Surat Ti Kedua Ari
SAINT JOHN
 
Jaku Pemuka
Surat Ti Kedua Ari Saint John  ditulis “Siku Tuai” ngagai “indu siku enggau bala anak iya,” nyangka sebuah eklisia enggau raban eklisia nya. Pesan ti pandak tu ngasuh sida rinduka pangan diri, sereta nangkan sida enggau jaku pasal pengajar ti pelesu, enggau ajar sida.
 
Ripih isi surat tu
Pun jaku (1-3)
Pengerindu dulu ari semua utai (4-6)
Jaku tangkan pasal ajar ti pelesu (7-11)
Penutup jaku (12-13).
 
Bagi 1
1 Ari tuai eklisia ngagai siku indu enggau bala anak iya, ke amat dikerinduka aku, lalu ukai semina aku aja, tang mega dikerinduka semua orang ke nemu pemendar,
2 ketegal pemendar ti meruan dalam kitai, lalu deka meruan enggau kitai datai ke belama iya.
3 Awakka Allah Taala ti Apai, enggau Jesus Kristus ti Anak Allah Taala meri kitai berekat, pengasih enggau pemaik dalam pemendar enggau pengerindu.
 
Pemendar Enggau Pengerindu
4 Ati aku balat amat gaga lebuh aku nemu sekeda bala anak nuan diau dalam pemendar  baka ti udah diasuh Apai.
5 Lalu diatu, Endu, aku ukai nuliska pesan ti baru ngagai nuan, tang pesan ti endang udah dikemisi kitai kenyau ari pun. Aku minta kitai rinduka pangan diri.
6 Reti pengerindu nya kitai ngasika pesan Allah Taala. Nya meh pesan ti udah didinga kita kenyau ari pun, iya nya, kita enda tau enda idup dalam pengerindu.
7 Mayuh orang ke penipu udah pansut ngagai dunya. Sida nya orang ke enda ngaku Jesus Kristus udah datai nyadi mensia. Nya meh orang ke penipu, ke Munsuh Kristus.
8 Bejaga kita, ngambika utai ti udah diulihka kita enda lenyau ari kitai, tang ngambika kita nerima semua upah kita.
9 Barang sapa enda bepegai ba ajar Kristus, tang ngelui ajar nya, nadai Allah Taala. Barang sapa bepegai ba ajar Kristus, bisi Apai enggau Anak.
10 Enti orang ke enda mai ajar tu datai ngagai rumah kita, anang ngelaluka sida. Meri tabi basa ngagai sida pen enda meh tau,
11 laban enti kita nabi sida, reti nya kita bekunsi enggau sida ngereja pengawa sida ti jai.
 
Jaku Ti Penudi
12 Aku mayuh utai ti deka disebut ngagai kita, tang aku enggai nuliska nya, laban aku ngarapka diri ulih nemuai ngagai kita, lalu bejaku betunga mua enggau kita, ngambika kitai sama chukup gaga.
13 Bala anak menyadi indu ke dikerinduka nuan  ngirumka tabi basa ngagai nuan.