Surat Ti Keterubah Ari Saint Paul
Ngagai Orang Di
TESALONIKA
 
Jaku Pemuka
Tesalonika nya indu nengeri menua Masedonia. Menua nya diperintah Rome. Paul udah numbuhka sebuah eklisia di nengeri nya, udah bekau iya ke angkat ari nengeri Pilipi. Tang enda lama udah bekau iya ke numbuhka eklisia dia, orang Judah lalu kepapaska Paul, laban iya udah mujur madahka ajar orang Kristian ngagai orang bukai ke bisi ati deka masuk pengarap orang Judah. Nya alai sida lalu ngelaban iya. Ketegal nya, Paul ngasaika diri enda tau enda angkat ari nengeri Tesalonika, lalu mansang ngagai Beria. Udah nya, lebuh iya udah datai di Korint, Paul bisi nerima berita ari pangan iya Timoti, ke sama bekereja enggau iya, lalu Timoti madahka gaya utai ti nyadi dalam eklisia di nengeri Tesalonika.

 Paul lalu nulis  Surat Ti Keterubah Ngagai Orang Di Tesalonika* kena iya meransang sereta negapka pengarap orang Kristian di nengeri nya. Iya meri terima kasih ke berita pasal pengarap enggau pengerindu sida. Iya minta sida ngingatka gaya pengidup iya lebuh iya begulai enggau sida. Iya lalu nyaut tanya ti bisi udah dibantaika orang pasal Kristus ti deka datai baru ngagai dunya tu. Baka tu ku munyi sekeda ari tanya sida nya: Kati orang ke arap, ke mati sebedau Jesus datai baru, tau enggau bempu pengidup ti meruan belama iya, lebuh Jesus datai baru? Kemaya Kristus deka datai baru? Paul ngambi peluang tu meransang sida majak bekereja, sekumbang sida ke nganti penatai Kristus.

 Surat tu ditulis Paul kira dalam taun 51-52 A.D.
 
Ripih isi surat tu
Pun jaku (1.1)
Jaku terima kasih enggau jaku puji (1.2-3.13)
Pengidup ti ngerinduka ati Allah Taala (4.1-12)
Utai ti patut dikereja lebuh penatai Kristus (4.13-5.11)
Jaku peransang ti penudi (5.12-22)
Jaku penutup (5.23-28)
 
Bagi 1
1  Surat ari Paul, Silas, enggau Timoti, ngagai eklisia di Tesalonika dalam Allah Taala ti Apai enggau Tuhan Jesus Kristus: Awakka berekat enggau pemaik diberi ngagai kita.
 
Pengidup Enggau Pengarap Orang Di Tesalonika
2 Kami seruran meri terima kasih ngagai Allah Taala ke semua kita, lalu seruran nyebut nama kita dalam sampi kami,
3 ngingatka di mua Allah Taala ti Apai, pengawa ti dikereja kita ke pengarap, pengawa ti dikereja kita ketegal pengerindu, enggau penegap pengadang kita ke Jesus Kristus Tuhan kitai.
4 Laban kami nemu, menyadi ke dikerinduka Allah Taala, Iya udah milih kita,
5 laban Berita Manah ti ditusui kami ngagai kita ukai semina ditusui kami ngena leka jaku aja, tang mega ngena kuasa, enggau Roh Kudus, sereta enggau ngena pemesai pengarap kami ke Berita Manah. Kita nemu gaya pendiau kami, lebuh kami begulai enggau kita, ke penguntung kita.
6 Lalu kita nunda teladan kami enggau teladan Tuhan. Taja pen kita balat diperinsa, tang kita nerima jaku nya ngena pengaga ti datai Roh Kudus,
7 ngambika kita nyadi teladan ke semua orang ke arap di Masedonia enggau di Akaia.
8 Laban jaku Tuhan udah ngerembai ari kita ukai semina di Masedonia, enggau di Akaia, tang di semua endur alai pengarap kita ke Allah Taala udah ditemu orang. Nya alai kami enda ibuh bejakuka pasal nya,
9 laban orang ke di menua nya empu madahka gaya pemendar kita nyambut kami, enggau gaya kita nguingka diri ari engkeramba ngagai Allah Taala, lalu bekereja ke Allah Taala ti bendar, Allah Taala ti idup,
10 sereta nganti Anak Iya datai ari serega, ke udah diangkatka Iya ari mati, iya nya Jesus ke ngelepaska kitai ari pengeringat ti deka datai.
 
Bagi 2
Pengawa Paul Di Tesalonika
1 Kita empu nemu, menyadi, kami enda lebu udah nemuai ngagai kita suba,
2 tang taja pen kami udah balat diperinsa sereta dikeduan di Pilipi, baka ke ditemu kita, kami udah diberi Allah Taala pemerani nusui Berita Manah Allah Taala, taja pen mayuh orang nyakal kami.
3 Laban ajar kami ukai datai ari ati ti ngelakar, tauka ari juluk ati ti enda tuchi, tauka ari ati ti deka nipu,
4 tang laban kami udah dikemendarka lalu diasuh Allah Taala nusui Berita Manah, nya alai kami bejaku, ukai deka ngerinduka ati mensia, tang deka ngerinduka ati Allah Taala ke nguji ati kami.
5 Kita empu nemu, lalu Allah Taala Empu nyadika saksi kami, kami nadai kala ngena jaku kelangkung, tauka ngena jaku ti ngelalaika pengamu;
6  lalu kami pen ukai mega minta puji ari mensia, nemuka ari kita tauka ari orang bukai,
7 taja pen kami nyangka patut minta sebarang utai ari kita laban kami tu rasul Kristus. Tang kami nelap lebuh kami begulai enggau kita, baka indai ke siru enggau anak diri.
8  Kami balat rinduka kita datai ke kami sedia deka bekunsi enggau kita, ukai semina Berita Manah ari Allah Taala, tang mega nyawa kami empu, laban kami balat sayauka kita.
9 Kita, menyadi, tentu ingatka pemendar kami gawa. Kami gawa siang malam, ngambika kami enda nating kita lebuh kami nusui Berita Manah Allah Taala ngagai kita.
10 Kita empu meda lalu Allah Taala mega meda ulah kami endang tuchi, betul, sereta nadai salah, lebuh kami begulai enggau kita.
11 Kita empu nemu, kami ngintu kita baka apai ke ngintu anak diri,
12 ngansak, meransang sereta mujuk kita idup ngemuliaka Allah Taala, ke udah ngangauka kita ngagai perintah enggau ngagai mulia Iya Empu.
13  Lalu kami mega seruran meri terima kasih ngagai Allah Taala ke nya, ngambika lebuh kita nerima jaku Allah Taala ti didinga kita ari kami suba, kita nerima iya ukai baka ke nerima jaku mensia, tang nerima jaku Allah Taala, laban iya endang amat jaku Allah Taala, ti bekereja dalam kita ke arap.
14 Laban kita, menyadi, nunda teladan eklisia Allah Taala dalam Jesus Kristus ti di Judea, laban kita empu natka diri diperinsaka bansa kita empu, baka sida di Judea ke diperinsaka orang Judah,
15 ke udah munuh Tuhan Jesus enggau sida nabi, lalu muru kami. Sida ngasuh Allah Taala enda lantang ati, sereta ngelaban semua orang
16 * laban sida nagang kami madah ngagai orang bansa bukai Berita Manah ti ulih nyelamatka sida. Nya alai, baka selama, sida endang seruran ngisi diri penuh enggau dosa. Tang diatu Allah Taala udah ringat ngagai sida!
 
Paul Bisi Ati Deka Nemuai Ngagai Sida Baru
17 Menyadi, lebuh kami nadai begulai enggau kita batang tubuh enda lama, kami balat lelengauka kita lalu gagit ati deka betemu betunga mua enggau kita.
18 Laban kami endang amat deka nemuai ngagai kita. Aku, Paul, endang enda ngetu-ngetu nguji nemuai ngagai kita, tang Sitan nagang kami.
19 Laban nama pengadang kami, tauka pengaga kami, tauka utai ti tau dikemegahka kami di mua Tuhan Jesus, enti ukai kita, lebuh Iya datai baru?
20  Iya ti bendar, kita nyadi nyadika mulia enggau pengaga kami.
 
Bagi 3
1 Nya alai lebuh kami nyau enda ulih natka diri agi, kami lalu mutuska runding ninggalka diri di Atens.
2 Kami lalu ngasuh Timoti, menyadi kitai, ke bekereja ke Allah Taala sama enggau kami ngerembaika Berita Manah pasal Kristus, ngambika iya ngeringka sereta meransang kita dalam pengarap,
3 ngambika nadai siku kita beguyat lebuh kita kena perinsa. Kita empu nemu, pemerinsa nya endang ungkup kitai.
4 Laban lebuh kami begulai enggau kita, kami bisi madah, sebedau utai nya nyadi, kitai sigi deka kena perinsa. Diatu kita nemu utai nya udah nyadi.
5  Nya meh kebuah, lebuh aku nyau enda ulih natka diri agi, aku lalu ngasuh Timoti nemuai ngagai kita ngambika aku nemu pasal pengarap kita, laban aku irau enggai ke Sitan nguji kita, lalu ngelebuka pengawa kami.
6 Tang diatu Timoti baru udah pulai kitu ari kita, lalu udah mai berita ti manah pasal pengarap enggau pengerindu kita. Iya madahka pasal kita ke udah manah amat seruran ngingatka kami sereta lelengauka kami, baka kami ke lelengauka kita.
7 Nya meh kebuah, menyadi, dalam semua penusah enggau pemerinsa kami, kami berasai diperansang ulih kita ketegal pengarap kita.
8 Laban diatu kami idup, enti kita majak bediri tegap dalam Tuhan.
9 Baka ni ku kami ulih meri terima kasih ti chukup ngagai Allah Taala, ke semua pengaga ti diasaika kami di mua Allah Taala ketegal kita?
10 Siang malam kami enggau naka pemendar besampi minta diri betemu enggau kita mua mata, lalu meri ngagai kita utai ti agi bisi kurang dalam pengarap kita.
11 Nya alai diatu awakka Allah Taala ti Apai kitai, enggau Jesus Kristus Tuhan kitai, nujuka pejalai kami ngagai kita.
12 Lalu awakka Tuhan ngasuh kita majak balat agi rinduka pangan diri, enggau rinduka semua orang, baka kami ke balat rinduka kita.
13 Lalu awakka Iya ngeringka ati kita kudus sereta nadai bepenyalah di mua Allah Taala ti Apai kitai, lebuh Tuhan Jesus datai, sama enggau semua nembiak Iya ti kudus.
 
Bagi 4
Pengidup Ti Ngerinduka Ati Allah Taala
1 Ke pengujung iya, menyadi, kami minta lalu meransang kita dalam Tuhan, baka kita ke udah belajar ari kami jalai kita patut idup, lalu ngerinduka ati Allah Taala, baka ke dikereja kita diatu, awakka kita majak ngereja lebih agi ari nya.
2 Laban kita nemu ajar ti udah diberi kami ngagai kita di baruh kuasa Tuhan Jesus.
3 Laban tu peneka Allah Taala ke kita, ngambika kita dikuduska: badu agi bambai;
4 kita patut nemu nagang pengingin tubuh diri ngena jalai ti kudus sereta menyana,
5 ukai ngembuan pengingin ti kamah baka orang bansa bukai ke enda nemu Allah Taala;
6 ngambika nadai siku kita ngereja utai ti salah tauka ngambi ulih ba pangan diri, laban Tuhan deka malas orang ke ngereja nya, munyi ti udah dipadahka kami ngagai kita kena kami nangkan kita.
7 Laban Allah Taala ukai ngangauka kitai ngagai pengidup ti kamah, tang ngagai pengidup ti kudus.
8 Nya alai, barang sapa nulak ajar tu, ukai nulak ajar mensia, tang nulak ajar Allah Taala, ke meri Roh Kudus Iya ngagai kita.
9 Pasal pengerindu ke pangan ke sama pengarap, kita enda ibuh begunaka orang nuliska nya ngagai kita, laban kita empu udah diajar Allah Taala, ngasuh kita rinduka pangan diri;
10 lalu kita endang amat rinduka semua menyadi di serata menua Masedonia. Tang kami meransang kita, menyadi, ngasuh kita majak ngereja lebih agi ari nya,
11 ngasuh kita likun ulah, ngereja pengawa diri, lalu bekereja ngena jari kita empu munyi ti diasuh kami;
12 ngambika kita manah ulah lebuh kita begulai enggau orang ke ukai Kristian, lalu enda bepanggai ba orang.
 
Penatai Tuhan
13  Tang kami enggai ke kita enda nemu, menyadi, pasal orang ke udah mati, ngambika kita enda tusah ati baka orang ke nadai pengadang.
14 Laban kitai arapka Jesus udah mati, lalu udah angkat idup baru, nya alai, ulih Jesus, Allah Taala deka mai enggau Iya orang ke udah mati.
15 Laban tu utai ti dipadahka kami ngagai kita ari jaku Tuhan Empu, iya nya, kitai ke idup, ke agi tinggal di dunya tu nyentuk ngagai maya penatai Tuhan, enda mupuk dulu ari orang ke udah mati.
16 Laban Tuhan Empu deka nurun ari serega enggau nyawa ti inggar, enggau nyawa tuai melikat, enggau munyi terumpit Allah Taala. Lalu orang ke mati, ke udah arapka Tuhan, deka angkat dulu.
17 Udah nya baru kitai ke agi idup, ke agi tinggal, deka digempuruka sama enggau sida dalam remang lalu betemu enggau Tuhan di langit, lalu kitai deka diau begulai enggau Tuhan belama iya.
18 Nya alai peransang pangan diri ngena jaku tu.
 
Bagi 5
Sedia Deka Nerima Penatai Tuhan
1 Tang ba pasal maya enggau musin, menyadi, kami enda ibuh nuliska pasal nya ngagai kita.
2 Laban kita empu nemu, Hari Tuhan deka datai baka penchuri ke datai lebuh malam hari.
3 Lebuh orang nyebut, “Kitai bisi pemaik sereta likun,” pengerusak deka ngenyit ninggang sida, baka indu ke radai deka beranak, lalu sida nadai jalai ngerarika diri.
4  Tang kita, menyadi, ukai diau dalam pemetang lalu kita enda patut tekenyit lebuh Hari nya datai baka penchuri,
5 laban semua kita endang anak penampak, anak siang hari. Kitai tu ukai anak malam hari tauka anak pemetang.
6 Nya alai, anang kitai tinduk baka orang bukai, tang awakka kitai seruran dani sereta sedia belama;
7  laban orang ke tinduk, tinduk lebuh malam hari, lalu orang ke mabuk, mabuk lebuh malam hari.
8  Tang laban kitai tu anak siang hari, kitai patut nemu nagang diri, lalu ngerasukka pengarap enggau pengerindu nyadika terabai dada kitai, enggau pengadang kitai ke pengelepas nyadika selapuk kebal kitai.
9 Laban Allah Taala ukai milih kitai ngambika kitai ditinggang pengeringat, tang ngambika kitai bulih pengelepas ulih Tuhan kitai Jesus Kristus
10 ke udah mati ke kitai, ngambika, nemuka kitai dani tauka tinduk, kitai tau idup begulai enggau Iya.
11 Nya alai peransang sereta tulung sukung pangan diri, baka ke dikereja kita diatu.
 
Atur Enggau Jaku Tabi Ti Penudi
12 Tang, menyadi, kami minta kita bebasaka orang ke bekereja ba bala kita, ke nyadi tuai kita dalam Tuhan sereta meri jaku tangkan ngagai kita.
13 Beri basa enggau pengerindu ti pemadu besai ngagai sida ketegal pengawa sida. Diau bebaik enggau pangan diri.
14  Lalu kami ngasuh kita, menyadi, meri jaku tangkan ngagai orang ke ngelusu, meransang orang ke takut, nulung orang ke lemi, lalu liat ati enggau semua sida.
15 Bejaga kita, anang malas penyai ngena penyai, tang seruran ngereja utai ti badas ngagai pangan diri enggau ngagai semua orang.
16  Seruran gaga ati;
17  seruran besampi;
18 beri terima kasih dalam semua utai, laban nya utai ti dikedekaka Allah Taala ari kita dalam Jesus Kristus.
19  Anang madamka Roh Kudus.
20 Anang ngeleseka jaku sida nabi,
21 dulu semua utai. Bepegai teguh ba utai ti badas,
22 seliahka semua penyai.
23 Awakka Allah Taala ti meri pemaik, nguduska kita enggau penuh; lalu awakka roh enggau semengat enggau tubuh kita diintu enggau menyana sereta nadai bepenyalah lebuh Jesus Kristus Tuhan kitai datai.
24 Iya ke ngangauka kita, deka ngereja nya laban Iya endang tau dikarapka.
25 Menyadi, besampi ke kami.
26 Beri tabi basa ngena pengerindu ngagai semua menyadi dalam Tuhan.
27 Dalam nama Tuhan aku ngansak kita macha surat tu ngagai semua bala menyadi.
28 Awakka pengasih Jesus Kristus Tuhan kitai meruan enggau kita.