Surat Ti Keterubah Ari Saint Paul Ngagai
TIMOTI
 
Jaku Pemuka
Timoti datai ari Asia Minor. Indai iya orang Judah, lalu apai iya orang Gerika. Iya nyadi pangan Paul nulung iya nginjil.  Surat Ti Keterubah ari Saint Paul Ngagai Timoti* ngenang pasal tiga bengkah pekara.

 Keterubah, surat tu ngasuh Timoti bejaga ari ajar ti pelesu dalam eklisia. Ajar tu datai ari penemu orang Judah enggau ari orang bansa bukai. Penemu tu beduduk ba pengarap ti ngumbai dunya tu jai, lalu orang semina tau bulih pengelepas ngena penemu ti resia enggau ari sida ke enda makai sekeda pemakai, sereta enda belaki, enda bebini. Surat Paul mega ngundan jaku ajar pasal atur kena bejalaika pengawa ngintu eklisia, enggau pasal atur besembiang, enggau gaya perangai ti patut dikembuan orang ke nyadi tuai eklisia, enggau nyadi dikon dalam eklisia. Timoti mega diberi jaku ajar pasal jalai nyadi ulun ke badas ke Jesus Kristus, enggau pasal tanggungjawap iya ke semua gempuru orang ke arap.

 Surat tu ditulis Paul dalam taun 63 A.D.
 
Ripih isi surat
Pun jaku (1.1-2)
Atur pasal eklisia enggau orang ke gawa ke eklisia (1.3-3.16)
Atur ngagai Timoti pasal kereja iya empu (4.1-6.21)
 
Bagi 1
1 Surat ari Paul, rasul Jesus Kristus ari atur Allah Taala ti Juruselamat kitai, enggau ulih Jesus Kristus ke nyadi pengadang kitai,
 2 Ngagai Timoti, anak aku ti bendar dalam pengarap: Awakka Allah Taala ti Apai kitai enggau Jesus Kristus Tuhan kitai meri nuan berekat, pengasih enggau pemaik.
 
Bejaga Ari Pengajar Ti Pelesu
3 Munyi ti diasuh aku kereja nuan lebuh aku mansang ngagai menua Masedonia suba, awakka nuan mengkang diau di Epesus, ngambika nuan ulih nagang orang mai ajar ti lain agi ari ajar kitai,
4 tauka nusui cherita kelulu, enggau betusut, ti semina ngasuh orang bekelikuh ngapa, ukai belajarka pengawa Allah Taala ti semina ulih ditemu ngena pengarap.
5 Tuju ke meri pesan ti baka nya, iya nya pengerindu, ti datai ari ati ti tuchi, ari ati ti beresi, enggau ari pengarap ti bendar.
6 Sekeda orang udah limpang ari semua utai tu, lalu berandauka utai ti nadai guna.
7 Sida keran deka nyadi pengajar Adat, tang sida enda nemu utai ti disebut diri tauka pasal pekara ti dikeringka sida.
8 Kitai sama nemu, Adat endang manah, enti kitai ngena iya enggau jalai ti patut.
9 Kitai mega nemu, Adat ukai digaga ke orang ke lurus, tang ke orang ke ngelanggar Adat, ke orang ke enda nangika Allah Taala, ke orang ke bedosa, ke orang ke bejaku busung ngelaban Allah Taala, ke orang ke munuh apai indai, ke orang ke pemunuh,
10 ke orang ke ngereja ulah ti kamah, ke orang ke beleman ngena jalai ti salah, ke orang ke betangkapka orang lalu nyual sida nyadi ulun, ke orang ke pemula, ke orang ke besaksi bula, tauka ngereja sebarang utai bukai ti ngelaban ajar ti bendar
11 ti ditemu dalam Berita Manah ti bemulia, ti udah diserahka Allah Taala ti beberekat, ngagai aku.
 
Beterima Kasihka Pengasih Allah Taala
12 Aku meri terima kasih ngagai Jesus Kristus Tuhan kitai, ke udah meri aku pengering, laban Iya udah ngira aku tetap ati, lalu udah ngeletak aku bekereja ke Iya,
13  taja pen aku dulu menya udah bejaku busung ngelaban Iya, lalu udah merinsaka Iya. Tang aku udah bulih pengasih, laban lebuh maya nya suba aku nadai nemu utai, laban aku apin arap.
14 Tuhan kitai lalu nuang pengasih Iya ngagai aku, lalu meri aku pengarap enggau pengerindu ti dalam Jesus Kristus.
15 Tu jaku ti bendar, ti patut diterima semua orang: Jesus Kristus datai ngagai dunya ngambika nyelamatka orang ke bedosa. Lalu aku tu orang ke pemadu jai ari semua orang ke bedosa.
16 Tang nya meh kebuah aku udah nerima pengasih ngambika aku ke pemadu jai tu, ulih dikena Jesus Kristus ngayanka pengabis pengeliat ati Iya, lalu ngaga aku nyadi teladan ke semua orang ke deka arapka Iya, ngambika sida bulih pengidup ti meruan belama iya.
17 Beri meh basa enggau mulia ngagai Raja ke meruan belama iya, ke enda nemu mati, ke enda dipeda, ti Allah Taala siku aja, belama-lama iya! Amin.
18 Timoti, anak aku, aku meri nuan atur tu nitihka jaku ti benabi ti udah disebut dulu suba ba pasal nuan, ngambika lebuh nuan nitihka atur tu, nuan deka kering belaban,
19 bepegai ba pengarap enggau ba ati ti beresi. Sekeda orang udah nulak utai tu, lalu ngerusak pengarap diri.
20 Sida nya nyengkaum Himinius seduai Aleksander, ke udah diserahka aku ngagai Sitan ngambika seduai iya nemu belajar enda agi bejaku busung.
 
Bagi 2
Atur Sembiang Dalam Gerija
1 Nya alai, ke lumur satu, aku minta jaku peminta, sampi, sampi ke orang bukai, enggau sampi terima kasih disebut ke semua orang,
2 ke raja enggau ke semua orang ke megai kuasa, ngambika kitai diau likun dalam pemaik, nangi sereta bebasaka Allah Taala ngena chara ti patut.
3 Tu meh utai ti manah, ti ngerinduka ati Allah Taala ke Juruselamat kitai,
4 ke dekaka semua mensia diselamatka, lalu nemu penemu pasal pemendar.
5 Laban Allah Taala endang siku aja, lalu semina siku aja orang ke mai pemaik entara Allah Taala enggau mensia, iya nya Jesus Kristus,
6 ke udah nyerahka Diri nyadika penebus semua mensia, ke udah dipadahka ba maya ti patut.
7  Nya meh kebuah aku udah diasuh nyadi penginjil enggau nyadi rasul -- aku madahka utai ti bendar, aku enda bula -- nyadi pengajar ke orang bansa bukai ba pasal pengarap enggau pemendar.
8 Aku dekaka orang ke lelaki di semua endur besampi, ngangkatka jari ti kudus sereta nadai mai ati ti pedis tauka kelikuh.
9 Aku mega dekaka sida ke indu begari penumbas iya sereta menyana, ngena gari ti patut, ukai ngena buk ti kelalu balat gaya, tauka bekenaka perengka emas, tauka batu mutiara, tauka bekenaka gari ti mar rega,
10 tang ngereja pengawa ti badas, baka ti patut dikereja indu ke nangika Allah Taala.
11 Awakka sida ke indu belajar enggau enda bemunyi sereta baruh ati.
12 Aku enda ngemendarka indu ngajar, tauka bekuasa atas lelaki. Sida enda tau bemunyi.
13 Laban Adam dulu agi ditempa, udah nya baru Awa;
14 lalu ukai Adam ke kena tipu, tang indu nya ke kena tipu lalu bedosa.
15 Tang taja pia, indu deka diselamatka laban iya beranak, enti iya, enggau ati ti baruh, majak dalam pengarap, pengerindu enggau pengudus.
 
Bagi 3
Orang Ke Nyadi Tuai Gerija
1 Tu jaku ti bendar: barang sapa ingin deka nyadi bishop, iya inginka pengawa ti badas.
2 Orang ke nyadi bishop enda tau enda orang ke nadai jalai mantah, siku aja bini, nemu nagang diri, nemu bejimat mansutka runding, sereta manah ulah, nemu ngelaluka temuai, landik ngajar,
3 ukai orang ke pemabuk, enda mangah tang siru enggau orang, ukai seruran deka belaya, lalu enda angkunka duit.
4 Iya enda tau enda nemu ngintu ruang bilik diri empu enggau menyana, lalu ngajar bala anak iya ngasi sereta bebasaka iya;
5 laban enti orang nya enda nemu ngintu ruang bilik diri empu, baka ni ku iya ulih ngintu eklisia Allah Taala?
6 Iya enda tau orang ke baru udah nyadi orang Kristian, enggai ke iya ngerigangka diri laban sumbung, lalu diukum baka Sitan.
7 Nambahka nya, iya enda tau enda orang ke dibasa orang ke ari luar eklisia, enggai ke iya dipechat lalu disintak panjuk Sitan.
 
Bala Orang Ke Nyadi Dikon
8 Baka nya mega orang ke nyadi dikon. Sida patut orang ke enda empelita ngereja pengawa, ukai orang ke aum-juak, ukai orang ke gian ngirup, lalu enda amuka duit.
9 Sida enda tau enda, enggau ati ti beresi bepegai teguh ba misteri pengarap kitai.
10 Lalu awakka sida diuji dulu. Udah nya, enti sida ditemu nadai udah ngereja penyalah, nya baru sida tau diambi nyadi dikon.
11 Bini sida mega patut orang ke manah ulah, enda bejakuka orang, tang nemu nagang diri, sereta tetap ati dalam semua utai.
12 Dikon  enda tau bebini lebih ari siku, sereta nemu ngintu anak enggau ruang bilik diri enggau menyana,
13 laban dikon ke ngereja pengawa sida enggau menyana deka dibasa orang, sereta berani bejakuka pasal pengarap sida ke Jesus Kristus.
 
Pemesai Misteri Agama Kitai
14 Aku ngarapka diri ulih nemuai ngagai nuan enda lama da agi, tang aku nuliska semua atur tu ngagai nuan ngambika,
15 enti aku laun mimit datai, nuan nemu jalai diri patut begaya dalam ruang bilik Allah Taala, iya nya eklisia Allah Taala ti idup, ti nyadika tiang ti besai enggau sukung ke pemendar.
16 Misteri agama kitai endang amat besai: Iya pegari ngena tubuh mensia. Roh Kudus madahka Iya endang amat, dipeda bala melikat, ditusui ngagai semua bansa, dikarapka mensia di serata dunya, dibai niki ke serega.
 
Bagi 4
Pengajar Ti Pelesu
1 Roh Kudus terang amat madahka, jemah ila sekeda orang deka ngelengkaka pengarap laban sida mendingka roh ti nipu, enggau ajar antu,
2 ti dikerembaika ulih orang ke pura-pura ngapa sereta bula, ke bempu ati ti asai ke disar ngena besi ti angat.
3 Sida nagang orang belaki bebini, nagang orang makai sekeda pemakai ti digaga Allah Taala ngambika bisi diterima enggau sampi terima kasih ulih orang ke arap sereta nemu pemendar.
4 Laban semua utai ti digaga Allah Taala endang manah magang, lalu nadai siti ari utai nya tau ditulak, enti iya diterima ngena sampi terima kasih,
5 laban iya dikuduska ulih jaku Allah Taala sereta enggau sampi.
 
Ulun Ti Badas Ke Jesus Kristus
6 Enti nuan meri ajar tu ngagai bala menyadi kitai, nuan nyadi ulun ti badas ke Jesus Kristus, ulun ke beridup ba jaku pengarap, enggau ba ajar ti badas ti udah dititihka nuan.
7 Seliahka semua cherita kelulu, laban utai nya ukai ari Allah Taala. Patihka diri idup nangika Allah Taala,
8 laban taja pen matihka tubuh beguna, tang matihka diri nangika Allah Taala lebih agi beguna dalam semua pekara, laban ati ti nangi baka nya ngundan semaya ke pengidup ti diatu, enggau pengidup ti deka datai.
9 Jaku tu amat, lalu patut diterima magang.
10 Laban nya meh tuju kitai bebendar bekereja, laban kitai manggaika pengadang kitai ba Allah Taala ti idup, ke nyadi Juruselamat ke semua mensia, kelebih agi ke orang ti arap.
11 Beri ajar tu ngagai sida, lalu asuh sida nitihka iya.
12 Anang nejuka orang ngemaruhka nuan ketegal nuan agi biak, tang awakka nuan empu, ari jaku, ulah, pengerindu, pengarap enggau pengidup nuan ti tuchi, nyadi teladan ke orang ti arap.
13 Sekumbang nuan ke nganti penatai aku, bacha Bup Kudus di mua orang mayuh, tusui Berita Manah, lalu ajar sida.
14 Anang enda ngena pemeri Roh Kudus ti dikemisi nuan, ti udah diberi ngagai nuan lebuh jaku ti benabi disebut bala tuai lebuh sida ngengkahka jari sida atas nuan.
15 Kena semua pemeri nya enggau pengabis ati nuan, ngambika semua orang ulih meda pemansang nuan.
16 Jaga diri empu, lalu jaga mega ajar ti diberi nuan ngagai orang. Majak ngereja nya, laban enti nuan ngereja nya, nuan deka nyelamatka diri empu enggau orang ke mendingka nuan.
 
Bagi 5
Betanggungjawapka Orang Ke Arap
1 Anang bejaku kasar enggau orang ke tuai agi umur ari nuan, tang bejaku enggau iya baka ke bejaku enggau apai nuan empu, lalu enggau orang ke biak agi ari nuan, baka ke bejaku enggau menyadi,
2 enggau indu ke tuai agi, baka ke bejaku enggau indai nuan empu, enggau indu ke biak agi, baka ke bejaku enggau menyadi indu nuan, ngena ati ti tuchi.
3 Bebasaka indu ke balu ke endang amat suntuk.
4 Enti indu ke balu nya bisi anak tauka uchu, sida patut dulu belajar ngereja tanggungjawap agama ngagai ruang bilik sida empu kena malas pemanah apai indai sida, laban nya ngerinduka ati Allah Taala.
5 Indu ke balu, ke diau kediri, udah manggaika pengadang iya ba Allah Taala, lalu majak besampi sereta mantaika peminta iya ngagai Allah Taala siang malam.
6 Tang indu ke balu, ke rindu nurutka pengingin tubuh diri, endang udah mati, taja pen iya agi idup.
7 Beri mega atur tu, ngambika sida nadai jalai orang mantah.
8 Lalu barang sapa enda ngintu kaban belayan diri empu, kelebih agi sida sebilik, udah nulak pengarap, lalu jai agi ari orang ke enda arap.
9 Awakka nama indu ke balu disimpan dalam list nama indu ke balu, enti umur iya lebih ari enam puluh taun, lalu iya semina sekali aja udah belaki.
10 Lalu iya pen endang selalu ditemu ngereja pengawa ti manah baka ngiring bala anak iya empu enggau menyana, ngelaluka temuai ngagai rumah iya, masu kaki * nembiak Tuhan, nulung orang ke kena perinsa, lalu angkun ngereja pengawa ti manah dalam
semua utai.
11 Tang anang nyimpan nama indu ke balu ke agi biak umur dalam list nama indu ke balu, laban lebuh pengingin sida nyeraraka sida ari Kristus, sida deka belaki,
12 lalu kena ukum laban sida udah bulaka semaya sida ti keterubah enggau Kristus.
13 Kelimpah ari nya, sida masau jam mawa ari rumah sebuah ngagai rumah sebuah, lalu ukai semina enda gawa, tang sida mega bejakuka orang, ngachau pengawa orang, besebutka utai ti enda patut disebut sida.
14 Nya alai, aku dekaka indu ke balu, ke agi biak umur, belaki baru, beranak, ngintu rumah tangga diri empu, lalu enda meri peluang ngagai munsuh ngeleseka kitai.
15 Laban sekeda udah limpang lalu nitihka Sitan.
16 Enti indu ke Kristian bisi kaban belayan ke balu, awakka iya nulung sida, ngambika sida enda nating eklisia, ngambika eklisia ulih nulung indu ke balu ke amat nadai orang nulung.
17 Bala tuai ke ngereja pengawa sida enggau menyana patut diberi dua kali lipat gaji, kelebih agi sida ke bebendar nusui Berita Manah enggau ngajar;
18  laban Bup Kudus nyebut, “Anang mampul mulut sapi lebuh iya ngindik gandum.” Bup Kudus mega nyebut, “Orang ke gawa patut diberi gaji.”
19  Anang mendingka jaku dawa ngelaban tuai eklisia, enti jaku dawa nya enda disukung dua tauka tiga iku saksi.
20 Nyadi pasal orang ke majak bedosa, rara sida di mua semua orang mayuh, ngambika orang bukai nemu takut.
21 Di mua Allah Taala, enggau di mua Jesus Kristus, enggau di mua bala melikat ti kudus, aku ngasuh nuan nitihka atur tu enggau enda belampung ati sereta enda bepilih mata ngereja utai.
22 Anang kelalu beguai ngengkahka jari atas orang.  Lalu anang enggau orang ngereja dosa. Intu diri empu tuchi.
23 Anang semina ngirup ai amat aja, tang irup wain mimit kena nulung perut nuan, laban nuan selalu sakit.
24 Dosa sekeda orang amat nyata sebedau sida kena ukum, tang dosa orang bukai semina nyata ila.
25 Pengawa ti manah deka mega nyata dipeda. Indah lebuh sida enda nyata, deh sida enda ulih dipelalaika belama.
 
Bagi 6
1 Semua ulun enda tau enda bebasaka tuan sida, ngambika nama Allah Taala enggau ajar kitai enda dikeleseka orang.
2 Orang ke nyadi ulun orang Kristian, enda tau enda bebasaka tuan sida, laban tuan sida mega orang Kristian baka sida empu. Utai ti patut dikereja sida nya, sida patut bebendar agi bekereja ke tuan sida, laban orang ke bulih penguntung ari pengawa ti dikereja sida nya orang ke arap, ke dikerinduka sida.
 
Ajar Ti Pelesu Enggau Pengaya Ti Bendar
Ajar sereta peransang orang ngereja tanggungjawap nya.
3 Barang sapa mai ajar ti lain agi ari nya, ti enda besetuju enggau jaku ti bendar ari Jesus Kristus Tuhan kitai, lalu enda nitihka ajar pasal idup nangika Allah Taala,
4 orang nya semina ngerigangka diri lalu nadai nemu utai. Iya seruran ingin deka bekelikuh, deka betalatka leka jaku ti semina nyungkak orang kepapas, beserekang penemu, bejai pangan diri, besangkaka pangan diri,
5 belaya enggau pangan diri, jai runding, sereta nadai nemu pemendar, ngarapka diri tau bulih pengaya ari pengawa agama.
6 Agama amat tau ngasuh kitai balat kaya, enti kitai nemu puas ati ke utai ti dikemisi kitai,
7 laban kitai nadai mai utai ngagai dunya tu, lalu kitai pen enda mega ulih mai utai ari dunya tu;
8 tang enti kitai bisi pemakai enggau gari, kitai patut nemu puas ati ke nya.
9 Tang orang ke keran deka nyadi kaya, deka kena laban penguji, lalu dipanjuk mayuh macham pengingin ti beli, ti ngemedis, ti ngerusak.
10 Laban pengangkun ke duit nya pun semua macham penyai. Pengangkun ti baka nya ti mai sekeda orang limpang ari pengarap, lalu ngachuk sida ngena mayuh macham pemedis.
 
Atur Ke Timoti Empu
11 Tang nuan, nembiak Allah Taala, enda tau enda nyeliahka semua utai nya. Ulihka pengelurus, ati ti nangika Allah Taala, pengarap, pengerindu, ati ti tan, enggau penelap.
12 Gawa bebendar ke pengarap. Ulihka pengidup ti meruan belama iya laban nuan udah dikangauka ngagai pengidup nya lebuh nuan ngaku diri arap di mua bala saksi.
13  Di mua Allah Taala, ke meri pengidup ngagai semua utai, enggau di mua Jesus Kristus, ke ngaku Diri di mua Pontius Pilate, aku ngasuh nuan
14 ngasika pesan enggau nadai penimpang, enggau nadai jalai mantah nyentuk ngagai Hari Jesus Kristus Tuhan kitai dipandangka,
15 ti deka dikereja Allah Taala ba maya ti patut--Allah Taala ti beberekat, Raja ti siku aja, ke ari atas semua raja, enggau Tuhan ari atas semua tuhan.
16 Semina Iya siku aja ke enda nemu mati, ke diau dalam penampak ti enda ulih digagai mensia, ke nadai kala dipeda, tauka ulih dipeda mensia. Beri meh basa enggau kuasa ti meruan belama-lama ngagai Iya! Amin.
17 Nyadi pasal orang ke kaya di dunya tu, padahka ngagai sida, sida enda tau sumbung, tauka manggaika pengadang sida ba pengaya ti tau lenyau, tang ba Allah Taala ke meri kitai semua utai kena kitai ngelantangka diri.
18 Sida enda tau enda ngereja pemadas, kaya dalam pengawa ti badas, ngembuan ati ti gerah mudah, sereta sedia deka bekunsika utai enggau orang bukai.
19 Nya meh jalai sida besimpanka pengaya ke diri empu nyadika pugu ti badas ke jemah ila, ngambika sida tau bulih pengidup, iya nya pengidup ti bendar.
20 Timoti, jaga utai ti udah diserahka ngagai nuan. Seliahka jaku ti kamah, enggau kelikuh pasal utai ti dikumbai sekeda orang “Penemu,”
21 laban sekeda orang udah madahka diri bisi “penemu”, lalu nya ngujungka sida limpang ari pengarap. Awakka berekat Allah Taala meruan enggau kita.