Surat Ti Kedua Ari Saint Paul Ngagai
TIMOTI
 
Jaku Pemuka
Surat Ti Kedua Ari Saint Paul Ngagai Timoti* ngundan jaku lalau ari Paul ngagai Timoti empu, laban Timoti, ti nyadi penulung iya, agi biak umur. Batang jaku Paul nya pasal pengeliat ati. Timoti diajar sereta diperansang besaksika pasal Jesus Kristus ngena ati ti tetap, bepegai ba ajar ti bendar ti dibai Berita Manah, enggau dibai Sempekat Lama, sereta ngereja pengawa iya ti nyadi pengajar enggau penginjil, taja pen iya dituntung penusah sereta disakal orang.

Timoti diberi jaku lalau ngambika iya enda enggau orang bejaku beli sereta bekelikuh, laban jaku ti baka nya nadai mai penguntung, tang semina ngerusak orang ke mending.

Dalam semua pekara nya, Paul ngasuh Timoti ngingatka teladan ari pengidup enggau juluk ati Paul empu, iya nya, pengarap iya, pengeliat ati, pengerindu iya, pasal iya ke tan natka pemerinsa.

Surat tu ditulis Paul dalam rumah jil di Rome dalam taun 63 A.D.
 
Ripih isi surat tu
Pun jaku (1.1-2)
Jaku puji enggau jaku peransang (1.3-2.13)
Jaku lalau enggau jaku ngasuh bejaga (2.14-4.5)
Gaya pendiau Paul (4.6-18)
Penutup (4.19-22)
 
Bagi 1
1 Surat ari Paul, rasul Jesus Kristus ulih peneka Allah Taala, ketegal semaya pasal pengidup dalam Jesus Kristus,
2 Ngagai Timoti, anak ke dikesayauka aku: Awakka Allah Taala ti Apai enggau Jesus Kristus Tuhan kitai meri nuan berekat, pengasih enggau pemaik.
 
Beterima Kasih Enggau Peransang
3 Aku meri terima kasih ngagai Allah Taala ke disembah  aku enggau ati ti beresi, baka ti dikereja aki ini aku kelia, lebuh aku seruran ngingatka nuan dalam sampi aku.
4 Lebuh aku ingatka ai mata nuan, aku lelengau amat deka betemu enggau nuan ngambika ati aku gaga.
5 Aku ingatka pemesai pengarap nuan, pengarap ti idup dalam ini nuan Lois enggau indai nuan Eunis, lalu diatu idup dalam nuan empu.
6 Nya meh kebuah aku ngasuh nuan seruran ingat ngidupka pemeri Allah Taala ti bisi dalam nuan, lebuh aku ngengkahka jari aku ba nuan;
7 laban Allah Taala ukai meri kitai roh penakut, tang roh kuasa, roh pengerindu enggau roh disiplin diri empu.
8 Nya alai, anang malu besaksika Tuhan kitai, lalu anang malu ke aku ke ditan dalam rumah jil ketegal Iya, tang awakka nuan sama enggau aku, natka pemerinsa ketegal Berita Manah ngena kuasa Allah Taala,
9 ke udah nyelamatka kitai, lalu udah ngangauka kitai nyadi nembiak Iya, ukai ketegal utai ti dikereja kitai, tang ketegal juluk ati enggau pengasih Iya. Pengasih nya udah diberi ngagai kitai dalam Jesus Kristus kenyau ari sebedau penumbuh dunya,
10 tang diatu pengasih nya udah dipandangka ngagai kitai ulih penatai Juruselamat kitai, Jesus Kristus, ke udah ngerusak pemati, lalu udah mandangka pengidup ti meruan belama iya ulih Berita Manah.
11 Ketegal Berita Manah tu meh aku udah dipilih nyadi rasul enggau nyadi pengajar,
12 ti ngujungka aku merinsa baka tu. Tang aku enda malu, laban aku nemu sapa ke dikarapka aku, lalu aku nemu, Iya ulih nyaga, nyentuk ngagai Hari nya, semua utai ti udah diserahka aku ngagai Iya.
13 Titihka semua ajar ti udah didinga nuan ari aku, ngena pengarap enggau pengerindu Jesus Kristus.
14 Ngena saup Roh Kudus ke diau dalam kitai, jaga pesaka ti badas ti udah diserahka ngagai nuan.
15 Nuan nemu, semua orang di menua Asia, nyengkaum Pigelus enggau Hemoginis, udah ninggalka aku.
16 Awakka Tuhan ngayanka pengasih ngagai sida Onisiporus sebilik, laban iya suah udah ngelantangka ati aku sereta enda malu ke aku ke ditan dalam rumah jil.
17 Lebuh iya datai di Rome suba, iya bebendar ngiga aku, datai ke iya nyau tetemuka aku.
18 Awakka Tuhan meri iya pengasih lebuh Hari nya ila! Nuan nemu iya udah bebendar amat nulung aku di Epesus.
 
Bagi 2
Nyadi Soldadu Jesus Kristus
1 Nya alai, anak, anang enda ngeringka diri dalam pengasih Jesus Kristus,
2 lalu jaku ti udah didinga nuan ari aku di mua orang mayuh, serahka jaku nya ngagai orang ke tetap ati, ke ulih ngajar orang bukai.
3 Awakka nuan sama enggau kami taluk natka pemerinsa nyadi soldadu Jesus Kristus.
4 Nadai orang ke nyadi soldadu malut diri enggau pengawa orang periman, laban tuju ati iya endang keran deka ngelantangka ati komandant iya.
5 Baka nya mega, orang ke belumba enda bulih prais enti iya enda nitihka atur lumba.
6 Orang bumai ke bebendar gawa, sigi patut diberi ungkup ari utai ti terubah diketau.
7 Belematika utai ti disebut aku, laban Tuhan deka ngasuh nuan meretika semua utai nya.
8 Kingatka Jesus Kristus, ke udah diangkatka ari mati, ke datai ari peturun David, munyi ti udah dipadahka aku dalam Berita Manah.
9 Ketegal Berita Manah nya meh aku kena perinsa, datai ke aku ditanchang ngena rantai baka orang ke udah ngereja penyalah. Tang jaku Allah Taala enda ditanchang.
10 Nya alai aku natka semua utai ke penguntung orang ke udah dipilih Allah Taala, ngambika sida mega tau bulih pengelepas enggau mulia ti meruan belama iya dalam Jesus Kristus.
11 Tu jaku ti bendar: “Enti kitai udah mati enggau Iya,kitai deka mega idup enggau Iya.
12 Enti kitai tan,kitai deka mega merintah enggau Iya. Enti kitai besangkalka Iya,Iya deka mega besangkalka kitai.
13 Enti kitai enda tetap ati, Iya meruan tetap ati laban Iya enda ulih besangkalka Diri Empu.”
 
Orang Ke Gawa Ke Dikerinduka Allah Taala
14 Asuh sida ngingatka tu, lalu beri sida jaku tangkan di mua Allah Taala ngambika sida enda betalatka leka jaku, laban utai nya nadai pulai ke penguntung, tang semina ngerusak orang ke mending.
15 Enggau naka ulih serahka diri empu ngagai Allah Taala, laban Iya udah ngemendarka nuan, ke enda malu ke pengawa diri, ngajar pesan ti bendar ngena jalai ti betul.
16 Seliahka semua jaku ti nadai guna ti ngeleseka Allah Taala, laban jaku nya semina ngasuh orang ngejangka diri jauh agi ari Allah Taala.
17 Jaku ajar sida nya baka rumbak ti enda nemu gerai. Orang ke bejaku baka nya nyengkaum Himineus seduai Pilitus,
18 ti udah limpang ari pemendar, laban seduai iya ngumbai pengangkat ari mati udah nyadi. Seduai iya ngachau pengarap sekeda orang.
19 Tang pugu ti didudukka Allah Taala endang meruan tegap. Pugu nya ngundan tulis ti munyi tu: “Tuhan nemu sapa ke enggi Iya” enggau leka jaku, “Awakka semua orang ke ngangauka nama Tuhan, ngelengkaka penyai.”
20 Dalam sebuah rumah ti besai bisi mayuh macham mangkuk ti digaga ari pirak enggau emas, tang sekeda mega digaga ari kayu enggau ari tanah liat. Sekeda dikena lebuh maya rami, lalu sekeda dikena sebarang maya.
21 Enti orang nuchi diri empu ari semua penyai, iya nyadi pekekas ti dikena ngereja pengawa ti menyana, digaga kudus, ti tau diguna Tuan iya sereta disediaka ngereja pengawa ti badas.
22 Seliahka semua pengingin nembiak, lalu bebendar ngulihka pengelurus, pengarap, pengerindu, enggau pemaik, sama enggau orang ke ngangauka nama Tuhan ngena ati ti tuchi.
23 Seliahka semua kelikuh ti beli ti nadai reti. Nuan nemu, utai nya semina ngasuh belaya ngapa.
24 Lalu ulun Tuhan enda tau belaya, tang patut nelap enggau semua orang, landik ngajar, liat ati,
25 lalu enggau penyiru ngerara orang ke ngelaban, ngarapka Allah Taala deka ngasuh sida nesal ati ke dosa sida lalu nemu pemendar,
26 lalu ulih ngelepaska diri ari panjuk Sitan ti udah nangkap lalu ngasuh sida ngereja utai ti dikedekaka iya.
 
Bagi 3
Hari Ti Penudi
1 Tang nuan enda tau enda nemu tu: ba hari ti penudi mayuh macham penusah deka nyadi.
2 Laban orang deka semina berundingka diri empu aja, angkunka duit, temegah, sumbung, bejai orang, enda ngasika apai indai, enda nemu meri terima kasih, enda kudus,
3 kasar enggau orang, nadai nemu siruka orang, bejakuka orang, enda nemu nagang diri, mangah, begedika utai ti badas,
4 aum-juak, enda berunding ngereja utai, ngerigangka diri laban sumbung, semina deka ngelantangka diri lalu enda rinduka Allah Taala,
5 baka ke bepegai ba agama, tang sida besangkalka kuasa agama nya. Anang begulai enggau sida!
6 Laban sekeda bala sida tama ngagai rumah orang, lalu bekuasa atas indu ke beli, ke alah ditating dosa sereta alah laban semua macham pengingin,
7 ke seruran diajar tang nadai tetemuka penemu pasal pemendar.
8 Baka Jannes seduai Jambres ke ngelaban Moses, baka nya meh orang tu nyakal pemendar. Runding sida jai, lalu pengarap sida pelesu.
9 Tang sida enda ulih majakka pengawa nya laban, baka ti nyadi ba Jannes seduai Jambres, semua orang deka meda pemeli sida.
 
Atur Ti Penudi
10 Tang nuan udah nemu ajar aku, ulah aku, tuju pengidup aku, pengarap aku, pengeliat ati aku, pengerindu aku, penegap aku,
11  pemerinsa aku, penusah aku, utai ti nyadi ba aku di Antiok, di Ikonium, enggau di Listra, pasal pemalat pemerinsa ti ditatka aku! Tang Tuhan udah ngelepaska aku ari semua utai nya.
12 Iya ti bendar, semua orang ke keran deka diau kudus dalam Jesus Kristus, deka kena perinsaka magang.
13 Tang orang ke jai, enggau orang ke pura-pura ngapa, deka majak jai se-jai, nipu orang, lalu sida empu deka kena tipu.
14 Tang nuan enda tau enda majak bepegai ba utai ti udah dipelajar sereta dikarapka nuan laban nuan nemu sapa ke udah ngajar nuan utai nya,
15 lalu nuan, kenyau ari nuan agi mit, endang udah nemu Bup Kudus ulih ngajar nuan ngulihka pengelepas ulih pengarap ke Jesus Kristus.
16 Semua Bup Kudus endang bepun ari Allah Taala magang, lalu beguna kena ngajar, kena ngerara, kena ngaduka utai ti salah, enggau kena matihka orang diau lurus,
17 ngambika semua nembiak Allah Taala chukup disikap ngereja genap macham pengawa ti badas.
 
Bagi 4
1 Di mua Allah Taala enggau di mua Jesus Kristus ke deka ngakim orang ke idup enggau orang ke mati, enggau ketegal Iya deka datai baru, enggau ketegal Perintah Iya, aku ngasuh nuan
2 nusui Jaku nya, lalu majak nusui Jaku nya, nemuka maya nya ngena tauka enda; nguingka ati orang, ngerara, enggau meransang orang, ngena pengabis pengeliat ati nuan lebuh nuan ngajar.
3 Laban maya deka datai alai orang enggai mendingka ajar ti ngena, tang ingin deka ngempuruka bala pengajar ke deka nyebut utai ti dikerinduka sida,
4 lalu sida deka limpang ari ajar ti bendar lalu mendingka cherita kelulu.
5 Tang nuan enda tau enda seruran tegap dalam semua utai, tan natka pemerinsa, bekereja nyadi penginjil, lalu ngereja semua pengawa nuan.
6 Ba pasal aku empu, aku udah dituang baka genselan, lalu aku nyau deka ninggalka dunya tu.
7 Aku udah bebendar belaban. Aku udah datai ba adan, lalu aku agi mengkang bepegai ba pengarap.
8 Berengkah ari diatu, makota pengelurus udah ditaruh ke aku, ti deka diberi Tuhan, Hakim ti Lurus, ngagai aku lebuh Hari nya ila, lalu ukai semina ngagai aku aja, tang mega ngagai semua orang ke lelengau deka meda Iya pegari.
 
Jaku Ajar Ngagai Timoti Empu
9 Datai kitu ngagai aku enggau naka pengelengkas,
10  laban Demas, ke angkunka dunya, udah ninggalka aku lalu mupuk ngagai Tesalonika; Kresen udah mupuk ngagai Galatia, lalu Titus ngagai Dalmatia.
11 Semina Luke aja bisi enggau aku. Ambi Mark lalu bai iya enggau nuan, laban iya beguna dalam pengawa aku.
12  Aku udah ngasuh Tikikus mupuk ngagai Epesus.
13  Lebuh nuan mansang kitu, bai kelambi ti ditinggalka aku ba Karpus di Troas. Bai mega semua bup, kelebih agi bup ti digaga ari kulit jelu.
14  Tukang temaga ke benama Aleksander, balat amat ngenusahka aku. Tuhan deka malas iya ketegal utai ti dikereja iya.
15 Bejaga ari iya, laban iya balat amat nyakal pesan kitai.
16 Lebuh aku terubah kena pechara suba, nadai siku orang nyukung aku. Semua orang bela ninggalka aku. Awakka Allah Taala enda besalahka sida ketegal nya!
17 Tang Tuhan mengkang bediri ngimbai aku, lalu meri aku pengering kena aku madahka semua pesan, ngambika semua orang bansa bukai ninga pesan nya. Lalu aku pen dilepaska ari nyawa singa.
18 Tuhan deka ngelepaska aku ari semua penyai, lalu nyelamatka aku, ngambika aku pulai ngagai Perintah Iya di serega. Awakka Iya bempu mulia belama- lama iya! Amin.
 
Jaku Tabi Ti Penudi
19 Aku ngirumka tabi basa ngagai Prisila seduai Akuila, enggau ngagai sida Onisiporus sebilik.
20 Erastus mengkang diau di Korint; aku ninggalka Tropimus di Miletus, laban iya sakit.
21 Datai kitu enggau naka ulih sebedau musin chelap. Eubulus ngirumka tabi basa ngagai nuan, lalu baka nya mega Puden, Linus, enggau Klaudia enggau semua orang Kristian ti bukai.
22 Awakka Tuhan meruan enggau nuan. Awakka berekat Allah Taala meruan enggau semua kita.