Surat
SAINT JAMES
 
Jaku Pemuka
Surat Saint James* ngundan mayuh bengkah atur pasal jalai idup.Surat tu ditulis ngagai “semua nembiak Tuhan ke ngachir di serata dunya.” Orang ke nulis surat tu ngena mayuh macham jaku sempama madahka atur pasal penemu-dalam ti tau diambi nyadika lalau perangai enggau ulah orang Kristian. Iya ngenang pasal pengaya enggau penyuntuk, penguji, ulah ti manah, pasal enda tau bepilih mata, pengarap enggau utai ti dikereja pengarap, kuasa dilah, penemu-dalam, belaya, penyumbung, pemaruh ati, ngakim orang, temegah, pengeliat ati, enggau sampi.

Surat tu ngemeranka pemesai guna ngansingka pengarap dalam pengidup orang Kristian.

Surat tu ditulis Saint James sebedau 62 A.D.
 
Ripih isi surat tu
Pun jaku (1.1)
Pengarap enggau penemu-dalam (1.2-8)
Penyuntuk enggau pengaya (1.9-11)
Kena abas enggau kena laban penguji (1.12-18)
Ninga lalu ngereja (1.19-27)
Anang bepilih mata (2.1-13)
Pengarap diansingka (2.14-26)
Dilah orang Kristian (3.1-18)
Orang Kristian enggau dunya (4.1-5.6)
Atur ti bukai (5.7-20)
 
Bagi 1
1 Surat James, ulun Allah Taala enggau ulun Tuhan Jesus Kristus: Ngagai dua belas raban bansa ke diau ngachir di serata dunya.
 
Pengarap Enggau Penemu-dalam
2 Menyadi, lebuh kita dituntung mayuh macham penguji, kita patut gaga ati,
3 laban kita nemu, lebuh pengarap kita diuji, iya ngadaka ati ti tan.
4 Lalu awakka ati ti tan nya nembuka pengawa iya, ngambika kita nyadi orang ke besai tuai sereta nyadi pemadu badas, nadai kurang utai.
5 Enti kita nadai penemu-dalam, pinta ngagai Allah Taala ke meri enggau gerah mudah sereta enda mansik penyalah, lalu utai nya deka diberi ngagai kita.
6 Tang pinta ngena pengarap, enggau ati ti enda kakang, laban orang ke kakang ati nya baka gelumbang ti di tasik, ti dipuput lalu dikebuka ribut.
7 Orang nya enda tau ngarapka diri deka nerima sebarang utai ari Tuhan.
8 laban iya ati dua ati tiga, enda tetap ati dalam semua utai ti dikereja iya.
 
Penyeranta Enggau Pengaya
9 Awakka menyadike baruh pendiau temegahka diri ke diberi Allah Taala pangkat ti tinggi,
10 lalu awakka orang ke kaya temegahka diri ke baruh pendiau, laban orang ke kaya deka lesap baka bungai rumput.
11 Laban mata panas niki, hari lalu angat, lalu ngelayuka rumput.Bungai rumput nya labuh, lalu pemajik iya nadai agi.Baka nya meh orang ke kaya deka lesap lebuh sida benung ngereja pengawa sida.
 
Diabas Enggau Diuji
12 Beberekat meh orang ke tan natka penguji, laban lebuh iya tan diuji, iya deka nerima makota pengidup ti udah disemaya Tuhanke orang ke rinduka Iya.
13 Orang ke kena laban penguji, enda tau nyebut, “Aku diuji Allah Taala,” laban Allah Taala enda ulih diuji penyai, lalu Iya Empu enda nguji orang.
14 Tang kitai diuji pengingin kitai empu, ti ngumpan lalu manjuk kitai;
15 udah nya, lebuh pengingin nya udah ngandung, iya ngadaka dosa, lalu dosa, lebuh iya udah chukup tuai, ngadaka pemati.
16 Menyadi ke dikerinduka aku, anang nejuka diri kena tipu.
17 Semua pemeri ti menyana, ti pemadu badas endang datai ari atas magang, nurun ari Apai penampak ke enda berubah, ke enda mindah kin kitu baka ayuk.
18 Ari peneka Iya Empu Iya udah ngadaka kitai, ulih jaku pemendar, ngambika kitai nyadi lumur satu ari semua utai ti idup ti digaga Iya.
 
Ninga Lalu Ngereja
19  Kita, menyadi ke dikerinduka aku, enda tau enda nemu tu: genap iku orang enda tau enda jampat mending, lubah mansutka jaku, lubah ringat,
20 laban pengeringat kita enda ulih mansutka pengelurus ti dikedekaka Allah Taala.
21 Nya alai buai semua ulah ti kamah enggau semua penyai ti balat mayuh ba kita, lalu terima enggau ati ti baruh jaku ti ditanam, ti bisi kuasa nyelamatka semengat kita.
22 Tang anang semina mendingka jaku nya, lalu nipu diri empu.Kereja utai ti diasuh jaku nya.
23 Laban enti orang semina mending lalu enda ngereja utai ti diasuh jaku nya, sida nya baka orang ke meda gamal diri empu ba cheremin;
24 laban sida meda gamal diri, lalu mupuk, lalu tekala nya enda ingatka gamal diri agi.
25 Tang orang ke merening ngagai adat ti pemadu badas, adat pengelepas, lalu majak ngasika adat nya, lalu ukai semina mending lalu udah nya enda ingatka
adat nya agi, tang ngereja utai ti diasuh adat nya, orang nya deka diberekatka dalam semua utai ti dikereja iya.
26 Enti orang ngumbai diri orang ke bepengarap, lalu enda nagang dilah diri, tang nipu diri empu, pengarap sida nya nadai guna.
27 Pengarap ti tuchi, ti bendar di mua Allah Taala ti Apai nya: ngintu orang ke patu balu, ke merinsa, sereta ngintu diri tuchi ari penyai dunya.

 
Bagi 2
Anang Pilih Mata
1 Menyadi, kati kita ke arapka Jesus Kristus Tuhan kitai ti bemulia enda bepilih mata?
2 Enti sema siku orang ke ngena tinchin emas, enggau gari ti manah, datai ngagai gempuru kita, lalu siku orang ke seranta, ke ngena gari ti kamah mega datai,
3 lalu kita ibuhka orang ke ngena gari ti manah nya, lalu bejaku ngagai iya, “Duduk ditu,” tang bejaku ngagai orang ke seranta nya, “Bediri din”, tauka “Duduk semak kaki aku,”
4 enda ke kita bepilih mata, lalu ngakim orang ngena runding ti jai?
5 Pendingka tu, menyadi ke dikerinduka aku! Kati Allah Taala nadai udah milih orang ke seranta di dunya tu nyadi orang ke kaya dalam pengarap, sereta bempu Perintah ti udah disemaya Iya ke orang ke rinduka Iya?
6 Tang kita udah ngeleseka orang ke seranta! Ukai enda orang ke kaya ke nekanka pengidup kita?Ukai enda orang ke kaya ke ngirit kita ngagai kot?
7 Ukai enda orang ke kaya ke bejaku busung ngelaban nama ti badas ti udah diberi ngagai kita?
8  Kita ngereja utai ti manah enti kita ngasika Adat Perintah Allah Taala ti ditulis dalam Bup Kudus, “Rinduka pangan diri baka kita ke rinduka diri empu.”
9 Tang enti kita bepilih mata, kita bedosa, lalu kita deka diukum Adat laban kita ngelanggar Adat.
10 Laban barang sapa nitihka Adat, tang ngelanggar siti ari Adat nya, udah ngelanggar semua Adat.
11  Laban Iya ke nyebut, “Anang butang,” mega nyebut, “Anang munuh orang.” Laban enti kita enda butang, tang munuh orang, kita udah ngelanggar Adat.
12 Nya alai, bejaku lalu kereja utai baka orang ke deka diukum Adat ti ngelepaska kitai.
13 Laban lebuh Allah Taala ngakim, Iya enda ngayanka pengasih ngagai orang ke enda ngayanka pengasih ngagai orang bukai.Pengasih lebih agi bekuasa ari ukum.
 
Pengarap Enggau Kereja
14 Nama penguntung kita, menyadi, enti kita ngumbai diri bisi pengarap, tang pengarap nya nadai ngereja utai?Kati pengarap ti baka nya ulih nyelamatka kita?
15 Enti sema menyadi lelaki tauka menyadi indu kita begunaka gari lalu nadai pemakai,
16 lalu kita nyebut ngagai iya, “Mupuk meh nuan enggau selamat. Awakka nuan enda chelap, sereta bisi utai diempa,” tang kita enda meri iya utai ti dipeguna iya, nama guna nya?
17 Baka nya mega pengarap; pengarap mati enti iya nadai pengawa.
18 Tang sekeda orang deka nyebut, “Nuan bisi pengarap; aku bisi pengawa.” Pandangka ngagai aku pengarap nuan ti nadai pengawa, lalu aku deka mandangka ngagai nuan pengarap aku ngena pengawa ti dikereja aku.
19 Kita arapka Allah Taala endang siku aja. Manah! Indah antu deh arapka nya, lalu getar-getar takut.
20 Kita tu amat beli.Kati kita ngasuh orang nunjukka ngagai kita, pengarap ti nadai pengawa nya pengarap ti nadai guna?
21 Kati aki kitai Abraham enda dikumbai lurus ketegal pengawa ti dikereja iya, lebuh iya nyerahka anak iya, Isak, ba alta?
22 Nya alai, pengarap diayanka ulih pengawa, lalu pengarap nyadi chukup menyana ulih pengawa.
23 Tu ngamatka jaku ti disebut dalam Bup Kudus, “Abraham arapka Allah Taala, lalu ketegal nya Allah Taala ngumbai iya lurus,” lalu iya dikumbai pangan Allah Taala.
24 Nya alai, orang digaga lurus  ulih pengawa, lalu ukai semina ulih pengarap aja.
25  Baka nya mega indu sundal ke benama Rahap. Iya digaga lurus ulih pengawa ti dikereja iya, lebuh iya nyambut pematau orang Israel, lalu ngasuh seduai iya mupuk nengah jalai bukai.
26 Baka tubuh ti mati enti iya nadai roh, baka nya mega pengarap; iya mati enti iya nadai pengawa.
 
Bagi 3
Nagang Dilah
1 Menyadi, enda mayuh kita tau nyadi pengajar laban, kita nemu, kami ke ngajar deka diakim balat agi.
2 Laban semua kitai bela ngereja mayuh macham penyalah.Orang ke nadai kala nyebut utai ti salah lebuh iya bejaku, iya nya orang ke pemadu badas, ke ulih nagang semua tubuh diri.
3 Enti kitai ngengkahka repik besi ba nyawa kuda, kena ngasuh iya ngasika kitai, kitai ulih ngasuh kuda nya nguingka tubuh diri.
4 Tauka, peda kita kapal. Taja pen kapal nya besai lalu belayar dipuputka ribut ti deras, tang iya dikemudika ngena tumpang ti mit amat ngagai sebarang endur alai juragan ngemudika iya.
5 Baka nya mega dilah. Taja pen iya mit, tang iya balat temegah. Peda kita utan ti besai. Iya ulih diselup ngena api ti mit lalu angus!
6 Dilah nya api, dunya ti jai dalam tubuh kitai, ti ngamahka kitai, nyelup semua pengidup kitai ngena api, lalu dilah nya empu diselup api neraka.
7 Mensia ulih bejinak lalu udah bejinakka semua utai bukai ti idup, baka jelu babas enggau burung, ular enggau ikan,
8 tang nadai orang ulih bejinakka dilah. Dilah nya utai ti jai, ti enda nemu jenuh, ti penuh laban rachun ti bisa.
9  Ngena dilah nya kitai muji Tuhan ti Apai kitai, lalu ngena dilah nya mega kitai nyumpah orang ke digaga neladan gamal Allah Taala Empu.
10 Ari nyawa siti nya pansut jaku berekat enggau jaku sumpah. Menyadi, utai tu enda tau baka nya!
11 Kati mata ai ulih mansutka ai amat enggau ai ti masin?
12 Kati kayu ara, menyadi, ulih mansutka buah kana? Tauka pun anggur ulih mansutka buah ara? Mata ai ti mansutka ai ti masin, enda ulih mansutka ai amat.
 
Penemu-dalam Ti Datai Ari Serega
13  Sapa bala kita ke bepenemu-dalam sereta mereti? Awakka iya ngayanka pemadas pengidup diri ngena pengawa ti dikereja iya ngena ati ti baruh ti datai ari penemu-dalam.
14 Tang enti kita kepapas, lalu semina berundingka diri empu aja, anang temegahka nya tauka besangkalka pemendar.
15 Penemu-dalam ti baka nya ukai datai ari atas,tang datai ari dunya, ari mensia, ari antu.
16 Laban dia endur alai ati ti kepapas, enggau ati ti semina berundingka diri empu aja, dia meh endur alai penyarut enggau semua pengawa ti jai nyadi.
17 Tang penemu-dalam ti datai ari atas nya, lumur satu, tuchi, mai pemaik, nelap, siru, penuh laban pengasih enggau buah ti manah, enda bepilih mata tauka pura-pura ngapa.
18 Lalu orang ke nanam pemaik, deka ngetau pengelurus.
 
Bagi 4
Bepangan Enggau Dunya
1 Nama utai ti ngasuh kita beperang ngelaban pangan diri? Nama utai ti ngasuh kita belaya? Kati utai nya enda datai ari mayuh macham pengingin kita ti beperang dalam kita?
2 Kita ingin deka bempu utai, tang kita nadai bulih utai nya. Nya alai kita munuh orang. Kita inginka utai, tang enda teulihka utai nya. Nya alai kita berebut lalu belayaka utai nya. Kita nadai bulih utai, laban kita enda minta ari Allah Taala.
 3 Kita minta, tang kita enda nerima, laban juluk ati kita salah, laban kita minta utai nya kena kita ngelantangka diri.
4 Kita tu orang ke enda tetap ati! Kati kita enda nemu, enti kita bepangan enggau dunya kita bemunsuh ngelaban Allah Taala? Nya alai barang sapa ingin deka bepangan enggau dunya, deka nyadi munsuh Allah Taala.
5 Kati kita ngumbai Bup Kudus nyebut utai ngapa lebuh iya nyebut, “Allah Taala balat lelengauka roh ti udah diasuh Iya diau dalam kitai”?
6  Tang Iya meri pengasih ti besai agi. Nya kebuah Bup Kudus nyebut, “Allah Taala ngelaban orang ke sumbung, tang ngayanka pengasih ngagai orang ke baruh ati.”
7 Nya alai, nunduk ngagai Allah Taala. Laban meh Sitan, lalu iya deka rari ari kita.
8 Datai semak ngagai Allah Taala, lalu Iya deka datai semak ngagai kita.Basu jari kita, kita orang ke bedosa, lalu tuchi ati kita, kita ke ati dua tiga.
9 Tusah ati, ngulit lalu nyabak meh kita.Tukar ketawa kita ngagai sabak, lalu tukar pengaga kita ngagai ati ti tusah.
10 Diau enggau ati ti baruh di mua Tuhan, nya baru Iya deka ngeninggika kita.
 
Nagang Orang Ngakim Pangan Diri
11 Anang bejai pangan diri, menyadi.Orang ke bejai pangan diri, tauka ngakim pangan diri, bejaku jai ngelaban Adat, sereta ngakim Adat. Tang enti kita ngakim Adat, kita ukai ngereja utai ti diasuh Adat, tang nyadi hakim Adat.
12 Semina Allah Taala aja ke meri Adat enggau nyadi Hakim, ke ulih nyelamat enggau ngerusak. Tang sapa kita nya ku kita, alai kita deka ngakim pangan diri?
 
Nagang Orang Temegah
13  Dingaka aku, kita ke nyebut, “Sehari tu tauka pagila kitai deka bejalai ngagai nengeri tu, nengeri nya, diau setaun dia, lalu bedagang ngulihka duit.”
14 Indah utai ti deka nyadi pagila deh kita enda nemu.Nama reti pengidup kita?Kita tu ambun ti pegari sekejap aja, lalu udah nya lesap.
15 Utai ti patut disebut kita nya, “Enti nya peneka Tuhan, kitai deka ngereja tu, tauka ngereja nya.”
16 Tang kita sumbung lalu temegah bejaku.Semua jaku temegah ti baka nya endang jai magang.
17 Nya alai, barang sapa nemu utai ti patut dikereja diri, tang enda ngereja iya, bedosa.
 
Bagi 5
Jaku Tangkan Ngagai Orang Ti Kaya
1 Dingaka aku, kita ke kaya.Nyabak duie-duie meh kita laban kita deka ditinggang pemerinsa.
2  Pengaya kita udah buruk, lalu gari kita abis diempa indu gegat.
3  Perengka emas enggau pirak kita udah betegar, lalu tegar nya deka nyadika saksi kena ngelaban kita, lalu deka makai isi kita baka api. Kita udah nugungka pengaya ba hari ti penudi.
4 Dinga kita! Gaji kuli ke bekereja ba umai kita ti enda dibayar kita, diatu ngangau, lalu sabak orang ke ngetau udah didinga Allah Taala, Tuhan ti Pemadu Bekuasa.
5 Kita udah nyamai diau di dunya tu, ngelantangka diri.Kita udah nupi diri gemu nyendiaka diri disayat.
6  Kita udah ngukum lalu munuh orang ke lurus, ke enda ngelaban kita.
 
Liat Ati Natka Pemerinsa
7 Nya alai, menyadi, kita enda tau enda liat ati nyentuk ngagai maya Tuhan datai. Peda kita pengeliat ati orang bumai nganti umai sida mansutka asil.Sida liat ati nganti hari ujan lebuh musin ruruh daun enggau lebuh musin bungai.
8 Kita mega enda tau enda liat ati.Keringka ati kita, laban Tuhan nyau semak.
9 Menyadi, anang mut-mut ngelaban pangan diri, enggai ke Allah Taala ngakim kita. Hakim diatu benung bediri ba mua pintu.
10 Awakka kita, menyadi, beteladan liat ati ba sida nabi ke bejaku dalam nama Tuhan.
11  Kitai ngumbai sida ke ngayanka ati ti tan nya beberekat. Kita udah ninga pasal Jop ke tan ati, lalu kita udah meda juluk ati Tuhan, pasal Tuhan ke penuh laban penyiru enggau pengasih.
12  Lebih ari semua, menyadi, anang besumpah, nemuka atas nama serega tauka nama dunya, tauka besumpah ngena jalai bukai, tang semina sebut aja “Au” lebuh kita deka nyebut “Au”, tauka “Enggai” enti kita deka nyebut “Enggai,” ngambika kita enda kena ukum.
 
Besampi Ngena Pengarap
13 Kati bala kita bisi merinsa?Iya patut besampi.Kati bala kita bisi lantang ati?Iya patut belagu pantun puji.
14  Kati bala kita bisi sakit? Iya patut mesanka bala tuai eklisia, minta sida besampika iya, nata iya ngena minyak dalam nama Tuhan.
15 Sampi ti disebut ngena pengarap deka ngeraika orang ke sakit.Tuhan deka ngeraika sida, lalu enti sida udah bedosa, dosa sida deka diampun.
16 Nya alai, kita patut ngaku dosa kita ngagai pangan diri, lalu besampika pangan diri, ngambika kita digeraika. Sampi orang ke lurus endang bekuasa sereta bisa.
17 Elijah endang mensia baka kitai.Iya bebendar besampi minta hari enda ujan, lalu hari enda ujan di menua nya tiga taun setengah.
18 Udah nya iya besampi baru; hari lalu ujan, lalu tanah mansutka asil.
19 Menyadi, enti bala kita bisi limpang ari pemendar, lalu siku ari bala kita mai iya pulai baru,
20  awakka kita nemu tu: barang sapa mai orang ke bedosa pulai baru ari jalai ti salah, deka nyelamatka semengat orang nya ari pemati, lalu deka ngasuh mayuh dosa diampun.