Surat Ti Kedua Ari Saint Paul
Ngagai Orang Di
TESALONIKA
 
Jaku Pemuka
Mayuh orang dalam eklisia di nengeri Tesalonika agi charut penemu ba pasal penatai Kristus ti kedua kali.  Surat Ti Kedua ari Saint Paul Ngagai Orang Di Tesalonika* ngenang pasal penemu orang ke ngumbai hari penatai Tuhan kedua kali, udah datai. Paul madahka penemu nya salah, laban ku iya, sebedau Jesus datai baru, penyai enggau ulah ti jai deka balat nyadi di baruh kuasa iya ke dikumbai “Iya Ke Jai,” ke ngelaban Kristus.

 Paul ngajar orang ke macha, ngasuh sida tegap dalam pengarap sida, taja pen sida dituntung penusah enggau pemerinsa, ngambika sida majak bekereja ngidupka diri baka Paul enggau orang ke sama bekereja enggau iya, sereta majak ngereja pemadas.

 Surat tu ditulis Paul dalam taun 52 A.D.
 
Ripih isi surat tu
Pun jaku (1.1-2)
Jaku muji orang Tesalonika (1.3-12)
Ajar pasal penatai Kristus kedua kali (2.1-17)
Diansak idup ngena jalai orang Kristian (3.1-15)
Penutup (3.16-18)
 
Bagi 1
1 Surat ari Paul, Silas enggau Timoti, ngagai eklisia di Tesalonika dalam Allah Taala ti Apai kitai enggau Tuhan Jesus Kristus:
2  Awakka Allah Taala ti Apai kitai enggau Tuhan Jesus Kristus meri kita berekat enggau pemaik.
 
Pengawa Ngakim Lebuh Jesus Datai Baru
3  Kami enda tau enda seruran meri terima kasih ngagai Allah Taala ke kita, menyadi, laban nya endang patut, laban pengarap kita deras amat mansang, lalu pengerindu genap iku kita ke pangan diri nambah-menambah.
4 Nya alai kami empu temegahka kita di mua semua eklisia Allah Taala, ketegal kita tan ati, enggau ketegal pengarap kita, taja pen kita natka semua macham pemerinsa enggau penusah.
 
Diakim Lebuh Kristus Datai Baru
5 Semua utai tu nunjukka Allah Taala endang ngakim ngena pengelurus, ngambika kita ulih tama ngagai Perintah Iya. Ketegal Perintah nya meh kita kena perinsa diatu.
6 Laban Allah Taala ngereja utai ti lurus lebuh Iya merinsaka orang ke merinsaka kita,
7 lalu meri pemaik ngagai kita ke kena perinsa, enggau ngagai kami, lebuh Tuhan Jesus nurun ari serega enggau bala melikat Iya ti bekuasa,
8  dalam daun api ti mau, ngukum orang ke enda ngelala Allah Taala, enggau orang ke enda ngasika Berita Manah Jesus Kristus Tuhan kitai.
9 Sida deka diukum lalu dirusak belama-lama iya, diseraraka ari Tuhan, enggau ari kuasa mulia Iya,
10 lebuh Iya datai nerima puji ari semua nembiak Iya, sereta dibasa semua orang ke arap, laban pesan ti ditusui kami ngagai kita udah dikarapka kita.
11 Nya meh kebuah kami seruran besampika kita, ngambika Allah Taala ngaga kita amat patut dikangauka Iya, lalu nembuka semua utai ti dikinginka Iya enggau semua kereja ti badas, ulih kuasa Iya,
12 ngambika nama Jesus Kristus Tuhan kitai dimuliaka dalam kita, lalu kita dimuliaka dalam Iya, nitihka pengasih Allah Taala kitai enggau pengasih Tuhan Jesus Kristus.
 
Bagi 2
Iya Ke Jai
1  Nyadi pasal penatai Jesus Kristus Tuhan kitai, enggau pasal kitai ke deka digempuruka begulai enggau Iya, kami minta kita, menyadi,
2 anang mudah irau ati tauka teguran ketegal orang bisi ngumbai Hari Tuhan udah datai. Sida nyangka madahka diri udah ninga utai nya ari Roh Kudus, tauka ari orang bukai, tauka ari surat ti ditulis kami.
3 Tang anang sekali-kali nejuka orang nipu kita; laban Hari Tuhan apin datai, sebedau Pengawa Ti Ngelaban nyadi, lalu orang siku ti enda beradat nya dipandangka, ke diletak deka dirusak.
4  Iya ngelaban sereta ngeninggika diri ari atas semua utai ti dikumbai petara tauka utai ti disembah, lalu nudukka diri dalam Rumah Sembiang Allah Taala, lalu madahka diri Allah Taala.
5 Kati kita enda ingatka semua nya? Aku udah madahka semua utai nya ngagai kita lebuh aku agi begulai enggau kita.
6 Lalu kita nemu utai ti nagang iya ti enda beradat nya diatu, ngambika iya dipandangka ba maya ti patut.
7 Laban diatu misteri ti enda beradat nya udah berengkah bekereja, tang semina nyentuk ngagai maya iya ke nagang iya ke enda beradat nya dibai ke tisi.
8 Udah nya baru iya ke enda beradat nya dipandangka, lalu dibuai Tuhan Jesus ngena kesuh nyawa Iya, lalu ngabiska iya lengis ngena mulia Iya lebuh Iya datai.
9 Penatai iya ti enda beradat nya nyata dalam semua pengawa Sitan ke ngena semua kuasa, tanda, kereja ajih ti pelesu,
10 enggau semua macham tipu ti jai, ba orang ke deka mati, laban sida enggai rinduka pemendar ti ulih nyelamatka sida.
11 Nya kebuah Allah Taala ngirumka siti kuasa penipu ti besai ngambika sida arapka utai ti pelesu,
12 ngambika semua orang ke enda arapka pemendar tang rinduka dosa, diukum.
 
Kita Udah Dipilih Nerima Pengelepas
13 Tang kami enda tau enda seruran meri terima kasih ngagai Allah Taala ke kita, menyadi ke dikerinduka Tuhan, laban Allah Taala udah milih kita ngambika kita diselamatka ulih Roh Kudus ti nguduska kita, enggau ulih pengarap kita ke pemendar.
14 Nya meh kebuah Allah Taala udah ngangauka kita ulih Berita Manah ti ditusui kami, ngambika kita tau bulih mulia Jesus Kristus Tuhan kitai.
15  Nya alai, menyadi, bediri tegap lalu bepegai teguh ba ajar ti diberi kami ngagai kita, nemuka ngena mulut tauka ngena surat kami.
16 Awakka Jesus Kristus Tuhan kitai, enggau Allah Taala ti Apai kitai, ke rinduka kitai, lalu udah meri kitai peransang ti meruan belama iya, enggau pengadang, ulih pengasih Iya,
17 meransang sereta ngeringka ati kita ngereja enggau nyebut semua utai ti manah.
 
Bagi 3
Besampi Ke Kami
1 Ke pengujung iya, menyadi, besampika kami, ngambika pesan Tuhan majak ngelekai lalu dibasa, di semua endur  baka ti udah nyadi ba bala kita,
2 lalu besampi mega minta Allah Taala ngelepaska kami ari orang ke jai; laban ukai semua orang arap.
3 Tang Tuhan endang tau dikarapka. Iya deka meri kita pengering, lalu nyaga kita ari iya ti jai.
4 Lalu dalam Tuhan kami nemu kita diatu benung ngereja, sereta deka majak ngereja utai ti diasuh kami kereja kita.
5 Awakka Tuhan nujuka ati kita ngagai pengerindu Allah Taala, enggau ngagai pengeliat ati Kristus.
 
Enda Tau Ngelusu
6 Dalam nama Jesus Kristus Tuhan kitai, menyadi, kami ngasuh kita ngejangka diri ari menyadi ke ngelusu, ke enda nitihka ajar ti diterima kita ari kami.
7  Laban kita empu nemu jalai kita patut nunda teladan kami; kami enda ngelusu lebuh kami begulai enggau kita,
8  lalu kami enda makai utai orang enti kami enda mayar utai nya; tang kami bebendar gawa siang malam, ngambika kami enda nating kita.
9 Kami ngereja nya ukai laban kami nadai hak nating kita, tang ngambika kami nyadika teladan ti tau ditunda kita.
10 Indah lebuh kami begulai enggau kita suba, deh kami meri atur tu ngagai kita: Barang sapa enggai gawa, awakka iya enda makai.
11 Laban kami bisi ninga sekeda kita ngelusu, kiruhka pengawa orang, lalu enggai gawa.
12 Dalam nama Jesus Kristus Tuhan kitai, kami ngasuh sereta meransang orang ke baka nya ngeringak ngereja pengawa diri, ngiga pengidup ke diri empu.
13 Menyadi, anang leju ngereja utai ti ngena.
14 Enti orang enggai ngasika utai ti disebut kami dalam surat tu, kita enda tau enda nemu sapa orang nya. Anang begulai enggau iya, ngambika iya nemu malu.
15 Tang anang ngaga iya nyadi munsuh, tang beri iya jaku tangkan, laban iya menyadi dalam Tuhan.
 
Jaku Ti Penudi
16 Awakka Tuhan Empu, ke pun pemaik, seruran meri kita pemaik ngena semua macham chara. Awakka Tuhan meruan enggau kita semua.
17 Aku, Paul, ke nulis leka jaku tabi basa tu ngena jari aku empu. Tu endang jalai aku nyain semua surat aku. Tu endang jalai aku nulis.
18 Awakka pengasih Jesus Kristus Tuhan kitai meruan enggau kita semua.