Surat Saint Paul Ngagai Orang Di
KOLOSI
 
Jaku Pemuka
Surat Saint Paul Ngagai Orang Di Kolosi* ditulis ngagai eklisia di Kolosi, sebuah nengeri di menua Asia, adap ke timur ari nengeri Epesus. Eklisia tu ukai ditumbuhka Paul, tang Paul berasai betanggungjawapka eklisia nya laban eklisia nya dalam kandang menua ti dikemataka Paul. Nya alai iya ngasuh nembiak Tuhan bejalai ari Epesus, indu nengeri menua Asia ti dipegai perintah Rome, ngagai eklisia nya, laban Paul bisi udah ninga berita pasal pengajar ti pelesu dalam eklisia di Kolosi. Bala pengajar nya udah madahka, enti orang keran deka nemu Allah Taala, lalu nerima pengelepas, sida enda tau enda nyembah sekeda “roh ke merintah, enggau perintah.” Nambahka nya, ku bala pengajar nya, orang enda tau enda ngereja sekeda utai nitihka atur pengarap, baka betutus, lalu nitihka adat ti terit pasal pemakai enggau pasal utai bukai.

Paul nulis surat tu kena iya ngelaban ajar nya, ngena ajar orang Kristian ti bendar. Batang saut Paul nya pasal Jesus Kristus ke ulih meri pengelepas, lalu semua utai ti dikereja sida, enggau utai ti dikarapka sida nya semina ngejangka sida ari Kristus. Ulih Kristus, Allah Taala udah ngaga dunya, lalu ulih Kristus Iya mai dunya pulai baru ngagai Iya Empu. Semina dalam Jesus Kristus aja, dunya deka dilepaska. Paul lalu madahka reti ajar nya dalam pengidup sida ke arap.

Peratika Tikikus enggau Onisimus ke mai surat Paul tu ngagai orang di Kolosi. Onisimus nya siku ulun ke dikenang Paul dalam surat iya ngagai Pilimon.

Surat tu ditulis Paul dalam rumah jil di Rome entara 61-63 A.D.
 
Ripih isi surat tu
Pun jaku (1.1-8)
Gaya enggau pengawa Kristus (1.9-2.19)
Pengidup ti baru dalam Kristus (2.20-4.6)
Penutup (4.7-18)
 
Bagi 1
1 Surat ari Paul, rasul Jesus Kristus ulih peneka Allah Taala, enggau ari menyadi kitai Timoti,
2 Ngagai bala nembiak Tuhan enggau ngagai menyadi lelaki enggau menyadi indu kitai ke tetap ati ngagai Kristus di Kolosi: Awakka Allah Taala ti Apai kitai meri kita berekat enggau pemaik.
 
Sampi Terima Kasih
3 Kami seruran meri terima kasih ngagai Allah Taala ti Apai Jesus Kristus Tuhan kitai, lebuh kami besampika kita,
4 laban kami bisi ninga pasal pengarap kita ke Jesus Kristus, enggau pasal pengerindu kita ke semua nembiak Tuhan,
5 ketegal pengadang ti disedia ke kita di serega. Kita udah ninga pasal pengadang tu suba dalam pesan ti bendar, iya nya Berita Manah
6 ti udah datai ba kita. Baka iya ti bebuah sereta ngerembai di serata dunya, baka nya mega Berita Manah nya udah bebuah ba bala kita kenyau ari maya kita ke terubah ninga iya lalu belabuh meretika semua pemendar pasal pengasih Allah Taala.
7 Kita udah nemu pasal pengasih nya ari Epapras, orang ke sama bekereja enggau kami, ke dikerinduka kami. Epapras nya orang ke tetap ati bekereja ke Kristus ngarika kita,
8 lalu iya udah madah ngagai kami pasal pengerindu kita dalam Roh Kudus.
9 Nya kebuah, kenyau ari maya kami ninga nya, kami enda ngetu besampika kita, minta kita dipenuhka enggau penemu pasal peneka Allah Taala, sereta enggau semua penemu-dalam enggau pemereti ti datai ari Roh Kudus,
10 ngambika kita idup nitihka jalai Tuhan, ngerinduka ati Iya lebuh kita bebuah ngereja semua pengawa ti manah, sereta mansang dalam penemu pasal Allah Taala.
11 Awakka kita digaga nyadi kering ulih semua pengering ti datai ari kuasa Iya ti bemulia, lalu awakka kita sedia tan natka semua pemerinsa enggau ati ti liat, lebuh kita, enggau ati ti gaga
12 meri terima kasih ngagai Apai, ke udah ngasuh kami bekunsika pesaka nembiak Tuhan ke diau dalam penampak.
13 Iya udah ngelepaska kitai ari kuasa pemetang, lalu mindahka kitai ngagai Perintah Anak ke dikerinduka Iya,
14 ke udah nebus kitai, reti nya, udah ngampun dosa kitai. Kristus, Enggau Pengawa Iya 15 Kristus nya meh gamal Allah Taala ti enda ulih dipeda. Iya Anak ke terubah diadaka ari atas semua utai ti digaga,
16 laban semua utai ti di serega enggau di dunya udah digaga ulih Kristus, utai ti ulih dipeda enggau ti enda ulih dipeda, nemuka utai nya kerusi diraja, tauka kuasa, tauka perintah, tauka pemerintah -- semua utai nya udah digaga ulih Kristus, ke Kristus.
17 Kristus endang udah bisi dulu ari semua utai, lalu semua utai begempung dalam Iya.
18 Kristus nyadi kepala ke tubuh, iya nya eklisia. Kristus nyadika pun, Anak ke terubah diangkatka ari mati, ngambika Iya ari atas semua.
19 Laban semua personaliti Allah Taala udah gaga diau dalam Kristus,
20 lalu ulih Kristus, Allah Taala udah gaga ati mai semua utai bebaik enggau Allah Taala Empu, nemuka di dunya tauka di serega, ulih darah Kristus ti dituang ba kayu regang.
21 Lalu kita, ke udah beserara ari Allah Taala, lalu udah bemunsuh enggau Iya dalam ati kita, lalu udah ngereja penyai,
22 diatu udah dibai Kristus bebaik enggau Allah Taala ngena tubuh Kristus Empu, ulih pemati Iya, ngambika Iya nyerahka kita kudus, nadai bepenyalah, nadai jalai mantah, ngagai Allah Taala,
23 asal ga kita majak tegap sereta tan dalam pengarap, enda bekinsit ari pengadang ti disemaya Berita Manah ti udah didinga kita, ti udah ditusui ngagai semua orang di baruh langit. Aku udah nyadi ulun Berita Manah nya.
 
Pengawa Paul Ke Nyadi Ulun Gerija
24 Diatu aku gaga ati natka pemerinsa, ke penguntung kita, lalu dalam tubuh aku empu, aku ngenyukupka pemerinsa ti enda ditatka Kristus, ke penguntung eklisia, iya nya tubuh Iya.
25 Aku udah diasuh Allah Taala bekereja ke eklisia, ngereja pengawa ti udah diberi Iya ngagai aku ke penguntung kita, ngambika jaku Allah Taala ditemu magang,
26 iya nya misteri ti udah dilalaika Allah Taala ari semua serak sejeman-jeman tu, tang diatu dipandangka ngagai nembiak Iya.
27 Allah Taala udah mandangka nya laban Iya dekaka kita orang bansa bukai nemu pemesai pengaya enggau mulia misteri nya, iya nya Kristus ke diau dalam kita, ke alai kita manggaika pengadang kita deka sama enggau bempu mulia Allah Taala.
28 Kristus nya ke ditusui kami, lalu kami meri jaku tangkan sereta ngajar genap iku orang ngena semua penemu-dalam, ngambika kami ulih nyerahka genap iku sida chukup badas dalam Kristus.
29 Nya meh kebuah aku bebendar bekereja ngena semua pengering kuasa ti diberi Iya ngagai aku.
 
Bagi 2
1 Laban aku dekaka kita nemu pemendar aku bekereja ke kita, enggau ke sida ke di Laudisia, enggau ke semua orang ke enda kala betemu betunga mua enggau aku.
2 Aku dekaka ati sida diperansang sereta begempung dalam pengerindu, ngambika sida meretika semua utai, lalu nemu misteri Allah Taala, iya nya Kristus Empu,
3 ke alai semua penemu-dalam enggau penemu dilalaika.
4 Aku nyebut tu ngambika orang enda ulih nipu kita ngena kelakar ti manah didinga.
5 Laban taja pen aku enda begulai enggau kita batang tubuh, tang aku begulai enggau kita dalam roh, lalu aku gaga meda kita seati sereta tegap dalam pengarap kita ke Kristus.
 
Pengidup Ti Penuh Dalam Kristus
6 Nyadi laban kita udah nerima Jesus Kristus nyadika Tuhan kita, awakka kita majak idup dalam Iya,
7 beurat sereta mansang dalam Iya, lalu nyadi tegap dalam pengarap, nitihka ajar ti udah diberi ngagai kita, lalu seruran meri terima kasih.
8 Anang nejuka orang nipu kita ngena penemu enggau kelakar ti nadai reti, ti datai ari ajar mensia, ti datai ari ajar bala roh ti merintah di langit enggau di dunya tu, ukai ari Kristus.
9 Laban semua personaliti Allah Taala endang diau dalam tubuh Kristus,
10  lalu kita udah diberi pengidup enggau penuh dalam Kristus ke ari atas semua pemerintah enggau kuasa.
11 Dalam Kristus mega kita udah ditutus ngena chara roh, lebuh Iya ngelepaska kita ari ulah ti bedosa, ukai ditutus jari mensia tang, tang ditutus Kristus,
12 lebuh kita dikuburka sama enggau Iya lebuh kita dibaptisa, lalu kita mega diangkatka ari mati sama enggau Iya ulih pengarap kita ke kuasa Allah Taala ti ngangkatka Iya ari mati.
13 Lebuh kita agi mati dalam dosa, lalu kita apin ditutus ari dosa kita, Allah Taala ngidupka kita sama enggau Kristus, lebuh Iya ngampun kitai ari semua dosa kitai,
14 lebuh Iya muai semua adat ti ditulis enggau atur ti ngelaban kitai. Iya muai semua utai nya, lebuh Iya mantangka sida ba kayu regang.
15 Iya ngerampas semua senyata ari perintah enggau kuasa, lalu mandangka sida ngagai orang mayuh, kena Iya ngayanka Diri udah menang ngelaban sida ngena kayu regang.
16  Nya alai anang nejuka orang ngakim kita pasal utai ti diempa tauka diirup kita, tauka pasal hari ti kudus, tauka pasal Gawai Anak Bulan, tauka pasal hari Sabat.
17  Semua utai nya semina ayuk utai ti deka datai, tang utai ti bendar diempu Kristus.
18 Anang nejuka orang ngumbai kita enda chukup badas. Sida nya orang ke pura-pura baruh ati lalu besembahka melikat. Sida bejakuka pasal genera, ngerigangka diri enggau nadai kebuah ngena runding mensia.
19 Sida enda bepegai teguh ba Kristus, ke nupi sereta bejantilka semua perengka tubuh nya ngena urat enggau rakat, lalu ngasuh tubuh nya mansang besai nitihka peneka Allah Taala.
 
Mati Idup Enggau Kristus
20 Enti kita udah mati enggau Kristus, lalu udah dilepaska ari roh ke merintah di langit enggau di dunya, nama kebuah kita diau baka ke agi diempu dunya? Nama kebuah kita nunduk ngagai adat baka
21 “Anang megai nya, Anang ensepi nya, Anang negu nya”?
22  Semua adat nya bejakuka pasal utai ti nemu abis lebuh sida udah dikena, laban utai nya semina adat enggau ajar mensia.
23 Adat nya baka ke beduduk ba penemu-dalam, ngasuh orang pura-pura ngayanka diri kudus, ngayanka diri baka ke baruh ati, merinsaka tubuh diri, tang utai nya nadai guna kena nagang pengingin tubuh.
 
Bagi 2
1 Nya alai enti kita udah diangkatka idup baru enggau Kristus, tumpuka ati kita ngagai utai ti di serega, alai Kristus ke duduk muak ari kanan Allah Taala.
2 Berundingka utai serega, ukai berundingka utai dunya,
3 laban kita udah mati, lalu pengidup kita diatu dilalaika enggau Kristus dalam Allah Taala.
4 Lebuh Kristus, ke nyadi pengidup kitai, pegari, kita deka mega pegari enggau Iya dalam mulia!
 
Pengidup Ti Lama Enggau Ti Baru
5 Nya alai bunuh semua pengingin dunya ti dalam kita, baka: pengawa bambai, ulah ti kamah, runding ti kamah, pengingin ti jai, enggau pengamu (reti nya nyembah engkeramba).
6 Nya utai ti nyungkak Allah Taala ringat ngagai orang ke enda ngasi.
7 Nya meh gaya pengidup kita suba, lebuh kita agi nitihka pengingin dunya.
8 Tang diatu buai semua utai nya ari kita, baka: pengeringat, ati ti ngeransi, ati ti bedendam, ati ti seruran deka bejakuka orang, enggau jaku ti kamah.
9  Anang bulaka pangan diri, laban kita udah ngelengkaka pengidup ti lama, enggau semua pengawa iya,
10  lalu udah nyadi mensia ti baru, ke majak diubah nyadi baru belama dalam penemu neladan gamal Allah Taala Empu.
11 Dalam pengidup ti baru tu sigi nadai bida entara orang bansa bukai enggau orang Judah, entara orang ke udah ditutus enggau orang ke enda ditutus, entara orang ke enda beradat  enggau orang ke semina pama mimit ari jelu, entara orang ke ulun enggau orang ke ukai ulun, tang Kristus nyadi semua, dalam semua!
12  Nya alai, laban kita udah dipilih Allah Taala nyadi orang ke kudus sereta dikerinduka Iya, rasukka penyiru, penelap, ati ti baruh, ati ti nemu nunduk ngagai pangan diri, enggau ati ti liat.
13  Sabar enggau pangan diri, lalu ampun pangan diri enti kita bisi enda nyamai ati ngagai pangan diri. Baka Tuhan ke udah ngampun kita, baka nya mega kita ngampun pangan diri.
14 Lebih ari semua, rasukka pengerindu kena ngempung semua utai nyadi siti.
15 Lalu awakka pemaik Kristus merintah dalam ati kita, laban semua kita udah dikangauka ngagai pemaik nya dalam siti tubuh. Lalu seruran beterima kasih.
16 Awakka semua jaku Kristus diau dalam kita. Ajar lalu rara pangan diri ngena semua penemu-dalam, lalu belagu ngena masmur, pantun, enggau ngena lagu Roh ngagai Allah Taala, enggau ati ti beterima kasih.
17 Dalam semua utai ti dikereja kita, nemuka ngena jaku tauka ngena pengawa, kereja semua utai nya dalam nama Tuhan Jesus, meri terima kasih ngagai Allah Taala dalam nama Iya.
 
Kaul Enggau Pangan Diri Dalam Pengidup Ti Baru
18 Kita ke bini, nunduk ngagai laki kita, laban nya endang patut dikereja kita dalam Tuhan.
19 Kita ke laki, rinduka bini kita, lalu anang kasar enggau sida.
20 Kita ke anak, ngasika apai indai kita dalam semua utai, laban nya ngerinduka ati Tuhan.
21  Kita ke apai, anang ngereja utai ti tau ngasuh anak kita ringat, enggai ke sida alah semengat.
22  Kita ke ulun, ngasika tuan kita dalam semua utai, ukai semina lebuh sida meda kita ketegal kita minta diri dikerinduka sida, tang enggau pengabis ati kita laban kita nangika Tuhan.
23 Kereja semua utai enggau pengabis ati kita, baka ke bekereja ke Tuhan, ukai ke mensia,
24 laban kita nemu, kita deka nerima ari Tuhan pesaka nyadika upah kita, laban kita bekereja ke Tuhan Jesus Kristus.
25 Laban orang ke ngereja penyalah deka diupah nitihka penyalah ti dikereja iya, lalu Tuhan enda bepilih mata.
 
Bagi 4
1 Kita ke tuan, intu ulun kita enggau badas sereta lurus, laban kita empu nemu kita bisi mega Tuan di serega,
 
Mayuh Bengkah Atur
2 Seruran majak besampi. Lebuh kita besampi, seruran bejaga sereta besampi terima kasih.
3 Besampi mega ke kami, minta Allah Taala muka pintu ngambika kami ulih nusui misteri Kristus. Nya pengawa ti ngasuh aku kena tutup.
4 Besampi ke aku, ngambika aku ulih nerangka misteri nya, baka ti patut dikereja aku.
5 Kita enda tau enda pintar lebuh kita begulai enggau orang ke ukai orang Kristian, ngena semua peluang kita.
6 Awakka jaku kita seruran badas sereta ngenyamaika ati orang, ngambika kita nemu jalai kita patut nyaut semua orang.
 
Jaku Tabi Ti Penudi
7  Taikikus deka madahka semua berita pasal aku ngagai kita. Iya tu menyadi ke dikerinduka kami, ke tetap ati enggau kami bekereja ke Tuhan.
8 Aku udah ngasuh iya nemuai ngagai kita ketegal tuju tu aja, iya nya, ngambika kita nemu berita pasal kami, sereta ngambika iya meransang kita.
9 Iya deka datai sama enggau Onisimus, menyadi ke tetap ati, ke dikerinduka kitai, ke ari raban kita empu. Seduai iya deka madah ngagai kita semua utai ti nyadi ditu.
10 Aristarkus, ke ditutup dalam rumah jil sama enggau aku, ngirumka tabi basa ngagai kita, lalu baka nya mega Mark, petunggal Barnabas. (Kita udah nerima atur pasal iya; enti iya datai, sambut meh iya.)
11 Jesus, ke dikumbai Justus, mega ngirumka tabi basa. Ka semina sida tiga tu aja orang Judah ke arap, ke bekereja enggau aku ke Perintah Allah Taala, lalu sida tiga tu udah ngelantangka ati aku.
12 Epaphras, iya nya siku raban kita empu, ke nyadi ulun Jesus Kristus, ngirumka tabi basa. Iya seruran bebendar amat besampika kita, ngambika kita nyadi orang ke besai tuai dalam pengarap, lalu nemu semua peneka Allah Taala.
13 Laban aku besaksi madahka iya udah bebendar amat bekereja ke kita, enggau ke sida ke di Laudisia, enggau di Hierapolis.
14  Luke, lutur ke dikesayauka kitai, enggau Demas ngirumka tabi basa ngagai kita.
15 Beri tabi basa ari aku ngagai bala menyadi  ke di Laudisia, kelebih agi ngagai Nympa, enggau ngagai raban eklisia ke begempuru dalam rumah iya.
16 Lalu lebuh surat tu udah dibacha di mua bala kita, awakka iya mega dibacha dalam eklisia di Laudisia. Lalu kita patut mega macha surat ari Laudisia.
17  Lalu sebut ngagai Arkipus, “Nuan enda tau enda nembuka pengawa ti udah diterima nuan dalam Tuhan.”
18  Aku, Paul, ke nulis leka jaku tu: Tabi ari Paul. Kingatka aku ke ditanchang ngena rantai! Awakka Allah Taala merekatka kita.