Surat Ti Keterubah Ari Saint Paul
Ngagai Orang Di
KORINT
 
Jaku Pemuka
Surat Ti Keterubah Ari Saint Paul Ngagai Orang Di Korint* ditulis iya kena iya mutarka penanggul ti bisi ayan dalam pengidup enggau dalam pengarap orang Kristian ke dalam eklisia ti udah ditumbuhka Paul di Korint. Lebuh maya nya menya, Korint nya nengeri ti besai, alai orang ari mayuh bengkah bansa diau. Nengeri nya indu nengeri menua Akaia, ti dipegai perintah Rome. Nengeri nya tebilang laban pengawa dagang, laban adat asal enggau main asal orang ke diau dia, laban kereja kamah ti balat dikereja orang, enggau laban mayuh bengkah pengarap orang ke diau dia.

Utai ti deka dikejakuka Paul nya pasal penanggul baka penyerekang, enggau kereja ti kamah ti bisi nyadi ba raban eklisia, pasal seks enggau pengawa jadi melaki-bini, pasal atur dalam eklisia, pemeri Roh Kudus, enggau pasal pengangkat ari mati. Iya ngayanka jalai Berita Manah bejakuka semua penanggul tu.

Bagi 13, madahka pengerindu nya pemeri ti chukup manah, ti diberi Allah Taala. Bagi 13 tu bagi ti pemadu tebilang dalam bup tu.

Surat tu ditulis Paul kira dalam taun 57 A.D.
 
Ripih isi surat tu
Pun jaku (1.1-9)
Penyerekang dalam eklisia (1.10-4.21)
Pasal kereja kamah enggau pengidup dalam ruang bilik (5.1-7.40)
Orang Kristian enggau orang bukai (8.1-11.1)
Pengidup eklisia enggau jalai nyembah (11.2-14.40)
Pengangkat Kristus enggau sida ke arap ari mati (15.1-58)
Tulung ti diberi ngagai orang Kristian di Judea (16.1-4)
Pekara pasal diri empu enggau jaku penutup (16.5-24)
 
Bagi 1
1 Ari Paul, ke dikangauka nyadi rasul Jesus Kristus nitihka peneka Allah Taala, enggau ari menyadi kitai Sostenes,
2 Ngagai eklisia Allah Taala di Korint, ngagai orang ke dikuduska dalam Jesus Kristus, ke dikangauka nyadi nembiak Tuhan sama enggau semua orang di semua endur ke ngangauka nama Tuhan Jesus Kristus, ti Tuhan sida enggau Tuhan kitai:
3 Awakka Allah Taala ti Apai kitai enggau Tuhan Jesus Kristus meri kita berekat enggau pemaik.
 
Berekat Dalam Kristus
4 Aku endang seruran meri terima kasih ngagai Allah Taala ke kita, ketegal pengasih ti udah diberi Iya ngagai kita dalam Jesus Kristus,
5 laban dalam Jesus Kristus kita udah nyadi kaya dalam semua jaku enggau penemu,
6 laban saksi kami pasal Kristus udah dikamatka ba kita,
7 datai ke kita nadai kurang ba pemeri ti diberi Roh Kudus, lebuh kita nganti Jesus Kristus Tuhan kitai dipandangka.
8 Iya deka mega negapka kita datai ke ujung, ngambika kita nadai penyalah lebuh Hari Jesus Kristus Tuhan kitai.
9  Allah Taala endang tau dikarapka. Kita udah dikangauka Iya ngambika kita bekaul enggau Anak Iya Jesus Kristus Tuhan kitai.
 
Penyerekang Dalam Gerija
10 Diatu, dalam nama Jesus Kristus Tuhan kitai aku minta kita, menyadi, sama besetuju enggau pangan diri, enda beserekang, tang begempung enggau pangan diri, sama seati, sama sepenemu, sama juluk ati enggau pangan diri.
11 Laban sida Kloi sebilik bisi udah madah ngagai aku, menyadi, pasal kita ke belaya enggau pangan diri.
12  Utai ti ku aku nya siku nyebut, “Aku nitihka Paul,” siku nyebut, “Aku nitihka Apollos,” siku nyebut, “Aku nitihka Peter”, lalu siku nyebut, “Aku nitihka Kristus.”
13 Kati Kristus udah dibagi? Kati Paul udah diregang ngarika kita? Tauka, kita udah dibaptisa dalam nama Paul?
14 Aku meri terima kasih ngagai Allah Taala ke diri ke nadai udah maptisa kita, kelimpah ari maptisa Krispus seduai Gaius,
15 enggai ke orang ngumbai kita udah dibaptisa dalam nama aku.
16 (Aku udah mega maptisa sida Stepanas sebilik. Tang kelimpah ari nya, aku enda ingat enti aku bisi udah maptisa orang bukai.)
17 Laban Kristus ukai ngasuh aku maptisa orang, tang ngasuh aku nusui Berita Manah - ukai ngena pengelanchar bejaku ti datai ari penemu-dalam mensia, enggai ke kuasa regang Kristus lenyau ngapa.
 
Kristus Nya Kuasa Enggau Penemu dalam Allah Taala
18 Laban pesan pasal regang nya utai ti mapap ba orang ke deka mati, tang ba kitai ke diselamatka, pesan nya kuasa Allah Taala.
19 Laban endang udah ditulis, “Aku deka ngerusak penemu-dalam orang ke pintar, lalu ngemuntanka pemintar orang ke pandai.”
20 Ni orang ke bepenemu-dalam? Ni orang ke bepelajar? Ni orang ke landik belabanka penemu di dunya tu? Kati Allah Taala nadai udah nunjukka pemeli penemu-dalam ti datai ari dunya?
21 Laban dunya enda ulih ngelala Allah Taala ngena penemu-dalam sida, nya alai Allah Taala ngena penemu-dalam Iya, mutuska runding deka ngena pemeli pesan ti ditusui kami, nyelamatka orang ke arap.
22  Laban orang Judah minta kereja ajih, lalu orang Gerika minta penemu-dalam,
23 tang kami nusui pasal Kristus ke diregang, pesan ti ditulak orang Judah, lalu orang bansa bukai ngumbai pesan nya beli.
24 Tang ba orang ke dikangauka Allah Taala, orang Judah enggau orang bansa bukai, Kristus nya kuasa enggau penemu-dalam Allah Taala.
25 Laban pemeli Allah Taala pintar agi ari penemu-dalam mensia, lalu pengelemi Allah Taala kering agi ari pengering mensia.
26 Peratika gaya kita suba, menyadi, lebuh Allah Taala ngangauka kita: nadai mayuh kita nya orang ke bepenemu-dalam enti dikira nitihka penemu mensia. Nadai mayuh kita nya orang ke bekuasa, nadai mayuh kita nya orang ke tinggi pangkat,
27  tang Allah Taala udah milih orang ke beli di dunya tu kena Iya ngemaluka orang ke bepenemu-dalam. Iya udah milih utai ti lemi di dunya tu kena Iya ngemaluka utai ti kering.
28 Allah Taala udah milih orang ke baruh pendiau sereta dikeleseka dunya, ke nadai reti, kena Iya ngerusak utai ti endang udah bisi,
29 ngambika nadai orang ulih temegah di mua Allah Taala.
30 Allah Taala nya ti pun pengidup kita dalam Jesus Kristus, ke nyadi penemu-dalam Allah Taala, nyadi pengelurus, pengudus enggau penebus kitai,
31 ngambika, munyi ti udah ditulis, “Awakka orang ke deka temegah, temegahka Tuhan.”
 
Bagi 2
Pesan Pasal Kristus Ti Diregang
1 Lebuh aku datai ngagai kita suba, menyadi, aku ukai datai madahka misteri Allah Taala ngena jaku ti enda ditemu reti tauka ngena penemu-dalam.
2 Laban aku udah mutuska runding enggai nemu utai bukai lebuh aku begulai enggau kita, tang semina Jesus Kristus, enggau pasal Iya ke diregang.
3  Lalu aku datai ngagai kita mai pengelemi, sereta getar-getar nangi.
4  Jaku enggau pesan aku ukai disebut ngena jaku ti datai ari penemu-dalam, tang ngayanka kuasa enggau Roh Allah Taala,
5  ngambika pengarap kita ukai dipanggaika ba penemu-dalam mensia, tang ba kuasa Allah Taala.
 
Penemu-dalam Allah Taala
6 Tang taja pia, ngagai orang ke besai tuai, kami bejaku ngena penemu-dalam, tang ukai penemu-dalam dunya, tauka penemu-dalam bala roh ti merintah di dunya tu, ti deka diukum lalu lesap.
7 Kami bejakuka pasal misteri penemu-dalam ti dilalaika Allah Taala, ti udah diletak Iya nyadika mulia kitai sebedau dunya digaga.
8  Nadai siku pemerintah di dunya tu meretika penemu-dalam nya, laban enti sida udah meretika penemu-dalam nya, sida tentu enda ngeregang Tuhan ti bemulia.
9 Tang, munyi ti udah ditulis, “Utai ti enda kala dipeda tauka didinga mensia, utai ti nadai kala diperagam mensia, nya meh utai ti udah disedia Allah Taala ke orang ti rinduka Iya.”
10 Nya utai ti udah dipandangka Allah Taala ngagai kitai ulih Roh Kudus, laban Roh Kudus mansik semua utai. Indah utai ti dalam buntut runding Allah Taala deh abis dipansik Iya.
11 Laban sapa nemu runding mensia kelimpah ari roh mensia ti dalam mensia nya empu? Baka nya mega, nadai orang nemu runding Allah Taala, kelimpah ari Roh Allah Taala Empu.
12 Nyadi kitai udah nerima, ukai roh dunya, tang Roh ti datai ari Allah Taala, ngambika kitai ulih meretika pemeri ti diberi Allah Taala ngagai kitai.
13 Lalu kami bejakuka utai nya ukai ngena leka jaku ti diajar penemu-dalam mensia, tang ngena leka jaku ti diajar Roh Kudus, lebuh kami nerangka utai roh ngagai orang ke bisi Roh Kudus.
14 Orang ke nadai Roh Kudus enda ulih nerima pemeri ti diberi Roh Allah Taala, laban utai nya baka ke beli ba iya, lalu iya enda ulih meretika utai nya, laban utai nya semina ulih ditemu ari tulung Roh Kudus.
15  Orang ke bisi Roh Kudus nemu semua utai, tang iya empu enda ulih diakim orang.
16  “Laban sapa nemu runding Tuhan, datai ke iya ulih ngajar Tuhan?” Tang kitai bisi runding Kristus.
 
Bagi 3
Ulun Allah Taala
1  Nya alai aku, menyadi, enda ulih bejaku enggau kita baka ke bejaku enggau orang ke bisi Roh Kudus, tang baka ke bejaku enggau orang ke agi nitihka chara dunya, ke agi mit dalam Kristus.
2 Dulu suba aku nupi kita ngena ai tusu, ukai ngena pemakai ti kering, laban kita apin ulih makai pemakai nya. Indah diatu deh kita apin sedia,
3 laban kita agi nitihka chara dunya. Laban seagi-agi kita kepapas, lalu belaya enggau pangan diri, enda ka nya nunjukka kita enggi dunya, lalu diau nitihka chara dunya?
4 Laban lebuh kita nyebut, “Aku nitihka Paul,” lalu siku nyebut, “Aku nitihka Apollos”, enda ke kita bejaku nitihka chara dunya?
5 Laban sapa Apollos? Lalu sapa Paul? Semina ulun Allah Taala aja, ke udah mai kita arap, nitihka pengawa ti udah diberi Tuhan ngagai kami duai siku-siku.
6 Aku nanam, Apollos manjah, tang Allah Taala ti ngasuh utai nya tumbuh.
7 Nya alai, iya ke nanam, enggau iya ke manjah, sama nadai tentu guna. Semina Allah Taala aja ke ngasuh utai nya tumbuh.
8 Iya ke nanam enggau iya ke manjah, endang nadai lebih ari pangan diri, lalu genap iku deka diupah nitihka pengawa ti dikereja siku-siku orang.
9 Laban kami duai sama bekereja enggau Allah Taala. Kita nya umai Allah Taala, rumah Allah Taala.
10 Nitihka pengasih ti diberi Allah Taala ngagai aku, aku nudukka pugu, baka tukang ke landik ngaga rumah, lalu orang bukai nirika rumah ba atas pugu nya.
Genap iku orang enda tau enda bejimat ngaga rumah ba atas pugu nya.
11 Laban nadai orang tau nudukka pugu bukai kelimpah ari pugu ti udah didudukka; pugu nya Jesus Kristus.
12 Enti orang nirika rumah ba atas pugu nya ngena emas tauka pirak, tauka batu ti berega, tauka kayu, tauka batang rumput, tauka rumput ti rangkai,
13 pengawa ti dikereja sida siku-siku deka terang nyata, laban Hari Tuhan deka ngayanka utai nya, laban utai nya deka diayanka ngena api, lalu api nya deka nguji pengawa ti udah dikereja sida siku-siku.
14 Enti utai ti udah digaga orang ba atas pugu nya tan diuji ngena api, orang ke ngaga utai nya deka nerima upah.
15  Tang enti utai ti digaga orang nya angus, iya deka rugi, taja pen iya empu deka diselamatka, tang baka orang ke udah ngerenchah api.
16 Kati kita enda nemu diri rumah Allah Taala, lalu Roh Allah Taala diau dalam kita?
17 Enti orang ngerusak rumah Allah Taala, Allah Taala deka ngerusak orang nya. Laban rumah Allah Taala kudus, lalu kita nya rumah Allah Taala.
18  Anang nipu diri empu. Enti kita ngumbai diri bepenemu-dalam nitihka kira dunya, kita patut nyadi orang ke beli, ngambika kita tau nyadi orang ke bepenemu-dalam.
19 Laban penemu-dalam mensia nya utai ti beli ba Allah Taala. Laban endang udah ditulis, “Allah Taala manjuk orang ke bepenemu-dalam ngena pemintar sida empu.”
20  Lalu Bup Kudus mega nyebut, “Tuhan nemu runding orang ke bepenemu-dalam endang nadai guna.”
21 Nya alai, nadai orang tau temegahka mensia. Laban semua utai endang enggi kita magang,
22 nemuka iya nya Paul, Apollos, tauka Peter, tauka dunya tu, tauka pengidup, tauka pemati, tauka utai ti diatu enggau utai ti jemah ila, semua sida nya endang enggi kita magang,
23 lalu kita endang enggi Kristus, lalu Kristus endang enggi Allah Taala.
 
Bagi 4
Bala Rasul Kristus
1 Baka tu ku jalai kita patut ngira kami: kami tu ulun Kristus, ke ngibun misteri Allah Taala.
2 Nambahka nya, orang ke ngibun utai Allah Taala, enda tau enda orang ke tau dikarapka.
3 Tang ba aku siku, aku enda irauka diri diakim kita, tauka diakim dalam kot. Indah aku empu deh enda ngakim diri empu.
4 Aku nadai nemu diri udah ngereja penyalah, tang ukai reti nya aku nadai penyalah. Tuhan ke ngakim aku.
5 Nya alai anang ngakim orang sebedau maya ti patut, sebedau Tuhan datai. Lebuh Iya datai, Iya deka mantaika semua resia ti dilalaika dalam pemetang ngagai penampak, lalu deka mansutka juluk ati ti dipelalaika mensia. Nya baru semua orang deka nerima puji ari Allah Taala.
6  Aku udah ngena semua utai nya ba aku empu, enggau ba Apollos, ke penguntung kita, menyadi, ngambika kita tau belajar ari kami duai reti utai ti udah ditulis munyi tu, “Anang ngelui utai ti udah ditulis”. Nya baru kita enda temegahka siku, lalu bejai siku.
7 Laban sapa ngumbai kita lain agi ari orang bukai? Nama utai ti dikemisi kita, ti ukai diberi ngagai kita? Nya alai, enti utai nya udah diberi ngagai kita, *nama kebuah kita temegahka utai nya, baka ke ngumbai utai nya ukai pemeri ti diberi ngagai kita?
8 Kita udah chukup semua utai ti dipeguna kita! Kita udah nyadi kaya! Kita udah nyadi raja, taja pen kami tu ukai! Naka meh pemanah enti sema kita amat
nyadi raja, ngambika kami tau nyadi raja sama enggau kita!
9  Laban aku ngira Allah Taala udah mandangka kami ke nyadi rasul pengabis dudi ari semua orang bukai, baka orang ke diukum bunuh, laban kami udah dikeleseka dunya, melikat enggau mensia.
10 Kami nyadi orang ke beli, ke Kristus, tang kita nyadi orang ke pintar dalam Kristus! Kami lemi, tang kita kering! Kita dibasa orang, tang kami dipechat orang.
11 Nyentuk ngagai diatu kami lapar sereta aus, enda chukup gari, dipalu, sereta nadai endur alai diau,
12  ngena jari kami empu. Lebuh orang mechat kami, kami merekatka sida. Lebuh orang merinsaka kami, kami tan natka diri diperinsa.
13 Lebuh orang bejai kami, kami nyaut sida ngena jaku ti siru. Kami udah nyadi uras dunya, utai ti kamah ti enda diguna.
 
Meri Jaku Tangkan
14 Aku ukai nulis tu kena ngemaluka kita, tang meri kita jaku tangkan, laban kita anak ke dikerinduka aku.
15 Laban taja pen kita bisi sepuluh ribu iku orang ngiring kita dalam Kristus, tang kita nadai mayuh apai. Laban iya ti bendar, ulih Berita Manah, aku nyadi apai kita dalam Jesus Kristus.
16 Nya alai aku minta kita nunda teladan aku.
17  Nya kebuah aku ngasuh Timoti, anak ke tetap ati sereta dikerinduka aku dalam Tuhan, nemuai ngagai kita, ngambika iya mai kita ngingatka gaya pengidup aku dalam Kristus, baka ke diajar aku ngagai semua eklisia.
18 Tang sekeda kita udah ngenyumbungka diri, laban sida ngumbai aku enggai nemuai ngagai kita.
19 Aku deka nemuai ngagai kita enda lama da agi, enti nya peneka Tuhan, lalu aku deka nemu, ukai semina utai ti disebut orang ke sumbung nya, tang kuasa sida.
20 Laban Perintah Allah Taala ukai bepanggai ba jaku, tang bepanggai ba kuasa.
21 Ni ti dipilih kita? Sekalika aku datai mai penyipat, tauka mai pengerindu enggau penelap?
 
Bagi 5
Pengawa Kamah Ti Dikereja Raban Gerija
1 Orang bisi udah madah, sekeda bala kita bisi udah ngaga ulah ti kamah. Indah orang kapir deh enda ngaga ulah ti kamah baka nya. Laban siku lelaki tinduk enggau indai-tiri iya empu!
2 Lalu kita temegahka nya! Enda ka kita patut tusah ati lalu muai orang ke udah ngaga ulah nya ari bala kita?
3  Laban taja pen aku enda begulai enggau kita batang tubuh, tang aku bisi enggau kita dalam roh, lalu baka aku ke begulai enggau kita batang tubuh, aku udah ngeletak ukum
4 dalam nama Tuhan Jesus ba orang ke udah ngaga ulah ti baka nya. Lebuh kita begempuru, lalu roh aku bisi enggau kita sama enggau kuasa Jesus Kristus Tuhan kitai,
5  kita enda tau enda nyerahka orang nya ngagai Sitan, ngambika tubuh iya dirusak, tang roh iya diselamatka lebuh Hari Tuhan.
6  Kita enda patut temegah! Kati kita enda nemu, ka semina mimit aja ragi diguna kena ngasuh semua tekang tepung kembai?
7  Buai semua ragi ti lama, ngambika kita amat tuchi. Nya baru kita deka nyadi baka tekang tepung ti enda beragi, laban aku nemu kita sigi baka nya. Laban Gawai Paska kitai udah sedia, laban Kristus, iya nya anak domba Gawai Paska kitai, udah diserahka ngagai Allah Taala nyadika piring.
8 Nya alai aram kitai ngintu Gawai Paska kitai, ukai ngena ragi ti lama, iya nya ragi pemenchi enggau penyai, tang ngena roti ti enda beragi, iya nya ati ti tuchi enggau pemendar.
9 Aku bisi udah nulis nagang kita begulai enggau orang ke kamah ulah.
10 Aku ukai bejakuka pasal orang dunya ke ngereja ulah ti kamah, tauka orang ke amu, tauka penchuri, tauka orang ke nyembah engkeramba, laban enti kita deka nyeliahka sida, kita enda tau enda pansut ari dunya tu.
11 Tang diatu aku nulis ngagai kita, enda nyagi kita begulai enggau orang ke ngaku diri orang Kristian, tang ngereja ulah ti kamah, tauka amu, tauka nyembah engkeramba, tauka bejai orang, tauka pemabuk, tauka penchuri. Indah makai enggau orang ke baka nya, deh kita enda tau.
12  Laban aku nadai hak ngakim orang ke ari luar eklisia. Kitai semina ngakim orang ke dalam eklisia.
13 Allah Taala Empu ke deka ngakim orang ke ari luar eklisia. “Buru orang ke jai nya ari bala kita.”
 
Bagi 6
Bechara Ngelaban Orang Ke Sama Kristian
1  Enti kita bisi laya enggau pangan diri, kati kita berani mai pekara nya ngagai kot lalu minta diri diatur orang kapir, lalu enda minta diri diatur bala nembiak Tuhan?
2 Kati kita enda nemu, nembiak Tuhan deka ngakim dunya? Lalu enti kita deka ngakim dunya, nama kebuah kita enda ulih ngatur pekara ti mit?
3 Kati kita enda nemu kitai deka ngakim melikat? Anang kenang pasal ngakim utai ti dalam pengidup tu!
4 Nya alai, enti kita bisi pekara ti baka nya, indah orang ke baruh pangkat dalam eklisia deh tau diasuh kita ngakim pekara nya!
5 Aku nyebut tu kena aku ngemaluka kita. Nyangka meh kita nadai orang ke chukup bepenemu-dalam ngatur pekara entara kita ke diri menyadi dalam Tuhan,
6 ti ngujungka kita ke sama Kristian mansang ngagai kot, lalu minta diri diatur orang ke ukai orang Kristian?
7  Enti kita nyara pangan diri, nya nunjukka kita endang udah alah. Nama kebuah enda nejuka orang ngereja utai ti salah ngagai kita? Nama kebuah enda nejuka sida ngakal kita?
8 Tang kita empu ngereja utai ti salah lalu nipu orang. Indah menyadi kita ke dalam Kristus deh ditipu kita!
9 Kati kita enda nemu, orang ke jai enda ulih bempu Perintah Allah Taala? Anang nipu diri! Orang ke ngereja ulah ti kamah, tauka nyembah engkeramba, tauka butang, tauka lelaki beleman enggau lelaki,
10 tauka ngenchuri, tauka amu, tauka pemabuk, tauka bejakuka orang, tauka perumpak, enda ulih bempu Perintah Allah Taala.
11 Baka nya meh sekeda bala kita suba. Tang kita udah dituchi, udah dikuduska, udah digaga lurus dalam nama Tuhan Jesus Kristus enggau ulih Roh Allah Taala kitai.
 
Kena Meh Tubuh Ngemuliaka Allah Taala
12 Nyangka orang bisi nyebut, “Aku tau ngereja semua utai.” Amat, tang ukai semua utai nya tau mai penguntung ngagai aku. “Aku tau ngereja semua utai.” Amat, tang aku enggai nyadi ulun utai.
13 Nyangka bisi mega orang deka nyebut, “Pemakai ke perut, lalu perut ke pemakai.” Tang Allah Taala deka ngerusak utai dua bengkah nya. Tubuh ukai dikena ngereja ulah ti kamah, tang dikena ngereja utai ke Tuhan, lalu Tuhan ngintu tubuh nya.
14 Lalu Allah Taala udah ngangkatka Tuhan ari mati, lalu Iya deka mega ngangkatka kitai ari mati ngena kuasa Iya.
15 Kati kita enda nemu, tubuh kita nya perengka tubuh Kristus? Nya alai, patut tauka enda aku mai perengka tubuh Kristus, lalu ngaga iya nyadi perengka tubuh indu sundal? Enda tau sekali-kali!
16 Kati kita enda nemu, barang sapa beleman enggau indu sundal, nyadi setubuh enggau indu sundal nya? Laban endang udah disebut, “Seduai iya deka nyadi setubuh.”
17 Tang barang sapa begempung enggau Tuhan, nyadi setubuh dalam roh enggau Tuhan.
18 Seliahka ulah ti kamah. Genap dosa ti dikereja mensia, dikereja iya ari luar tubuh, tang orang ke ngereja ulah ti kamah, bedosa ngelaban tubuh diri empu.
19 Kati kita enda nemu, tubuh kita nya rumah Roh Kudus, ke diau dalam kita, ke udah diberi Allah Taala ngagai kita? Kita ukai enggi kita empu.
20  Laban kita udah dibeli ngena rega ti besai. Nya alai, kena meh tubuh kita ngemuliaka Allah Taala.
 
Bagi 7
Tanya Pasal Belaki Bebini
1 Nyadi ngenang pasal utai ti udah ditulis kita: Manah agi enti lelaki enda bebini.
2 Tang laban ulah ti kamah kelalu suah udah nyadi, lelaki patut bisi bini ke diri empu, lalu indu patut bisi laki ke diri empu.
3 Laki patut ngereja pengawa iya ke nyadi laki ngagai bini iya, lalu pia mega bini ngagai laki iya,
4 laban ukai bini ke bekuasa atas tubuh diri, tang laki iya, lalu baka nya mega, ukai laki ke bekuasa atas tubuh diri, tang bini iya.
5 Siku-siku seduai iya enda tau enggai besetubuh enggau pangan diri, semadi meh seduai iya sama besetuju deka ngetu enda lama ari tanggungjawap nya, ngambika seduai iya ulih besampi, tang udah nya seduai iya patut begulai baru, enggai ke Sitan nguji kita laban kita enda tetagangka pengingin diri.
6 Aku nyebut tu kena ngajar kita, ukai meri atur.
7 Naka meh pemanah enti semua orang baka aku magang. Tang genap iku kita endang bisi pemeri ari Allah Taala, enggi siku pemeri tu, enggi siku pemeri nya.
8 Ngagai orang ke enda bebini, enda belaki, enggau ngagai sida indu ke balu, aku madah ngagai sida, manah agi enti sida terus enda belaki enda bebini baka aku.
9 Tang enti sida enda tetagangka pengingin diri, sida patut jadi enggau pangan diri, laban manah agi sida jadi melaki-bini, ari ke merinsa natka diri tetengukka pangan diri.
10 Ngagai orang ke bisi laki, bisi bini, aku meri pesan, ukai ari aku, tang ari Tuhan: bini enda tau ninggalka laki.
11 (Tang enti iya ninggalka laki iya, iya enda tau jadi enggau lelaki bukai, tauka iya mulaika diri baru ngagai laki iya empu), lalu laki enda tau muai bini.
12  Ngagai sida ti bukai, aku nyebut tu (aku, ukai Tuhan): enti lelaki ke orang Kristian bisi bini ke ukai orang Kristian, lalu indu nya besetuju deka begulai enggau iya, lelaki nya enda tau muai iya.
13 Lalu enti indu ke orang Kristian bisi laki ke ukai orang Kristian, lalu laki iya besetuju deka begulai enggau iya, iya enda tau muai laki iya.
14 Laban laki ke enda arap, digaga lurus ulih bini iya, lalu indu ke enda arap, digaga lurus ulih laki iya. Enti enda baka nya, anak kita enda tuchi, tang laban iya baka nya, anak kita kudus.
15 Tang enti tawing ke ukai orang Kristian nyarakka diri. Ba pekara ti baka nya, tawing ke orang Kristian nadai utai nanchang, laban Allah Taala udah ngangauka kita ngagai pemaik.
16  Nuan ke bini, baka ni ku nuan nemu diri deka, tauka enda, nyelamatka laki nuan? Nuan ke laki, baka ni ku nuan nemu diri deka, tauka enda, nyelamatka bini nuan?
 
Idup Nitihka Kangau Allah Taala
17 Tang awakka genap iku kita idup nitihka pengidup ti udah diberi Tuhan ngagai kita lebuh Iya ngangauka kita suba. Tu meh atur ti diberi aku ngagai semua eklisia.
18 Kati orang nya udah ditutus lebuh iya dikangau? Awakka iya enda ibuh muai litan tutus iya. Kati iya enda ditutus lebuh iya dikangau? Awakka iya terus enda ibuh ditutus.
19 Betutus nadai guna, lalu enda betutus mega nadai guna. Utai ti beguna nya ngasika pesan Allah Taala dalam semua utai.
20 Genap iku orang enda tau enda baka iya ke menya lebuh iya dikangau.
21 Kati kita ulun lebuh kita dikangau? Nya nadai ngawa. Tang enti kita ulih ngelepaska diri ari pangkat ulun, lepaska diri empu.
22 Laban orang ke udah dikangauka Tuhan lebuh iya agi nyadi ulun, nyadi orang ke dilepaska Tuhan. Baka nya mega, orang ke ukai ulun lebuh iya dikangau, iya nyadi ulun Kristus lebuh iya udah dikangau.
23 Kita udah dibeli ngena rega ti besai; nya alai, anang nyadi ulun mensia.
24 Nya alai, menyadi, enda milih gaya pengidup kita lebuh kita dikangau, awakka kita meruan enggau Allah Taala.
 
Tanya Pasal Orang Ke Enda Belaki Bebini Enggau Indu Ke Balu
25 Ngenang pasal orang ke dara bungas, aku nadai pesan ari Tuhan, tang aku meri penemu diri empu, laban ulih pengasih Tuhan, aku tau dikarapka.
26 Aku ngira, ketegal penusah ti nyadi diatu, manah agi enti kita mengkang baka gaya kita ke diatu.
27 Kati nuan bisi bini? Anang muai bini nuan. Kati nuan apin bebini? Anang bebini.
28 Tang enti nuan bebini, nuan ukai bedosa. Lalu enti dara bungas belaki, iya ukai bedosa. Tang orang ke jadi melaki-bini deka dituntung penusah dunya, lalu aku ngasuh kita nyeliahka nya.
29 Utai ti ku aku, menyadi, nya baka tu: kitai nyau suntuk hari. Berengkah ari diatu, awakka orang ke bisi bini idup baka orang ke nadai bini,
30 lalu orang ke ngulit, baka orang ke enda ngulit, lalu orang ke rami gaga, baka orang ke enda rami gaga, lalu orang ke bebelika utai, baka orang ke nadai utai,
31 lalu orang ke ngereja pengawa dunya, baka orang ke ukai ngereja pengawa dunya, laban gaya dunya ti diatu deka lenyau.
32  Aku dekaka kita dilepaska ari pengirau. Lelaki ke enda bebini deka irauka pasal pekara Tuhan, baka ni ku jalai ngerinduka ati Tuhan.
33 Tang lelaki ke bisi bini, irauka pekara dunya, baka ni ku jalai ngelantangka ati bini iya,
34 lalu iya bebagi ati. Lalu indu ke enda belaki, tauka dara bungas, deka irauka pasal pekara Tuhan, irauka baka ni ku jalai ngaga diri tuchi tubuh tuchi roh, tang indu ke bisi laki deka irauka pekara dunya, irauka baka ni ku jalai ngelantangka ati laki iya.
35 Aku nyebut tu ke penguntung kita empu, ukai kena nagang kita, tang dekaka kita ngereja utai ti ngena, ngambika kita enda belampung ati angkunka Tuhan.
36 Enti orang ngira diri udah enda manah ulah enggau tunang iya, enti iya enda ulih nagang pengingin diri, lalu utai nya enda tau enda nyadi, awakka iya ngereja utai ti dikedekaka iya: awakka seduai iya jadi enggau pangan diri. Utai tu nadai pulai ke dosa.
37 Tang enti lelaki, ukai ari pejal, tang ari ati iya empu, udah mutuska runding enggai bebini, iya ngereja utai ti manah enti iya enda jadi enggau tunang iya.
38 Nya alai, lelaki ke jadi enggau tunang iya ngereja utai ti manah, tang lelaki ke enda bebini, ngereja utai ti manah agi.
39  Bini ditanchang ngagai laki iya, asal ga laki iya agi meruan idup. Tang enti laki iya mati, iya tau jadi enggau sebarang lelaki bukai ke dikedekaka iya, asal ga lelaki nya nembiak Tuhan.
40 Tang ba runding aku, indu nya deka beberekat agi enti iya mengkang enda belaki baru. Lalu aku ngira, aku mega bisi Roh Allah Taala.
 
Bagi 8
Pasal Pemakai Ti Diberi Ngagai Engkeramba
1 Ngenang pasal pemakai ti diberi ngagai engkeramba: kitai nemu, “Semua kitai bela bisi penemu.” Penemu ngasuh orang ngerigangka diri, tang pengerindu ngemansangka orang.
2  Barang sapa ngumbai diri nemu utai, apin bisi penemu ti patut dikembuan iya;
3 tang orang ke rinduka Allah Taala, dikelala Allah Taala.
4  Nya alai, ba pasal pemakai ti udah diberi ngagai engkeramba, kitai sama nemu, “engkeramba endang ukai utai ti idup”, lalu “Allah Taala endang siku aja.”
5 Laban enti sema utai ti dikumbai petara bisi di langit tauka di dunya--laban utai ti dikumbai “petara” enggau dikumbai “tuhan” endang amat mayuh--
6  tang ba kitai, kitai semina bisi siku aja Allah Taala, Apai ke pun semua utai, lalu kitai idup ke Iya; lalu kitai semina bisi siku aja Tuhan, iya nya Jesus Kristus. Ulih Iya semua utai udah digaga, lalu ulih Iya kitai idup.
7  Tang ukai semua orang ngembuan penemu tu. Laban sekeda orang udah teleba enggau engkeramba nyentuk ngagai diatu, nya alai sida agi ngumbai pemakai ti diempa sida nya pemakai ti udah diberi ngagai engkeramba, lalu laban ati sida agi lemi, sida lalu ngumbai diri bedosa lebuh sida makai pemakai nya.
8 “Pemakai enda ulih mai kitai semak ngagai Allah Taala. Kitai enda rugi, enti kitai enda makai, lalu kitai enda mega untung, enti kitai makai.”
9  Tang bejimat, enggai ke kita ke tau ngereja semua utai, ngasuh orang ke lemi, bedosa.
10 Laban enti orang ke lemi meda kita ke bisi penemu makai dalam rumah sembiang engkeramba, enda ka nya deka meransang iya makai pemakai ti dienjuk ngagai engkeramba, enti iya agi lemi?
11  Nya alai, menyadi ke lemi nya, ke udah ditebus Kristus, deka rusak laban penemu kita.
12 Tang lebuh kita bedosa ngelaban orang Kristian lalu nelihka ati sida ti agi lemi, kita bedosa ngelaban Kristus.
13 Nya alai, enti pemakai ngasuh orang Kristian bedosa, aku enggai sekali-kali makai dagin, enggai ke aku ngasuh sida bedosa.
 
Bagi 9
Kuasa Enggau Pengawa Sida Rasul
1 Kati aku apin dilepaska? Kati aku ukai rasul? Kati aku nadai udah kala meda Jesus Tuhan kitai? Kati kita ukai asil ari pengawa ti dikereja aku ke Tuhan?
2 Enti sema orang bukai enda ngaku aku rasul, kita ga patut ngaku aku rasul, laban pengidup kita dalam Tuhan nandaka aku amat rasul.
3 Tu meh saut aku ngagai orang ke mansik aku.
4 Kati kami nadai hak diberi pemakai enggau utai irup?
5 Kati kami nadai hak mai bini kami baka rasul ti bukai, enggau baka sida menyadi Tuhan, enggau Peter?
6 Tauka semina kami duai Barnabas aja ke enda tau enda bekereja ngulihka pengidup ke diri empu?
7 Kati orang ke nyadi soldadu kala ngaji diri empu? Kati orang ke nanam kebun anggur enda tau makai buah ari kebun nya? Kati orang ke ngibun raban jelu enda tau ngirup ai tusu ari raban jelu nya?
8 Kati aku nyebut tu ngena penemu mensia? Kati nya nadai disebut Adat?
9 Laban endang udah ditulis dalam Adat Moses, “Anang mampul mulut sapi lebuh iya ngindik gandum.” Kati Allah Taala bejakuka pasal sapi?
10 Enda ka Iya bejakuka pasal kitai? Utai nya endang ditulis ke kitai, laban orang ke ngeradu tanah enggau orang ke ngetau endang patut ngereja pengawa sida, laban sida ngarapka diri diberi ungkup ari utai ti ditanam.
11 Enti kami udah nanam benih roh ba kita, kati kami enda tau minta utai ari kita?
12  Enti orang bukai tau ngarapka diri bulih utai ari kita, kati kami enda besai agi hak tau bulih utai nya ari kita? Tang taja pia, kami nadai udah ngena hak nya, tang natka semua utai, ngambika kami enda nekul pejalai Berita Manah Kristus.
13 Kati kita enda nemu, orang ke bekereja dalam Rumah Sembiang, bulih pemakai ari Rumah Sembiang, lalu orang ke ngenjuk piring ba alta, bulih ungkup ari piring nya?
14 Baka nya mega Tuhan udah meri atur, ngeletak orang ke nusui Berita Manah patut bulih utai dikena beridup ari Berita Manah.
15 Tang aku nadai udah ngena hak nya, lalu aku pen ukai mega nulis surat tu kena aku ngambu hak nya ke aku empu. Manah agi aku mati, ari ke ngereja nya. Nadai orang tau ngerampas hak kena aku temegahka diri empu!
16 Enti aku nusui Berita Manah, aku enda tau temegahka nya, laban aku endang udah diasuh ngereja pengawa nya. Tulah meh aku enti aku enda nusui Berita Manah!
17 Laban enti aku ngereja pengawa nya ari peneka ati aku empu, aku tentu bisi upah, tang enti aku ngereja pengawa nya ukai ari peneka ati aku empu, reti nya aku diasuh Allah Taala ngereja pengawa nya.
18  Nya alai, nama upah aku? Semina tu aja: lebuh aku nusui Berita Manah, awakka aku enda minta bayar, enggai ke aku ngena semua hak aku ke bekereja ke Berita Manah.
19 Laban taja pen aku ukai ulun orang, tang aku udah ngaga diri nyadika ulun semua orang, ngambika aku tau bulih mayuh agi orang ke Kristus.
20  Ba orang Judah, aku baka orang Judah, ngambika aku ulih mai orang Judah ngagai Kristus. Ba orang ke di baruh Adat, aku nyadi baka orang ke di baruh Adat, taja pen aku ukai di baruh Adat, ngambika aku ulih mai orang ke di baruh Adat ngagai Kristus.
21 Ba orang ke ari luar Adat, aku baka orang ke ari luar Adat (taja pen aku ukai dilepaska ari adat Allah Taala, tang di baruh adat Kristus) ngambika aku ulih mai orang ke di luar Adat ngagai Kristus.
22 Ba orang ke lemi, aku baka orang ke lemi, ngambika aku ulih mai sida ngagai Kristus. Aku udah nyadi semua macham utai ke semua mensia, ngambika aku, ngena sebarang chara, ulih nyelamatka sekeda sida.
23 Aku ngereja semua nya ke Berita Manah, ngambika aku tau nerima berekat ari nya.
24 Kati kita enda nemu, orang ke belumba belanda endang mayuh, tang ka semina siku aja bulih prais? Nya alai, belanda meh kita ngambika kita bulih prais.
25 Genap iku orang ke belumba, enda tau enda disiplin diri empu. Sida ngereja nya ngambika sida bulih makota ti nemu abis, tang kitai ngulihka makota ti enda nemu abis.
26 Nya alai aku belanda terus ngagai adan. Aku enda belaban baka orang ke mukut angin,
27 tang aku mandam tubuh aku lalu ngaga iya nyadi ulun aku, enggai ke aku enda bulih prais lebuh aku udah nusui Berita Manah ngagai orang bukai.
 
Bagi 10
Jaku Tangkan Pasal Engkeramba
1  Aku enggai ke kita enda nemu, menyadi, semua aki ini kitai di baruh remang magang, lalu semua sida bejalai nengah tasik,
2  lalu semua sida dibaptisa magang nyadi nembiak Moses dalam remang enggau dalam tasik nya,
3  lalu semua sida makai roti roh nya
4 lalu ngirup siti aja ai roh, laban sida ngirup ari sigi batu roh ti nitihka sida, lalu batu nya Kristus.
5 Tang taja pia, Allah Taala enda lantang ati ngagai nyau ka semua bala sida, lalu bangkai sida ngachir ba sebelah menua puang
6 Semua utai tu nyadi chunto ke kitai, ngambika kitai enda inginka utai ti jai, baka sida.
7 Anang nyembah engkeramba, baka sekeda sida. Munyi ti udah ditulis, “Orang mayuh duduk makai ngirup lalu angkat betanda.”
8 Kitai enda tau ngereja pengawa ti kamah, baka sekeda sida, lalu dua puluh tiga ribu iku sida mati dalam sehari.
9  Kitai enda tau nguji Tuhan , baka sekeda sida, lalu sida mati dipantuk ular.
10 Lalu anang mutap, baka sekeda sida, lalu sida dibunuh Melikat Pemati.
11 Semua utai tu nyadi ba sida ngambika nyadika chunto ke kitai, lalu utai nya dituliska kena ngajar kitai, laban pengujung dunya udah datai ba kitai.
12 Nya alai enti kita ngumbai diri bediri tegap, bejaga kita ngambika kita enda rebah.
13 Nadai penguji ti udah diasaika kita enda udah diasaika semua orang. Allah Taala endang tau dikarapka, lalu Iya enda nejuka kita diuji lebih ari ti ulih ditatka kita; tang lebuh kita diuji, Iya deka meri kita jalai kena kita ngelepaska diri, ngambika kita tan natka penguji nya.
14 Nya alai, pangan ke dikerinduka aku, anang nyembah engkeramba.
15 Aku bejaku ngagai orang ke pintar. Peratika utai ti disebut aku.
16 Mangkuk berekat ti diberekatka kitai, kati nya enda nunjukka kitai bekunsi ngirup darah Kristus? Lalu roti ti dipechahka kitai, kati nya enda nunjukka kitai bekunsi makai tubuh Kristus?
17 Laban roti endang siti aja, kitai ke mayuh tu endang setubuh, laban semua kitai bela makai roti siti nya aja.
18 Peratika orang Israel. Kati orang ke makai piring nya ukai orang ke sama besaup ngereja pengawa ba alta?
19 Nama utai ti ku aku? Kati aku ngumbai pemakai ti diberi ngagai engkeramba nya bisi reti, tauka engkeramba empu bisi reti?
20  Ukai! Utai ti ku aku nya, piring ti diberi orang ke enda nangika Allah Taala, diberi sida ngagai antu, ukai ngagai Allah Taala. Aku enda nyagi kita besaum enggau antu.
21 Kita enda tau ngirup ari mangkuk Tuhan, lalu ngirup mega ari mangkuk antu. Kita enda tau makai ba mija Tuhan, lalu makai mega ba mija antu.
22 Tauka kitai endang sengaja nyungkak Tuhan chemburu? Kati kitai kering agi ari Iya?
23 “Semua utai tau dikereja magang,” tang ukai semua utai nya pulai ke penguntung. “Semua utai tau dikereja magang,” tang ukai semua utai nya ulih ngemansangka pengidup kitai.
24 Anang berundingka diri empu aja, tang berunding ke orang bukai.
25 Empa aja sebarang utai ti dijual ba kedai dagin, lalu anang betanyaka pasal utai nya ketegal pengasai ati kita,
26 laban “Dunya enggau semua utai ti dalam dunya endang enggi Tuhan.”
27 Enti orang ke enda arap mai kita makai, lalu kita deka makai enggau iya, empa aja sebarang utai ti dibantaika orang di mua kita, lalu anang betanyaka pasal utai nya ketegal pengasai ati kita.
28 Tang enti orang nyebut ngagai kita, “Utai tu udah dienjuk nyadika piring,” anang kita makai utai nya, ketegal orang ke udah madahka utai nya ngagai kita, enggau ketegal pengasai ati,
29 ketegal pengasai ati iya, nya utai ti ku aku, ukai ketegal pengasai ati kita. Laban nama kebuah aku ke tau makai sebarang utai, diperintah pengasai ati orang bukai?
30 Enti aku meri terima kasih ngagai Allah Taala ke utai ti diempa aku, nama kebuah orang tau mantah aku enti aku makai pemakai nya ngena sampi terima kasih?
31 Nya alai, nemuka kita makai tauka ngirup, tauka ngereja sebarang utai, kereja semua utai nya ke mulia Allah Taala.
32 Anang ngenusahka ati orang Judah tauka ati orang bansa bukai, tauka ati raban eklisia Allah Taala.
33 Tunda aja aku. Aku nguji ngelantangka ati semua orang dalam semua utai ti dikereja aku, ukai berundingka diri empu, tang berundingka semua orang, ngambika sida diselamatka.
 
Bagi 11
1  Nya alai, beteladan ba aku, baka aku ke beteladan ba Kristus.
 
Nudung Pala Lebuh Besembiang
2 Aku muji kita, laban kita seruran ngingatka aku dalam semua utai, lalu nitihka ajar ti udah diberi aku ngagai kita.
3  Tang aku deka ngasuh kita nemu, Kristus nyadi kepala semua lelaki, lalu laki nyadi kepala bini, lalu Allah Taala nyadi kepala Kristus.
4 Lelaki ke betudung pala lebuh iya besampi tauka benabi, ngemaluka pala iya,
5 tang indu ke enda betudung pala lebuh iya besampi tauka lebuh iya benabi, ngemaluka pala iya, laban nya sebaka reti enggau indu ke udah dikukur pala.
6 Enti indu enggai nudung pala diri, iya patut ngukur buk iya; tang enti indu malu ke buk diri dikukur, iya patut nudung pala diri.
7 Lelaki enda patut nudung pala diri, laban iya ngayanka gamal enggau mulia Allah Taala. Tang indu ngayanka mulia lelaki,
8 laban lelaki ukai digaga ari indu, tang indu ari lelaki.
9  Lalu lelaki ukai digaga ke indu, tang indu digaga ke lelaki.
10 Nya kebuah, enggau ketegal sida melikat, indu enda tau nadai tanda kuasa ba pala iya.
11 Tang, dalam Tuhan, indu enda tau nyeraraka diri ari lelaki, lalu lelaki pen enda mega tau nyeraraka diri ari indu.
12  Laban indu digaga ari lelaki, lalu lelaki diadaka indu; tang semua utai endang datai ari Allah Taala magang.
13 Awakka kita empu berunding: kati indu patut besampi ngagai Allah Taala enggau pala ti enda ditudung?
14 Kati kita enda nemu, lelaki ke panjai buk, ngemaluka diri empu?
15 Tang enti indu panjai buk, buk nya nyadika mulia iya. Laban buk nya diberi ngagai iya nyadika tudung pala iya.
16  Tang enti orang bisi ati deka bekelikuhka pasal tu, kitai tauka eklisia nadai adat asal bukai.
 
Pemakai Tuhan
17 Tang ba atur ti nangkanka tu, aku enda muji kita, laban lebuh kita begempuru, kita ukai ngereja utai ti badas, tang ngereja utai ti jai.
18 Laban, kena aku ngemunka jaku, lebuh kita begempuru besembiang, aku ninga kita bisi beserekang ari pangan diri. Aku arapka nya mimit.
19 Iya ti bendar, kita endang patut bisi bagi entara bala kita, ngambika kita nyamai ngelala sapa orang Kristian ke bendar, sapa ke ukai.
20 Lebuh kita begempuru, iya ti bendar kita ukai makai pemakai Tuhan.
21 Laban lebuh kita makai, tiap iku kita terus makai pemakai diri empu, lalu sekeda kita lapar, lalu sekeda mabuk.
22 Kati kita nadai rumah alai kita makai ngirup? Tauka, kita deka mechat eklisia Allah Taala, lalu ngemaluka orang ke nadai utai? Baka ni ku jalai aku bejaku ngagai kita tu? Kati aku patut muji kita? Sigi enda!
23 Laban aku udah nerima ari Tuhan utai ti diberi aku ngagai kita, iya nya, malam Tuhan Jesus dijual, Iya ngambi roti,
24 lalu lebuh Iya udah meri terima kasih, Iya mechahka roti nya, lalu bejaku, “Tu tubuh Aku ti diberi ke kita. Kereja tu kena ngingatka Aku.”
25 Baka nya mega, lebuh sida udah badu makai, Iya ngambi mangkuk, lalu bejaku, “Mangkuk tu sempekat baru ti ditanggam ngena darah Aku. Kereja tu genap kali kita ngirup iya, kena ngingatka Aku.”
26 Laban genap kali kita makai roti tu, lalu ngirup ari mangkuk tu, kita madahka pemati Tuhan, nyentuk ngagai Iya datai baru.
27 Nya alai, barang sapa makai roti tauka ngirup ari mangkuk Tuhan ngena jalai ti enda bebasaka Iya, deka bedosa ngelaban tubuh enggau darah Tuhan.
28 Peresa diri empu dulu; udah nya baru kita tau makai roti, lalu ngirup ari mangkuk nya.
29 Laban barang sapa makai enggau ngirup, tang enda ngelala tubuh Tuhan, ngukum diri empu.
30 Nya kebuah mayuh kita lemi sereta sakit, lalu sekeda udah mati.
31 Tang enti kitai meresa diri empu, kitai enda diakim.
32 Tang lebuh Tuhan ngakim kitai, Iya disiplin kitai, ngambika kitai enda diukum sama enggau dunya.
33 Nya alai, menyadi, lebuh kita begempuru makai, anti pangan diri.
34  Enti kita lapar, kita patut makai di rumah, ngambika lebuh kita begempuru, kita enda kena ukum. Pasal pekara bukai, aku deka mutarka nya lebuh aku datai ila.
 
Bagi 12
Pemeri Ti Diberi Roh Kudus
1 Nyadi pasal pemeri ti diberi Roh Kudus, menyadi, aku enggai ke kita enda nemu.
2  Kita nemu, lebuh kita agi nyadi orang kapir suba, ati kita tetarit lalu kita dibai tesat ngagai engkeramba ti bisu.
3  Nya alai aku dekaka kita nemu: nadai orang ke bejaku nitihka iring Roh Allah Taala kala nyebut “Awakka Jesus kena sumpah!” lalu nadai orang ulih nyebut “Jesus nya Tuhan,” enti enda ari iring Roh Kudus.
4 Nyadi pemeri endang mayuh macham, tang Roh siku aja.
5 Pengawa di dikereja endang mayuh macham, tang Tuhan siku aja.
6 Jalai ngereja pengawa endang mayuh macham, tang Allah Taala siku aja ke meri penau ngagai genap iku orang kena sida ngereja pengawa.
7 Siku-siku diberi tanda kena mandangka Roh Kudus, ke penguntung semua.
8 Siku diberi ulih Roh nya penemu-dalam, lalu siku diberi penemu ulih Roh nya mega,
9 siku diberi pengarap ulih Roh nya, siku diberi pemeri ngeraika orang ulih Roh nya,
10 siku diberi pemeri ngereja kereja ajih, siku diberi pemeri benabi, siku diberi pemeri ngelala roh, ngagai siku, pemeri bejaku ngena mayuh macham jaku ti nyelai, ngagai siku, pemeri nyalinka jaku.
11 Semua pengawa nya dikereja Roh siku nya aja, ke meri pemeri ngagai genap iku orang, nitihka peneka Roh nya Empu.
 
Siti Aja Tubuh, Tang Perengka Mayuh
12 Baka reti tubuh: taja pen perengka tubuh nya mayuh, tang semua sida nya nyadika raban siti tubuh nya. Baka nya mega Kristus.
13  Laban semua kitai dibaptisa ke dalam siti tubuh, nemuka kitai nya orang Judah tauka orang bansa bukai, ulun tauka ukai ulun, lalu semua kitai bela diberi Roh siku nya aja ke diirup kitai.
14 Iya ti bendar, tubuh ukai digaga ari siti aja perengka, tang ari mayuh bengkah perengka.
15 Enti kaki nyebut, “Laban aku ukai jari, nya alai aku ukai raban tubuh nya,” jaku nya enda ulih ngasuh kaki nya badu agi nyadi perengka tubuh nya.
16 Lalu enti pending nyebut, “Laban aku ukai mata, nya alai aku ukai raban tubuh,” jaku nya enda ulih ngasuh pending nya badu agi nyadi perengka tubuh nya.
17 Enti sema semua tubuh nya semina mata aja, nama kena iya ninga? Enti semua tubuh nya semina pending aja, nama kena iya nyium utai?
18 Tang kitai sama nemu, Allah Taala udah ngatur semua perengka dalam tubuh nya, genap iti sida, nitihka peneka Allah Taala Empu.
19 Enti sema tubuh nya digaga ari siti aja perengka, dini deh alai tubuh?
20 Nya alai, perengka tubuh endang amat mayuh, tang tubuh siti aja.
21 Nya alai, mata enda tau nyebut ngagai jari, “Aku enda begunaka nuan!” Pala pen enda mega tau nyebut ngagai kaki, “Aku enda begunaka nuan!”
22 Utai ti patut dikereja nya, perengka tubuh ti baka ke lemi, enda ulih enda diguna,
23 lalu perengka ti kurang agi dibasa kitai, patut balat agi dibasa kitai, lalu perengka ti enda patut diayanka kitai, patut dilamun kitai enggau manah,
24 tang perengka ti manah agi gaya enda ibuh dibasa kitai baka nya. Tang Allah Taala udah ngatur perengka tubuh nya baka nya, meri basa ti besai ngagai perengka ti kurang agi dibasa,
25 ngambika nadai penyerekang dalam tubuh nya, tang semua perengka bela sama nemu ibuhka pangan diri.
26 Enti siti ari perengka nya pedis, semua perengka bela pedis magang enggau iya. Enti siti ari perengka nya kena puji, semua perengka tubuh nya deka rami gaga ati enggau iya.
27 Kita nya tubuh Kristus, lalu genap iku kita nya perengka tubuh nya.
28  Lalu Allah Taala udah ngeletak dalam eklisia, kesatu rasul, kedua nabi, ketiga pengajar, udah nya orang ke ngereja kereja ajih, orang ke ngeraika orang, orang ke nulung orang, orang ke nyadi tuai, orang ke bejaku ngena jaku ti nyelai.
29 Kati semua sida nya rasul magang? Kati semua sida nya nabi magang? Kati semua sida nya pengajar magang? Kati semua sida nya ngereja kereja ajih?
30 Kati semua sida nya bisi pemeri ngeraika orang? Kati semua sida nya bejaku ngena jaku ti nyelai? Kati semua sida nya ulih nyalinka jaku?
31 Tang kita patut inginka pemeri ti besai agi. Aku deka nunjukka jalai ti pemadu manah ke kita.
 
Bagi 13
Pengerindu
1 Enti aku bejaku ngena mayuh macham jaku mensia, enggau ngena jaku melikat, tang nadai pengerindu, aku tu gong ti inggar dipangkung, tauka luching ti sering-sering.
2  Lalu enti aku bisi kuasa kena benabi  lalu nemu semua misteri, sereta nemu semua penemu, lalu enti aku bisi pengarap kena nginsitka bukit, tang nadai pengerindu, aku nadai guna.
3 Enti aku meri semua utai aku ngagai orang, lalu enti aku nyerahka tubuh aku ngambika ditunu, tang nadai pengerindu, nya nadai pulai ke penguntung aku.
4 Pengerindu nya liat ati, nelap, enda kepapas, enda temegah tauka sumbung,
5 tauka jai jaku enggau orang. Pengerindu enda berundingka diri empu, enda jampat ringat tauka bedendam.
6 Pengerindu enda gaga ati ke penyalah, tang gaga ati ke utai ti bendar.
7  Pengerindu natka semua utai, arapka semua utai, ngadang semua utai, tan dalam semua utai.
8 Pengerindu enda nemu abis. Tang jaku ti benabi nemu abis; jaku ti nyelai nemu abis; penemu nemu abis.
9 Laban kitai semina nemu mimit aja, lalu jaku ti benabi endang enda kala chukup,
10 tang lebuh utai ti pemadu badas datai, utai ti enda chukup badas deka lesap magang.
11 Lebuh aku agi mit, aku bejaku baka anak mit, aku berunding baka anak mit, aku bekira baka anak mit. Lebuh aku nyau besai tuai, aku muai semua perangai anak mit.
12 Kitai diatu semina meda ayas aja, baka ke meda dalam cheremin; ila baru kitai deka betemu betunga mua. Diatu aku semina nemu mimit aja; ila baru aku deka nemu semua utai, baka Allah Taala ke nemu semua utai pasal aku.
13 Diatu utai tiga bengkah tu agi mengkang: pengarap, pengadang, enggau pengerindu. Tang utai ti pemadu besai nya pengerindu.
 
Bagi 14
Pemeri Ari Roh Kudus
1 Ulihka pengerindu, lalu bebendar minta pemeri ari Roh Kudus, kelebih agi pemeri kena nusui pesan Allah Taala.
2 Laban orang ke bejaku ngena jaku ti nyelai, ukai bejaku ngagai mensia, tang bejaku ngagai Allah Taala; laban nadai orang meretika utai ti disebut iya, laban iya nyebut utai ti enda ditemu reti ngena jaku Roh.
3 Tang orang ke nusui pesan Allah Taala, bejaku ngagai mensia, kena ngering, meransang sereta ngelantangka sida.
4 Orang ke bejaku ngena jaku ti nyelai, semina mai penguntung ngagai diri empu, tang orang ke nusui pesan Allah Taala, mai penguntung ngagai semua raban eklisia.
5 Aku dekaka semua kita bejaku ngena jaku ti nyelai, tang aku lebih agi dekaka kita nusui pesan Allah Taala Orang ke benabi beguna agi ari orang ke bejaku ngena jaku ti nyelai enti orang nadai nerangka reti jaku nya ngambika semua raban eklisia bulih penguntung ari nya.
6 Enti aku datai ngagai kita, menyadi, lalu bejaku ngena jaku ti nyelai, baka ni ku aku ulih mai penguntung ngagai kita, enti aku enda mai pemandang, penemu, tauka pesan Allah Taala, tauka jaku ajar?
7 Utai tu baka reti pekekas musik; enti pekekas musik baka kesuling tauka belikan enda ditebah enggau menyana, baka ni ku kitai nemu musik ti ditebah?
8 Lalu enti terumpit enda nyaris disepu, sapa deka nyendiaka diri mansang beperang?
9 Baka nya mega kita. Enti kita bejaku ngena jaku ti nyelai ti enda ditemu orang reti, baka ni ku orang nemu utai ti disebut kita? Laban kita semina bejaku ngagai angin.
10 Bansa jaku dalam dunya tu endang mayuh, lalu semua sida nya bisi reti magang.
11 Enti aku enda nemu reti jaku ti disebut orang, aku enggau orang nya baka orang kampar enggau pangan diri.
12 Baka nya mega kita. Laban kita inginka pemeri ari Roh Kudus, kita patut lebih agi inginka pemeri ti tau dikena ngemansangka eklisia.
13 Nya alai, orang ke bejaku ngena jaku ti nyelai, patut besampi minta kuasa kena nerangka utai ti disebut.
14 Laban enti aku besampi ngena jaku ti nyelai, roh aku amat besampi, tang runding aku enda.
15 Nya alai, nama utai ti patut dikereja aku? Aku deka besampi ngena jaku Roh, tang aku deka mega besampi ngena runding aku. Aku deka belagu ngena lagu Roh, tang aku deka mega belagu ngena runding aku.
16 Enti kita meri terima kasih ngagai Allah Taala ngena jaku Roh, baka ni ku orang ke ukai raban eklisia ulih nyebut “Amin” ngagai sampi terima kasih nya enti iya enda nemu utai ti disebut kita?
17 Kita amat besampi ngagai Allah Taala, tang orang nya nadai bulih penguntung ari sampi nya.
18 Aku meri terima kasih ngagai Allah Taala laban aku bejaku ngena jaku ti nyelai lebih ari semua kita;
19 tang dalam gerija, aku deka agi bejaku ngena lima iti leka jaku ngena runding aku, ngambika ngajar orang bukai, ari ke nyebut seribu leka jaku ngena jaku ti nyelai.
20 Menyadi, anang berunding baka anak mit. Ba pekara ti jai, awakka kita baka anak mit, tang ba jalai kita berunding, kita patut nyadi orang ke besai tuai.
21 Utai tu bisi ditulis dalam Bup Adat, “Aku deka bejaku ngagai orang tu ngena jaku ti nyelai enggau ngena mulut orang kampar, Aku deka bejaku ngagai orang tu tang taja pia, sida enggai mendingka Aku,” ku Tuhan bejaku.
22 Nya alai, bejaku ngena jaku ti nyelai nya ukai tanda ke orang ke arap, tang ke orang ke enda arap. Tang nusui pesan Allah Taala nya ukai ke orang ke enda arap, tang ke orang ke arap.
23 Nya alai, enti semua raban gerija begempuru lalu semua orang bejaku ngena jaku ti nyelai, lalu enti orang luar, tauka orang ke ukai orang Kristian tama, enda ke sida deka ngumbai kita gila?
24 Tang enti semua orang nusui pesan Allah, lalu orang ke ukai orang Kristian tauka orang luar tama, sida tentu deka nemu diri orang ke bedosa ari utai ti disebut kita, lalu sida deka madahka pasal diri empu,
25 madahka resia ti dalam ati sida, lalu nyungkurka diri nyembah Allah Taala, lalu bejaku, “Allah Taala amat bisi enggau kita.”
 
Atur Besembah Dalam Gerija
26  Nama utai ti patut dikereja deh, menyadi? Lebuh kita begempuru besembiang, siku bepantun, siku mai jaku ajar, siku mai pemandang ari Allah Taala, siku bejaku ngena jaku ti nyelai, tauka nerangka reti jaku nya. Semua utai nya dikereja kena ngeringka eklisia.
27 Enti orang bejaku ngena jaku ti nyelai, awakka semina dua tauka tiga iku aja abis mayuh tau bejaku, udah badu siku, nya baru siku, lalu awakka siku nerangka reti utai ti disebut.
28 Tang enti orang dia nadai nerangka reti jaku nya, awakka sida badu agi bemunyi, tang semina bejaku ngagai diri empu enggau ngagai Allah Taala.
29 Awakka dua tauka tiga iku nabi bejaku, lalu awakka orang bukai berundingka utai ti disebut.
30 Enti orang ke duduk dia bisi pemandang ari Allah Taala, orang ke benabi nya patut ngetu bejaku, lalu nejuka orang ke bisi pemandang nya bejaku.
31 Laban semua kita tau nusui pesan Allah Taala, udah badu siku, nya baru siku, ngambika semua belajar ari nya lalu diperansang.
32 Roh nabi endang dikuasa nabi nya empu,
33 laban Allah Taala ukai Allah Taala ti ngasuh utai charut, tang meri pemaik. Baka ti nyadi dalam semua eklisia nembiak Tuhan,
34 sida ke indu enda tau bemunyi dalam gerija. Sida enda tau bejaku, tang seruran nunduk, munyi ti disebut Adat.
35 Enti sida keran deka betanyaka pasal utai, sida patut betanya ngagai laki sida di rumah. Malu amat meda indu bejaku dalam gerija.
36 Kati pesan Allah Taala bepun ari kita? Tauka semina kita aja ke udah nerima pesan nya?
37 Enti kita ngumbai diri nabi, tauka ngumbai diri bisi pemeri ari Roh Kudus, awakka kita ngaku utai ti ditulis aku ngagai kita endang amat pesan ari Tuhan.
38 Enti iya enggai ibuhka nya, anang ibuhka iya.
39 Nya alai, menyadi, kita patut keran deka benabi, tang anang nagang orang bejaku ngena jaku ti nyelai;
40 tang semua utai patut dikereja enggau menyana sereta meruan atur magang.
 
Bagi 15
Pengangkat Kristus Ari Mati
1 Nyadi diatu, menyadi, aku deka ngasuh kita ngingatka Berita Manah ti udah ditusui aku ngagai kita, ti udah diterima kita, ti alai kita bediri tegap.
2 Berita Manah nya nyelamatka kita, enti kita bepegai teguh ba jaku ti diajar aku ngagai kita -- nyangka meh kita semina arap ngapa.
3 Laban aku meri ngagai kita utai ti pemadu beguna, ti udah diterima aku, iya nya, Kristus mati ketegal dosa kitai, munyi ti ditulis dalam Bup Kudus.
4  Iya dikuburka, lalu diangkatka idup baru ba hari ti ketiga, munyi ti ditulis dalam Bup Kudus.
5 Iya lalu pegari di mua Peter, lalu udah nya pegari di mua semua sida ke dua belas iku.
6 Udah nya Iya pegari di mua lebih lima ratus iku murid Iya sereta sekali. Mayuh sida nya agi idup diatu, taja pen sekeda udah mati.
7 Udah nya Iya pegari di mua James, lalu udah nya, di mua semua sida rasul.
8  Ke penudi iya, Iya mega pegari di mua aku, ke ada salah maya.
9  Laban aku tu rasul ke pemadu mit ari semua bala rasul, lalu enda patut dikumbai rasul, laban aku udah merinsaka eklisia Allah Taala.
10 Tang ulih pengasih Allah Taala, aku nyadi aku ke diatu, lalu Iya enda lebu kasihka aku. Sigi amat enda lebu laban aku udah bebendar agi bekereja ari sida rasul ti bukai, taja pen ukai aku empu ke bekereja, tang pengasih Allah Taala ti dalam aku.
11 Nya alai, nemuka orang ke bekereja nya aku tauka sida, kami mai Berita Manah lalu kita arap.
 
Pengangkat Ari Mati
12 Enti kami madahka Jesus udah diangkatka ari mati, baka ni ku sekeda kita tau ngumbai orang nadai diangkatka ari mati?
13 Enti nadai pengangkat ari mati, reti nya Kristus nadai udah diangkatka ari mati;
14 lalu enti Kristus nadai udah diangkatka ari mati, reti nya pesan ti ditusui kami nadai guna, lalu pengarap kita nadai guna.
15 Lebih ari nya, kami empu lalu ditemu nyebut utai ti bula pasal Allah Taala, laban kami madahka Allah Taala udah ngangkatka Kristus ari mati, enti Iya amat nadai udah ngangkatka Kristus ari mati, enti orang ke mati amat enda diangkatka idup baru.
16 Laban, enti orang ke mati enda diangkatka idup baru, Kristus pen enda mega diangkatka idup baru.
17 Lalu enti Kristus nadai udah diangkatka idup baru, reti nya pengarap kita nadai guna, lalu kita agi mengkang dalam dosa kita.
18  Reti nya orang ke udah mati dalam Kristus, udah lenyau magang.
19 Enti pengadang kitai dalam Kristus semina ke pengidup kitai di dunya tu aja, reti nya, kami tu patut lebih agi dikesinuka ari semua orang bukai.
20 Tang iya ti bendar, Kristus udah diangkatka ari mati, nyadi orang ke terubah diangkatka idup baru ari bala orang ke udah mati.
21 Laban enti pemati datai ulih siku mensia, pengangkat ari mati mega datai ulih siku mensia,
22 laban semua mensia mati dibai Adam, nya alai semua mensia deka idup dibai Kristus.
23 Tang genap iku deka diangkatka begintir-gintir: keterubah, Kristus ke buah bungas, lalu lebuh Kristus datai baru, nya baru bala nembiak Kristus.
24 Udah nya baru pengujung datai, lebuh Kristus nyerahka Perintah ngagai Allah Taala ti Apai, lebuh Iya udah ngerusak semua pemerintah, perintah enggau kuasa.
25 Laban Iya enda tau enda merintah nyentuk ngagai maya Allah Taala udah ngengkahka semua munsuh Iya di baruh kaki Iya.
26 Munsuh ti pemadu dudi dirusak nya pemati.
27  Laban “Allah Taala udah ngengkahka semua utai di baruh kaki Kristus.” Tang leka jaku “semua utai” sigi terang enda nyengkaum Allah Taala Empu, ke ngengkahka semua utai di baruh kaki Kristus.
28  Lebuh semua utai udah diengkahka magang di baruh Kristus, nya baru Anak Allah Taala Empu, deka diengkahka di baruh Allah Taala, ke udah ngengkahka semua utai di baruh Kristus, ngambika Allah Taala nyadi semua dalam semua.
29  Enti nadai pengangkat ari mati, nama kebuah orang dibaptisa ngarika orang ke mati? Enti orang ke mati enda diangkatka idup baru, nama kebuah orang dibaptisa ngarika sida?
30 Lalu nama kebuah kami berambunka nyawa diri tiap jam?
31 Aku mati tiap hari, menyadi. Jaku tu amat, baka pengamat aku ke temegahka kita dalam Jesus Kristus Tuhan kitai.
32  Enti aku udah belaban di Epesus nitihka juluk ati mensia baka ke ngelaban jelu babas, nama penguntung ulih aku ari nya? Enti orang ke mati enda diangkatka idup baru, “Aram kitai makai ngirup, laban pagila kitai mati.”
33 Anang nejuka orang nipu kita: “Orang ke jai ngerusak moral ti menyana.”
34  Anang enda nemu berunding, lalu badu agi bedosa. Aku nyebut tu kena aku ngemaluka kita laban sekeda kita nadai penemu pasal Allah Taala.
 
Tubuh Ti Diangkatka Idup Baru
35 Tang sekeda orang deka nanya, “Baka ni ku orang ke udah mati diangkatka idup baru? Baka ni ku gaya tubuh sida lebuh sida diangkatka idup baru?”
36 Beli! Utai ti ditanam enda ulih idup enti iya enda dulu mati.
37 Lalu utai ti ditanam nya ukai tubuh ti deka datai, tang leka aja, nemuka utai nya gandum, tauka utai bukai.
38  Tang Allah Taala meri iya tubuh nitihka peneka Allah Taala Empu. Semacham leka, semacham ga tubuh.
39 Ukai semua isi nya sebaka. Isi mensia lain ari isi jelu, ari isi burung, enggau ari isi ikan.
40 Utai ti di serega bisi tubuh, lalu utai ti di dunya mega bisi tubuh, tang pemanah gaya tubuh ti di serega enda sebaka enggau pemanah gaya tubuh ti di dunya.
41 Mata hari bisi pemanah gaya ke diri empu. Bulan bisi pemanah gaya ke diri empu. Bintang bisi pemanah gaya ke diri empu, lalu pemanah gaya bintang sigi-sigi endang enda sebaka.
42 Baka nya mega pasal pengangkat ari mati. Utai ti ditanam  nya tubuh ti nemu mati, tang tubuh ti diangkatka idup baru enda nemu mati agi.
43 Lebuh iya ditanam, iya nadai dibasa, tang iya diangkatka dalam mulia. Iya lemi lebuh iya ditanam, tang lebuh iya diangkatka idup baru, iya bisi kuasa.
44 Lebuh iya ditanam, iya endang tubuh dunya, tang lebuh iya diangkatka idup baru, iya nyadi tubuh roh. Enti tubuh dunya amat bisi, tubuh roh mega bisi.
45 Munyi ti ditulis, “Mensia ti keterubah, iya nya Adam, nyadi mensia ke idup”, tang Adam ti penudi nya Roh ti meri pengidup.
46 Tang ukai tubuh roh ke dulu datai, tang tubuh dunya, udah nya baru tubuh roh.
47 Mensia ti keterubah, ke digaga ari amau, datai ari dunya, tang mensia ti kedua nya datai ari serega.
48 Semua orang ke digaga ari amau, sebaka enggau iya ke digaga ari amau, tang orang serega sebaka tubuh enggau orang ke datai ari serega.
49 Baka kitai ke sebaka gamal enggau mensia ti digaga ari amau, baka nya mega kitai deka sebaka gamal enggau Orang ke datai ari serega.
50 Utai ti ku aku, menyadi, nya baka tu: isi enggau darah enda ulih bempu Perintah Allah Taala, lalu utai ti nemu mati, enda ulih bempu utai ti enda nemu mati.
51 Dinga kita, aku deka madahka siti misteri ngagai kita! Ukai semua kitai deka mati , tang semua kitai deka diubah,
52 tekala nya, dalam sekejap mata, lebuh terumpit ti penudi disepu. Laban terumpit nya deka disepu, lalu semua orang ke mati deka diangkatka idup baru nyadi orang ke enda nemu mati agi, lalu kitai deka diubah.
53 Laban tubuh ti nemu buruk tu enda tau enda diubah nyadi tubuh ti enda nemu buruk, lalu tubuh ti nemu mati, enda tau enda diubah nyadi tubuh ti enda nemu mati.
54 Lebuh tubuh ti nemu buruk tu diubah nyadi tubuh ti enda nemu buruk, lalu tubuh ti nemu mati diubah nyadi tubuh ti enda nemu mati, nya baru jaku ti ditulis dalam Bup Kudus dikamatka: “Pemati udah dirusak, pemenang udah ulih.”
55 “O pemati, dini alai pemenang nuan? O pemati, dini alai penyengat nuan?”
56 Penyengat pemati nya dosa, lalu dosa bulih kuasa ari Adat.
57 Tang beri terima kasih ngagai Allah Taala ke udah meri kitai pemenang ulih Jesus Kristus Tuhan kitai!
58 Nya alai, menyadi, bediri tegap, anang bekinsit, seruran bebendar gawa ke Tuhan, laban kita nemu, kita enda lebu gawa ke Iya.
 
Bagi 16
Pemeri Ti Diberi Ngagai Orang Kristian Ke Suntuk
1  Ngenang pasal duit tulung ti diberi ngagai nembiak Tuhan: kereja aja utai nya baka ti diasuh aku kereja raban eklisia di Galatia.
2 Genap hari ti keterubah  tiap minggu, genap iku kita patut ngalau lalu naruh duit nitihka pemayuh ti ulih kita, ngambika kita enda ibuh begumpulka duit lebuh aku datai.
3  Lalu lebuh aku datai, aku deka meri surat ngagai orang ke dikemendarka kita, lalu ngasuh sida mai pemeri kita ngagai Jerusalem.
4 Enti kita ngira aku patut mega mansang kin enggau sida, awakka sida nyempulang aku.
 
Perambu Pejalai Paul
5 Aku deka nemuai ngagai kita lebuh aku udah nemuai ngagai menua Masedonia, laban aku endang deka bejalai nengah menua nya,
6 lalu nyangka aku deka diau lama mimit enggau kita, nyangka sepemanjai musin chelap, ngambika kita ulih nulung nyendiaka aku nampung pejalai aku ngagai sebarang endur aku deka.
7  Aku enggai semina ngelansa aja betemu enggau kita diatu, tang ngarapka diri ulih diau lama mimit enggau kita, enti nya peneka Tuhan.
8  Tang aku deka diau di Epesus ditu nyentuk ngagai hari Pentikos,
9 laban pintu udah ditukangka alai aku ngereja pengawa ti manah, taja pen mayuh orang nyakal aku.
10 Enti Timoti datai, anang ngasuh iya nangi begulai enggau kita, laban iya bekereja ke Tuhan, baka aku empu.
11 Nya alai anang nejuka orang ngeleseka iya. Tulung iya mupuk enggau selamat, ngambika iya ulih mulaika diri ngagai aku, laban aku ngadang iya pulai kitu baru sama enggau orang Kristian ti bukai.
12 Nyadi pasal menyadi kitai Apollos, aku udah bebendar ngasuh iya nemuai ngagai kita sama enggau menyadi kitai ti bukai, tang iya apin deka nemuai ngagai kita diatu. Iya deka nemuai lebuh iya bisi peluang.
 
Jaku Ti Penudi
13 Selalu bejaga, bediri tegap dalam pengarap, berani sereta kering.
14 Kereja semua utai dalam pengerindu.
15  Menyadi, kita nemu sida Stepanas sebilik endang orang ke terubah-rubah nyadi orang Kristian di menua Akaia, lalu sida udah, enggau ati ti angkun, nyerahka diri bekereja ke nembiak Tuhan.
16 Aku meransang kita nulung orang ke baka nya, sereta nulung semua orang bukai ke sama gawa lalu bekereja enggau sida.
17 Aku balat gaga ngelaluka penatai Stepanas, Portunatus, enggau Akaius laban sida tiga udah bekereja nganti kita betulungka aku,
18 laban sida ngelantangka ati aku, enggau ngelantangka ati kita. Orang ke baka nya patut dikingatka kitai.
19 Semua eklisia di menua Asia ngirumka tabi basa ngagai kita. Akuila seduai Prisila enggau raban eklisia ke begempuru dalam rumah seduai iya, ngirumka tabi basa dalam nama Jesus Kristus.
20 Semua bala menyadi ditu bela ngirumka tabi basa. Beri tabi pengerindu ngagai pangan diri.
21 Aku, Paul, nulis jaku tabi tu ngena jari aku empu.
22 Awakka orang ke enda rinduka Tuhan, ditinggang sumpah. Datai meh Nuan, Tuhan!
23 Awakka pengasih Tuhan Jesus meruan enggau kita.
24 Pengerindu aku meruan enggau kita dalam Jesus Kristus. Amin.