Surat Saint Paul Ngagai
TITUS
 
Jaku Pemuka
 Titus nya orang bansa bukai ke udah nyadi orang Kristian. Iya bekereja enggau Paul, nulung iya nginjil.  Surat Paul Ngagai Titus* ditulis Paul ngagai penulung iya ti agi biak nya, lebuh Titus agi di pulau Krit. Titus udah ditinggalka Paul dia ngambika bisi ngemataka eklisia dia. Surat Paul tu ngenang tiga bengkah pekara.

 Keterubah, Titus diasuh Paul ngingatka gaya perangai ti patut dikembuan orang ke nyadi tuai eklisia. Utai tu amat beguna, laban mayuh orang ba pulau nya jai perangai. Udah nya, iya meri jaku lalau ngagai Titus ba chara ngajar semua raban dalam eklisia nyengkaum: lelaki ke tuai, indu ke tuai (ke patut ngajar indu ke biak agi), lelaki ti agi biak, enggau ulun. Ke pengujung iya, iya ngelalau Titus ba pasal ulah orang Kristian, kelebih agi pasal orang Kristian ti enda tau enda diau bepangan sereta bebaik enggau semua orang, sereta nyeliahka ati ti begedi, nyeliahka kelikuh, enggau penyerekang dalam eklisia.

 Surat tu ditulis Paul nyangka dalam rumah jil di Rome dalam taun 62 A.D.
 
Ripih isi surat tu
Pun jaku (1.1-4)
Bala orang ke mangku pengawa dalam eklisia (1.5-16)
Pengawa ke genap bengkah raban dalam eklisia (2.1-15)
Jaku peransang enggau jaku tangkan (3.1-11)
Penutup (3.12-15)
 
Bagi 1
1 Surat ari Paul, ulun Allah Taala sereta nyadi rasul Jesus Kristus, ketegal pengarap orang ke udah dipilih Allah Taala enggau ketegal penemu pasal pemendar ti mai ngagai pengidup ti nangika Allah Taala,
2 pengarap enggau penemu ti beduduk ba pengadang ke pengidup ti meruan belama iya, ti udah disemaya Allah Taala (Allah Taala enda kala bula) kenyau ari sebedau penumbuh dunya,
3 lalu ba maya ti patut, Iya udah mandangka semaya nya ngena pesan Iya. Pesan nya udah diserahka ngagai aku, lalu aku nusui pesan nya nitihka asuh Allah Taala ti Juruselamat kitai.
4 Ngagai Titus, anak aku ti bendar dalam pengarap kitai: Awakka Allah Taala ti Apai, enggau Jesus Kristus ti Juruselamat kitai meri nuan berekat enggau pemaik.
 
Pengawa Titus Di Krit
5 Kebuah aku ninggalka nuan di Krit, nya ngambika nuan ulih mutarka semua pekara ti apin diputarka, lalu ngeletak orang nyadika tuai eklisia ba genap bengkah nengeri nitihka atur ti diberi aku ngagai nuan.
6  Tuai eklisia enda tau enda orang ke nadai penyalah, ke bisi siku aja bini, lalu anak iya endang orang ke arap, ke nadai kala didinga enda manah ulah, tauka enda ngasi.
7 Laban bishop,  ke ngemataka pengawa Allah Taala, enda tau enda orang ke nadai jalai mantah, enda sumbung, tauka jampat ringat, tauka pemabuk, tauka mangah, tauka amuka duit.
8 Tang iya enda tau enda rindu nyambut temuai, rinduka utai ti badas, ulih nagang diri, lurus, kudus sereta nemu disiplin diri empu.
9 Iya enda tau enda bepegai teguh ba pesan ti tau dikarapka, ti udah diajar, ngambika iya ulih meransang orang ngena ajar ti betul, lalu nyakal orang ke ngelaban ajar nya.
10 Laban mayuh orang deka ngelaban, orang ke semina bejaku ngapa, ke nipu, kelebih agi orang Judah.
11 Padamka jaku sida nya, laban sida ngachau ruang bilik orang ngena ajar ti enda patut diberi, ketegal sida ngulihka duit.
12 Siku ari bala sida, ke endang nabi sida empu, udah nyebut, “Orang Krit endang seruran bula, mangah baka jelu, ngelusu, bam.”
13 Nya endang amat. Nya alai rara sida enggau terit, ngambika sida kering dalam pengarap,
14 lalu enda mendingka cherita kelulu orang Judah, tauka mendingka pesan ti diberi orang ke nulak pemendar.
15 Ba orang ke tuchi, semua utai tuchi magang, tang ba orang ke jai sereta enda arap, nadai siti utai ti tuchi. Runding enggau ati sida endang jai.
16 Sida ngumbai diri nemu Allah Taala, tang utai ti dikereja sida besangkalka nya. Sida dipegedika, enda ngasi, enda tau dikarapka ngereja pengawa ti badas.
 
Bagi 2
Ajar Ti Manah
1 Tang nuan empu enda tau enda meri ajar ti bendar.
2 Asuh sida ke lelaki, ke tuai agi umur, nagang diri, enda empelita diau, bejimat berunding, tegap dalam pengarap, dalam pengerindu, sereta ngembuan ati ti tan.
3 Baka nya mega, asuh sida indu ke tuai agi umur diau tuchi, enda bejakuka orang, enda pengirup. Asuh sida ngajar utai ti badas,
4 ngambika sida ulih matihka indu ke agi biak rinduka laki enggau anak sida,
5 nagang diri, diau tuchi, ngintu ruang bilik sida enggau menyana, nelap, sereta nunduk ngagai laki sida, ngambika jaku Allah Taala nadai jalai mantah.
6 Baka nya mega, peransang lelaki ke agi biak belajar nagang diri.
7 Ayanka diri empu nyadika teladan ti badas dalam semua utai ti dikereja nuan, lalu dalam semua ajar nuan, ayanka diri amat lurus ati, enda empelita ulah,
8 bejaku menyana lalu nadai jalai mantah, ngambika orang ke ngelaban nuan nemu malu laban sida nadai jalai bejaika kitai.
9 Asuh ulun nunduk ngagai tuan sida lalu ngemuaska ati tuan sida dalam semua utai. Sida enda tau besaut enggau tuan sida,
10 tauka ngenchuri utai ari sida, tang ngayanka diri endang seruran manah sereta tetap ati, ngambika dalam semua utai sida mai puji ngagai ajar ti diberi Allah Taala ti Juruselamat kitai.
11 Laban pengasih Allah Taala udah pegari, mai pengelepas ngagai semua mensia,
12 ngajar kitai muai semua ulah ti jai, enggau semua pengingin dunya, lalu nemu nagang diri, diau lurus, sereta nangika Allah Taala dalam dunya tu,
13 sekumbang kitai ke nganti pengadang ti beberekat, enggau mulia Allah Taala, enggau Jesus Kristus ti Juruselamat kitai, pegari
14  ke udah nyerahka Diri ketegal kitai, ngambika Iya ulih nebus kitai ari semua penyai, lalu nuchi kitai ngambika kitai diempu Iya siku aja, lalu gagit ati ngereja pengawa ti badas.
15 Padahka utai tu ngagai orang. Peransang lalu rara orang ngena semua kuasa. Anang nejuka orang ngemaruhka nuan.
 
Bagi 3
Ulah Orang Kristian
1 Asuh bala nembiak nuan nunduk ngagai orang ke megai perintah enggau ngagai orang ke megai kuasa, ngasika sida, lalu sedia deka ngereja pengawa ti badas,
2 enda bejaku jai pasal orang, enda belaya, siru enggau orang, sereta bebasaka semua orang.
3 Laban dulu menya kitai empu udah beli, enda ngasi, tesat, nyadi ulun semua macham pengingin enggau nyadi ulun ati ti selalu deka ngelantangka diri, jai ati ngagai orang, kepapaska orang, dipegedika orang lalu begedika pangan diri.
4 Tang lebuh pemadas, penelap enggau pengerindu Allah Taala ti nyadi Juruselamat kitai pegari,
5 Iya nyelamatka kitai, ukai laban kitai udah ngereja pengawa ti lurus, tang ulih pengasih Iya. Iya nyelamatka kitai ulih Roh Kudus, ke masu kitai, lalu ngadaka kitai baru, lalu meri kitai pengidup ti baru.
6 Roh Kudus nya dituang Allah Taala ngagai kitai belimpah-limpah, ulih Jesus Kristus ti Juruselamat kitai,
7 ngambika kitai digaga lurus ulih pengasih Allah Taala, lalu bempu pengidup ti meruan belama iya ti disadang kitai.
8 Tu jaku ti bendar. Aku dekaka nuan bebendar ngemeranka semua pekara nya, ngambika orang ke udah arapka Allah Taala nemu ngereja pengawa ti badas. Semua utai nya badas magang sereta beguna ke semua orang.
9 Tang seliahka kelikuh ti beli, tauka tusut pasal penatai aki ini, tauka penyerekang, enggau laya pasal Adat, laban utai nya nadai pulai ke penguntung, sereta nadai guna.
10 Beri jaku tangkan enda kurang ari dua kali ngagai orang ke mai penyerekang ngagai gerija udah nya anang agi bekaul enggau iya,
11 laban nuan nemu, orang ke baka nya endang jai sereta bedosa. Iya ngukum diri empu.
 
Atur Ti Penudi
12 Lebuh aku ngasuh Artemas, tauka Tikikus, nemuai ngagai nuan, aku minta nuan enggau naka ulih nemuai ngagai aku di Nikopolis, laban aku udah mutuska runding deka ngenduh dia lebuh musin chelap.
13 Enggau naka ulih, tulung lawyer Senas enggau Apollos nyendiaka diri mupuk. Anang nejukka seduai iya suntuk sebarang utai.
14 Lalu awakka bala kitai belajar ngereja pengawa ti badas, ngambika sida ulih nulung orang ke suntuk, lalu enda masau jam ngapa.
15 Semua orang ke enggau aku bela ngirumka tabi basa ngagai nuan. Beri tabi basa kami ngagai pangan ke sama pengarap enggau kitai. Awakka berekat Allah Taala meruan enggau kita semua.