JAKU-DALAM
 
Jaku Pemuka
Bup  Jaku-dalam* ngundan ajar pasal jalai pendiau enggau ajar pasal pengarap. Ajar nya disebut ngena ‘jaku tuai’ enggau ‘jaku dalam.’ Bup tu tebal agi ngenang pasal utai ti diguna kitai dalam pengidup kitai tiap hari. Bup tu ngasuh kitai ngingatka siti ajar ti munyi tu: “Enti kitai deka bulih penemu, kitai enda tau enda dulu nangika TUHAN.” Udah nya bup tu lalu nginsit ngagai pekara pasal pengarap enggau pasal jalai pendiau, enggau ngagai penemu berunding, enggau ngagai pasal ulah ti manah. Mayuh ‘jaku tuai’ ti disebut ditu mandangka penalam runding bala pengajar orang Israel ke dulu kelia ba pasal utai ti patut dikereja kitai. Sekeda ‘jaku tuai’ nya ngajar pasal ngaduka kaul dalam ruang bilik, iya ti bukai nyebut pasal pengawa dagang, sekeda pasal adat basa lebuh kitai begulai enggau pangan diri, lalu sekeda pasal pemesai guna nagang pengingin diri. Bup tu mega meri mayuh bengkah ajar ba pasal pemaruh ati, pengeliat ati, bebasaka orang ke seranta, enggau pasal taluk ngagai pangan diri.
 
Isi Bup Tu
 Muji penemu-dalam (1.1-9.18)
Jaku-dalam ti disebut Solomon (10.1-29.27)
Jaku Agur (30.1-33)
‘Jaku tuai’ ti bukai (31.1-31)
 
Bagi 1
Guna Jaku-dalam
1 Jaku-dalam Solomon, anak David, raja menua Israel.
2 Tu jaku-dalam ti ulih nulung kita ngelala penemu-dalam enggau jaku lalau ti manah, sereta meretika ‘jaku tuai’ ti ngundan reti ti dalam.
3 Jaku-dalam tu ulih ngajar kita pemintar idup, enggau jalai idup ngena ati ti betul, lurus sereta patut.
4 Jaku-dalam tu ulih ngasuh orang ke kurang peneleba, bulih pemintar, sereta ngajar orang ke biak chakah ngereja pengawa.
5 Jaku-dalam tu tau nambahka penemu orang ke endang bepenemu-dalam, lalu ngelalau orang ke bepelajar,
6 ngambika sida ulih nemu reti utai ti dilalaika jaku-dalam, enggau pekara ti dibantaika orang ke bepenemu-dalam.
 
Jaku Lalau Ke Orang Ke Biak
7  Nangika TUHAN nya pun penemu; orang ke beli ngeleseka penemu-dalam lalu enggai belajar.
8 Anak, dingaka utai ti dipadahka apai indai nuan.
9 Ajar ti diberi sida deka ngasuh perangai nuan manah agi, baka labung ti manah, tauka baka tenggak ti ngasuh gamal nuan sigat.
10 Anak, lebuh orang ke bedosa nipu nuan, anang nurutka sida.
11 Enti sema sida bejaku munyi tu, “Aram kitai ngiga orang ngambika bisi dibunuh kitai! Aram kitai ngamuk orang ke nadai penyalah, kena kitai ngelantangka diri!
12 Sida nyangka idup sereta bepengerai, lebuh kitai tetemuka sida, tang sida deka mati lebuh kitai udah ngamuk sida!
13 Kitai deka tetemuka mayuh macham pengaya, lalu ngisi rumah kitai enggau perapasan!
14 Aram mupuk enggau kami lalu bebagika utai ti ulih kitai enchuri.”
15 Anak, anang nitihka orang ke baka nya. Anang begulai enggau sida.
16 Sida enda tan nganti diri ti ngereja penyai. Sida endang seruran sedia deka munuh orang.
17 Nadai guna nuan nan pukat lebuh burung ti deka ditangkap nuan nengkilaka nuan,
18 tang orang ke baka nya semina nan panjuk kena nyintak diri empu, panjuk ti deka munuh sida.
19 Pengawa ngerumpak endang selalu ngambi nyawa perumpak nya empu. Nya meh utai ti nyadi ba orang ke idup ngena chara ti kasar.
 
Penemu-dalam Ngangau
20 Dinga! Penemu-dalam benung ngangau ba sebelah jalai raya enggau ba sebelah pasar,
21 ngangau ngena nyawa ti inggar ari pintu nengeri, enggau ari sebarang endur alai orang begempuru.
22 “Kita tu beli! Ni pengelama kita agi beli? Ni pengelama kita agi majak ngelese lalu begedika penemu?
23 Pendingka aku, lebuh aku nganu kita. Aku deka meri kita jaku lalau ti manah, lalu bekunsika penemu aku enggau kita.
24 Aku udah bebendar ngangauka kita, minta kita datai, tang kita enggai mending. Kita enggai mendingka aku.
25 Kita enggai mendingka semua jaku lalau aku, lalu enda kala ngelakka aku nunjukka jalai ti ngena ngagai kita.
26 Nya alai, lebuh kita dituntung penusah, aku deka ketawaka kita. Aku deka ngeleseka kita lebuh kita dituntung utai ti balat ngenakutka kita,
27 lebuh iya datai baka biaubalai, lalu kita natka diri pedis sereta merinsa.
28 Nya baru kita deka ngangauka penemu-dalam, tang aku enggai nyaut. Kita nyangka begigaka aku di semua endur, tang kita enda tetemuka aku.
29 Kita nadai kala begunaka penemu, lalu kita seruran enggai ngasika TUHAN.
30 Kita nadai kala begunaka jaku lalau aku, tauka mendingka aku lebuh aku madahka penyalah kita.
31 Nya alai, kita deka nerima utai ti endang patut diterima kita, lalu utai ti dikereja kita empu deka ngasuh kita sakit.
32 Orang ke nadai peneleba, mati, laban sida nulak penemu-dalam. Orang ke beli dirusak, laban sida enggai kiruh.
33 Tang barang sapa mendingka aku, deka bulih pengelikun. Iya deka diau likun, lalu nadai kebuah takut.”
 
Bagi 2
Upah Penemu-dalam
1 Anak, pelajarka utai ti diajar aku ngagai nuan, lalu anang enda ingatka utai ti diasuh aku kereja nuan.
2 Pendingka penemu-dalam lalu uji meratika utai nya.
3 Pinta meh penemu. Pinta meh runding ti dalam.
4 Giga iya enggau naka ulih nuan baka ke ngiga pirak tauka pengaya ti dilalaika.
5 Nya baru nuan deka nemu reti nangika TUHAN, lalu nuan deka mujur belajarka pasal Allah Taala.
6 Penemu-dalam nya utai ti diberi TUHAN. Penemu enggau pemereti ati endang datai ari Iya.
7 Iya nulung sereta nyaga orang ke lurus sereta betul ati.
8 Iya nyaga orang ke manah enggau orang bukai, lalu nyaga orang ke angkunka Iya.
9 Enti nuan mendingka aku, nuan deka nemu utai ti ngena, lurus sereta betul. Nuan deka nemu utai ti patut dikereja nuan.
10 Nuan deka nyadi orang ke bepenemu-dalam, lalu penemu nuan deka ngasuh ati nuan gaga.
11 Pemintar runding enggau pemereti ati nuan deka nyaga nuan,
12 nagang nuan ngereja utai ti salah. Sida deka ngejangka nuan jauh ari orang ke numbuhka pengachau ngena utai ti disebut sida,
13 iya nya, sida ke udah ngelengkaka pengidup ti lurus, lalu diau dalam pemetang,
14 ke ngelantangka diri ngereja utai ti salah, lalu gaga ati ngereja penyai,
15 orang ke enda tetap ati sereta enda tau dikarapka.
16 Nuan ulih nulak indu ke kamah ulah, ke nguji ngulihka nuan ngena jaku ti manis,
17 indu ke enda tetap ati ngagai laki diri, sereta enda ingatka semaya ti kudus ti udah digaga iya.
18 Enti nuan mansang ngagai rumah indu nya, nuan niti jalai ti nuju ngagai pemati. Enti nuan mansang kia, nuan mansang ngagai dunya pemati.
19 Orang ke nemuai ngagai iya enda ulih pulai agi. Orang nya enda ulih pulai agi ngagai jalai ti nuju ngagai pengidup.
20 Nya alai nuan enda tau enda beteladan ba orang ke menyana, lalu diau lurus.
21 Orang ke lurus, orang ke rentang ati, deka diau di menua kitai.
22 Tang Allah Taala deka muai orang ke jai ari menua tu, lalu nyabut orang ke bedosa ari menua tu baka ke nyabut rumput ari tanah.
 
Bagi 3
Jaku Lalau Ke Sida Ke Biak
1 Anak, anang enda ingatka utai ti diajar aku ngagai nuan. Seruran kingatka utai ti diasuh aku kereja nuan.
2 Jaku ajar ti diberi aku deka ngasuh nuan gayu-guru sereta nyadi kaya-raja.
3 Anang ngelengkaka penaluk enggau penetap ati nuan. Tanchangka sida ba rekung nuan. Tuliska sida ba ati nuan.
4 Nya baru Allah Taala enggau mensia deka rinduka nuan.
5 Panggaika diri ba TUHAN enggau pengabis ati nuan. Anang manggaika diri ba penemu diri empu.
6 Awakka TUHAN seruran ngiring nuan, nya baru Iya deka nunjukka jalai ti ngena ngagai nuan.
7 Anang ngumbai diri pintar. Nangika TUHAN, lalu anang ngereja penyai.
8 Nya baru Iya deka nyadi baka ubat ti manah, ti ngeraika telih nuan, lalu ngasuh nuan kurang agi pedis.
9 Kemesaika TUHAN ngena piring ti pemadu manah ari asil umai nuan,
10 nya baru bilik setor nuan deka penuh laban gandum, lalu nuan deka bulih wain lebih ari ti ulih disimpan nuan.
11 Anak, lebuh TUHAN madahka penyalah nuan, dingaka Iya enggau manah, lalu ambi jaku Iya nyadika jaku tangkan.
12  Allah Taala madahka penyalah orang ke dikerinduka Iya, baka apai indai ke madahka penyalah anak ke dikemegahka sida.
13 Beberekat meh orang ke nyadi orang ke bepenemu-dalam, ke nemu meretika utai.
14 Penguntung ari nya besai agi ari penguntung bulih pirak. Utai nya berega agi ari emas.
15 Penemu-dalam berega agi ari batu ti berega. Nadai utai ti dikinginka nuan ulih dibandingka enggau nya.
16 Penemu-dalam meri nuan umur ti panjai, pengaya enggau basa.
17 Penemu-dalam tau ngasuh pendiau nuan lantang sereta likun seumur idup.
18 Orang ke bepegai erat ba penemu-dalam deka diau lantang senang. Penemu-dalam deka meri sida pengidup.
19 TUHAN ngaga dunya ngena penemu-dalam. Ngena penemu Iya, Iya ngengkahka langit ba endur iya.
20 Penemu-dalam ti dikembuan TUHAN ngasuh ai sungai rarat lalu ngasuh mua hari meri ai ujan ngagai tanah.
21 Anak, bepegai erat ba penemu-dalam enggau ba penalam runding nuan. Anang nejuka sida ninggalka nuan.
22 Sida deka meri nuan pengidup, pengidup ti nyamai sereta lantang.
23 Nuan ulih bejalai enggau likun lalu enda tesangkut.
24 Nuan enda takut lebuh nuan deka tinduk, lalu nuan deka tinduk jenak sepemanjai malam.
25 Nuan enda ibuh irau ati ke penusah besai ti datai enggau ngenyit baka kabut ti nuntung orang ke jai.
26 TUHAN deka nyaga nuan likun. Iya enggai nejuka nuan disintak panjuk.
27 Enggau naka ulih kereja utai ti manah ngagai orang ke begunaka utai nya.
28 Anang sekali-kali ngasuh orang ke berimbai pendiau enggau nuan, nganti ngagai pagila, enti nuan ulih nulung sida tekala nya.
29 Anang bekira deka ngereja utai ti tau ngemediska orang ke berimbai pendiau enggau nuan. Sida diau berimbai enggau nuan, laban sida arapka nuan.
30 Anang bekelikuh enggau nadai kebuah, enti orang nya nadai udah ngemediska nuan.
31 Anang ngining pemangah orang, lalu anang diau nitihka jalai iya,
32 laban TUHAN begedika orang ke ngereja penyai, tang Iya ngaga orang ke lurus nyadika pangan Iya.
33 TUHAN nyumpah ruang bilik orang ke jai, tang merekatka ruang bilik orang ke lurus.
34 Iya enda begunaka orang ke sumbung, tang Iya rinduka orang ke baruh ati.
35 Orang ke bepenemu-dalam deka dibasa orang, tang orang ke beli deka semina nambahka pemalu diri.
 
Bagi 4
Penguntung Ngembuan Penemu-dalam
1 Anak, pendingka jaku ajar apai nuan. Pendingka ajar nya, nya baru nuan deka nyadi orang ke mereti.
2 Utai ti diajar aku ngagai nuan endang utai ti manah. Nya alai kingatka semua utai nya.
3 Lebuh aku agi mit, lalu aku anak tunggal apai aku,
4 iya selalu ngajar aku. Ku iya, “Kingatka utai ti disebut aku, lalu anang enda ingatka utai nya. Kereja utai ti diasuh aku, ngambika nuan idup.
5 Giga penemu-dalam enggau runding ti dalam! Anang enda ingat tauka enda mendingka utai ti disebut aku.
6 Anang ngelengkaka penemu-dalam. Nya baru iya deka nyaga nuan. Rinduka iya, nya baru iya deka ngintu nuan enggau likun.
7 Begigaka penemu-dalam nya utai ti pemadu beguna ti tau dikereja nuan. Enti nuan ngiga utai, giga runding ti dalam.
8 Rinduka penemu-dalam, nya baru iya deka ngemesaika nuan. Berap iya,  nya baru orang deka masa nuan.
9 Iya deka nyadi makota ti bemulia ke nuan.”
10 Pendingka aku, anak. Peratika enggau manah utai ti dipadahka aku ngagai nuan, nya baru nuan deka panjai umur.
11 Aku udah ngajar nuan penemu-dalam, enggau jalai ti ngena, kena nuan idup.
12 Nadai utai deka mempang nuan, enti nuan belalau ba penemu-dalam, lalu nuan enda tesangkut lebuh nuan belanda.
13 Seruran kingatka utai ti udah dipelajarka nuan. Pelajar nuan nyadika pengidup nuan - jaga iya enggau manah.
14 Anang nitihka orang ke jai. Anang beteladan ba orang ke jai.
15 Anang ngereja nya! Kejangka diri jauh ari penyai! Tulak iya, lalu angkat ari nya.
16 Orang ke jai enda ulih tinduk enti sida enda dulu ngereja penyalah. Sida gali tang enda ulih tinduk, enti sida enda dulu ngemediska orang.
17 Ba sida, penyai enggau pemangah nya baka pemakai enggau utai ti diirup.
18 Jalai ti ditengah orang ke lurus nya baka penumbuh mata hari. Iya majak terang-seterang datai ke hari nyau siang.
19 Tang jalai ti ditengah orang ke jai nya petang baka malam. Sida teterap, tang enda nemu utai ti ngasuh sida tesangkut.
20 Anak, pendingka utai ti disebut aku. Pendingka leka jaku aku.
21 Anang nejuka sida lenyau ari nuan. Kingatka sida, lalu simpan sida dalam ati nuan.
22 Sida deka meri pengidup enggau pengerai ngagai barang sapa meretika sida.
23 Bejimat lebuh nuan berunding, laban gaya pengidup nuan ditempa runding nuan.
24 Anang sekali-kali nyebut utai ti bula. Anang bekaul enggau pemula, tauka enggau jaku ti nipu.
25 Perening terus ke mua enggau ati ti kempang sereta betul, lalu anang malu lalu kunduk-kunduk ngapa.
26 Perambu enggau silik utai ti deka dikereja nuan, nya baru utai ti dikereja nuan deka mujur.
27 Seliahka penyai, lalu bejalai lurus nuju ke mua. Anang sekali-kali limpang ari jalai ti ngena.
 
Bagi 5
Jaku Tangkan Nagang Orang Butang
1 Anak, perati sereta pendingka penemu-dalam enggau runding ti dalam ti diberi aku.
2 Nya baru nuan deka nemu chara ngatur ulah diri enggau menyana, lalu jaku nuan deka mandangka nuan bisi penemu.
3 Mulut bini orang bukai nyangka manis baka ai manyi, lalu sium iya nyangka lichin baka minyak kana,
4 tang lebuh utai nya udah lepas, iya nadai ninggalka utai bukai tang semina ati ti begedi enggau pemerinsa.
5 Iya deka mai nuan nurun ngagai dunya pemati. Jalai ti ditengah iya nuju ngagai pemati.
6 Iya enda niti jalai pengidup, tang limpang, lalu iya enda nemu utai ti nyadi.
7 Nya alai pendingka aku, kita ke anak lelaki, lalu anang enda ingatka utai ti disebut aku.
8 Kejangka diri jauh ari indu ke baka nya! Datai semak ngagai mua pintu iya deh kita enda tau!
9 Enti kita datai semak ngagai indu ke baka nya, kita enda dibasa orang agi lalu kita deka mati biak dibunuh orang ke nadai pengasih.
10 Orang kampar deka ngerampas semua pengaya kita, lalu utai ti udah ulih kita deka diempu orang bukai.
11 Kita deka gali bedemuh nganti diri ke mati. Isi enggau gumpal isi kita deka lupis,
12 lalu kita deka bejaku munyi tu, “Nama kebuah aku enggai diajar? Nama kebuah aku enggai nejuka orang madahka aku salah?
13 Aku enggai mendingka bala pengajar aku. Aku enggai mendingka sida.
14 Lalu aku tekala nya nemu diri kena pechat di mua orang mayuh.”
15 Irup ai ari telaga nuan empu, ai ti rarat ari letung nuan empu.
16 Kati mata ai nuan patut diachirka ngagai menua bukai, lalu ai sungai nuan rarat ba sebelah jalai raya?
17 Awakka sida diempu nuan siku aja, lalu ukai dipekunsika nuan enggau orang kampar.
18 Nya alai nuan patut lantang ati diau enggau bini ke enggau nuan jadi,
19 ti bajik sereta imun baka rusa. Awakka pemajik iya ngasuh nuan lantang. Awakka iya nyerayung nuan ngena pengerindu.
20 Anak, nama kebuah nuan rinduka indu bukai? Nama kebuah nuan inginka pemajik bini orang bukai?
21 TUHAN meda semua utai ti dikereja nuan. Iya meda nuan di sebarang endur nuan bejalai.
22 Dosa orang ke jai nyadi panjuk. Sida disintak jarin dosa sida empu.
23 Sida mati laban sida enda nemu nagang diri. Pemeli sida empu ti munuh sida.
 
Bagi 6
 Jaku Tangkan Ti Bukai
1 Anak, kati nuan bisi udah besemaya deka betanggungjawapka utang orang bukai?
2 Kati nuan bisi udah kala kena sintak jaku nuan empu, tauka disintak semaya nuan empu?
3 Anak, enti nuan udah kala, nuan dipanjuk kuasa orang nya, tang tu jalai nuan mansutka diri ari nya: mansang nuan enggau jampat ngagai orang nya lalu minta iya ngelepaska nuan.
4 Anang tinduk, tauka ngetu lalu belelak.
5 Lepaska diri ari panjuk nya, baka burung tauka rusa ti rari ari orang ke ngasu.
6 Orang ke ngelusu patut beratika chara semut idup.
7 Sida nadai kepala, nadai pengulu, nadai raja,
8 tang sida besimpanka pemakai lebuh musin panas, nyendiaka bekal nyadika penabat musin chelap.
9 Ni pengelama orang ke ngelusu deka majak gali? Kemaya iya deka angkat?
10 Ku iya bejaku, “Aku deka tinduk enda lama. Aku deka bekerendut dada lalu belelak enda lama.”
11 Tang lebuh iya tinduk, penyeranta datai nyerang iya, baka perumpak ke besenyata.
12 Orang ke nadai guna, orang ke jai, bejalai segau-segau nusui pemula.
13 Sida ngichekka mata, lalu ngaga tanda ngagai pangan diri deka nipu nuan.
14 Sekumbang sida ke ngereja nya, sida berunding deka ngereja penyai, nyungkak pengachau nyadi di semua endur.
15 Ketegal nya, penusah ti besai deka nuntung sida lebuh sida enda ngadang, lalu sida deka bakal lalu mati.
 
Utai Ti Dipegedika TUHAN
16-19 Tu tujuh bengkah utai ti dipegedika TUHAN, ti enda ulih ditatka Iya: pendiau ti sumbung, dilah ti bula, jari ti munuh orang ke nadai penyalah, ati ti berundingka akal ti jai, kaki ti beguai bejalaika ngereja penyai, orang ke seruran besaksi bula enggau orang ke nyungkak pengachau nyadi entara pangan.
 
Jaku Tangkan Pasal Butang
20 Anak, kereja utai ti diasuh apai nuan, lalu anang enda ingatka utai ti udah diajar indai nuan.
21 Kingatka jaku seduai iya dalam ati nuan.
22 Jaku ajar seduai iya deka nguluka nuan lebuh nuan bejalai, nyaga nuan lebuh malam hari, lalu meri nuan jaku lalau lebuh siang hari.
23 Atur ti diberi seduai iya nya penampak ti manchar. Jaku rara seduai iya ulih ngajar nuan jalai pengidup.
24 Jaku nya ulih nyaga nuan ari indu ke jai, ari jaku ti manis ti disebut bini orang bukai.
25 Anang alah diuji pemajik sida. Anang alah dipanjuk jeling mata sida.
26 Lelaki ulih meli indu sundal ngena setuku roti, tang pengawa butang deka ngabiska semua reta iya.
27 Kati nuan ulih merap bara api, lalu gari nuan enda angus?
28 Kati nuan ulih bejalai ngindik bara api, lalu kaki nuan enda betu?
29 Baka nya meh pemesai penusah enti nuan tinduk enggau bini orang. Barang sapa ngereja nya, deka dituntung penusah.
30 Orang enda mechat penchuri ke lapar enti iya ngenchuri pemakai.
31 Tang enti iya kena tangkap, iya enda tau enda mayar tujuh kali lipat utai ti dichuri iya, lalu iya enda tau enda nyerahka semua reta tengkira iya.
32 Tang lelaki ke butang endang sigi enda nemu berunding. Iya semina ngerusak diri empu.
33 Iya enda dibasa agi, lalu iya deka dipalu, lalu dipechat belama iya.
34 Laki pengabis udu ringat lebuh iya ninding, lalu iya malas enggau nadai besekat.
35 Iya enggai nerima bayar. Ngemayuh ni pen utai diberi ngagai iya, enggai meh iya badu ringat.
 
Bagi 7
1 Anak, kingatka utai ti disebut aku, lalu anang enda ingatka utai ti diasuh aku kereja nuan.
2 Kereja utai ti diasuh aku, nya baru nuan deka idup. Titihka ajar aku enggau naka penyimat, baka nuan ke bejimat nyaga mata nuan.
3 Seruran kingatka ajar aku. Tuliska iya dalam ati nuan.
4 Gaga penemu-dalam nyadika menyadi indu nuan, lalu gaga runding ti dalam nyadika pangan nuan ti pemadu nyempil.
5 Penemu-dalam enggau runding ti dalam deka ngejangka nuan jauh ari bini orang, ari indu ke nguji ngulihka nuan ngena jaku ti manis.
 
Indu Ke Kamah
6 Nyadi sekali lebuh aku nilik ari mua jenila rumah aku,
7 aku tepedaka bala orang bujang ke apin bisi peneleba, lalu aku meda siku ari bala sida nya beli.
8 Iya bejalai ba jalai raya semak sukut ti alai siku indu diau. Iya bejalai mansa rumah indu nya
9 lebuh lemai hari, lebuh hari nyau udah petang.
10 Indu nya lalu betemu enggau iya. Indu nya ngena pekayan baka indu sundal ke nganta.
11 Indu nya berani sereta enda nemu malu, lalu iya endang seruran bejalai nengah jalai raya
12 tauka bediri nganti ba sukut jalai, kadang-kadang ba jalai raya, kadang-kadang di pasar.
13 Indu nya lalu engkauk orang bujang nya, nyium iya. Seduai iya merening ngagai mua pangan diri, lalu ku iya bejaku,
14 “Aku udah ngenjuk piring sehari tu tadi, lalu aku bisi dagin ari piring nya.
15 Nya kebuah aku pansut ngiga nuan. Aku endang keran deka ngiga nuan, lalu diatu nuan bisi ditu!
16 Aku udah mungkur peninduk aku ngena kain linin ti bechura, ti dibeli ari menua Ejip.
17 Aku udah ngerabu peninduk aku enggau mur, garu, enggau kulit kayu manis.
18 Aram tua beleman semalam-malam tu. Tua deka gaga ati ngimbit pangan diri.
19 Laki aku nadai di rumah, laban iya udah bejalai.
20 Iya mai mayuh duit lebuh iya mupuk, lalu iya enda pulai dalam kandang dua minggu tu.”
21 Nya alai indu nya nguji ngulihka lelaki nya ngena pemajik iya, lalu lelaki nya alah laban pemanis jaku indu nya.
22 Lelaki nya lalu tekala nya nyadi baka sapi ti lelaki ti deka disayat, baka rusa ti nempuh jarin.
23 Laja deka ngebuska tungkul ati iya. Iya baka burung ti terebai nuju jarin - iya enda nemu diri deka tetempuhka utai ti tau nganu nyawa.
24 Nya alai, kita ke anak, pendingka aku. Pendingka utai ti disebut aku.
25 Anang nejuka indu ke baka nya ngulihka kita. Anang segau-segau begigaka iya.
26 Mayuh lelaki udah rusak laban iya, lalu iya udah ngasuh mayuh lelaki mati, datai ke pemayuh sida nyau enda ulih diitung agi.
27 Enti kita mansang ngagai rumah iya, kita niti jalai ti nuju ngagai dunya pemati. Nya meh jalai ti muntang ngagai pemati.
 
Bagi 8
Muji Penemu-dalam
1 Pendingka ulih kita! Penemu-dalam benung ngangauka kita. Sara-penemu minta diri didinga kita.
2 Iya bediri ba tuchung bukit semak jalai raya enggau ba simpang jalai raya.
3 Iya ngangau ari penama ngagai nengeri, ngimbai pintu ti besai.
4 Ku iya, “Aku ngangauka semua kita. Aku ngangauka semua orang di dunya.
5 Kati kita agi muda penemu? Awakka kita belajar ngansah penemu diri. Enti kita beli, awakka kita ngiga penemu.
6 Pendingka jaku aku ti pemadu manah tu. Semua utai ti dipadahka aku ngagai kita, endang ngena magang.
7 Utai ti disebut aku, endang utai ti bendar. Aku begedika pemula.
8 Semua utai ti disebut aku, endang amat magang. Utai nya nadai bula siti, tauka nipu.
9 Ba orang ke bisi runding ti dalam, semua utai nya terang magang. Ba orang ke nemu mayuh leman utai, semua utai nya endang nyata magang.
10 Pilih atur ti diberi aku, ukai milih pirak. Pilih penemu, ukai milih emas ti pemadu manah.
11 “Aku tu Penemu-dalam. Aku tu manah agi ari batu ti berega. Nadai utai ti dikinginka nuan ulih dibandingka enggau aku.
12 Aku tu Penemu-dalam, lalu aku bisi runding ti dalam. Aku bisi penemu, lalu aku meri atur ti menyana.
13 Reti nangika TUHAN nya begedika penyai. Aku begedika penyumbung, ati ti tinggi, ulah ti jai enggau jaku ti bula.
14 Aku ngaga pelan lalu bejalaika pelan nya. Aku meretika utai, lalu aku kering.
15 Aku tu ke nulung bala raja merintah, lalu nulung bala pemerintah ngaga adat ti manah.
16 Genap iku pemerintah di dunya tu endang merintah ari tulung aku, lalu baka nya mega bala pemesai enggau orang ke tinggi pangkat.
17 Aku rinduka orang ke rinduka aku. Barang sapa begigaka aku, deka tetemuka aku.
18 Aku bisi pengaya enggau basa pengaya enggau pemujur ti deka diberi.
19 Utai ti ulih kita ari aku manah agi ari emas ti pemadu manah, manah agi ari pirak ti pemadu tulin.
20 Aku bejalai nengah pengelurus. Aku nitihka atur ti lurus,
21 meri pengaya ngagai orang ke rinduka aku, ngemenuhka rumah sida enggau pengaya.
22  “Aku tu ti pengabis dulu digaga TUHAN, ke terubah pengawa ti dikereja Iya dulu kelia.
23 Aku endang digaga ba pun kelia, ke terubah iya digaga, sebedau dunya nyadi.
24 Aku endang udah ada sebedau tasik bisi, sebedau mata ai bisi.
25 Aku endang udah ada sebedau bukit digaga, sebedau munggu diengkahka ba endur sida,
26 sebedau Allah Taala ngaga dunya enggau padang iya, sebedau tanah bisi.
27  Aku endang udah bisi dia lebuh Iya ngengkahka langit ba endur iya, lebuh Iya mintarka langit atas tasik,
28 lebuh Iya ngengkahka mua hari di langit, lebuh Iya muka mata ai di tasik
29 lalu ngasuh ai tasik niki enda ngelui ikas ti diletak Iya. Aku endang udah bisi dia lebuh Iya nanam pugu dunya.
30 Aku bisi ngimbai Iya baka orang ke landik ngaga pelan rumah, aku tu ke ngasuh ati Iya gaga tiap hari, lalu aku seruran lantang ati begulai enggau Iya,
31 lantang ati ke dunya sereta gaga ati ke mensia.
32 “Nya alai, kita ke agi biak, pendingka aku. Kereja utai ti diasuh aku, nya baru kita deka lantang diau.
33 Pendingka utai ti diajar ngagai kita. Diau ngena pemintar. Anang enggai begunaka iya.
34 Orang ke mendingka aku, deka idup lantang, orang ke diau ba mua pintu aku tiap hari, ke nganti ba penama ngagai rumah aku.
35 Orang ke tetemuka aku, tetemuka pengidup, lalu TUHAN deka gaga ati ke sida.
36 Orang ke enda tetemuka aku, ngemediska diri empu. Semua orang ke begedika aku, rinduka pemati.”
 
Bagi 9
Penemu-dalam Enggau Pemeli
1 Penemu-dalam udah ngaga rumah iya, lalu ngaga tujuh batang tiang ti besai dalam rumah nya.
2 Iya udah ngasuh orang munuh siku jelu kena ngintu pengerami makai besai, nyampurka rempah dalam wain, lalu ngatur pemakai ba mija.
3 Iya udah ngasuh bala orang gaji ti indu ngangau ari endur ti pemadu tinggi dalam nengeri nya:
4 “Tama meh kita ke nadai nemu utai!” Lalu ngagai sida ke beli, iya nyebut,
5 “Datai kitu, empa pemakai aku, lalu irup wain ti udah dichampur aku.
6 Lengkaka pemeli nuan, lalu idup. Titi jalai penemu.”
7 Enti nuan ngajar orang ke ngemesaika diri, nuan semina minta diri dipechat. Enti nuan nganu orang ke jai, nuan semina ngemediska diri.
8 Anang sekali-kali ngajar orang ke ngemesaika diri. Sida deka begedika nuan ketegal nya. Tang enti nuan ngajar orang ke bepenemu-dalam, sida deka masa nuan.
9 Enti nuan ngajar orang ke bepenemu-dalam, iya deka lebih agi bepenemu-dalam. Enti nuan ngajar orang ke lurus, penemu iya deka nambah.
10 Nangika TUHAN nya pun penemu-dalam. Enti nuan nemu Iya ti Kudus, nuan ulih meretika utai.
11 Penemu-dalam deka ngasuh nuan panjai umur.
12 Nuan empu deka untung enti nuan bepenemu-dalam, lalu enti nuan nulak iya, nuan deka merinsa.
13 Pemeli endang baka indu ke ragak, ke nadai nemu utai, sereta enda nemu malu.
14 Iya duduk ba mua pintu rumah iya, tauka ba penuduk ba endur ti pemadu tinggi dalam nengeri nya,
15 lalu ngangauka orang ke mansa, ke benung ngereja pengawa sida:
16 “Tama meh kita ke nadai nemu utai!” Ku iya ngangauka sida ke beli,
17 “Ai ti dichuri berasai manis agi. Roti ti dichuri berasai nyamai agi.”
18 Orang ke ditipu iya enda nemu diri mati lebuh sida tama ngagai rumah iya, lalu orang ke udah tama ngagai rumah nya, diatu diau dalam dunya pemati.
 
Bagi 10
Jaku-dalam Ti Disebut Solomon
1 Tu jaku-dalam ti disebut Solomon: Anak ti bepenemu-dalam ngelantangka apai iya. Tang anak ti beli ngenusahka indai iya.
2 Pengaya ti ulih nuan ngena chara ti jai,  nadai mai penguntung ngagai nuan,  tang ati ti betul ulih ngelepaska nuan ari pemati.
3 TUHAN enggai nejuka orang ke lurus lapar,  tang Iya deka nagang orang ke jai bulih utai ti dikinginka sida.
4 Orang ke ngelusu deka diau seranta,  tang orang ke bagas, deka nyadi kaya.
5 Anak ti pintar ngetau lebuh musin panas,  tang anak ke tinduk lebuh maya ngetau, mai pemalu.
6 Orang ke lurus deka nerima berekat,  tang mulut orang ke jai ngelalaika pemangah sida.
7 Orang ke lurus deka dikingatka nyadi berekat,  tang nama orang ke jai enda dikingatka agi.
8 Orang ke mereti deka ngasika pesan,  tang orang ke beli ke kutap-kutap ngapa, deka rusak.
9 Orang ke lurus ati, diau likun,  tang orang ke enda betul ati deka ditemu.
10 Orang ke ngichekka mata, nyungkak pengachau nyadi,  tang orang ke berani ngerara penyalah, mai pemaik.
11 Jaku orang ke lurus nyadika pun pengidup,  tang jaku orang ke jai ngelalaika pemangah sida.
12 Ati ti begedi nyungkak pengachau nyadi,  tang pengerindu ngelamun semua penyalah.
13 Penemu ti dalam ditemu ba mulut orang ke mereti,  tang orang ke beli deka disipat.
14 Orang ke bepenemu-dalam nugungka penemu,  tang orang ke beli, ke bejaku kutap-kutap mai pengerusak datai semak.
15 Pengaya nyaga orang ke kaya,  tang penyeranta ngerusak orang ke miskin.
16 Upah orang ke lurus nya pengidup, tang upah orang ke jai nya dosa.
17 Orang ke mendingka ajar, nuju ngagai pengidup,  tang orang ke enggai dirara, tesat.
18 Orang ke ngelalaika ati diri ti begedi, nya orang ke bula, lalu orang ke bejaku jai pasal orang bukai, nya orang ke beli.
19 Mayuh agi jaku disebut, mayuh agi penyalah, tang orang ke enda pejaku, nya orang ke pintar.
20 Jaku ti disebut orang ke lurus nya baka pirak ti tulin, tang runding orang ke jai, sigi nadai guna.
21 Jaku ti disebut orang ke lurus, mai penguntung ngagai mayuh orang,  tang orang ke beli mati laban pemeli diri.
22 Berekat ti diberi TUHAN, ngasuh kaya, lalu TUHAN nadai nambahka ati ti tusah enggau pengaya nya.
23 Orang ke beli rindu ngereja penyalah, baka ke bemain, tang orang ke mereti lantang ati ke ulah ti manah.
24 Utai ti diketakutka orang ke beli, deka nuntung iya, tang utai ti dikinginka orang ke lurus, deka diberi ngagai iya.
25 Lebuh biaubalai mansa, orang ke jai nadai agi,  tang orang ke lurus deka tan belama iya.
26 Baka asai chuka ti ba ngeli, enggau asap ba mata, baka nya mega orang ke ngelusu, ba orang ke ngasuh iya gawa.
27 Nangika TUHAN, ngasuh umur panjai, tang orang ke jai deka pandak umur.
28 Pengadang orang ke lurus, mai ngagai pengaga, tang utai ti diadang orang ke jai, deka puntan.
29 TUHAN nyadika kuta ke orang ke lurus, tang ngerusak orang ke ngereja penyai.
30 Orang ke lurus deka diau tegap,  tang orang ke jai enda diau di menua tu.
31 Jaku orang ke lurus mai penemu-dalam,  tang dilah ti nyebut utai ti jai, deka ditetak.
32 Orang ke lurus nemu utai ti patut disebut,  tang orang ke jai nyebut utai ti jai.
 
Bagi 11
1 TUHAN begedika orang ke ngena dachin ti enda betul, tang Iya lantang ati ke timbang ti betul.
2 Orang ke sumbung deka jampat dipechat. Enti nuan nemu ngemaruhka diri, nuan bepenemu-dalam.
3 Enti nuan orang ke menyana, nuan diiring ati ti betul. Orang ke enda tau dikarapka, dirusak ati sida ti enda betul.
4 Pengaya nadai pulai ke penguntung nuan lebuh nuan nyau deka mati, tang ati ti betul ulih ngelepaska nuan ari pemati.
5 Ati ti betul ngasuh orang ke menyana nyamai agi diau, tang orang ke jai deka ngasuh diri empu alah.
6 Pengelurus ngelepaska orang ke lurus ati, tang sida ke enda tau dikarapka, dipanjuk pengamu sida empu.
7 Lebuh orang ke jai mati, pengadang sida sama mati enggau sida. Pengadang ti dipanggaika ba pengaya, sigi nadai mai penguntung.
8 Orang ke lurus dilindung ari penusah, tang penusah nya deka ninggang orang ke jai.
9 Jaku orang ke enda nangika Allah Taala, tau ngerusak nuan, tang penemu-dalam ari orang ke lurus, ulih ngelepaska nuan.
10 Nengeri nyadi lantang lebuh orang ke lurus ati mujur ngereja pengawa, lalu orang manjung gaga ati lebuh orang ke jai mati.
11 Nengeri deka tampak nama lebuh orang ke lurus merekatka iya, tang jaku orang ke jai deka ngerusak nengeri nya.
12 Bejaku mechat orang nya pengawa ti beli. Enti nuan amat pintar, nuan enda bemunyi.
13 Orang ke chabul mulut enda tau dikarapka nyimpan resia, tang nuan tau ngarapka orang ke amat tau dikarapka.
14 Bansa deka alah enti iya nadai orang ngiring. Enti mayuh penyanding penemu, bansa deka diau likun.
15 Enti nuan besemaya deka mayar utang orang ke enda dikelala nuan, nuan deka ngesal ila. Manah agi nuan enda malut diri enggau pekara nya.
16 Indu ke nemu kasihka orang, patut dibasa, tang indu ke jai ulah, mai pemalu. Orang ke ngelusu enda tulihka duit,  tang orang ke bagas deka nyadi kaya.
17 Nuan nyamai diau enti nuan nelap. Enti nuan jai enggau orang, nuan semina ngemediska diri empu.
18 Orang ke jai nadai bulih utai, tang enti nuan ngereja utai ti ngena, nuan tetap deka diberi upah.
19 Barang sapa keras deka ngereja utai ti ngena, deka idup, tang barang sapa majak ngereja utai ti salah, deka mati.
20 TUHAN begedika orang ke jai runding, tang rinduka orang ke ngereja utai ti ngena.
21 Orang ke jai tetap deka diukum, tang orang ke lurus enda diukum.
22 Ba indu ke enda nemu berunding, pemajik nya baka tinchin emas ti ba junggur babi.
23 Utai ti dikinginka orang ke menyana, seruran mai penguntung. Lebuh orang ke jai bulih utai ti dikinginka sida, semua orang pedis ati magang.
24 Orang siku meri enggau ati ti gerah mudah, tang iya nyadi lebih agi kaya. Siku ti bukai rangka, tang seruran suntuk.
25 Orang ke meri enggau ati ti gerah mudah, deka nyadi kaya-raja. Orang ke nulung orang bukai, deka bulih tulung ari orang.
26 Orang nyumpah orang ke besimpanka gandum nganti rega gandum niki, tang orang muji orang ke nyual gandum.
27 Enti juluk ati nuan manah, nuan deka dibasa orang, tang enti nuan ngiga pengachau, nuan deka bulih pengachau.
28 Orang ke manggaika diri ba pengaya, deka labuh baka daun lebuh musin ruruh, tang orang ke lurus deka galak baka daun lebuh musin panas.
29 Orang ke ngenusahka diri sebilik, deka abis semua utai.
Orang ke beli deka seruran nyadi kuli orang ke pintar.
30 Pengelurus deka meri pengidup, tang pemangah  deka muai pengidup.
31  Orang ke menyana deka bulih upah di dunya tu. Nya alai kita patut nemu, orang ke jai sereta bedosa deka diukum.
 
Bagi 12
1 Orang ke rinduka penemu, minta orang ngajar sida. Kitai beli enti kitai pedis ati diajar.
2 TUHAN gaga ati ke orang ke menyana, tang Iya ngukum orang ke bekira deka ngereja penyai.
3 Penyai nadai meri pengelikun, tang orang ke lurus deka bediri tegap.
4 Bini ke menyana deka ngasuh laki iya temegah sereta gaga, tang bini ke ngasuh laki iya malu nya baka penyakit riman ti makai tulang.
5 Orang ke lurus ati deka manah enggau nuan, tang orang ke jai semina deka nipu nuan.
6 Jaku orang ke jai, tau munuh, tang jaku orang ke lurus, deka ngelepaska orang ke diemba orang.
7 Orang ke jai deka alah, lalu nadai ninggalka purih, tang orang ke lurus deka seruran bisi peturun.
8 Enti nuan nemu berunding, nuan deka kena puji, tang enti nuan beli, orang deka mechat nuan.
9 Manah agi nyadi orang ke sengapa-dia, ngulihka pengidup ke diri empu, ari ke ngaga diri tinggi pangkat, tang nadai utai diempa.
10 Orang ke menyana nemu ngintu jelu tupi sida, tang orang ke jai, merinsaka jelu tupi sida.
11 Orang bumai ke bagas, mayuh utai diempa, tang kitai beli enti kitai masau jam ngereja pengawa ti enda menuku.
12 Orang ke jai semina deka ngiga utai ti jai ti deka dikereja sida, tang orang ke lurus deka bediri tegap.
13 Orang ke jai dipanjuk jaku sida empu, tang orang ke lurus ati ulih ngelepaska diri ari penusah.
14 Upah nuan bepanggai ba utai ti disebut nuan, enggau ba utai ti dikereja nuan. Nuan deka bulih utai ti patut diberi ngagai nuan.
15 Orang ke beli seruran ngumbai diri ngena, tang orang ke pintar, mendingka jaku lalau.
16 Lebuh orang ke beli ringat, iya lalu tekala nya mandangka pengeringat iya, tang orang ke pintar, nadai ibuhka diri dipechat.
17 Lebuh nuan madahka utai ti amat, nuan ngereja pengelurus, tang pemula nadai mai nuan ngagai pengelurus.
18 Leka jaku ti disebut enggau enda berunding, ngasuh ati balat telih baka pedang, tang jaku ti disebut enggau bejimat, ulih nyuman.
19 Pemula enda ulih tan lama, tang utai ti bendar deka meruan belama iya.
20 Orang ke bekira deka ngereja penyai, deka tekenyit ati ke penyai diri, tang orang ke bekereja ngulihka pemanah, deka bulih pengelantang.
21 Orang ke lurus enda kena tinggang penusah, tang orang ke jai nadai bulih utai bukai, tang semina penusah aja.
22 TUHAN begedika orang ke bula, tang Iya gaga ati ke orang ke ngamatka semaya diri.
23 Orang ke pintar nadai kerah-kerah madahka penemu diri, tang orang ke beli ngayanka diri enda nemu utai.
24 Enti nuan bebendar bekereja, nuan deka bulih kuasa, tang enti nuan ngelusu, nuan nyadi ulun.
25 Pengirau ati nuan ulih muai pengelantang, tang jaku ti siru deka ngelantangka ati nuan.
26 Orang ke lurus ulih ngiring pangan iya, tang jalai orang ke jai deka mai sida limpang.
27 Enti nuan ngelusu, nuan nadai tulihka utai, tang enti nuan bebendar gawa, nuan deka bulih pengaya.
28 Pengelurus nya jalai ti nuju ngagai pengidup, tang penyai nya jalai ti nuju ngagai pemati.
 
Bagi 13
1 Anak mit ti pintar, nemu mending lebuh apai indai sida ngerara lalu ngajar sida, tang orang ke tinggi ati nadai kala ngaku diri salah.
2 Orang ke menyana, deka diupah ketegal utai ti disebut sida, tang orang ke penipu endang seruran ati deka mangah.
3 Bejimat nyebut utai, kena nyaga seput diri. Orang ke bejaku enggau enda berunding, ngerusak diri empu.
4 Baka ni pen pemalat orang ke ngelusu inginka utai, iya sigi enda tulihka utai nya, tang orang ke bagas deka bulih semua utai ti dikinginka iya.
5 Orang ke lurus ati, begedika pemula, tang jaku ti disebut orang ke jai, ngemaluka iya empu, lalu iya dipechat.
6 Pengelurus nyaga orang ke nadai penyalah, tang penyai ngasuh orang ke bedosa alah.
7 Sekeda orang pura-pura ngumbai diri kaya, tang nadai utai. Orang bukai pura-pura ngaga diri baka ke seranta, tang kaya.
8 Orang ke kaya enda tau enda ngena duit sida ngidupka nyawa diri, tang nadai orang ngemba orang ke seranta.
9 Orang ke lurus baka penampak ti manchar terang, tang orang ke jai baka api kelita ti kelap-kelap deka padam.
10 Ati ti tinggi semina mai ngagai penusah. Nuan amat pintar enti nuan nemu minta jaku lalau.
11 Enti nuan mudah bulih pengaya, jampat agi ga nuan deka ngelenyauka iya. Enti nuan mar ngulihka pengaya, mayuh agi ga pengaya deka ulih nuan.
12 Lebuh nuan nadai agi pengadang, ati nuan tusah, tang ati nuan gaga lebuh nuan bulih utai ti dikinginka nuan.
13 Enti nuan nulak jaku lalau ti manah, nuan minta penusah. Tang enti nuan nitihka jaku lalau nya, nuan likun.
14 Jaku ajar ari orang ke bepenemu-dalam, nya pun pengidup. Jaku ajar nya deka nulung nuan ngerarika diri lebuh nuan ditempuh utai ti tau nganu nyawa.
15 Orang ke pandai berunding deka bulih basa, tang orang ke enda tau dikarapka deka nuju terus ngagai pengerusak.
16 Orang ke nemu berunding endang selalu berunding dulu sebedau sida ngereja pengawa, tang orang ke beli ngayanka diri nadai nemu utai.
17 Seruan ti enda tau dikarapka, endang ngasuh penusah nyadi, tang orang ke tau dikarapka, mai pemaik.
18 Orang ke enggai diajar, deka diau seranta sereta dipechat, tang barang sapa mendingka jaku ajar, deka bulih basa.
19 Naka meh pemanah enti nuan bulih utai ti dikinginka nuan! Orang ke beli enggai ngelengkaka penyai.
20 Enti nuan begulai enggau orang ke bepenemu-dalam, nuan deka nyadi orang ke bepenemu-dalam baka sida. Enti nuan bepangan enggau orang ke beli, nuan deka rusak.
21 Penusah endang nitihka orang ke bedosa ngagai semua endur, tang orang ke lurus deka diupah ngena utai ti manah.
22 Orang ke menyana deka ninggalka pengaya ke uchu-ambu sida, tang pengaya orang ke bedosa deka diempu orang ke lurus.
23 Tanah ti enda dipumai, tau mansutka mayuh pemakai ke orang ke seranta, tang orang ke enda lurus ati nagang tanah nya dipumai.
24 Enti nuan enda nyipat anak nuan, reti nya nuan enda rinduka sida. Enti nuan amat rinduka sida, nuan enda tau enda disiplin sida.
25 Orang ke lurus chukup utai diempa, tang orang ke jai endang seruran lapar.
 
Bagi 14
1 Ruang bilik didirika ulih penemu-dalam sida ke indu, tang diruntuhka ulih pemeli.
2 Orang ke betul ati ngayanka diri nangika TUHAN, tang orang ke enda betul ati, ngeleseka TUHAN.
3 Orang ke beli sereta sumbung kelalu deka bejaku. Jaku orang ke bepenemu-dalam nyaga sida empu.
4 Enti nuan nadai sapi ti lelaki kena narit pengeradu tanah, bilik setor nuan puang, tang enti nuan ngena sapi ti lelaki ngeradu tanah, bilik setor nuan deka penuh laban gandum.
5 Saksi ti tau dikarapka, endang selalu madahka utai ti bendar, tang saksi ti enda tau dikarapka, nadai nyebut utai bukai, tang semina nyebut utai ti bula aja.
6 Orang ke ngenyumbungka diri, enda ulih nyadi orang ke bepenemu-dalam, tang orang ke nemu berunding, nyamai belajarka utai.
7 Anang bepangan enggau orang ke beli, laban sida nadai utai ti tau diajar sida ngagai nuan.
8 Nama kebuah orang ke pandai pintar? Laban iya nemu utai ti dikereja diri. Nama kebuah orang ke beli lap? Laban iya ngumbai diri nemu utai.
9 Orang ke beli nadai bedulika diri bedosa, tang orang ke menyana minta diri diampun.
10 Pengaga ati nuan endang enggi nuan empu. Dendam nuan endang enggi nuan empu. Nadai orang ulih bempu utai nya enggau nuan.
11 Rumah orang ke menyana deka mengkang bediri, tang rumah orang ke ngereja penyai dirusak.
12 Jalai ti dikumbai nuan jalai ti ngena, tau nuju ngagai pemati.
13 Ketawa tau ngelalaika ati ti tusah. Lebuh ati ti lantang nyau nadai agi, ati ti tusah deka seruran bisi.
14 Orang ke jai deka bulih utai ti setipak enggau penyai iya. Orang ke menyana deka diupah ketegal utai ti dikereja sida.
15 Orang ke beli deka arapka sebarang utai, tang orang ke pintar deka nyingkang enggau bejimat.
16 Orang ke mereti endang bejimat, ngambika sida enda kena laban penusah. Orang ke beli kelalu beguai-guai sereta enda berunding ngereja utai.
17 Orang ke lengkar ngereja utai ti beli. Orang ke bepenemu-dalam mengkang enda ringat.
18 Orang ke nadai nemu utai, bulih utai ti setipak enggau pemeli sida, tang orang ke pandai diupah enggau penemu.
19 Orang ke jai deka meremi ngagai orang ke lurus, lalu ngemaruhka diri minta kasih ari sida.
20 Nadai orang deka rinduka orang ke seranta. Indah orang ke berimbai pendiau enggau sida deh enda rinduka sida, tang orang ke kaya mayuh pangan.
21 Enti nuan deka lantang ati, nuan enda tau enda nelap enggau orang ke seranta. Nuan bedosa enti nuan ngeleseka orang.
22 Nuan deka dikarapka sereta dibasa orang, enti nuan ngereja utai ti manah. Enti nuan bekereja ngulihka penyai, nuan ngereja utai ti salah.
23 Enti nuan gawa, nuan deka bulih pengidup. Enti nuan duduk berandau ngapa, nuan deka idup seranta.
24 Orang ke bepenemu-dalam diupah ngena pengaya, tang orang ke beli deka dikelala ari pemeli sida.
25 Orang ke nyadika saksi ngidupka nyawa lebuh iya madahka utai ti bendar. Lebuh iya madahka utai ti bula, iya nyual orang.
26 Nangika TUHAN meri ati ti kempang enggau pengelikun ngagai orang enggau sida sebilik.
27 Kati nuan deka nyeliahka pemati? Ati ti nangika TUHAN nya pun pengidup.
28 Pemesai nama raja bepanggai ba pemayuh orang ke diperintah iya. Enti iya nadai orang diperintah, iya nadai guna.
29 Enti nuan enda jampat ringat, reti nya nuan orang ke bepenemu-dalam, tang enti nuan jampat ringat, nuan semina mandangka pemeli diri.
30 Ati ti lantang, ngasuh tubuh nuan bepengerai, tang ati ti kepapas baka penyakit riman.
31 Enti nuan nekanka pengidup orang ke seranta, nuan ngeleseka Allah Taala ti ngaga sida. Tang enti nuan nelap enggau orang ke seranta, reti nya nuan nyembah Allah Taala.
32 Orang ke jai ngasuh sida empu labuh ngena penyai ti dikereja sida, tang orang ke menyana dijaga ati sida ke rentang.
33 Penemu-dalam endang bisi dalam semua runding orang ke nemu berunding, tang orang ke beli nadai penemu-dalam.
34 Pengelurus ngemesaika nama bansa. Dosa mai pemalu ngagai bansa.
35 Raja gaga ati ke bala pemesai ti landik gawa, tang iya ngukum sida ke enda ngereja utai ti diasuh iya.
 
Bagi 15
1 Saut ti nelap ngasuh orang badu agi ringat, tang jaku ti kasar ngasuh orang ringat.
2 Lebuh orang ke bepenemu-dalam bejaku, sida ngaga penemu manah didinga, tang orang ke beli mantaika penemu ti nadai reti.
3 TUHAN meda utai ti nyadi di semua endur. Iya nengkilaka kitai, nemuka kitai ngereja utai ti manah tauka ngereja utai ti jai.
4 Jaku ti siru mai pengidup, tang jaku ti jai ngelemika semengat.
5 Nuan beli enti nuan enggai mendingka ajar apai indai nuan, tang nuan bepenemu-dalam enti nuan nerima jaku rara enggau ajar ari sida.
6 Orang ke lurus nemu nyimpan pengaya sida, tang orang ke jai ngelenyauka pengaya sida lebuh maya suntuk.
7 Penemu disiburka orang ke bepenemu-dalam, ukai disiburka orang ke beli.
8 TUHAN gaga ati lebuh orang ke menyana besampi, tang Iya begedika piring ti dibai orang ke jai.
9 TUHAN begedika ulah orang ke jai, tang rinduka orang ke ngereja utai ti ngena.
10 Enti nuan ngereja penyalah, nuan deka balat diukum. Nuan deka mati, enti nuan enggai diajar.
11 Indah dunya pemati deh enda ulih nagang TUHAN nemu utai ti dalam iya. Nya alai, baka ni ku kitai ulih ngelalaika runding kitai ari Allah Taala?
12 Orang ke sumbung enggai ditunjukka orang penyalah. Sida nadai kala minta jaku lalau ari orang ke dalam agi penemu ari sida.
13 Lebuh orang lantang ati, sida tuchum, tang lebuh ati sida enda lantang, mua sida berupai tusah.
14 Orang ke mereti, begigaka penemu,  tang mulut orang ke beli beridup ba pemeli.
15 Orang ke seranta endang seruran merinsa diau, tang orang ke lantang ati endang seruran nyamai diau.
16 Manah agi diau seranta lalu nangika TUHAN, ari ti nyadi kaya tang bisi penusah.
17 Manah agi makai sayur begulai enggau orang ke dikerinduka nuan, ari ke makai dagin ti pemadu nyamai tang ati seruran begedi.
18 Ati ti lengkar ngasuh bekelikuh, tang ati ti liat mai pemaik.
19 Enti nuan ngelusu, nuan deka tusah idup di semua endur, tang enti ati nuan betul, nuan nadai utai ngenusah.
20 Anak ti bepenemu-dalam ngelantangka apai. Tang orang ke beli nadai basa enggau indai diri.
21 Orang ke beli gaga ke pemeli, tang orang ke bepenemu-dalam deka ngereja utai ti ngena.
22 Enggau naka ulih giga semua jaku lalau, nya baru nuan deka mujur. Enti nuan nadai bulih jaku lalau, pengawa nuan deka puntan.
23 Naka meh pengaga tetemuka leka jaku ba maya ti ngena.
24 Orang ke bepenemu-dalam niti jalai ti nuju ke atas ngagai pengidup, ukai niti jalai ti nuju ke baruh ngagai pemati.
25 TUHAN deka ngerusak rumah orang ke sumbung, tang Iya deka nyaga reta tengkira indu ke balu.
26 TUHAN begedika runding ti jai, tang Iya rinduka jaku ti siru.
27 Enti nuan nguji ngulihka penguntung ngena jalai tipu, ruang bilik nuan empu deka rusak. Anang makai suap, nya baru umur nuan deka panjai agi.
28 Orang ke menyana berunding dulu sebedau sida nyaut. Orang ke jai jampat nyaut, tang saut sida mai penusah.
29 Lebuh orang ke menyana besampi, TUHAN mendingka sida, tang TUHAN enda mendingka orang ke jai.
30 Mua ti tuchum ngasuh nuan lantang ati, lalu berita ti manah ngasuh ati nuan berasai nyamai agi.
31 Enti nuan mending lebuh orang ngajar nuan, reti nya nuan bepenemu-dalam.
32 Enti nuan enggai diajar, nuan ngemediska diri empu. Enti nuan nerima jaku ti nunjukka penyalah nuan, nuan deka lebih agi bepenemu-dalam.
33 Bebasaka TUHAN nya pelajar ti manah. Nuan enda tau enda baruh ati, sebedau nuan bulih basa.
 
Bagi 16
1 Mensia nyangka begagaka pelan, tang TUHAN ti meri pemutus penemu.
2 Nuan nyangka ngumbai semua utai ti dikereja nuan ngena magang, tang TUHAN Empu ke meresa juluk ati nuan.
3 Serahka utai ti dikereja nuanngagai TUHAN, nya baru pelan nuan deka mujur.
4 Semua utai ti udah digaga TUHAN endang bisi tuju magang, lalu tuju orang ke jai nya pengerusak.
5 TUHAN begedika semua orang ke sumbung. Iya enggai sekali-kali nejuka sida enda diukum.
6 Taluk sereta tetap ati, nya baru dosa nuan diampun. Ngasika TUHAN, nya baru nuan enda dituntung utai ti jai.
7 Lebuh nuan ngerinduka ati TUHAN, nuan ulih ngaga munsuh nuan nyadi pangan.
8 Manah agi bulih duit mimit ngena chara ti lurus, ari ke bulih mayuh duit ngena chara ti enda lurus.
9 Nuan nyangka ngaga pelan, tang TUHAN ti ngatur utai ti dikereja nuan.
10 Raja bejaku ngena kuasa ti diberi Allah Taala. Pemutus penemu iya endang seruran ngena.
11 TUHAN ngasuh nuan ngena dachin enggau takar ti betul, lalu anang ngelakar lebuh nuan bejual.
12 Raja enggai meda penyai, laban utai ti ngasuh perintah kering nya pengelurus.
13 Raja keran deka ningaka utai ti ngena, lalu deka rinduka orang ke nyebut utai ti ngena.
14 Orang ke bepenemu-dalam deka nguji ngelantangka ati raja. Enti raja ringat, orang bisi deka kena bunuh.
15 Pengasih raja nya baka mua hari ti mai ujan lebuh musin bungai: iya meri pengidup.
16 Manah agi bisi penemu-dalam enggau penemu, ari ke bisi emas enggau pirak.
17 Orang ke menyana, ngelaungka penyai. Nya alai bejimat - laban nya nyangka ulih ngidupka nyawa nuan.
18 Penyumbung nuju ngagai pengerusak, lalu ati ti tinggi ngasuh nuan rebah.
19 Manah agi ngembuan ati ti baruh lalu diau seranta, ari ti sumbung lalu enggau orang bekunsika perapasan.
20 Peratika utai ti diajar ngagai nuan, nya baru nuan deka mujur. Arapka TUHAN, nya baru nuan deka lantang.
21 Orang ke bepenemu-dalam sereta tuai runding, deka tampak nama laban iya nemu meretika utai. Manah agi jalai jaku iya, rindu agi ga orang nitihka iya.
22 Ba orang ke pintar, penemu-dalam nya pun pengidup, tang nuan semina masau jam ngapa ngajar orang ke beli.
23 Orang ke bepenemu-dalam, berunding dulu sebedau sida bejaku. Utai ti disebut sida dipendingka orang magang.
24 Jaku ti siru nya baka ai manyi - manis sereta manah ke pengerai nuan.
25 Jalai ti dikumbai nuan ngena, tau nuju ngagai pemati.
26 Perut ti lapar ngasuh orang bebendar agi gawa, laban iya keran deka bisi utai diempa.
27 Orang ke jai begigaka jalai ngemediska orang. Indah leka jaku ti disebut iya deh jai magang.
28 Orang ke jai bejakuka orang. Sida nyungkak pengachau nyadi lalu mechahka kaul entara pangan.
29 Orang ke mangah nipu pangan, lalu mai sida ngagai penusah.
30 Bejaga ari orang ke tuchum sereta ngichekka mata ngagai nuan; sida udah berundingka utai ti jai.
31 Upah orang ke lurus nya umur ti panjai; bulu pala ti buban nya makota ti bemulia.
32 Manah agi ngembuan ati ti liat, ari ke ngembuan kuasa, lalu manah agi enti nuan ulih merintah ati diri, ari nuan ti ngalahka nengeri.
33 Orang bechabut undi kena ngiga peneka Allah Taala, tang Allah Taala empu ke meri pemutus penemu.
 
Bagi 17
1 Manah agi makai kerak roti tang bisi pemaik dalam ati, ari ke rami makai besai dalam rumah ti penuh laban pengachau.
2 Orang gaji ti pintar deka bekuasa atas anak tuan iya ti nadai guna, lalu nerima sebagi ari pesaka tuan iya.
3 Emas enggau pirak diuji ngena api, lalu ati orang diuji TUHAN.
4 Orang ke jai mendingka penemu ti jai, lalu orang ke bula mendingka pemula.
5 Enti nuan beduan orang ke seranta, nuan ngeleseka Allah Taala ti ngaga sida. Nuan deka diukum, enti nuan gaga meda orang kena laban penusah.
6 Aki temegahka uchu diri, baka anak ke temegahka apai indai sida.
7 Orang ke dibasa orang, enda nusui utai ti bula, lalu orang ke beli nadai nyebut utai ti menyana.
8 Sekeda orang ngumbai makai suap nya baka kereja ajih. Sida ngarapka diri ulih ngereja semua utai.
9 Enti nuan deka ngasuh orang rinduka nuan, ampun sida lebuh sida ngereja utai ti salah ngagai nuan. Enti nuan seruran ingatka penyalah sida, kaul entara kita deka rusak.
10 Orang ke pintar bulih agi pelajar ari jaku anu, ari orang ke beli, ke disipat seratus kali.
11 Pemati deka datai baka seruan ti jai, ngagai orang ke jai, ke semampai nyungkak pengachau nyadi.
12 Manah agi betemu enggau indu beruang ti udah lenyau anak, ari ke betemu enggau orang ke beli, ke ngiruh diri ngereja pengawa ti nadai reti.
13 Enti nuan malas pemanah ngena penyai, nuan enda ulih muai penyai ari rumah nuan.
14 Pun kelikuh nya baka tekat ai ti baru deka runtuh. Padamka kelikuh nya enggau jampat.
15 Ngukum orang ke nadai penyalah, tauka ngelepaska orang ke jai, nya pengawa ti sama dipegedika TUHAN.
16 Nadai guna orang ke beli bekenaka duit ngulihka pelajar, laban iya enda nemu berunding.
17 Pangan endang seruran ngayanka pengerindu sida. Nama guna bisi kaban belayan enti sida enda enggau natka penusah?
18 Semina orang ke enda nemu berunding aja ti deka besemaya betanggungjawapka utang orang bukai.
19 Reti rinduka dosa nya rindu ngaga pengachau. Enti nuan seruran temegah, reti nya nuan minta penusah.
20 Barang sapa berundingka utai ti jai, lalu bejakuka pasal penyai, nadai ulih ngarapka diri ulih tetemuka utai ti manah, tang semina penusah aja.
21 Apai indai ke bisi anak ti ngereja utai ti beli, nadai utai bukai tang semina ati ti tusah sereta sinu.
22 Ati ti selalu lantang ngasuh nuan bepengerai. Ati ti selalu tusah deka ngasuh nuan mupuk mati.
23 Hakim ti jai belalai makai suap, lalu atur ti lurus enda dipejalaika.
24 Tuju orang ke pintar nya ngulihka penemu-dalam, tang orang ke beli nadai meruan tuju.
25 Anak ke beli ngenusahka ati apai, sereta ngemaluka indai.
26 Kitai enda patut ngukum orang ke nadai penyalah, tauka orang ke ngereja utai ti ngena.
27 Orang ke mereti, enda seruran kutap-kutap. Orang ke enda bemunyi nya orang ke bepenemu-dalam.
28 Indah orang ke beli deh kadang-kadang dikumbai bepenemu-dalam sereta nemu berunding, enti sida enda bejaku.
 
Bagi 18
1 Orang ke enda nemu begulai enggau orang bukai, semina berundingka diri empu aja. Sida enda besetuju enggau semua utai ti dikumbai orang bukai ngena.
2 Orang ke beli enda beduli sekalika iya mereti tauka enda. Iya semina keran deka ngayanka pemintar diri aja.
3 Dosa enggau pemalu endang begulai. Enti orang enda agi bebasaka nuan, sida ngeleseka nuan.
4 Jaku orang tau meri penemu, ti dalam baka tasik, sereta chiru baka ai sungai.
5 Kitai salah enti kitai ngeringka orang ke salah, lalu nagang orang ke nadai penyalah nerima atur ti lurus.
6 Lebuh orang ke beli ngepunka kelikuh, iya minta diri dipalu orang.
7 Lebuh orang ke beli mansutka jaku, iya ngerusak diri empu. Iya dipanjuk jaku diri empu.
8 Pengawa ti bejakuka orang asai ti nyamai. Naka meh pemalat ati kitai tetenguk deka nelan iya!
9 Orang ke ngelusu endang jai. Iya baka orang ke rindu ngerusak utai.
10 TUHAN baka menara ti tegap, endur alai orang ke lurus tau datai lalu diau enggau likun.
11 Tang orang ke kaya ngumbai pengaya sida ulih nyaga sida, baka dinding kuta ti tinggi sereta tegap, ti ngelingi nengeri.
12 Nadai orang tau bulih basa enti iya enda ngemaruhka diri. Orang ke sumbung endang bejalai ngagai pengerusak.
13 Mending dulu sebedau nuan nyaut. Enti nuan enda mending dulu, nuan beli sereta enda nemu bebasaka orang.
14 Pengeras nuan deka idup ulih ngasuh nuan tan lebuh nuan sakit, tang enti nuan ngelengkaka pengeras ati nuan nya, nuan nadai utai diadang agi.
15 Orang ke nemu berunding endang seruran gagit ati sereta sedia deka belajar.
16 Kati nuan deka betemu enggau orang ke tinggi pangkat? Bai pemeri, nya baru nuan nyamai betemu enggau iya.
17 Orang ke terubah mansutka jaku dalam kot endang munyi ti ngena belama, sebedau orang ke ngelaban iya belabuh nanya iya.
18 Enti dua iku orang ke sama bekuasa belaban dalam kot, seduai iya tau bechabut undi kena seduai iya mutuska pekara nya.
19 Tulung kaban belayan nuan, nya baru sida deka nyaga nuan baka dinding kuta nengeri ti tegap, tang enti nuan belaya enggau sida, sida deka nikupka pintu sida lalu enggai ngemendarka nuan tama.
20 Nuan deka betanggungjawapka utai ti deka nyadi ketegal semua jaku ti disebut nuan.
21 Utai ti disebut nuan tau ngidup tauka ngerusak nyawa.
Nya alai nuan enda tau enda betanggungjawapka utai ti deka nyadi ba nuan ketegal jaku nuan empu.
22 Enti nuan bulih bini, nuan bulih utai ti manah. Nya ngayanka TUHAN manah enggau nuan.
23 Lebuh orang ke seranta bejaku, sida enda tau enda bejaku enggau penuh basa, tang lebuh orang ke kaya nyaut, sida bejaku sumbung.
24 Sekeda orang bepangan enda lama aja, tang sekeda pangan taluk agi ari menyadi diri.
 
Bagi 19
1 Manah agi seranta tang ngembuan ati ti betul, ari ti beli sereta bula.
2 Semina ransing aja enda chukup enti kita nadai penemu. Enti kita enda liat ati, kita deka kena laban penusah.
3 Sekeda orang ngerusak diri empu ngereja pengawa ti beli, lalu udah nya besalah TUHAN.
4 Orang ke kaya endang selalu bulih pangan ti baru, tang orang ke seranta dilengkaka pangan sida empu.
5 Enti nuan nusui utai ti bula dalam kot, nuan deka diukum - nuan enda ulih nyeliahka ukum nya.
6 Semua orang nguji ngulihka ati orang ke tinggi pangkat. Semua orang deka bepangan enggau orang ke meri sida utai.
7 Indah kaban belayan orang ke seranta deh enda nemu begunaka iya. Nya alai patut ga iya nadai pangan. Bebendar ni pen iya ngiga pangan, nadai ga iya tetemuka orang ke deka nyadi pangan iya.
8 Kasihka diri empu lalu belajar enggau naka ulih. Udah nya kingatka utai ti dipelajarka nuan. Nya baru nuan deka nyadi kaya-raja.
9 Nadai orang ke bula dalam kot ulih nyeliahka ukum. Iya nadai penyadi agi.
10 Orang ke beli enda patut diau nyamai, lalu ulun enda patut merintah orang ke peturun raja.
11 Enti nuan orang ke mereti, nuan deka nagang diri lengkar. Lebuh orang ngereja utai ti salah ngagai nuan, nuan deka dipuji orang enti nuan enda bedulika penyalah nya.
12 Pengeringat raja sebaka enggau penginggar singa ti negung, tang pengasih iya baka ujan.
13 Anak ke beli ngerusak apai indai sida. Bini ke ituk sebaka munyi enggau ai ti enda ngetu nitik.
14 Orang tau bulih rumah enggau duit ari apai indai, tang semina TUHAN siku aja ke ulih meri bini ti mereti.
15 Awakka nuan majak ngelusu. Tinduk meh nuan, tang nuan deka lapar.
16 Titihka adat Allah Taala lalu nuan deka panjai agi umur. Enti nuan enda ngasika adat nya, nuan deka mati.
17 Lebuh nuan meri utai ngagai orang ke seranta, nuan baka ke nyali utai ngagai TUHAN, lalu TUHAN deka mayar nuan.
18 Disiplin anak nuan lebuh sida agi biak lalu udah nemu meretika utai. Enti nuan enda, nuan nulung sida ngerusak diri empu.
19 Enti orang lengkar, awakka iya betanggungjawapka utai ti nyadi ketegal pengelengkar iya empu. Enti nuan ngelepaska iya ari penusah iya sekali, nuan deka
ngelepaska iya baru.
20 Pendingka jaku lalau, lalu terima jaku ajar, ngambika nuan bulih penemu-dalam kena nuan idup jemah ila.
21 Mensia nyangka bekiraka mayuh macham pelan, tang semina peneka TUHAN aja deka nyadi.
22 Kitai patut nemu malu ke pengamu diri. Orang ke seranta lantang agi diau ari orang ke bula.
23 Enti nuan nangika TUHAN, nuan deka panjai umur, idup puas ati sereta nadai kena laban utai ti tau ngemedis.
24 Sekeda orang kelalu ngelusu datai ke sida nyau enda tesuapka pemakai.
25 Penyumbung patut diukum, ngambika orang ke nadai nemu utai, ulih belajar ari nya. Enti nuan bepenemu-dalam, nuan deka mereti lebuh nuan diajar.
26 Semina orang ke enda nemu malu sereta enda nemu bebasa, deka merinsaka apai diri, tauka muru indai iya ari rumah.
27 Anak, lebuh nuan badu belajar, nuan deka jampat enda ingatka utai ti udah ditemu nuan.
28 Enti orang ke nyadika saksi keran deka ngemediska orang, atur ti lurus enda ulih dipejalaika. Orang ke jai endang rinduka penyai.
29 Orang ke sumbung sereta beli, tetap deka dipalu.
 
Bagi 20
1 Enti nuan kelalu ngirup, nuan deka ragak sereta beli. Kitai beli enti kitai nejuka diri mabuk.
2 Takutka raja ke ringat nya baka ke takutka singa ti negung. Enti kitai nyungkak iya ringat, kitai semina munuh diri.
3 Orang ke beli nemu ngepunka kelikuh, tang utai ti manah dikereja nya ngejangka diri jauh ari kelikuh nya.
4 Orang bumai ke ngelusu lalu enda ngeradu tanah umai diri ba maya ti patut, nadai utai diketau.
5 Runding mensia baka ai ti ba telaga ti dalam, tang orang ke ngembuan runding ti dalam, ulih ngauk ai nya.
6 Semua orang bela madahka penaluk enggau penetap ati diri, tang uji giga orang ke endang amat taluk sereta tetap ati!
7 Bala anak amat diberekatka enti sida bisi apai ke lurus ati, sereta ngereja utai ti ngena.
8 Raja duduk ngakim, lalu iya ngelala penyai lebuh iya meda penyai.
9 Kati orang ulih ngumbai diri nadai udah ngereja penyalah, lalu ngumbai semua dosa iya udah dibuai magang?
10 TUHAN begedika orang ke ngena timbang enggau takar ti enda betul.
11 Indah anak mit deh nemu ngayanka pendiau diri ari utai ti dikereja sida. Kita nemu enti sida nya betul ati sereta manah.
12 TUHAN udah meri kitai mata kena meda, enggau pending kena mending.
13 Enti nuan selalu tinduk, nuan deka nyadi orang ke seranta. Enti nuan seruran bekereja, nya baru nuan deka mayuh utai diempa.
14 Orang ke meli utai endang selalu mutap madahka rega utai nya kelalu mar, tang udah nya iya mupuk lalu temegahka diri nemu betawar.
15 Enti nuan nemu utai ti dikejakuka nuan, nuan bisi utai ti lebih agi berega ari emas tauka batu ti berega.
16 Barang sapa besemaya deka betanggungjawapka utang orang kampar, patut nyerahka reta tengkira diri kena nyamin utang nya.
17 Utai ti ulih nuan ngena jalai tipu, tau ngasuh nuan gaga ati baka ke makai pemakai ti pemadu nyamai, tang lama laun utai nya deka baka asai pasir dalam nyawa nuan.
18 Giga jaku lalau ti manah, nya baru nuan deka mujur. Anang mansang beperang enti nuan apin ngaga pelan dulu.
19 Orang ke chabul mulut enda ulih nyimpan resia. Nya alai anang begulai enggau orang ke kelalu deka bejaku.
20 Enti nuan nyumpah apai indai nuan, seput nuan deka padam baka lampu ti padam dalam petang.
21 Makin mudah agi nuan bulih pengaya, makin kurang agi ga guna pengaya nya ba nuan.
22 Anang malas penyai ngena penyai. Panggaika pengarap nuan ba TUHAN, nya baru Iya deka nulung nuan.
23 TUHAN begedika orang ke ngena dachin enggau timbang ti enda betul.
24 TUHAN udah nentuka jalai ti deka ditengah kitai. Nya alai, kati ku orang ulih meretika tuju pengidup diri?
25 Berunding enggau manah sebedau nuan besamaya deka ngenjuk piring ngagai Allah Taala, enggai ke nuan ngesal  ila.
26 Raja ti bepenemu-dalam deka nemu sapa ti ngereja penyalah, lalu iya deka ngukum orang nya enggau nadai pengasih.
27 TUHAN udah meri kitai runding enggau ati ti nemu ngelala utai ti manah enggau utai ti jai. Kitai enda ulih ngelalaika diri ari kitai empu.
28 Raja deka mengkang megai perintah seagi-agi iya merintah enggau ati ti betul, lurus sereta manah.
29 Kitai muji pengering sida ke agi biak, lalu kitai masa orang ke buban bulu pala.
30 Kadang-kadang kitai semina ngubah ulah diri lebuh kitai udah ngasaika pemedis.
 
Bagi 21
1 TUHAN ngatur runding raja, ngemudah Iya ke ngatur arus sungai.
2 Nuan nyangka ngumbai semua utai ti dikereja nuan ngena magang, tang ingat: TUHAN meresa juluk ati nuan.
3 Kereja aja utai ti ngena sereta manah. Utai nya ngerinduka ati TUHAN, lebih agi ari piring ti dibai ngagai Iya.
4 Orang ke jai diperintah ati ti sumbung sereta tinggi. Nya dikumbai bedosa.
5 Bejimat lebuh nuan ngaga pelan, nya baru nuan deka bulih mayuh utai. Enti nuan kelalu beguai-guai ngereja utai, nuan nadai kala chukup utai.
6 Pengaya ti ulih nuan ngena jalai tipu, deka jampat lesap, tang semina lebuh iya udah mai nuan ngagai pemati.
7 Orang ke jai deka diukum ketegal pemangah sida, laban sida enggai ngereja utai ti ngena.
8 Orang ke ngereja penyalah endang bula magang, tang orang ke nadai penyalah, ngereja utai ti ngena.
9 Manah agi diau ba perabung rumah ari ti diau enggau bini ke ituk.
10 Orang ke jai endang seruran inginka penyai. Sida nadai nemu kasihka orang.
11 Lebuh orang ke sumbung diukum, orang ke enda nemu berunding bulih pelajar ari nya. Orang ke bepenemu-dalam deka bulih pelajar ari utai ti diajar ngagai iya.
12 Allah Taala ti Lurus, nemu utai ti nyadi dalam rumah orang ke jai, lalu Iya deka ngerusak orang ke jai nya.
13 Enti nuan enggai mendingka sabak orang ke seranta, sabak nuan empu ti minta tulung enda mega didingaka.
14 Enti orang ringat ngagai nuan, pemeri ti diberi nuan ngena jalai belalai deka ngasuh iya badu agi ringat.
15 Lebuh atur ti lurus udah dipejalaika, orang ke menyana deka gaga ati, tang orang ke jai deka tusah ati.
16 Pemati endang meruan nganti orang ke limpang ari runding ti manah.
17 Ngelantangka diri ngena pengaya, ngena wain, enggau pemakai ti manah, enda ngasuh nuan kaya.
18 Orang ke jai ngasuh diri ditinggang pemerinsa ti deka dikena sida merinsaka orang ke menyana.
19 Manah agi diau di menua puang ari ti diau begulai enggau bini ke ituk sereta selalu mutap.
20 Orang ke bepenemu-dalam diau kaya sereta nyamai, tang orang ke beli ngerua duit sida ngenyampat sida bulih duit nya.
21 Anang enda nelap sereta betul ati, nya baru nuan deka panjai umur. Orang bukai deka bebasaka nuan, lalu manah enggau nuan.
22 Orang ke pintar ulih ngalahka nengeri ti dijaga bala orang ke kering, lalu ngerusak kuta ti dikena sida ngetanka diri.
23 Enti nuan enggai ke diri kena laban penusah, nuan enda tau enda bejimat nyebut utai.
24 Tunjukka ngagai aku orang ke sumbung, lalu aku deka nunjuk ke nuan orang ke tinggi ati, ti sumbung, ti enda nemu berundingka orang bukai.
25 Orang ke ngelusu, ke enggai gawa, semina munuh diri empu.
26 Sida semina berundingka utai ti dikinginka sida. Tang orang ke lurus, ulih meri utai enggau ati ti gerah mudah.
27 TUHAN begedi lebuh orang ke jai meri Iya piring, lebih agi lebuh sida ngenjuk piring nya ngena juluk ati ti jai.
28 Saksi orang ke bula enda tau dikarapka, tang jaku orang ke berundingka pekara enggau silik, tau diterima.
29 Orang ke lurus andal ati ke diri empu, tang orang ke jai naka ulih pura-pura ngaga diri baka orang ke lurus.
30 Penemu-dalam, pemandai, penalam runding mensia enda ulih nulung nuan, enti TUHAN ngelaban nuan.
31 Nuan tau nyendiaka kuda kena beperang, tang TUHAN ti ngasuh nuan menang.
 
Bagi 22
1 Pilih pemanah nama, ukai milih pengaya, lalu pilih pengasih, ukai milih pirak enggau emas.
2 Orang ke kaya enggau orang ke seranta endang sebaka: seduai iya sama digaga TUHAN.
3 Orang ke nemu berunding deka meda penusah datai, lalu belalai; tang orang ke enda berunding deka terus bejalai lalu tetempuhka penusah nya, lalu merinsa ketegal nya.
4 Upah orang ke baruh ati sereta nangika TUHAN nya pengaya, basa enggau umur ti panjai.
5 Enti nuan sayauka nyawa diri, seliahka panjuk ti tau nyintak orang ke jai ba jalai raya.
6  Ajar anak mit jalai idup, nya baru sida deka ingatka ajar nya seumur idup.
7 Orang ke seranta nyadi ulun orang ke kaya. Enti nuan nginjau duit, nuan nyadi ulun orang ke nyali nuan duit nya.
8 Enti orang nanam atur ti enda lurus, iya deka ngetau penusah, lalu iya deka badu agi nekanka pengidup orang bukai.
9 Orang ke gerah mudah magi pemakai sida enggau orang ke seranta, deka bulih berekat.
10 Buru orang ke sumbung, nya baru penyarut, laya, enggau bejai pangan diri nadai agi.
11 Enti nuan rinduka ati ti tuchi, enggau jaku ti siru, nuan deka nyadi pangan raja.
12 TUHAN deka nyaga penemu, tang Iya ngalahka jaku orang ke bula.
13 Orang ke ngelusu diau di rumah, laban kenu ku sida, singa deka munuh sida enti sida pansut ke luar.
14 Pengawa butang nya panjuk. Pengawa butang nyintak orang ke dikeringatka TUHAN.
15 Anak mit endang selalu ngereja utai ti beli, sereta enda berunding, tang enti sida disipat, nya baru sida nemu ngubah ulah diri.
16 Enti nuan meri pemeri ngagai orang ke kaya, tauka nekanka pengidup orang ke seranta kena nuan ngulihka pengaya, nuan empu deka suntuk.
 
Tiga Puluh Bengkah Jaku Ajar
17 Pendingka aku, laban aku deka ngajar nuan utai ti udah disebut orang ke bepenemu-dalam. Peratika ajar sida,
18 nya baru nuan deka gaga ati lebuh nuan ingatka ajar nya, lalu ulih nyebut ajar nya baru ngagai orang bukai.
19 Aku ngasuh nuan manggaika pengarap nuan ba TUHAN. Nya kebuah aku ngajar utai nya ngagai nuan diatu.
20 Aku udah nuliska tiga puluh iti jaku ke nuan, ti ngundan penemu enggau jaku lalau ti manah,
21 ti deka ngajar nuan utai ti dikumbai pemendar. Udah nya lebuh nuan diasuh ngiga pemendar nya, nuan deka pulai baru mai saut ti ngena.
 
-1-
22 Anang ngambi ulih ba orang ke seranta, ketegal iya seranta, tauka ngambi ulih ba orang ke nadai daya dalam kot,
23 laban TUHAN deka bejaku ngarika sida, lalu deka ngambi nyawa orang ke nguji ngambi nyawa sida.
 
-2-
24 Anang bepangan enggau orang ke lengkar sereta mangah,
25 enggai ke nuan dirampit ulah sida, lalu disintak panjuk.
 
-3-
26 Anang besemaya deka betanggungjawapka utang orang bukai,
27 enggai ke nuan enda ulih mayar utang nya, lalu sida deka ngambi peninduk nuan.
 
-4-
28 Anang nginsitka entara tanah ti udah diletak aki ini nuan.
 
-5-
29 Kati nuan bisi meda orang ke landik gawa? Iya deka bekereja ke raja; iya enda bekereja ke orang ke sengapa-dia.
 
Bagi 23
 -6-
1 Lebuh nuan duduk makai enggau orang ke tinggi pangkat, peratika sapa orang nya.
2 Enti nuan bam makai, tagang diri.
3 Anang tetengukka pemakai ti dienahka iya ngagai nuan, nyangka iya nguji nipu nuan.
 
-7-
4 Anang ngelelakka diri ngiga pengaya, lalu patut nemu nagang diri.
5 Duit nuan tau abis dalam sekejap mata aja, baka ke bisi sayap, lalu terebai baka burung menaul.
 
-8-
6 Anang makai ba mija orang ke rangka, lalu anang tetengukka pemakai ti dienahka iya ngagai nuan.
7 Ku orang nya bejaku, “Anang nagang diri. Nyengkau baru.” Tang nya ukai jaku ti bendar.
8 Nuan deka mutahka semua utai ti udah diempa nuan, lalu semua jaku puji nuan deka tebasau ngapa.
 
-9-
9 Anang bejaku ngagai orang ke beli, laban iya deka semina ngeleseka penemu nuan.
 
-10-
10 Anang sekali-kali mindahka kelai entara tanah orang, tauka ngambi tanah orang ke nadai apai,
11 laban TUHAN ti bekuasa nyaga sida, lalu Iya deka bejaku ngarika sida ngelaban nuan.
 
-11-
12 Pendingka pengajar nuan, lalu pelajarka utai enggau naka ulih nuan.
 
-12-
13 Anang enda disiplin anak. Enti nuan nyipat iya, nya enda munuh iya.
14 Enti nuan nyipat iya, nya tau nyelamatka iya ari neraka.
 
-13-
15 Anak, enti nuan orang ke bepenemu-dalam, ati aku deka gaga amat.
16 Aku deka temegah ati lebuh aku ninga nuan mansutka penemu-dalam.
 
-14-
17 Anang ngining orang ke bedosa, tang awakka nuan seruran nangika TUHAN,
18 nya baru nuan deka diau lantang jemah ila, lalu utai ti diadang nuan, enda lenyau.
 
-15-
19 Pendingka jaku aku, anak. Anang enda bepenemu-dalam lalu berunding enggau manah ke jalai nuan idup.
20 Anang begulai enggau orang ke pengirup, ti bam,
21 laban orang ke pemabuk enggau orang ke bam deka nyadi seranta. Enti nuan semina makai tinduk, enda lama da agi nuan deka begari ngena gari ti charik.
 
-16-
22 Pendingka apai nuan ke meri nuan pengidup, lalu anang ngeleseka indai nuan lebuh iya nyau tuai.
23 Beli pemendar, penemu-dalam, jaku ajar, enggau ati ti mereti, lalu anang nyual sida.
24 Apai orang ke lurus deka gaga ati; orang ke bisi anak ti pintar, deka gaga ati ke iya.
25 Awakka apai enggau indai nuan gaga ati ke nuan; asuh ati indai nuan lantang.
 
-17-
26 Anak, peratika enggau manah pengidup aku ngambika iya nyadika teladan nuan.
27 Indu sundal enggau indu ke ngereja kereja ti kamah nya lubang kebung ti dalam sereta sempit.
28 Sida ngipa nuan baka perumpak, lalu ngasuh mayuh lelaki enda tetap ati ngagai bini sida.
 
-18-
29-30 Tunjukka ngagai aku orang ke pengirup, ti enda tau enda ensepi ai bisa, nya baru aku deka nunjuk ke nuan orang ke merinsa, ke tusah ati ke diri empu,
ke selalu ngaga pengachau, lalu selalu mutap. Mata sida mirah, lalu tubuh sida malui. Utai tu patut udah diseliahka sida.
31 Anang nejuka wain nguji nuan, taja pen chura iya mirah-redam, lalu iya nyau beperenching dalam mangkuk, lalu nyamai diirup.
32 Pagi hari siti nuan asai ti udah dipantuk ular.
33 Mata nuan deka meda utai ti nyelai, lalu nuan enda ulih berunding tauka bejaku enggau terang.
34 Nuan deka asai ke ba tasik, asai ke betayun ngena tali layar.
35 Lalu ku nuan bejaku, “Nyangka aku udah dipalu orang. Aku tetap udah dipalu orang, tang aku enda ingat. Nama kebuah aku enda ulih dani? Aku deka ngirup baru.”
 
Bagi 24
-19-
1 Anang ngining orang ke jai, lalu anang bepangan enggau sida,
2 laban sida semina berunding deka ngaga pengachau, lalu semua jaku sida ngenusahka orang.
 
-20-
3 Ulih penemu-dalam, rumah digaga, lalu ulih pemereti ati, rumah didirika.
4 Ulih penemu, bilik diisi enggau utai ti manah sereta berega.
 
-21-
5 Orang ke bepenemu-dalam bekuasa agi ari orang ke kering, lalu orang ke bisi penemu bekuasa agi ari orang ke bisi pengering;
6 laban ari iring penemu-dalam, kita ulih beperang, lalu ari iring bala penyanding penemu, kita deka menang.
 
 
-22-
7 Jaku-dalam enda ulih diperatika orang ke beli. Sida nadai utai disebut lebuh orang berandauka pekara ti besai.
 
-23-
8 Orang ke bekira deka ngereja penyai, deka dikumbai orang ke ngaga pengachau.
9 Utai ti diperundingka orang ke beli, endang dosa magang, lalu orang ke sumbung dipegedika orang.
 
-24-
10 Enti nuan lemi lebuh nuan dituntung penusah, reti nya nuan endang sigi amat lemi.
 
-25-
11 Anang kakang ati ngelepaska orang ke baru deka diukum bunuh, enti iya diakim ngena atur ti enda lurus.
12 Nuan nyangka ngumbai utai nya ukai pekara nuan, tang Allah Taala nemu sereta ngakim ati nuan. Iya nengkilaka nuan, nya alai Iya nemu, lalu Iya deka ngupah nuan nitihka utai ti dikereja nuan.
 
-26-
13 Anak, empa ai manyi, laban iya manah ke nuan. Ai manyi ti pansut ari idang manis ba dilah nuan.
14 Baka nya mega, penemu-dalam manah ke semengat nuan. Giga penemu-dalam, nya baru pengidup nuan deka lantang senang jemah ila.
 
-27-
15 Anang baka orang ke jai, ke bekira deka ngerumpak orang ke lurus ati, tauka ngerampas rumah sida.
16 Orang ke lurus ati nyangka rebah tujuh kali, lalu sida angkat baru; tang orang ke jai deka alah laban penusah.
 
-28-
17 Anang gaga ati lebuh munsuh kita rebah, lalu anang gaga ati lebuh sida tesangkut;
18 enggai ke TUHAN meda nya, lalu Iya enda lantang ati ke nya, lalu enda nyadi ngukum sida.
 
-29-
19 Anang irau ati ketegal orang ke jai, lalu anang ngining sida;
20 laban orang ke jai nadai penyadi, nadai utai diadang.
 
-30-
21 Anak, anang enda nangika TUHAN sereta bebasaka raja. Anang bekaul enggau orang ke angkat ngelaban sida,
22 laban orang ke baka nya deka dirusak enggau ngenyit, lalu nadai orang nemu gaya pengerusak ti deka datai ari TUHAN enggau ari raja.
 
Jaku Lalau Ti Bukai
23 Tu jaku ari orang ke bepenemu-dalam:
Anang bepilih mata lebuh ngakim orang.
24 Enti sida ngumbai orang ke bepenyalah nya nadai udah ngereja utai ti salah, sida deka kena sumpah, sereta dipegedika semua orang.
25 Tang hakim ke ngukum orang ke salah, deka diau lantang sereta nerima berekat.
26 Saut ti betul nandaka orang nya endang amat pangan ti bendar.
27 Sediaka pengawa nuan di luar, sediaka umai nuan; udah nya baru nuan nirika rumah.
28 Anang besaksi ngelaban pangan diri enggau nadai kebuah, lalu anang nipu orang.
29 Anang nyebut, “Aku deka ngereja ngagai orang utai ti udah dikereja sida ngagai aku! Aku deka malas!”
30 Aku bejalai nengah umai orang ke ngelusu, lalu nengah kebun anggur orang ke beli.
31 Aku tepedaka umai enggau kebun nya penuh laban madang duri enggau babas. Dinding batu ti ngelingi umai enggau kebun nya udah runtuh.
32 Aku tepedaka utai nya, lalu berundingka iya; aku malik, lalu aku bulih pelajar ari nya.
33 Enti nuan tinduk bekerendut dada enda lama, lalu belelak,
34 penyeranta deka nyerang nuan baka perumpak ke besenyata.
 
Bagi 25
Jaku-dalam Ti Bukai Ari Solomon
1 Tu sekeda agi jaku-dalam ti disebut Solomon, ti ditulis bala pemesai raja Hesekiah di menua Judah.
2 Kitai ngemesaika Allah Taala ketegal utai ti dilalaika Iya. Kitai bebasaka raja ketegal utai ti diterangka sida.
3 Nuan nadai nemu utai ti diperundingka raja. Runding iya enda ulih diperagam kitai, baka peninggi langit tauka penalam tasik.
4 Buai utai ti kamah ari pirak, nya baru tukang pirak ulih ngaga utai ti manah ari nya.
5 Buai penyanding penemu raja ti jai, nya baru perintah iya deka bejalaika pengawa enggau lurus.
6 Lebuh nuan bediri di mua raja nuan patut ngemaruhka diri, lalu anang nguji ngaga diri baka orang ke tinggi pangkat.
7 Manah agi diasuh orang niki ngagai endur ti tinggi, ari ke diasuh orang angkat ari endur nya awakka endur nya diberi ngagai orang ke tinggi agi pangkat.
8 Anang kelalu jampat mai pekara ti dipeda nuan ngagai kot. Enti orang bukai nemu saksi nuan nya salah, nama utai ti deka dikereja nuan?
9 Enti nuan beserekang penemu enggau orang ke berimbai pendiau enggau nuan, atur pekara nya enggau iya, lalu anang madahka resia nya ngagai orang bukai,
10 enggai ke semua orang nemu nuan enda nemu nyimpan resia, lalu nuan deka malu seumur idup.
11 Penemu ti terang disebut sebaka enggau emas ti disangkumka enggau pirak.
12 Jaku tangkan ti diberi orang ke bisi peneleba ngagai orang ke deka mending, berega agi ari tinchin emas tauka ari utai ti berega ti digaga ari emas ti pemadu tulin.
13 Seruan ti tau dikarapka, ngerinduka ati orang ke ngasuh iya mai pesan, baka ai ti chelap lebuh hari angat lebuh maya ngetau.
14 Orang ke besemaya deka meri utai, tang enda, nya baka mua hari enggau ribut ti nadai ngasuh hari ujan.
15 Ati ti liat ulih nguingka ati penyakal ti pemadu kieh, lalu ulih nguingka ati bala orang ke merintah.
16 Anang sekali-kali makai ai manyi lebih ari ti patut, laban enti nuan makai kelalu mayuh, ai manyi nya tau ngasuh nuan mutah.
17 Anang kelalu suah nemuai ngagai orang ke berimbai pendiau enggau nuan, enggai ke sida leju meda nuan, lalu begedika nuan.
18 Jaku dawa ti bula nya baka pedang, baka pemalu, tauka baka laja ti tajam.
19 Ngarapka orang ke enda tau dikarapka lebuh maya penusah, nya baka orang ke nguji ngunyah utai ngena ngeli ti gerah, tauka bejalai ngena kaki ti enda ulih engkebut.
20 Enti nuan belagu di mua orang ke tusah ati nuan baka ke muka baju ari tubuh orang lebuh hari chelap, tauka baka ke nuang chuka ngagai telih iya.
21  Enti munsuh nuan lapar, beri sida makai. Enti sida aus, beri sida ai.
22 Nuan deka ngasuh sida malu, lalu TUHAN deka ngupah nuan.
23 Mulut ti chabul deka ngasuh orang ringat, baka ribut utara ti mai ujan.
24 Manah agi diau ba perabung rumah, ari ti diau dalam rumah begulai enggau bini ke ituk.
25 Nerima berita ari menua ti jauh nya baka ke ngirup ai chelap lebuh nuan rangkai aus.
26 Orang ke menyana, ti ngalahka diri lalu nurutka orang ke jai, nya baka mata ai ti kamah, tauka baka telaga ti udah diberi rachun.
27 Enti nuan makai kelalu mayuh ai manyi utai nya enda manah ke nuan, lalu baka nya mega enti nuan kelalu balat minta puji orang.
28 Enti nuan enda ulih nagang diri ringat, nuan nadai daya, baka nengeri ti nadai kuta, ti mudah diserang munsuh.
 
Bagi 26
1 Jaku puji enggai nyadi disebut ba orang ke beli, baka seleju ti nadai kala labuh lebuh musin panas, tauka baka hari ujan lebuh maya ngetau.
2 Jaku sumpah enda ulih ngemediska nuan, enti nuan endang enda patut disumpah. Jaku sumpah nya baka burung ti mansa terebai lalu nadai kala inggap.
3 Nuan enda tau enda nyipat kuda. Nuan enda tau enda ngelekatka tali ba mulut keledai, lalu nuan enda tau enda malu orang ke beli.
4 Enti nuan nyaut tanya ti beli, nuan sama beli baka orang ke mantaika tanya nya.
5 Beri saut ti beli ngagai tanya ti beli. Nya baru orang ke mantaika tanya nya deka nemu diri enda pintar munyi ti disangka iya empu.
6 Enti nuan ngasuh orang ke beli mai pesan, manah agi nuan netak kaki nuan empu, laban nuan minta penusah.
7 Orang ke beli enda ulih ngena jaku ti dalam. Iya sebaka enggau orang ke kait-kupit ti enda ulih ngena kaki diri.
8 Muji orang ke beli sigi nadai reti, baka ke nanchangka batu ba pangwang.
9 Orang ke beli, ke besebutka jaku ti dalam reti, nya baka orang ke mabuk, ke nguji ngulihka duri ari jari diri.
10 Orang ke ngupah orang ke beli lalu ngasuh iya bekereja lebuh iya mansa, semina ngemediska semua orang.
11 Orang ke beli ti ngereja utai ti enda menuku kedua kali, nya baka ukui ti pulai ngagai mutah diri empu.
12 Orang ke pemadu beli nya manah agi ari orang ke ngumbai diri bepenemu-dalam, tang iya ti bendar iya ukai orang ke bepenemu-dalam.
13 Nama kebuah orang ke ngelusu enda pansut ari rumah? Nama utai ti tau ngerampit sida? Kati sida takutka singa?
14 Orang ke ngelusu singit ke kiba, singit ke kanan ba peninduk diri, baka pintu ti telenga tikup.
15 Sekeda orang kelalu ngelusu, datai ke sida nyau enda tesuapka pemakai ke diri empu.
16 Orang ke ngelusu deka ngumbai diri pintar agi ari tujuh iku orang ke nemu nerangka penemu diri.
17 Enti nuan bekelikuh enggau orang pasal pekara orang bukai, nuan baka orang ke bejalai nengah jalai raya lalu musil pending ukui.
18-19 Orang ke nipu orang bukai, lalu udah nya ngumbai diri semina betundi aja, nya baka orang ke gila ke bemain ngena senyata ti tajam.
20 Api padam enti nadai kayu. Enti orang nadai bejakuka pangan diri ari belakang, orang badu agi belaya.
21 Arang ngasuh bara api majak menyadi. Kayu ngasuh api majak menyadi, lalu orang ke ngaga pengachau ngasuh kelikuh nadai nemu abis.
22 Chabul mulut nyamai amat asai! Naka meh pengingin kitai nelan iya!
23 Jaku ti manis ti dikena nuan ngelalaika runding diri nya baka chat ti alus ti dikena ngechat periuk tanah ti murah.
24 Orang ke pura-pura ngapa, ngelalaika ati diri ti begedi ngena jaku ti manis.
25 Jaku iya munyi ti manah, tang anang arapka iya, laban ati iya penuh laban pemenchi.
26 Iya nyangka nguji ngelalaika ati diri ti begedi, tang semua orang deka meda utai ti jai ti dikereja iya.
27 Orang ke nan panjuk kena nyintak orang bukai, deka kena sintak panjuk diri empu. Orang ke ngasuh tanah tusur, deka ditinggang tanah nya.
28 Mulut ti bula begedika orang ke dikemulaka iya, lalu jaku ti manis semina mai pengerusak.
 
Bagi 27
1 Anang temegah bejakuka pasal pagila, laban nuan enda nemu utai ti deka nyadi entara diatu enggau pagila.
2 Awakka orang bukai muji nuan. Orang kampar pen tau meh muji nuan. Anang sekali-kali muji diri.
3 Batu enggau pasir kurang agi berat enti dibandingka enggau penusah ti tau nyadi ketegal orang ke beli.
4 Pengeringat nya utai ti jai sereta ngerusak, tang iya enda ulih dibandingka enggau ati ti kepapas.
5 Manah agi ngerara orang enggau chara ti terang, ari ke nejuka iya ngumbai nuan enda ibuhka iya.
6 Pangan nganu enggau ati ti manah, taja pen nuan pedis dianu sida. Tang bejaga nuan lebuh munsuh engkauk nuan!
7 Lebuh nuan kenyang, nuan enggai nerima ai manyi, tang lebuh nuan lapar, indah pemakai ti pait deh asai ti manis.
8 Orang ke jauh ari menua diri nya baka burung ti ninggalka sarang.
9 Minyak wangi enggau minyak ti bebau rengut ngasuh ati nuan lantang agi, tang pengachau ngasuh ati nuan irau.
10 Anang enda ingatka pangan nuan, tauka pangan apai nuan. Enti nuan bisi penusah, anang minta tulung ari kaban belayan nuan. Orang ke berimbai pendiau enggau nuan ulih nulung nuan lebih agi ari kaban belayan nuan ti diau jauh ari nuan.
11 Nuan enda tau enda bepenemu-dalam, anak, nya baru aku deka lantang ati, lalu ulih nyaut semua orang ke nganu aku.
12 Orang ke mereti deka meda penusah datai, lalu nyeliahka penusah nya, tang orang ke enda berunding deka tetempuhka penusah nya, lalu ngesalka nya.
13 Barang sapa chukup beli lalu besemayaka betanggungjawapka utang orang bukai, patut nejuka reta tengkira sida ditan nyadika gadai.
14 Ngerak pangan diri enggau nyawa ti inggar lebuh pagi hari nya baka ke nyumpah iya.
15 Bini ke ituk nya munyi teritik ai ujan.
16 Baka ni ku nuan ulih nagang iya bejaku? Kati nuan bisi udah kala nagang ribut, tauka nguji ngenggam minyak?
17 Orang belajar ari pangan diri nya baka besi ti ngansah besi.
18 Enti nuan ngintu kayu ara, nya baru nuan bisi buah ara diempa. Orang gaji ke ngintu tuan sida, deka dibasa.
19 Baka nuan ke meda kelemayang mua diri ba ai, baka nya meh nuan meda diri empu dalam ati nuan.
20 Pengingin mensia nya baka dunya pemati, endang nadai sekat.
21 Pemanah emas enggau pirak diabas ngena api. Pemanah orang pen ulih mega diabas.
22 Taja pen nuan malu orang ke beli setengah mati, enda meh nuan ulih ngasuh sida badu agi beli.
23 Intu raban bedus enggau raban jelu sapi nuan enggau naka ulih nuan,
24 laban pengaya enda ulih tan belama iya. Indah bansa deh enda ulih tan belama iya.
25 Rumput ba umai enggau ba munggu ditebas lalu digumpul nyadika pemakai jelu tupi lalu rumput dia ditejuka tumbuh baru.
26 Nuan tau ngaga kain ari bulu bedus nuan empu, lalu meli tanah ngena duit ari rega kambin nuan.
27 Kambin ti bukai deka meri ai tusu ngagai nuan enggau ngagai kita sebilik, enggau ngagai bala orang gaji nuan ti indu.
 
Bagi 28
1 Orang ke jai rari taja pen orang nadai begagaika sida, tang orang ke lurus ati, berani baka singa.
2 Lebuh siti bansa bedosa, orang ke merintah sida deka seruran betukar. Tang bansa deka nyadi kering sereta tan, lebuh bansa nya diperintah bala tuai ti landik berunding sereta mereti.
3 Orang ke megai kuasa, ke nekanka pengidup orang ke seranta nya baka ujan ti ngerusak utai ti ditanam.
4 Enti nuan enda bebasaka adat, nuan setanah enggau orang ke jai. Tang enti nuan ngasika adat, nuan ngelaban orang ke jai.
5 Orang ke jai enda meretika utai ti dikumbai atur ti lurus, tang orang ke nyembah TUHAN nemu reti atur nya.
6 Manah agi nyadi orang ke seranta sereta betul ati, ari ke nyadi orang ke kaya tang ngembuan ati ti enda betul.
7 Orang ke biak ke ngasika adat nya orang ke nemu berunding. Orang ke bepangan enggau orang ke nadai guna, ngemaluka apai indai sida.
8 Enti nuan kaya ari nuan ke bepintaka duit ba utai ti dijual nuan, lalu ngambi ulih ba orang, pengaya nuan deka pulai baru ngagai orang bukai ke nemu siru enggau orang ke seranta.
9 Enti nuan enda ngasika adat, Allah Taala deka ringat lalu enggai mendingka sampi nuan.
10 Enti nuan nipu orang ke lurus ati, lalu mai iya ngereja penyai, nuan deka kena sintak panjuk nuan empu, tang orang ke nadai penyalah deka diberi upah ti besai.
11 Orang ke kaya ngumbai diri bepenemu-dalam, tang orang ke seranta, ti mereti, deka nemu sapa orang nya ke bendar.
12 Lebuh orang ke lurus megai kuasa, semua orang lantang diau, tang lebuh orang ke jai merintah, orang belalai.
13 Nuan enda ulih mujur dalam pengidup nuan, enti nuan nguji ngelalaika dosa diri. Tang enti nuan ngaku dosa diri lalu badu agi bedosa, nya baru Allah Taala deka kasihka nuan.
14 Anang enda seruran ngasika TUHAN, nya baru nuan deka lantang diau, tang enti nuan kieh, nuan deka rusak.
15 Orang ke seranta nadai daya ngelaban raja ti jai, laban raja nya mangah baka singa ti negung, tauka baka beruang ti segau-segau.
16 Raja ti enda nemu berunding, jai enggau orang, tang raja ke begedika ati ti enda betul, deka lama merintah.
17 Orang ke munuh orang endang numbak kubur ke diri empu enggau naka penyampat. Anang nguji nagang iya.
18 Awakka ati nuan betul, nya baru nuan deka diau likun, tang enti ati nuan enda betul,nuan deka rebah enggau ngenyit.
19 Orang bumai ke bagas, deka mayuh utai diempa, tang orang ke masau jam, deka seruran seranta.
20 Orang ke lurus ati, deka idup lantang senang, tang enti nuan deka jampat kaya, nuan deka kena ukum.
21 Bepilih mata nya utai ti salah; tang sekeda hakim deka ngereja utai ti salah, kena sida makai suap ti pemadu mit.
22 Orang ke semina berundingka diri empu aja beguai-guai deka nyadi kaya datai ke sida nyau enda nemu diri deka ditinggang penyeranta.
23 Rara lalu ajar orang, lalu udah nya baru iya nemu begunaka jaku nya lebih agi ari jaku kelangkung.
24 Orang ke ngumbai diri enda salah ngenchuri utai ari apai indai diri, nya jai agi ari penchuri.
25 Semina berundingka diri empu aja deka nyungkak pengachau nyadi. Manah agi nuan manggaika pengarap nuan ba TUHAN.
26 Nuan beli enti nuan nitihka penemu diri, tang enti nuan nitihka ajar orang ke dalam agi penemu, nuan deka diau likun.
27 Beri utai ngagai orang ke seranta, nya baru nuan enda nemu suntuk, tang enti nuan nutup mata nuan ngagai orang ke seranta, mayuh orang deka nyumpah nuan.
28 Orang belalai lebuh orang ke jai angkat megai kuasa, tang lebuh sida dibuai ari kuasa, orang ke lurus deka merintah baru.
 
Bagi 29
1 Enti nuan majak kieh genap kali orang ngajar nuan, jemah ila nuan deka rusak lalu enda ulih angkat agi.
2 Tunjukka siku pemerintah ke lurus, lalu aku deka nunjukka orang ke lantang diau. Tunjukka pemerintah ti jai, lalu aku deka nunjukka orang ke merinsa diau.
3 Enti nuan nemu begunaka penemu-dalam, apai indai nuan deka temegahka nuan. Nuan beli enti nuan masau duit ba indu sundal.
4 Lebuh raja keran deka ngeringka atur ti lurus, bansa deka kering, tang lebuh iya semina berundingka duit aja, iya deka ngerusak menua.
5 Enti nuan pura-pura ngapa bejaku manis enggau pangan nuan, nuan semina nan panjuk kena nuan nyintak diri empu.
6 Orang ke jai disintak dosa sida empu, tang orang ke lurus ati diau lantang senang sereta nadai utai ngawa.
7 Orang ke menyana nemu hak orang ke seranta, tang orang ke jai enda meretika utai nya.
8 Orang ke enda berundingka orang bukai, tau ngasuh nengeri kachau, tang orang ke bepenemu-dalam ulih nagang pengachau nyadi.
9 Lebuh orang ke pintar bechara ngelaban orang ke beli, orang ke beli nya semina ketawa aja, inggar sereta ngelese.
10 Orang ke selalu deka bebunuhka orang begedika orang ke lurus ati, tang orang ke lurus deka nyaga pengidup orang ke lurus ati.
11 Orang ke beli ngayanka pengeringat diri di mua orang mayuh, tang orang ke mereti, nemu liat ati lalu nagang diri ringat.
12 Enti raja mendingka berita ti bula, semua bala pemesai iya deka nyadi orang ke bula.
13 Orang ke seranta, enggau orang ke nekanka pengidup sida, sama diberi TUHAN mata.
14 Enti raja nyaga hak orang ke seranta, iya deka lama nyadi raja.
15 Sipat enggau jaku anumeri penemu-dalam. Indai deka malu laban anak, enti indai nejuka anak enda disipat, enda dirara.
16 Lebuh orang ke jai megai kuasa, pengawa ti jai deka betambah. Tang orang ke lurus deka meda orang ke jai rebah.
17 Disiplin anak kita, nya baru kita seruran tau temegahka sida. Sida nadai kebuah ngasuh kita malu.
18 Enti enda diiring Allah Taala, mensia deka charut, tang beberekat meh orang ke nitihka adat Allah Taala!
19  Nuan enda ulih ngerara orang gaji nuan semina ngena jaku aja. Sida nyangka meretika utai ti ku nuan, tang sida enggai mending.
20 Orang ke beli bisi agi pengadang ari orang ke bejaku enggau enda berunding.
21 Enti nuan meri semua utai ti dipinta ulun nuan kenyau ari sida agi mit, jemah ila sida deka ngerampas semua utai nuan.
22 Orang ke lengkar nyungkak orang balat belaya, sereta ngaga pengachau.
23 Ati ti sumbung deka ngasuh nuan rebah, tang enti nuan baruh ati, nuan deka dibasa orang.
24 Orang ke bekereja enggau penchuri, begedika diri empu. Iya deka diukum enti iya madahka utai ti bendar dalam kot, lalu enti iya enda, iya deka disumpah Allah Taala.
25 Enti nuan irauka jaku orang, nuan tusah diau, tang enti nuan manggaika pengarap nuan ba TUHAN, nuan deka likun.
26 Semua orang bela ingin minta diri nyadi pangan orang ke merintah, tang nuan semina tau bulih atur ti lurus ari TUHAN.
27 Orang ke lurus begedika orang ke jai, lalu orang ke jai begedika orang ke lurus.
 
Bagi 30
Jaku Agur
1 Tu jaku Agur anak Jakeh: “Allah Taala nadai enggau aku, Allah Taala nadai enggau aku, lalu aku nadai daya agi.
2 Aku tu baka jelu, ukai baka mensia lalu aku enda nemu reti utai.
3 Aku nadai kala belajarka penemu-dalam, lalu aku nadai nemu pasal Allah Taala.
4 Kati orang bisi udah ulih meretika penemu ti datai ari serega? Kati orang bisi udah kala ngenggam ribut ngena jari sida? Tauka mungkus ai ngena kain? Tauka ngeletak pemesai dunya? Sapa orang nya, enti kita nemu? Sapa bala anak sida?
5 “Allah Taala ngamatka semua semaya ti digaga Iya. Iya baka terabai ke semua orang ke minta diri dijaga Iya.
6 Enti nuan ngumbai Iya bisi udah nyebut utai ti enda kala disebut Iya, Iya deka nganu nuan, lalu mandangka nuan nya orang ke bula.”
 
Jaku-dalam Ti Bukai
7 Aku minta Nuan, Allah Taala, meri aku dua iti utai sebedau aku mati:
8 tagang aku bula, lalu awakka aku ukai kaya tauka seranta. Nya alai, beri ngagai aku pemakai umbas ke guna aku.
9 Enti aku diberi lebih ari nya, enggai ke aku ngumbai diri enda begunaka Nuan. Tang enti aku seranta, aku enggai ke diri ngenchuri, lalu ngemaluka Allah Taala
aku.
10 Anang sekali-kali mantah bala orang gaji di mua tuan sida. Nuan deka kena sumpah lalu merinsa ketegal nya.
11 Orang bisi nyumpah apai diri, lalu enda nemu gaga ati ke indai sida.
12 Orang bisi ngumbai diri tuchi, taja pen sida iya pemadu kamah.
13 Orang bisi ngumbai diri manah. Balat amat sida ngumbai diri manah!
14 Orang jai amat ngambi ulih ba orang ke seranta enggau ke suntuk. Nya endang jalai sida beridup.
15 Siku lintah bisi dua iku anak indu, lalu seduai iya sama benama “Beri aku!”
Tu empat iti utai ti enda nemu puas:
16 dunya pemati, indu ke nadai anak, tanah rangkai ti begunaka ai ujan, enggau api ti enda ulih dipadamka.
17 Enti nuan beduan apai nuan, tauka enda bebasaka indai nuan lebuh iya nyau tuai umur, nuan patut diempa burung ti bepakaika bangkai, tauka leka mata nuan dipantuk burung kak.
18 Tu empat bengkah utai ti nyelai lalu enda ditemu aku reti:
19 Siku menaul ti terebai di langit, siku ular ti ngerayap ba atas batu, sebuah kapal ti belayar di tasik, enggau siku lelaki enggau siku indu ke rinduka pangan diri.
20 Baka tu ku gaya ulah bini ti enda tetap ati: iya butang, mandi, lalu bejaku, “Aku nadai udah ngereja penyalah!”
21 Tu empat bengkah utai ti enda ulih ditatka dunya:
22 ulun ti nyadi raja, orang ke beli ke bisi semua utai dipakai iya,
23 indu ke dipegedika, ke bulih laki, enggau orang gaji ti indu, ke ngambi laki indu ke ngaji iya gawa.
24 Tu empat bengkah jelu di dunya tu ti mit, tang pintar amat:
25 Semut: sida lemi, tang sida besimpanka pemakai lebuh musin panas.
26 Tikus tanah: sida tu pen enda mega kering, tang sida berumah ba sebelah batu.
27 Buntak: sida nadai raja, tang sida nemu mindah kia-kia begulai enggau pangan.
28 Tichak: nuan enda ulih nangkap sida ngena jari, tang nuan tau tetemuka sida dalam istana.
29 Tu empat bengkah utai ti manah gaya dipeda lebuh sida bejalai:
30 singa, jelu ti pemadu kering sereta enda nemu takut;
31 kambin enggau manuk sabung, enggau raja di mua bala nembiak iya.
32 Enti nuan udah beli ngeninggika diri, lalu udah bekira deka ngereja penyai, ngetu nuan dulu, lalu berunding!
33 Enti nuan nunyau ai tusu, nuan deka bulih tusu ti meku. Enti nuan malu idung orang, idung iya deka bedarah. Enti nuan nyungkak orang ringat, nuan deka
bulih penusah.
 
Bagi 31
Jaku Lalau Ti Diberi Ngagai Siku Raja
1 Tu jaku ti disebut indai Raja Lemuel ngagai iya:
2 “Nuan tu anak ke dikesayauka aku. Nuan tu meh saut ke sampi aku. Nama utai ti deka dipadahka aku ngagai nuan?
3 Anang ngabiska tulang beleman, lalu anang ngabiska duit nuan ba indu. Sida udah ngerusak bala raja.
4 Pendingka tu, Lemuel. Raja enda patut ngirup wain, tauka tetengukka ai ti bisa.
5 Lebuh sida ngirup, sida enda ingatka adat, lalu enda ibuhka hak orang ke suntuk.
6 Ai arak nya ungkup ke orang ke mati, ke orang ke merinsa diau.
7 Awakka sida ngirup, lalu enda agi ingatka penyeranta enggau ati ti enda lantang idup.
8 “Anang enda bejaku ngarika orang ke enda ulih ngarika diri empu. Jaga hak semua orang ke nadai daya.
9 Bejaku ngarika sida, lalu nyadi hakim ke lurus. Jaga hak orang ke seranta, enggau ke suntuk.”
 
Bini Ke Landik Ngereja Pengawa
10 Naka meh pemar ngiga bini ke nemu ngereja utai! Iya berega agi ari semua batu ti berega!
11 Laki iya ngarapka iya, lalu laki iya enda sekali-kali seranta diau.
12 Seagi-agi iya idup, iya ngereja utai ti manah ke laki iya, lalu enda kala ngemediska iya.
13 Iya seruran bekereja begagaka kain ari bulu bedus enggau ari linin.
14 Iya mai pemakai ke rumah ari endur ti jauh, baka kapal ti dikena orang bedagang.
15 Iya angkat sebedau rerak tawas, nyendiaka pemakai ke sida sebilik, lalu madahka bagi pengawa ngagai sida indu ke orang gaji iya.
16 Iya meresa tanah, lalu meli tanah nya, lalu ngena duit ti ulih iya, iya numbuhka kebun anggur.
17 Iya indu ke bagas, kering sereta rajin.
18 Iya nemu rega semua utai ti digaga iya, lalu iya gawa jauh malam.
19 Iya ngaga ubung ke diri empu, lalu nenun kain ke diri empu.
20 Iya gerah ati meri utai ngagai orang ke seranta enggau orang ke suntuk.
21 Iya enda irau ati lebuh seleju nyadi, laban sida sebilik bisi gari kena ngintu tubuh diri angat.
22 Iya ngaga chadar tilam, lalu ngerasukka kain linin ti alus ti mirah-redam.
23 Laki iya endang dikelala orang, siku ari orang ke tinggi pangkat.
24 Iya ngaga gari enggau belulang, lalu nyual utai nya ngagai orang ke bedagang.
25 Iya regas, sereta dibasa orang, lalu iya enda takutka utai ti nyadi jemah ila.
26 Iya bejimat sereta pintar mansutka jaku.
27 Iya endang enda jenuh lalu seruran meratika utai ti dipeguna sida sebilik.
28 Bala anak iya beterima kasihka utai ti dikereja iya, lalu laki iya muji iya.
29 Ku laki iya, “Bini ti manah amat mayuh, tang nuan tu bini ke pemadu manah.”
30 Pemajik tau nipu, lalu pemanah gamal tau lenyau, tang indu ke nangika TUHAN patut dipuji.
31 Puji meh iya ketegal semua utai ti dikereja iya. Iya endang patut dibasa semua orang.