HOSEA
 
Jaku Pemuka
Hosea nyadi nabi nangkanka Amos. Iya madahka pesan Allah Taala ngagai perintah ti di utara, lebuh maya pengachau balat nyadi sebedau Samaria alah dalam taun 721 sebedau pengada Kristus. Hosea tusah ati laban orang Israel besembahka engkeramba sereta enda tetap ati ngagai Allah Taala. Hosea nunjukka sida enda tetap ati ngagai TUHAN ngena pengidup iya empu, ti enda mujur bebini laban bini iya enda tetap ati ngagai iya. Bini iya Gomer butang, lalu baka nya mega nembiak Allah Taala: sida udah ninggalka TUHAN. Ketegal nya Israel deka diukum. Tang taja pia, ba pengujung iya, Allah Taala endang meruan rinduka nembiak Iya. Iya deka ngambi orang Israel pulai baru ngagai Iya Empu, lalu ngaduka kaul entara Iya enggau sida. Pengerindu Iya ke sida dipandangka Iya ngena jaku tu: “Baka ni ku Aku ulih ngelengkaka nuan, Israel? Baka ni ku Aku ulih ninggalka nuan? Ati Aku ti nagang Aku ngereja nya! Aku kelalu balat rinduka kita.” (11.8)
 
Ripih Bup Tu
Pasal Hosea ke bebini enggau pasal ruang bilik iya (1.1-3.5)
Pesan ngelaban Israel (4.1-13.16)
Pesan nesal ati enggau semaya (14.1)
 
Bagi 1
1 Tu pesan ti diberi TUHAN ngagai Hosea anak Beeri lebuh Usiah, Jotam, Ahas, enggau Hesekiah nyadi raja menua Judah lalu Jeroboam anak Jehoas nyadi raja menua Israel.
 
Bini Enggau Bala Anak Hosea
2 Lebuh TUHAN bejaku ngagai orang Israel ngena Hosea keterubah iya, Iya bejaku munyi tu, “Hosea, alai nuan jadi enggau indu sundal, ngambika iya ngadaka anak ke nyundal baka iya, laban nya gaya menua tu udah butang ketegal iya udah ninggalka Aku.”
3 Nya alai Hosea lalu jadi enggau indu siku ke benama Gomer anak Diplaim. Lebuh Gomer ngadaka anak lelaki seduai iya ke tuai,
4  TUHAN bejaku ngagai Hosea, “Beri iya nama ‘Jesril,’ laban enda lama da agi Aku deka ngukum raja orang Israel laban aki iya Jehu udah munuh orang di Jesril. Aku deka ngerusak perintah Jehu.
5 Lalu Aku deka ngerusak kuasa bala soldadu orang Israel ba Lebak Jesril lebuh maya nya ila.”
6 Gomer ngadaka anak iya ti kedua. Sekali tu anak iya indu. Ku TUHAN bejaku ngagai Hosea, “Beri nama iya ‘Enda Dikerinduka.’ laban Aku enggai agi ngayanka pengerindu ngagai orang Israel tauka ngampun sida.
7 Tang Aku deka ngayanka pengerindu ngagai orang Judah. Aku TUHAN Allah Taala sida deka ngelepaska sida, tang Aku enggai ngereja nya ngena perang - ngena pedang tauka panah enggau laja tauka ngena kuda tauka ngena orang ke nepan kuda.”
8 Lebuh Gomer badu agi nusuka anak indu iya, iya lalu ngandung baru, lalu ngadaka siku agi anak lelaki.
9 Ku TUHAN bejaku ngagai Hosea, “Beri iya nama ‘Ukai Bala Nembiak Aku,’ laban orang Israel ukai bala nembiak Aku, lalu Aku ukai Allah Taala sida.”
 
Israel Deka Didirika Baru
10 Orang Israel deka mayuh tubuh baka pasir ti di tasik, enda ulih diitung tauka ditakar. Diatu Allah Taala bejaku ngagai sida, “Kita ukai nembiak Aku,” tang maya deka datai alai Iya deka nyebut ngagai sida, “Kita tu anak Allah Taala ti idup!”
11 Orang Judah enggau orang Israel deka beserakup baru. Sida deka milih siku tuai, lalu sida deka sekali agi mansang sereta nyadi kaya di menua sida empu. Sigi amat, hari Jesril deka nyadi hari ti besai!
 
Bagi 2
1 Nuan patut ngumbai menyadi lelaki nuan, “Ammi,” lalu ngumbai menyadi indu nuan, “Ruhamah.”Gomer Butang, Ukum Enggau Penebus
2 Anak, alai kita bejaku enggau indai kita, taja pen iya ukai bini Aku agi, lalu Aku pen ukai laki iya agi. Bejaku enggau iya minta iya badu agi butang, lalu badu agi nyundal,
3 enggai ke Aku ngeruntun kain ari tubuh iya ngambika iya telanjai baka iya ke baru ada menya. Aku deka ngaga iya nyadi menua puang, lalu iya deka mati aus.
4-5 Aku enggai kasihka bala anak iya, laban sida nya anak indu sundal ti enda nemu malu.  Ku indai sida bejaku, “Aku deka mansang ngagai bala ambai aku, ke meri aku pemakai enggau ai, bulu bedus enggau kain linin, minyak kana enggau wain.”
6 Nya alai Aku deka ngandang iya ngena pagar ti digaga ari kayu ti beduri, lalu ngaga dinding kena mempang jalai iya.
7 Iya deka belanda nitihka bala ambai iya, tang enda ulih nitihka sida. Iya deka begigaka sida, tang enda tetemuka sida. Udah nya iya deka bejaku, “Aku deka pulai baru ngagai laki aku ti terubah, laban aku udah lantang agi diau begulai enggau iya suba ari aku ke diatu.”
8 Iya sigi enggai ngaku Aku udah meri iya gandum, wain, minyak kana, enggau semua pirak enggau emas ti dikena iya nyembah Baal.
9 Nya alai lebuh maya ngetau nyau datai, Aku deka ngambi pulai baru gandum enggau wain ti udah diberi Aku ngagai iya, lalu deka ngambi bulu bedus enggau kain linin ti udah diberi aku kena iya begari.
10 Aku deka nelanjaika iya di mua bala ambai iya, lalu nadai orang ulih ngelepaska iya ari kuasa Aku.
11 Aku deka madamka semua gawai iya, iya nya gawai ninting taun, gawai tiap bulan, enggau pengerami Hari Sabat iya, iya nya semua gawai pengarap iya.
12 Aku deka ngerusak kebun anggur enggau kayu ara iya ti dikumbai iya diberi bala ambai iya ketegal iya udah bekereja ke sida. Aku deka ngaga kebun anggur enggau kebun buah ara iya nyadi menua puang, laban jelu babas deka ngerusak sida.
13 Aku deka ngukum iya laban iya udah begawai ke bala petara Baal, lebuh iya nunu menyan ngagai sida, lalu ngias diri ngena tinchin enggau batu ti berega, lalu nitihka bala ambai iya, lalu enda ingatka Aku, ku TUHAN bejaku.
 
Pengerindu TUHAN Ke Bala Nembiak Iya
14 Nya alai Aku deka mai iya ngagai menua puang, laban Aku deka ngulihka ati iya baru ngena jaku ti siru.
15 Aku deka meri kebun anggur iya pulai baru ngagai iya, lalu ngaga Emperan Penusah nyadika pintu pengadang. Iya deka nyaut Aku dia baka iya ti udah nyaut Aku lebuh iya agi biak suba, lebuh iya datai ari menua Ejip.
16 Udah nya baru iya deka sekali agi ngumbai Aku laki iya, lalu enda agi ngumbai Aku Baal  iya.
17 Aku enggai sekali-kali nejuka iya nyebut nama Baal agi.
18 Lebuh maya nya ila, Aku deka ngaga siti sempekat enggau semua jelu babas enggau burung, ngambika sida enda ngemediska bala nembiak Aku. Aku deka mega muai semua senyata perang ari menua tu, semua pedang enggau panah, ngambika bala nembiak Aku diau dalam pemaik enggau pengelikun.
19 Israel, Aku deka ngambi nuan nyadika bini Aku dalam pengelurus, sereta tetap ati ngagai nuan. Aku deka seruran rindu sereta kasihka nuan lalu bempu nuan belama iya.
20 Aku deka ngamatka semaya Aku, lalu ngaga nuan nyadika enggi Aku, lalu nuan deka ngaku Aku nyadika TUHAN nuan.
21-22 Lebuh maya nya ila, Aku deka nyaut sampi bala nembiak Aku Israel. Aku deka ngasuh hari ujan, lalu tanah deka mansutka gandum enggau buah anggur enggau buah kana.
23 Aku deka ngentapka bala nembiak Aku diau di menua tu, lalu ngasuh sida kaya-raja. Aku deka ngayanka pengerindu ngagai sida ke dikumbai “Enda Dikerinduka,” enggau ngagai sida ke dikumbai “Ukai Bala Nembiak Aku” Aku deka nyebut, “Kita tu nembiak Aku,” lalu sida deka nyaut, “Nuan meh Allah Taala kami.”
 
Bagi 3
Hosea Enggau Indu Ke Butang
1 Ku TUHAN bejaku ngagai aku, “Alai nuan mupuk baru  lalu ayanka pengerindu nuan ke siku indu ke butang enggau ambai iya. Nuan enda tau enda rinduka iya baka Aku ti agi mengkang rinduka orang Israel, taja pen sida limpang ngagai petara bukai, lalu rindu mai piring buah anggur ti udah disalai ngagai engkeramba.”
2 Nya alai aku lalu meli indu nya ngena rega 15 singkap duit pirak enggau 150 kilogram barli.
3 Aku lalu madahka iya deka lama nganti aku, lalu enda tau nyundal, tauka butang, lalu aku pen enda mega tau beleman enggau iya.
4 Nya meh pengelama orang Israel deka idup nadai raja tauka tuai bansa, nadai ngenjuk piring, nadai tiang batu keramat, nadai engkeramba, nadai anak patung kena nujum.
5 Tang maya deka datai alai orang Israel deka sekali agi pulai baru ngagai TUHAN Allah Taala sida enggau ngagai peturun David ke nyadika raja sida. Udah nya baru sida deka nangika TUHAN, lalu nerima pemeri ti manah ari Iya.
 
Bagi 4
TUHAN Bedawaka Orang Israel
1 Ku TUHAN bedawaka orang Israel: “Kita orang Israel, pendingka utai ti disebut TUHAN. Penetap ati enggau pengerindu nadai agi di menua tu, lalu orang Israel enda ngaku Aku nyadika Allah Taala sida.
2 Sida ngaga semaya, tang sida mungkir ari semaya nya. Sida bula, munuh orang, ngenchuri, sereta butang. Penyalah sida nambah-menambah. Orang nyau betangkan-tangkan mati dibunuh.
3 Nya alai menua tu deka rangkai, lalu semua utai ti idup di menua tu deka mati magang. Semua mensia, jelu, burung, enggau ikan deka mati magang.”
 
TUHAN Bedawaka Sida Imam
4 Ku TUHAN bejaku, “Anang besalah sebarang orang! Ukai semua orang salah. Aku bejaku ngelaban kita ke imam.
5 Siang malam kita ngereja penyalah, lalu sida nabi pen nadai mega lebih ari kita. Aku deka ngerusak Israel ti indai kita.
6 Nembiak Aku deka dirusak, laban sida enda bedulika Aku. Kita ke imam enda bedulika Aku, lalu udah nulak ajar Aku. Nya alai, Aku nulak kita, lalu enggai ngaku bala anak kita nyadika imam Aku.
7 “Makin mayuh agi kita nyadi imam, makin mayuh agi ga kita bedosa ngelaban Aku. Nya alai Aku enggai agi masa kita, tang deka mechat kita.
8 Kita gaga ati meda bala nembiak Aku bedosa, ngambika kita ulih ngelantangka diri ngena piring ti dikena muai dosa sida.
9 Kita deka merinsa natka ukum baka orang mayuh! Aku deka ngukum kita ketegal penyai ti dikereja kita.
10 Kita deka makai piring ti endang ungkup kita, tang kita deka mengkang lapar. Kita deka nyembah petara ti ngasuh peridi, tang kita deka mengkang nadai anak, laban kita udah ninggalka Aku lalu nitihka petara bukai.”
 
TUHAN Ngukum Orang Ke Nyembah Petara Bukai
11 Ku TUHAN bejaku, “Wain, nemuka lama tauka baru, bela ngasuh bala nembiak Aku enda nemu berunding!
12 Bala nembiak Aku betanyaka utai ngagai kayu, lalu tungkat sida meri sida leka jaku. Laban roh sundal udah nesatka sida, lalu sida udah ninggalka Allah Taala sida, ngambika sida ulih nyundal.
13 Sida ngenjuk piring ba endur alai nyembah engkeramba ba sebelah tuchung bukit, lalu sida nunu menyan di baruh kayu ti tinggi sereta jurai ba sebelah munggu, laban endur nya lindung!
Nya lalu ngujungka bala anak indu kita nyundal, lalu menantu indu kita butang.
14 Aku enggai ngukum anak indu kita ketegal sida nyundal, lalu Aku pen enda mega ngukum menantu indu kita ketegal sida butang, laban laki sida empu deh beleman enggau indu sundal, lalu ngenjuk piring sama enggau indu sundal dalam rumah sembiang. Pemeli kita empu deka ngujungka kita dirusak.
15 “Tang taja pen kita orang Israel enda tetap ati ngagai Aku, awakka Judah enda ngereja utai ti salah baka nya. Anang nyembah di Gilgal tauka di Bet-aben, tauka ngaga semaya dia dalam nama Allah Taala ti idup.
16 Orang Israel kieh baka penakan kuda. Baka ni ku Aku ulih engkani sida baka ke engkani anak domba ba padang rumput?
17 Orang Israel udah kena laban jayau engkeramba. Awakka sida baka nya aja.
18 Lebuh sida udah balat ngirup wain, sida lalu ngelantangka diri nyundal. Sida rindu agi ke diri dipechat ari ke dibasa.
19 Sida deka ditabanka, baka ke dikebuka ribut, lalu sida deka malu ke piring ti diberi sida ngagai engkeramba.
 
Bagi 5
1 “Pendingka tu ulih kita ke imam! Peratika enggau manah, kita orang Israel! Anang enda mending, kita ke ari ruang bilik raja! Kita udah dikarapka ngakim enggau lurus, tang kita empu deka diakim! Kita udah nyadi panjuk di Mispah, nyadi jarin ti ditan ba Bukit Tabor,
2 nyadi lubang kebung ti dalam di nengeri Akasia, lalu Aku deka ngukum semua kita.
3 Aku nemu gaya bansa orang Israel. Sida enda ulih belalai ari Aku. Sida udah enda tetap ati ngagai Aku, lalu sida enda patut nyembah Aku.”
 
Hosea Nagang Orang Nyembah Engkeramba
4 Penyai ti udah dikereja orang mayuh nagang sida pulai baru ngagai Allah Taala sida. Pengawa ti besembahka engkeramba balat nanchang sida, lalu sida enda ngaku TUHAN.
5 Penyumbung orang Israel deka besaksi ngelaban sida empu. Dosa sida empu ti ngasuh sida tesangkut lalu tetingkap, lalu orang Judah sama rebah enggau sida.
6 Sida mai bedus enggau sapi sida lalu meri utai nya nyadika piring ngagai TUHAN, tang utai nya nadai mai penguntung ngagai sida. Sida enda ulih nemu TUHAN, laban Iya udah ninggalka sida.
7 Sida udah enda tetap ati ngagai TUHAN. Bala anak sida ukai enggi TUHAN. Nya alai menua sida deka dirusak enda lama da agi.
 
Perang Entara Judah Enggau Israel
8 Sepu terumpit di Gibe-ah! Asuh orang megau orang mayuh di Ramah! Manjung meh kita di Bet-aben mai orang mansang beperang! Mansang beperang meh kita bala Benjamin!
9 Israel deka dirusak lebuh maya sida diukum. Aku madahka ngagai semua raban bansa orang Israel, utai ti tetap deka nyadi!
10 Ku TUHAN bejaku, “Aku ringat laban tuai orang Judah udah nyerang menua Israel, lalu ngenchuri tanah sida. Nya alai Aku deka mubuhka pengeringat Aku ngagai sida baka ai bah.
11 Israel natka diri merinsa kena tekan. Iya udah lenyau menua ti endang patut diempu iya, laban iya keras minta tulung ari orang ke enda ulih nulung iya.
12 Nya alai Aku deka ngerusak orang Israel, enggau orang Judah.
13 “Lebuh Israel meda diri balat sakit, lalu lebuh Judah meda diri bakal, nya baru Israel mansang ngagai Asiria minta raja menua nya nulung iya, tang raja nya enda ulih ngeraika sida tauka nyumanka bakal sida.
14 Aku deka nyerang orang Israel enggau orang Judah baka singa. Aku Empu deka nyarikka sida, lalu udah nya ninggalka sida. Lebuh Aku ngirit sida, nadai orang ulih ngelepaska sida.
15 “Aku deka ninggalka nembiak Aku datai ke sida udah chukup merinsa ketegal dosa sida, lalu datai ngiga Aku. Lebuh sida tusah, sida nguji ngiga Aku.”
 
Bagi 6
Orang Mayuh Dikangauka Nesal Ati
1 “Aram kitai pulai baru ngagai TUHAN. Iya udah encharikka kitai, tang Iya deka ngeraika kitai. Iya udah ngemakalka kitai, tang Iya deka malut telih kitai.
2 Dalam dua hari Iya deka ngidupka kitai baru; ba hari ti ketiga Iya deka ngangkatka kitai ngambika kitai tau idup di mua Iya.
3 Aram kitai majak nguji meretika TUHAN. Iya tetap deka datai ngagai kitai, baka penumbuh mata hari, baka ujan ti labuh ninggang tanah.”
 
Orang Israel Enggau Orang Judah Enggai Nesal Ati
4 Tang ku TUHAN bejaku, “Israel enggau Judah, nama utai ti patut dikereja Aku ngagai kita? Pengerindu kita ke Aku jampat lesap baka sebun ambun pagi hari, baka ai ambun ti lesap tumu pagi.
5 Nya kebuah Aku udah ngasuh bala nabi Aku betemu enggau kita, mai pesan pasal ukum enggau pengerusak. Utai ti diguna Aku ari kita nya terang sereta nyata:
6 Aku begunaka pengerindu ti meruan belama iya, ukai piring. Aku rindu agi ke kita nemu Aku, ari kita ke meri piring tunu ngagai Aku.
7 “Tang di Adam, sida ngelanggar sempekat ti udah digaga Aku enggau sida. Dia meh endur alai sida ngayanka diri enda tetap ati ngagai Aku.
8 Nengeri Giliat penuh laban orang ke jai enggau pemunuh.
9 Bala sida imam nyau baka bala perumpak ke ngeramka ipa nganti orang ke mansa. Indah ba jalai raya ngagai endur ti kudus di Sekem deh sida bebunuhka orang, lalu ngereja penyalah ti besai.
10 Aku bisi udah meda siti utai ti jai nyadi di menua Israel: bala nembiak Aku udah ngamahka diri besembahka engkeramba.
11 “Nyadi kita orang Judah, Aku udah ngeletak maya alai Aku deka mai kita pulai baru.
 
Bagi 7
1 “Genap kali Aku deka ngeraika Israel, lalu ngasuh sida nyadi kaya-raja baru, Aku semina tepedaka utai ti jai ti dikereja sida. Sida nipu pangan diri. Sida tama ngagai rumah orang lalu ngenchuri. Sida ngerumpak orang ba sebelah jalai raya.
2 Sida ngumbai Aku enda ingatka semua penyai nya. Tang dosa ngelulung sida, lalu Aku meda dosa nya.”
 
Orang Bepekat Dalam Istana
3 Ku TUHAN bejaku, “Orang mayuh bepekat lalu nipu raja enggau bala pemesai iya.
4 Semua sida nya orang ke aum-juak sereta enda taluk magang. Ati sida ke begedi mau baka api ti ba dapur, ti dikena ngaga roti, api ti enda ibuh disurungka datai ke roti nya mansau.
5 Lebuh raja ngintu pengerami iya, bala pemesai iya mabuk ngirup wain.
6 Sida mau baka api ti dikena manggang roti. Semalam-malam pengeringat sida ngungut, lalu lebuh pagi hari pengeringat nya mau baka api.
7 “Sida balat ringat lalu munuh orang ke megai perintah. Bala raja sida udah dibunuh betangkan-tangkan, tang nadai siku orang besampi ngangauka Aku.”
 
Israel Enggau Bansa Bukai
8 Ku TUHAN bejaku, “Orang Israel baka roti ti dipanggang setengah mansau. Sida begaul enggau orang bansa bukai.
9 Sida enda nemu orang bansa bukai nginsap pengering sida. Lalu sida enda nemu pala diri nyau buban-banan.
10 Penyumbung orang Israel deka besaksi ngelaban  sida empu; tang taja pia, sida enda pulai baru ngagai TUHAN ti Allah Taala sida, tauka ngiga Iya ketegal semua utai nya.
11 Israel nyau baka burung achang, beli lalu enda nemu berunding. Sida minta tulung menua Ejip, udah nya minta tulung orang Asiria!
12 Tang lebuh sida bejalai, Aku deka nibarka jala Aku ngagai sida. Aku deka mai sida baka ke mai burung. Aku deka disiplin sida nitihka utai ti dipadahka sida ngagai gempuru sida.
13 “Tulah meh sida, laban sida udah ninggalka Aku. Sida deka dirusak, laban sida udah angkat ngelaban Aku. Aku endang deka nebus sida, tang sida bejaku bula ngelaban Aku.
14 Sida enda besampi ngagai Aku ari ati sida, tang nyungkurka diri ba peninduk sida, lalu duie-duie nyabak. Sida ngurik tubuh diri lebuh sida minta gandum enggau wain. Sida angkat ngelaban Aku!
15 Aku tu ti udah matih sereta ngeringka lengan sida. Tang taja pia sida bepekat ngelaban Aku.
16 Sida nguingka diri ngagai utai ti nadai guna. Sida udah nyadi baka panah ti enda menyana; bala pemesai sida deka mati laban pedang ketegal pemeli jaku sida. Lalu orang Ejip deka ketawaka sida.”
 
Bagi 8
TUHAN Ngukum Orang Israel Ke Nyembah Engkeramba
1 Ku TUHAN bejaku, “Sepu terumpit kena megau orang mayuh! Bala munsuh nyerang menua Aku baka menaul, laban nembiak Aku udah ngelanggar sempekat enggau adat Aku.
2 Taja pen sida ngumbai Aku Allah Taala sida, lalu ngumbai diri nembiak Aku sereta nemu Aku,
3 tang sida udah nulak utai ti manah. Ketegal nya, bala munsuh sida deka begagaika sida.
4 “Bala nembiak Aku udah milih raja, tang ukai dikemendarka Aku. Sida nuduhka orang nyadi tuai, tang ukai nitihka penemu Aku. Sida begagaka engkeramba ngena emas enggau pirak sida, kena sida ngerusak diri empu.
5 Aku begedika sapi emas ti disembah orang di nengeri Samaria. Aku pedis ati ngagai sida. Ni pengelama baru sida deka diau tuchi
6 di menua Israel? Engkeramba nya digaga tukang. Engkeramba nya ukai Allah Taala. Sapi emas orang Samaria deka dipechahka!
7 Sida nanam ribut, nya alai sida deka ngetau kabut! Gandum sida nadai tangkai, lalu enda ulih mansutka roti. Tang enti sema iya ulih mansutka roti, orang bansa bukai ga deka makai roti nya.
8 Israel nyau sebaka enggau bansa bukai, sereta nadai guna baka periuk ti udah pechah.
9 Kieh baka keledai kampung, orang Israel bejalai ngatika diri. Sida udah mupuk ngiga tulung ari orang Asiria, lalu udah ngaji bansa bukai nyaga sida.
10 Tang diatu Aku deka ngempuruka sida, lalu ngukum sida. Enda lama da agi, sida deka ngelingkang natka diri pedis lebuh raja menua Asiria nekanka pengidup sida.
11 “Makin mayuh agi alta digaga orang Israel kena muai dosa, makin mayuh agi ga endur alai sida bedosa!
12 Taja pen Aku nuliska mayuh jaku ajar ke sida, tang sida ngumbai ajar nya nyelai.
13 Taja pen sida rindu ngenjuk piring, lalu bepakaika dagin, tang TUHAN enda nerima piring nya. Diatu Iya deka ngingatka penyai sida lalu ngukum sida ketegal dosa sida. Sida deka pulai baru ngagai menua Ejip!
14 “Orang Israel enda ingatka Aku ti udah ngaga sida, lalu sida begagaka berapa buah istana. Orang Judah udah nambahka pemayuh nengeri ti bekuta, tang Aku deka nunu nengeri sida, lalu nganguska kuta sida.”
 
Bagi 9
Hosea Madahka Ukum Israel
1 Anang kita rami gaga, O Kita orang Israel! Anang rami tauka manjung baka orang bansa bukai. Kita udah ninggalka Allah Taala kita, lalu enda tetap ati ngagai Iya. Di serata menua tu kita udah nyual diri baka indu sundal ngagai petara Baal, lalu udah gaga ati ke gandum ti dikumbai kita kena iya mayar kita!
2 Tang enda lama da agi kita enda chukup gandum enggau minyak kana, lalu nadai agi wain.
3 Orang Israel enda agi diau di menua TUHAN, tang deka pulai baru ngagai menua Ejip, lalu di menua Asiria sida deka makai pemakai ti enda tuchi.
4 Di menua orang bansa bukai sida enda ulih ngenjuk piring wain ngagai TUHAN, lalu piring sida enda ulih ngerinduka ati Iya. Piring nya baka pemakai ti diempa orang ke ngulit. Semua orang ke makai piring nya deka kamah laban iya, laban pemakai nya semina ngenyangka sida aja. Piring nya enda datai ba Rumah TUHAN.
5 Nama utai ti deka dikereja sida lebuh maya gawai, enggau lebuh gawai TUHAN?
6 Laban taja pen sida enda dirusak, orang Ejip deka ngumpul sida, lalu orang Mempis deka nguburka sida. Reta tengkira pirak enggau endur alai rumah sida ke udah bediri menya, deka dilamun rumput enggau madang duri.
7 Maya ngukum udah datai; sida deka nerima ukum ti patut diterima sida. Sida deka nyebut, “Nabi nya beli. Iya gila.” Kita balat begedika aku laban dosa kita besai.
8 Allah Taala udah ngirumka aku nyadi nabi ngambika aku nyadi jejaga orang Israel. Tang kita nguji manjuk aku baka ke manjuk burung di sebarang endur aku bejalai. Indah dalam Rumah Sembiang, deh orang mayuh begedika nabi.
9  Sida udah ngereja penyai baka ke udah dikereja di Gibe-ah. Allah Taala deka ingatka dosa sida lalu ngukum sida ketegal dosa nya.
 
Orang Israel Bedosa Lalu Dirusak
10 Ku TUHAN bejaku, “Lebuh Aku terubah tetemuka Israel, Aku asai ke tetemuka buah anggur di menua puang. Lebuh Aku terubah meda aki ini kita, Aku asai ke tepedaka buah ara ti terubah mansau. Tang lebuh sida datai ba Bukit Peor, sida berengkah nyembah Baal, lalu enda lama udah nya sida lalu nyadi jai baka petara ti dikerinduka sida.
11 Penampak nama Israel deka terebai kebukai baka burung, lalu sida nadai agi anak, nadai agi indu ke ngandung, nadai agi anak dikandung.
12 Enti sida bisi anak, Aku deka ngambi anak sida, datai ke nadai siku sida agi idup. Tulah meh sida lebuh Aku ninggalka sida.”
13 Suba aku bisi meda bala anak sida baka kayu engkerema ti ditanam ba padang ti manah  tang diatu Israel enda tau enda mai bala anak iya pansut ngambika sida dibunuh.
14 TUHAN, kereja siti aja utai ngagai orang tu: asuh bala indu sida nadai anak, tauka enda ulih nusuka anak!
 
Allah Taala Ngukum Israel
15 Ku TUHAN bejaku, “Semua pengawa sida ke jai udah belabuh dikereja sida di Gilgal. Dia meh endur alai Aku ke berengkah begedika sida. Lalu ketegal penyai ti udah dikereja sida, Aku deka muru sida ari menua Aku. Aku enggai agi rinduka sida. Semua bala tuai sida udah angkat ngelaban Aku.
16 Orang Israel tu baka kayu ti udah rangkai urat, lalu enda bebuah. Sida nadai ulih beranak, tang enti sema sida beranak, Aku deka munuh anak ti balat dikesayauka sida.”
 
Nabi Bejaku Ngenang Pasal Israel
17 Allah Taala ti dipetuaika aku, deka nulak bala nembiak Iya, laban sida enda mendingka Iya. Sida deka belelang ngagai menua bukai.
 
Bagi 10
1 Orang Israel baka batang anggur ti lebat buah. Kaya agi sida, mayuh agi ga alta digaga sida. Mayuh agi asil ulih sida ari tanah sida, manah agi ga gaya tiang batu keramat ti disembah sida.
2 Orang ke ati deka ngelakar enda tau enda natka pemerinsa ketegal dosa sida. Allah Taala deka ngerubuh alta sida, lalu ngerusak tiang keramat sida.
3 Enda lama da agi orang tu deka nyebut, “Kitai nadai raja, laban kitai enda nangika TUHAN. Tang nama utai ti ulih dikereja raja ke kitai?”
4 Sida nyebut jaku ti nadai guna, lalu sida ngaga semaya ti bula, enggau sempekat ti nadai guna. Atur ti lurus udah nyadi atur ti bingkuk, ti tumbuh baka rumput ti berachun ba tanah umai ti udah dichangkul.
5 Orang ke diau di nengeri Samaria deka takut, lalu deka ngulitka sapi sida ti lelaki  ti digaga ari emas di Bet-aben. Sida enggau bala imam ke bekereja ke engkeramba nya deka nyabakka iya. Sida deka duie-duie nyabak lebuh emas dikerebakka ari engkeramba nya.
6 Engkeramba nya deka dibai ngagai menua Asiria, lalu diberi nyadika pemeri ngagai raja. Orang Israel deka dipechat, lalu sida deka malu ketegal jaku lalau ti dititihka sida.
7 Raja sida deka ditabanka, baka ke nganyutka repik kayu ba ai.
8  Rumah sembiang alai orang ke nyembah engkeramba ba tuchung bukit di Aben, alai orang Israel ti nyembah engkeramba, deka dirusak. Madang duri enggau rumput deka tumbuh lalu ngelamun alta sida. Orang mayuh deka ngangauka bukit, “Lalaika kami!” sereta ngangauka munggu, “Lamun kami!”
 
TUHAN Ngukum Orang Israel
9  Ku TUHAN bejaku, “Orang Israel nadai nemu ngetu bedosa ngelaban Aku kenyau ari sida ke bedosa di Gibe-ah  suba. Nya alai, sida deka diserang di Gibe-ah.
10 Aku deka nyerang orang ke bedosa nya. Semua bansa deka setanah ngelaban sida, lalu sida deka diukum ketegal pemayuh dosa sida.
11 “Dulu menya Israel udah kala nyadi baka sapi dara ti udah dilatih, lalu sedia deka nungku gandum. Tang Aku mutuska runding deka ngengkahka kungkung ba rekung iya ti manah nya, lalu nyendiaka iya ngereja pengawa ti kasar agi. Aku udah ngasuh Judah narit pengeradu tanah, lalu Israel deka narit perengka ti dikena mechahka tanah.
12 Ku Aku bejaku, ‘Radu tanah bukai ke diri empu, tanam pengelurus, lalu ketau berekat ti deka datai ari pengangkun kita ke Aku. Tu meh maya kita patut nguingka diri ngagai Aku ti TUHAN kita, lalu Aku deka datai lalu nuang berekat ngagai kita.’
13 Tang kita nanam penyai, lalu kita ngetau penyai. Kita udah makai buah ti pansut ari pemula kita empu. “Laban kita ngarapka kerita perang kita  enggau pemayuh bala soldadu kita,
14 kita deka diserang munsuh, lalu semua kuta kita deka dirusak magang. Utai ti deka nyadi nya sebaka enggau utai ti udah nyadi lebuh Raja Salman ngerusak nengeri Bet-arbel lebuh perang nya suba, lalu sida ke indai enggau bala anak sida redak lalu mati.
15 Tu utai ti deka nyadi ba kita, kita orang Betel, ketegal pemalat penyai ti udah dikereja kita. Lebuh perang belabuh, raja menua Israel deka mati.”
 
Bagi 11
Pengerindu Allah Taala Ke Nembiak Iya
1  “Lebuh Israel agi mit, Aku rinduka iya lalu Aku ngangauka anak Aku pansut ari menua Ejip.
2 Tang makin bebendar agi Aku  ngangauka iya, makin jauh agi ga iya ninggalka Aku. Bala nembiak Aku ngenjuk piring ngagai Baal. Sida nunu menyan ngagai engkeramba.
3 Aku udah ngiring lalu ngajar orang Israel bejalai. Aku udah merap bala nembiak Aku tang sida enda ngaku Aku udah ngeraika sida.
4 Aku nguluka sida enggau penelap sereta enggau pengerindu. Aku ngangkatka sida ngagai kuyu Aku. Aku ngenduk lalu nyapi sida.
5 “Sida enggai pulai baru ngagai Aku, nya alai sida enda tau enda pulai baru ngagai menua Ejip, lalu Asiria deka merintah sida.
6 Nengeri sida deka diserang, lalu pintu nengeri sida deka diruntuhka. Perang nya deka ngerusak bala nembiak Aku laban sida ngereja utai ti dikumbai sida manah.
7 Nembiak Aku keras deka ninggalka Aku. Sida ngangauka Iya ti Pemadu Tinggi, tang Iya enda ngangkatka sida.
8 “Baka ni ku Aku ulih ngelengkaka kita, Israel? Baka ni ku Aku ulih ninggalka kita? Baka ni ku Aku ulih ngerusak kita baka Aku ti udah ngerusak Admah, tauka ngaga kita baka Aku ti udah ngaga Seboim? Ati Aku sigi enggai ngereja nya! Ati Aku kelalu balat rinduka kita.
9 Aku enggai ngukum kita lebuh Aku ringat. Aku enggai agi ngerusak Israel, laban Aku tu Allah Taala, ukai mensia, Aku ti kudus, ke meruan enggau kita. Aku enggai datai ngagai kita lebuh Aku ringat.
10 “Bala nembiak Aku deka nitihka Aku lebuh Aku negung munyi singa ngelaban munsuh sida. Sida deka beguai datai ngagai Aku ari barat.
11 Sida deka datai ari Ejip, ngelaju burung, enggau ari Asiria, baka burung achang. Aku deka mai sida pulai baru ngagai rumah sida empu. Aku ti TUHAN udah bejaku.”
 
Israel Enggau Judah Diukum
12 Ku TUHAN bejaku, “Orang Israel udah ngelulung Aku ngena pemula enggau jaku tipu, tang orang Judah agi nitihka Allah Taala sereta tetap ati ngagai Iya ti kudus.
 
Bagi 12
1 Semua utai ti dikereja orang Israel ari pagi nyentuk ngagai malam sigi nadai guna magang, sereta tau ngerusak. Sida majak bula sereta mangah. Sida ngaga sempekat enggau Asiria, lalu bedagang enggau menua Ejip.”
2 TUHAN deka bedawaka orang Judah, lalu ngukum Israel ketegal ulah bala nembiak iya. Iya deka malas sida ketegal utai ti udah dikereja sida.
3 Aki sida ke benama Jakop belaban enggau menyadi iya Esau lebuh seduai iya agi dalam kandung. Lebuh Jakop nyau besai tuai, iya belaban enggau Allah Taala.
4 Iya belaban enggau siku melikat, lalu menang. Iya nyabak lalu minta berekat. Lalu Allah Taala datai ngagai aki kitai Jakop di Betel, lalu bejaku enggau iya.
5 Tu meh TUHAN ti Pemadu Bekuasa, lalu nama Iya TUHAN, nama ke dikena kitai nyembah Iya.
6 Nya alai, peturun Jakop, panggaika pengarap kita ba Allah Taala, lalu pulai baru ngagai Iya. Kita enda tau enda taluk sereta lurus, lalu enggau ati ti liat, anti meh Allah Taala kita.
 
Tampung Jaku Ngeletak Ukum
7 Ku TUHAN bejaku, “Orang Israel enda betul ati baka orang Kanaan. Sida rindu nipu orang ke meli utai ngena dachin ti enda betul.
8 Ku sida, ‘Kami tu kaya. Kami udah bulih pengaya. Lalu nadai orang tau ngumbai kami bulih pengaya nya ngena jalai ti enda betul.’
9  Tang Aku TUHAN Allah Taala kita, ti udah mai kita pansut ari menua Ejip, deka ngasuh kita diau dalam langkau kain baru, baka kita kelia lebuh Aku datai ngagai kita di menua puang.
10 “Aku udah bejaku ngagai bala nabi lalu meri sida genera, lalu nengah bala nabi nya Aku udah meri jaku tangkan ngagai bala nembiak Aku.
11 Tang taja pia, engkeramba agi disembah di Giliat, lalu sida ke nyembah engkeramba nya, deka mati. Sapi ti lelaki digaga nyadika piring di Gilgal, lalu alta ti dia deka nyadi tugung batu ba padang.”
12  Aki kitai Jakop rari ngagai menua Mesopotamia, alai iya ke bekereja ke orang siku, lalu ngibun raban bedus ke orang nya, kena iya ngulihka bini.
13 TUHAN ngasuh siku nabi ngelepaska orang Israel ti nyadi ulun di menua Ejip, lalu ngibun sida.
14 Orang Israel udah ngasuh TUHAN balat ringat. Sida patut dibunuh ketegal penyalah sida. TUHAN sida deka ngukum sida laban sida udah ngemaluka Iya.
 
Bagi 13
Ukum Israel Ti Penudi
1 Dulu menya, lebuh raban bansa Epraim bejaku, raban bansa orang Israel ti bukai takut, laban sida bebasaka Epraim. Tang orang Israel bedosa laban sida nyembah Baal, lalu sida mati.
2 Sida agi majak bedosa begagaka engkeramba ari besi ngambika bisi disembah sida - engkeramba ti digaga ari pirak, ti ditempa lalu digaga jari mensia. Lalu udah nya, ku sida bejaku, “Beri piring ngagai engkeramba tu!” Baka ni ku orang ulih nyium engkeramba nya, engkeramba ti baka gamal sapi ti lelaki?
3 Nya alai orang tu deka lesap baka sebun ambun pagi hari, baka ai ambun ti lesap tumu pagi. Sida baka ampa ti dikebuka ribut ari endur alai nungku, baka asap ti pansut ari serumbung.
4 Ku TUHAN bejaku, “Aku tu TUHAN Allah Taala kita ke udah mai kita pansut ari menua Ejip. Kita nadai petara bukai tang semina Aku aja. Semina Aku aja ke Penebus kita.
5 Aku udah ngibun kita di menua puang ti rangkai.
6 Tang lebuh kita datai ba menua ti manah, kita kenyang lalu puas ati, lalu udah nya kita sumbung lalu enda agi ingatka Aku.
7 Nya alai Aku deka nerekam kita baka singa. Baka engkuli, Aku deka ngipa kita ba jalai ti ditengah kita.
8 Aku deka nerekam kita baka beruang ti lenyau anak, lalu Aku deka nyarikka tubuh kita. Baka singa, Aku deka makai kita dia lalu nyarikka kita baka jelu babas.
9 “Aku deka ngerusak kita orang Israel! Udah nya sapa ulih nulung kita?
10 Kita minta raja enggau tuai bansa, tang baka ni ku sida ulih ngelepaska bansa kita?
11  Aku ringat lalu meri kita raja, lalu lebuh Aku ngeransi, Aku ngambi raja nya ari kita.
12 “Dosa enggau penyalah orang Israel udah dituliska, lalu ditaruh teguh.
13 Israel bisi peluang idup, tang iya kelalu beli lalu enda ngambi peluang nya - baka anak mit ke baru deka ada, ke enggai pansut ari kandung.
14 Aku enggai ngelepaska bansa orang tu ari dunya pemati tauka ngelepaska sida ari kuasa pemati. Bai kitu penyakit nuan, pemati! Bai kitu  *pengerusak nuan, dunya pemati! Aku enggai agi kasihka bansa orang tu.
15 Taja pen orang Israel tumbuh baka rumput, Aku deka ngasuh ribut ti angat muput ari menua puang, lalu ribut nya deka ngerangkaika mata ai enggau telaga sida. Ribut nya deka ngambi abis lengis semua utai ti berega.
16 Samaria deka diukum laban iya udah angkat ngelaban Aku. Bala nembiak iya deka mati beperang. Anak mit deka diempaska ngagai tanah, lalu perut indu ke ngandung deka diperuti.”
 
Bagi 14
Hosea Ngumbuk Israel Pulai Baru
1 O kita orang Israel, pulai meh kita baru ngagai TUHAN Allah Taala kita. Dosa kita udah ngasuh kita tesangkut lalu tetingkap.
2 Pulai meh kita baru ngagai TUHAN, lalu awakka sampi tu nyadika piring kita ngagai Iya: “Buai semua dosa kami, lalu terima meh sampi kami, lalu kami deka muji Nuan munyi ti udah disemaya kami.
3 Asiria nadai ulih ngidupka kami, lalu kuda perang enda ulih nyaga kami. Kami enggai agi nyebut ngagai engkeramba kami, ngumbai sida nya Allah Taala kami. O TUHAN, Nuan kasihka orang ke nadai petara bukai alai sida ngadap.”
 
TUHAN Besemaya Deka Meri Pengidup Ti Baru Ngagai Israel
4 Ku TUHAN bejaku, “Aku deka mai bala nembiak Aku pulai baru ngagai Aku. Aku deka rinduka sida enggau pengabis ati Aku. Aku enda agi ringat ngagai sida.
5 Ba orang Israel, Aku deka nyadi baka ujan ti labuh ba tanah ti rangkai. Sida deka bekuntum baka bungai. Sida deka beurat tegap baka kayu di menua Lebanon.
6 Sida deka idup lalu nelesak baru, sereta manah gaya baka kayu kana. Sida deka bebau rengut baka kayu sidar di menua Lebanon.
7 Sekali agi sida deka idup dilindung Aku. Sida deka galak baka gandum lalu sida deka bebuah lebat baka kebun anggur. Sida deka beberita baka wain menua Lebanon.
8 Orang Israel  enggai agi bekaul enggau engkeramba. Aku deka nyaut sampi sida, lalu ngibun sida. Baka kayu ti enda nemu layu, Aku deka ngelindung sida. Aku tu meh penatai semua berekat sida.”
 
Pengujung
9 Awakka sida ke bepenemu-dalam meretika utai ti ditulis ditu, lalu awakka sida nyimpan utai nya dalam ati sida. Jalai TUHAN endang ngena, lalu orang ke lurus sigi idup nitihka jalai nya, tang orang ke bedosa tesangkut lalu tetingkap laban sida enda begunaka jalai nya.