HABAKUK
 
Jaku Pemuka
Nabi Habakuk mai jaku iya ba semak ujung abad ti ketujuh sebedau pengada Jesus, lebuh maya orang Babilon megai perintah. Iya balat amat enda lantang ati meda orang ke jai mangah enggau orang Israel, lalu iya nanya ngagai TUHAN, “Nama kebuah Nuan enda bemunyi lebuh sida ngerusak orang ke lebih agi lurus ari sida empu?” (1.13). TUHAN nyaut, madahka Diri deka malas ba maya ti dipilih Iya. Tang ba maya ti diatu, “Sida ke lurus deka idup, laban sida tetap ati ngagai Allah Taala.” (2.4).

Bup tu lalu diujungka enggau jaku ti madahka orang ke enda lurus deka diukum. Bup tu lalu disimpul ngena masmur ti ngemesaika kuasa Allah Taala, sereta madahka nabi nya deka mengkang arap.
 
Ripih Isi Bup Tu
Serebana Habakuk, enggau saut TUHAN (1.1-2.4)
Ukum ke orang ke enda lurus (2.5-20)
Sampi Habakuk (3.1-19)
 
Bagi 1
1 Tu pesan ti dipadahka TUHAN ngagai nabi Habakuk.
 
Habakuk Serebanaka Atur Ti Enda Lurus
2 O TUHAN, ni pengelama aku enda tau enda ngangau minta tulung, baru Nuan deka mending, lalu ngelepaska kami ari orang ke mangah tu?
3 Nama kebuah Nuan ngasuh aku meda penyalah enggau penusah ti baka tu? Baka ni ku Nuan tan meda penyalah ti baka tu? Aku dikelingi pengerusak enggau penusah, lalu orang belaban sereta belaya.
4 Adat enda terit sereta nadai guna, lalu atur ti lurus endang enda kala dipejalaika. Orang ke jai ngelingi orang ke lurus. Nya alai atur ti lurus ditunsangka magang.
 
Saut Ari TUHAN
5 Udah nya TUHAN lalu bejaku ngagai bala nembiak Iya, “Peratika semua bansa ti ngelingi kita. Kita deka tekenyit ati ke utai ti dipeda kita, laban Aku deka ngereja siti utai lebuh rambau kita, ti mar dikarapka kita enti utai nya dipadahka ngagai kita.
6 Aku ngasuh orang Babilon, orang ke mangah sereta enda nemu jenuh nya, megai kuasa. Sida bejalai ngagai semua endur di dunya tu ngalahka menua bukai.
7 Sida ngasuh orang nangi sereta takut, lalu ari penyumbung sida, sida ngumbai semua utai ti dikereja sida ngena magang.
8 “Kuda sida laju agi ari engkuli, mangah agi ari ukui kampung ti lapar. Bala soldadu sida ke nepan kuda, datai ari menua ti jauh. Kuda sida ngerumbak tanah. Sida nyambar, baka menaul ti nyambarka utai ti deka diempa sida.
9 “Bala soldadu sida nyerang lalu ngalah, lalu semua orang bela takut magang lebuh sida datai. Orang ke ditangkap sida ngemayuh igi pasir.
10 Sida enda bebasaka raja, lalu ngeleseka bala pemesai. Nadai kuta ulih mempang sida. Sida nugungka tanah ba tisi kuta, lalu ngalahka kuta nya.
11 Udah nya sida majakka pejalai sida baka ribut. Kuasa sida empu nyadika petara sida.”
 
Habakuk Serebana Baru Ngagai TUHAN
12 TUHAN, kenyau ari pun, Nuan endang Allah Taala. Nuan Allah Taala aku. Nuan kudus sereta meruan belama iya. TUHAN Allah Taala enggau Penyaga aku, Nuan udah milih orang Babilon, lalu ngasuh sida kering ngambika sida ulih ngukum kami.
13 Tang baka ni ku Nuan tan meda orang ke aum-juak, ti jai tu? Mata Nuan kelalu kudus merening ngagai penyai, lalu Nuan enda tan meda orang ngereja penyalah. Nya alai, nama kebuah Nuan enda bemunyi lebuh sida ngerusak orang ke lurus agi ari sida?
14 Baka ni ku Nuan ngaga mensia baka ke enggau ikan, tauka enggau bala indu utai ti nadai raja?
15 Orang Babilon nangkap orang ngena ginti baka ke nangkap ikan. Sida ngirit orang ngena jala, lalu manjung gaga ati ke orang ke ditangkap sida!
16 Indah pukat sida deh abis disembah sida, lalu sida ngenjuk piring ngagai pukat sida, laban pukat sida nya meri sida utai ti pemadu manah.
17 Kati sida deka ngena pedang sida belama iya, lalu majak ngerusak semua bansa bukai enggau nadai pengasih?
 
 
Bagi 2
TUHAN Nyaut Habakuk
 1 Aku deka niki menara ti alai aku jaga, lalu nganti TUHAN madahka ngagai aku utai ti deka diasuh Iya sebut aku, enggau saut ari Iya pasal serebana aku.
2 Ku TUHAN nyaut aku: “Tuliska enggau terang ba batu-tulis utai ti dipadahka Aku ngagai nuan, ngambika utai nya nyamai dibacha.
3  Tuliska utai nya, laban utai nya apin dikamatka diatu. Tang maya deka datai enda lama da agi, alai utai ti dipadahka Aku ngagai nuan, deka dikamatka. Utai nya baka ke lubah nyadi, tang anti aja utai nya. Iya tetap deka nyadi, lalu iya enda masau jam.
4  Tu pesan nya: ‘Orang ke jai enda ulih idup, tang orang ke lurus deka idup ngena pengarap sida.’ “
 
Ukum Ke Orang Ke Enda Lurus
5 Pengaya nemu nipu. Orang ke amu endang sumbung sereta kasak-kasak, enda nemu puas ati baka pemati. Nya kebuah sida ngalahka menua siti lalu udah nya ngalahka menua siti.
6 Orang ke dialahka sida deka ngeleseka sida. Ku orang ke dialahka sida bejaku, “Kita ngerampas utai orang, tang kita deka tulah! Ni pengelama kita deka ngiga pengaya mejalka orang mayar utang sida?”
7 Tang sebedau kita nemu diri, kita ke udah ngalahka orang bukai, deka mega berutang lalu dipejalka mayar anak duit nya. Munsuh deka datai, lalu kita getar-getar. Sida deka ngerumpak utai kita!
8 Kita udah ngerumpak utai orang ari mayuh bengkah bansa, tang diatu sida ke agi idup deka ngerumpak utai kita, laban kita udah munuh orang, laban kita udah kasar enggau orang di dunya tu, sereta kasar enggau nengeri sida.
9 Tulah meh kita ke udah ngaga ruang bilik kita kaya-raja ngena utai ti dirampas kita, lalu kita udah nguji ngaga rumah kita likun ari utai ti tau nganu!
10 Tang pelan kita udah ngemaluka ruang bilik kita. Pengawa kita ke ngerusak mayuh bengkah bansa, deka ngerusak kita empu.
11 Indah batu ti dikena ngaga kuta deh nemu nyabak ngelaban kita, lalu kasau ngelembungka sabak nya.
12 Tulah meh orang ke nirika nengeri beduduk ba penyalah, lalu ngaga nengeri nya beduduk ba pengawa kita ke bebunuhka orang.
13 Bansa ti dialahka kita ngelelakka diri ngereja pengawa ti nadai guna, lalu semua utai ti udah digaga sida abis retung diempa api. TUHAN ti Pemadu Bekuasa Empu ti udah ngereja nya.
14 Tang dunya deka penuh laban penemu pasal mulia TUHAN, baka tasik ti penuh laban ai.
15 Tulah meh kita ke ngemalu sereta ngeleseka pangan lebuh kita ringat; kita ngasuh sida guir-guir baka ke mabuk, ngambika kita ulih meda sida telanjai.
16 Kita empu deka dikeleseka, ukai dibasa. Kita empu deka ngirup lalu guir-guir. TUHAN deka ngasuh kita ngirup mangkuk ukum kita empu, lalu kita deka dipechat, enda dibasa agi.
17 Kita udah berimba utan di menua Lebanon. Diatu kita empu deka ditebang. Kita udah bebunuhka jelu dalam utan nya. Diatu jelu babas deka ngemba kita. Utai nya deka nyadi laban kita udah bebunuhka orang, enggau laban kita udah kasar enggau mensia di dunya tu, sereta kasar enggau nengeri sida.
18 Nama guna engkeramba? Engkeramba nya semina utai ti digaga mensia, lalu iya nadai madahka utai bukai, tang semina pemula aja. Nama penguntung orang ke ngaga engkeramba enti iya manggaika pengarap iya ba petara ti enda nemu bejaku!
19 Tulah meh kita ke bejaku ngagai repik kayu, “Dani!” tauka bejaku ngagai tekang batu, “Angkat!” Kati engkeramba ulih mandangka utai ngagai kita? Iya nyangka abis dibalut pirak enggau emas, tang iya nadai seput.
20 Tang TUHAN diau dalam Rumah Sembiang Iya ti kudus. Awakka semua mensia di dunya tu diau enda engkeretik di mua Iya.
 
Bagi 3
 Sampi Habakuk
1 Tu sampi nabi Habakuk:
2 O TUHAN, aku bisi udah ninga pasal utai ti udah dikereja Nuan lalu aku nangi. Diatu kereja baru ba rambau kami tu utai ti udah dikereja Nuan dulu menya. Kasihka kami, taja pen Nuan ringat.
3 Allah Taala datai baru ari Edom. Allah Taala ti kudus datai ari munggu di menua Paran. Mulia Iya ngemenuhka langit, lalu dunya penuh laban jaku puji ke Iya.
4 Iya datai tampak baka kilat. Penampak bepijar pansut ari jari Iya. Dia meh endur alai kuasa Iya dilalaika.
5 Iya ngasuh penyakit bejalai dulu ari Iya lalu Iya ngasuh pemati ngentudika Iya.
6 Lebuh Iya ngetu, tanah berenyang. Lebuh Iya merening sekejap aja, semua bansa getar-getar. Bukit ti meruan belama iya diredakka. Munggu ti meruan belama iya, tengelam, munggu ti udah alai Iya bejalai dulu kelia.
7 Aku meda orang Kusan takut lalu orang Media getar-getar.
8 TUHAN, kati Nuan pedis ati ngagai sungai? Tauka Nuan ringat ngagai sungai, tauka Nuan ringat ngagai tasik, lebuh Nuan nepan kuda enggau kerita perang Nuan mai pemenang?
9 Nuan ngedarka panah Nuan, sedia deka nimbakka laja Nuan. Nuan melah tanah ngena sungai.
10 Bukit tepedaka Nuan lalu sida getar-getar. Ai tebubuh ari langit. Ai ti di baruh dunya beguntam, lalu gelumbang ti besai nyadi.
11 Mata hari enggau bulan enda engkebut lebuh panah Nuan beperenching mansa, lebuh sangkuh Nuan bekilap.
12 Nuan bejalai nengah dunya mai pengeringat. Nuan ngeransi lalu ngelunjak mayuh bengkah bansa.
13 Nuan datai laban Nuan deka ngelepaska bala nembiak Nuan, deka ngelepaska raja ti udah dipilih Nuan. Nuan mumpung pala tuai orang ke jai lalu ngeluska semua orang ke nitihka iya.
14 Laja Nuan ngebuska tuai soldadu iya lebuh laja nya datai baka kabut ti deka mambarka kami, ketawaka kami baka sida ke belalai nekanka pengidup orang ke seranta.
15 Nuan ngelunjak tasik ngena kuda Nuan lalu ai tasik bepupu.
16 Aku ninga semua utai nya, lalu aku getar-getar. Mulut aku nyau getar-getar laban aku takut. Tubuh aku lemi, lalu kaki aku jelepi. Aku enda engkeretik nganti Allah Taala ngukum sida ke nyerang kami.
17 Taja pen kayu ara nadai bebuah lalu buah anggur nadai tumbuh ba batang iya, taja pen buah kana enda lekat lalu umai gandum nadai mansutka asil, taja pen semua bedus abis mati lalu bansal sapi puang,
18 aku deka mengkang gaga ati sereta lantang laban TUHAN endang Juruselamat aku.
19  TUHAN ti Pemadu Tinggi meri aku pengering. Iya ngasuh aku laju baka rusa lalu ngasuh aku diau likun ba sebelah bukit.