MIKAH
 
Jaku Pemuka
Nabi Mikah sama serambau enggau nabi Isaiah. Iya datai ari sebuah nengeri ti mit di menua Judah, iya nya perintah ti di selatan. Mikah endang nemu menua Judah deka dituntung penusah, baka penusah besai ti deka nuntung perintah ti di utara, munyi ti dipadahka Amos. Mikah madahka Allah Taala deka mega ngukum orang Judah laban sida enda lurus. Tang pesan ti dibai Mikah terang agi madahka pasal pengadang ti deka datai jemah ila.

Genteran ti patut diperatika nya pasal pemaik ti deka dibai Allah Taala di serata dunya (4.1-4); jaku ti madahka siku raja ti besai deka datai ari peturun David, lalu mai pemaik ngagai orang Israel (5.2-5a); enggau ayat (6.8) ti nyimpul utai ti disebut bala nabi orang Israel: “Tu utai ti diguna Iya ari kitai: ngereja utai ti lurus, seruran ngayanka pengerindu, lalu diau baruh ati begulai enggau Allah Taala.”
 
Ripih Isi Bup Tu
Israel enggau Judah diakim (1.1-3.12)
Didirika baru enggau pemaik (4.1-5.15)
Pesan pasal jaku tangkan enggau pengadang (6.1-7.20)
 
Bagi 1
1 Lebuh maya Jotam, Ahas, enggau Hesekiah nyadi raja menua Judah, TUHAN meri pesan tu ngagai Mikah, ke datai ari nengeri Moreset. TUHAN mandangka ngagai Mikah semua utai tu pasal Samaria enggau Jerusalem.
 
Sabak Kenang Ke Samaria Enggau Jerusalem
2 Dingaka utai tu, semua bansa. Pendingka tu, semua kita ke diau di dunya! TUHAN, Raja ti Pemadu Tinggi deka besaksi ngelaban kita. Iya bejaku ari Rumah Sembiang Iya ti di serega.
3 TUHAN deka datai ari endur Iya ti kudus. Iya deka nurun lalu bejalai ba tuchung bukit.
4 Udah nya bukit deka luluh di baruh Iya baka lilin ti luluh laban api. Sida deka rarat ngagai lebak baka ai ti nurun bukit.
5 Semua utai tu deka nyadi laban orang Israel udah bedosa lalu angkat ngelaban Allah Taala. Sapa ke patut dianu ketegal orang Israel angkat ngelaban?
Samaria, indu nengeri nya empu! Sapa ke salah laban sida besembahka engkeramba di menua Judah? Jerusalem empu!
6 Nya alai TUHAN bejaku, “Aku deka ngaga Samaria nyadi tembawai di menua pesisir, nyadi endur alai nanam anggur. Aku deka mubuhka tugung batu nengeri nya ngagai lebak, lalu deka ngerumbak pugu nengeri nya.
7 Semua engkeramba ti dikesayauka orang di nengeri nya deka dipechahka magang, lalu semua utai ti diberi ngagai indu ke nyundal dalam rumah sembiang engkeramba nya, deka dirusak ngena api, lalu semua anak patung di nengeri nya deka ditugungka nyadi uras. Samaria udah bulih utai tu kena sida besembiang minta diri peridi, lalu diatu munsuh sida deka nabanka utai nya ngagai bala indu ke nyundal dalam rumah sembiang di menua bukai.
8 Ketegal utai tu, aku deka ngulit sereta nyabak. Aku deka bejalai enda bekasut sereta telanjai. Aku deka meraung munyi ukui kampung, lalu ngulit baka burung unta.
9 Bakal Samaria enda ulih suman, lalu Judah baru deka natka diri merinsa baka nya mega. Pengerusak udah datai ba pintu besai nengeri Jerusalem empu, ti alai bala nembiak Aku diau.”
 
Munsuh Datai Semak Jerusalem
10 Anang madahka ngagai bala munsuh kitai di Gat pasal kitai ke alah. Anang nejuka sida meda kita nyabak. Kita orang Bet-le-aprah,\baringka diri malai amau kena kita ngayanka diri tusah ati!
11 Kita orang Sapir, alai kita mindah ngagai menua bukai, telanjai sereta malu. Sida ke diau di Sanan enda berani pansut ari nengeri sida. Lebuh kita ninga orang di Bet-esel ngulit, kita deka nemu diri enda ulih ngenduh di nengeri nya.
12 Orang di Marot irau ati nganti bantu, laban TUHAN udah ngasuh penusah ti besai datai semak ngagai Jerusalem.
13 Kita ti diau di Lakis, tanchangka kuda ngagai kerita perang kita. Kita udah bedosa nunda orang Israel, lalu ngasuh Jerusalem bedosa.
14 Diatu, kita orang Judah, beri selamat tinggal ngagai nengeri Moreset Gat. Bala raja orang Israel nadai bulih tulung ari nengeri Aksip.
15 Kita ke di Maresah, TUHAN deka nyerahka kita ngagai munsuh, ti deka ngalahka nengeri kita. Bala tuai orang Israel deka rari lalu belalai dalam lubang gua di Adulam.
16 Kita orang Judah, kukur buk kita kena nandaka diri ngulitka anak ke dikerinduka kita. Kukur abis lengis buk kita baka pala burung ti bepakaika bangkai, laban anak kita deka dirampas ari kita, lalu ditabanka ngagai menua bukai.
 
Bagi 2
Pengujung Sida Ke Nekanka Pengidup Orang Ke Seranta
1 Tulah meh orang ke gali enda tinduk berundingka jalai ngereja penyai! Lebuh hari nyau tawas, lebuh sida bisi peluang, sida lalu ngereja penyai ti udah diperambu sida.
2 Lebuh sida inginka tanah orang, sida ngerampas tanah nya. Lebuh sida inginka rumah orang, sida ngerampas rumah nya. Nadai ruang bilik, tauka reta tengkira ti likun.
3 Nya alai TUHAN bejaku, “Aku berunding deka ngasuh penusah ti besai ninggang kita, lalu kita enda ulih ngerarika diri. Kita deka nemu diri tusah. Nya baru kita enda ngenyumbungka diri agi.
4 Lebuh maya nya ila, orang deka ngena cherita pasal kita ke ditinggang penusah nyadika leka jaku sumpah, lalu sida deka belagu ngena lagu sinu ati tu kena sida ngenang pasal utai ti udah diasaika kita:
Kami udah abis rusak! TUHAN udah ngerampas tanah kami Lalu udah meri tanah nya ngagai orang ke nangkap kami.”
5 Nya alai, lebuh maya tanah nya dipulaika baru ngagai bala nembiak TUHAN, kita nadai ungkup.
6 Ku orang mayuh ngajar aku, “Anang ngajar kami. Anang ngajar pasal utai nya. Allah Taala sigi enda mechat kami.
7 Kati nuan ngumbai orang Israel kena tinggang sumpah? Kati TUHAN enda agi liat ati? Kati Iya amat deka ngereja utai nya? Kati Iya enda nelap lebuh Iya  bejaku ngagai orang ke ngereja utai ti ngena?”
8 Ku TUHAN nyaut, “Kita nyerang bala nembiak Aku baka munsuh. Orang ke pulai ngayau ngumbai diri likun di rumah, tang kita bisi dia, deka ngenchuri baju sida.
9 Kita muru bala bini nembiak Aku ari rumah ti dikesayauka sida, lalu kita udah ngerumpak berekat ti udah diberi Aku ngagai bala anak sida belama iya.
10 Angkat meh kita lalu mupuk. Kita nadai agi pengelikun ditu. Dosa kita udah ngasuh endur tu dirusak.
11 “Orang tu begunaka nabi ke bejalai mai pemula enggau ati ti nipu, ke nyebut, ‘Aku benabi madahka kita deka mayuh wain enggau ai ti bisa.’
12 “Tang Aku deka ngempuruka kita, semua kita orang Israel ti agi tinggal. Aku deka ngempuruka kita baka bedus ti pulai baru ngagai raban sida empu. Baka padang rumput ti penuh laban bedus, baka nya meh menua kita deka penuh baru laban mensia.”
13 Allah Taala deka muka jalai ke sida, lalu nguluka sida pulai ari menua bukai. Sida deka ngebuka diri pansut nengah pintu nengeri, lalu ngelepaska diri. Raja sida, iya nya TUHAN Empu, deka nguluka sida pansut.
 
Bagi 3
Mikah Besalah Bala Tuai Orang Israel
1 Pendingka tu, kita ke merintah orang Israel! Kita udah dikarapka meri atur ti lurus,
2 tang kita begedika utai ti badas, lalu rinduka utai ti jai. Kita niti kulit bala nembiak Aku idup-idup, lalu nyarikka isi ari tulang sida.
3 Kita bepakaika bala nembiak Aku. Kita niti kulit sida, matahka tulang sida, lalu netak sida baka ke netak dagin ti deka dipanduk.
4 Maya deka datai alai kita deka nyabak ngangauka TUHAN, tang Iya enggai nyaut kita. Iya enggai mendingka sampi kita, laban kita udah ngereja penyai.
5 Bala nembiak Aku ditipu bala nabi ke madahka sida deka diau dalam pemaik enti sida meri nabi nya duit, tang deka nyerang sida, enti sida enda meri duit ngagai sida nabi nya.
6 “Nabi, timpuh kita nyau deka abis. Hari kita nyau deka malam. Laban kita udah nesatka bala nembiak Aku, kita nadai agi begenera, lalu kita enda ulih nujum agi.”
7 Sida ke nujum, deka malu laban sida enda ulih nujum agi. Semua sida deka malu magang, laban Allah Taala enda nyaut sida.
8 Tang ba pasal aku empu, TUHAN ngemenuhka aku enggau Roh sereta enggau kuasa Iya, lalu Iya meri aku ati ti lurus enggau pemerani kena aku madahka dosa orang Israel.
9 Pendingka aku, kita ke merintah orang Israel, kita ke begedika atur ti lurus, lalu nyarutka utai ti ngena nyadi salah.
10 Kita nirika nengeri Allah Taala, Jerusalem, beduduk ba pengawa kita ke bebunuhka orang enggau ba atur ti enda lurus.
11 Orang ke merintah di nengeri tu megai perintah laban sida deka makai suap. Sida imam minta upah lebuh sida nerangka Adat, lalu sida nabi minta duit lebuh sida madahka pemandang sida empu, lalu semua sida nya bela madahka TUHAN bisi enggau sida. Ku sida, “Kitai enda bebadi, laban TUHAN bisi enggau kitai.”
12 Nya alai, ketegal kita, Sion deka dichangkul baka tanah umai. Jerusalem deka nyadi tembawai, lalu Rumah Sembiang deka nyadi utan.
 
Bagi 4
TUHAN Merintah Dunya Ngena Pemaik
1 Jemah ila bukit ti alai Rumah Sembiang bediri deka nyadi bukit ti pemadu tinggi, ti ngayung semua bukit. Mayuh bengkah bansa deka beterudus datai ngagai iya,
2 lalu bala orang ari semua bansa deka nyebut, “Aram kitai niki ngagai bukit TUHAN, ngagai Rumah Sembiang Allah Taala ke disembah orang Israel. Iya deka ngajar kitai utai ti diasuh Iya kereja kitai. Kitai deka bejalai nengah jalai ti udah dipilih Iya. Laban ajar TUHAN deka datai ari Jerusalem. Iya bejaku ngagai bala nembiak Iya ari Sion.”
3 Iya deka ngatur laya entara semua bansa, entara menua ti bekuasa, ti semak enggau ti jauh. Sida deka nempa pedang sida nyadika pengeradu tanah lalu sangkuh sida digaga nyadika duku kena nyarau dan kayu. Semua bansa enda agi beperang, lalu nadai agi nyendiaka diri beperang.
4  Semua orang deka diau bebaik enggau pangan diri ba sebelah kebun anggur enggau ba madang kayu ara sida, lalu nadai agi orang deka ngemba sida. TUHAN ti Pemadu Bekuasa udah besemayaka utai tu.
5 Genap bengkah bansa deka nyembah sereta ngasika petara sida empu, tang kitai deka nyembah sereta ngasika TUHAN Allah Taala kitai belama lama iya.
 
Orang Israel Deka Pulai Ari Menua Bukai
6 Ku TUHAN bejaku, “Maya deka datai alai Aku deka ngempuruka bala orang ke udah diukum Aku, sida ke udah merinsa dibuai ngagai menua bukai.
7 Sida iya kait-kupit sereta jauh ari menua diri, tang Aku deka ngepunka bansa ti baru ngena sida ke agi idup tu, lalu sida deka nyadi bansa ti kering. Aku deka merintah sida ba Bukit Sion berengkah ari maya nya datai ke belama lama iya.”
8 Lalu nuan, Jerusalem, ti alai Allah Taala ngibun bala nembiak Iya, baka pengibun bedus ke nilik ari menara iya, nuan deka sekali agi nyadi indu nengeri ke perintah ti endang enggi nuan menya.
9 Nama kebuah nuan duie-duie nyabak? Nama kebuah nuan pedis baka indu ke radai deka beranak? Laban nuan nadai raja, lalu bala penyanding penemu nuan semua udah mati magang?
10 Ngelingkang sereta bedemuh  meh kita orang Jerusalem, baka indu ke radai deka beranak, laban diatu kita deka angkat ari nengeri tu, lalu diau di menua pesisir. Kita deka mupuk ngagai menua Babilon, tang din TUHAN deka ngelepaska kita ari munsuh kita.
11 Mayuh bengkah bansa udah begempuru deka nyerang nuan, Jerusalem. Ku sida, “Jerusalem enda tau enda dirusak! Kitai deka ngaga nengeri nya nyadi tembawai!”
12 Tang semua bansa nya enda nemu utai ti dalam runding TUHAN. Sida enda nemu diri udah digempuruka lalu diukum, baka gandum ti dibai ari umai lalu ditungku.
13 Ku TUHAN bejaku, “Kita orang Jerusalem, mansang kita lalu ukum bala munsuh kita! Aku deka ngasuh kita kering baka sapi ti lelaki ti bisi tanduk besi, sereta betunjingka temaga. Kita deka ngeredakka mayuh bengkah bansa, lalu pengaya ti udah dirampas sida, deka diserahka kita ngagai Aku ti TUHAN ke semua
dunya.”
 
Bagi 5
1 Orang Jerusalem, gempuruka bala soldadu kita! Kitai tu dikelulung munsuh! Sida nyerang tuai orang Israel!
 
Allah Taala Besemaya Deka Meri Siku Pemerintah Ari Betlehem
2  Ku TUHAN bejaku, “Betlehem Epratah, nuan suku raban bansa ti pemadu mit ari peturun Judah, tang ari nuan Aku deka mansutka siku pemerintah ke orang Israel, ari peturun orang ke dulu kelia.”
3 Nya alai TUHAN deka nejuka bala nembiak Iya diperintah munsuh sida, nyentuk ngagai maya indu ke deka beranak nya udah ngadaka anak lelaki iya. Udah nya, orang Israel ti udah dibuai ngagai menua bukai, deka pulai baru ngagai bala sida empu.
4 Lebuh pemerintah nya datai, iya deka merintah bala nembiak iya ngena kuasa ti datai ari TUHAN, sereta enggau mulia TUHAN Allah Taala empu. Bala nembiak iya deka diau likun, laban semua mensia di serata dunya deka ngaku iya endang besai kuasa,
5 lalu iya deka mai pemaik.
 
Pengelepas Enggau Ukum
Lebuh orang Asiria nyerang menua kitai, lalu ngelanggar kuta kitai, kitai deka ngasuh bala tuai kitai ke pemadu kering ngelaban sida.
6 Ngena senyata sida, sida deka ngalahka menua Asiria, iya nya menua Nimrot, lalu sida deka ngelepaska kitai ari orang Asiria lebuh orang Asiria nyerang menua kitai.
7 Orang Israel ti agi idup deka nyadi baka ambun ti ngasuh nyamai isi, ti dikirumka TUHAN ngagai mayuh bengkah bansa, baka ujan ti beberis ninggang utai ti tumbuh. Sida deka manggaika pengarap sida ba Allah Taala, ukai ba mensia.
8 Sida ke tinggal dalam mayuh bengkah menua, deka nyadi baka singa ti begigaka pemakai dalam utan, tauka ba padang rumput. Iya tama ngagai raban bedus, nerekam sida, lalu nyarikka sida, lalu nadai orang ngelepaska sida.
9 Israel deka ngalahka bala munsuh iya, lalu ngerusak semua sida.
10 Ku TUHAN bejaku, “Lebuh maya nya ila, Aku deka munuh kuda kita lalu ngerusak kerita perang kita.
11 Aku deka ngerusak nengeri di menua kita, lalu ngeruntuhka semua kuta kita.
12 Aku deka muai pengaruh kita, lalu muai semua orang ke betilitka nasit.
13 Aku deka ngerusak engkeramba enggau tiang batu keramat kita. Kita enda agi nyembah utai ti udah digaga kita empu.
14 Aku deka numbangka engkeramba petara indu Aserah di menua kita, lalu ngerusak nengeri kita.
15 Lalu laban Aku balat ringat, Aku deka malas penyai semua bansa ti enda ngasika Aku.”
 
Bagi 6
 TUHAN Besalah Orang Israel
1 Pendingka pekara ti dibantaika TUHAN kena Iya ngelaban orang Israel. Angkat meh Nuan, O TUHAN, lalu bantaika pekara ti dibai Nuan. Awakka bukit enggau munggu ninga utai ti disebut Nuan.
2 Kita bukit, kita pugu dunya ti meruan belama iya, pendingka pekara ti dibantaika TUHAN! TUHAN bisi pekara kena Iya ngelaban bala nembiak Iya. Iya deka besalah orang Israel.
3 Ku TUHAN bejaku, “Nembiak Aku, nama utai ti udah dikereja Aku ba kita? Baka ni ku Aku udah nating kita? Saut Aku.
4 Aku udah mai kita pansut ari menua Ejip. Aku udah ngelepaska kita ari pengidup kita ke nyadi ulun. Aku udah ngasuh Moses, Aron, enggau Miriam nguluka kita.
5 Nembiak Aku, kingatka utai ti deka dikereja Raja Balak menua Moap ngagai kita, enggau chara Balaam anak Beor nyaut iya. Kingatka utai ti nyadi di rantau jalai ari kem di Akasia ngagai Gilgal. Kingatka semua utai nya, nya baru kita deka nemu utai ti udah dikereja Aku kena Aku ngidupka kita.”
 
Utai Ti Diguna TUHAN
6 Nama utai ti deka dibai aku ngagai TUHAN Allah Taala ti di serega, lebuh aku datai nyembah Iya? Kati aku patut mai anak jelu sapi ti pemadu gemu nyadika piring tunu?
7 Kati TUHAN deka gaga ati enti aku mai ngagai Iya seribu iku bedus, tauka minyak kana ti enda nemu abis? Kati aku patut meri ngagai Iya anak tuai aku, kena aku nebus dosa aku?
8 Enda. TUHAN udah madahka ngagai kitai utai ti manah. Utai ti diguna Iya ari kitai nya baka tu: ngereja utai ti lurus, seruran ngayanka pengerindu, lalu diau begulai sejalai enggau Allah Taala kitai enggau ati ti baruh.
9 Kitai pintar enti kitai nangika TUHAN. Ku Iya ngangau ngagai nengeri, “Pendingka tu, kita ke begelumu di nengeri!
10 Dalam rumah orang ke jai, bisi pengaya ti udah ulih sida nipu. Sida ngena takar ti enda betul. Tu utai ti dipegedika Aku.
11 Baka ni ku Aku ulih ngampun orang ke ngena takar enggau timbang ti enda betul?
12 Orang ke kaya ngambi ulih ba orang ke seranta, lalu semua kita endang orang ke bula.
13 Nya alai Aku udah ngepunka pengawa ngerusak kita, ketegal dosa kita.
14 Kita makai, tang enda nemu kenyang. Iya ti bendar, kita agi lapar. Kita deka nabanka utai, tang kita enda ulih nyimpan utai nya. Sebarang utai ti disimpan kita deka dirusak Aku lebuh maya perang.
15 Kita deka nanam gandum, tang kita nadai utai diketau. Kita deka mitan buah kana ngulihka minyak, tang kita nadai peluang ngena minyak nya. Kita deka ngaga wain, tang kita enda ngirup wain nya.
16  Utai tu deka nyadi laban kita udah ngereja utai ti jai nunda Raja Omri enggau anak lelaki iya, Raja Ahap. Kita udah majak nitihka atur seduai iya, nya alai Aku deka ngerusak kita, lalu semua orang deka ngeleseka kita. Orang  di semua endur deka mechat kita.”
 
Bagi 7
Penyai Pendiau Orang Israel
1 Nadai penyadi meh aku tu! Aku nyau baka orang ke lapar, ti nadai tetemuka buah ba kayu ara, lalu nadai tetemuka buah ba batang anggur. Semua buah anggur enggau semua buah ara ti nyamai diempa, udah digumpul orang magang.
2 Siku pen nadai ga orang ke lurus ati agi tinggal di menua tu, nadai siku ke taluk ngagai Allah Taala. Genap iku orang bela nganti peluang bebunuhka orang. Genap iku orang bela ngasu bala diri empu.
3 Semua sida bela landik magang ngereja penyai. Bala pemesai enggau bala hakim makai suap. Orang ke bekuasa madahka utai ti dikedekaka sida, nya alai sida bepekat enggau pangan diri.
4 Indah orang ke pemadu betul ati dalam bala sida, deh nyadi orang ke nadai guna baka rumput. Maya udah datai alai Allah Taala deka ngukum orang mayuh, nitihka jaku tangkan ti udah diberi Iya nengah bala nabi ke ngibun sida. Diatu runding sida charut.
5 Anang arapka utai ti disebut orang ke berimbai pendiau enggau kita, tauka ngarapka pangan kita. Bejimat kita lebuh kita nyebut utai, nemuka ngagai laki tauka ngagai bini kita.
6  Lebuh maya nya ila, anak lelaki enda bebasaka apai sida, anak indu deka ngelaban indai sida, lalu indu ke biak belaya enggau mentua indu sida. Orang ke nyadi munsuh kita nya kita sebilik empu.
7 Tang aku deka nganti TUHAN. Aku deka nganti Allah Taala enggau penuh pengarap. Iya deka ngelepaska aku. Allah Taala aku deka ninga aku.
 
TUHAN Mai Pengelepas
8 Munsuh kitai nadai kebuah ketawaka kitai. Kitai udah rebah, tang kitai deka angkat baru. Diatu kitai amat diau dalam petang, tang TUHAN deka meri kitai penampak.
9 Kitai udah bedosa ngelaban TUHAN, nya alai diatu kitai enda tau enda tan ngasaika pengeringat Iya enda lama. Tang ba pengujung iya ila, Iya deka bejaku ngarika kitai, lalu ngaduka semua utai ti salah ti udah dikereja orang ngagai kitai. Iya deka mai kitai pansut ngagai penampak. Kitai deka mengkang idup lalu meda Iya ngelepaska kitai.
10 Nya baru munsuh kitai deka meda nya, lalu berasai malu, iya nya bala munsuh ti udah mechat kitai ngena jaku, “Dini alai TUHAN Allah Taala kita?” Kitai deka meda bala munsuh kitai alah, dilunjak baka tanah luchak ba jalai raya.
11 Orang Jerusalem, maya deka datai alai kita patut nirika kuta nengeri tu baru. Lebuh maya nya ila rampa menua kita deka ngerembai besai agi.
12 Bala kita deka pulai baru ngagai kita ari semua endur - ari Asiria di timur, ari Ejip di selatan, ari menua ti ngelingi Sungai Eupratis, ari tasik luar, enggau ari bukit ti jauh.
13 Tang dunya deka nyadi menua puang, ketegal penyai orang ke nguan iya.
 
TUHAN Kasihka Israel
14 Awakka Nuan TUHAN nyadika pengibun bala nembiak Nuan, ti udah dipilih Nuan. Taja pen sida diau jauh ari pangan diri di menua puang, sida dikelingi tanah ti ami. Awakka sida mupuk lalu ngulam ba padang rumput ti galak di Basan enggau di Giliat, baka ke udah dikereja sida dulu kelia.
15 Gaga meh kereja ajih ke kami, TUHAN, baka ke udah dikereja Nuan lebuh Nuan mai kami pansut ari menua Ejip.
16 Semua bansa deka meda nya, lalu tusah ati, taja pen sida kering. Enggau ati ti tusah, sida deka nutup mulut sida lalu mampul pending sida.
17 Sida deka nilat amau baka ular. Sida deka datai ari kuta sida, getar-getar takut. Enggau ati ti nangi sida deka nguingka diri ngagai TUHAN Allah Taala kitai.
18 Nadai petara bukai ti sebaka enggau Nuan, O TUHAN. Nuan ngampun dosa bala nembiak Nuan ti agi idup. Nuan enda ringat belama iya, tang Nuan gaga ati ngayanka pengerindu Nuan ti meruan ngagai kami.
19 Nuan deka kasihka kami baru. Nuan deka ngelunjak dosa kami, lalu muai dosa kami ngagai buntut tasik!
20 Nuan deka ngayanka penetap ati Nuan, enggau pengerindu Nuan ti meruan, ngagai bala nembiak Nuan, iya nya peturun Abraham enggau Jakop, munyi ti udah disemaya Nuan ngagai bala aki ini kami dulu kelia.