau orang Israel ke dipegai iya, endang di baruh Perintah Allah Taala magang (2.7-10). Dalam adat Allah Taala, hak semua mensia, nemuka sida nya kaya, tauka seranta, endang enda tau dibuai.
 
Ripih Isi Bup Tu
Samuel nyadi pengulu orang Israel (1.1-7.17)
Saul nyadi raja (8.1-10.27)
Utai ti nyadi lebuh Saul belabuh nyadi raja (11.1-15.35)
David enggau Saul (16.1-30.31)
Pemati Saul enggau anak lelaki iya (31.1-13)
 
Bagi 1
Elkanah Enggau Sida Sebilik Di Siloh
1 Nyadi di nengeri Ramah, di menua ti bebukit di menua Epraim, bisi siku lelaki benama Elkanah anak Jeroham, uchu Elihu, ari ruang bilik Tohu, ari raban peturun Sup.
2 Elkanah bisi dua iku bini; nama siku Hanah, lalu nama siku Peninah. Peninah bisi anak, tang Hanah nadai anak.
3 Elkanah bejalai tiap taun ari Ramah mansang nyembah lalu ngenjuk piring ngagai TUHAN ti Pemadu Bekuasa di Siloh, alai dua iku anak lelaki Eli, Hopni seduai Pinehas ke bekereja nyadi imam TUHAN.
4 Genap kali Elkanah ngenjuk piring, iya meri siti ungkup ari dagin nya ngagai bini iya, Peninah, enggau siti ungkup ngagai genap iku anak lelaki enggau anak indu Peninah.
5 Tang taja pen Elkanah rinduka bini iya Hanah, iya semina meri siti aja ungkup ngagai Hanah, laban TUHAN udah nagang Hanah bisi anak.
6 Peninah selalu ngeleseka Hanah ngambika iya ringat, laban TUHAN nagang Hanah beranak.
7 Utai tu nyadi ari taun siti ngagai taun siti. Genap kali Hanah mansang ngagai Rumah TUHAN, Peninah selalu ngeleseka iya, datai ke Hanah nyau nyabak, lalu enggai makai.
8 Laki iya selalu nanya iya, “Hanah, nama kebuah nuan nyabak, enda makai, lalu selalu tusah ati? Kati aku tu kurang agi beguna ba nuan ari sepuluh iku anak lelaki?”
 
Hanah Seduai Eli
9 Nyadi sekali, lebuh sida udah badu makai ngirup di Siloh, Hanah angkat. Nyadi imam Eli duduk ngimbai tiang pintu rumah TUHAN.
10 Ati Hanah balat amat tusah, lalu iya balat amat nyabak besampi ngagai TUHAN.
11 Hanah lalu besumpah, ku iya, “TUHAN ti Pemadu Bekuasa, enti Nuan deka merening ngagai pemerinsa aku ke nembiak Nuan, lalu ingatka aku, lalu meri aku siku anak lelaki, aku deka nyerahka iya ngagai TUHAN sepemanjai umur iya, lalu buk iya deka digalau enda diguntin.”
12 Hanah majak besampi ngagai TUHAN, lalu Eli beratika mulut iya.
13 Iya besampi dalam ati diri; semina mulut iya aja ti kimut-kimut, tang iya enda bemunyi. Nya alai Eli ngumbai iya mabuk,
14 lalu ku Eli bejaku enggau iya, “Ni pengelama nuan mandangka diri mabuk baka tu? Anang agi ngirup!”
15 Tang ku Hanah nyaut, “Aku ukai mabuk, tuan; ati aku balat tusah; aku nadai ngirup wain tauka ai ti bisa; aku semina mantaika penusah aku ngagai TUHAN.
16 Anang ngumbai aku jai. Aku besembiang baka tu laban ati aku balat irau sereta tusah.”
17 Eli lalu nyaut iya, “Mupuk meh nuan enggau selamat. Awakka Allah Taala ke disembah orang Israel meri ngagai nuan utai ti dipinta nuan.”
18 Lalu ku Hanah bejaku ngagai Eli, “Awakka nuan selalu manah runding pasal aku.” Hanah lalu mupuk, makai mimit, lalu mua iya enda agi tusah.
 
Samuel Ada Lalu Diserahka Ngagai TUHAN
19 Elkanah enggau sida sebilik dani tumu pagi hari siti, lalu nyembah TUHAN; udah nya sida mulaika diri ke Ramah. Elkanah beleman enggau bini iya Hanah, lalu TUHAN ingatka Hanah.
20 Hanah ngandung, lalu ngadaka anak lelaki siku, lalu iya meri iya nama Samuel. Ku Hanah, “Aku udah minta iya ari TUHAN.”
21 Maya pen datai alai Elkanah enggau sida sebilik deka mansang baru ngagai Siloh, lalu ngenjuk piring ti diberi sida ninting taun ngagai TUHAN, enggau siti piring ti pemadu manah ti udah disemaya iya.
22 Tang sekali tu Hanah enda enggau sida. Ku iya madahka ngagai laki iya, “Lebuh anak mit tu udah badu nusu ila, aku deka mai iya ngagai rumah TUHAN, lalu iya deka diau dia seumur idup.”
23 Disaut Elkanah, “Barang ku jaku. Kereja aja utai ti ku ati nuan, nganti nuan udah badu agi nusuka iya. Awakka TUHAN ngamatka semaya Iya.” Nya alai Hanah diau di rumah, nusuka anak iya, nyentuk ngagai maya iya badu nusu.
24 Lebuh Hanah udah badu agi nusuka anak mit nya, iya lalu mai anak mit nya ngagai Siloh, mai siku sapi ti lelaki ti umur tiga taun, sepuluh kilogram tepung, enggau sekambut wain. Iya mai Samuel ngagai Rumah TUHAN di Siloh, taja pen Samuel agi biak.
25 Lebuh sida udah nyayat jelu sapi nya, sida lalu mai anak mit nya ngagai Eli.
26 Ku Hanah bejaku enggau Eli, “Tuan, aku tu meh indu ke dipeda nuan bediri ditu besampi ngagai TUHAN.
27 Iya tu meh anak ke dipinta aku ari TUHAN, lalu TUHAN udah nyaut sampi aku.
28 Nya alai aku diatu nyerahka iya ngagai TUHAN. Seagi-agi iya idup, iya diserahka ngagai TUHAN.” Hanah lalu ninggalka Samuel dia ke TUHAN.
 
Bagi 2
Sampi Hanah
1 Hanah lalu besampi: “TUHAN meri aku pengaga,
2 enggau pengering; Aku ketawaka munsuh aku, laban aku gaga ati ke pengelepas aku. “Nadai orang ke kudus baka TUHAN, nadai orang ke sebaka enggau Nuan; nadai orang ke nyaga baka Allah Taala kami.
3 Badu agi nuan temegah bejaku. Anang agi nuan bejaku sumbung, laban TUHAN nya Allah Taala ti nemu semua utai, lalu Iya ngakim semua utai ti dikereja orang.
4 Panah bala soldadu ti kering udah patah, tang orang ke lemi nyadi kering.
5 Orang ke udah kenyang dulu suba diatu minta orang ngaji sida ngambika sida bisi utai dipakai, tang orang ke lapar, enda agi lapar. Indu ke mandul udah ngadaka tujuh iku anak, tang indai ke mayuh anak, nyau nadai agi anak.
6 TUHAN munuh, lalu TUHAN mega ngidup. TUHAN mai orang ngagai dunya pemati lalu Iya mega ngangkatka sida.
7 Iya ngasuh sekeda orang seranta, lalu sida ti bukai kaya. Iya ngemaruhka sekeda, lalu ngeninggika sekeda.
8 Iya ngangkatka orang ke seranta ari amau lalu ngangkatka orang ke seranta ari pemerinsa sida, lalu ngasuh sida duduk begulai enggau bala raja,lalu ngasuh sida dibasa orang. Pugu dunya tu endang enggi TUHAN, lalu Iya udah nudukka dunya ba atas pugu nya.
9 “Iya nyaga bala nembiak Iya ke tetap ati ngagai Iya, tang orang ke jai deka dibuai ngagai dunya pemati; laban orang enda ulih menang ngena pengering diri empu.
10 TUHAN deka ngerusak munsuh Iya. Iya deka meletup munyi guntur ngelaban sida ari serega. TUHAN deka ngakim semua dunya. Iya deka meri pengering ngagai raja ke dipilih Iya. Iya deka meri kuasa ngagai raja ke dipilih Iya.”
11 Udah nya Elkanah pulai ngagai rumah iya di Ramah, tang anak mit nya, Samuel, diau di Siloh, lalu bekereja ke TUHAN di baruh imam Eli.
 
Bala Anak Lelaki Eli
12 Nyadi anak lelaki Eli ke dua iku nya orang ke jai. Seduai iya enda bebasaka TUHAN,
13 Adat asal entara sida imam enggau orang mayuh nya baka tu: lebuh orang ngenjuk piring, ulun imam datai, lebuh dagin nya benung melidih dipanduk,
14 iya ngerejangka serampang ti bemata tiga ngagai dagin ti benung dipanduk nya, lalu sebarang utai ti ulih direjang serampang nya diempu imam. Nya alai nya adat asal ti dipejalaika sida di Siloh ngagai semua orang Israel.
15 Nambahka nya, sebedau lemak ditunu, ulun imam datai, lalu bejaku ngagai orang ke ngenjuk piring, “Beri dagin ngambika bisi dipanggang imam; laban iya enggai nerima dagin ti udah dipanduk, tang dagin ti agi mata.”
16 Lalu enti orang ke ngenjuk piring nya nyaut, “Awakka sida nunu lemak dulu. Udah nya baru nuan tau ngambi sepemayuh ti dikedekaka nuan,” ulun imam nya deka bejaku, “Anang baka nya; nuan enda tau enda meri dagin nya diatu; enti nuan enggai, utai nya aku rampas ari nuan lagi!”
17 Nya alai, di mua TUHAN, dosa ti dikereja anak lelaki Eli ke dua iku nya besai amat, laban seduai iya enda bebasaka piring TUHAN.
 
Samuel Di Siloh
18 Lebuh maya nya, Samuel, ti agi benung nembiak, majak bekereja ke TUHAN. Iya ngena epod ti digaga ari kain linin.
19 Lalu indai iya tiap taun ngaga selambar baju panjai ti mit ke Samuel, lalu mai baju nya ngagai Samuel, lebuh iya nyempulang laki iya ngenjuk piring ti diberi genap taun.
20 Eli lalu merekatka Elkanah enggau bini iya, ku iya, “Awakka TUHAN meri ngagai nuan anak ti bukai ulih bini nuan, kena nganti siku tu ti udah diserahka bini nuan ngagai TUHAN.” Udah nya, seduai iya pulai ke rumah.
21 TUHAN merekatka Hanah, lalu iya ngadaka tiga iku agi anak lelaki, enggau dua iku anak indu. Samuel mansang besai, sereta majak bekereja ke TUHAN.
 
Eli Enggau Anak Lelaki Iya
22 Nyadi Eli diatu nyau tuai. Iya selalu ninga pasal semua utai ti dikereja anak lelaki iya ngagai orang Israel, pasal seduai iya ke tinduk enggau sida indu ke bekereja ba penama ngagai Langkau Kain TUHAN.
23 Lalu ku iya bejaku enggau seduai iya, “Nama kebuah seduai ngereja utai tu? Laban aku ninga semua orang bela nusui penyai ti dikereja seduai.
24 Seduai enda tau baka nya, anak. Berita pasal seduai ngelekai ngagai semua nembiak TUHAN, lalu berita nya enda manah.
25 Enti orang bedosa ngelaban pangan diri, Allah Taala ulih bejaku ngarika iya. Tang enti orang bedosa ngelaban TUHAN, sapa ulih bejaku ngarika orang nya?” Tang seduai iya enggai mendingka apai seduai, laban TUHAN endang deka munuh seduai iya.
26 Samuel mansang besai, sereta dikerinduka TUHAN enggau mensia.
 
Jaku TI Benabi Ninggang Ruang Bilik Eli
27 Siku nabi lalu datai ngagai Eli mai pesan tu ari TUHAN: “Lebuh aki ini nuan Aron enggau sida sebilik agi nyadi ulun raja menua Ejip, Aku udah mandangka Diri ngagai Aron.
28  lalu Aku milih ruang bilik iya ari semua raban bansa orang Israel nyadika imam Aku, bekereja ba alta, nunu menyan, lalu ngena epod betanyaka utai ngagai Aku. Lalu Aku udah meri ngagai ruang bilik iya hak nyimpan sebagi ari piring tunu ba alta nya.
29 Nya alai, nama kebuah kita amuka piring enggau pemeri ti dipinta Aku ari bala nembiak Aku? Nama kebuah nuan, Eli, lebih agi bebasaka anak lelaki nuan ari nuan ke bebasaka Aku, lalu nejuka seduai iya gemu bepakaika ungkup ti pemadu manah ari semua piring ti diberi bala nembiak Aku ngagai Aku?
30 Aku, TUHAN Allah Taala ke disembah orang Israel, udah besemaya dulu kelia, madahka ruang nuan enggau raban peturun nuan deka bekereja ke Aku nyadi imam belama iya. Tang diatu Aku madahka ngagai nuan, Aku enda begunaka semaya nya agi; laban Aku bebasaka orang ke bebasaka Aku, lalu Aku nyumpah orang ke enda bebasaka Aku.
31 Dinga nuan, maya deka datai alai Aku deka munuh semua orang bujang dalam ruang bilik nuan, enggau dalam raban peturun nuan, ngambika nadai siku lelaki ari ruang bilik nuan deka panjai umur.
32 Kita deka tusah ati lalu deka ngining semua berekat ti deka diberi Aku ngagai orang Israel ti bukai, tang nadai siku kita sebilik deka panjai umur.
33 Tang taja pia, Aku deka ngasuh siku ari peturun nuan idup, lalu iya deka bekereja ke Aku nyadi imam. Tang iya deka buta, sereta nadai pengandal, lalu semua peturun nuan deka mati dibunuh ngena pedang.
34  Anak lelaki nuan ke dua iku, Hopni seduai Pinehas, deka mati sama hari, kena nunjuk ke nuan, semua utai ti udah disebut Aku deka dikamatka magang.
35 Aku deka milih siku imam ti deka tetap ati ngagai Aku, ti deka ngereja semua utai ti diasuh Aku. Aku deka meri iya peturun, ke seruran deka bekereja di mua raja ke dipilih Aku.
36 Semua bala peturun nuan ti agi idup, deka mansang ngagai imam nya lalu minta duit enggau pemakai, sereta minta pemendar nyaup bala imam, kena sida ngulihka pemakai.”
 
Bagi 3
TUHAN Pegari Ngagai Samuel
1 Lebuh maya nya menya, lebuh Samuel agi biak, lalu bekereja ke TUHAN di baruh Eli, nadai mayuh pesan datai ari TUHAN, lalu genera pen jarang mega dipeda.
2 Nyadi sekali, lebuh Eli, ke nyau deka buta, tinduk dalam bilik iya,
3 lampu Allah Taala apin dipadamka, Samuel tinduk ba Endur ti Kudus, alai Peti Lampang Batu Adat Allah Taala disimpan.
4 TUHAN ngangauka Samuel. Samuel lalu nyaut, “Au, tuan!”
5 Iya lalu belanda ngagai Eli, ku iya, “Nuan bisi ngangauka aku: tu aku.” Tang ku Eli nyaut, “Nadai aku ngangauka nuan. Tinduk meh nuan.” Samuel lalu pulai lalu gali baru.
6 TUHAN lalu ngangauka Samuel baru. Samuel angkat lalu mansang ngagai Eli, lalu bejaku, “Nuan bisi ngangauka aku. Tu aku.” Tang ku Eli bejaku, “Nadai aku ngangauka nuan, anak. Tinduk meh nuan.”
7 Nyadi Samuel apin nemu TUHAN, lalu jaku TUHAN pen apin mega dipandangka ngagai iya.
8 TUHAN lalu ngangauka Samuel ketiga kali. Samuel angkat, mansang ngagai Eli, lalu bejaku, “Nuan bisi ngangauka aku; tu aku.” Nya baru Eli nemu, TUHAN Empu ke ngangauka nembiak nya.
9 Nya alai iya lalu bejaku enggau Samuel, “Pulai nuan ngagai peninduk nuan. Enti Iya ngangauka nuan baru, sebut, ‘Bejaku meh TUHAN. Nembiak Nuan mending.’ “ Samuel lalu pulai baru ngagai peninduk iya.
10 TUHAN datai lalu bediri dia, lalu Iya ngangau baka ke dulu, “Samuel! Samuel!” Samuel lalu nyaut, “Bejaku meh, TUHAN. Nembiak Nuan mending.”
11 TUHAN lalu bejaku ngagai Samuel, “Dinga nuan, Aku baru deka ngereja utai ngagai orang Israel, datai ke semua orang ke ninga pasal utai nya deka temati-kutu.
12 Ba hari nya ila Aku deka ngukum ruang bilik Eli, munyi ti udah disemaya Aku.
13 Aku madahka ngagai iya, Aku deka ngukum ruang bilik iya belama iya, ketegal penyai ti ditemu iya, laban anak lelaki iya bejaku busung ngelaban Allah Taala, lalu iya enda nagang seduai iya.
14 Nya alai Aku besumpah ngelaban ruang bilik Eli, madahka penyai ti dikereja ruang bilik iya enda ulih dibuai ngena genselan tauka piring datai ke belama iya.”
15 Samuel mengkang gali nyentuk ngagai pagi. Udah nya iya muka pintu rumah TUHAN. Iya takut madahka genera nya ngagai Eli.
16 Tang Eli ngangauka iya, “Samuel, anak!” “Tu aku,” ku Samuel nyaut.
17 Eli lalu bejaku, “Nama utai ti dipadahka TUHAN ngagai nuan? Anang ngelalaika utai nya ari aku. Awakka Allah Taala ngukum nuan, enti nuan ngelalaika utai ti dipadahka Iya ngagai nuan.”
18 Samuel lalu madahka semua utai ngagai iya. Iya enda ngelalaika utai ari Eli. Ku Eli, “Iya endang TUHAN. Awakka Iya ngereja utai ti manah ba ati Iya.”
19 Samuel mansang besai tuai, lalu TUHAN meruan enggau iya, lalu ngamatka semua utai ti disebut Samuel.
20 Lalu semua orang Israel kenyau ari Dan nyentuk ngagai Berseba bela nemu Samuel endang amat nabi TUHAN.
21 Lalu TUHAN mandangka Diri baru di Siloh, alai Iya ke pegari di mua Samuel ngena jaku TUHAN.
 
Bagi 4
Peti Lampang Batu Adat Dirampas Munsuh
1 Semua orang Israel bela mendingka jaku Samuel. Lebuh maya nya, orang Israel deka mansang nyerang orang Pilistin; sida nirika kem sida di Ebeneser, lalu orang Pilistin nirika kem sida di Apek.
2 Orang Pilistin lalu nyerang orang Israel. Lebuh sida udah bebendar amat belaban, orang Israel lalu alah laban orang Pilistin; kira empat ribu iku orang Israel mati laban orang Pilistin ba endur alai sida ke betempuh nya.
3 Lebuh orang Israel pulai ngagai kem sida, bala tuai orang Israel lalu nanya, “Nama kebuah TUHAN nejuka kitai alah laban orang Pilistin sehari tu? Aram kitai ngambi Peti Lampang Batu Adat TUHAN ari Siloh, ngambika TUHAN bejalai enggau kitai, lalu ngelepaska kitai ari kuasa munsuh kitai.”
4 Sida lalu ngasuh bala seruan ngambi Peti Lampang Batu Adat TUHAN ari Siloh, laban kerusi diraja TUHAN ti Pemadu Bekuasa bisi ba atas Peti Lampang Batu Adat nya. Anak lelaki Eli ke dua iku, Hopni seduai Pinehas, datai sama enggau Peti Lampang Batu Adat nya.
5 Lebuh Peti Lampang Batu Adat nya datai ba kem, orang Israel lalu manjung datai ke tanah nyau berenyang empa penginggar panjung sida.
6 Lebuh orang Pilistin ninga orang Israel manjung, sida lalu nanya, “Nama utai ti dipanjungka orang Hebrew?” Lebuh sida ninga Peti Lampang Batu Adat TUHAN udah datai ba kem orang Hebrew,
7 sida lalu takut. Ku sida, “Siku petara udah datai ba kem sida! Nadai meh penyadi kitai tu! Nadai utai baka tu udah kala nyadi menya!
8 Tulah meh kitai tu! Sapa ulih ngelepaska kitai ari bala petara ti bekuasa nya? Sida nya meh petara ti munuh orang Ejip ngena semua macham penyakit di menua puang!
9 Anang takut, kita orang Pilistin! Awakka kita beperang baka anak lelaki, enggai ke kitai nyadi ulun orang Hebrew, baka sida ke udah nyadi ulun kita. Beperang baka anak lelaki!”
10 Nya alai orang Pilistin nyerang, lalu orang Israel alah laban sida. Orang Israel lalu rari ngagai rumah diri empu. Mayuh amat orang Israel mati. Tiga puluh ribu iku sida mati.
11 Peti Lampang Batu Adat Allah Taala lalu ditabanka munsuh. Anak Eli, Hopni seduai Pinehas, mega mati.
 
Pemati Eli
12 Siku orang Benjamin belanda ari endur ti betempuh lalu datai di Siloh sehari nya. Gari iya nyau abis charik lalu pala iya abis dibalut tanah.
13 Lebuh iya datai, Eli benung duduk ba kerusi iya ngimbai jalai raya, ngemata, laban iya irau ati ke Peti Lampang Batu Adat Allah Taala. Lebuh orang nya datai di nengeri nya, lalu nusui berita nya, semua orang di nengeri nya lalu nyabak magang.
14 Lebuh Eli ninga munyi orang balat amat nyabak, iya lalu nanya, “Nama kebuah orang inggar?” Orang nya lalu beguai-guai mansang ngagai Eli, lalu madahka ngagai iya. (
15 Umur Eli nyau semilan puluh lapan taun, lalu mata iya nyau rabun lalu enda lansik agi.)
16 Ku orang nya madahka ngagai Eli, “Aku udah ngerarika diri ari endur alai kami ke betempuh enggau munsuh, lalu udah belanda kitu sehari tu.” Eli lalu nanya iya, “Kati ku baka perang nya, anak?”
17 Seruan nya lalu nyaut, “Orang Israel udah rari ari orang Pilistin. Mayuh amat bala kami mati! Anak lelaki nuan, Hopni seduai Pinehas, mega mati, lalu Peti Lampang Batu Adat Allah Taala udah ditabanka munsuh!”
18 Lebuh orang nya madahka pasal Peti Lampang Batu Adat nya, Eli lalu rebah telentang ari kerusi iya ngimbai pintu penama nya. Pegu iya patah lalu iya mati, laban iya nyau tuai sereta kelalu gemu. Iya udah nyadi pengulu orang Israel empat puluh taun.
 
Pemati Balu Pinehas
19 Nyadi menantu indu Eli, iya nya bini Pinehas, benung betubuh-bisi, lalu nyau deka beranak. Lebuh iya ninga Peti Lampang Batu Adat Allah Taala udah ditabanka munsuh, lalu mentua iya ti lelaki enggau laki iya pen udah mega mati, iya pedis perut, lalu beranak.
20 Lebuh iya baru deka ngapuska seput, bala bidan ke nyaup iya lalu bejaku enggau iya, “Anang tusah ati! Nuan bisi siku anak lelaki!” Tang iya enggai mendingka utai ti disebut sida, lalu iya enda nyaut.
21 Iya meri anak mit nya nama Ikabot. Ku iya nerangka nama nya, “Mulia Allah Taala udah ninggalka orang Israel.” Iya bejakuka pasal Peti Lampang Batu Adat ti udah ditabanka munsuh, enggau pasal pemati mentua iya ti lelaki, enggau pemati laki iya.
22 Ku iya bejaku, “Mulia Allah Taala udah ninggalka orang Israel, laban Peti Lampang Batu Adat Allah Taala udah ditabanka munsuh.”
 
Bagi 5
Peti Lampang Batu Adat Ba Jari Orang Pilistin
1 Lebuh orang Pilistin udah nabanka Peti Lampang Batu Adat nya, sida lalu mai peti nya ari Ebeneser ngagai Asdot.
2 Sida lalu mai Peti Lampang Batu Adat nya ngagai rumah sembiang petara sida ke benama Dagon, lalu ngengkahka Peti nya ngimbai engkeramba Dagon.
3 Tumu pagi hari siti, orang di Asdot meda engkeramba Dagon rebah tingkap ba tanah di mua Peti Lampang Batu Adat TUHAN. Sida lalu ngangkatka engkeramba nya, lalu nirika iya baru.
4 Tang lebuh sida dani tumu pagi hari siti, sida meda engkeramba nya udah rebah baru di mua Peti Lampang Batu Adat nya. Sekali tu pala enggau lengan dua piak engkeramba nya udah putus, lalu garing-garing ba pintu penama. Ka semina bukang tubuh engkeramba nya aja agi tinggal. (
5 Nya kebuah nyentuk ngagai sehari tu, bala imam Dagon enggau semua orang ke nyembah iya, enda tau ngindik semetung mua pintu rumah sembiang Dagon.)
6 TUHAN balat amat ngukum orang Asdot, sereta ngenakutka sida. Iya ngukum sida, enggau orang ke diau di menua ti ngelingi nengeri nya, ngena penyakit bengkak.
7 Lebuh sida meda utai nya balat amat nyadi, sida lalu bejaku, “Kitai enda tau nyimpan Peti Lampang Batu Adat tu agi; laban Allah Taala ke disembah orang Israel balat amat ngukum kitai.”
8 Nya alai sida mesanka semua raja orang Pilistin, lalu nanya ngagai sida, “Kati ku kitai enggau Peti Lampang Batu Adat Allah Taala ke disembah orang Israel tu?” Sida raja nya lalu nyaut, “Bai Peti nya ngagai Gat.” Nya alai sida lalu mai Peti nya ngagai nengeri Gat.
9 Tang lebuh Peti Lampang Batu Adat nya datai dia, TUHAN mega ngukum orang di nengeri nya, ti ngujungka orang dia balat amat begau abis ati. TUHAN ngukum sida ngena penyakit bengkak ti tumbuh ba semua orang ke biak enggau ke tuai di nengeri nya.
10 Nya alai sida lalu nganjung Peti Lampang Batu Adat nya ngagai Ekron. Tang lebuh Peti nya datai di Ekron, orang dia lalu bejaku, “Sida udah mai Peti Lampang Batu Adat Allah Taala ke disembah orang Israel kitu, ngambika Peti nya munuh kitai semua!”
11 Sida lalu mesanka semua raja orang Pilistin baru, ku sida, “Anjung Peti Lampang Batu Adat orang Israel nya pulai ngagai endur iya empu, ngambika iya enda munuh kitai enggau ruang bilik kitai.” Laban semua orang di nengeri nya begau abis ati laban Allah Taala balat amat ngukum sida.
12 Indah orang ke enda mati deh diempa bengkak, datai ke sida nyau nyabak minta tulung petara sida.
 
Bagi 6
Peti Lampang Batu Adat Dipulaika Baru
1 Peti Lampang Batu Adat TUHAN disimpan orang Pilistin tujuh bulan.
2 Orang Pilistin lalu mesanka bala imam enggau bala orang ke tau keramat, lalu nanya ngagai sida, “Kati ku kitai enggau Peti Lampang Batu Adat TUHAN tu? Padahka ngagai kami, nama utai ti deka diberi kitai lebuh kitai nganjung Peti nya pulai?”
3 Disaut sida, “Enti kita nganjung Peti Lampang Batu Adat Allah Taala ke disembah orang Israel nya pulai, kita enda tau nejuka Peti nya pulai puang, tang ngenjuk piring kena muai penyalah. Nya baru kita digeraika, lalu nemu kebuah Allah Taala ke disembah orang Israel udah ngukum kita.”
4 “Nama piring ti deka diberi kitai ngagai Allah Taala nya?” ku orang mayuh nanya. “Lima iti anak patung bengkak ti digaga ari emas, enggau lima iku anak patung tikus ti digaga ari emas, siti ke siku raja orang Pilistin. Penyakit nya udah nyerang semua kita, nyengkaum raja empu.
5 Kita enda tau enda ngaga anak patung ke bengkak enggau tikus ti ngerusak menua kita, lalu ngemuliaka Allah Taala ke disembah orang Israel, nyangka Iya deka badu agi ngukum kita, ngukum petara enggau menua kita.
6 Nama kebuah kita ngekiehka diri baka orang Ejip enggau raja sida? Anang enda ingatka chara Allah Taala udah ngemelika sida, datai ke sida nyau nejuka orang Israel angkat ari menua Ejip.
7 Nya alai sediaka kerita ti baru, enggau dua iku sapi ti indu, ti nadai kala dikungkung. Tanchangka kerita nya ngagai jelu dua iku nya, tang buru anak sapi nya pulai ngagai bansal.
8 Ambi Peti Lampang Batu Adat TUHAN, lalu engkahka Peti nya dalam kerita nya. Simpan dalam siti peti anak patung ti dikirumka nyadika piring kena muai penyalah, lalu engkahka peti nya ngimbai Peti Lampang Batu Adat nya. Buru sapi dua iku nya ngambika seduai iya mupuk lalu narit kerita nya.
9 Kemataka kerita nya mupuk. Enti kerita nya mansang tunga ngagai nengeri Bet-semes, nya nunjukka Allah Taala ke disembah orang Israel Empu udah ninggang kitai enggau penusah ti besai tu. Tang enti kerita nya enda mansang tunga ngagai nengeri Bet-semes, nya baru kita nemu TUHAN nadai ngukum kitai ngena penyakit tu. Utai tu endang nyadi pia aja.”
10 Sida lalu ngereja nya, ngambi dua iku sapi ti indu, lalu nanchangka kerita ngagai sapi dua iku nya, lalu ngandang anak sapi nya dalam bansal.
11 Sida ngengkahka Peti Lampang Batu Adat nya dalam kerita nya, sama enggau siti peti ti ngundan anak patung tikus enggau anak patung bengkak ti digaga ari emas.
12 Sapi nya lalu mupuk nengah jalai raya nuju ngagai Bet-semes. Sapi dua iku nya enda ngetu bemunyi lebuh seduai iya bejalai. Bala raja orang Pilistin nitihka sapi dua iku nya nyentuk ngagai garis entara menua enggau Bet-semes.
13 Nyadi orang ke diau di Bet-semes benung ngetau gandum ba lebak. Lebuh sida malik, lalu tepedaka Peti Lampang Batu Adat TUHAN, sida lalu rami gaga meda Peti Lampang Batu Adat nya.
14 Kerita nya lalu datai ba umai Josua, ti diau di Bet-semes, lalu ngetu dia. Nyadi ba endur nya bisi sigi batu ti besai; lalu sida melah kayu ari kerita nya kena menyadika api, lalu sida ngenjuk sapi dua iku nya nyadika piring ngagai TUHAN.
15 Orang Lewi lalu nurunka Peti Lampang Batu Adat TUHAN, enggau peti ti ngundan anak patung ti digaga ari emas, lalu ngengkahka Peti Lampang Batu Adat enggau peti ti ngundan anak patung nya ba batu ti besai nya. Udah nya orang ke diau di Bet-semes lalu ngenjuk piring tunu enggau piring bukai ngagai TUHAN.
16 Lebuh raja orang Pilistin ke lima iku nya udah meda nya, sida lalu mulaika diri sehari nya ngagai Ekron.
17 Nya meh lima igi engkeramba bengkak ti digaga ari emas, ti diberi orang Pilistin ngagai TUHAN nyadika piring kena muai penyalah sida, sigi ke genap nengeri Asdot, Gasa, Askelon, Gat enggau Ekron.
18 Sida mega meri engkeramba tikus ti digaga ari emas, siku ke genap buah nengeri ti dipegai raja Pilistin ke lima iku nya, nyengkaum nengeri ti mit ti bekuta enggau genturung pendiau ti enda bekuta. Batu ti besai nya, ti ba umai Josua, ti alai sida ngengkahka Peti Lampang Batu Adat TUHAN, agi mengkang dia nyadika saksi utai ti udah nyadi.
19 TUHAN munuh tujuh puluh iku lelaki ari Bet-semes, laban sida bisi nilik ke dalam Peti Lampang Batu Adat nya. Orang mayuh lalu ngulit, laban TUHAN udah munuh mayuh amat bala sida.
 
Peti Lampang Batu Adat Di Kiriat-jearim
20 Ku orang di Bet-semes bejaku, “Sapa ulih bediri di mua TUHAN Allah Taala ti kudus? Kini ke tunga Peti nya deka mupuk?”
21 Nya alai sida lalu ngasuh bala seruan bejalai ngagai orang ke diau di Kiriat-jearim, “Orang Pilistin udah mulaika Peti Lampang Batu Adat TUHAN. Datai kitu lalu ambi Peti nya.”  
 
Bagi 7
1 Orang ke di Kiriat-jearim datai lalu ngambi Peti Lampang Batu Adat TUHAN, lalu mai Peti nya ngagai rumah orang siku ke benama Abinadap, ti diau ba sigi munggu. Sida lalu ngasuh anak iya ke benama Eleasar ngibun Peti nya.
 
Samuel Merintah Menua Israel
2 Peti Lampang Batu Adat TUHAN nya lama disimpan di Kiriat-jearim, kira dua puluh taun. Sekumbang maya nya semua orang Israel nyabak ngangauka TUHAN.
3 Samuel lalu bejaku ngagai semua orang Israel, “Enti kita pulai baru ngagai TUHAN enggau pengabis ati kita, kita enda tau enda muai semua petara orang bansa bukai, enggau engkeramba petara indu Astarte. Serahka diri enggau pengabis ati kita ngagai TUHAN, lalu sembah Iya siku aja; nya baru Iya deka ngelepaska kita ari jari orang Pilistin.”
4 Orang Israel lalu muai semua engkeramba Baal enggau Astarte, lalu nyembah semina TUHAN  siku aja.
5 Udah nya Samuel bejaku, “Asuh semua orang Israel begempuru di Mispah; aku deka besampi ngarika kita ngagai TUHAN.”
6 Semua orang Israel lalu begempuru di Mispah. Sida nyauk ai, lalu nuang ai nya ngagai piring ti diserahka ngagai TUHAN, lalu bepasa sehari nya. Ku sida, “Kami udah bedosa ngelaban TUHAN.” (Mispah nya meh endur alai Samuel ti nyadi tuai orang Israel.)
7 Lebuh orang Pilistin ninga orang Israel udah begempuru di Mispah, raja orang Pilistin ke lima iku nya lalu mansang nyerang orang Israel. Lebuh orang Israel ninga nya, sida lalu takut.
8 Orang Israel lalu bejaku enggau Samuel, “Anang ngetu besampi ngagai TUHAN Allah Taala kitai, ngarika semua kitai, ngambika Iya ngelepaska kitai ari jari orang Pilistin.”
9 Samuel lalu nyayat siku anak domba ti agi nusu, lalu nyerahka jelu nya nyadika piring tunu ngagai TUHAN. Udah nya iya lalu besampi ngagai TUHAN ti orang Israel; TUHAN lalu nyaut sampi iya.
10 Lebuh Samuel benung ngenjuk piring tunu ngagai TUHAN, orang Pilistin lalu nyerang. Tang TUHAN meletup munyi guntur ari langit ngelaban sida. Orang Pilistin lalu begau abis ati, lalu rari ari orang Israel.
11 Bala orang Israel lalu mupuk ari Mispah, begagaika orang Pilistin, lalu munuh sida nyentuk ngagai semak ngagai Bet-kar.
12 Udah nya Samuel ngambi sigi batu, ngengkahka batu nya entara Mispah enggau Sen, lalu ku iya bejaku, “TUHAN udah nyaup kitai sepemanjai jalai tu.” Iya lalu ngumbai batu nya “Batu Penyaup.”
13 Orang Pilistin alah, lalu sida nadai agi tama ngagai menua orang Israel. Jari TUHAN mengkang ngelaban orang Pilistin sepemanjai umur Samuel.
14 Semua nengeri ti udah dirampas orang Pilistin ari orang Israel, dipulaika magang ngagai orang Israel, berengkah ari Ekron nyentuk ngagai Gat. Nya alai orang Israel ngerampas menua sida empu ari jari orang Pilistin. Orang Israel enggau orang  Amor lalu diau bebaik enggau pangan diri.
15 Samuel nyadi tuai menua Israel seumur idup.
16 Iya nemuai genap taun ngagai nengeri Betel, Gilgal enggau Mispah, lalu ngatur pechara orang ba genap buah nengeri nya.
17 Udah nya iya pulai baru ngagai rumah iya di Ramah, alai iya ke mega nyadi hakim. Iya ngaga siti alta di Ramah ke TUHAN.
 
Bagi 8
Orang Israel Minta Siku Raja
1 Lebuh Samuel nyau tuai, iya ngeletak anak lelaki iya nyadi hakim di menua Israel.
2 Nama anak tuai iya Joel, lalu iya ke biak agi Abijah. Seduai iya nyadi hakim di Beer-seba.
3 Tang taja pia, seduai iya enda nitihka teladan apai seduai, tang limpang begigaka pengaya; seduai iya makai suap, lalu meri atur ti enda lurus lebuh seduai iya ngatur pechara.
4 Bala tuai orang Israel begempuru, lalu mansang ngagai Ramah deka betemu enggau Samuel.
5 Ku sida bejaku enggau iya, “Dinga nuan, nuan nyau tuai, lalu anak nuan enda nitihka teladan nuan. Nya alai letak siku orang nyadika raja kami, ngambika kami bisi raja baka bansa bukai.”
6 Samuel enda lantang ati ninga peminta sida, nya alai iya besampi ngagai TUHAN.
7 TUHAN lalu bejaku enggau Samuel, “Pendingka semua utai ti disebut sida ngagai nuan; laban sida ukai nulak nuan, tang nulak Aku ke endang Raja sida.
8 Kenyau ari Aku udah mai sida pansut ari menua Ejip, sida udah ninggalka Aku, lalu nyembah petara bukai, lalu diatu sida ngereja ngagai nuan utai ti seruran deka dikereja sida ngagai Aku.
9 Nya alai, pendingka sida, tang nuan enda tau enda meri sida jaku tangkan ngena sumpah, lalu padahka jalai raja sida deka megai sida.”
10 Samuel lalu madahka jaku TUHAN ngagai orang ke minta iya meri sida siku raja.
11 Ku iya bejaku, “Baka tu ku gaya raja ti deka megai kita: iya deka ngambi anak lelaki kita lalu ngasuh sida ngemudika kerita perang iya, nyadi soldadu ti nepan kuda, lalu sida ti bukai deka belanda ari mua kerita perang iya.
12 Iya deka ngasuh sekeda sida nyadi kepala ke beribu iku soldadu, nyadi kepala ke lima puluh iku, lalu sekeda deka diasuh iya ngeradu tanah ba umai iya, ngetau utai ti ditanam ba umai iya, enggau begagaka senyata perang enggau pekekas ke kerita perang iya.
13 Iya deka ngambi anak indu kita ngambika sida bisi ngaga minyak wangi ke iya, berapi ke iya, ngaga roti ke iya.
14 Iya deka ngambi tanah kita ke pemadu manah, kebun anggur kita, kebun buah kana kita, lalu meri utai nya ngagai bala pemesai iya.
15 Iya deka ngambi sepuluh peratus ari gandum kita, ari buah anggur kita, lalu meri utai nya ngagai bala pemesai iya, enggau ngagai bala orang gaji iya.
16 Iya deka ngambi orang gaji kita, jelu sapi ti pemadu manah  enggau keledai kita, lalu ngasuh sida gawa ke iya.
17 Iya deka ngambi sepuluh peratus ari jelu tupi kita, lalu kita empu deka nyadi ulun iya.
18 Lebuh maya nya ila, kita deka balat mutap ketegal raja ti udah dipilih kita empu, tang TUHAN enggai mendingka putap kita.”
19 Tang orang mayuh enggai mendingka Samuel. Ku sida, “Kami minta siku raja,
20 ngambika kami sebaka enggau bansa bukai, bisi raja ke diri empu merintah kami, lalu nguluka kami beperang, lalu belaban ngarika kami.”
21 Lebuh Samuel udah mendingka jaku orang mayuh, iya lalu madahka semua jaku sida ngagai TUHAN.
22 Lalu ku TUHAN bejaku ngagai Samuel, “Pendingka jaku sida, lalu beri sida siku raja.” Udah nya Samuel lalu ngasuh semua orang pulai.
 
Bagi 9
Saul Betemu Enggau Samuel
1 Nyadi di menua nya bisi siku lelaki ke kaya, ke dibasa orang mayuh. Nama iya Kis anak Abiel, uchu Seror, uchu Bekorat, uchu Apiah, ari raban bansa Benjamin;
2 lalu iya bisi siku anak lelaki benama Saul, ke sigat gamal, sereta agi benung orang. Nadai orang di menua Israel ke sigat agi ari iya; iya sekaki tinggi agi ari semua orang bukai di menua Israel.
3 Nyadi sekali sekeda jelu keledai Kis bisi lelang. Nya alai iya bejaku enggau Saul, “Bai siku orang gaji enggau nuan, lalu giga keledai nya.”
4 Saul enggau orang gaji nya lalu bejalai nengah semua menua ti bebukit di menua Epraim, enggau menua Salisah, tang nadai tetemuka jelu nya. Nya alai seduai iya lalu bejalai nengah menua Saalim, tang keledai nya nadai dia. Udah nya seduai iya bejalai nengah menua Benjamin, tang seduai iya mengkang nadai tetemuka keledai nya.
5 Lebuh seduai iya datai di menua Sup, Saul bejaku enggau orang gaji iya, “Aram tua pulai, enggai ke apai balat agi irauka tua, ari ke irauka keledai nya.”
6 Ku orang gaji nya nyaut, “Dinga nuan, di nengeri tu bisi siku nabi, ke balat dibasa orang, laban semua utai ti disebut iya dikamatka magang. Manah tua betemu enggau iya, nyangka iya ulih madahka endur alai tua tau nemu keledai nya.”
7 Saul lalu nanya iya, “Enti tua deka betemu enggau iya, nama utai ti tau diberi tua ngagai iya? Laban bekal tua nyau udah abis, lalu tua pen nadai mega utai ti tau diberi tua ngagai iya. Nama utai ti dikemisi tua?”
8 Ku orang gaji nya nyaut, “Aku bisi sesingkap duit pirak. Aku tau meri duit nya ngagai iya, ngambika iya madahka endur alai tua tau nemu keledai nya.”
9-11 Ku Saul nyaut, “Manah penemu nuan nya! Aram tua mupuk.” Seduai iya lalu mansang ngagai nengeri nya ti alai nabi nya diau. Lebuh seduai iya benung niki bukit mansang ngagai nengeri nya, seduai iya betemu enggau bala indu ke mansang nyauk. Seduai iya lalu nanya sida indu nya, “Kati tukang tujum bisi di nengeri tu?” (Lebuh maya nya kelia, nabi dikumbai tukang tujum. Nya alai lebuh orang deka nanyaka utai ngagai Allah Taala, sida selalu nyebut, “Aram betemu enggau tukang tujum.”)
12 “Bisi,” ku sida indu nya nyaut. “Nyin iya bejalai dulu ari seduai. Laju agi seduai; iya baru datai, laban orang ditu deka miring ba endur alai besembiang sehari tu lagi.
13 Lebuh seduai tama ngagai nengeri lagi, seduai ulih nemu iya, sebedau iya mansang makai ngagai endur alai besembiang; laban orang mayuh enggai makai sebedau iya datai, laban iya enda tau enda merekatka piring. Udah nya baru bala pengabang makai. Mupuk meh seduai, ngambika seduai ulih betemu enggau iya.”
14 Saul enggau orang gaji iya lalu niki ngagai nengeri nya. Lebuh seduai iya tama ngagai nengeri nya, seduai iya lalu tepedaka Samuel pansut nuju seduai iya, deka mansang ngagai endur alai besembiang.
15 Nyadi sehari sebedau nya, TUHAN endang udah madahka ngagai Samuel munyi tu,
16 “Ba urung maya tu pagila, Aku deka ngasuh siku lelaki ari raban bansa Benjamin betemu enggau nuan. Tata iya nyadi raja ke bala nembiak Aku Israel. Iya deka ngelepaska sida ari orang Pilistin. Aku udah meda pemerinsa bala nembiak Aku, lalu Aku udah ninga sabak sida ke minta Aku nyaup sida.”
17 Lebuh Samuel meda Saul, TUHAN lalu bejaku enggau iya, “Nya meh lelaki ke dipadahka Aku ngagai nuan. Iya deka merintah bala nembiak Aku.”
18 Saul lalu mansang ngagai Samuel semak pintu penama nengeri nya, lalu nanya ngagai Samuel, “Padahka ngagai aku, dini alai tukang tujum diau?”
19 Ku Samuel nyaut, “Aku tu meh tukang tujum. Alai seduai bejalai dulu ngagai endur alai kitai deka nyembah TUHAN. Seduai deka makai enggau aku sehari tu. Pagila aku deka nyaut semua tanya nuan, lalu ngasuh seduai mupuk.
20 Nyadi pasal keledai ti lenyau tiga hari tu udah, anang irauka sida. Sida udah ditemu. Tang orang ke balat dikedekaka orang Israel, nya nuan enggau ruang bilik apai nuan.”
21 Ku Saul nyaut, “Aku datai ari raban bansa Benjamin, raban bansa ti pemadu mit di menua Israel, lalu ruang bilik aku enda tentu dikibuhka orang dalam raban bansa kami. Nya alai, nama kebuah nuan bejaku munyi tu ngagai aku?”
22 Samuel lalu nguluka Saul enggau orang gaji iya ngagai bilik siti ti besai, lalu ngasuh seduai iya duduk ba penuduk ba ujung mija, ti alai kira tiga puluh iku pengabang duduk.
23 Samuel lalu bejaku enggau orang ke berapi, “Bai dagin ti udah diberi aku ngagai nuan, ti udah diasuh aku galau nuan.”
24 Orang ke berapi nya lalu mai dagin ti endang udah dipilih, ti diambi ari isi kaki jelu, lalu ngengkahka dagin nya di mua Saul. Samuel lalu bejaku, “Tu dagin ti udah digalau aku ke nuan. Empa dagin nya. Aku udah ngalau dagin nya ke nuan ngambika bisi diempa nuan diatu begulai enggau orang ke diambi aku ngabang. Nya alai sehari nya Saul begulai makai enggau Samuel.
25 Lebuh sida nurun ari endur alai orang Israel ti nyembah TUHAN lalu mansang ngagai nengeri, orang nyendiaka siti peninduk ke Saul ba perabung rumah.
26 Saul lalu tinduk dia.
 
Samuel Nata Saul Nyadi Raja
Ba urung dini hari, Samuel ngangauka Saul ke ba perabung rumah nya, “Saul, angkat. Aku deka ngasuh nuan pulai.” Saul angkat, lalu seduai iya Samuel sama pansut ngagai jalai raya.
27 Lebuh seduai iya datai ba tisi nengeri, Samuel lalu bejaku enggau Saul, “Asuh orang gaji nya bejalai dulu ari tua.” Orang gaji nya lalu mupuk, lalu ku Samuel nampung jaku iya, “Nganti ditu enda lama. Aku deka madahka ngagai nuan utai ti udah disebut Allah Taala.”
 
Bagi 10
1 Udah nya Samuel ngambi sebutul mit minyak kana, lalu nuang minyak nya ba pala Saul, nyium Saul, lalu ku iya, “TUHAN nata nuan nyadi raja ke nembiak Iya orang Israel. Nuan deka merintah nembiak Iya, lalu nyaga sida ari semua munsuh sida. Tu tanda kena nunjukka nuan udah dipilih TUHAN nyadi raja ke bala nembiak Iya:
2 Lebuh tua beserara sehari tu lagi, nuan deka betemu enggau dua iku orang semak lumbung Rachel di Selsah, di menua Benjamin. Seduai iya deka madahka keledai ti digiga nuan udah ditemu, ngambika apai nuan enda agi irau ati ke keledai nya. Tang iya irau ati ke nuan. Iya seruran nanya, ‘Baka ni ku aku enggau anak aku nya?’
3 Nuan deka angkat ari endur nya lalu datai ba sepun kayu oak di Tabor. Dia nuan deka betemu enggau tiga iku orang ke mansang ngenjuk piring ngagai Allah Taala di Betel. Siku ari sida nya deka mai tiga iku kambin, siku deka mai tiga iti tuku roti, lalu iya ti ketiga deka mai siti kambut ti penuh laban wain.
4 Sida tiga nya deka nabi nuan, lalu meri ngagai nuan dua ari tiga iti tuku roti nya, lalu nuan enda tau enda nyambut roti nya.
5 Udah nya nuan deka bejalai ngagai bukit Allah Taala di Gibe-ah, alai ti bisi kem orang Pilistin. Ba pintu kuta nengeri nya nuan deka betemu enggau bala nabi ke nurun ari alta ti ba bukit nya. Sida nabi nya deka nebah belikan, dedumbak, kesuling, enggau engkeratung. Sida deka betanda sereta benabi.
6 Roh TUHAN deka tekala nya bekuasa ba nuan, lalu nuan deka betanda sereta manjung sama enggau sida, lalu nuan deka berubah lalu enda agi baka selama.
7 Lebuh utai tu nyadi, kereja aja sebarang utai ti diasuh Allah Taala kereja nuan.
8 Nuan deka bejalai dulu ari aku ngagai Gilgal. Aku deka betemu enggau nuan din, lalu ngenjuk piring tunu enggau piring pemaik. Nuan enda tau enda nganti tujuh hari din, nyentuk ngagai maya aku udah datai din, lalu madahka utai ti enda tau enda dikereja nuan.”
9 Lebuh Saul nguing deka beserara ari Samuel, Allah Taala ngubah Saul, lalu semua utai ti udah dipadahka Samuel, nyadi magang sehari nya.
10 Lebuh Saul enggau orang gaji iya datai di Gibe-ah, seraban bala nabi betemu enggau iya. Roh Allah Taala lalu tekala nya bekuasa ba Saul, lalu iya enggau bala nabi betanda sereta manjung.
11 Lebuh orang ke udah nemu iya dulu ari nya, meda iya ngereja nya, sida lalu nanya ngagai pangan diri, “Nama utai ti udah nyadi ba anak Kis? Kati Saul udah nyadi nabi?”
12  Siku orang ke diau dia lalu nanya, “Kati ku baka nabi ti bukai tu - sapa apai sida tu ku pikir kita?” Tu meh penatai jaku, “Kati Saul udah nyadi nabi?”
13 Lebuh Saul udah badu betanda lalu badu agi manjung, iya lalu mansang ngagai alta ti ba atas bukit nya.
14 Lebuh aya Saul meda Saul enggau orang gaji iya, iya lalu nanya, “Kini ke seduai tadi?” “Ngiga keledai,” ku Saul nyaut. “Lebuh kami duai nadai tetemuka raban keledai nya, kami duai lalu mansang ngagai Samuel.”
15 “Nama utai ti dipadahka iya ngagai nuan?” ku aya Saul nanya.
16 “Iya madahka jelu nya udah ditemu,” ku Saul nyaut, tang iya enda madahka ngagai aya iya utai ti udah disebut Samuel pasal iya ti deka nyadi raja.
 
Saul Dichiri Nyadi Raja
17 Samuel lalu mesanka orang mayuh begempuru di mua TUHAN di Mispah,
18 lalu ku iya bejaku enggau sida, “TUHAN Allah Taala ke disembah orang Israel bejaku munyi tu, ‘Aku udah mai kita pansut ari menua Ejip, lalu udah ngelepaska kita ari pengidup kita ke nyadi ulun orang Ejip, enggau ari semua orang ke udah nekanka pengidup kita.
19 Aku tu Allah Taala kita ke udah ngelepaska kita ari semua penusah enggau pemerinsa kita, tang sehari tu kita udah nulak Aku, lalu udah minta Aku meri kita siku raja. Barang ku jaku! Begempuru meh kita di mua TUHAN nitihka ripih raban bansa enggau ripih suku raban bansa kita.’ “
20 Udah nya Samuel lalu ngasuh siti-siti raban bansa mansang ke mua, lalu TUHAN milih raban bansa Benjamin.
21 Udah nya Samuel ngasuh ruang bilik ari raban bansa Benjamin mansang ke mua, lalu ruang bilik Matri kena pilih. Udah nya, bala lelaki ari ruang bilik Matri datai ke mua, lalu Saul anak Kis kena pilih. Sida lalu ngiga iya, tang lebuh sida nadai tetemuka iya,
22 sida lalu nanya ngagai TUHAN, “Kati bisi agi orang bukai?” TUHAN lalu nyaut, “Saul bisi din, belalai ba tugung pekekas.”
23 Sida lalu belanda kia, lalu mai Saul pansut betemu enggau orang mayuh, lalu sida meda iya sekaki tinggi agi ari orang bukai.
24 Ku Samuel bejaku enggau orang mayuh, “Tu meh orang ke udah dipilih TUHAN! Nadai orang bukai baka iya ba bala kitai tu.” Semua orang lalu manjung, “Gayu-guru raja!”
25 Samuel lalu nerangka ngagai orang mayuh pasal hak enggau pengawa raja. Udah nya iya nuliska utai nya dalam siti bup, ti diengkah iya ba endur ti kudus. Udah nya iya lalu ngasuh semua orang pulai.
26 Saul mega pulai ngagai Gibe-ah. Sekeda orang ke kering, ti udah ditegu Allah Taala ati, mupuk sama enggau Saul.
27 Tang ku sekeda orang ke nadai guna bejaku, “Baka ni ku orang tu tau meri penguntung ngagai kitai?” Sida mechat Saul, lalu enda mai pemeri ngagai iya.
 
Bagi 11
Saul Ngalahka Orang Amon
1 Kira sebulan udah bekau nya, Raja Nahas orang Amon lalu nguluka bala soldadu iya nyerang lalu ngelulung nengeri Jabes di menua Giliat. Orang ke lelaki di Jabes lalu bejaku enggau Nahas, “Gaga siti sempekat enggau kami, nya baru kami deka nerima nuan nyadika raja kami.”
2 Disaut Nahas, “Aku endang deka ngaga siti sempekat enggau kita, tang nitihka atur tu: aku deka ngeruk igi mata kanan semua kita, kena ngemaluka semua orang Israel.”
3 Lalu ku bala tuai orang di Jabes bejaku, “Beri kami timpuh tujuh hari alai kami ngasuh bala seruan bejalai ngagai serata menua Israel. Enti orang nadai deka nyaup kami, nya baru kami nyerahka diri ngagai nuan.”
4 Bala seruan lalu datai di Gibe-ah, endur alai Saul diau; sida lalu madahka pekara nya ngagai orang mayuh; semua sida lalu bekeduie nyabak.
5 Nyadi lebuh maya nya Saul baru udah pulai ari umai mai dua iku sapi. Iya lalu nanya, “Nama utai ti ngenusahka ati kita? Nama kebuah kita nyabak?” Sida lalu madahka ngagai iya utai ti udah dipadahka bala seruan ke datai ari Jabes.
6 Roh Allah Taala lalu bekuasa ba iya, lalu iya pedis ati.
7 Iya lalu ngambi dua iku sapi nya, ngelampang tubuh jelu dua iku nya, lalu ngasuh bala seruan mai lampang jelu nya, enggau jaku tangkan tu, ngagai serata menua Israel. “Barang sapa enda nitihka Saul enggau Samuel mansang beperang, sapi sida deka digaga baka tu!” Orang Israel lalu takutka utai ti deka dikereja TUHAN. Nya alai semua sida lalu nitihka Saul enggau Samuel mansang beperang.
8 Saul lalu ngempuruka sida di Besek, tiga ratus ribu iku ari Israel, enggau tujuh puluh ribu iku  ari Judah.
9 Ku sida bejaku enggau bala seruan ke datai ari Jabes, “Padahka ngagai bala kita, sebedau tengah hari pagila, sida deka dilepaska.” Lebuh orang di Jabes nerima pesan nya, sida gaga amat ati.
10 Lalu ku sida bejaku enggau Nahas, “Kami deka nyerahka diri ngagai nuan pagila, lalu ngelakka nuan ngereja sebarang utai ti deka dikereja nuan ngagai kami.”
11 Malam nya Saul lalu magi bala iya ngagai tiga bengkah raban. Tumu pagi sida lalu mansang ngagai kem munsuh lalu nyerang orang Amon. Ba urung tengah hari, sida pen tembu bebunuhka bala orang Amon. Bala orang Amon ti agi idup lalu pambar, rari ngatika diri.
12 Udah nya orang Israel bejaku enggau Samuel, “Ni orang ke madahka Saul enda tau nyadi raja kitai? Serahka sida ngagai kami, ngambika kami munuh sida!”
13 Tang ku Saul, “Nadai orang tau dibunuh sehari tu, laban sehari tu TUHAN udah ngelepaska orang Israel.”
14 Lalu ku Samuel bejaku enggau sida, “Aram kitai mansang ngagai Gilgal, lalu sekali agi nyiri Saul nyadi raja kitai.”
15 Nya alai semua sida lalu mansang ngagai Gilgal. Sida lalu nyiri Saul nyadi raja ba endur ti kudus dia. Sida lalu ngenjuk piring pemaik. Saul enggau orang Israel lalu ngerami pengawa nya.
 
Bagi 12
Samuel Bejaku Enggau Orang Israel
1 Udah nya Samuel lalu bejaku enggau orang Israel, “Aku udah ngereja utai ti dipinta kita. Aku udah meri kita raja ngambika bisi merintah kita.
2 Diatu iya bisi nguluka kita. Tang aku empu nyau tuai, nyau buban bulu pala, lalu bala anak aku bisi enggau kita. Aku udah nguluka kita kenyau ari aku agi bujang, nyentuk ngagai diatu.
3 Diatu aku bediri di mua kita. Enti aku bisi udah ngereja penyalah ngagai kita, awakka kita bedawaka aku diatu di mua TUHAN, enggau di mua raja ti udah dipilih Iya. Kati aku bisi udah kala ngambi sapi tauka keledai kita? Kati aku bisi udah kala nipu tauka nekanka pengidup kita? Kati aku bisi udah kala makai suap? Enti aku bisi udah ngereja utai nya, aku deka mayar utai ti udah diambi aku.”
4 Orang mayuh lalu nyaut, “Nadai kala. Nuan nadai kala nipu, tauka nekanka pengidup kami. Nuan nadai kala ngambi utai ari kami.”
5 Samuel lalu nyaut, “TUHAN enggau raja ti udah dipilih Iya deka nyadika saksi sehari tu ke kita ke nemu aku nadai penyalah.” “Awakka TUHAN nyadika saksi kami,” ku sida nyaut.
6 Ku Samuel nampung jaku iya, “TUHAN udah milih Moses seduai Aron, lalu udah mai aki ini kita pansut ari menua Ejip.
7 Nya alai anang mindah, laban aku deka bedawaka kita di mua TUHAN. Aku deka ngasuh kita ngingat ke semua kereja ti besai ti udah dikereja TUHAN kena Iya ngidupka nyawa kita enggau nyawa aki ini kita.
8  Lebuh Jakop enggau sida sebilik mansang ngagai menua Ejip, lalu orang Ejip nekanka pengidup sida, bala aki ini kita nyabak ngangauka TUHAN minta Iya nyaup sida. TUHAN lalu ngirumka Moses seduai Aron, lalu seduai iya mai sida pansut ari menua Ejip, lalu ngentapka sida diau di menua tu.
9 Tang orang mayuh enda ingatka TUHAN Allah Taala sida. Nya alai Iya lalu nejuka orang Pilistin enggau raja menua Moap, enggau Sisera, tuai soldadu ke di nengeri Hasor, nyerang aki ini kita lalu ngalahka sida.
10  Udah nya sida lalu nyabak minta saup TUHAN. Ku sida, ‘Kami udah bedosa, laban kami udah ninggalka Nuan, TUHAN, lalu udah nyembah engkeramba Baal enggau engkeramba Astarte. Lepaska kami ari munsuh kami, ngambika kami nyembah Nuan!’
11TUHAN lalu ngirumka Gideon, Barak, Jeptah, lalu ke pengujung iya, Iya ngirumka aku empu. Genap iku bala kami bela udah ngelepaska kita ari jari munsuh kita, lalu kita udah diau likun.
12 Tang lebuh kita meda Nahas, raja orang Amon baru deka nyerang kita, kita lalu nyingkirka TUHAN ti endang Raja kita, lalu ku kita bejaku enggau aku, ‘Kami minta siku raja ngambika iya bisi merintah kami.’
13 “Nya alai, tu raja ti udah dipilih kita. Kita udah minta iya, lalu diatu TUHAN udah meri iya ngagai kita.
14 Pengidup kita deka mujur enti kita nangika TUHAN Allah Taala kita, betuaika Iya, mendingka Iya, lalu ngasika pesan Iya, lalu kita enggau raja kita nitihka Iya.
15 Tang enti kita enda mendingka TUHAN, lalu enda ngasika pesan Iya, Iya deka nyerang kita enggau raja kita.
16 Nya alai, anang beguai-guai mupuk, ngambika kita ulih meda pengawa ti besai ti deka dikereja TUHAN.
17 Tu musin kemarau, ukai enda? Tang aku deka besampi, lalu TUHAN deka ngasuh hari beguntur sereta ujan. Lebuh utai nya nyadi, nya baru kita deka nemu pemesai penyalah diri ngelaban TUHAN lebuh kita minta Iya meri kita raja.”
18 Samuel lalu besampi, lalu sehari nya TUHAN ngasuh hari beguntur sereta ujan. Udah nya semua orang mayuh takutka TUHAN enggau ke Samuel,
19 lalu ku sida bejaku enggau Samuel, “Tuan, kami minta nuan besampi ngagai TUHAN Allah Taala kitai, ngarika kami, ngambika kami enda mati. Diatu baru kami nemu, kelimpah ari dosa kami ke bukai, kami udah bedosa, laban kami udah minta siku raja.”
20 Ku Samuel nyaut, “Anang takut. Taja pen kita udah ngereja utai ti jai baka tu, anang mega kita ninggalka TUHAN, tang betuaika Iya enggau pengabis ati kita.
21 Anang nyembah engkeramba, laban sida enda ulih nyaup tauka ngidupka kita, laban sida nya ukai utai ti bendar.
22 TUHAN udah besumpah enggai ninggalka kita, laban Iya udah mutuska penemu deka ngaga kita nyadika nembiak Iya.
23 Nyadi pasal aku empu, aku bedosa ngelaban TUHAN enti aku badu agi besampika kita. Lalu aku deka ngajar kita pasal utai ti manah sereta ngena, ti patut dikereja kita.
24 Kita enda tau enda nangika TUHAN lalu tetap ati betuaika Iya enggau pengabis ati kita. Kingatka utai ti besai ti udah dikereja Iya ke kita.
25 Tang enti kita majak bedosa, kita enggau raja kita deka dirusak.”
 
Bagi 13
Beperang Ngelaban Orang Pilistin
1 Saul umur..”..taun lebuh iya berengkah megai perintah; lalu iya merintah ... dua taun.
2 iya milih tiga ribu iku lelaki, lalu ngeletak dua ribu iku sida diau enggau iya di Mikmas, enggau di menua ti bebukit di Betel. Iya ngirumka seribu iku sida ti bukai ngagai anak lelaki iya Jonatan di Gibe-ah, di menua Benjamin. Lelaki ti bukai diasuh Saul pulai.
3 Jonatan munuh tuai soldadu orang Pilistindi Geba, lalu semua orang Pilistin ninga berita nya. Udah nya Saul lalu ngasuh bala seruan nyepu terumpit di serata menua nya kena nesau orang Hebrew mansang beperang.
4 Semua orang Israel udah dipadahka magang pasal Saul ti udah munuh tuai soldadu orang Pilistin, enggau pasal orang Pilistin ke begedika orang Israel. Nya alai orang mayuh bela nyaut tesau nya, lalu datai ngagai Saul di Gilgal.
5 Orang Pilistin lalu begempuru deka nyerang orang Israel. Sida bisi tiga puluh ribu buah kerita perang, enam ribu iku bala soldadu ke nepan kuda, lalu bala soldadu sida ngemayuh igi pasir ti ba tebing tasik. Sida mansang ngagai Mikmas, tunga ke timur ari Bet-aben, lalu nirika kem sida dia.
6 Udah nya sida bebendar amat nyerang orang Israel, ti ngasuh orang Israel nyau genting seput. Sekeda orang Israel belalai dalam gua, enggau dalam lubang, ba sebelah selikap batu, tauka dalam lubang tanah tauka telaga.
7 Sida ke bukai meraka Sungai Jordan ngagai menua Gat enggau Giliat. Saul agi mengkang di Gilgal, lalu orang ke enggau iya nyau getar-getar takut.
8 Iya nganti Samuel tujuh hari, nitihka atur Samuel. Tang Samuel lalu apin datai di Gilgal. Bala orang mayuh lalu belabuh ninggalka Saul.
9 Nya alai, ku iya bejaku enggau sida, “Bai ngagai aku piring tunu, enggau piring pemaik.” Iya lalu ngenjuk piring tunu,
10 lalu lebuh iya baru udah tembu ngereja nya, Samuel pen datai. Saul lalu mansang ngambat iya, lalu ngelaluka penatai iya.
11 Tang ku Samuel bejaku, “Nama utai tu ti udah dikereja nuan, Raja?” Saul lalu nyaut, “Orang mayuh nyau ninggalka aku, lalu nuan pen apin mega datai, enda nitihka semaya nuan. Nambahka nya, orang Pilistin nyau betatam di Mikmas.
12 Nya alai aku berunding, ‘Orang Pilistin deka nyerang aku di Gilgal ditu, lalu aku apin minta kasih ari TUHAN.’ Nya alai aku lalu berunding deka ngenjuk piring.”
13 Samuel lalu nyaut, “Nya pengawa ti beli. Nuan enda ngasika pesan TUHAN Allah Taala nuan. Enti nuan udah ngasi, Iya tentu deka ngasuh nuan, enggau peturun nuan, megai perintah di menua Israel belama iya.
14 Tang diatu, perintah nuan deka abis. Laban nuan enda ngasika TUHAN, Iya deka ngiga siku orang ke dikedekaka Iya, lalu ngasuh orang nya merintah bala nembiak TUHAN.”
15 Samuel angkat lalu mupuk ari Gilgal. Orang Israel ti bukai nitihka Saul lebuh iya pulai baru ngagai bala soldadu iya. Sida angkat ari Gilgal ngagai Gibe-ah, di menua Benjamin. Saul lalu ngitung bala soldadu iya, kira enam ratus iku semua sida.
16 Saul, enggau anak iya Jonatan, enggau bala sida nirika kem di Geba, di menua Benjamin. Orang Pilistin bepalan ba kem sida di Mikmas.
17 Bala soldadu orang Pilistin mansang nyerang ari kem sida ngena tiga iti raban. Seraban mansang ngagai Oprah di menua Sual;
18 seraban mansang ngagai Bet-horon; lalu seraban ngagai garis entara menua ti ari atas Lebak Seboim enggau menua puang.
19 Nyadi menua Israel nadai orang tukang besi, laban orang Pilistin bebendar nagang orang Israel begagaka pedang enggau sangkuh.
20 (Orang Israel enda tau enda mai pengeradu tanah, changkul, kapak enggau lungga kena ngetau ngagai orang Pilistin, ngambika orang Pilistin ngansah utai nya ke sida.
21 Upah ngansah siti kapak, enggau ngaduka tungkat ti dikena ngachuk sapi nya sesingkap duit ti mit. Upah ngansah pengeradu tanah enggau changkul nya dua singkap duit ti mit.)
22 Nya alai lebuh sida beperang sehari nya, orang Israel nadai pedang tauka sangkuh, kelimpah ari Saul enggau anak iya Jonatan.
23 Orang Pilistin ngirumka seraban soldadu nan ba Genting Mikmas.
 
Bagi 14
Pemerani Jonatan
1 Nyadi sekali, Jonatan bejaku enggau siku orang bujang ke mai senyata ke iya, “Aram tua meraka ngagai kem orang Pilistin.” Tang Jonatan enda madahka pekara nya ngagai apai iya.
2 Nyadi apai iya bepalan ba kem di baruh sekayu buah delima di Mogron, enda jauh ari Gibe-ah. Iya bisi kira enam ratus iku soldadu enggau iya.
3 (Imam ke mai epod nya Ahijah, anak menyadi Ichabot ke benama Ahitup anak Pinehas, uchu Eli, ti udah nyadi imam TUHAN di Siloh.) Bala soldadu enda nemu Jonatan udah mupuk.
4 Nyadi ba Genting Mikmas, ti deka ditengah Jonatan mansang ngagai kem orang Pilistin, bisi dua igi batu ti besai, sigi ari sepiak, lalu sigi ari sepiak jalai nya. Sigi dikumbai Boses, lalu sigi dikumbai Seneh.
5 Sigi batu nya ba tisi utara jalai nya, nunga ngagai Mikmas, lalu sigi ba tisi selatan jalai nya, nunga ngagai Geba.
6 Ku Jonatan bejaku enggau orang bujang nya, “Aram tua meraka ngagai kem orang kapir nya. Nyangka TUHAN deka nyaup tua. Enti Iya nyaup tua, nadai utai ulih nagang Iya ngasuh tua menang, enda ngira pemimit tubuh kitai.”
7 Ku orang bujang nya nyaut, “Aku sigi enggau nuan, sebarang utai ti deka dikereja nuan.”
8 “Barang ku jaku,” ku Jonatan nyaut. “Tua deka meraka, lalu ngayanka diri ngagai orang Pilistin.
9 Enti sida ngasuh tua nganti sida, tua nganti.
10 Tang enti sida ngangauka tua mansang ngagai sida, tua mansang, laban nya nunjukka TUHAN udah ngasuh tua menang ngelaban sida.”
11 Nya alai seduai iya lalu ngayanka diri ngagai orang Pilistin, lalu ku orang Pilistin, “Peda nyin! Orang Hebrew pansut ari lubang alai sida belalai!”
12 Udah nya sida ngangauka Jonatan enggau orang bujang nya, “Datai kitu! Kami bisi utai ti deka dipadahka ngagai seduai!”
Ku Jonatan bejaku enggau orang bujang nya, “Titihka aku. TUHAN udah ngasuh orang Israel menang ngelaban sida.”
13 Jonatan lalu pansut ari Genting nya meragau, lalu orang bujang nya nitihka iya. Jonatan lalu nyerang orang Pilistin lalu ngalahka sida. Orang bujang nya lalu munuh sida.
14 Lebuh sida terubah bamuk, Jonatan enggau orang bujang nya munuh kira dua puluh iku orang Pilistin ba endur kira setengah ikar.
15 Semua orang Pilistin ti diau di menua pesisir nyau takut magang. Bala orang ke ngayau enggau bala soldadu ke bepalan ba kem nya nyau getar-getar takut. Tanah berenyang, lalu sida begau abis ati.
 
Orang Pilistin Alah
16 Bala Saul ke nyaga kem sida di Gibe-ah di menua Benjamin tepedaka bala orang Pilistin belanda enda temu tunga.
17 Saul lalu bejaku enggau bala iya, “Itung bala soldadu kitai. Sapa nadai ditu?” Sida lalu ngitung tubuh lalu nemu Jonatan, enggau orang bujang ke mai senyata ke Jonatan, nadai dia.
18 “Bai epodkitu,” ku Saul bejaku enggau Imam Ahijah. (Nyadi sehari nya Ahijah udah dipaduka bejalai mai epod nya dulu ari mua orang Israel.)
19 Lebuh Saul agi benung bejaku enggau Imam Ahijah, bala orang di kem orang Pilistin majak balat agi begau. Lalu ku Saul bejaku, “Nadai kitai hari betanya ngagai TUHAN!”
20 Udah nya iya enggau bala iya lalu mansang nyerang orang Pilistin, ti agi benung charut belaban enggau pangan diri.
21 Sekeda orang Hebrew ti udah ngalih ari orang Pilistin, ti udah diau enggau orang Pilistin ba kem nya, lalu ngalih ari Saul seduai Jonatan.
22 Bala sida bukai ti udah belalai ba sebelah bukit di menua Epraim, lebuh sida ninga pasal orang Pilistin ke rari, mega enggau belaban lalu nyerang orang Pilistin.
23 Sida belaban di serantu jalai nyentuk ngagai ngilah Bet-aben. Sehari nya TUHAN ngelepaska orang Israel.
 
Utai Ti Nyadi Udah Bekau Sida Bamuk
24 Nyadi sehari nya orang Israel nyau lembut tulang laban lapar, laban Saul udah besumpah, “Awakka orang ke makai sehari tu sebedau aku malas munsuh aku, tulah.” Nya alai nadai siku sida makai sehari nya.
25 Semua sida lalu datai ba siti pulau utan, lalu nemu ai manyi di serata endur nya.
26 Babas dia nyau penuh laban ai manyi, tang nadai orang makai ai manyi nya, laban sida takut ditinggang sumpah Saul.
27 Tang Jonatan nadai udah ninga pasal apai iya ti udah ngemba orang mayuh ngena sumpah. Nya alai iya lalu ngedarka tungkat ti dibai iya, ngachukka tungkat nya ngagai idang manyi, lalu makai ai manyi nya mimit. Iya lalu berasai kering.
28 Tang siku ari bala sida madahka ngagai Jonatan, “Semua kitai tu lembut tulang laban lapar, tang apai nuan udah ngemba kami, ku iya, ‘Awakka orang ke makai utai sehari tu, tulah.’ “
29 Ku Jonatan nyaut, “Naka meh penyai utai ti dikereja apai ngagai bala kitai! Peda kita, aku berasai kering agi lebuh aku udah makai ai manyi nya mimit!
30 Kada enda manah agi sehari tu, enti bala kitai makai bekal ti dirampas kitai ari orang Pilistin. Uji nuan ngira, tentu mayuh agi orang Pilistin ulih bunuh kitai!”
31 Sehari nya orang Israel ngalahka orang Pilistin, ngamuk sida di serantau-rantau jalai ari Mikmas nyentuk ngagai Aijalon. Tang orang Israel nyau lembut tulang laban sida lapar.
32 Nya alai sida lalu belanda ngagai utai ti udah dirampas sida ari munsuh, ngambi jelu bedus enggau sapi, lalu munuh jelu nya dia, lalu makai dagin ti agi bedarah.
33 Orang lalu madahka ngagai Saul, “Peda nuan, orang mayuh bedosa ngelaban TUHAN, bepakaika dagin ti agi bedarah.”
Saul lalu merak sida, “Kita tu nyual bansa! Baringka sigi batu ti besai kitu ngagai aku.”
34 Udah nya iya lalu meri siti agi atur, “Bejalai kita ngagai orang mayuh, lalu asuh semua sida mai jelu sapi enggau jelu bedus kitu. Sida enda tau enda munuh jelu nya lalu makai jelu nya ditu. Sida enda tau bedosa ngelaban TUHAN bepakaika dagin ti agi bedarah.” Nya alai, malam nya semua sida mai jelu sapi, lalu munuh jelu nya dia.
35 Saul ngaga siti alta ke TUHAN, alta ti keterubah iya digaga iya.
36 Ku Saul bejaku enggau bala iya, “Aram kitai nurun lalu nyerang orang Pilistin malam tu, ngamuk sida nyentuk ngagai pagi, lalu munuh semua sida.”
“Kereja aja meh utai ti pemadu manah ba runding nuan,” ku sida nyaut. Tang ku imam bejaku, “Manah kitai betanya ngagai Allah Taala dulu.”
37 Nya alai Saul lalu betanya ngagai Allah Taala, “Kati tau aku nyerang orang Pilistin? Kati Nuan deka nyerahka sida ngagai jari kami?” Tang sehari nya Allah Taala enda nyaut iya.
38 Udah nya Saul lalu bejaku enggau bala tuai orang mayuh, “Datai kitu lalu pansik dosa ti udah dikereja sehari tu.
39 Aku besemaya dalam nama Allah Taala ti idup ke ngasuh orang Israel menang, barang sapa salah, enda ngira enti iya nya anak aku Jonatan, deka dibunuh.
40 Udah nya Saul bejaku enggau sida, “Semua kita bediri din. Aku enggau Jonatan bediri ditu.” “Kereja aja utai ti manah ku ati nuan,” ku sida nyaut.
41 Saul lalu bejaku enggau TUHAN Allah Taala ke disembah orang Israel, “TUHAN, nama kebuah Nuan enda nyaut aku sehari tu? TUHAN Allah Taala ke disembah orang Israel, saut aku ngena batu ti kudus. Enti Jonatan udah salah, tauka aku udah salah, saut ngena Urim, tang enti penyalah nya enggi bala nembiak Nuan orang Israel, saut ngena Tumim.” Saut nya lalu nunjuk ngagai Jonatan seduai Saul. Orang mayuh nadai salah siku.
42 Udah nya Saul lalu bejaku, “Pilih entara anak aku Jonatan enggau aku empu.” Jonatan lalu kena pilih.
43 Udah nya Saul lalu nanya Jonatan, “Nama utai ti udah dikereja nuan?” Jonatan lalu nyaut, “Aku udah makai ai manyi mimit ngena tungkat ti dipegai aku. Aku sedia deka mati.”
44 Ku Saul bejaku enggau iya, “Awakka Allah Taala munuh aku enti nuan enda dibunuh!”
45 Tang ku orang mayuh bejaku enggau Saul, “Kati Jonatan ti udah menang ngarika orang Israel deka diukum bunuh? Enda patut! Kami besemaya dalam nama TUHAN ti idup, nadai selambar buk ari pala iya deka lenyau. Utai ti udah dikereja iya sehari tu udah dikereja iya ari tulung Allah Taala.” Nya meh chara orang mayuh ngelepaska Jonatan ari ukum bunuh.
46 Udah bekau nya, Saul lalu badu agi begagaika orang Pilistin, lalu sida pulai ngagai menua sida empu.
 
Perintah Saul Enggau Sida Sebilik
47 Lebuh Saul nyadi raja orang Israel, iya ngelaban semua munsuh iya di semua endur, nyengkaum orang Moap, orang Amon, orang Edom, bala raja di Sobah, enggau orang Pilistin. Iya seruran menang di semua endur alai iya beperang.
48 Iya berani ngelaban munsuh. Indah orang Amalek deh dialahka iya. Iya nyaga orang Israel ari semua munsuh.
49 Nama anak lelaki Saul nya Jonatan, Isbi enggau Malkisua. Anak indu iya ke tuai agi nya benama Merap, lalu anak indu iya ke biak agi nya Mikal.
50 Bini Saul nya Ahinoam anak Ahimas. Orang ke nyadi tuai soldadu Saul nya petunggal iya empu, Abner, anak aya iya Ner.
51 Nyadi apai Saul, Kis, enggau apai Abner, Ner, nya anak lelaki Abiel.
52 Saul suah bamuk ngelaban orang Pilistin sepemanjai umur iya. Nya alai lebuh iya tetemuka orang lelaki ti kering tauka berani, iya ngambi orang nya nyadika soldadu iya.
 
Bagi 15
Beperang Ngelaban Orang Amalek
1 Ku Samuel bejaku enggau Saul, “Aku udah diasuh TUHAN nata nuan nyadi raja ke bala nembiak Iya Israel. Nya alai pendingka utai ti disebut TUHAN ti Pemadu Bekuasa.
2 Iya deka ngukum orang Amalek, laban aki ini sida udah ngelaban orang Israel lebuh orang Israel datai ari menua Ejip.
3 Nya alai serang meh orang Amalek, lalu rusak abis lengis semua utai ti dikemisi sida. Anang nejuka siti utai enda dirusak. Bunuh semua lelaki, indu, nembiak enggau anak mit, jelu sapi, jelu bedus, unta enggau keledai.”
4 Saul lalu ngempuruka bala soldadu iya, lalu ngitung sida di Telem. Tubuh sida dua ratus ribu iku ari Israel enggau sepuluh ribu iku ari Judah.
5 Udah nya iya nguluka bala iya mansang ngagai nengeri orang Amalek, lalu ngipa munsuh ba buntut sungai siti ti udah rangkai.
6 Iya lalu ngirumka jaku tangkan ngagai orang Ken, uchu orang ke udah manah enggau orang Israel lebuh sida datai ari menua Ejip, “Angkat lalu tinggalka orang Amalek, ngambika aku enda munuh kita sama enggau sida.” Orang Ken lalu angkat.
7 Saul lalu ngalahka orang Amalek, belaban di serantau-rantau jalai kenyau ari Habilah nyentuk ngagai Sur, tunga ke timur menua Ejip.
8 Iya nangkap Agak, raja orang Amalek, lalu munuh semua orang Amalek.
9 Tang Saul enggau bala iya enda munuh Agak, lalu enda mega munuh jelu bedus enggau jelu sapi, anak sapi enggau anak domba ti pemadu manah, tauka utai bukai ti manah. Sida semina ngerusak utai ti nadai guna tauka enda berega.
10 TUHAN lalu bejaku ngagai Samuel,
11 “Aku nesal udah ngasuh Saul nyadi raja. Iya udah ninggalka Aku, lalu enda ngasika pesan Aku.” Samuel lalu ringat. Semalam-malam nya iya bejaku minta kasih ngagai TUHAN.
12 Tumu pagi hari siti iya lalu mupuk ngiga Saul. Iya lalu ninga Saul udah mansang ngagai nengeri Karmel, alai iya ti udah ngaga siti tiang pengingat ke diri empu, lalu udah bekau nya, mansang ngagai Gilgal.
13 Samuel mansang ngagai Saul. Saul lalu ngambat iya, ku iya, “TUHAN merekatka nuan, Samuel! Aku udah ngasika pesan TUHAN.”
14 Samuel lalu nanya, “Enti pia, nama kebuah aku bisi ninga munyi sapi enggau bedus?”
15 Disaut Saul, “Bala aku udah ngerampas sida ari orang Amalek. Sida ngambi bedus enggau sapi ti pemadu manah, ngambika bisi diberi nyadika piring ngagai TUHAN Allah Taala nuan. Sida ke bukai udah abis dibunuh kami.”
16 Ku Samuel, “Badu agi nuan bejaku. Aku deka madahka ngagai nuan utai ti udah disebut TUHAN ngagai aku dimalam.” “Padahka meh,” ku Saul nyaut.
17 Disaut Samuel, “Taja pen nuan ngumbai diri orang ke enda dipeguna orang, tang nuan nyadi tuai ke semua raban bansa orang Israel. TUHAN udah nata nuan nyadi raja orang Israel,
18 lalu Iya udah ngasuh nuan ngerusak orang Amalek ti jai nya. Iya udah ngasuh nuan ngelaban sida, datai ke nuan udah munuh semua sida.
19 Nya alai, nama kebuah nuan enda ngasika TUHAN? Nama kebuah nuan beguai-guai ngerampas perapasan, lalu ngereja utai ti jai di mua TUHAN?”
20 “Aku udah ngasika TUHAN,” ku Saul nyaut. “Aku udah mupuk nitihka asuh TUHAN, mai Raja Agak pulai baru, lalu munuh semua orang Amalek.
21 Tang bala soldadu aku enda munuh jelu bedus enggau jelu sapi ti pemadu manah ti ditangkap sida. Sida mai jelu nya kitu ngagai Gilgal, nyadika piring ti diberi ngagai TUHAN Allah Taala nuan.”
22 Ku Samuel, “Ni bagi utai ti dikedekaka TUHAN? Ngasika Iya, tauka piring? Manah agi ngasika Iya ari ke meri bedus ti pemadu manah nyadika piring.
23 Pengawa ngelaban TUHAN nya ngenyai pengawa betilitka nasit, lalu ati ti sumbung nya ngenyai dosa besembahka engkeramba. Nuan udah nulak pesan TUHAN, nya alai diatu Iya udah nulak nuan nyadi raja.”
24 Disaut Saul, “Aku amat udah bedosa. Aku udah enda ngasika pesan TUHAN, enggau atur nuan. Aku takutka bala aku, lalu aku ngereja utai ti dipinta sida.
25 Tang diatu aku minta kasih ngagai nuan, ampun dosa aku, lalu pulai sama enggau aku, ngambika aku ulih nyembah TUHAN.”
26 Samuel lalu nyaut, “Aku sigi enda pulai enggau nuan; laban nuan udah nulak pesan TUHAN, lalu Iya udah nulak nuan ti nyadi raja orang Israel.”
27 Samuel nguing lalu mupuk, tang Saul bepegai ba baju Samuel, lalu baju nya charik.
28 Ku Samuel bejaku enggau iya, “TUHAN udah nyarikka perintah orang Israel ari nuan sehari tu, lalu udah meri perintah nya ngagai orang ke badas agi ari nuan.
29 Allah Taala ti bemulia, ke disembah orang Israel, enda bula; Iya enda ngubah runding Diri; Iya ukai mensia; Iya enda ngubah runding Diri.”
30 Ku Saul nyaut, “Aku udah bedosa, tang taja pia, ayanka meh basa nuan ngagai aku di mua bala tuai soldadu aku, enggau di mua semua orang Israel. Pulai enggau aku, ngambika aku ulih nyembah TUHAN Allah Taala nuan.”
31 Samuel lalu pulai sama enggau iya. Saul lalu nyembah TUHAN.
32 “Bai Raja Agak ngagai aku kitu, “ ku Samuel bejaku. Agak lalu datai ngagai Samuel, getar-getar takut, laban ku runding iya, “Naka meh pemedis mati!”
33 Ku Samuel bejaku, “Laban pedang nuan udah ngasuh mayuh orang ke indu lenyau anak, nya alai indai nuan empu diatu deka mega lenyau anak.” Samuel lalu mepat Agak di mua alta di Gilgal.
34 Udah nya Samuel lalu mupuk ngagai Ramah, lalu Raja Saul pulai ngagai Gibe-ah.
35 Samuel nadai agi betemu enggau Saul nyentuk ngagai hari iya mati, tang iya sinu ati ke Saul. TUHAN nesal ati ke Diri ti udah ngasuh Saul nyadi raja orang Israel.
 
Bagi 16
David Ditata Nyadi Raja
1 Ku TUHAN bejaku ngagai Samuel, “Ni pengelama nuan agi tusah ati ke Saul? Aku udah nulak iya nyadi raja orang Israel. Diatu ambi minyak kana, lalu mansang ngagai Betlehem, ngagai orang siku ke benama Jesi, laban Aku udah milih siku ari anak lelaki iya nyadi raja.”
2 Samuel lalu nanya, “Baka ni ku aku ulih ngereja nya? Enti Saul ninga nya, iya tentu deka munuh aku!” Disaut TUHAN, “Bai siku anak sapi, lalu padahka ngagai Saul nuan deka ngenjuk piring ngagai TUHAN din.
3 Bai Jesi ngagai pengawa miring nya. Ila Aku deka madahka utai ti deka dikereja nuan. Nuan deka nata orang siku ti deka dipadahka Aku ngagai nuan, ngambika iya nyadi raja.”
4 Samuel lalu ngereja utai ti diasuh TUHAN. Iya mansang ngagai Betlehem. Bala tuai nengeri nya nyau getar-getar ngambat iya. Ku sida nanya, “Kati nuan nemuai mai pemaik, tukang tujum?”
5 Disaut Samuel, “Aku datai laban aku deka meri piring ngagai TUHAN. Tuchi diri empu lalu mupuk sama enggau aku.” Iya mega ngasuh Jesi enggau bala anak lelaki iya nuchi diri, lalu mai sida ngagai pengawa nya.
6 Lebuh sida datai, Samuel meda anak Jesi ke benama Eliap, lalu ku iya berunding dalam ati diri, “Orang ke bediri di mua TUHAN tu tentu orang ke udah dipilih Iya.”
7 Tang ku TUHAN bejaku enggau Samuel, “Anang ngira peninggi tauka penyigat gamal orang. Aku udah nulak iya, laban Aku enda ngira mensia ngena chara mensia. Mensia meda gamal, tang Aku meda ati.”
8 Udah nya Jesi ngangauka anak iya ke benama Abinadap, lalu mai iya ngagai Samuel. Tang ku Samuel, “Ukai. TUHAN enda milih iya.”
9 Udah nya Jesi lalu mai Samah. Tang ku Samuel, “Ukai. TUHAN enda milih iya.”
10 Nya alai Jesi mai tujuh iku ari bala anak lelaki iya ngagai Samuel. Tang ku Samuel bejaku enggau Jesi, “Ukai. TUHAN enda milih bala sida tu.”
11 Udah nya Samuel lalu nanya Jesi, “Kati nuan agi bisi anak lelaki bukai?” Disaut Jesi, “Bisi. Siku ke bunsu, tang iya benung ngibun bedus.” Ku Samuel, “Asuh iya datai kitu. Kitai enda meri piring sebedau iya datai.”
12 Jesi lalu mesanka anak bunsu iya. Gamal iya sigat amat, bepengerai, lalu mata iya tajam. Ku TUHAN bejaku ngagai Samuel, “Nya meh iya. Tata iya!”
13 Samuel lalu ngambi minyak kana, lalu nata David di mua bala menyadi iya. Tekala nya Roh TUHAN lalu bekuasa ba David, lalu berengkah ari nya Roh TUHAN meruan enggau iya. Udah nya Samuel pulai ngagai Ramah.
 
David Dalam Bilik Saul
14 Roh TUHAN ninggalka Saul, lalu roh ti jai ti dikirumka TUHAN datai, lalu merinsaka iya.
15 Ku bala orang gaji Saul bejaku enggau Saul empu, “Roh ti jai, ti dikirumka Allah Taala, nya ti merinsaka nuan.
16 Nya alai asuh kami, tuan, ngiga orang siku ke nemu nebah belikan. Lebuh roh ti jai nya merinsaka nuan, orang nya tau nebah belikan iya, lalu nuan deka gerai baru.”
17 Saul lalu bejaku enggau sida, “Giga siku orang ke landik nebah belikan, lalu bai iya kitu ngagai aku.”
18 Ku siku orang gaji bejaku, “Jesi ari nengeri Betlehem bisi siku anak lelaki, ti landik nebah musik. Iya mega orang ke berani, sereta sigat gamal, soldadu ti manah, sereta lanchar bejaku. TUHAN bisi enggau iya.”
19 Saul lalu ngasuh bala seruan mai pesan tu ngagai Jesi, “Asuh anak lelaki nuan ke benama David, ke ngibun bedus, datai ngagai aku.”
20 Jesi lalu ngambi siku keledai. Iya ngengkahka roti enggau sekambut wain ba belakang keledai nya, lalu ngasuh anak iya David nganjung utai nya, enggau siku anak kambin, ngagai Saul.
21 Lebuh David datai ba istana Saul, iya lalu belabuh bekereja ke Saul. Saul balat amat rinduka David, lalu David nyadi orang ke mai senyata ke iya.
22 Udah nya Saul lalu ngirumka pesan ngagai Jesi, “Awakka David bekereja ke aku, laban aku rinduka iya.”
23 Lebuh roh ti jai, ti dikirumka Allah Taala, merinsaka Saul, David ngambi belikan iya, lalu nebah belikan nya. Saul lalu berasai nyamai, sereta gerai, lalu roh ti jai nya ninggalka iya.
 
Bagi 17
Goliat Nyakap Orang Israel
1 Orang Pilistin begempuru di Sokoh, sebuah nengeri di menua Judah, sedia deka beperang. Sida nirika kem sida ba endur siti ke benama Epes-damim, ba entara Sokoh enggau Asekah.
2 Saul enggau orang Israel begempuru lalu nirika kem sida ba Lebak Elah, lalu berintai deka beperang ngelaban orang Pilistin.
3 Bala orang Pilistin bediri berintai ba bukit sigi lalu orang Israel ba bukit sigi, diseraraka siti lebak.
4 Siku orang ke benama Goliat, ari nengeri Gat, pansut ari kem orang Pilistin, lalu nyakap orang Israel. Peninggi iya kira tiga meter,
5 lalu iya ngena baju kebal ti digaga ari temaga, ti berat lima puluh semilan kilogram, enggau selapuk kebal ti digaga ari temaga.
6 Kaki iya mega disarung enggau temaga, lalu iya mai siti sangkuh ti digaga ari temaga, ti disan iya.
7 Enteran sangkuh iya ngemesai tendai ti dikena orang betenun. Mata sangkuh iya digaga ari besi lalu pemerat mata sangkuh iya nya kira tujuh kilogram. Lalu orang ke mai senyata iya, bejalai dulu ari iya.
8 Goliat bediri lalu ngangauka orang Israel, “Nama kebuah kita berintai deka beperang? Kati aku tu ukai orang Pilistin, lalu kita nya ulun Saul? Pilih siku ari bala kita, lalu awakka iya nurun kitu ngagai aku.
9 Enti iya ulih ngelaban aku, lalu tebunuhka aku, awakka kami meh nyadi ulun kita. Tang enti aku menang ngelaban iya, lalu tebunuhka iya, kita meh nyadi ulun kami.
10 Sehari tu aku nyakap kita soldadu orang Israel. Asuh siku ari bala kita ngelaban aku!”
11 Lebuh Saul enggau bala iya ninga nya, sida tusah ati sereta balat amat takut.
 
David Ba Kem Saul
12 Nyadi David nya anak Jesi, ari raban peturun Eprat, ti diau di Betlehem, di menua Judah. Jesi bisi lapan iku anak lelaki. Lebuh Saul nyadi raja, Jesi endang udah tuai umur.
13 Anak iya tiga iku ke tuai agi udah mupuk enggau Saul mansang beperang. Iya ke tuai nya Eliap, ditangkanka Abinadap, lalu iya ti ketiga nya Samah.
14 David nya anak bunsu Jesi. Lebuh sida tiga ke tuai agi nya enggau Saul,
15 David selalu kuang-kuit mansang ngagai Saul lalu pulai baru ngagai raban bedus apai iya di Betlehem.
16 Goliat nyakap orang Israel tiap pagi lemai dalam kandang empat puluh hari.
17 Nyadi sekali Jesi bejaku enggau David, “Bai sepuluh kilogram kemping enggau sepuluh iti tuku roti lalu anjung enggau jampat ngagai menyadi nuan di kem.
18 Lalu bai mega sepuluh igi tuku engkiju ngagai tuai soldadu. Tanyaka gaya pendiau bala menyadi nuan, lalu bai siti utai kena nandaka sida agi gerai nyamai magang.
19 Raja Saul, bala menyadi nuan, enggau semua orang Israel ti bukai diatu benung ba Lebak Elah, beperang ngelaban orang Pilistin.”
20 David angkat tumu pagi hari siti, ngasuh orang bukai ngibun raban bedus, lalu nganjung pemakai nitihka asuh apai iya Jesi. Iya datai ba kem lebuh orang Israel benung manjung mansang ngagai endur alai sida ke berintai deka beperang.
21 Orang Pilistin enggau orang Israel lalu besedia deka belaban, betunga mua enggau pangan diri.
22 David lalu ninggalka pemakai ba orang ke ngibun bekal, belanda ngagai rintai orang ke deka belaban, mansang ngagai bala menyadi iya, lalu nanyaka gaya pendiau sida sebuat.
23 Lebuh iya agi benung bejaku enggau sida, Goliat mansang ke mua ari bala orang Pilistin, lalu nyakap orang Israel, baka selama. Lalu David ninga iya.
24 Lebuh orang Israel meda Goliat, sida lalu rari takut.
25 “Peda iya nya!” ku sida bejaku enggau pangan diri. “Pendingka ulih kita jaku chakap iya! Raja Saul udah besemaya deka meri upah ti besai ngagai orang ke tebunuhka Goliat. Raja deka mega meri anak dara iya nyadika bini orang nya, lalu ruang bilik apai orang nya enda ibuh mayar chukai.”
26 David lalu nanya bala orang ke semak iya, “Nama utai ti deka diberi ngagai orang ke tebunuhka orang Pilistin tu, lalu ngelepaska orang Israel ari pemalu tu? Berani amat orang kapir tu nyakap bala soldadu Allah Taala ti idup!”
27 Sida lalu madahka ngagai iya utai ti deka dikereja ngagai orang ke tebunuhka Goliat.
28 Eliap, menyadi David ke pengabis tuai, bisi ninga David bejaku enggau bala orang nya. Iya lalu pedis ati ngagai David, lalu ku iya, “Nama pengawa nuan ditu? Sapa ngibun bedus nuan di menua puang din? Nuan tu ngemintarka diri aja. Nuan datai ditu laban nuan ingin deka meda orang belaban!”
29 “Nama penyalah aku?” ku David nanya. “Nama kebuah aku enda tau bejaku?”
30 Iya nguing ngagai orang bukai, lalu nanya munyi ti dulu. Genap kali iya nanya, saut sida sebaka magang.
31 Sekeda orang ke ninga jaku David, madahka ngagai Saul. Saul lalu mesanka David.
32 Lalu ku David bejaku enggau Saul, “Tuan Raja, anang nejuka orang takutka orang Pilistin nya! Awakka aku ngelaban iya.”
33 Saul lalu bejaku enggau David, “Nuan enda ulih ngelaban orang Pilistin nya, laban nuan agi biak, lalu iya enda udah nyadi soldadu kenyau ari iya agi bujang.”
34 Tang ku David nyaut Saul, “Tuan Raja, aku endang selalu ngibun bedus apai aku. Genap kali jelu singa tauka beruang nabanka anak domba,
35 aku nitihka iya, lalu munuh iya, lalu ngelepaska anak domba nya. Lalu enti jelu singa tauka beruang nya mutar ngelaban aku, aku nyekal iya, malu iya lalu munuh iya.
36 Aku udah munuh jelu singa enggau beruang, lalu aku deka munuh orang kapir tu baka aku ti munuh jelu, laban iya udah nyakap bala soldadu Allah Taala ti idup.
37 TUHAN ke udah nyelamatka aku ari singa enggau beruang, deka mega nyelamatka aku ari jari orang Pilistin nya.” “Barang ku jaku,” ku Saul nyaut. “Mupuk meh nuan. TUHAN deka meruan enggau nuan.”
38 Saul lalu ngerasukka perengka perang iya empu ba David; iya ngerasukka selapuk kebal ti digaga ari temaga ba pala David, enggau baju kebal iya.
39 David lalu nanchangka pedang Saul atas baju kebal nya, lalu nguji bejalai, tang enda ulih, laban iya enda teleba ngena utai ti baka nya. David lalu bejaku ngagai Saul, “Aku enda ulih belaban ngena semua utai tu, laban aku enda teleba ngena utai tu.” Iya lalu muka utai nya ari tubuh iya.
40 Iya lalu mai tungkat ti dikena iya ngibun bedus, lalu milih lima igi batu ti segala ari sungai, lalu nyimpan batu nya dalam kambut iya. Iya megai pangwang iya, lalu mansang ngagai Goliat.
 
David Ngalahka Goliat
41 Orang Pilistin nya lalu belabuh mansang ngagai David. Orang ke mai terabai iya bejalai dulu ari iya.
42 Lebuh Goliat udah meratika David, iya ngeleseka David, laban David agi biak umur, agi biring sereta sigat gamal.
43 Ku iya bejaku ngagai David, “Kati aku tu ukui alai nuan mansang ngagai aku mai tungkat?” Iya lalu nyumpah David dalam nama petara iya empu.
44 Ku iya nyakap David, “Mansang kitu, ngambika aku nyerahka bangkai nuan ngagai burung enggau jelu.”
45 Disaut David, “Nuan mansang ngelaban aku ngena pedang, sangkuh enggau perambut, tang aku mansang ngelaban nuan dalam nama TUHAN ti Pemadu Bekuasa, Allah Taala bala soldadu orang Israel ti udah dikeleseka nuan.
46 Sehari tu TUHAN deka nyerahka nuan ngagai jari aku, lalu aku deka munuh nuan, lalu mumpung pala nuan. Lalu sehari tu aku deka nyerahka bangkai bala soldadu orang Pilistin ngagai burung enggau jelu ngambika semua mensia nemu orang Israel bisi Allah Taala,
47 lalu semua orang ditu deka nemu TUHAN ukai ngelepas ngena pedang tauka sangkuh, laban perang tu perang TUHAN, lalu Iya deka nyerahka kita ngagai jari kami.”
48 Lebuh Goliat angkat lalu mansang semak ngagai David, David lalu belanda ngagai rintai bala orang Pilistin, deka ngelaban Goliat.
49 David nyelukka jari iya ke dalam kambut iya, lalu ngambi sigi batu, ti ditimbakka iya ngena pangwang iya ngagai Goliat. Batu nya lalu kena kening Goliat, ngebuska kening iya. Goliat lalu rebah tetingkap.
50 Nya meh gaya David ngalahka Goliat lalu munuh iya, ukai ngena pedang, tang ngena pangwang enggau batu! David nadai mai pedang.
51 David lalu belanda ngagai Goliat, bediri atas iya, nyintak pedang Goliat empu, mumpung pala iya, lalu munuh iya. Lebuh orang Pilistin meda bujang berani sida udah mati, sida lalu rari.
52 Bala orang Israel enggau orang Judah lalu manjung begagaika orang Pilistin nyentuk ngagai Gatenggau nyentuk ngagai pintu penama nengeri Ekron. Orang Pilistin rebah bakal di serantau-rantau jalai ti nuju ngagai Saraim, nyentuk ngagai Gat enggau Ekron.
53 Lebuh orang Israel pulai begagaika orang Pilistin, sida ngerumpak kem orang Pilistin.
54 David ngambi pala Goliat, lalu mai pala nya ngagai Jerusalem, tang iya nyimpan senyata Goliat dalam langkau kain iya empu.
 
David Dibai Betemu Enggau Saul
55 Lebuh Saul meda David mansang ngelaban Goliat, iya lalu nanya Abner, ti nyadi tuai soldadu iya, “Abner, anak sapa nembiak nya?” “Entah, enda aku nemu, Tuan Raja,” ku Abner nyaut.
56 “Alai nuan nanya ngagai orang,” ku Saul bejaku enggau Abner.
57 Nya alai, lebuh David pulai ngagai kem udah bekau iya ti munuh Goliat, Abner lalu mai iya ngagai Saul. David agi minching pala Goliat.
58 Saul lalu nanya iya, “Anak sapa nuan tu?” “Aku tu anak nembiak nuan Jesi ari Betlehem,” ku David nyaut.
 
Bagi 18
1 Lebuh Saul udah bejaku enggau David, anak Saul ke benama Jonatan balat amat tetarit ati ngagai David, lalu belabuh rinduka iya baka ke rinduka diri empu.
2 Kenyau ari nya, Saul mai David begulai enggau iya, lalu enggai ngelakka iya pulai ngagai rumah apai iya.
3 Jonatan ngaga siti sempekat enggau David, laban iya rinduka David baka iya ti rinduka diri empu.
4 Jonatan lalu muka baju panjai ti dikena iya, lalu meri baju panjai nya ngagai David, sama enggau baju kebal, sereta enggau pedang, panah enggau belulang iya.
5 David mujur belama ba semua kayau ti diasuh Saul kereja iya. Nya alai Saul ngaga iya nyadi kepala ke bala soldadu iya. Semua orang Israel enggau semua pemesai bala soldadu Saul gaga ati meda nya.
 
Saul Kepapaska David
6 Lebuh sida pulai ke rumah, udah bekau David ti munuh Goliat, orang ke indu lalu datai ari semua nengeri di menua Israel mansang ngambat Raja Saul. Sida belagu gaga ati, betanda, sereta nebah tamborin enggau engkeratung.
7  Ku sida belagu: “Saul udah munuh beribu iku, tang David udah munuh bepuluh ribu iku.”
8 Saul lalu enda rindu ninga nya, lalu iya balat amat ringat. Ku iya, “Sida ngumbai David udah munuh bepuluh ribu iku, tang aku semina munuh beribu iku aja. Enda lama da agi iya deka ngerampas perintah tu ari jari aku!”
9 Nya alai berengkah ari sehari nya Saul belabuh kepapaska David.
 
Saul Nguji Munuh David
10 Hari siti siku roh ti jai, ti dikirumka Allah Taala ngenyit merinsaka Saul. Iya lalu mutap inggar amat dalam rumah iya, lebuh David benung nebah belikan baka ke dikereja iya tiap. Saul megai sangkuh.
11 Ku runding Saul, “Lagi aku ngentumka iya ngagai dinding.” Saul lalu numbukka sangkuh nya ngagai David, dua kali, tang David nyilat iya belama.
12 Saul takutka David, laban TUHAN bisi enggau David, tang udah ninggalka Saul.
13 Nya alai Saul enggai agi meda David, lalu ngaga iya nyadi tuai ke seribu iku soldadu. David lalu nguluka bala iya beperang.
14 David mujur dalam semua utai ti dikereja iya, laban TUHAN bisi enggau iya.
15 Lebuh Saul meda David mujur amat, iya majak balat agi takutka David.
16 Tang semua orang di menua Israel enggau di menua Judah rindu magang ke David, laban iya mujur nyadi tuai sida.
 
David Jadi Enggau Anak Indu Saul
17 Udah nya Saul lalu bejaku enggau David, “Tu Merap, anak indu aku ke tuai agi. Aku deka meri iya nyadika bini nuan, enti nuan deka bekereja ke aku nyadi soldadu ti berani sereta taluk, lalu beperang ngelaban munsuh TUHAN.” (Laban kenu ku runding Saul, “Aku empu enggai ngedarka jari ngelaban iya; awakka orang Pilistin munuh iya.)
18 Disaut David, “Sapa aku tu, lalu purih sapa aku tu, alai aku tau nyadika menantu raja?”
19 Tang lebuh maya udah chukup alai Merap patut diberi ngagai David, Merap lalu diberi ngagai lelaki siku ke benama Adril, ke datai ari Meholah.
20 Tang anak indu Saul ke benama Mikal rinduka David; orang lalu madahka nya ngagai Saul, lalu iya gaga ati ke nya.
21 Ku iya runding iya, “Awakka aku meri Mikal ngagai David, kena aku manjuk iya, sereta ngambika orang Pilistin munuh iya.” Nya alai tu kedua kali Saul nyebut ngagai David, “Nuan deka nyadika menantu aku.”
22 Iya lalu bejaku enggau bala pemesai iya, “Awakka kita bejaku kediri enggau David munyi tu, ‘Raja rinduka nuan, lalu semua pemesai iya rinduka nuan. Awakka nuan nyadika menantu raja.’ “
23 Nya alai sida lalu nyebut jaku nya ngagai David, lalu ku David nyaut, “Kati kita ngumbai nyadika menantu raja nya pekara ti mit, laban aku tu orang ke seranta, ti enda dikelala orang.”
24 Bala pemesai lalu madahka jaku David ngagai Saul.
25 Saul lalu bejaku ngagai sida, “Bejaku kita enggau David munyi tu, ‘Derian ti dipinta raja nya seratus iti ujung kulup orang Pilistin, kena malas munsuh iya.’ “ (Dalam runding Saul, nya jalai ngasuh David dibunuh orang Pilistin.)
26 Lebuh bala pemesai Saul madahka jaku Saul ngagai David, David lalu gaga ati deka nyadika menantu raja. Sebedau hari nikah,
27 David enggau bala iya mansang lalu munuh dua ratus iku orang Pilistin. Iya mai ujung kulup orang Pilistin nya ngagai raja, lalu ngitung semua utai nya di mua raja, ngambika iya tau nyadika menantu raja. Saul lalu meri anak indu iya Mikal nyadika bini David.
28 Nya baru Saul nyemetak nemu TUHAN bisi enggau David, lalu nemu semua orang Israel rinduka David.
29 Saul majak balat agi takutka David, lalu kenyau ari nya iya ngaga diri nyadi munsuh David.
30 Bala soldadu orang Pilistin selalu datai, lalu nyerang, lalu genap kali sida nyerang, David mujur agi ari bala pemesai bukai. Nya lalu ngujungka David tebilang nama.
 
Bagi 19
Saul Merinsaka David
1 Saul lalu bejaku enggau anak iya Jonatan, sereta enggau semua pemesai iya, ngasuh sida munuh David. Tang Jonatan balat rinduka David.
2 Jonatan lalu madahka ngagai David, “Apai aku deka munuh nuan. Bejimat nuan pagila. Belalai ba endur ti enda ditemu orang, lalu diau dia.
3 Aku deka bediri semak apai aku ba padang ti alai nuan belalai, lalu aku deka ngenang pasal nuan ngagai iya. Enti aku bisi tetemuka utai ari randau kami duai, aku deka madahka nya ngagai nuan.”
4 Jonatan muji David di mua Saul, lalu ku iya, “Tuan, anang besalah David, laban iya nadai kala ngereja utai ti salah ngagai nuan. Semua utai ti udah dikereja iya sigi bisi guna magang ba nuan.
5 Iya berambunka nyawa diri lebuh iya munuh Goliat, lalu TUHAN ngasuh orang Israel menang. Lebuh nuan meda nya, ati nuan gaga. Nya alai, nama kebuah nuan deka ngereja utai ti salah ngagai orang ke nadai penyalah, lalu deka munuh David enggau nadai kebuah?”
6 Saul ngasika jaku Jonatan, lalu besumpah dalam nama TUHAN madahka diri enggai munuh David.
7 Jonatan lalu ngangauka David, lalu madahka semua utai nya ngagai iya. Udah nya iya lalu mai David betemu enggau Saul. David lalu begulai enggau Saul baka ke dulu.
8 Perang lalu nyadi baru. David lalu nyerang orang Pilistin, lalu munuh mayuh amat orang Pilistin, lalu sida rari ari iya.
9 Udah nya roh ti jai ari TUHAN bekuasa ba Saul, lebuh iya benung duduk di rumah megai sangkuh iya, lalu David benung nebah belikan iya.
10 Saul numbukka sangkuh iya ngagai David, tang David nyilat, lalu sangkuh nya lekat ba dinding. David lalu belanda rari.
11 Malam nya Saul ngasuh sekeda bala iya nengkilaka rumah David, laban iya deka munuh David pagi hari siti. Tang Mikal, iya nya bini David, madahka ngagai David, “Enti nuan enda rari malam tu, nuan mati pagila.”
12 Mikal lalu ngulurka David ari jenila ke tanah. David lalu belanda rari.
13 Udah nya Mikal ngambi engkeramba sida sebilik, ngengkahka engkeramba nya ba peninduk David, lalu ngengkahka panggal ti digaga ari bulu kambin, ba pala engkeramba nya, lalu mungkur iya.
14 Lebuh bala nembiak Saul datai deka ngambi David, Mikal lalu bejaku, “Iya sakit.”
15 Tang Saul ngasuh sida mansang baru, ku iya, “Bai iya kitu ngena peninduk iya empu, ngambika aku munuh iya.”
16 Lebuh sida tama, sida lalu tepedaka engkeramba ba peninduk nya, enggau panggal ti digaga ari bulu kambin ba pala engkeramba nya.
17 Saul lalu nanya Mikal, “Nama kebuah nuan nipu aku baka tu, lalu ngelakka munsuh aku rari?” Disaut Mikal, “Iya madahka dirika munuh aku, enti aku enda nyaup iya rari.”
18 David rari lalu mansang ngagai Samuel di Ramah, lalu madahka ngagai Samuel semua utai ti udah dikereja Saul ngagai iya. Udah nya David seduai Samuel mupuk ngagai Naiot, lalu diau dia.
19 Orang lalu madahka ngagai Saul David bisi di Naiot, semak Ramah.
20 Nya alai iya lalu ngasuh orang nangkap David. Lebuh sida meda bala nabi betanda sereta benabi, diuluka Samuel, Roh Allah Taala lalu bekuasa ba bala nembiak Saul, lalu sida mega belabuh betanda sereta benabi.
21 Lebuh orang madahka nya ngagai Saul, iya lalu ngirumka mayuh agi seruan iya. Sida nya mega belabuh betanda sereta benabi. Iya lalu ngirumka bala seruan ketiga kali. Sida nya mega betanda sereta benabi.
22 Udah nya, Saul empu mupuk ngagai Ramah. Lebuh iya datai ba telaga ti besai di Seku, iya lalu nanya ngagai orang endur alai Samuel seduai David diau. Orang lalu madahka ngagai iya, “Seduai nya di Naiot, di Ramah.”
23 Lebuh iya benung mansang ngagai Naiot di Ramah, Roh Allah Taala lalu bekuasa ba iya. Lalu lebuh iya benung bejalai, iya betanda sereta benabi, nyentuk ngagai iya datai di Naiot.
24 Iya muka gari iya, lalu iya mega betanda sereta benabi di mua Samuel, garing-garing gali telanjai sehari-hari, semalam-malam nya. (Tu meh penatai jaku, “Kati Saul udah nyadi nabi?”)
 
Bagi 20
Jonatan Nulung David
1 Udah nya David rari ari Naiot, lalu mansang ngagai Jonatan. Iya lalu nanya, “Nama utai ti udah dikereja aku? Nama penyalah aku? Nama dosa ti udah dikereja aku ngagai apai nuan, datai ke nyau keran deka munuh aku?”
2 Jonatan lalu nyaut David, “Nuan enda mati! Dinga nuan, apai aku enda ngereja utai sebedau iya madahka ngagai aku, nemuka utai nya besai tauka mit. Lalu iya nadai kebuah ngelalaika pekara tu ari aku.”
3 Tang ku David nyaut, “Apai nuan nemu nuan balat rinduka aku, lalu iya udah mutuska runding enggai nejuka nuan nemu utai ti deka dikereja iya, laban nya deka ngenusahka ati nuan. Aku besumpah madahka ngagai nuan dalam nama TUHAN ti idup, aku nyau deka mati!”
4 Ku Jonatan madahka ngagai David, “Aku deka ngereja sebarang utai ti diasuh nuan.”
5 Disaut David, “Dinga nuan, Gawai Anak Bulan deka nyadi pagila, lalu aku enda tau enda makai sama enggau raja. Enti nuan besetuju, aku deka belalai ba padang datai ngagai lemai lusa.
6 Enti apai nuan meda aku nadai ba mija nya, padahka ngagai iya, aku udah minta pemendar ari nuan begaut pulai ngagai Betlehem, laban tu maya semua kami sebilik ngenjuk piring ti diberi genap taun.
7 Enti iya nyebut, ‘Enda ngawa,’ aku deka likun. Tang enti iya ringat, nuan deka nemu iya endang keras deka ngemediska aku.
8 Nya alai, aku minta nuan ngereja nya ke aku, lalu ngamatka sempekat ti kudus ti udah digaga nuan enggau aku. Tang enti aku bisi salah, awakka nuan empu munuh aku, tang anang nyerahka aku ngagai apai nuan.”
9 “Anang irau!” ku Jonatan nyaut. “Enti aku nemu apai aku udah mutuska runding deka munuh nuan, aku deka madahka nya ngagai nuan.”
10 David lalu nanya, “Sapa orang ke deka madahka ngagai aku enti apai nuan ringat nyaut nuan?”
11 “Aram tua bejalai ngagai padang,” ku Jonatan nyaut. Seduai iya lalu mupuk,
12 lalu ku Jonatan bejaku enggau David, “Awakka TUHAN Allah Taala ke disembah orang Israel nyadika saksi tua! Lebuh maya tu pagila, enggau lusa, aku deka nanya apai aku. Enti perangai iya manah ngagai nuan, aku deka mesanka nuan.
13 Enti iya bisi ati deka ngemediska nuan, awakka TUHAN munuh aku, enti aku enda madahka nya ngagai nuan, lalu mai nuan kebukai ngagai endur ti likun. Awakka TUHAN meruan enggau nuan baka Iya ti udah enggau apai aku!
14 Lalu enti aku agi mengkang idup, aku minta nuan ngayanka pengerindu TUHAN ngagai aku, ngambika aku enda mati.
15 Lalu pandangka penaluk nuan ngagai kami sebilik belama iya. Lebuh TUHAN udah ngeluska semua munsuh nuan,
16 anang enda ingatka kami sebilik. Awakka TUHAN malas semua munsuh David.”
17 Jonatan lalu ngasuh David besumpah baru madahka diri rinduka iya, laban Jonatan rinduka David baka iya ti rinduka diri empu.
18 Udah nya Jonatan bejaku enggau iya, “Pagila Gawai Anak Bulan, nuan deka nyata nadai dia, laban kerusi nuan puang.
19 Lusa orang deka lebih agi nemu nuan nadai datai! Nya alai, mupuk nuan ngagai endur alai nuan ke belalai suba, lalu belalai ari belakang tugung batu dia.
20 Aku deka nimbakka tiga iti laja ngagai batu nya, ngeluluka diri baka ke nyelinting batu nya.
21 Udah nya aku deka ngasuh ulun aku ngiga panah nya. Enti aku madahka ngagai iya, ‘Laja nya tunga kitu. Ambi iya,’ reti nya, nuan nadai utai ngawa, lalu tau pansut ari endur alai nuan ke belalai. Aku besumpah dalam nama TUHAN ti idup, nadai utai ulih nganu nuan.
22 Tang enti aku madahka ngagai iya, ‘Panah nya ngilah nuan kin agi,’ nuan enda tau enda mupuk, laban TUHAN ngasuh nuan mupuk.
23 Pasal semaya ti udah digaga tua enggau pangan diri, TUHAN deka nentuka tua ingatka semaya nya belama iya.”
24 Nya alai David lalu belalai di padang. Lebuh Gawai Anak Bulan nyadi, Raja Saul datai ngagai pengerami makai besai nya
25 lalu duduk ba endur alai iya ke duduk selama ngimbai dinding, lalu Jonatan duduk betunga mua enggau iya ari sepiak mija nya, lalu Abner duduk ngimbai Saul, tang penuduk David puang,
26 Tang taja pia Saul nadai nyebut utai sehari nya, laban ku pikir iya, “Utai bisi udah nyadi ba iya ti ngasuh iya enda tuchi.”
27 Tang ba hari ti kedua, iya nya sehari udah bekau Gawai Anak Bulan, penuduk David mega puang. Saul lalu nanya Jonatan, “Nama kebuah David nadai datai makai kemari enggau sehari tu?”
28 Disaut Jonatan, “Iya udah minta aku ngemendarka iya mupuk ngagai Betlehem;
29 ku iya, ‘Awakka aku mupuk, laban kami sebilik deka meri piring ngagai TUHAN, lalu bala menyadi aku udah mesanka aku datai. Nya alai, enti nuan amat pangan aku, awakka aku mupuk betemu enggau kaban belayan aku.’ Nya kebuah iya nadai duduk ba endur iya ba mija Raja.”
30 Saul lalu pedis ati ngagai Jonatan, lalu ku iya bejaku ngagai Jonatan, “Nuan tu anak ti nadai guna! Diatu baru aku nemu nuan setanah enggau David, lalu ngemaluka diri empu sereta ngemaluka indai nuan!
31 Seagi-agi David mengkang idup, nuan enda ulih nyadi raja menua tu. Nya alai, asuh orang ngambi iya lalu bai iya ngagai aku, laban iya enda tau enda mati.”
32 Jonatan lalu nyaut apai iya, Saul, “Nama kebuah iya enda tau enda mati? Nama utai ti udah dikereja iya?”
33 Ninga iya bejaku munyi nya, Saul lalu numbuk Jonatan ngena sangkuh iya, deka munuh iya. Nya baru Jonatan nemu apai iya amat keran deka munuh David.
34 Jonatan balat amat ringat, lalu angkat ari mija nya, lalu nadai makai utai sehari nya, iya nya ba hari ti kedua Gawai Anak Bulan nya. Ati iya balat tusah ke David, laban Saul udah mechat David.
35 Pagi hari siti Jonatan lalu mansang ngagai padang nya, deka betemu enggau David nitihka semaya seduai iya. Iya mai siku nembiak enggau iya,
36 lalu ku iya bejaku enggau nembiak nya, “Alai nuan belanda kin lalu giga laja ti deka ditimbakka aku.” Nembiak nya lalu belanda. Jonatan lalu nimbakka laja ngelui nembiak nya.
37 Lebuh nembiak nya datai ba endur alai laja nya udah labuh, Jonatan lalu ngangauka iya, “Laja nya jauh agi ari nya!
38 Anang bediri tegir-tegir ngapa! Jampat agi!” Nembiak nya lalu ngambi laja nya, lalu pulai baru ngagai tuan iya.
39 Tang iya enda nemu reti semua utai nya. Semina Jonatan seduai David aja nemu.
40 Jonatan lalu nyuaka senyata iya ngagai nembiak nya, lalu ngasuh iya mai senyata nya pulai ngagai nengeri.
41 Lebuh nembiak nya udah mupuk, David angkat ari belakang tugung batu nya, besugang, lalu nyungkurka diri ke tanah tiga kali. Seduai iya Jonatan sama nyabak lebuh seduai iya nyium pangan diri, tang David balat agi tusah ati ari Jonatan.
42 Jonatan lalu bejaku enggau David, “Allah Taala deka meruan enggau nuan. TUHAN deka nentuka tua, enggau peturun tua, deka ngingatka sempekat ti udah digaga tua enggau pangan diri.” David lalu mupuk, lalu Jonatan mulaika diri ngagai nengeri.
 
Bagi 21
David Rari Ari Saul
1 David lalu mansang ngagai imam Ahimelek di Nop. Ahimelek nyau getar-getar mansang ngambat iya, lalu nanya, “Nama kebuah nuan datai ditu kediri?”
2 “Aku datai ditu ari asuh raja,” ku David nyaut. “Iya enda ngasuh aku madahka ngagai orang utai ti diasuh iya kereja aku. Nyadi pasal bala aku, aku udah ngasuh sida betemu enggau aku ba endur siti.
3 Kati nuan bisi bekal ke aku? Beri aku lima iti tuku roti, tauka sebarang utai bukai ti dikemisi nuan”
4 Ku imam nya bejaku, “Aku nadai roti, semina roti ti kudus. Nuan tau ngambi roti nya, enti bala nuan nadai udah beleman enggau indu dalam dua tiga hari tu ti udah.”
5 “Nadai sida udah ngereja nya,” ku David nyaut. “Bala aku endang semampai ngintu diri tuchi lebuh kami bejalai, anang kenang lebuh kami bejalai baka tu!”
6 Imam nya lalu meri roti ti kudus nya ngagai David, laban iya semina bisi roti ti udah diberi ngagai Allah Taala, ti udah dipindahka ari mija ti kudus nya, lalu diganti enggau roti ti baru. (
7 Nyadi tuai orang ke ngibun jelu tupi Saul, ke benama Doek, ke asal ari Edom, enda mukai-mukai bisi dia sehari nya, ngereja pengawa pengarap ti enda tau enda dikereja iya.)
8 Ku David bejaku enggau Ahimelek, “Kati nuan bisi sangkuh tauka pedang? Aku nadai mai pedang tauka senyata bukai, laban raja ngenyit ngasuh aku mupuk.”
9  Disaut Ahimelek, “Aku bisi pedang Goliat orang Pilistin, ke dibunuh nuan ba Lebak Elah. Pedang nya ari belakang epod, dibalut ngena kain. Enti nuan begunaka pedang nya, bai aja. Ka semina nya aja senyata ti bisi ditu.” Lalu ku David bejaku, “Beri nya ngagai aku. Nadai pedang ti manah agi ari nya!”
10 David lalu mupuk, ngerarika diri ari Saul. Iya lalu mansang ngagai Raja Akis di Gat.
11 Bala pemesai raja Akis lalu bejaku enggau raja, “Ukai enda iya tu David, ti nyadi raja di menua iya empu? Tu meh orang ke dikenang bala indu ngena lagu lebuh sida betanda, ‘Saul udah munuh beribu iku, tang David udah munuh bepuluh ribu iku.’ “
12  Leka jaku nya balat ngirauka ati David, lalu iya takut amat ke Raja Akis.
13 Nya alai di mua sida, iya ngaga diri baka ke gila. Lebuh sida deka masung iya, iya lalu jukat. Iya ngurik pintu penama nengeri nya, lalu nejuka liur iya rarat nurun ragum iya.
14 Nya alai, ku Akis bejaku enggau bala pemesai iya, “Peda nya! Iya tu gila! Nama kebuah kita mai iya ngagai aku?
15 Kati aku nadai chukup orang gila ditu? Nama kebuah kita mai siku agi orang gila ngagai rumah aku, lalu nejuka iya ngiruh aku ngena ulah ti tuyu?”
 
Bagi 22
Bala Imam Dibunuh
1 David rari ari nengeri Gat, lalu mansang ngagai lubang gua Adulam. Lebuh bala menyadi iya enggau semua sida sebilik ninga iya bisi dia, sida lalu mansang ngagai iya.
2 Orang ke kena tekan, tauka berutang, semua orang ke bisi utai ti ngasuh sida pedis ati, mansang ngagai iya, kira empat ratus iku semua sida, lalu iya nyadi tuai sida.
3 Ari Gat David bejalai ngagai Mispah di menua Moap, lalu ku iya bejaku enggau raja menua Moap, “Aku minta nuan ngelakka apai enggau indai aku datai lalu diau enggau nuan, nganti aku udah nemu utai ti deka dikereja Allah Taala ke aku.”
4 Nya alai David ninggalka apai indai iya enggau raja menua Moap. Seduai iya diau dia sekumbang David ke belalai dalam lubang gua.
5 Udah nya, nabi Gat datai ngagai David lalu bejaku, “Anang diau ditu. Mupuk nuan diatu ngagai menua Judah.” David mupuk, lalu mansang ngagai utan Heret.
 
Saul Munuh Bala Imam Di Nop
6 Nyadi sekali lebuh Saul di Gibe-ah, iya duduk di baruh sebatang kayu tamaris ba sigi munggu, megai sangkuh, dikelingi bala pemesai iya. Orang lalu madahka ngagai iya David enggau bala iya udah ditemu.
7 Ku iya bejaku ngagai bala pemesai iya, “Kita orang Benjamin, pendingka tu ulih kita! Kati kita ngumbai David deka meri umai enggau kebun anggur ngagai semua kita, lalu ngaga kita nyadi pemesai ke bala soldadu iya?
8 Kati nya kebuah kita bepekat ngelaban aku? Siku pen nadai ga kita deka madahka ngagai aku pasal anak aku empu ti udah setanah enggau David. Siku pen nadai ga kita deka ibuhka aku, tauka madahka pasal David, siku ari bala soldadu aku empu ke benung ngiga peluang munuh aku, enggau pasal anak aku ke meransang iya!”
9 Nyadi Doek bisi bediri dia begulai enggau bala pemesai Saul, lalu ku iya bejaku, “Aku bisi meda David mansang ngagai Ahimelek anak Ahitup di Nop.
10 Ahimelek nanya ngagai TUHAN utai ti patut dikereja David. Udah nya iya lalu meri David bekal, enggau pedang Goliat orang Pilistin.”
11 Raja Saul lalu mesanka Imam Ahimelek enggau semua kaban belayan iya ke sama nyadi imam di Nop. Sida lalu betemu enggau Saul.
12 Ku Saul bejaku enggau Ahimelek, “Pendingka tu ulih nuan, Ahimelek!” “Tuan,” ku Ahimelek nyaut.
13 Saul lalu nanya iya, “Nama kebuah nuan enggau David bepekat ngelaban aku? Nama kebuah nuan meri iya bekal enggau pedang, lalu betanya ngagai Allah Taala ngarika iya? Diatu iya udah nguing ngelaban aku, lalu nganti peluang alai iya munuh aku!”
14 Ku Ahimelek nyaut, “David nya pemesai ke pemadu tetap ati ngagai nuan! Iya menantu nuan. Iya tuai soldadu ke nyaga nuan. Lalu iya endang dibasa semua orang ke bekereja di istana raja.
15 Aku amat bisi betanya ngagai Allah Taala ngarika iya, lalu nya ukai terubah iya aku ngereja nya. Nyadi pasal bepekat ngelaban nuan, Tuan Raja enda tau nuduhka aku tauka orang bukai ari ruang bilik aku. Aku nadai nemu pasal pekara tu!”
16 Ku raja, “Ahimelek, nuan enggau semua kita sekaban enda tau enda dibunuh magang.”
17 Iya lalu bejaku enggau jejaga ke bediri semak iya, “Bunuh bala imam TUHAN! Sida udah bepekat enggau David, lalu sida enda madahka pasal iya ke rari, taja pen sida nemu nya kenyau ari pun.” Tang jejaga nya enggai ngangkatka jari munuh imam TUHAN.
18 Saul lalu bejaku enggau Doek, “Bunuh sida!” Doek lalu munuh semua sida. Dalam sehari nya iya munuh lapan puluh lima iku imam. Semua sida nya tau mai epod magang.
19 Saul mega ngasuh semua orang ke diau di Nop, iya nya nengeri ti alai imam nya diau, dibunuh magang, nyengkaum orang ke lelaki, sida ke indu, bala nembiak enggau anak mit, jelu sapi, keledai enggau jelu bedus. Semua sida dibunuh magang.
20 Tang Abiatar, siku ari bala anak lelaki Ahimelek, rari lalu mansang ngagai David.
21 Iya madahka ngagai David chara Saul udah munuh bala imam TUHAN.
22 Ku David bejaku enggau iya, “Lebuh aku meda Doek bisi dia sehari nya, aku nemu iya deka madahka utai ngagai Saul. Nya alai, aku betanggungjawapka pemati semua kaban belayan nuan.
23 Diau enggau aku. Anang takut. Saul bisi ati deka munuh tua, tang nuan deka likun enti nuan diau enggau aku.
 
Bagi 23
David Ngelepaska Nengeri Keilah
1 Orang lalu madahka ngagai  David, “Dinga nuan, orang Pilistin nyerang nengeri Keilah, lalu ngenchuri gandum ti baru udah diketau.”
2 David lalu betanya ngagai TUHAN, “Kati tau aku mansang lalu nyerang orang Pilistin?”
“Tau,” ku TUHAN nyaut. “Serang meh sida, lalu lepaska Keilah.”
3 Tang ku bala David bejaku enggau iya, “Dinga nuan, indah di menua Judah tu deh kitai takut. Kitai tentu deka balat agi takut enti kitai mansang ngagai Keilah lalu nyerang bala soldadu orang Pilistin din.”
4 David lalu betanya baru ngagai TUHAN, lalu ku TUHAN bejaku ngagai iya, “Mupuk nuan lalu serang Keilah, laban Aku deka ngasuh nuan menang ngelaban orang Pilistin.”
5 Nya alai David enggau bala iya mansang ngagai Keilah, lalu nyerang orang Pilistin. Sida munuh mayuh amat orang Pilistin, lalu ngerampas jelu tupi sida. Nya meh jalai David ngelepaska nengeri nya ari kuasa munsuh.
6 Lebuh Abiatar anak Ahimelek rari lalu mansang ngagai bala David di Keilah, iya bisi mai epod.
7 Orang lalu madahka ngagai  Saul pasal David ti udah mansang ngagai Keilah. Ku Saul, “Allah Taala udah nyerahka iya ngagai jari aku. David udah tepekul, laban iya tama ngagai nengeri ti bekuta, ti bisi pintu ti kukuh.”
8 Saul lalu nguluka bala soldadu iya nyerang Keilah, lalu ngelulung David enggau bala iya.
9 Lebuh David ninga Saul bekira deka nyerang iya, iya lalu bejaku enggau Imam Abiatar, “Bai epod nya kitu.”
10 Lalu ku iya bejaku, “TUHAN Allah Taala ke disembah orang Israel, aku bisi ninga Saul deka datai di Keilah, lalu ngerusak nengeri tu, ketegal aku, ke nembiak Nuan.
11 Kati orang di Keilah deka nyerahka aku ngagai Saul? Kati Saul amat deka datai, munyi ti didinga aku? TUHAN Allah Taala ke disembah orang Israel, aku minta Nuan nyaut aku!” Ku TUHAN nyaut, “Saul deka datai.”
12 “Kati orang Keilah deka nyerahka aku enggau bala aku ngagai Saul?” ku David nanya baru. “Sida deka,” ku TUHAN nyaut.
13 Nya alai David enggau bala iya, kira enam ratus iku semua sida, lalu tekala nya angkat ari Keilah, lalu rari ngagai sebarang endur ti deka digusung sida. Lebuh Saul ninga David udah rari ari Keilah, iya lalu badu agi nyerang David.
 
David Di Menua Ti Bebukit
14 David belalai di menua ti bebukit, di menua puang semak Sip. Saul endang seruran nguji ngiga David, tang Allah Taala enda nyerahka David ngagai jari iya.
15 David bisi di Hores, di menua puang semak Sip, lebuh iya ninga Saul deka datai munuh iya.
16 Jonatan anak Saul mupuk lalu betemu enggau David di Hores; iya meransang David lebuh David madahka ngagai iya pasal Allah Taala ti deka nyaga David.
17 Ku Jonatan bejaku enggau David, “Anang takut. Apai aku Saul enda ulih ngemediska nuan. Iya sigi nemu nuan deka nyadi raja orang Israel, lalu aku deka nyadi lumur dua nuan.”
18 Seduai iya lalu ngaga siti sempekat di mua TUHAN; David diau di Hores, lalu Jonatan pulai ke rumah.
19 Sekeda orang ari Sip betemu enggau Saul di Gibe-ah, lalu ku sida, “David belalai di menua kami di Hores, ba Bukit Hakilah, di selatan menua puang Judea.
20 Tuan Raja, kami nemu pemendar nuan ke nguji nangkap iya. Nya alai, manah nuan datai ngagai menua kami. Kami deka nentuka nuan ulih nangkap iya.”
21 Disaut Saul, “Awakka TUHAN merekatka kita, laban kita udah manah enggau aku!
22 Mupuk meh kita lalu tentuka utai nya sekali agi. Giga endur alai iya, lalu giga orang ke udah meda iya dia. Aku ninga iya pintar amat.
23 Giga endur alai iya belalai, lalu padahka ngagai aku tekala nya. Nya baru aku deka bejalai enggau kita, lalu enti iya agi di menua nya, aku deka ngiga iya, nyengkaum di serata menua Judah.
24 Nya alai sida angkat lalu pulai ngagai Sip, dulu ari Saul. Nyadi David enggau bala iya bisi di menua puang Maon, ba lebak siti ti nadai orang nguan, di selatan menua puang Judea.
25 Saul enggau bala iya lalu angkat begigaka David. Tang lebuh David ninga nya, iya lalu mupuk ngagai menua ti bebukit ti bebatu di menua puang Maon, lalu diau dia. Lebuh Saul ninga nya, iya lalu nitihka David.
26 Saul enggau bala iya diseraraka bukit sigi ari bala David. David enggau bala iya lalu beguai-guai rari ari Saul, lebuh bala Saul nyau deka ngelikupka bala David.
27 Lebuh maya nya siku seruan datai, lalu bejaku enggau Saul, “Pulai diatu, laban orang Pilistin nyerang menua kitai!”
28 Saul lalu enda nyadi nitihka David; iya lalu nyerang orang Pilistin. Nya kebuah endur nya dikumbai “Bukit Alai Beserara.”
29 David angkat ari endur nya lalu belalai di menua En-gedi.
 
Bagi 24
David Enggai Munuh Saul
1 Lebuh Saul pulai beperang ngelaban orang Pilistin, orang bisi madahka ngagai iya pasal David ke bisi di menua puang semak En-gedi.
2 Saul lalu mai tiga ribu iku soldadu ke pemadu kering ari menua Israel, lalu mupuk begigaka David enggau bala iya tunga ke timur Batu Kambin Babas.
3 Iya datai ba siti lubang gua ti semak kandang bedus, ngimbai jalai raya, lalu tama ngagai lubang gua nya, deka bira. Nyadi David enggau bala iya bisi belalai ba buntut lubang gua nya.
4 Ku sida bejaku enggau David, “Tu peluang nuan! TUHAN udah madahka Iya deka nyerahka munsuh nuan ngagai jari nuan, lalu nuan tau ngereja sebarang utai ti dikedekaka nuan ngagai iya.” David nyubuk Saul, lalu belalai netak puting baju panjai iya.
5 Tang David belabuh enda nyamai ati,
6 lalu ku iya bejaku enggau bala iya, “Awakka TUHAN nagang aku ngemediska tuan aku, ti udah dipilih TUHAN nyadi raja! Mimit pen enda meh aku tau ngemediska iya, laban iya raja ti udah dipilih TUHAN!”
7 Ngena jaku nya David ulih nguingka ati bala iya, lalu iya enda nyagi sida ngamuk Saul.
Saul angkat, ninggalka lubang gua nya, lalu mupuk.
8 Udah nya David pansut ari lubang gua nya, lalu ngangauka Saul, “Tuan Raja!” Lebuh Saul malik kebelakang, David lalu nyungkurka diri ke tanah masa Saul.
9 David lalu bejaku ngagai Saul, ku iya, “Nama kebuah nuan mendingka orang ke ngumbai aku nguji ngemediska nuan?
10 Dinga nuan, sehari tu nuan udah meda jalai TUHAN nyerahka nuan ngagai jari aku dalam lubang gua tu. Sekeda orang ari bala aku ngasuh aku munuh nuan, tang aku enggai munuh nuan. Aku bejaku ngagai bala aku madahka aku enda tau sekali-kali ngemediska nuan, laban nuan udah dipilih TUHAN nyadi raja.
11 Apai, peda nuan puting baju panjai nuan tu! Aku ulih munuh nuan, tang aku semina netak puting baju panjai nuan, lalu enda munuh nuan. Nuan patut nemu aku nadai ati deka ngelaban nuan. Aku nadai bedosa ngelaban nuan, taja pen nuan begagaika aku, deka munuh aku.
12 Awakka TUHAN ngakim entara tua! Awakka Iya malas nuan ngarika aku; tang aku sigi enggai ngelaban nuan.
13 Munyi ti disebut Jaku-dalam, ‘Orang ke jai mansutka penyai.’ Tang aku enggai ngelaban nuan.
14 Sapa ke digagai raja orang Israel? Begagaika bangkai ukui? Begagaika empiras?
15 Awakka TUHAN ngakim, lalu meri atur sapa tua ke salah. Awakka Iya meratika pekara tu, nyaga aku, lalu ngelepaska aku ari jari nuan.”
16 Lebuh David udah bejaku, Saul lalu bejaku, “Kati nya amat nuan, David, anak?” Iya lalu belabuh nyabak.
17 Udah nya iya lalu bejaku ngagai David, “Nuan endang amat lurus agi ari aku, laban nuan udah malas penyai aku ngena pemanah, tang aku udah malas nuan ngena penyai.
18 Sehari tu nuan udah mandangka pemanah nuan ngagai aku, laban nuan enda munuh aku, taja pen TUHAN udah nyerahka aku ngagai jari nuan.
19 Laban lebuh orang tetemuka munsuh, iya enda nejuka munsuh nya idup. Nya alai awakka TUHAN meri upah ti manah ngagai nuan ketegal utai ti udah dikereja nuan ngagai aku sehari tu.
20 Diatu baru aku nemu nuan deka nyadi raja, lalu menua Israel deka diserahka ngagai jari nuan.
21 Nya alai aku minta nuan besumpah di mua TUHAN, enda munuh uchu-ambu aku, ngambika waris kami sebilik enda putus.”
22 David lalu ngaga sumpah nya. Udah nya Saul pulai ke rumah, lalu David enggau bala iya pulai ngagai endur alai sida ke belalai.
 
Bagi 25
Pemati Samuel
1 Samuel mati, lalu semua orang Israel begempuru magang ngulitka iya, lalu sida nguburka iya ba rumah iya di Ramah.
 
David Enggau Abigail
David angkat lalu mupuk ngagai menua puang Paran.
2-3 Nyadi di Maon bisi orang siku benama Nabal. Nabal tu ari raban peturun Kalep. Iya bisi tanah semak nengeri Karmel. Nabal tu kaya bendar. Iya bisi tiga ribu iku jelu bedus, enggau seribu iku kambin. Bini iya Abigail bajik sereta tajam berunding, tang Nabal nya orang ke jai perangai sereta lengkar.
4 Lebuh David di menua puang, iya ninga pasal Nabal ke ngukur bedus iya.
5 Nya alai David ngasuh sepuluh iku nembiak iya mansang ngagai Nabal di Karmel. Ku David bejaku enggau sida, “Mansang kita ngagai Nabal di Karmel, lalu beri tabi basa ari aku ngagai iya.
6 Sebut ngagai iya: ‘David ngirumka pesan tabi basa ngagai nuan. Iya ngajihka nuan enggau kita sebilik, enggau semua bala nuan bela gerai nyamai magang.
7 Iya bisi ninga pasal nuan ke ngukur jelu bedus, lalu iya madahka ngagai nuan, bala pengibun bedus nuan udah bisi begulai enggau kami, lalu kami nadai ngachau sida, lalu nadai kala ngenchuri utai sida sekumbang sida di Karmel.
8 Tanya sida empu lalu sida deka madahka ngagai nuan. David mega minta nuan nyambut bala kami enggau manah, laban kami deka datai kitu lebuh maya gawai, laban pangan nuan David enggau kami ke nembiak nuan, minta beri nuan makai.’ “
9 Lebuh bala David datai, sida lalu nyebut semua pesan David ngagai Nabal. Udah nya sida lalu nganti.
10 Ku Nabal nyaut bala David, “Sapa David? Nadai aku kala ninga nama nya! Diatu mayuh amat ulun rari ninggalka tuan sida.
11 Kati aku patut mai roti enggau ai aku, enggau dagin jelu ti udah disayat aku ke bala orang ke ngukur bedus aku, lalu meri utai nya ngagai orang ke enda ditemu aku penatai?”
12 Bala David lalu pulai, lalu madahka ngagai iya semua utai nya.
13 David lalu bejaku ngagai bala iya, “Tangkin pedang kita!” Semua sida lalu nangkin pedang magang. David mega nangkin pedang iya; kira empat ratus iku orang nitihka David. Iya ninggalka dua ratus iku ngibun bekal sida.
14 Tang siku ari bala Nabal bejaku enggau bini Nabal, Abigail, “Dinga nuan, David bisi ngirumka bala seruan ari menua puang mai pesan tabi basa ngagai tuan kami, lalu iya ngeleseka sida,
15 taja pen bala orang tu udah manah amat enggau kami, sida nadai kala ngachau kami, lalu nadai kala ngenchuri utai kami sekumbang kami ke begulai enggau sida.
16 Sida nyaga kami siang malam, sekumbang kami ke begulai enggau sida, lebuh kami ngibun bedus kitai.
17 Nya alai nuan enda tau enda nemu tu, lalu bekiraka utai ti patut dikereja; laban penusah ti besai deka ninggang tuan kami enggau ruang bilik iya. Iya kelalu jai perangai datai ke nadai siku orang ulih bejaku enggau iya.”
18 Abigail lalu beguai-guai ngambi dua ratus iti tuku roti, dua iti kambut ti penuh laban wain, lima iku bedus ti udah disediaka, tujuh belas kilogram kemping, seratus iti gupung buah anggur ti udah disalai, enggau dua ratus igi roti buah ara, lalu ngundanka semua utai nya ba berapa iku keledai.
19 Udah nya iya bejaku enggau bala orang gaji iya, “Kita bejalai dulu. Lagi aku nitihka kita.” Tang iya enda madahka nya ngagai laki iya Nabal.
20 Lebuh iya nepan keledai iya musin serimbing bukit, David, enggau bala iya mansang ngagai iya, lalu iya betemu enggau sida.
21 Nyadi David udah bejaku, “Lebu ngapa aku udah nyaga utai orang tu di menua puang tu. Utai iya nadai kena churi; lalu iya malas pemanah aku ngena penyai.
22 Awakka Allah Taala munuh akuenti aku enda munuh semua bala orang nya sebedau rerak tawas pagila!”
23 Lebuh Abigail meda David, iya lalu beguai-guai nurun ari keledai iya, lalu nyungkurka diri ke tanah
24 semak kaki David, lalu bejaku enggau iya, “Tuan, aku minta nuan mendingka aku! Awakka penyalah nya ninggang aku.
25 Anang bedulika Nabal ti nadai guna nya! Reti nama iya nya beli lalu iya empu endang beli! Lebuh bala ke dikirumka nuan datai, aku nadai betemu enggau sida.
26 TUHAN Empu ti udah nagang nuan malas lalu munuh munsuh nuan. Nya alai, diatu aku besumpah dalam nama Allah Taala ti idup, awakka munsuh nuan enggau semua orang ke deka ngemediska nuan, diukum baka Nabal.
27 Nyadi diatu awakka pemeri ti udah dibai aku ngagai nuan, tuan, diberi ngagai bala nuan.
28 Aku minta nuan, tuan, ngampun penyalah aku; laban TUHAN tetap deka ngaga nuan, enggau peturun nuan, nyadi raja, laban nuan beperang ngarika TUHAN. Lalu nadai penusah deka ninggang nuan sepemanjai umur nuan.
29 Enti orang angkat ngelaban nuan, begagaika nuan, lalu nguji munuh nuan, TUHAN Allah Taala nuan deka nyaga nuan, baka ke nyaga pesaka ti berega. Tang bala munsuh nuan deka dibuai TUHAN, baka ke nikauka batu ngena pangwang.
30 Lalu lebuh TUHAN udah ngereja semua utai ti manah ti udah disemaya Iya ngagai nuan, lalu udah ngaga nuan nyadi raja menua Israel,
31 nuan nadai agi kebuah tusah tauka nesal ati ketegal nuan udah munuh orang enggau nadai kebuah, tauka ngiga balas. Lalu lebuh TUHAN udah merekatka nuan, tuan, anang enda ingatka aku.”
32 David lalu bejaku enggau Abigail, “Puji TUHAN Allah Taala ke disembah orang Israel ti udah ngasuh nuan betemu enggau aku sehari tu!
33 Awakka Allah Taala merekatka nuan, laban sehari tu nuan udah nagang aku munuh orang, sereta nagang aku malas ngena jari aku empu.
34 TUHAN udah nagang aku ngemediska nuan. Tang aku besumpah dalam nama Allah Taala ke disembah orang Israel ti idup, enti nuan enda udah jampat betemu enggau aku, semua bala Nabal tetap mati magang tumu pagila!”
35 Udah nya David lalu nyambut ari Abigail utai ti dibai Abigail ngagai iya. Lalu ku iya bejaku enggau Abigail, “Pulai meh nuan enggau selamat. Aku udah mendingka nuan, lalu aku udah ngereja utai ti dipinta nuan.”
36 Abigail lalu pulai ngagai Nabal, ke benung rami makai besai baka raja. Nabal balat amat ngelantangka diri, laban iya mabuk, sereta bebuti enggau orang. Nya alai Abigail enda madahka utai ngagai iya nyentuk ngagai pagi hari siti.
37 Pagi hari siti, lebuh Nabal udah gerai mabuk, Abigail lalu madahka semua utai nya ngagai iya. Iya lalu mati tubuh, lalu enda ulih engkebut.
38 Kira sepuluh hari udah bekau nya, TUHAN munuh Nabal, lalu iya mati.
39 Lebuh David ninga Nabal udah mati, iya lalu bejaku, “Puji TUHAN ti udah malas Nabal laban Nabal udah ngeleseka aku, lalu udah nagang aku ngereja utai ti salah. TUHAN udah ngukum Nabal ketegal penyai ti udah dikereja iya empu.” Udah nya David lalu ngirumka pesan minta Abigail jadi enggau iya.
40 Lebuh bala orang gaji David betemu enggau Abigail di Karmel, sida lalu nyebut ngagai iya, “David udah ngasuh kami betemu enggau nuan, lalu mai nuan nyadika bini iya.”
41 Abigail lalu nyungkurka diri ke tanah, lalu bejaku, “Aku tu ulun iya. Aku sedia deka masu kaki bala orang gaji iya.”
42 Iya lalu beguai-guai angkat, lalu nepan keledai iya, disempulang lima iku orang gaji iya, mupuk enggau bala orang gaji David, lalu nyadi bini David.
43 David udah mega jadi enggau Ahinoam ari Jesril. Diatu Abigail seduai Ahinoam sama nyadika bini iya.
44 * Laban Saul udah meri anak indu iya Mikal, ti udah nyadi bini David, ngagai Palti anak Lais, ke datai ari nengeri Galim.
 
Bagi 26
Kedua Kali David Enggai Munuh Saul
1 Sekeda orang ari Sip datai ngagai Saul di Gibe-ah, lalu madahka ngagai iya pasal David ke belalai ba Bukit Hakilah, ba tisi menua puang menua Judea.
2 Saul lalu angkat tekala nya, lalu mansang ngagai menua puang Sip, mai tiga ribu iku bala soldadu ke pemadu kering di menua Israel, ngiga David.
3 Iya lalu nirika kem ba tisi jalai ba Bukit Hakilah. Tang David mengkang diau di menua puang, lalu lebuh iya ninga Saul nyau deka datai ngiga iya,
4 iya lalu ngasuh bala pematau nentuka Saul amat bisi dia.
5 David lalu mupuk ngagai endur alai Saul udah nirika kem iya, lalu David tepedaka endur alai Saul tinduk enggau Abner anak Ner, ti nyadi tuai soldadu. Saul tinduk dalam kem nya, dikelingi bala soldadu iya.
6 Udah nya David lalu nanya ngagai Ahimelek, orang Iti, enggau ngagai menyadi Joap, Abisai anak Seruiah, “Sapa deka enggau aku mansang ngagai kem Saul?” “Aku,” ku Abisai nyaut.
7 Nya alai, malam nya David seduai Abisai mansang ngagai kem Saul, lalu nemu Saul tinduk dalam kem nya. Sangkuh iya diunjamka iya ba tanah semak puchuk pala iya; lalu Abner enggau bala soldadu tinduk ngelingi iya.
8 Ku Abisai bejaku enggau David, “Allah Taala udah nyerahka munsuh nuan ngagai jari nuan malam tu. Awakka aku ngentumka sangkuh iya empu ngagai iya, sekali aja, enda ibuh ditandu.”
9 Tang ku David bejaku ngagai Abisai, “Anang munuh iya, laban TUHAN deka ngukum orang ke ngenataika jari ba raja ti udah dipilih Iya.”
10 Lalu ku David, “Aku besumpah dalam nama TUHAN ti idup, TUHAN Empu deka munuh iya, nemuka lebuh iya mati tuai, tauka mati beperang.
11 TUHAN enda ngasuh aku ngenataika jari ngagai orang ke udah ditata TUHAN nyadi raja! Tang awakka tua semina ngambi sangkuh enggau tepayan ai iya, lalu mupuk ari tu.”
12 David lalu ngambi sangkuh, enggau tepayan ai ari semak pala Saul; lalu seduai iya mupuk. Nadai orang meda tauka nemu utai nya udah nyadi, tauka tedani; laban TUHAN udah ngasuh semua sida tinduk jenak magang.
13 David lalu meraka ke seberai, lalu bediri ba tuchung bukit, jauh ari Saul.
14 David lalu ngangauka bala soldadu Saul, enggau Abner, ku iya, “Abner! Kati nuan ulih ninga aku?”
Abner lalu nyaut, “Sapa nuan nya ke ngangauka raja?”
15 David lalu nyaut, “Abner, kati nuan ukai anak lelaki? Sapa orang bisi baka nuan di menua Israel? Nya alai nama kebuah nuan enda nyaga raja nuan? Laban siku orang udah tama ngagai kem kita, deka munuh tuan nuan.
16 Utai ti dikereja nuan nya enda manah. Aku besumpah dalam nama TUHAN ti idup, nuan patut diukum bunuh, laban nuan enda nyaga tuan nuan, ti udah ditata TUHAN. Uji peda nuan diatu, dini alai sangkuh raja enggau tepayan ai ti ngimbai pala iya?”
17 Saul ngelala munyi nyawa David, lalu iya nanya, “David, kati nya nuan, anak?” “Aku meh tu, Tuan Raja,” ku David nyaut.
18 Lalu ku David bejaku, “Tuan, nama kebuah nuan begagaika nembiak nuan? Nama utai ti udah dikereja aku ngagai nuan? Nama penyalah aku?
19 Nya alai awakka Tuan Raja, mendingka jaku aku. Enti sema TUHAN udah nyungkak nuan ngelaban aku, awakka Iya nerima siti piring; tang enti nuan disungkak mensia, awakka orang nya kena sumpah di mua TUHAN, laban sida sehari tu udah muru aku ari menua TUHAN, lalu ngasuh aku nyembah petara orang bansa bukai.
20 Nya alai, anang munuh aku jauh ari TUHAN; laban raja orang Israel keras deka munuh aku, baka ke ngasu burung ba sebelah bukit.”
21 Disaut Saul, “Aku udah salah. Pulai kitu, David, anak aku, laban aku enggai agi ngemediska nuan, laban nuan sayauka nyawa aku sehari tu. Dinga nuan, aku udah beli, lalu udah ngereja utai ti balat jai!”
22 Disaut David, “Tu sangkuh nuan, Tuan Raja. Asuh siku ari bala nuan mansang kitu, ngambi sangkuh tu.
23 TUHAN ngupah genap iku orang ke tetap ati sereta lurus; laban sehari tu TUHAN udah nyerahka nuan ngagai jari aku, tang aku enda ngenataika jari ngagai orang ke udah ditata TUHAN.
24 Dinga nuan, laban sehari tu aku udah sayauka nyawa nuan, awakka TUHAN mega sayauka nyawa aku, lalu awakka Iya ngelepaska aku ari semua penusah.”
25 Lalu ku Saul bejaku enggau David, “Beberekat meh nuan, David, anak aku! Nuan deka ngereja mayuh macham utai, lalu nuan deka mujur dalam semua utai nya.” David mupuk, lalu Saul pulai ke rumah.
 
Bagi 27
David Diau Enggau Orang Pilistin
1 Ku David berunding dalam ati diri, “Saul tetap deka munuh aku ila. Manah aku rari ngagai menua Pilistin. Nya baru Saul deka badu agi begigaka aku di menua Israel, lalu aku rari ari jari iya.”
2 Nya alai David enggau enam ratus iku bala iya angkat tekala nya lalu mansang ngagai Akis anak Maok, raja nengeri Gat.
3 David enggau bala iya sereta enggau bini anak sida lalu diau di Gat. David mai bini iya ke dua iku enggau iya, Ahinoam ke asal ari Jesril, enggau Abigail, balu niang Nabal, ke asal ari Karmel.
4 Lebuh Saul ninga David udah rari ngagai Gat, iya lalu enggai agi begigaka iya.
5 Ku David bejaku enggau Akis, “Enti nuan amat pangan aku, beri aku siti nengeri alai aku diau. Aku enda ibuh diau begulai enggau nuan ba indu nengeri tu, tuan.”
6 Nya alai Akis meri iya nengeri Siklak. Nya meh kebuah Siklak diempu raja orang Judah nyentuk ngagai sehari tu.
7 David diau di menua Pilistin setaun empat bulan.
8 Sekumbang iya ti diau dia, David enggau bala iya selalu nyerang orang Gesur, Girsi, enggau Amalek. Orang tu endang lama udah diau di menua nya. Iya ngayau ngagai menua nya nyentuk ngagai Sur, terus ngagai menua Ejip,
9 munuh semua orang ke lelaki, sida ke indu, lalu ngambi jelu bedus, jelu sapi, keledai enggau unta, nyengkaum kain baju. Udah nya iya pulai baru ngagai Akis.
10 Lalu ku Akis nanya iya, “Kini ke nuan udah ngayau sekali tu?” David lalu madahka diri udah ngayau ngagai selatan menua Judah, tauka ngagai menua raban peturun Jerahmil, tauka ngagai menua orang Ken.
11 David selalu munuh semua orang, lelaki enggau indu, ngambika sida nadai mai berita ngagai Gat, enggai ke sida madahka utai ti udah dikereja iya enggau bala iya. Nya meh utai ti dikereja David sekumbang iya ti diau di menua Pilistin.
12 Tang Akis ngarapka David, ku iya berunding, “David balat dipegedika bansa iya empu di menua Israel. Nya kebuah iya deka bekereja ke aku seumur idup.”
 
Bagi 28
1 Nyau kelama udah bekau nya, orang Pilistin ngempuruka bala soldadu sida, deka nyerang orang Israel, lalu ku Akis bejaku enggau David, “Nuan nemu, nuan enggau bala nuan, deka enggau aku mansang beperang.”
2 Ku David bejaku enggau Akis, “Barang ku jaku; ila baru nuan meda jamah aku.” Lalu ku Akis bejaku enggau David, “Manah nya! Aku deka ngasuh nuan nyadi jejaga aku seumur idup.”
 
Saul Betanya Ngagai Manang
3  Lebuh maya nya Samuel endang udah mati. Lalu semua orang Israel udah ngulit lalu nguburka iya di nengeri iya empu di Ramah, lalu Saul endang udah muru semua orang ke tau tujum enggau semua manang ari menua Israel.
4 Bala soldadu orang Pilistin begempuru lalu nirika kem sida di Sumen. Saul lalu ngempuruka orang Israel lalu nirika kem ba Bukit Gilboa.
5 Lebuh Saul meda bala soldadu orang Pilistin, iya balat takut.
6 Lalu lebuh Saul betanya ngagai TUHAN, TUHAN enda nyaut iya, nemuka dalam mimpi, tauka ngena Urim enggau Tumim, tauka ngenanabi.
7 Udah nya Saul lalu bejaku enggau bala pemesai iya, “Giga siku indu ke tau tujum, ngambika aku betanya ngagai iya.” “Bisi siku di Endor,” ku sida nyaut iya.
8 Saul lalu nukar gari diri, kena iya nyaru diri baka gamal orang bukai. Lebuh hari nyau petang, iya mai dua iku orang ari bala iya, lalu mansang betemu enggau indu nya. “Tanyaka ngagai semengat orang ke udah mati, lalu padahka ngagai aku utai ti deka nyadi,” ku iya bejaku enggau indu nya. “Kangauka semengat orang ke disebut aku nama.”
9 Ku indu nya nyaut, “Nuan tentu nemu utai ti udah dikereja Saul, pasal iya ke muai semua orang ke tau tujum, enggau sida manang ari menua Israel. Nya alai, nama kebuah nuan deka manjuk aku, lalu ngasuh aku diukum bunuh?”
10 Udah nya Saul lalu besumpah. “Aku besemaya dalam nama TUHAN ti idup, nuan enda kena ukum ketegal utai tu,” ku iya madahka ngagai  indu nya.
11 “Sapa orang ke patut dikangauka aku?” ku indu nya nanya. “Samuel,” ku Saul nyaut.
12 Lebuh indu nya meda Samuel, iya nyerauh, lalu bejaku enggau Saul, “Nama kebuah nuan nipu aku? Nuan tu Raja Saul!”
13 “Anang takut!” ku Saul bejaku enggau iya. “Nama utai ti dipeda nuan?” “Aku meda semengat siku orang pansut ari dalam tanah,” ku indu nya nyaut.
14 “Baka ni ku gamal semengat orang nya?” ku Saul nanya. “Orang nya tuai,” ku indu nya nyaut. “Iya ngena siti baju ti panjai.” Nya baru Saul nemu orang nya Samuel. Iya lalu nyungkurka diri ke tanah, masa iya.
15 Ku Samuel bejaku enggau Saul, “Nama kebuah nuan ngachau aku, lalu ngasuh aku pulai baru?” Disaut Saul, “Aku balat kena laban penusah! Orang Pilistin nyerang aku, lalu Allah Taala udah ninggalka aku. Iya nadai agi nyaut aku, nemuka ngena sida nabi tauka ngena mimpi. Nya alai aku ngangauka nuan, minta nuan madahka utai ti patut dikereja aku.”
16 Ku Samuel bejaku, “Nama kebuah nuan ngangauka aku lebuh TUHAN udah ninggalka nuan, lalu nyadi munsuh nuan?
17 TUHAN udah ngereja ngagai nuan, utai ti diasuh Iya padahka aku ngagai nuan. Iya udah ngambi perintah ari jari nuan, lalu udah meri perintah nya ngagai David.
18 Nuan enda ngasika pesan TUHAN, lalu enda ngeluska orang Amalek, sama enggau semua utai ti dikembuan sida. Nya kebuah TUHAN ngereja utai tu ngagai nuan diatu.
19 Iya deka nyerahka nuan enggau orang Israel ngagai orang Pilistin. Pagila nuan enggau bala anak nuan deka begulai enggau aku, lalu TUHAN mega deka nyerahka bala soldadu orang Israel ngagai orang Pilistin.”
20 Saul lalu tekala nya rebah lalu garing-garing ba tanah, laban iya takutka utai ti udah disebut Samuel. Iya lembut tulang, laban iya nadai makai utai sehari nya, enggau semalam-malam nya.
21 Indu nya lalu mansang ngagai iya, lalu lebuh iya meda Saul balat amat takut, iya lalu bejaku enggau Saul, “Tuan, aku berambunka nyawa ngereja utai ti diasuh nuan.
22 Aku diatu minta nuan ngereja utai ti dipinta aku; awakka aku nyendiaka pemakai ke nuan. Nuan enda tau enda makai, ngambika nuan ulih bejalai.”
23 Saul lalu madahka diri enggai makai, ku iya, “Aku enggai makai.” Tang bala pemesai iya, enggau indu nya mujuk iya makai. Nyau kelama, nya baru iya nurutka jaku sida, angkat ari tanah, lalu duduk ba katil.
24 Indu nya lalu beguai-guai munuh siku anak sapi, ti udah digalau iya. Udah nya iya lalu ngambi tepung, nyendiaka tepung nya, lalu manggang roti ti enda beragi.
25 Iya lalu ngenahka pemakai nya di mua Saul enggau bala pemesai iya makai. Sida lalu makai. Malam nya sida lalu mupuk.
 
Bagi 29
David Ditulak Orang Pilistin
1 Orang Pilistin lalu ngempuruka semua bala soldadu sida di Apek, lalu orang Israel nirika kem sida ba mata ai ba Lebak Jesril.
2 Raja orang Pilistin ke lima iku nya lalu mansang mai bala sida, beratus iku enggau beribu iku dalam siti-siti raban. David enggau bala iya bejalai di belakang, sama enggau Raja Akis.
3 Bala kepala soldadu orang Pilistin tepedaka seduai iya, lalu nanya, “Nama pengawa orang Hebrew nya ditu?” Akis lalu nyaut, “Iya tu David, siku pemesai Raja Saul orang Israel. Iya endang lama udah enggau aku. Aku nadai kala nemu iya bisi udah ngereja penyalah kenyau ari iya datai ngagai aku.”
4 Tang bala tuai soldadu orang Pilistin pedis ati ngagai Akis, lalu ku sida bejaku enggau iya, “Asuh orang nya pulai ngagai nengeri ti udah diberi nuan ngagai iya. Anang ngasuh iya enggau kitai beperang. Kada enda iya deka nguing ngelaban kitai lebuh kitai bamuk lagi. Tu peluang ti manah kena iya munuh bala kitai lalu minta diri dikerinduka tuan iya.
5 Iya tu David, orang ke dipuji sida ke indu ngena lagu lebuh sida betanda, “Saul udah munuh beribu iku, tang David udah munuh bepuluh ribu iku.’ “
6 Akis lalu mesanka David, lalu ku iya bejaku enggau David, “Aku besumpah dalam nama Allah Taala ti idup, ke disembah orang Israel. Nuan udah taluk ngagai aku. Aku endang gaga ati deka mai nuan mansang beperang. Aku nadai kala nemu nuan bisi udah ngereja penyalah kenyau ari nuan datai kitu ngagai aku. Tang sida raja ti bukai enda ngasuh nuan.
7 Nya alai, pulai meh nuan enggau selamat ke rumah, lalu anang ngereja utai ti tau ngasuh sida enda lantang ati.”
8 David lalu nyaut, “Nama penyalah aku, tuan? Enti munyi ku nuan, aku endang nadai udah kala ngereja penyalah kenyau ari terubah hari aku bekereja ke nuan, nama kebuah aku enda tau enggau nuan ngelaban munsuh nuan? Nuan endang tuan enggau raja aku. “
9 “Aku besetuju,” ku Akis nyaut. “Aku ngira nuan taluk baka melikat Allah Taala. Tang sida raja ti bukai udah bejaku madahka nuan enda tau enggau kami beperang.
10 Nya alai, David, semua kita ke udah ninggalka Saul lalu udah datai ngagai aku, angkat tumu pagila, lalu mupuk ari tu rerak tawas pagila.”
11 Nya alai David enggau bala iya lalu mupuk tumu pagi hari siti, deka mulaika diri ngagai menua Pilistin. Orang Pilistin lalu mupuk ngagai Jesril.
 
Bagi 30
Beperang Ngelaban Orang Bansa Amalek
1 Dua hari udah bekau nya, David enggau bala iya lalu datai baru di Siklak. Orang bansa Amalek udah nyerang selatan menua Judah, enggau nengeri Siklak, nunu nengeri nya
2 lalu nangkap semua orang ke indu. Sida nadai munuh orang, tang nabanka semua orang lebuh sida ninggalka nengeri nya.
3 Lebuh David enggau bala iya datai dia, sida nemu nengeri nya udah ditunu, lalu bini sida, anak lelaki enggau anak indu sida udah ditabanka munsuh.
4 David enggau bala iya lalu enda ngetu-ngetu nyabak datai ke sida nyau lepi.
5 Indah bini David ke dua iku, Ahinoam seduai Abigail, deh ditabanka munsuh.
6 David balat tusah, laban bala iya balat amat ringat ketegal sida lenyau anak bini, lalu sida deka nuku iya ngena batu. Tang David bekering ba TUHAN Allah Taala iya.
7 Lalu ku David bejaku enggau Imam Abiatar anak Ahimelek, “Bai epod kitu ngagai aku.” Abiatar lalu mai epod ngagai iya.
8 David lalu betanya ngagai TUHAN, “Kati tau aku ngagai bala perumpak nya? Kati aku ulih tetitihka sida?” Ku TUHAN nyaut, “Titihka sida. Nuan ulih tetitihka sida, lalu ngelepaska bala orang ke ditangkap sida.”
9 Nya alai David enggau enam ratus iku bala iya lalu mupuk. Lebuh sida datai ba sungai Besor, sekeda sida lalu tinggal dia.
10 David enggau empat ratus iku bala iya lalu majakka pejalai sida. Nyadi sida ke dua ratus iku nya nyau kelalu lelak, enda ulih meraka sungai nya, lalu sida ninggalka diri.
11 Bala David lalu tetemuka siku orang Ejip di menua nya, lalu sida mai iya ngagai David. Sida meri iya makai enggau ai irup,
12 meri iya salai buah ara mimit, enggau dua gupung salai buah anggur. Lebuh iya udah badu makai, iya lalu berasai kering baru. Iya nadai makai, nadai ngirup tiga hari terit.
13 David lalu nanya iya, “Sapa nama tuan nuan, lalu ari ni penatai nuan?” “Aku tu orang Ejip, ulun orang Amalek,” ku iya nyaut. “Tuan aku ninggalka aku tiga hari tu udah, laban aku sakit.
14 Kami udah ngerumpak menua Kereti di selatan menua Judah, enggau menua raban peturun Kalep, lalu kami nunu Siklak.”
15 “Kati nuan deka nguluka aku ngagai bala perumpak nya?” ku David nanya iya. “Ka, enti nuan besemaya dalam nama Allah Taala, enda munuh aku, tauka nyerahka aku ngagai tuan aku,” ku iya nyaut.
16 Iya lalu nguluka David ngagai sida. Nyadi bala perumpak nya udah ngachir ba sebelah menua nya, makai, ngirup, lalu ngerami diri ti udah ngerampas mayuh amat perapasan ari menua Pilistin enggau menua Judah.
17 Tumu pagi hari siti, David lalu nyerang sida, ngelaban sida nyentuk ngagai lemai hari nya. Kelimpah ari empat ratus iku orang ke nepan unta, ke ngerarika diri, nadai siku sida ulih rari.
18 David lalu ngambi pulai baru semua orang enggau semua utai ti udah ditabanka orang Amalek, nyengkaum bini iya ke dua iku.
19 Utai sida nadai lenyau siti. David lalu mai semua anak lekaki enggau anak indu bala iya pulai, enggau semua utai ti udah dirampas orang Amalek.
20 Iya mega ngambi pulai baru semua jelu bedus, enggau semua jelu sapi. Bala iya lalu ngasuh raban jelu tupi bejalai dulu ari sida. Ku sida, “Tu enggi David magang!”
21 Udah nya David lalu pulai ngagai dua ratus iku bala iya ke kelalu lepi bejalai enggau iya, lalu udah ninggalka diri ba sungai Besor. Sida mansang ngambat David enggau bala iya. David lalu mansang ngagai sida, lalu betabi enggau sida, gaga ati.
22 Tang sekeda orang ke jai, ti udah bejalai enggau David lalu bejaku, “Sida nadai bejalai enggau kitai, nya alai kami enggai meri sida perapasan ti udah ulih kami, tang sida tau ngambi bini enggau anak sida, lalu angkat ari tu.”
23 Tang ku David nyaut, “Menyadi, enggai nyadi kita baka nya enggau utai ti udah diberi TUHAN ngagai kitai! Iya udah nyaga kitai, lalu udah nyerahka bala perumpak ngagai jari kitai.
24 Nadai orang deka mendingka kita ba pekara tu! Semua utai enda tau enda dibagi bela. Orang ke tinggal ngemataka bekal, diberi ungkup ngemayuh enggi orang ke enggau beperang.”
25 David ngaga tu nyadika adat, lalu berengkah ari nya, adat nya mengkang dititihka orang Israel.
26 Lebuh David pulai ngagai Siklak, iya ngirumka sekeda perapasan nya ngagai pangan iya, iya nya bala tuai orang Judah, ngena pesan tu, “Tu pemeri ke nuan, ari perapasan ti udah dirampas aku ari bala munsuh TUHAN.”
27 Iya ngirumka utai nya ngagai orang di Betel, orang di Ramah di selatan menua Judah, enggau ngagai orang di nengeri Jatir,
28 Aroer, Sipmot, Estemoa,
29 enggau di Rakal, ngagai raban peturun Jerahmil, Ken,
30 enggau ngagai orang di nengeri Hormah, Borasan, Atak,
31 enggau Hebron. Iya ngirumka utai nya ngagai semua endur ti udah ditengah iya enggau bala iya.
 
Bagi 31
Pemati Saul Enggau Bala Anak Lelaki Iya
1 Nyadi orang Pilistin bamuk ngelaban orang Israel ba Bukit Gilboa. Mayuh amat orang Israel mati dia.
2 Orang Pilistin lalu ulih tetitihka Saul enggau anak lelaki iya, lalu munuh Jonatan, Abinadap, enggau Malkisua, anak lelaki Saul ke tiga iku.
3 Balat amat orang bamuk ngelingi Saul, lalu Saul empu kena laban laja munsuh, lalu balat amat bakal.
4 Ku iya bejaku enggau nembiak ke mai senyata iya, “Sintak pedang nuan, lalu rejangka pedang nya ngagai aku, enggai ke orang kapir nya beduan aku.” Tang nembiak nya enggai. Nya alai Saul lalu ngambi pedang iya empu, lalu ngerejang diri ngena  pedang nya.
5 Lebuh nembiak nya meda Saul udah mati, iya mega ngerejang diri ngena pedang iya empu, lalu mati sama enggau Saul.
6 Nya meh gaya Saul, anak lelaki iya ke tiga iku, nembiak ke mai senyata ke iya, enggau semua bala Saul mati sehari nya.
7 Lebuh orang Israel ke ba sepiak-sepiak Lebak Jesril, enggau di timur Sungai Jordan, ninga bala soldadu orang Israel udah rari, lalu Saul enggau bala anak iya udah mati, sida lalu ninggalka nengeri sida, lalu rari. Udah nya orang Pilistin datai, lalu nguan nengeri nya.
8 Sehari udah bekau sida ke bamuk, orang Pilistin lalu ngambi utai ari bangkai orang ke mati. Sida lalu nemu bangkai Saul enggau anak lelaki iya ke tiga iku ba Bukit Gilboa.
9 Sida mumpung pala Saul, muka baju kebal iya, lalu ngasuh bala seruan mai utai nya ngagai semua menua Pilistin, madahka berita manah nya ngagai engkeramba enggau ngagai orang Pilistin.
10 Udah nya sida ngengkahka senyata Saul dalam rumah sembiang petara Astarte, lalu ngelantakka bangkai iya ba dinding nengeri Bet-san ngena paku lawang.
11 Tang lebuh orang di Jabes, di menua Giliat ninga utai ti udah dikereja orang Pilistin ngagai Saul,
12 semua orang ke berani angkat lalu bejalai semalam-malam nya ngagai Bet-san. Sida nurunka bangkai Saul enggau anak lelaki iya ari dinding nya, mai sida pulai baru ngagai Jabes, lalu nunu bangkai sida dia.
13 Udah nya sida ngambi tulang sida, lalu nguburka tulang nya di baruh kayu tamaris di nengeri nya, lalu bepasa tujuh hari.