Surat Ti Kedua Ari Saint Paul
Ngagai Orang Di
KORINT
 
Jaku Pemuka
Surat Ti Kedua Ari Saint Paul Ngagai Orang Di Korint* ditulis iya lebuh kaul iya enggau raban eklisia di Korint enda berapa rapat. Sekeda raban eklisia balat mantah Paul, tang iya ngayanka diri bisi amat ati deka bebaik, lalu iya madahka diri deka gaga ati lebuh sida udah bebaik enggau iya.

Dalam pun surat iya, Paul ngenang pasal kaul iya enggau eklisia di Korint, nerangka kebuah iya ti udah terit ngelaban orang ke mechat iya, sereta ngelaban orang ke ngelanggar atur dalam eklisia, lalu iya madahka diri gaga ati ke sida ke udah nesal ati ketegal jaku ti terit nya, lalu bebaik enggau pangan diri. Udah nya iya lalu minta raban eklisia meri duit tulung, ngena ati ti gerah mudah, ngagai orang Kristian ke suntuk di Judea. Ba pengujung surat iya, Paul bejaku ngarika diri empu ke nyadi rasul, ngelaban dua tiga iku orang di Korint, ti udah ngumbai diri empu rasul ti bendar, lalu ngumbai Paul rasul ti pelesu.

Surat tu ditulis Paul kira dalam taun 50 A.D.
 
Ripih isi surat tu
Pun jaku (1.1-11)
Paul enggau eklisia di Korint (1.12-7.16)
Pemeri ke orang Kristian di Judea (8.1-9.15)
Paul bejaku ngarika diri empu pasal kuasa ti dikena iya nyadi rasul (10.1-13.10)
Jaku penutup (13.11-13)
 
Bagi 1
1 Surat ari Paul, rasul Jesus Kristus ulih peneka Allah Taala, enggau ari menyadi kitai Timoti, Ditujuka ngagai eklisia Allah Taala di Korint, nyengkaum semua nembiak Tuhan di serata menua Akaia.
2  Awakka Allah Taala ti Apai kitai enggau Tuhan Jesus Kristus meri kita berekat enggau pemaik.
 
Paul Meri Terima Kasih Ngagai Allah Taala
3 Pujika Allah Taala ti Apai Jesus Kristus Tuhan kitai, Apai ti pun semua pengasih, Allah Taala ti pun semua pengelantang,
4 ke merindang kami lebuh kami dituntung semua macham penusah, ngambika kami ulih merindang orang bukai ke dituntung penusah, ngena tulung ti udah dikena Allah Taala merindang kami.
5 Laban lebuh kami natka semua pemerinsa Kristus, kami balat diperindang Kristus.
6 Enti kami diperinsa, nya ke pengelantang enggau pengelepas kita, lalu enti kami ditulung, nya ke pengelantang kita, ti diasaika kita lebuh kita, enggau ati ti liat, natka pemerinsa baka ti ditatka kami.
7 Pengandal kami ke kita endang enda beguyat, laban kami nemu, enti kita natka pemerinsa baka ti ditatka kami, kita deka mega diperindang baka kami.
8 Kami enggai ke kita enda nemu, menyadi, pasal penusah ti ditatka kami di Asia, laban kami amat balat merinsa datai ke kami nyau asai ke deka mati.
9 Iya ti bendar, kami asai ke kena ukum bunuh, datai ke kami nyau enda manggaika diri ba pengering kami empu agi, tang ba Allah Taala ke ngangkatka orang ari mati.
10 Iya udah ngelepaska kami ari penusah ti tau ngambi nyawa, lalu Iya deka majak ngelepaska kami. Kami sigi arapka Iya deka ngelepaska kami baru,
11 lebuh kita nyaup kami ngena sampi kita, ngambika mayuh orang deka meri terima kasih ngarika kami ketegal berekat ti udah diberi ngagai kami ari sampi mayuh orang.
 
Paul Ngubah Pelan Diri
12 Tu utai ti dikemegahka kami: ati kami ti beresi udah besaksi madahka kami udah idup di dunya tu, kelebih agi dalam kaul kami enggau kita, dalam pengudus sereta enggau ati ti betul ari Allah Taala. Kami udah ngereja nya ukai ngena penemu-dalam ti datai ari dunya, tang nitihka pengasih Allah Taala.
13 Laban kami ukai nuliska utai ti enda ulih dibacha tauka enda ditemu kita. Lalu aku ngarapka,
14 baka kita ke udah mereti mimit pasal kami, kita deka meretika kami enggau penuh, ngambika kita ulih temegahka kami baka kami ke temegahka kita lebuh Hari Tuhan Jesus.
15 Laban aku endang ngarapka tu, nya kebuah aku merambu diri nemuai ngagai kita dulu, ngambika kita lantang dua kali lipat;
16 Aku merambu diri nemuai ngagai kita lebuh aku mansang ngagai menua Masedonia, lalu nemuai baru ngagai kita lebuh aku pulai ari Masedonia, lalu ngasuh kita nulung aku mulaika diri ngagai menua Judea.
17 Lebuh aku merambu utai nya, kati runding aku kalik-kalik? Tauka aku merambu semua utai nya ngena chara mensia, ngambika aku nyebut “Au, au” lalu tekala nya nyebut “Enggai, enggai”?
18 Laban Allah Taala endang tau dikarapka, nya alai pesan kami ngagai kita ukai “Au” enggau “Enggai.”
19  Laban Anak Allah Taala, Jesus Kristus, ke udah ditusui Silas,  Timoti enggau aku empu ngagai kita, ukai “Au,” enggau “Enggai,” tang dalam Iya semua utai endang seruran “Au” belama.
20  Laban dalam Iya semua semaya Allah Taala endang “Au” magang. Nya kebuah kitai nyebut “Amin” dalam nama Iya, kena kitai ngemuliaka Allah Taala.
21 Tang Allah Taala Empu udah ngasuh kami begempung enggau kita dalam Kristus, lalu udah nata kitai,
22 lebuh Iya udah ngelai kitai tu endang enggi Iya lalu meri Roh Iya ke dalam ati kitai kena nyamin utai ti deka datai.
23 Aku ngangauka Allah Taala nyadika saksi aku: Aku enda nemuai baru ngagai kita di Korint, laban aku enggai ngenusahka ati kita.
24 Ukai reti nya kami merintah pengarap kita, tang bekereja enggau kita ke pengaga kita, laban kita bediri tegap ulih pengarap kita.
 
Bagi 2
1 Nya alai aku mutuska runding enggai nemuai ngagai kita baru, enggai ke aku ngenusahka ati kita.
2 Laban enti aku ngenusahka ati kita, sapa deh tau dikarapka aku ngasuh ati aku gaga, kelimpah ari orang ke udah tusah ati laban aku?
3 Aku nulis baka nya suba, ngambika lebuh aku datai, aku enda tusah ati laban orang ke patut ngasuh ati aku gaga, laban aku sigi arapka semua kita deka sama gaga ati enggau aku.
4 Laban aku nulis ngagai kita enggau ati ti balat tusah sereta bekeberai ai mata, ukai deka ngenusahka ati kita, tang ngambika kita nemu pemesai pengerindu aku ke kita.
 
Ampun Orang Ke Udah Salah Nya
5 Enti orang bisi udah ngenusahka ati orang bukai, iya ukai ngenusahka ati aku, tang ngenusahka ati semua kita, abis kurang iya, enggai ke jaku aku kelalu kasar.
6 Ukum ti diletak bala mayuh ngagai orang nya, udah chukup ke iya.
7 Nya alai diatu, kita patut ngampun sereta merindang iya, enggai ke iya enda ulih natka penusah ati diri.
8 Nya alai aku minta kita madah ngagai iya baru pengerindu kita ke iya.
9 Aku nulis surat nya suba kena aku ngabas ati kita, enti kita tan diuji lalu ngasi dalam semua utai.
10 Barang sapa diampun kita, mega diampun aku. Orang ke udah diampun aku, enti aku udah ngampun orang, udah diampun aku di mua Kristus, ke penguntung kita.
11 Lalu kitai ngereja nya ngambika kitai enda ulih ditipu Sitan; laban kitai ukai enda nemu pelan iya.
 
Pengirau Ati Paul Lebuh Iya Di Troas
12 Lebuh aku datai di Troas nusui Berita Manah pasal Kristus, Tuhan udah muka pintu ke aku.
13 Tang aku seruran enda nyamai ati, laban aku nadai tetemuka menyadi kitai Titus dia. Nya alai aku lalu meri selamat tinggal ngagai sida, lalu mupuk ngagai Masedonia.
 
Pemenang Ulih Kristus
14 Tang aku meri terima kasih ngagai Allah Taala, laban Iya seruran nguluka kami menang dalam Kristus, lalu bejaku ngena kami ngerembaika penemu pasal Kristus baka bau rengut ti nyelamar ngagai semua endur.
15 Laban ba Allah Taala kami tu bau rengut Kristus ke orang ti benung diselamatka, enggau ke orang ti tesat.
16 Ba orang ke tesat, kami tu bau but pemati, tang ba orang ke benung diselamatka, kami tu bau rengut pengidup. Sapa ulih ngereja pengawa nya?
17 Laban kami ukai bejualka jaku Allah Taala baka mayuh orang bukai,tang dalam Kristus kami bejaku enggau ati ti beresi di mua Allah Taala, baka orang ke dikirumka Allah Taala.
 
Bagi 3
Nyadi Ulun Ke Sempekat Ti Baru
1 Kati kami munyi ke muji diri baru? Kati kami begunaka surat puji ngagai kita tauka ari kita baka orang bukai?
2 Kita empu ke nyadi surat kami, ke ditulis ba ati kami, ngambika bisi ditemu sereta dibacha semua orang.
3  Kita empu ke ngayanka diri endang amat surat Kristus, ti udah disediaka kami, ukai ditulis ngena ai dawat tang ngena Roh Kudus Allah Taala ti idup, ukai ditulis ba papak batu, tang ba ati mensia.
4 Nya meh pemesai pengarap kami ke Allah Taala, ulih Kristus.
5 Ukai reti nya kami ngumbai diri landik ngereja pengawa tu ngatika diri; pengelandik nya datai ari Allah Taala,
6 ke udah meri kami pengelandik bekereja ke sempekat ti baru, ukai bekereja ke adat ti ditulis, tang bekereja ke Roh Kudus, laban adat ti ditulis, munuh, tang Roh Kudus meri pengidup.
7  Enti Adat ti mai pemati, ti ditulis ba lampang batu, pegari ngena mulia ti ngemalat nya, datai ke orang Israel nyau enda ulih merening ngagai mua Moses, empa pemalat penampak mulia nya, taja pen mulia nya majak ayas-seayas,
8 enda ka pengawa Roh Kudus deka lebih agi bemulia ari nya?
9 Laban enti pengawa ti meri ukum bisi mulia, tentu besai agi ga mulia pengawa ti mai pengelurus!
10 Laban utai ti bemulia suba nyau nadai agi bemulia diatu enti dibandingka enggau mulia ti lebih besai agi ari nya.
11 Lalu enti utai ti tau lesap pegari ngena mulia, tentu besai agi ga mulia utai ti tan belama iya!
12 Nya alai laban kami bisi pengadang tu, kami amat berani.
13 Kami enda baka Moses, ke mampul mua diri ngena kain ngambika orang Israel enda meda penampak mulia nya majak ayas-seayas.
14 Tang runding sida udah tumpul, laban nyentuk ngagai sehari tu, tambai mua sida agi mengkang lebuh sempekat lama dibacha. Tambai mua nya apin dibuai, laban semina Kristus aja ulih muai tambai nya.
15 Indah nyentuk ngagai sehari tu, genap kali Adat Moses dibacha, deh runding sida agi mengkang dipampul kain tambai;
16  tang lebuh orang nguingka diri ngagai Tuhan, kain tambai nya dibuai.
17 Tuhan endang Roh, lalu dia alai Roh Tuhan, dia meh pengelepas.
18 Lalu semua kitai, enggau mua ti enda dipampul sereta ngayanka mulia Tuhan, deka diubah nyadi sebaka gamal enggau Iya, enggau mulia ti nambah- menambah, laban mulia nya datai ari Tuhan ke endang Roh.
 
Bagi 4
Pengaya Roh Disimpan Dalam Periuk Tanah
1 Nya alai laban kami udah diberi pengawa tu ulih pengasih Allah Taala, kami enda mantul.
2 Kami udah ngelengkaka semua utai ti dipelalaika ti tau ngasuh malu; kami enggai nipu orang, tauka nyarutka jaku Allah Taala, tang madahka utai ti bendar enggau terang di mua Allah Taala ngambika genap iku orang, ngena pengasai ati sida siku-siku, nemu kami endang madahka utai ti bendar.
3 Lalu enti sema Berita Manah nya dipampul, iya semina dipampul ari orang ke tesat.
4 Ba pekara nya, petara dunya udah mampul runding orang ke enda arap, kena nagang sida meda penampak Berita Manah pasal mulia Kristus, ke sebaka gamal enggau Allah Taala.
5 Laban kami ukai nusui pasal kami empu, tang pasal Jesus Kristus ti Tuhan, lalu kami empu nyadi ulun kita, ketegal Jesus.
6 Laban Allah Taala, ke nyebut, “Awakka penampak manchar ari pemetang,” udah manchar dalam ati kitai, ngambika kita nemu, mulia Iya ulih dipeda ba mua Jesus Kristus.
7 Tang reta roh nya disimpan dalam periuk tanah kena nunjukka kuasa ti besai nya datai ari Allah Taala, ukai datai ari kami.
8 Kami dituntung semua macham penusah, tang kami enda alah; beba runding tang enda kelalu tusah;
9 kena perinsa, tang enda ditinggalka; dipalu, tang enda rusak;
10 seruran mai pemati Jesus dalam tubuh kami, ngambika pengidup Jesus mega diayanka ba tubuh kami.
11 Laban lebuh kami idup, kami endang seruran napi pemati ketegal Jesus, ngambika pengidup Jesus diayanka ba tubuh kami ke tau mati tu.
12 Nya alai pemati bekereja dalam kami, tang pengidup bekereja dalam kita.
13 Tang kami bisi roh pengarap baka ti ditulis dalam Bup Kudus, “Aku arap, nya alai aku bejaku.” Kami mega arap, nya alai kami bejaku,
14 laban kami nemu, Iya ke udah ngangkatka Tuhan Jesus ari mati, deka mega ngangkatka kami ari mati sama enggau Jesus, lalu deka mai kami sama enggau kita, ngagai mua Iya Empu.
15 Semua utai tu ke penguntung kita, ngambika pengasih ti ngelekai ngagai mayuh agi orang, ngasuh mayuh agi  orang meri sampi terima kasih, kena ngemuliaka Allah Taala.
 
Idup Ngena Pengarap
16 Nya alai kami enda mantul. Taja pen tubuh kami majak lemi, tang roh kami digaga nyadi baru tiap hari.
17 Laban penusah ti mit sereta enda lama tu nyendiaka kami nerima mulia ti meruan belama iya, ti nadai banding,
18 laban kami ukai merening ngagai utai ti ulih dipeda, tang ngagai utai ti enda ulih dipeda; laban utai ti ulih dipeda semina tan enda lama, tang utai ti enda ulih dipeda, tan belama iya.
 
Bagi 5
1 Laban kami nemu, enti langkau kain ti alai kitai diau tu dirubuh, kitai bisi rumah ari Allah Taala, rumah ti meruan belama iya, ti ukai digaga jari mensia.
2 Laban dalam langkau kain tu kitai bedemuh minta rumah ti di serega dirasukka ba kitai,
3 ngambika lebuh rumah nya dirasukka ba kitai, kitai enda agi telanjai.
4 Laban seagi-agi kitai diau dalam langkau kain tu, kitai bedemuh mai ma ti berat laban kitai enggai dilepaska ari tubuh tu, tang laban kitai keran dekaka tubuh serega dirasukka ba kitai, ngambika tubuh ti nemu mati tu ditelan pengidup.
5 Allah Taala Empu ke udah nyendiaka kitai ke nya, lalu Iya udah meri kitai Roh Kudus nyadika jamin.
6 Nya kebuah kami seruran kempang ati, lalu kami nemu, seagi-agi kami diau dalam tubuh tu, kami jauh ari Tuhan,
7 laban kami idup ngena pengarap, ukai ngena utai ti dipeda.
8 Kami sigi amat kempang ati lalu keran deka ninggalka tubuh tu, lalu diau begulai enggau Tuhan.
9 Nya alai, tuju ati kami endang seruran deka ngelantangka ati Iya, nemuka kami diau dalam tubuh tu tauka ninggalka tubuh tu.
10 Laban semua kitai enda tau enda bediri di mua Kristus lalu diakim ulih Iya, ngambika genap iku kitai nerima upah, nitihka utai ti udah dikereja kitai siku-siku ngena tubuh tu, nemuka utai nya manah tauka jai.
 
Bebaik Enggau Allah Taala Ulih Kristus
11 Nya alai, laban kami nemu reti nangika Tuhan, kami nguji ngumbuk orang bukai. Tang Allah Taala ngelala sapa kami tu, lalu aku mega ngarapka kita ngelala sapa kami tu dalam ati kita.
12 Kami ukai muji diri baru di mua kita, tang meri kita peluang temegahka kami, ngambika kita ulih nyaut orang ke temegahka utai ti dipeda ba mensia lalu ukai temegahka utai ti dalam ati mensia.
13 Enti kami gila, kami gila ke Allah Taala. Enti kami enda gila, nya ke penguntung kita.
14 Laban pengerindu Kristus mejalka kami, laban kami nemu, siku orang udah mati ngarika semua mensia, nya alai, semua mensia bela udah mati magang.
15 Lalu Iya mati ke semua mensia, ngambika orang ke idup ukai idup ke diri empu agi, tang idup ke Iya ke udah mati lalu diangkatka idup baru ngarika sida.
16 Nya alai, belabuh ari diatu, kami enda agi ngira orang ngena chara dunya. Taja pen kami dulu suba udah ngira Kristus ngena chara dunya, tang kami diatu enda agi ngira Iya ngena chara nya.
17 Nya alai, enti orang nya dalam Kristus, iya nyadi mensia ti baru. Iya ke lama nadai agi, iya ke baru, udah datai!
18  Semua utai tu datai ari Allah Taala magang, ke udah mai kitai bebaik enggau Iya Empu, ulih Kristus, lalu udah meri kitai pengawa mai semua mensia bebaik enggau Iya.
19 Reti nya, dalam Kristus, Allah Taala udah mai semua dunya bebaik enggau Iya Empu,enda ngitung penyalah sida, lalu ngasuh kami nusui pesan pemaik tu.
20 Nya alai, kami nyadika pengari Kristus, laban Allah Taala bejaku ngena kami. Kami bebendar ngarika Kristus ngumbuk kita, mai kita bebaik enggau Allah Taala.
21 Ketegal kitai meh Allah Taala udah ngengkahka dosa kitai ba Iya ke enda bedosa, ngambika dalam Iya kitai digaga lurus di mua Allah Taala.
 
Bagi 6
1 Nya alai, laban kami sama bekereja enggau Allah Taala,  kami mega bebendar ngumbuk kita, anang masau pengasih Allah Taala.
2 Laban Allah Taala bisi nyebut: “Ba maya ti patut, Aku udah mendingka nuan, lalu lebuh hari pengelepas Aku udah nyaup nuan.” Dinga kita! Tu meh maya ti patut. Tu meh hari pengelepas.
3 Kami nadai mempang jalai orang, ngambika orang enda ulih besalahka pengawa kami,
4  tang dalam semua utai enggau ngena semua macham chara kami udah ngayanka diri amat ulun Allah Taala. Kami udah tan natka penusah, pemerinsa enggau penyuntuk,
5 dipalu, ditutup dalam rumah jil, dijamah orang ke begau, bebendar bekereja, nadai tinduk, nadai utai diempa,
6 ngena ulah ti tuchi, penemu, pengeliat ati, penelap, pengerindu ti bendar,
7 madahka utai ti amat, enggau ulih kuasa Allah Taala; ngena pengelurus nyadika senyata ba jari kanan enggau ba jari kiba kami,
8 dibasa orang, dikeleseka orang, dipejai orang, dipuji orang, dikumbai orang bula, taja pen kami madahka utai ti bendar;
9  enda dikelala orang, taja pen semua orang ngelala kami; baka ke mati, tang, baka ke dipeda kita, kami agi mengkang idup; baka ke diukum, tang enda dibunuh;
10 baka ke tusah ati, tang seruran rami gaga; baka ke seranta, tang ngaga mayuh orang nyadi kaya; baka ke nadai utai, tang bempu semua utai.
11 Kami bejaku enggau terang ngagai kita orang Korint. Kami udah nukangka ati kami ngagai kita.
12 Kami nadai sekat rinduka kita; kita empu ke nyekat diri rinduka kami.
13 Kena kitai besilih -- Aku bejaku baka ke ngagai anak mit -- tukangka ati kita ngagai kami.
 
Bejaga Ari Orang Ke Enda Nemu Allah Taala
14 Anang besulu enggau orang ke enda arap. Laban baka ni ku pengelurus ulih begulai enggau penyai? Tauka baka ni ku penampak ulih bekaul enggau
pemetang?
15 Baka ni ku Kristus ulih besetuju enggau Sitan? Tauka orang ke arap tau sebaka enggau orang ke enda arap?
16 Baka ni ku rumah Allah Taala ulih besetuju enggau engkeramba? Laban kitai tu rumah Allah Taala ti idup! Munyi ti disebut Allah Taala, “Aku deka diau dalam sida lalu begulai enggau sida, lalu Aku deka nyadi Allah Taala sida, lalu sida deka nyadi nembiak Aku.
17  Nya alai pansut kita ari sida, lalu seraraka diri ari sida, ku Tuhan bejaku, lalu anang negu utai ti enda tuchi; nya baru Aku deka nerima kita,
18  lalu Aku deka nyadi Apai kita, lalu kita deka nyadi anak lelaki enggau anak indu Aku, ku Tuhan ti Pemadu Bekuasa bejaku.”
 
Bagi 7
1 Nya alai laban kitai bisi semaya tu, menyadi, aram kitai nuchi diri empu ari semua utai ti ngamahka tubuh enggau roh kitai, lalu nyadi pemadu kudus nangika Allah Taala.
 
Pengaga Paul
2 Sambut meh kami ke dalam ati kita, laban kami nadai udah ngereja utai ti salah ngagai orang, nadai udah kala jai enggau orang, tauka ngambi ulih ba orang.
3 Aku nyebut tu ukai laban aku deka besalahka kita, laban munyi ti udah disebut aku suba, kami sayauka kita, mati sama, idup sama enggau kita.
4 Aku suah temegahka kita. Aku balat gaga ati ke kita. Aku berasai diperansang. Taja pen kami dituntung mayuh macham penusah, tang ati aku lantang amat.
5  Indah lebuh kami datai di Masedonia, deh kami enda ulih belelak, tang dituntung penusah di semua endur, betalat enggau orang, lalu ati kami berasai takut.
6 Tang Allah Taala, ke meransang orang ke lemi semengat, udah meransang kami ngena penatai Titus,
7 lalu ukai semina ngena penatai iya aja, tang mega ngena berita pasal kita ke udah ngelantangka ati Titus, lebuh iya madahka pasal kita ke balat lelengau sereta tusah ati ke aku, pasal kita ke angkun sereta irauka aku. Nya alai, ati aku berasai lantang agi ari selama.
8 Laban, enti sema surat aku nya udah ngasuh ati kita enda lantang, aku enda nesal ati ke nya (taja pen aku nesal ati mimit lebuh aku meda kita tusah ati enda lama laban surat nya).
9 Tang diatu ati aku gaga, ukai laban aku udah ngenusahka ati kita, tang laban ati kita ti tusah udah ngasuh kita nesal ati; laban ati ti tusah nya endang nitihka peneka Allah Taala, nya alai kami nadai ngemediska kita.
10 Laban ati ti tusah ulih peneka Allah Taala, ngasuh kita nesal ati, lalu ati kita ti nesal mai kita ngagai pengelepas. Nya nadai ngasuh kita ngesal. Tang ati ti tusah ulih peneka mensia, mai pemati.
11 Peda kita utai ti udah nyadi ari ati kita ti tusah ulih peneka Allah Taala: kita enda empelita agi, kita bebendar deka ngayanka diri nadai penyalah! Peda kita pemalat kita pedis ati, pemalat kita irau, pemalat kita lelengau, pemalat kita angkun, pemalat kita seruran sedia deka ngukum penyalah! Dalam semua pekara tu kita udah mandangka diri endang nadai penyalah.
12 Nya alai, taja pen aku udah nulis surat nya suba ngagai kita, aku ukai nulis nya ketegal orang siku nya ke udah ngereja penyalah, lalu ukai mega ketegal orang ke udah pedis laban iya, tang ngambika, di mua Allah Taala, kita empu nemu pengangkun diri ke kami.
13 Nya utai ti meransang ati kami. Nambahka nya, kami balat gaga ati meda pengaga ati Titus laban semua kita bela udah ngelantangka ati iya!
14 Laban aku amat udah temegahka pasal kita di mua iya, lalu kita enda ngemaluka aku. Baka kami ke seruran madahka utai ti bendar ngagai kita, baka nya mega kami madahka utai ti bendar ngagai Titus lebuh kami temegahka pasal kita.
15 Iya lalu balat agi rinduka kita, lebuh iya ngingatka semua kita ke ngasi, enggau gaya kita ke getar-getar sereta nangi nyambut penatai iya.
16 Ati aku chukup gaga laban kita tau dikarapka dalam semua utai.
 
Bagi 8
Jalai Orang Kristian Meri Utai
1  Kami deka ke kita nemu, menyadi, pasal pengasih ti diberi Allah Taala ke mayuh bengkah eklisia di menua Masedonia.
2 Taja pen sida udah balat diuji mayuh macham penusah, tang sida udah meri tulung enggau ati ti amat gaga sereta gerah mudah, taja pen sida udu seranta.
3 Laban, aku madah ngagai kita, sida udah meri enggau naka ulih sida, enggau lebih agi ari ti ulih diberi sida. Ari peneka ati sida empu
4  sida minta kami meri sida peluang sama enggau meri tulung ngagai bala nembiak Tuhan.
5 Lalu sida ngereja nya, ukai baka ke disangka kami, tang sida dulu nyerahka diri ngagai Tuhan, lalu udah nya baru sida nyerahka diri ngagai kami, nitihka peneka Allah Taala.
6 Nya alai kami ngasuh Titus, ke udah ngepunka pengawa pengasih nya, mega nembuka pengawa nya ba bala kita.
7 Nyadi diatu baka kita ke mujur dalam semua utai--dalam pengarap, dalam jaku, dalam penemu, dalam pemendar kita ngereja utai, enggau dalam pengerindu kita ke kami--awakka kita mega mujur dalam pengawa pengasih tu.
8 Aku ukai nyebut tu laban aku deka meri atur ngagai kita, tang laban aku deka nemu pengamat pengerindu kita, enti dibandingka enggau pengerindu orang bukai.
9 Laban kita nemu pengasih Jesus Kristus Tuhan kitai: taja pen Iya kaya, tang ketegal kita, Iya nyadi seranta, ngambika ulih penyeranta Iya, kita tau nyadi kaya.
10 Ba pekara tu aku meri kita jaku lalau ti tau dititihka kita: Taun siti tu kemari kita tu orang ti keterubah, ukai semina meri tang mega orang ke terubah bisi ati deka meri.
11 Diatu tembuka pengawa nya, ngambika pengeransing kita ke merambu pengawa nya setipak enggau pengeransing kita nembuka iya, ngena utai ti dikemisi kita.
12 Laban enti pengeransing nya bisi, pemeri kita nya deka diterima, beduduk ba utai ti dikemisi kita, ukai beduduk ba utai ti nadai ba jari kita.
13 Aku ukai ngumbai kita patut ditating enggau pengawa ti berat nya, lalu orang bukai enda, tang ngambika semua bela bisi utai magang.
14 Diatu lebuh kita bulih mayuh utai, kita meri sida utai ti dipeguna sida, ngambika lebuh sida bulih mayuh utai, sida meri kita utai ti dipeguna kita, ngambika semua bela bisi utai magang.
15 Munyi ti udah ditulis,  “Orang ke ngumpul mayuh,  nadai bulih kelalu mayuh,  lalu orang ke ngumpul mimit,  nadai mega bulih kelalu mimit.”
 
Titus Enggau Orang Ke Sama Bekereja Enggau Iya
16 Aku meri terima kasih ngagai Allah Taala ke udah ngasuh Titus ransing ati nulung kita baka ti deka dikereja aku empu!
17 Laban iya ukai semina nerima peminta kami, tang laban iya empu endang majak ransing agi ati deka nulung kita, nya alai iya deka nemuai ngagai kita ari peneka ati iya empu.
18 Kami ngirumka enggau iya, siku menyadi ke dibasa orang dalam semua eklisia ketegal pengawa iya ke nusui Berita Manah.
19 Lalu ukai semina nya aja, tang iya mega udah diasuh mayuh bengkah eklisia bejalai enggau kami lebuh kami ngereja pengawa pengasih tu, ke mulia Tuhan Empu, enggau kena nunjukka pengeransing kami ke deka nulung.
20 Kami deka ngereja pengawa ba pasal pemeri tu enggau bejimat enggai ke orang mantah kami,
21 laban kami endang deka ngereja utai ti ngena, ukai semina di mua Tuhan aja, tang mega di mua mensia.
22 Nya alai, kami ngasuh menyadi kami tu bejalai enggau sida. Kami suah udah nguji iya, lalu kami nemu iya endang ransing dalam semua pekara. Lalu diatu iya balat agi ransing ari ke udah, laban iya arap amat ke kita.
23 Nyadi pasal Titus, iya endang tawing aku bekereja betulungka kita. Pasal bala menyadi bukai, sida nya pengari ari mayuh bengkah eklisia, ke nyadi mulia Kristus.
24 Nya alai di mua semua eklisia, ayanka pengerindu kita ke sida enggau kebuah kami ke temegahka kita di mua sida.
 
Bagi 9
Tulung Ke Orang Kristian Ke Suntuk
1 Aku tau enda ibuh nulis ngagai kita pasal tulung ti diberi ngagai bala nembiak Tuhan,
2  laban aku nemu kita endang keran deka nulung, lalu aku udah temegahka nya di mua orang Masedonia, madahka orang di menua Akaia endang udah sedia kenyau ari taun siti tu kemari, lalu pengeransing ati kita udah nyungkak nyauka semua bala sida.
3  Tang diatu aku ngasuh Titus enggau sida menyadi tu nemuai ngagai kita, ngambika kami enda lebu temegahka kita ba pekara tu, ngambika kita endang amat sedia, munyi ti dipadahka aku ngagai sida;
4 enggai ke lebuh orang Masedonia datai enggau aku, lalu nemu kita enda sedia, kami malu ke diri ke udah balat ngarapka kita! Lalu kita empu pen malu.
5 Nya alai aku ngira, aku patut ngasuh sida menyadi nya nemuai dulu ngagai kita, lalu nyendiaka dulu pemeri ti udah disemaya kita, ngambika pemeri nya sedia magang, ukai ari pejal, tang ari peneka ati kita empu.
6 Ingatka jaku tu: orang ke nanam mimit, deka ngetau mimit, lalu orang ke nanam mayuh, deka ngetau mayuh.
7 Genap iku kita patut meri nitihka pemutus runding diri, ukai enggau ati ti lembau, tauka ari pejal, laban Allah Taala rinduka orang ke meri enggau ati ti gaga.
8 Lalu Allah Taala ulih meri kita semua macham berekat ti belimpah-limpah, ngambika lebuh kita seruran chukup semua utai, kita ulih meri mayuh utai kena ngereja genap bengkah pengawa ti badas.
9  Munyi ti ditulis, “Iya meri enggau ati ti gerah mudah.  Iya meri ngagai orang ke seranta. Pengelurus Iya meruan belama iya.”
10  Allah Taala, ke meri benih ngagai orang ke nanam, enggau roti ke pemakai, deka meri lalu nambahka semua utai kita, sereta nambahka asil pengelurus kita.
11 Kita deka digaga nyadi kaya ngena semua macham chara laban kita meri enggau ati ti gerah mudah, ti deka nyungkak orang meri terima kasih ngagai Allah Taala ketegal pemeri kita ke diterima sida ari kami,
12 laban pengawa ti dikereja kita tu ukai semina meri utai ti dipeguna bala nembiak Tuhan, tang mega nyungkak mayuh orang meri terima kasih ngagai Allah Taala.
13 Nyadi laban kita udah diuji ngena pengawa tu, kita deka ngemuliaka Allah Taala ketegal kita ngasi lalu ngaku Berita Manah pasal Kristus, enggau ketegal kita meri enggau ati ti gerah mudah ngagai sida enggau ngagai orang bukai.
14 Lalu enggau ati ti balat lelengau, sida deka besampika kita ketegal pemesai pengasih ti udah diberi Allah Taala ngagai kita.
15 Beri terima kasih ngagai Allah Taala ketegal pemeri Iya ti enda ulih ditelah!
 
Bagi 10
Paul Bejaku Ngeringka Pengawa Diri
1  Aku, Paul, ulih pemaruh ati enggau penelap Kristus, minta kita--aku ti takut lebuh aku betunga mua enggau kita, tang berani lebuh aku jauh ari kita --
2 aku minta kita anang nyungkak aku kasar enggau kita lebuh aku begulai enggau kita, baka ti deka dikereja aku ngagai orang ke ngumbai kami gawa ngena chara mensia.
3 Kami endang idup ngena chara mensia, tang kami ukai beperang ngena chara mensia,
4 laban senyata ti dikena kami beperang ukai senyata dunya, tang kuasa Allah Taala kena ngerusak kuta.
5 Kami ngerusak kelikuh enggau semua utai ti ngelaban penemu pasal Allah Taala, lalu nangkap semua runding lalu ngasuh sida ngasika Kristus.
6 Kami sedia deka ngukum semua orang ke enda ngasi, lebuh kita empu udah chukup ngasi.
7 Kita semina meda gamal utai aja.Enti orang arapka diri nembiak Kristus, awakka iya berunding baru lalu ingatka kami tu mega nembiak Kristus, baka iya empu.
8 Laban enti aku temegah lebih ari ti patut pasal kuasa kami, ti diberi Tuhan kena nirika kita, ukai kena ngeruntuhka kita, aku enda malu ke nya.
9 Aku ukai baka ke ngemba kita ngena surat.
10 Laban ku sida, “Surat iya kasar, sereta terit, tang iya empu lemi batang tubuh, lalu jaku iya nadai guna!”
11 Orang ke baka nya patut nemu, utai ti ditulis kami lebuh kami enda begulai enggau kita, sigi deka mega dikereja kami lebuh kami begulai enggau kita.
12 Kami enda berani nyemaka tauka mandingka diri enggau orang ke muji diri baka nya. Lebuh sida nyukat lalu mandingka diri enggau pangan diri, sida nunjukka diri beli.
13 Tang kami enggai temegah lebih ari ti patut, tang semina deka temegahka pengawa ti udah diasuh Allah Taala kereja kami, nyengkaum bekereja ba bala kita.
14 Laban kami ukai ngereja lebih ari ti patut lebuh kami bekereja ba bala kita, laban kami tu orang ke terubah-rubah datai ba kita mai Berita Manah pasal Kristus.
15 Kami ukai temegah lebih ari ti patut, reti nya, temegahka pengawa orang bukai; tang kami ngarap, lebuh pengarap kita mansang, pengawa ti dikereja kami deka ngerembai besai agi,
16 ngambika kami ulih nusui Berita Manah di menua bukai ngilah menua kita, lalu enda ibuh temegahka pengawa ti dikereja ba endur alai orang bukai udah nusui Berita Manah.
17 “Awakka orang ke deka temegah, temegahka Tuhan.”
18 Laban ukai orang ke muji diri ke diterima Tuhan, tang orang ke dipuji Tuhan.
 
Bagi 11
Paul Enggau Sida Rasul Ti Pelesu
1  Aku ngarapka kita deka sabar enggau aku, enti aku beli mimit. Aku minta kita sabar enggau aku!
2  Aku chemburuka kita, baka Allah Taala ke chemburuka kita, laban aku udah ngasuh kita betunang enggau siku laki, iya nya nyerahka kita dara bungas ngagai Kristus.
3 Tang aku irau enggai ke, baka ular ke ngena pemintar iya nipu Awa, runding kita dibai tesat ari ati ti tuchi ti balat angkunka Kristus.
4 Laban enti orang datai lalu nusui pasal Jesus ti lain agi ari Jesus ke ditusui kami, tauka kita nerima roh ti lain agi ari Roh ke diterima kita, tauka kita nerima berita manah ti lain agi ari Berita Manah ti diterima kita, kita jampat amat nunduk ngagai utai nya.
5 Aku ngira diri enda kurang agi ari sida rasul ke ngumbai diri lebih agi bekuasa nya!
6 Aku nyangka nadai udah kala belajar lanchar bejaku, tang aku bisi penemu, lalu tu udah diayanka kami ngagai kita dalam semua utai ti dikereja kami.
7  Kati aku bedosa lebuh aku ngemaruhka diri ngambika kita ditinggika, ketegal aku nusui Berita Manah Allah Taala ngagai kita enggau nadai minta bayar?
8  Aku ngerumpak eklisia bukai laban aku nerima sukung ari sida, ngambika aku ulih bekereja ke kita.
9 Lalu lebuh aku begulai enggau kita, lalu aku suntuk utai, aku enda nating kita, laban utai ti dipeguna aku diberi bala menyadi ke datai ari Masedonia. Nya kebuah aku enggai, lalu deka majak enggai nating kita dalam semua utai.
10 Laban ajar Kristus bisi dalam ati aku, nadai orang ulih madamka temegah aku tu di menua Akaia.
11  Nama kebuah? Laban aku enda rinduka kita? Ukai! Allah Taala nemu aku rinduka kita!
12 Lalu aku deka majak ngereja utai ti dikereja aku, ngambika enda meri peluang ngagai orang ke ngiga peluang temegah madahka diri bekereja baka kami.
13 Laban orang ke temegah baka nya, nya nabi ti pelesu, pengelakar, ke nyaru diri nyadi rasul Kristus.
14 Sigi aruh iya! Indah Sitan deh nemu nyaru diri nyadi melikat penampak.
15 Nya alai, enda nyelai enti bala ulun Sitan nemu nyaru diri nyadi ulun pengelurus. Sida deka nerima ukum ti setipak enggau utai ti udah dikereja sida.
 
Pemerinsa Paul Nyadi Rasul
16 Aku nandu nya baru: anang orang ngumbai aku beli. Tang enti sema kita ngumbai aku beli, terima aja meh aku ke beli tu, ngambika aku tau mega temegah mimit.
17  Aku ke temegah tu ukai ari asuh Tuhan, tang ari pemeli aku empu.
18 Laban mayuh orang temegahka utai ti dikereja dunya, aku pen deka mega temegah.
19 Laban kita gaga ati sabar enggau orang ke beli, laban kita empu pintar!
20 Kita sabar lebuh orang ngaga kita nyadi ulun, tauka ngelakar kita, tauka ngambi ulih ba kita, tauka ngerigangka diri, tauka nampar mua kita.
21 Aku malu ngaku tu, tang kami enda ulih natka nya!  Tang enti orang berani temegahka sebarang utai -- aku bejaku baka orang ke beli -- aku pen berani mega temegahka utai nya.
22 Kati sida nya orang Hebrew? Aku mega orang Hebrew. Kati sida nya orang Israel? Aku mega orang Israel. Kati sida nya peturun Abraham? Aku mega peturun Abraham.
23 Kati sida nya ulun Kristus? Aku bejaku munyi orang ke gila -- aku manah agi ari sida, aku udah bebendar agi bekereja ari sida, suah agi ari sida udah ditutup dalam rumah jil, suah agi udah disipat, lalu suah nyau deka mati.
24 Lima kali aku udah disipat orang Judah, empat puluh kali (kurang siti) sekali-sekali aku disipat.
25 Tiga kali aku dipalu ngena batang kayu; sekali aku dituku ngena batu; tiga kali ditabanka kapal karam, lalu sekali aku rarat sehari semalam ba tasik.
26 Aku seruran bejalai, nyau deka bebadi ba sungai, laban perumpak, laban orang ke ari bansa aku empu, laban orang bansa bukai, nyau deka bebadi dalam nengeri, nyau deka bebadi di menua puang, ba tasik, nyau deka bebadi ba jari pangan ti pelesu;
27 bebendar bekereja sereta merinsa, suah semalam-malam enda tinduk, lapar sereta aus, suah nadai pemakai, chelap sereta telanjai.
28 Lalu kelimpah ari utai bukai, tiap hari aku ngasaika diri ditekanka pengirau ke semua eklisia.
29  Sapa ke lemi, lalu aku enda lemi? Sapa ke dibai orang bedosa, lalu aku enda pedis ati?
30 Enti aku enda tau enda temegah, aku deka temegahka utai ti nunjukka pengelemi aku.
31 Allah Taala ti Apai Tuhan Jesus - awakka nama Iya dipuji belama iya! - nemu aku enda bula.
32 Lebuh aku di Damaskus, tuan gabenor ke bekereja di baruh Raja Aretas, nyaga nengeri nya laban sida deka nangkap aku.
33 Tang aku diulurka ngena bakul nengah lubang ba dinding kuta, lalu aku ngerarika diri ari iya.
 
Bagi 12
Genera Enggau Pemandang Ti Dipeda Paul
1 Aku enda tau enda temegah taja pen aku nadai bulih penguntung ari nya, tang aku deka temegahka pasal genera enggau pemandang ari Tuhan.
2 Aku nemu siku orang Kristian ke udah dibai ngagai serega ba peringkat ti ketiga, empat belas taun tu ti udah. Aku enda nemu sekalika utai nya nyadi ba iya batang tubuh, tauka ukai -- semina Allah Taala aja nemu.
3 Lalu aku nemu -- nemuka iya dibai batang tubuh tauka ukai, aku enda nemu; Allah Taala aja nemu --
4  iya dibai niki ke serega,alai iya ke ninga utai ti pemadu manah, ti enda ulih ditelah ngena jaku mensia.
5 Aku deka temegahka orang ke baka nya, tang aku enggai temegahka diri empu, kelimpah ari temegahka pengelemi aku.
6 Tang enti sema aku deka temegah, aku enda beli, laban aku deka madahka utai ti bendar. Tang aku enggai temegah, ngambika nadai orang ngira aku lebih ari ke dipeda sida ba aku, tauka didinga sida ari aku.
7 Lalu kena nagang aku ngenyumbungka diri ketegal pemandang ti baka nya, sebengkah penyakit udah diberi ngagai tubuh aku, nyadika seruan Sitan, kena merinsaka aku.
8 Tiga kali aku udah besampika ngagai Tuhan minta penyakit nya dibuai ari aku,
9 tang ku Tuhan bejaku ngagai aku, “Pengasih Aku chukup ke nuan, laban kuasa Aku nyadi pemadu badas lebuh nuan lemi.” Nya alai aku deka lebih agi gaga ati temegahka pengelemi aku, ngambika kuasa Kristus meruan dalam aku.
10 Nya alai ketegal Kristus aku gaga ke pengelemi aku, dipechat, dikeduan, diperinsa, enggau dituntung mayuh macham penusah. Laban lebuh aku lemi, aku kering.
 
Pengirau Ati Paul Ke Orang Ke Arap Di Korint
11 Aku udah beli. Kita empu ke nyungkak aku beli, laban iya ti bendar, kita patut muji aku, laban aku enda kurang agi ari sida “rasul” ke bekuasa nya, taja pen aku tu orang ke nadai guna.
12 Tanda ti ngelai rasul ti bendar -- kereja ajih enggau kereja ti nyelai -- udah dikereja enggau ati ti liat ba bala kita.
13 Baka ni ku kita kurang agi dikibuhka enti dibandingka enggau eklisia bukai, kelimpah ari aku ke enda nating kita? Ampun meh penyalah aku nya!
14 Tu ketiga kali aku sedia deka nemuai ngagai kita. Lalu aku enggai nating kita, laban aku ukai minta utai kita, tang deka betemu enggau kita empu; laban ukai anak ke patut besimpanka utai ke apai indai, tang apai indai ke patut besimpanka utai ke anak.
15 Aku gaga ati ngabiska semua utai aku, nyengkaum aku empu, kena nulung kita. Enti aku bebendar rinduka kita baka nya, kati kita deka kurang agi rinduka aku?
16 Nadai ku enggau, aku amat enda nating kita. Tang kita ngumbai aku pintar nipu kita.
17 Kati aku bisi udah kala ngambi ulih ba kita ngena bala seruan ke diasuh aku nemuai ngagai kita?
18  Aku udah ngansak Titus nemuai ngagai kita, lalu ngasuh siku sida ke arap nemuai enggau iya. Kati Titus bisi udah ngambi ulih ba kita? Kati juluk ati kami duai Titus enda sebaka? Kati utai ti dikereja kami duai enda sebaka?
19 Kati kita ngelamatu seruran ngumbai kami udah nguji bejaku ngarika diri empu di mua kita? Kami duai bejaku di mua Allah Taala dalam nama Kristus. Semua utai ti dikereja kami, menyadi, endang kena ngeringka pengarap kita.
20  Laban aku irau enggai ke lebuh aku datai ila, aku nemu kita ukai baka ti dikedekaka aku, lalu kita nemu aku ukai baka ti dikedekaka kita. Aku irau enggai ke aku tetemuka kita belaya, kepapas, ringat, berundingka diri empu aja, mechat pangan diri, bejakuka pangan diri, sumbung sereta charut.
21 Aku irau enggai ke lebuh aku nemuai baru ngagai kita ila, Allah Taala deka ngemaruhka aku di mua kita, lalu aku nyabakka mayuh orang ke udah bedosa dulu menya lalu apin nesal ati ke runding sida ke kamah, kereja kamah ti udah dikereja sida.
 
Bagi 13
Ajar Ti Penudi Enggau Jaku Tabi
1 Tu ketiga kali aku nemuai ngagai kita. “Semua dawa enda tau enda disukung dua tauka mayuh agi saksi.”
2 Aku udah meri jaku tangkan ngagai sekeda bala kita ke udah bedosa suba, enggau ngagai semua sida ti bukai, lalu diatu aku meri sida jaku tangkan lebuh aku enda begulai enggau kita. Jaku tangkan tu munyi ti udah disebut aku lebuh aku nemuai kedua kali ngagai kita suba: iya nya, lebuh aku datai baru ila, aku deka nganu sida,
3 laban kita minta aku ngayanka tanda kena nunjukka Kristus amat bejaku ngena aku. Kristus enda lemi lebuh Iya bekereja ba kita, tang bekuasa dalam kita.
4 Iya lemi lebuh Iya diregang, tang Iya idup ulih kuasa Allah Taala. Kami lemi dalam Kristus,  tang lebuh kami bekereja ba bala kita, kami deka idup begulai enggau Iya ulih kuasa Allah Taala.
5 Peresa diri empu, kena nentuka kita amat idup ngena pengarap tauka enda. Uji diri empu. Kati kita enda nemu Jesus Kristus bisi dalam kita? Nyangka meh kita nemu diri enda mujur lebuh kita nguji diri empu!
6 Aku ngarapka kita deka nemu kami ukai orang ke enda tan diuji.
7 Tang kami besampi ngagai Allah Taala ngambika kita enda ngereja utai ti salah, ukai reti nya kami mandangka diri udah mujur lebuh kami diuji, tang ngambika kita ngereja utai ti ngena, taja pen kami baka ke enda mujur.
8 Laban kami enda tau ngereja utai ngelaban pemendar, tang semina bekereja ke pemendar.
9 Laban kami gaga lebuh kami lemi, lalu kita kering. Utai ti disampika kami nya kita nyadi pemadu badas.
10 Nya kebuah aku nuliska utai tu lebuh aku enda begulai enggau kita, ngambika lebuh aku datai ila, aku enda ibuh kasar enggau kita lebuh aku ngena kuasa ti udah diberi Tuhan ngagai aku, kuasa kena ngemansang, ukai kena ngeruntuh.
11 Ke pengujung iya, menyadi, selamat tinggal. Diau badas. Pendingka jaku aku. Besetuju enggau pangan diri. Diau bebaik enggau pangan diri, lalu Allah Taala ti pun pengerindu enggau pemaik deka meruan enggau kita.
12 Tabi pangan diri dalam pengerindu. Semua nembiak Tuhan bela ngirumka tabi basa ngagai kita.
13 Awakka pengasih Tuhan Jesus Kristus, enggau pengerindu Allah Taala, enggau kaul Roh Kudus meruan enggau kita semua.