OBADIAH
 
Jaku Pemuka
Nadai orang nyemetak nemu maya bup ti pandak tu ditulis. Tang iya ditulis udah bekau Jerusalem alah dalam taun 586 sebedau pengada Jesus. Lebuh maya bup tu ditulis, menua Edom ti endang munsuh lama orang Israel, ukai semina rami gaga ke nengeri Jerusalem ti alah, tang mega ngambi ulih ba penusah orang Judah, lalu ngerampas utai di nengeri nya, sereta nulung bala munsuh nyerang Jerusalem. Obadiah benabi madahka Edom deka diukum lalu alah, sama enggau menua bukai ti nyadi munsuh orang Israel.
 
Ripih Isi Bup Tu
Ukum ke menua Edom (1-14)
Hari TUHAN (15-21)
 
1 Tu jaku ti benabi ti disebut Obadiah. Iya madahka jaku TUHAN ti Pemadu Tinggi pasal orang Edom.
 
TUHAN Deka Ngukum Edom
TUHAN udah ngasuh seruan Iya bejalai ngagai mayuh bengkah bansa, lalu kami udah ninga pesan Iya: “Sedia! Aram kitai beperang ngelaban Edom!”
2 Ku TUHAN bejaku ngagai Edom, “Aku deka ngasuh nuan lembut tulang. Semua orang deka mechat nuan.
3 Penyumbung nuan udah nipu nuan empu. Indu nengeri nuan nya kuta ti digaga ari batu galang. Rumah nuan tinggi ba atas bukit, lalu ku nuan bejaku dalam ati diri, ‘Sapa ulih ngeruntun aku ke baruh?’
4 Tang taja pen nuan ngaga rumah nuan ngeninggi endur alai sarang burung menaul, datai ke iya nyau baka ke begulai enggau bintang, Aku deka ngeruntun nuan ke baruh.
5 “Lebuh penchuri datai malam hari, sida semina ngambi utai ti dikedekaka sida. Lebuh orang ngetau buah anggur, sida selalu ninggalka sekeda buah enda diketau. Tang bala munsuh nuan udah ngeluska kita.
6 Peturun Esau, pengaya nuan udah dirampas.
7 Orang ke setanah enggau nuan, udah nipu nuan. Sida udah muru nuan ari menua nuan empu. Orang ke bebaik enggau nuan udah ngalahka nuan diatu. Pangan nuan ke sama makai enggau nuan, udah manjuk nuan. Ku sida bejakuka pasal nuan, ‘Kini ke tunga pemintar iya?’
8 “Ba hari Aku ngukum Edom, Aku deka ngerusak bala sida ke pintar lalu muai semua penemu-dalam ti dikembuan sida.
9 Orang ke tau serang ari Teman, deka balat takut, lalu genap iku soldadu di menua Edom, deka dibunuh magang.
 
Kebuah Edom Diukum
10 “Laban nuan udah ngerumpak lalu munuh peturun Jakop ke endang kaban belayan nuan empu, nya alai nuan deka dirusak lalu nadai agi dibasa orang belama iya.
11 Nuan bediri dia ngapa ba hari nya lebuh bala munsuh ngeruntuhka pintu nengeri Jerusalem. Nuan jai baka orang kampar ke nabanka pengaya Jerusalem lalu magi pengaya nya ngagai bala sida.
12 Nuan enda patut ketawaka pemerinsa kaban belayan nuan orang Judah. Nuan enda patut gaga ati lebuh sida dirusak. Nuan enda patut ketawaka sida lebuh sida kena laban penusah.
13 Nuan enda patut tama ngagai nengeri bala nembiak Aku lalu ketawaka pemerinsa sida sereta ngerampas pengaya sida lebuh sida ditinggang penusah.
14 Nuan enda patut bediri ba simpang jalai raya lalu nangkap sida ke nguji ngerarika diri. Nuan enda patut nyerahka sida ngagai munsuh lebuh sida kena laban penusah. Allah Taala Deka Ngakim Semua Bansa
15 “Hari nyau semak alai Aku, ti TUHAN, deka ngakim semua bansa. Edom, utai ti udah dikereja nuan deka dikereja ngagai nuan empu. Nuan deka nerima utai ti udah diberi nuan empu.
16 Bala nembiak Aku udah ngirup mangkuk ukum ti pait ba bukit Aku ti kudus. Tang semua bansa ti ngelingi menua nembiak Aku deka ngirup ari mangkuk ukum ti pait agi ari nya. Sida deka ngirup semua utai dalam mangkuk nya, lalu lesap.
 
Israel Menang
17 “Tang ba Bukit Sion sekeda orang ulih ngerarika diri lalu Bukit nya deka nyadi endur ti kudus. Bala peturun Jakop deka bempu menua ti endang enggi sida.
18 Bala peturun Jakop enggau bala peturun Josep deka nyadi baka api. Sida deka ngerusak bala peturun Esau baka api ti nganguska jerami. Nadai siku peturun Esau deka mengkang idup. Aku ti TUHAN, udah bejaku.
19 “Orang ke datai ari selatan menua Judah deka nguan menua Edom. Sida ke datai ari kaki bukit ti muak ke barat, deka ngalahka menua Pilistin. Orang Israel deka bempu menua Epraim enggau Samaria. Bala orang Benjamin deka ngambi menua Giliat.
20 Bala orang ke udah dibuai ari utara menua Israel lalu diau di Halah deka pulai baru, lalu ngalahka menua Ponisia nyentuk ngagai Sarepat di utara. Orang ke udah dibuai ari Jerusalem, lalu diau di Sardis, deka ngalahka semua nengeri di selatan menua Judah.
21 Orang Jerusalem ke menang deka nyerang Edom, lalu merintah menua nya. Lalu TUHAN Empu deka nyadi raja.”