DANIEL
 
Jaku Pemuka
Bup  Daniel* ditulis lebuh orang Judah benung balat diperinsa sereta ditekanka raja orang kapir. Orang ke nulis bup tu ngena mayuh macham jerita pasal genera kena meransang orang ngarapka Allah Taala deka muai raja ti jai nya, lalu ngasuh bala nembiak Allah Taala merintah diri baru.

Bup tu dibagi ngagai dua iti sitak: 1) Jerita pasal Daniel enggau sekeda orang bukai ti udah dibuai sama enggau iya ngagai menua bukai, iya nya orang ke arap sereta ngasika Allah Taala, lalu menang ngelaban munsuh sida. Utai ti disebut dalam jerita tu nyadi ba rambau perintah Babilon enggau perintah Persia kelia. 2) Daniel meda mayuh macham genera. Genera nya nunjukka sekeda perintah deka menang enggau alah, berengkah ari perintah Babilon. Genera nya mega madahka orang kapir ke merinsaka orang Israel deka alah, lalu bala nembiak Allah Taala deka menang.
 
Ripih Isi Bup Tu
Daniel enggau sida pangan iya (1.1-6.28)
Genera Daniel (7.1-12.13)
     a. Empat iku jelu (7.1-28)
     b. Bedus lelaki enggau kambin (8.1-9.27)
     c. Seruan ari serega (10.1-11.45)
     d. Timpuh ti penudi (12.1-13)
 
Bagi 1
Jerita Pasal Daniel Enggau Bala Pangan Iya (1.1-6.28)
 
Empat Iku Bujang Orang Israel Dalam Istana Nebukadnesar
1 Dalam taun ti ketiga Jehoiakim nyadi raja menua Judah, dia Raja Nebukadnesar menua Babilon datai ngagai Jerusalem lalu ngelulung nengeri nya.
2 Lalu TUHAN nyerahka Raja Jehoiakim ngagai jari Raja Nebukadnesar sama enggau reta tengkira ti berega dalam Rumah Sembiang. Lalu Nebukadnesar nabanka sekeda orang tangkap ngagai menua Babilon. Iya mai lalu nyimpan reta tengkira dalam bilik setor rumah petara iya.
3 Raja nya ngasuh Aspenas, ti nyadi tuai ke bala pemesai iya, milih orang Israel ke agi biak, ke ari peturun raja, enggau ari peturun orang ke tinggi pangkat,
4 ke nadai penimpang, sigat, bepenemu-dalam sereta bepelajar, ke ulih bekereja dalam istana raja. Iya ngasuh Aspenas ngajar sida macha enggau nulis jaku orang Babilon.
5 Raja mega meri atur ngasuh sida tiap hari diberi pemakai enggau wain ti diberi ngagai raban orang ke di istana raja. Lebuh sida udah dilatih tiga taun, sida lalu dibai betemu enggau raja.
6 Bala sida nya nyengkaum Daniel, Hananiah, Misael, enggau Asariah, ke datai ari raban bansa Judah.
7 Tuai pemesai nya meri sida nama baru: Daniel dikumbai iya Beltesasar; Hananiah dikumbai iya Sadrak; Misael dikumbai iya Mesak; lalu Asariah dikumbai iya Abednego.
8 Daniel mutuska runding enggai ngamahka diri makai pemakai raja, tauka ngirup wain ti diirup raja, lalu iya minta Aspenas ngemendarka iya ngereja nya.
9 Lalu Allah Taala ngasuh Aspenas kasihka Daniel.
10 Tang ku Aspenas bejaku enggau Daniel, “Aku takutka raja; laban raja udah ngeletak utai ti patut diempa enggau diirup kita. Enti iya meda kita kurus agi ari orang bujang ke seumur enggau kita, iya tentu deka munuh aku.”
11 Udah nya Daniel lalu bejaku enggau orang jaga ti udah diasuh Aspenas ngemataka sida:
12 “Awakka nuan nguji kami dalam kandang sepuluh hari. Beri kami sayur enggau ai irup aja.
13 Udah nya nuan tau mandingka kami enggau orang bujang ke makai pemakai raja, lalu ngaga pemutus nuan beduduk ba utai ti dipeda nuan.”
14 Orang jaga nya besetuju nejuka sida Daniel ngujika diri dalam kandang sepuluh hari.
15 Lebuh timpuh nyau chukup, sida berupai manah agi gaya, sereta gemu agi ari semua orang bujang ke makai pemakai raja.
16 Nya alai, orang jaga nya ngambi pemakai raja ari sida, lalu meri sida sayur.
17 Allah Taala meri sida penemu macha enggau nulis, sereta meri sida penemu-dalam. Nambahka nya, Iya meri Daniel pengelandik nerangka reti genera enggau mimpi.
18 Ba ujung timpuh ti udah diletak raja, Aspenas mai semua orang bujang nya ngagai Nebukadnesar.
19 Raja berandau enggau semua sida, lalu iya puas agi ati enggau Daniel, Hananiah, Misael, enggau Asariah ari sida ti bukai. Nya alai sida empat lalu diletak nyadi raban orang ke bekereja di istana raja.
20 Dalam semua pekara pasal penemu-dalam enggau pasal meretika utai ti ditanyaka raja ngagai sida, raja nemu sida sepuluh kali pandai agi ari semua orang ke tau keramat, tauka orang ke nyadi lemambang ke di menua ti dipegai iya.
21 Daniel mengkang bekereja di istana raja nyentuk ngagai maya Raja Sairus.
 
Bagi 2
Mimpi Nebukadnesar
1 Kedua taun Nebukadnesar udah nyadi raja, iya bisi mimpi. Mimpi nya balat amat ngasuh ati iya irau, datai ke nyau enda ulih tinduk.
2 Nya alai iya mesanka bala nembiak iya ke nemu betilitka nasit, orang ke tau keramat, sida dukun enggau sida manang, minta sida nerangka reti mimpi nya ngagai iya. Sida datai lalu bediri di mua raja.
3 Raja lalu bejaku enggau sida, “Ati aku balat irauka mimpi aku. Aku keran deka nemu reti mimpi nya.”
4 Ku sida nyaut raja ngena jaku orang Aram,“Awakka Tuan Raja idup belama iya! Padahka mimpi nuan ngagai kami, nya baru kami nemu nerangka reti mimpi nya ngagai nuan.”
5 Ku raja nyaut sida, “Aku udah mutuska runding deka ngasuh kita madahka mimpi nya ngagai aku. Udah nya baru kita nerangka reti mimpi nya ngagai aku. Enti kita enda ulih, aku deka ngasuh orang nyarikka tubuh kita, lalu rumah kita digaga nyadi tembawai.
6 Tang enti kita ulih madahka mimpi enggau reti mimpi nya ngagai aku, aku deka ngupah kita ngena pemeri enggau basa ti besai. Nya alai, padahka mimpi nya, enggau reti iya ngagai aku.”
7 Sida lalu nyaut raja nya baru, “Enti Tuan Raja deka madahka ngagai kami mimpi nya, nya baru kami nerangka reti iya.”
8 Lebuh raja ninga nya, iya lalu bejaku enggau nyawa ti inggar, “Betul sangka aku! Kita tu semina masau jam ngapa, laban kita nemu aku endang udah mutuska penemu
9 deka ngukum semua kita enti kita enda madahka mimpi nya ngagai aku. Kita udah besetuju enggau pangan diri deka ngemulaka aku, laban kita ngarapka aku deka ngubah runding diri. Padahka mimpi nya ngagai aku. Nya baru aku deka nemu kita amat nemu nerangka reti mimpi nya ngagai aku.”
10 Bala penyanding penemu raja lalu nyaut, “Nadai orang di dunya tu ulih madahka utai ti keran deka ditemu Tuan Raja. Nadai raja, nyengkaum raja ti pemadu besai sereta pemadu bekuasa, udah bisi kala minta utai ti munyi tu ari bala nembiak iya ti tau tilit, ti tau keramat, enggau ari bala manang.
11 Utai ti dipinta Tuan Raja nya kelalu mar dikereja. Semina petara aja ulih ngereja utai nya ke nuan, tang petara nadai diau begulai enggau mensia.”
12 Lebuh raja ninga jaku nya, iya ringat. Iya lalu ngasuh semua penyanding penemu raja di menua Babilon, dibunuh magang.
13 Nya alai atur lalu dipejalaika, ngasuh semua sida dibunuh magang, nyengkaum Daniel enggau bala pangan iya.
 
Allah Taala Nerangka Reti Mimpi Nya Ngagai Daniel
14 Udah nya Daniel lalu mansang ngagai Ariok, ti nyadi tuai ke bala jejaga raja, ti udah diberi atur bejalaika ukum nya. Daniel bejaku enggau bejimat,
15 lebuh iya nanya ngagai Ariok pasal kebuah raja ti udah meri atur ti kasar baka nya. Ariok lalu nusui ngagai Daniel pasal utai ti udah nyadi.
16 Daniel lalu tekala nya betemu enggau raja lalu minta raja nginsur timpuh nya panjai agi, ngambika iya ulih madahka reti mimpi nya ngagai raja.
17 Udah nya Daniel pulai, lalu nusui pasal utai ti udah nyadi ngagai pangan iya Hananiah, Misael, enggau Asariah.
18 Iya ngasuh sida besampi ngagai Allah Taala ti di serega minta pengasih ari Iya, lalu minta Iya nerangka misteri nya ngagai sida, ngambika sida enda kena bunuh sama enggau bala penyanding penemu ti bukai di menua Babilon.
19 Malam nya misteri nya lalu dipandangka ngagai Daniel ngena siti genera. Daniel lalu muji Allah Taala ti di serega:
20 “Allah Taala endang pintar sereta bekuasa! Pujika Iya belama lama iya.
21 Iya ngatur jam enggau musin. Iya ngeletak orang nyadi raja, lalu Iya mega muai raja. Iya meri penemu-dalam lalu ngasuh orang mereti.
22 Iya mandangka utai ti dalam sereta resia. Iya nemu utai ti dilalaika dalam pemetang, lalu Iya Empu diau dalam penampak.
23 Aku muji sereta ngemesaika Nuan, O Allah Taala aki ini aku. Nuan udah meri aku penemu-dalam enggau pengering. Nuan udah nyaut sampi aku lalu nunjukka ngagai kami utai ti patut dipadahka kami ngagai raja.”
 
Daniel Madah Sereta Nerangka Reti Mimpi Ngagai Raja
24 Daniel lalu mansang ngagai Ariok, ti udah diasuh raja munuh bala penyanding penemu raja. Ku Daniel bejaku enggau Ariok, “Anang munuh sida. Bai aku
ngagai raja ngambika aku madahka reti mimpi nya ngagai iya.”
25 Ariok lalu tekala nya mai Daniel betemu enggau Raja Nebukadnesar, lalu madahka ngagai raja, “Aku bisi udah tetemuka siku orang Judah ti udah dibuai ari menua sida, ke ulih madahka reti mimpi Tuan Raja.”
26 Ku raja bejaku enggau Daniel (ke dikumbai Beltesasar), “Kati nuan ulih madahka mimpi aku, enggau reti iya?”
27 Ku Daniel nyaut, “Tuan Raja, nadai siku manang tauka orang ke tau keramat, tauka orang ke tau tilit, tauka landik pasal bintang, ulih madahka misteri nya ngagai nuan.
28 Tang di serega bisi Allah Taala ti mandangka utai ti resia. Iya udah madahka ngagai Tuan Raja utai ti deka nyadi jemah ila. Diatu aku deka madahka mimpi nya ngagai nuan, genera ti dipeda nuan lebuh nuan tinduk.
29 “Lebuh Tuan Raja benung tinduk, nuan bemimpika utai ti deka nyadi jemah ila, lalu Allah Taala, ke mandangka utai ti resia, nunjuk ke nuan utai ti deka nyadi.
30 Nyadi misteri tu udah dipandangka ngagai aku, ukai laban aku lebih agi bepenemu-dalam ari orang bukai, tang ngambika Tuan Raja nemu reti mimpi nya, lalu meretika runding ti udah datai ba ati nuan.
31 “Tuan Raja, dalam genera nuan nya, nuan meda, bediri di mua nuan, siku engkeramba ti besai, ti terang sereta beperenching, lalu balat ngenakutka.
32 Pala iya digaga ari emas ti pemadu tulin. Dada enggau lengan iya digaga ari pirak. Punggung enggau pun pah iya digaga ari temaga.
33 Betis iya digaga ari besi, lalu kaki iya digaga ari besi bechampur enggau tanah liat.
34 Lebuh nuan benung merening ngagai utai nya, sigi batu ti besai tingkil ari tingkah, lalu mangka ngagai kaki besi enggau tanah liat engkeramba nya, lalu ngeredakka kaki nya.
35 Tekala nya besi, tanah liat, temaga, pirak enggau emas nya lalu besepur baka amau ba endur alai nungku. Ribut lalu ngebuka semua amau nya. Tang batu nya mansang besai-sebesai lalu nyadi sigi bukit ti ngelamun semua dunya.
36 “Nya meh mimpi nuan. Diatu aku deka madahka reti mimpi nya ngagai nuan.
37 Tuan Raja, nuan tu raja ti besai agi ari semua raja. Allah Taala ti di serega udah ngasuh nuan nyadi raja, lalu udah meri ngagai nuan kuasa, pengering enggau basa.
38 Iya udah ngasuh nuan merintah semua dunya, sereta merintah semua jelu enggau burung. Pala emas nya ngambarka nuan empu.
39 Udah bekau nuan, siti agi perintah deka pegari, tang iya enda ngemesai perintah nuan, lalu udah bekau nya, perintah ti ketiga, iya nya perintah temaga, ti deka merintah semua dunya.
40 Udah nya bisi perintah ti keempat, ti kering baka besi, ti mechah lalu ngeredakka semua utai. Lalu baka besi ti mechahka semua utai, iya deka mechah lalu ngeredakka semua perintah ti dulu ari nya.
41 Nuan mega bisi meda kaki enggau tunjuk kaki nya digaga ari tanah liat enggau ari besi. Reti nya, perintah nya deka bebagi. Iya deka ngembuan pengering besi, laban besi bisi bechampur enggau tanah liat.
42 Tunjuk kaki - ti digaga ari besi enggau tanah liat - nunjukka perintah nya kering, tang bisi mega pengelemi.
43 Nuan mega meda besi nya udah dichampur enggau tanah liat. Reti nya, orang ke megai perintah di menua nya deka nguji berakupka ruang bilik sida ngena chara belaki bini bepasuk bansa, tang sida enda ulih, baka besi ti enda ulih bechampur enggau tanah liat.
44 Lebuh bala raja nya megai perintah, Allah Taala ti di serega deka numbuhka siti perintah ti enda nemu abis. Perintah nya ila enda ulih dialahka, tang iya deka ngerusak semua perintah bukai, lalu udah nya iya deka meruan belama iya.
45 Nuan bisi meda chara batu nya tingkil ari tingkah, nadai ditegu mensia, enggau chara batu nya mangka ngagai engkeramba ti digaga ari besi, temaga, tanah liat, pirak enggau emas. Utai nya kena Allah Taala ti besai madahka ngagai Tuan Raja utai ti deka nyadi jemah ila. Aku udah madahka mimpi nuan, lalu udah madahka reti mimpi nya ti bendar ngagai nuan.”
 
Raja Ngupah Daniel
46 Udah nya Raja Nebukadnesar nyungkurka diri ke tanah, lalu meri atur ngasuh piring enggau pemeri diberi ngagai Daniel.
47 Ku raja nya bejaku, “Allah Taala nuan besai agi ari semua petara. Iya TUHAN ke semua raja. Iya mandangka semua misteri. Aku nemu nya laban nuan udah ulih nerangka misteri tu.”
48 Raja nya lalu meri Daniel pangkat ti tinggi. Iya meri pemeri ti manah ngagai Daniel. Iya ngasuh Daniel nyadi tuai sitak menua Babilon, sereta ngasuh iya nyadi tuai semua penyanding penemu raja.
49 Nitihka pinta Daniel, raja lalu ngasuh Sadrak, Mesak, enggau Abednego nyadi tuai ngemataka pengawa perintah dalam sitak menua Babilon. Tang Daniel mengkang bekereja di istana raja.
 
 
Bagi 3
Nebukadnesar Ngasuh Semua Orang Nyembah Engkeramba Emas
1 Raja Nebukadnesar ngasuh orang ngaga engkeramba emas. Peninggi engkeramba nya dua puluh tujuh meter, lalu buka iya tiga meter. Raja nya ngasuh orang nirika engkeramba nya ba emperan Dura, dalam sitak menua Babilon.
2 Udah nya raja meri atur ngasuh semua bala pemesai iya begempuru - bala anak raja, bala tuan gabenor, sapit gabenor, orang ke ngemataka wang, bala hakim, majistret, enggau semua bala pemesai ari semua sitak menua. Sida diperintah datai ngagai pengerami nyerahka engkeramba ti udah didirika Raja Nebukadnesar.
3 Lebuh semua bala pemesai begempuru ba pengawa nyerahka engkeramba nya, sida bediri di mua engkeramba nya.
4 Siku orang lalu bejaku enggau nyawa ti inggar, “Kita ke datai ari semua menua, bansa enggau jaku!
5 Kita deka ninga munyi terumpit ditangkanka enggau munyi kesuling, engkeratung, sape enggau belikan, enggau munyi kereban musik ti bukai. Lebuh musik nya berengkah ditebah, kita enda tau enda meremi lalu nyembah engkeramba emas ti didirika Raja Nebukadnesar.
6 Barang sapa enda meremi lalu nyembah engkeramba nya deka tekala nya ditikauka ngagai serumbung api.”
7 Nya alai, lebuh orang ari semua menua, bansa enggau jaku ninga musik nya, sida meremi lalu nyembah engkeramba emas ti didirika Raja Nebukadnesar.
 
Tiga Iku Pangan Daniel Ngelanggar Atur
8 Nya meh maya sekeda orang Babilon ngambi peluang besalah orang Judah.
9 Ku sida bejaku enggau Raja Nebukadnesar, “Awakka Tuan Raja idup belama iya!
10 Tuan Raja udah meri atur: lebuh musik berengkah ditebah, semua orang enda tau enda meremi lalu nyembah engkeramba emas nya,
11 lalu barang sapa enda meremi lalu nyembah engkeramba nya deka dibuai ngagai serumbung api.
12 Sekeda orang Judah ti udah diasuh nuan megai sitak menua Babilon - Sadrak, Mesak, enggau Abednego - udah enda ngasika atur Tuan Raja. Sida enda nyembah petara nuan tauka meremi ngagai engkeramba ti didirika nuan.”
13 Lebuh raja ninga nya, iya balat amat ringat, lalu ngasuh orang mai sida tiga nya ngagai iya.
14 Ku iya bejaku enggau sida, “Sadrak, Mesak, enggau Abednego, kati kita amat enggai nyembah petara aku, lalu enggai meremi ngagai engkeramba emas ti didirika aku?
15 Diatu, lebuh kita ninga munyi terumpit, kesuling, engkeratung, sape enggau belikan, enggau munyi semua kereban musik ti bukai, kita enda tau enda meremi lalu nyembah engkeramba nya. Enti kita enda, kita deka tekala nya ditikauka ngagai serumbung api. Kati kita bisi petara ti ulih ngelepaska kita ari jari aku?”
16 Sadrak, Mesak, enggau Abednego lalu nyaut, “O Tuan Raja, kami enda ibuh bejaku ngarika diri empu.
17 Enti Allah Taala ti dipetuaika kami ulih ngelepaska kami ari api ti mau nya, enggau ari kuasa nuan, awakka Iya meh ngelepaska kami, Tuan Raja.
18 Tang enti Iya enda ngelepaska kami, kami madahka ngagai nuan Tuan Raja, enggai meh kami nyembah petara nuan, lalu meremi ngagai engkeramba emas ti didirika nuan.”
 
Pangan Daniel Ti Tiga Iku Diukum Bunuh
19 Nebukadnesar lalu balat amat ringat. Mua iya mirah, ringat ngagai Sadrak, Mesak enggau Abednego. Iya lalu ngasuh orang masang api dalam serumbung nya tujuh kali angat agi ari selama.
20 Iya lalu ngasuh orang ke pemadu kering ari bala soldadu iya nanchang sida tiga, lalu nikauka sida ngagai serumbung api nya.
21 Sida tiga lalu ditanchang mengkang ngena pekayan sida, iya nya baju, baju panjai, selapuk, enggau semua pekayan bukai. Sida tiga lalu ditikauka ngagai serumbung api nya.
22 Laban raja udah meri atur ngasuh orang masang api nya enggau naka pengangat, bala orang ke mai sida tiga ngagai serumbung api nya, lalu mati angus kena diang api nya.
23 Sadrak, Mesak, enggau Abednego, ti agi mengkang ditanchang, labuh ngagai tengah-tengah serumbung api ti mau nya.
24 Tekala nya Raja Nebukadnesar lalu bediri, laban iya alit ati. Ku iya nanya ngagai bala pemesai iya, “Ukai enda tiga iku orang ditanchang kita, lalu ditikauka kita ngagai serumbung api nya tadi?” Disaut sida, “Sigi amat, Tuan Raja.”
25 “Enti pia, nama kebuah aku meda empat iku orang bejalai ba tengah-tengah api nya?” ku iya nanya. “Sida nya enda ditanchang, lalu sida enda bebadi, lalu iya ti keempat nya baka gamal melikat.”
 
Lelaki Tiga Iku Nya Dilepaska Lalu Ditikika Pangkat
26 Nebukadnesar lalu mansang semak ngagai mua pintu serumbung api nya, lalu ngangau, “Sadrak! Mesak! Abednego! Nembiak Allah Taala ti Pemadu Tinggi! Pansut kita!” Sida tiga lalu pansut ari api nya.
27 Semua anak raja, tuan gabenor, sapit gabenor, enggau pemesai raja ti bukai lalu begelumu meda orang tiga iku nya, ti enda bebadi laban api nya. Buk sida enda angus, gari sida enda diempa api, lalu sida nadai bebau asap.
28 Ku Nebukadnesar bejaku, “Pujika Allah Taala ti disembah Sadrak, Mesak enggau Abednego! Iya udah ngirumka melikat Iya, lalu ngelepaska sida tu ke betuai sereta arapka Iya. Sida udah ngelanggar atur aku, lalu berambunka nyawa enggai meremi sereta nyembah petara bukai tang semina Allah Taala sida empu.
29 “Diatu aku meri atur: enti orang ari sebarang menua, bansa enggau jaku, ngeleseka Allah Taala sida Sadrak, Mesak, enggau Abednego, tubuh orang nya deka dicharikka, lalu rumah iya deka digaga nyadi tembawai, laban nadai petara bukai ulih ngelepaska orang baka nya.”
30 Raja nya lalu nikika pangkat Sadrak, Mesak, enggau Abednego ngagai pangkat ti tinggi agi dalam sitak menua Babilon.
 
Bagi 4
 Nebukadnesar Bemimpi Kedua Kali
1 Raja Nebukadnesar ngirumka pesan tu ngagai orang di semua menua, bansa enggau jaku di dunya tu: “Tabi!
2 Pendingka cherita aku pasal utai ti nyelai enggau kereja ajih ti udah diayanka Allah Taala ti Pemadu Tinggi ngagai aku.
3 “Naka meh pemesai kereja ti nyelai ti dipandangka Allah Taala ngagai kitai! Naka meh pemesai kereja ajih ti dikereja Iya! Allah Taala endang Raja belama iya. Iya deka merintah belama lama iya.
4 “Aku udah diau lantang senang dalam istana aku, sereta kaya-raja.
5 Tang aku bisi mimpi ti ngasuh ati aku rawan, enggau genera ti balat ngenakutka ati aku lebuh aku tinduk.
6 Aku lalu mesanka semua penyanding penemu di menua Babilon betemu enggau aku, lalu madahka reti mimpi nya ngagai aku.
7 Udah nya semua orang ke tau tilit, orang ke tau keramat, bala manang, enggau orang ke landik pasal bintang, dibai tama, lalu aku madahka mimpi aku ngagai sida. Tang sida enda ulih nerangka reti mimpi nya ngagai aku.
8 Udah nya Daniel datai. (Iya mega dikumbai Beltesasar, ngangkatka nama petara aku.) Roh bala petara ti kudus bisi dalam iya. Nya alai aku lalu madahka mimpi aku ngagai iya. Ku aku bejaku enggau iya:
9 Beltesasar, nuan tu tuai orang ke tau nilit nasit. Aku nemu roh bala petara  ti kudus bisi dalam nuan, lalu nuan meretika semua misteri. Baka tu ku mimpi aku. Padahka reti mimpi nya ngagai aku.
10 “Lebuh aku tinduk, aku begenera meda sepun kayu ti besai bediri ba tengah-tengah dunya.
11 Kayu nya mansang besai-sebesai datai ke nyau nyentuk ke langit, lalu ulih dipeda semua mensia di dunya tu.
12 Daun iya manah, lalu buah iya lebat - chukup diempa semua mensia di dunya tu. Jelu babas belelak di baruh iya. Burung begagaka tansang ba dan iya, lalu genap macham utai ti idup bela makai buah iya.
13 “Lebuh aku benung berundingka genera nya, aku meda siku melikat nurun ari serega. Melikat nya endang seruran bejaga sereta sedia.
14 Iya bejaku enggau nyawa ti inggar, “Tebang kayu nya, lalu tetak dan iya. Gugurka daun iya, lalu taburka buah iya. Buru jelu ari baruh iya, enggau burung ari dan iya.
15 Tang awakka tuga iya tinggal ba tanah, dibelit ngena belulang besi enggau temaga. Awakka tuga nya mengkang ba padang nya dibalut rumput. “ ‘Awakka ambun labuh ninggang orang tu, lalu awakka iya diau di babas begulai enggau jelu.
16 Dalam kandang tujuh taun iya nadai agi ngembuan runding mensia, tang runding jelu.
17 Tu meh pemutus penemu bala melikat ke sedia sereta bejaga nya. Nya alai, awakka semua orang di semua endur nemu Allah Taala ti Pemadu Tinggi bisi kuasa atas perintah mensia, lalu Iya ulih meri perintah nya ngagai sebarang orang ke dipilih Iya - nyengkaum ngagai orang ke pemadu nadai guna.’
18 “Tu meh mimpi aku,” ku Raja Nebukadnesar bejaku. “Nya alai, Beltesasar, padahka reti mimpi nya ngagai aku. Nadai orang ari bala penyanding penemu aku ulih madahka reti mimpi nya ngagai aku, tang nuan ulih, laban roh bala petara ti kudus bisi dalam nuan.”
 
Daniel Nerangka Reti Mimpi
19 Lebuh iya ninga nya, Daniel, ke dikumbai Beltesasar, berasai balat amat irau ati, datai ke nyau enda ulih bejaku. Ku raja nya bejaku enggau iya, “Beltesasar, anang nejuka mimpi enggau pesan mimpi nya ngasuh ati nuan irau.” Ku Beltesasar nyaut, “Tuan Raja, naka meh pemanah enti sema mimpi enggau reti iya ditujuka ngagai bala munsuh nuan, lalu ukai ngagai nuan empu.
20 Kayu ti tinggi, datai ke nyau nyentuk ke langit, ulih dipeda semua mensia di dunya tu.
21 Daun iya manah, lalu buah iya chukup kena nupi semua dunya. Jelu babas belelak di baruh iya, lalu burung begagaka tansang ba dan iya.
22 “Tuan Raja, kayu ti tinggi sereta tegap nya ngambarka nuan empu. Nuan udah nyadi besai datai ke nuan nyau nyentuk ke langit, lalu kuasa nuan ngerembai di serata dunya.
23 Lebuh Tuan Raja benung ngemataka utai nya, siku melikat nurun ari serega lalu bejaku, ‘Tebang kayu nya, lalu rusak iya, tang awakka tuga iya mengkang ba tanah. Belit tuga nya ngena belulang besi enggau temaga, lalu tinggalka iya dia ba tanah dibalut rumput. Awakka ambun labuh ninggang orang tu, lalu awakka iya diau dia tujuh taun begulai enggau jelu.’
24 “Nya alai tu reti mimpi nuan, Tuan Raja. Tu utai ti udah dipadahka Allah Taala ti Pemadu Tinggi deka nyadi ba nuan.
25 Nuan deka diburu ari orang mayuh, lalu nuan deka diau begulai enggau jelu babas. Dalam pengelama tujuh taun nuan deka ngulam rumput baka sapi, lalu tinduk ba sebelah padang, ditinggang ambun. Udah nya baru nuan deka ngaku Allah Taala ti Pemadu Tinggi endang bekuasa atas semua perintah mensia, lalu iya ulih meri perintah nya ngagai sebarang orang ke dipilih Iya.
26 Melikat nya ngeletak tuga nya ditinggalka ba tanah. Reti nya, nuan deka nyadi raja baru lebuh nuan ngaku Allah Taala endang merintah semua dunya.
27 Nya alai titihka jaku lalau ti diberi aku, Tuan Raja. Badu agi bedosa. Kereja utai ti ngena, lalu kasihka orang ke seranta. Nya baru nuan deka mengkang kaya-raja.”
28 Semua utai nya lalu nyadi magang ba Raja Nebukadnesar.
29 Dua belas taun udah lepas nya, lebuh iya benung bejalai ba perabung istana iya di Babilon,
30 iya bejaku, “Peda pemanah nengeri Babilon! Aku udah ngaga iya nyadi indu nengeri aku, kena aku ngayanka kuasa, pengering, mulia enggau penampak nama aku ti nyadi raja.”
31 Sebedau leka jaku nya pansut ari nyawa iya, siti nyawa lalu bejaku ari serega, “Raja Nebukadnesar, pendingka jaku aku! Kuasa nuan ti nyadi raja diatu diambi ari nuan.
32 Nuan deka diburu ari orang mayuh, diau begulai enggau jelu babas, lalu makai rumput baka sapi dalam pengelama tujuh taun. Udah nya nuan deka ngaku Allah Taala ti Pemadu Tinggi bisi kuasa atas perintah mensia, lalu Iya ulih meri perintah nya ngagai sebarang orang ke dipilih Iya.”
33 Utai ti disebut nya lalu nyadi tekala nya. Nebukadnesar diburu ari orang mayuh, lalu makai rumput baka sapi. Ambun labuh ninggang tubuh iya, lalu buk iya mansang panjai sepemanjai hari baka bulu menaul, lalu kukut iya panjai baka kukut burung.
 
Nebukadnesar Muji Allah Taala
34 Ku raja nya bejaku, “Lebuh tujuh taun nya nyau udah abis, aku engkadah ke langit, lalu aku badu agi gila. Aku lalu muji Allah Taala ti Pemadu Tinggi, lalu ngemesai sereta ngemuliaka Iya ke idup belama lama iya. “Iya deka merintah belama lama iya, lalu perintah Iya deka meruan belama lama iya.
35 Orang di dunya tu nadai reti ba Iya. Melikat di serega enggau mensia di dunya tu endang diperintah Iya magang. Nadai orang ulih ngelaban peneka Iya tauka nyakal utai ti dikereja Iya.
36 “Lebuh aku nyau udah badu agi gila, basa, pangkat aku ti nyadi raja, enggau mulia perintah aku lalu dipulaika baru ngagai aku. Bala pemesai, enggau bala aku ti tinggi pangkat nyambut penatai aku, lalu kuasa aku ti nyadi raja dipulaika baru ngagai aku, sereta enggau basa ti lebih agi ari ti dulu suba.
37 “Nya alai, diatu aku, Nebukadnesar, muji, ngemesai sereta ngemuliaka Raja Serega. Semua utai ti dikereja Iya endang ngena sereta lurus magang, lalu Iya ulih ngemaruhka sebarang orang ke ngenyumbungka diri.”
 
Bagi 5
Belsasar Nyendiaka Pengerami Makai Besai
1 Nyadi sekali Raja Belsasar ngambi seribu iku orang ke tinggi pangkat ngagai siti pengerami makai besai, lalu sida begulai ngirup wain.
2 Lebuh sida benung ngirup, Belsasar ngasuh orang ngambi changkir enggau mangkuk emas enggau pirak ti udah ditabanka apai iya Nebukadnesar ari Rumah Sembiang di Jerusalem. Kebuah raja nya ngasuh orang ngambi mangkuk enggau changkir nya, ngambika iya, bala pemesai iya, bala bini iya, enggau bala indu simpan iya ulih ngirup ngena utai nya.
3 Changkir enggau mangkuk emas nya lalu tekala nya dibai ke dalam, lalu semua sida bela ngirup wain ngena changkir enggau mangkuk nya
4 lalu muji bala petara ti digaga ari emas, pirak, temaga, besi, kayu enggau batu.
5 Tekala nya siti jari mensia lalu pegari, lalu belabuh nulis ba dinding istana nya, ba endur ti pemadu terang dipanchar lampu. Raja empu meda jari nya nulis.
6 Raja balat amat takut. Mua iya puchat, lalu patung iya nyau getar-getar.
7 Iya manjung ngasuh orang ngangauka bala orang ke tau keramat, bala manang, enggau bala orang ke landik pasal bintang. Lebuh sida tama, raja lalu bejaku enggau sida, “Barang sapa nemu macha tulis tu, lalu madahka reti iya ngagai aku, deka diasuh begari ngena gari ungu raja, betenggakka rantai emas, lalu nyadi orang ke lumur tiga bekuasa dalam menua tu.”
8 Bala penyanding penemu raja lalu mansang ke mua, tang nadai siku sida nemu macha tulis nya, tauka madahka reti iya ngagai raja.
9 Raja Belsasar balat amat irau ati, lalu mua iya balat agi puchat, lalu bala pemesai iya nadai nemu utai ti patut dikereja sida.
10 Lebuh indai raja ninga raja enggau bala pemesai iya inggar, iya lalu tama ngagai balai endur makai besai nya. Ku iya, “Awakka Tuan Raja idup belama iya! Anang takut, lalu anang ngasuh mua nuan puchat baka nya.
11 Di menua ti diperintah nuan tu bisi siku lelaki ke ngembuan Roh Allah Taala dalam iya. Lebuh apai nuan nyadi raja, lelaki tu udah ngayanka diri nemu berunding, bisi penemu, enggau penemu-dalam baka bala petara. Lalu Raja Nebukadnesar, iya nya apai nuan udah ngasuh iya nyadi tuai bala orang ke nemu nilit nasit, ti tau keramat, bala manang, enggau orang ke landik pasal bintang.
12 Iya bisi pengelandik ti nyelai, lalu iya bepenemu-dalam, sereta landik nerangka reti mimpi, nerangka entelah, enggau nerangka utai ti resia. Nya alai, pesanka lelaki nya. Nama iya Daniel, tang raja udah ngumbai iya Beltesasar. Awakka Daniel madahka reti semua utai tu ngagai nuan.”
 
Daniel Nerangka Tulis Nya
13 Daniel lalu dibai betemu enggau raja, lalu ku raja bejaku enggau iya, “Kati nuan tu Daniel, orang Judah ti udah dibuai ari menua nuan empu, lalu ditabanka apai aku kitu ari menua Judah?
14 Aku bisi udah ninga berita pasal Roh Allah Taala ti kudus bisi dalam nuan, lalu nuan bisi pengelandik sereta bisi penemu enggau penemu-dalam.
15 Bala penyanding penemu enggau bala orang ke tau keramat udah dibai tama kitu, lalu diasuh macha tulis tu, ngambika sida madahka reti utai nya ngagai
aku, tang sida enda nemu reti utai nya.
16 Nyadi aku udah bisi ninga pasal nuan ke nemu nerangka utai ti resia, lalu nemu nerangka utai ti mar diperatika. Enti nuan nemu macha tulis tu, lalu madahka reti utai nya ngagai aku, nuan deka dirasukka enggau gari ungu ti diraja, betenggakka rantai emas kena nandaka nuan dibasa orang, lalu nyadi orang ke lumur tiga bekuasa di menua tu.”
17 Ku Daniel nyaut, “Simpan nuan empu meh pemeri nuan nya, tauka beri ngagai orang bukai. Aku deka macha ke Tuan Raja utai ti udah ditulis nya, lalu madahka reti iya ngagai nuan.
18 “Allah Taala ti Pemadu Tinggi udah ngasuh apai nuan Nebukadnesar nyadi raja ti besai, lalu udah meri ngagai iya mulia enggau kuasa.
19 Iya udah besai amat kuasa datai ke orang ari semua menua, bansa, enggau jaku nyau getar-getar takutka iya. Enti iya deka munuh orang, iya munuh. Enti iya deka nejuka orang nya idup, iya nejuka orang nya idup. Iya mechat tauka ngemesaika orang nitihka peneka ati iya empu.
20 Tang laban iya sumbung, kieh ati sereta jai enggau orang, iya udah dibuai ari kerusi diraja iya, lalu nadai dibasa orang agi.
21 Iya udah diburu ari orang mayuh, lalu iya berunding baka jelu. Iya diau begulai enggau keledai kampung, ngulam rumput baka sapi, lalu tinduk ba sebelah padang, lalu iya nadai utai kena ngelindung diri ari ambun. Ke pengujung iya, iya ngaku Allah Taala ti Pemadu Tinggi endang bekuasa atas semua perintah mensia, lalu ulih meri perintah nya ngagai sebarang orang ke dipilih Iya.
22 “Tang nuan ke anak iya, enda ngemaruhka diri, taja pen nuan nemu semua utai tu.
23 Nuan ngereja utai ti ngelaban TUHAN ti di serega, lalu nuan udah mai ngagai endur tu changkir enggau mangkuk ti udah ditabanka ari Rumah Sembiang. Nuan enggau bala pemesai nuan, bala bini nuan, enggau bala indu simpan nuan bela ngirup wain ngena changkir enggau mangkuk nya, lalu muji bala petara ti digaga ari emas, pirak, temaga, besi, kayu enggau batu, petara ti enda ulih meda, enda ulih ninga, enda nemu utai. Tang nuan enda ngemesaika Allah Taala ti ngeletak nuan idup tauka mati, ke ngatur semua utai ti dikereja nuan.
24 Nya kebuah Allah Taala udah ngasuh jari nya nulis leka jaku tu.
25 “Tu utai ti udah ditulis: ‘Diitung, diitung, ditimbang, dibagi.’
26 Lalu tu reti utai ti ditulis nya:  diitung:, Allah Taala udah ngitung penyampau hari perintah nuan, lalu udah ngabiska iya.
27  Ditimbang: Nuan udah ditimbang ngena dachin, lalu ditemu kelalu lempung.
28  Dibagi: Menua nuan deka dibagi, lalu diberi ngagai orang Media enggau orang Persia.”
29 Belsasar lalu ngasuh bala ulun iya ngerasukka gari diraja ti bechura ungu ba Daniel, lalu ngerasukka tenggak emas ba rekung iya kena nandaka iya dibasa. Lalu iya ngasuh Daniel nyadi orang ke lumur tiga bekuasa di menua nya.
30 Malam nya Raja Belsasar menua Babilon dibunuh.
31 Lalu Darius orang Media, ke umur 62 taun lebuh maya nya, ngerampas kuasa lalu nyadi raja menua nya.
 
Bagi 6
Daniel Dalam Lubang Singa
1 Darius lalu mutuska runding deka ngeletak seratus dua puluh iku orang nyadi tuan gabenor di menua ti diperintah iya.
2 Nambahka nya, iya milih Daniel enggau dua iku orang bukai ngemataka bala tuan gabenor, enggau ngintu semua reta tengkira raja.
3 Enda lama udah bekau nya, Daniel ngayanka diri landik agi gawa ari orang dua iku ti bukai nya, enggau ari bala tuan gabenor. Laban Daniel berupai landik agi, raja lalu berunding deka ngasuh iya merintah semua menua nya.
4 Udah nya orang dua iku nya, sereta enggau bala gabenor nya nguji ngiga penyalah Daniel lebuh iya bejalaika pengawa perintah di menua nya. Tang sida nadai nemu penyalah iya, laban Daniel endang orang ke tau dikarapka, lalu enda ngereja utai ti salah tauka enda lurus.
5 Ku sida bejaku enggau pangan diri, “Kitai enda ulih ngiga utai kena besalahka Daniel, kelimpah ari utai ti besangkut-paut enggau agama iya empu”
6 Nya alai sida betemu enggau raja, lalu bejaku, “Raja Darius, awakka Tuan Raja idup belama iya!
7 Semua kami ke bejalaika pengawa perintah di menua tu - bala orang ke ngemataka pengawa gabenor, sida gabenor empu, sapit gabenor, enggau bala pemesai ti bukai - udah besetuju minta nuan, Tuan Raja, meri siti atur nagang semua orang minta utai ari sebarang petara, tauka ari mensia, dalam kandang tiga puluh hari, tang semina minta utai ari Tuan Raja aja. Atur tu deka dipejalaika enggau terit, lalu barang sapa ngelanggar atur tu deka dibuai ngagai lubang singa.
8 Nya alai, awakka Tuan Raja meri atur nya ngagai orang Media enggau orang Persia, lalu nyain atur nya, ngambika atur nya enda tau diubah.”
9 Raja Darius lalu nyain atur nya.
10 Lebuh Daniel nemu atur nya udah disain, iya lalu pulai ke rumah. Nyadi ba siti bilik ti di sadau rumah iya, mayuh jenila ti nunga ngagai Jerusalem. Endang baka selama, dalam bilik nya iya besugang ba mua jenila, lalu besampi ngagai Allah Taala tiga kali sehari.
11 Lebuh bala orang ke ngelaban Daniel meda iya besampi ngagai Allah Taala,
12 semua sida lalu mansang ngagai raja, deka bedawaka Daniel. Ku sida, “Tuan Raja, nuan udah nyain atur ngeletak barang sapa minta utai ari sebarang petara tauka mensia, tang semina ari Tuan Raja empu aja dalam kandang tiga puluh hari, deka dibuai ngagai lubang singa.” Ku raja nyaut, “Sigi amat! Nitihka adat orang Media enggau orang Persia, atur nya enda tau diubah.”
13 Udah nya sida lalu nyaut raja, “Siku ari orang ke udah dibuai ari menua Judah, ke benama Daniel, enda bebasaka Tuan Raja lalu enda ngasika atur ti diberi nuan. Iya besampi tiap hari, tiga kali sehari.”
14 Lebuh raja ninga nya, ati iya balat tusah, lalu iya enggau naka ulih ngiga jalai nyelamatka Daniel. Iya majak begigaka jalai nya nyentuk ngagai padam mata panas.
15 Udah nya bala orang ke bepekat ngelaban Daniel lalu datai baru ngagai raja, lalu bejaku enggau iya, “Tuan Raja nemu, nitihka adat orang Media enggau orang Persia, nadai atur ti diberi raja, tau diubah.”
16 Nya alai raja lalu meri atur ngasuh Daniel dibai lalu ditikauka ngagai lubang singa. Ku iya bejaku enggau Daniel, “Awakka Allah Taala nuan, ke dipetuaika nuan enggau ati ti taluk, ngidupka nuan.”
17 Sigi batu lalu diengkahka ba mua lubang nya, lalu raja ngelekatka chop tambit iya empu, enggau chop bala pemesai iya, ba batu nya, ngambika orang enda ulih ngelepaska Daniel.
18 Udah nya raja lalu pulai ngagai istana iya. Semalam-malam nya iya enda tinduk, enda makai, enda ngelantangka diri.
19 Ba urung rerak tawas, raja angkat lalu beguai-guai mansang ngagai lubang singa.
20 Lebuh iya datai dia, iya ngangau enggau ati ti irau, “Daniel, nembiak Allah Taala ti idup! Kati Allah Taala ti seruran dipetuaika nuan, ulih nyelamatka nuan ari bala singa?”
21 Daniel lalu nyaut, “Awakka Tuan Raja idup belama iya!
22 Allah Taala udah ngasuh melikat Iya nutup mulut singa, ngambika sida enda ngemediska aku. Iya ngereja nya laban Iya nemu aku endang nadai penyalah, enggau laban aku nadai udah ngereja utai ti salah ngelaban nuan, O Tuan Raja.”
23 Raja lalu gaga amat ati, lalu meri atur ngasuh orang narit Daniel pansut ari lubang singa. Sida lalu narit iya pansut. Dia sida meda iya nadai nama-nama, laban iya arapka Allah Taala.
24 Udah nya raja lalu meri atur ngasuh orang nangkap semua sida ke udah bedawaka Daniel, lalu ngasuh sida dibuai ngagai lubang singa nya, sama enggau bini anak sida. Sebedau sida terengkah ba buntut lubang nya, bala singa endang udah nyambarka sida, lalu ngeredakka semua tulang sida.
25 Udah nya Raja Darius nulis ngagai orang di semua menua, bansa enggau jaku di dunya tu. “Tabi!
26 Aku meri atur ngagai serata menua ti diperintah aku, ngeletak semua orang enda tau enda nangi sereta bebasaka Allah Taala ti dipetuaika Daniel. “Iya Allah Taala ti idup, lalu Iya deka merintah belama iya. Perintah Iya enda ulih dirusak, lalu kuasa Iya enda nemu abis.
27 Iya ngidup sereta ngelepas. Iya ngereja pengawa ti nyelai, enggau kereja ajih di serega enggau di dunya. Iya udah nyelamatka Daniel ari jelu singa.”
28 Daniel mujur dalam semua utai lebuh maya perintah Darius, enggau lebuh maya perintah Sairus ari Persia.
 
Bagi 7
GENERA DANIEL  (7.1-12.13)
 
Daniel Begenera Meda Empat Iku Jelu
1 Nyadi sekali lebuh malam hari dalam taun ti keterubah Belsasar nyadi raja menua Babilon, aku bemimpi, lalu begenera. Aku lalu nuliska mimpi nya. Tu gaya utai
2 ti dipeda aku malam nya. Ribut muput ari semua endur lalu mangka ba tasik.
3 Empat iku jelu ti besai, ti enda sebaka gamal, lalu pansut ari tasik.
4  Jelu ti terubah nya baka gamal singa, tang bisi sayap baka menaul. Lebuh aku benung nengkilaka iya, sayap iya ditingkilka. Jelu nya lalu diangkatka, lalu diasuh bediri tegir-tegir baka mensia. Udah nya runding mensia lalu diberi ngagai iya.
5 Jelu ti kedua nya baka beruang ti bediri ngena kaki belakang iya. Iya manggum tiga iti tulang kerigai. Siti nyawa lalu bejaku ngagai beruang nya, “Alai nuan makai dagin nya enggau naka ulih nuan!”
6 Lebuh aku benung nengkila, siku agi jelu pegari. Gamal iya baka gamal engkuli, tang ba belakang iya bisi empat iti sayap, ti baka sayap burung, lalu iya bisi empat igi pala. Iya diberi kuasa merintah.
7 Lebuh aku benung nengkila, jelu ti keempat pegari. Iya kering, jai sereta balat ngenakutka. Iya ngeredakka utai ti digigit iya ngena ngeli besi ti besai, lalu udah nya iya ngelunjak sida. Iya enda baka tiga iku jelu ti bukai, laban iya bisi sepuluh iti tanduk.
8 Lebuh aku benung genung-genung merening ngagai tanduk nya, aku lalu tepedaka siti tanduk ti mit pansut ngimbai tanduk ti bukai. Tanduk ti mit nya lalu nyabut tiga iti tanduk ti bukai. Tanduk ti mit nya bisi mata mensia, enggau mulut ti temegah.
 
Begenera Meda Iya Ke Idup Belama Iya
9  Lebuh aku benung nengkila, mayuh kerusi diraja lalu diengkahka ba endur nya. Iya ke idup belama iya duduk ba siti ari kerusi diraja nya. Gari Iya burak baka seleju, lalu buk Iya baka bulu bedus ti tulin. Kerusi diraja Iya baka kerita ti beapi-api, lalu kaki kerita nya mau laban api.
10 Api lalu pansut ari kerusi diraja nya. Beribu-ribu iku orang bekereja ke Iya, lalu bejuta-juta iku orang bediri di mua Iya. Pengawa bechara lalu belabuh, lalu mayuh bengkah bup dibuka.
11 Lebuh aku benung nengkila, aku agi ulih ninga tanduk ti mit nya temegah mansutka penyumbung diri. Lebuh aku agi benung nengkila, jelu ti keempat nya lalu dibunuh, lalu bangkai iya dibuai ngagai api lalu ditunu.
12 Kuasa jelu ti bukai nya lalu dirampas ari sida, tang sida dikemendarka idup enda lama aja.
13 Dalam genera malam nya, aku tepedaka utai ti baka gamal anak mensia, datai dalam mua hari, lalu mansang ngagai Iya ke idup belama iya, lalu diserahka ngagai Iya.
14  Iya diberi kuasa, basa enggau mulia, ngambika orang ari semua menua, bansa, enggau jaku betuaika Iya magang. Kuasa Iya deka meruan belama iya, lalu perintah Iya enda nemu abis.
 
Genera Diterangka
15 Genera ti dipeda aku, balat amat ngasuh ati aku irau, sereta takut.
16 Aku lalu mansang ngagai siku ari orang ke bediri dia, minta iya nerangka reti semua utai nya. Nya alai iya madahka reti utai nya ngagai aku.
17 Ku iya, “Jelu ti empat iku nya empat iku raja ti deka pegari di dunya.
18 Lalu bala nembiak Allah Taala ti Pemadu Tinggi deka nerima kuasa diraja, lalu kuasa nya deka diempu sida belama lama iya.”
19 Udah nya aku keran deka nemu pasal jelu ti keempat, ti enda sebaka enggau jelu ti bukai, jelu ti balat ngenakutka, ti ngeredakka utai ti diempa iya ngena kukut temaga, enggau ngena ngeli besi, lalu udah nya ngelunjak sida.
20 Lalu aku mega keran deka nemu pasal sepuluh iti tanduk ti ba pala iya, enggau pasal tanduk siti ti pansut udah bekau nya, ti nyabut tiga iti tanduk ti bukai. Iya bisi mata enggau nyawa, lalu iya temegahka diri empu. Tanduk ti mit nya balat agi ngasuh ati takut ari tanduk ti bukai.
21 Lebuh aku benung nengkila, tanduk ti mit nya lalu beperang ngelaban bala nembiak Allah Taala, lalu ngalahka sida.
22  Udah nya, Iya ke idup belama iya datai, ngakim sereta ngarika  bala nembiak Allah Taala ti Pemadu Tinggi. Maya udah datai alai bala nembiak Allah Taala deka nerima kuasa diraja.
23 Tu penerang ti diberi ngagai aku: “Jelu ti keempat nya perintah ti keempat ti deka pegari di dunya, lalu iya lain agi ari semua perintah bukai. Iya deka ngeredakka, lalu ngelunjak semua dunya.
24 Tanduk ti sepuluh iti nya sepuluh iku raja, ti deka merintah di menua nya. Udah nya siku agi raja deka pegari. Iya lain agi ari sida raja ke dulu agi ari nya, lalu iya deka muai raja ke tiga iku nya.
25  Iya deka bejaku ngelaban Allah Taala ti Pemadu Tinggi, lalu nekanka pengidup bala nembiak Allah Taala. Iya deka nguji ngubah adat pengarap enggau gawai sida, lalu iya deka merintah bala nembiak Allah Taala tiga taun setengah.
26 Udah nya kot deka belabuh ngatur pechara; kuasa iya dirampas ari iya, lalu iya dirusak abis lengis.
27  Semua kuasa diraja enggau pengering semua perintah di dunya tu deka diserahka magang ngagai bala nembiak Allah Taala ti Pemadu Tinggi. Perintah sida deka meruan belama iya, lalu semua perintah di dunya tu deka betuaika sida lalu ngasika sida.”
28 Nya meh pengujung jerita tu. Aku balat amat takut, datai ke mua aku nyau tepuchat-kelat, lalu aku nadai madahka utai tu ngagai orang.
 
Bagi 8
Begenera Meda Bedus Lelaki Enggau Kambin
1 Ketiga taun Belsasar udah nyadi raja, aku begenera kedua kali.
2 Dalam genera nya aku nemu diri dalam nengeri Susa ti bekuta, dalam sitak menua Elam. Aku bediri ba tebing Sungai Ulai,
3 lalu ba tebing sungai nya aku tepedaka siku bedus ti lelaki ti bisi dua iti tanduk ti panjai. Siti ari tanduk nya panjai agi sereta baru agi ari tanduk ti siti.
4 Aku nengkilaka bedus ti lelaki nya nanduk tunga ke barat, ke utara, enggau tunga ke selatan. Nadai siku jelu ulih nagang iya, tauka ulih ngerarika diri ari kuasa iya. Iya ngereja utai nitihka peneka ati iya empu, lalu iya sumbung.
5 Lebuh aku benung belematika reti utai nya, siku kambin datai belanda laju amat ari barat datai ke kaki iya nyau enda terengkah ba tanah. Iya bisi siti tanduk ti besai ba entara mata iya.
6 Iya mansang ngagai bedus ti lelaki ti dipeda aku bediri ba tebing sungai, lalu belanda nempuh iya enggau pengabis pengering iya.
7 Aku nengkilaka iya nyerang bedus ti lelaki nya. Iya balat amat ringat datai ke nanduk bedus ti lelaki nya enggau naka pemalat, lalu matahka kedua-dua iti tanduk bedus ti lelaki nya. Bedus ti lelaki nya enda ulih ngelaban iya, lalu rebah ke tanah, lalu dilunjak iya, lalu nadai orang ulih ngelepaska bedus ti lelaki nya ari kuasa iya.
8 Kambin nya majak balat agi sumbung, tang lebuh iya nyadi pemadu bekuasa, tanduk iya patah. Tanduk nya lalu diganti empat iti tanduk ti besai. Genap iti tanduk nya nunjuk kebukai magang.
9 Ari siti tanduk nya pansut siti tanduk ti mit, lalu kuasa tanduk ti mit tu ngerembai tunga ke selatan, enggau ke timur, enggau ngagai Menua Ti Udah Disemaya.
10 Tanduk nya nyadi kering datai ke ulih nyerang bala soldadu serega, nyerang bintang, lalu muai sekeda sida ke tanah, lalu ngelunjak sida.
11 Tanduk ti mit nya mega berani nyakap Anak Raja ti nyadi tuai soldadu serega, madamka semua pengawa ti beberika piring tiap hari ngagai Anak Raja nya, lalu ngerusak Rumah Sembiang.
12 Orang ngereja penyalah ba endur nya, ukai ngenjuk piring ti endang patut diberi tiap hari,lalu agama ti bendar dibuai ke tanah. Tanduk nya mujur dalam semua utai ti dikereja iya.
13 Udah nya aku ninga siku melikat betanya ngagai pangan diri, “Ni pengelama utai ti dipeda dalam genera tu agi majak nyadi? Ni pengelama dosa ti jai tu deka majak nganti piring ti diberi tiap hari? Ni pengelama bala soldadu serega enggau Rumah Sembiang tu diindik?”
14 Aku ninga melikat nya nyaut, “Utai tu deka majak nyadi 2,300 lemai enggau 2,300 pagi lebuh piring nya diberi. Udah nya baru Rumah Sembiang nya deka digaga baru.”
 
Melikat Gabriel Nerangka Genera Nya
15 Lebuh aku benung nguji berundingka reti genera nya, siku orang lalu tekala nya bediri di mua aku.
16  Aku lalu ninga siku melikat ngangau ari seberai Sungai Ulai, “Gabriel, terangka ngagai iya reti utai ti udah dipeda iya.”
17 Gabriel datai lalu bediri ngimbai aku. Aku lalu balat amat takut datai ke aku nyau rebah ke tanah.
Ku Gabriel bejaku enggau aku, “Anak mensia, nuan enda tau enda nemu reti genera nya. Genera nya besangkut-paut enggau pengujung dunya.”
18 Lebuh iya benung bejaku, aku rebah ke tanah, luput. Tang iya megai aku, ngangkatka aku lalu nirika aku.
19 Lalu ku iya bejaku, “Aku ngayanka ngagai nuan utai ti deka nyadi ketegal pengeringat Allah Taala. Genera nya madahka pengujung dunya.
20 “Bedus lelaki ti bisi dua iti tanduk ti dipeda nuan, ngambarka perintah menua Media enggau menua Persia.
21 Kambin nya ngambarka perintah menua Gerika, lalu tanduk ti besai ba entara mata iya nya ngambarka raja ti keterubah.
22 Tanduk ti empat iti, ti pansut lebuh tanduk ti keterubah nya patah, ngambarka perintah nya deka dibagi ngagai empat bengkah perintah, ti enda sebaka pengering enggau perintah ti keterubah.
23 “Lebuh perintah empat bengkah nya baru deka abis, lalu nyau jai datai ke sida enda tau enda diukum, siku raja ke kieh sereta jai, deka pegari.
24 Iya deka nyadi kering, tang ukai laban kuasa iya empu. Iya deka balat ngerusak utai, lalu iya deka mujur dalam semua utai ti dikereja iya. Iya deka ngerusak orang ke bekuasa, enggau bala nembiak Allah Taala.
25 Laban iya pintar, iya ulih nipu orang. Iya deka temegahka diri empu, lalu ngerusak mayuh orang enggau ngenyit. Indah Raja ke pemadu besai ari semua raja deh dichakap iya, tang iya deka dirusak, tang ukai ngena kuasa mensia.
26 Genera pasal piring ti diberi lebuh lemai enggau pagi hari, ti udah diterangka ngagai nuan, deka dikamatka. Tang awakka utai nya nyadi resia diatu, laban utai nya deka dikamatka jemah ila.”
27 Aku tusah ati sereta sakit dalam kandang dua tiga hari nya. Udah nya aku angkat, lalu pulai baru ngagai pengawa ti udah diasuh raja kereja aku, tang aku agi mengkang alit ati ke genera nya, lalu enda nemu reti iya.
 
Bagi 9
Daniel Besampi Ke Nembiak Iya
1 Darius anak Serses, orang Media, megai perintah di menua Babilon.
2 Dalam taun ti keterubah iya megai perintah, aku belajarka Bup Kudus, lalu berundingka tujuh puluh taun Jerusalem udah nyadi tembawai, nitihka utai ti udah dipadahka TUHAN ngagai nabi Jeremiah.
3 Aku lalu besampi enggau bebendar ngagai TUHAN Allah Taala, minta kasih ngagai Iya. Aku bepasa, lalu begari ngena kain guni, lalu duduk malai amau.
4 Aku besampi ngagai TUHAN Allah Taala aku, lalu ngaku dosa bansa aku empu.
Ku aku, “TUHAN Allah Taala, Nuan endang besai, lalu kami nangika Nuan. Nuan endang tetap ati ngagai sempekat Nuan, lalu ngayanka pengerindu ti meruan ngagai orang ke rinduka Nuan sereta ngereja utai ti diasuh Nuan.
5 “Kami udah bedosa, kami udah jai, kami udah ngereja penyalah. Kami udah nulak utai ti diasuh Nuan kereja kami, lalu kami udah limpang ari utai ti ngena ti udah diayanka Nuan ngagai kami.
6 Kami enda mendingka bala nembiak Nuan, iya nya sida nabi, ke bejaku dalam nama Nuan ngagai bala raja kami, bala orang ke merintah kami, bala aki ini kami, enggau ngagai semua bansa kami.
7 Nuan, TUHAN, endang seruran ngereja utai ti ngena, tang kami udah ngemaluka diri empu. Utai tu endang amat ba semua bala kami ke diau di Judea enggau di Jerusalem, enggau ba semua orang Israel ti udah diachirka Nuan ba sebelah menua ti jauh enggau ti semak, ketegal sida udah enda tetap ati ngagai Nuan.
8 Bala raja kami, bala orang ke merintah kami, enggau bala aki ini kami udah ngereja utai ti balat ngemaluka kami empu, lalu udah bedosa ngelaban Nuan, O TUHAN.
9 Nuan endang penuh laban pengasih enggau pengampun, taja pen kami udah angkat ngelaban Nuan.
10 Kami enda mendingka Nuan, O TUHAN Allah Taala kami, lebuh Nuan ngasuh kami nitihka adat ti udah diberi Nuan ngagai kami nengah bala nembiak Nuan, iya nya sida nabi.
11 Semua orang Israel udah ngelanggar adat Nuan lalu enggai mendingka jaku Nuan. Kami udah bedosa ngelaban Nuan. Nya alai Nuan udah ngasuh kami ditinggang semua sumpah ti ditulis dalam Adat nembiak Nuan Moses.
12 Nuan udah ngereja utai ti deka dikereja Nuan ngagai kami enggau ngagai orang ke merintah kami. Nuan udah ngukum Jerusalem lebih balat agi ari Nuan ke ngukum nengeri bukai di dunya tu,
13 lalu ngasuh kami ditinggang semua ukum ti disebut dalam Adat Moses. Datai ke diatu, O TUHAN Allah Taala kami, kami apin nguji ngelengkaka dosa kami, tauka nitihka pemendar ti diberi Nuan ngagai kami lalu ngerinduka ati Nuan.
14 Nuan, O TUHAN Allah Taala kami, endang sedia deka ngukum kami, lalu Nuan udah ngukum kami, laban Nuan endang seruran ngereja utai ti ngena, lalu kami enda mendingka Nuan.
15 “O TUHAN Allah Taala kami, Nuan udah ngayanka kuasa Nuan lebuh Nuan mai bala nembiak Nuan pansut ari menua Ejip, lalu kuasa Nuan endang agi mengkang dikingatka kami. Kami udah bedosa. Kami udah salah.
16 Nuan udah bejaku ngarika kami dulu menya, nya alai anang agi ringat ngagai Jerusalem. Nengeri tu endang enggi Nuan, bukit Nuan ti kudus. Semua orang di menua ti ngelingi kami endang enda bebasaka Jerusalem, sereta ngeleseka bala nembiak Nuan ketegal dosa kami, enggau ketegal penyai ti udah dikereja bala aki ini kami.
17 O Allah Taala, dingaka sampi enggau peminta aku tu. Gaga baru meh Rumah Nuan ti udah rusak. Gaga iya baru ngambika semua orang deka nemu Nuan endang Allah Taala.
18  Pendingka kami, O Allah Taala. Malik ngagai kami, lalu peda meh penusah kami, enggau pemerinsa nengeri ti ngangkatka nama Nuan. Kami besampi ngagai Nuan laban Nuan endang kasih, ukai laban kami udah ngereja utai ti ngena.
19 TUHAN, pendingka kami. Ampun meh kami. Dingaka kami, lalu kereja meh utai ti dipinta kami! Anang betangguh, ngambika semua orang nemu Nuan endang Allah Taala. Nengeri tu enggau bala orang tu endang enggi Nuan magang.”
 
Gabriel Nerangka Utai Ti Deka Nyadi
20 Aku majak besampi, ngaku dosa aku enggau dosa bansa aku, dosa orang Israel, lalu minta TUHAN Allah Taala aku nirika baru Rumah Sembiang Iya ti kudus.
21 Lebuh aku benung besampi, Gabriel, ti udah dipeda aku dalam genera ti dulu, datai terebai nurun ngagai aku. Nyadi jam ba urung nya endang maya orang ngenjuk piring lemai hari.
22 Ku Gabriel nerangka ngagai aku, “Daniel, aku datai laban aku deka meri nuan penemu-dalam enggau pengelandik meretika utai.
23 Lebuh nuan belabuh mantaika peminta nuan ngagai Allah Taala, Iya nyaut nuan. Iya rinduka nuan, nya alai aku udah datai ditu madahka saut ngagai nuan. Dingaka enggau manah lebuh aku nerangka genera nya.
24 “Tujuh kali tujuh puluh taun nya meh pengelama ti udah diletak Allah Taala kena Iya ngelepaska bansa nuan enggau nengeri kita ke kudus tu, ari dosa enggau penyai. Dosa deka diampun, lalu pengelurus ti meruan belama iya deka didudukka, ngambika genera, enggau jaku nabi dikamatka, lalu Rumah Sembiang ti kudus deka diserahka baru.
25 Peratika utai tu ngambika nuan mereti: Berengkah ari maya meri atur ngaga Jerusalem baru, nyentuk ngagai maya penatai tuai ke dipilih Allah Taala, tujuh kali tujuh taun deka lempus. Jerusalem deka digaga baru. Jalai raya enggau kuta ti tegap deka digaga baru, lalu nengeri nya deka mengkang bediri tujuh kali enam puluh dua taun, tang tu maya mayuh macham penusah nyadi.
26 Lalu ba pengujung timpuh nya, tuai ti udah dipilih Allah Taala deka dibunuh enggau nadai kebuah. Nengeri nya enggau Rumah Sembiang deka diserang lalu dirusak bala soldadu pemerintah ti bekuasa. Pengujung nya deka datai baka ai bah, mai perang enggau pengerusak ti udah disediaka Allah Taala.
27 Tuai nya deka ngaga siti sempekat enggau mayuh orang dalam kandang tujuh taun, lalu lebuh setengah ari timpuh nya udah lempus, iya deka madamka semua pengawa ti beberika piring enggau pemeri. Utai Ti Balat Jai  deka diengkah ba legit Rumah Sembiang, lalu deka mengkang dia nyentuk ngagai maya orang ke ngengkahka iya dia besatup enggau penusah ti udah disediaka Allah Taala ke iya.”
 
Bagi 10
Daniel Begenera Ba Tebing Sungai Tigris
1 Dalam taun ti ketiga Sairus udah nyadi raja besai menua Persia, siti pesan bisi dipandangka ngagai Daniel, ke dikumbai Belsasar. Pesan nya endang amat, tang kelalu mar diperatika. Pesan nya udah diterangka ngagai Daniel dalam genera.
2 Lebuh maya nya aku benung ngulit tiga minggu.
3 Aku enda makai pemakai ti nyamai, tauka dagin, enda ngirup wain, tauka nyugu buk aku datai ke tiga minggu nya udah lempus.
4 Kena dua puluh empat hari bulan ti kesatu taun nya, aku bediri ba tebing Sungai Tigris ti besai.
5 Aku engkadah lalu tepedaka siku orang ke ngena pekayan linin, enggau belulang ti digaga ari emas ti tulin.
6 Tubuh iya beperenching baka batu ti berega. Mua iya bepijar baka kilat, lalu mata iya baka daun api. Lengan enggau kaki iya beperenching baka temaga ti udah dipugar, lalu nyawa iya inggar munyi panjung bala mayuh.
7 Semina aku aja ke meda genera nya. Sida ke enggau aku nadai meda utai, tang sida balat takut, rari lalu belalai.
8 Semina aku aja agi tinggal dia, ke meda genera ti nyelai nya. Aku nyau lembut tulang, lalu mua aku puchat.
9 Lebuh aku ninga nyawa orang nya, aku luput lalu rebah tetingkap ke tanah.
10 Udah nya siti jari megai aku lalu ngangkatka aku, lalu aku angkat betunjang ngena jari enggau patung aku. Aku agi getar-getar.
11 Ku melikat nya bejaku enggau aku, “Daniel, Allah Taala rinduka nuan. Bediri nuan lalu pendingka enggau manah utai ti deka disebut aku. Aku udah diasuh betemu enggau nuan.” Lebuh iya nyebut nya, aku lalu bediri, tang agi getar-getar.
12 Udah nya ku iya bejaku, “Daniel, anang takut. Allah Taala udah ninga sampi nuan kenyau ari nuan ke terubah mutuska runding deka ngemaruhka diri ngambika nuan ulih meretika utai. Aku datai ditu laban aku deka nyaut sampi nuan.
13 Melikat ke megai menua Persia udah ngelaban aku dua puluh satu hari. Udah nya Mikael, siku ari bala tuai melikat, datai nulung aku, laban aku udah ditinggalka kediri-diri di menua Persia.
14 Aku udah datai ditu laban aku deka ngasuh nuan meretika utai ti deka nyadi ba bala nembiak nuan jemah ila. Genera tu nunjukka utai ti deka nyadi jemah ila.”
15 Lebuh iya udah nyebut nya, aku lalu tegenung merening ke tanah, enda tepansutka jaku.
16 Udah nya melikat nya, ke baka gamal mensia, ngangkatka jari iya lalu negu mulut aku. Ku aku bejaku enggau iya, “Tuan, genera tu ngasuh aku lembut tulang lalu aku enda ulih badu getar-getar.
17 Aku nyau baka ulun ke bediri di mua tuan iya. Baka ni ku aku ulih bejaku enggau nuan? Aku nyau lembut tulang lalu enda ulih enseput.”
18 Orang ke baka gamal mensia nya negu aku baru, lalu ngasuh aku berasai kering.
19 Ku iya bejaku, “Anang takut, menyadi. Nuan nadai utai ngawa. Nuan enda tau enda kering sereta berani!” Lebuh iya bejaku ngagai aku, aku berasai kering, lalu ku aku bejaku, “Bejaku meh nuan, tuan, laban nuan udah ngasuh aku kering.”
20 Iya lalu bejaku, “Kati nuan nemu kebuah aku datai ngagai nuan? Diatu aku enda tau enda pulai baru lalu beperang ngelaban melikat menua Persia, lalu lebuh aku udah ngalahka iya, melikat menua Gerika deka datai.
21 Tang aku deka madahka ngagai nuan utai ti ditulis dalam bup pemendar. Nadai orang bukai nulung aku ngelaban melikat dua iku nya, semina Mikael aja, melikat ke nyaga nuan.
 
Bagi 11
1 Iya nya  meh melikat ke nulung sereta nyaga aku.
2 Lalu utai ti deka dipadahka aku ngagai nuan nya utai ti amat.”
 
Perintah Menua Ejip Enggau Siria
Ku melikat nya bejaku, “Tiga iku agi raja deka megai perintah di menua Persia, lalu ditangkanka raja ti keempat, ti deka nyadi kaya agi ari semua sida ti bukai. Lebuh iya udah nyadi kering laban pengaya iya, iya deka nyakap perintah menua Gerika.
3 “Udah nya siku raja ti berani deka pegari. Iya deka merintah sebuah menua ti besai, lalu iya deka ngereja utai nitihka peneka ati iya.
4 Tang lebuh kuasa iya nyau besai amat, menua ti diperintah iya deka pechah lalu dibagi empat. Bala raja ke ukai ari peturun iya deka merintah nganti iya, tang sida nya enda bekuasa baka iya.
5 “Raja menua Ejip deka nyadi kering. Tang siku ari tuai soldadu iya deka nyadi kering agi, lalu megai perintah di menua ti besai agi.
6 Nyau berapa taun udah bekau nya, raja menua Ejip deka beserakup enggau raja menua Siria, lalu ngasuh anak indu iya jadi enggau raja menua Siria. Tang penyerakup seduai nya enda tan lama, lalu anak indu raja menua Ejip nya, laki iya, anak iya, enggau bala ulun ke sama bejalai enggau iya, deka dibunuh magang.
7 Enda lama udah bekau nya, siku ari kaban belayan indu nya deka nyadi raja. Orang nya deka nyerang bala soldadu raja menua Siria, tama ngagai kuta sida, lalu ngalahka sida.
8 Orang nya deka mai pulai baru ngagai menua Ejip engkeramba petara sida enggau perengka emas enggau pirak ti udah diserahka ngagai bala petara nya. Lebuh menua nya udah bebaik dua tiga taun
9 raja menua Siria deka nyerang menua Ejip, tang iya deka dipejalka nyurutka diri.
10 “Bala anak lelaki raja menua Siria deka nyendiaka diri beperang, lalu ngempuruka mayuh bala soldadu. Siku ari bala anak raja nya deka ngalun baka ai bah, lalu nyerang kuta munsuh.
11 Raja menua Ejip deka ringat, lalu beperang ngelaban raja menua Siria, lalu nangkap bala soldadu raja menua Siria.
12 Raja menua Ejip deka temegahka diri ke menang, sereta temegahka pemayuh bala soldadu ti udah dibunuh iya, tang iya enda menang belama.
13 “Raja menua Siria deka pulai baru, lalu ngempuruka mayuh agi bala soldadu ari ti dulu. Ba maya ti ngena, iya deka datai baru mai bala soldadu ti mayuh bendar, ti chukup disikap enggau senyata.
14 Nya baru mayuh orang deka angkat ngelaban raja menua Ejip. Lalu sekeda orang ke mangah ari bansa nuan empu, Daniel, deka angkat ngelaban ketegal genera ti udah dipeda sida, tang sida deka alah.
15 Raja menua Siria deka ngelulung nengeri ti bekuta nya, lalu ngalahka nengeri nya. Bala soldadu menua Ejip lalu enggai agi ngelaban. Indah soldadu sida ke pemadu kering, deh nadai pengering agi.
16 Orang Siria ke nyerang nya deka merinsaka sida enggau sepeneka ati sida, lalu nadai orang tan ngelaban iya. Iya deka bediri di Menua Ti Udah Disemaya, lalu merintah menua nya.
17 “Raja menua Siria deka bekira nyerang ngena semua bala soldadu iya. Udah nya, ngambika iya ulih ngerusak menua munsuh, iya deka beserakup enggau munsuh nya, lalu ngasuh anak indu iya jadi enggau munsuh nya. Tang pelan iya enda mujur.
18 Udah bekau nya, raja menua Siria deka nyerang mayuh bengkah bansa ti ba tebing tasik, lalu ngalahka sida. Tang siku tuai orang menua bukai deka ngalahka iya, lalu madamka penyumbung iya. Tuai nya deka mutarka penyumbung raja Siria kena iya malas penyumbung raja nya empu.
19 Raja nya deka pulai baru ngagai kuta di menua iya empu, tang iya deka alah laban munsuh, lalu nya meh pengujung iya.
20 “Iya deka ditangkanka siku agi raja, ti deka ngasuh siku pemesai nekanka pengidup orang mayuh lalu mejalka sida mayar chukai, kena iya nambahka pengaya menua ti diperintah iya. Enda lama udah bekau nya iya deka dibunuh, tang ukai di mua orang mayuh, lalu ukai lebuh maya perang.”
 
Raja Ti Jai Ke Megai Menua Siria
21 Melikat nya lalu majak meri penerang: “Raja menua Siria ti deka nangkanka iya, nya orang ke jai lalu enda patut nyadi raja, tang iya deka datai lalu ngerampas kuasa ngena jalai tipu.
22 Barang sapa ngelaban iya, nyengkaum Imam Besai Allah Taala, deka dibuai lalu dibunuh.
23 Iya deka nyain sempekat enggau mayuh bengkah bansa bukai, lalu nipu sida, lalu iya deka mansang kering-sekering, taja pen iya megai perintah di menua ti mit.
24 Iya deka nyerang enggau ngenyit sitak menua ti kaya, lalu deka ngereja utai ti enda kala dikereja bala aki ini iya. Udah nya iya deka magi ngagai bala orang ke nitihka iya, barang enggau reta tengkira ti udah dirampas iya lebuh beperang. Iya deka bekira nyerang mayuh bengkah kuta, tang timpuh iya nyau deka abis enda lama da agi.
25 “Enggau ati ti berani iya deka ngempuruka mayuh bala soldadu kena iya nyerang raja menua Ejip ke sedia deka ngelaban iya ngena bala soldadu ti mayuh sereta kering. Tang raja menua Ejip deka kena tipu, lalu iya enda ulih mujur.
26 Bala penyanding penemu ti nyempil enggau iya, deka ngerusak iya. Bala soldadu iya deka lus dibunuh.
27 Udah nya raja dua iku nya deka duduk begulai makai ba siti mija, tang juluk ati seduai iya jai, lalu seduai iya deka ngemulaka pangan diri. Seduai iya nadai bulih utai ti dikinginka seduai iya, laban timpuh utai nya apin datai.
28 Raja menua Siria deka pulai baru ngagai menua iya empu mai semua perapasan ti udah dirampas iya, lalu udah mutuska runding deka ngerusak agama bala nembiak Allah Taala. Iya deka ngereja utai nitihka peneka ati iya, lalu udah nya pulai baru ngagai menua iya empu.
29 “Udah bekau nya iya deka nyerang menua Ejip baru, tang sekali tu utai ti deka nyadi nya lain agi ari ti dulu.
30 Orang bansa Rome deka datai ngena kapal lalu ngelaban iya, lalu iya deka takut.
“Udah nya iya deka nikal, mai ati ti balat ringat, lalu nguji ngerusak agama bala nembiak Allah Taala, nitihka jaku lalau ari orang ke udah ngelengkaka agama nya.
31  Sekeda bala soldadu iya deka ngamahka Rumah Sembiang. Sida deka madamka pengawa ti beberika piring tiap hari, lalu nirika Utai Ti Balat Jai.
32 Ngena jalai tipu, raja nya deka ngulihka sukung ari sida ke udah ngelengkaka agama sida, tang orang ke nitihka Allah Taala deka ngelaban sida.
33 Bala tuai ti bepenemu-dalam deka magi penemu-dalam ngagai mayuh orang bukai. Tang dalam berapa hari aja sekeda sida deka mati beperang, tauka mati ditunu, lalu sekeda deka dirumpak, lalu digaga nyadi orang tangkap.
34 Lebuh pengawa bebunuh nya benung nyadi, bala nembiak Allah Taala deka nerima tulung mimit, taja pen mayuh orang ke setanah enggau sida semina deka beserakup kena ngiga penguntung ke diri empu aja.
35 Sekeda bala tuai ti bepenemu-dalam deka dibunuh, tang pemati sida deka nuchi orang mayuh. Utai tu deka majak nyadi datai ke ujung, ba maya ti udah diletak Allah Taala.
36 “Raja menua Siria deka ngereja utai nitihka peneka ati iya empu. Iya deka temegah madahka diri besai agi ari sebarang petara, kering agi ari Allah Taala ti Pemadu Tinggi. Iya ulih ngereja utai nya nyentuk ngagai maya Allah Taala deka ngukum iya. Allah Taala deka ngereja utai nitihka pelan Allah Taala empu.
37 Raja nya enggai ibuhka petara ti udah dipetuaika bala aki ini iya, enggau petara ti dikerinduka sida ke indu. Iya ti bendar, iya enggai ibuhka semua petara, laban iya ngumbai diri besai agi ari sida.
38 Tang iya deka ngemesaika petara ti nyaga kuta. Iya deka meri emas, pirak, batu ti berega, enggau pemeri bukai ti berega ngagai petara ti enda kala disembah aki ini iya.
39 Iya deka ngasuh orang ke nyembah petara orang bansa bukai, nyaga kuta iya. Iya deka meri basa ti besai ngagai sida ke nerima iya nyadi raja, meri sida pangkat ti tinggi, lalu meri sida tanah nyadika upah sida.
40 “Lebuh timpuh raja menua Siria nyau deka abis, raja menua Ejip deka nyerang iya, lalu raja menua Siria deka ngelaban ngena semua kuasa iya, ngena kerita perang, kuda, enggau berapa buah kapal. Iya deka nyerang mayuh bengkah menua, baka ai bah.
41 Iya deka mega nyerang Menua Ti Udah Disemaya lalu munuh bepuluh ribu iku orang, tang menua Edom, Moap, enggau teda menua Amon, enda diserang.
42 Lebuh iya nyerang semua menua nya, iya enda ngalau menua Ejip.
43 Iya deka nabanka pengaya ti dilalaika ti digaga ari emas, pirak enggau utai bukai ti dikesayauka, ari menua Ejip. Iya deka ngalahka menua Libia enggau menua Etiopia.
44 Udah nya iya deka takut ninga berita ti datai ari timur enggau ari utara, lalu iya deka bebendar belaban, lalu munuh mayuh orang.
45 Iya deka nirika langkau kain diraja iya ti besai ba entara tasik enggau bukit ti kudus. Tang iya deka mati, nadai orang nulung.”
 
Bagi 12
Pengujung Dunya
1 Ku melikat nya bejaku, “Lebuh maya nya ila, melikat Mikael, ke nyaga bala nuan, deka pegari. Udah nya penusah ti besai deka nyadi. Nadai penusah ti jai agi ari nya udah kala nyadi kenyau ari penumbuh bansa ti terubah menya. Lebuh maya nya ila, semua orang ari bansa nuan, ke bisi nama ditulis dalam bup Allah Taala, deka diidupka.
2 Mayuh sida ke udah mati, deka idup baru. Sekeda deka idup belama iya, lalu sekeda deka dipechat belama iya.
3 Bala tuai ti bepenemu-dalam deka manchar baka penampak langit. Lalu sida ke udah ngajar orang ngereja utai ti ngena, deka manchar baka bintang belama iya.”
4 Ku iya bejaku enggau aku, “Nya alai, Daniel, tutup bup nya, lalu lekatka chop tambit ba iya nyentuk ngagai pengujung dunya. Ba jam ke diatu, mayuh orang deka masau jam nguji meratika utai ti nyadi.”
5 Udah nya aku lalu tepedaka dua iku orang bediri ba tebing sungai, siku ba tebing seberai, lalu siku ba tebing seberai.
6 Siku ari seduai nya nanya melikat ke bediri ari ulu iya, “Ni pengelama baru utai ti nyelai nya badu agi nyadi?”
7  Melikat nya lalu ngedarka jari iya kedua piak ke langit, lalu besumpah dalam nama Allah Taala ti idup belama iya, lalu aku ninga iya nyebut, “Pengelama iya tiga taun setengah. Lebuh bala nembiak Allah Taala badu agi diperinsa, nya meh maya semua utai tu badu agi nyadi.”
8 Aku ninga utai ti disebut iya, tang aku enda meretika utai nya. Nya alai aku nanya, “Tang baka ni ku jalai semua utai tu deka badu agi nyadi, Tuan?”
9 Ku iya nyaut, “Nuan enda tau enda mupuk diatu, Daniel, laban leka jaku tu resia sereta dilalaika nyentuk ngagai pengujung dunya.
10 Mayuh orang deka dituchi. Sida ke jai enda ulih mereti, tang deka majak nyadi orang ke jai. Semina sida ke bepenemu-dalam aja deka mereti.
11 “Kenyau ari maya pengawa ngenjuk piring tiap hari nya dipadamka, reti nya, kenyau ari maya penatai Utai Ti Balat Jai  nya, 1,290 hari deka lempus.
12 Beberekat meh orang ke mengkang tetap ati nyentuk ngagai 1,335 hari nya udah lempus!
13 “Lalu nuan, Daniel, enda tau enda tetap ati nyentuk ke ujung. Udah bekau nya nuan deka mati, tang nuan deka angkat idup baru lalu nerima upah nuan ba pengujung dunya.”