JONAH
 
Jaku Pemuka
Bup  Jonah* enda baka bup nabi ti bukai dalam Bup Kudus tu, laban bup tu nusui pasal pejalai siku nabi ti enda ngasika pesan Allah Taala. Allah Taala ngasuh iya bejalai ngagai nengeri Nineweh, indu nengeri menua Asiria, ti nyadi munsuh orang Israel. Tang Jonah enggai bejalai ngagai nengeri nya mai pesan Allah Taala, laban iya ngumbai Allah Taala enda ngamatka jaku Diri ti deka ngerusak nengeri nya. Lebuh mayuh macham utai udah nyadi ba Jonah, nya baru iya ngasika jaku Allah Taala, tang enggau ati ti lembau, lalu iya ringat lebuh pesan ti dibai iya enda dikamatka.
Bup tu nunjukka Allah Taala endang bekuasa atas semua utai ti udah digaga Iya. Tang lebih agi ari nya, bup tu nunjukka Allah Taala penuh laban pengerindu enggau pengasih. Iya endang deka ngampun lalu ngelepaska semua orang, nyengkaum munsuh bala nembiak Iya. Iya ukai deka ngukum tauka ngerusak sida.
 
Ripih Isi Bup Tu
Jonah dikangauka tang enda ngasi (1.1-17)
Jonah nesal ati lalu dilepaska (2.1-10)
Pesan Jonah ngelaban Nineweh (3.1-10)
Allah Taala kasihka orang Nineweh (4.1-11)
 
Bagi 1
Jonah Enda Ngasika TUHAN
1  Nyadi sekali, TUHAN bejaku ngagai Jonah anak Amitai.
2 Ku TUHAN bejaku, “Alai nuan mansang ngagai Nineweh, nengeri ti besai nya, lalu bejaku ngelaban nengeri nya, laban Aku nemu penyai orang di nengeri nya.”
3 Tang Jonah mupuk ngagai endur bukai, deka ngerarika diri ari TUHAN. Iya mansang ngagai Jopa, alai iya ke tetemuka sebuah kapal ti baru deka bekejang ngagai menua Spain. Iya mayar tambang diri, lalu nepan kapal nya sama enggau bala kelasi, deka belayar ngagai menua Spain, deka ngejangka diri jauh ari TUHAN.
4 Tang TUHAN ngasuh biaubalai mangka ba tasik nya, lalu kabut balat amat nyadi datai ke kapal nya nyau deka pechah.
5 Bala kelasi balat amat takut, lalu rauh-rauh ngangauka petara sida minta tulung. Udah nya sida muai barang ari kapal nya, ngambika kapal sida lempung agi, Lebuh utai tu benung nyadi, Jonah udah nurun ke baruh, gali dalam ruang kapal nya, lalu tinduk jenak amat.
6 Lebuh kepten kapal nya tetemuka Jonah, iya lalu bejaku enggau Jonah, “Nama kebuah nuan tinduk? Angkat, lalu besampi ngagai petara nuan minta iya nulung, nyangka iya deka sinu ati ke kitai, lalu enda nejuka kitai mati.”
7 Ku bala kelasi bejaku enggau pangan diri, “Aram kita bechabut undi kena ngiga sapa ke ngasuh kitai ditinggang penusah tu.” Sida lalu bechabut undi, lalu nama Jonah kena chabut.
8 Nya alai sida lalu bejaku enggau iya, “Padahka ngagai kami diatu, sapa ke patut diukum ketegal utai tu? Nama kebuah nuan ditu? Datai ari ni nuan? Nama bansa nuan?”
9 “Aku tu orang Hebrew,” ku Jonah nyaut. “Aku nyembah TUHAN Allah Taala ti di serega, ke ngaga tanah enggau tasik.”
10 Jonah lalu madahka ngagai sida pasal iya ke rari ari TUHAN.
Bala kelasi lalu balat amat takut, lalu ku sida bejaku enggau iya, “Utai ti dikereja nuan nya amat jai!”
11 Kabut nyau majak balat-sebalat. Nya alai bala kelasi lalu nanya iya, “Nama utai ti patut dikereja kami ngagai nuan kena ngasuh kabut tu teduh?”
12 Ku Jonah nyaut, “Buai aku ke tasik, nya baru tasik deka teduh, laban aku nemu, kita dipangkaka kabut tu ketegal penyalah aku.”
13 Tang bala kelasi nguji mai kapal nya ke tebing, bedayung enggau naka pemendar sida. Tang kabut nya majak balat-sebalat, lalu sida enda ulih ngampir ngagai tebing.
14 Nya alai sida nyabak ngangauka TUHAN, “O TUHAN, kami besampi, anang ngukum kami ketegal kami munuh orang tu! Nuan, O TUHAN, endang betanggungjawapka semua utai tu. Utai tu endang dikereja Nuan Empu.”
15 Udah nya sida lalu nanggung Jonah, lalu muai iya ngagai tasik. Tasik lalu tekala nya teduh.
16 Bala kelasi lalu balat amat takutka TUHAN, datai ke sida nyau meri siti piring, lalu besemaya deka betuaika Iya.
17 TUHAN lalu ngasuh siku ikan ti besai nelan Jonah, lalu Jonah mengkang dalam perut ikan nya tiga hari tiga malam.
 
Bagi 2
Sampi Jonah
1 Jonah lalu besampi dalam perut ikan nya ngagai TUHAN Allah Taala iya:
2 “Lebuh aku tusah, O TUHAN, aku ngangauka Nuan, lalu Nuan nyaut aku. Ari dunya pemati aku nyabak minta Nuan nulung, lalu Nuan ninga aku.
3 Nuan nikauka aku ngagai tasik nyentuk ngagai tengah tasik, lalu aku dikelingi ai, lalu semua gelumbang Nuan ti besai ngelamun aku.
4 Aku ngumbai diri udah dibuai ari Nuan lalu nadai agi meda Rumah Sembiang ti kudus.
5 Ai ngelamun aku lalu ngasuh aku enda ulih enseput. Tasik ngelamun aku lalu rumput tasik melit pala aku.
6 Aku tengelam terus ngagai pugu bukit ngagai menua ti bisi pintu ti dikunchi belama iya. Tang Nuan, O TUHAN Allah Taala aku, mai aku pulai baru idup-idup ari tasik.
7 Lebuh aku ngasaika nyawa diri nyau deka apus, aku lalu besampi ngagai Nuan, O TUHAN, lalu dalam Rumah Nuan ti kudus, nuan ninga aku.
8 Orang ke nyembah engkeramba ti nadai guna udah ngelengkaka penaluk sida ke Nuan.
9 Tang aku deka belagu muji Nuan. Aku deka ngenjuk piring ngagai Nuan lalu ngereja utai ti udah disemaya aku. Pengelepas endang datai ari TUHAN!”
10 Udah nya TUHAN lalu bejaku ngagai ikan nya. Ikan nya lalu ngeluaka Jonah ba tebing tasik.
 
Bagi 3
Jonah Ngasika TUHAN
1 TUHAN lalu bejaku ngagai Jonah baru.
2 Ku Iya, “Alai nuan mansang ngagai Nineweh, nengeri ti besai nya, lalu padahka ngagai orang dia pesan ti udah dipadahka Aku ngagai nuan.”
3 Nya alai Jonah ngasika TUHAN, lalu mansang ngagai nengeri Nineweh. Nengeri nya besai amat, pejalai tiga hari ari tisi sepiak ngagai tisi sepiak.
4  Jonah lalu belabuh bejalai nengah nengeri nya, lalu lebuh iya udah bejalai sehari, iya lalu bejaku enggau orang dia madahka pesan TUHAN, “Dalam empat puluh hari da agi nengeri Nineweh deka dirusak!”
5 Orang Nineweh arapka pesan Allah Taala. Nya alai sida lalu mutuska penemu ngasuh semua orang bepasa, lalu semua orang, berengkah ari orang ke pemadu tinggi pangkat nyentuk ngagai orang ke pemadu baruh pangkat, bela ngerasukka kain guni kena sida nunjukka diri udah nesal ati.
6 Lebuh raja nengeri Nineweh ninga pasal utai nya, iya lalu angkat ari kerusi diraja iya, muka baju panjai iya, ngerasukka kain guni, lalu duduk malai amau.
7 Iya ngirumka atur ngagai orang di Nineweh: “Tu atur ari raja, enggau ari bala pemesai iya: Nadai mensia, tauka jelu, tauka raban bedus, tau makai utai. Sida enda tau makai tauka ngirup.
8 Semua mensia enggau jelu enda tau enda ngerasukka kain guni. Semua orang enda tau enda bebendar besampi ngagai Allah Taala, lalu enda tau enda muai ulah ti jai, lalu badu agi mangah enggau orang.
9 Nyangka ukur Allah Taala deka ngubah runding Diri, lalu badu agi ringat, ngambika kitai enda mati!”
10 Allah Taala meda utai ti dikereja sida. Iya meda sida udah ngelengkaka ulah sida ke jai. Nya alai Iya ngubah runding Diri, lalu enda nyadi ngukum sida.
 
Bagi 4
Pengeringat Jonah Enggau Pengasih Allah Taala
1 Tang Jonah balat amat enda lantang ati meda nya, lalu iya ringat.
2  Nya alai iya besampi, “TUHAN, kati aku nadai udah nyebut, sebedau aku angkat ari rumah, madahka Nuan endang deka ngereja utai nya? Nya kebuah aku enggau naka ulih rari ngagai menua Spain! Aku nemu Nuan endang Allah Taala ti penuh laban pengerindu enggau pengasih, seruran liat ati, seruran nelap, lalu seruran sedia deka ngubah runding Diri, lalu enda nyadi ngukum.
3 Nya alai, awakka aku mati, TUHAN. Manah agi aku mati ari ke idup.”
4 Ku TUHAN nyaut, “Nuan enda patut ringat.”
5 Jonah pansut ari nengeri nya tunga ke timur, lalu duduk. Iya ngaga siti dunju, lalu duduk belindung dalam dunju nya, deka meda utai ti deka nyadi ba nengeri nya.
6 Udah nya TUHAN Allah Taala ngasuh sepun kayu tumbuh ngelindung Jonah, ngambika iya nyamai agi pendiau. Jonah gaga amat ati meda kayu nya.
7 Tang ba urung dini hari pagi siti, Allah Taala ngasuh siku ulat nyerang kayu nya, lalu kayu nya mati.
8 Lebuh mata hari nyau udah niki, Allah Taala lalu ngasuh ribut ti angat muput ari timur, lalu Jonah nyau deka luput laban mata hari ti manchar ngagai pala iya. Nya alai iya ngajihka diri mati. “Manah agi aku mati, ari ke idup,” ku iya bejaku.
9 Tang ku Allah Taala bejaku ngagai iya, “Nuan enda patut ringat ketegal kayu nya.”
Disaut Jonah, “Aku endang patut ringat, chukup balat ringat!”
10 Ku TUHAN bejaku ngagai iya, “Kayu nya tumbuh dalam semalam, lalu lesap hari siti. Nuan nadai ngereja utai ngagai kayu nya, lalu nuan nadai ngasuh iya tumbuh, tang taja pia nuan tusah ati ke kayu nya!
11 Nya alai Aku patut lebih agi kasihka nengeri Nineweh ti besai nya, laban nengeri nya bisi 120,000 iku anak mit ti nadai nemu utai, nyengkaum mayuh bala jelu!”