ESTER
 
Jaku Pemuka
Pekara ti ditusui dalam bup  Ester* nyadi lebuh musin chelap ba istana raja besai menua Persia. Orang ke tebilang dalam cherita tu nya siku indu orang Judah ke benama Ester, ti berani sereta angkunka bansa iya empu lalu ngelepaska sida ari jari munsuh. Bup tu nerangka pun enggau reti gawai Purim orang Judah.
 
Ripih Isi Bup Tu
Ester nyadi kuin (1.1-2.23)
Haman bepekat (3.1-5.14)
Haman dibunuh (6.1-7.10)
Orang Judah ngalahka munsuh sida (8.1-10.3)
 
Bagi 1
Kuin Basti Ngelaban Atur Raja Serses
1-2 Raja Serses merintah nyadi raja ari Susa, indu nengeri menua Persia. Iya merintah 127 sitak menua kenyau ari India nyentuk ngagai menua Etiopia.
3 Dalam taun ti ketiga iya megai perintah, iya nyendiaka siti pengerami makai besai ke bala pemesai enggau ke orang ke bejalaika pengawa perintah. Bala soldadu menua Persia enggau Media bela bisi datai, lalu pia mega tuan gabenor enggau orang ke tinggi pangkat ari mayuh bengkah sitak menua.
4 Sekumbang enam bulan pengerami nya diintu, Raja Serses ngayanka pengaya, pemanah enggau pemesai istana raja.
5 Udah bekau nya, raja lalu ngaga siti pengerami makai besai ke semua orang ke kaya enggau ke seranta di Susa, indu nengeri menua nya. Pengelama pengerami nya seminggu, lalu dibuka ba kebun istana raja.
6 Tengah laman ba endur nya dilagu enggau kain tirai ti bechura biru enggau burak. Kain tirai nya ditanchang ngena tali linin ti alus sereta bechura ungu, ngagai chengkerung pirak ti lekat ba tiang batu burak. Kerusi ti digaga ari emas enggau pirak bisi diatur ba tengah laman nya. Nyadi geladak tengah laman nya disampak enggau batu burak, batu mirah ti berega, batu mutiara ti beperenching, enggau batu berega ti biru.
7 Utai ti diirup diengkah dalam changkir emas. Nadai siti changkir nya sebaka enggau changkir ti bukai, lalu raja nya nadai sayau mimit ke wain iya.
8 Utai ti diirup endang enda disekat. Raja udah meri atur ngagai bala orang ke bekereja dalam istana ngasuh sida meri semua orang ngirup enggau nadai betagang, tang nitihka peneka sida empu.
9 Lebuh maya nya, Kuin Basti mega nyamu sida ke indu dalam istana.
10 Ba hari ti ketujuh, raja ngirup sereta gaga ati, lalu iya mesanka tujuh iku orang gaji iya, ti udah dipeliri. Nama sida nya Mehuman, Bista, Harbona, Bikta, Abakta, Setar, enggau Charkas.
11 Iya ngasuh sida mai Kuin Basti ngagai iya, bengepan ngena makota. Kuin nya bajik amat gamal, lalu raja deka ngasuh bala pemesai enggau semua bala pengabang iya meda pemajik kuin.
12 Tang lebuh bala orang gaji nya madahka utai ti dipinta raja ngagai Kuin Basti, iya enggai datai. Raja lalu pedis ati.
13 Nyadi raja endang selalu betanyaka pasal adat ngagai orang ke pandai pasal adat. Nya alai iya lalu mesanka bala penyanding penemu iya laban sida patut nemu utai ti patut dikereja.
14 Orang ke suah alai iya betanya nya Karsena, Setar, Admata, Tarsis, Meres, Marsena, enggau Memukan, iya nya tujuh iku pemesai menua Persia enggau Media ke pemadu tinggi pangkat dalam perintah menua nya.
15 Ku iya bejaku enggau sida, “Aku, Raja Serses, udah ngasuh bala orang gaji aku mai siti pesan ngagai Kuin Basti, tang iya enda ngasika pesan nya! Nama utai ti disebut adat, ti patut dikereja ngagai iya?”
16 Memukan lalu bejaku enggau raja sereta enggau bala pemesai iya: “Kuin Basti udah enda bebasaka raja, enggau bala pemesai raja. Iya ti bendar, iya udah ngeleseka semua lelaki dalam menua ti diperintah raja!
17 Semua indu dalam menua tu deka belabuh enggai bebasaka laki sida, lebuh sida ninga pasal utai ti udah dikereja kuin. Sida deka nyebut, ‘Indah kuin Basti deh enggai datai lebuh Raja Serses mesanka iya.’
18 Lebuh bini bala pemesai raja di menua Persia enggau Media ninga pasal ulah Kuin Basti, sida deka madahka pekara nya ngagai laki sida sebedau padam mata panas lemai tu. Semua bini di semua endur deka badu agi bebasaka laki diri, lalu laki sida deka ringat ngagai sida.
19 Enti Tuan Raja besetuju, nuan tau madahka ngagai orang mayuh pasal Basti ti enda agi tau betemu enggau raja. Asuh atur nya ditulis nyadika adat menua Persia enggau Media, ngambika atur nya enda diubah agi. Udah nya beri pangkat kuin ngagai indu ke manah agi ari iya.
20 Lebuh semua orang dalam menua ti besai ti diperintah nuan tu nemu atur nya, semua indu deka bebasaka laki sida, nemuka laki sida kaya tauka seranta.”
21 Raja enggau bala pemesai iya rindu ninga penemu nya, lalu raja ngereja nitihka penemu Memukan.
22 Iya ngirumka pesan ngagai genap sitak menua ti dipegai iya, ngena jaku enggau chara ti dikena orang nulis surat dalam sitak menua siti-siti, madahka semua laki enda tau enda nyadi tuai ke ruang bilik sida empu.
 
Bagi 2
Ester Nyadi Kuin
1 Udah bekau nya, lebuh Raja Serses nyau enda agi ringat, iya ingatka Basti, enggau utai ti udah dikereja Basti enggau adat ti udah digaga kena ngelaban iya.
2 Udah nya sekeda bala penyanding penemu raja bejaku enggau raja, “Awakka orang ngiga indu ke dara bungas ke Raja.
3 Lalu awakka nuan ngasuh bala pemesai dalam genap sitak menua ti dipegai nuan, mai semua indu ke bajik, ti agi dara bungas, ngagai rumah alai nuan ke nyimpan semua indu simpan nuan di Susa. Asuh Hegai, lelaki ti udah dipeliri, ke ngemataka semua indu nuan, ngintu sida ngambika gamal sida bajik.
4 Lalu awakka indu ke pemadu ngerinduka ati nuan nganti Basti nyadi kuin.” Raja rinduka penemu nya, lalu iya nitihka penemu nya.
5 Nyadi di Sisa bisi siku orang Judah ke benama Mordikai anak Jair, uchu Semei, uchu Kis ari raban bansa Benjamin.
6  Nyadi Kis udah ditabanka Raja Nebukadnesar menua Babilon nyadi orang tangkap ari nengeri Jerusalem sama enggau Raja Jehoiakin menua Judah ari Jerusalem, sama enggau orang tangkap ti bukai.
7 Mordikai bisi siku petunggal, ke benama Ester. Nama Hebrew Ester nya Hadasah. Iya indu ke bajik, sereta manah raras tubuh. Lebuh apai indai Ester mati, Mordikai ngiru iya nyadika anak.
8 Lebuh raja udah meri atur tu, lalu mayuh indu ke agi biak dibai ngagai Susa, Ester bisi enggau sida. Iya mega diasuh diau di istana, diintu Hegai, ke ngintu semua indu simpan raja.
9 Hegai gaga ati meda Ester, lalu beguai belabuh ngereja pengawa ngemajikka Ester ngena pengawa urut enggau pemakai. Iya meri Ester endur ti pemadu manah alai diau dalam rumah indu simpan raja, lalu ngeletak tujuh iku indu ke biak ke endang dipilih ari istana raja, ngintu Ester.
10 Ester enda madahka bansa diri, laban Mordikai udah bejaku nagang iya madahka bansa diri ngagai orang.
11 Tiap hari Mordikai bejalai ba tengah laman rumah alai indu simpan raja diau, keran deka nemu pasal Ester enggau namaka penyadi iya.
12 Pengawa ngemajikka indu dikereja setaun: 6 bulan diurut ngena minyak mur, lalu 6 bulan udah bekau nya diurut ngena minyak balsam. Udah nya, siku-siku indu nya dibai ngagai Raja Serses.
13 Lebuh Ester bejalai ari rumah alai indu simpan raja diau, mansang ngagai istana, iya diberi sebarang gari ti dikedekaka iya.
14 Iya selalu kin lebuh lemai hari, lalu pagi hari siti iya dibai ngagai sebuah rumah bukai ti alai bala indu simpan raja diau, lalu diintu Sasgas, orang siku ti udah dipeliri lalu diasuh ngintu indu simpan raja. Ester enda betemu enggau raja baru, enti raja enda chukup rinduka iya lalu minta iya datai.
15 Nyadi maya pen nyau datai alai Ester patut betemu enggau raja. Ester tu anak indu Abihail, lalu iya mega petunggal Mordikai, ti udah ngiru iya nyadika anak. Ester dipuji semua orang ke meda iya. Lebuh gintir iya datai, iya ngena gari ti diletak Hegai ke ngintu bala indu simpan raja.
16 Nya alai, dalam bulan ti kesepuluh, iya nya bulan Tebet, dalam taun ti ketujuh Serses nyadi raja, Ester lalu dibai betemu enggau Raja Serses di istana.
17 Raja rindu sereta sayauka Ester lebih ari semua indu bukai. Raja lalu ngengkahka makota diraja ba pala Ester, lalu nyiri iya nyadi Kuin nganti Basti.
18 Udah nya raja nyendiaka pengerami makai besai kena iya masa Ester, lalu ngambi semua bala pemesai iya enggau orang ke bekereja perintah ngabang ngagai pengerami nya. Iya ngeletak hari nya nyadika hari besai ke semua menua ti dipegai raja, lalu nyadung mayuh pemeri ti manah ngagai orang mayuh.
 
Mordikai Nyelamatka Nyawa Raja
19 Sekumbang utai tu benung nyadi, Mordikai udah diberi raja pangkat nyadi pemesai perintah.
20 Nyadi Ester apin madahka diri indu orang Judah laban Mordikai enda ngasuh iya madahka nya ngagai orang, lalu Ester ngasika iya baka iya ti udah ngasika Mordikai lebuh iya agi mit.
21 Lebuh Mordikai bekereja di istana, Biktana seduai Teres, dua iku lelaki ti udah dipeliri, ke nyaga pintu bilik raja, begedika Raja Serses, lalu bepekat deka munuh iya.
22 Mordikai nemu pasal pekara nya, lalu iya madahka ngagai Kuin Ester. Ester lalu madahka ngagai raja utai ti udah ditemu Mordikai.
23 Pekara nya lalu dipansik, lalu ditemu amat. Nya alai orang dua iku nya diukum gantung. Raja ngasuh cherita pasal pekara tu ditulis dalam cherita pasal perintah menua.
 
Bagi 3
Haman Bepekat Deka Munuh Orang Judah
1 Apin tentu lama udah bekau nya, Raja Serses nikika pangkat orang siku ke benama Haman, ngasuh iya nyadi perdana menteri. Haman nya anak Hamedata, ari peturun Agak.
2 Raja lalu meri atur ngasuh semua bala pemesai ke bekereja ke iya, besugang lalu meremi di mua Haman, kena sida mandangka diri bebasaka Haman. Semua sida besugang sereta meremi magang, kelimpah ari Mordikai.
3 Bala pemesai ti bukai, ke bekereja ke raja, nanyaka kebuah iya enda ngasika atur raja.
4 Tiap hari sida ngasuh Mordikai nitihka atur nya, tang iya enggai mendingka sida. Ku iya nerangka diri, “Aku tu orang Judah. Aku enda tau meremi ngagai mensia.” Sida lalu madahka pekara nya ngagai Haman laban sida keran deka nemu utai ti deka dikereja Haman ngagai Mordikai.
5 Haman pedis ati lebuh iya nemu Mordikai enggai besugang lalu meremi di mua iya.
6 Lebuh iya nemu Mordikai nya orang Judah, iya lalu mutuska runding deka ngereja lebih ari semina ngukum Mordikai siku aja. Iya bekira deka munuh semua orang Judah di serata menua ti dipegai raja besai menua Persia.
7 Dalam bulan ti kesatu, iya nya bulan Nisan, kedua belas taun Raja Serses megai perintah, Haman meri atur ngasuh undi dichabut (dikumbai “purim”) kena nemu hari enggau bulan ti ngena alai iya bejalaika akal iya. Hari ti dipilih iya nya tiga belas hari bulan ti kedua belas, iya nya bulan Adar.
8 Haman lalu madahka ngagai raja, “Tuan Raja, di menua ti dipegai nuan tu bisi siti bansa ti diau ngachir ba semua sitak menua. Sida tu nitihka adat asal ti enda sebaka enggau adat asal orang bansa bukai. Nambahka nya, sida enda ngasika adat menua ti dipegai nuan. Nya alai nuan enda tau nejuka sida tu enda diukum.
9 Enti Tuan Raja besetuju, awakka Tuan Raja ngaga siti adat ngasuh sida dibunuh. Enti nuan meri adat nya, aku tetap ulih nyimpan 375 tan pirak ngagai sarang reta raja kena bejalaika pengawa perintah di menua tu.”
10 Raja lalu merurutka tinchin ti dikena ngechop surat atur perintah, lalu meri tinchin nya ngagai munsuh besai orang Judah, iya nya Haman anak Hamedata, ke peturun Agak.
11 Ku raja bejaku enggau iya, “Sida nya, sereta enggau duit sida, endang enggi nuan. Kereja aja sebarang utai ti deka dikereja nuan ba sida.”
12 Nya alai, kena tiga belas hari bulan ti kesatu Haman mesanka bala kerani raja, lalu ngasuh sida nulis surat, ti enda tau enda disalin ngagai semua jaku bansa ti dikena dalam menua siti-siti, lalu ngirumka surat nya ngagai semua pemerintah, tuan gabenor, enggau bala pemesai perintah. Surat nya ditulis dalam nama Raja Serses, lalu dichop ngena tinchin raja empu.
13 Orang lalu nganjung surat nya ngagai semua sitak menua ti dipegai raja. Surat nya meri atur, dalam sehari aja, iya nya kena tiga belas hari bulan Adar, semua orang Judah ke biak enggau ke tuai, indu enggau anak mit, enda tau enda dibunuh. Sida enda tau dikesinuka, tang dibunuh, lalu semua reta tengkira sida dirampas magang.
14 Utai ti disebut dalam surat nya enda tau enda dipadahka ngagai orang mayuh di semua sitak menua, ngambika semua orang sedia magang lebuh hari nya.
15 Nitihka atur raja, adat nya lalu dipadahka ngagai orang mayuh ba indu nengeri Susa, lalu orang mai berita nya ngagai semua sitak menua. Raja enggau Haman duduk lalu ngirup, tang orang di nengeri Susa begau lebuh sida ninga berita nya.
 
Bagi 4
Mordikai Minta Tulung Ester
1 Lebuh Mordikai ninga pasal semua utai ti udah dikereja, iya nyarikka gari diri, lalu ngerasukka kain guni, sereta ngerabu pala iya enggau amau, lalu bejalai duie-duie nyabak nengah nengeri nya,
2 nyentuk ngagai penama ngagai istana. Tang iya enda tama, laban orang ke ngena kain guni sigi enda dikemendarka tama.
3 Di serata semua sitak menua nya, lebuh atur raja nya dibacha, orang Judah nyau bekeduie nyabak. Sida bepasa, duie-duie nyabak, lalu mayuh ari bala sida begari ngena kain guni, lalu gali malai amau.
4 Lebuh bala indu ke digaji Ester, enggau bala lelaki ti udah dipeliri, madahka ngagai  Ester utai ti udah dikereja Mordikai, iya balat amat irau ati. Iya ngirumka gari ngagai Mordikai, kena Mordikai nganti kain guni iya, tang Mordikai enggai nerima gari nya.
5 Udah nya iya ngangauka Hatak, siku ari sida lelaki ti udah dipeliri, ti udah diletak raja nyadi orang gaji Ester. Iya ngasuh Hatak mansang ngagai Mordikai lalu nanyaka utai ti udah nyadi, enggau kebuah utai nya nyadi.
6 Hatak mansang ngagai Mordikai ba padang nengeri, ba penama ngagai istana.
7 Mordikai madahka ngagai  Hatak semua utai ti udah nyadi ba iya, enggau penyampau duit ti udah disemaya deka disimpan Haman ngagai sarang reta raja, enti semua orang Judah dibunuh magang.
8 Iya meri siti salin surat raja ti udah dikeluarka di Susa kena meri atur ngasuh orang Judah dibunuh. Mordikai lalu ngasuh Hatak mai surat nya ngagai Ester, nerangka pekara nya ngagai Ester, lalu minta Ester bejaku enggau raja, minta raja kasihka orang ke ari bansa Ester empu.
9 Hatak lalu ngereja nya
10 lalu Ester ngasuh Hatak mai pesan tu ngagai Mordikai:
11 “Enti lelaki tauka indu bisi tama ngagai tengah laman istana, deka betemu enggau raja, tang ukai ari panggil raja, orang nya enda tau enda dibunuh. Tu endang adat, lalu semua orang, kenyau ari penyanding penemu raja nyentuk ngagai orang mayuh ti diau di semua sitak menua tu, bela nemu adat nya magang. Semina siti aja jalai adat nya ulih diseliahka: iya nya, enti raja ngedarka tungkat emas iya ngagai orang nya. Enti raja ngereja nya, orang nya enda dibunuh. Tang dalam sebulan tu raja nadai udah mesanka aku.”
12 Lebuh Mordikai nerima pesan Ester,
13 iya lalu ngirumka jaku tangkan tu ngagai Ester: “Anang ngumbai diri lebih agi likun ari orang Judah ti bukai, ketegal nuan diau di istana raja.
14 Enti nuan enda bemunyi lebuh maya ti baka tu, penyaup deka datai ari serega ngagai orang Judah, lalu sida deka diselamatka, tang nuan deka mati, lalu ruang bilik apai nuan deka lus. Tang kitai enda nemu, nyangka tu meh kebuah nuan udah dichiri nyadi kuin!”
15 Ester ngirumka saut tu ngagai Mordikai:
16 “Mupuk meh nuan lalu gempuruka semua orang Judah ti diau di Susa, bepasa lalu besampika aku. Anang makai tauka ngirup utai tiga hari tiga malam. Bala indu ke digaji aku enggau aku empu deka mega bepasa. Udah bekau nya, aku deka betemu enggau raja, taja pen nya ngelanggar adat. Enti aku mati ketegal ngereja nya, awakka aku mati.”
17 Udah nya Mordikai mupuk lalu ngereja semua utai ti diasuh Ester.
 
Bagi 5
Ester Ngambi Raja Enggau Haman Ngabang Ngagai Pengerami Makai Besai
1 Ba hari ti ketiga iya bepasa, Ester ngerasukka gari diraja iya, mansang lalu bediri ba tengah laman istana, nunga ngagai bilik kerusi diraja. Raja bisi di dalam, duduk ba kerusi diraja, nunga ngagai mua pintu.
2 Lebuh raja meda Kuin Ester bediri di luar, iya gaga meda iya, lalu iya ngedarka tungkat emas ngagai Ester. Udah nya Ester niki, lalu negu puting tungkat nya.
3 “Nama utai, Kuin Ester?” ku raja nanya. “Padahka ngagai aku utai ti dipinta nuan, lalu nuan deka nerima utai nya. Indah setengah ari menua ti dipegai aku deh deka aku meri ngagai nuan.”
4 Ku Ester nyaut, “Enti Tuan Raja deka, aku minta nuan enggau Haman ngabang ngagai pengerami makai besai ti disediaka aku ke nuan.”
5 Udah nya raja lalu mesanka Haman datai enggau jampat, ngambika seduai iya tau ngabang ngagai Ester. Nya alai raja seduai Haman datai ngagai pengerami makai besai ti disediaka Ester.
6 Lebuh sida benung ngirup wain, raja lalu nanya Ester, “Padahka ngagai aku utai ti dipinta nuan, lalu nuan deka nerima utai nya. Aku deka meri ngagai nuan utai ti dipinta nuan. Enti sema nuan minta setengah ari menua ti dipegai aku, nya pen deka meh aku meri ngagai nuan.”
7 Ku Ester nyaut,
8 “Enti Tuan Raja lantang ati enggau aku lalu deka meri utai ti dipinta aku, aku minta nuan enggau Haman nyadi pengabang aku baru ba siti agi pengerami makai besai ti deka disediaka aku ke nuan pagila. Dia ila baru aku madahka utai ti dipinta aku.”
 
Haman Bepekat Deka Munuh Mordikai
9 Lebuh Haman pulai ari pengerami nya, iya berupai lantang sereta gaga. Tang lebuh iya tepedaka Mordikai ba pintu penama ngagai istana, lalu meda Mordikai enda bediri, tauka ngayanka diri masa Haman lebuh Haman mansa, Haman lalu pedis ati ngagai Mordikai.
10 Tang iya nagang ati diri ti pedis lalu pulai ke rumah. Udah nya iya mesanka pangan iya ngagai rumah iya, lalu minta bini iya Seres begempuru enggau sida.
11 Haman lalu temegah madahka diri kaya, madahka pemayuh anak lelaki iya, madahka raja udah nikika pangkat iya, sereta madahka raja begunaka iya lebih ari pemesai bukai.
12 “Nambahka nya,” ku Haman nampung jaku iya, “Kuin Ester udah nyendiaka pengerami makai besai, ukai ke orang bukai, tang ke kami duai raja, lalu kami duai ngabang baru pagila.
13 Tang semua utai tu nadai reti ba aku seagi-agi aku meda orang Judah ke benama Mordikai nya duduk ba mua pintu istana.”
14 Bini iya enggau semua pangan iya lalu meri iya penemu, “Nama kebuah nuan enda ngasuh orang ngaga siti palan alai ngantung orang, peninggi dua puluh dua meter? Tumu pagila nuan tau minta raja ngemendarka Mordikai diukum gantung ba endur nya. Nya baru nuan deka gaga ati mansang ngagai pengerami makai besai nya. Haman gaga ninga penemu nya, nya alai iya lalu ngasuh orang ngaga palan nya.
 
Bagi 6
Raja Meri Basa Ngagai Mordikai
1 Malam nya raja enda ulih tinduk, lalu iya ngasuh orang mai sereta macha ngagai iya cherita pasal perintah menua nya.
2 Bagi ti dibacha sida nya madahka pasal Mordikai ke tetemuka orang ke bepekat deka munuh raja, iya nya Biktana seduai Tares, dua iku lelaki ti udah dipeliri, ke bekereja nyaga bilik raja.
3 Raja lalu nanya, “Kati Mordikai bisi udah diberi basa ketegal utai tu?” Ku orang gaji iya nyaut, “Nadai.”
4 “Kati bala pemesai bisi dalam istana diatu?” ku raja nanya. Nyadi Haman baru udah tama ngagai tengah laman. Iya datai laban iya deka minta raja ngemendarka Mordikai diukum gantung ba endur ti udah disediaka.
5 Bala orang gaji lalu nyaut, “Haman bisi ditu. Iya deka betemu enggau nuan.” “Asuh iya tama,” ku raja bejaku.
6 Haman lalu tama, lalu ku raja bejaku enggau iya, “Aku deka meri basa ngagai orang siku. Nama utai ti patut dikereja aku ke orang nya?”
Haman lalu berunding dalam ati diri, “Sapa orang ke deka dibasa raja? Nadai patut orang bukai kelimpah ari aku.”
7-8 Nya alai ku iya nyaut raja, “Asuh orang mai baju panjai diraja ngagai orang nya, baju panjai ti dikena nuan empu. Asuh orang ngengkahka pengias diraja ba kuda nuan.
9 Udah nya asuh siku orang ke ari peturun orang ke tinggi pangkat ngerasukka pekayan nya ba orang nya, ngasuh iya nepan kuda, lalu nguluka iya nengah padang nengeri. Asuh orang ke tinggi pangkat nya nyada, lebuh sida bejalai, “Peda jalai raja bebasaka orang ke dibasa iya!”
10 Udah nya raja lalu bejaku enggau Haman, “Jampat ambi baju panjai enggau kuda, lalu beri basa ngagai orang Judah ke benama Mordikai. Kereja ngagai iya semua utai ti udah disebut nuan. Nuan deka nemu iya duduk ba mua pintu istana.”
11 Haman lalu ngambi baju panjai enggau kuda, lalu ngerasukka baju panjai nya ba Mordikai. Mordikai lalu nepan kuda nya. Haman lalu nguluka iya nengah padang nengeri, nyada ngagai orang mayuh lebuh seduai iya bejalai, “Peda jalai raja bebasaka orang ke dibasa iya!”
12 Udah nya Mordikai pulai baru ngagai mua pintu istana, lalu Haman beguai-guai pulai, ngelalaika mua diri ke malu.
13 Iya lalu madahka ngagai bini iya enggau ngagai semua pangan iya pasal semua utai ti udah nyadi ba iya. Udah nya bini iya enggau pangan iya ti bepenemu-dalam nya lalu madahka ngagai iya, “Mordikai diatu baru deka ngerampas kuasa ari nuan. Iya orang Judah, lalu nuan enda ulih ngalahka iya. Iya tetap deka ngalahka nuan.”
 
Haman Diukum Bunuh
14 Lebuh sida agi benung bejaku, lelaki ti udah dipeliri lalu beguai-guai datai ari istana, ngambi Haman ngabang ngagai pengerami makai besai ti udah disediaka Ester.
 
Bagi 7
1 Raja enggau Haman lalu mansang makai enggau Ester
2 kedua kali. Lebuh sida benung ngirup wain, raja lalu nanya Ester baru, “Kuin Ester, nama utai ti dipinta nuan? Padahka ngagai aku, lalu nuan deka nerima utai nya. Indah setengah ari menua ti dipegai aku deh deka aku beri ngagai nuan.”
3 Ku Kuin Ester nyaut, “Enti Tuan Raja deka meri utai ti dipinta aku, aku minta aku empu enggau orang ari bansa aku meruan idup.
4 Aku enggau bansa aku udah dijual ngambika kami dibunuh. Enti pekara tu semina pasal kami ke dijual nyadi ulun, aku tentu enda bemunyi lalu enda ngiruh nuan, tang kami tu baru deka dibunuh abis lengis!”
5 Raja Serses lalu nanya Kuin Ester, “Sapa orang ke berani ngereja utai baka nya? Dini alai orang nya?”
6 Ester lalu nyaut, “Munsuh kami, ke merinsaka kami nya orang ke jai. Nama iya Haman!” Haman lalu merening ngagai raja enggau ngagai kuin, enggau mua ti pemadu takut.
7 Raja lalu angkat, balat amat ringat, pansut ari bilik nya ngagai kebun istana. Haman nemu raja endang keras deka munuh iya. Nya alai iya mengkang di istana, minta Ester nulung iya ngambika iya enda dibunuh.
8 Lebuh raja pulai ari kebun ngagai bilik nya baru, Haman baru udah nyungkurka diri ba kerusi Ester, minta kasih ari iya. Lebuh raja meda nya, iya lalu merak bejaku, “Kati orang tu masung kuin di mua aku empu, dalam istana aku empu?”
Lebuh raja baru udah nyebut jaku nya, bala lelaki ti udah dipeliri ke gawa dalam istana nya lalu mampul mua Haman.
9 Udah nya siku ari bala sida ke benama Harborah lalu bejaku, “Haman udah ngaga endur alai ngantung orang, alai iya deka ngantung Mordikai ti udah ngidupka nyawa raja. Peninggi palan gantung nya dua puluh dua meter!” Raja lalu bejaku enggau sida, “Gantung Haman ba endur nya!”
10 Nya alai Haman digantung ba endur ti udah digaga iya empu ke Mordikai. Nya baru raja badu agi ringat.
 
Bagi 8
Orang Judah Diasuh Ngelaban Munsuh
1 Sehari nya Raja Serses meri semua reta tengkira Haman, ti udah nyadi munsuh orang Judah, ngagai Kuin Ester. Ester bejaku enggau raja madahka diri kaban belayan Mordikai. Belabuh ari nya Mordikai dikemendarka betemu enggau raja.
2 Raja lalu merurutka tinchin chop iya (ti udah diambi iya pulai baru ari Haman) lalu meri tinchin nya ngagai Mordikai. Ester lalu ngasuh Mordikai ngemataka reta tengkira Haman.
3 Udah nya Ester bejaku baru ngagai raja, nyungkurka diri semak kaki raja, nyabak. Iya minta raja madamka akal ti jai ti udah digaga Haman, ke ari peturun Agak \f d \fr 8.3 \ft Agak; \fq Peda 3.1\f* kena Haman ngelaban orang Judah.
4 Raja lalu ngedarka tungkat emas ngagai Ester. Ester bediri, lalu bejaku,
5 “Enti Tuan Raja deka, lalu enti nuan sayauka aku, lalu enti utai tu ngena ba ati nuan, aku minta nuan meri atur nagang orang bejalaika atur ti udah diberi Haman anak Hamedata, ke peturun Agak, ti udah ngeletak semua orang Judah di menua tu dibunuh magang.
6 Baka ni ku aku ulih natka ati diri enti penusah ti besai tu ninggang bansa aku, lalu kaban belayan aku empu kena bunuh?”
7 Raja Serses lalu bejaku enggau Kuin Ester seduai Mordikai, ti bansa orang Judah, “Aku udah ngantung Haman ketegal pekat iya ngelaban orang Judah, lalu aku udah meri ngagai Ester semua reta tengkira Haman.
8 Tang atur ti dikeluarka dalam nama raja, lalu dichop ngena chop diraja, enda ulih diubah. Tang seduai tau nulis ngagai orang Judah sebarang utai ti dikedekaka seduai, lalu seduai tau nulis surat nya dalam nama aku, lalu nambit surat nya ngena chop diraja.”
9 Utai tu nyadi kena dua puluh tiga hari bulan ti ketiga, iya nya bulan Siban. Mordikai mesanka bala kerani raja, lalu ngasuh sida nulis surat ngena leka jaku ti disebut iya ngagai orang Judah enggau ngagai bala tuan gabenor, bala orang ke bekereja perintah, enggau bala pemesai dalam semua 127 sitak menua kenyau ari India nyentuk ngagai Etiopia. Surat nya ditulis ngagai siti-siti sitak menua ngena jaku enggau chara tulis ti dikena dalam sitak menua nya empu, enggau ngagai orang Judah ngena jaku enggau chara orang Judah nulis surat.
10 Mordikai ngasuh surat nya ditulis dalam nama Raja Serses, lalu nambit surat nya ngena chop diraja. Surat nya lalu dianjung bala orang ke nepan kuda, ngena kuda ti laju, ti diambi ari raban kuda raja.
11 Surat nya nerangka pasal raja ke ngemendarka orang Judah dalam semua nengeri, begempuru lalu nyaga nyawa diri. Enti orang ke besenyata datai ari sebarang macham bansa, dalam sebarang sitak menua, lalu nyerang orang Judah ti lelaki, bala anak sida, tauka bala indu sida, orang Judah tau ngelaban, lalu munuh orang nya. Sida tau munuh orang nya abis lengis, lalu ngerampas reta tengkira sida.
12 Atur tu dipejalaika di serata menua ti dipegai raja besai menua Persia, ba hari ti udah diletak alai orang Judah deka dibunuh, iya nya kena tiga belas hari bulan Adar, iya nya bulan ti kedua Belas.
13 Atur tu deka digaga nyadika adat, lalu deka dipadahka ngagai semua mensia dalam semua sitak menua, ngambika orang Judah sedia ngelaban munsuh sida lebuh hari nya.
14 Nitihka atur raja, bala orang ke nepan kuda lalu mupuk enggau naka pengelaju. Atur nya mega dipadahka ngagai orang mayuh di Susa, indu nengeri menua nya.
15 Mordikai ninggalka istana, ngena baju panjai diraja, ti bechura biru enggau burak, baju luar ti digaga ari kain linin ti alus, ti bechura ungu, enggau siti makota emas ti manah. Udah nya orang di sebelah jalai raya nengeri Susa lalu manjung gaga ati.
16 Orang Judah gaga ati, nadai agi pengirau, lantang sereta nemu diri deka menang.
17 Ba genap buah nengeri dalam semua sitak menua, lebuh atur raja nya dibacha, orang Judah lalu ngaga hari nya nyadika hari besai alai sida ngaga pengerami makai besai enggau ati ti lantang. Mayuh orang ari bansa bukai masuk nyadi bansa orang Judah, laban sida diatu nyau takutka orang Judah.
 
Bagi 9
Orang Judah Munuh Munsuh Sida
1 Kena tiga belas hari bulan Adar, atur ti diberi raja lalu dipejalaika, iya nya hari alai munsuh orang Judah ngarapka diri ulih ngalahka orang Judah. Tang enda mukai-mukai, orang Judah empu ti ngalahka sida.
2 Ba genturung pendiau orang Judah dalam genap buah nengeri di menua nya, orang Judah begempuru deka ngelaban orang ke nguji munuh sida. Semua orang di semua endur takut magang ke sida, lalu nadai orang tan ngelaban sida.
3 Iya ti bendar, bala pemesai perintah ke bekereja di semua sitak menua, iya nya bala tuan gabenor, orang ke bekereja perintah, enggau pengari raja, bela nulung orang Judah, laban semua sida takut magang ke Mordikai.
4 Semua orang di serata menua nya bela nemu Mordikai nya orang ke bekuasa dalam istana raja, lalu kuasa iya majak nambah-menambah.
5 Nya alai orang Judah ulih ngereja sebarang utai ti deka dikereja sida ngagai munsuh sida. Sida mantap munsuh sida ngena pedang, lalu munuh sida.
6 Di Susa, iya nya indu nengeri menua nya, orang Judah munuh lima ratus iku orang.
7-10 Bala orang ke dibunuh nya nyengkaum sepuluh iku anak lelaki Haman, munsuh besai orang Judah. Nama sida nya: Parsandata, Dalpon, Aspata, Porata, Adalia, Aridata, Parmasta, Arisai, Aridai enggau Baisata. Tang reta tengkira sida enda dirumpak.
11 Ba hari nya mega, pemayuh orang ke dibunuh di Susa bisi dipadahka ngagai raja.
12 Udah nya raja lalu bejaku enggau Kuin Ester, “Orang Judah di Susa udah munuh lima ratus iku orang, nyengkaum sepuluh iku anak lelaki Haman. Kada enda mayuh agi ari nya orang udah dibunuh sida ba sebelah sitak menua! Kati nuan agi bisi utai dipinta? Padahka ngagai aku utai bukai ti dipinta nuan, ngambika aku ngereja nya ke nuan.”
13 Ku Ester nyaut, “Enti Tuan Raja besetuju, awakka orang Judah di Susa ngereja baru pagila utai ti udah dikereja sida sehari tu. Lalu awakka bangkai sepuluh iku anak lelaki Haman digantung ari palan gantung.”
14 Raja lalu ngemendarka nya, lalu atur nya dikeluarka di Susa. Bangkai sepuluh iku anak lelaki Haman lalu digantung.
15 Kena empat belas hari bulan Adar, orang Judah di Susa lalu begempuru baru, lalu munuh tiga ratus iku agi orang di nengeri nya. Sekali tu sida enda mega ngerumpak utai orang nya.
16 Bala orang Judah di sebelah sitak menua mega begempuru nyaga nyawa diri. Sida ngalahka bala munsuh sida, lebuh sida munuh tujuh puluh lima ribu iku orang ke begedika sida. Tang sida enda ngerumpak utai munsuh.
17 Utai tu nyadi kena tiga belas hari bulan Adar. Hari siti, iya nya kena empat belas hari bulan nya, orang nadai agi dibunuh, lalu sida ngaga hari nya nyadika hari alai sida ngintu pengerami makai besai.
18 Tang orang Judah di Susa ngaga lima belas hari bulan Adar nyadika hari besai, laban sida udah munuh munsuh sida kena tiga belas enggau empat belas hari bulan nya, lalu udah nya, badu bebunuhka orang kena lima belas hari bulan nya.
19 Nya kebuah bala orang Judah ti diau di nengeri ti mit ngintu empat belas hari bulan Adar nyadika hari besai, alai sida ngintu pengerami makai besai, enggau beberika pemakai ngagai pangan diri.
 
Gawai Purim
20 Mordikai ngasuh orang nuliska semua utai ti nyadi, lalu ngirumka surat nya ngagai semua orang Judah ke semak enggau ke jauh, di serata menua ti dipegai raja besai menua Persia,
21 ngasuh sida ngintu empat belas enggau lima belas hari bulan Adar nyadika hari besai ninting taun.
22 Nya meh hari alai orang Judah udah ngalahka munsuh sida. Tu meh bulan alai penusah enggau pengirau udah bebali nyadi pengaga enggau pengelantang. Sida diasuh ngintu hari nya ngena pengerami makai besai, enggau pengerami bukai, beberika pemakai ngagai pangan diri enggau ngagai orang ke seranta.
23 Orang Judah lalu nitihka atur Mordikai, lalu pengerami nya digaga nyadika adat asal ti diintu ninting taun.
24 Nyadi Haman anak Hamedata, ke datai ari peturun Agak, ti nyadi munsuh besai orang Judah, udah enchabut undi (ti dikumbai “purim,”) kena nentuka hari alai sida deka munuh orang Judah. Iya udah bekira deka ngeluska orang Judah.
25 Tang Ester betemu enggau raja, lalu raja nulis surat meri atur ti ngujungka Haman empu dibunuh baka ke udah diperambu iya ke orang Judah. Iya enggau bala anak lelaki iya digantung ba palan gantung.
26 Nya kebuah hari besai nya dikumbai Purim. Ketegal surat Mordikai, enggau ketegal semua utai ti udah nyadi ba orang Judah,
27 sida ngaga siti atur ke sida empu, ke peturun sida, enggau ke barang sapa ti deka nyadi orang Judah, ngeletak dua hari nya diintu ninting taun, nitihka atur Mordikai.
28 Sida ngaga siti atur ngeletak genap ruang bilik orang Judah dalam genap iti serak, di semua sitak menua, enggau dalam genap buah nengeri, bela ngingatka, sereta ngintu hari Purim belama iya.
29 Udah nya Kuin Ester anak Abihail, enggau Mordikai, mega nulis siti surat kena nyukung surat pasal Purim, ti udah ditulis Mordikai dulu agi ari nya.
30 Surat nya ditujuka ngagai semua orang Judah, lalu salin surat nya dikirumka ngagai semua 127 sitak menua dalam menua ti dipegai raja besai menua Persia. Surat nya ngajihka orang Judah diau dalam pemaik enggau pengelikun
31 lalu ngasuh sida enggau peturun sida ngintu hari Purim nya ba maya ti udah diletak, baka sida ke udah nerima atur kena bepasa, enggau maya ngulit. Atur tu udah diberi Mordikai seduai Kuin Ester.
32 Atur ti dikeluarka Ester, ti netapka adat pasal Purim, bisi ditulis dalam siti surat.
 
Bagi 10
Pemesai Kuasa Serses Seduai Mordikai
1 Raja Serses mejalka orang ke diau ba sebelah tebing tasik di menua ti dipegai iya, enggau orang ke diau di menua ulu, bekereja nyadi ulun.
2 Semua utai ti besai sereta badas ti udah dikereja iya, enggau semua cherita pasal iya ke ngasuh Mordikai bekereja ba opis ti tinggi, bisi dituliska magang dalam cherita pasal raja besai menua Persia enggau Media.
3 Mordikai, ti bansa orang Judah, lalu nyadi lumur satu pemesai ari belakang Raja Serses empu. Iya dibasa sereta dikerinduka orang Judah ti bukai. Iya bekereja ke penguntung bansa iya empu, enggau ke pengelikun semua peturun sida.