SABAK KENANG

 
Jaku Pemuka
Bup Sabak Kenang* ngundan lima bengkah sabak kenang pasal Jerusalem ti dirusak dalam taun 586 sebedau pengada Kristus, enggau pasal nengeri nya ti nyadi tembawai, lalu orang di nengeri nya dibuai ngagai menua bukai. Taja pen utai ti dalam bup tu munyi ti balat ngenusahka ati, tang orang agi ulih mengkang arapka Allah Taala, lalu bisi pengadang ke jemah ila. Leka sabak dalam bup tu dikena orang Judah nyembah Allah Taala lebuh sida bepasa sereta ngulit ngingatka penusah ti nyadi dalam taun 586 sebedau pengada Jesus.
 
Ripih Isi Bup Tu
Penusah Jerusalem (1.1-22)
Ukum Jerusalem (2.1-22)
Ukum enggau pengadang (3.1-66)
Jerusalem nyadi tembawai (4.1-22)
Sampi minta pengasih (5.1-22)
 
Bagi 1
Penusah Nengeri Jerusalem
1 Sunyi amat meh nengeri Jerusalem diatu. Dulu menya iya penuh laban mensia! Dulu menya iya dibasa semua bansa, tang diatu iya nyau baka indu ke balu. Nengeri ti pemadu manah tu udah nyadi ulun.
2 Iya nyabak semalam-malam. Ai mata iya nyau nelusur kuyu iya. Ari semua bala pangan iya, nadai siku agi tinggal ngaum iya. Orang ke setanah enggau iya udah nipu iya, lalu semua sida ngelaban iya diatu.
3 Orang Judah nyau nyadi ulun ti nadai daya agi lalu dipejalka ninggalka menua diri. Sida diau di menua bukai, nadai agi menua ti tau dikumbai sida menua diri, dikelingi munsuh, lalu nadai jalai ngerarika diri.
4 Nadai agi orang datai ngagai Rumah Sembiang diatu lalu nyembah Allah Taala lebuh hari kudus. Bala indu ke biak ke belagu dia, natka pemerinsa, lalu bala imam semina ulih bedemuh aja. Pintu nengeri nadai orang nengah, lalu Sion natka diri pedis.
5 Bala munsuh iya udah menang, lalu merintah iya. TUHAN udah ngasuh iya merinsa ketegal semua dosa iya. Bala anak iya udah ditangkap lalu ditabanka ngagai menua bukai.
6 Pemanah gaya nengeri Jerusalem nyau nadai agi. Bala tuai iya nyau baka rusa ti lemi ketegal lapar, ke nyau deka abis pengering lebuh sida ngerarika diri ari orang ke ngasu.
7 Jerusalem diatu nyau nyadi tembawai, lalu iya ngingatka pemanah gaya diri ti dulu menya. Lebuh iya alah laban munsuh, nadai orang nulung iya. Orang ke ngalahka iya ketawaka iya lebuh iya alah.
8 Iya enda agi dibasa orang. Iya telanjai lalu dikeleseka orang. Iya bedemuh lalu mampul mua diri laban malu. Jerusalem udah ngamahka diri ngena dosa ti udu jai.
9 Pengamah iya nyata dipeda, tang iya enda irau mimit ke utai ti deka nyadi ba iya jemah ila. Iya balat amat alah. Nadai orang ulih ngaum iya. Bala munsuh iya udah menang, lalu iya nyabak minta TUHAN kasihka iya.
10 Bala munsuh udah ngerampas semua reta tengkira iya. Iya tepedaka sida tama ngagai Rumah Sembiang, ti enda disagi TUHAN pasuk orang bansa bukai.
11 Bala nembiak iya bedemuh lebuh sida begigaka utai diempa. Sida nyilih reta tengkira sida enggau pemakai kena sida beridup. “Peda aku tu, TUHAN,” ku nengeri nya nyabak. “Peda pemerinsa aku tu.”
12 “Malik ngagai aku!” ku iya nyabak nunga ngagai semua orang ke mansa. “Nadai orang udah kala pedis baka aku tu, pemedis ti udah diasuh TUHAN ninggang aku lebuh Iya ringat.
13 “Iya ngirumka api ari langit, api ti mau dalam aku. Iya nan panjuk kena nyintak aku, lalu ngerebahka aku ke tanah. Udah nya Iya ninggalka aku, lalu nejuka aku seruran pedis.
14 “Iya meda semua dosa aku, lalu merekaska sida nyadi siti berekas. Iya nanchangka berekas dosa nya ba rekung aku, lalu aku nyau lembut tulang ditating dosa nya. TUHAN nyerahka aku ngagai bala munsuh aku, lalu aku nadai daya ngelaban sida.
15 “TUHAN ketawaka semua soldadu aku ke pemadu kering. Iya ngirumka bala soldadu ngerusak bala soldadu aku ke agi biak. Iya ngeredakka bala aku baka ke mitan buah anggur.
16 “Nya kebuah ai mata aku nyau lilih. Nadai orang ulih ngaum aku, lalu nadai orang ngangkatka semengat aku. Bala munsuh udah ngalahka aku. Bala nembiak aku nyau nadai utai agi.
17 “Aku ngangkatka jari, tang nadai orang deka nulung aku. TUHAN udah mesanka bala munsuh ari sepiak-sepiak ngelaban aku. Sida ngaga aku baka utai ti kamah.
18 “Tang TUHAN endang lurus, laban aku udah enda ngasika Iya. Pendingka aku, kita di semua endur. Peda kita pemedis aku tu. Bala nembiak lelaki enggau bala nembiak indu aku ke biak, udah ditabanka nyadi orang tangkap.
19 “Aku ngangauka orang ke setanah enggau aku, tang sida enggai nulung aku. Bala imam enggau bala tuai bansa mati ba sebelah jalai raya di nengeri, begigaka pemakai kena beridup.
20 “Peda, O TUHAN, penusah ati aku, penusah semengat aku! Ati aku runtuh tusah ke dosa aku. Orang bebunuh ba sebelah jalai raya, lalu dalam rumah pen bisi mega pemati.
21 “Pendingka  aku ke bedemuh. Nadai orang deka ngaum aku. Bala munsuh aku gaga ati meda Nuan ngasuh penusah ti besai tu ninggang aku. Asuh datai meh hari ti udah disemaya Nuan. Awakka bala munsuh aku merinsa baka aku.
22 “Peda Nuan semua penyai sida, lalu ukum meh sida baka Nuan ti udah ngukum aku ketegal dosa aku. Aku bedemuh ketegal merinsa, lalu ati aku balat tusah.”
 
Bagi 2
TUHAN Ngukum Nengeri Jerusalem
 1 TUHAN ringat lalu mungkur Sion ngena pemetang. Nengeri ti manah gaya nya udah diubah Iya nyadi tembawai. Indah Rumah Sembiang deh ditinggalka TUHAN lebuh Iya ringat.
 2 TUHAN nadai pengasih mimit ngerusak semua genturung pendiau di menua Judah Lalu ngeruntuhka kuta ti dikena nyaga menua nya. Iya mechat perintah enggau bala orang ke megai perintah di menua nya.
3 TUHAN ngeransi lalu nganchurka pengering Israel. Iya enggai nulung kitai lebuh munsuh datai. Iya balat amat ngelaban kitai baka api, lalu ngerusak semua utai.
4 Iya nyelintingka laja Iya ngagai kitai baka munsuh. Iya munuh semua orang ke dikegagaka sereta dikerinduka kitai. Di Jerusalem ditu kitai ngasaika pengeringat Iya.
5 TUHAN udah nyadi baka munsuh. Iya udah ngerusak Israel. Iya udah ngaga semua kuta enggau istana di menua Israel nyadi tembawai. Iya udah ngasuh orang Judah enda ngetu-ngetu ditinggang penusah.
6 Iya udah ngerusak Rumah Sembiang alai kitai ti udah nyembah Iya. Iya enda ngasuh orang ngintu hari ti kudus enggau Hari Sabat. Raja enggau imam udah sama ngasaika pengeringat Iya.
7 TUHAN enggai agi begunaka alta Iya, lalu Iya ninggalka Rumah Sembiang Iya ti kudus. Iya nejuka munsuh ngeruntuhka dinding Rumah Sembiang. Sida manjung ke diri ke menang ba endur alai kitai, enggau ati ti gaga, udah besembah.  8 TUHAN udah mutuska runding deka ngeruntuhka dinding kuta Sion. Iya nyukat dinding kuta nya, kena nentuka semua dinding nya dirusak magang. Diatu menara enggau dinding kuta nya udah nyadi tembawai magang.
9 Pintu nengeri dilamun rapuh, lalu alang pintu redak magang. Raja enggau bala pemesai diatu udah dibuai ngagai menua bukai. Adat nadai agi diajar, lalu sida nabi nadai nerima genera ari TUHAN.
10 Orang ke tuai umur di Jerusalem duduk ba tanah, enda engkeretik. Pala sida dikerabuka enggau amau lalu sida begari ngena kain guni. Indu ke agi biak ngendukka pala sida ke tanah.
11 Mata aku nyau bangkung laban aku enda ngetu nyabak. Ati aku balat tusah. Ati aku balat tusah laban bala aku udah dirusak, laban sida ke nembiak enggau anak mit luput ba sebelah jalai raya.
12 Lapar sereta aus, sida nyabak minta pemakai enggau utai diirup ari indai sida. Sida rebah ba sebelah jalai raya baka ke bakal, dipangku indai sida, lalu mati.
13 O Jerusalem, Jerusalem ti dikesayauka aku, baka ni ku jalai aku bejaku? Baka ni ku jalai aku merindang nuan? Nadai orang patut merinsa baka tu. Penusah nuan nadai sekat baka tasik, nadai pengandal agi.
14 Bala nabi nuan nadai madahka utai bukai ngagai nuan, semina pemula aja. Jaku ajar sida semina nipu nuan, laban ajar nya enda kala madahka dosa nuan. Sida nyungkak nuan berunding ngumbai diri enda ibuh nesal ati ke dosa nuan.
15 Orang ke mansa nuan merening lalu ngeleseka nuan. Sida ngilikka pala, lalu ketawaka Jerusalem ke nyau nyadi tembawai: “Kati tu amat nengeri ti manah nya suba? Kati tu nengeri ti dikemegahka dunya?”
16 Semua bala munsuh nuan ngeleseka nuan, lalu melut mata begedika nuan. Sida enchebirka mulut lalu ngelese, “Kami udah ngerusak nengeri nya! Tu meh hari ti dianti kami ngelamatu!”
17 Diatu TUHAN udah ngereja utai ti deka dikereja Iya: Iya udah ngerusak kitai enggau nadai pengasih, nitihka jaku tangkan ti disebut Iya ngagai kitai dulu kelia. Iya ngasuh bala munsuh kitai menang, ngasuh sida gaga ati meda kitai alah.
18 O Jerusalem, asuh dinding kuta nuan nyabak ngangauka TUHAN! Awakka ai mata nuan lilih baka ai sungai ti rarat siang malam. Awakka nuan lelak nyabak tusah ati!
19 Awakka nuan semalam-malam enda ngetu angkat ngangauka TUHAN. Bantaika semua utai ari ati nuan ngagai TUHAN, minta Iya kasihka bala anak nuan, anak ke mati keberuran ba genap sukut jalai raya!
20 TUHAN, peda Nuan! Nama kebuah Nuan ngukum kami baka tu? Sida ke indu nyau bepakaika anak ke dikesayauka sida! Bala imam enggau bala nabi dibunuh dalam Rumah Sembiang!
21 Orang ke biak enggau ke tuai nyau betegaring mati ba sebelah jalai raya, Lelaki enggau indu ke biak, dibunuh munsuh ngena pedang. Nuan munuh sida enggau nadai pengasih lebuh Nuan ringat.
22 Nuan ngasuh bala munsuh aku begawai ngelingi aku lalu ngemba aku, Lalu nadai orang ulih ngerarika diri ba hari Nuan ringat. Bala munsuh munuh bala anak aku, ti udah ditupi sereta dikerinduka aku.
 
Bagi 3
Ukum, Nesal Ati, Enggau Pengadang
1 Aku tu orang ke udah ngasaika ukum Allah Taala.
2 Iya muru aku jauh-sejauh ke dalam pemetang;
3 lalu enda ngetu-ngetu malu aku.
4 Iya udah ngemakalka aku, lalu matahka tulang aku.
5 Iya udah nutup aku dalam rumah jil, lalu merinsa sereta ngenusah.
6 Iya udah mejalka aku diau dalam pemetang baka orang ke udah mati dulu kelia.
7 Iya udah nanchang aku ngena rantai. Aku tu orang tutup ti enda ulih ngerarika diri.
8 Aku nyabak rauh-rauh minta tulung, tang Allah Taala enggai mending.
9 Iya udah mempang jalai aku ngena lampang batu ti udah dipansap, Iya udah ngaga jalai aku bingkuk.
10 Iya ngipa aku baka beruang, baka singa ti deka nerekam aku.
11 Iya muru aku ari jalai raya, nyarikka tubuh aku, lalu ninggalka aku.
12 Iya ngambi panah, lalu nyelintingka laja Iya ngagai aku.
13 Iya nimbakka laja Iya dalam bendar masuk ngagai tubuh aku.
14 Orang ketawaka aku sepemanjai hari. Aku tu orang ke dikeleseka semua sida.
15 Iya udah balat merinsaka aku, baka orang ke dipejalka ngirup ai ti pemadu pait.
16 Iya nginsarka mua aku ngagai batu, lalu matahka ngeli aku.
17 Aku nyau nadai pengelantang agi; aku nyau enda ingatka utai ti dikumbai pemaik.
18 Aku enda lama agi idup, lalu aku nadai agi utai diadang ari TUHAN.
19 Lebuh aku berundingka pemerinsa diri, enggau pasal aku ti nadai rumah alai diau, utai nya pait baka rachun.
20 Aku seruran berundingka utai nya, lalu ati aku tusah.
21 Tang taja pia, pengadang datai baru lebuh aku ngingatka utai siti tu:
22 Pengerindu enggau pengasih TUHAN enda nemu abis,
23 nyadi baru belama tiap pagi, naka meh penetap ati Nuan.
24 Semina TUHAN aja ke dikemisi aku, nya alai aku manggaika pengadang aku ba Iya.
25 TUHAN endang manah enggau orang ke arapka Iya, enggau orang ke ngiga Iya.
26 Nya alai manah kitai nganti Iya enggau ati ti liat, nganti Iya ngidupka kitai.
27 Manah kitai belajar liat ati lebuh kitai agi biak.
28 Lebuh TUHAN ninggang kitai enggau pemerinsa, kitai patut duduk kediri enda bemunyi sereta liat ati.
29 Kitai patut meremika pala nunduk ngagai Iya, nyangka kitai agi bisi pengadang.
30 Taja pen kitai ditampar sereta dikeleseka orang, kitai patut nerima semua utai nya.
31 TUHAN endang kasihka kitai, lalu Iya enggai nulak kitai belama iya.
32 Iya nyangka ngasuh ati kitai tusah, tang pengerindu Iya ke kitai endang meruan sereta kering;
33 laban Iya ukai deka ngemerinsa tauka ngenusahka kitai.
34 TUHAN nemu lebuh kitai dalam rumah jil, ati kitai tusah.
35 Iya nemu lebuh orang ngerampas hak ti udah diberi Iya ngagai kitai.
36 Iya nemu lebuh orang meri atur ti enda lurus dalam kot.
37 Peneka TUHAN aja ti seruran dipejalaika.
38 Utai ti manah enggau utai ti jai dikereja nitihka jaku Iya.
39 Nama kebuah kitai mutap lebuh kitai diukum ketegal dosa kitai empu?
40 Aram kita meresa ulah diri, lalu pulai baru ngagai TUHAN.
41 Aram kitai muka ati kitai ngagai Allah Taala ti di serega, lalu besampi,
42 “Kami udah bedosa lalu udah angkat ngelaban Nuan, TUHAN, lalu Nuan apin ngampun kami.
43 “Nuan udah begagaika kami lalu munuh kami. Pengasih Nuan dilamun Nuan ngena pengeringat.
44 Ati Nuan dilamun Nuan ngena ransi, baka mua hari ti tebal, datai ke sampi kami enda ulih datai ba Nuan.
45 Nuan udah ngaga kami nyadi baka tugung uras, di mua semua orang.
46 “Kami dipechat sereta diketawaka semua munsuh kami.
47 Kami udah ditinggang pemedis enggau pemerinsa; kami diau tusah sereta takut.
48 Mata aku semampai basah laban ai mata, laban bansa aku dirusak.
49 “Ai mata aku deka lilih enda ngetu-ngetu,
50 datai ke TUHAN nilik ke baruh ari serega, lalu meda kami.
51 Ati aku balat tusah meda utai ti nyadi ba orang ke diau di nengeri nya.
52 “Aku tu baka burung, dipanjuk bala munsuh ke begedika aku enggau nadai kebuah.
53 Sida nikauka aku idup-idup ngagai lubang kebung, lalu nutup mua lubang kebung nya ngena batu.
54 Ai lalu belabuh ngampuhka aku, lalu aku ngumbai diri nyau deka mati.
55 “Ari buntut lubang kebung, aku nyabak ngangauka Nuan, O TUHAN!
56 Lalu lebuh aku minta Nuan mendingka sabak aku, Nuan ningaka aku.
57 Nuan nyaut aku, lalu Nuan enda ngasuh aku takut.
58 “Nuan datai lalu ngelepaska aku, TUHAN, lalu nebus aku.
59 Beri atur ti lurus lebuh Nuan ngakim aku. Nuan nemu utai ti salah ti udah dikereja orang ngagai aku.
60 Nuan nemu pemalat bala munsuh aku begedika aku, enggau jalai sida bepekat ngelaban aku.
61 “Nuan udah ninga sida mechat aku, O TUHAN. Nuan nemu semua akal sida.
62 Sida bejaku jai pasal aku sepemanjai hari, lalu bepekat.
63 Kenyau ari pagi nyentuk ngagai malam, sida beduan aku.
64 “O TUHAN, ukum sida ketegal utai ti udah dikereja sida.
65 Sumpah sida, lalu asuh sida tusah ati!
66 Buru sida, lalu rusak sida abis lengis ari dunya tu!”
 
Bagi 4
 Jerusalem Udah Bekau Iya Ti Alah
1 Emas ti beperenching nyau enda beperenching agi. Batu ti udah dikena ngaga Rumah Sembiang nyau ngachir ba sebelah jalai raya.
2 Orang ke biak di Sion endang dikesayauka kami baka emas, tang diatu sida nyau digaga nyadi baka periuk tanah.
3 Indah indu ukui kampung deh nemu nusuka anak, tang bala nembiak aku baka burung unta, jai enggau anak diri.
4 Sida nejuka anak sida mati laban lapar enggau aus. Bala anak mit minta pemakai, tang nadai orang deka meri sida pemakai.
5 Orang ke udah teleba makai pemakai ti pemadu nyamai, diatu mati lapar ba sebelah jalai raya. Sida ke udah nyamai diau, diatu ngair ba tugung uras ngiga pemakai.
6  Bala nembiak aku udah balat agi diukum ari orang ke diau di Sodom, ke ngenyit dialahka Allah Taala.
7 Bala anak raja kami enda kamah, tang tuchi baka seleju, regas, kering, sereta bepengerai.
8 Diatu sida nyau betegaring ba sebelah jalai raya enda dikelala orang. Mua sida chelum agi ari aruk. Kulit sida rangkai baka kayu, ngeriut malut tulang sida.
9 Lantang agi orang ke mati beperang ari orang ke mati udah lepas nya, ke mati keberuran, laban sida nadai pemakai kena idup.
10  Penusah ti ninggang bala aku amat ngasuh geli. Sida ke indai manduk anak ke dikesayauka sida nyadika pemakai.
11 TUHAN mubuhka pengeringat Iya. Iya nunu Sion, lalu ngeretungka nengeri nya nyentuk ke tanah.
12 Nadai siku orang di semua endur, nyengkaum bala raja menua bukai, arapka orang ke nyerang ulih tama mua pintu nengeri Jerusalem.
13 Tang utai nya udah nyadi, laban bala nabi nengeri Jerusalem udah bedosa, lalu bala imam udah salah bebunuhka orang ke nadai penyalah.
14 Bala tuai nengeri nya bejalai segau-segau ba sebelah jalai raya baka ke buta, abis dibalut darah datai ke orang nyau enggai negu sida.
15 “Rari kita ari tu,” ku orang merak sida. “Kita tu kamah! Anang negu aku!” Nya alai sida segau-segau bejalai ari menua siti ngagai menua siti, enda diterima orang.
16 TUHAN enggai agi ibuhka sida. TUHAN Empu ke ngachirka sida. Iya enggai agi bebasaka bala imam enggau tuai kitai.
17 Kami gining-gining ngiga orang nyaup, tang nadai ga orang datai. Kami majak nganti tulung ari siti bansa, tang iya nadai ulih nulung kami.
18 Munsuh nengkilaka kami, datai ke kami nyau enda berani bejalai nengah jalai raya. Kami nyau deka mati. Seput kami nyau abis.
19 Bala munsuh begagaika kami laju agi ari menaul ti nyambar ari langit. Sida nyidi kami ba sebelah bukit. Sida negah kami di menua puang.
20 Sida ngalahka pun pengidup kami, raja ti udah dipilih TUHAN, ke dikarapka kami nyaga kami ari semua orang ke nyerang.
21 Ketawa meh kita, orang Edom enggau orang Us. Gaga ati meh kita kala lebuh kita agi ulih. Penusah ti besai deka mega ninggang kita. Kita deka mega bejalai guir-guir telanjai sereta malu.
22 Sion udah diukum ketegal dosa iya. TUHAN enggai agi nejuka kami diau di menua bukai. Tang nuan Edom, TUHAN deka ngukum nuan. Iya deka mandangka penyalah ti udah dikereja nuan.
 
Bagi 5
Sampi Minta Pengasih
1 TUHAN, kingatka utai ti udah nyadi ba kami. Malik ngagai kami, lalu peda pemalu kami.
2 Reta tengkira kami ba jari orang kampar. Orang ari menua bukai diatu diau dalam rumah kami.
3 Bala apai kami udah dibunuh munsuh, lalu diatu bala indai kami nyau balu.
4 Kami enda tau enda mayar rega ai ti diirup kami. Kami enda tau enda meli kayu api.
5 Kami dipejalka gawa baka keledai tauka unta, nya alai kami lelak, tang enda tau belelak.
6 Kami minta pemakai ari menua Ejip enggau ari menua Asiria ngambika kami ulih idup.
7 Aki ini kami bedosa, tang diatu sida iya nadai agi, lalu kami diatu merinsa ketegal dosa sida.
8 Kami diatu diperintah bala ulun, lalu nadai orang ulih ngelepaska kami ari jari sida.
9 Orang ke pemunuh nyau bekesegau bejalai ba sebelah menua pesisir. Kami berambunka nyawa lebuh kami begigaka pemakai. 10 Kami merinsa laban lapar datai ke kulit kami nyau angat baka dapur.
11 Bala bini kami udah dipasung orang ba Bukit Sion. Bala anak indu kami udah dipejalka nunduk ba genap buah genturung pendiau di menua Judah.
12 Bala tuai bansa kami udah ditabanka lalu digantung. Bala tuai kami enda dibasa orang.
13 Sida ke bujang dipejalka ngisar gandum baka ulun. Sida nembiak ti lelaki nyau guir-guir ngesan kayu.
14 Orang ke tuai umur nadai agi duduk ba mua pintu nengeri, lalu orang ke biak enda agi nebah musik.
15 Kami nyau nadai pengelantang agi. Kami nadai agi betanda, laban ati kami balat tusah.
16 Semua utai ti dikemegahka kami udah abis magang. Tulah meh kami tu, laban kami udah bedosa.
17 Ati kami balat tusah lalu mata kami nyau rapa laban ai mata kami,
18 laban Bukit Sion nadai agi diuan mensia, tang nyadi endur alai raban pasun bejalai.
19 Tang Nuan, O TUHAN, endang Raja belama iya lalu deka merintah nyentuk ngagai pengujung dunya.
20 Nama kebuah Nuan lama amat ngelengkaka kami? Kati Nuan deka ingatka kami baru?
21 Bai meh kami pulai ngagai Nuan baru, O TUHAN! Bai kami pulai baru! Pulaika baru mulia kami ke suba.
22 Kati Nuan deka nulak kami belama iya? Kati pengeringat Nuan nadai sekat?