PELANDAI SOLOMON
 
Jaku Pemuka
Pelandai Solomon* tu pantun pengerindu. Pantun tu tebal agi ditujuka lelaki ngagai indu dara, enggau ari indu dara ngagai lelaki. Bu tu dikumbai Pelandai Solomon, laban iya dipelabaka ditulis Solomon, nitihka tajuk dalam Hebrew.

Pelandai tu suah dikumbai orang Judah ngambarka kaul Allah Taala enggau nembiak Iya, lalu dikumbai orang Kristian ngambarka kaul Kristus enggau gerija.
 
Riih Isi Bu Tu
Lagu ti keterubah (1.1-2.7)
Lagu ti kedua (2.8-3.5)
Lagu ti ketiga (3.6-5.1)
Lagu ti keemat (5.2-6.3)
Lagu ti kelima (6.4-8.4)
Lagu ti keenam (8.5-14)
 
Bagi 1
1  Pelandai ti pemadu manah, ulih Solomon.
 
Lagu Ti Keterubah

Ku Indu Dara
2 Mulut nuan nyium aku. Pengerindu nuan manah agi ari wain.
3 Nuan ngaba bau rengut. Nama nuan madahka nya.Nadai indu ulih nagang diri rinduka nuan.
4 Bai aku enggau nuan, lalu tua deka rari. Awakka nuan meh nyadi raja aku, lalu mai aku ngagai bilik nuan. Tua deka lantang begulai bebendar ngirup, lalu rinduka pangan diri. Diatu baru aku nemu kebuah semua indu rinduka nuan!
5 Indu Jerusalem, aku amat chelum tang bajik, chelum baka langkau kain Kedar, tang bajik baka kain tirai ti di istana Solomon.
6 Anang ngemaruhka aku ketegal chura kulit aku, laban mata hari udah ngasuh kulit aku chelum. Bala menyadi lelaki aku ringat ngagai aku lalu mejalka aku gawa dalam kebun anggur, datai ke aku nyau nadai hari ngintu tubuh diri emu.
7 Padahka ngagai aku, O ambai, ngagai ni nuan deka nguluka raban bedus nuan ngulam? Ngagai ni alai sida deka ngerarika diri ari panchar mata panas lebuh tengah hari? Nama kebuah aku enda tau enda begigaka nuan ba raban bedus orang bukai?

Ku Lelaki
8 Kati nuan enda nemu endur alai nya, nuan indu ke pemadu bajik? Mupuk meh nuan, lalu titihka raban bedus nya. Giga padang rumput ke raban kambin nuan semak langkau kain bala pengibun bedus.
9 Nuan, ambai, nyau ngasuh lelaki gila laban pengingin baka kuda ti indu ke ngasuh kuda ti lelaki ti narit kerita raja Eji nyau gila laban pengingin.
10 Buk nuan manah gaya mungkur kuyu nuan lalu merundai ba rekung nuan baka batu ti berega.
11 Tang kami deka ngaga ke nuan rantai emas ti diias enggau pirak.

Ku Indu Dara
12 Lebuh raja aku benung gali ba kerusi-panjai iya, lalu minyak wangi aku ngaba bau rengut.
13 Ambai aku bebau mur lebuh iya ningkaka diri ba tusu aku.
14 Ambai aku baka bungai babas ti bebungai dalam kebun anggur di En-gedi.

 Ku Lelaki
15 Naka meh emajik nuan, O ambai. Mata nuan jelik-jelik laban pengerindu!

Ku Indu Dara
16 Naka meh penyigat gamal nuan, O sulu aku. Nuan ngasuh ati aku udu gaga! Rumut ti gadung tu meh nyadika peninduk tua.
17 Kayu sidar deka nyadika tiang rumah tua, lalu kayu sairis deka nyadika atap rumah tua.
 
Bagi 2
1 Aku tu bungai ros di Saron, bungai bakung ti ba lebak.

Ku Lelaki
2 Baka bungai bakung ti tumbuh ba madang duri, baka nya meh ambai aku begulai enggau indu bukai.

Ku Indu Dara
3 Baka kayu epal ti tumbuh dalam babas,baka nya meh ambai aku dibandingka enggau lelaki bukai. Aku rindu duduk belindung ba iya, lalu buah iya manis diempa.
4 Iya mai aku ngagai balai pengerami makai besai lalu nuatka menira pengerindu atas aku.
5 Keringka aku baru ngena salai buah anggur lalu asuh aku badu agi aus ngena buah epal! Aku nyau lembut tulang laban aku balat tetengukka iya.
6 Jari kiba iya di baruh pala aku, lalu jari kanan iya murus aku.
7 Besemaya ngagai aku, kita indu Jerusalem. Besumpah meh kita atas rusa ti laju, enggau kijang madahka diri enda ngachau kami duai lebuh kami duai benung rinduka pangan.
 
Lagu Ti Kedua

Ku Indu
8 Aku bisi ninga nyawa ambai aku. Iya datai belanda nengah bukit, belanda nengah munggu mansang ngagai aku.
9 Ambai aku baka kijang, baka anak rusa ti lelaki. Nyin iya bediri ngimbai dinding. Iya nilik ke dalam ari jenila lalu nyeling ngeramas ari seling dinding.
10 Ambai aku bejaku enggau aku.

Ku Lelaki
Datai kitu, ambai aku. O sulu, aram mupuk enggau aku.
11 Musin chelap nyau abis.Ujan udah badu.
12 Di menua pesisir, bungai nyau ngerembai. Tu meh maya belagu. Lalu munyi burung achang bisi didinga di padang.
13 Buah ara nyau deka mansau. Angin nyau bebau rengut laban bau bungai anggur. Nya alai, datai meh nuan ambai. Sulu, aram mupuk enggau aku.
14 Nuan baka burung achang ti belalai ba selikap batu. Awakka aku meda pemajik mua nuan lalu ninga munyi pemanah nyawa nuan.
15 Tangkap jelu munsang, enggau anak sida sebedau sida ngerusak kebun anggur kitai ti benung bebungai.

Ku Indu
16 Ambai aku endang enggi aku, lalu aku endang enggi iya. Iya ngasuh raban bedus iya ngulam ba madang bungai bakung
17 datai ke ribut muput pagi hari lalu hari enda agi petang. Pulai kitu, sulu, baka kijang, baka anak rusa ti lelaki ba bukit Beter.
 
Bagi 3
1 Lebuh aku tinduk ba peninduk aku tiap malam, aku bemimpika ambai aku. Aku ngiga iya, tang nadai tetemuka iya.
2 Aku bejalai segau-segau nengah nengeri, nengah jalai raya nengeri nya, enggau nengah jalai ti sempit. Aku ngiga ambai aku. Aku ngiga iya, tang nadai tetemuka iya.
3 Bala orang ke jaga ba jalai raya di nengeri bisi tepedaka aku. Aku lalu nanya sida, “Kati kita bisi tetemuka ambai aku?”
4 Lebuh aku ninggalka sida, aku lalu tetemuka iya. Aku merap iya, lalu enggai ngelengkaka iya datai ke aku nyau mai iya ngagai rumah indai aku, ngagai bilik ti alai aku ada.
5 Besemaya enggau aku, kita indu Jerusalem. Besumpah kita atas nama rusa enggau kijang ti laju belanda madahka diri enda ngachau kami duai lebuh kami duai benung rinduka pangan diri.
 
Lagu Ti Ketiga

Ku Indu
6 Nama utai nya ti datai ari menua puang baka tiang asap, ti bebau rengut laban menyan enggau mur, menyan ti dijual orang ke bedagang?
7 Solomon bisi datai, dibai atas kerusi diraja iya, dijaga enam puluh iku soldadu, soldadu ke pemadu kering di menua Israel.
8 Semua sida endang landik magang ngena pedang, ke suah udah beperang. Genap iku sida besenyataka pedang, nyaga ari orang ke nyerang lebuh malam hari.
9 Raja Solomon dibai ngena kerusi diraja ti digaga ari kayu ti pemadu manah.
10 Tiang kerusi nya disampak enggau pirak, lalu dibalut enggau kain ti disulam enggau emas. Selap penuduk kerusi nya dibap ngena kain ti bechura mirah-redam,ti disulam indu orang Jerusalem enggau abis pengerindu ati.
11 Kita indu Sion, datai kitu lalu peda Raja Solomon. Iya ngena makota ti udah diengkah indai iya ba pala iya lebuh iya ditikah, lebuh maya iya lantang sereta gaga.
 
Bagi 4
Ku Lelaki         
1 Naka meh pemajik nuan, O ambai aku! Mata nuan nyau beperenching laban pengerindu merening ari belakang tambai mua nuan. Buk nuan kepai-kepai baka raban kambin ti belanda nurun bukit Giliat.
2 Ngeli nuan burak baka jelu bedus ti baru udah dikukur sereta diberi mandi.Sigi pen nadai ga ngeli nuan rabang. Semua ngeli nuan nadai timpang.
3 Mulut nuan baka kain ti mirah-redam. Naka meh pemanah mulut nuan lebuh nuan bejaku. Kuyu nuan nyau pelu-pelu dibap tambai mua nuan.
4 Rekung nuan baka menara David, segala sereta alus, lalu tenggak baka seribu iti terabai ba rekung nuan.
5 Tusu nuan baka kijang, rusa ti besapit ti ngulam ba madang bungai bakung.
6 Aku deka majak diau ba bukit mur, ba bukit menyan, datai ngagai maya ribut muput pagi hari lalu hari enda agi petang.
7 Naka meh pemajik nuan, O ambai aku! Naka meh pemajik nuan!
8 Aram mupuk enggau aku ari Bukit Lebanon, O bini. Mupuk enggau aku ari menua Lebanon. Nurun ari tuchung Bukit Amana, ari Bukit Senir enggau Bukit Hermon, alai singa enggau engkuli diau.
9 Jelik mata nuan, O ambai enggau bini aku, enggau tenggak ti dikena nuan udah ngasuh ati aku balat berai.
10 Pengerindu nuan ngasuh ati aku gaga, O ambai enggau bini aku. Pengerindu nuan manah agi ari wain. Minyak wangi nuan lebih agi bebau rengut ari remah.
11 Mulut nuan manis asai ai manyi, O sulu aku.Dilah nuan asai ai tusu enggau ai manyi. Gari nuan bebau rengut baka Bukit Lebanon.
12 Ambai aku, bini aku, nya kebun ti resia, kebun ti dipagar, mata ai ti diempu aku siku aja.
13 Dia meh endur alai utai ti ditanam tumbuh enggau galak. Sida tumbuh baka kebun buah delima lalu mansutka buah ti pemadu manah. Bungai inai enggau kayu remah,
14 kunyit, tebu, kayu manis, enggau semua macham menyan bisi dia magang. Kayu mur enggau garu bisi tumbuh dia sama enggau semua kayu rempah ti pemadu bebau rengut.
15 Ai ti engkeching sungai ti rarat, anak sungai ti pansut ari Bukit Lebanon mai ai ngagai kebun nya.

Ku Indu
16 Dani meh nuan, Ribut Utara. Ribut Selatan, puputka kebun aku. Awakka angin ngaba bau rengut. Awakka ambai aku datai ngagai kebun tu lalu makai buah ti emadu manah ari kebun tu.
 
Bagi 5
Ku Lelaki
1 Aku udah tama ngagai kebun aku, O ambai enggau bini aku. Aku benung ngumpul rempah enggau mur aku. Aku benung makai ai manyi enggau idang manyi. Aku benung ngirup wain enggau ai tusu.

Ku Bala Indu Ti Bukai
Makai meh kita, O bala ambai, lalu ngirup datai ke kita nyau mabuk laban pengerindu!
 
Lagu Ti Keemat

Ku Indu
2 Lebuh aku tinduk, ati aku mengkang dani. Aku bemimip ninga ambai aku nekung pintu.

Ku Lelaki
Awakka aku tama, O wai sulu ambai aku, burung achang aku. Pala aku nyau basah laban ambun, lalu buk aku nyau basah laban bias ujan.

Ku Indu
3 Aku baru udah muka gari aku, nya alai nama kebuah aku enda tau enda begari baru? Aku udah masu kaki aku, nya alai nama kebuah aku enda tau enda ngamahka kaki aku baru?
4 Ambai aku megai pintu, lalu ati aku gaga laban iya nyau semak.
5 Aku sedia deka ngasuh iya tama. Jari aku dibalut mur tunjuk aku dibalut ai mur, lebuh aku megai gagang pintu.
6 Aku muka intu ke ambai aku, tang iya udah nadai agi dia. Naka meh pengingin aku deka ninga nyawa iya! Aku ngiga iya, tang nadai tetemuka iya. Aku ngangauka iya, tang nadai ninga iya nyaut.
7 Orang ke nyaga nengeri tetemuka aku. Sida malu aku, lalu tubuh aku rajai. Bala jejaga ke ba kuta nengeri ngerampas tungguk pala aku.
8 Besemaya meh kita enggau aku, kita indu Jerusalem, enti kita tetemuka ambai aku, padahka ngagai iya, aku nyau lembut tulang inginka iya.

Ku Bala Indu
9 Nuan indu ke emadu bajik, kati ambai nuan lain agi ari semua orang bukai? Nama utai ti manah ba iya ti ngasuh kami patut besemaya enggau nuan?

Ku Indu
10 Ambai aku sigat sereta kering. Ari sepuluh ribu iku lelaki, ka semina siku aja ti baka iya.
11 Mua iya baka emas tulin, lalu buk iya ngelegetang, chelum baka bulu burung kak.
12 Mata iya manah baka burung achang ti ba tebing sungai, burung achang ti dibasu ngena ai tusu, ti bediri ba tebing sungai.
13 Kuyu iya manah baka kebun ti penuh laban sayur enggau rempah. Mulut iya baka bungai bakung, basah laban ai mur.
14 Jari iya manah raras, lalu iya ngena tinchin ti nyangkum batu ti berega. Tubuh iya baka gading ti alus, ti nyangkum batu nilam.
15 Pah iya baka tiang batu marmar ti burak ti diengkah dalam sangkum emas. Iya baka raja, baka Bukit Lebanon ti ngundan kayu sidar ti tinggi.
16 Mulut iya manis disium. Semua utai ba iya narit ati aku magang. Nya meh gaya ambai aku, indu Jerusalem.
 
Bagi 6
Ku Bala Indu
1 Indu ke pemadu bajik, kini ke tunga ambai nuan bejalai? Padahka ngagai kami kini ke ambai nuan bejalai, ngambika kami ulih nulung nuan ngiga iya.

Ku Indu
2 Ambai aku udah bejalai ngagai kebun iya, alai kayu balsam ti tumbuh. Iya meri raban jelu tupi iya makai ba kebun nya lalu ngumul bungai bakung.
3 Ambai aku endang enggi aku, lalu aku endang enggi iya. Iya ngasuh raban bedus iya ngulam ba madang bungai bakung.
 
Lagu Ti Kelima

Ku Lelaki
4 Ambai aku, nuan bajik baka Jerusalem, manah baka nengeri Tirsah, manah baka nengeri ti besai.
5 Anang malik ngagai aku, laban perening nuan ngasuh aku lemi. Buk nuan kepai-kepai baka raban kambin ti belanda nurun bukit di Giliat.
6 Ngeli nuan burak baka raban bedus ti udah diberi mandi. Sigi pen nadai ga ngeli nuan rabang. Semua ngeli nuan nadai timpang.
7 Kuyu nuan pelu-pelu di belakang tambai mua nuan.
8 Awakka raja bisi enam puluh iku kuin, lapan puluh iku indu simpan, indu ke biak ti enda ulih diitung!
9 Tang aku rinduka siku indu aja, lalu iya bajik baka burung achang. Iya anak tunggal indai iya, anak ke dikerinduka indai iya. Semua indu bela merening ngagai iya magang, lalu muji iya. Kuin enggau indu simpan belagu muji iya.
10 Sapa orang tu ke nyeling baka merekah pajar? Iya bajik sereta terang mua, beperenching baka mata hari tauka baka bulan.
11 Aku udah datai ba madang kayu almon deka meda anak kayu ba lebak nya, deka meda daun ti muda ba batang anggur enggau bungai ba kayu delima.
12 Aku getar-getar laban nuan udah ngasuh aku balat gagit ati deka rindu baka orang ke nepan kerita perang ke ransing deka beperang.

Ku Bala Indu
13 Betanda, betanda, meh nuan indu dara orang Sulam. Awakka kami meda nuan betanda.

Ku Indu
Nama kebuah kita keran deka meda aku betanda ba entara rintai orang ke ngemata?
 
Bagi 7
Ku Lelaki
1 Naka meh pemanah gaya kaki nuan bekasut, O indu ke udu bajik! Pah nuan baka batu ti berega ti ditempa orang ke landik engkebang.
2 Pusat nuan baka mangkuk ti nadai kala enda ngundan wain ti udah dichampur. Perut nuan baka tugung gandum ti dikelingi bungai bakung.
3 Tusu nuan baka dua iku anak rusa, baka dua iku kijang.
4 Rekung nuan baka menara ti digaga ari gading. Mata nuan baka letung ti di nengeri Hesbon, semak pintu Batrabim. Idung nuan baka menara Lebanon ti ngayung nengeri Damaskus.
5 Pala nuan baka Bukit Karmel lalu buk nuan kepai-kepai baka kain ungu ti narit ati raja.
6 Naka meh pemanah enggau pemajik gamal nuan O ambai ke emadu bajik!
7 Raras tubuh nuan manah baka batang kayu engkerema, lalu tusu nuan baka tangkai buah iya.
8 Aku deka niki kayu engkerema nya lalu ngambi buah iya. Dipeda aku tusu nuan baka tangkai buah anggur, lalu kesuh seput nuan bebau rengut baka buah epal,
9 lalu mulut nuan baka wain ti pemadu manah.

 Indu
Enti pia awakka wain nya rarat terus ngagai ambai aku, rarat ngagai mulut enggau ngeli iya.
10 Aku endang enggi ambai aku, lalu iya endang inginka aku.
11 Datai kitu meh nuan O sulu aku. Aram tua mupuk ngagai menua pesisir lalu bemalam ba sebelah genturung pendiau.
12 Tua deka dani tumu pagi lalu meresa batang anggur, deka meda enti sida udah belabuh bekantuk deka meda enti bungai anggur udah ngerembai lalu kayu
delima udah bebungai. Dia ila baru aku deka ngayanka pengerindu aku ke nuan.
13 Nuan ulih ensium bau jayau, lalu semua buah ti manah bisi semak mua pintu tua. O wai sulu, aku udah nyimpan ke nuan pengerindu ti lama enggau pengerindu ti baru.
 
Bagi 8
1 Naka meh pemanah enti sema nuan tak menyadi lelaki aku, ti udah ditusuka indai aku. Nya baru, enti aku betemu enggau nuan ba jalai raya, aku ulih nyium nuan, lalu nadai orang deka ibuhka nya.
2 Aku deka mai nuan ngagai rumah indai aku, alai nuan tau ngajar aku pasal pengerindu. Aku deka meri ngagai nuan wain ti udah dirempah, wain ti digaga ari buah delima, ngambika bisi diirup nuan.
3 Jari kiba nuan di baruh pala aku, lalu jari kanan nuan murus aku.
4 Besemaya meh kita enggau aku, kita indu Jerusalem, madahka diri enggai ngachau lebuh kami duai benung rinduka ngan diri.
 
Lagu Ti Keenam

Ku Bala Indu
5 Sapa orang nya ke datai ari menua puang, bepegai jari enggau ambai iya?

Ku Indu
Aku ngerak nuan di baruh pun kayu epal, ba endur alai nuan ke ada.
6 Anang rinduka orang bukai tang semina siku aku aja. Anang merap orang bukai, tang semina aku siku aja. Pengerindu endang bekuasa baka pemati. Pengingin bekuasa baka pemati. Iya mau lalu ngangus baka daun api.
7 Ai enda ulih madamka iya. Ai bah enda ulih ngelamun iya. Tang enti orang nguji meli pengerindu ngena pengaya sida, sida deka dikeleseka orang.

Ku Menyadi Lelaki Indu Nya
8 Kami bisi siku menyadi indu ke agi biak, ti agi mit tusu. Kati ku kami enggau iya lebuh orang ke bujang datai ngagai iya?
9 Enti sema iya nya dinding kami deka ngaga ke iya siti menara ari pirak. Tang enti sema iya nya pintu ti besai, kami deka nyaga iya ngena papan kayu sidar.

Ku Indu
10 Aku tu dinding, lalu tusu aku menara iya. Ambai aku nemu, lebuh aku begulai enggau iya aku puas ati sereta bisi pemaik.

Ku Lelaki
11 Solomon bisi sebidang kebun anggur ba endur siti ti dikumbai Baal Hamon. Bala orang bumai nyua kebun nya ari iya. Genap iku sida mayar seribu singkap duit pirak.
12 Solomon nerima seribu singkap duit iya, lalu bala orang bumai bulih dua ratus singkap nyadika ungkup sida. Aku endang bisi kebun anggur aku empu!
13 Awakka aku ninga munyi nyawa nuan ari kebun nya, O ambai. Bala pangan aku nganti, keran deka ninga nuan bejaku.

Ku Indu
14 Datai ngagai aku, O ambai, baka kijang, baka anak rusa lelaki ba bukit ti endur alai kayu rempah tumbuh.