Surat Ari
SAINT JUDE
 
Jaku Pemuka
Surat Ari Saint Jude* ditulis kena nangkan bala orang ke macha ngasuh sida bejaga ari pengajar ti pelesu, ke ngumbai diri orang Kristian. Utai ti disebut dalam surat ti pandak tu, nyau deka sebaka enggau utai ti disebut dalam surat 2 Peter. Orang ke nulis surat tu meransang bala orang ke macha “majak bekereja ngeringka pengarap ti udah diberi Allah Taala sekali aja ngagai bala nembiak Iya.”
 
Surat tu ditulis entara 80-100 A.D.
 
Ripih isi surat tu
Pun jaku (1-2)
Perangai, ajar, enggau ukum ke bala pengajar ti pelesu (3.16)
Jaku tangkan pasal enda tau enda bepegai ba pengarap (17-23)
Sampi puji (24-25)
 
Bagi 1
1 Ari Jude, menyadi James, ke nyadi ulun  Jesus Kristus, ngagai orang ke udah dikangau, ke dikerinduka  Allah Taala ti Apai, sereta dijaga Jesus Kristus:
 2 Awakka pengasih, pemaik enggau pengerindu nambah-menambah diberi ngagai kita.
 
Pengajar Ti Pelesu
3 Menyadi, lebuh aku benung gagit ati nyendiaka diri nulis ngagai kita pasal pengelepas ti dikembuan semua kitai, aku ngira diri enda tau enda nulis ngagai kita minta kita bebendar gawa ke pengarap ti udah diberi sekali aja ngagai nembiak Tuhan.
4  Laban sekeda orang udah belalai enselitka diri tama ngagai bala kitai. Sida endang lama udah diletak deka diukum laban sida enda nangika Allah Taala. Sida nyarutka pesan pasal pengasih Allah Taala, lalu ngaga nya nyadika peluang kena sida ngereja pengawa ti kamah, lalu enggai ngaku Tuan enggau Tuhan kitai, Jesus Kristus, ti siku aja.
5 Diatu aku deka ngasuh kita ngingatka tu, taja pen kita udah nemu semua utai tu, iya nya, Tuhan udah ngelepaska orang Israel ari menua Ejip, tang udah nya, Iya munuh sida ke enda arap.
6 Kingatka melikat ke enda nitihka sekat hak sida, tang ninggalka endur alai sida diau. Iya udah nanchang sida ngena rantai lalu nyimpan sida dalam endur ti pemadu petang, ngambika sida diakim lebuh Hari Pechara.
7 Lalu kingatka mega Sodom enggau Gomorah, enggau nengeri ti ngelingi nengeri dua buah nya, ti ngereja ulah ti kamah, lalu nyarutka pengawa beleman. Sida diukum ngena api ti enda nemu padam, kena ngajar semua mensia.
8 Orang tu pen baka nya mega. Sida ngamahka tubuh diri, enggai diperintah Allah Taala, lalu mechat utai idup ti bemulia di serega.
9 Indah tuai melikat ke benama Mikael deh enda berani mechat Sitan lebuh iya berebutka bangkai Moses enggau Sitan, tang semina nyebut, “Tuhan ngerara nuan!”
10 Tang bala orang tu mechat semua utai ti enda ditemu sida reti. Lalu utai ti ditemu sida ngena pengasai, baka jelu ti enda nemu berunding, nya meh utai ti ngerusak sida.
11 Tulah meh sida! Sida niti jalai Kain, lalu ngereja penyalah ketegal duit baka penyalah ti dikereja Balaam, lalu sida dirusak baka Korah ke angkat ngelaban.
12 Sida tu ngamahka gempuru kita lebuh kita beserumpu makai, laban sida enda nemu malu lebuh sida makai, lalu semina berundingka diri empu aja. Sida nya baka mua hari ti dipuputka ribut, tang nadai ngasuh hari ujan. Sida nya baka kayu ti nadai buah lebuh musin ruruh daun, mati dua kali, lalu dichabut.
13 Sida nya baka gelumbang di tasik, ti ngayanka pupu ti ngasuh sida malu. Sida nya baka bintang ti terebai, ti deka dibuai ngagai endur ti pemadu petang ti disedia Allah Taala belama iya.
14 Enok, tujuh serak ari Adam, udah benabika pasal sida nya dulu kelia: “Peda kita, Tuhan datai enggau beribu-ribu iku bala melikat Iya ti kudus,
15 deka ngakim semua mensia, lalu ngukum genap iku orang ketegal semua penyai ti udah dikereja sida, enggau ketegal semua jaku jai ti udah disebut orang ke bedosa, ke enda arapka Allah Taala, kena sida ngelaban Iya!”
16 Orang nya seruran mutap, seruran nganu pangan diri. Sida nurutka pengingin sida ti kamah. Sida muji diri, lalu ngelangkungka orang kena sida ngambi ulih ba orang.
 
Jaku Tangkan Enggau Atur
17 Tang kita, menyadi, enda tau enda ingatka utai ti udah dipadahka bala rasul Jesus Kristus Tuhan kitai sebedau utai nya nyadi.
18  Ku sida madah ngagai kita, “Ba hari ti penudi, orang ke ngelese deka datai, nurutka pengingin sida ti kamah.”
19 Nya meh orang ke nyungkak orang beserekang penemu. Sida tu diperintah pengingin dunya, sereta nadai ngembuan Roh Kudus.
20 Tang kita, menyadi, enda tau enda negapka pengarap kita ti pemadu kudus, lalu besampi nitihka iring Roh Kudus;
21 meruan dalam pengerindu Allah Taala; nganti pengasih Jesus Kristus Tuhan kitai ti deka mai kitai ngagai pengidup ti meruan belama iya.
22 Kasihka orang ke kakang ati;
23 Rampas sekeda orang ari api, lalu selamatka sida; kasihka sida ti bukai enggau ati ti nangi, datai ke kita nyau begedika gari ti udah dikena sida ngereja ulah ti kamah.
 
Sampi Puji
24 Ngagai Iya ke ulih nagang kita rebah, lalu nyerahka kita nadai bepenyalah sereta enggau ati ti gaga ngagai Iya ke bemulia,
25 ngagai Allah Taala ti siku aja ke nyadi Juruselamat kitai, beri meh puji, mulia, pengering, enggau kuasa, ulih Jesus Kristus Tuhan kitai, kenyau ari dulu kelia, ngagai diatu, enggau ke belama-lama iya! Amin.