Surat Saint Paul Ngagai Orang Di
EPESUS
 
Jaku Pemuka
Surat Saint Paul Ngagai Orang Di Epesus* terubah iya, ngenang pasal “Langgur penemu Allah Taala ti deka ngempung semua utai ti udah digaga Allah Taala di serega enggau di dunya tu, di baruh kuasa Kristus” (1.10). Surat tu mega minta semua nembiak Tuhan diau nitihka langgur Allah Taala ti deka mai semua bansa mensia nyadi setubuh dalam Kristus.

 Dalam sitak ti keterubah dalam surat ngagai orang di Epesus, Paul bejakuka pasal begempung. Iya bejakuka jalai Allah Taala milih orang nyadika nembiak Iya, pasal jalai sida diampun lalu dilepaska ari semua dosa sida, ulih Jesus Kristus ke Anak, enggau pasal utai ti disemaya Allah Taala dijamin ngena Roh Kudus. Dalam sitak ti kedua, Paul minta orang ke macha surat tu idup beserakup dalam Kristus, ngambika penyerakup nya nyadi utai ti bendar dalam pengidup sida.

 Dua tiga iti jaku sempama bisi dikena dalam surat tu, kena nunjukka penyerakup bala nembiak Tuhan. Iya nyemakaka eklisia enggau tubuh mensia, lalu Kristus nyadi pala ke tubuh nya. Iya mega nyemakaka eklisia ngagai rumah, lalu Kristus nyadi batu pemun ke rumah nya. Iya nyemakaka eklisia ngagai orang ke melaki-bini, lalu Kristus nyadika laki. Udah nya, kena Paul ngujungka jaku iya, iya ngenang pasal pengasih Kristus. Semua utai nya dibandingka magang ngagai pengerindu Kristus, enggau piring, pengampun penyalah, pengasih enggau pengudus.

Surat tu ditulis Paul dalam rumah jil, dipelabaka di Rome entara taun 61-63 A.D.
 
Ripih isi surat tu
Pun jaku (1.1-2)  
Kristus enggau eklisia (1.3-3.21)  
Pengidup ti baru dalam Kristus (4.1-6.20)
Penutup (6.21-24)
 
Bagi 1
1  Surat ari Paul, ke nyadi rasul Jesus Kristus ulih peneka Allah Taala, ngagai bala nembiak Tuhan ke diau di Epesus, ke tetap ati dalam Jesus Kristus:
2 Awakka Allah Taala ti Apai kitai enggau Tuhan Jesus Kristus meri kita berekat enggau pemaik.
 
Berekat Roh Kudus Dalam Kristus
3  Pujika Allah Taala ti Apai Jesus Kristus Tuhan kitai, ke udah merekatka kitai dalam Kristus ngena semua berekat roh di serega.
4 Laban Iya udah milih kitai dalam Kristus sebedau dunya digaga, ngambika kitai kudus, lalu nadai bepenyalah di mua Iya. Ulih pengerindu
5 Iya udah milih kitai, ulih Jesus Kristus, ngambika kitai diiru nyadi anak Iya nitihka peneka enggau juluk ati Iya.
6  Beri meh puji ngagai Allah Taala ketegal pengasih Iya ti bemulia ti udah diberi Iya pechuma ngagai kitai dalam Anak ke dikerinduka Iya.
7 Dalam Iya kitai ditebus ulih darah Iya, iya nya dosa kitai diampun, nitihka pemesai pengasih Iya
8 ti udah dituang Iya ngagai kitai ngena semua penemu-dalam enggau pemereti ati Iya.
9 Lalu Iya udah madahka ngagai kitai misteri peneka Iya, nitihka juluk ati Iya ti diletak Iya dalam Kristus,
10 ti deka dipejalaika Iya ba maya ti patut, iya nya, ngempuruka semua utai ti di serega enggau di dunya, di baruh siku kepala, iya nya Kristus.
11 Dalam Kristus kitai mega udah dipilihnitihka pelan Iya ke ngereja semua utai nitihka juluk ati enggau peneka Iya,
12 ngambika kitai, ke terubah-rubah manggaika pengadang ba Kristus, ulih idup lalu muji mulia Iya!
13 Lalu kita mega nyadi nembiak Kristus lebuh kita ninga pesan ti bendar, iya nya Berita Manah ti mai pengelepas ngagai kita, lalu lebuh kita udah arapka Iya, kita lalu ditanda ngena Roh Kudus ti udah disemaya.
14 Roh Kudus nya nyadika jamin kitai deka nerima pesaka, iya nya penebus kitai ke enggi Allah Taala. Pujika mulia Allah Taala!
 
Sampi Paul
15 Aku bisi udah ninga pasal pengarap kita ke Tuhan Jesus, enggau pasal pengerindu kita ke semua nembiak Tuhan. Nya kebuah
16 aku enda ngetu-ngetu meri terima kasih ke kita lebuh aku ngingatka kita dalam sampi aku.
17 Aku besampi minta Apai ti bemulia, Allah Taala Jesus Kristus, meri kita Roh penemu-dalam enggau pemandang ngambika kita lebih agi nemu Iya.
18 Aku mega besampi ngambika mata ati kita diberi penerang, ngambika kita nemu pengadang, laban kita udah dikangauka ngagai pengadang nya, iya nya pemayuh pesaka ti bemulia ti disedia Iya ke bala nembiak Iya,
19 enggau pemesai kuasa Iya ti nadai banding, ke kitai ti arap. Kuasa nya sebaka enggau kuasa ti besai
20 ti udah dikena Iya ngangkatka Kristus ari mati, lalu nudukka Iya muak ari kanan Iya Empu di serega,
21 jauh ari atas semua adat enggau pemerintah, kuasa, enggau perintah, enggau ari atas semua nama, ukai semina di dunya tu, tang mega di dunya ti deka datai.
22  Lalu Iya udah ngengkahka semua utai di baruh kaki Kristus, lalu udah ngeletak Iya ari atas semua utai, ke penguntung eklisia.
23 Eklisia nya tubuh Kristus, ti penuh laban semua personaliti Kristus Empu ke menuhka semua utai di semua endur.
 
Bagi 2
Ari Pemati Ngagai Pengidup
1 Kita menya mati laban penyalah enggau dosa,
2 lebuh kita agi diau nurutka sida, nitihka chara dunya, nitihka pemerintah ti merintah kuasa ti di langit, iya nya roh ti benung bekereja ba orang ke enda ngasika Allah Taala.  
3 Semua kitai suba udah idup begulai enggau sida, nurutka pengingin mensia, nurutka pengingin tubuh enggau runding mensia. Nya alai Allah Taala ringat ngagai kitai, baka Iya ke ringat ngagai semua orang bukai.  
4 Tang laban Allah Taala balat rinduka kitai, ulih pemesai pengasih Iya,
5 Iya udah ngasuh kitai idup begulai enggau Kristus, taja pen kitai udah mati dalam dosa kitai -- kita diselamatka ulih pengasih.
6 Lalu Iya ngangkatka kitai idup baru enggau Kristus, lalu ngasuh kitai duduk enggau Iya di serega dalam Jesus Kristus,
7 ngambika, dalam dunya ti deka datai, Iya ulih mandangka pemesai pengasih Iya ti nadai banding, ngena penelap ati Iya ke kitai dalam Jesus Kristus.
8 Laban kita udah diselamatka ulih pengasih, ketegal pengarap. Pengelepas nya ukai utai ti ulih kita ari pengawa kita; pengelepas nya pemeri Allah Taala,
9 ukai datai ari pengawa ti dikereja kita, ngambika kita enda ulih temegahka nya.
10 Laban kitai digaga Allah Taala, ditempa Iya dalam Jesus Kristus ngambika kitai ngereja pengawa ti manah ti udah disedia Allah Taala ke kitai nyadika jalai pengidup kitai.
 
Siku Dalam Kristus
11 Nya alai ingat: dulu suba kita orang bansa bukai, lalu orang Judah ke betutus ngumbai kita “orang ke enda betutus” (utai ti dikereja jari mensia ba tubuh mensia).
12  Ingat: dulu suba kita nadai Kristus, diseraraka ari bansa orang Israel, nadai ungkup dalam sempekat, nadai pengadang, lalu nadai Allah Taala di dunya tu.
13 Tang diatu, dalam Jesus Kristus, kita ke udah diau jauh suba, udah dibai semak, ulih darah Kristus.
14 Laban Kristus Empu nyadika pemaik kitai. Ngena tubuh Iya Empu, Iya udah ngaga orang Judah enggau orang bansa bukai nyadi siku, lalu udah ngeruntuhka dinding pemenchi ti nyeraraka kitai.
15  Iya udah muai Adat enggau semua pesan enggau atur ti dalam Adat, ngambika Iya, dalam Iya Empu, ngaga siti aja bansa kena Iya nganti dua bengkah bansa nya, lalu mai pemaik ngagai sida.
16 Iya lalu mai bansa dua bengkah nya bebaik enggau Allah Taala, dalam siti tubuh, ulih kayu regang, lalu munuh ati sida ti seruran deka bemunsuh enggau pangan diri.
17 Nya alai Kristus datai lalu madahka pemaik ngagai kita ke jauh ari Allah Taala, enggau ngagai orang Judah ke semak Iya,
18 laban ulih Kristus, kitai sama ulih datai ngagai Apai ulih siku Roh.
19 Nya alai, kita ukai temuai agi, ukai orang kampar agi, tang sama nyadi peranak enggau bala nembiak Tuhan, nyadi raban ruang bilik Allah Taala.
20 Ruang bilik nya didirika ba atas pugu ti didudukka sida rasul enggau sida nabi, lalu Jesus Kristus Empu nyadika batu pemun nya.
21 Dalam Iya semua perengka rumah nya dipejantilka lalu mansang nyadi rumah sembiang ti kudus dalam Tuhan.
22 Lalu dalam Iya kita mega didirika nyadi rumah alai Roh Allah Taala diau.
 
Bagi 3
Paul Nginjil Ngagai Orang Bansa Bukai
1 Nya kebuah aku, Paul, nyadi orang jil Jesus Kristus ke penguntung kita orang bansa bukai.
2 Kita tentu udah ninga pasal Allah Taala ke udah, ulih pengasih Iya, meri aku pengawa ke penguntung kita,
3 enggau pasal jalai misteri nya udah dipadahka ngagai aku ngena pemandang, munyi ti udah ditulis aku mimit.
4  Lebuh kita macha tu, nya baru kita meretika utai ti ditemu aku pasal misteri Kristus,
5 misteri ti nadai udah kala dipandangka ngagai bala anak mensia ba serak ti bukai, baka ti udah dipandangka Roh Kudus diatu ngagai sida rasul Iya ti kudus enggau ngagai sida nabi.
6  Misteri nya baka tu: Ulih Berita Manah, orang bansa bukai udah dibai sama enggau orang Judah bempu pesaka, nyadi raban tubuh nya, lalu sama enggau bempu utai ti udah disemaya dalam Jesus Kristus.
7 Aku nyadi ulun Berita Manah tu ari pengasih Allah Taala, pengasih ti udah diberi ngagai aku ulih kuasa Iya ti bekereja dalam aku.
8 Taja pen aku tu orang ke pemadu mit ari semua nembiak Tuhan, pengasih tu udah diberi ngagai aku, iya nya nusui ngagai orang bansa bukai pasal pemesai pengaya Kristus,
9 lalu mai semua bansa nemu misteri Iya ti dilalaika sejeman-jeman tu dalam Allah Taala ke ngaga semua utai;
10 ngambika diatu, ulih eklisia, semua penemu-dalam Allah Taala dipadahka ngagai bala pemerintah, enggau kuasa ti di langit,
11 nitihka juluk ati Iya ti meruan belama iya, ti udah dipejalaika Iya dalam Jesus Kristus Tuhan kitai.
12 Dalam Iya enggau ulih pengarap kitai ke Iya, kitai berani sereta kempang ati datai ngagai Allah Taala.
13 Nya alai aku enda nyagi kita mantul ngapa ketegal pemerinsa aku ke kita, laban nya pulai ke mulia kita.
 
Pengerindu Kristus
14 Nya meh kebuah aku besugang di mua Apai,
15 ke meri nama ngagai semua ruang bilik ti di serega enggau di dunya.
16 Aku besampi ngambika, ari pemesai pengaya Iya ti bemulia, Iya ngeringka ati kita ngena kuasa ulih Roh Iya,
17 sereta ngambika Kristus diau dalam ati kita, ulih pengarap, lebuh kita beurat sereta negapka diri dalam pengerindu.
18 Aku besampi ngambika kita, sama enggau semua nembiak Allah Taala, bisi kuasa kena nemu pemesai, pemanjai, peninggi enggau penalam
19 pengerindu Kristus ti ngelui peragam mensia, ngambika kita dipenuhka enggau semua personaliti Allah Taala.
20 Ngagai Iya ke ulih ngereja utai lebih ari ti dipinta tauka diperagam kitai, ulih kuasa ti bekereja dalam kitai,
21 awakka semua turun-menurun dalam eklisia, enggau dalam Jesus Kristus, ngemuliaka Iya belama-lama iya. Amin.
 
Bagi 4
Penyerakup Dalam Tubuh
1 Nya alai aku, ke nyadi orang jil Tuhan, bebendar minta kita diau menyana nitihka kangau Tuhan,
2 baruh ati, nelap, liat ati, sabar enggau pangan diri dalam pengerindu,
3 lalu enggau naka ulih nyaga penyerakup dalam Roh ngena pemaik ti nanggam kita semua.
4 Tubuh siti aja, lalu Roh Kudus siku aja, baka kita ke udah dikangauka ngagai siti aja pengadang,
5 siku aja Tuhan, siti aja pengarap, siti aja pemaptisa,
6 siku aja Allah Taala ti Apai semua, ke ari atas semua, ke bekereja ngena semua, dalam semua.
7 Tang genap iku kitai udah diberi pengasih nitihka pemesai ungkup ti diletak Kristus.
8 Nya kebuah Bup Kudus nyebut, “Lebuh Iya niki ke atas ngagai endur ti pemadu tinggi, Iya mai mayuh orang tangkap enggau Iya; Iya meri pemeri ngagai mensia.”
9 (Nama reti “Iya niki”? Reti nya, terubah, Iya nurun ngagai buntut dunya.
10 Iya ke nurun nya mega Iya ke niki ke atas jauh ngilah semua langit, ngambika Iya ngemenuhka semua utai enggau Iya Empu.)
11 Iya nya ke meri pemeri ngambika sekeda nyadi rasul, sekeda nyadi nabi, sekeda nyadi penginjil, sekeda nyadi gembala lalu sekeda nyadi pengajar,
12 kena nyikap  nembiak Tuhan ngereja pengawa orang Kristian, kena ngemansangka tubuh Kristus,
13 datai ke semua kitai nyau segempung magang dalam pengarap, sama sepenemu pasal Anak Allah Taala, nyadi orang ke besai tuai lalu nyadi sebaka enggau Kristus.
14 Kitai enda tau agi nyadi anak mit ke dikebu lalu ditabanka kia-kia ulih genap macham ajar ti datai ari akal mensia, enggau ulih kelakar orang ke nipu.
15  Tang kitai patut bejakuka pasal utai ti bendar dalam pengerindu, mansang dalam semua utai ngagai Iya ke nyadi kepala, iya nya Kristus,
16 ke bejantilka semua perengka tubuh, lalu nanggam sida ngena semua rakat ti diberi ngagai tubuh nya, lalu ngasuh semua perengka tubuh nya sama bekereja enggau menyana ngemansang lalu niri negika tubuh nya dalam pengerindu.
 
Pengidup Ti Lama Enggau Ti Baru
17 Nya alai, aku netap lalu nekanka tu dalam nama Tuhan: badu agi diau baka orang bansa bukai ke enda menuku runding.
18 Runding sida nyau petang, lalu sida diseraraka ari pengidup Allah Taala laban sida nadai nemu utai sereta kieh.
19 Sida nyau enda nemu malu agi, lalu udah nyerahka diri ngagai pengidup ti kamah, sereta seruran ingin deka ngereja semua macham ulah ti kamah.
20 Nya ukai utai ti dipelajarka kita pasal Kristus!
21 Laban kita tentu udah ninga lalu diajar pasal Iya, laban pemendar endang dalam Jesus.
22  Kita udah diajar muai jalai pengidup kita ti lama, ulah ti lama ti dirusak sereta ditipu pengingin pengidup nya,
23 lalu ngelakka runding enggau ati kita diubah nyadi baru,
24  lalu kita nyadi mensia ti baru, ditempa neladan gamal Allah Taala lalu nyadi amat lurus sereta kudus.
 
Atur Pengidup Ti Baru
25 Nya alai, badu agi bula! Awakka semua kitai nyebut utai ti bendar ngagai pangan diri, laban semua kitai tu raban siti tubuh.
26 Anang bedosa lebuh kita ringat. Anang ringat apus hari,
27 lalu anang meri peluang ngagai Sitan.
28 Orang ke penchuri enda tau enda badu agi ngenchuri, lalu ngereja pengawa ti menyana ngena jari iya empu, ngambika iya bisi utai dipekunsika enggau orang ke suntuk.
29 Anang mansutka jaku ti jai, tang semina nyebut jaku ti manah kena ngemansangka pengarap orang, ba maya ti patut, ngambika jaku nya meri berekat ngagai orang ke ninga.
30 Lalu anang ngenusahka ati Roh Kudus Allah Taala, ke udah dikena ngechop kita ke Hari Penebus.
31 Buai semua dengki, tebiat ngeransi, pengeringat, jaku laya, tebiat bejakuka orang, enggau semua ati ti begedi,
32  lalu nelap enggau pangan diri, siru enggau pangan diri, ngampun pangan diri, baka Allah Taala, dalam Kristus, ke udah ngampun kita.
 
Bagi 5
Diau Dalam Penampak
1 Nya alai tunda teladan Allah Taala, laban kita tu anak ke dikesayauka Iya.
2  Lalu idup dalam pengerindu, baka Kristus ke udah rinduka kitai, lalu udah nyerahka Diri ketegal kitai, nyadika genselan enggau piring ti bebau rengut, ti diberi ngagai Allah Taala.
3 Tang pengawa bambai, enggau semua ulah ti kamah, tauka pengamu enda patut nyadi ba bala kita, laban kita nembiak Tuhan.
4 Anang bejaku kamah, tauka bejaku beli, tauka enda senunuh bejaku laban utai nya enda patut; tang beri terima kasih ngagai Allah Taala.
5 Kita enda tau enda nemu tu: orang ke bambai, tauka ngereja ulah ti kamah, tauka orang ke amu (sama reti enggau nyembah engkeramba), nadai ungkup dalam Perintah Kristus, enggau dalam Perintah Allah Taala.
6 Anang nejuka orang nipu kita ngena jaku ti nadai reti, laban nya utai ti nyungkak Allah Taala ringat ngagai orang ke enda ngasika Iya.
7 Nya alai anang begulai enggau orang ke baka nya.
8 Laban dulu menya kita nya pemetang, tang diatu, dalam Tuhan, kita nyadi penampak. Nya alai, idup baka anak penampak,
9 laban penampak mansutka semua buah ti badas, ti ngena, ti bendar.
10 Uji giga utai ti ngerinduka ati Tuhan.
11 Anang enggau orang ngereja pengawa pemetang ti nadai guna, tang pansutka penyai sida.
12 Indah nyebut utai ti dikereja sida belalai deh kitai malu.
13 Tang semua utai ti diayanka penampak, deka nyata magang dipeda,
14 laban penampak ngasuh semua utai nyata magang dipeda. Nya kebuah Bup Kudus nyebut: “Dani meh kita ke tinduk! Angkat ari pemati, lalu Kristus deka manchar ngagai kita.”
15 Nya alai idup enggau bejimat, ukai baka orang ke beli, tang baka orang ke bepenemu-dalam.
16 Kena semua peluang kita enggau badas, laban hari tu jai.
17 Nya alai, anang beli, tang giga semua peneka Tuhan.
18 Anang mabuk beirupka wain, laban pengawa nya jai, tang awakka kita dipenuhka enggau Roh Kudus,
19  bejaku enggau pangan diri ngena masmur, pantun enggau lagu Roh, belagu muji Tuhan dalam ati kita,
20 seruran meri terima kasih ngagai Allah Taala ti Apai, ke semua utai dalam nama Jesus Kristus Tuhan kitai.
 
Bini Enggau Laki
21 Nunduk ngagai pangan diri, kena masa Kristus.
22 Kita ke bini, nunduk ngagai laki kita, baka ke nunduk ngagai Tuhan.
23 Laban laki nyadi kepala bini, baka Kristus ke nyadi kepala eklisia, iya nya tubuh Iya Empu, lalu Iya Empu nyadika Juruselamat ke eklisia nya.
24 Baka eklisia ke nunduk ngagai Kristus, baka nya mega bini patut nunduk ngagai laki dalam semua utai.
25 Kita ke laki, rinduka bini kita, baka Kristus ke rinduka eklisia, lalu nyerahka Diri Empu ke eklisia,
26 ngambika nguduska eklisia, lebuh Iya udah nuchi eklisia nya ngena ai enggau ulih jaku Iya,
27 lalu nyerahka eklisia nya enggau semua pemadas iya ngagai Iya Empu, nadai bepetik, enda ngeriut, tauka utai ti baka nya, ngambika eklisia nya kudus sereta nadai penimpang.
28 Baka nya meh laki patut rinduka bini diri, baka iya ke rinduka tubuh diri empu. Laki ke rinduka bini diri, rinduka diri empu.
29 Laban nadai orang kala begedika tubuh diri, tang iya nupi sereta bejimat ngintu tubuh nya, baka ti dikereja Kristus ke eklisia,
30 laban kitai tu raban tubuh Iya.
31 “Nya kebuah lelaki ninggalka apai indai iya, lalu jadi enggau bini iya, lalu seduai iya nyadi setubuh enggau pangan diri.”
32 Tu misteri ti besai kena aku mandingka Kristus enggau eklisia.
33 Tang genap iku kita patut rinduka bini diri, baka kita ke rinduka diri empu, lalu bini patut masa laki.
 
Bagi 6
Anak Enggau Apai Indai
1 Kita ke anak, ngasika apai indai kita dalam Tuhan, laban utai nya ngena.
2 “Bebasaka apai enggau indai nuan” - nya terubah-rubah pesan ti disempulang enggau semaya:
3 “ngambika nuan mujur, sereta panjai umur nguan menua.”
4 Lalu kita ke apai, anang ngereja utai ti tau ngemediska ati anak kita, tang iring sida nyadi orang ke besai tuai dalam disiplin enggau ajar Tuhan.
 
Ulun Enggau Tuan Sida
5 Kita ke ulun, ngasika tuan kita enggau ati ti nangi sereta bejimat, enda belampung ati, baka ke ngasika Kristus;
6 ukai semina lebuh sida meda kita, ketegal kita deka minta diri dipuji sida, tang laban kita ulun Kristus ke ngereja peneka Allah Taala enggau pengabis ati kita.
7 Kereja pengawa kita enggau ati ti ransing, baka ke ngereja pengawa ke Tuhan, ukai baka ke ngereja pengawa ke mensia,
8 laban kita nemu, Tuhan deka ngupah genap iku kitai ketegal kereja ti manah ti dikereja kitai, nemuka kitai nya ulun tauka ukai ulun.
9 Lalu kita ke bempu ulun, kereja baka nya mega ngagai ulun kita. Badu agi ngemba sida, laban kita nemu, kita enggau sida sama besaumka siku aja Tuan di serega, lalu Iya enda bepilih mata.
 
Semua Senyata Allah Taala
10 Ke pengujung iya, keringka diri dalam Tuhan, ngena pengering kuasa Iya.
11 Rasukka semua senyata Allah Taala, ngambika kita ulih ngelaban akal Sitan.
12 Laban kitai ukai beperang ngelaban isi enggau darah, tang ngelaban bala pemerintah, ngelaban perintah, ngelaban kuasa dunya ti petang tu, enggau ngelaban kuasa roh ti jai di langit.
13 Nya alai, rasukka semua senyata Allah Taala, ngambika kita tan lebuh hari ti jai nya datai, lalu lebuh kita udah ngereja semua utai, kita deka mengkang bediri tegap.
14 Nya alai bediri kita, lalu tanchangka pemendar nyadika belulang ba punggung kita, enggau pengelurus nyadika terabai dada kita,
15  enggau ati ti seruran sedia deka nusui Berita Manah pasal pemaik, nyadika kasut kita.
16 Nambahka nya, ambi pengarap nyadika terabai kena kita madamka semua laja ti beapi-api ti ditimbakka Sitan.
17 Lalu ambi pengelepas nyadika selapuk kebal kita, enggau jaku Allah Taala nyadika pedang Roh.
18 Besampi dalam Roh tiap kali kita besampi, ngena semua macham sampi enggau peminta. Nya alai seruran bejaga lalu majak besampika semua nembiak Tuhan.
19 Besampi mega ke aku ngambika lebuh aku bejaku, leka jaku diberi ngagai aku lebuh aku, enggau ati ti berani, madahka misteri Berita Manah,
20 laban aku nyadi pengari ke Berita Manah nya, taja pen aku kena jil ketegal Berita Manah nya. Besampi ke aku, ngambika aku berani nusui Berita Manah nya, laban aku enda tau enda nusui Berita Manah nya.
 
Jaku Tabi Ti Penudi
21  Menyadi kitai Taikikus, ke tetap ati nyadi ulun Tuhan, deka madahka semua utai ngagai kita, ngambika kita nemu pasal aku, enggau pasal utai ti dikereja aku.
22 Aku ngasuh iya nemuai ngagai kita ketegal tuju tu aja, ngambika kita nemu gaya pendiau kami, sereta meransang kita.
23 Awakka Allah Taala ti Apai, enggau Tuhan Jesus Kristus meri pemaik, pengerindu enggau pengarap ngagai semua orang Kristian.
24 Awakka berekat Allah Taala meruan enggau semua orang ke enda badu rinduka Tuhan Jesus Kristus.