JOP
 
Jaku Pemuka
Bup  Jop* nusui pasal siku orang ke badas, ke balat ditinggang penusah. Semua anak iya mati magang, lalu semua reta tengkira iya abis dirampas orang, lalu iya balat merinsa natka penyakit ti udu kamah. Udah nya, ngena tiga bengkah jaku ti bebungai, orang ke nulis bup tu ngayanka chara bala pangan Jop enggau Jop empu napi penusah nya. Ba pengujung iya, Allah Taala Empu, ke seruran bekaul enggau mensia, lalu nyadika buah jaku dalam randau tu, pegari di mua Jop.

Bala pangan Jop nerangka pemerinsa iya ngena penemu asal ti datai ari pengarap sida. Ku penemu sida, laban Allah Taala endang seruran meri upah ngagai utai ti manah, lalu ngukum utai ti jai, pemerinsa ti ditatka Jop nya nunjukka Jop udah bedosa. Tang ba penemu Jop, utai nya enda ngemudah nya. Iya enda patut diukum ngemalat nya, laban iya orang ke badas sereta lurus. Iya enda meretika kebuah Allah Taala nejuka utai ti ngenyai nya nyadi ba orang ke baka iya, lalu iya berani nyakap Allah Taala. Jop enda muai pengarap iya ke Allah Taala, tang iya tetenguk minta diri digaga lurus di mua Allah Taala, lalu dibasa Allah Taala baru ketegal pemanah iya.

Allah Taala enda nyaut tanya Jop, tang Iya malas pengarap Jop ngena mayuh amat jaku ti bebungai ti mandangka kuasa enggau penemu-dalam ti dikembuan Allah Taala Empu. Udah nya Jop lalu ngemaruhka diri lalu ngaku Allah Taala endang bepenemu-dalam sereta besai, lalu iya nesal ati ke jaku ti enda menyana ti udah disebut iya.

Jaku ti ngujungka bup tu madahka chara Jop pulai baru ngagai pengidup iya ti dulu, lalu nyadi mujur agi ari ti keterubah. Allah Taala nganu bala pangan Jop, laban sida enda meretika guna pemerinsa Jop. Semina Jop siku aja ti udah ngasaika Allah Taala nya besai agi ari ti dipadahka dalam pengarap asal.
 
Ripih Isi Bup Tu
Pun jaku (1.1-2.13)
Jop enggau bala pangan iya (3.1-31.40)
     a. Jaku putap Jop (3.1-26)
     b. Randau Jop ti keterubah (41-12.22)
     c. Randau ti kedua (15.1-21.34)
     d. Randau ti ketiga (22.1-27.23)
     e. Muji penemu-dalam (28.1-28)
     f. Jaku Jop ti penudi (29.1-31.40)
Jaku Elihu (32.1-37.24)
TUHAN nyaut Jop (38.1-42.6)
Jaku penutup (42.7-17)
 
Bagi 1
Sitan Nguji Jop
1 Dulu menya bisi orang siku benama Jop. Iya diau di menua Us, Iya tu orang ke badas sereta lurus, nangika Allah Taala sereta enggai ngereja penyai.
2 Iya bisi tujuh iku anak lelaki, enggau tiga iku anak indu.
3 Iya bisi tujuh ribu iku jelu bedus, tiga ribu iku unta, seribu iku sapi, enggau lima ratus iku keledai. Orang gaji iya mega mayuh, lalu iya orang ke pemadu kaya di Timur.
4 Bala anak lelaki Jop selalu begintir-gintir nyendiaka pengerami makai besai, lalu semua sida menyadi ti lelaki datai magang. Sida selalu mai menyadi indu sida ngagai pengerami nya.
5 Lebuh pengerami makai besai nya udah tembu, Jop mesanka sida lalu nuchi sida. Iya angkat tumu pagi lalu ngenjuk piring tunu ke genap iku bala anak iya, laban ku iya berunding, “Nyangka anak aku bisi udah bedosa lalu nyumpah Allah Taala dalam ati sida.’’ Nya meh utai ti selalu dikereja Jop.
6 Nyadi sekali lebuh bala orang serega datai ngadap TUHAN, Sitan bisi mega datai enggau sida.
7 TUHAN lalu nanya Sitan, “Datai ari ni nuan?’’ Sitan lalu nyaut, “Aku udah bejalai kia-kia, segau-segau nengah dunya tu.’’
8 TUHAN lalu nanya Sitan, “Kati nuan bisi udah berundingka nembiak Aku Jop? Nadai orang di dunya ke badas sereta lurus baka iya, ke nangika Allah Taala sereta nyeliahka penyai.’’
9 Sitan lalu nyaut, “Kati Jop deka nyembah Nuan enti iya nadai bulih utai ari nya?
10 Ukai enda Nuan ke seruran nyaga iya, nyaga ruang bilik enggau semua utai ti diempu iya? Nuan udah merekatka semua utai ti dikereja iya, lalu jelu bedus enggau jelu sapi iya udah nambah-menambah di menua tu.
11 Tang enti Nuan ngunjurka jari Nuan, lalu ngambi semua utai ti dikemisi iya, iya tetap deka nyumpah Nuan mua mata!’’
12 “Barang ku jaku,’’ ku TUHAN bejaku enggau Sitan, “semua utai ti dikemisi iya sigi ba jari nuan magang, tang nuan enda tau ngemediska Jop.’’ Sitan lalu mupuk.
 
Bala Anak Jop Enggau Pengaya Iya Dirusak
13 Nyadi sekali, lebuh bala anak Jop benung ngintu pengerami makai besai ba rumah aka tuai sida,
14 siku seruan datai belanda ngagai Jop. Ku iya, “Kami benung ngeradu tanah ngena sapi, lalu raban keledai meruan ba padang rumput semak endur nya.
15 Orang Sabean lalu ngenyit nyerang kami lalu ngerampas semua jelu nya. Sida munuh semua bala orang gaji nuan. Semina aku aja ulih ngerarika diri lalu madahka tu ngagai nuan.’’
16 Lebuh orang gaji nya agi benung bejaku, siku agi orang gaji datai, lalu bejaku, “Jelu bedus enggau bala pengibun bedus udah dipangkaka ngitar, lalu semua sida mati magang. Ka semina aku aja agi idup lalu madahka utai tu ngagai nuan.’’
17 Lebuh orang gaji nya agi benung bejaku, siku agi orang gaji datai lalu bejaku, “Tiga bengkah raban soldadu penyelawai orang Kaldea udah nyerang kami, ngerampas jelu unta, lalu munuh semua bala orang gaji nuan. Ka semina aku aja ulih ngerarika diri lalu madahka utai tu ngagai nuan.’’
18 Lebuh orang gaji nya agi benung bejaku, siku agi orang gaji datai, lalu bejaku, “Lebuh bala anak lelaki enggau anak indu nuan agi benung ngintu pengerami makai besai ba rumah anak tuai nuan,
19 kabut ti besai datai lalu ngenyit mangka ari menua puang, numbangka rumah. Semua sida mati magang ditinggang rumah nya. Ka semina aku aja agi idup lalu madahka utai tu ngagai nuan.’’
20 Jop lalu angkat, nyarikka gari diri, ngukur pala iya, lalu nyungkurka diri ke tanah nyembah Allah Taala.
21 Ku iya bejaku, “Aku ada telanjai, lalu aku deka mati telanjai. TUHAN udah meri, lalu TUHAN udah ngambi. Pujika nama TUHAN!’’
22 Dalam semua utai nya, Jop enda bedosa, laban iya enda besalah Allah Taala.
 
Bagi 2
Sitan Nguji Jop Baru
1 Lebuh bala orang serega datai baru ngadap TUHAN, Sitan bisi mega datai enggau sida.
2 TUHAN lalu nanya Sitan, “Datai ari ni nuan?’’ Sitan lalu nyaut, “Aku udah bejalai kia-kia, segau-segau nengah dunya.’’
3 TUHAN lalu nanya Sitan, “Kati nuan bisi udah berundingka nembiak Aku Jop? Nadai orang dalam dunya tu badas sereta lurus baka iya, ke nangika Allah Taala sereta enggai ngereja penyai. Iya agi majak diau lurus, taja pen nuan udah nyungkak Aku ngelaban iya, lalu ngerusak iya enggau nadai kebuah.’’
4 Ku Sitan nyaut TUHAN, “Mensia deka ngelengkaka semua utai, asal nyawa iya idup.
5 Tang enti nuan ngemediska iya, lalu negu tulang enggau isi iya, iya tentu deka nyumpah Nuan mua mata!’’
6 TUHAN lalu bejaku, “Barang ku jaku, iya ba jari nuan, tang nuan enda tau munuh iya.’’
7 Udah nya Sitan lalu ninggalka TUHAN, lalu ngasuh penyakit rumbak nyelamar ba sebelah tubuh Jop.
8 Jop mupuk lalu duduk ba endur alai orang ke muai uras, lalu ngambi kerimpak periuk kena iya ngikis tubuh diri.
9 Ku bini iya bejaku enggau iya, “Kati nuan agi mengkang tetap ati? Nama kebuah nuan enda nyumpah Allah Taala, lalu mati?’’
10 Disaut Jop, “Nuan bejaku munyi indu ke beli! Kati kitai semina nerima utai ti manah ari jari Allah Taala, lalu enggai nerima utai ti jai?’’ Dalam semua utai nya Jop nadai bedosa ngena mulut iya.
 
Bala Pangan Jop Datai
 11 Jop bisi tiga iku pangan. Sida nya Elipas, ari nengeri Teman, Bildat, ari menua Suah, enggau Sopar, ari menua Naamah. Lebuh sida ninga Jop balat merinsa, sida berunding deka nemuai lalu merindang iya.
12 Lebuh sida tepedaka Jop ari jauh, sida nyau enda ngelala iya agi. Lebuh sida nyau ngelala iya, sida lalu bekeduie nyabak, nyarikka gari diri, lalu ngerabuka amau ngagai pala sida, laban sida balat tusah ati.
13 Udah nya sida lalu duduk enggau iya tujuh hari tujuh malam, nadai bejaku seleka, laban sida meda iya kelalu balat merinsa.
 
Bagi 3
Jop Mutap Ngelaban Allah Taala
1 Nyau kelama udah nya, nya baru Jop bejaku, lalu nyumpah hari iya ada.

Ku Jop

2-3 O Allah Taala, sumpah meh hari aku ada. Sumpah mega malam aku dikandungka!
4 Asuh hari nya nyadi petang, Allah Taala. Anang agi ngingatka hari nya. Anang agi nejuka penampak manchar ngagai iya.
5 Asuh hari nya nyadi piam sereta petang enda dipeda achuk mata. Bungkur iya ngena mua hari, lalu lindung iya ari mata hari.
6 Buai malam nya ari taun, lalu anang ngitung iya agi.
7 Asuh malam nya kusung, nadai pengaga.
8 Asuh ti tau tepang nyumpah hari nya, sida ke nemu merintah naga.
9 Anang ngasuh bintang bendang-bendang tumbuh pagi hari. Anang ngasuh malam meda penampak dini hari.
10 Sumpah meh malam nya, laban iya udah nejuka aku ada, udah ngasuh aku natka pemerinsa enggau penusah.
11 Manah agi enti aku mati dalam kandung indai aku tauka mati lebuh aku baru ada.
12 Nama kebuah indai aku mangku aku? Nama kebuah iya nusuka aku?
13 Enti aku mati lebuh maya nya suba, aku tentu ulih diau jenuh belelak diatu,
14 Tinduk baka raja enggau bala pemerintah ke udah nirika baru istana ti lama.
15 Nya baru aku ulih tinduk baka anak raja ke ngisi rumah diri enggau perengka emas enggau pirak,
16 Tauka tinduk baka anak mit ke mati lulus.
17 Dalam kubur, orang ke jai badu agi ngereja pengawa ti jai, lalu orang ke bekereja ulih belelak.
18 Indah orang tutup deh nemu gaga ati diau dalam pemaik, nadai agi ninga jaku perak tauka jaku pejal ti kasar.
19 Semua orang bisi dia magang, orang ke tebilang nama enggau orang ke enda dikelala orang, lalu ulun dilepaska ari tuan sida.
20 Nama kebuah nejuka orang majak idup merinsa? Nama kebuah meri penampak ngagai orang ke tusah ati?
21 Sida nganti pemati, tang pemati nadai datai. Sida rindu agi ke kubur ari ti rinduka pengaya.
22 Sida lantang ati enti sida mati, lalu dikuburka.
23 Allah Taala ngelalaika penunga sida ke jemah ila lalu mempang sida.
24 Aku enda makai, tang ngulit, lalu aku enda badu bedemuh.
25 Semua utai ti diketakutka aku, nyadi magang ba aku.
26 Aku nadai pemaik, nadai ulih belelak, lalu penusah aku enda nemu abis.
 
Bagi 4
Jaku Randau Ti Keterubah
Ku Elipas:
1-2 Jop, aku ngarapka nuan enda ringat ninga aku bejaku. Aku enda ulih natka diri enda bejaku.
3 Mayuh orang udah diajar nuan lalu nuan udah ngeringka jari ti lemi.
4 Lebuh orang tesangkut, lembut tulang sereta lelak, jaku nuan meransang orang nya bediri.
5 Diatu tu meh maya nuan empu deka ditinggang penusah, lalu nuan deka temati-kutu napi penusah nya.
6 Nuan udah nyembah Allah Taala, lalu pengidup nuan nadai jalai mantah. Nya alai nuan patut kempang ati sereta andal.
7 Uji kingatka utai ti udah, lalu sebut siti pekara alai orang ke lurus udah dituntung penusah.
8 Aku bisi udah meda orang ngeradu tanah penyai lalu nanam penyai baka ke nanam leka utai. Diatu sida ngetau penyai enggau penyalah.
9 Allah Taala ringat lalu ngerusak sida baka kabut.
10 Orang ke jai bejaku munyi singa ti negung, tang Allah Taala ngasuh sida badu agi bemunyi lalu matahka ngeli sida.
11 Sida mati baka singa ti nadai utai dipakai, lalu semua anak sida pambar pendiau magang.
12 Nyadi sekali siti pesan datai enda inggar, datai ke aku nyau deka enda ulih ninga iya.
13 Iya ngachau aku tinduk lalu ngasuh aku ngigau.
14 Aku getar-getar sereta digak-digak. Semua tubuh aku getar-getar takut.
15 Ribut ti enda deras muput ngagai mua aku, bulu aku lalu nyeregu laban aku takut.
16 Aku bisi meda utai bediri dia. Aku bebendar amat merening, tang aku enda ngelala utai nya. Udah nya aku lalu ninga munyi nyawa bejaku ari utai ti sunyi nya:
17 “Kati mensia ulih diau lurus di mua Allah Taala tauka diau tuchi di mua Allah Taala ti ngaga iya?
18 Allah Taala enda arapka bala nembiak Iya ke di serega. Indah bala melikat Iya deh dikumbai Iya bisi penyalah.
19 Kati nuan ngumbai Iya deka arapka utai ti ditempa ari tanah liat, utai ti datai ari amau ti ulih dipichit baka indu buyah?
20 Kitai nyangka idup lebuh pagi hari, tang kitai mati enda ditemu orang sebedau lemai hari.
21 Semua utai ti dikemisi kitai dirampas magang. Kitai mati, mengkang enda bepenemu-dalam.’’
 
Bagi 5
1 Jop, uji nuan ngangau; kati orang bisi nyaut? Kati melikat bisi alai nuan ngadap?
2 Munuh diri ngena pengeringat nya utai ti beli, ti nadai reti.
3 Aku bisi udah kala meda orang ke beli, ti baka ke likun pendiau, tang tekala nya aku nyumpah rumah ti alai sida diau.
4 Bala anak sida nadai agi pengelikun. Nadai orang deka angkat bejaku ngarika sida dalam kot.
5 Orang ke lapar deka bepakaika utai ti ditanam orang ke beli nya nyengkaum gandum ti tumbuh ba madang duri lalu orang ke aus deka ngining pengaya orang ke beli nya.
6 Penyai ukai tumbuh ba tanah, lalu penusah pen ukai mega pansut ari tanah.
7 Ukai! Kitai empu ke ngasuh diri ditinggang penusah, baka murun api ti terebai ke langit.
8 Enti aku baka nuan, aku tentu deka nguing ngagai Allah Taala lalu mantaika pekara aku di mua Iya.
9 Kitai enda ulih meretika pemesai pengawa Allah Taala, lalu kereja ajih Iya endang enda nemu abis.
10 Iya ngasuh hari ujan lalu manjah tanah.
11 Sigi amat! Allah Taala ngangkatka orang ke baruh ati lalu ngelantangka ati semua orang ke ngulit.
12-13 Iya ngemuntanka pelan orang ke pintar, lalu manjuk orang ke bepenemu-dalam ngena akal sida empu, ngambika pengawa sida puntan.
14 Indah lebuh tengah hari deh sida besagam dalam petang.
15 Tang Allah Taala ngelepaska orang ke seranta ari kuasa pemati. Iya ngelepaska orang ke seranta ari kena tekan.
16 Iya meri pengandal ngagai orang ke seranta lalu ngasuh orang ke jai badu agi bemunyi.
17 Beberekat meh orang ke diajar Allah Taala! Anang ngenggai lebuh TUHAN ti Pemadu Bekuasa disiplin nuan.
18 Allah Taala ngemakal, lalu Iya mega malut bakal nya. Jari Iya ngemedis, lalu jari Iya mega ngerai.
19 Iya deka seruran ngelepaska nuan ari utai ti tau ngemedis.
20 Lebuh maya lapar pungkang, Iya deka nebus nuan ari pemati, lalu lebuh maya perang, Iya deka nebus nuan ari kuasa pedang.
21 Allah Taala deka ngelepaska nuan ari jaku petenah orang. Iya deka ngidupka nuan lebuh pengerusak nuntung.
22 Nuan deka ketawaka pengerusak enggau lapar pungkang lalu enda takutka jelu babas.
23 Tanah umai ti dichangkul nuan, enda bebatu. Jelu babas enda nerekam nuan.
24 Nuan deka diau likun dalam langkau kain nuan. Lebuh nuan meresa raban bedus nuan, nuan deka nemu sida likun.
25 Bala anak nuan deka mayuh baka daun rumput ti ba padang.
26 Baka gandum ti mansau nyentuk ngagai maya iya patut diketau, baka nya meh nuan deka gayu-guru gerai nyamai.
27 Jop, kami udah nemu utai tu laban kami lama udah belajarka iya. Utai tu amat, nya alai terima iya.
 
Bagi 6
Ko Jop:
1-2 Enti penusah enggau pemerinsa aku ditimbang ngena dachin,
3 Sida deka berat agi ari pasir ti di tasik. Nya alai, jaku aku ti kasar enda patut ngasuh ati nuan tekenyit.
4 Allah Taala ti Pemadu Bekuasa udah nimbak aku ngena laja lalu ipuh laja nya nyerangkap ba sebelah tubuh aku. Allah Taala udah ngerintaika utai ti balat ngenakut kena Iya ngelaban aku.
5 Keledai puas ati lebuh iya ngulam rumput, lalu sapi enda bemunyi lebuh iya ngulam rumput ti rangkai.
6 Tang sapa ulih makai pemakai ti nadai asai, ti enda begaram? Baka ni ku asai telu burak?
7 Aku enda tetengukka pemakai ti baka nya, lalu semua utai ti diempa aku ngasuh aku mutah.
8 Nama kebuah Allah Taala enggai meri utai ti dipinta aku? Nama kebuah Iya enggai nyaut sampi aku?
9 Manah agi enti Iya terus munuh aku!
10 Enti aku nemu Iya deka munuh aku, aku deka ngingkak gaga ati, enda ngira pemalat pemedis ti ditatka aku. Aku nemu Allah Taala endang kudus. Aku nadai kala ngelaban pesan Iya.
11 Nama pengering kena aku idup? Nama guna aku majak idup enti aku nadai pengadang?
12 Kati aku digaga ari batu? Kati tubuh aku digaga ari temaga?
13 Aku nadai agi pengering kena aku ngidupka diri. Aku nadai nemu orang ke ulih nulung aku.
14 Lebuh aku dituntung penusah baka tu, aku begunaka penelap ari pangan, nemuka aku udah ninggalka Allah Taala tauka enda.
15 Tang kita ke pangan aku nipu aku baka sungai ti rangkai lebuh hari nadai ujan.
16 Sungai nya nyau sebat laban seleju enggau ais,
17 Tang lebuh hari nyau angat, sida lesap lalu buntut sungai nya rangkai.
18 Jelu unta ti narit kerita tesat begigaka ai. Sida segau-segau ngapa lalu mati di menua puang.
19 Jelu unta ti narit kerita ari Sheba enggau Tema datai begigaka ai
20 Tang sida asa ngapa ba tebing sungai ti rangkai.
21 Ba peda aku, kita tu baka sungai nya. Kita meda penusah aku, lalu kita takut.
22 Kati aku bisi udah kala minta pemeri ari kita tauka nyuap orang ngarika aku,
23 Tauka minta kita ngelepaska aku ari jari munsuh tauka ari jari raja ti nadai pengasih?
24 Barang ku jaku, ajar meh aku. Padahka penyalah aku. Aku enggai bemunyi tang mendingka kita.
25 Aku nyangka deka mendingka jaku ti menuku, tang jaku kita mapap.
26 Kita ngumbai aku bejaku ngapa. Enti baka nya, nama kebuah kita nimbal jaku serebana aku?
27 Kita sedia deka bechabut undi berebutka anak mit ti patu nyadi ulun kita lalu ngulihka pengaya pangan kita!
28 Peda kita mua aku. Aku enggai bula.
29 Penemu kita udah kelalu lunggar. Anang bingkuk penemu. Anang besalahka aku. Aku enda salah.
30 Tang kita ngumbai aku bula. Kita ngumbai aku enda nemu bida entara utai ti ngena enggau utai ti salah.
 
Bagi 7
1 Pengidup mensia endang baka pengidup soldadu, baka pengidup orang ke dipejalka ngereja pengawa ti berat,
2 Baka ulun ke bisi ati deka belelak ba endur ti lindung, baka orang gaji ke nganti diri terima gaji.
3 Tiap bulan aku nadai kebuah idup. Tiap malam aku semina nemu pemerinsa.
4 Lebuh aku gali deka tinduk, jam asai ti panjai. Aku gali kasak-kasak semalam-malam nganti hari tawas.
5 Tubuh aku penuh laban ulat. Tubuh aku dibalut kerutup. Nanah nyau melilih pansut ari rumbak aku.
6 Aku mansang tuai-setuai, nadai pengadang agi, laju agi ari ripang ti dikena orang betenun.
7 Ingat, O Allah Taala, pengidup aku semina kesuh seput aja. Pengelantang ati aku nyau udah abis.
8 Diatu Nuan meda aku, tang jemah ila Nuan nadai agi meda aku. Enti Nuan ngiga aku, aku nadai agi.
9-10 Kami mensia mati, lalu enda pulai agi, baka mua hari ti majak ayas-seayas lalu lesap. Semua orang ke udah bekelala enggau kami, nadai agi ingatka kami.
11 Aku enda ulih nagang diri bejaku! Aku ringat sereta pedis ati. Aku enda tau enda bejaku.
12 Nama kebuah Nuan ngasuh aku dijaga orang? Kati Nuan ngumbai aku naga tasik?
13 Aku gali nguji belelak, ngarapka diri badu agi pedis.
14 Tang Nuan ngemba aku ngena mimpi. Nuan ngasuh aku begenera sereta ngigau,
15 Datai ke aku nyau minta diri dichekal lalu mati ari ke idup dalam tubuh ti merinsa tu.
16 Aku enggai agi idup. Aku nyau lelak idup. Awakka aku diau kediri. Pengidup aku nadai reti agi.
17 Nama kebuah mensia beguna ba Nuan? Nama kebuah Nuan ibuhka utai ti dikereja sida?
18 Nuan meresa sida tiap pagi lalu nguji sida tiap minit.
19 Kati Nuan enggai malik kebukai enda lama, chukup peluang alai aku nelan liur?
20 Kati dosa aku bisi ngemediska Nuan ke ngejil aku? Nama kebuah Nuan belatih nimbakka laja ngagai aku? Kati aku kelalu ngenusahka Nuan?
21 Kati Nuan enda ulih ngampun dosa aku? Kati Nuan enda ulih ngampun penyalah aku? Enda lama da agi aku deka diau dalam kubur lalu lebuh Nuan ngiga aku, Nuan enda tetemuka aku.
 
Bagi 8
Ko Bildat
1-2 Kati nuan udah tembu bejaku?
3 Allah Taala enda kala meri atur ti enda lurus. Iya nadai kala enda ulih ngereja utai ti ngena.
4 Bala anak nuan tentu udah bedosa ngelaban Allah Taala. Nya alai Iya ngukum sida enggau pematut.
5 Tang diatu nuan enda tau enda ngadap ngagai Allah Taala ti Pemadu Bekuasa, lalu minta Iya kasihka nuan.
6 Enti nuan amat tau dikarapka sereta tuchi, nya baru Allah Taala deka datai nulung nuan lalu ngaduka ruang bilik nuan pulai baka selama, nyadika upah nuan.
7 Semua pengaya nuan ti udah lenyau, sigi nadai reti enti dibandingka enggau utai ti deka diberi Allah Taala ngagai nuan ila.
8 Uji peratika enda lama penemu-dalam ti disebut orang ke dulu kelia. Uji peratika utai ti bendar ti udah dipelajarka aki ini kitai kelia.
9 Kitai enda gayu lalu kitai nadai nemu utai. Kitai tu baka ayuk ti ngelansa meraka dunya.
10 Tang awakka orang ke bepenemu-dalam ke dulu kelia, ngajar nuan. Pendingka utai ti disebut sida:
11 “Temesing enda ulih tumbuh ba endur ti nadai ai. Sida nadai kala ditemu ba endur ti ukai paya.
12 Enti ai nyau nadai agi, buluh nya dulu agi layu ari babas bukai, lebuh sida agi kelalu mit dipantap lalu apin tau dikena.
13 Orang kapir sebaka enggau buluh nya. Pengadang sida lenyau lebuh sida enda agi ingatka Allah Taala.
14 Sida andal ati ke ubung, iya nya pukat empelawa.
15 Enti sida nyandih ba pukat empelawa, pukat empelawa nya enda tan alai sida nyandih. Enti sida nyapai ubung, ubung nya enda ulih dikena sida ngangkatka diri bediri.’’
16 Orang ke jai matuk baka rumput ti dipanchar mata hari, baka rumput ti nyerangkap ba sebelah kebun.
17 Urat sida malut batu lalu empakap ba genap igi batu.
18 Tang enti sida dichabut, nadai orang nemu sida udah bisi dia.
19 Semina nya aja meh pengaga orang ke jai. Diatu orang bukai nyau datai lalu nganti endur sida.
20 Tang Allah Taala enda sekali-kali ninggalka orang ke tetap ati ngagai Iya, tauka meri tulung ngagai orang ke jai.
21 Iya deka ngasuh nuan ketawa sereta manjung baru,
22 Tang Iya deka mechat orang ke begedika nuan, lalu rumah orang ke jai nya deka lesap.
 
Bagi 9
Ko Jop
1-2 Sigi amat. Aku bisi udah ninga semua utai nya suba. Tang baka ni ku mensia tau menang bechara ngelaban Allah Taala?
3 Kati mensia ulih bekelikuh enggau Iya? Iya tau nanyaka seribu macham tanya ti enda ulih disaut.
4 Allah Taala endang bepenemu-dalam sereta besai kuasa. Nadai orang tan ngelaban Iya.
5 Iya enda madahka Diri lebuh Iya nginsitka bukit lalu ngeruntuhka sida lebuh Iya ringat.
6 Allah Taala ngasuh tanah berenyang, lalu ngasuh tanah belinggang. Iya nguyat tiang ti nungkat dunya.
7  Iya ulih nagang mata hari tumbuh, ulih nagang bintang manchar lebuh malam hari.
8 Nadai orang nulung Allah Taala mintarka langit tauka ngelunjak belakang naga tasik.
9 Allah Taala ngantung Bintang Tiga di langit, Bintang Banyak, Bintang Tujuh, enggau Bintang Selatan.
10 Kitai enda meretika utai ti dikereja Iya, lalu kereja ajih Iya endang enda nemu abis.
11 Allah Taala mansa, tang aku enda ulih meda Iya.
12 Iya ngambi utai ti dikedekaka Iya, lalu nadai orang ulih nagang Iya. Nadai orang berani nanya Iya, “Nama utai ti dikereja Nuan?’’
13 Pengeringat Allah Taala endang enda berubah. Iya ngalahka bala munsuh ke udah nulung Rahap, iya nya naga tasik ti ngelaban Iya.
14 Nya alai, nama leka jaku kena aku nyaut Allah Taala?
15 Taja pen aku nadai penyalah, aku semina ulih minta kasih ari Allah Taala ti Hakim aku.
16 Tang taja pia, enti sema Iya ngasuh aku bejaku, enda meh aku arapka Iya deka mendingka aku.
17 Iya ngasuh kabut mangka lalu ngerajaika tubuh aku enggau nadai kebuah.
18 Iya nadai meri awak alai aku nyintak seput. Iya udah ngasuh aku balat pedis ati.
19 Enti utai tu pasal belaban ngena pengering, Iya endang kering. Enti utai tu pasal atur ti lurus, sapa ulih ngasuh Iya mansang ngagai kot?
20 Taja pen aku nadai penyalah sereta tetap ati, tang jaku aku munyi ti madahka aku bisi penyalah, lalu semua utai ti disebut aku, besalah aku magang.
21-22 Aku endang nadai penyalah, tang aku enggai ibuhka nya agi.  Aku nyau leju idup. Semua utai nyau nadai guna agi. Nemuka kitai bepenyalah, tauka nadai penyalah, Allah Taala sigi deka ngerusak kitai.
23 Lebuh orang ke nadai penyalah mati ngenyit, Allah Taala ketawa.
24 Allah Taala nyerahka dunya tu ngagai orang ke jai. Iya ngasuh semua hakim buta lalu enti Allah Taala nadai udah ngereja nya, sapa deh?
25 Aku jampat belinsur tuai, tang sehari pen nadai ga aku kala lantang.
26 Penyampat aku belinsur tuai, baka perau ti pemadu laju, ngelaju menaul ti nyambarka tikus.
27-28 Enti aku tuchum lalu nguji ngelimpangka diri ari pemedis aku, semua pemerinsa aku datai baru lalu ngachau aku. Aku nemu Allah Taala endang ngumbai aku udah ngereja penyalah.
29 Laban aku dikumbai udah ngereja penyalah, kapa aku deka ibuhka nya?
30 Nadai sabun ulih muai dosa aku.
31 Allah Taala muai aku ngagai lubang ti penuh laban utai ti kamah, datai ke gari aku nyau malu ke aku.
32 Enti sema Allah Taala nya mensia, aku ulih nyaut Iya. Kami duai tau mutuska laya dalam kot.
33 Tang nadai orang ulih ngatur kami duai, nadai orang ulih ngakim Allah Taala enggau aku.
34 Badu agi ngukum aku, O Allah Taala! Anang agi ngemba aku!
35 Aku enda takut. Aku endang deka bejaku laban aku nemu runding ati diri.
 
Bagi 10
1 Aku nyau leju idup. Pendingka pemalat putap aku.
2 Anang ngukum aku, O Allah Taala. Padahka penyalah aku ti dikena Nuan bedawaka aku?
3 Kati Nuan patut ngemalat nya merinsaka aku? Lalu mechat utai ti udah digaga Nuan Empu? Lalu udah nya tuchum meda pelan orang ke jai?
4 Kati Nuan meda utai baka chara kami?
5 Kati umur Nuan pandak baka umur kami?
6 Nama kebuah Nuan mansik dosa aku lalu begigaka semua penyalah aku?
7 Nuan nemu aku endang nadai penyalah. Nuan nemu orang sigi nadai ulih ngelepaska aku ari jari Nuan.
8 Jari Nuan Empu ti ngaga nempa aku, lalu diatu jari nya mega ngerusak aku.
9 Kingatka Diri ti udah ngaga aku ari tanah liat. Kati Nuan deka nginsarka aku nyadi amau baru?
10 Nuan udah meri pengering ngagai apai aku, ngambika aku dikandungka. Nuan udah ngasuh aku mansang besai dalam kandung indai aku.
11 Nuan udah ngaga tubuh aku ngena tulang enggau rakat lalu malut tulang nya ngena gumpal isi enggau kulit.
12 Nuan udah meri aku pengidup enggau pengerindu ti enda berubah lalu aku idup laban Nuan ngibun aku.
13 Tang diatu aku nyau nemu, nuan endang lama udah berunding deka ngemediska aku.
14 Nuan nengkilaka meda enti aku deka bedosa, ngambika Nuan enggai ngampun aku.
15 Lebuh aku bedosa, aku lalu kena laban penusah ketegal Nuan, tang lebuh aku ngereja utai ti ngena, aku enda ulih ngangkatka pala diri laban aku malu, sereta balat merinsa.
16 Lalu enti aku ulih ngangkatka pala diri nuan lalu baka singa, ngasu aku. Indah kereja ajih deh dikena nuan ngelaban aku.
17 Nuan endang seruran bisi saksi ngelaban aku. Pengeringat Nuan ngagai aku mansang balat-sebalat. Nuan endang seruran bekiraka chara kena Nuan nyerang aku.
18 O Allah Taala, nama kebuah Nuan ngelakka aku ada? Aku patut udah mati sebedau orang meda aku,
19 Lalu pansut ari kandung terus ngagai pendam baka ti nadai kala idup.
20 Umur aku nyau deka abis. Anang ngachau aku! Awakka aku ngelantangka diri kala lebuh aku agi idup.
21 Aku deka mupuk enda lama da agi, lalu enda pulai agi, mansang ngagai menua ti piam sereta petang,
22 Menua pemetang, alai ayuk enggau penyarut nyadi alai penampak empu nyadi pemetang.
 
Bagi 11
Ko Sopar
1-2 Kati nadai orang deka nyaut semua jaku mapap tu? Kati jaku nuan ti enda nemu putus baka nya tau ngasuh nuan nyadi ngena?
3 Jop, kati nuan ngumbai kami enda ulih nyaut nuan? Lalu ngumbai jaku kelese nuan deka ngasuh kami enda tepansutka jaku?
4 Nuan ngumbai diri nyebut utai ti amat. Nuan ngumbai diri tuchi di mua Allah Taala.
5 Manah amat enti Allah Taala nyaut nuan!
6 Iya tetap deka madahka ngagai nuan mayuh macham penemu-dalam. Pekara ti kelalu dalam lalu enda ulih disagam mensia pen bisi. Ukum ti dikena Allah Taala ngukum nuan lempung agi ari ti patut.
7 Kati nuan nemu sekat pemesai enggau kuasa Allah Taala?
8 Allah Taala tinggi agi ari langit, tang nuan enda ulih nyengkau langit. Allah Taala nemu dunya pemati, tang nuan enda nemu dunya nya.
9 Pemesai Allah Taala lebih agi ari pemesai dunya, besai agi ari tasik.
10 Enti Allah Taala nangkap nuan, lalu mai nuan ngagai kot, sapa ulih nagang Iya?
11 Allah Taala nemu sapa orang ke nadai guna. Iya meda semua penyai ti dikereja sida.
12 Orang ke beli belabuh nyadi orang ke bepenemu-dalam lebuh keledai ti siga ada jinak.
13 Gaga betul ke ati nuan, Jop. Besampi ngagai Allah Taala.
14 Buai penyai enggau penyalah ari rumah nuan.
15 Udah nya baru nuan ulih ngeringka diri baru, tegap sereta berani.
16 Nya baru nuan enda agi ingatka semua penusah nuan, baka ai ti udah bah, lalu nadai dikingatka agi.
17 Pengidup nuan deka nyadi terang agi ari panchar mata hari lebuh tengah hari, lalu pemetang ti enda dipeda achuk mata ba pengidup nuan deka manchar baka rerak tawas.
18 Nuan deka diau likun sereta penuh enggau pengadang. Allah Taala deka nyaga nuan, lalu ngasuh nuan belelak.
19 Nuan enda takutka bala munsuh nuan. Mayuh orang deka minta nuan nulung sida.
20 Tang orang ke jai deka malik kia-kia tusah ati lalu nadai nemu jalai rari. Sida semina ngarapka diri deka mati.
 
Bagi 12
Ko Jop
1-2 Sigi amat. Nuan bejaku ngarika orang mayuh. Lebuh nuan mati, penemu-dalam ti dikembuan nuan deka ditabanka nuan mati.
3 Tang aku nemu berunding baka nuan. Aku enda kurang agi ari nuan. Semua utai ti disebut nuan endang udah ditemu semua orang.
4 Indah bala pangan aku deh ketawaka aku diatu. Sida ketawa taja pen aku lurus sereta nadai penyalah. Tang suba Allah Taala nyaut sampi aku.
5 Nuan nadai penusah, tang taja pia nuan beduan aku. Nuan mukut orang ke baru deka rebah.
6 Tang bala perumpak enggau orang ke enda nangika Allah Taala diau nadai utai ngachau, taja pen sida manggaika diri ba pengering sida empu.
7 Indah burung enggau jelu deh ulih ngajar nuan mayuh macham utai.
8 Uji tanyaka penemu-dalam ari utai ti idup di darat, enggau di tasik.
9 Semua sida nemu diri udah digaga TUHAN.
10 Allah Taala Empu ke ngatur pengidup utai ti digaga Iya. Allah Taala endang bekuasa atas seput semua mensia.
11 Tang baka dilah nuan ti ngasaika penyamai utai ti diempa, baka nya meh pending nuan deka lantang ninga leka jaku.
12-13 Orang ke tuai bisi penemu-dalam, tang Allah Taala bisi penemu-dalam enggau kuasa. Orang ke tuai bisi runding ti dalam, tang Allah Taala bisi runding ti dalam sereta bisi kuasa ngereja utai.
14 Lebuh Allah Taala ngeruntuh, sapa ulih nirika utai nya baru, lalu sapa ulih ngelepaska orang ke ditutup Allah Taala dalam rumah jil?
15 Kemarau nyadi lebuh Allah Taala nagang hari ujan. Bah nyadi lebuh Allah Taala ngasuh hari ujan.
16 Allah Taala endang kering sereta seruran menang. Orang ke ditipu enggau orang ke nipu endang di baruh kuasa Iya.
17 Iya muai penemu-dalam ari bala pemerintah lalu ngasuh bala tuai nyadi baka orang ke beli.
18 Iya muai raja ari kerusi diraja sida, lalu ngejil sida.
19 Iya ngemaruhka bala imam enggau orang ke bekuasa.
20 Iya ngasuh orang ke tau dikarapka, badu agi bejaku, lalu muai penemu-dalam ari orang ke tuai.
21 Iya mechat orang ke megai kuasa lalu muai pengering bala pemerintah.
22 Iya ngasuh penampak manchar ba endur ti pemadu petang.
23 Iya ngasuh mayuh bengkah bansa kering sereta bekuasa, tang udah nya Iya ngalahka sida lalu ngerusak sida.
24 Iya ngasuh bala tuai sida beli lalu nejuka sida segau-segau, charut runding sereta tesat.
25 Sida bejalai gama-gama dalam petang, guir-guir baka orang ke mabuk.
 
Bagi 13
1 Mata aku udah meda semua utai tu. Pending aku udah ninga lalu meretika utai nya.
2 Utai ti ditemu nuan mega ditemu aku. Aku enda kurang ari nuan.
3 Tang aku deka bejaku enggau Allah Taala, ukai enggau nuan. Aku deka bejaku enggau Iya pasal pekara aku.
4 Nuan ngena pemula ngelalaika diri enda nemu utai. Nuan tu baka lutur ti enda nemu ngeraika orang.
5 Anang bejaku, nya baru orang ngumbai nuan bepenemu-dalam!
6 Pendingka aku lebuh aku madahka pekara aku.
7 Nama kebuah nuan bula? Kati nuan ngumbai pemula nuan ulih mai penguntung ngagai Allah Taala?
8 Kati nuan nguji bejaku ngarika Allah Taala? Kati nuan deka bejaku ngarika Iya dalam kot?
9 Enti Allah Taala meresa nuan, bisi enda ke Iya tetemuka utai ti manah ba nuan? Kati nuan ngumbai diri ulih ngemelika Allah Taala, baka nuan ke ngemelika mensia?
10 Taja pen nuan belalai bepilih mata, Iya deka nganu nuan,
11 lalu kuasa Iya deka ngenakutka nuan.
12 Jaku-dalam ti disebut nuan nadai guna baka amau. Jaku kelakar nuan lemi baka tanah liat.
13 Anang bemunyi, lalu beri aku peluang bejaku. Awakka utai nyadi ari jaku nya.
14 Aku sedia deka berambunka nyawa aku.
15 Aku nadai utai diadang agi, nya alai enda ngawa enti Allah Taala munuh aku.  Aku deka bejaku ngarika diri empu di mua Iya.
16 Kada enda pemerani aku ulih ngelepaska aku, laban nadai orang ke jai berani bediri di mua Allah Taala.
17 Diatu pendingka jaku penerang ari aku.
18 Aku sedia deka mantaika pekara aku, laban aku nemu diri endang ngena.
19 Allah Taala, kati Nuan datai deka nyalah aku? Enti pia, aku sedia enggai bejaku lalu mati.
20 Awakka aku minta dua bengkah utai. Enti Nuan besetujuka utai nya, nya baru aku enda belalai ari Nuan.
21 Badu agi ngukum aku, lalu badu agi ngemba aku.
22 Bejaku dulu, O Allah Taala, ngambika aku nyaut. Tauka, awakka aku bejaku, lalu Nuan nyaut.
23 Nama dosa aku? Nama penyalah aku? Nama penyalah aku ti dikena Nuan bedawaka aku?
24 Nama kebuah Nuan ngelalaika mua Nuan ari aku? Nama kebuah Nuan ngaga aku baka munsuh?
25 Kati Nuan nguji ngemba aku? Aku tu orang ke nadai guna, semina daun ti dikebuka ribut. Nuan nyerang sebatang rumput ti rangkai.
26 Nuan balat amat nyalah aku. Indah penyalah ti dikereja aku lebuh aku agi biak, deh dikingatka Nuan semua.
27 Nuan nanchang kaki aku ngena rantai. Nuan nengkilaka genap singkang aku. Indah bekau kaki aku deh abis diperesa Nuan.
28 Ketegal nya, aku nyau repuk baka kayu ti buruk, baka baju ti abis diempa gegat.
 
Bagi 14
1  Semua kitai tu endang ada lemi sereta nadai daya magang. Semua kitai endang enda panjai umur sereta ditinggang penusah seumur idup.
2 Kitai mansang besai tuai lalu jampat layu baka bungai. Kitai lesap baka ayuk.
3 Kati Nuan deka malik ngagai aku, Allah Taala? Tauka, nyara lalu ngakim aku?
4 Nadai utai ti tuchi ulih pansut ari utai ti enda tuchi baka mensia.
5 Umur mensia endang udah diletak Nuan. Penyampau bulan alai mensia idup endang udah ditetapka Nuan. Nuan endang udah ngeletak utai nya, lalu utai nya enda ulih diubah.
6 Anang malik ngagai kami, lalu anang ngachau kami. Awakka kami ngelantangka diri idup merinsa, enti kami ulih.
7 Kayu ti udah ditebang, agi bisi pengadang. Iya tau nelesak lalu tumbuh baru.
8 Taja pen urat iya nyau tuai, lalu pugu iya mati,
9 tang enti iya dipanjah, iya deka nelesak baru baka kayu ti muda.
10 Tang kami mati, lalu nya meh pengujung kami. Lebuh kami mati, dini alai kami?
11 Baka sungai ti badu agi rarat, enggau danau ti rangkai,
12 baka nya meh mensia mati, lalu enda angkat agi. Sida enda dani, seagi-agi langit meruan bisi. Sida enda ulih dani.
13 Naka meh pemanah enti Nuan ngelalaika aku di dunya pemati. Awakka aku dilalaika nyentuk ngagai maya Nuan badu agi ringat. Udah nya, letak meh maya alai Nuan ngingatka aku.
14 Enti orang mati, kati iya ulih angkat idup baru? Tang aku deka nganti maya ti manah agi, nganti maya penusah tu abis.
15 Nya baru Nuan deka ngangau, lalu aku deka nyaut, lalu Nuan deka gaga ati ke aku, ti udah digaga Nuan.
16 Udah nya baru Nuan deka nengkilaka genap singkang aku, tang enda nyidi dosa aku.
17 Nuan deka ngampun lalu muai dosa aku. Nuan deka muai semua penyalah aku.
18 Maya deka datai alai bukit deka runtuh lalu tingkah deka dibuai.
19 Ai deka numpurka batu, lalu ujan ti bangat deka nusurka tanah. Nya meh jalai Nuan ngerusak pengadang dalam pengidup kami.
20 Nuan ngalahka kami, lalu muai kami belama iya. Mua kami ngerecham lebuh kami mati.
21 Bala anak kami bulih basa, tang kami enda nemu nya, lalu orang pen nadai mega madahka ngagai kami, lebuh sida kena pechat.
22 Kami semina natka tubuh diri ti pedis enggau ati ti tusah.
 
Bagi 15
Jaku Randau Ti Kedua
Ko Elipas
1-2 Jaku nya nadai reti, Jop! Nadai reti!
3 Nadai orang ke bepenemu-dalam deka bejaku munyi nuan tauka bejaku ngarika diri empu ngena leka jaku ti nadai reti.
4 Enti nitihka peneka ati nuan, nadai orang deka nangika Allah Taala, lalu nadai mega orang deka besampi ngagai Iya.
5 Penyai nuan nyata ari utai ti disebut nuan. Nuan nguji ngelalaika penyai diri ngena pemintar nuan bejaku.
6 Aku enda ibuh ngukum nuan. Nuan diukum genap leka jaku ti disebut nuan empu.
7 Kati nuan ngumbai diri orang ke terubah ada? Kati nuan bisi dia lebuh Allah Taala ngaga bukit?
8 Kati nuan bisi ninga pelan ti digaga Allah Taala? Kati penemu-dalam semina bisi ba nuan siku aja?
9 Nadai utai ti ditemu nuan, ti enda ditemu kami.
10 Kami belajarka penemu-dalam ari orang ke buban bulu pala, orang ke dulu agi ada ari apai nuan.
11 Allah Taala deka ngelantangka ati nuan. Nama kebuah nuan agi nulak nya? Kami udah bejaku ngarika Iya ngena jaku ti alus.
12 Tang nuan isin, lalu melutka mata merening ngagai kami.
13 Nuan ringat ngagai Allah Taala, lalu ngelaban Iya.
14 Kati mensia ulih nyadi chukup tuchi? Kati orang ulih nyadi lurus di mua Allah Taala?
15 Indah bala melikat Iya deh enda dipechayaka Iya. Indah sida nya deh enda tuchi ba mata Iya.
16 Kitai ngirup penyai baka ke ngirup ai. Sigi amat. Kitai tu jai. Kitai tu nadai guna.
17 Jop, diatu pendingka utai ti ditemu aku.
18 Orang ke bepenemu-dalam udah ngajar utai ti bendar ngagai aku utai ti udah dipelajarka sida ari aki ini sida, lalu sida enda ngelalaika utai ti resia.
19 Menua sida nadai orang kampar. Orang nadai mai sida ninggalka Allah Taala.
20 Orang ke jai, ke nekanka pengidup orang bukai deka natka pemerinsa seumur idup.
21 Nyawa ti ngemba deka merak ba pending sida, lalu bala penyamun deka nyerang sida lebuh sida ngumbai diri likun.
22 Sida nadai jalai ngarapka diri ulih rari ari pemetang, laban siti pedang benung nganti, deka munuh sida,
23 lalu bala burung benung nganti, deka makai bangkai sida. Sida endang nemu diri deka merinsa.
24 Penusah ti besai, baka raja ti bekuasa, benung nganti deka nyerang sida.
25 Nya meh pengujung orang ke ngenggam lalu ngedarka jari ngelaban Allah Taala lalu nyakap Iya ti Pemadu Bekuasa.
26-27 Sida tu sumbung sereta seruran angkat ngelaban. Sida kieh lalu ngedarka terabai sida lalu belanda mansang ngelaban Allah Taala.
28 Sida nya meh orang ke ngalahka nengeri ti besai lalu ngerampas rumah ti udah ditinggalka orang rari. Tang semua nengeri enggau rumah nya deka dirusak lebuh maya perang.
29 Sida enda ulih lama kaya. Nadai utai ti dikembuan sida ulih tan lama. Indah ayuk sida deh deka lesap,
30 lalu sida enda ulih ngerarika diri ari pemetang. Sida deka nyadi baka dan kayu ti ditunu api, enggau bunga iti dikebuka ribut.
31 Enti sida chukup beli lalu arapka penyai, penyai meh deka nyadika upah sida.
32 Sebedau sida mati, sida deka layu, layu baka dan, lalu enda ulih idup baru.
33 Sida deka nyadi baka batang anggur ti gugur buah puda, baka kayu kana ti gugur bungai.
34 Orang ke enda arapka Allah Taala, nadai peturun, lalu api deka ngerusak rumah ti digaga ngena chara makai suap.
35 Sida bekira deka ngaga pengachau, enggau ngereja penyai. Ati sida seruran deka nipu.
 
Bagi 16
Ko Jop
1-2 Aku bisi udah ninga jaku ti munyi nya suba. Jaku ti dikena kita merindang aku semina ngasuh ati aku merinsa ngapa.
3 Kati kita enda nemu ngetu bejaku? Kati kita enda tau enda nyadi orang ke pengabis dudi badu bejaku?
4 Enti sema kita baka aku, lalu aku baka kita, aku pen ulih meh mansutka jaku munyi kita, nemu ngilikka pala baka orang ke bepenemu-dalam lalu ngujan kita ngena leka jaku.
5 Aku ulih ngeringka kita ngena jaku ajar lalu enda ngetu bejaku merindang kita.
6 Tang utai ti disebut aku nadai ulih nyaup aku, lalu enti aku enda engkeretik, nadai ga nya ulih ngasuh aku badu agi pedis.
7 Allah Taala, diatu Nuan udah ngasuh aku lelak. Nuan udah nejuka kami sebilik dibunuh.
8 Nuan udah nangkap aku. Nuan tu munsuh aku. Aku tu semina tinggal kulit enggau tulang aja, lalu orang ngumbai nya nunjukka penyalah aku.
9 Allah Taala ringat, lalu nyarikka tubuh aku. Iya begedika aku lalu melutka mata merening ngagai aku.
10 Orang enchebirka mulut ngeleseka aku. Sida besedul bekelingika aku, lalu nampar mua aku.
11 Allah Taala udah nyerahka aku ngagai jari orang ke jai.
12 Sebedau nya, aku udah diau nadai utai ngachau, tang Allah Taala nyekal rekung aku, mangkaka aku, lalu ngeredakka aku. Allah Taala ngaga aku nyadika alai Iya belajar nimbakka laja,
13 lalu Iya nimbakka laja ngagai aku ari semua endur, laja ti ngebuska isi lalu ngemakalka aku, tang taja pia Iya mengkang enda sinu ati ke aku.
14 Iya enda ngetu-ngetu ngemakalka aku. Iya nyerang aku baka soldadu ti gila laban pemenchi.
15 Aku ngulit lalu begari ngena kain guni, lalu duduk ditu malai amau laban aku alah.
16 Aku nyabak datai ke mua aku nyau mirah, lalu mata aku nyau bangkung,
17 tang aku nadai ngaga ulah ti kasar lalu sampi aku ngagai Allah Taala endang amat.
18 O dunya! Anang ngelalaika utai ti salah ti udah dikereja orang ngagai aku! Anang mampul kangau aku ke minta atur ti lurus!
19 Di serega bisi siku orang ti deka bejaku ngarika aku, lalu setanah enggau aku.
20 Bala pangan aku ngelanyaika aku. Aku nyabak minta tulung Allah Taala.
21 Aku begunaka orang bejaku ngarika aku ngagai Allah Taala, baka ke bejaku ngarika pangan.
22 Umur aku nyau deka abis, lalu aku enda pulai agi.
 
Bagi 17
1 Aku nyau deka mati. Aku enda tentu ulih enseput agi. Aku nadai utai dianti agi, semina nganti kubur aja.
2 Aku meda pemalat orang ngelanyaika aku.
3 Aku endang betul ati, Allah Taala. Terima meh leka jaku aku. Nadai orang bukai deka nyukung utai ti disebut aku.
4 Nuan udah nutup ati sida ngambika sida enda mereti. Anang nejuka sida ngalahka aku diatu.
5 Jaku-dalam ti dulu kelia madahka siku orang nyual pangan iya kena ngulihka duit, lalu bala anak iya merinsa ketegal nya.
6 Diatu orang ngena jaku-dalam tu ngelaban aku. Sida datai lalu ngeludah mua aku.
7 Ati aku balat tusah datai ke mata aku nyau rapa. Semua tubuh aku balat amat kurus.
8 Orang ke ngumbai diri nadai penyalah tekenyit ati, lalu semua sida nuduhka aku enda arapka Allah Taala.
9 Orang ke ngumbai diri lurus majak ngumbai diri ngena.
10 Tang enti sema semua sida datai magang lalu bediri di mua aku, aku tetap nadai tetemuka sida nya bisi penemu-dalam.
11 Umur aku nyau deka abis. Perambu aku udah puntan magang. Aku nadai pengadang agi.
12 Tang bala pangan aku ngumbai malam siang hari. Sida ngumbai penampak nyau semak, tang aku nemu diri agi mengkang dalam pemetang.
13 Semina dunya pemati aja ti diadang aku, alai aku deka gali lalu tinduk dalam pemetang.
14 Aku deka ngumbai kubur nyadika apai aku, lalu ulat ti makai aku deka dikumbai aku indai enggau menyadi indu aku.
15 Nya alai dini alai pengadang aku? Sapa bisi meda pengadang aku?
16 Pengadang enda mupuk enggau aku lebuh aku nurun ngagai dunya pemati.
 
Bagi 18
Ko Bildat
1-2 Jop, kati nuan enda nemu ngetu bejaku? Enti nuan ngetu bejaku lalu mending, nya baru kami ulih bejaku enggau nuan.
3 Nama kebuah nuan ngumbai kami tu beli baka sapi?
4 Nuan semina ngemediska diri empu aja ringat baka nya. Kati dunya tu deka nadai orang nguan laban nuan ringat? Kati Allah Taala deka nginsitka bukit kena ngemuaska ati nuan?
5 Penampak orang ke jai ulih dipadamka. Api iya enda ulih menyadi agi.
6 Lampu ti dalam langkau kain sida deka piam.
7 Sida amat kering bejalai, tang diatu sida tesangkut. Sida rebah, dipanjuk jaku lalau sida empu.
8 Sida bejalai nempuh jarin, lalu kaki sida kena sintak.
9 Panjuk nyintak tumbit sida, lalu nanchang sida.
10 Amba dilalaika ba tanah. Panjuk udah ditan ba jalai ti ditengah sida.
11 Sida dikelingi utai ti balat ngenakut. Utai nya betitihka sida genap kali sida nyingkang.
12 Dulu menya sida udah kaya, tang diatu sida lapar. Penusah ti besai bediri, lalu nganti ngimbai sida.
13 Penyakit ti tau munuh nyelamar ba sebelah tubuh sida lalu ngasuh jari enggau kaki sida buruk.
14 Sida ditarit ari langkau kain ti alai sida diau likun, lalu sida diirit ngagai Raja Pemati.
15 Diatu langkau kain sida nadai utai agi, merirang lalu ditaburka dalam langkau kain sida.
16 Urat enggau dan sida layu lalu rangkai.
17 Sida nadai agi didinga rita di menua tu enggau di menua bukai. Orang nadai agi ingatka sida.
18 Sida deka diburu ari menua orang ke idup, diburu ari penampak ngagai pemetang.
19 Sida nadai peturun, nadai telesak.
20 Ari timur nyentuk ke barat, semua orang ninga penusah sida lalu getar-getar takut.
21 Nya meh pengujung orang ke jai, pengujung orang ke enda nangika Allah Taala.
 
Bagi 19
Ko Jop
1-2 Nama kebuah nuan enda ngetu-ngetu merinsaka aku ngena jaku?
3 Nuan seruran mechat aku, lalu enda nemu malu ke jalai nuan ngayahka aku.
4 Enti sema aku bisi udah ngereja penyalah baka ni ku nya tau ngawa nuan?
5 Nuan ngumbai diri manah agi ari aku, lalu ngumbai penusah aku tu nunjukka aku udah ngereja penyalah.
6 Kati nuan enda nemu, semua utai tu udah dikereja Allah Taala? Iya udah nan panjuk kena Iya nyintak aku.
7 Aku nyakal ulah Iya ti kasar, tang nadai orang mendingka aku. Nadai orang ninga aku minta atur ti lurus.
8 Allah Taala udah mempang jalai aku, lalu aku enda ulih nengah jalai nya. Iya udah ngelalaika jalai aku dalam pemetang.
9 Iya udah ngambi semua pengaya aku lalu ngerusak pemanah nama aku.
10 Iya malu aku ba sebelah tubuh. Iya nyabut pengadang aku baka ke nyabut kayu lalu ninggalka aku layu lalu mati.
11 Allah Taala ringat lalu ngeransi ngelaban aku. Iya ngaga aku baka munsuh ti pemadu jai.
12 Iya ngasuh bala soldadu Iya nyerang aku. Sida ngaga parit ngelulung langkau kain aku.
13 Allah Taala udah nyungkak bala kami sebilik ninggalka aku. Aku nyau nyadi orang kampar ba orang ke ngelala aku.
14 Kaban belayan enggau bala pangan aku nyau nadai agi.
15 Orang ke nyadi temuai dalam rumah aku nyau nadai agi ingatka aku. Bala orang gaji aku ti indu ngaga aku baka orang kampar enggau baka orang bansa bukai.
16 Lebuh aku ngangauka orang gaji aku, iya enda nyaut taja pen aku minta iya nulung aku.
17 Bini aku enda tan nyium bau kesuh seput aku, lalu sida menyadi lelaki aku enggai datai semak ngagai aku.
18 Bala anak mit enda bebasaka aku, lalu ketawa lebuh sida meda aku.
19 Pangan rapat aku kejika aku. Orang ke pemadu dikerinduka aku, udah nguing ngelaban aku.
20 Aku tu semina tinggal kulit enggau tulang aja. Aku nyau deka enda ulih ngidupka nyawa diri.
21 Kita tu pangan aku! Kasihka aku! Jari Allah Taala udah nyamah aku.
22 Nama kebuah kita merinsaka aku baka chara Allah Taala? Kati kita enda udah chukup merinsaka aku?
23 Naka meh pemanah enti orang bisi ngingatka jaku aku lalu nuliska jaku nya dalam bup!
24 Tauka nebukka leka jaku nya ba batu ngena pat ngambika tan belama iya.
25 Laban aku nemu, aku bisi siku pengari ti idup ti deka bejaku ngarika aku ba pengujung dunya ila.
26 Lalu lebuh kulit aku udah abis diempa penyakit, ngena tubuh tu aku deka meda Allah Taala
27 ngimbai aku, lalu mata aku empu deka meda Iya ukai meda orang kampar. Ati enda sabar nganti!
28 Enti kita nyebut, “Baka ni ku jalai kitai deka merinsaka iya?’’ Lalu nyebut, “Semua pekara tu bepun ba iya magang’’;
29 kita patut takutka pedang, laban pedang mai pengeringat Allah Taala, ngambika kita nemu, Allah Taala Empu ke ngakim mensia.
 
Bagi 20
Ko Sopar
1-2 Jop, nuan ngenusahka ati aku. Diatu aku enda liat ati nganti diri nyaut nuan.
3 Utai ti udah disebut nuan nya mechat aku, tang aku nemu jalai nyaut nuan.
4 Nuan tentu nemu, kenyau ari dulu kelia, lebuh mensia terubah diengkah ba dunya,
5 orang ke jai enda ulih lantang lama.
6 Sida nyangka ulih nyadi besai, bediri tinggi, datai ke pala sida nyau nyaruk remang,
7 tang sida deka dikebuka baka amau. Orang ke udah ngelala sida deka alit ati ke penunga sida lenyau.
8 Sida deka lesap baka mimpi, baka genera lebuh malam hari, lalu nadai dipeda agi.
9 Orang ke jai deka lesap ari endur alai sida diau,
10 lalu bala anak sida deka mulaika utai ti udah dichuri sida ari orang ke seranta.
11 Dulu suba tubuh sida biak sereta kering, tang enda lama da agi, sida deka nyadi amau.
12-13 Penyai asai ti nyamai disepi sida, datai ke sida nyau ngulum sekeda penyai nya dalam mulut sida, ngambika sida ngasaika penyamai iya.
14 Tang pemakai nya bebali nyadi pait dalam perut sida, pait baka rachun.
15 Orang ke jai ngemutahka pengaya ti dichuri sida. Allah Taala deka ngambi utai nya pulai baru, nyengkaum utai ti dalam perut sida.
16 Utai ti ditelan orang ke jai nya baka rachun. Utai nya munuh sida baka pantuk ular ti bisa.
17 Sida enda ulih idup lalu meda sungai minyak kana tauka sungai ti rarat ai tusu enggau ai manyi.
18 Sida enda tau enda ngelengkaka semua utai ti udah ulih sida. Sida nadai peluang ngelantangka diri ngena pengaya sida,
19 laban sida udah nekanka pengidup, sereta enda ngintu orang ke seranta lalu ngerampas rumah ti udah digaga orang bukai.
20 Sida enda nemu badu amu.
21 Lebuh sida makai, sida nadai ninggalka teda, tang diatu pengaya sida nyau abis.
22 Lebuh sida mujur semua pemerinsa deka ninggang sida.
23 Awakka sida ngemuaska diri bepakaika utai! Allah Taala deka ringat lalu ngukum sida.
24 Lebuh sida nguji ngerarika diri ari pedang besi, panah temaga deka nimbak sida.
25 Laja ngebuska tubuh sida. Darah sida beteritik ari ujung laja ti bekilap, lalu sida balat takut.
26 Semua utai ti udah ditaruh sida, dirusak magang. Api ti ukai ditungkun jari mensia nunu sida enggau semua sida sebilik.
27 Serega mandangka dosa sida, lalu dunya besaksi ngelaban sida.
28 Semua pengaya sida deka dirusak ulih pemalat pengeringat Allah Taala.
29 Nya meh pengujung orang ke jai ti udah diletak Allah Taala ke sida.
 
Bagi 21
Ko Jop
1-2 Pendingka jaku aku. Nya aja utai ti dipinta aku ari kita, kena aku merindang ati diri.
3 Beri aku peluang bejaku, lalu udah nya, lebuh aku udah bejaku, nya baru kita tau enchebirka mulut ngeleseka aku.
4 Aku ukai belaya enggau mensia. Aku bisi kebuah enda liat ati.
5 Peda aku tu, ngambika kita temati-kutu lalu enda bemunyi.
6 Lebuh aku berundingka utai ti udah nyadi ba aku, aku temati-kutu, lalu getar-getar.
7 Nama kebuah Allah Taala nejuka orang ke jai idup, nejuka sida panjai umur sereta kaya?
8 Sida ulih meda uchu ichit, lalu idup meda semua sida mansang besai tuai.
9 Allah Taala nadai ngasuh penusah nuntung rumah sida. Sida nadai kala takut.
10 Semua jelu sapi sida peridi magang lalu mudah beranak.
11 Bala anak sida belanda sereta bemain baka raban anak domba
12 lalu betanda nitihka rentak munyi belikan enggau kesuling.
13 Sida diau nadai utai ngachau lalu mati enda bemunyi, nadai merinsa.
14 Orang ke jai enda ngasuh Allah Taala ibuhka sida. Sida enggai nemu peneka Allah Taala dalam pengidup sida.
15 Dalam runding sida, nadai guna sida betuaika Allah Taala lalu nadai mega penguntung besampi ngagai Iya.
16 Sida ngumbai pengering sida ulih ngasuh sida mujur, tang Aku kejika pelan orang ke jai.
17 Kati penampak orang ke jai bisi kala dipadamka? Kati sida bisi udah kala dituntung penusah? Kati Allah Taala bisi udah kala ringat ngagai orang ke jai lalu ngukum sida?
18 Berapa penyuah sida udah baka rumput ti rangkai ti dikebuka ribut, baka ampa ti ditabanka kabut?
19 Kita ngumbai Allah Taala ngukum anak mit ketegal dosa apai iya. Tang ku aku, “Awakka Allah Taala ngukum orang ke bempu dosa. Awakka Allah Taala ngukum orang ke salah.
20 Awakka orang ke bedosa diukum ketegal dosa sida empu. Awakka sida ngasaika pengeringat Allah Taala ti Pemadu Bekuasa.
21 Lebuh kitai mati, kati kitai amat ibuhka pengelantang bala anak kitai tauka enda?
22 Kati mensia ulih ngajar Allah Taala? Indah melikat di serega deh diakim Iya.
23-24 Sekeda orang mengkang bepengerai nyentuk ngagai maya sida mati. Sida lantang ati lebuh sida mati, nadai irau mimit, lalu tubuh sida enda kurus.
25 Tang orang bukai nadai pengelantang. Sida idup lalu mati nabanka dendam.
26 Tang semua orang sebaka magang, mati lalu dikuburka. Semua sida dibalut ulat magang.
27 Aku nemu penyai runding kita.
28 Ku kita nanya, “Namaka penyadi rumah orang ke tinggi pangkat nya diatu, orang ke ngereja penyai?’’
29 Kati kita nadai udah kala berandau enggau orang ke seruran bejalai ngagai menua bukai? Kati kita enda nemu utai ti ditusui sida?
30 Lebuh Allah Taala ringat lalu ngukum, orang ke jai enda diukum Iya.
31 Nadai orang bedawaka orang ke jai tauka malas sida ketegal utai ti udah dikereja sida.
32 Lebuh sida dianjung ngagai pendam, ngagai lumbung sida ke chukup dijaga,
33 beribu-ribu iku orang enggau nganjung sida. Indah tanah deh nemu begadai-gadai ngelamun bangkai sida.
34 Tang kita nguji merindang aku ngena jaku ti mapap! Semua saut kita bula magang!
 
Bagi 22
Jaku Randau Ti Ketiga
Ko Elipas
1-2 Kati orang bisi tau diguna Allah Taala, nyengkaum orang ke pemadu pintar?
3 Kati Allah Taala bisi penguntung enti nuan ngereja utai ti lurus? Kati pemadas pendiau nuan ulih mai penguntung ngagai Allah Taala?
4 Nuan dianu lalu diakim Allah Taala ukai laban nuan nangika Allah Taala
5 tang laban nuan udah balat bedosa ketegal semua penyai ti dikereja nuan.
6 Kena nuan mejalka menyadi nuan mayar utang iya, nuan ngambi gari iya, lalu nejuka iya nadai gari dikena.
7 Nuan enggai meri ai ngagai orang ke aus, lalu enggai meri orang ke lapar makai.
8 Nuan ngerampas semua menua ngena kuasa enggau pangkat nuan.
9 Nuan ukai semina enggai nulung indu ke balu, tang nuan mega ngerumpak sereta merinsaka orang ke nadai apai indai.
10 Nya alai, diatu nuan dikelingi panjuk, lalu nuan ngenyit takut.
11 Hari nyau balat amat petang datai ke nuan nyau enda ulih meda utai, lalu bah besai ngelamun nuan.
12 Kati Allah Taala enda diau di serega ti pemadu tinggi lalu nilik ke baruh ngagai bintang, taja pen sida nya ba endur ti tinggi?
13 Lalu ku nuan nanya, “Nama utai ti ditemu Allah Taala? Iya dilindung mua hari, nya alai baka ni ku iya ulih ngakim kitai?’’
14 Nuan ngumbai mua hari ti tebal ulih ngasuh Iya enda ulih meda, lebuh Iya bejalai ba kebung langit.
15 Kati nuan mutus ati deka bejalai nengah jalai ti seruran ditengah orang ke jai?
16 Indah sebedau timpuh datai deh sida anyut ditabanka ai bah.
17 Ku sida bejaku ngagai Allah Taala, ‘Anang ngachau kami,’ lalu ku sida bejaku, ‘Nama utai ti ulih dikereja Allah Taala ti Pemadu Bekuasangagai kitai?’
18 Tang iya ti bendar, Allah Taala Empu ke ngasuh sida nyadi kaya-raja. Aku sigi kejika pelan orang ke jai.
19 Orang ke badas, gaga ati, lalu orang ke nadai penyalah, ketawa lebuh sida meda orang ke jai diukum.
20 Semua utai ti dikemisi orang ke jai, dirusak magang, lalu api nganguska utai bukai ti tinggal.
21 Jop, manah nuan bebaik enggau Allah Taala, lalu badu agi ngaga Iya nyadi munsuh, nya baru Iya deka merekatka nuan.
22 Terima meh ajar ti diberi Iya. Simpan leka jaku Iya dalam ati nuan.
23 Sigi amat. Nuan enda tau enda ngemaruhka diri lalu pulai baru ngagai Allah Taala lalu badu agi ngereja penyai ti dikereja dalam rumah nuan.
24 Buai semua emas nuan. Buai emas nuan ti pemadu tulin ngagai buntut sungai ti rangkai.
25 Awakka Allah Taala ti Pemadu Bekuasa nyadika emas nuan, lalu awakka Iya nyadika pirak nuan.
26 Nya baru nuan deka seruran manggaika pengarap nuan ba Allah Taala lalu nemu Iya endang penatai pengaga nuan.
27 Lebuh nuan besampi, Iya deka nyaut nuan, lalu nuan deka ngamatka sumpah ti udah digaga nuan.
28 Nuan deka mujur dalam semua utai ti dikereja nuan, lalu penampak deka manchar ba jalai ti ditengah nuan.
29 Allah Taala ngemaruhka orang ke sumbung lalu ngidupka orang ke baruh ati.
30 Iya deka ngelepaska nuan, enti nuan nadai penyalah, enti nuan ngereja utai ti ngena.
 
Bagi 23
Ku Jop
1-2 Aku agi angkat ngelaban, sereta mutap ngelaban Allah Taala. Aku enda tetagangka diri bedemuh.
3 Naka meh pemanah enti aku tetemuka endur alai aku ulih nemu Allah Taala, lalu nemu chara datai ngagai endur alai Iya.
4 Aku deka mantaika pekara aku di mua Iya lalu mantaika semua penemu kena aku bejaku ngarika diri empu.
5 Aku keran deka nemu utai ti deka disebut Iya enggau chara Iya nyaut aku.
6 Kati Allah Taala deka ngelaban aku enggau pengabis pengering Iya? Enda. Iya deka mending lebuh aku bejaku.
7 Aku endang betul ati, lalu aku ulih berandau enggau Allah Taala. Iya deka ngumbai aku nadai penyalah sekali aja enggau ke belama iya.
8 Aku udah begigaka Allah Taala di timur, tang Iya nadai dia. Aku nadai tetemuka Iya lebuh aku ngiga Iya di barat.
9 Allah Taala udah bekereja di utara enggau di selatan, tang aku mengkang nadai meda Iya.
10 Tang taja pia, Allah Taala nemu genap singkang aku. Enti Iya ngabas ati aku, Iya deka nemu ati aku tuchi.
11 Enggau ati ti tetap aku nengah jalai ti dipilih Iya lalu aku enda sekali-kali limpang ari jalai nya.
12 Aku seruran ngereja utai ti diasuh Allah Taala. Aku nitihka peneka Iya.
13 Allah Taala endang enda berubah. Nadai orang ulih nyakal penemu Iya tauka nagang Iya ngereja utai ti deka dikereja Iya.
14 Iya deka ngamatka utai ti udah diperambu Iya ke aku. Perambu nya siti ari pemayuh pelan Iya.
15 Aku getar-getar takut di mua Iya.
16-17 Allah Taala ti Pemadu Bekuasa udah ngerusak pemerani aku. Allah Taala Empu ke ngasuh aku takut, ukai pemetang, taja pen pemetang udah ngasuh aku enda ulih meda.
 
Bagi 24
1 Nama kebuah Allah Taala enda ngeletak maya ngakim, hari alai Iya ngayanka atur ti lurus ngagai orang ke betuaika Iya?
2 Orang nginsitka kelai entara ngambika tanah sida besai agi. Sida ngenchuri jelu bedus, lalu nyimpan jelu nya ba raban jelu sida empu.
3 Sida ngambi keledai orang ke nadai apai indai, lalu nyimpan jelu sapi ti diempu indu ke balu nyentuk ngagai maya indu nya ulih mayar utang iya.
4 Sida nagang orang ke seranta nerima hak diri lalu mejalka orang ke seranta rari lalu belalai.
5 Nya alai orang ke seranta nyau baka jelu keledai begigaka pemakai di menua puang. Sida nadai endur bukai alai sida begigaka pemakai ke bala anak sida.
6 Sida dipejalka ngetau ba umai orang bukai, lalu begumpulka buah anggur ari kebun anggur orang ke jai.
7 Lebuh malam hari sida tinduk enda bepua, sereta nadai utai kena ngangatka tubuh.
8 Sida basah laban ujan ti labuh ba bukit, lalu sida engketut belindung ngimbai batu.
9 Orang ke jai beulunka anak mit ti nadai apai indai, lalu ngambi bala anak orang ke seranta nyadika bayar utang sida.
10 Tang orang ke seranta gawa nadai diberi gari. Sida enda diberi makai lebuh sida ngetau gandum.
11 Sida diasuh mitan buah kana ngulihka minyak, lalu mitan buah anggur ngulihka wain, tang sida empu aus.
12 Dalam mayuh bengkah nengeri orang ke bakal enggau orang ke nyau deka mati ngangau enggau sabak, tang Allah Taala enggai ibuhka sampi sida.
13 Orang nulak penampak. Sida enda meretika penampak, lalu enda nitihka iya.
14 Orang ke pemunuh angkat dini hari lalu bebunuhka orang ke seranta, lalu lebuh malam hari, iya ngenchuri.
15 Orang ke butang nganti hari petang. Iya ngelalaika mua diri ngambika orang enda ngelala iya.
16 Penchuri tama ngagai rumah orang lebuh malam hari, tang lebuh siang hari sida belalai, ngerarika diri ari penampak.
17 Sida takutka penampak siang hari, tang sida enda takutka pemetang.
18 Orang ke jai anyut ditabanka ai bah, lalu tanah sida disumpah Allah Taala. Sida nadai agi bekereja dalam kebun anggur sida empu.
19 Sida lela baka seleju ti dipanchar mata hari, enggau laban kemarau. Baka nya meh orang ke bedosa lesap ari dunya orang ke idup.
20 Indah indai sida empu deh enda agi ingatka sida diatu. Sida diempa ulat, lalu dirusak baka kayu ti udah rebah.
21 Utai nya nyadi laban sida merinsaka indu ke balu lalu enda ngayanka penelap ngagai sida indu ke nadai anak.
22 Ngena pengering Iya, Allah Taala ngerusak orang ke kering. Allah Taala bekereja, lalu orang ke jai mati.
23 Allah Taala tau nejuka sida idup likun, tang Iya seruran nengkilaka ulah sida.
24 Orang ke jai kaya enda lama, tang udah nya sida layu baka rumput, baka tangkai gandum ti udah ditetak.
25 Kati orang ulih ngumbai utai tu nadai udah nyadi? Kati orang ulih ngumbai aku bejaku bula?
 
Bagi 25
Ko Bildat
1-2 Allah Taala endang amat bekuasa. Semua orang enda tau enda nangika Iya. Iya meri pemaik ngagai perintah Iya di serega.
3 Kati orang ulih ngitung bala melikat ke bekereja ke Iya? Kati bisi endur ti enda kena panchar penampak Allah Taala?
4 Baka ni ku orang ulih nyadi lurus di mua Allah Taala? Baka ni ku mensia tau nyadi tuchi?
5 Enti di mata Iya, bulan enda terang, lalu bintang enda tuchi,
6 baka ni ku anak mensia, ke semina ulat aja, enggau mensia ti semina belut aja!’’
 
Bagi 26
Ko Jop
1-2 Naka meh pemendar nuan nulung aku ke seranta, ke lemi tu!
3 Nuan meri jaku lalau ti manah lalu nuan magi penemu nuan ngagai orang ke beli baka aku tu!
4 Dalam pikir nuan, sapa deka ningaka semua jaku nuan? Sapa ngasuh nuan bejaku baka tu?

Ko Bildat

5 Roh orang ke mati begetar di dunya pemati.
6 Ba mata Allah Taala, dunya pemati endang tebuka. Nadai utai ngelindung dunya nya ari mata Iya.
7 Allah Taala mintarka langit utara lalu ngitang dunya ba langit ti puang.
8 Allah Taala ngisi mua hari enggau ai lalu nagang mua hari pambus laban pemerat ai nya.
9 Iya ngelalaika bulan peranama di belakang mua hari.
10 Iya nyeraraka penampak ari pemetang ngena siti chengkerung ti digaga ba atas ai.
11 Lebuh Iya ngemba tiang ti nungkat langit, tiang nya takut lalu berenyang sereta begetar.
12 Pengering Allah Taala ti ngalahka tasik. Iya ngena pemintar Iya ngerusak naga ke benama Rahap
13 Kesuh seput Allah Taala ti ngasuh langit terang, lalu jari Iya ti munuh naga ti rari nya.
14 Tang tu semina nunjukka mimit aja pemesai kuasa Iya, semina jaku telai ti udah didinga kitai. Sapa nemu pemesai kuasa Allah Taala?
 
Bagi 27
Ko Jop
1-2 Aku besumpah dalam nama Allah Taala ti Pemadu Bekuasa, ti idup, ke enggai meri aku atur ti lurus tang ngasuh pengidup aku balat tusah:
3 seagi-agi Allah Taala meri aku seput,
4 mulut aku enggai sekali-kali nyebut utai ti jai, dilah aku enggai sekali-kali madahka utai ti bula.
5 Aku enggai sekali-kali ngumbai kita ngena. Aku deka majak ngumbai diri nadai penyalah nyentuk ngagai maya aku mati.
6 Aku enggai sekali-kali badu ngumbai diri ngena. Aku endang nemu diri nadai udah ngereja utai ti salah.
7 Awakka semua orang ke nyakal sereta ngelaban aku diukum baka orang ke jai enggau orang ke enda lurus.
8 Nama utai ti diadang orang ke enda nangika Allah Taala, lebuh Allah Taala ngambi seput sida?
9 Lebuh penusah datai, kati Allah Taala deka ningaka sabak sida?
10 Sida patut udah keran deka bempu pengaga ti diberi Iya. Sida patut udah seruran besampi ngagai Iya.
11 Awakka aku ngajar kita pasal pemesai kuasa Allah Taala, lalu nerangka utai ti udah diperambu Allah Taala ti Pemadu Bekuasa.
12 Tang enda ibuh, laban kita empu udah meda utai nya. Nya alai nama kebuah kita bejaku mapap munyi nya?

Ku Sopar

13 Tu jalai Allah Taala ti Pemadu Bekuasa ngukum orang ke jai, orang ke mangah.
14 Sida nyangka mayuh anak lelaki, tang semua sida nya deka mati beperang. Bala anak sida seruran suntuk pemakai.
15 Sida ke agi idup, deka mati laban penyakit. Indah balu sida deh enggai ngulitka pemati sida.
16 Orang ke jai nyangka bisi pirak ti enda ulih itung sereta mayuh agi gari ari ti dipeguna orang,
17 tang sekeda orang ke badas deka ngena gari nya lalu orang ke lurus ati, deka bulih pirak nya.
18 Orang ke jai ngaga rumah baka pukat empelawa tauka baka langkau ulun ke nyaga umai.
19 Ba pengujung iya sida deka gali natka pengaya diri, lalu lebuh sida dani, sida deka nemu pengaya sida nyau nadai agi.
20 Utai ti balat ngenakut deka nuntung sida baka bah. Ribut ti muput malam hari deka ngebuka sida.
21 Ribut ari timur deka ngebuka sida ari rumah sida.
22 Ribut nya deka ngebuka sida balat amat lebuh sida enggau naka ulih ngerarika diri.
23 Kabut nya nyau guntam-guntam mangkaka sida lebuh sida belanda, ngenakutka sida ngena kuasa iya ti tau ngerusak.
 
Bagi 28
Muji Penemu-dalam
1 Pirak endang diulihka ari lumbung pirak. Bisi mega endur alai nuchi emas.
2 Besi dikali ari tanah lalu engkeraju dilelaka orang ari batu.
3 Orang ngiga utai dalam lumbung ti pemadu petang. Sida ngiga di buntut dunya, lalu ngali batu dalam petang.
4 Sida numbak lumbung jauh ari endur alai orang diau, jauh ari endur ti udah kala ditengah mensia. Dia meh endur alai sida gawa kediri-diri, betayun ngena tali dalam lumbung nya.
5 Pemakai tumbuh ba tanah, tang di baruh tanah nya semua utai rumuh magang baka ke diempa api.
6 Batu ti dalam tanah ngundan batu nilam, lalu amau batu nya ngundan emas.
7 Menaul nadai nemu jalai tama ngagai lumbung nya, indah burung ti pemadu lansik deh enda kala meda lumbung nya.
8 Nadai singa tauka jelu bukai ti mangah kala nengah jalai ti sunyi nya.
9 Orang ngali batu ti pemadu kering, ngali nyentuk ngagai buntut bukit.
10 Lebuh sida nebuk lubang nengah batu, sida tetemuka batu ti berega.
11 Sida ngali tanah nyentuk ngagai entigis ulu sungai lalu tetemuka utai ti enda kala dipeda.
12 Tang dini alai kitai ulih tetemuka penemu-dalam? Dini alai kitai tau belajar ngambika kitai mereti?
13 Nadai mensia nemu jalai ngagai penemu-dalam, lalu iya nadai ditemu di menua mensia.
14 Tasik ti dalam enggau tasik ti mit madahka penemu-dalam nadai dalam sida.
15 Penemu-dalam enda ulih dibeli ngena pirak tauka emas.
16 Emas ti pemadu tulin enggau batu ti pemadu berega enda ulih dibandingka enggau iya.
17 Iya berega agi ari emas, lalu enda ulih disilih enggau emas ti tulin.
18 Penemu-dalam lebih agi berega ari batu karang tauka batu kristal, tauka batu rubi.
19 Batu jakut kuning ti pemadu manah, enggau emas ti pemadu tulin enda ulih dibandingka enggau penemu-dalam.
20 Nya alai, ari ni penatai penemu-dalam? Dini alai kitai belajar ngambika kitai mereti?
21 Nadai utai ti idup ulih meda iya. Indah burung ti terebai deh enda ulih meda iya.
22 Indah pemati enggau pengerusak deh madahka diri semina bisi udah ninga berita ngapa pasal iya.
23 Semina Allah Taala aja nemu jalai ngagai endur penemu-dalam,
24 Laban Iya meda pengujung dunya, meda semua utai di bap langit.
25 Lebuh Allah Taala meri kuasa ngagai ribut lalu ngeletak pemesai tasik,
26 lebuh Allah Taala ngeletak endur alai ai ujan labuh, enggau arus ti deka ditengah kilat enggau mua hari,
27 nya baru Allah Taala meda penemu-dalam, nguji iya, lalu ngemendarka iya.
28 Ku Allah Taala bejaku ngagai mensia, “Enti kita deka bepenemu-dalam, kita enda tau enda nangika TUHAN. Enti kita deka nemu reti utai, kita enda tau enda ngelengkaka penyai.’’
 
Bagi 29
Jop Nyimpul Jaku Diri
1 Jop lalu belabuh bejaku baru.
 
Ko Jop

2 Naka meh pemanah enti pengidup aku ulih diulang baru baka lebuh maya Allah Taala ti ngibun aku.
3 Lebuh maya nya suba Allah Taala endang seruran enggau aku lalu meri aku penampak lebuh aku bejalai nengah petang.
4 Nya meh maya aku kaya-raja, lalu kaul aku enggau Allah Taala nyaga rumah aku.
5 Allah Taala ti Pemadu Bekuasa bisi enggau aku lebuh maya nya suba, lalu aku dikelingi semua anak aku.
6 Bala jelu sapi enggau kambin aku mansutka mayuh ai tusu, lalu aku bulih mayuh minyak kana ari pitan aku.
7 Genap kali bala tuai nengeri baum lalu aku duduk enggau sida,
8 bala orang ke biak meri awak jalai aku mansa lebuh sida meda aku, lalu orang ke tuai bediri masa aku.
9 Bala tuai orang mayuh lalu ngetu bejaku.
10 Indah orang ke pemadu tinggi pangkat, deh enda engkeretik.
11 Semua orang ke meda aku, tauka ninga pasal aku bela bejakuka pemanah utai ti udah dikereja aku.
12 Lebuh orang ke seranta ngangau, aku nulung sida. Aku nulung orang ke nadai apai indai, ti nadai orang nulung.
13 Orang ke pengabis merinsa idup, muji aku lalu aku nulung indu ke balu diau likun.
14 Aku endang seruran ngereja utai ti lurus, sereta enda bepilih mata.
15 Aku nyadi mata ke orang ke buta lalu nyadi kaki ke orang ke enda ulih bejalai.
16 Aku udah nyadi apai ke orang ke seranta lalu setanah enggau orang kampar ke kena laban penusah.
17 Aku ngerusak kuasa orang ke jai lalu ngelepaska orang ke diperinsaka sida.
18 Aku endang seruran ngadang diri panjai umur lalu mati di rumah diri enggau nyamai.
19 Aku tu baka kayu ti galak urat ti seruran chukup ai lalu dan seruran basah laban ambun.
20 Semua orang seruran muji aku, lalu pengering aku nadai kala ngelebuka aku.
21 Lebuh aku meri jaku lalau, orang enda engkeretik lalu diau jenuh mendingka jaku aku,
22 lalu lebuh aku udah badu bejaku, sida nadai ibuh nambahka jaku ngagai utai ti disebut aku. Leka jaku aku ngenyamaika ati sida baka leka ujan.
23 Genap iku sida bela gaga ati nerima jaku aku, baka orang bumai ke gaga ati ke ai ujan lebuh musin bungai.
24 Aku tuchum ngagai sida, lebuh sida enda kempang. Mua aku ti lantang, meransang sida.
25 Aku nyadi tuai sida, lalu meri pemutus penemu. Aku nguluka sida baka raja ke nguluka bala soldadu iya, lalu ngelantangka sida, lebuh ati sida tusah.
 
Bagi 30
1 Tang diatu, lelaki ke biak agi ari aku, beduan aku! Apai sida endang nadai guna, datai ke aku enggai ngasuh sida nulung ukui aku ngibun bedus.
2 Sida nya orang ke nadai pengering agi, ke kelalu lembut tulang lalu enda ulih bekereja ke aku.
3 Sida iya kelalu seranta sereta keberuran datai ke sida nyau bekunyahka urat ti rangkai ba tanah lebuh malam hari, di menua ti nadai orang nguan.
4 Sida nyabut lalu makai sebarang utai ti tumbuh di menua puang. Indah urat utai ti enda nyamai, deh abis diempa sida!
5 Semua orang manjung muru sida, baka ke muru penchuri.
6 Sida diau dalam lubang gua, dalam lubang ti ba tingkah.
7 Lebuh sida dalam utan, sida meraung munyi jelu lalu bekempit duduk di baruh pun kayu.
8 Sida nya orang ke nadai guna! Sida udah dibuai ari menua tu.
9 Diatu sida datai lalu ketawaka aku. Ba sida, aku tu nadai reti tang semina orang ke diketawaka sida.
10 Sida nyau kejika aku. Sida ngumbai diri kelalu manah lalu enda patut begulai enggau aku, lalu ngeludah mua aku.
11 Laban Allah Taala udah ngasuh aku lemi sereta nadai daya agi, sida lalu ngelaban aku enggau naka pemalat.
12 Bala orang ke jai tu lalu nyerang aku ari mua. Sida muru aku. Sida sedia deka nyerang aku lalu ngerusak aku.
13 Sida mempang jalai aku rari, lalu ngerusak aku, lalu nadai orang nagang sida.
14 Sida beterudus tama nengah lubang ba dinding kuta aku lalu ninggang aku.
15 Aku balat amat takut. Pangkat aku lenyau, baka ke dikesuhka ribut, lalu pengandal aku ke diri deka menang, lesap baka mua hari.
16 Diatu aku nyau deka mati. Nadai utai ulih muai pemerinsa aku.
17 Lebuh malam hari, semua tulang aku pedis magang. Tubuh aku enda badu pedis.
18 Allah Taala ngeruntun rekung baju aku lalu mulaska gari aku nadai temu tunga.
19 Iya ngempaska aku ngagai luchak, datai ke aku nyau baka tanah.
20 Aku ngangauka Nuan, O Allah Taala, tang Nuan nadai kala nyaut, lalu lebuh aku besampi, nuan enda mending.
21 Nuan balat amat jai enggau aku. Nuan merinsaka aku ngena semua kuasa Nuan.
22 Nuan nejuka ribut ngebuka aku. Nuan ngelambungka aku ngena ribut biaubalai.
23 Aku nemu Nuan deka ngasuh aku mati, lalu muai aku ngagai endur ti endang udah digalau Nuan ke semua mensia.
24 Nama kebuah Nuan nyerang orang ke udah rusak, orang ke nadai daya agi, ke ngangau minta saup?
25 Kati aku enda kala nyabak enggau orang ke ditinggang penusah lalu berasai sinu ati ke orang ke suntuk?
26 Aku ngadang diri tau bulih pengelantang enggau penampak, tang penusah enggau pemetang datai.
27 Ati aku balat tusah laban pengirau enggau pemedis. Aku merinsa tiap hari.
28 Aku bejalai dalam petang, nadai dipanchar mata hari. Aku bediri di mua orang mayuh, minta saup orang.
29 Aku nyabak seilu-ilu tusah ati munyi nyawa pasun tauka burung unta.
30 Kulit aku nyau bebali chelum. Tubuh aku nyau angat laban penyakit.
31 Dulu menya aku ninga munyi musik ti ngasuh ati gaga, tang diatu aku semina ninga munyi orang ke ngulit enggau nyabak.
 
Bagi 31
1 Aku udah besumpah madahka diri enggai merening ngagai indu enggau ati ti kanji.
2 Nama utai ti dikereja Allah Taala ti Pemadu Bekuasa ngagai kitai? Baka ni ku jalai Iya malas utai ti dikereja mensia?
3 Iya ngasuh penusah ti besai enggau pengerusak ninggang orang ke ngereja penyalah.
4 Allah Taala nemu semua utai ti dikereja aku. Iya meda semua singkang aku.
5 Aku besumpah madahka diri nadai kala ngereja penyai lalu nadai kala nipu orang.
6 Awakka Allah Taala nimbang aku ngena dachin ti betul, nya baru Iya deka nemu aku endang nadai penyalah.
7 Enti aku udah limpang ari jalai ti ngena tauka nejuka diri tetengukka penyai, enti jari aku udah kamah laban dosa,
8 awakka utai ti ditanam aku dirusak magang, tauka awakka orang bukai makai pemakai ti ditanam aku.
9 Enti aku udah kala inginka bini orang, lalu ngipa iya ba mua pintu iya,
10 awakka bini aku manduk pemakai ke lelaki bukai lalu tinduk ba peninduk lelaki bukai.
11 Penyai ti baka nya patut diukum ngena pemati.
12 Utai nya baka api ti ngerusak, ti datai ari neraka, ti nganguska semua utai ti dikemisi aku.
13 Lebuh orang gaji aku mutap ngelaban aku, aku mending lalu aku manah enggau sida.
14 Enti aku enda, baka ni ku aku ulih bediri di mua Allah Taala ila? Nama utai ti deka disebut aku lebuh Allah Taala datai ngakim aku?
15 Allah Taala ngaga aku lalu Iya mega ngaga orang gaji aku.
16 Aku nadai kala enggai nyaup orang ke seranta. Nadai aku kala nejuka indu ke balu diau tusah ati
17 tauka nejuka anak mit ti nadai apai indai lapar, lebuh aku makai.
18 Seumur idup, aku udah ngibun sida.
19 Lebuh aku tetemuka orang ke suntuk, ke kelalu seranta lalu enda ulih meli gari ke diri empu,
20 aku meri iya gari ti digaga ari bulu bedus ari raban bedus aku empu. Nya baru iya deka muji aku enggau pengabis ati iya.
21 Enti aku udah nipu anak mit ti nadai apai indai, ketegal aku nemu diri deka menang enti aku bechara dalam kot,
22 awakka lengan aku dipatahka. Awakka lengan aku diputuska ari bau aku.
23 Aku nangika ukum Allah Taala, nya kebuah aku enda ulih ngereja utai ti baka nya.
24 Aku nadai kala manggaika diri ba pengaya
25 tauka temegahka pengaya aku.
26 Aku nadai kala nyembah mata hari ti manchar terang tauka bulan ti manah gaya.
27 Aku nadai kala dibai tesat lalu ngemesaika sida besiumka jari diri ketegal bebasaka sida.
28 Dosa ti baka nya patut diukum ngena pemati, laban iya besangkalka Allah Taala ti Pemadu Bekuasa.
29 Aku nadai kala gaga ati lebuh munsuh aku merinsa, tauka lantang ati lebuh sida dituntung penusah.
30 Aku nadai kala bedosa besampi minta sida mati.
31 Semua orang ke bekereja ke aku nemu aku endang seruran ngelaluka temuai ngagai rumah aku.
32 Aku ngelaluka temuai tama ngagai rumah aku lalu aku enda kala nejuka sida tinduk ba jalai raya.
33 Orang bukai nguji ngelalaika dosa diri, tang aku nadai kala ngelalaika dosa aku.
34 Aku nadai kala nangika jaku orang. Aku nadai kala enda bemunyi, tauka diau di rumah, ketegal takutka diri dikeleseka sida.
35 Kati orang nadai deka mendingka utai ti disebut aku? Aku besumpah, semua utai ti disebut aku endang amat magang. Awakka Allah Taala ti Pemadu Bekuasa nyaut aku. Enti dawa ti dikena munsuh aku besalahka aku dituliska magang ngambika aku ulih meda dawa nya,
36 aku deka ngelekatka dawa nya ba bau aku lalu ngengkahka dawa nya nyadika makota ba pala aku.
37 Aku deka madahka ngagai Allah Taala semua utai ti udah dikereja aku lalu enda malu bediri di mua Iya.
38 Enti aku udah ngenchuri tanah ti dipumai aku lalu udah ngerampas tanah nya ari orang,
39 lalu enti aku udah bisi makai utai ti tumbuh ba tanah nya tang nejuka orang ke nanam utai nya, lapar
40 awakka umai aku tumbuh rumput enggau lalang lalu enda tumbuh gandum enggau barli. Baka nya ku pengujung jaku Jop.
 
Bagi 32
Jaku Elihu
1 Sida tiga lalu badu agi nyaut Jop, laban iya majak madahka diri nadai ngereja penyalah.
2 Tang siku orang ke bediri semak dia, ke benama Elihu, nyau enda ulih natka diri agi pedis ati, laban Jop beluruska diri empu lalu besalah Allah Taala. (Elihu nya anak Barakel, peturun Bus, ari raban peturun Ram.)
3 Iya mega pedis ati ngagai pangan Jop ke tiga iku nya, laban sida nadai nemu jalai nyaut Jop, ti ngujungka Allah Taala baka ke salah.
4 Elihu nya orang ke pengabis biak ke semua sida. Nya alai iya nejuka semua sida ke tuai bejaku dulu.
5 Lebuh iya meda sida tiga nya enda ulih nyaut Jop, iya pedis ati
6 lalu belabuh bejaku.
 
Ko Elihu

Aku tu biak, lalu kita tuai. Nya kebuah aku enda berani mantaika runding diri ngagai kita,
7 laban dalam runding aku, kita patut bejaku dulu, lalu kita ke tuai patut bekunsika penemu-dalam ti dikembuan kita.
8 Tang iya ti bendar, Roh Allah Taala ti Pemadu Bekuasa ke meri penemu-dalam ngagai kitai.
9 Ukai penuai umur kitai ti ngasuh kitai bepenemu-dalam tauka nemu utai ti ngena.
10 Nya alai aku diatu minta kita mendingka aku madahka runding diri ngagai kita.
11 Aku udah liat ati mendingka kita bejaku lalu nganti kita begigaka jaku ti menyana agi.
12 Aku udah diau diri mendingka kita, lalu ninga kita alah penemu. Nadai siku kita ulih madahka jaku Jop salah.
13 Baka ni ku kita tau ngumbai diri udah tetemuka penemu-dalam? Allah Taala enda tau enda nyaut Jop, laban kita enda tesautka iya.
14 Jop bejaku ngagai kita, ukai ngagai aku, tang aku sigi enggai sekali-kali nyaut ngena chara kita.
15 Jop, sida udah alah jaku laban nuan, enda tesautka nuan.
16 Kati aku patut majak nganti baru aku tau bejaku? Sida enda bemunyi, bediri tegir-tegir, enda nemu utai ti patut disebut diri agi.
17 Aku deka nyaut nuan diatu lalu madahka runding aku ngagai nuan.
18 Aku enda ulih natka diri enda bejaku. Aku enda ulih nagang diri bejaku.
19 Enti aku nadai peluang bejaku, aku deka meletup baka kambut wain ti penuh laban wain ti baru.
20 Aku enda ulih natka diri agi. Aku enda tau enda bejaku.
21 Aku ukai ngarika sapa-sapa dalam randau tu, lalu aku pen enda mega muji sapa-sapa,
22 laban aku enda nemu chara muji orang, lalu Allah Taala deka ngukum aku enggau ngenyit, enti aku muji sapa-sapa.
 
Bagi 33
1 Nya alai, Jop, pendingka enggau manah semua utai ti deka disebut aku.
2 Aku diatu udah sediaka mantaika runding diri.
3 Semua jaku aku tu endang datai ari ati aku empu, lalu aku nyebut utai ti bendar.
4 Roh Allah Taala udah ngaga aku lalu ngasuh aku idup.
5 Saut aku, enti nuan ulih. Sediaka penemu nuan.
6 Ba mata Allah Taala, tua tu sebaka. Tua tu sama ditempa ari tanah.
7 Nya alai nuan nadai kebuah takutka aku. Aku ukai deka ngalahka nuan.
8 Tu jaku nuan ti udah didinga aku:
9 “Aku enda salah. Aku nadai udah ngereja penyalah. Aku nadai penyalah, lalu aku enda bedosa.
10 Tang Allah Taala begigaka tegal kena Iya ngelaban aku lalu ngaga aku baka munsuh.
11 Iya nanchang kaki aku ngena rantai. Iya nengkilaka semua utai ti dikereja aku.’’
12 Tang, aku madahka ngagai nuan, Jop, nuan salah. Allah Taala bekuasa agi ari mensia.
13 Nama kebuah nuan besalah Allah Taala ngumbai Iya nadai kala nyaut jaku putap kitai?
14 Taja pen Allah Taala enda ngetu bejaku, nadai orang mendingka utai ti disebut Iya.
15 Lebuh orang tinduk malam hari, Allah Taala bejaku dalam mimpi enggau genera.
16 Iya ngasuh sida mendingka utai ti disebut Iya, lalu sida takut ninga jaku tangkan Iya.
17 Allah Taala bejaku ngasuh sida badu agi bedosa lalu nagang sida ngenyumbungka diri.
18 Iya enggai nejuka sida dirusak. Iya ngelepaska sida ari kuasa pemati.
19 Allah Taala nganu kitai ngena penyakit lalu ngisi tubuh kitai enggau pemedis.
20 Orang ke sakit enggai makai. Indah pemakai ti pemadu manah deh ngasuh sida mutah.
21 Tubuh sida mansang kurus-sekurus. Semua tulang sida ayan magang.
22 Sida baru deka mansang ngagai dunya pemati.
23 Nyangka ukur melikat bisi deka datai nyaup sida, siku ari beribu-ribu iku melikat Allah Taala, ke ngasuh kitai ingatka pengawa kitai.
24 Enggau ati ti kasih melikat nya bejaku, “Lepaska sida! Sida enda tau nurun ngagai dunya pemati. Tu tebus kena ngelepaska sida.’’
25 Tubuh sida deka mansang biak sereta kering baru.
26 Lebuh sida besampi, Allah Taala deka nyaut. Sida deka nyembah Allah Taala enggau ati ti gaga. Allah Taala deka ngaga utai ngena baru ke sida.
27 Genap iku sida deka bejaku di mua orang mayuh, “Aku udah bedosa. Aku nadai ngereja utai ti ngena, tang Allah Taala udah ngampun aku.
28 Iya udah nagang aku mansang ngagai dunya pemati, lalu aku mengkang idup.’’
29 Allah Taala endang seruran ngereja semua utai nya,
30 lalu ngidupka nyawa orang lalu ngasuh orang nya gaga idup.
31 Jop, diatu pendingka utai ti disebut aku. Anang bemunyi, lalu awakka aku bejaku.
32 Tang enti nuan bisi utai ti deka disebut nuan, awakka aku ningaka utai nya. Aku deka gaga ati ngumbai nuan ngena.
33 Tang enti nuan nadai utai disebut, anang bemunyi, lalu pendingka aku, ngambika aku ngajar nuan jalai nyadi orang ke bepenemu-dalam.
 
Bagi 34
1 Udah nya Elihu lalu bejaku:
2 “Dingaka jaku aku, kita ke bepenemu-dalam, lalu singitka pending kita ngagai aku, kita ke nemu utai.
3 Peratika jaku aku baka nyawa ke meratika penyamai utai ti dipakai.
4 Awakka kitai milih utai ti ngena. Awakka kitai meri pemutus penemu pasal bagi utai ti manah.
5 Jop ngumbai diri nadai penyalah, lalu ngumbai Allah Taala enggai meri iya atur ti lurus.
6 Ku Jop nanya, ‘Baka ni ku aku ulih bula lalu ngumbai diri salah? Aku nyau deka mati laban bakal, tang aku enda bedosa.’
7 “Kati kita udah kala meda orang ke baka Jop ti nadai kala nangika Allah Taala.
8 Iya rindu begulai enggau orang ke jai lalu segau-segau bejalai enggau orang ke bedosa.
9 Ku Jop, ‘nadai guna kitai nguji nitihka peneka Allah Taala.’ ‘‘
10 “Pendingka aku, kita ke mereti! Kati Allah Taala ti Pemadu Bekuasa deka ngereja utai ti salah?
11  Iya ngupah orang nitihka utai ti dikereja sida lalu ngukum sida enggau pematut.
12 Allah Taala ti Pemadu Bekuasa enda ngereja penyai, lalu Iya enda kala meri atur ti enda lurus.
13 Sapa meri Allah Taala kuasa merintah dunya? Sapa ngengkahka dunya tu ba jari Iya?
14 Enti Allah Taala ngambi seput pengidup ari kitai, lalu ngambi seput nya pulai baru ngagai Iya Empu,
15 semua mensia deka mati magang lalu pulai nyadi amau baru.
16 “Pendingka aku diatu, enti kita amat bepenemu-dalam.
17 Kati orang ke begedika atur ti lurus, ulih megai perintah? Kati kita besalah Allah Taala ti lurus sereta bekuasa,
18 ke bejaku ngagai raja, ‘Nuan tu nadai guna,’ lalu bejaku ngagai orang ke tinggi pangkat, ‘Nuan tu orang ke jai’;
19 lalu enda ngemesaika orang ke kaya lebih agi ari orang ke seranta? Laban semua sida iya digaga Iya magang.
20 Enda lama da agi sida deka mati; Ba urung tengah malam sida digusak lalu mati, lalu orang ke bekuasa ukai dibunuh mensia.
21 “Laban Allah Taala nengkilaka semua ulah kitai, lalu meda semua singkang kitai.
22 Nadai pemetang ulih ngelalaika orang ke bedosa ari Allah Taala.
23 Laban Allah Taala enda ibuh ngeletak maya kitai mupuk lalu diakim ulih Iya.
24 Iya enda ibuh mansik orang ke bekuasa sebedau Iya nganchurka sida, lalu ngeletak orang bukai nganti sida
25 Laban Iya nemu utai ti dikereja sida, nya alai Iya muai lalu ngeredakka sida lebuh malam hari.
26 Iya nyamah sida di mua orang mayuh ketegal penyai ti dikereja sida,
27 laban sida enggai agi nitihka Iya lalu enda bedulika pesan Iya.
28 Ketegal sida, orang ke seranta nyabak ngangauka Allah Taala, lalu Iya ningaka kangau sida ke kena perinsa.
29 Lebuh Allah Taala enda ngereja utai, sapa ulih mantah Iya? Lebuh Iya ngelalaika mua Iya, sapa ulih meda Iya, nemuka nya bansa tauka orang?
30 Ngambika orang ke enda nangika Allah Taala, tauka orang ke nipu orang mayuh enda megai perintah.
31 “Jop, kati nuan udah ngaku dosa nuan di mua Allah Taala lalu besemaya enda agi bedosa?
32 Kati nuan bisi udah minta Allah Taala ngayanka penyalah nuan, lalu nuan besemaya enggai agi ngereja penyai?
33 Laban nuan nulak utai ti dikereja Allah Taala, kati nuan patut ngarapka Iya deka ngereja utai ti dikinginka nuan? Laban nuan empu ke patut milih, ukai aku; nya alai sebut utai ti ditemu nuan.
34 Orang ke mereti deka nyebut ngagai aku, lalu orang ke bepenemu-dalam ke ninga aku deka nyebut,
35 ‘Jop bejaku laban iya enda nemu utai lalu semua utai ti disebut iya sigi nadai reti magang.’
36 Manah amat enti Jop diuji enggau penuh, laban iya nyaut munyi orang ke jai.
37 Laban iya angkat ngelaban Allah Taala kena iya nambahka dosa diri. Iya betempap jari di mua semua kitai, lalu ngeleseka Allah Taala.’’
 
Bagi 35
1-2 Jop, nuan enda patut ngumbai diri enda salah di mua Allah Taala.
3 Enti nuan nanya, ‘Baka ni ku dosa aku tau ngawa Nuan? Nama untung aku, enti aku enda bedosa?’
4 Aku deka nyaut nuan, enggau bala pangan nuan.
5 Peda nuan langit! Peda nuan mua hari ti tinggi agi ari nuan!
6 Enti nuan bedosa ngelaban Iya, nama utai ulih nuan ari nya? Enti nuan ngereja mayuh macham penyalah, nama utai ti dikereja nuan ngagai Iya?
7 Enti nuan lurus, nama utai ti diberi nuan ngagai Iya? Nama utai ti diterima Iya ari jari nuan?
8 Orang bukai nyau merinsa laban dosa nuan, lalu pengelurus nuan ulih mai penguntung ngagai orang bukai.
9 Lebuh orang kena tekan, sida bedemuh. Sida nyabak minta orang ngelepaska sida.
10 Tang sida enda nguing ngagai Allah Taala, ke ngaga sida, ke meri sida pengering lebuh malam hari,
11 ke ngajar sida lebih agi ari ke ngajar jelu di dunya tu, lalu ngasuh sida lebih agi pintar ari burung.
12 Sida nyabak minta tulung, tang Allah Taala enda nyaut, laban sida sumbung sereta jai.
13 Nadai guna sida ngangau. Allah Taala ti Pemadu Bekuasa enda meda tauka ninga sida.
14 Jop, nuan madahka diri enda ulih meda Allah Taala. Tang nuan patut nganti enggau ati ti liat. Pekara nuan bisi di mua Iya.
15 Nuan ngumbai Allah Taala enda ngukum, ngumbai Iya enda tentu ibuhka dosa.
16 Nadai guna nuan majak bejaku. Nuan endang nyata enda nemu utai ti disebut diri.
 
Bagi 36
1-2 Anang enda liat ati, lalu pendingka lama agi utai ti disebut aku ngarika Allah Taala.
3 Penemu aku luas. Ngena utai ti ditemu aku, aku deka mandangka pengelurus Allah Taala ti udah ngaga aku.
4 Utai ti disebut aku ngagai nuan nadai bula siti. Orang ke di mua nuan nya orang ke amat bepenemu-dalam.
5 Allah Taala endang amat bekuasa, lalu Iya enda ngeleseka orang; Iya nemu semua utai.
6 Iya enda nejuka orang ke bedosa majak idup, lalu Iya meri atur ti lurus ngagai orang ke kena perinsa.
7 Iya nyaga orang ke lurus. Iya ngemendarka sida merintah baka raja lalu nejuka sida dibasa belama iya.
8 Lalu enti sida ditanchang ngena rantai, lalu kena perinsa ketegal utai ti udah dikereja sida,
9 Allah Taala deka madahka ngagai sida utai ti udah dikereja sida enggau penyalah sida, ti nunjukka sida udah ngenyumbungka diri.
10 Iya ngasuh sida mendingka jaku ajar Iya, lalu ngasuh sida ngelengkaka penyai.
11 Enti sida mending lalu betuaika Iya, sida deka bulih pengaya seumur idup, sereta nyamai diau.
12 Tang enti sida enda mendingka Iya, sida deka dipantap ngena pedang, lalu mati mengkang nadai nemu utai.
13 Orang ke enda arapka Allah Taala majak ringat; sida enda besampi minta tulung lebuh Iya nanchang sida.
14 Sida mati biak, nabanka ati ti malu.
15 Tang Allah Taala ngajar orang ngena pemerinsa lalu muka mata sida ngena penusah.
16 Allah Taala udah mai nuan pansut ari penusah ngagai endur ti luas ti nadai utai nekul, lalu pemakai ti pemadu manah ditugungka ba mija nuan.
17 Tang diatu nuan benung diukum nitihka pematut.
18 Bejimat nuan, enggai ke nuan kena tipu lalu makai suap, tauka pengaya nuan mai nuan limpang.
19 Nadai guna nuan ngangau minta tulung. Semua pengering nuan enda ulih nulung nuan diatu.
20 Anang ngajihka malam datai alai semua bansa deka mati.
21 Bejimat nuan, enggai ke nuan nguingka diri ngagai penyai. Pemerinsa nuan endang diasuh datai kena nagang nuan ari penyai.
22 Kingatka pemesai kuasa Allah Taala. Iya pengajar ti pemadu besai.
23 Nadai orang ulih madahka ngagai Allah Taala utai ti patut dikereja Iya tauka ngumbai Iya udah ngereja penyai.
24 Iya endang seruran dipuji ketegal utai ti dikereja Iya. Nuan empu pen enda tau enda mega muji Iya.
25 Semua mensia udah meda utai ti udah dikereja Iya, tang kitai semina ulih ninjau ari jauh.
26 Kitai enda ulih nemu enggau silik pasal pemesai kuasa Iya tauka ngitung umur Iya.
27 Allah Taala ngambi ai ari dalam tanah lalu ngaga ai nya nyadi leka ujan.
28 Iya ngasuh ujan labuh ari mua hari ti bekeberai ninggang semua mensia.
29 Nadai orang nemu jalai mua hari mindah tauka jalai guntur meletup di langit, ti alai Allah Taala diau.
30 Iya ngasuh kilat nyelar di langit, tang buntut tasik mengkang petang.
31 Nya meh chara Iya nupi mensia lalu meri pemakai ti mayuh.
32 Iya nangkap kilat ngena jari Iya lalu ngasuh kilat nya mangka ba endur ti udah diletak.
33 Guntur madahka hari deka kabut lalu jelu sapi nemu kabut nya deka datai.
 
Bagi 37
1 Kabut ngasuh tungkul ati aku ketap-ketap.
2 Pendingka ulih semua kita, munyi nyawa Allah Taala, munyi guntur ti pansut ari nyawa Iya.
3 Iya ngasuh kilat nyelar di langit, ari ujung dunya siti ngagai ujung siti.
4 Nya baru auh nyawa Iya didinga, munyi guru guntur ti manah didinga, sekumbang kilat ti nyelar.
5 Lebuh Allah Taala bejaku, utai lalu nyadi, utai ti badas, ti enda ditemu kitai reti.
6 Iya ngasuh seleju labuh ke tanah, lalu ngasuh ujan bangat.
7 Iya ngasuh kitai badu gawa. Iya mandangka ngagai kitai utai ti ulih dikereja Iya.
8 Jelu babas pulai ngagai lubang sida.
9 Ribut biaubalai datai ari selatan, lalu ribut ti udu chelap datai ari utara.
10 Kesuh seput Allah Taala ngasuh ai meku, lalu ngasuh sida bebali nyadi ais.
11 Kilat nyelar ari mua hari,
12 nitihka peneka Allah Taala. Sida ngereja semua utai ti diasuh Allah Taala, di semua endur, di serata dunya.
13 Allah Taala ngasuh ujan ngemasahka tanah. Nyangka Iya ngukum kitai ngena ai ujan, tauka mandangka pengerindu Iya ke kitai.
14 Ngetu enda lama, Jop, lalu pendingka aku. Peratika utai ti badas ti dikereja Allah Taala.
15 Kati nuan nemu jalai Allah Taala meri pesan Iya lalu ngasuh kilat nyelar ari mua hari?
16 Kati nuan nemu jalai mua hari ulih melepung di langit, pengawa ti dikereja Allah Taala ngena pengelandik Iya?
17 Nuan enda nemu. Nuan semina merinsa natka pengangat lebuh ribut muput ari selatan.
18 Kati nuan ulih nulung Allah Taala mintarka langit lalu ngasuh langit nya kering baka besi ti dipugar?
19 Ajar kami utai ti patut disebut kami ngagai Allah Taala. Kami nadai penemu, nadai utai disebut.
20 Aku enggai minta diri bejaku enggau Allah Taala. Nama kebuah aku meri Iya peluang ngerusak aku?
21 Diatu penampak di langit nyau manchar terang, kelalu tampak lalu enda ulih diperening kitai, lalu langit udah beresi laban iya dipuputka ribut.
22 Panchar ti be-emas emas bisi dipeda di utara, lalu mulia Allah Taala ngasuh kitai nangi.
23 Kuasa Allah Taala endang besai, datai ke kitai enda ulih datai semak ngagai Iya. Iya endang lurus sereta betul dalam semua pengawa Iya enggau kitai.
24 Nya alai, semua orang endang patut nangika Iya. Iya enggai ibuhka orang ke ngumbai diri bepenemu-dalam.
 
Bagi 38
TUHAN Nyaut Jop
1 Udah nya TUHAN lalu bejaku ngagai Jop ari biaubalai nya.
 
Ko TUHAN

2 “Sapa nuan nya ti berani betanyaka penemu-dalam ari Aku, ngena jaku ti beli sereta kusung?
3 Bediri terit lalu saut tanya Aku.
4 Kati nuan bisi dia lebuh Aku ngaga dunya? Enti nuan amat mayuh penemu, padahka nya ngagai Aku.
5 Sapa ngeletak pemesai dunya? Sapa nerantingka tali kena nyukat pemesai dunya? Kati nuan nemu semua saut ke semua tanya nya?
6 Nama utai ti ngasuh tungkat dunya bediri? Sapa nudukka batu pemun dunya?
7  Pagi nya, semua bintang belagu sama sereta, lalu bala orang serega manjung gaga ati.
8 Sapa nikupka pintu kena nagang ai tasik masuk lebuh ai nya pansut ari pusat dunya?
9 Aku tu ke mungkur tasik ngena mua hari lalu mungkus iya ngena pemetang.
10 Aku tu ke ngeletak garis entara darat enggau tasik lalu nagang ai tasik tama nengah pintu ti bekalang.
11 Ku Aku bejaku enggau ai tasik, ‘Naka tu aja! Anang ngelui tu! Gelumbang nuan ti balat enda tau ngalun ngelui tu.’
12 Jop, kati nuan, dalam sepemanjai umur nuan, bisi udah kala ngasuh hari siang?
13 Kati nuan udah kala ngasuh merekah pajar merintah dunya lalu ngusak orang ke jai pansut ari endur alai sida ke belalai?
14 Penampak mata hari ngasuh bukit enggau lebak ayan nyata baka lepi kain, nyengala baka chop ti ditekanka ba tanah liat.
15 Penampak siang hari kelalu terang ke orang ke jai lalu nagang sida ngayanka pemangah sida.
16 Kati nuan bisi udah kala bejalai ngagai mata ai ti ba buntut tasik? Kati nuan udah kala bejalai nengah buntut tasik?
17 Kati orang bisi udah kala mandangka ngagai nuan pintu ti nyaga dunya pemati ti petang?
18 Kati nuan nemu pemesai dunya? Padahka ngagai Aku, enti nuan nemu semua utai nya.
19 Kati nuan nemu asal penatai penampak tauka asal penatai pemetang?
20 Kati nuan ulih madahka ikas entara pemetang enggau penampak, tauka ngasuh seduai iya pulai baru lebuh seduai iya udah datai?
21 Aku nemu nuan ulih ngereja nya, laban nuan tuai amat umur lalu nuan endang bisi dia lebuh dunya digaga!
22 Kati nuan udah kala tama ngagai bilik setor, endur alai Aku ke naruh seleju enggau ujan batu?
23 Aku naruh sida nyendiaka maya penusah nyadi maya orang beperang.
24 Kati nuan udah kala bejalai ngagai endur alai mata hari pansut, tauka ngagai endur alai penatai ribut ti muput ari timur?
25 Sapa ke numbak parit ke ujan ti lebat lalu ngelasi jalai keguntur enggau kilat?
26 Sapa ngasuh ai ujan labuh ba endur ti nadai mensia?
27 Sapa meri ai ngagai menua ti rangkai, sereta aus, lalu ngasuh rumput tumbuh?
28 Kati ujan tauka ambun bisi apai?
29 Sapa indai ais enggau batu seleju,
30 ti ngasuh ai bebali nyadi batu lalu ngasuh ai tasik meku?
31 Kati nuan ulih ngerempungka bintang tujuh tauka muka tanchang bintang banyak?
32 Kati nuan ulih ngatur pejalai bintang ari musin siti ngagai musin siti lalu ngatur pejalai bintang tiga enggau bintang tujuh?
33 Kati nuan nemu adat ti merintah langit. Kati nuan ulih neritka adat nya ngagai dunya?
34 Kati nuan ulih manjung merintah mua hari lalu ngasuh sida manjah nuan ngena ujan?
35 Lalu enti nuan ngasuh kilat nyelar, kati iya deka datai ngagai nuan, lalu bejaku, ‘Tu aku, tuan’?
36 Sapa madahka ngagai burung ibis tauka madahka ngagai manuk sabung hari deka ujan?
37 Sapa chukup bepenemu-dalam lalu ulih ngitung mua hari? Sapa ulih nyingitka mua hari ngambika sida mansutka ujan,
38 ujan ti ngasuh amau betekang?
39 Kati nuan ngiga pemakai ke singa, ngambika anak singa kenyang
40 lebuh sida belalai dalam lubang sida tauka gali ngipa ba alai sida ke belalai?
41 Sapa nupi burung kak lebuh sida terebai segau-segau lapar, lebuh anak sida nyabak minta pemakai ngagai Aku?
 
Bagi 39
1 Kati nuan nemu maya kambin bukit ada? Kati nuan kala nengkilaka rusa beranak?
2 Kati nuan nemu pengelama sida ngandung? Kati nuan nemu maya anak sida patut ada?
3 Kati nuan nemu maya sida deka ningkap lalu beranak?
4 Anak sida mansang kering-sekering dalam babas. Sida angkat, lalu enda pulai agi.
5 Sapa udah ngelepaska keledai kampung? Sapa muka tanchang sida lalu ngasuh sida mawa?
6 Aku meri sida menua puang alai sida diau, lalu nejuka sida diau ba emperan garam.
7 Sida diau jauh ari nengeri ti inggar, lalu nadai orang ulih bejinakka sida, lalu ngena sida ngereja pengawa.
8 Padang rumput ba bukit nyadi endur alai sida ngulam, alai sida ngiga rumput.
9 Kati sapi ti siga deka bekereja ke nuan? Kati iya deka bemalam ba bansal jelu tupi nuan?
10 Kati nuan ulih nanchang sapi nya ngena tali, lalu mejalka iya ngeradu tanah? Tauka mejalka iya narit pengeradu tanah ba umai nuan?
11 Kati nuan ulih ngarapka pengering iya, lalu ngarapka iya ngereja pengawa ti berat ke nuan?
12 Kati nuan ngarapka iya ngetau umai nuan lalu mai gandum nuan ngagai endur alai nungku?
13 Naka meh penyampat kebap sayap burung unta! Tang burung unta enda ulih terebai baka burung bangau.
14 Burung unta ninggalka telu iya ba tanah ngambika telu nya angat laban pengangat tanah.
15 Iya enda nemu telu nya tau kena indik lalu redak tauka jelu babas mechahka sida.
16 Burung unta nya baka ke ngumbai telu nya ukai telu iya lalu enda irauka diri deka lebu ngapa betelu.
17 Aku Empu ti udah ngasuh iya beli lalu enda meri iya penemu-dalam.
18 Tang lebuh iya belabuh belanda, iya laju agi ari kuda enggau orang ke nepan kuda nya.
19 Kati nuan, Jop, bisi udah ngasuh kuda kering lalu meri sida bulu ti panjai melulur rekung sida?
20 Kati nuan bisi udah ngasuh sida merejuk baka buntak lalu ngasuh orang takut ninga munyi kesuh idung sida?
21 Sida ransing ngerumbak tanah ba lebak. Sida belanda mansang beperang enggau pengabis pengering sida.
22 Sida enda nemu reti takut, lalu pedang enda ulih ngasuh sida nikal.
23 Senyata ti dibai orang ke nepan sida begetar inggar sereta bekilap dipanchar mata hari.
24 Kuda betegitik isi ransing, lalu belanda mansang ke mua. Lebuh terumpit disepu, sida enda ulih diau jenuh.
25 Genap kali terumpit nya disepu, sida inggar ngesuhka seput. Sida nemu ngembau perang sebedau sida datai semak lalu sida ninga bala pemesai merakka nyawa meri atur.
26 Kati burung menaul bisi belajar ari nuan chara terebai lebuh iya ngerembaika sayap iya lalu nuju ke selatan?
27 Kati burung menaul nganti atur ari nuan sebedau iya ngaga tansang ba tuchung bukit?
28 Iya ngaga tansang ba tuchung bukit ti bebatu lalu ngaga tuchung ti tajam nya nyadika kuta iya.
29 Ari nya iya ninjau utai ti semak enggau ti jauh ngintaika utai ti tau dibunuh lalu diempa iya.
30  Menaul begempuru ngelingi bangkai lalu anak menaul ngirup darah.
 
Bagi 40
1-2 Jop, nuan udah nyakap Allah Taala ti Pemadu Bekuasa. Kati nuan diatu deka ngalahka diri, tauka nyaut?
 
Ko Jop

3-4 “Aku udah bejaku mapap, TUHAN. Baka ni ku jalai aku nyaut? Aku nadai nemu utai disebut agi.
5 Aku udah nyebut lebih ari ti patut.’’
6 Udah nya TUHAN lalu bejaku baru ngagai Jop ari kabut biaubalai.
 
Ko TUHAN

7 “Bediri rurus lalu saut tanya Aku.
8 Kati nuan nguji ngumbai Aku enda lurus? Kati nuan deka besalah Aku, lalu ngumbai nuan empu ngena?
9 Kati nuan kering baka Aku? Kati nyawa nuan inggar munyi guntur baka nyawa Aku?
10 Enti pia, begari nuan lalu bediri ngena pangkat, basa, enggau mulia nuan.
11 Bantaika pengeringat nuan, lalu peda enti nuan ulih ngasuh orang ke sumbung nya baruh ati.
12 Peda sida ke sumbung nya, lalu alahka sida; Redakka sida ke jai nya ba endur alai sida ke bediri.
13 Tumbakka sida dalam tanah. Tanchang sida di dunya pemati.
14 Nya baru Aku deka ngumbai nuan menang ngena pengering nuan empu.
15 Peda nuan Behemot. Aku udah ngaga iya, lalu Aku udah mega ngaga nuan. Iya makai rumput baka sapi,
16 tang peda nuan pengering dalam tubuh iya, enggau kuasa dalam gumpal isi iya!
17 Iku iya bediri chegit-chegit baka kayu sidar, lalu gumpal isi dalam kaki iya amat kering.
18 Tulang iya kering baka temaga, lalu kaki iya baka lumpung besi.
19 Iya tu utai ti pemadu ngasuh ati iran ari semua utai ti idup ti digaga Aku! Semina Aku ti ngaga iya ulih ngalahka iya.
20 Rumput ti dikena nupi iya tumbuh ba bukit alai jelu babas bemain.
21 Iya gali di baruh madang duri, lalu belalai ba madang purun ti tumbuh ba paya.
22 Lalu iya belindung di baruh madang duri enggau madang kayu willow ti tumbuh ba tebing sungai.
23 Iya enda takutka ai sungai ti deras. Iya enda irau ati lebuh ai Sungai Jordan mangka mua iya.
24 Sapa ulih ngasuh iya buta, lalu nangkap iya? Tauka, sapa ulih nyintak junggur iya ngena panjuk?
 
Bagi 41
1 “Kati nuan ulih ngulihka naga ngena ginti tauka nanchang dilah iya ngena tali?
2 Kati nuan ulih nanchangka tali ba junggur iya tauka ngaitka ginti ba rang iya?
3 Kati iya deka minta nuan ngelepaska iya? Kati iya deka minta nuan kasihka iya?
4 Kati iya deka ngaga sempekat enggau nuan lalu besemaya deka betuaika nuan belama iya?
5 Kati nuan deka nambat iya baka ke nambat burung ayam kena ngelantangka ati sida indu ke digaji nuan?
6 Kati orang berikan deka betawarka rega iya? Kati orang dagang deka ngelampang lalu nyual iya?
7 Kati nuan ulih ngebuska kulit iya ngena berayang tauka ngebuska pala iya ngena pendawan?
8 Tegu iya sekali, lalu nuan enggai agi negu iya. Nuan deka seruran ingatka diri ti udah belaban enggau iya!
9 Barang sapa meda naga deka takut lalu rebah.
10 Lebuh iya dikachau, iya mangah. Nadai orang berani bediri di mua iya.
11 Sapa ulih nyerang iya lalu enda bebadi? Nadai orang di serata dunya tu ulih ngereja nya. 12 Awakka aku nusui ngagai nuan pasal kaki naga nya lalu madahka pemesai enggau pengering iya.
13 Nadai orang ulih nyarikka baju iya tauka ngebuska baju kebal iya.
14 Sapa ulih mejalka iya nukangka rang ti penuh laban ngeli ti balat ngenakut?
15 Belakang iya digaga ari rintai terabai ti bejantil enggau pangan diri, lalu kering baka batu.
16 Terabai nya bejantil rapit enggau pangan diri datai ke angin enda ulih tama.
17 Semua terabai nya bejantil rapit amat datai ke nadai utai ulih ningkilka sida ari pangan diri.
18 Lebuh iya engkasi, penampak lalu bekilat, lalu mata iya mirah chinang-chinang baka mata hari ti tumbuh pagi hari.
19 Daun api nyelar ari nyawa iya lalu perechi api pansut.
20 Ari idung iya pansut asap, baka asap ti pansut ari rumput ti diempa api di baruh periuk.
21 Kesuh seput iya ngasuh api menyadi. Daun api nyelar ari nyawa iya.
22 Rekung iya kering datai ke semua orang ke betemu enggau iya bela takut magang.
23 Indah perengka tubuh iya ti pemadu lemi deh kering baka besi.
24 Ati iya baka batu, enda nemu takut, enda lembut tang kering baka batu kisar.
25 Lebuh iya angkat, indah utai ti pemadu kering deh takut. Sida nadai daya laban takut.
26 Nadai pedang ulih nelihka iya nadai sangkuh, tauka laja tauka lunju, ulih ngemediska iya.
27 Ba iya, besi lemi baka rumput ti rangkai, lalu temaga, baka kayu ti repuk.
28 Nadai panah ulih ngasuh iya rari. Batu ti ditikau ngagai iya baka rumput ti rangkai.
29 Ba iya, pemalu baka rumput ti rangkai, lalu iya ketawa lebuh orang numbukka sangkuh ngagai iya.
30 Tisik perut iya tajam baka kerimpak periuk. Tisik nya ngeraus tanah ti luchak baka pengeradu tanah.
31 Lebuh iya nyelam ke dalam tasik ai melidih baka minyak ti melidih dalam periuk,
32 lalu ai ti udah ditengah iya nyau begenyeling bepupu burak.
33 Nadai utai di dunya tu sebaka enggau iya. Iya enda nemu takut.
34 Iya nyadi raja ke semua jelu ti sumbung lalu iya ngira jelu bukai nadai guna magang.
 
Bagi 42
1 Udah nya Jop lalu nyaut TUHAN.

Ko Jop

2 “TUHAN, Aku nemu Nuan endang bekuasa ari atas semua, lalu Nuan ulih ngereja semua utai ti dikedekaka Nuan.
3 Nuan nanyaka kebuah aku kakang ati ke penemu-dalam Nuan taja pen aku nadai nemu utai. Aku bejakuka pasal utai ti enda ditemu aku, pasal utai ti nyelai ti
enda ulih ditemu aku.
4 Nuan udah ngasuh aku mendingka Nuan lebuh Nuan bejaku lalu ngasuh aku nguji nyaut tanya Nuan.
5 Dulu menya, aku semina nemu utai ti dipadahka orang ngagai aku, tang diatu aku udah meda Nuan ngena mata aku empu.
6 Nya alai aku malu ke semua utai ti udah disebut aku lalu aku nesal ati lalu ngerabu diri enggau amau enggau abus.
 
Penutup
7 Lebuh TUHAN udah tembu bejaku ngagai Jop, Iya lalu bejaku ngagai Elipas, “Aku ringat ngagai nuan, enggau ngagai pangan seduai ke dua iku nya, laban nuan enda nyebut utai ti bendar pasal Aku, baka nembiak Aku Jop.
8 Nya alai bai diatu tujuh iku sapi ti lelaki, enggau tujuh iku bedus ti lelaki, ngagai Jop, lalu beri utai nya nyadika piring ke nuan empu. Jop deka besampika nuan, lalu Aku deka nyaut sampi iya, lalu enda ngukum nuan nitihka pemeli nuan. Nuan enda baka iya laban Nuan enda nyebut utai ti bendar pasal Aku.’’
9 Elipas, Bildat, enggau Sopar lalu ngereja utai ti diasuh TUHAN, lalu TUHAN nyaut sampi Jop.
10 Udah nya, lebuh Jop udah besampika pangan iya ke tiga iku nya, TUHAN lalu merekatka iya nyadi kaya-raja baru, lalu meri iya dua kali lipat mayuh agi utai ari ti dikemisi iya sebedau nya.
11 Semua sida menyadi lelaki enggau menyadi indu Jop, enggau semua pangan iya ke dulu suba, bela datai nemuai ngagai iya, lalu ngintu pengerami makai besai enggau iya ba rumah iya. Sida madahka penyinu ati sida ngagai iya, lalu merindang iya, ketegal semua penusah ti udah diasuh TUHAN ninggang iya. Genap iku sida bela meri iya sesingkap duit, enggau siti tinchin emas.
12 TUHAN merekatka pengidup Jop lebuh iya nyau tuai, lebih agi ari ti terubah. Jop bisi empat belas ribu iku jelu bedus, enam ribu iku unta, dua ribu iku jelu sapi, enggau seribu iku keledai.
13 Iya bisi tujuh iku anak lelaki enggau tiga iku anak indu.
14 Iya meri nama Jemimah ngagai anak indu iya ke tuai, iya ti kedua Kesiah, lalu iya ke pemadu biak Keren-hapuk.
15 Nadai indu di serata dunya tu ti bajik agi ari anak indu Jop. Apai sida meri sida ungkup ari pesaka iya, sebaka enggau ungkup ti diberi iya ngagai sida menyadi lelaki sida.
16 Udah bekau nya, Jop idup seratus empat puluh taun, lalu meda bala uchu enggau bala ichit diri.
17 Iya mati lebuh umur iya nyau tuai amat.