ULANG ADAT
 
Jaku Pemuka
Bup Ulang Adat* ditulis kena madahka jaku Moses ngagai orang Israel, lebuh sida di menua Moap, alai sida ke enda tau enda ngetu udah bekau sida ke lama udah bejalai nengah menua puang, lalu baru deka datai di menua Kanaan, lalu ngalahka menua nya.

Pekara ti pemadu beguna, ti ditulis dalam bup tu nyengkaum: (1) Moses mai orang Israel ngingatka utai ti udah nyadi empat puluh taun ti dulu ari nya. Iya minta orang mayuh ngingatka chara Allah Taala udah nguluka sida bejalai nengah menua puang, lalu minta sida ngasi sereta taluk ngagai Allah Taala. (2) Moses ngulang Sepuluh Pesan Allah Taala, lalu madahka pemesai reti Pesan ti keterubah, lalu minta orang mayuh angkunka TUHAN siku aja. Udah nya iya lalu ngulang semua adat ti deka dikena merintah pengidup orang Israel lebuh sida diau ila di menua ti udah disemaya. (3) Moses ngasuh orang mayuh ngingatka reti sempekat entara Allah Taala enggau sida, lalu minta sida seruran taluk ngagai sempekat nya. (4) Josua diletak nganti Moses nyadi tuai bala nembiak Allah Taala. Udah bekau iya ke belagu muji penetap ati Allah Taala ke orang Israel, lalu merekatka orang Israel, Moses lalu mati di menua Moap, di timur Sungai Jordan.

Batang jaku ti dalam bup tu ngenang pasal Allah Taala ti udah ngelepas sereta merekatka bala nembiak Iya, ke dikerinduka Iya. Nya alai bala nembiak Iya enda tau enda ngingatka utai tu, lalu rinduka Iya sereta ngasika Iya, ngambika sida idup lalu majak ngasaika berekat ari Iya.

Ayat ti pemadu besai reti dalam bup tu nya 6.4-6. Ayat tu ngundan jaku ti dikumbai Jesus pesan ti pemadu besai: “Rinduka TUHAN Allah Taala kita enggau pengabis ati kita, enggau pengabis semengat kita, enggau pengabis pengering kita.”
 
Ripih Isi Bup Tu
Jaku Moses ti keterubah (1.1-4.49)
Jaku Moses ti kedua (5.1-26.19)
     a. Sepuluh Pesan (5.1-10.22)
     b. Adat, atur, enggau jaku tangkan (11.1-26.19)
Atur pasal tama ngagai menua Kanaan (27.1-28.68)
Ngulang sempekat (29.1-30.20)
Jaku Moses ti penudi (31.1-33.29)
Pemati Moses (34.1-12)
 
Bagi 1
Jaku Pemuka
1 Bup tu ngundan jaku Moses ngagai semua orang Israel lebuh sida di menua puang di timur Sungai Jordan. Sida iya benung ba Lebak Jordan, semak Sup, entara nengeri Paran ti muak ari sepiak enggau nengeri Topel, Laban, Haserot enggau Disahap muak ari sepiak.
2 (Penyauh Bukit Sinai ari Kades-barnea nya kira pejalai sebelas hari enti nengah menua ti bebukit di Edom.)
3 Kena satu hari bulan ti kesebelas dalam taun ti keempat puluh udah bekau sida pansut ari menua Ejip, Moses madahka ngagai orang Israel semua utai ti udah diasuh TUHAN padahka iya ngagai sida.
4 Utai tu nyadi udah bekau TUHAN ngalahka Raja Sihon, raja orang Amor, ke merintah di nengeri Hesbon, enggau Raja Og menua Basan, ke merintah di nengeri Astarot enggau nengeri Edrei.
5 Lebuh orang Israel benung di timur Sungai Jordan, di menua Moap, Moses belabuh nerangka adat enggau ajar Allah Taala. Ku iya,
6 “Lebuh kitai ba Bukit Sinai, TUHAN Allah Taala kitai bejaku enggau kitai: ‘Kita udah chukup lama diau ba bukit tu.
7 Rerak kem kita, lalu mupuk baru. Awakka kita mupuk ngagai menua ti bebukit di menua orang Amor, enggau ngagai menua ti ngelingi menua nya, iya nya, ngagai Lebak Jordan, ngagai menua ti bebukit enggau menua ti emperan, ngagai selatan menua nya, enggau ngagai tebing Tasik Tengah. Awakka kita mansang ngagai menua Kanaan, lalu bejalai terus ngilah Bukit ti di menua Lebanon, nyentuk ngagai Sungai Eupratis.
8 Tu meh semua menua ti udah disemaya deka diberi Aku ti TUHAN ngagai aki ini kita Abraham, Isak enggau Jakop, enggau ngagai peturun sida. Mupuk meh kita lalu alahka menua nya.’ “
 
Moses Ngeletak Orang Nyadi Hakim
9 Ku Moses bejaku enggau orang mayuh, “Lebuh kitai agi ba Bukit Sinai, aku madahka ngagai kita, ‘Tanggungjawap nguluka kita nya kelalu berat ke aku. Aku enda ulih ngereja pengawa nya kediri.
10 TUHAN Allah Taala kita udah ngasuh kita nambah-menambah datai ke kita nyau ngemayuh bintang ti di langit.
11 Awakka TUHAN Allah Taala aki ini kita ngasuh kita seribu kali mayuh agi tubuh, lalu ngasuh kita nyadi kaya-raja, munyi ti udah disemaya Iya!
12 Tang baka ni ku aku ulih mangku tanggungjawap mutarka penusah enggau laya kita, enti aku ngereja pengawa nya kediri?
13 Pilih orang ke bepenemu-dalam, ke nemu meretika utai, ke bisi peneleba, ari genap raban bansa kita, lalu aku deka ngeletak sida nyadi tuai kita.’
14 Kita lalu besetuju ngumbai penemu nya manah.
15 Nya alai aku lalu ngambi bala tuai raban bansa kita, orang ke bepenemu-dalam, ke bisi peneleba, lalu aku ngeletak sida nyadi tuai ke seribu iku orang, ke seratus iku, ke lima puluh iku, enggau ke sepuluh iku orang. Aku mega ngeletak pemesai bukai dalam semua raban bansa kita.
16 “Lebuh maya nya suba, aku ngajar sida munyi tu: ‘Pendingka semua laya ti nyadi ba entara bala kita. Putarka semua laya enggau lurus, nemuka laya nya entara bala kita empu, tauka enggau orang kampar ti diau begulai enggau kita.
17 Anang bepilih mata lebuh kita ngatur pechara. Semua orang enda tau enda dipendingka magang, enda milih sapa-sapa sida nya. Anang takut, laban pemutus penemu ti digaga kita endang datai ari Allah Taala. Enti pekara nya kelalu mar diputarka kita, bai pekara nya ngagai aku, lalu aku deka mutarka iya.’
18 Lebuh maya nya suba, aku mega ngatur semua utai ti deka dikereja kita.
 
Bala Pematau Diasuh Bejalai Ari Kades-barnea
19 “Kitai lalu mupuk ari Bukit Sinai, lalu bejalai nengah menua puang ti besai rampa, menua ti ngenakutka ati, mansang ngagai menua ti bebukit di menua orang Amor. Lebuh kitai datai di Kades-bernea,
20-21 aku lalu madahka ngagai kita munyi tu: ‘Kita udah datai ba menua ti bebukit ti diempu orang Amor, menua ti diberi TUHAN Allah Taala ngagai kitai. Peda kita! Nyin menua nya. Mansang kita lalu alahka menua nya nitihka jaku ti udah dipesanka TUHAN ngagai kita. Anang takut tauka lemi semengat.’
22 “Tang kita datai ngagai aku lalu ku kita, ‘Awakka kitai ngasuh orang matau menua nya dulu, ngambika sida ulih madahka jalai ti deka ditengah kitai, enggau gaya nengeri di menua nya.’
23 “Utai nya baka ke manah ba penemu aku, nya alai aku lalu milih dua belas iku lelaki, siku ari siti-siti raban bansa.
24 Sida lalu bejalai ngagai menua ti bebukit nya, lalu matau menua nya nyentuk ngagai Lebak Eskol.
25 Lebuh sida pulai, sida mai buah ti ditemu sida dia, lalu madahka pasal pemanah menua ti diberi TUHAN Allah Taala kitai ngagai kitai.
26 “Tang kita enggai mansang ngagai menua nya, tang angkat ngelaban jaku TUHAN Allah Taala kita;
27 lalu kita mutap dalam langkau kain kita. Ku kita, ‘TUHAN begedika kitai, nya kebuah Iya udah mai kitai pansut ari menua Ejip, ngambika Iya ulih nyerahka kitai ngagai orang Amor, ngambika sida munuh kitai.
28 Nama guna kitai kin? Orang ke udah diasuh kitai matau menua nya udah ngasuh kitai lemi semengat kitai, madahka orang dia kering agi sereta tinggi agi ari kitai, lalu nengeri sida bisi kuta ti nyentuk ke langit. Sida bisi meda orang Anakim, orang ke besai gamal di menua nya!’
29 “Aku lalu bejaku ngagai kita, ‘Anang takutka orang nya.
30 TUHAN Allah Taala kita deka bejalai dulu ari kita, lalu Iya deka beperang ngarika kita, baka ke udah dipeda kita kereja Iya di menua Ejip,
31 enggau di menua puang, alai kita ke udah meda chara TUHAN Allah Taala kita mai kita, baka apai ke mai anak, sepemanjai jalai ti ditengah kita, nyentuk ngagai endur tu.’
32 Tang taja pen aku udah nyebut nya, kita mengkang enggai manggaika diri ba TUHAN Allah Taala kita,
33 ti udah bejalai dulu ari kita, dalam tiang api lebuh malam hari, enggau dalam gentilang remang lebuh siang hari, ngiga endur alai kita tau nirika kem kita.
 
TUHAN Ngukum Orang Israel
34 “Lebuh TUHAN ninga jaku putap kita, Iya ringat lalu besumpah:
35 Ku Iya, ‘Nadai siku orang ke ari serak tu deka datai di menua ti ami nya, ti udah disemaya deka diberi Aku ngagai aki ini kita,
36 kelimpah ari Kalep anak Jepuneh; iya deka meda menua nya, lalu Aku deka meri ngagai iya, enggau ngagai anak uchu iya, menua ti udah diindik kaki iya, laban iya udah nitihka TUHAN enggau pengabis ati iya.’
37 TUHAN udah mega ringat ngagai aku, ketegal kita. Ku Iya, ‘Nuan pen enda meh tau datai ngagai menua nya;
38 Josua anak Nun, ke penulung nuan, deka tama ngagai menua nya. Peransang iya, laban iya deka nguluka orang Israel bempu menua nya.’
39 Lalu bala anak kita ke dikumbai kita deka nyadi orang tangkap, anak ke apin nemu bida entara utai ti manah enggau utai ti jai, deka tama ngagai menua nya. Aku deka meri menua nya ngagai sida, lalu sida deka bempu menua nya.
40 Tang kita enda tau enda nguing lalu bejalai ngagai menua puang tunga ngagai Tasik Mirah.’
41 “Udah nya kita lalu nyaut aku, “Kami udah bedosa ngelaban TUHAN. Kami deka nyerang, nitihka pesan TUHAN Allah Taala kitai.’ Genap iku kita lalu ngerasukka senyata, ngumbai pengawa nyerang menua ti bebukit nya mudah.
42 Lalu ku TUHAN bejaku ngagai aku, ‘Sebut ngagai sida, ‘Anang kin tauka nyerang, laban Aku enda enggau kita, enggai ke kita alah laban munsuh kita.’
43 Nya alai aku lalu bejaku ngagai kita, tang kita enggai mending. Kita lalu ngelaban jaku TUHAN, lalu mai penyumbung kita mansang nyerang menua ti bebukit.
44 Orang bansa Amor, ti diau di menua ti bebukit nya lalu ngelaban kita baka manyi, lalu begagaika kita kenyau ari Edom nyentuk ngagai Hormah.
45 Kita pulai lalu nyabak di mua TUHAN, tang TUHAN enggai ibuhka kita, tauka mendingka kita.
?46 Nya alai kita lama diau di Kades.
 
Bagi 2
1 “Udah nya kitai lalu nguingka pejalai kitai ngagai menua puang tunga ngagai Tasik Mirah, nitihka pesan TUHAN ngagai aku, lalu kitai lama segau-segau ba sebelah menua ti bebukit di Edom.
2 “Udah nya TUHAN lalu bejaku ngagai aku,
3 ‘Kita lama udah segau-segau ba sebelah menua ti bebukit tu; bejalai tunga ke utara,
4 lalu beri atur tu ngagai orang Israel munyi tu: Kita baru deka bejalai nengah menua ti diuan kaban belayan kita empu, iya nya bala peturun Esau. Sida deka takutka kita, nya alai bejimat kita;
5 anang beperang ngelaban sida, laban Aku enggai meri menua sida ngagai kita, ngemesai tapa kaki pen tanah sida enggai meh Aku meri ngagai kita, laban Aku udah meri menua Edom ngagai Esau nyadika pesaka iya.
6 Kita enda tau enda meli pemakai ari sida, ngambika kita bisi utai diempa; lalu kita enda tau enda meli ai ari sida, ngambika kita bisi ai irup.
7 Laban TUHAN Allah Taala kita udah merekatka kita dalam semua utai ti dikereja kita. Iya udah ngintu kita lebuh kita segau-segau bejalai nengah menua puang ti besai rampa. Iya udah begulai enggau kita empat puluh taun, lalu kita nadai suntuk utai.’
8 “Nya alai kitai lalu majakka pejalai kitai lalu limpang ari jalai raya ti pansut ari nengeri Elat enggau ari nengeri Esion-geber ti nuju ngagai Tasik Mati. Kitai lalu nguing tunga ke utara nuju ngagai menua Moap.
9 Ku TUHAN bejaku ngagai aku, ‘Anang ngachau orang Moap, tauka ngepunka perang ngelaban sida, laban sida peturun Lot. Aku udah meri nengeri Ar ngagai sida, lalu Aku enggai meri menua sida ngagai kita.’”
10 (Dulu menya bansa orang ke besai gamal, ke dikumbai Emim bisi udah diau di Ar. Sida nya ngeninggi orang? Anakim, orang ke besai gamal.
11 Baka orang Anakim, sida nya mega dikumbai bansa Repaim, tang orang Moap ngumbai sida orang Emim.
12 Orang bansa Hori udah kala diau di Edom, tang bala peturun Esau muru sida ari menua nya, ngerusak bansa sida, lalu ngentapka diri di menua nya, baka chara orang Israel ti deka muru munsuh sida ari menua ti diberi TUHAN ngagai sida.)
13 “Udah nya kitai lalu meraka Sungai Seret, nitihka pesan TUHAN.
14 Utai tu nyadi tiga puluh lapan taun udah bekau kitai ninggalka Kades-bernea. Semua bala orang ke tau kayau ari rebak nya, udah mati magang, munyi ti ku TUHAN.
15 TUHAN majak ngelaban sida, datai ke Iya udah munuh semua sida.
16 “Lebuh semua sida udah mati magang,
17 TUHAN lalu bejaku enggau kitai,
18 ‘Sehari tu kita deka meraka garis entara menua Moap, ba Ar.
19 Lalu kita deka datai semak ngagai menua orang Amon, ti peturun Lot. Anang ngachau sida, tauka ngepunka perang ngelaban sida, laban Aku enggai meri kita menua ti udah diberi Aku ngagai sida.’ “ (
20 Menua tu mega dikumbai menua orang Repaim, iya nya nama bansa orang ke diau di menua nya. Orang Amon ngumbai sida Samsumim.
21 Orang tu tinggi gamal baka orang Anakim. Bala sida mayuh, lalu bansa sida kering. Tang TUHAN ngerusak sida, ngambika orang Amon bempu menua sida, lalu ngentapka diri dia.
22 TUHAN udah mega ngereja baka nya ke orang Edom, ti peturun Esau, ti diau di menua ti bebukit di Edom, lebuh Iya ngerusak orang? Hori, ngambika orang? Edom ngerampas menua sida, lalu ngentapka diri di menua nya, alai sida ke diau diatu.
23 Menua ti ngimbai tebing Tasik Tengah, udah diuan orang ke datai ari pulau Krit. Sida udah ngalahka orang? Abim, orang ke asal diau di menua nya, lalu udah ngerampas semua menua sida nyentuk ngagai nengeri Gasa di selatan.)
24 “Udah bekau kitai ke bejalai meraka menua Moap, TUHAN bejaku ngagai kitai, ‘Mupuk kita diatu, lalu peraka Sungai Arnon. Aku nyerahka Sihon, raja orang? Amor ke merintah di Hesbon, ngagai jari kita, sama enggau menua sida. Serang iya, lalu belabuh ngalahka menua iya.
25 Berengkah ari sehari tu, Aku deka ngasuh semua orang di semua menua, takutka kita. Semua orang deka getar-getar takut ninga nama kita disebut.’
 
Orang Israel Ngalahka Raja Sihon
26 “Aku lalu ngasuh bala seruan bejalai ari menua puang Kedemot betemu enggau Raja Sihon ke merintah di Hesbon, deka mai iya bebaik. Ku aku:
27 ‘Awakka kami bejalai nengah menua kita. Kami deka bejalai meraka terus, lalu enda limpang ari jalai raya.
28 Kami deka meli pemakai enggau ai irup ari kita. Awakka kami bejalai nengah menua kita,
29 baka ke disagi bala peturun Esau ti diau di Edom, enggau baka ke disagi orang Moap ti diau di Ar, datai ke kami udah meraka Sungai Jordan ngagai menua ti diberi TUHAN Allah Taala kami ngagai kami.’
30 “Tang Raja Sihon enda ngemendarka kitai bejalai nengah menua iya, laban TUHAN Allah Taala kitai udah ngasuh ati iya kieh sereta keras deka ngelaban, ngambika kitai ngalahka iya, lalu ngerampas menua iya. Menua nya agi benung dialahka kitai diatu.
31 Lalu ku TUHAN bejaku ngagai aku, ‘Peda nuan, Aku udah belabuh nyerahka Raja Sihon enggau menua iya ngagai jari nuan; berengkah ngerampas menua iya, ngambika kita nguan menua iya.’
32 Sihon lalu datai mai semua bala soldadu iya, lalu ngelaban kitai di Jahas.
33 TUHAN Allah Taala kitai lalu nyerahka iya ngagai jari kitai. Kitai lalu ngalahka iya, enggau bala anak lelaki iya, enggau semua bala soldadu iya.
34 Lalu kitai mega ngalah lalu ngerusak semua nengeri, lalu munuh semua orang ke lelaki, ti indu, enggau anak mit. Semua sida abis dibunuh kitai.
35 Kitai ngambi jelu tupi, lalu ngerampas utai ti dalam nengeri nya.
36 Kenyau ari Aroer ti ba tisi Lebak Arnon, enggau kenyau ari nengeri ti ba lebak nya, nyentuk ngagai Giliat, nadai nengeri ti bekuta ti enda ulih dialahka kitai; TUHAN Allah Taala kitai udah nyerahka semua nengeri nya ngagai jari kitai.
37 Semina menua peturun Amon aja enda tau ditengah kitai, iya nya semua menua ti nebing Sungai Jabok, enggau nengeri ti ba menua ti bebukit, enggau sebarang endur bukai ti enda disagi TUHAN tengah kitai.
 
Bagi 3
Orang Israel Ngalahka Raja Og
1 “Udah nya kitai mindah tunga ke utara ngagai Basan, lalu Raja Og angkat enggau semua bala iya, mansang ngelaban kitai ba semak nengeri Edrei.
2 Tang ku TUHAN bejaku ngagai aku, ‘Anang takutka iya. Aku deka nyerahka iya, bala soldadu iya, enggau menua iya, ngagai nuan. Kereja ngagai iya baka ke udah dikereja nuan ngagai Sihon raja orang Amor ke merintah di Hesbon.’
3 Nya alai TUHAN mega nyerahka Raja Og enggau bala nembiak iya ngagai jari kitai, lalu kitai munuh semua sida.
4 Lebuh maya nya mega, kitai ngalahka semua nengeri iya. Nadai nengeri ti enda dialahka kitai. Enam puluh buah nengeri semua iya dialahka kitai. Semua menua Argop, ti alai Raja Og merintah, dialahka magang.
5 Semua nengeri nya didinding ngena kuta ti tinggi, bisi pintu, enggau alang penutup pintu, lalu mayuh mega genturung pendiau ti enda bekuta.
6 Kitai ngerusak semua nengeri, lalu munuh semua lelaki, indu enggau anak mit, baka ke udah dikereja kitai ngagai nengeri Raja Sihon ke merintah di Hesbon.
7 Kitai ngambi semua jelu tupi, lalu ngerumpak utai ari nengeri nya.
8 Nya alai kitai ngerampas ari raja bansa Amor ke dua iku nya, menua ti muak ke timur Sungai Jordan, berengkah ari Sungai Arnon nyentuk ngagai Bukit Hermon.
9 (Orang Sidon ngumbai Bukit nya Sirion, lalu orang Amor ngumbai bukit nya Senir.)
10 Kitai ngerampas semua menua Raja Og ke megai perintah di menua Basan, nyengkaum nengeri ti ba emperan atas, menua Giliat enggau menua Basan, nyentuk ngagai nengeri Salekah enggau nengeri Edrei.
11 (Raja Og nya pengabis orang ari bansa Repaim. Sentubung iya, Buka sentubung nya 2 meter, lalu pemanjai sentubung nya 4 meter, nitihka atur penyukat ti dikena. Sentubung nya agi ulih dipeda di nengeri orang Amon di Rabah.)
 
Raban Bansa Ke Ngentapka Diri Di Timur Sungai Jordan
12 “Lebuh kitai ngerampas menua nya, aku ngeletak raban bansa Reuben enggau raban bansa Gat bempu menua ti muak ke utara nengeri Aroer, semak Sungai Arnon, enggau sekeda menua ti bebukit di Giliat, sama enggau nengeri ti mit di menua nya.
13 Aku ngeletak setengah ari raban bansa Manasi bempu sebagi ari menua Giliat, enggau semua menua Basan, alai Raja Og ke merintah, reti nya, semua menua Argop. (Basan mega dikumbai menua orang Repaim.
14 Jair, ke ari raban bansa Manasi, ngerampas semua menua Argop, reti nya, Basan, nyentuk ngagai garis entara menua Gesur enggau Maakah. Iya meri nama iya empu ngagai genturung pendiau di menua nya, lalu genturung pendiau nya agi dikumbai Tumpuk Pendiau Jair nyentuk ngagai ke diatu.)
15 “Aku udah meri menua Giliat ngagai raban peturun Machir ke ari raban bansa Manasi.
16 Lalu ngagai raban bansa Reuben enggau Gat, aku udah meri menua berengkah ari Giliat nyentuk ngagai Sungai Arnon. Tengah sungai nya nyadika garis entara menua sida di selatan, lalu garis entara menua sida di utara nya Sungai Jabok. Sida mega bekunsika Sungai Jabok nyadika garis entara menua enggau orang Amon.
17 Muak ke barat, menua sida nganchau nyentuk ngagai Sungai Jordan, ari Tasik Galili di utara nyentuk ngagai Tasik Mati di selatan, enggau nyentuk ngagai kaki Bukit Pisgah di timur.
18 “Lebuh maya nya, aku mega meri atur tu ngagai kita: ‘Taja pen TUHAN Allah Taala kitai udah meri ngagai kita menua ti di timur Sungai Jordan, ngambika kita ngalahka menua nya, semua bala soldadu kita enda tau enda meraka Sungai Jordan dulu ari raban bansa orang Israel ti bukai.
19 Semina bini, anak enggau jelu tupi kita aja, deka tinggal dalam nengeri ti udah diberi aku ngagai kita. Aku nemu kita mayuh jelu tupi.
20 Saup orang Israel ti bukai, datai ke sida udah ngalahka menua ti diberi TUHAN ngagai sida di barat Sungai Jordan, nyentuk ngagai maya TUHAN ngasuh sida diau dia enggau selamat, baka ke udah dikereja Iya ngagai kita. Udah nya baru kita tau pulai baru ngagai menua tu ti udah diberi aku ngagai kita.’
21 “Lebuh maya nya aku lalu bejaku ngagai Josua, ‘Nuan udah meda semua utai ti udah dikereja TUHAN Allah Taala nuan ngagai raja dua iku nya, Sihon seduai Og. Iya deka ngereja baka nya mega ngagai semua menua bukai ti baru deka dipasuk kita.
22 Anang takutka sida, laban TUHAN Allah Taala kita, deka beperang ngarika kita.’
 
Moses Enda Disagi Datai Ngagai Menua Kanaan
23 “Lebuh maya nya aku bebendar amat besampi. Ku aku,
24 ‘O TUHAN ti Pemadu Tinggi, aku nemu Nuan udah mandangka ngagai aku semina pun aja ari utai ti besai sereta badas, ti deka dikereja Nuan. Nadai petara di langit, tauka di dunya, ulih ngereja pengawa ti besai baka ke udah dikereja Nuan!
25 O TUHAN, Awakka aku meraka Sungai Jordan, ngambika aku meda menua ti ami ba tebing seberai nyin, menua ti bebukit sereta manah, enggau menua Lebanon.’
26 Tang TUHAN udah ringat ngagai aku, ketegal kita, lalu Iya enggai mendingka aku. Ku Iya bejaku ngagai aku, ‘Umbas meh nya! Anang nyebut nya agi ngagai Aku!
27 Alai nuan niki ngagai tuchung Bukit Pisgah, lalu tinjau tunga ke utara, ke selatan, ke timur enggau ke barat. Perening enggau manah utai ti dipeda nuan, laban nuan enda tau meraka Sungai Jordan.
28 Beri atur ngagai Josua, lalu keringka ati iya, laban iya deka nguluka orang mayuh meraka lalu ngalahka menua ti dipeda nuan.’
29 Nya alai kitai mengkang diau ba lebak seberai nengeri Bet-peor.
 
Bagi 4
Moses Ngansak Orang Israel Ngasi
1 Udah nya Moses lalu bejaku ngagai orang mayuh, “Kita enda tau enda ngasika semua adat ti diajar aku ngagai kita. Nya baru kita deka idup lalu ngalahka menua ti diberi TUHAN Allah Taala aki ini kita, ngagai kita.
2 Anang nambahka utai ngagai pesan ti diberi aku ngagai kita, lalu anang muai utai ari pesan nya. Kita enda tau enda ngasika pesan TUHAN Allah Taala kita, ti diberi aku ngagai kita.
3 Kita empu udah meda utai ti dikereja TUHAN ba Bukit Peor, munuh semua orang ke nyembah Baal ba endur nya,
4 tang bala kita ke tetap ati ngagai TUHAN Allah Taala kita, mengkang idup datai ke sehari tu.
5 “Aku udah ngajar kita semua adat, nitihka asuh TUHAN Allah Taala. Kita enda tau enda ngasika adat nya di menua ti baru deka dialah lalu diuan kita.
6 Kita enda tau enda ngasika semua adat nya, kena ngayanka ngagai orang bansa bukai penalam penemu kita. Lebuh sida ninga pasal semua adat nya, sida deka nyebut, ‘Naka meh penalam penemu enggau pemereti bansa orang tu!’
7 Laban nadai bansa bukai bisi petara ti diau semak sida ke tau dikangauka sida, baka TUHAN Allah Taala kitai.
8 Lalu nadai bansa bukai bisi adat ti lurus baka adat ti diajar aku ngagai kita sehari tu.
9 “Bejaga kita, lalu kingatka utai ti udah dipeda kita ngena mata kita empu, seagi-agi kita idup. Padahka utai nya ngagai anak uchu kita,
10 pasal kita ke bediri di mua TUHAN Allah Taala kita ba Bukit Sinai, lebuh Iya bejaku ngagai aku, ‘Gempuruka orang mayuh. Aku deka ngasuh sida ningaka utai ti disebut Aku, ngambika sida belajar ngasika Aku seumur idup, sereta ngambika sida ngajar anak sida ngereja nya mega.’
11 “Padahka ngagai anak kita pasal kita ke bediri ba kaki bukit nya ti dibalut asap ti tebal, enggau pasal api ti mau nyentuk ke langit.
12 Padahka ngagai sida pasal TUHAN ti bejaku ngagai kita ari dalam api, pasal kita ke ninga Iya bejaku, tang nadai meda Iya.
13 Iya madahka ngagai kita utai ti enda tau enda dikereja kita kena kita ngasika sempekat ti digaga Iya enggau kita, iya nya, pasal kita ke enda tau enda ngasika Sepuluh Pesan ti udah ditulis Iya ba dua iti lampang batu.
14 Lebuh maya nya TUHAN ngasuh aku ngajar kita semua adat ti enda tau enda dititihka kita di menua ti baru deka dialah lalu diuan kita.
 
Anang Nyembah Engkeramba
15 “Lebuh TUHAN bejaku ngagai kita ari dalam api ba Bukit Sinai, kita nadai meda Iya. Nya alai, ngambika utai tu pulai ke penguntung kita, kita enda tau enda nentuka
16 diri enda bedosa begagaka engkeramba ke diri empu neladan gamal utai, nemuka neladan gamal mensia ti lelaki tauka indu,
17 jelu tauka burung,
18 ular tauka ikan.
19 Anang nejuka diri diuji lalu nyembah sereta betuaika utai ti dipeda kita di langit, baka mata hari, bulan enggau bintang. TUHAN Allah Taala kita udah meri utai tu ngagai semua bansa bukai ngambika bisi disembah sida.
20 Tang kita tu orang ke udah dilepaska Iya ari menua Ejip, alai kita ke udah balat diperinsa. Iya udah mai kita pansut ngambika kita nyadi nembiak Iya, baka ke sehari tu.
21 Ketegal kita TUHAN Allah Taala kita udah ringat ngagai aku, lalu udah besumpah madahka aku enda ulih meraka Sungai Jordan lalu datai ngagai menua ti ami nya, ti diberi Iya ngagai kita.
22 Aku deka mati di menua tu, lalu enda meraka sungai nya, tang kita nyau deka meraka sungai nya, lalu ngalahka menua ti ami nya.
23 Kita enda tau enda nentuka diri seruran ingatka sempekat ti digaga TUHAN Allah Taala kita enggau kita. Kita enda tau enda ngasika pesan Iya, lalu enda ngaga engkeramba,
24 laban TUHAN Allah Taala kita baka api, Allah Taala ti chemburu.
25 “Indah lebuh kita lama udah nguan menua nya, lalu udah beranak betelesak, deh kita mengkang enda tau bedosa begagaka engkeramba ke diri empu neladan sebarang gamal utai. Utai tu jai di mua TUHAN, lalu Iya deka ringat ketegal nya.
26 Sehari tu aku ngangauka langit enggau tanah nyadika saksi ngelaban kita: enti kita enda ngasika aku, kita deka lengkas lesap ari menua nya. Kita deka pandak umur nguan menua ti di seberai Sungai Jordan ti baru deka dialahka kita. Semua kita deka abis dibunuh.
27 TUHAN deka ngachirka kita ngagai menua bukai. Ka semina mimit aja kita deka mengkang idup.
28 Dia meh alai kita deka nyembah petara ti digaga jari mensia, petara ti digaga ari kayu enggau batu, petara ti enda ulih meda, enda ulih ninga, enda ulih makai tauka nyium utai.
29 Dia meh alai kita deka ngiga TUHAN Allah Taala kita, lalu enti kita ngiga Iya enggau pengabis ati, enggau pengabis semengat kita, kita deka tetemuka Iya.
30 Lebuh kita dituntung penusah, lebuh semua utai nya udah nyadi ba kita jemah ila, nya baru kita deka nguingka diri baru ngagai TUHAN lalu ngasika Iya.
31 Iya Allah Taala ti kasih. Iya enda ninggalka kita, tauka ngerusak kita, lalu Iya deka ngingatka sempekat ti udah digaga Iya enggau aki ini kita.
32 “Peratika utai ti nyadi dulu kelia, sebedau kita ada, kenyau ari lebuh maya Allah Taala ngaga mensia di dunya tu. Peratika semua dunya tu. Kati utai ti ngemesai tu bisi udah kala nyadi dulu menya? Kati bisi orang udah kala ninga utai ti baka tu?
33 Kati orang ke ninga petara bejaku ngagai sida ari dalam api, bisi kala mengkang idup udah bekau nya baka kita?
34 Kati petara bukai udah bisi kala berani mansang lalu mai orang pansut ari menua bukai, lalu ngaga sida nyadi nembiak iya, baka ke dikereja TUHAN Allah Taala kita ke kita di menua Ejip? Kita empu udah meda Iya ngena kuasa enggau pengering Iya ti besai mai penyakit enggau perang, ngereja kereja ajih, enggau kereja ti nyelai, lalu ngasuh utai ti balat ngenakut nyadi.
35 TUHAN udah ngayanka utai tu ngagai kita, kena nunjukka Iya siku aja ti Allah Taala kita. Kita nadai petara bukai.
36 Iya nejuka kita ninga munyi nyawa Iya ari serega ngambika Iya ulih ngajar kita. Di dunya tu Iya nejuka kita meda api Iya ti kudus, lalu Iya bejaku ngagai kita ari dalam api nya.
37 Laban Iya rinduka aki ini kita, nya kebuah Iya udah milih kita, lalu ngena kuasa Iya ti besai, mai kita pansut ari menua Ejip.
38 Lebuh kita majakka pejalai kita, Iya muru bansa orang ke kering sereta bekuasa agi ari kita, ngambika Iya mai kita ngagai menua nya, lalu meri menua nya ngagai kita nyadika pesaka kita, nyentuk ngagai sehari tu.
39 Nya alai, ingatka hari tu, lalu kingatka tu dalam ati kita: TUHAN nya Allah Taala ti di serega enggau di dunya. Kita nadai petara bukai.
40 Kita enda tau enda ngasika semua adat Iya ti udah diberi aku ngagai kita sehari tu. Nya baru pengidup kita, enggau pengidup bala peturun kita deka mujur. Kita deka mengkang diau di menua ti diberi TUHAN Allah Taala kita ngagai kita nyadika pesaka kita belama iya.”
 
Nengeri Alai Ngerarika Diri Di Timur Sungai Jordan
41 Udah nya Moses lalu ngeletak tiga buah nengeri di timur Sungai Jordan
42 nyadika nengeri alai orang tau ngerarika diri, lalu diau likun, enti orang nya tekelanjur tebunuhka orang ke ukai munsuh iya. Iya tau ngerarika diri ngagai nengeri nya, ngidupka nyawa diri.
43 Nengeri ti diletak ke raban bansa Reuben nya Beser ba emperan atas, di menua puang. Iya ngeletak Ramot-giliat ke raban bansa Gat. Lalu ke raban bansa Manasi, iya ngeletak Golan, di menua Basan.
 
Meri Adat Allah Taala
44 Moses meri adat enggau ajar Allah Taala ngagai orang Israel.
45-46 Iya meri adat nya lebuh sida udah pansut ari menua Ejip, lalu diau ba emperan di timur Sungai Jordan, seberai nengeri Bet-peor. Menua tu udah diempu Sihon raja orang Amor, ke merintah di nengeri Hesbon. Moses enggau orang Israel udah ngalahka iya lebuh sida pansut ari menua Ejip.
47 Sida nguan menua iya, enggau menua ti diempu Raja Og di Basan, siku agi raja orang Amor ti diau di timur Sungai Jordan.
48 Menua nya berengkah ari nengeri Aroer ba tebing Sungai Arnon, nyentuk ngagai Bukit Sirion
49 Menua nya mega nyengkaum semua menua ti di timur Sungai Jordan nyentuk ngagai Tasik Mati di selatan, lalu terus ke timur ngagai kaki Bukit Pisgah.
 
Bagi 5
Sepuluh Pesan
1 Moses ngempuruka semua orang Israel, lalu bejaku ngagai sida, ku iya, “O orang Israel, pendingka semua adat ti diberi aku ngagai kita sehari tu. Pelajar lalu titihka adat nya enggau ati ti tetap.
2 TUHAN Allah Taala kitai udah ngaga siti sempekat enggau kitai ba Bukit Sinai.
3 Iya ukai ngaga sempekat nya enggau bala aki ini kitai, tang enggau semua kitai ke idup diatu.
4 TUHAN bejaku betunga mua enggau kita ba bukit nya, ari dalam api,
5 lebuh aku bediri entara TUHAN enggau kita lebuh maya nya suba, lalu madahka jaku TUHAN ngagai kita; laban kita takutka api nya, lalu kita enda niki ngagai bukit nya. Ku Iya bejaku:
6 “ ‘Aku tu TUHAN Allah Taala kita, ti udah mai kita pansut ari menua Ejip, alai kita ke udah nyadi ulun.
7 “ ‘Anang nyembah petara bukai tang semina Aku siku aja.
8 “ ‘Anang ngaga engkeramba ke diri empu neladan gamal utai ti di langit tauka di tanah, tauka dalam ai ti di baruh tanah.
9 Anang meremi ngagai sida tauka nyembah sida; laban Aku tu TUHAN Allah Taala ti chemburu. Aku ngukum tiris-pantisorang ke begedika Aku datai ke ketiga enggau keempat serak peturun sida,
10 tang ngayanka pengerindu ti enda berubah ngagai beribu serak orang ke rinduka Aku, sereta ngasika pesan Aku.
11 “ ‘Anang empelita ngena nama TUHAN ti Allah Taala kita, laban TUHAN deka ngukum orang ke empelita ngena nama Iya.
12 “ ‘Intu Hari Sabat, lalu intu hari nya kudus, munyi ti udah dipesanka TUHAN Allah Taala kita, ngagai kita.
13 Kita gawa enam hari,
14 tang hari ti ketujuh nya Hari Sabat ti diserahka ngagai TUHAN Allah Taala kita. Ba hari nya kita enda tau gawa, nemuka kita empu, tauka anak lelaki, tauka anak indu, tauka ulun kita ke lelaki, tauka ulun kita ke indu, tauka jelu sapi kita, tauka keledai, tauka jelu tupi kita, tauka orang ke diau enggau kita, ngambika ulun kita ke lelaki enggau ulun kita ke indu, sereta enggau kita empu, belelak.
15 Kingatka diri ti udah nyadi ulun di menua Ejip, lalu TUHAN Allah Taala kita udah mai kita pansut ari menua nya ngena pemesai kuasa enggau pengering Iya. Nya kebuah TUHAN Allah Taala kita ngasuh kita ngintu Hari Sabat.
16 “ ‘Bebasaka apai indai kita nitihka pesan TUHAN Allah Taala kita, ngambika kita panjai umur sereta mujur nguan menua ti diberi TUHAN Allah Taala kita, ngagai kita.
17 “ ‘Anang munuh orang.
18 “ ‘Anang butang.
19 “ ‘Anang ngenchuri.
20 “ ‘Anang besaksi bula ngelaban orang.
21 “ ‘Anang inginka bini orang, tauka rumah orang, tauka tanah, ulun, jelu sapi, keledai, tauka sebarang utai orang.’
22 “Nya meh leka jaku ti disebut TUHAN enggau nyawa ti inggar ngagai semua kita ba bukit nya, ari dalam api, ari dalam mua hari, enggau ari dalam pemetang ti enda dipeda achuk mata. Iya nadai nyebut leka jaku bukai. Lalu Iya nuliska semua leka jaku nya ba dua iti lampang batu, lalu meri lampang batu nya ngagai aku.
 
Orang Mayuh Takut
23 “Lebuh kita ninga munyi nyawa nya bejaku ari dalam petang, lebuh bukit nya diempa api, kita, semua kepala raban bansa kita, enggau bala tuai kita lalu datai semak ngagai aku;
24 lalu ku kita bejaku, ‘TUHAN Allah Taala kitai udah ngayanka ngagai kitai mulia enggau pemesai kuasa Iya, lalu kitai udah ninga munyi nyawa Iya bejaku ari dalam api; sehari tu kitai udah meda Allah Taala bejaku enggau mensia, lalu mensia agi mengkang idup.
25 Nya alai, nama kebuah kitai patut mati? Laban api ti balat nya deka ngerusak kitai; enti kitai ninga munyi nyawa TUHAN Allah Taala kitai, kitai tetap mati.
26 Laban sapa udah kala ninga munyi nyawa Allah Taala ti idup bejaku ari dalam api, baka ke didinga kitai, lalu agi mengkang idup?
27 Alai nuan empu mansang semak kin, lalu mendingka semua utai ti disebut Allah Taala. Udah nya padahka ngagai kami utai ti disebut Iya ngagai nuan, lalu kami deka mending lalu ngasi.’
28 “TUHAN ninga jaku kita, lebuh kita bejaku ngagai aku; lalu ku TUHAN bejaku ngagai aku, ‘Aku udah ninga jaku orang tu, ti disebut sida ngagai nuan; sida endang nyebut utai ti ngena.
29 Naka meh pemanah enti sida berunding baka nya berari, nangika Aku sereta ngasika semua pesan Aku, ngambika sida enggau anak uchu sida mujur belama iya!
30 Alai asuh sida pulai ngagai langkau kain sida.
31 Tang nuan, Moses, Aku ngasuh nuan bediri ditu enggau Aku, laban Aku deka madahka ngagai nuan semua adat enggau pesan Aku, ti deka diajar nuan ngagai sida, ngambika sida ngasika semua adat enggau pesan nya di menua ti diberi Aku ngagai sida.’
32 “Nya alai kita enda tau enda ngereja semua utai ti udah dipesanka TUHAN Allah Taala kita ngagai kita. Anang limpang ke kiba tauka ke kanan.
33 Kita enda tau enda idup nitihka jalai ti udah dipesanka TUHAN Allah Taala kita ngagai kita, ngambika kita idup, sereta mujur, lalu gayu-guru nguan menua ti diempu kita.
 
Bagi 6
Pesan Ti Besai
1 “Nya meh adat ti diasuh TUHAN Allah Taala kita ajar aku ngagai kita. Titihka semua adat nya di menua ti deka digagai lalu dialahka kita;
2 ngambika kita enggau anak uchu kita nangika TUHAN Allah Taala kita sepemanjai umur kita, lalu ngasika semua adat enggau pesan Iya, ti dipadahka aku ngagai kita, ngambika kita panjai umur.
3 Nya alai, pendingka semua adat enggau pesan nya, kita orang Israel, lalu ngasi; ngambika kita mujur, lalu pemayuh tubuh kita nambah-menambah di menua ti kaya sereta ami, munyi ti udah disemaya TUHAN Allah Taala aki ini kita, ngagai kita.
4 “Dinga, kita orang Israel! TUHAN Allah Taala kita endang siku aja;
5 lalu kita enda tau enda rinduka TUHAN Allah Taala kita enggau pengabis ati kita, enggau pengabis semengat kita, enggau pengabis pengering kita.
6 Kingatka pesan ti diberi aku ngagai kita sehari tu.
7 Ajar pesan nya ngagai anak kita. Kita enda tau enda betanduka pesan nya lebuh kita di rumah, enggau lebuh kita bejalai kebukai, lebuh kita belelak, enggau lebuh kita gawa.
8 Tuliska sida lalu tanchangka ba lengan kita. Lekatka sida ba kening kita kena kita ngingatka sida.
9 Tuliska sida ba tiang pintu rumah kita, enggau ba pintu kuta kita.
 
Anang Enda Ngasi
10 “Munyi ti udah disemaya TUHAN Allah Taala kita ngagai aki ini kita Abraham, Isak enggau Jakop, Iya deka meri ngagai kita menua ti bisi nengeri ti besai sereta kaya-raja, ti ukai digaga kita.
11 Rumah dia deka penuh laban utai ti manah, ti ukai disimpan kita empu, lalu bisi telaga ti ukai ditumbak kita, enggau kebun anggur enggau kebun kana ti ukai ditanam kita. Lebuh TUHAN mai kita ngagai menua nya, lalu semua utai ti deka diempa kita bisi magang,
12 anang enda ingatka TUHAN ti udah mai kita pansut ari menua Ejip, alai kita ke udah nyadi ulun.
13 Kemesaika TUHAN Allah Taala kita. Sembah Iya siku aja, lalu gaga semaya kita atas nama Iya siku aja.
14 Anang nyembah petara bukai, petara orang bansa bukai ke ngelingi kita.
15 Enti kita nyembah petara bukai, TUHAN deka ringat ngagai kita baka api, lalu deka ngerusak semua kita, laban TUHAN Allah Taala, ti bisi enggau kita, nya Allah Taala ti chemburu.
16 “Anang nguji TUHAN Allah Taala kita, baka ke udah dikereja kita di Masah.
17 Kita enda tau enda ngasika semua adat ti udah diberi Iya ngagai kita.
18 Kereja semua utai ti ngena sereta manah ti diasuh TUHAN. Nya baru semua utai ti dikereja kita deka mujur magang. Kita ulih ngerampas menua ti ami nya, ti udah disemaya TUHAN ngagai aki ini kita,
19 lalu kita ulih muru munsuh kita, munyi ti udah disemaya Iya.
20 “Jemah ila anak kita deka nanya, ‘Nama kebuah TUHAN Allah Taala kitai ngasuh kitai ngasika semua adat nya?’
21 Lalu kita deka madahka ngagai sida, ‘Kitai udah nyadi ulun raja menua Ejip, lalu TUHAN udah mai kitai pansut ari menua nya ngena pemesai kuasa Iya.
22 Lalu kami udah meda Iya ngereja kereja ajih, sereta ngereja utai ti ngenakutka, ngagai orang Ejip, enggau ngagai raja sida, enggau ngagai semua bala pemesai raja.
23 Iya udah mai kitai pansut ari menua Ejip, mai kitai kitu, lalu meri menua tu ngagai kitai, munyi ti udah disemaya Iya ngagai aki ini kitai.
24 Udah nya, TUHAN Allah Taala kitai lalu ngasuh kitai ngasika semua adat nya, lalu nangika Iya. Enti kitai ngereja nya, Iya deka seruran ngemataka bansa kitai, lalu ngasuh bansa kitai seruran kaya-raja.
25 Enti kitai tetap ati ngasika semua utai ti udah dipesanka Allah Taala ngagai kitai, Iya deka gaga ati ke kitai.’
 
Bagi 7
Bala Nembiak TUHAN
1 “Lebuh TUHAN Allah Taala kita mai kita ngagai menua ti deka dialahka kita, lalu muru mayuh bengkah bansa ari mua kita, orang Iti, orang Girgas, orang Amor, orang Kanaan, orang Peris, orang Ibi enggau orang Jebus, tujuh bengkah bansa ti mayuh agi tubuh sereta kering agi ari kita,
2 lalu lebuh TUHAN Allah Taala kita nyerahka sida ngagai kita, lalu kita ngalahka sida, kita enda tau enda munuh semua sida. Kita enda tau begagaka sempekat enggau sida, tauka kasihka sida.
3 Kita enda tau jadi enggau sida, lalu enda tau nejuka anak kita jadi enggau sida,
4 laban sida deka mai anak kita limpang ari Aku, besembahka petara bukai. TUHAN deka ringat ngagai kita, lalu Iya deka tekala nya munuh kita.
5 Nya alai runtuhka alta sida, patahka tiang batu keramat sida. Tebang anak patung petara Aserah sida, lalu tunu semua engkeramba sida.
6 Laban kita tu orang ke kuduska TUHAN ti Allah Taala kita. TUHAN udah milih kita ari semua bansa di dunya tu, nyadika nembiak Iya.
7 “TUHAN ukai rinduka kita lalu milih kita laban kita mayuh agi tubuh ari orang bansa bukai; kita tu bansa ti pemadu mit.
8 Tang TUHAN rinduka kita, lalu deka ngamatka semaya ti udah digaga Iya enggau aki ini kita. Nya kebuah Iya mai kita pansut ngena pemesai pengering Iya, lalu nebus kita ari pengidup kita ke nyadi ulun raja menua Ejip.
9 Ingat: TUHAN Allah Taala kita endang siku aja. Ati Iya endang tetap. Iya deka ngingatka sempekat Iya, lalu ngayanka pengerindu Iya ti meruan belama iya ngagai beribu serak orang ke rinduka Iya, sereta ngasika pesan Iya,
10 tang Iya deka ngukum orang ke begedika Iya; Iya enda lubah ngukum orang ke begedika Iya, Iya deka ngukum sida.
11 Nya alai, kita enda tau enda ngasika semua pesan, enggau adat enggau atur ti diasuh aku titihka kita sehari tu.
 
Bulih Berekat Enti Ngasi
12 “Enti kita mending lalu tetap ati ngasika pesan tu, nya baru TUHAN Allah Taala kita deka majak ingatka sempekat Iya enggau kita, lalu deka ngayanka pengerindu Iya ti enda berubah, munyi ti udah disemaya Iya ngagai aki ini kita.
13 Iya deka rinduka kita, lalu merekatka kita, ngambika pemayuh tubuh kita nambah-menambah. Kita deka mayuh anak, lalu Iya deka merekatka umai kita, ngambika kita bulih gandum, wain, enggau minyak kana. Iya deka nambahka pemayuh jelu sapi enggau jelu bedus kita di menua ti udah disemaya Iya enggau aki ini kita, ti deka diberi Iya ngagai kita.
14 Nadai bansa di dunya tu deka bulih mayuh agi berekat ari ti diberi Iya ngagai kita. Nadai siku kita, tauka jelu tupi kita, deka mandul.
15 Lalu TUHAN deka muai semua penyakit kita; lalu nadai penyakit ti jai ti nyadi di menua Ejip, ti ditemu kita menya, deka nyerang kita, tang Iya deka ngasuh penyakit nya nyerang orang ke begedika kita.
16 Lalu kita enda tau enda ngerusak semua bansa ti diserahka TUHAN Allah Taala kita ngagai jari kita, lalu anang kasihka sida. Lalu kita pen enda mega tau nyembah petara sida, laban utai nya deka manjuk kita.
17 “Anang berunding ngumbai orang nya mayuh agi tubuh ari kita, lalu kita ngumbai diri enda ulih muru sida.
18 Anang takutka sida. Kingatka utai ti udah dikereja TUHAN Allah Taala kita ngagai raja menua Ejip, enggau ngagai semua nembiak raja nya.
19 Kingatka penyakit ti dipeda mata kita empu, kereja ajih enggau kereja ti nyelai, enggau pemesai kuasa enggau pengering ti dikena TUHAN Allah Taala kita mai kita pansut. Baka nya meh chara TUHAN Allah Taala kita deka ngerusak semua bansa ti diketakutka kita.
20 Nambahka nya, TUHAN ti Allah Taala kita deka ngasuh indu gamang nyerang sida, datai ke orang ke agi idup, ke belalai ari kita, abis mati.
21 Anang takutka sida; laban TUHAN Allah Taala kita, Allah Taala ti bekuasa, ti balat diketakutka, bisi enggau kita.
22 Iya deka muru bansa orang nya mimit-mimit sekali, lebuh kita nyerang. Kita enda tau ngeluska semua sida sekali, enggai ke kita dikelingi kelalu mayuh jelu babas.
23 Tang TUHAN Allah Taala kita deka nyerahka sida ngagai jari kita, lalu ngasuh sida begau abis ati, datai ke sida dibunuh.
24 Lalu Iya deka nyerahka raja sida ngagai jari kita, lalu kita enda tau enda munuh sida. Nadai orang tan ngelaban kita. Kita deka munuh semua sida.
25 Tunu engkeramba sida. Anang inginka pirak tauka emas ti ba tubuh engkeramba nya, lalu anang ngambi utai nya ke kita empu, enggai ke kita dipanjuk utai nya; laban TUHAN begedika utai nya.
26 Lalu anang mai engkeramba nya ngagai rumah kita, enggai ke kita kena sumpah baka utai nya empu. Kita enda tau enda begedi sereta kejika utai nya; laban utai nya kena tinggang sumpah Allah Taala.
 
Bagi 8
Menua Ti Manah Diuan
1 “Kita enda tau enda tetap ati ngasika semua adat ti udah diberi aku ngagai kita sehari tu, ngambika kita ulih idup, lalu pemayuh tubuh kita nambah-menambah, lalu kita ngalahka menua ti udah disemaya TUHAN ngagai aki ini kita.
2 Kingatka chara TUHAN Allah Taala kita udah nguluka kita bejalai nengah menua puang empat puluh taun tu ti udah, kena Iya ngemaruhka ati kita, sereta ngabas ati kita, laban Iya keran deka nemu utai ti dalam ati kita, sekalika kita deka tauka enggai ngasika pesan Iya.
3 Iya ngasuh kita lapar kena Iya ngemaruhka ati kita, lalu udah nya Iya meri kita mana nyadika pemakai kita, pemakai ti enda kala diempa kita, tauka diempa aki ini kita. Iya ngereja nya ngambika kita nemu, mensia ukai beridup makai roti aja, tang beridup ba genap leka jaku ti pansut ari mulut TUHAN.
4 Dalam empat puluh taun nya, gari kita enda luya, lalu kaki kita pen enda mega kembai.
5 Nya alai, kita patut nemu, TUHAN Allah Taala disiplin kita baka apai ke disiplin anak diri.
6 Nya alai, titihka semua pesan TUHAN Allah Taala kita; titihka jalai Iya, sereta nangika Iya.
7 Laban TUHAN Allah Taala kita mai kita ngagai menua ti ami, menua ti mayuh mata ai enggau ai sungai ti rarat nengah lebak enggau munggu,
8 menua ti mayuh gandum enggau barli, buah anggur, buah kayu ara, buah delima, kana enggau ai manyi,
9 menua ti alai kita nadai kala suntuk utai, alai kita bisi semua utai ti dipeguna kita, menua ti penuh laban besi, lalu nyamai alai ngulihka engkeraju ari bukit.
10 Lalu kita deka makai lalu kenyang, lalu kita deka muji TUHAN Allah Taala kita laban Iya udah meri menua ti manah ngagai kita.
 
Anang Enda Ingatka TUHAN
11 “Anang enda ingatka TUHAN Allah Taala kita; anang enda ngasika semua adat Iya ti diberi aku ngagai kita sehari tu,
12 enggai ke, lebuh kita udah makai lalu kenyang, lalu udah nirika rumah ti manah, lalu diau dalam rumah nya,
13 lalu jelu sapi enggau jelu bedus kita udah nambah-menambah, lalu pirak enggau emas kita udah nambah-menambah, lalu semua reta tengkira kita udah nambah-menambah,
14 kita lalu ngeninggika diri, lalu enda agi ingatka TUHAN Allah Taala kita, ti udah mai kita pansut ari menua Ejip, ari pengidup kita ke nyadi ulun,
15 ti udah nguluka kita bejalai nengah menua puang ti mar alai diau, menua ti mayuh ular enggau kala, menua ti nadai ai, alai Iya ke mansutka ai ari batu,
16 ti udah nupi kita di menua puang ngena mana, pemakai ti enda kala diempa aki ini kita, kena Iya ngemaruhka sereta ngabas ati kita, ti meri penguntung ngagai kita.
17 Nya alai, bejaga kita enggai ke kita nyebut dalam ati diri, ‘Kuasa enggau pengering aku empu ti ngasuh aku bulih pengeraja tu.’
18 Kita enda tau enda ingatka TUHAN Allah Taala kita, laban Iya ke meri kita kuasakena ngulihka pengaya, lalu netapka sempekat ti udah digaga Iya enggau aki ini kita, baka ke dikereja Iya sehari tu.
19 Enti kita enda ingatka TUHAN Allah Taala kita, lalu nitih sereta betuaika petara bukai lalu nyembah sida, aku meri kita jaku tangkan tu sehari tu: kita deka dibunuh.
20 Baka bansa bukai ti deka dirusak TUHAN di mua kita, baka nya mega kita deka dirusak, laban kita enda ngasika jaku TUHAN Allah Taala kita.
 
Bagi 9
Orang Israel Enda Ngasi
1 “Dingaka tu, kita orang Israel! Sehari tu kita baru deka meraka Sungai Jordan, lalu ngalahka menua ti diempu bansa orang ke kering sereta bekuasa agi ari kita. Nengeri sida besai, sereta bisi kuta ti nyentuk ke langit.
2 Orang nya tinggi sereta kering, peturun orang? Anakim. Kita nemu sapa sida nya. Sida nya orang ke udah dikenang orang munyi tu, ‘Sapa tan ngelaban orang? Anakim?’
3 Nya alai kita enda tau enda nemu sehari tu, TUHAN Allah Taala kita deka bejalai dulu ari kita baka api ti mau. Iya deka ngalahka sida lebuh kita nyerang sida, ngambika kita muru lalu munuh sida enggau naka penyampat, munyi ti udah disemaya TUHAN.
4 “Lebuh TUHAN Allah Taala kita udah muru sida ari mua kita, anang bejaku dalam ati diri, ‘TUHAN udah mai aku kitu ngambika aku bempu menua tu, ketegal aku lurus’; Utai nya ukai baka nya: TUHAN muru semua bansa orang nya ari mua kita ketegal penyai sida.
5 Kita deka ngerampas menua sida ukai ketegal pengelurus tauka pemanah ati kita, tang laban TUHAN Allah Taala kita muru sida ari mua kita ketegal penyai sida, enggau laban TUHAN deka ngamatka semaya ti digaga Iya enggau aki kita Abraham, Isak enggau Jakop.
6 Kita enda tau enda nemu tu: TUHAN ukai meri menua ti manah tu ngagai kita ketegal pengelurus kita; laban kita tu bansa ti kieh.
7 “Anang enda ingatka jalai kita udah nyungkak TUHAN Allah Taala kita ringat di menua puang. Kenyau ari maya kita pansut ari menua Ejip, nyentuk ngagai hari kita datai ditu, kita udah ngelaban TUHAN.
8 Indah ba Bukit Sinai deh kita udah nyungkak TUHAN ringat, datai ke Iya nyau sedia deka munuh kita.
9 Lebuh aku niki ngagai bukit nya deka nerima lampang batu ti udah alai TUHAN nuliska sempekat entara Iya enggau kita, aku diau ba bukit nya empat puluh hari, empat puluh malam, nadai makai, nadai ngirup.
10 Lalu TUHAN meri ngagai aku dua iti lampang batu nya ngagai aku, alai Iya ti udah nulis ngena jari Iya Empu, jaku ti udah disebut Iya ngagai kita ari dalam api lebuh kita begempuru ba bukit nya.
11 Ba pengujung empat puluh hari empat puluh malam nya, TUHAN meri ngagai aku lampang batu dua iti nya, iya nya lampang batu adat.
12 “Udah nya TUHAN bejaku ngagai aku, ku Iya, ‘Angkat nuan, lalu nurun ari bukit tu enggau jampat, laban bala nembiak nuan, ti udah dibai nuan pansut ari menua Ejip, udah ngereja pengawa ti jai; sida udah limpang ari jalai Aku; sida udah ngaga engkeramba ke diri empu.’
13 “Nambahka nya, TUHAN mega bejaku ngagai aku, ku Iya, ‘Aku nemu orang tu bansa ti kieh.
14 Anang nguji nagang Aku. Aku deka munuh sida, ngambika sida enda agi dikingatka. Udah nya baru Aku deka ngasuh nuan nyadi apai ke siti bansa ti kering agi sereta mayuh agi tubuh ari sida.’
15 “Ninga nya, aku nguing lalu nurun ari bukit nya, lebuh bukit nya mau laban api; aku mai lampang batu dua iti nya ba jari aku.
16 Aku malik lalu tepedaka kita udah bedosa ngelaban TUHAN Allah Taala kita; kita udah ngaga engkeramba anak sapi ari emas ti diluluhka kita; kita jampat amat limpang ari jalai TUHAN.
17 Aku lalu ngempaska dua iti lampang batu adat nya di mua kita, lalu mechahka lampang batu nya.
18 Udah nya aku lalu ningkapka diri baru ba tanah di mua TUHAN empat puluh hari empat puluh malam baka ke dikereja aku dulu ari nya; aku nadai makai, nadai ngirup, ketegal semua dosa kita, laban kita udah ngereja utai ti jai di mua Iya, lalu udah nyungkak Iya ringat.
19 Aku takutka pengeringat TUHAN, laban Iya udah chukup pedis ati ngagai kita, datai ke Iya nyau deka munuh kita. Tang TUHAN mendingka aku baru lebuh maya nya.
20 TUHAN mega balat amat ringat ngagai Aron, datai ke Iya nyau deka munuh Aron. Aku lalu besampi mega ke Aron lebuh maya nya.
21 Aku lalu ngambi utai dosa nya, anak sapi ti udah digaga kita, lalu nunu utai nya, mechahka iya, lalu nginsarka iya nyadi amau, lalu naburka amau nya ngagai ai sungai ti rarat ari bukit nya.
22 “Kita mega nyungkak TUHAN Allah Taala kita ringat lebuh kita di Taberah, di Masah, enggau di Kibrot-hataba.
23 Lalu lebuh Iya ngasuh kita bejalai ari Kades-barnea, lalu ngasuh kita ngerampas menua ti diberi Iya ngagai kita, kita angkat ngelaban atur ti diberi TUHAN Allah Taala kita, lalu enda arapka? Iya tauka ngasika jaku Iya.
24 Sekumbang aku ti udah nemu kita, kita endang seruran ngelaban TUHAN.
25 “Nya alai aku ningkapka diri ba tanah di mua TUHAN empat puluh hari empat puluh malam, laban TUHAN udah madahka Diri deka munuh kita.
26 Aku lalu besampi ngagai TUHAN, ku aku: ‘O TUHAN Allah Taala, anang munuh bala nembiak Nuan enggau pesaka Nuan tu, ti udah ditebus Nuan ngena pemesai kuasa Nuan, ti udah dibai Nuan pansut ari menua Ejip ngena pengering Nuan.
27 Kingatka nembiak Nuan Abraham, Isak enggau Jakop, lalu anang bedulika pengekieh, tauka penyai, tauka dosa orang tu,
28 enggai ke orang Ejip bejaku munyi tu, ‘Laban TUHAN enda ulih mai sida ngagai menua ti udah disemaya Iya ngagai sida, enggau laban Iya begedika sida, nya kebuah Iya mai sida ngagai menua puang lalu munuh sida.’
29 Laban orang tu endang nembiak enggau pesaka Nuan, ke dibai Nuan pansut ngena pemesai kuasa, enggau ngena jari Nuan.”
 
Bagi 10
Moses Nerima Sepuluh Pesan Kedua Kali
1 “Udah nya TUHAN bejaku ngagai aku, ‘Tingkuh dua igi lampang batu baka ti keterubah, lalu gaga siti peti kayu alai nyimpan batu nya. Udah nya niki ke atas ngagai Aku ba bukit tu.
2 Aku deka nulis ba lampang batu dua iti nya leka jaku ti udah ditulis ba lampang batu ti udah dipechahka nuan. Udah nya nuan enda tau enda nyimpan lampang batu nya dalam peti nya.’
3 “Nya alai aku ngaga Peti nya ari kayu akasia, lalu ningkuh dua iti lampang batu baka ke keterubah, lalu mai lampang batu nya niki ngagai bukit nya.
4 Udah nya TUHAN lalu nulis ba lampang batu nya leka jaku baka ke ditulis Iya ba lampang batu ti keterubah, iya nya Sepuluh Pesan ti diberi Iya ngagai kita, lebuh Iya bejaku ari dalam api lebuh kita begempuru ba bukit nya. TUHAN lalu meri lampang batu nya ngagai aku.
5 Aku nguing lalu nurun ari bukit nya. Udah nya, nitihka pesan TUHAN, aku lalu nyimpan lampang batu nya dalam Peti ti udah digaga aku, lalu lampang batu nya mengkang dia datai ke sehari tu.” (
6 Orang Israel lalu angkat ari telaga orang Jakan, sereta mansang ngagai Moserah. Aron mati dia lalu dikuburka. Anak iya Eleasar lalu nganti iya nyadi imam.
7 Ari nya sida mansang ngagai Gutgodah, lalu udah nya ngagai Jotbatah, alai ti mayuh ai.
8 Lebuh sida ba bukit nya TUHAN milih orang ke lelaki ari raban bansa Lewi ngesan Peti Lampang Batu Adat nya, bekereja nyadi imam, enggau merekatka orang dalam nama TUHAN, nyentuk ngagai diatu.
9 Nya alai raban bansa Lewi enda diberi pesaka tanah baka raban bansa orang Israel ti bukai, laban sida deka nerima semua utai ti disemaya TUHAN Allah Taala kita, ngagai sida.)
10 “Aku diau ba bukit nya empat puluh hari empat puluh malam, baka ke terubah. TUHAN mendingka aku baru, lalu besetuju enda nyadi munuh kita.
11 Udah nya Iya ngasuh aku mupuk, lalu nguluka kita, ngambika kita ulih ngerampas menua ti udah disemaya deka diberi Iya ngagai aki ini kita.
 
Utai Ti Dipinta Allah Taala
12 “Nya alai diatu, kita orang Israel, nama utai ti dipinta TUHAN Allah Taala kita, ari kita? Semina nangika TUHAN Allah Taala kita, idup nitihka jalai Iya, rinduka Iya, nyembah Iya enggau pengabis ati, enggau pengabis semengat kita,
13 lalu ngasika semua pesan enggau adat TUHAN, ti diberi aku ngagai kita sehari tu, ke penguntung kita.
14 Taja pen langit enggau serega, enggau dunya sereta enggau semua utai ti di dunya, diempu TUHAN Allah Taala kita,
15 tang TUHAN balat rinduka aki ini kita, datai ke Iya milih kita, ke peturun sida, ari semua bansa, baka ke sehari tu.
16 Nya alai, ngasi meh kita ke TUHAN, lalu badu agi kieh.
17 Laban TUHAN Allah Taala kita endang Allah Taala ari atas semua petara, TUHAN ari atas semua tuhan, Allah Taala ti bekuasa, ti kering ti diketakutka, ti enda bepilih mata, lalu enda makai suap,
18 ti meri atur ti lurus ngagai orang ke patu balu, ti rinduka orang kampar, lalu meri sida pemakai enggau gari.
19 Nya alai kita mega enda tau enda rinduka orang kampar, laban kita empu udah nyadi orang kampar di menua Ejip.
20 Kita enda tau enda nangika TUHAN Allah Taala kita; sembah Iya siku aja. Seruran bepegai teguh ba Iya, lalu sebut sumpah kita atas nama Iya.
21 Iya aja ti dipuji kita, laban semina Iya aja ti Allah Taala kita, ti udah ngereja utai ti besai sereta nyelai, baka ke udah dipeda kita.
22 Lebuh bala aki ini kita mansang ngagai menua Ejip, sida semina tujuh puluh iku aja. Tang diatu TUHAN Allah Taala kita udah ngasuh kita mayuh tubuh ngemayuh bintang ti di langit.
 
Bagi 11
Pemesai Kuasa TUHAN
1 “Rinduka TUHAN Allah Taala kita, lalu seruran ngasika semua adat Iya.
2 Kingatka sehari tu utai ti udah ditemu kita pasal TUHAN ari utai ti udah diasaika kita enggau Iya. Kita empu, ukai anak kita, ke ngasaika utai nya. Kita udah meda pemesai kuasa Iya, pengering Iya,
3 enggau kereja ajih Iya. Kita udah meda utai ti dikereja Iya ngagai raja di menua Ejip, enggau ngagai menua Ejip empu.
4 Kita udah meda chara TUHAN munaska semua bala soldadu orang Ejip, sama enggau kuda, kerita perang, lebuh Iya ngasuh sida lemas ba Tasik Mirah, lebuh sida begagaika kita.
5 Kita nemu utai ti udah dikereja TUHAN ti kita di menua puang sebedau kita datai ditu.
6 Kita tentu ingatka utai ti udah dikereja Iya ngagai Datan seduai Abiram, anak Eliap ke ari peturun Reuben. Dipeda orang mayuh tanah merekah lalu nelan seduai iya, enggau sida sebilik, langkau kain sida, enggau semua kuli seduai iya, enggau jelu tupi sida.
7 Kita nya meh orang ke meda semua utai ti besai ti udah dikereja TUHAN.
 
Berekat Di Menua Ti Disemaya
8 “Titihka semua pesan ti dipadahka aku ngagai kita sehari tu. Nya baru kita ulih ngelayang sungai lalu nguan menua ti baru deka dipasuk kita.
9 Lalu kita deka diau lama di menua ti kaya sereta ami ti udah disemaya deka diberi TUHAN ngagai aki ini enggau ngagai peturun sida.
10 Menua ti baru deka dialahka kita nya enda baka menua Ejip, alai kita ke diau menya. Di menua Ejip, lebuh kita nanam benih, kita bebendar bekereja meri ai ngagai umai kita.
11 Tang menua ti deka dipasuk kita nya menua ti bebukit enggau mayuh lebak, menua ti seruran bisi ujan.
12 TUHAN Allah Taala kita deka ngintu sereta ngemataka menua nya sepemanjai taun.
13 “Nya alai, titihka semua pesan ti diberi aku ngagai kita sehari tu. Rinduka TUHAN Allah Taala kita, lalu sembah Iya enggau pengabis ati kita, enggau pengabis semengat kita.
14 Enti kita ngereja nya, Iya deka ngasuh hari ujan di menua kita, lebuh kita begunaka ujan lebuh musin ruruh daun enggau lebuh musin bungai, ngambika kita bisi gandum, wain enggau minyak kana.
15 Iya deka meri kita rumput ke pemakai jelu tupi kita. Kita deka bisi semua pemakai ti dikedekaka kita.
16 Anang nejuka diri dibai orang limpang ari TUHAN besembah sereta betuaika petara bukai.
17 Enti kita ngereja, TUHAN deka ringat ngagai kita. Iya deka nagang hari ujan, lalu tanah kita deka nyadi kelalu rangkai, lalu utai ti ditanam kita enggai tumbuh. Ketegal nya kita jampat parai, taja pen menua ti diberi Iya ngagai nya ami.
18 “Kingatka pesan tu, lalu simpan sida dalam ati kita. Tuliska sida, lalu tanchangka sida ba lengan kita. Lekatka sida ba kening kita kena ngingatka sida.
19 Ajar sida ngagai anak kita. Kenang sida tu lebuh kita di rumah, enggau lebuh kita bejalai kebukai, lebuh kita gali, enggau lebuh kita gawa.
20 Tuliska sida ba tiang pintu rumah kita, enggau ba pintu kuta kita.
21 Nya baru kita enggau anak kita deka diau lama ba menua ti udah disemaya deka diberi TUHAN Allah Taala kita ngagai aki ini kita. Kita deka diau dia, seagi-agi langit map dunya.
22 “Titihka enggau ati ti tetap semua pesan ti udah dipadahka aku ngagai kita: Rinduka TUHAN Allah Taala kita, kereja semua utai ti diasuh Iya, lalu bepegai teguh ba Iya.
23 Nya baru Iya deka muru semua bansa ari mua kita, lalu kita deka ngalahka menua ti diempu bansa bukai ti besai agi sereta kering agi ari kita.
24 Semua endur ti ditengah kita deka diempu kita. Rampa menua kita deka berengkah ari menua puang di selatan ngagai Bukit Lebanon di utara, enggau ari Sungai Eupratis di timur ngagai Tasik Tengah di barat.
25 Di sebarang endur alai kita bejalai di menua nya, TUHAN Allah Taala kita deka ngasuh orang takutka kita, munyi ti udah disemaya Iya, lalu nadai orang ulih nagang kita.
26 “Pilih sehari tu entara berekat enggau sumpah.
27 Kita deka diberekatka enti kita ngasika pesan TUHAN Allah Taala kita ke dipadahka aku ngagai kita sehari tu.
28 Tang kita deka kena sumpah, enti kita enda ngasika pesan TUHAN Allah Taala kita, lalu limpang ari jalai TUHAN, lalu nyembah petara bukai ti enda kala disembah kita.
29 Lebuh TUHAN mai kita ngagai menua ti deka dialahka kita, kita enda tau enda nyada madahka berekat ari Bukit Gerisim, enggau madahka sumpah ari Bukit Ebal.
30 (Bukit dua igi tu ba tebing barat Sungai Jordan, di menua orang Kanaan ti diau ba Lebak Jordan. Bukit dua igi tu tunga ke barat, enda jauh ari kayu keramat di Moreh, semak nengeri Gilgal.)
31 Kita baru deka meraka Sungai Jordan, lalu ngalahka menua ti diberi TUHAN Allah Taala kita ngagai kita. Lebuh kita ngerampas menua nya, lalu ngentapka diri dia,
32 kita enda tau enda ngasika semua adat ti diberi aku ngagai kita sehari tu.
 
Bagi 12
Siti Endur Alai Nyembah Allah Taala
1 “Tu adat ti enda tau enda dititihka kita seagi-agi kita idup di menua ti diberi TUHAN Allah Taala aki ini kita, ngagai kita. Titihka semua adat nya!
2 Rusak semua endur alai orang bansa bukai nyembah petara sida ba sebelah bukit ti tinggi, ba munggu, enggau di baruh kayu, dalam menua ti deka dirampas kita.
3 Runtuhka alta sida, lalu redakka tiang batu keramat sida. Tunu anak patung petara Aserah, lalu tebang engkeramba sida, ngambika sida nadai agi disembah ba endur nya.
4 “Anang nyembah TUHAN Allah Taala kita ngena chara nya.
5 TUHAN deka milih siti endur ari semua menua ti diempu raban bansa kita, alai orang deka datai lalu nyembah Iya.
6 Nya meh endur alai kita deka ngenjuk piring tunu, enggau piring ti bukai, pemeri sepuluh peratus, enggau pemeri kita, pemeri ti disemaya deka diberi kita ngagai TUHAN, piring ti diberi nitihka peneka ati diri, enggau anak tuai jelu sapi enggau jelu bedus kita.
7 Dia meh kita, enggau kita sebilik deka makai, di mua TUHAN Allah Taala kita, lalu ensepi penyamai semua utai ti manah ti udah diberekatka TUHAN ngagai kita.
8 Kita enda tau ngereja utai baka ke dikereja kita diatu, nitihka peneka ati diri,
9 laban kita apin datai di menua ti diberi TUHAN Allah Taala kita ngagai kita, alai kita ke deka diau likun.
10 Lebuh kita meraka Sungai Jordan, lalu diau di menua ti diberi TUHAN Allah Taala kita ngagai kita, lalu lebuh Iya meri kita pemaik ari semua munsuh ti ngelingi kita, ngambika kita diau likun,
11 nya baru kita deka mai semua utai ti diasuh aku bai kita ngagai endur ti deka dipilih TUHAN nyadi endur alai Iya deka diau. Utai ti deka dibai kita nya: piring tunu enggau piring ti bukai, pemeri sepuluh peratus kita, enggau pemeri kita, enggau pemeri ti udah disemaya kita enggau TUHAN.
12 Kita, enggau anak kita, orang gaji kita enggau orang Lewi (ti nadai pesaka tanah) ti diau dalam nengeri kita di menua nya, deka gaga ati magang di mua TUHAN.
13 Kita enda tau ngenjuk piring kita ba sebarang endur ti dipilih kita.
14 Kita semina ngenjuk piring nya ba siti endur ti deka dipilih TUHAN, dalam menua ti diempu siti ari raban bansa kita. Semina dia aja kita tau ngenjuk piring tunu, lalu ngereja semua utai ti dipadahka aku ngagai kita.
15 “Tang kita tau nyayat lalu makai jelu kita ba endur alai kita diau. Kita tau makai sepemayuh ti diberi TUHAN ngagai kita. Semua kita, nemuka kita nya tuchi tauka enda, tau makai jelu nya, baka ke makai dagin rusa tauka dagin kijang.
16 Tang kita enda tau makai darah jelu nya. Kita enda tau enda nuang darah nya ngagai tanah baka ke nuang ai.
17 Nadai utai ti diberi kita ngagai TUHAN tau diempa kita ba endur alai kita diau, nemuka utai nya pemeri sepuluh peratus ari gandum kita, ari wain kita, tauka ari minyak kana kita, tauka anak tuai jelu sapi enggau jelu bedus kita, enggau pemeri ti disemaya kita enggau TUHAN, piring ti diberi kita nitihka peneka ati diri, tauka piring ti bukai.
18 Kita enggau anak kita, enggau orang gaji kita, sereta enggau orang Lewi ti diau di nengeri kita, enda tau enda makai piring nya semina di mua TUHAN Allah Taala kita, ba siti endur alai besembiang ti dipilih TUHAN Allah Taala kita. Kita enda tau enda gaga ati dia, di mua TUHAN Allah Taala kita, ke semua utai ti udah dikereja kita.
19 Anang enda nemu ibuhka orang Lewi seagi-agi kita idup di menua kita.
20 “Lebuh TUHAN Allah Taala kita ngerembaika rampa menua kita, munyi ti udah disemaya Iya, kita tau makai dagin di sebarang endur kita deka.
21 Enti endur alai besembiang nya kelalu jauh, kita tau, ba sebarang maya kita deka, nyayat jelu sapi tauka bedus ti udah diberi TUHAN ngagai kita, lalu kita tau makai dagin jelu nya di rumah kita empu, munyi ti udah dipadahka aku ngagai kita.
22 Genap iku orang, nemuka iya nya tuchi tauka enda tuchi, tau makai dagin nya, baka ke makai dagin rusa tauka dagin kijang.
23 Tang kita enda tau makai dagin ti agi bedarah, laban darah ngundan seput, lalu kita enda tau makai seput sama enggau dagin.
24 Anang makai darah, tang tuang darah nya ngagai tanah baka ke nuang ai.
25 Enti kita ngasika pesan tu, TUHAN deka gaga ati ke kita, lalu kita, enggau peturun kita deka mujur diau.
26 Bai pemeri ti kudus ti udah disemaya kita enggau TUHAN, ngagai siti aja endur alai nyembah TUHAN.
27 Beri ba endur nya piring ti deka ditunu ba alta TUHAN. Beri mega piring ti bukai ti diempa kita dagin, lalu tuang darah ba alta.
28 Enggau ati ti tetap, titihka semua utai ti udah dipadahka aku ngagai kita. Nya baru kita enggau peturun kita deka lantang senang belama iya, laban kita ngereja utai ti ngena, ti ngerinduka ati TUHAN Allah Taala kita.
 
Anang Nyembah Engkeramba
29 “TUHAN Allah Taala kita deka ngerusak orang bansa bukai lebuh kita nyerang menua sida, lalu kita deka nguan menua nya, lalu ngentapka diri dia.
30 Lebuh TUHAN udah ngerusak bansa orang nya, kita enda tau enda nentuka diri enda nitihka atur pengarap sida, laban nya deka munuh kita. Anang betanyaka chara sida nyembah petara sida, enggai ke kita nyembah TUHAN ngena chara nya.
31 Anang nyembah TUHAN Allah Taala kita ngena chara sida nyembah petara sida, laban lebuh sida nyembah petara sida, sida ngereja semua utai ti jai, ti dipegedika TUHAN. Indah anak sida empu deh diserahka sida nyadika piring ba api ti ba alta sida.
32 “Kereja semua utai ti udah dipadahka aku ngagai kita. Anang nambahka tauka muai utai ari jaku nya.
 
Bagi 13
1 “Enti nabi tauka orang ke nemu nerangka mimpi bisi ba bala kita, lalu besemaya deka ngereja kereja ajih tauka kereja ti nyelai,
2 lalu kereja ajih tauka kereja ti nyelai nya bisi nyadi, lalu sida nyebut ngagai kita, “Aram kitai nitihka petara bukai,” (petara ti enda ditemu kita), “lalu nyembah sida,”
3 anang bedulika jaku sida nabi nya, tauka jaku orang ke nemu nerangka mimpi; laban TUHAN Allah Taala kita deka ngabas ati kita, deka nemu enti kita amat rinduka TUHAN Allah Taala kita enggau pengabis ati, enggau pengabis semengat kita.
4 Titihka TUHAN, lalu kemesaika Iya. Kita enda tau enda ngasika Iya, sereta nitihka pesan Iya. Sembah Iya, lalu seruran tetap ati ngagai Iya.
5 Tang bunuh sida nabi nya, tauka orang ke nerangka mimpi, laban sida udah bejaku busung ngelaban TUHAN Allah Taala kita ke udah mai kita pansut ari menua Ejip, lalu udah nebus kita ari pengidup kita ke nyadi ulun. Orang nya jai, lalu sida nguji mai kita limpang ari jalai pengidup ti udah diasuh TUHAN titihka kita. Sida nya enda tau enda dibunuh, ngambika penyai nya dibuai ari bala kita.
6 “Indah menyadi kita, tauka anak lelaki tauka anak indu, tauka bini ke dikesayauka kita, tauka pangan kita deh deka nguji, ngena chara belalai, meransang kita nyembah petara bukai ti enda kala disembah kita tauka disembah aki ini kita.
7 Sekeda sida nyangka deka meransang kita nyembah petara orang ke diau semak kita, tauka petara orang ke diau jauh ari kita.
8 Tang anang nejuka sida mujuk kita. Mendingka sida pen kita enda tau. Anang kasihka sida, tauka sinu ati ke sida, lalu anang nyaga sida.
9 Bunuh sida! Kita patut dulu agi ari orang bukai nuku sida ngena batu. Udah nya baru kita tau nejuka orang bukai nuku sida ngena batu.
10 Tuku sida ngena batu datai ke sida mati! Sida udah nguji mai kita limpang ari TUHAN Allah Taala kita ke udah mai kita pansut ari menua Ejip, alai kita ke udah nyadi ulun.
11 Nya baru semua orang Israel deka ninga berita pasal utai ti nyadi. Sida deka takut, lalu nadai agi orang berani ngereja utai ti ngenyai nya.
12 “Lebuh kita diau di nengeri ti diberi TUHAN Allah Taala kita ngagai kita, kita nyangka bisi ninga
13 pasal sekeda orang ke nadai guna ari bansa kita empu ti udah mai orang dalam nengeri sida limpang lalu nyembah petara ti nadai kala disembah kita.
14 Enti kita bisi ninga berita ti baka nya, pansik berita nya enggau silik, lalu enti utai ti jai nya amat udah nyadi,
15 bunuh semua orang dalam nengeri nya, enggau semua jelu tupi sida. Rusak abis nengeri nya.
16 Gempuruka semua reta tengkira orang ke diau dalam nengeri nya, lalu tugungka utai nya ba padang nengeri nya. Udah nya tunu nengeri nya, sama enggau utai ti dalam nengeri nya nyadika piring ti diserahka ngagai TUHAN Allah Taala kita. Nengeri nya enda tau enda ditejuka rusak belama iya, lalu enda tau digaga baru.
17 Anang nyimpan ke diri empu utai ti udah diletak deka dirusak. Nya baru TUHAN deka badu agi ringat, tang deka ngayanka pengasih Iya ngagai kita. Iya deka kasihka kita, lalu ngaga kita nyadi bansa ti besai, munyi ti udah disemaya Iya ngagai aki ini kita,
18 enti kita deka ngasika semua pesan Iya ti udah diberi aku ngagai kita sehari tu, lalu ngereja utai ti dikedekaka Iya.
 
Bagi 14
Pengawa Ti Enda Tau Dikereja Lebuh Ngulit
1 “Kita tu anak TUHAN Allah Taala kita. Kita enda tau ngurik tubuh diri tauka ngukur buk ti ba kening kita, lebuh kita ngulitka orang ke mati.
2 Laban kita tu orang ke kuduska TUHAN Allah Taala kita. Kita tu orang ke udah dipilih Iya ari semua bansa di dunya tu, nyadika pesaka ti dikesayauka Iya.
 
Jelu Ti Tuchi Enggau Enda Tuchi
3 “Anang makai utai ti enda tuchi.
4 Tu bagi jelu ti tau diempa kita: sapi, bedus, kambin,
5 rusa, bedus utan, kambin utan, kijang,
6 jelu ti belah tunjing, ti ngunyah pemakai ti udah diluaka iya baru ari perut raya iya.
7 Jelu ti enda belah tunjing, lalu enda ngunyah pemakai ti udah diluaka iya baru ari perut raya iya, enda tau diempa. Kita enda tau makai jelu unta, tikus belanda, tauka badger batu. Sida nya enda tuchi. Sida amat ngunyah pemakai ti udah diluaka sida baru ari perut raya sida, tang tunjing sida enda belah.
8 Anang makai babi. Sida nya enda tuchi. Tunjing sida amat belah, tang sida enda ngunyah pemakai ti udah diluaka sida baru ari perut raya sida. Anang makai jelu nya, tauka negu bangkai sida.
9 “Kita tau makai semua macham ikan ti bisi pidin enggau tisik,
10 tang utai ti idup dalam ai ti enda bepidin, ti enda betisik, enda tau diempa kita. Sida nya enda tuchi ke kita.
11 “Kita tau makai burung ti tuchi.
12-18 Tang tu macham burung ti enda tau diempa kita: menaul, burung puk, burung unta, burung tasik, burung undan, burung bangau, burung kak,? enggau kusing.
19 “Semua indu utai ti besayap enda tuchi magang. Anang makai sida.
20 Kita tau makai sebarang indu utai ti tuchi.
21 “Anang makai jelu ti ditemu mati. Kita tau nejuka orang bansa bukai ke diau enggau kita makai utai nya, tauka kita nyual utai nya ngagai orang bansa bukai. Laban kita udah dikuduska TUHAN Allah Taala kita. “Anang manduk anak domba tauka anak kambin ngena ai tusu indai iya empu.
 
Atur Pasal Pemeri Sepuluh Peratus
22 “Seraraka pemeri sepuluh peratus kita ari utai ti diketau kita tiap taun.
23 Di mua TUHAN Allah Taala kita, ba endur ti deka dipilih Iya alai Iya patut disembah, empa pemeri sepuluh peratus ti diberi kita ari gandum, wain, minyak kita, sereta enggau anak tuai jelu sapi enggau jelu bedus kita, ngambika kita seruran belajar nangika TUHAN Allah Taala kita.
24 Tang enti endur alai nyembah TUHAN nya kelalu jauh ari rumah kita, lalu kita enda ulih mai pemeri sepuluh peratus ari utai ti udah diberekatka TUHAN ngagai kita, kita tau ngereja tu:
25 Jual utai ti ulih kita nya, lalu bai duit nya ngagai endur alai nyembah TUHAN.
26 Kita tau ngena duit nya bebelika utai ti ku ati kita, baka dagin sapi, anak domba, wain, ai ti bisa, tauka sebarang utai bukai ti dikedekaka kita, lalu di mua TUHAN Allah Taala kita, kita enggau kita sebilik tau makai utai nya lalu rami gaga dia.
27 Anang enda ibuhka orang Lewi ti diau dalam nengeri kita, laban sida iya nadai pesaka tanah baka kita.
28 “Ba genap ujung taun ti ketiga, bai pemeri sepuluh peratus ari semua utai ti diketau kita, lalu taruh utai nya dalam nengeri kita.
29 Orang Lewi, laban sida nadai tanah, orang kampar, enggau orang ke patu balu ti diau di nengeri kita, tau datai lalu makai utai nya lalu kenyang, ngambika TUHAN Allah Taala kita merekatka kita dalam semua pengawa ti dikereja kita.
 
Bagi 15
Taun Ti Ketujuh
1 “Ba genap ujung taun ti ketujuh, kita enda tau enda muai semua utang orang ke berutang ba kita.
2 Baka tu ku chara kita ngereja nya: genap iku kita ke udah nyali duit ngagai orang Israel, enda tau enda muai utang nya. Kita enda tau minta duit nya ari sida, laban TUHAN Empu udah madahka utang nya dibuai.
3 Kita tau minta orang bansa bukai mayar utang diri, tang kita enda tau minta bayar utang ari bansa kita empu.
4 “TUHAN Allah Taala kita deka merekatka kita di menua ti diberi Iya ngagai kita. Nadai siku kita deka seranta
5 enti kita ngasika TUHAN Allah Taala kita, lalu bejimat ngereja semua pesan ti diberi aku ngagai kita sehari tu.
6 Lebuh TUHAN Allah Taala kita merekatka kita, munyi ti udah disemaya Iya, kita deka nyali duit ngagai mayuh bengkah bansa, tang kita enda nginjau duit ari orang. Kita deka merintah mayuh bengkah bansa, tang sida enda merintah kita.
7 “Enti orang Israel bisi suntuk dalam nengeri ti diberi TUHAN Allah Taala kita ngagai kita, anang rangka lalu enggai nyaup sida.
8 Kita patut, enggau ati ti gerah mudah, nyali sida sebarang utai ti dipeguna sida.
9 Anang rangka, lalu berunding, “Taun ti ketujuh alai muai utang, nyau semak,” lalu kita jai enggau pangan diri, lalu enggai meri iya utai, lalu pangan nuan nya ngangauka TUHAN ngelaban kita, lalu kita deka dikumbai salah.
10 Beri enggau ati ti gerah mudah lebuh kita meri utai ngagai sida, lalu TUHAN deka merekatka kita dalam semua pengawa kita enggau dalam semua utai ti dikereja kita.
11 Laban orang ke suntuk endang seruran bisi di dunya tu, nya alai aku meri pesan tu ngagai kita, “Beri enggau ati ti gerah mudah ngagai pangan diri ke suntuk di menua kita.”
 
Chara Ngintu Ulun
12 “Enti orang Israel, nemuka lelaki tauka indu, nyual diri? ngagai kita nyadi ulun, kita enda tau enda ngelepaska sida lebuh sida udah bekereja ke kita enam taun. Masuk taun ti ketujuh, kita enda tau enda ngelepaska sida.
13 Lebuh kita ngelepaska sida, anang ngasuh sida pulai puang.
14 Beri sida utai ti udah diberekatka TUHAN ngagai kita: jelu bedus, gandum enggau wain.
15 Kingatka diri ti udah nyadi ulun di menua Ejip, lalu TUHAN Allah Taala kita udah ngelepaska kita. Nya kebuah aku ngasuh kita ngereja nya.
16 “Tang ulun kita nyangka enggai ninggalka kita. Nyangka iya rinduka kita enggau ke kita sebilik, lalu keran deka diau enggau kita.
17 Enti pia, bai iya ngagai pintu rumah kita, lalu achuk rambing pending iya dia. Nya baru iya nyadi ulun kita seumur idup. Kereja baka nya mega ngagai ulun kita ti indu.
18 Anang pedis ati ketegal kita ngelepaska ulun kita. Sida udah bekereja ke kita enam taun, ngena setengah gaji. Lepaska sida, nya baru TUHAN Allah Taala kita deka merekatka kita dalam semua utai ti dikereja kita.
 
Anak Tuai Jelu Sapi Enggau Jelu Bedus
19 “Serahka ngagai TUHAN Allah Taala kita semua anak tuai ti lelaki ari jelu sapi enggau jelu bedus kita. Anang ngena jelu nya ngereja pengawa, lalu anang ngukur bedus nya.
20 Kita, enggau kita sebilik, enda tau enda makai jelu nya di mua TUHAN genap taun, ba endur ti deka dipilih TUHAN Allah Taala kita.
21 Tang enti jelu nya enda tentu menyana, enti sida nya kait-kupit, tauka buta, tauka bisi penimpang bukai, kita enda tau ngaga sida nyadika piring ti diberi ngagai TUHAN Allah Taala kita.
22 Kita tau makai jelu nya di rumah kita empu. Semua kita, nemuka kita nya tuchi tauka enda tuchi, tau makai jelu nya, baka ke makai dagin rusa tauka dagin kijang.
23 Tang anang makai darah sida. Tuang darah sida ngagai tanah baka ke nuang ai.
 
Bagi 16
Gawai Paska
1 “Kemesaika TUHAN Allah Taala kita ngena Gawai Paska dalam bulan Abip, laban Iya udah mai kita pansut ari menua Ejip lebuh malam hari dalam bulan nya.
2 Mansang kita ngagai siti endur alai nyembah TUHAN, lalu sayat dia siku jelu bedus kita, tauka jelu sapi kita, ke Gawai Paska, kena ngemesaika TUHAN Allah Taala kita.
3 Lebuh kita makai pemakai nya, anang makai roti ti beragi. Tujuh hari kita deka makai roti ti enda beragi, baka ke dikereja kita lebuh kita beguai-guai angkat ari menua Ejip. Empa roti nya. Roti nya deka dikumbai roti pemerinsa, ngambika, seagi-agi kita meruan idup, kita deka ingatka hari kita pansut ari menua Ejip, alai kita ke udah kena perinsa.
4 Dalam kandang tujuh hari, nadai orang di menua kita tau nyimpan ragi dalam rumah sida. Lalu jelu ti disayat ba lemai ti keterubah, enda tau enda abis diempa kita malam nya.
5-6 “Sayat jelu ke Gawai Paska nya ba siti endur alai kita besembah, ukai ba endur bukai di menua ti deka diberi TUHAN Allah Taala kita ngagai kita. Kereja pengawa nya lebuh padam mata panas, laban nya jam kita angkat ari menua Ejip.
7 Panduk dagin nya, lalu empa iya ba siti endur alai kita besembiang. Pagi hari siti baru kita pulai ngagai rumah kita empu.
8 Dalam enam hari lepas nya kita deka makai roti ti enda beragi. Ba hari ti ketujuh kita enda tau enda besembiang bebala mayuh nyembah TUHAN Allah Taala kita, lalu enda gawa sehari nya.
 
Gawai Ngetau
9 “Itung tujuh minggu ari maya kita belabuh ngetau gandum kita,
10 lalu udah nya intu Gawai Ngetau kena ngemesaika TUHAN Allah Taala kita, lebuh kita mai ngagai Iya piring ti diberi nitihka peneka ati diri setipak enggau berekat ti udah diberi Iya ngagai kita.
11 Kita, anak kita, orang gaji kita, enggau orang Lewi, orang kampar, orang ke patu balu ti diau dalam nengeri kita, enda tau enda gaga ati ngintu Gawai nya di mua TUHAN. Kereja nya ba siti endur alai kita besembiang.
12 Kita enda tau enda ngasika pesan tu. Anang enda ingatka diri ti udah nyadi ulun di menua Ejip.
 
Gawai Belangkau
13 “Lebuh kita udah tembu ngindik semua gandum kita, lalu udah tembu mitan semua buah anggur kita, kita enda tau enda ngintu Gawai Belangkau tujuh hari.
14 Kita, anak kita, orang gaji kita, enggau orang Lewi, orang kampar, orang ke patu balu ti diau dalam nengeri kita, enda tau enda semua gaga ati ngerami Gawai nya.
15 Intu Gawai nya tujuh hari ba siti endur alai besembiang kena kita ngemesaika TUHAN Allah Taala kita. Kita enda tau enda gaga ati, laban TUHAN udah merekatka utai ti diketau kita, sereta merekatka pengawa kita.
16 “Semua lelaki dalam bansa kita enda tau enda datai nyembah TUHAN tiga kali setaun ba siti endur ti deka dipilih TUHAN, iya nya, lebuh Gawai Paska, Gawai Ngetau, enggau Gawai Belangkau. Genap iku sida enda tau enda meri pemeri
17 naka ti ulih diberi sida, nitihka pemayuh berekat ti udah diberi TUHAN ngagai sida siku-siku.
 
Bejalaika Atur Ti Lurus
18 “Pilih orang nyadi hakim, enggau nyadi pemesai bukai, dalam semua nengeri ti diberi TUHAN Allah Taala kita ngagai kita. Orang tu enda tau enda ngatur pechara enggau enda bepilih mata.
19 Sida enda tau meri atur ti enda lurus, lalu enda tau bepilih mata. Sida enda tau makai suap, laban makai suap ngasuh orang ke bepenemu-dalam enda meda utai ti betul, lalu ngasuh sida meri atur ti salah.
20 Kita enda tau enda seruran meri atur ti lurus, ngambika kita ulih ngalahka lalu diau dalam menua ti diberi TUHAN Allah Taala kita ngagai kita.
21 “Lebuh kita ngaga alta ke TUHAN Allah Taala kita, anang nirika alta nya ngimbai tiang petara indu Aserah.
22 Lalu anang mega nirika tiang ti dipegedika TUHAN.
 
Bagi 17
1 “Anang meri jelu sapi tauka jelu bedus ti bisi penimpang nyadika piring ngagai TUHAN Allah Taala kita. TUHAN begedika utai nya.
2 “Enti sema kita bisi ninga dalam nengeri kita, pasal lelaki tauka indu ke udah bedosa ngelaban TUHAN, lalu ngelanggar sempekat Iya
3 ketegal sida nyembah lalu betuaika petara bukai, nemuka nya mata hari, tauka bulan, tauka bintang, lalu ngelanggar pesan TUHAN,
4 lalu enti kita bisi ninga berita nya, kita enda tau enda mansik utai nya enggau silik, lebuh orang madahka utai nya ngagai kita. Enti utai ti jai nya amat udah nyadi dalam menua Israel,
5 bai orang nya pansut ke luar ari nengeri nya, lalu tuku sida ngena batu datai ke sida mati.
6 Tang sida semina tau dibunuh beduduk ba jaku saksi dua tauka mayuh agi orang. Sida enda tau dibunuh beduduk ba saksi siku orang aja.
7 Orang ke nyadika saksi enda tau enda dulu nukuka batu. Udah nya baru semua orang bukai tau nuku sida ngena batu. Nya meh jalai kita muai orang ke jai nya ari bala kita.
8 “Kadang-kadang pekara bisi kelalu mar diputarka bala hakim ke di nengeri nya, baka pekara pasal hak bempu pesaka, tauka pasal orang ke bakal, tauka pasal pekara munuh tauka tebunuhka orang. Ba pekara ti baka nya, kita enda tau enda mansang ngagai endur alai kita ke nyembah TUHAN ti udah dipilih TUHAN Allah Taala kita,
9 lalu mantaika pekara nya ngagai bala imam Lewi, enggau hakim ke bekereja lebuh maya nya, lalu awakka sida meri pemutus penemu ba pasal pekara nya.
10 Sida deka meri pemutus penemu sida, lalu kita enda tau enda ngereja utai nitihka atur sida.
11 Sambut meh pemutus penemu sida, lalu titihka atur sida enggau silik.
12 Barang sapa berani ngelaban atur hakim tauka imam ke bekereja sehari nya, deka dibunuh. Nya meh jalai kita muai orang ke jai nya ari bansa orang Israel.
13 Nya baru semua orang deka ninga pasal pekara nya, lalu takut. Nya baru orang nadai agi berani ngereja utai ti baka nya.
 
Atur Pasal Raja
14 “Lebuh kita udah ngerampas menua ti diberi TUHAN Allah Taala kita ngagai kita, lalu udah ngentapka diri di menua nya, kita deka berunding begunaka raja baka bansa bukai ti ngelingi kita.
15 Kita enda tau enda nentuka orang ke dipilih kita nyadi raja nya orang ke udah dipilih TUHAN. Iya enda tau enda datai ari bansa kita empu. Anang ngasuh orang kampar nyadika raja kita.
16 Raja nya enda tau ngembuan mayuh kuda ke bala soldadu iya empu, tauka ngasuh orang nikal ngagai menua Ejip bebelika kuda, laban TUHAN udah bejaku enda nyagi bala nembiak Iya nikal ngagai menua nya.
17 Raja nya enda tau mayuh bini, laban nya deka ngasuh iya ninggalka TUHAN; lalu iya enda tau ngaga diri kaya besimpanka pirak enggau emas.
18 Lebuh iya nyadi raja, iya enda tau enda bisi siti Bup Adat dituliska iya di mua bala imam Lewi.
19 Iya enda tau enda nyimpan bup nya semak iya empu, lalu macha bup nya seumur idup, ngambika iya nemu belajar nangika TUHAN, lalu tetap ati ngasika semua utai ti ditulis dalam bup nya.
20 Tu deka nagang iya berunding ngumbai diri manah agi ari orang Israel ti bukai, sereta nagang iya ngelanggar pesan TUHAN dalam semua utai. Nya baru iya enggau peturun iya deka lama megai perintah di menua Israel.
 
Bagi 18
Ungkup Ke Bala Imam
1 “Semua imam Lewi, semua raban bansa Lewi, enda tau nerima ungkup tanah tauka pesaka di menua Israel, tang sida deka beridup ba piring ti diberi ngagai TUHAN.
2 Sida enda tau bempu pesaka tanah baka raban bansa ti bukai. TUHAN Empu deka nyadika pesaka sida, munyi ti udah disemaya Iya ngagai sida.
3 “Tu ungkup ti diberi orang Israel ngagai sida imam ari piring ti diberi sida, nemuka piring nya jelu sapi tauka bedus: berang, rang enggau perut raya jelu nya.
4 Utai ti terubah ulih kita ari gandum, wain, enggau minyak kana kita, enggau bulu bedus ti terubah ulih kita ari bedus kita, enda tau enda diberi ngagai sida,
5 laban TUHAN Allah Taala kita udah milih raban bansa Lewi enggau peturun sida ari semua raban bansa kita, bekereja dalam nama TUHAN belama iya.
6 “Enti orang Lewi, sebarang maya iya deka, angkat ari sebarang nengeri ti udah alai iya diau di menua Israel, lalu datai ngagai endur ti deka dipilih TUHAN,
7 iya tau bekereja dia dalam nama TUHAN Allah Taala iya, baka orang Lewi ti bukai ke bekereja dia.
8 Iya enda tau enda diberi pemakai ngemayuh ti diberi ngagai imam ti bukai, taja pen iya bisi penatai duit ari rega reta tengkira ti dijual sida sebilik. Enda Tau Nunda Orang Ke Enda Nemu Allah Taala
9 “Lebuh kita datai di menua ti diberi TUHAN Allah Taala kita ngagai kita, kita enda tau nunda pengawa ti jai ti dikereja orang bansa bukai ke diau di menua nya.
10 Anang nyerahka anak kita lalu nunu sida ba alta nyadika piring. Lalu anang betilitka nasit, tauka beburung, tauka bedukun, tauka bemanang,
11 tauka bekenaka pengaruh, tauka betanya ngagai antu, tauka betanya ngagai semengat orang ke udah mati.
12 Laban TUHAN Allah Taala kita begedika orang ke ngereja utai ti jai baka nya. Nya kebuah Iya muru mayuh bengkah bansa ari mua kita.
13 Kita enda tau enda, enggau pengabis ati kita, mengkang taluk ngagai TUHAN Allah Taala kita.
14 Taja pen orang ke diau di menua ti baru deka dialahka kita, mendingka manang, mendingka orang ke betilitka nasit, tang TUHAN Allah Taala kita enda ngasuh kita ngereja nya.
 
Siku Nabi Baka Moses
15 “Lalu TUHAN Allah Taala kita deka meri kita siku nabi ke baka aku, ari bansa kita empu, lalu kita enda tau enda ngasika iya.
16 Laban tu utai ti dipinta kita ari TUHAN Allah Taala kita ba Bukit Sinai, alai kita ke begempuru bebala mayuh, lebuh kita nyebut, ‘Enti kami agi majak ninga munyi nyawa TUHAN Allah Taala kami, tauka meda api ti mau, kami tentu mati.’
17 Lalu ku TUHAN bejaku ngagai aku, ‘Jaku sida endang ngena.
18 Aku deka meri sida siku nabi ke baka nuan, ari bansa sida empu. Aku deka nepuka leka jaku Aku ke dalam mulut iya, lalu iya deka madahka semua pesan Aku ngagai sida.
19 Barang sapa enda mendingka jaku ti disebut nabi nya dalam nama Aku, Aku deka ngasuh orang nya betanggungjawapka diri empu.
20 Tang enti nabi berani bejaku mai pesan dalam nama petara bukai, tauka ngumbai diri bejaku dalam nama Aku, tang ukai ari asuh Aku, iya enda tau enda mati ketegal nya.’
21 “Kita nyangka berunding dalam ati diri, ‘Baka ni ku jalai kitai nemu jaku nya ukai jaku TUHAN?’
22 Enti nabi nya bejaku dalam nama TUHAN, tang utai ti ku iya nya nadai nyadi, nya nunjukka pesan nya ukai ari TUHAN. Nabi nya bejaku ngena kuasa iya empu. Anang takutka jaku nya.
 
Bagi 19
Nengeri Alai Ngerarika Diri
1 “Lebuh TUHAN Allah Taala kita udah ngerusak orang ke bempu menua ti diberi Iya ngagai kita, lalu kita udah ngerampas nengeri enggau rumah sida lalu udah ngentapka diri dia,
2 kita enda tau enda ngeletak tiga buah nengeri alai ngerarika diri di menua ti diberi TUHAN Allah Taala kita ngagai kita.
3 Sukat penyauh nengeri nya, lalu bagi menua ti diberi TUHAN Allah Taala kita nyadika pesaka kita, ngagai tiga bagi, ngambika orang ke tekelanjur tebunuhka orang tau rari ngagai sebuah ari nengeri nya.
4 Tu pasal orang ke tekelanjur tebunuhka orang, lalu ngerarika diri ngagai nengeri nya, deka ngidupka nyawa diri, iya nya pasal orang ke tekelanjur tebunuhka orang ke ukai munsuh iya:
5 Ambika banding, enti dua iku orang ari bala kita bejalai ke babas deka ngambi kayu, lalu lebuh siku ari seduai nya nebang kayu, pala kapak iya ngelechut ari baur iya, lalu kena pangan iya, lalu pangan iya nya mati, iya ke tebunuhka pangan iya tau ngerarika diri ngagai sebuah ari nengeri nya, ngidupka nyawa diri.
6 Tang enti nengeri nya semina sebuah aja, nyangka nengeri nya kelalu jauh, lalu kaban belayan ti deka bebalaska pemati nya ulih tepegaika orang nya lalu, enggau ati ti balat ringat, munuh iya taja pen iya nadai penyalah. Laban iya ti bendar, iya ukai sengaja munuh pangan iya.
7 Nya kebuah aku ngasuh kita ngeletak tiga buah nengeri.
8 “Enti TUHAN Allah Taala kita ngerembaika rampa menua kita, munyi ti dipadahka Iya ngagai aki ini kita ngena sumpah, lalu Iya meri ngagai kita semua menua ti udah disemaya deka diberi Iya ngagai kita,
9 lalu kita ngasika semua pesan ti diberi aku ngagai kita sehari tu, iya nya rinduka TUHAN Allah Taala kita, sereta nitihka jalai Iya, nya baru kita tau nambahka tiga buah agi nengeri ngagai nengeri ti tiga buah nya,
10 ngambika orang ke nadai penyalah nya enda mati dalam menua ti diberi TUHAN Allah Taala kita nyadika pesaka kita, lalu ninggang kita enggau penyalah munuh orang.
11 “Tang enti sema kita endang sengaja munuh munsuh kita, lalu udah nya kita ngerarika diri ngagai nengeri nya, deka ngidupka nyawa diri,
12 bala tuai nengeri kita empu deka mesanka kita, lalu nyerahka kita ngagai kaban belayan ke ngiga balas ke pemati nya, ngambika kita dibunuh.
13 Nadai orang deka kasihka kita. Menua Israel enda tau enda muai semua orang ke munuh orang, ngambika kita diau lantang senang.
 
Garis Entara Tanah
14 “Anang mindahka pak kelai entara enggau tanah orang, ti lama udah diletak ba menua ti diberi TUHAN Allah Taala kita ngagai kita.
 
Pasal Nyadi Saksi
15 “Saksi ari siku orang aja enda umbas kena nyalah orang. Abis kurang iya, dua iku saksi diguna, kena netapka orang nya salah.
16 Enti orang nguji ngemediska pangan diri ngena jaku petenah,
17 seduai iya enda tau enda sama mansang ngagai endur alai kita ke nyembah TUHAN, lalu diakim bala imam enggau bala hakim ke bekereja sehari nya.
18 Bala hakim deka mansik pekara nya enggau silik, lalu enti orang nya amat udah betenah,
19 iya deka diukum ngena ukum ti diletak ninggang pangan iya, enti sema pangan iya amat salah. Nya meh jalai bansa kita deka muai penyai nya.
20 Udah nya baru semua orang bukai deka ninga pasal pekara nya lalu takut, lalu nadai agi orang berani ngereja utai ti jai baka nya ba bala kita.
21 Anang kasihka orang nya: nyawa balas nyawa, mata balas mata, ngeli balas ngeli, jari balas jari, kaki balas kaki.
 
Bagi 20
Atur Pasal Beperang
1 “Lebuh kita mansang ngelaban munsuh, lalu kita meda kerita perang enggau kuda, enggau bala soldadu sida mayuh agi ari bala soldadu kita, anang takutka sida. Laban TUHAN Allah Taala kita, ti udah mai kita pansut ari menua Ejip, deka meruan enggau kita.
2 Sebedau kita berengkah belaban, siku imam enda tau enda mansang ke mua, lalu nyebut ngagai bala soldadu munyi tu:
3 ‘Kita orang Israel, pendingka tu ulih kita! Sehari tu kita deka mansang beperang. Anang takutka munsuh, tauka lemi semengat, tauka begau abis ati,
4 laban TUHAN Allah Taala kita deka bejalai enggau kita, beperang ngarika kita, lalu meri kita pemenang.’
5 “Udah nya bala pemesai deka bejaku enggau bala soldadu munyi tu, ‘Kati bisi lelaki ditu ke baru udah ngaga rumah, tang apin nyerahka rumah nya? Enti iya apin, iya enda tau enda pulai, enggai ke iya mati beperang, lalu orang bukai deka nyerahka rumah iya.
6 Kati bisi lelaki ditu ke baru udah nanam kebun anggur, tang apin bisi peluang ngetau buah ari kebun nya? Enti iya apin, iya enda tau enda pulai, enggai ke iya mati beperang, lalu orang bukai deka ensepi penyamai buah anggur nya.
7 Kati bisi lelaki ditu ke betunang deka bebini? Enti bisi, iya enda tau enda pulai, enggai ke iya mati beperang, lalu orang bukai jadi enggau tunang iya.’
8 “Bala pemesai mega deka nyebut ngagai bala soldadu sida munyi tu, ‘Kati bisi lelaki ditu takut? Enti bisi, iya enda tau enda pulai, enggai ke iya marit orang bukai takut.’
9 Lebuh bala pemesai udah tembu bejaku ngagai bala soldadu, nya baru orang ke nyadi tuai ke siti-siti raban enda tau enda dipilih.
10 “Lebuh kita mansang nyerang sebuah nengeri, kita enda tau enda dulu meri peluang ngasuh orang dia nunduk.
11 Enti sida muka pintu nengeri lalu nunduk, semua sida deka nyadi ulun kita, lalu ngereja pengawa ti berat ke kita.
12 Tang enti orang dalam nengeri nya enggai nunduk, tang keras deka ngelaban, kelulung nengeri nya ngena bala soldadu kita.
13 Udah nya, lebuh TUHAN Allah Taala kita ngasuh kita ngalahka nengeri nya, bunuh semua lelaki ke dalam nengeri nya.
14 Tang kita tau ngambi indu, anak mit, jelu tupi enggau semua utai bukai dalam nengeri nya ke kita empu. Kita tau ngena utai ti diempu munsuh kita laban TUHAN udah meri utai nya ngagai kita.
15 Nya jalai kita ngereja utai ba nengeri ti jauh ari menua ti alai kita ngentapka diri.
16 “Tang lebuh kita ngalahka nengeri dalam menua ti diberi TUHAN Allah Taala kita ngagai kita, bunuh semua utai ti enseput dalam nengeri nya.
17 Luska semua orang Iti, orang Amor, orang Kanaan, orang Peris, orang Ibi, orang Jebus, munyi ti dipesanka TUHAN.
18 Bunuh sida ngambika sida enda mai kita bedosa ngelaban TUHAN ngena ajar ti ngasuh kita ngereja semua utai ti jai, ti dikereja sida lebuh sida nyembah petara sida.
19 “Lebuh kita nguji ngalahka nengeri, anang betebangka kayu buah dia, taja pen kita lama ngelulung nengeri nya. Empa buah nya, tang anang munuh kayu nya. Kayu nya ukai munsuh kita.
20 Kita tau nebang kayu bukai kena kita begagaka kuta ti dikena kita ngelulung nengeri nya, datai ke nengeri nya alah.
 
Bagi 21
Pasal Munuh Orang
1 “Enti orang bisi ditemu kena bunuh orang ba padang di menua ti deka diberi TUHAN Allah Taala kita ngagai kita, lalu kita enda nemu sapa munuh iya,
2 bala tuai bansa enggau bala hakim kita enda tau enda angkat lalu nyukat penyauh endur alai bangkai nya ditemu ngagai genap buah nengeri ti semak endur nya.
3 Udah nya bala tuai ke dalam nengeri ti pemadu semak, enda tau enda milih siku sapi ti indu ti agi biak, ti enda kala dikena ngereja pengawa.
4 Sida lalu mai sapi ti indu nya ngagai siti endur ti semak siti sungai ti nadai kala rangkai, lalu tanah dia pen nadai mega kala dichangkul tauka ditanam enggau utai. Dia sida deka matahka rekung sapi ti indu nya.
5 Bala imam Lewi deka mansang ke mua, laban TUHAN Allah Taala kita udah milih sida bekereja ke Iya, lalu madahka berekat dalam nama TUHAN, lalu ari pemutus penemu sida, semua laya diputarka magang.
6 Udah nya semua tuai ari nengeri ti pemadu semak ari endur alai bangkai orang nya ditemu, enda tau enda masu jari sida atas sapi ti indu ti udah dipatahka rekung nya
7 lalu nyebut, ‘Kami nadai munuh orang tu, lalu kami enda mega nemu sapa ti munuh iya.
8 TUHAN, ampun meh orang Israel, ti udah ditebus Nuan. Anang nejuka darah orang ke nadai penyalah ninggang nembiak Nuan orang Israel.’ Sida lalu diampun.
9 Nya alai, laban kita ngereja utai ti diasuh TUHAN, kita enda kena tinggang penyalah ketegal pemati orang nya.
 
Pasal Indu Ke Ditangkap Lebuh Maya Perang
10 “Lebuh TUHAN Allah Taala kita meri kita pemenang lebuh beperang, lalu kita bulih orang tangkap,
11 kita nyangka bisi tepedaka, ba bala orang tangkap nya, indu ke bajik, ti deka diambi kita nyadika bini.
12 Bai iya ngagai rumah nuan. Dia iya enda tau enda ngukur ?buk iya, mipil kukut iya,
13 lalu nukar gari iya. Iya deka diau dalam rumah nuan, lalu ngulitka apai indai iya sebulan. Udah nya baru nuan tau jadi enggau iya.
14 Lepas nya, enti nuan enggai agi jadi enggau iya, nuan enda tau enda ngelepaska iya. Nyadi laban nuan udah mejalka iya beleman enggau nuan, nuan enda tau ngaga iya baka ke ngaga ulun lalu nyual iya.
 
Pasal Pesaka Anak Tuai
15 “Enti sema orang bisi dua iku bini, lalu bini iya ke dua iku nya sama ngadaka anak lelaki, tang anak ke dulu agi ada nya ukai anak ari indu ke balat dikerinduka iya,
16 lebuh iya berundingka chara iya deka magi reta tengkira iya ngagai bala anak iya, iya enda tau semina berundingka anak ari bini ke balat agi dikerinduka iya, lalu meri iya ungkup ti endang patut diempu anak tuai iya.
17 Iya enda tau enda meri dua kali lipat mayuh agi ungkup ngagai anak tuai iya, taja pen anak tuai iya nya ukai anak ari bini ke balat agi dikerinduka iya. Apai enda tau enda ngaku anak tuai diri empu, lalu meri ngagai iya ungkup ti endang patut diempu iya ti nyadi anak tuai, nitihka adat.
 
Pasal Anak Lelaki Ke Enda Ngasi
18 “Enti sema orang bisi siku anak lelaki ke kieh sereta deka ngelaban, ke enggai ngasika apai indai iya, taja pen seduai iya disiplin iya,
19 apai indai iya enda tau enda mai iya ngagai bala tuai di nengeri ti alai sida diau, lalu ngasuh iya kena pechara.
20 Apai indai orang nya deka nyebut ngagai bala tuai, ‘Anak kami duai tu kieh sereta deka ngelaban, lalu enggai ngasika kami duai. Iya bebasauka duit sereta pemabuk.’
21 Udah nya bala orang lelaki di nengeri nya lalu nuku iya ngena batu datai ke mati. Nya meh chara kita muai orang ke jai nya ari bala kita. Semua orang di menua Israel deka ninga berita pasal utai ti udah nyadi, lalu sida deka takut.
 
Mayuh Bengkah Adat
22 “Enti orang udah kena ukum bunuh laban iya udah ngereja penyalah, lalu bangkai iya digantung ari sebatang tiang,
23 bangkai nya enda tau ditejuka begantung dia semalam-malam nya. Bangkai nya enda tau enda dikuburka sehari nya, laban bangkai orang ke digantung ari tiang, mai sumpah Allah Taala ngagai menua. Kuburka bangkai orang nya, ngambika kita enda ngamahka menua ti diberi TUHAN Allah Taala kita, ngagai kita.
 
Bagi 22
1 “Enti kita bisi tepedaka sapi tauka bedus orang Israel lelang, anang enda ibuhka jelu nya. Bai jelu nya pulai baru ngagai orang ke bempu iya.
2 Tang enti orang ke bempu jelu nya diau jauh ari kita, tauka kita enda nemu sapa ke bempu jelu nya, bai jelu nya ngagai rumah kita. Lebuh orang ke bempu iya datai ngiga iya, beri jelu nya ngagai iya.
3 Kereja mega baka nya ba pasal keledai, gari, tauka utai bukai ti lenyau ari jari orang Israel.
4 “Enti keledai tauka sapi orang Israel rebah, anang enda ibuhka jelu nya. Saup orang nya ngangkatka jelu iya bediri baru.
5 “Indu enda tau ngena pekayan lelaki, lalu lelaki pen enda mega tau ngena pekayan indu. TUHAN Allah Taala kita begedika orang ke ngereja utai ti baka nya.
6 “Enti kita tetemuka sarang burung ba kayu, tauka ba tanah, lalu indu burung nya meram telu tauka anak iya, anang ngambi indu burung nya.
7 Kita tau ngambi anak burung nya, tang kita enda tau enda ngelepaska indu iya, ngambika kita gayu-guru sereta kaya-raja.
8 “Lebuh kita ngaga rumah baru, gaga reraga ba tisi perabung rumah nya. Nya baru kita enda betanggungjawap enti orang labuh ari perabung nya lalu mati.
9 “Anang nanam utai bukai ba kebun anggur kita. Enti kita nanam utai bukai dia, kita enda tau ngambi asil ari kebun nya, nemuka buah anggur tauka utai bukai.
10 “Anang begandinka jelu sapi enggau keledai lebuh kita ngeradu tanah.
11 “Anang ngena gari ti ditenun ari bulu bedus begulai enggau linin.
12 “Jait rambing ba empat iti sukut gari kita.
 
Adat Pasal Beleman
13 “Enti lelaki jadi enggau indu siku, lalu udah nya berunding enggai agi jadi enggau iya,
14 lalu iya ngaga mayuh macham petenah ngagai indu nya, madahka iya ukai dara bungas lebuh seduai iya jadi,
15 apai enggau indai indu nya enda tau enda nyerahka kelai ngagai bala tuai ba pintu kuta nengeri nya, kena netapka indu nya endang amat dara bungas.
16 Apai indu nya deka nyebut ngagai sida, ‘Aku ngasuh anak indu aku jadi enggau lelaki tu, lalu diatu lelaki tu enggai agi jadi enggau iya.
17 Iya udah betenahka iya, ngumbai iya ukai dara bungas lebuh seduai iya jadi enggau pangan diri. Tu tanda anak aku agi dara bungas lebuh seduai iya jadi enggau pangan diri. Peda kita bekau darah ba chadar tilam tu!’
18 Udah nya bala tuai nengeri nya deka mai laki indu nya, lalu malu iya.
19 Sida mega deka ngukum iya seratus singkap duit pirak, lalu meri duit nya ngagai apai indu nya, laban lelaki nya udah ngemaluka indu orang Israel. Nambahka nya, indu nya deka mengkang jadi enggau lelaki nya, lalu lelaki nya enda tau muai indu nya seagi-agi lelaki nya idup.
20 “Tang enti utai ti dipedawaka lelaki nya endang sigi amat, lalu tanda indu nya agi dara bungas pen nadai,
21 sida enda tau enda mai indu nya pansut ngagai pintu penama rumah apai iya, alai orang lelaki ke di nengeri nya deka nuku indu nya ngena batu datai ke mati. Iya udah ngereja utai ti ngemaluka bansa kitai, laban iya udah beleman enggau lelaki sebedau iya belaki lebuh iya agi diau dalam rumah apai iya. Nya meh jalai kita muai penyai nya ari bala kita.
22 “Enti lelaki kena tangkap beleman enggau bini orang bukai, seduai iya deka sama dibunuh. Nya meh jalai kita deka muai penyai nya ari menua Israel.
23 “Enti lelaki kena tangkap ba sebuah nengeri lebuh iya beleman enggau indu siku ke betunang enggau orang bukai,
24 kita enda tau enda mai seduai iya pansut ari nengeri nya, lalu nuku seduai iya ngena batu datai ke seduai iya mati. Indu nya enda tau enda dibunuh, laban iya nadai ngangau minta tulung, taja pen iya dalam nengeri, alai orang ulih ninga iya. Lalu lelaki nya enda tau enda mega dibunuh, laban iya beleman enggau orang ke betunang. Nya meh jalai kita muai penyai nya ari bala kita.
25 Enti lelaki masung indu siku dalam babas, lebuh indu nya benung betunang enggau lelaki bukai, semina lelaki ke masung iya nya aja deka dibunuh.
26 Kita enda tau ngereja sebarang utai ngagai indu nya, laban iya nadai ngereja dosa ti tau ngasuh iya diukum bunuh. Pekara nya sebaka enggau pekara pasal lelaki ke ngamuk lelaki siku, lalu munuh iya.
27 Lelaki nya masung indu nya dalam babas, lalu taja pen indu nya rauh-rauh minta tulung, tang orang nadai datai nyaup iya.
28 “Enti lelaki kena tangkap masung indu ke biak, ti enda betunang,
29 lelaki nya enda tau enda mayar derian lima puluh singkap duit pirak ngagai apai indu nya, lalu indu nya nyadika bini iya, laban iya udah mejalka indu nya beleman enggau iya. Lalu iya enda tau muai indu nya seumur idup.
30 “Lelaki enda tau beleman enggau bini apai iya, laban nya ngemaluka apai iya.
 
Bagi 23
Dibuai Ari Bansa Israel
1 “Orang ke udah dipeliri, tauka udah dikempat utai ti dilalaika lelaki, enda tau nyadi raban nembiak TUHAN.
2 “Anak ampang, tauka peturun anak ampang enda tau nyadi nembiak TUHAN. Indah nyentuk ngagai serak ti kesepuluh deh sida enda tau nyadi nembiak TUHAN.
3 “Orang bansa Amon, tauka orang Moap, tauka peturun sida, nyentuk ngagai serak ti kesepuluh, enda tau nyadi raban nembiak TUHAN,
4 laban sida enda meri kita pemakai enggau ai irup lebuh kita di rantau jalai pansut ari menua Ejip, lalu sida ngaji Balaam anak Beor, ari nengeri Petor di Mesopotamia, nyumpah kita.
5 Tang TUHAN Allah Taala kita enggai mendingka Balaam, lalu mutarka sumpah nya nyadika berekat, laban Iya rinduka kita.
6 Anang nulung bansa orang nya, tauka ngasuh sida kaya-raja, sepemanjai umur kita.
7 “Anang mechat orang Edom laban sida iya kaban belayan kita empu. Lalu anang mechat orang Ejip, laban kita udah diau nyadi orang kampar di menua sida.
8 Berengkah ari serak ti ketiga ke atas, peturun bansa orang nya tau nyadi raban nembiak TUHAN.
 
Ngintu Kem Soldadu Tuchi
9 “Lebuh kita diau dalam kem deka mansang nyerang munsuh kita, kita enda tau enda nyeliahka utai ti tau ngasuh kita enda tuchi.
10 Enti lelaki nyadi enda tuchi laban iya bisi mansutka ai mani lebuh iya tinduk, iya enda tau enda pansut ari kem; iya enda tau tama ngagai kem.
11 Lebuh hari nyau lemai, iya enda tau enda masu diri ngena ai, lalu ba padam mata panas iya tau pulai baru ngagai kem.
12 “Kita enda tau enda bisi siti endur di luar kem alai kita kemi bira.
13 Siti ari pekekas ti dibai kita nya utai kena ngeruang tanah; lebuh kita asai ti deka kemi bira, kita tau ngeruang lubang ngena pengeruang tanah nya, lalu udah nya ngelamun tai kita.
14 Laban TUHAN Allah Taala kita bejalai enggau kem kita, nyaga kita lalu nyerahka munsuh kita ngagai jari kita, nya alai kem kita enda tau enda diintu kudus, ngambika Iya nadai meda utai ti enda menuku ba bala kita lalu nguingka belakang iya ngagai kita.
 
Adat Ti Bukai
15 “Enti ulun rari ari tuan iya, lalu iya datai ngagai kita, anang nganjung iya pulai baru.
16 Sida tau diau enggau kita, dalam nengeri ti dipilih sida nitihka peneka ati sida empu, lalu kita enda tau nekanka pengidup sida.
17 “Orang Israel, nemuka lelaki tauka indu, nadai tau nyadi sundal dalam rumah sembiang.
18 Kita enda tau mai duit ti ulih orang nyundal, tauka gaji lelaki ke nyundal, ngagai rumah TUHAN Allah Taala kita, kena kita ngamatka semaya, laban utai dua bengkah nya dipegedika TUHAN.
19 “Kita enda tau minta anak ari utai ti dijali kita ngagai orang Israel, nemuka utai nya duit, tauka pemakai, tauka utai bukai.
20 Kita tau minta anak ari duit ti dijali kita ngagai orang kampar, tang kita enda tau minta anak ari duit ti dijali kita ngagai orang Israel. Kita enda tau enda ngasika adat tu. Nya baru TUHAN Allah Taala kita deka merekatka semua utai ti dikereja kita di menua ti deka diempu kita.
21 “Lebuh kita ngaga semaya enggau TUHAN Allah Taala kita, anang laun ngamatka semaya nya. TUHAN enggai meda kita enda ngamatka semaya kita. Kita bedosa enti kita enda ngamatka semaya diri.
22 Kita enda salah enti kita enda ngaga semaya enggau TUHAN,
23 tang enti kita ngaga semaya laban kita endang deka, kita enda tau enda ngamatka semaya nya.
24 “Lebuh kita bejalai niti jalai ba kebun anggur orang bukai, kita tau makai buah anggur naka ti ulih empa kita, tang kita enda tau ngisi ma kita lalu mai buah nya kebukai.
25 Lebuh kita bejalai niti jalai nengah umai orang, kita tau makai gandum naka ti ulih dirurut kita, tang kita enda tau ngetau gandum nya ngena ketap.
 
Bagi 24
Pasal Sarak Enggau Pasal Bebini Baru
1 “Enti lelaki jadi enggau siku indu, lalu udah nya berunding enggai agi jadi enggau indu nya, laban iya bisi tetemuka utai pasal bini iya ti ngasuh ati iya enda lantang, iya tau nulis surat sarak, meri surat nya ngagai bini iya, lalu ngasuh bini iya angkat ari rumah nya.
2 Enti sema indu nya jadi enggau lelaki bukai,
3 lalu lelaki nya mega berunding enggai agi jadi enggau iya, lelaki nya enda tau enda nulis surat sarak, meri surat nya ngagai indu nya, lalu ngasuh iya angkat ari rumah nya (tauka, enti laki ke lumur dua nya mati).
4 Ba pekara dua bengkah tu, laki ke terubah enda tau jadi enggau indu nya baru, lebuh indu nya udah ngamahka diri; laban TUHAN begedika utai ti baka nya, lalu kita enda tau ngereja penyalah ti baka nya dalam menua ti udah diberi TUHAN Allah Taala kita nyadika pesaka kita.
 
Adat Bukai
5 “Lebuh lelaki baru udah jadi enggau bini iya, iya enda tau nyadi soldadu, tauka diasuh ngereja pengawa bukai ti besangkut-paut enggau pengawa soldadu. Iya tau pulai ke rumah setaun, lalu ngelantangka diri enggau bini ke baru udah enggau iya jadi.
6 “Lebuh kita nyali utai ngagai orang, kita enda tau minta kisar nyadika gadai utai nya, laban enti kita ngereja nya, kita ngambi utai ti dikena sida sebilik nyendiaka pemakai kena sida ngidupka diri.
7 “Enti kita nangkap lalu nabanka orang Israel, lalu ngaga sida nyadi ulun kita, tauka nyual sida nyadi ulun, kita enda tau enda dibunuh. Nya meh jalai kita muai penyai nya ari bansa kita.
8 “Lebuh kita ngidapka penyakit kulit ti tau ngerampit, kita enda tau enda ngereja utai munyi ti diasuh imam Lewi. Titihka atur ti udah diberi aku ngagai sida.
9 Kingatka utai ti udah dikereja TUHAN Allah Taala kita ngagai Miriam lebuh kita di rantau jalai pansut ari menua Ejip.
10 Lebuh kita nyali utai ngagai orang, anang tama ngagai rumah orang nya lalu ngambi tajung ti deka diberi iya nyadika gadai.
11 Anti iya di luar, nganti iya mai utai nya ngagai kita.
12 Enti iya seranta, anang ngasuh tajung nya bemalam ba jari kita.
13 Pulaika utai nya ngagai iya tiap lemai, ngambika iya bisi utai kena tinduk. Nya baru iya deka beterima kasih ngagai kita, lalu TUHAN Allah Taala kita deka lantang ati ngagai kita.
14 “Anang ngelakar orang gaji ke seranta, ke suntuk, nemuka sida nya orang Israel tauka orang kampar ti diau dalam nengeri kita.
15 Genap hari, sebedau padam mata panas, bayar gaji sida ke sehari nya. Sida begunaka duit nya, lalu ngarapka diri nerima duit nya. Enti kita enda mayar gaji sida, sida deka ngangauka TUHAN minta Iya ngelaban kita, lalu kita bedosa.
16 “Apai indai enda tau dibunuh ketegal penyalah anak sida, lalu anak pen enda mega tau dibunuh ketegal penyalah apai indai sida. Orang semina tau dibunuh ketegal penyalah sida empu.
17 “Anang ngerampas hak orang kampar, tauka hak orang ke nadai apai indai, lalu anang ngambi kain ari indu ke balu nyadika gadai utai ti dijali.
18 Kingatka diri ti udah nyadi ulun di menua Ejip, lalu TUHAN Allah Taala kita udah nebus kita ari menua nya. Nya kebuah aku meri kita pesan tu.
19 “Lebuh kita ngetau umai kita, lalu kita ninggalka sekeda gandum ti udah diketau kita, anang nikal baru lalu ngumpul utai nya. Tinggalka utai nya ke orang kampar, enggau ke orang ke patu balu, ngambika TUHAN Allah Taala kita merekatka kita dalam semua utai ti dikereja kita.
20 Lebuh kita udah ngetau buah kana kita sekali, anang ngulihka buah ti tinggal. Tinggalka buah nya ke orang kampar, enggau ke orang ke patu balu.
21 Lebuh kita udah ngumpul buah anggur kita sekali, anang mutik buah ti tinggal. Buah ti tinggal nya ungkup ke orang kampar, enggau ke orang ke patu balu.
22 Kingatka diri ti udah nyadi ulun di menua Ejip. Nya kebuah aku meri pesan tu ngagai kita.
 
Bagi 25
1 “Enti dua iku orang Israel mansang ngagai kot minta orang ngatur laya seduai iya, lalu siku ari seduai iya nya dikumbai enda salah, lalu siku dikumbai salah,
2 lalu enti iya ke salah nya diukum sipat, hakim enda tau enda ngasuh iya tingkap ba tanah, lalu ngasuh iya disipat. Penyuah iya disipat deka bepanggai ba pemerat penyalah iya.
3 Iya tau disipat nyentuk ngagai empat puluh kali, tang enda tau lebih ari nya. Enti lebih ari nya, utai nya deka ngemaluka iya di mua orang mayuh.
4 “Anang mampul mulut sapi lebuh kita ngena sida nungku gandum.
 
Tanggungjawap Ngagai Menyadi Ke Mati
5 “Enti orang dua iku diri menyadi diau ba sebidang tanah, lalu siku ari seduai nya mati, nadai ninggalka anak, balu menyadi ke mati nya enda tau jadi enggau lelaki bukai ke ukai ari ruang bilik laki iya. Menyadi lelaki orang ke udah mati nya betanggungjawap jadi enggau indu ke balu nya.
6 Anak tuai seduai iya deka dikumbai anak orang ke udah mati nya, ngambika iya enda putus purih di menua Israel.
7 Tang enti menyadi orang ke mati nya enggai jadi enggau indu nya, indu nya empu enda tau enda betemu enggau bala tuai di nengeri nya, lalu nyebut ngagai sida, ‘Menyadi laki aku enggai ngereja pengawa diri. Iya enggai meri menyadi iya purih dalam bansa orang Israel.’
8 Udah nya bala tuai di nengeri nya enda tau enda mesanka lelaki nya lalu bejaku enggau iya. Enti iya mengkang enggai jadi enggau indu nya,
9 balu menyadi iya enda tau enda betemu enggau iya, di mua semua bala tuai di nengeri nya, ningkilka kasut iya sepiak, ngeludah mua iya, lalu nyebut, ‘Tu utai ti nyadi ngagai orang ke enggai meri purih ngagai menyadi iya.’
10 Ruang bilik lelaki nya deka dikumbai ‘ruang bilik orang ke udah tingkil kasut.’
 
Adat Bukai
11 “Enti dua iku lelaki belaya, lalu bini lelaki ti siku nguji nyaup laki iya, lalu ngeremuk utai lelaki ti siku nya,
12 anang kasihka indu nya; tetak jari iya.
13-14 “Anang ngakal lebuh kita nimbang tauka nyukat utai.
15 Kena timbang enggau penyukat ti betul, ngambika kita gayu-guru nguan menua ti diberi TUHAN Allah Taala kita ngagai kita.
16 TUHAN begedika orang ke ngakal.
 
Diasuh Munuh Orang Amalek
17 “Kingatka utai ti udah dikereja orang Amalek ngagai kita, lebuh kita pansut ari menua Ejip,
18 pasal sida ke nyerang kita di rantau jalai, lebuh kita lepi sereta lelak, lalu munuh semua bala kita ke enda tetitihka bala mayuh bejalai; orang Amalek nya enda nangika Allah Taala.
19 Nya alai, lebuh TUHAN Allah Taala kita udah meri menua nya ngagai kita, lalu udah ngasuh kita diau likun ari semua munsuh ke ngelingi kita, kita enda tau enda munuh semua orang Amalek, ngambika sida enda agi dikingatka. Anang enda ingat ngereja nya!
 
Bagi 26
Pemeri Ti Diberi Lebuh Udah Badu Ngetau
1 “Lebuh kita udah ngambi menua ti diberi TUHAN Allah Taala kita ngagai kita, lalu udah ngentapka diri dia,
2 kita enda tau enda mai sekeda buah bungas ari utai ti ditanam kita, ti diketau kita di menua ti diberi TUHAN Allah Taala kita ngagai kita, lalu kita enda tau enda nyimpan utai nya dalam bakul, lalu mansang ngagai endur alai TUHAN Allah Taala kita disembah.
3 Mansang kita ngagai imam ke bekereja lebuh maya nya, lalu sebut ngagai iya, ‘Sehari tu aku ngaku ngagai TUHAN Allah Taala aku, aku udah datai di menua ti udah disemaya deka diberi Iya ngagai aki ini kitai.’
4 “Lebuh imam nya ngambi bakul nya ari jari kita, lalu ngengkahka bakul nya di mua alta TUHAN Allah Taala kita,
5 kita enda tau enda nyebut leka jaku tu di mua TUHAN Allah Taala kita: ‘Aki ini kami orang Aram ti diau segau-segau ba sebelah endur; iya enggau sida sebilik mansang ngagai menua Ejip, lalu diau dia nyadi orang kampar; sida nadai mayuh tubuh, tang sida nyadi bansa ti besai, ti kering sereta mayuh tubuh.
6 Lebuh orang Ejip jai enggau kami, lalu mejalka kami nyadi ulun,
7 kami nyabak ngangauka TUHAN Allah Taala aki ini kami; TUHAN ninga kami lalu meda pemedis, penusah enggau pemerinsa kami.
8 TUHAN lalu mai kami pansut ari menua Ejip ngena jari Iya ti kering, enggau ngena lengan ti diunjurka Iya, ngena kuasa ti besai ti dipandangka Iya, sereta enggau ngena kereja ajih, enggau kereja ti nyelai;
9 lalu Iya udah mai kami ngagai endur tu, lalu meri menua ti kaya sereta ami tu ngagai kami.
10 Nya alai diatu aku mai buah bungas ari utai ti ditanam aku ba tanah ti udah diberi Nuan, O TUHAN, ngagai aku.’
Kita lalu ngengkahka bakul nya di mua TUHAN Allah Taala nuan, lalu meremi di mua Iya.
11 Udah nya kita, sama enggau orang Lewi, sereta enggau orang kampar ti diau begulai enggau kita, deka rami gaga ngena utai ti udah diberi TUHAN Allah Taala kita, ngagai kita, enggau ngagai kita sebilik.
12 “Lebuh kita udah tembu meri semua pemeri sepuluh peratus kita dalam taun ti ketiga (ti dikumbai taun alai meri pemeri sepuluh peratus), alai kita ke meri pemeri sepuluh peratus kita ngagai orang Lewi, ngagai orang kampar, ngagai orang ke patu balu, ngambika sida makai lalu kenyang dalam nengeri kita,
13 kita enda tau enda nyebut di mua TUHAN Allah Taala kita: ‘Aku udah mai pemeri sepuluh peratus ti kudus nya ari rumah aku, lalu aku udah meri pemeri nya ngagai orang Lewi, ngagai orang kampar ti diau begulai enggau kami, ngagai orang ke patu balu, nitihka semua pesan ti diberi Nuan ngagai kami; aku nadai ngelanggar tauka enda ingatka pesan Nuan:
14 Aku nadai makai utai nya lebuh aku ngulit; Aku nadai mai utai nya pansut ari rumah aku lebuh aku enda tuchi, lalu aku nadai udah meri utai nya nyadika piring ke orang ke udah mati. Aku udah ngasika TUHAN Allah Taala aku, ngereja semua utai ti udah dipesanka Nuan.
15 Malik ke baruh kitu ari endur Nuan ti kudus di serega, lalu berekatka bala nembiak Nuan Israel, enggau menua ti udah diberi Nuan ngagai kami ngena sumpah ngagai aki ini kami, menua ti kaya sereta ami.’
 
Bala Nembiak TUHAN
16 “Sehari tu TUHAN Allah Taala kita bejaku ngasuh kita ngasika semua adat Iya. Nya alai, kita enda tau enda tetap ati ngasika semua adat nya enggau pengabis ati, enggau pengabis semengat kita.
17 Sehari tu kita udah ngaku TUHAN nyadika Allah Taala kita. Kita udah besemaya deka ngasika Iya, nitihka semua adat Iya, lalu ngereja semua utai ti dipesanka Iya ngagai kita.
18 Sehari tu TUHAN udah nyambut kita nyadika nembiak Iya, munyi ti udah disemaya Iya ngagai kita, lalu Iya ngasuh kita ngasika semua adat Iya.
19 Iya deka ngaga kita nyadi bansa ti kering agi ari semua bansa bukai ti udah digaga Iya, lalu kita deka mai puji enggau basa ngagai nama Iya, lalu kita deka nyadi nembiak Iya, munyi ti udah disemaya Iya.”
 
Bagi 27
Adat Allah Taala Dituliska Ba Batu
1 Udah nya Moses enggau bala tuai orang Israel, bejaku ngagai orang mayuh, “Kita enda tau enda ngasika semua pesan ti diberi aku ngagai kita sehari tu.
2 Lebuh kita udah meraka Sungai Jordan, lalu datai ba menua ti diberi TUHAN Allah Taala kita ngagai kita, kita enda tau enda nirika berapa igi lampang batu ti besai, ngechat batu nya enggau kapu.
3 Tuliska semua leka adat tu ba batu nya lebuh kita udah meraka sungai nya, deka mansang ngagai menua ti diberi TUHAN ngagai kita, menua ti kaya sereta ami, munyi ti udah disemaya TUHAN Allah Taala aki ini kita ngagai kita.
4 Nya alai lebuh kita udah meraka Sungai Jordan, dirika lampang batu nya ba Bukit Ebal, munyi ti diasuh aku kereja kita sehari tu, lalu chat batu nya enggau kapu.
5 Gaga siti alta ke TUHAN Allah Taala kita dia ari batu ti nadai kala dipansap ngena besi.
6 Giga batu ti tau dikena enda ibuh dipansap. Udah nya beri piring tunu kita ngagai TUHAN Allah Taala kita ba alta nya.
7 Beri mega piring pemaik, lalu empa piring nya dia, rami gaga di mua TUHAN Allah Taala kita.
8 Kita enda tau enda nuliska semua leka jaku adat tu enggau terang ba semua lampang batu nya.”
9 Udah nya Moses enggau bala imam Lewi lalu bejaku ngagai semua orang Israel, “Anang ragak, kita orang Israel, lalu pendingka aku. Sehari tu kita udah nyadi nembiak TUHAN Allah Taala kita.
10 Nya alai kita enda tau enda ngasika Iya lalu nitihka semua pesan enggau adat Iya ti diberi aku ngagai kita sehari tu.”
 
Sumpah Enti Enda Ngasi
11 Sehari nya Moses mega bejaku ngagai orang Israel,
12 “Lebuh kita udah meraka Sungai Jordan, tu bagi raban bansa ti enda tau enda bediri ba Bukit Gerisim lebuh jaku berekat disebut: Raban bansa Simeon, Lewi, Judah, Isakar, Josep, enggau Benjamin.
13 Lalu tu bagi raban bansa ti deka bediri ba Bukit Ebal lebuh jaku sumpah disebut: Raban bansa Reuben, Gat, Aser, Sebulun, Dan enggau Naptali.
14 Udah nya orang Lewi deka nyebut leka jaku tu enggau nyawa ti inggar ngagai semua orang Israel:
15 “Barang sapa ngaga engkeramba, tauka ngaga anak patung, utai ti dipegedika TUHAN, lalu belalai nirika utai nya, deka tulah.” Lalu semua orang mayuh deka nyaut, “Amin!”
16 “Barang sapa enda bebasaka apai indai diri, deka tulah.” Lalu semua orang mayuh deka nyaut, “Amin!”
17 “Barang sapa mindahka pak kelai entara, deka tulah.” Lalu semua orang mayuh deka nyaut, “Amin!”
18 “Barang sapa nguluka orang ke buta nengah jalai ti salah, deka tulah.” Lalu semua orang mayuh deka nyaut, “Amin!”
19 “Barang sapa ngerampas hak orang kampar, orang ke patu balu, deka tulah.” Lalu semua orang mayuh deka nyaut, “Amin!”
20 “Barang sapa ngemaluka apai iya, laban iya beleman enggau siku ari bini apai iya, deka tulah.” Lalu semua orang mayuh deka nyaut, “Amin!”
21 “Barang sapa beleman enggau jelu, deka tulah.” Lalu semua orang mayuh deka nyaut, “Amin!”
22 “Barang sapa beleman enggau menyadi indu tauka menyadi indu tiri diri, deka tulah.” Lalu semua orang deka nyaut, “Amin!”
23 “Barang sapa beleman enggau mentua indu diri, deka tulah.” Lalu semua orang mayuh deka nyaut, “Amin!”
24 “Barang sapa udah belalai munuh orang, deka tulah.” Lalu semua orang mayuh deka nyaut, “Amin!”
25 “Barang sapa nerima gaji munuh orang ke nadai penyalah, deka tulah.” Lalu semua orang mayuh deka nyaut, “Amin!”
26 “Barang sapa enda ngasika semua adat tu, deka tulah ditinggang sumpah.” Lalu semua orang mayuh deka nyaut, “Amin!”
 
Bagi 28
Berekat Enti Ngasi
1 “Enti kita ngasika TUHAN Allah Taala kita, lalu tetap ati nitihka semua pesan Iya ti diberi aku ngagai kita sehari tu, TUHAN Allah Taala kita deka ngaga kita nyadi bansa ti pemadu bekuasa di dunya tu.
2 Semua berekat tu deka diberi ngagai kita, enti kita ngasika TUHAN Allah Taala kita:
3 “Nengeri enggau umai kita deka diberekatka.
4 “Anak kita, utai ti ditanam kita, anak jelu tupi kita, nyengkaum anak sapi enggau anak domba kita, deka diberekatka.
5 “Bakul roti enggau bisin ti dikena kita ngaga roti, deka diberekatka.
6 “Kita deka diberekatka lebuh kita mupuk, enggau lebuh kita pulai.
7 “TUHAN deka ngasuh munsuh ke nyerang kita, alah laban kita. Sida deka datai nyerang kita nengah jalai siti, tang rari ari kita nengah tujuh bengkah jalai.
8 “TUHAN Allah Taala kita deka merekatka tibang kita, enggau semua pengawa ti dikereja kita; Iya deka merekatka kita di menua ti diberi TUHAN Allah Taala kita ngagai kita.
9 TUHAN deka ngaga kita nyadi bansa ti kudus, munyi ti udah disemaya Iya ngena sumpah, enti kita ngasika pesan ti diberi TUHAN Allah Taala kita, lalu idup nitihka jalai Iya.
10 Nya baru semua bansa di dunya tu deka nemu kita udah dipilih TUHAN nyadika nembiak Iya, lalu sida deka takutka kita.
11 TUHAN deka meri kita mayuh anak, mayuh jelu sapi, bulih mayuh asil ari utai ti ditanam kita, di menua ti udah disemaya Iya ngagai aki ini kita, ti deka diberi Iya ngagai kita.
12 TUHAN deka nukangka langit, alai Iya ke nyimpan ai ujan, lalu meri kita ai ujan nitihka musin, lalu merekatka semua pengawa kita. Kita deka nyali ngagai mayuh bengkah bansa, tang kita enda nginjau.
13 TUHAN deka ngaga kita nyadi pala, ukai nyadi iku; kita deka seruran kaya-raja, nadai kala miskin, enti kita ngasika pesan TUHAN Allah Taala kita, ti diberi aku ngagai kita sehari tu,
14 lalu enda limpang ke kiba tauka ke kanan ari sebarang jaku ti diberi aku ngagai kita sehari tu, sereta enda nitih tauka nyembah petara bukai.
 
Utai Ti Deka Nyadi Enti Enda Ngasi
15 “Tang enti kita enda ngasika TUHAN Allah Taala kita, lalu enda tetap ati ngereja semua pesan enggau adat Iya ti diberi aku ngagai kita sehari tu, semua leka jaku sumpah tu deka ninggang kita:
16 “Nengeri enggau umai kita deka ditinggang sumpah.
17 “Bakul roti kita enggau bisin ti dikena kita ngaga roti, deka tulah ditinggang sumpah.
18 “Anak kita, asil ti ulih kita ari umai kita, anak jelu sapi, enggau anak jelu bedus kita deka tulah ditinggang sumpah.
19 Kita deka tulah ditinggang sumpah lebuh kita mupuk, enggau lebuh kita pulai.
20 “TUHAN deka ngasuh kita dituntung penusah lalu begau abis atidalam semua utai ti dikereja kita, datai ke semua kita udah abis lengis enggau jampat, ketegal penyai ti dikereja kita, laban kita udah ninggalka Aku.
21 TUHAN deka ngasuh penyakit betangkan-tangkan nyerang kita, datai ke semua kita abis mati di menua ti deka diambi kita.
22 TUHAN deka merinsaka kita ngena sakit tibi, penyakit chelap-angat, penyakit bisul, ngena hari ti angat enggau kemarau, ngena penyakit kulat enggau penyakit bekuap. Penyakit nya deka nyerang kita, datai ke kita mati.
23 Hari enda ujan, lalu tanah kita deka rangkai baka besi.
24 TUHAN deka nganti ujan ngena amau lalu semina amau aja deka nurun ari langit, datai ke kita abis mati.
25 TUHAN deka ngasuh kita alah laban munsuh kita. Kita deka nyerang sida nengah jalai siti, lalu kita deka rari ari sida nengah tujuh bengkah jalai, lalu semua orang di dunya tu deka takut lebuh sida meda utai ti nyadi ba kita.
26 Bangkai kita deka nyadika pemakai burung enggau jelu babas, lalu nadai orang muru sida.
27 TUHAN deka merinsaka kita enggau penyakit pisa, baka ke dikereja Iya ngagai orang Ejip. Iya deka merinsaka kita ngena penyakit rumbak, penyakit kuris enggau penyakit gatal, ti enda ulih digeraika.
28 TUHAN deka merinsaka kita ngena penyakit gila, penyakit buta, enggau penyakit mamau.
29 Kita deka bejalai gapa-gapa lebuh siang hari baka orang ke buta, lalu kita enda nemu tunga diri bejalai; lalu kita deka seruran dikeduan, sereta dirumpak orang, lalu nadai orang deka nulung kita.
30 “Kita deka betunang enggau indu, tang orang bukai deka jadi enggau indu nya. Kita deka ngaga rumah, tang kita enda diau dalam rumah nya. Kita deka numbuhka kebun anggur, tang kita enda ngasaika penyamai buah anggur nya.
31 Jelu sapi kita deka disayat orang di mua kita empu, tang kita enda makai dagin jelu nya. Keledai kita deka dichuri orang lebuh kita tegenung merening, lalu jelu nya enda dipulaika baru ngagai kita. Jelu bedus kita deka diberi ngagai munsuh kita, lalu nadai orang deka nulung kita.
32 Anak lelaki enggau anak indu kita deka ditabanka munsuh ngagai menua bukai, lebuh kita genung-genung meda. Kita deka begigaka sida sepemanjai hari, tang nadai kuasa ngereja sebarang utai.
33 Orang ke enda dikelala kita deka makai utai ti ditanam kita enggau utai ti ulih kita; kita deka seruran dikeduan sereta diperinsa,
34 lalu nyadi gila meda utai ti dipeda kita.
35 TUHAN deka malu patung kita, lalu ngasuh kaki kita abis pedis diempa rumbak ti enda ulih digeraika, kenyau ari tapa kaki nyentuk ngagai punjung pala kita.
36 TUHAN deka mai kita, enggau raja kita ngagai menua bukai, ngagai bansa ti enda dikelala kita tauka dikelala aki ini kita, alai kita deka betuaika petara bukai ti digaga ari kayu enggau ari batu.
37 Orang di menua ti deka alai TUHAN muai kita, deka tekenyit ati meda utai ti nyadi ba kita; sida deka merinsa sereta beduan kita.
38 “Kita deka nanam mayuh benih, tang asil kita mimit, laban buntak deka makai utai ti ditanam kita.
39 Kita deka nanam kebun anggur, lalu ngintu kebun nya, tang kita enda ngetau buah anggur nya, tauka ngirup wain ari anggur nya, laban ulat deka makai batang anggur kita.
40 Kayu kana deka tumbuh di serata menua kita, tang kita nadai minyak kana kena kita ngunsut tubuh diri, laban buah kana nya deka gugur.
41 Kita deka bisi anak lelaki, anak indu, tang sida deka lenyau ari jari kita, laban sida deka ditabanka orang nyadi orang tangkap.
42 Semua kayu enggau utai ti ditanam kita deka diempa indu lukung.
43 “Orang bansa bukai ti diau di menua kita deka mansang kering-sekering, lalu kita deka mansang lembut-selembut.
44 Sida deka nyali kita duit, tang kita nadai duit dijali ngagai sida; sida deka nyadi pala, lalu kita nyadi iku.
45 “Semua sumpah tu deka ninggang kita, ngagai kita lalu ngalahka kita, datai ke kita dirusak, laban kita enda ngasika TUHAN Allah Taala kita, enda nitihka pesan enggau adat ti diberi aku ngagai kita.
46 Sumpah tu deka meruan enggau kita, sereta enggau peturun kita, kena nangkan kita belama iya.
47 TUHAN ngasuh kita kaya-raja dalam semua utai, tang kita enggai nyembah Iya enggau ati ti gaga sereta beterima kasih,
48 nya alai Iya deka ngasuh munsuh nyerang kita, lalu kita deka bekereja nyadi ulun sida. Kita deka lapar, aus, nadai gari, lalu suntuk semua utai. TUHAN deka nejuka munsuh kita merinsaka kita, datai ke kita mati.
49 TUHAN deka ngasuh siti bansa datai ari tisi dunya nyambarka kita baka menaul, bansa ti enda ditemu kita jaku,
50 bansa orang ke mangah, ti enda nemu bebasaka orang ke tuai, tauka kasihka orang ke biak.
51 Sida deka ngerampas semua jelu tupi kita, enggau semua utai ti ditanam kita, ngambika kita lapar, nadai ninggalka gandum, wain, minyak kana, jelu sapi, tauka jelu bedus ke kita, datai ke kita mati.
52 Sida deka ngelulung kita dalam semua nengeri kita, datai ke dinding kuta kita ke tinggi, ti dikarapka kita, runtuh di serata menua kita. Sida deka ngelulung kita dalam semua nengeri kita di serata menua ti udah diberi TUHAN Allah Taala kita, ngagai kita.
53 “Laban kita kelalu balat merinsa dikelulung munsuh, kita deka bepakaika anak kita empu, ti udah diberi TUHAN Allah Taala kita ngagai kita. Kita deka makai isi anak lelaki, isi anak indu kita.
54 Indah orang ke nelap sereta siru ari bala kita empu deh enggai magi pemakai nya ngagai menyadi iya empu, ngagai bini ke endang seruran diberap iya, enggau ngagai bala anak iya ti agi idup,
55 enggai meri ngagai sida isi anak ti diempa iya, laban iya nadai pemakai bukai, laban iya udah kelalu balat merinsa dikelulung munsuh dalam nengeri kita.
56 Indah indu ke nelap sereta siru ari bala kita empu, ti enda ngindikka kaki iya ngagai tanah, deh enggai meri pemakai nya ngagai laki ke endang seruran diberap iya, tauka ngagai anak lelaki iya, tauka ngagai anak indu iya.
57 Indah entemuni anak iya empu, enggau anak ke diadaka iya empu, deh iya enggai magi ngagai sida, laban iya belalai makai utai nya, laban iya nadai utai bukai diempa, empa pemalat kita udah merinsa dikelulung munsuh.
58 Ku Moses bejaku ngagai sida, “Enti kita enda tetap ati ngasika semua leka jaku ti ditulis dalam bup tu, lalu enda nangika pemesai mulia nama TUHAN Allah Taala kita,
59 TUHAN deka ngukum kita enggau peturun kita ngena penyakit ti balat, ti enda ulih digeraika.
60 Iya deka ngasuh semua penyakit ti udah nyadi di menua Ejip, ti balat diketakutka kita, lekat ba kita.
61 Semua penyakit enggau pemerinsa bukai, taja pen sida nadai ditulis dalam Bup Adat tu, deka dikena TUHAN merinsaka kita, datai ke kita mati.
62 Taja pen kita menya ngemayuh bintang ti di langit, tang semina mimit aja kita deka idup, laban kita enda ngasika TUHAN Allah Taala kita.
63 Baka TUHAN ti gaga ati deka ngasuh kita kaya-raja sereta mayuh tubuh, baka nya mega TUHAN deka gaga ati ngerusak kita; kita deka dichabut ari menua ti deka diambi kita.
64 TUHAN deka ngachirka kita ngagai semua bansa, di serata dunya, lalu dia kita deka nyembah petara bukai ti digaga ari kayu tauka ari batu, petara ti enda ditemu kita tauka ditemu aki ini kita.
65 Lebuh kita diau di menua bukai, kita nadai pemaik, nadai endur alai kita belelak. Dia TUHAN deka ngasuh tungkul ati kita ketap-ketap, mata kita rabun, lalu kita lemi semengat.
66 Kita nadai pengadang. Siang malam kita deka takut, nadai pengandal.
67 Lebuh pagi hari kita deka nyebut, “Naka meh pemanah enti tu lemai hari!” lalu lebuh lemai hari, kita deka nyebut, “Naka meh pemanah enti tu pagi hari!” Kita nyebut nya laban kita takutka utai ti deka ngasuh ati kita takut, sereta takutka utai ti deka dipeda kita.
68 TUHAN deka mai kita pulai baru ngagai menua Ejip ngena kapal, nengah menua ti dipadahka aku enda agi ditengah kita; lalu di menua nya kita deka nyual diri ngagai munsuh kita nyadika ulun lelaki tauka ulun indu sida, tang nadai siku orang deka meli kita.”
 
Bagi 29
Sempekat TUHAN Enggau Orang Israel Lebuh Sida Di Menua Moap
1 Tu leka jaku sempekat ti udah diasuh TUHAN gaga Moses enggau orang Israel di menua Moap, nambahka sempekat ti udah digaga TUHAN enggau sida lebuh sida ba Bukit Sinai.
 
Sempekat Disebut Baru Lebuh Sida Di Menua Moap
2 Moses ngempuruka semua orang Israel, lalu bejaku ngagai sida, “Kita empu udah meda utai ti udah dikereja TUHAN ngagai raja menua Ejip, ngagai bala pemesai, enggau ngagai semua menua iya,
3 pemalat penyakit ti dipeda kita, kereja ajih, enggau kereja ti nyelai.
4 Tang nyentuk ngagai sehari tu TUHAN apin ngasuh kita meretika utai nya, apin ngasuh kita meda, apin ngasuh kita ninga.
5 Ku TUHAN bejaku ngagai kita, ‘Aku udah nguluka kita empat puluh taun nengah menua puang. Baju kita enggau kasut kita enda luya;
6 Kita nadai makai roti, lalu kita nadai ngirup wain, tauka ai ti bisa, ngambika kita nemu Aku tu TUHAN Allah Taala kita.’
7 Lebuh kitai datai ba endur tu, Raja Sihon di Hesbon, enggau Raja Og di Basan nyerang kitai, tang kitai ngalahka sida.
8 Kitai ngerampas lalu magi menua sida ngagai raban bansa Reuben enggau Gat, enggau setengah ari raban bansa Manasi.
9 Nya alai kita enda tau enda tetap ati ngasika semua leka jaku sempekat tu, ngambika kita mujur dalam semua utai ti dikereja kita.
10 “Semua kita begempuru sehari tu, kepala raban bansa kita, bala tuai kita, bala pemesai kita, enggau semua orang Israel,
11 bala anak kita, bala indu kita, enggau orang bansa bukai ke diau dalam kem kita, ke ngambi kayu enggau nyauk ai ke kita,
12 ngambika kita nerima sempekat ti digaga TUHAN Allah Taala kita enggau kita, lalu netapka sempekat nya ngena sumpah sehari tu,
13 ngambika Iya ngaga kita nyadika nembiak Iya sehari tu, lalu Iya nyadi Allah Taala kita, munyi ti udah disemaya Iya enggau kita, sereta enggau aki ini kita, Abraham, Isak enggau Jakop.
14 Aku ngaga sempekat tu ngena jaku sumpah, ukai semina enggau kita ke bediri enggau kami ditu sehari tu di mua TUHAN Allah Taala kita,
15 tang mega enggau semua orang ke nadai ditu enggau kitai sehari tu.
16 Kita nemu gaya pengidup kita di menua Ejip, enggau jalai kita bejalai nengah menua orang bansa bukai.
17 Kita udah meda engkeramba sida, ti digaga sida ari kayu, batu, pirak enggau emas.
18 Bala kita, nemuka lelaki tauka indu, tauka ruang bilik, tauka raban bansa kita, nyangka bisi limpang ari TUHAN Allah Taala kita lalu nyembah petara orang bansa bukai. Nyangka siku ari bala kita bisi baka urat ti tumbuh nyadi kayu ti pait sereta berachun.
19 Semua orang ke ninga jaku sumpah tu, lalu merekatka diri empu, berunding dalam ati diri, “Kitai nadai utai ngawa, taja pen kitai kieh” (lalu ketegal nya, ngasuh penusah ti besai nyadi ba tanah ti mayuh ai enggau ba tanah ti rangkai),
20 TUHAN enggai ngampun orang ke baka nya, tang pengeringat TUHAN deka mau ngelaban iya, lalu semua jaku sumpah ti ditulis dalam bup tu deka ninggang iya magang, datai ke TUHAN udah ngerusak iya abis lengis.
21 TUHAN deka ngaga iya nyadika teladan ke semua raban bansa orang Israel, lalu ngukum iya ngena sumpah ti disebut dalam sempekat ti ditulis dalam Bup Adat TUHAN tu.
22 Jemah ila, peturun kita, enggau orang bansa bukai ke datai ari menua jauh, deka meda penusah ti besai enggau pemerinsa ti udah dikena TUHAN ninggang menua kita.
23 Tanah kita nadai tumbuh utai, dilamun merirang enggau garam. Nadai utai ulih tumbuh dia. Indah rumput deh enggai tumbuh dia. Menua kita deka nyadi baka nengeri Sodom enggau Gomorah, baka nengeri Admah enggau nengeri Seboim, ti dirusak TUHAN lebuh Iya ringat.
24 Semua dunya deka alit ati lalu nanya, ‘Nama kebuah TUHAN ngereja utai baka nya ngagai menua sida? Nama kebuah Iya ngemalat nya ringat?’
25 Lalu saut iya munyi tu, ‘Laban bala nembiak TUHAN udah ngelanggar sempekat ti udah digaga sida enggau Iya ti Allah Taala aki ini sida, lebuh Iya mai sida pansut ari menua Ejip.
26 Sida udah betuaika, lalu nyembah petara bukai ti nadai kala disembah sida menya, petara ti enda diasuh TUHAN sembah sida.
27 Nya kebuah TUHAN ringat ngagai nembiak Iya, lalu ninggang sida ngena semua sumpah ti ditulis dalam bup tu.
28 TUHAN nyabut sida ari menua sida empu laban Iya balat ringat, lalu ngeransi, lalu Iya muai sida ngagai menua bukai, ti alai sida diau diatu.’
29 Utai ti resia endang enggi TUHAN Allah Taala kitai, tang utai ti dipandangka endang enggi kita, enggau ke peturun kitai, ngambika kitai nitihka semua leka jaku ti dalam Adat nya belama iya.
 
Bagi 30
Berekat Ti Diberi TUHAN Ngagai Orang Ke Nesal Ati
1 Ku Moses bejaku, “Aku diatu udah ngasuh kita milih entara berekat enggau sumpah. Lebuh semua utai tu udah nyadi ba kita ila, lalu kita diau begulai enggau bansa bukai, alai TUHAN Allah Taala kita ke udah ngachirka kita, kita deka ingatka utai ti udah diasuh aku pilih kita.
2 Enti kita, tauka peturun kita, deka pulai baru ngagai TUHAN, lalu enggau pengabis ati kita ngasika pesan Iya ti diberi aku ngagai kita sehari tu,
3 nya baru TUHAN Allah Taala kita deka kasihka kita. Iya deka mai kita pulai baru ari menua ti alai Iya udah ngachirka kita, lalu Iya deka ngasuh kita kaya-raja baru.
4 Taja pen kita diachirka jauh ngagai sukut dunya, TUHAN Allah Taala kita deka ngempuruka kita, lalu mai kita pulai baru,
5 ngambika kita tau bempu menua ti diuan aki ini kita kelia. Lalu Iya deka ngasuh kita lebih agi kaya-raja, sereta mayuh agi tubuh ari bala aki ini kita kelia.
6 TUHAN Allah Taala kita deka meri ati ti ngasi ngagai kita enggau ngagai peturun kita, ngambika kita deka rinduka Iya enggau pengabis ati kita, lalu kita deka mengkang diau di menua nya.
7 Iya deka nguingka semua sumpah nya ngagai munsuh kita ke begedi sereta merinsaka kita.
8 Lalu kita deka ngasika Iya baru, sereta nitihka semua pesan Iya ti diberi aku ngagai kita sehari tu.
9 TUHAN deka ngasuh kita kaya-raja dalam semua utai ti dikereja kita. Kita deka mayuh anak, enggau mayuh jelu tupi, lalu tanah kita deka mansutka mayuh asil. Iya deka gaga ati ngasuh kita kaya-raja, baka Iya ti udah gaga ati ngasuh aki ini kita kaya-raja,
10 tang kita enda tau enda ngasika Iya, lalu nitihka semua adat Iya ti ditulis dalam Bup Adat Iya tu. Kita enda tau enda nguingka diri ngagai Iya enggau pengabis ati kita.
11 Ku Moses bejaku, “Pesan ti diberi aku ngagai kita sehari tu ukai utai ti kelalu mar dititihka kita, tauka enda ulih dijengkau kita.
12 Iya ukai di langit din, lalu kita enda ibuh nanya, ‘Sapa deka niki ke atas lalu mai iya nurun ngagai kitai, ngambika kitai ulih ninga iya, lalu ngasika iya?’
13 Iya ukai mega di seberai tasik ti besai. Nya alai kita enda ibuh nanya, ‘Sapa deka ngelayang tasik ti besai tu lalu mai iya ngagai kitai, ngambika kitai ulih ninga iya, lalu ngasika iya?’
14 Jaku nya semak kita. Iya diau dalam nyawa enggau dalam ati kita, ngambika kita ngasika iya.
15 Ku Moses bejaku, “Sehari tu aku ngasuh kita milih entara pemadas enggau penyai, entara pengidup enggau pemati.
16 Enti kita ngasika pesan TUHAN Allah Taala kita, ti diberi aku ngagai kita sehari tu, enti kita rinduka Iya, ngasika Iya, lalu nitihka semua adat Iya, nya baru kita deka bulih pengaya lalu nyadi bansa ti kering. TUHAN Allah Taala kita deka merekatka kita di menua ti baru deka diempu kita.
17 Tang enti kita enda ngasi, lalu enggai mending, lalu dibai limpang besembahka petara bukai,
18 kita deka dirusak. Aku meri jaku tangkan tu ngagai kita diatu: kita enda panjai umur nguan menua ti di seberai Sungai Jordan din, ti baru deka diempu kita.
19 Aku diatu ngasuh kita milih entara pengidup enggau pemati, entara berekat enggau sumpah, lalu aku ngangauka langit enggau tanah nyadika saksi utai ti dipilih kita. Pilih pengidup.
20 Rinduka TUHAN Allah Taala kita. Titihka Iya, lalu tetap ati arapka Iya. Nya baru kita enggau peturun kita deka gayu-guru nguan menua ti udah disemaya deka diberi Iya ngagai aki ini kita, Abraham, Isak, enggau Jakop.”
 
Bagi 31
Josua Nganti Moses
1 Lebuh Moses udah nyebut jaku nya ngagai semua orang Israel,
2 iya lalu bejaku ngagai sida, ku iya, “Umur aku diatu nyau seratus dua puluh taun, lalu aku enda ulih nyadi tuai kita agi. Nambahka nya, TUHAN udah madahka aku enda tau meraka Sungai Jordan.
3 TUHAN Allah Taala kita deka meraka dulu ari kita, lalu ngerusak bansa orang ke diau dia, lalu kita deka ngalahka menua sida. Lalu Josua deka nyadi tuai kita, munyi ti udah disemaya TUHAN.
4 TUHAN deka ngerusak bansa orang nya, baka Iya ti ngalahka Sihon seduai Og, raja orang Amor, lalu ngerusak menua sida.
5 TUHAN deka ngasuh kita menang ngelaban sida, lalu kita enda tau enda ngereja ngagai sida nitihka pesan ti diberi aku ngagai kita.
6 Kita enda tau enda kering sereta berani. Anang takutka sida. TUHAN Allah Taala kita, deka bejalai enggau kita. Iya enda ngasuh kita lebu ngapa, tauka ninggalka kita.”
7 Udah nya Moses ngangauka Josua, lalu bejaku enggau iya di mua semua orang Israel, “Nuan enda tau enda kering sereta berani, laban nuan deka bejalai enggau orang tu ngagai menua ti udah disemaya TUHAN ngagai aki ini sida, deka diberi Iya ngagai sida; lalu nuan deka meri menua nya ngagai sida.
8 TUHAN Empu deka bejalai dulu ari kita. Iya deka meruan enggau kita. Iya enda ngasuh kita lebu ngapa, tauka ninggalka kita. Nya alai anang takut tauka lemi semengat.”
 
Adat Dibacha Genap Taun Ti Ketujuh
9 Udah nya Moses nuliska semua Adat nya, lalu meri Adat nya ngagai bala imam Lewi ke ngesan Peti Lampang Batu Adat TUHAN, enggau ngagai bala tuai orang Israel.
10 Ku Moses bejaku enggau sida, “Ba genap ujung taun ti ketujuh, lebuh gawai belangkau,
11 lebuh semua orang Israel datai nyembah TUHAN Allah Taala kita ba siti endur ti deka dipilih Iya, bacha Adat tu enggau nyawa ti inggar ngagai orang Israel.
12 Gempuruka semua lelaki, indu, nembiak, enggau orang kampar ti diau dalam nengeri kita, ngambika semua sida ulih ninga Adat nya dibacha, lalu belajar nangika TUHAN Allah Taala kita, sereta tetap ati ngasika Adat nya.
13 Nya meh jalai peturun kita, ti enda nemu Adat nya, ulih ninga lalu belajar nangika TUHAN Allah Taala kita seumur idup di menua ti baru deka diempu kita di seberai Sungai Jordan.”
 
Moses Seduai Josua Nerima Atur TUHAN
14 Udah nya TUHAN bejaku ngagai Moses, “Nuan enda lama agi idup. Kangauka Josua, lalu bai iya ngagai Langkau Kain TUHAN, ngambika Aku meri iya pengawa.” Moses seduai Josua lalu mansang ngagai Langkau Kain TUHAN.
15 TUHAN lalu pegari di mua seduai iya dalam gentilang remang ti bediri ngimbai pintu Langkau Kain nya.
16 TUHAN lalu bejaku ngagai Moses, “Enda lama da agi nuan deka mati. Orang tu deka nyembah petara orang bansa bukai di menua ti deka digagai sida. Sida deka ninggalka Aku, ngelanggar sempekat ti udah digaga Aku enggau sida.
17 Aku deka ringat ngagai sida lebuh maya nya ila. Aku deka ninggalka sida, lalu ngelalaika mua Aku ari sida; sida deka mudah dialahka munsuh, lalu mayuh macham penusah ti besai deka ninggang sida. Lebuh maya nya ila sida deka nyebut, ‘Penusah tu ninggang kitai, laban TUHAN nadai enggau kitai, ukai enda?’
18 Lebuh maya nya ila, Aku deka ngelalaika mua Aku ari sida ketegal semua penyai ti dikereja sida laban sida nguingka diri ngagai petara bukai.
19 Nya alai, tuliska lagu tu, lalu ajar iya ngagai orang Israel; simpan lagu tu ngagai mulut sida, ngambika lagu tu nyadika saksi kena ngelaban sida.
20 Laban lebuh Aku udah mai sida ngagai menua ti kaya sereta ami nya, munyi ti udah disemaya Aku ngagai aki ini sida, lalu sida udah kenyang lalu gemu, sida deka nguing lalu nyembah petara bukai, lalu ngeleseka Aku, sereta ngelanggar sempekat Aku.
21 Lalu lebuh mayuh penusah ti besai ninggang sida, lagu tu deka nyadika saksi kena ngelaban sida, laban lagu tu deka mengkang dalam mulut peturun sida. Indah diatu deh Aku nemu utai ti deka dikereja sida, sebedau Aku mai sida ngagai menua ti udah disemaya Aku ngena sumpah, ti deka diberi Aku ngagai sida.”
22 Sehari nya Moses lalu nuliska leka lagu nya, lalu ngajar lagu nya ngagai orang Israel.
23 Udah nya TUHAN lalu meri Josua anak Nun pengawa, lalu bejaku, “Nuan enda tau enda kering sereta berani; laban nuan deka mai orang Israel mansang ngagai menua ti udah disemaya Aku ngagai sida; Aku deka meruan enggau nuan.”
24 Lebuh Moses udah tembu nuliska Adat Allah Taala dalam siti bup nyentuk ke ujung,
25 Moses lalu bejaku ngagai orang Lewi ke ngesan Peti Lampang Batu Adat TUHAN,
26 ku iya, “Bai Bup Adat tu, lalu engkahka iya ngimbai Peti Lampang Batu Adat TUHAN Allah Taala kita; awakka bup nya meruan dia nyadika saksi kena ngelaban kita.
27 Laban aku nemu kita seruran deka ngelaban, lalu aku nemu kita endang kieh. Enti kita seruran deka ngelaban TUHAN lebuh aku agi idup begulai enggau kita, baka ni ku gaya kita lebuh aku udah mati!
28 Gempuruka semua tuai raban bansa kita, enggau bala pemesai kita di mua aku, ngambika aku ulih madahka jaku tu ngagai sida, lalu ngangauka langit enggau tanah nyadika saksi kena ngelaban sida.
29 Laban aku nemu, lebuh aku udah mati, kita deka ngereja penyai, limpang ari pesan ti udah diberi aku ngagai kita. Jemah ila penusah ti besai deka ninggang kita, laban kita deka ngereja penyai di mua TUHAN, nyungkak Iya ringat ngena utai ti digaga jari kita.”
 
Lagu Moses
30 Udah nya Moses lalu nyebut semua leka lagu nya, nyentuk ke ujung, lalu semua orang Israel bela mendingka iya:
 
Bagi 32
1 “Pendingka aku, langit, laban aku deka bejaku; awakka tanah ninga jaku ti disebut aku.
2 Awakka jaku ajar aku labuh baka ujan, awakka jaku aku nurun baka ambun, baka ai ujan ti beberis ninggang rumput, baka ujan ti lebat ninggang rumput ti baru udah tumbuh.
3 Laban aku deka muji nama TUHAN, lalu bala nembiak Iya deka madahka pemesai kuasa Iya.
4 “TUHAN nya meh penyaga kita ke kering, lalu semua jalai Iya endang lurus magang. Allah Taala ti tetap ati, enda nipu. Iya ngereja utai ti ngena sereta lurus.
5 Tang bala anak Iya ti jai, udah bulaka Iya, bansa ti bedosa, ti penipu.
6 Kati nya jalai kita malas pemanah TUHAN, O kita ke beli, ke nadai nemu utai? Kati Iya ukai Apai kita, ti udah ngaga kita, ti udah nirika kita nyadi siti bansa?
7 “Kingatka utai ti udah nyadi kelia menya; tanyaka ngagai apai kita, lalu iya deka madahka ngagai kita; tanyaka ngagai bala tuai bansa kita, lalu sida deka nusui ngagai kita.
8 Lebuh Iya ti Pemadu Tinggi udah meri menua ngagai genap bengkah bansa, lebuh Iya magi bansa mensia, Iya ngeletak garis entara menua ke siti-siti bansa nitihka pemayuh petara sida;
9 Tang TUHAN milih peturun Jakop ke Iya Empu.
10 “Iya tetemuka sida segau-segau di menua puang, menua puang ti balat dipuputka ribut. Iya ngelindung sida, ngibun sida, nyaga sida laban Iya balat rinduka sida.
11 Baka menaul ti ngajar anak iya terebai, lalu terebai enda mindah ari atas sida; Iya ngerembaika sayap iya, lalu mai sida ke atas, lalu nyambut sida ngena belakang iya.
12 TUHAN siku aja ke nguluka bala nembiak Iya; nadai petara orang bansa bukai nulung Iya.
13 “Iya ngasuh sida merintah di menua ti bebukit, lalu nupi sida ngena utai ti tumbuh ba umai; Iya nupi sida ngena ai manyi ari sebelah selikap batu, ngena minyak ari kayu kana ti tumbuh galak ba tanah ti bebatu.
14 Iya nupi sida ngena ai tusu sapi ti meku, enggau ngena ai tusu kambin, ngena lemak anak domba enggau lemak bedus ti lelaki; Iya nupi sida ngena sapi ti lelaki enggau kambin ari Basan, ngena gandum ti pemadu alus, enggau ngena wain ti pemadu manah ari kebun anggur sida.
15 “Bala nembiak TUHAN nyadi kaya-raja, tang sida seruran deka ngelaban. Sida gemu, gentung perut, seruran kenyang. Sida ninggalka Allah Taala ti udah ngaga sida lalu nulak Penebus sida ke kering.
16 Pengawa sida ke besembahka engkeramba, nyungkak TUHAN ninding. TUHAN ringat ketegal engkeramba sida.
17 Sida ngenjuk piring ngagai antu, ukai ngagai Allah Taala, ngagai bala petara ti nadai kala ditemu sida,
bala petara ti baru, ti nadai kala dikenangika aki ini sida.
18 Sida enda agi ingatka Allah Taala sida, Penebus sida ke kering, ti udah meri sida pengidup.
19 Lebuh TUHAN meda nya, Iya ringat lalu nulak bala anak lelaki enggau bala anak indu Iya.
20 Ku Iya bejaku, ‘Aku deka ngelalaika mua Aku ari sida. Aku deka meda pengujung sida, laban orang tu jai, sereta enda tetap ati.
21 Sida udah nyungkak Aku chemburulaban sida nyembah utai ti ukai petara, nyungkak Aku ringat ketegal engkeramba sida. Nya alai Aku deka ngasuh sida ringat ngena siti bansa. Aku deka ngasuh sida chemburu ngena siti bansa ti beli.
22 Pengeringat Aku deka mau baka api lalu nunu semua utai di dunya tu, nyentuk ngagai dunya ti di baruh ?lalu nganguska pugu bukit.
23 “ ‘Aku deka ngasuh sida betangkan-tangkan ditinggang penusah ti besai, lalu nimbakka semua panah Aku ngelaban sida.
24 Sida deka mati lapar, sereta mati laban penyakit chelap-angat, enggau laban penyakit ti balat. Aku deka ngirumka jelu babas ngelaban sida, sereta ngasuh ular ti bisa mantuk sida.
25 Ba sebelah jalai raya, pedang deka mantap lalu munuh sida, lalu dalam rumah, orang ke bujang enggau orang ke dara, anak mit enggau orang ke tuai deka mati laban kelalu balat takut.
26 Aku bisi ati deka ngachirka sida, ngambika orang nadai agi ingatka sida;
27 Tang Aku enggai ke munsuh sida temegah, enggai ke munsuh sida salah sangka lalu nyebut, ‘Kitai menang; TUHAN Empu ti ngereja semua nya.’
28 “Israel nya bansa ti enda nemu berunding. Sida enda mereti.
29 Enti sida nya orang ke bepenemu-dalam, sida ulih meretika tu; sida tentu nemu namaka penyadi sida.
30 Baka ni ku siku munsuh ulih ngalahka seribu iku, lalu dua iku munsuh ulih ngalahka sepuluh ribu iku, enti TUHAN Allah Taala sida nadai udah nyual sida ngagai munsuh, enti TUHAN nadai udah ngelengkaka sida?
31 Petara sida enda baka Allah Taala kitai; Munsuh kitai beli.
32 Munsuh kitai jai baka Sodom enggau Gomorah, buah anggur sida bisi rachun, tangkai anggur sida pait;
33 wain sida digaga ari rachun ular.
34 Ku TUHAN bejaku, “Utai ti deka dikereja Aku ngagai orang Israel enggau ngagai munsuh sida, sigi enda dipadahka Aku.
35 Laban maya Aku malas sereta ngukum deka datai enda lama da agi; laban maya sida deka kena laban penusah ti besai nyau semak, maya sida dirusak deka datai enggau jampat.
36 TUHAN deka sinu ati ke nembiak Iya, lalu ngumbai sida nadai penyalah, lebuh Iya meda sida nadai kuasa agi, sereta abis mati, nemuka sida nya ulun tauka ukai ulun.
37 Udah nya TUHAN deka nanya bala nembiak Iya, ‘Kini ke tunga bala petara ti kering nya ti alai kita manggaika diri,
38 ke makai lemak ari piring kita, lalu ngirup wain ti diberi nyadika genselan sida? Awakka sida datai nyaup kita diatu. Awakka sida datai lalu nyaga kita.
39 “ ‘Semina Aku aja ti Allah Taala. Kita nadai petara bukai tang semina Aku aja. Aku munuh, lalu Aku mega ngidup; Aku ngemakal, lalu Aku mega nyuman; Nadai orang ulih ngelepaska orang ari jari Aku.
40 Laban Aku tu Allah Taala ti idup belama iya, Aku ngedarka jari Aku lalu besumpah,
41 lebuh Aku ngansah pedang Aku ti bekilap, lalu nentuka atur ti lurus tu dikena; Aku deka malas munsuh Aku, lalu ngukum orang ke begedika Aku.
42 Panah Aku deka neritik darah, lalu pedang Aku deka munuh semua orang ke ngelaban Aku. Aku enda ngalau orang ke beperang ngelaban Aku; Indah orang ke bakal enggau orang tangkap deh deka dibunuh.
43 Ku Moses bejaku, “Puji meh bala nembiak TUHAN, semua kita bansa bukai. Sembah meh TUHAN, semua kita petara! Laban Iya deka bebalaska nyawa bala nembiak Iya, lalu malas semua munsuh Iya; Iya deka mayar orang ke begedika Iya, lalu nuchi menua nembiak Iya ari penyai ti datai ari dosa sida.
44 Moses seduai Josua anak Nun lalu nyebut leka lagu tu di mua semua orang Israel, ngambika sida ninga.
 
Atur Ti Penudi Diberi Moses
45 Lebuh Moses udah tembu nyebut leka lagu nya ngagai semua orang Israel,
46 iya lalu bejaku ngagai sida, “Kingatka semua leka lagu tu ti nyadika saksi kena ngelaban kita sehari tu; beri pesan nya ngagai anak kita, ngambika sida nitihka semua leka jaku ti dalam adat tu enggau ati ti tetap.
47 Jaku tu ukai jaku ngapa, tang pengidup kita; enti kita nitihka jaku tu, kita deka panjai umur nguan menua di seberai Sungai Jordan ti baru deka diempu kita.”
 
TUHAN Madahka Moses Deka Mati
48 Ba hari nya mega TUHAN bejaku ngagai Moses munyi tu:
49 “Alai nuan niki ngagai Bukit Nebo ba gerinjing Bukit Abarim di menua Moap, di seberai nengeri Jeriko, lalu tinjau menua Kanaan ti baru deka diberi Aku ngagai orang Israel.
50 Nuan deka mati ba bukit ti ditiki nuan nya, baka menyadi nuan Aron ti mati ba Bukit Hor;
51 laban seduai udah sama enda tetap ati ngagai Aku di mua orang Israel, lebuh kita ba ai Meribah, semak nengeri Kades, di menua puang Sin, laban seduai enda bebasaka pengudus Aku di mua orang Israel.
52 Taja pen nuan ulih ninjau menua nya ari jauh, tang nuan enda tau tama ngagai menua nya, menua ti diberi Aku ngagai orang Israel.”
 
Bagi 33
Moses Merekatka Raban Bansa Orang Israel
1 Tu berekat ti disebut nabi Moses ngagai orang Israel sebedau iya mati.
2 Ku iya bejaku: “TUHAN datai ari Bukit Sinai mansang nulung nembiak Iya; Iya angkat baka penumbuh mata hari lalu manchar ngagai nembiak Iya ari Edom. Lalu penampak Iya manchar ari Bukit Paran. Beribu-ribu iku melikat datai enggau Iya, lalu kilat nyelar ari jari kanan Iya.
3 TUHAN rinduka nembiak Iya lalu nyaga orang ke diempu Iya. Nya alai kitai meremi di kaki Iya lalu ngasika pesan Iya.
4-5 Lebuh semua orang Israel begempuru, Aku meri kita Adat Allah Taala, pesaka ti pemadu dikesayauka bansa kitai. Udah nya TUHAN lalu nyadi raja orang Israel.
6 Awakka raban bansa Reuben enda abis, taja pen sida enda mayuh tubuh.
7 Tu utai ti disebut iya pasal raban bansa Judah: “O TUHAN, pendingka Judah, lalu bai iya ngagai bansa iya empu; Asuh jari iya kering, lalu saup iya ngelaban munsuh iya.
8 Lalu ku iya bejakuka pasal raban bansa Lewi: “Pandangka ngagai orang Lewi peneka Nuan TUHAN ngena Urim enggau Tumim? ngagai bala nembiak Nuan ke taluk ngagai Nuan, ti udah diabas Nuan ati di Masah, ti udah ngelaban Nuan ba ai di Meribah;
9 ke madahka diri lebih agi taluk ngagai Nuan ari sida ke taluk ngagai apai indai, menyadi, tauka anak sida. Laban sida nitihka pesan Nuan, lalu tetap ati ngagai sempekat Nuan.
10 Sida ngajar Jakop atur Nuan, lalu ngajar orang Israel Adat Nuan, sida ngengkahka menyan di mua Nuan, enggau piring tunu segala ba alta Nuan.
11 O TUHAN, berekatka raban bansa tu, lalu sambut meh semua utai ti dikereja sida; Rusak semua munsuh sida, orang ke begedika sida, ngambika munsuh nya enda angkat agi.
12 Ba pasal raban bansa Benjamin, iya nyebut: “Tu meh raban bansa ti dikerinduka sereta dijaga TUHAN. Iya nyaga sida siang malam, lalu Iya diau begulai enggau sida.
13 Ba pasal raban bansa Josep, iya nyebut: “Awakka TUHAN merekatka menua sida ngena ujan enggau ngena ai ti datai ari dalam tanah;
14 ngena buah ti pemadu manah ti mansau laban mata hari, enggau ngena buah ti pemadu manah genap musin;
15 ngena asil ti pemadu manah ari bukit ti tuai, enggau ari asil ti pemadu mayuh ari munggu ti meruan belama iya;
16 ngena semua pemeri ti pemadu manah ari tanah, enggau ngena pengasih Iya ti diau ba Bukit Sinai. Awakka semua berekat nya diberi ngagai Josep, ba kening iya ti udah nyadi raja ke semua bala menyadi iya.
17 Josep kering baka sapi ti lelaki ti pengabis dulu ada, bisi tanduk baka sapi ti siga, ti dikena iya nanduk bansa bukai ngagai ujung dunya; baka nya ku utai ti dikereja bepuluh ribu iku peturun Epraim, enggau beribu iku peturun Manasi.
18 Ba pasal raban bansa Sebulun enggau raban bansa Isakar, iya nyebut: “Awakka Sebulun kaya-raja bedagang di tasik, lalu awakka pengaya Isakar nambah-menambah di menua.
19 Sida mai orang bansa bukai ngagai bukit sida lalu dia sida ngenjuk piring ti ngena. Sida bulih pengaya ari tasik enggau ari pasir ti ba tebing tasik.
20 Ba pasal raban bansa Gat, iya nyebut: “Pujika Allah Taala, ti udah ngerembaika rampa menua sida. Gat diau baka singa; iya nyarikka lengan tauka kulit pala.
21 Iya ngambi menua ti pemadu manah ke iya empu, laban nya endang ungkup ke orang ke nyadi tuai; iya nguluka bala nembiak iya, iya bejalaika atur ti lurus ari TUHAN enggau adat ti diberi TUHAN ngagai orang Israel.
22 Ba pasal raban bansa Dan, iya nyebut: “Dan tu singa ti agi biak, ti merejuk pansut ari Basan.
23 Ba pasal raban bansa Naptali, iya nyebut: “Naptali ke dikerindu sereta diberekatka TUHAN, deka bempu menua ti tunga ke barat enggau ke selatan menua kita.
24 Ba pasal raban bansa Aser, iya nyebut: “Aser diberi mayuh agi berekat ari sida menyadi ti bukai; Awakka iya mengkang lebih agi dikerinduka Allah Taala ari bala menyadi iya, lalu awakka menua iya penuh laban kayu kana.
25 Awakka nengeri iya dijaga ngena pintu besi, lalu awakka iya diau likun sepemanjai umur iya.
26 O kita orang Israel! Nadai petara ti baka Allah Taala kita, ke bejalai nengah langit mansang nyaup kita, ke bemulia bejalai nengah langit.
27 Iya ngalahka petara ti lama, nganchurka semua kuasa ti lama; Iya muru munsuh kita lebuh kita majakka pejalai kita, lalu bejaku, ‘Rusak sida!’
28 Nya alai peturun Jakop diau likun nadai utai ngachau, di menua ti penuh laban gandum enggau wain, alai ambun ti datai ari langit ngemasahka tanah.
29 O Israel! Naka meh pengelantang ati kita! Nadai orang ti baka kita, bansa ti diselamatka TUHAN ti nyadi terabai kena nyaup kita, ti nyadi pedang ti meri kita pemenang. Bala munsuh kita deka datai minta kasih ngagai kita, lalu kita deka ngindik belakang sida.
 
Bagi 34
Pemati Moses
1 Udah nya Moses angkat ari emperan menua Moap, lalu niki ngagai Bukit Nebo, ngagai tuchung Bukit Pisgah tunga ke timur nengeri Jeriko. Dia TUHAN lalu mandangka ngagai iya semua menua nya: menua Giliat nyentuk ngagai nengeri Dan di utara,
2 semua menua Naptali, menua Epraim enggau menua Manasi, menua Judah nyentuk ngagai Tasik Tengah di barat,
3 sitak selatan menua Judah, enggau emperan ti nganchau berengkah ari Soar nyentuk ngagai Jeriko, iya nya nengeri ti mayuh kayu engkerema.
4 Ku TUHAN bejaku ngagai iya, “Tu meh menua ti udah disemaya Aku ngagai Abraham, Isak enggau Jakop, ti deka diberi Aku ngagai peturun sida. Aku udah nejuka nuan meda menua nya ngena mata nuan empu, tang nuan enda tau meraka ngagai menua nya.”
5 Udah nya Moses, ti ulun TUHAN, mati dia di menua Moap, munyi ti udah dipadahka TUHAN.
6 TUHAN lalu nguburka iya ba siti lebak di menua Moap, seberai nengeri Bet-peor. Tang nyentuk ngagai sehari tu, nadai orang nemu endur alai kubur iya.
7 Umur Moses 120 taun lebuh iya mati. Iya mengkang kering baka selama, lalu mata iya agi lansik.
8 Orang Israel ngulitka iya tiga puluh hari ba emperan menua Moap. Udah nya sida badu agi ngulitka iya.
9 Josua anak Nun penuh laban penemu-dalam, laban Moses udah ngengkahka jari iya atas iya; nya alai orang Israel ngasika Josua, lalu ngereja utai ti udah dipesanka TUHAN ngagai Moses.
10 Nadai nabi udah bisi kala baka Moses di menua Israel, ke bejaku betunga mua enggau TUHAN.
11 Nadai nabi bukai bisi udah kala ngereja kereja ajih enggau kereja ti nyelai baka ke diasuh TUHAN kereja Moses kena ngelaban raja menua Ejip, ngelaban bala pemesai enggau semua menua nya.
12 Nadai nabi bukai udah ulih ngereja utai ti besai, ti balat ngenakutka ati, baka ti dikereja Moses di mua semua orang Israel.