PENGULU
 
Jaku Pemuka
Bup  Pengulu* ngundan jerita lama pasal orang Israel berengkah ari maya penyarut ti balat nyadi di menua Israel, lebuh orang Israel nyerang menua Kanaan, nyentuk ngagai maya orang Israel bisi raja. Cherita tu madahka pasal utai ti dikereja bujang berani orang Israel. Sida nya dikumbai “Pengulu.” Tang nyauka semua sida nya tuai serang magang, lalu ukai orang ke ngatur pechara. Siku ari sida ke tebilang agi nya Samson. Utai ti dikereja iya bisi ditulis dalam bagi 13-16.

Batang utai ti dipelajarka kitai ari bup tu nya pasal orang Israel ke mujur lebuh sida taluk ngagai Allah Taala. Lebuh sida enda taluk ngagai Allah Taala, sida alah. Tang kitai ulih belajarka utai ti lebih agi ari nya dalam bup tu. Lebuh orang Israel enda taluk ngagai Allah Taala, lalu sida kena tinggang penusah, Allah Taala endang seruran sedia deka nyelamatka sida, lebuh sida nesal ati lalu pulai baru ngagai Iya.
 
Ripih Isi Bup Tu
Utai ti nyadi nyentuk ngagai maya pemati Josua (1.1-2.10)
Bala pengulu orang Israel (2.11-16.31)
Utai ti nyadi (17.1-21.25)
 
Bagi 1
Raban Bansa Judah Enggau Simeon Ngalahka Adonibesek
1 Udah bekau pemati Josua, orang Israel lalu betanya ngagai TUHAN, “Sapa deka bejalai nguluka kami nyerang orang Kanaan?”
2 Ku TUHAN nyaut, “Raban bansa Judah deka nguluka kita. Aku udah meri menua nya ngagai jari sida.”
3 Ku raban bansa Judah bejaku enggau raban bansa Simeon, “Aram mansang sama enggau kami ngagai menua ti udah diberi ngagai kami, ngambika kitai sama nyerang orang Kanaan. Udah nya baru kami bejalai enggau kita, ngagai menua ti udah diberi ngagai kita.” Nya alai raban bansa Simeon
4 enggau raban bansa Judah lalu sama mansang nyerang. TUHAN ngasuh sida menang ngelaban orang Kanaan enggau orang Peris, lalu sida ngalahka sepuluh ribu iku munsuh di Besek.
5 Sida tetemuka Adonibesek di Besek, lalu nyerang iya.
6 Adonibesek rari, tang sida ngagai iya, nangkap iya, lalu netak semua tunjuk indu jari enggau tunjuk indu kaki iya.
7 Ku Adonibesek bejaku, “Tujuh puluh iku raja, ti udah ditetak tunjuk indu jari enggau tunjuk indu kaki, udah beputikka pemakai di baruh mija aku. Diatu Allah Taala udah ngereja ngagai aku utai ti udah dikereja aku ngagai sida.” Adonibesek lalu dibai ngagai Jerusalem, lalu iya mati dia.
 
Raban Bansa Judah Ngalahka Jerusalem Enggau Hebron
8 Raban bansa Judah nyerang Jerusalem, lalu ngalahka nengeri nya.
9 Udah nya sida nyerang orang Kanaan ti diau di menua ti bebukit, ba kaki bukit, enggau di menua ti rangkai di selatan.
10 Sida nyerang orang Kanaan ti diau di nengeri Hebron, ti dikumbai Kiriat-arba dulu menya. Dia sida ngalahka raban peturun Sheshai, Ahiram enggau Talmai.
 
Otnil Ngalahka Nengeri Debir
11 Raban bansa Judah angkat ari nya, lalu nyerang nengeri Debir, ti dikumbai Kiriat-seper lebuh maya nya.
12 Siku ari bala sida ke benama Kalep lalu bejaku, “Aku deka ngasuh anak dara aku Aksah jadi enggau lelaki ke ulih ngalahka Kiriat-seper.”
13 Otnil anak Kenas, lalu ngalahka nengeri nya. Nyadi Kenas nya adi Kalep. Kalep lalu meri anak dara iya Aksah ngagai Otnil nyadika bini Otnil.
14 Ba hari seduai iya nikah, Otnil lalu ngasuh Aksah  minta ari apai iya Kalep sebidang tanah. Aksah nurun ari keledai iya, lalu Kalep nanyaka utai ti dikedekaka iya.
15 Ku Aksah nyaut, “Aku minta mata ai, laban tanah ti udah diberi nuan ngagai aku rangkai nadai ai.” Nya alai Kalep meri ngagai Aksah mata ai ti di ulu enggau ti di ili.
 
Raban Bansa Judah Enggau Raban Bansa Benjamin Menang
16 Bala peturun mentua Moses, iya nya orang Ken, lalu mansang sama enggau orang Judah ari Jeriko, iya nya nengeri ti mayuh kayu engkerema, ngagai menua puang tunga ke selatan nengeri Arat di menua Judah. Sida lalu ngentapka diri dia begulai enggau orang Amalek.
17 Raban bansa Judah mansang enggau raban bansa Simeon, lalu sida ngalahka orang Kanaan ti diau di nengeri Sepat. Sida nyumpah nengeri nya, ngerusak lalu meri nama Hormah ngagai nengeri nya.
18-19 TUHAN nyaup raban bansa Judah, lalu sida ngalahka menua ti bebukit. Tang sida enda ngalahka  Gasa, Askelon, tauka Ekron, tauka menua ti ngelingi nengeri nya. Orang nya diau ba sebelah tebing tasik, bisi kerita perang ti digaga ari besi. Nya kebuah orang Judah enda ulih muru sida ari menua nya.
20 Munyi ti udah diatur Moses, Hebron diberi ngagai Kalep, lalu Kalep muru tiga bengkah raban peturun Anak ari nengeri nya.
21 Tang raban bansa Benjamin enda muru orang Jebus ti diau di Jerusalem, lalu bansa orang nya agi mengkang diau begulai enggau orang Benjamin kenyau ari maya nya menya.
 
Raban Bansa Epraim Enggau Manasi Ngalahka Betel
22-23 Raban bansa Epraim enggau Manasi nyerang nengeri Betel, ti dikumbai Lus lebuh maya nya menya. TUHAN nyaup sida. Sida ngasuh orang matau nengeri nya.
24 Lebuh bala pematau nya meda siku orang pansut ari nengeri nya, sida lalu bejaku enggau iya, “Padahka ngagai kami chara tama ngagai nengeri tu, ngambika kami enda ngemediska nuan.”
25 Orang nya lalu madahka ngagai sida. Raban bansa Epraim enggau raban bansa Manasi lalu munuh semua orang dalam nengeri nya, tang sida enda munuh orang nya tauka sida sebilik.
26 Orang nya lalu mansang ngagai menua orang Iti, ngaga sebuah nengeri dia, lalu meri nama nengeri nya Lus. Nama nya mengkang nyentuk ngagai sehari tu.
 
Bansa Ke Enda Diburu Orang Israel
27 Raban bansa Manasi enda muru bansa orang ke diau dalam nengeri Bet-sean, Taanak, Dor, Iblim, Megido, enggau nengeri ti mit ti semak dia. Orang Kanaan agi mengkang diau di nengeri nya.
28 Lebuh orang Israel nyau mansang kering agi, sida mejalka orang Kanaan bekereja ke sida, tang sida mengkang enda muru semua orang Kanaan ari menua nya.
29 Raban bansa Epraim enda muru orang Kanaan ti diau di nengeri Geser. Nya alai orang Kanaan agi mengkang diau dia begulai enggau sida.
30 Raban bansa Sebulun enda muru orang ke diau di nengeri Kitron, enggau Nahalal. Nya alai orang Kanaan agi mengkang diau dia begulai enggau sida, lalu dipejalka sida bekereja ke sida.
31 Raban bansa Aser enda muru orang ke diau dalam nengeri Ako, Sidon, Ahlap, Aksip, Helbah, Apek enggau Rehob.
32 Raban bansa Aser diau begulai enggau orang Kanaan ti nguan menua nya, laban sida enda muru orang Kanaan ari menua nya.
33 Raban bansa Naptali enda muru orang ke diau dalam nengeri Bet-semes enggau Bet-anat. Sida diau begulai enggau orang Kanaan ti nguan menua nya, tang sida mejalka orang Kanaan bekereja ke sida.
34 Orang Amor mejalka raban bansa Dan diau di menua ti bebukit, lalu enda nyagi sida nurun ngagai menua emperan.
35 Orang Amor majak diau di Aijalon, Sa-albim, enggau di Har-heres, tang raban bansa Epraim enggau Manasi merintah sida, lalu mejalka sida bekereja ke sida.
36 Tunga ke utara Sela, garis entara menua orang Edom  ti di utara, ngerenchah Genting Akrabim.
 
Bagi 2
Melikat TUHAN Di Bokim
1 Melikat TUHAN bejalai ari Gilgal ngagai Bokim, lalu bejaku enggau orang Israel, “Aku udah mai kita pansut ari menua Ejip, lalu udah mai kita ngagai menua ti udah disemaya Aku ngagai aki ini kita. Ku Aku, ‘Aku enggai mungkir ari sempekat Aku enggau kita.
2 Kita enda tau sekali-kali ngaga sempekat enggau orang ke diau di menua tu. Kita enda tau enda ngeruntuhka alta sida.’ Tang kita enda ngereja utai ti diasuh Aku, tang ngereja utai ti enda disagi Aku!
3 Nya alai Aku madahka ngagai kita diatu, Aku enggai muru bansa orang tu ari mua kita lebuh kita nyerang. Sida deka nyadi munsuh kita, lalu kita deka disintak panjuk sida lalu nyembah petara sida.”
4 Lebuh melikat nya udah nyebut nya, semua orang Israel lalu belabuh nyabak magang.
5 Nya kebuah endur nya dikumbai Bokim. Sida lalu ngenjuk piring ngagai TUHAN ba endur nya.
 
Pemati Josua
6 Josua lalu ngasuh orang Israel mupuk. Sida mupuk lalu ngambu menua ti udah diungkupka ngagai sida.
7 Lebuh Josua agi idup, orang Israel majak nyembah TUHAN. Indah lebuh iya udah mati, deh sida agi nyembah TUHAN, seagi-agi orang ke tuai agi meruan idup, iya nya orang ke udah meda semua pengawa ti besai ti udah dikereja TUHAN ti orang Israel.
8 Josua anak Nun, ke nembiak TUHAN, mati lebuh umur iya seratus sepuluh taun.
9 Iya dikuburka ba tanah iya empu di Timnat-serah, di menua ti bebukit di menua Epraim, tunga ke utara Bukit Gaas.
10 Orang ke rebak iya udah mega mati magang, lalu rebak orang ke nangkanka sida enda agi ingatka TUHAN, tauka pasal utai ti udah dikereja TUHAN ti orang Israel.
 
Orang Israel Badu Agi Nyembah TUHAN
11 Udah nya orang Israel bedosa ngelaban TUHAN, lalu belabuh nyembah Baal.
12 Sida ninggalka TUHAN Allah Taala aki ini sida, Allah Taala ti udah mai sida pansut ari menua Ejip, lalu sida belabuh nyembah petara bukai, iya nya petara bansa orang ke diau ngelingi sida. Sida meremi ngagai petara nya, lalu TUHAN ringat.
13 Sida ninggalka TUHAN, lalu nyembah Baal enggau Astarte.
14 Nya alai TUHAN pedis ati ngagai orang Israel, lalu nejuka bala perumpak nyerang lalu ngerumpak sida. Iya nejuka munsuh ti ngelingi sida ngalahka sida, lalu orang Israel enda ulih nyaga diri agi.
15 Genap kali sida mansang beperang, TUHAN ngelaban sida, munyi ti udah dipadahka Iya. Sida amat merinsa.
16 Udah nya TUHAN meri orang Israel tuai ke ngelepaska sida ari kuasa bala perumpak.
17 Tang orang Israel enggai mendingka bala tuai sida. Orang Israel enda tetap ati ngagai TUHAN, lalu sida nyembah petara bukai. Aki ini sida udah ngasika pesan TUHAN, tang rebak ti baru tu jampat amat badu ngasika pesan TUHAN.
18 Lebuh TUHAN meri siku tuai ngagai orang Israel, TUHAN nyaup tuai nya, lalu ngelepaska orang Israel ari jari munsuh sida, seagi tuai nya meruan idup. TUHAN kasihka sida, laban sida bedemuh natka pemerinsa ditekanka orang.
19 Tang lebuh tuai nya mati, orang Israel lalu pulai baru ngagai pendiau sida ke lama, lalu nyadi jai agi ari rebak ti dulu ari sida. Sida meremi lalu nyembah petara bukai, lalu majak kieh ati nitihka jalai sida ke jai.
20 Udah nya TUHAN lalu pedis ati ngagai orang Israel. Ku Iya, “Bansa orang tu udah ngelanggar sempekat ti udah diasuh Aku titihka bala aki ini sida. Nya alai laban sida enda ngasika Aku,
21 Aku enggai agi muru bansa ti agi diau di menua tu lebuh Josua mati.
22 Aku deka ngena bansa orang nya ngabas sekalika orang Israel deka nitihka jalai Aku, baka aki ini sida, tauka enggai.”
23 Nya alai TUHAN nejuka bansa orang nya mengkang diau di menua nya. TUHAN enda nyagi Josua menang ngelaban sida, lalu Iya pen enda mega muru bansa orang nya lebuh Josua udah mati.
 
Bagi 3
Bansa Ke Agi Diau Di Menua Nya
1 Nya alai TUHAN nejuka sekeda orang bansa bukai diau di menua nya, kena Iya nguji orang Israel ti enda teleba beperang di menua Kanaan.
2 Iya ngereja nya ngambika genap serak orang Israel nemu beperang, kelebih agi sida ke nadai kala beperang.
3 Orang bansa bukai ti agi diau di menua nya nyengkaum orang Pilistin ke mengkang diau dalam lima buah nengeri, semua orang Kanaan, orang Sidon, enggau orang Ibi ti diau ba Bukit Lebanon berengkah ari Bukit Baal Hermon nyentuk ngagai Lebo-hamat.
4 Sida nya dikena nguji orang Israel, kena nemu enti sida deka tauka enggai ngasika pesan ti udah diberi TUHAN ngagai aki ini sida, ngena Moses.
5 Nya alai orang Israel ngentapka diri diau begulai enggau orang Kanaan, orang Iti, orang  Amor, orang Peris, orang Ibi, enggau orang Jebus.
6 Sida jadi enggau bansa orang nya, lalu nyembah petara sida.
 
Otnil
7 Orang Israel enda agi ingatka TUHAN Allah Taala sida. Sida bedosa ngelaban Iya, lalu nyembah engkeramba Baal enggau Aserah.
8 Nya alai TUHAN ringat ngagai orang Israel, lalu nejuka Raja Kusan-risataim ari menua Mesopotamia ngalahka sida, lalu iya merintah sida lapan taun.
9 Udah nya orang Israel nyabak ngangauka TUHAN. Iya lalu ngasuh siku orang ngelepaska sida. Orang nya Otnil, anak adi Kalep ke benama Kenas.
10 Roh TUHAN bekuasa ba Otnil, lalu iya nyadi tuai orang Israel. Otnil ngayau, lalu TUHAN ngasuh iya menang ngelaban raja menua Mesopotamia.
11 Menua nya lalu nadai agi pengachau empat puluh taun. Otnil lalu mati.
 
Ehut
12 Orang Israel lalu bedosa baru ngelaban TUHAN. Ketegal nya, TUHAN ngasuh Eglon ti nyadi raja orang Moap kering agi ari orang Israel.
13 Eglon lalu beserakup enggau orang Amon sereta enggau orang Amalek. Sida ngalahka orang Israel lalu ngerampas Jeriko, iya nya nengeri ti mayuh kayu engkerema.
14 Orang Israel diperintah Eglon lapan belas taun.
15 Udah nya orang Israel nyabak ngangauka TUHAN, lalu Iya ngasuh siku orang ngelepaska sida. Orang nya Ehut anak Gera. Orang nya chawit. Iya datai ari raban bansa Benjamin. Orang Israel lalu ngasuh Ehut betemu enggau Eglon, raja Moap, mai pemeri ngagai iya.
16 Ehut lalu ngaga siti pedang ti bemata dua; pemanjai pedang nya kira 50 sentimeter. Iya nanchangka pedang nya ba rusuk kanan iya, dilamun pekayan iya.
17 Udah nya iya mai pemeri ngagai Eglon. Nyadi Eglon tu orang ke gemu amat.
18 Lebuh Ehut udah meri pemeri ngagai Eglon, Ehut lalu ngasuh orang ke udah mai pemeri nya pulai.
19 Tang lebuh Ehut datai ba batu ti udah diukir, iya nikal baru ngagai Eglon, lalu bejaku enggau iya, “Tuan Raja, aku bisi pesan ti resia ti deka dipadahka aku ngagai nuan.”
Raja nya lalu ngasuh bala orang gaji iya pansut, ninggalka seduai iya Ehut kediri.
20 Ehut lalu datai semak ngagai raja ke benung duduk. Ehut lalu bejaku, “Aku bisi pesan ari Allah Taala ke nuan.” Raja lalu bediri.
21 Ehut lalu nyintak pedang ari rusuk kanan iya ngena jari kiba, lalu ngerejangka pedang nya ngagai perut raja.
22 Pedang nya ampuh, ngebuska tubuh raja, datai ke ulu pedang nya nyau ampuh ke dalam lemak raja. Ehut nejuka pedang nya mengkang ba perut raja.
23 Ehut lalu pansut, nikupka pintu bilik raja lalu ngunchi pintu nya.
24 Lebuh bala orang gaji datai, sida nemu pintu nya dikunchi. Tang sida ngumbai raja bisi di dalam, agi dalam bilik mandi.
25 Sida lalu nganti, tang lebuh raja mengkang enda muka pintu, sida ngambi kunchi lalu muka pintu nya, lalu tepedaka raja sida mati garing-garing ba geladak.
26 Sekumbang bala orang gaji benung nganti raja muka pintu, Ehut majak ngerarika diri. Iya mansa batu ti udah diukir nya, lalu rari ngagai Seirah.
27 Lebuh iya datai di Seirah, di menua ti bebukit di menua Epraim, iya lalu nyepu terumpit kena iya megau orang Israel, deka mai sida mansang beperang. Udah nya iya lalu nguluka sida nurun ari menua ti bebukit nya.
28 Ku iya, “Titihka aku, laban TUHAN udah nyerahka orang Moap ngagai jari kitai.” Sida lalu nitihka Ehut, lalu ngalahka orang Moap ba pemeraka Sungai Jordan. Nadai siku munsuh ditejuka sida meraka sungai nya.
29 Sehari nya sida munuh kira sepuluh ribu iku bala soldadu orang Moap ti pemadu kering. Nadai siku sida ulih ngerarika diri.
30 Nya meh hari sida ngalahka orang Moap. Menua lalu nadai agi pengachau lapan puluh taun.
 
Samgar
31 Tuai ke nangkanka Ehut nya Samgar anak Anat. Samgar mega ngelepaska orang Israel. Iya ngereja pengawa nya lebuh iya munuh enam ratus iku orang Pilistin ngena tungkat ti dikena iya ngibun sapi.
 
Bagi 4
Deborah Seduai Barak
1 Lebuh Ehut udah mati, orang Israel lalu bedosa baru ngelaban TUHAN.
2 Nya alai TUHAN nejuka sida dialahka Jabin, siku raja orang Kanaan ke merintah di nengeri Hasor. Orang ke nyadi tuai ke bala soldadu iya nya Sisera, ti diau di Haroset-ha-goiim.
3 Jabin bisi semilan ratus buah kerita perang ti digaga ari besi, lalu iya balat amat nekan sereta merinsaka orang Israel lebuh iya merintah sida dua puluh taun. Udah nya orang Israel nyabak ngangauka TUHAN.
4 Nyadi Deborah, bini Lapidot, nya nabi, lalu iya bekereja nyadi hakim ke orang Israel lebuh maya nya menya.
5 Iya selalu duduk di baruh sepun kayu engkerema, ba entara nengeri Ramah enggau nengeri Betel, di menua ti bebukit di menua Epraim, lalu orang Israel datai kia minta iya ngatur pekara sida.
6 Nyadi sekali Deborah mesanka Barak anak Abinoam datai ngagai iya ari nengeri Kedes di menua Naptali. Ku iya bejaku enggau Barak, “TUHAN Allah Taala ke disembah orang Israel udah meri pesan tu ngagai nuan: ‘Bai sepuluh ribu iku orang ari raban bansa Naptali enggau Sebulun, lalu uluka sida ngagai Bukit Tabor.
7 Aku deka mai Sisera, tuai soldadu Jabin, lalu ngasuh iya beperang ngelaban nuan ba Sungai Kison. Iya deka mai kerita perang iya enggau bala soldadu iya, tang Aku deka ngasuh nuan menang.’ “
8 Barak lalu nyaut, “Aku sigi mupuk, enti nuan deka mupuk enggau aku, tang enti nuan enggai mupuk enggau aku, aku enda mupuk.”
9 Disaut Deborah, “Barang ku jaku. Aku deka mupuk enggau nuan, tang nuan enda dibasa orang ketegal pemenang nya, laban TUHAN deka nyerahka Sisera ngagai indu.” Deborah lalu mupuk enggau Barak ngagai Kedes.
10 Barak mesanka raban bansa Sebulun enggau raban bansa Naptali datai ngagai Kedes, lalu sepuluh ribu iku orang nitihka iya. Deborah lalu mupuk enggau Barak.
11 Ba urung maya nya Heber, orang Keni udah nirika kem iya ba semak Kedes, semak kayu oak ti di Sananim. Iya udah ninggalka orang Keni ti bukai, iya nya orang ke ari peturun Hobap, ipar Moses.
12 Lebuh Sisera nemu Barak udah niki ngagai Bukit Tabor,
13 iya mesanka semilan ratus buah kerita perang iya ti digaga ari besi, enggau semua soldadu iya, lalu ngasuh sida angkat ari Haroset-ha-goiim lalu mansang ngagai Sungai Kison.
14 Deborah lalu bejaku enggau Barak, “Mupuk nuan! TUHAN deka nguluka nuan! Sehari tu TUHAN deka ngasuh nuan menang ngelaban Sisera.” Barak lalu nurun ari Bukit Tabor, mai sepuluh ribu iku soldadu.
15 Lebuh Barak enggau bala soldadu iya nyerang, TUHAN lalu ngasuh Sisera, kerita perang enggau bala soldadu iya begau abis ati. Sisera nurun ari kerita perang iya, lalu rari bejalai kaki.
16 Barak begagaika kerita perang enggau bala soldadu Sisera nyentuk ngagai Haroset-ha-goiim, lalu semua bala soldadu Sisera abis dibunuh. Nadai siku sida ditejuka idup.
17 Sisera rari ngagai langkau kain Jael, bini Heber orang Keni laban Jabin, ti nyadi raja di Hasor, udah bebaik enggau suku raban bansa Heber.
18 Jael pansut lalu ngambat Sisera. Ku iya bejaku enggau Sisera, “Tama ngagai langkau kain aku. tuan. Anang takut.” Sisera lalu tama, lalu Jael ngelalaika iya ari belakang kain tirai.
19 Ku Sisera bejaku enggau Jael, “Beri aku ngirup. Aus amat aku tu.” Jael lalu muka siti sarang ai tusu, lalu meri iya ngirup. Jael lalu ngelalaika Sisera baru.
20 Udah nya Sisera bejaku enggau iya, “Bediri di mua pintu langkau kain. Enti orang bisi datai lalu nanyaka enti orang bisi ditu, padahka nadai.”
21 Sisera nyau udah lelak amat, nya alai iya jenak amat tinduk. Jael lalu ngambi tukul enggau siti tiang bantil langkau kain, mansang begadai-gadai ngagai Sisera, lalu mantangka tiang bantil nya ba tepisan Sisera, kebus ke tanah. Sisera lalu mati.
22 Lebuh Barak datai ngiga Sisera, Jael lalu pansut ngambat Barak. Ku Jael bejaku enggau Barak, “Datai kitu! Aku deka madahka ngagai nuan orang ke digiga nuan.” Barak lalu tama enggau Jael, lalu iya tepedaka Sisera garing-garing ba tanah, mati, dipantang ngena tiang bantil langkau kain ti ngebuska pala iya.
23 Sehari nya Allah Taala ngasuh orang Israel ngalahka Jabin raja orang Kanaan.
24 Sida lalu bebendar agi ngelaban Jabin, datai ke nyau mati dibunuh sida.
 
Bagi 5
Pantun Deborah Seduai Barak
1 Ba hari nya Deborah seduai Barak anak Abinoam bepantun ngena lagu tu:
2 “Pujika TUHAN! Orang Israel mutus ati deka belaban. Orang Israel gaga ati nyerahka diri mansang beperang.
3 Pendingka tu ulih kita bala raja enggau pemerintah! Aku deka belagu lalu nebah musik ke TUHAN Allah Taala ke disembah orang Israel.
4 TUHAN, lebuh Nuan ninggalka bukit di Seir, lebuh Nuan pansut ari menua Edom, tanah berenyang, lalu hari ujan. Sigi amat, ai tebubuh ari mua hari.
5 Bukit berenyang di mua TUHAN ti datai ari Sinai, di mua TUHAN Allah Taala ke disembah orang Israel.
6 Lebuh maya Samgar anak Anat, lebuh maya Jael, kerita unta nadai agi bejalai nengah menua tu lalu orang nadai agi bejalai nengah jalai raya.
7 Nengeri orang Israel nadai agi orang nguan, Deborah. Nengeri nya puang nyentuk ngagai maya nuan datai, baka indai orang Israel.
8 Lebuh orang Israel nyembah petara bukai perang lalu nyadi di menua Israel. Ari empat puluh ribu iku orang Israel, nadai siku sida mai terabai tauka sangkuh.
9 Ati aku endang semampai ingatka bala tuai soldadu orang Israel, enggau bala orang ke gaga ati nyerahka diri mansang beperang. Puji TUHAN!
10 “Padahka pasal utai nya kita ke nepan keledai ti burak, ke duduk ba atas penuduk ti ba belakang keledai nya, enggau kita ke bejalai kaki.
11 Pendingka orang mayuh ke richah ba tisi telaga ke madahka pasal pemenang TUHAN pemenang orang Israel! Udah nya, bala nembiak TUHAN bebaris nurun ari nengeri sida.
12 Deborah, uluka bala! Uluka sida! Belagu lebuh kitai bejalai! Mansang ke mua meh nuan Barak anak Abinoam. Bai orang tangkap nuan kebukai!
13 Udah nya orang ke tetap ati deka nurun ngagai bala tuai sida. Bala nembiak TUHAN datai ngagai Iya sedia deka beperang.
14 Sida datai ari Epraim mansang ngagai lebak, ngentudika raban bansa Benjamin enggau bala sida. Bala tuai soldadu nurun ari Machir, bala pemesai nurun ari Sebulun.
15 Bala tuai raban bansa Isakar datai enggau Deborah. Sigi amat. Isakar datai, lalu Barak mega datai, lalu sida nitihka Barak ngagai lebak nya. Tang suku raban bansa ti diturunka Reuben beserekang penemu. Sida enda nemu mutuska runding sekalika sida datai tauka enda.
16 Nama kebuah sida ninggalka diri enggau bedus sida? Deka mendingka bala pengibun bedus ngumbai bedus sida? Sigi amat. Suku raban bansa ti diturunka Reuben udah beserekang penemu. Sida enda nemu mutuska runding sekalika sida datai tauka enda.
17 Raban bansa Gat diau di timur Sungai Jordan, lalu raban bansa Dan mengkang diau semak kapal sida. Raban bansa Aser diau semak tebing tasik. Sida mengkang diau ba tebing tasik.
18 Tang raban bansa Sebulun enggau Naptali berambunka nyawa beperang.
19 Ba Taanak, semak sungai Megido, bala raja datai lalu nyerang. Bala raja orang Kanaan nyerang, tang sida enda nabanka perengka pirak.
20 Bintang nyerang ari langit. Lebuh sida bejalai meraka langit, sida beperang ngelaban Sisera.
21 Sida anyut ditabanka ai bah di Kison, Sungai Kison ti deras. Aku deka bejalai, lalu majak bejalai, ngena pengering!
22 Udah nya bala kuda datai belanda, kaki sida redup-redup ngindik tanah.
23 “Sumpah Meros,” ku melikat TUHAN bejaku, “siti sumpah ke orang ke diau dia, laban sida nadai datai nyaup TUHAN, nyadi soldadu lalu beperang ngarika Iya.
24 “Indu ti pemadu beberekat nya Jael, bini Heber ari raban bansa Ken, indu ke pemadu beberekat ari semua indu ke diau dalam langkau kain.
25 Sisera minta ai irup, tang Jael meri iya ai tusu. Jael mai ngagai iya ai tusu ngena mangkuk ti manah gaya.
26 Ba jari iya sepiak, iya mai siti tiang bantil langkau kain, lalu enggau jari iya sepiak, iya mai tukul. Iya ngembalka Sisera lalu mechahka kerubung pala iya. Iya ngebuska pala Sisera.
27 Sisera angkat nyerugang, rebah lalu mati semak kaki Jael. Semak kaki Jael, iya angkat nyerugang lalu rebah. Iya mati lalu rebah ke tanah.
28 Indai Sisera nyenguk ari jenila. Iya nilik ari  belakang jenila. “Nama kebuah kerita perang iya lalu apin datai?” ku iya nanya. “Nama kebuah kuda iya lalu apin pulai?”
29 Pangan iya ke pemadu pintar lalu nyaut iya, lalu ku iya betanduka runding dalam ati diri,
30 “Sida semina begigaka utai ti deka ditangkap sereta dibagi, siku tauka dua iku indu ke genap iku soldadu, kain ti berega ke Sisera, kain ti udah disulam kena malut rekung kuin.”
31 “Awakka semua munsuh Nuan mati baka nya, O TUHAN, tang awakka bala pangan Nuan manchar baka mata hari ti benung niki! Menua nya lalu nadai agi pengachau empat puluh taun.
 
Bagi 6
Gideon
1 Orang Israel lalu bedosa baru ngelaban TUHAN. Nya alai Iya nejuka orang Midian merintah sida tujuh taun.
2 Orang Midian kering agi ari orang Israel, lalu orang Israel belalai ari orang Media dalam lubang gua enggau ba sebelah bukit.
3 Genap kali orang Israel nanam utai, orang Midian enggau orang Amalek, enggau raban bansa orang ke diau di menua puang datai, lalu nyerang sida.
4 Bala orang nya nirika kem sida di menua nya, lalu ngerusak semua utai ti ditanam nyentuk ngagai Gasa di selatan. Sida nabanka semua jelu bedus, sapi enggau keledai, lalu nadai ninggalka utai kena orang Israel beridup.
5 Bala orang nya datai mai jelu tupi enggau langkau kain sida, ngemayuh buntak. Sida enggau jelu unta sida nyau enda ulih diitung agi. Sida datai lalu ngerusak menua.
6 Orang Israel nadai daya ngelaban sida. Orang Israel lalu nyabak ngangauka TUHAN.
7 Lebuh orang Israel nyabak ngangauka TUHAN ketegal orang Midian,
8 TUHAN lalu ngirumka siku nabi ngagai orang Israel, lalu ku nabi nya bejaku ngagai sida, “Munyi tu ku jaku TUHAN Allah Taala ke disembah orang Israel: Aku udah mai kita pansut ari menua Ejip, ari endur alai kita ke nyadi ulun;
9 lalu Aku udah ngelepaska kita ari jari orang Ejip, enggau ari jari semua orang ke nekanka pengidup kita, lalu muru sida lebuh kita majakka pejalai kita, lalu meri menua sida ngagai kita;
10 lalu ku Aku bejaku ngagai kita, ‘Aku tu TUHAN Allah Taala kita; kita enda tau nyembah petara orang Amor, ke bempu menua ti alai kita diau.’ Tang kita enda mendingka Aku.”
11 Melikat TUHAN datai di Oprah lalu duduk di baruh sepun kayu oak ti diempu Joas, ke ari raban peturun Abieser, lebuh anak iya Gideon benung nungku gandum belalai dalam pitan anggur, ngambika orang Midian enda meda gandum nya.
12 Melikat TUHAN pegari di mua iya lalu bejaku, “Nuan ke kering sereta berani, TUHAN bisi enggau nuan!”
13 Gideon lalu nyaut, “Enti TUHAN bisi enggau kami, nama kebuah utai tu nyadi ba kami? Lalu dini alai semua pengawa Iya ti badas ti dipadahka aki ini kami ngagai kami, lebuh sida nyebut, ‘Ukai enda TUHAN ti mai kami pansut ari menua Ejip?’ Tang diatu TUHAN udah muai kami, lalu nyerahka kami ngagai jari orang Midian.”
14 Udah nya TUHAN lalu bejaku enggau Gideon, “Bejalai nuan ngena semua pengering nuan, lalu lepaska orang Israel ari jari orang Midian. Aku diatu ngasuh nuan ngereja pengawa nya.”
15 Disaut Gideon, “Tang baka ni ku aku ulih ngelepaska orang Israel, TUHAN? Suku raban bansa aku pemadu lemi dalam raban bansa Manasi, lalu aku tu orang ke pemadu enda diguna orang dalam ruang bilik aku.”
16 Ku TUHAN nyaut, “Aku deka enggau nuan, lalu nuan deka ngalahka orang Midian, ngemudah nuan ti ngalahka siku orang.”
17 Ku Gideon nyaut, “Enti Nuan amat rinduka aku, beri aku siti tanda kena nunjukka Nuan, TUHAN, amat bejaku enggau aku.
18 Anang guai mupuk, nganti aku udah mai piring, lalu ngenjuk piring nya ngagai Nuan.” TUHAN lalu bejaku, “Aku deka nganti nuan.”
19 Gideon lalu pulai ke rumah, lalu manduk siku kambin ti agi biak. Iya ngambi sepuluh kilogram tepung, lalu ngaga roti ti enda beragi. Iya ngengkahka dagin nya ba bakul, kuah dalam periuk, mai utai nya ngagai melikat TUHAN di baruh kayu oak nya, lalu meri utai nya ngagai iya.
20 Ku melikat nya bejaku enggau iya, “Engkahka dagin enggau roti nya ba atas batu tu, lalu tuang kuah ba dagin enggau roti nya.” Gideon lalu ngereja nitihka asuh melikat nya.
21 Udah nya melikat TUHAN ngedarka tungkat iya, lalu negu dagin enggau roti nya ngena ujung tungkat nya. Api lalu pansut ari batu nya, lalu nganguska dagin enggau roti nya. Melikat nya lalu lesap.
22 Nya baru Gideon nemu diri amat udah meda melikat TUHAN, lalu ku iya bejaku, “Nadai penyadi meh aku tu, O TUHAN Allah Taala, laban aku diatu udah meda mua melikat Nuan!”
23 Tang ku TUHAN bejaku enggau iya, “Anang irau; anang takut, nuan enda mati.”
24 Gideon lalu ngaga siti alta ke TUHAN ba endur nya, lalu iya ngumbai alta nya “TUHAN nya Pemaik.” (Alta nya agi mengkang bediri di Oprah diatu. Nengeri Oprah nya diempu raban peturun Abieser.)
25 Malam nya melikat TUHAN bejaku ngagai Gideon, “Bai sapi lelaki apai nuan, enggau siku agi sapi ti lelaki ti umur tujuh taun, runtuhka alta ti udah digaga apai nuan ke Baal, lalu tebang tanda petara indu Aserah, ti bediri ngimbai nya.
26 Gaga siti alta ti tegap ke TUHAN Allah Taala nuan ba atas jumpu tanah tu. Udah nya ambi sapi ti lelaki ti kedua, lalu tunu iya segala nyadika piring, ngena tiang Aserah ti deka ditebang nuan nya nyadika kayu api nuan.”
27 Gideon lalu mai sepuluh iku orang gaji iya lalu ngereja utai ti udah diasuh TUHAN. Iya ngereja nya lebuh malam hari, laban iya kelalu takutka sida sebilik, sereta takutka orang ke di nengeri nya enti iya ngereja pengawa nya lebuh siang hari.
28 Lebuh orang di nengeri nya dani pagi hari siti, sida nemu alta Baal enggau tiang Aserah udah ditebang, lalu sapi ti lelaki ti kedua udah ditunu ba alta ti udah digaga ba endur nya.
29 Sida lalu betanya ngagai pangan diri, “Sapa ngereja tu?” Sida mansik, lalu nemu utai nya udah dikereja Gideon anak Joas.
30 Udah nya sida lalu bejaku enggau Joas, “Bai anak nuan pansut kitu, ngambika kami munuh iya! Iya udah ngeruntuhka alta Baal lalu udah nebang tiang Aserah ti bediri ngimbai nya.”
31 Tang ku Joas bejaku enggau semua sida ke betemu enggau iya, “Kati kita setanah enggau Baal? Kati kita bejaku ngarika Baal? Barang sapa setanah enggau Baal deka dibunuh sebedau pagi hari pagila. Enti Baal amat petara, awakka iya empu bejaku ngarika diri empu, laban alta ti udah dirubuh nya enggi iya.”
32 Belabuh ari nya Gideon lalu dikumbai Jerubaal, laban ku Joas, “Awakka Baal empu bejaku ngarika diri empu, laban alta ti dirubuh nya endang enggi iya.”
33 Udah nya bala orang Midian, orang Amalek, enggau bala raban bansa ti diau di menua puang lalu ngelumuka bala sida, meraka Sungai Jordan, lalu nirika kem sida ba Lebak Jesril.
34 Roh TUHAN lalu bekuasa ba Gideon. Iya lalu nyepu terumpit mesanka bala raban peturun Abieser nitihka iya.
35 Iya ngasuh bala seruan bejalai nengah serata dua bengkah menua Manasi, mai sida nitihka iya. Iya ngasuh bala seruan bejalai ngagai raban bansa Aser, Sebulun enggau Naptali. Sida lalu datai nitihka Gideon.
36 Udah nya Gideon bejaku enggau Allah Taala, “Nuan madahka Diri udah mutuska runding deka ngena aku ngelepaska orang Israel.
37 Enti pia, aku ngengkahka bulu bedus ba tanah ba endur alai kami ke ngindik gandum tu. Enti pagila semina bulu bedus nya aja bisi lekat ambun, tang tanah ti ngelingi nya rangkai, nya baru aku deka nemu Nuan amat deka ngena aku ngelepaska orang Israel.”
38 Utai nya lalu nyadi. Lebuh Gideon dani tumu pagi hari siti, iya mulaska bulu bedus nya, lalu ai ti pansut ari bulu bedus nya chukup kena ngisi sigi mangkuk.
39 Udah nya Gideon bejaku enggau Allah Taala, “Anang ringat ngagai aku, tang awakka aku bejaku sekali agi. Beri aku peluang sekali agi ngabas utai tu ngena bulu bedus. Sekali tu, awakka bulu bedus nya rangkai, tang tanah ti ngelingi nya basah.”
40 Malam nya Allah Taala ngasuh bulu bedus nya rangkai, tang tanah nya basah laban ambun.
 
Bagi 7
Gideon Ngalahka Orang Midian
1 Nyadi sekali, Gideon enggau semua bala iya angkat tumu pagi, lalu nirika kem sida ngimbai mata ai di Harot. Nyadi orang Midian nirika kem sida ba lebak ti tunga ke utara ari sida, ngimbai bukit Moreh.
2 Ku TUHAN bejaku ngagai Gideon, “Bala nuan kelalu mayuh. Aku enggai ngasuh sida menang ngelaban orang Midian, enggai ke sida ngumbai diri menang ketegal pengering sida empu, lalu enggai muji Aku.
3 Padahka ngagai orang mayuh munyi tu, ‘Barang sapa takut, awakka iya pulai.’ “ Baka nya ku jalai Gideon nguji sida; lalu dua puluh dua ribu iku pulai. Ka semina sepuluh ribu iku agi tinggal.
4 Udah nya TUHAN lalu bejaku baru enggau Gideon, “Bala nuan agi kelalu mayuh. Bai sida ngagai ai. Din Aku deka nguji sida ke nuan. Enti Aku madahka ngagai nuan, ‘Orang tu deka bejalai enggau nuan,’ orang nya deka bejalai enggau nuan. Enti Aku madahka ngagai nuan, ‘Orang tu enda tau bejalai enggau nuan,’ iya enda bejalai enggau nuan.”
5 Gideon lalu mai sida ngagai ai. TUHAN lalu bejaku ngagai Gideon, “Seraraka semua orang ke ngirup baka ukui, ari sida ke nyerugang lalu ngirup.”
6 Tiga ratus iku sida ngauk ai ngena jari, lalu ngirup ai nya ari jari sida. Semua sida ti bukai nyerugang magang, lalu ngirup.
7 Ku TUHAN bejaku ngagai Gideon, “Aku deka ngelepaska nuan lalu ngasuh nuan menang ngelaban orang Midian ngena tiga ratus iku sida ke nilat ai baka ukui. Asuh semua sida ti bukai pulai.”
8 Gideon ngasuh semua orang Israel pulai, kelimpah ari sida ke tiga ratus iku nya. Semua bekal enggau terumpit sida ti bukai nya lalu diserahka sida ngagai orang ke tiga ratus iku nya. Nyadi kem orang Midian nya ba lebak ti ari baruh sida.
9 Malam nya TUHAN bejaku ngagai Gideon, “Angkat, lalu serang kem nya; laban Aku udah nyerahka kem nya ngagai jari nuan.
10 Tang enti nuan takut nyerang, bai nembiak nuan Purah, lalu mansang ngagai kem nya,
11 lalu pendingka utai ti disebut sida. Lebuh nuan udah mendingka utai ti disebut sida, nuan deka berani nyerang kem nya.” Gideon enggau nembiak iya Purah lalu nurun ngagai tisi kem munsuh.
12 Orang Midian, orang Amalek enggau orang ari raban bansa ti diau di menua puang nyau ngachir ba lebak nya, ngemayuh bala buntak, lalu jelu unta sida nyau enda ulih diitung, ngemayuh igi pasir ti ba tebing tasik.
13 Lebuh Gideon datai ba tisi kem nya, iya ninga siku orang madahka mimpi diri ngagai pangan iya. Ku orang nya bejaku, “Aku bisi mimpi, tepedaka siti tuku roti barli bebaring ngagai kem kitai, lalu ngerenchah sebuah langkau kain, ninggang lalu ngeruntuhka iya.”
14 Ku pangan orang nya nyaut, “Nya ukai utai bukai, tang pedang Gideon anak Joas, orang Israel! Allah Taala udah nyerahka orang Midian, enggau semua bala soldadu kitai ngagai jari iya!”
15 Lebuh Gideon ninga orang nya nusui mimpi diri, enggau reti mimpi nya, iya lalu besugang, lalu nyembah TUHAN. Iya lalu pulai ngagai kem orang Israel, lalu ku iya bejaku, “Angkat; laban TUHAN udah nyerahka bala soldadu orang Midian ngagai jari kita!”
16 Iya lalu magi tiga ratus iku bala iya ngagai tiga iti raban, lalu meri ngagai genap iku sida siti terumpit enggau sigi kebuk, ti ngundan siti sempun.
17 Ku iya madahka ngagai sida, “Malik ngagai aku, lalu kereja utai nitihka aku; lebuh aku datai ba tisi kem, kereja utai nitihka aku.
18 Lebuh aku enggau bala aku nyepu terumpit, kita mega nyepu terumpit kita ngelingi kem nya, lalu manjung, ‘Ke TUHAN enggau ke Gideon!’ “
19 Gideon enggau seratus iku bala iya lalu datai ba tisi kem munsuh ba urung tengah malam, lebuh bala jejaga baru udah betukar. Gideon enggau bala iya lalu nyepu terumpit sida, mechahka kebuk ti dipegai sida.
20 Semua tiga iti raban nya nyepu terumpit lalu mechahka kebuk sida, lalu megai sempun ngena jari kiba sida, lalu megai terumpit ti disepu sida ngena jari kanan sida, lalu manjung, “Pedang ke TUHAN enggau ke Gideon!”
21 Genap iku sida bediri enda nginsit ari endur diri ngelingi kem nya, lalu semua bala soldadu munsuh nyau beterauh rari.
22 Lebuh bala Gideon nyepu tiga ratus iti terumpit sida, TUHAN lalu nyungkak bala soldadu munsuh bepantapka pangan diri. Bala soldadu munsuh belanda tunga ngagai Saretan nyentuk ngagai Bet-sitah, nyentuk ngagai nengeri Abel-meholah semak Tabat.
23 Orang Israel ari raban bansa Naptali, Aser enggau ari dua bengkah raban bansa Manasi lalu dipesanka, lalu sida begagaika orang Midian.
24 Gideon lalu ngirumka bala seruan ngagai serata menua ti bebukit. Ku sida, “Nurun lalu serang orang Midian. Kita enda tau enda nan ba Sungai Jordan, enggau ba sungai ti mit nyentuk ngagai Bet-barah, ngambika orang Midian enda meraka sungai nya.” Bala orang Epraim lalu ditesau magang, lalu sida nan ba Sungai Jordan, enggau ba sungai ti mit nyentuk ngagai Bet-barah.
25 Sida nangkap dua iku tuai orang Midian, Orep seduai Sep. Sida munuh Orep ba Batu Orep, enggau Sep ba pitan anggur ti ba Sep. Sida majak begagaika orang Midian lalu mai pala Orep enggau pala Sep ngagai Gideon di timur Sungai Jordan.
 
Bagi 8
Orang Midian Alah
1 Udah nya orang Epraim lalu bejaku enggau Gideon, “Nama kebuah nuan enda mesanka kami lebuh kita mansang ngelaban orang Midian? Nama kebuah nuan ngaga kami baka nya?” Sida balat amat ngutuk iya.
2 Ku Gideon nyaut sida, “Utai ti ulih dikereja aku nya mit amat enti dibandingka enggau utai ti udah dikereja kita. Indah utai ti mimit aja ti dikereja kita orang Epraim, deh mayuh agi ari utai ti udah dikereja semua bala raban peturun Abieser.
3 Ulih kuasa Allah Taala, kita udah tebunuhka Orep seduai Sep, dua iku tuai orang Midian. Nama utai ti udah dikereja aku ti tau dibandingka enggau nya?” Lebuh iya nyebut nya, sida lalu badu agi ringat ngagai iya.
4 Lebuh maya nya Gideon enggau bala iya ke tiga ratus iku udah datai ba Sungai Jordan, lalu udah meraka sungai nya. Sida nyau lelak amat, tang agi majak begagaika munsuh.
5 Lebuh sida datai di Sukot, iya lalu bejaku enggau bala lelaki di nengeri nya, “Beri bala aku roti. Sida lelak, lalu aku benung begagaika Sebah seduai Salmuna, raja orang Midian.”
6 Tang ku bala tuai orang Sukot bejaku, “Nama kebuah kami enda tau enda meri bala soldadu nuan pemakai? Indah Sebah seduai Salmuna deh apin ditangkap kita.”
7 Gideon lalu bejaku, “Barang ku jaku! Lebuh TUHAN udah nyerahka Sebah enggau Salmuna ngagai jari aku, aku deka nyipat kita ngena duri enggau emperingat ti diambi ari menua puang!”
8 Gideon lalu bejalai terus ngagai Penuel, lalu minta roti ari orang dia. Tang orang di Penuel mega nyaut munyi orang ke di Sukot.
9 Gideon lalu bejaku enggau orang Penuel, “Lebuh aku udah menang lalu pulai kitu, aku deka ngeruntuhka menara tu!”
10 Lebuh maya nya Sebah seduai Salmuna bisi di Karkor sama enggau bala soldadu seduai iya. Ari semua bala soldadu raban bansa ti diau di menua puang, semina 15,000 iku aja agi tinggal; 120,000 iku udah dibunuh.
11 Gideon bejalai nengah jalai ti nisi menua puang, tunga ke timur ari Nobah enggau Jogbehah, lalu ngenyit nyerang, lebuh bala munsuh benung enda ngadang.
12 Sebah seduai Salmuna lalu rari; Gideon lalu nitihka seduai iya, nangkap seduai iya, lalu semua bala soldadu seduai iya begau abis ati.
13 Lebuh Gideon pulai ngayau nengah Genting Heres,
14 iya nangkap siku orang bujang ari Sukot, lalu nanyaka utai ari orang nya. Orang bujang nya lalu nuliska nama tujuh puluh tujuh iku tuai di Sukot.
15 Udah nya Gideon lalu mansang ngagai orang di Sukot, lalu bejaku enggau sida, “Kati kita ingatka diri ke enggai nyaup aku? Kita madahka diri enggai meri pemakai ngagai bala soldadu aku, laban kami apin tetangkapka Sebah seduai Salmuna. Peda kita, tu seduai iya!”
16 Udah nya iya lalu ngambi duri enggau emperingat ari menua puang, lalu nyipat bala tuai orang di Sukot ngena nya.
17 Iya mega ngeruntuhka kuta di Penuel, lalu munuh orang ke lelaki di nengeri nya.
18 Udah nya iya lalu nanya Sebah seduai Salmuna, “Baka ni ku gaya orang ke udah dibunuh seduai di Tabor?”
Ku seduai iya nyaut, “Sida baka gamal nuan - genap iku sida bela baka gamal anak raja.”
19 Ku Gideon bejaku, “Sida nya menyadi lelaki aku, anak indai aku. Aku besumpah, enti kita enda munuh sida, aku pen enda mega munuh seduai.”
20 Udah nya iya lalu bejaku enggau anak tuai iya ke benama Jeter, “Bunuh seduai iya!” Tang nembiak nya enda nyintak pedang iya. Iya takut, laban iya agi nembiak.
21 Udah nya Sebah seduai Salmuna lalu bejaku enggau Gideon, “Nuan empu munuh kami duai. Semina orang ke besai tuai aja ulih ngereja pengawa orang ke besai tuai.” Nya alai Gideon lalu munuh seduai iya, lalu ngambi perengka pengias ti ba rekung jelu unta seduai iya.
22 Udah bekau nya, orang Israel lalu bejaku enggau Gideon, “Laban nuan udah ngelepaska kami ari kuasa orang Midian, awakka nuan enggau peturun nuan merintah kami.”
23 Ku Gideon nyaut, “Aku enggai merintah kita, lalu anak aku pen enda mega merintah kita. TUHAN Empu deka merintah kita.”
24 Tang ku iya majakka jaku diri, “Awakka aku minta siti aja utai ari kita. Genap iku kita meri ngagai aku antin ti ulih kita.” (Orang Midian, baka orang bansa bukai ke diau di menua puang, bekenaka antin emas ba pending sida.)
25 Ku orang mayuh nyaut, “Kami gaga ati meri utai nya ngagai nuan.” Sida lalu nganchau selambar kain, lalu genap iku sida bela ngengkahka semua antin ti udah ulih sida, ba kain nya.
26 Antin emas ti diberi ngagai Gideon berat 18 kilogram, enda nyengkaum perengka pengias, tenggak, enggau kain ungu ti dikena raja orang Midian, tauka kungkung rekung ti ba rekung jelu unta sida.
27 Gideon lalu ngaga siti engkeramba ari emas nya, lalu ngengkahka engkeramba nya di nengeri iya empu, iya nya Oprah. Semua orang Israel lalu ninggalka Allah Taala, mupuk ngagai nengeri nya lalu nyembah engkeramba nya. Utai nya nyadika panjuk ke Gideon enggau sida sebilik.
28 Nya alai orang Midian alah laban orang Israel, lalu enda agi ngachau sida. Menua nya nadai agi pengachau empat puluh taun, nyentuk ngagai pemati Gideon.
 
Pemati Gideon
29 Gideon pulai lalu diau ba rumah iya empu.
30 Nyadi iya bisi tujuh puluh iku anak lelaki, laban iya mayuh bini.
31 Iya mega bisi siku indu simpan di Sekem. Indu nya ngadaka siku anak lelaki ke iya, lalu iya meri anak mit nya nama Abimelek.
32 Gideon anak Joas mati lebuh umur iya nyau tuai, lalu iya dikuburka ba lumbung apai iya Joas, di Oprah, nengeri ti diempu raban peturun Abieser.
33 Udah bekau pemati Gideon, orang Israel lalu enda tetap ati baru ngagai Allah Taala sida, lalu nyembah Baal. Sida ngaga Baal-berit nyadika petara sida.
34 Sida enda ingatka TUHAN Allah Taala sida ke udah ngelepaska sida ari kuasa semua munsuh ke ngelingi sida;
35 lalu sida enda ngayanka penaluk ngagai ruang bilik Gideon ke semua utai ti manah ti udah dikereja Gideon ke orang Israel.
 
Bagi 9
Abimelek
1 Anak Gideon ke benama Abimelek mansang ngagai nengeri Sekem, ngagai kaban belayan indai iya, lalu bejaku enggau sida, sereta enggau semua suku raban bansa indai iya,
2 munyi tu, “Ni bagi ti dipilih kita? Ngasuh tujuh puluh iku anak lelaki Gideon merintah kita, tauka diperintah orang siku aja? Ingat: aku tu endang darah-getah kita empu.”
3 Bala kaban belayan indai iya lalu bejaku ngarika iya pasal pekara nya enggau sida ke lelaki di Sekem, lalu sida mutuska runding deka nitihka Abimelek, laban iya kaban belayan sida empu.
4 Sida meri iya tujuh puluh singkap duit pirak ari rumah sembiang Baal-berit, lalu iya ngena duit nya ngaji orang ke kurang ajar, ke nitihka iya.
5 Iya lalu mansang ngagai rumah apai iya di Oprah, lalu munuh tujuh puluh iku bala menyadi iya empu, iya nya anak lelaki Gideon, ba atas sigi batu. Tang Jotam, iya nya anak bunsu Gideon belalai, lalu enda kena bunuh.
6 Udah nya bala orang ari Sekem enggau ari Bet-milo begempuru, lalu mansang ngagai kayu oak keramat sepun di Sekem, lalu nyiri Abimelek nyadi raja.
7 Lebuh Jotam ninga berita nya, iya mansang lalu bediri ba tuchung Bukit Gerisim, lalu ngangauka sida enggau nyawa ti inggar, “Pendingka aku, kita orang Sekem, ngambika Allah Taala mendingka kita!
8 Nyadi sekali, bala kayu mansang deka milih sapa ti deka dichiri sida nyadi raja. Ku sida bejaku enggau kayu kana, ‘Nuan nyadi raja kami.’
9 Ku kayu kana nyaut, ‘Enti aku nyadi raja kita, aku enda tau enda badu agi mansutka minyak ti dikena ngemesaika petara enggau mensia.’
10 Udah nya bala kayu lalu bejaku enggau kayu ara, ‘Awakka nuan datai kitu, lalu nyadi raja kami.’
11 Tang ku kayu ara nyaut, ‘Enti aku nyadi raja kita, aku enda tau enda badu agi mansutka buah aku ti manis.’
12 Nya alai bala kayu lalu bejaku enggau batang anggur, ‘Nuan datai kitu, lalu nyadi raja kami.’
13 Tang ku batang anggur nyaut, ‘Enti aku nyadi raja kita, aku enda tau enda badu agi mansutka wain ti ngasuh petara enggau mensia lantang ati.’
14 Nya alai semua kayu lalu bejaku enggau madang duri, ‘Nuan datai kitu, lalu nyadi raja kami.’
15 Ku madang duri nyaut, ‘Enti kita amat ngasuh aku nyadi raja kita, datai meh kita kitu ngambika aku nyaga kita. Enti kita enda datai kitu, api ti mau deka pansut ari dan aku ti beduri, lalu nganguska kayu sidar di Lebanon.’
16 Ku Jotam nampung jaku iya, “Kati kita amat manah ati lebuh kita ngasuh Abimelek nyadi raja? Kati kita amat bebasaka nama Gideon, lalu masa ruang bilik iya ngena jalai ti menyana, nitihka pemanah utai ti udah dikereja Gideon?
17 Kingatka tu ulih kita. Apai aku beperang ngarika kita. Iya berambunka nyawa diri ngelepaska kita ari kuasa orang Midian.
18 Tang sehari tu kita mutar ngelaban ruang bilik apai aku. Kita munuh tujuh puluh iku anak lelaki iya ba atas batu sigi, lalu kita nyiri Abimelek, anak apai aku enggau siku indu ke ulun, nyadi raja di Sekem laban Abimelek kaban belayan kita empu.
19 Nya alai, enti utai ti udah dikereja kita sehari tu ngagai Gideon enggau ngagai ruang bilik iya datai ari ati ti manah, awakka kita lantang ati enggau Abimelek, lalu Abimelek lantang ati enggau kita.
20 Tang enti enda, awakka api ti mau pansut ari Abimelek, lalu nganguska orang Sekem enggau orang Bet-milo, lalu awakka api ti mau pansut ari orang Sekem enggau Bet-milo, lalu nganguska Abimelek.”
21 Jotam lalu rari lalu diau di Beer laban iya takutka menyadi iya Abimelek.
22 Abimelek megai perintah di menua Israel tiga taun.
23 Udah nya Allah Taala ngasuh Abimelek enggau orang Sekem ringat ngagai pangan diri, lalu orang Sekem angkat ngelaban Abimelek.
24 Utai tu nyadi ngambika Abimelek enggau orang Sekem ti udah meransang Abimelek munuh tujuh puluh iku anak lelaki Gideon, bebayarka ukum penyalah ti udah dikereja sida.
25 Orang ke lelaki di Sekem lalu ngasuh orang ari bala sida ngipa Abimelek ba tuchung bukit, lalu sida ngerumpak semua orang ke mansa. Orang lalu madahka pekara nya ngagai Abimelek.
26 Lebuh Gaal anak Ebet enggau sida menyadi lelaki iya datai di Sekem, lalu bala orang Sekem andal ati ke iya.
27 Semua sida mansang ngagai kebun anggur sida, lalu ngetau buah anggur, ngaga wain, lalu begawai. Sida mansang ngagai rumah sembiang petara sida, alai sida ke makai ngirup, lalu ngeleseka Abimelek.
28 Ku Gaal bejaku enggau sida, “Sapa kitai tu alai kitai nyau betuaika Abimelek, lalu sapa Abimelek? Ukai enda iya nya anak Gideon! Lalu iya enggau Sebul ti nyadi pemesai iya bekereja ari baruh bala Hamor apai Sekem? Nya alai, nama kebuah kitai betuaika Abimelek?
29 Naka meh pemanah enti sema aku nyadi tuai sida! Aku tetap deka muai Abimelek! Aku tentu deka madahka ngagai iya, “Tambahka bala soldadu nuan. Pansut kitu lalu belaban!’ “
30 Sebul, ke merintah di nengeri nya, ringat lebuh iya ninga jaku Gaal.
31 Iya lalu ngasuh bala seruan betemu enggau Abimelek di Arumah, lalu nyebut ngagai iya munyi tu: “Gaal anak Ebet enggau bala menyadi iya udah datai di Sekem, lalu sida enda nyagi nuan tama ngagai nengeri nya.
32 Nya alai, nuan enggau bala nuan patut mupuk lebuh malam hari, lalu belalai di umai.
33 Pagila, lebuh tumbuh mata panas, kita angkat lalu nyerang nengeri nya enggau ngenyit. Udah nya, lebuh Gaal enggau bala iya mansang ngelaban nuan, serang sida enggau naka ulih nuan!”
34 Abimelek enggau bala iya lalu mupuk malam nya, dibagi ngagai empat bengkah raban, lalu sida belalai ba umai ari luar Sekem.
35 Lebuh Abimelek enggau bala iya meda Gaal pansut ari nengeri, lalu bediri ba pintu kuta nengeri nya, sida lalu angkat ari endur alai sida ke belalai.
36 Gaal tepedaka sida, lalu bejaku enggau Sebul, “Peda bala orang nyin nurun ari tuchung bukit!”
 “Nya ukai mensia,” ku Sebul nyaut. “Nya ayuk ba bukit.”
37 Gaal lalu bejaku baru, “Peda bala orang nyin nurun ari tuchung bukit. Siti raban bejalai nengah jalai ari kayu oak keramat ti diempu orang ke nemu nilit nasit!”
38 Udah nya Sebul lalu bejaku enggau Gaal, “Kini ke tunga mulut nuan ti temegah nya? Nuan empu ke nanyaka kebuah kitai betuaika Abimelek. Nyin bala orang ke dikeleseka nuan. Serang sida.”
39 Gaal lalu nguluka orang Sekem pansut, lalu ngelaban Abimelek.
40 Abimelek belanda mansang ngamuk Gaal. Gaal lalu rari. Mayuh amat orang bakal, nyentuk ngagai pintu kuta nengeri nya.
41 Abimelek diau di Arumah lalu Sebul muru Gaal enggau bala menyadi iya ari Sekem. Nya alai sida Gaal enda tau diau di nengeri nya agi.
42 Hari siti bala orang Sekem nurun ke umai. Lebuh orang madahka nya ngagai Abimelek,
43 Iya lalu mai bala iya, magi sida ngagai tiga bengkah raban, lalu ngipa orang Sekem ba umai. Lebuh Abimelek meda bala orang pansut ari nengeri nya, iya angkat ari endur alai iya ke belalai, lalu munuh bala orang nya.
44 Abimelek enggau raban iya beguai-guai mansang lalu bediri ba mua pintu nengeri nya, benung raban ti dua bengkah nyerang bala orang ke di umai, lalu munuh semua sida.
45 Abimelek nyerang nengeri nya sehari nya. Iya ngalahka nengeri nya, munuh orang ke diau dia, ngerubuh nengeri nya, lalu naburka garam ngagai tanah di nengeri nya.
46 Lebuh semua bala tuai orang ke dalam menara di Sekem ninga berita nya, sida lalu rari ngagai kuta rumah sembiang Baal-beret.
47 Orang lalu madahka ngagai Abimelek pasal orang Sekem ti udah begempuru dia.
48 Abimelek lalu niki ngagai Bukit Salmon mai bala iya. Dia iya ngambi siti kapak, netak lalu merekaska dan kayu, lalu ngesan dan kayu nya. Iya lalu bejaku enggau bala iya, “Kereja enggau jampat utai ti udah dikereja aku.”
49 Semua sida lalu netak dan kayu. Sida lalu nitihka Abimelek, lalu nugungka dan kayu nya ngimbai kuta nya. Sida nyelup tugung kayu nya, ngambika orang ke diau dalam kuta nya mati. Semua orang dalam kuta nya mati magang, kira seribu iku lelaki enggau indu.
50 Udah nya Abimelek mansang ngagai Tebes, ngelulung lalu ngalahka nengeri nya.
51 Nyadi di nengeri nya bisi siti kuta ti tegap. Semua lelaki enggau indu di nengeri nya, nyengkaum bala tuai sida, belanda ngagai kuta nya. Sida lalu ngunchi diri di dalam, lalu niki ke perabung.
52 Lebuh Abimelek datai nyerang kuta nya, iya mansang ngagai pintu, deka nunu kuta nya.
53  Tang siku indu muai sigi batu kisar ngagai pala Abimelek, mechahka pala iya.
54 Abimelek lalu ngangauka orang bujang ke mai senyata iya, ku iya, “Sintak pedang nuan, lalu bunuh aku, enggai ke orang ngumbai aku mati dibunuh indu.” Orang bujang nya lalu ngerejang Abimelek ngena pedang, lalu iya mati.
55 Lebuh orang Israel meda Abimelek udah mati, sida lalu pulai ke rumah.
56 Nya meh jalai Allah Taala malas Abimelek ketegal penyalah ti udah dikereja iya ngagai apai iya, lebuh iya munuh tujuh puluh iku sida menyadi lelaki iya.
57 Allah Taala mega ngasuh orang Sekem natka pemerinsa ketegal penyai sida, munyi ti ku Jotam anak Gideon, lebuh iya nyumpah sida.
 
Bagi 10
Tola
1 Lebuh Abimelek udah mati, Tola anak Puah, uchu Dodo, datai ngelepaska orang Israel. Iya datai ari raban bansa Isakar, lalu iya diau di Samir, di menua ti bebukit di Epraim.
2 Iya nyadi tuai orang Israel dua puluh tiga taun. Udah nya iya mati, lalu dikuburka di Samir.
 
Jair
3 Udah bekau Tola, Jair lalu datai ari Giliat. Iya nguluka orang Israel dua puluh dua taun.
4 Iya bisi tiga puluh iku anak lelaki, ke nepan tiga puluh iku keledai. Sida bisi tiga puluh buah nengeri di menua Giliat. Nengeri nya agi dikumbai Tumpuk Pendiau Jair.
5 Jair mati, lalu dikuburka di Kamon.
 
Jeptah
6 Orang Israel lalu bedosa baru ngelaban TUHAN, laban sida nyembah Baal enggau Astarte, sereta nyembah mayuh bengkah petara orang Siria, petara orang Sidon, petara orang Moap, petara orang Amon, enggau petara orang Pilistin. Sida ninggalka TUHAN, lalu badu agi nyembah Iya.
7 Nya alai TUHAN ringat ngagai orang Israel, lalu nejuka orang Pilistin enggau orang Amon ngalahka sida.
8 Lapan belas taun bansa orang nya nekanka pengidup sereta merinsaka semua orang Israel ti diau di menua orang Amor di timur Sungai Jordan, di menua Giliat.
9 Orang Amon meraka Sungai Jordan nyerang raban bansa Judah, Benjamin, enggau Epraim. Israel balat amat tusah.
10 Udah nya orang Israel nyabak ngangauka TUHAN, ku sida, “Kami udah bedosa ngelaban Nuan, laban kami udah ninggalka Nuan ti Allah Taala kami, lalu udah nyembah bala petara Baal.”
11 TUHAN lalu nyaut sida munyi tu: “Orang Ejip, orang  Amor, orang Amon, orang Pilistin,
12 orang Sidon, orang Amalek, enggau orang Maon udah nekanka pengidup kita dulu menya, lalu kita nyabak ngangauka Aku. Kati Aku nadai udah kala ngelepaska kita ari jari sida?
13 Tang taja pia, kita mengkang ninggalka Aku, lalu nyembah petara bukai. Nya alai, Aku enggai agi ngelepaska kita.
14 Kangauka bala petara ti udah dipilih kita. Awakka sida ngelepaska kita ari penusah.”
15 Tang ku orang Israel bejaku enggau TUHAN, “Kami udah bedosa. Kereja meh sebarang utai ti deka dikereja Nuan, tang lepaska kami sehari tu.”
16 Nya alai sida muai semua petara orang bansa bukai, lalu nyembah TUHAN. TUHAN lalu ringat meda pemerinsa orang Israel.
17 Udah nya bala soldadu orang Amon sedia deka nyerang, lalu nirika kem di Giliat. Orang Israel lalu begempuru, lalu nirika kem sida di Mispah, di menua Giliat.
18 Dia orang Israel enggau bala tuai sida nanya pangan diri, “Sapa deka nguluka kitai ngelaban orang Amon? Barang sapa nguluka kitai, deka nyadi tuai ke semua orang di Giliat.”
 
Bagi 11
1 Jeptah, siku soldadu ti berani, ke datai ari Giliat, nya anak indu sundal. Apai iya benama Giliat
2 lalu Giliat bisi anak lelaki bukai ari bini iya empu, lalu lebuh bala anak iya mansang besai, sida muru Jeptah ari rumah. Ku sida bejaku enggau iya, “Nuan enda tau bempu reta tengkira apai kami laban nuan tu anak indu bukai.”
3 Jeptah lalu rari ari bala menyadi iya, lalu diau di menua Top. Dia iya ulih narit ati bala orang ke nadai guna, lalu sida belelang enggau iya.
4 Nyau ke lama udah bekau nya, orang Amon nyerang orang Israel.
5 Lebuh perang nya nyadi, bala tuai orang di Giliat mansang ngambi Jeptah pulai ari menua Top.
6 Ku sida bejaku enggau iya, “Kami minta nuan nguluka kami ngelaban orang Amon.”
7 Tang ku Jeptah nyaut, “Kita udah balat amat begedika aku, datai ke kita nyau muru aku ari rumah apai aku. Nama kebuah kita datai ngagai aku diatu, lebuh kita dituntung penusah?”
8 Ku sida nyaut Jeptah, “Kami nguing ngagai nuan diatu laban kami deka ngasuh nuan bejalai enggau kami ngelaban orang Amon, lalu nguluka semua orang di Giliat.”
9 Ku Jeptah nyaut sida, “Enti kita mai aku pulai, lalu ngasuh aku ngelaban orang Amon, lalu TUHAN ngasuh aku menang, aku deka merintah kita.”
10 Ku sida nyaut, “Kami besetuju. Awakka TUHAN nyadika saksi kami.”
11 Jeptah lalu mupuk enggau bala tuai orang Giliat. Orang Giliat lalu ngasuh iya merintah sereta nyadi tuai sida. Jeptah lalu nyebut, di Mispah, utai ti dikedekaka iya ari orang Giliat, di mua TUHAN.
12 Udah nya Jeptah lalu ngasuh bala seruan bejalai ngagai raja menua Amon, ngasuh sida nyebut munyi tu: “Nama laya nuan enggau kami? Nama kebuah nuan nyerang menua kami?”
13 Raja menua Amon lalu nyaut jaku ti dibai bala seruan Jeptah, “Lebuh orang Israel pansut ari menua Ejip, sida ngerampas menua aku, kenyau ari Sungai Arnon nyentuk ngagai Sungai Jabok, enggau Sungai Jordan. Diatu kita enda tau enda meri menua nya pulai baru ngagai aku ngena chara ti alus.”
14 Jeptah lalu ngasuh bala seruan iya betemu enggau raja menua Amon baru
15 mai saut tu, “Nuan enda tau ngumbai orang Israel udah ngerampas menua Moap tauka menua Amon.
16 Baka tu ku gaya utai ti udah nyadi. Lebuh orang Israel pansut ari menua Ejip, sida bejalai nengah menua puang ngagai Teluk Akaba, lalu datai di Kades.
17 Sida lalu ngasuh bala seruan betemu enggau raja menua Edom, minta pemendar bejalai meraka menua iya. Tang raja menua Edom enggai ngemendarka sida. Sida mega minta pemendar ari raja menua Moap, tang iya mega enggai ngemendarka sida nengah menua iya. Nya alai orang Israel diau di Kades.
18 Udah nya sida lalu bejalai nengah menua puang, ngelaungka menua Edom, enggau menua Moap, datai ke sida nyau datai ba tisi menua Moap muak ari timur, di seberai Sungai Arnon. Sida lalu nirika kem sida dia, tang sida enda meraka Sungai Arnon, laban sungai nya nyadika garis entara menua orang Moap.
19  Udah nya orang Israel lalu ngasuh bala seruan bejalai ngagai Sihon, raja orang  Amor ke merintah di Hesbon, minta iya ngemendarka sida bejalai nengah menua iya.
20 Tang Sihon enggai ngemendarka orang Israel meraka. Iya lalu ngempuruka semua bala soldadu iya, nirika kem sida di Jahas, lalu nyerang orang Israel.
21 Tang TUHAN Allah Taala ke disembah orang Israel, nyerahka Sihon enggau bala soldadu iya ngagai jari orang Israel, lalu orang Israel ngalahka sida. Nya alai orang Israel lalu bempu semua menua orang Amor ti diau di menua nya.
22 Sida nguan semua menua orang Amor berengkah ari Arnon di selatan nyentuk ngagai Sungai Jabok di utara, enggau ari menua puang ti di timur nyentuk ngagai Sungai Jordan di barat.
23 Nya alai, TUHAN Allah Taala ke disembah orang Israel muru orang  Amor ngarika bala nembiak Iya, iya nya orang Israel.
24 Kati nuan nguji ngambi menua nya pulai baru? Nuan tau bempu sebarang menua ti udah diberi petara nuan Chemos ngagai nuan. Tang kami deka bempu semua menua ti udah dialahka TUHAN Allah Taala kami, ke kami.
25 Kati nuan ngumbai diri manah agi ari Balak anak Sipor, raja orang Moap? Kati iya bisi udah kala nyakap orang Israel? Kati iya bisi udah kala beperang ngelaban kami?
26 Orang Israel udah nguan Hesbon enggau Aroer tiga ratus taun, enggau semua nengeri ti mit ti ngelingi dua buah nengeri nya, enggau semua nengeri ti ba tebing Sungai Arnon. Nama kebuah nuan enda ngambi semua nengeri nya ngelamatu?
27 Aku nadai udah ngereja utai ti salah ngagai nuan. Nuan empu ti ngereja utai ti salah, laban nuan ngepunka perang tu ngelaban aku. Awakka TUHAN, ti nyadi Hakim, meri pemutus penemu sehari tu entara orang Israel enggau orang Amon.”
28 Tang raja menua Amon enggai mendingka pesan ti dikirumka Jeptah.
29 Roh TUHAN lalu nurun ngagai Jeptah. Jeptah lalu bejalai nengah menua Giliat enggau Manasi, lalu pulai ngagai Mispah di menua Giliat, lalu mansang terus ngagai Amon.
30 Jeptah udah besemaya enggau TUHAN: “Enti Nuan deka ngasuh aku menang ngelaban orang Amon,
31 aku deka nyerahka orang ke terubah-rubah pansut ari rumah aku, ti deka ngambat aku lebuh aku pulai menang beperang. Aku deka meri orang nya ngagai nuan nyadika piring.”
32 Nya alai Jeptah meraka sungai nya mansang nyerang orang Amon, lalu TUHAN ngasuh Jeptah menang.
33 Iya nyerang sida berengkah ari Aroer nyentuk ngagai menua ti ngelingi Minit, dua puluh buah nengeri semua iya, nyentuk ngagai Abel Keramim. Mayuh amat orang dibunuh sida, lalu orang Amon alah laban orang Israel.
 
Anak Dara Jeptah
34 Lebuh Jeptah pulai ngagai Mispah, anak dara iya lalu pansut ngambat iya, betanda sereta nebah tamborin. Iya anak tunggal Jeptah.
35 Lebuh Jeptah meda iya, iya lalu nyarikka gari diri laban iya tusah ati. Ku iya, “O anak! Nuan tu ngenusahka ati aku! Nama kebuah nuan enggai enda ngenusahka ati aku? Aku udah besumpah enggau TUHAN, nya alai aku enda ulih matak semaya diri!”
36 Ku anak dara iya bejaku enggau iya, “Enti nuan udah ngaga semaya enggau TUHAN, kereja aja meh utai ti deka dikereja nuan ngagai aku, laban TUHAN udah ngasuh nuan malas ngagai munsuh nuan orang Amon.”
37 Tang anak dara iya minta siti utai ari apai iya, “Kereja utai siti tu ke aku: awakka aku diau kediri dua bulan, ngambika aku ulih bejalai enggau bala pangan aku ba sebelah bukit, lalu natka diri ke tusah ati deka mati agi dara bungas baka tu.”
38 Jeptah ngemendarka iya bejalai dua bulan. Iya enggau bala iya lalu bejalai niki ngagai bukit, lalu natka diri tusah ati laban iya deka mati sebedau iya belaki, lalu nadai anak.
39 Ba ujung dua bulan nya, iya lalu pulai baru ngagai apai iya. Apai iya lalu ngereja utai ti udah disemaya iya enggau TUHAN. Nya alai anak iya mati lebuh iya agi dara bungas.
Tu meh pun adat asal di menua Israel
40 alai sida ke indu deka bejalai empat hari dalam setaun, ngulitka anak dara Jeptah ari Giliat.
 
Bagi 12
Jeptah Enggau Orang Epraim
1 Orang Epraim ditesau mansang beperang. Sida meraka Sungai Jordan ngagai Sapon, lalu ku sida bejaku enggau Jeptah, “Nama kebuah nuan meraka garis entara menua mansang ngelaban orang Amon lalu enda mai kami? Diatu kami deka nunu rumah kita!”
2 Tang ku Jeptah bejaku enggau sida, “Bala aku enggau aku empu bisi laya ti besai enggau orang Amon. Aku bisi mesanka kita, tang kita enggai ngelepaska aku ari kuasa orang Amon.
3 Lebuh aku nemu kita enggai, aku lalu berambunka nyawa diri, lalu meraka garis entara menua mansang ngelaban sida, lalu TUHAN udah ngasuh aku menang ngelaban sida. Nya alai, nama kebuah kita datai ngagai aku lalu ngelaban aku diatu?”
4 Udah nya Jeptah ngempuruka semua bala orang Giliat, ngelaban orang Epraim lalu ngalahka sida. (Orang Epraim udah nyebut, “Kita orang Giliat ke di menua Epraim enggau di menua Manasi, kita tu rari ninggalka orang Epraim!”)
5 Orang Giliat lalu nan ba pemeraka Sungai Jordan, ngambika orang Epraim enda ulih rari. Lebuh orang ari raban bansa Epraim minta pemendar meraka lalu nguji ngerarika diri, orang Giliat nanya, “Kati nuan tu orang Epraim?” Enti orang nya nyebut, “Ukai,”
6 sida deka ngasuh iya nyebut “Shibbolet.” Tang orang nya deka nyebut “Sibolet,” laban iya enda terus nyebut leka jaku nya, lalu iya ditangkap, lalu dibunuh dia ba pemeraka di Sungai Jordan. Empat puluh dua ribu iku orang Epraim dibunuh lebuh maya nya.
7 Jeptah nguluka orang Israel enam taun. Udah nya iya mati, lalu dikuburka di nengeri iya empu di Giliat.
 
Ipsan, Elon, enggau Apdon
8 Udah bekau Jeptah nyadi tuai, Ipsan ari Betlehem lalu nguluka orang Israel.
9 Iya bisi tiga puluh iku anak lelaki enggau tiga puluh iku anak indu. Iya ngasuh bala anak indu iya jadi enggau orang ke ari luar suku raban bansa sida empu, lalu iya ngambi tiga puluh iku indu ke biak ari luar suku raban bansa sida empu jadi enggau bala anak lelaki iya. Ipsan nguluka orang Israel tujuh taun.
10 Udah nya iya mati, lalu dikuburka di Betlehem.
11 Udah bekau Ipsan, Elon ari Sebulun nguluka orang Israel sepuluh taun.
12 Udah nya iya mati, lalu dikuburka di Aijalon di menua Sebulun.
13 Udah bekau Elon, Apdon anak Hilel ari Piraton nguluka orang Israel.
14 Iya bisi empat puluh iku anak lelaki enggau tiga puluh iku uchu. Sida tu nepan tujuh puluh iku keledai. Apdon nguluka orang Israel lapan taun.
15 Udah nya iya mati, lalu dikuburka di Piraton di menua Epraim, ba menua ti bebukit ti diempu orang Amalek.
 
Bagi 13
Pengada Samson
1 Orang Israel lalu bedosa baru ngelaban TUHAN, lalu Iya nejuka orang Pilistin merintah sida empat puluh taun.
2 Nyadi lebuh maya nya bisi siku orang ke benama Manoah, ari nengeri Sorah. Iya datai ari raban bansa Dan. Bini iya mandul, nadai anak.
3 Melikat TUHAN pegari di mua bini Manoah, lalu bejaku, “Nuan mandul, tang enda lama da agi nuan deka ngandung, lalu ngadaka anak lelaki siku.
4 Nuan enda tau ngirup wain tauka ai ti bisa, tauka makai pemakai ti enda tau diempa.
5  Lalu lebuh anak nuan ada ila, nuan enda tau nguntin buk iya, laban kenyau ari maya iya ada, iya deka diserahka ngagai Allah Taala nyadi Nasir. Iya deka ngepunka pengawa ngelepaska orang Israel ari jari orang Pilistin.”
6 Udah nya indu nya lalu madahka utai nya ngagai laki iya. Ku iya, “Siku nabi udah datai ngagai aku, lalu gamal iya baka gamal melikat, lalu ati aku balat takut. Aku enda nanyaka penatai iya, lalu iya pen enda mega madahka nama diri ngagai aku.
7 Tang iya bisi madahka aku deka ngandung, lalu ngadaka anak lelaki siku. Iya enda ngasuh aku ngirup wain tauka ai ti bisa, tauka makai pemakai ti enda tau diempa, laban anak mit nya deka diserahka ngagai Allah Taala nyadi Nasir seumur idup.”
8 Udah nya Manoah besampi ngagai TUHAN. Ku iya, “TUHAN, asuh nabi nya pulai kitu baru ngagai kami, ngambika iya madahka ngagai kami utai ti patut dikereja kami lebuh anak mit nya ada ila.”
9 Allah Taala lalu ngereja utai ti dipinta Manoah. Melikat Allah Taala lalu datai baru ngagai indu nya lebuh iya benung duduk di umai. Nyadi laki iya nadai enggau iya,
10 nya alai indu nya lalu belanda tekala nya, lalu madahka ngagai laki iya, “Peda nuan! Orang ke datai ngagai aku suba, bisi pegari baru ngagai aku.”
11 Manoah angkat lalu nitihka bini iya. Iya mansang ngagai orang nya, lalu nanya, “Kati nuan tu orang ke bejaku enggau bini aku suba?” “Aku meh nya,” ku iya nyaut.
12 Udah nya Manoah lalu bejaku, “Lebuh jaku nuan dikamatka ila, nama utai ti patut dikereja nembiak nya? Baka ni ku gaya pengidup iya ila?”
13 Melikat Allah Taala lalu nyaut, “Bini nuan enda tau enda ngereja semua utai ti udah dipadahka aku ngagai iya.
14 Iya enda tau makai utai ti datai ari batang anggur. Iya enda tau ngirup wain tauka ai ti bisa, tauka makai pemakai ti enda tau diempa. Iya enda tau enda ngereja semua utai ti udah dipadahka aku ngagai iya.”
15-16 Laban Manoah enda nemu orang nya melikat TUHAN, nya alai iya bejaku enggau iya, “Anang guai mupuk. Awakka aku manduk siku kambin ti biak ke nuan.”
Tang ku melikat nya bejaku, “Enti aku diau ditu, aku enda makai pemakai nuan nya. Tang enti nuan deka nyendiaka pemakai nya, tunu pemakai nya nyadika piring ti diberi ngagai TUHAN.”
17 Ku Manoah nyaut, “Uji padahka nama nuan ngagai kami duai, ngambika kami duai ulih ngemesaika nuan lebuh jaku nuan nya dikamatka ila.”
18 Melikat nya lalu nanya, “Nama kebuah nuan keran deka nemu nama aku? Nama nya nyelai.”
19 Manoah lalu ngambi siku kambin ti agi biak, enggau gandum mimit, lalu meri utai nya ba atas batu alta, ngagai TUHAN ti ngereja utai ti nyelai.
20-21 Lebuh api nyau mau ba alta nya, Manoah enggau bini iya lalu meda melikat nya niki ke serega dalam api nya. Nya baru Manoah nemu orang nya melikat TUHAN. Iya enggau bini iya lalu nyungkurka diri ke tanah. Seduai iya nadai meda melikat nya agi.
22 Ku Manoah bejaku enggau bini iya, “Tua tentu deka mati, laban tua udah meda Allah Taala!”
23 Tang ku bini iya nyaut, “Enti TUHAN bisi ati deka munuh tua, iya tentu enggai nyambut piring tua. Iya tentu enggai nunjukka semua utai tu, tauka madahka utai ti baka nya ngagai tua diatu.”
24 Bini Manoah lalu ngadaka anak lelaki siku, lalu iya meri iya nama Samson. Anak mit nya mansang besai, lalu TUHAN merekatka iya.
25 Kuasa TUHAN lalu belabuh ngasuh Samson kering lebuh iya diau entara Sorah enggau Esta-ol dalam kem Dan.
 
Bagi 14
Samson Enggau Siku Indu Ari Timnah
1 Nyadi sekali lebuh Samson nurun ngagai Timnah, iya tepedaka siku indu orang Pilistin.
2 Samson pulai, lalu madahka pasal indu nya ngagai apai enggau indai iya, “Di Timnah bisi siku indu orang Pilistin. Ambi iya ke aku, ngambika aku jadi enggau iya.”
3 Tang ku apai enggau indai iya nanya iya, “Nama kebuah nuan deka ngambi indu orang Pilistin ti kapir nyadika bini nuan? Kati nuan nadai tetemuka indu ari raban peturun nuan empu, ari semua bala kitai?” Tang ku Samson madahka ngagai  apai iya, “Ambi indu nya ke aku, laban aku rinduka iya.”
4 Apai indai iya enda nemu TUHAN udah ngasuh Samson ngereja nya, laban TUHAN ngiga tegal kena Iya ngelaban orang Pilistin. Lebuh maya nya, orang Pilistin merintah orang Israel.
5 Nya alai Samson enggau apai indai iya lalu nurun ngagai Timnah. Lebuh sida benung bejalai nengah kebun anggur orang, Samson lalu ninga siku singa negung.
6 Kuasa TUHAN lalu tekala nya ngasuh Samson kering. Iya nyarikka tubuh singa nya ngena jari iya, baka ke nyarikka anak kambin. Tang iya enda madahka utai nya ngagai apai indai iya.
7 Udah nya iya mupuk, lalu bejaku enggau indu nya, lalu Samson rinduka iya.
8 Dua tiga hari udah bekau nya, Samson mansang ngagai indu nya baru, deka jadi enggau iya. Lebuh iya benung di rantau jalai, iya limpang ari jalai raya, deka meda singa ti udah dibunuh iya. Iya tekenyit ati meda raban manyi enggau ai manyi bisi dalam bangkai singa nya.
9 Iya lalu ngikis ai manyi nya ngagai jari iya, lalu makai ai manyi nya lebuh iya benung bejalai. Udah nya iya mansang ngagai apai enggau indai iya, lalu meri ai manyi nya mimit ngagai seduai iya. Seduai iya makai ai manyi nya, tang Samson enda madahka diri udah ngambi ai manyi nya ari bangkai singa.
10 Apai iya lalu mansang ngagai rumah indu nya. Samson lalu nyendiaka pengerami makai besai ba rumah nya. Tu endang adat asal sida ke bujang.
11 Lebuh orang Pilistin meda iya, sida lalu ngasuh tiga puluh iku orang ke bujang diau enggau iya.
12-13 Ku Samson bejaku enggau sida, “Awakka aku madahka siti entelah ngagai kita. Aku deka meri genap iku kita selambar kain linin, enggau sepasang pekayan ti manah, enti kita ulih madahka reti entelah nya ngagai aku dalam kandang gawai tikah tu.” “Lalaika meh entelah nuan. Awakka kami ninga iya,” ku sida bejaku.
14 Ku Samson, “Ari utai ti makai, pansut pemakai. Ari utai ti kering, pansut utai ti manis.”Tiga hari udah bekau nya, sida mengkang enda tetemuka lalai entelah nya.
15 Ba hari ti keempat, sida lalu bejaku enggau bini Samson, “Uji nuan nipu laki nuan ngasuh iya madahka reti entelah nya. Enti nuan enda, kami deka nunu nuan enggau rumah nuan. Seduai udah mesanka kami, ngambika seduai ulih ngerumpak kami, ukai enda?”
16 Bini Samson lalu mansang ngagai Samson enggau ai mata. Ku iya, “Nuan enda rinduka aku! Nuan begedika aku! Nuan ngelalaika entelah ngagai pangan aku, lalu nuan enda madahka reti entelah nya ngagai aku!” Ku Samson, “Dinga nuan, indah apai indai aku deh apin dipadahka aku. Nama kebuah aku madahka reti entelah nya ngagai nuan?”
17 Bini iya nyabakka pasal pekara nya dalam kandang tujuh hari gawai nya. Tang ba hari ti ketujuh, Samson madahka reti entelah nya ngagai bini iya, laban bini iya tatuk betanyaka reti entelah nya ngagai Samson. Udah nya bini iya lalu madahka ngagai orang Pilistin.
18 Nya alai ba hari ti ketujuh, sebedau Samson tinduk, orang di nengeri nya nyebut ngagai iya, “Nama utai ti manis agi ari ai manyi? Nama utai ti kering agi ari singa?” Ku Samson nyaut, “Enti kita enda udah ngeradu tanah ngena sapi indu aku, nadai kita ulih tetemuka lalai entelah nya nyentuk ngagai diatu.”
19 Kuasa TUHAN lalu tekala nya ngasuh iya kering. Iya lalu nurun ngagai Askelon, lalu munuh tiga puluh iku lelaki, ngambi gari ari tubuh sida, lalu meri gari ti manah nya ngagai bala lelaki ti udah nemu lalai entelah nya. Udah nya, iya pulai ke rumah, pedis ati ke utai ti udah nyadi.
20 Bini iya lalu diasuh mentua iya jadi enggau lelaki ti udah nyadika saksi Samson lebuh Samson seduai bini iya nikah.
 
Bagi 15
1 Nyau kelama udah bekau nya, Samson nemuai ngagai bini iya lebuh maya ngetau gandum, mai siku anak kambin. Ku iya madahka ngagai mentua iya ti lelaki, “Aku deka ke bilik betemu enggau bini aku.”
Tang apai bini iya enda nyagi Samson tama.
2 Ku iya madahka ngagai Samson, “Aku ngumbai nuan amat begedika iya. Nya kebuah aku meri iya ngagai pangan nuan. Tang adi iya bajik agi ari iya. Manah nuan ngambi iya.”
3 Ku Samson, “Sekali tu aku enggai betanggungjawapka utai ti deka dikereja aku ngagai orang Pilistin!”
4 Iya mupuk lalu nangkap tiga ratus iku munsang. Iya nanchangka iku dua iku munsang sepasang, lalu nyelitka sempun ba sintal iku nya.
5 Udah nya iya nyelup sempun nya, lalu ngelepaska munsang nya ba madang gandum. Nya meh chara iya nunu, ukai semina gandum ti udah diketau, tang mega gandum ti apin diketau. Kebun buah kana mega angus.
6 Lebuh orang Pilistin betanyaka sapa udah ngereja utai nya, nya baru sida nemu Samson udah ngereja utai nya, laban mentua Samson di Timnah udah meri bini Samson ngagai pangan Samson. Nya alai orang Pilistin mansang lalu nunu indu nya enggau apai iya.
7 Ku Samson bejaku enggau sida, “Enti tu utai ti dikereja kita, aku besumpah, aku enda badu ngapa datai ke aku udah malas semua penyai kita!”
8 Iya lalu ngelaban sida enggau naka pemalat, lalu munuh mayuh amat sida. Udah nya iya mupuk, lalu diau dalam lubang gua ti ba tingkah di Etam.
 
Samson Ngalahka Orang Pilistin
9 Orang Pilistin datai lalu nirika kem di menua Judah, lalu nyerang nengeri Lehi.
10 Orang di menua Judah lalu nanya sida, “Nama kebuah kita nyerang kami?”
Kami datai laban kami deka nangkap Samson, lalu ngereja ngagai iya utai ti udah dikereja iya ngagai kami.”
11 Nya alai tiga ribu iku orang ari menua Judah lalu mansang ngagai lubang gua ti ba tingkah di Etam, lalu bejaku enggau Samson, “Kati nuan enda nemu kitai tu diperintah orang Pilistin? Nama kebuah nuan ngereja utai tu ngagai kami?” Disaut Samson, “Aku ngereja ngagai sida utai ti udah dikereja sida ngagai aku.”
12 Ku sida bejaku enggau iya, “Kami datai ditu laban kami deka nanchang nuan, lalu nyerahka nuan ngagai orang Pilistin.” Ku Samson, “Aku minta kita besemaya enda munuh aku.”
13 “Barang ku jaku,” ku sida nyaut. “Kami semina deka nanchang nuan aja, lalu nyerahka nuan ngagai sida. Kami enda munuh nuan.” Nya alai sida nanchang iya ngena dua iti tali ti baru, lalu mai iya nurun ari tingkah nya.
14 Lebuh iya datai di Lehi, orang Pilistin lalu manjung belanda mansang ngagai iya. Tekala nya kuasa TUHAN lalu ngasuh iya kering, lalu iya mutuska tali ti nanchang lengan enggau jari iya, baka ke mutuska ubung ti udah ditunu.
15 Udah nya iya tetemuka siti tulang rang keledai ti apin lama udah mati. Iya nyengkau lalu ngambi tulang rang nya, lalu munuh seribu iku orang ngena tulang rang nya.
16 Samson lalu belagu, “Aku munuh seribu iku orang ngena tulang rang keledai. Aku nugungka bangkai sida ngena tulang rang keledai.”
17 Udah nya, iya muai tulang rang nya. Endur nya lalu dikumbai Ramat-lehi.
18 Udah nya Samson berasai balat amat aus. Iya lalu ngangauka TUHAN, ku iya, “Nuan udah ngasuh aku menang. Kati Nuan deka ngasuh aku mati aus, lalu ditangkap orang kapir tu?”
19 Allah Taala lalu ngeruang siti lubang ba tanah di Lehi. Ai lalu pansut ari lubang nya. Samson lalu ngirup, lalu berasai nyamai. Mata ai nya lalu dikumbai En-hakori. Mata ai nya agi bisi di Lehi diatu.
20 Samson nguluka orang Israel dua puluh taun lebuh orang Pilistin agi megai perintah di menua nya.
 
Bagi 16
Samson Di Gasa
1 Nyadi sekali lebuh Samson mansang ngagai nengeri Gasa, iya betemu enggau siku indu sundal, lalu iya tinduk enggau indu nya.
2 Lebuh orang di Gasa ninga Samson bisi dia, sida ngelulung endur nya, ngipa iya semalam-malam nya ba pintu nengeri. Sida enda engkeretik semalam-malam nya. Ku sida, “Awakka kitai ngipa iya nyentuk ngagai rerak tawas. Udah nya kitai munuh iya.”
3 Tang Samson semina tinduk dia ngagai tengah malam aja. Udah nya iya angkat, nyabut pintu nengeri nya nyengkaum tiang pintu, kunchi enggau semua utai bukai ti ba pintu nya. Iya ngesan lalu mai pintu nya ngagai tuchung bukit ti ari atas nengeri Hebron.
 
Samson Enggau Delilah
4 Udah bekau nya, Samson rinduka siku indu ke benama Delilah, ti diau ba Lebak Sorek.
5 Lima iku raja orang Pilistin mansang ngagai Delilah, lalu bejaku enggau iya, “Uji nuan nipu Samson ngambika iya madahka ngagai nuan kebuah iya kering baka nya, enggau chara kami ulih ngalahka iya, nanchang iya, lalu ngasuh iya nadai daya agi. Genap iku kami deka meri nuan seribu seratus singkap duit pirak.”
6 Delilah lalu bejaku enggau Samson, “Padahka ngagai aku, nama utai ti ngasuh nuan kering? Enti orang deka nanchang nuan, lalu ngasuh nuan nadai daya agi, kati ku jalai iya ngereja nya?”
7 Disaut Samson, “Enti sida nanchang aku ngena tujuh iti tali panah ti baru, ti apin rangkai, aku deka lemi baka orang bukai.”
8 Orang Pilistin lalu mai tujuh iti tali panah ti baru, ti apin rangkai, ngagai Delilah. Delilah lalu nanchang Samson.
9 Iya ngasuh orang nganti dalam bilik sepiak. Delilah lalu ngangau, “Samson! Orang Pilistin datai!” Tang Samson mutuska tali panah nya baka ke mutuska ubung ti diselup api. Nya alai sida mengkang enda nemu utai ti ngasuh Samson kering.
10 Ku Delilah bejaku enggau Samson, “Nuan udah ngemelika aku, lalu enggai madahka utai ti bendar ngagai aku. Padahka ngagai aku, baka ni ku orang ulih nanchang nuan.”
11 Ku Samson madahka ngagai iya, “Enti sida nanchang aku ngena tali ti nadai udah kala dikena orang, aku deka lemi baka orang bukai.”
12 Delilah lalu ngambi tali ti baru, lalu nanchang Samson. Delilah lalu ngangau, “Samson! Orang Pilistin datai!”. Orang Pilistin endang nganti dalam bilik sepiak. Tang Samson mutuska tali nya ari lengan iya baka ke mutuska ubung.
13 Ku Delilah bejaku enggau Samson, “Nuan majak ngemelika aku, lalu enggai madahka utai ti bendar ngagai aku.” Ku Samson madahka ngagai  Delilah, “Enti nuan nenun buk aku ngagai tujuh iti gumpal, lalu nanchangka buk nya ngagai tendai ti dikena betenun, lalu madat iya rapit ngena belia, aku deka lemi baka orang bukai.”
14 Udah nya Delilah nimang iya ngasuh iya tinduk, ngambi tujuh iti gumpal buk iya, lalu nenun gumpal buk nya ngagai tendai ti dikena orang betenun. Iya madat gumpal buk nya ngena belia, lalu ngangau, “Samson! Orang Pilistin datai!” Tang Samson dani lalu narit buk iya ari tendai nya.
15 Lalu ku Delilah bejaku enggau Samson, “Baka ni ku nuan madahka diri rinduka aku, enti nuan endang amat enda? Nuan udah ngemelika aku tiga kali, lalu nuan apin madahka ngagai  aku utai ti ngasuh nuan kering.”
16 Delilah majak nanyaka nya ngagai Samson tiap hari, datai ke Samson nyau leju ninga iya ituk betanyaka utai nya ngagai iya.
17 Samson lalu madahka utai ti bendar ngagai iya. “Buk aku nadai kala diguntin,” ku iya madahka. “Aku udah diserahka ngagai Allah Taala nyadi Nasir kenyau ari aku ada. Enti buk aku diguntin, pengering aku lenyau, lalu aku lemi baka orang bukai.”
18 Lebuh Delilah nemu Samson udah madahka utai ti bendar ngagai iya, iya lalu mesanka bala raja orang Pilistin. Ku iya, “Datai kitu sekali da agi. Iya udah madahka utai ti bendar ngagai aku.” Sida lalu datai, mai duit.
19 Delilah lalu nimang Samson, ngasuh iya tinduk ba atas pah iya. Udah nya iya mesanka siku lelaki. Lelaki nya lalu ngerat tujuh iti gumpal buk Samson. Udah nya Delilah lalu belabuh merinsaka Samson, laban pengering Samson nyau nadai agi.
20 Delilah lalu ngangau, “Samson! Orang Pilistin datai!” Samson lalu dani, lalu ku pikir iya, “Aku deka ngelepaska diri baka selama.” Iya enda nemu TUHAN udah ninggalka iya.
21 Orang Pilistin nangkap iya, lalu ngeruk leka mata iya. Sida mai iya ngagai Gasa, nanchang iya ngena rantai temaga, lalu ngasuh iya bekereja ngindik gandum ba gudang dalam rumah jil nya.
22 Tang buk iya belabuh tumbuh baru.
 
Pemati Samson
23 Bala raja orang Pilistin begempuru lalu begawai, deka ngenjuk piring ti besai ngagai petara sida ke dikumbai Dagon. Ku sida belagu, “Petara kitai udah nyerahka munsuh kitai Samson ngagai jari kitai!”
24 Lebuh orang Pilistin meda Samson, sida muji petara sida, ku sida, “Petara kitai udah nyerahka munsuh kitai ngagai jari kitai, munsuh ke ngerusak menua kitai, ti udah munuh mayuh bala kitai,”
25 Lebuh sida benung rami ngelantangka diri, sida lalu bejaku, “Kangauka Samson. Awakka iya merindang kitai!” Nya alai sida mai Samson pansut ari rumah jil, lalu iya merindang sida. Sida ngasuh Samson bediri entara tiang ti besai;
26 lalu ku Samson bejaku enggau nembiak ke ngiring iya, “Awakka aku megai tiang ti besai ti nungkat rumah tu, ngambika aku ulih nyandih ba tiang nya.”
27 Rumah nya nyau penuh laban lelaki enggau indu. Raja orang Pilistin ke lima iku bisi dia magang. Pemayuh orang dia kira tiga ribu iku ba perabung rumah nya, ngemataka Samson merindang sida.
28 Udah nya Samson besampi, ku iya, “TUHAN Allah Taala, kingatka aku. Aku besampi minta Nuan meri aku pengering sekali tu agi, ngambika aku ulih malas orang Pilistin ti udah ngeruk dua igi leka mata aku.”
29 Samson lalu megai dua iti tiang ti besai ti nungkat rumah nya. Iya ngengkahka jari sepiak ba tiang siti, lalu jari sepiak ba tiang siti. Iya lalu ngejuka tiang dua iti nya
30 sereta manjung, “Awakka aku mati enggau orang Pilistin tu!” Iya ngejuka tiang nya enggau pengabis pengering iya. Rumah nya lalu runtuh, ninggang raja ke lima iku nya, enggau semua orang bukai. Samson munuh mayuh agi orang ba pemati iya empu, ari lebuh iya ti agi idup.
31 Bala menyadi iya, enggau sida sebilik datai lalu ngambi bangkai iya. Sida mai iya pulai, lalu nguburka iya ba entara Sorah enggau Esta-ol, dalam lumbung apai iya Manoah. Iya udah nyadi tuai orang Israel dua puluh taun.
 
Bagi 17
Engkeramba Mikah
1 Nyadi di menua ti bebukit di menua Epraim bisi siku lelaki benama Mikah.
2 Ku iya madahka ngagai  indai iya, “Lebuh orang ngenchuri seribu seratus singkap duit pirak nya ari nuan, nuan nyumpah perumpak nya. Aku empu ninga nuan nyumpah iya. Duit nya disimpan aku. Aku empu ke ngenchuri duit nya.” Ku indai iya bejaku, “Awakka TUHAN merekatka nuan, anak!”
3 Iya lalu meri duit nya pulai baru ngagai indai iya, lalu ku indai iya bejaku, “Aku nyerahka duit tu ngagai TUHAN, ari jari anak aku empu, kena ngaga engkeramba ari kayu lalu disampak enggau pirak; nya alai diatu aku mulaika duit pirak tu ngagai jari nuan.”
4 Lebuh iya meri duit nya pulai baru ngagai indai iya, indai iya lalu ngambi dua ratus singkap ari duit pirak nya, lalu meri dua ratus singkap duit nya ngagai siku tukang besi, ke lalu ngaga siku engkeramba, ari kayu, lalu nyampak engkeramba nya enggau pirak nya. Engkeramba nya lalu disimpan dalam rumah Mikah.
5 Nyadi Mikah endang bisi endur alai iya empu besembiang. Iya ngaga engkeramba enggau siti epod, lalu nyiri siku ari bala anak lelaki iya nyadi imam.
6 Menua Israel endang nadai raja lebuh maya nya. Semua orang ngereja utai nitihka peneka ati sida empu.
7 Nyadi lebuh maya nya mega, bisi siku orang bujang ari peturun Lewi, ti diau di nengeri Betlehem, di menua Judah.
8 Iya ninggalka nengeri Betlehem, ngiga endur bukai alai diau. Lebuh iya benung bejalai, iya datai ba rumah Mikah di menua ti bebukit di menua Epraim.
9 Mikah lalu nanya iya, “Ari ni penatai nuan?” Orang bujang nya lalu nyaut, “Aku tu orang Lewi ari nengeri Betlehem, di menua Judah. Aku ngiga endur alai diau.”
10 Ku Mikah bejaku enggau iya, “Diau enggau aku, lalu nyadi penyanding penemu sereta nyadi imam aku, lalu aku deka meri ngagai nuan sepuluh singkap duit pirak setaun, gari, enggau pemakai.
11 Orang bujang nya besetuju deka diau enggau Mikah, lalu iya nyadi baka anak Mikah empu.
12 Mikah ngasuh iya nyadi imam, lalu iya diau dalam rumah Mikah.
13 Ku Mikah bejaku, “Diatu aku nemu TUHAN deka ngasuh aku mujur, laban aku bisi siku orang Lewi nyadika imam aku.”
 
Bagi 18
Mikah Enggau Raban Bansa Dan
1 Menua Israel nadai raja lebuh maya nya kelia, lalu raban bansa Dan agi benung begigaka menua ti tau diambu sida alai sida tau ngentapka diri, laban sida apin diberi menua.
2 Nya alai orang ari raban bansa Dan milih lima iku orang ke tau dikarapkaari suku raban bansa sida empu, lalu meri atur ngasuh sida bejalai ari nengeri Sorah enggau ari nengeri Esta-ol lalu matau menua nya. Lebuh sida datai ba menua ti bebukit di menua Epraim, sida lalu diau ba rumah Mikah.
3 Lebuh sida benung dia, sida ninga orang Lewi nya bejaku. Sida mansang lalu nanya iya, “Nama pengawa nuan ditu? Sapa mai nuan kitu?”
4 Ku orang Lewi nya nyaut, “Aku diau ditu ari atur Mikah; iya ngaji aku nyadi imam iya.”
5 Ku sida bejaku enggau iya, “Saup kami nanya ngagai Allah Taala enti pejalai kami tu deka mujur tauka enda.”
6 Ku imam nya nyaut, “Kita nadai utai ngawa. TUHAN deka ngintu kita dalam pejalai kita.”
7 Sida lima iku nya lalu mupuk, mansang ngagai nengeri Lais. Sida meda orang di nengeri nya diau likun baka orang Sidon. Orang nengeri nya diau bebaik enggau orang bukai, lalu nadai laya enggau orang bukai. Sida bisi semua utai ti dipeguna sida. Sida diau jauh ari orang Sidon, lalu nadai kaul enggau orang bansa bukai.
8 Lebuh sida lima nya pulai ngagai Sorah enggau ngagai Esta-ol, orang mayuh lalu nanyaka utai ti ditemu sida.
9 “Aram kitai nyerang Lais,” ku sida nyaut.” Kami udah meda menua nya. Tanah dia manah. Anang diau ditu lalu nadai ngereja apa-apa. Aram mupuk enggau jampat lalu ngambi menua nya!
10 Lebuh kita datai din ila, kita deka nemu orang dia nadai ngadang utai bisi deka nyadi ba sida. Menua nya besai, sereta bisi semua utai ti dipeguna kita, lalu Allah Taala udah meri menua nya ngagai kita.”
11 Enam ratus iku bala lelaki ari suku raban bansa ti diturunka Dan lalu angkat ari Sorah enggau ari Esta-ol mai senyata perang sida.
12 Sida lalu nirika kem sida tunga ke barat ari Kiriat-jearim di menua Judah. Nya kebuah endur nya agi dikumbai Kem Dan nyentuk ngagai diatu.
13 Sida angkat ari endur nya lalu datai ba rumah Mikah, di menua ti bebukit di menua Epraim.
14 Udah nya orang lima iku ti udah meresa menua ngelingi Lais lalu bejaku enggau bala pangan sida, “Kati kita nemu, dalam sebuah rumah ditu bisi engkeramba ti digaga ari kayu lalu disampak enggau pirak? Engkeramba bukai pen bisi, lalu epod pen bisi. Nama utai ti patut dikereja kitai, dalam pikir kita?”
15 Sida lalu mansang ngagai rumah Mikah, ti alai orang Lewi nya diau, lalu nanya ngagai iya pasal pengidup iya.
16 Nyadi lebuh maya nya, enam ratus iku bala soldadu ari raban bansa Dan benung bediri ba pintu penama, sedia deka nyerang.
17 Pematau ke lima iku nya lalu terus mansang ngagai rumah nya, lalu ngambi engkeramba ti digaga ari kayu sereta disampak enggau pirak, enggau engkeramba ti bukai, enggau epod nya. Nyadi imam nya benung bediri enggau enam ratus iku bala soldadu ba mua pintu penama.
18 Lebuh orang lima iku nya tama ngagai rumah Mikah, lalu ngambi engkeramba nya, imam nya lalu nanya, “Nama pengawa kita tu?”
19 Ku sida madahka ngagai iya, “Anang bemunyi. Anang bejaku. Mupuk aja enggau kami, lalu nyadi imam enggau nyadi penyanding penemu kami. Kati nuan rindu agi nyadi imam ke siti suku raban bansa, ari ti nyadi imam ke siti raban bansa orang Israel?”
20 Imam nya lalu lantang ati ninga jaku nya. Iya lalu ngambi engkeramba nya, lalu mupuk enggau sida.
21 Sida nguing lalu angkat ari endur nya. Bala anak sida, jelu tupi, enggau reta tengkira sida dibai dulu ari sida.
22 Lebuh sida udah jauh ngejangka rumah nya, Mikah lalu mesanka orang ke berimbai pendiau enggau iya, mai sida mansang beperang. Lebuh sida nyau ulih tepegaika raban bansa Dan
23 sida lalu ngangau. Orang Dan nguing lalu nanya Mikah, “Nama kebuah nuan mai ngemayuh nya orang datai ditu?”
24 Disaut Mikah, “Kita nabanka imam aku enggau engkeramba ti udah digaga aku, lalu mupuk, datai ke aku nyau nadai utai agi, lalu kita nanya, ‘Nama kebuah’?”
25 Orang Dan lalu madahka ngagai Mikah, “Manah nuan badu agi bejaku, enggai ke bala orang tu ringat, lalu nyerang nuan. Enti sida nyerang nuan, nuan enggau semua kita sebilik tetap mati.”
26 Udah nya raban bansa Dan majakka pejalai sida, lalu lebuh Mikah nemu sida enda ulih dialahka iya, iya nguing, lalu pulai.
27 Lebuh orang Dan udah ngerampas imam enggau engkeramba ti udah digaga Mikah, sida lalu nyerang Lais lalu nunu nengeri sida.
28 Orang di nengeri nya nadai orang nulung, laban sida jauh ari nengeri Sidon, lalu sida nadai kaul enggau orang bukai. Nengeri sida nya ba lebak semak nengeri Bet-rehop. Orang Dan lalu ngaga nengeri nya baru, lalu ngentapka diri dia.
29 Sida lalu nukar nama nengeri nya ngagai nama Dan, ngangkatka nama aki ini sida ke benama Dan anak Jakop.
30 Orang Dan lalu nirika engkeramba nya ngambika bisi disembah sida, lalu Jonatan anak Gersom, uchu Moses, bekereja nyadi imam ke raban bansa Dan, lalu peturun iya nyadika imam sida nyentuk ngagai maya sida ditabanka ngagai menua bukai.
31 Sida lalu nirika engkeramba ti udah digaga Mikah, seagi-agi Langkau Kain Allah Taala meruan di Siloh.
 
Bagi 19
Siku Orang Lewi Enggau Bini Simpan Iya
1 Lebuh maya nya kelia, sebedau menua Israel bisi raja, siku orang Lewi diau jauh di menua ti bebukit di menua Epraim. Iya ngambi siku indu ke agi biak ari nengeri Betlehem di menua Judah, nyadika indu simpan iya.
2 Tang indu nya ringat ngagai iya, pulai ngagai rumah apai iya di Betlehem, lalu diau dia empat bulan.
3 Udah nya lelaki nya lalu berunding deka nitihka indu nya, nguji mujuk iya pulai baru ngagai iya. Lelaki nya mai siku orang gaji enggau iya, enggau dua iku keledai. Indu nya mai orang Lewi nya tama, lalu lebuh apai indu nya meda lelaki nya, iya gaga ati ngelaluka penatai iya.
4 Apai indu nya mujuk lelaki nya diau dia, nya alai iya diau dia tiga hari, makai ngirup sereta tinduk enggau bini iya.
5 Ba pagi hari ti keempat, seduai iya angkat tumu pagi besikap deka mupuk. Tang ku apai indu nya bejaku enggau orang Lewi nya, “Makai dulu meh seduai, ngambika seduai kering. Lagi baru seduai mupuk.”
6 Nya alai orang Lewi enggau orang gaji iya duduk, lalu sama makai ngirup. Udah nya apai indu nya bejaku enggau orang Lewi nya, “Bemalam ditu lalu ngelantangka diri.”
7 Orang Lewi nya besikap deka mupuk, tang apai indu nya mujuk iya diau dia enda lama. Nya alai iya bemalam semalam da agi.
8 Tumu pagi hari ti kelima, iya besikap deka mupuk, tang ku apai indu nya bejaku, “Makai dulu. Lagi baru seduai mupuk.” Nya alai lelaki dua iku nya makai.
9 Lebuh lelaki nya, enggau indu simpan iya, enggau orang gaji iya baru deka mupuk, apai indu nya lalu bejaku, “Hari nyau lemai. Manah kita bemalam ditu malam tu. Peda kita, hari nyau deka petang. Diau ditu, lalu ngelantangka diri. Kita tau angkat tumu pagila lalu mulaika diri ke menua.”
10-11 Tang lelaki nya enggai agi bemalam dia. Nya alai iya enggau indu simpan iya mupuk, sama enggau orang gaji iya, enggau keledai ti dua iku nya, ti udah sedia. Hari endang udah lunggar lebuh sida datai semak Jebus (iya nya, Jerusalem). Lalu ku orang gaji nya bejaku enggau tuan iya, “Manah kitai ngetu, lalu bemalam ditu ba nengeri orang Jebus tu?”
12 Tang ku tuan iya, “Kitai enda ngetu ba nengeri orang bansa bukai, ke ukai orang Israel. Kitai majakka pejalai kitai ngagai Gibe-ah.
13 Aram mupuk lalu bemalam di Gibe-ah tauka di Ramah.”
14 Nya alai sida lalu majakka pejalai sida. Urung padam mata panas lemai nya sida datai semak Gibe-ah, di menua Benjamin.
15 Sida lalu limpang ari jalai raya, deka bemalam di Gibe-ah. Sida tama ngagai nengeri nya lalu nudukka diri ba padang nengeri; laban nadai siku orang deka mai sida bemalam.
16 Siku apai tuai orang mansa pulai ari umai. Iya tu asal ari menua ti bebukit di menua Epraim, tang diatu iya diau di Gibe-ah. (Orang dalam nengeri nya endang orang Benjamin magang.)
17 Lebuh apai tuai orang nya tepedaka temuai ba padang nengeri nya, iya lalu nanya, “Ari ni penatai kita, lalu kini ke pejalai kita?”
18 Disaut orang Lewi nya, “Kami datai ari Betlehem di menua Judah, lalu kami deka pulai  ngagai menua ti bebukit di menua Epraim. Tang nadai orang deka mai kami bemalam,
19 taja pen kami bisi pemakai enggau rumput ti rangkai ke keledai kami empu, enggau roti enggau wain ke indu simpan aku, ke aku empu enggau ke orang gaji aku. Kami nadai suntuk utai.”
20 Ku apai tuai orang nya bejaku, “Kita tau bemalam dalam rumah aku! Aku empu deka ngintu kita. Anang bemalam ba padang tu.”
21 Nya alai iya mai sida ngagai rumah iya empu, lalu meri keledai sida makai. Bala temuai iya masu kaki diri, lalu makai.
22 Lebuh sida benung ngelantangka diri, bala orang ke jai lalu ngenyit datai ari nengeri nya, ngelulung rumah nya, lalu belabuh mandam pintu. Ku sida bejaku enggau apai tuai nya, “Bai pansut lelaki ke dibai nuan ngagai rumah nuan! Kami deka beleman enggau iya!”
23 Apai tuai nya pansut, lalu bejaku enggau sida, “Anang baka nya, unggal! Anang ngereja utai ti jai, ti kamah baka nya! Orang tu temuai aku.
24 Tu indu simpan iya, enggau anak dara aku ti agi dara bungas. Awakka aku mai seduai iya pansut diatu. Kita tau beleman enggau seduai iya, nitihka peneka ati kita. Tang anang ngereja utai ti jai baka nya ngagai lelaki tu!”
25 Tang bala lelaki nya enggai mendingka iya. Nya alai orang Lewi nya lalu ngambi indu simpan orang nya, lalu ngasuh iya ke luar ngagai bala orang nya. Sida lalu ngereja iya, sereta beduan tubuh iya semalam-malam nya, enda ngetu-ngetu datai ke pagi hari siti.
26 Tumu pagi hari siti indu nya lalu rebah ba mua pintu rumah apai tuai nya, alai laki iya ti diau. Indu nya mengkang dia nyentuk ngagai rerak tawas.
27 Lelaki nya lalu angkat pagi nya, lalu lebuh iya muka pintu deka mupuk, iya nemu indu simpan iya garing-garing ba mua pintu rumah nya. Jari indu nya agi megai pintu.
28 Ku lelaki nya bejaku enggau iya, “Angkat. Mupuk kitai.” Tang indu nya enda nyaut. Iya lalu manggaika indu nya ba keledai, mupuk lalu pulai ngagai menua iya empu.
29 Lebuh iya datai di rumah, iya ngambi duku. lalu ngambi bangkai indu simpan iya nya, netak iya ngagai dua belas iti lampang, lalu ngirumka siti-siti lampang ngagai serata menua Israel.
30 Lalu ku semua orang ke meda utai nya bejaku, “Nadai utai baka tu udah kala nyadi, tauka dipeda kenyau ari orang Israel udah pansut ari menua Ejip nyentuk ngagai sehari tu! Kitai enda tau enda bekiraka utai tu, berandau lalu bejakuka utai tu.”
 
Bagi 20
Orang Israel Sedia Deka Beperang
1 Semua orang Israel, kenyau ari Dan di utara, nyentuk ngagai Beer-seba di selatan, enggau orang ari menua Giliat di timur, bela begempuru di mua TUHAN di Mispah.
2 Bala tuai semua raban bansa orang Israel bisi enggau ba gempuru bala nembiak Allah Taala nya, empat ratus ribu iku bala soldadu ke bejalai kaki, ke besenyataka pedang.
3 Nyadi orang Benjamin bisi ninga pasal orang Israel ke begempuru di Mispah.
Orang Israel lalu nanya, “Padahka ngagai kami, baka ni ku utai ti jai tu nyadi?”
4 Orang Lewi ke bempu indu simpan nya lalu nyaut, “Aku enggau bini simpan aku datai di Gibe-ah di menua Benjamin, lalu deka bemalam dia.
5 Bala lelaki ari Gibe-ah datai ngamuk aku, lalu ngelulung rumah ti alai kami diau malam nya. Sida deka munuh aku, tang enda nyadi. Sida lalu ngereja bini simpan aku, lalu iya mati.
6 Aku lalu mai bangkai bini simpan aku, ngelampang tubuh iya, lalu ngirumka siti-siti lampang ngagai dua belas raban bansa orang Israel, laban bala orang nya udah ngereja utai ti jai sereta kamah di menua Israel.
7 Semua kita orang Israel, baka ni ku penemu kita pasal pekara tu?”
8 Semua orang lalu angkat sereta, lalu bejaku, “Nadai siku kitai tau pulai ngagai langkau kain kitai, tauka ngagai rumah diri.
9 Tu utai ti deka dikereja kitai ngagai orang Gibe-ah: kitai deka nyerang sida ngena chara bechabut undi.
10 Sepuluh peratus ari bala orang Israel deka meri bekal ngagai bala soldadu, lalu sida ti bukai deka mansang lalu ngukum Gibe-ah laban orang Gibe-ah udah ngereja pengawa ti kamah di menua Israel.”
11 Nya alai semua orang lelaki di menua Israel lalu begempuru, semua seati magang deka nyerang nengeri Gibe-ah.
12 Raban bansa orang Israel lalu ngasuh bala seruan bejalai ngagai serata menua Benjamin mai jaku tu: “Naka meh pemesai penyai ti udah dikereja kita!
13 Nya alai, serahka orang ke jai ari nengeri Gibe-ah, ngambika kami munuh sida, lalu muai penyai tu ari menua Israel.” Tang orang Benjamin enggai mendingka jaku bala menyadi sida, iya nya orang Israel ti bukai.
14 Orang Benjamin lalu datai ari semua nengeri sida lalu mansang ngagai nengeri Gibe-ah, deka ngelaban orang Israel.
15 Orang Benjamin ngempuruka dua puluh enam ribu iku soldadu ari semua nengeri sida sehari nya, nambahka tujuh ratus iku orang ari nengeri Gibe-ah nya empu.
16 Tujuh ratus iku ari semua bala orang Benjamin nya chawit, ke ulih nyelinting lambar buk ngena pangwang sida, lalu enda kala salah.
17 Semua orang Israel ti bukai ngempuruka empat ratus ribu iku soldadu; semua sida nya endang orang ke tau serang magang.
 
Perang Ngelaban Orang Benjamin
18 Orang Israel lalu mansang ngagai Betel, lalu betanya ngagai TUHAN, “Sapa ari bala kami deka terubah ngelabuhka jari nyerang orang Benjamin?” TUHAN lalu nyaut, “Raban bansa Judah.”
19 Bala orang Israel lalu mupuk pagi hari siti, lalu nirika kem sida semak nengeri Gibe-ah.
20 Sida lalu mansang nyerang bala soldadu orang Benjamin; sida ngerintai bala sida nunga nengeri nya.
21 Bala soldadu Benjamin lalu pansut ari nengeri Gibe-ah, lalu sebedau lemai nya, sida udah ulih munuh dua puluh dua ribu iku soldadu orang Israel.
22 Tang orang Israel mengkang berani, lalu ngerintai bala sida ba endur nya baru, ba alai sida ke udah berintai ba hari ti keterubah.
23 Orang Israel lalu nyabak di mua TUHAN nyentuk ngagai lemai; sida lalu betanya ngagai TUHAN, “Kati tau kami mansang baru lalu nyerang bala menyadi kami orang Benjamin?” “Tau,” ku TUHAN nyaut.
24 Nya alai, ba hari ti kedua orang Israel lalu nyerang bala soldadu orang Benjamin kedua kali.
25 Ba hari ti kedua nya orang Benjamin pansut baru ari nengeri Gibe-ah, lalu munuh lapan belas ribu iku bala soldadu orang Israel ke endang udah chukup dilatih.
26 Udah nya semua orang Israel mansang ngagai Betel, lalu ngulit. Sida duduk dia di mua TUHAN, lalu bepasa nyentuk ngagai lemai nya. Sida ngenjuk piring pemaik, lalu nunu piring ti segala ngagai TUHAN.
27 Lalu orang Israel betanya ngagai TUHAN (laban Peti Lampang Batu Adat Allah Taala bisi dia lebuh maya nya,
28 lalu Pinehas, anak Eleasar, uchu Aron, nyadi tuai ngemataka utai nya lebuh maya nya). Ku sida, “Kati tau kami mansang baru lalu nyerang bala menyadi kami orang Benjamin, tauka kami badu nyerang sida?” Lalu ku TUHAN nyaut, “Tau; laban Aku deka nyerahka sida ngagai jari kita pagila.”
29 Nya alai orang Israel lalu ngeramka ipa ngelingi Gibe-ah.
30 Ba hari ti ketiga, orang Israel lalu mansang nyerang orang Benjamin, lalu ngerintaika bala sida baka ke dulu ari nya.
31 Orang Benjamin pansut lalu ngelaban orang Israel, lalu sida diumpan pansut lalu ngejangka diri ari nengeri nya, lalu baka ke dulu, sida belabuh munuh sekeda orang Israel ba jalai raya ti nuju ngagai Betel, enggau ba jalai raya ti nuju ngagai Gibe-ah, enggau di menua pesisir. Kira tiga puluh iku orang Israel mati laban sida.
32 Ku orang Benjamin bejaku, “Kitai udah ngalahka sida baka ke dulu ari tu.” Tang ku orang Israel bejaku, “Aram kitai rari, ngambika sida nitihka kitai ngagai jalai raya.”
33 Semua orang Israel lalu angkat ari endur sida, lalu berintai di Baal-tamar, lalu bala soldadu sida ke ngeramka ipa ari barat nengeri Gibe-ah, pansut ari endur sida.
34 Sepuluh ribu lelaki, ke endang udah dipilih ari semua orang Israel, lalu nyerang Gibe-ah. Balat amat sida belaban. Tang bala orang Benjamin enda nemu diri deka alah.
35 TUHAN lalu ngalahka orang Benjamin di mua orang Israel; lalu orang Israel munuh 25,100 iku orang Benjamin sehari nya; semua sida nya endang orang ke udah chukup dilatih magang.
36 Nya baru orang Benjamin nemu diri udah alah.
 
Chara Orang Israel Menang
Bala soldadu orang Israel endang sengaja nyurutka diri ari bala soldadu orang Benjamin, laban sida ngarapka orang ke udah ngeramka ipa, ngalahka Gibe-ah.
37 Bala orang ke ngeramka ipa lalu beguai-guai tama ngagai nengeri Gibe-ah; sida munuh semua orang dalam nengeri nya.
38 Bala orang Israel, enggau bala soldadu ke ngeramka ipa udah besetuju ngena siti tanda, iya nya, lebuh bala soldadu ke ngeramka ipa udah nunu nengeri nya lalu asap ti tebal pansut ari nengeri nya,
39 bala orang Israel enda tau enda mutar lalu ngelaban orang Benjamin. Lebuh maya nya orang Benjamin baru udah munuh kira tiga puluh iku orang Israel, lalu ku sida bejaku, “Sida tentu alah laban kitai, baka ke dulu.”
40 Tang lebuh asap ti tebal belabuh bebalun pansut ari nengeri nya, orang Benjamin malik kebelakang, lalu meda semua nengeri nya diempa api.
41 Orang Israel lalu mutar; bala orang Benjamin lalu takut, laban sida nemu diri baru deka alah.
42 Sida lalu nyurutka diri ari orang Israel, lalu rari tunga ngagai menua puang, tang sida ulih digagai orang Israel, lalu bala soldadu orang Israel ke pansut ari nengeri, munuh sida.
43 Orang Israel ngelulung bala orang Benjamin. Sida begagaika orang Benjamin, lalu ngalahka sida kenyau ari Nohah, nyentuk ngagai siti endur ti tunga ke timur nengeri Gibe-ah.
44 Lapan belas ribu iku bala soldadu Benjamin mati; semua sida nya endang bujang berani magang.
45 Sida ke bukai nguing lalu rari tunga ngagai menua puang nuju ngagai Batu Rimon. Lima ribu iku sida dibunuh di rantau jalai nya. Orang Israel majak begagaika sida ngagai Gidom, lalu munuh dua ribu iku sida.
46 Nya alai dua puluh lima ribu iku bala soldadu Benjamin mati sehari nya. Semua sida nya endang bujang berani magang.
47 Tang enam ratus iku orang Benjamin ngerarika diri ngagai menua puang, ngagai Batu Rimon, lalu sida diau dia empat bulan.
48 Orang Israel nikal, lalu munuh semua orang Benjamin ti lelaki, ti indu, enggau bala anak mit, nyengkaum jelu tupi sida. Sida nunu semua nengeri ti mit di menua nya.
 
Bagi 21
Bini Ke Raban Bansa Benjamin
1 Nyadi lelaki orang Israel udah besumpah di Mispah, ku sida, “Nadai siku kita tau ngasuh anak indu kitai jadi enggau orang Benjamin.”
2 Nya alai sida mansang ngagai Betel, lalu duduk dia duie-duie nyabak di mua TUHAN nyentuk ngagai lemai. Ku sida:
3 “O TUHAN Allah Taala ke disembah orang Israel, nama kebuah utai tu nyadi di menua tu, datai ke siti raban bansa kami nyau abis lus di menua tu?”
4 Tumu pagi hari siti bala orang Israel angkat lalu ngaga siti alta ba endur nya. Sida ngenjuk piring pemaik, lalu nunu piring  segala.
5 Sida lalu nanya, “Raban bansa ni ti nadai datai ngagai gempuru besai di mua TUHAN di Mispah?” (Sida nyebut nya laban sida udah besumpah madahka orang ke nadai datai enggau begempuru di Mispah, deka diukum bunuh.)
6 Orang Israel lalu berasai tusah ati ke menyadi sida ke ari raban Benjamin. Ku sida, “Sehari tu siti raban bansa orang Israel udah lenyau.
7 Baka ni ku kita ngiga bini ke lelaki orang Benjamin ti agi idup? Kitai udah besumpah di mua TUHAN madahka kitai enggai nyerahka anak indu kitai ngagai sida.”
8 Lalu ku sida bejaku, “Raban bansa ni ti nadai datai di mua TUHAN di Mispah?” Nya baru sida nemu, nadai siku orang ari Jabes ti di menua Giliat datai ngagai gempuru besai nya.
9 Laban lebuh orang ngangauka nama bala soldadu, nadai siku orang ari Jabes nyaut.
10 Nya alai bala orang ke begempuru nya lalu ngasuh dua belas ribu iku bala soldadu sida ke pemadu berani mansang ngagai Jabes. Ku sida, “Alai kita mansang ngagai Jabes; lalu bunuh semua orang di Jabes; bunuh mega sida ke indu enggau sida ke mit.
11 Bunuh semua orang ke lelaki, enggau semua indu ke ukai dara bungas.”
12 Sida lalu tetemuka empat ratus iku dara bungas ari bala orang ke diau di Jabes. Sida lalu mai sida indu dara nya ngagai kem di Siloh, di menua Kanaan.
13 Udah nya semua orang ke begempuru dia lalu ngirumka pesan ngagai orang Benjamin ti diau ba Batu Rimon, mai sida badu agi beperang.
14 Orang Benjamin pulai ari Batu Rimon, lalu orang Israel ti bukai meri sida bala indu ke biak ari Jabes, ti enda dibunuh sida. Tang sida indu nya enda chukup ba semua bala sida.
15 Nya alai orang mayuh berasai sinu ati ke orang Benjamin laban TUHAN udah mechahka penyerakup entara raban bansa orang Israel.
16 Nya alai bala tuai ke bisi ba gempuru dia lalu bejaku, “Orang Benjamin nadai agi indu. Nama utai ti deka dikereja kitai kena kitai meri bini ngagai lelaki orang Benjamin ti agi idup?”
17 Israel enda tau ngelenyauka sebarang raban bansa ari dua belas raban bansa iya. Kitai enda tau enda ngiga jalai kena ngidupka raban bansa Benjamin,
18 tang kitai enda tau nejuka sida jadi enggau anak indu kitai, laban kitai udah nyumpah orang ke nejuka orang Benjamin jadi enggau anak indu kitai.”
19 Udah nya sida berunding, “Gawai ninting taun ke TUHAN di Siloh nyau deka nyadi enda lama da agi.” (Nyadi Siloh nya tunga ke utara Betel, ari selatan Lebonah, lalu tunga ke timur jalai raya ari Betel ngagai Sekem.)
20 Sida lalu bejaku enggau orang Benjamin, “Mupuk kita lalu belalai ba kebun anggur,
21 lalu nganti dia. Lebuh indu ari Siloh pansut deka mansang betanda, kita lalu mansutka diri ari kebun anggur. Genap iku kita lalu ngerampas siku indu ari bala sida nyadika bini kita, lalu bai sida pulai enggau kita ngagai menua Benjamin.
22 Enti apai tauka menyadi lelaki sida datai ngagai kitalalu madahka diri enda besetujuka utai nya, kitatau bejaku enggau sida munyi tu: ‘Kami minta kita kasihka kami lalu ngawakka kami bempu sida, laban kami ukai ngerampas sida ari kita nyadika bini kami lebuh beperang. Nyadi laban kita ukai meri sida ngagai kami, kita enda salah, laban kita ukai mungkir ari semaya kita.’ “
23 Orang Benjamin lalu ngereja nya. Genap iku sida bela milih siku indu ke biak ke betanda di Siloh, lalu mai indu nya nyadika bini iya. Udah nya sida pulai ngagai menua diri empu, ngaduka nengeri sida, lalu diau dia.
24 Lebuh maya nya orang Israel ti bukai lalu mupuk. Genap iku sida pulai ngagai raban bansa diri empu, ngagai ruang bilik diri empu enggau ngagai tanah diri empu.
25 Menua Israel nadai raja lebuh maya nya, lalu genap iku orang bela ngereja utai nitihka peneka ati diri empu.