NEHEMIAH
 
Jaku Pemuka
Bup  Nehemiahtau dibagi ngagai empat iti sitak: (1) Pemulai Nehemiah ngagai Jerusalem, laban iya udah diasuh raja besai menua Persia nyadi gabenor menua Judah. (2) nirika dinding kuta Jerusalem. (3) Esra macha Adat Allah Taala, lalu orang mayuh ngaku dosa. (4) Pengawa bukai ti dikereja Nehemiah, tuan gabenor menua Judah.

Utai ti tau amat diperatika dalam bup tu nya pasal pemendar Nehemiah ke manggaika diri ba Allah Taala, enggau pasal iya ke selalu besampi ngagai TUHAN.
 
Ripih Isi Bup Tu
Nehemiah pulai ngagai Jerusalem (1.1-2.20)
Nirika dinding kuta nengeri Jerusalem baru (3.1-7.73)
Adat dibacha. Sempekat diaku baru (8.1-10.39)
Pengawa bukai ti dikereja Nehemiah (11.1-13.31)
 
Bagi 1
1 Tu cherita pasal utai ti udah dikereja Nehemiah anak Hakaliah. Nehemiah Tusah Ati Ke Jerusalem. Dalam bulan Kislep kedua puluh taun Artaserses nyadi raja besai menua Persia, Aku, Nehemiah, bisi di Susa, iya nya indu nengeri menua nya.
2 Siku ari sida menyadi aku, ke benama Hanani, bisi datai ari menua Judah enggau siti raban. Aku lalu nanya ngagai sida pasal Jerusalem, enggau pasal orang Judah ti bukai, ti udah pulai ari menua Babilon.
3 Sida madahka ngagai aku, orang ke agi idup lalu udah pulai ke menua  balat amat tusah pendiau, sereta dipechat orang bansa bukai ke diau semak sida. Sida mega madahka ngagai aku pasal dinding kuta Jerusalem ti udah runtuh, lalu pintu nengeri apin digaga baru sekumbang pintu nya udah ditunu.
4 Lebuh aku ninga berita nya, aku nudukka diri lalu nyabak. Aku ngulit lalu enda makai dua tiga hari. Ku aku besampi ngagai Allah Taala,
5 “TUHAN Allah Taala ti di serega! Nuan endang besai, lalu kami nangika Nuan. Nuan tetap ati ingatka sempekat Nuan enggau orang ke rinduka Nuan, ti ngereja utai ti diasuh Nuan.
6 Peda meh aku tu, TUHAN, lalu dingaka sampi aku lebuh aku besampi siang malam ke bala nembiak Nuan, orang Israel. Aku ngaku kami orang Israel endang udah bedosa. Aki ini aku enggau aku empu udah bedosa.
7 Kami udah ngereja utai ti jai ngelaban Nuan, lalu kami enda ngereja utai ti diasuh Nuan kereja kami. Kami enda nitihka adat ti udah diberi Nuan ngena nembiak Nuan, Moses.
8 Kingatka diatu utai ti udah dipadahka Nuan ngagai Moses. Ku Nuan, ‘Enti kita orang Israel enda tetap ati ngagai Aku, Aku deka ngachirka kita ngagai semua bansa bukai.
9 Tang enti kita pulai baru ngagai Aku, lalu ngereja utai ti diasuh Aku, Aku deka ngambi kita pulai baru ngagai endur ti udah dipilih Aku alai kita deka nyembah Aku, taja pen kita ngachir nyentuk ngagai tisi dunya.’ “
10 “TUHAN, sida tu bala ulun Nuan, bala nembiak Nuan. Nuan udah ngelepaska sida ngena kuasa Nuan ti besai enggau ngena pengering Nuan.
11 Pendingka sampi aku diatu, enggau sampi semua nembiak Nuan ti bukai, ti deka ngemesaika nama Nuan. Awakka aku mujur sehari tu, lalu asuh raja besai kasihka aku.” Lebuh maya nya menya, aku bekereja nyuaka wain ngagai raja besai.
 
Bagi 2
Nehemiah Mansang Ngagai Jerusalem
1 Nyadi sekali, empat bulan udah bekau nya, lebuh Raja Besai Artaserses benung makai, aku mai wain ngagai iya. Iya enda kala meda mua aku ngemalat nya tusah.
2 Nya alai iya nanya, “Nama kebuah nuan tusah ati baka nya? Nuan ukai sakit. Kada enda laban nuan enda lantang ati.” Aku lalu takut.
3  Ku aku nyaut raja, “Awakka Tuan Raja idup belama iya! Baka ni ku aku ulih nagang mua diri tusah enti nengeri ti alai aki ini aku dikuburka nyau nyadi tembawai, lalu pintu nengeri nya nyau udah retung diempa api?”
4 Raja besai lalu nanya, “Nama utai ti dikedekaka nuan?” Aku lalu besampi ngagai Allah Taala ti di serega,
5 lalu nyebut ngagai raja besai, “Enti Tuan Raja lantang ati enggau aku, lalu deka meri utai ti dipinta aku, awakka aku mansang ngagai menua Judah, ngagai nengeri alai aki ini aku dikuburka, ngambika aku ulih ngaga nengeri nya baru.”
6 Raja besai, ke duduk berimbai enggau kuin, ngemendarka peminta aku. Iya nanyaka pengelama aku di Jerusalem, enggau kemaya aku deka pulai ari nyin, lalu aku madahka ngagai iya.
7 Udah nya aku lalu minta kasih ngagai iya, minta iya meri aku surat ngambika bisi dibai aku ngagai bala tuan gabenor di Menua Ti Di Barat Eupratis, ngasuh sida ngemendarka aku bejalai ngagai menua Judah.
8 Aku mega minta siti surat ditujuka ngagai Asap, ke nyaga utan perintah, ngasuh iya meri aku kayu ramu kena ngaga pintu kuta ti dikena nyaga Rumah Sembiang, kena ngaga dinding kuta nengeri, enggau kena ngaga rumah alai aku diau. Raja besai meri semua utai ti dipinta aku, laban Allah Taala bisi enggau aku.
9 Raja besai lalu ngasuh bala pemesai soldadu enggau bala soldadu ke nepan kuda, bejalai enggau aku. Aku lalu mansang ngagai Menua Ti Di Barat Eupratis. Dia aku meri surat raja besai ngagai bala tuan gabenor.
10 Tang lebuh Sanbalat ke ari nengeri Bet-horon, enggau Tobiah, siku pemesai di sitak menua Amon, ninga orang siku bisi udah datai deka nulung orang Israel, seduai iya balat amat pedis ati.
11 Aku lalu datai di Jerusalem, lalu dalam kandang tiga hari sekumbang aku ti udah datai
12 aku nadai madahka ngagai orang utai ti udah diasuh Allah Taala kereja aku ke nengeri Jerusalem. Udah nya, ba urung tengah malam, aku angkat, lalu pansut, mai dua tiga iku pangan enggau aku. Kami mai semina siku aja keledai ti ditepan aku.
13 Hari endang udah malam lebuh aku pansut ari nengeri nengah Pintu Lebak ti di barat, lalu bejalai nuju ke selatan mansa Ai Engkeching Naga, ngagai Pintu Uras. Lebuh aku bejalai, aku meresa dinding nengeri ti udah pechah, enggau pintu nengeri ti udah rusak ditunu.
14 Udah nya, ba tisi timur nengeri nya, aku lalu bejalai nuju ke utara ngagai Pintu Ai Engkeching, enggau Letung Raja. Keledai ti ditepan aku nadai tetemuka jalai nengah tugung batu ari rumah ti udah runtuh.
15 Nya alai aku lalu nurun ngagai Lebak Kidron, lalu majakka pejalai aku, meresa dinding nya. Udah nya aku pulai baru ngagai nengeri nengah jalai aku mansang, nengah Pintu Lebak.
16 Nadai siku pemesai di nengeri nya nemu tunga pejalai aku, tauka utai ti udah dikereja aku. Nyentuk ngagai maya nya, aku endang apin nyebut sebarang utai ngagai orang Judah ti bukai, iya nya bala imam, bala tuai bansa, bala pemesai, tauka orang bukai ti deka sama enggau ngereja pengawa nya.
17 Tang udah nya aku bejaku enggau sida, “Peda kita pemalat penusah kitai tu, laban Jerusalem tu nyau nyadi tembawai, lalu pintu iya rusak! Nya alai aku mai bala kitai ngaga dinding kuta nengeri tu baru, kena muai pemalu kitai.”
18 Aku lalu madahka ngagai sida pasal Allah Taala ti udah enggau aku, lalu nulung aku, enggau pasal utai ti udah disebut raja besai ngagai aku.
Sida lalu nyaut, “Awakka kitai berengkah ngaga dinding kuta nya baru!” Sida lalu sedia deka berengkah ngereja pengawa nya.
19 Lebuh Sanbalat, Tobiah enggau siku orang Arab ke benama Gesem ninga pasal utai ti deka dikereja kami, sida ketawaka kami, lalu ku sida, “Nama utai ti dikereja kita? Kati kita deka angkat ngelaban raja besai?”
20 Aku lalu nyaut, “Allah Taala ti di serega deka ngasuh kami mujur. Kami tu nembiak Iya, lalu kami deka berengkah ngaga dinding kuta tu baru. Tang kita nadai hak bempu sebarang reta tengkira di Jerusalem, lalu nama kita sigi enda dikingatka orang jemah ila.”
 
Bagi 3
Dinding Kuta Nengeri Jerusalem Digaga Baru
1 Baka tu ku jalai kuta nengeri nya digaga baru. Imam Besai Eliasip enggau bala imam ti bukai ngaga Pintu Bedus, nyerahka Pintu nya ngagai TUHAN, lalu nirika Pintu nya ba endur asal iya. Sida nyerahka dinding kuta nyentuk ngagai Menara Seratus enggau Menara Hananel ngagai TUHAN.
2 Orang ari Jeriko ngaga lumpar ti nangkanka nya. Sakur anak Imri ngaga lumpar ti nangkanka nya.
3 Bala raban peturun Hasenah ngaga Pintu Ikan. Sida nirika tiang enggau pintu kuta, lalu ngelekatka pasak enggau alang kena nambit pintu nya.
4 Meremot anak Uriah, iya nya uchu Hakos, ngaga lumpar ti nangkanka nya. Mesulam anak Berekiah, iya nya uchu Mesesabel, ngaga lumpar ti nangkanka nya. Sadok anak Bana ngaga lumpar ti nangkanka nya.
5 Orang ari Tekoa ngaga lumpar ti nangkanka nya, tang bala tuai nengeri nya empu enggai ngereja ungkup ti udah diasuh kereja sida nitihka atur orang ke ngemataka pengawa.
6 Joiada anak Paseah, enggau Mesulam anak Besodeiah ngaga Pintu Jesanah. Seduai iya nirika tiang enggau pintu, lalu ngelekatka pasak enggau alang kena nambit pintu nya.
7 Melatiah ari Gibeon, Jadon ari Meronot, enggau bala orang ari Gibeon enggau ari Mispah ngaga lumpar ti nangkanka nya, nyentuk ngagai rumah tuan gabenor ke Menua Ti Di Barat Eupratis.
8 Usil anak Haraiah, ti nyadi tukang emas, ngaga lumpar ti nangkanka nya. Hananiah ke idup begagaka minyak wangi, ngaga lumpar ti nangkanka nya, nyentuk ngagai Dinding Ti Besai Buka.
9 Repaiah anak Hur, ke megai setengah pelilih menua di Jerusalem, ngaga lumpar ti nangkanka nya.
10 Jedaiah anak Herumap ngaga lumpar ti nangkanka nya, semak rumah iya empu. Hatus anak Hasapniah ngaga lumpar ti nangkanka nya.
11 Malkijah anak Harim enggau Hasup anak Pahat Moap ngaga dua iti lumpar ti nangkanka nya, enggau Menara Oben.
12 Salum anak Halohes, orang ke megai setengah pelilih menua Jerusalem, ngaga lumpar ti nangkanka nya. (Bala anak indu iya nulung iya.)
13 Hanun enggau orang ari nengeri Sanoah ngaga Pintu Lebak. Sida nirika Pintu nya, masang pasak, enggau alang kena nambit pintu, lalu ngaduka 400 meter dinding kuta naka Pintu Uras.
14 Malkijah anak Rekap, ke merintah di pelilih menua Bet Hakerem, ngaga Pintu Uras. Iya nirika pintu nya, lalu ngelekatka pasak, enggau alang kena nambit pintu nya.
15 Salum anak Kolhoseh, ke merintah pelilih menua Mispah, ngaga Pintu Ai Ti Engkeching. Iya ngaga atap ke pintu penama, nirika pintu, lalu ngelekatka pasak enggau alang pintu. Ba letung Selah iya ngaga dinding kuta ti ngimbai kebun istana, nyentuk ngagai tangga ti nurun ngagai Nengeri David.
16 Nehemiah anak Asbuk, ke megai setengah pelilih menua Bet-sur, ngaga lumpar ti nangkanka nya, nyentuk ngagai lumbung David, letung enggau rumah soldadu. Orang Lewi Ke Bekereja Ngaga Dinding Kuta
17 Tu nama bala orang Lewi ke ngaga dua tiga iti lumpar dinding kuta: Rehum anak Bani ngaga lumpar ti nangkanka nya. Hasabiah, ke megai setengah pelilih menua Keilah, ngaga lumpar ti nangkanka nya ngarika pelilih menua iya.
18 Bawai anak Henadat, ke megai setengah pelilih menua Keilah, ngaga lumpar ti nangkanka nya.
19 Eser anak Jesua, ke megai Mispah, ngaga lumpar ti nangkanka nya, di mua setor alai nyimpan senyata, nyentuk ngagai endur alai dinding kuta nya betiku.
20 Baruk anak Sabai ngaga lumpar ti nangkanka nya, nyentuk ngagai penama ngagai rumah Imam Besai Eliasip.
21 Meremot anak Uriah, uchu Hakos, ngaga lumpar ti nangkanka nya, nyentuk ngagai ujung rumah Eliasip. Bala Imam Ke Bekereja Ngaga Dinding Kuta
22 Tu nama bala imam ke ngaga dua tiga iti lumpar dinding kuta: Bala imam ari ngelingi Jerusalem, ngaga lumpar ti nangkanka nya.
23 Benjamin enggau Hasup ngaga lumpar ti nangkanka nya, di mua rumah seduai iya empu. Asariah anak Maseiah, uchu Ananiah, ngaga lumpar ti nangkanka nya, di mua rumah iya empu.
24 Binui anak Henadat ngaga lumpar ti nangkanka nya, berengkah ari rumah Asariah ngagai sukut dinding kuta.
25-26 Palal anak Usai ngaga lumpar ti nangkanka nya, berengkah ari sukut dinding kuta enggau menara ti ba atas istana semak tengah laman bala jejaga. Pedaiah anak Paros ngaga lumpar ti nangkanka nya, ngagai endur ti muak ke timur semak Pintu Ai enggau menara ti dikena nyaga Rumah Sembiang. (Tu semak endur ti dikumbai Opel, endur alai orang ke bekereja dalam Rumah Sembiang, diau.)
 
Orang Bukai Ke Sama Enggau Ngaga Dinding Kuta
27 Orang ari Tekoa ngaga lumpar ti nangkanka nya. Tu ungkup sida ke kedua. Lumpar nya berengkah ba endur ti besenentang enggau menara ti besai ti nyaga Rumah Sembiang, nyentuk ngagai dinding kuta ti semak Opel.
28 Seraban bala imam ngaga lumpar ti nangkanka nya, nuju ke utara ari Pintu Kuda. Genap iku sida bela ngaga dinding kuta di mua rumah diri empu.
29 Sadok anak Imer ngaga lumpar ti nangkanka nya, di mua rumah iya empu. Semaiah anak Sekaniah, ke nyaga Pintu Timur, ngaga lumpar ti nangkanka nya.
30 Hananiah anak Selemiah enggau Hanun, anak lelaki Salapan ke lumur enam, ngaga lumpar ti nangkanka nya. Tu ungkup seduai iya ti kedua. Mesulam anak Berekiah ngaga lumpar ti nangkanka nya, di mua rumah iya empu.
31 Siku tukang emas ke benama Malkijah, ngaga lumpar ti nangkanka nya, nyentuk ngagai rumah ti dikena bala orang ke bekereja dalam Rumah Sembiang, semak Pintu Mipkad Rumah Sembiang, semak bilik ti ba atas sukut timur utara ke dinding kuta nya.
32 Bala tukang emas enggau bala orang dagang ngaga lumpar ti penudi, berengkah ari bilik ti ba sukut, nyentuk ngagai Pintu Bedus.
 
Bagi 4
Nehemiah Ngalahka Orang Ke Nyakal Pengawa Nya
1 Lebuh Sanbalat ninga kami orang Judah udah berengkah ngaga dinding kuta nya baru, iya pedis ati lalu berengkah ngeleseka kami.
2 Ku iya bejaku di mua bala pangan iya enggau di mua bala soldadu orang Samaria, “Nama utai ti dikereja bala orang Judah ke lemi tu? Kati sida deka nirika nengeri nya baru? Kati sida ngumbai diri ulih nembuka pengawa nya dalam sehari ketegal sida ngenjuk piring? Kati sida ngumbai diri ulih ngaga utai ngena tugung batu ti udah ditunu?”
3 Nyadi Tobiah bisi bediri dia ngimbai sida, lalu ku iya bejaku, “Ni gaya kuta ti deka digaga sida? Indah munsang deh ulih ngeruntuhka kuta nya!”
4 Aku lalu besampi, “Dinga Nuan jalai sida ngeleseka kami, O Allah Taala! Awakka jaku kelese sida ninggang sida empu. Awakka semua utai ti dikemisi sida dirampas magang ari sida, lalu awakka sida nyadi orang tangkap lalu ditabanka ngagai menua bukai.
5 Anang ngampun penyai sida, lalu anang enda ingatka dosa sida, laban sida udah mechat kami ke ngaga dinding kuta tu.”
6 Nya alai kami majak ngaga dinding kuta nya. Enda lama udah nya dinding kuta nyau bulih setengah peninggi ari ti dijuluk ati kami, laban orang mayuh ransing gawa.
7 Sanbalat, Tobiah, enggau orang Arab, orang Amon, enggau orang Asdot balat amat pedis ati lebuh sida ninga pasal pemansang pengawa kami ke begagaka dinding kuta Jerusalem, sereta ngalitka semua endur ti sawang ba dinding kuta nya.
8 Nya alai semua sida bepekat deka nyerang Jerusalem, lalu ngaga pengachau.
9 Tang kami besampi ngagai Allah Taala kami, lalu ngasuh orang nyaga kami ari sida siang malam
10 Orang Judah bisi siti lagu ti dinyanyi sida:
“Kami nyau lembut tulang mai utai ti berat.
Mayuh amat batu ti udah runtuh enda tau enda dibai kebukai.
Baka ni ku kami ulih nirika dinding kuta tu sehari tu?”
11 Bala munsuh kami ngumbai kami enda meda sida, tauka enda nemu utai ti nyadi, sebedau sida nyerang kami, munuh kami lalu ngemuntanka pengawa kami.
12 Tang orang Judah ti diau begulai enggau bala munsuh seruran datai madahka pelan munsuh ti deka ngelaban kami.
13 Nya alai aku lalu meri pedang, sangkuh, enggau panah ngagai orang mayuh, lalu ngasuh sida jaga di belakang dinding kuta nitihka ripih raban peturun sida empu, ba endur alai dinding kuta ti apin tembu digaga.
14 Aku meda orang mayuh irau ati. Nya alai aku bejaku enggau sida, enggau ngagai bala tuai enggau bala pemesai, “Anang takutka munsuh kitai. Kingatka pemesai enggau pengering TUHAN kitai, lalu laban meh munsuh kitai, kena nyaga kaban belayan kita, bala anak, bala bini, enggau rumah kita.”
15 Lebuh munsuh kami ninga kami udah nemu pekat sida, nya baru sida nemu Allah Taala udah ngemuntanka pelan sida. Udah nya semua kami lalu pulai baru ngagai pengawa begagaka dinding kuta nya.
16 Berengkah ari nya, setengah ari bala aku bekereja, lalu setengah jaga, ngena baju kebal, mai sangkuh, terabai, enggau panah. Lalu bala tuai kami nyukung orang mayuh
17 ke begagaka dinding kuta nya. Indah orang ke mai utai ti dikena begagaka dinding kuta, deh bekereja ngena jari sepiak, lalu jari sepiak megai senyata.
18 Semua orang ke gawa bela nangkin pedang magang. Orang ke nyepu terumpit kena megau orang mayuh endang seruran enggau aku.
19 Ku aku madahka ngagai orang mayuh enggau ngagai bala pemesai sida, enggau ngagai bala tuai, “Pengawa tu nyau ngachir jauh-sejauh, lalu bala kitai nyau jauh-sejauh ari pangan diri ba dinding kuta tu.
20 Enti kita ninga munyi terumpit, kita enda tau enda begempuru ngelingi aku. Allah Taala kitai deka beperang ngarika kitai.”
21 Nya alai tiap hari, kenyau ari dini hari nyentuk ngagai bintang nyau pegari malam hari, setengah ari bala kami gawa ngaga dinding kuta nya, lalu setengah jaga bepegaika sangkuh.
22 Lebuh maya nya aku bisi madahka ngagai orang ke nyadi tuai, sida enggau bala penulung sida enda tau enda diau di Jerusalem lebuh malam hari, ngambika kami ulih nyaga nengeri lebuh malam hari, lalu gawa lebuh siang hari.
23 Lebuh malam hari aku, bala pangan aku, bala orang gaji, enggau orang ke jaga mengkang ngena gari ti dikena kami bekereja. Senyata kami endang seruran ba jari kami.
 
Bagi 5
Orang Ke Miskin Kena Tekan
1 Nyau kelama udah bekau nya, mayuh lelaki enggau indu, belabuh mutap ngelaban orang Judah ti bukai.
2 Ku sekeda sida, “Bala kami sebilik mayuh. Kami begunaka gandum kena kami idup.”
3 Kenu ku sida ti bukai bejaku, “Kami nyau begadaika tanah kami, enggau kebun anggur enggau rumah kami kena meli gandum lebuh lapar pungkang tu.”
4 Sida ke bukai mega nyebut, “Kami nyau nginjau duit kena mayar chukai tanah enggau kebun ngagai perintah.
5 Kitai tu orang Judah magang. Kati bala anak kami enda ngemanah anak sida? Tang kami nyau mejalka anak kami nyadi ulun. Sekeda bala anak indu kami udah dijual nyadi ulun. Kami tu nadai daya, laban tanah enggau kebun anggur kami udah dirampas ari kami.”
6 Lebuh aku ninga jaku putap sida, aku pedis ati
7 lalu mutuska runding deka mutarka pekara nya. Aku besalah semua bala tuai enggau bala pemesai orang mayuh. Ku aku bejaku ngagai sida, “Kita tu nekanka pengidup kaban belayan kita empu!” Aku lalu mesanka semua orang datai begempuru ngambika mutarka penusah nya.
8 Ku aku bejaku, “Kitai udah, enggau naka ulih nebus bala kaban belayan kitai ke bansa orang Judah ke udah nyual diri ngagai orang bansa bukai. Tang diatu kita mejalka kaban belayan kita nyual diri ngagai kita ke orang Judah baka sida empu!” Bala tuai enda bemunyi, sereta enda nemu utai ti patut disebut.
9 Udah nya aku lalu bejaku enggau sida, “Utai ti dikereja kita tu enda manah. Kita patut ngasika Allah Taala, nya baru bansa bukai ti nyadi munsuh kitai enda ngeleseka kitai.
10 Nambahka nya, aku enggau bala menyadi aku, enggau bala orang gaji aku, udah nyali duit enggau gandum. Aram kitai badu agi minta sida mayar anak duit nya.
11 Beri pulai baru ngagai sida sehari tu tanah sida, kebun anggur sida, kebun buah kana sida, rumah sida, enggau anak ari duit ti dijali ngagai sida, gandum, wain, enggau minyak ti udah diambi kita ari sida!”
12 Bala tuai lalu nyaut, “Kami deka ngereja utai ti disebut nuan. Kami deka mulaika pesaka sida ngagai sida empu, lalu enda minta sida mayar utang sida.”
Aku lalu mesanka bala imam, lalu mejalka bala tuai besumpah di mua sida, ngasuh sida ngamatka semaya ti baru udah digaga sida.
13 Udah nya aku lalu muka belulang ari punggung aku, lalu nesai belulang nya. lalu bejaku, “Baka tu ku Allah Taala deka nesai barang sapa kita ke enda ngamatka semaya diri. Allah Taala deka ngerampas rumah enggau semua utai kita, ngambika kita nadai agi utai.”
Semua orang ke bisi dia bela nyebut, “Amin!” lalu muji TUHAN. Bala tuai lalu ngamatka semaya sida.
 
 
Nehemiah Gerah Ati Meri Utai
14 Dalam kandang dua belas taun aku ti nyadi gabenor menua Judah, berengkah ari taun ti kedua belas nyentuk ngagai taun ti ketiga puluh dua Artaserses nyadi raja besai, kaban belayan aku enggau aku empu nadai kala makai pemakai gabenor.
15 Semua gabenor ti udah megai orang dulu agi ari aku, udah nating orang mayuh, lalu udah minta sida mayar empat puluh singkap duit pirak sehari kena meli pemakai enggau wain. Indah bala orang gaji sida deh udah nekanka pengidup orang mayuh. Tang aku enda baka nya, laban aku nangika Allah Taala.
16 Aku ngaga dinding kuta enggau pengabis pengering aku, lalu aku nadai ngulihka reta tengkira ke diri empu. Semua orang ke bekereja ke aku, bela ngaga dinding kuta nya magang.
17 Aku endang semampai nupi seratus lima puluh iku orang Judah enggau bala tuai sida, enda ngira semua orang bansa bukai ke betemu enggau aku.
18 Aku mela ke sida siku sapi, enam iku jelu bedus ti gemu, enggau berapa iku manuk tiap hari, lalu genap sepuluh hari aku meri sida wain. Tang aku nemu pemerinsa orang mayuh. Nya kebuah aku enda minta gaji nyadi gabenor.
19 Aku besampi ngagai Nuan, O Allah Taala. Kingatka semua utai ti udah dikereja aku ke orang mayuh tu.
 
Bagi 6
Orang Bepekat Ngelaban Nehemiah
1 Lebuh Sanbalat, Tobiah, Gesam, enggau bala munsuh kami ke bukai ninga kami udah nembuka dinding kuta, lalu dinding nya nyau nadai agi pesuk, taja pen kami apin nirika pintu ba ruang pintu,
2 Sanbalat enggau Gesam ngirumka pesan ngagai aku, minta aku betemu enggau sida ba siti genturung pendiau ti ba Emperan Ono. Tang aku nemu, sida deka ngemediska aku.
3 Aku lalu ngasuh orang mai pesan tu ngagai sida: “Aku enda ulih nurun kin laban aku benung ngereja pengawa ti besai amat guna, lalu aku enggai ngasuh pengawa tu tejanggal ngapa ketegal betemu enggau kita.”
4 Empat kali sida mesanka aku. Genap kali sida mesanka aku, baka nya ga saut aku.
5 Udah nya Sanbalat lalu ngasuh siku ari bala nembiak iya betemu enggau aku, mai pesan ti kelima, ngena siti surat ti enda ditutup.
6 Munyi tu ku surat nya: “Gesam madahka ngagai aku, berita bisi udah selebubu ngapa ba sebelah orang ke bekelingi ditu, madahka nuan enggau orang Judah ngaga dinding kuta tu laban kita deka angkat ngelaban perintah. Berita nya mega madahka nuan deka nyiri diri empu nyadi raja
7 lalu nuan udah meri atur ngasuh bala imam madahka, di Jerusalem, nuan raja orang Judah. Tuan Raja tetap deka ninga pasal utai tu, nya alai aku minta tua betemu lalu berandauka pekara tu.”
8 Aku lalu ngirumka saut ngagai iya: “Semua utai ti disebut nuan bula magang. Semua utai tu dikeluluka nuan magang.”
9 Sida nguji ngemba kami ngambika kami badu agi gawa. Aku lalu besampi, “TUHAN Allah Taala, asuh aku kering!”
10 Kira ba urung maya nya aku nemuai ngagai Semaiah anak Delaiah, uchu Mehetabel, ti enda ulih mindah ari rumah. Ku iya bejaku enggau aku, “Tua enda tau enda mupuk lalu belalai ba Endur ti Kudus dalam Rumah Sembiang, lalu ngunchi diri dia, laban sida deka datai lalu munuh nuan. Kada enda malam tu sida deka datai lalu munuh nuan.”
11 Ku aku nyaut, “Aku tu ukai orang ke rari lalu belalai. Kati nuan ngumbai aku deka belalai dalam Rumah Sembiang lalu ngidupka nyawa diri? Aku enda.”
12 Lebuh aku berundingka utai nya, nya baru aku nemu Allah Taala nadai bejaku ngena Semaiah. Semaiah meri aku jaku tangkan nya laban Sanbalat seduai Tobiah udah nyuap iya nyebut jaku nya.
13 Sida ngaji iya bejaku ngemba aku, ngambika aku bedosa, lalu ari nya ngenyaika nama aku lalu ngemaluka aku.
14 Aku lalu besampi, “Allah Taala, kingatka utai ti udah dikereja Tobiah enggau Sanbalat, lalu ukum seduai iya. Kingatka indu ke benama Noadiah enggau semua bala nabi ti bukai ti udah nguji ngemba aku.”
 
Pengawa Tembu
15 Lebuh kami udah bekereja 52 hari, semua kuta nya tembu magang digaga kena dua puluh lima hari bulan Elul.
16 Lebuh bala munsuh kami di menua ti ngelingi kami, ninga berita nya, sida takut, laban semua orang nemu pengawa nya tembu ari tulung Allah Taala.
17 Sekumbang maya nya, bala tuai orang Judah endang selalu ngirumka surat ngagai Tobiah, lalu Tobiah mega selalu ngirumka surat ngagai sida,
18 laban orang Judah mayuh setanah enggau iya laban mentua iya ti lelaki, Sekaniah anak Arah, nya orang Judah. Nambahka nya, anak lelaki iya ke benama Jehohanan jadi enggau anak indu Mesulam anak Berekiah.
19 Orang selalu bejaku di mua aku madahka semua utai ti manah ti udah dikereja Tobiah, lalu sida madahka ngagai iya semua utai ti disebut aku. Lalu iya majak ngirumka surat ngagai aku kena iya ngemba aku.
 
Bagi 7
1 Diatu dinding kuta udah digaga. Semua pintu udah didirika magang, lalu orang ke nyaga Rumah Sembiang, raban orang ke belagu ke TUHAN, enggau orang Lewi ti bukai udah diberi pengawa magang.
2 Aku lalu ngeletak dua iku orang merintah nengeri Jerusalem: menyadi aku Hanani, enggau Hananiah ti nyadi kepala nyaga kuta. Hananiah lain ari orang bukai laban iya orang ke tau dikarapka, sereta nangika Allah Taala.
3 Aku madahka ngagai seduai iya, pintu nengeri Jerusalem enda tau dibuka sebedau tinggi mata hari, lalu enda tau enda ditutup lalu dikalang sebedau bala jejaga pulai lebuh padam mata panas. Aku mega ngasuh seduai iya ngeletak orang nyadi jejaga ari orang ke diau di Jerusalem, lalu ngeletak sekeda sida nyaga ba siti-siti endur, lalu sida ti bukai bejalai nyaga ngelingi rumah diri empu.
 
Nama Orang Ke Mulaika Diri Ari Menua Bukai
4 Nengeri Jerusalem nya besai, tang orang ke diau dia enda mayuh, lalu rumah pen apin mega mayuh udah digaga.
5 Allah Taala ngasuh aku ngempuruka semua orang mayuh, bala tuai sida, enggau bala pemesai, ngambika ngitung tubuh nitihka ruang bilik. Aku lalu tetemuka bup ti ngundan nama orang ke terubah-rubah iya pulai ari menua Babilon. Baka tu ku utai ti ditemu aku:
6 Mayuh orang ke udah kena buai ngagai sitak menua Babilon, udah angkat ari menua nya, lalu pulai ngagai Jerusalem enggau ngagai menua Judah, napatka nengeri diri empu. Raban ruang bilik sida tu udah dibuai ngagai menua Babilon lalu diau din kenyau ari maya Raja Nebukadnesar udah nabanka sida nyadi orang tangkap.
7 Orang ke nyadi tuai sida nya Serubabel, Josua, Nehemiah, Asariah, Ramiah, Nahamani, Mordikai, Bilsan, Misperet, Bikbai, Nehum, enggau Banah.
8-25 Tu nama raban peturun orang Israel, enggau pemayuh tubuh ari siti-siti raban peturun ke pulai ari menua Babilon:
Paros - 2,172
Sepatiah - 372
Arah - 652
Pahat Moap (peturun Josua enggau peturun Joap) - 2,818
Elam - 1,254
Satu - 845
Sakai - 760
Binui - 648
Bebai - 628
Asgat - 2,322
Adonikam - 667
Bikbai - 2,067
Adin - 655
Ater (mega dikumbai Hesekiah) - 98
Hasum - 328
Besai - 324
Harip - 112
Gibeon - 95
26-38 Orang ke bempu aki ini ti udah diau di nengeri ti disebut di baruh tu mega pulai:
Betlehem enggau Netopah - 188
Anatot - 128
Bet Asmabet - 42
Kiriat-jearim, Chepirah, enggau Berot - 743
Ramah enggau Geba - 621
Mikmas - 122
Betel enggau Ai - 123
Nebo ti siti - 52
Elam ti siti - 1,254
Harim - 320
Jeriko - 345
Lod, Hadit, enggau Ono - 721
Senaah - 3,930
39-42 Tu nama raban peturun bala imam ke pulai ari menua Babilon:
Jedaiah (peturun Jesua) - 973
Imer - 1,052
Pasur - 1,247
Harim - 1,017
43-45 Tu nama raban peturun orang Lewi ke pulai ari menua Babilon:
Jesua enggau Kadmi-el (peturun Hodabiah) - 74
Raban peturun orang ke nebah musik dalam Rumah Sembiang (peturun Asap) - 148
Raban peturun orang ke nyaga Rumah Sembiang (peturun Salum, Ater, Talmon, Akup, Hatita, enggau Sobai) - 138
46-56 Raban peturun orang ke bekereja dalam Rumah Sembiang ke pulai ari menua Babilon:
Siha, Hasupa, Tabaot
Keros, Sia, Padon,
Lebana, Hagaba, Salmai,
Hanan, Gidel, Gahar,
Reaiah, Resin, Nekoda,
Gasam, Usa, Paseah,
Besai, Meunim, Nepusesim,
Bakbuk, Hakupa, Harhur,
Baslit, Mehida, Harsa,
Barkos, Sesera, Temah,
Nesiah, enggau Hatipa.
57-59 Raban peturun bala ulun Solomon ke pulai ari menua Babilon:
Sotai, Soperet, Perida
Jaalah, Darkon, Gidel,
Sepatiah, Hatil, Pecheret Hasebaim, enggau Amon.
60 Pemayuh semua peturun orang ke bekereja dalam Rumah Sembiang enggau bala ulun Solomon, ke pulai ari menua Babilon nya 392 iku.
61-62 Enam ratus empat puluh dua iku orang ari raban peturun Delaiah, Tobiah, enggau Nekoda pulai ari nengeri Tel Melah, Tel Harsa, Kerup, Adon, enggau Imer, tang sida enda ulih nerangka diri endang peturun orang Israel.
63-64 Tu bala raban peturun sida imam ti nadai tetemuka utai ti udah ditulis kena nerangka aki ini sida: Hobaiah, hakos, enggau Barsilai. (Aki ini ari raban peturun imam Barsilai udah jadi enggau siku indu ari raban peturun Barsilai ari Giliat, lalu ngangkatka nama raban peturun mentua iya ti lelaki.) Laban sida enda ulih nerangka aki ini diri, sida enda diterima nyadi imam.
65  Tuan gabenor orang Judah nagang sida makai pemakai ti diberi ngagai Allah Taala enti sida nadai imam ke nemu ngena Urim enggau Tumim.
66-69 Pemayuh semua orang ke pulai ari menua Babilon - 42,360.
Orang gaji ti lelaki enggau ti indu - 7,337
Lelaki enggau indu ke nebah musik - 245
Kuda - 736
Penakan-keledai - 245
Unta - 435
Keledai - 6,720
70-72 Mayuh orang ari bala sida meri duit kena ngaga Rumah Sembiang nya baru:
Tuan gabenor meri  8 kilogram emas
50 igi mangkuk kena ngereja pengawa pengarap
530 lambar baju panjai ke bala imam
Bala tuai peturun meri  168 kilogram emas
1,250 kilogram pirak
Semua orang bukai meri  168 kilogram emas
140 kilogram pirak
67 lambar baju panjai imam
73 Bala imam, orang Lewi, bala orang ke nyaga Rumah Sembiang, bala orang ke nebah musik, mayuh orang Israel ti bukai, bala orang ke bekereja dalam Rumah Sembiang, iya nya semua orang Israel, ngentapka diri di nengeri ti mit enggau nengeri ti besai di menua Judah.
 
Bagi 8
Esra Macha Adat Ngagai Orang Mayuh
1 Dalam bulan ti ketujuh semua orang Israel bela udah ngentapka diri magang dalam nengeri diri empu. Kena satu hari bulan nya, semua sida begempuru magang di Jerusalem, ba padang semak Pintu Ai. Sida ngasuh Esra ngambi Bup Adat Moses ti udah diberi TUHAN ngagai orang Israel.
2 Esra lalu mai bup nya ngagai endur alai semua orang ke lelaki, sida ke indu, enggau bala anak mit ti udah nemu meretika utai, begempuru.
3 Iya lalu macha Adat nya ngagai sida ba padang semak pintu nya, kenyau ari dini hari nyentuk ngagai tengah hari, lalu semua sida nyinuk mending.
4 Esra bediri ba panggau, ti endang udah disediaka alai ngereja pengawa nya. Tu nama orang ke bediri ari kanan Esra: Matitiah, Sema, Anaiah, Uriah, Hilkiah, enggau Maseiah. Orang ke bediri ari kiba iya: Pedaiah, Misael, Malkijah, Hasum, Hasbadanah, Sekariah, enggau Mesulam.
5 Esra bediri ba panggau nya ari atas orang mayuh, lalu semua sida bela merening ngagai iya magang. Lebuh iya ngebakka bup nya, semua sida bediri magang.
6 Ku Esra, “Pujika TUHAN Allah Taala ti pemadu besai!” Semua orang mayuh lalu ngangkatka jari sida, lalu nyaut, “Amin! Amin!” Sida besugang lalu nyungkurka diri ke tanah nyembah Allah Taala.
7 Udah nya sida angkat lalu bediri, lalu bala orang Lewi nerangka Adat nya ngagai sida. Tu nama orang Lewi nya: Jesua, Bani, Serebiah, Jamin, Akup, Sabetai, Hodiah, Maseiah, Kelita, Asariah, Josabat, Hanan, enggau Pelaiah.
8 Sida lalu nyalinka  Bup Adat Allah Taala nya, sereta nerangka iya ngambika orang mayuh meretika iya.
9 Lebuh orang mayuh ninga utai ti diguna Adat, ati sida balat kena tegu datai ke sida belabuh nyabak. Nya alai Nehemiah, ti nyadi tuan gabenor, Esra ti nyadi imam sereta landik pasal Adat, enggau bala orang Lewi nerangka Adat lalu madahka ngagai orang mayuh, “Tu hari ti kuduska TUHAN Allah Taala kita. Nya alai kita enda tau ngulit tauka nyabak.
10 Pulai ke rumah, lalu intu pengerami makai besai. Bagi pemakai enggau wain kita enggau orang ke nadai chukup utai diempa. Tu hari ti kuduska TUHAN. Nya alai, anang ngasuh ati kita tusah. Pengaga ti diberi TUHAN ngagai kita, deka ngasuh kita kering.”
11 Bala orang Lewi bejalai ngagai orang mayuh minta sida diau jenuh, lalu enda tusah ati ba hari ti kudus nya.
12 Nya alai semua orang mayuh pulai, lalu makai ngirup enggau ati ti gaga, sereta magi utai ti dikemisi sida enggau orang bukai, laban sida meretika utai ti udah dibacha ngagai sida.
 
Gawai Belangkau
13 Hari siti bala tuai peturun, enggau bala imam enggau orang Lewi, mansang ngagai Esra, deka belajarka ajar ari Adat.
14 Nya baru sida nemu, Adat ti udah diberi TUHAN ngena Moses, ngasuh orang Israel diau ba dunju lebuh Gawai Belangkau.
15 Nya alai sida madahka atur tu ngagai serata nengeri Jerusalem, enggau ngagai nengeri bukai enggau nengeri ti mit: “Kita enda tau enda mansang ngagai bukit, lalu ngambi dan kayu pain, kana, mertil, engkerema enggau kayu bukai, kena ngaga dunju nitihka atur ti ditulis dalam Adat.”
16 Orang mayuh lalu ngambi dan kayu, lalu ngaga dunju ba perabung rumah sida, ba tengah laman, ba tengah laman Rumah Sembiang, enggau ba padang nengeri ti semak Pintu Ai, enggau ngimbai Pintu Epraim.
17 Semua orang ke udah pulai ari menua Babilon bela ngaga dunju magang lalu diau dia. Tu keterubah iya utai tu dikereja kenyau ari maya Josua anak Nun. Semua orang mayuh gagit sereta lantang ati magang.
18 Kenyau ari hari ti keterubah ba Gawai nya nyentuk ngagai hari ti penudi, sida macha sebagi ari Adat Allah Taala tiap hari. Sida ngintu Gawai nya tujuh hari, lalu ba hari ti kelapan, sida besembiang bebala mayuh nitihka atur Adat.
 
Bagi 9
Orang Mayuh Ngaku Dosa
1 Kena dua puluh empat hari bulan nya, orang Israel begempuru. Sida bepasa, ngerasukka kain guni sereta ngerabu pala sida enggau amau.
2 Sida lalu nyeraraka diri ari semua orang bansa bukai, lalu bediri lalu belabuh ngaku dosa sida enggau dosa aki ini sida.
3 Sida bediri ba endur sida tiga jam mendingka Adat TUHAN Allah Taala sida dibacha ngagai sida, lalu dalam tiga jam nangkanka nya, sida ngaku dosa sida, lalu nyembah TUHAN Allah Taala sida
4 Udah nya Jesua, Bani, Kadmi-el, Sebaniah, Buni, Serebiah, Bani, enggau Chenani lalu bediri ba panggau ti endang diungkupka orang Lewi, lalu besampi enggau nyawa ti inggar ngagai TUHAN Allah Taala sida.
5 Udah nya orang Lewi, iya nya, Jesua, Kadmi-el, Bani, Hasapneiah, Serebiah, Hodiah, Sebaniah, enggau Petahiah, lalu bejaku: “Bediri lalu puji TUHAN Allah Taala kita. Puji Iya belama lama iya! Puji meh nama Nuan ti bemulia, taja pen Nuan tinggi agi ari ke ulih dipuji mensia.
 
Sampi Ngaku Penyalah
6 Semina Nuan siku aja ti TUHAN; Nuan udah ngaga semua langit enggau bintang; Nuan ngaga tanah enggau tasik, enggau semua utai ti dalam sida. Nuan udah meri sida seput, lalu semua utai ti di langit nyembah Nuan.
7  Nuan endang TUHAN Allah Taala ti udah milih Abram lalu mai iya pansut ari Ur di menua Babilon, lalu meri iya nama Abraham;
8 lalu Nuan nemu iya endang tetap ati ngagai Nuan, lalu Nuan ngaga siti sempekat enggau iya, madahka Nuan deka meri ngagai peturun iya menua orang Kanaan, menua orang Iti enggau menua orang Amor, menua orang Peris, menua orang Jebus, enggau menua orang Girgas; lalu Nuan udah ngamatka semaya Nuan, laban Nuan endang lurus.
9 “Lalu Nuan udah meda pemerinsa aki ini kami di menua Ejip, lalu ninga sabak sida ba Tasik Mirah.
10 Nuan udah ngereja kereja ajih ngelaban raja, enggau ngelaban bala pemesai iya, enggau ngelaban orang ke di menua iya, laban Nuan nemu pemalat sida udah nekanka pengidup bala nembiak Nuan. Nama Nuan tampak nyentuk ngagai sehari tu.
11  Lalu Nuan nyeraraka ai tasik ke sida ngambika sida ulih bejalai nengah tasik nya nengah tanah ti rangkai, tang Nuan nikauka orang ke begagaika sida ngagai ai ti dalam, baka ke nikauka batu ngagai tasik ti begelumbang.
12 Nambahka nya, Nuan nguluka sida ngena mua hari lebuh siang hari lalu lebuh malam hari Nuan nenggau jalai sida ngena api.
13 Nuan mega nurun ngagai Bukit Sinai, lalu bejaku ngagai bala nembiak Nuan ari serega, lalu meri sida adat ti bendar enggau pesan ti menyana,
14 lalu Nuan ngajar sida ngintu Hari Sabat ti kudus, lalu meri sida pesan enggau adat beseruanka nembiak Nuan Moses.
15 “Lebuh sida lapar, Nuan meri sida roti ari serega, lalu lebuh sida aus, Nuan meri sida ai ari batu; lalu Nuan ngasuh sida ngambi menua ti udah disemaya Nuan ngagai sida.
16  Tang bala aki ini kami sumbung sereta kieh lalu enda ngasika pesan Nuan.
17 Sida enggai ngasi, lalu sida enda ingatka semua kereja ti nyelai ti udah dikereja Nuan, tang kieh lalu ingin deka pulai baru ngagai menua Ejip lalu nyadi ulun baru. Tang Nuan endang Allah Taala ti seruran sedia deka ngampun, ke kasih, lubah ringat, sereta penuh laban pengerindu ti meruan belama iya, lalu Nuan enda ninggalka sida.
18 Indah lebuh sida ngaga siku engkeramba anak sapi lalu ngumbai nya petara ti udah nguluka sida pansut ari menua Ejip, lalu bejaku busung ngelaban Nuan,
19 deh Nuan enda ninggalka sida di menua puang, laban pengasih Nuan endang amat besai. Tiang remang ti nguluka sida lebuh siang hari, enggau tiang api ti nguluka sida lebuh malam hari nadai kala ninggalka sida.
20 Ngena kuasa Nuan, Nuan ngajar sida, lalu Nuan meri sida mana nyadika pemakai sida, lalu meri sida ai irup.
21 Nuan nupi sida di menua puang empat puluh taun; lalu sida nadai suntuk utai; gari sida enda luya, lalu kaki sida enda kembai.
22 “Nuan meri sida menua enggau bansa, lalu meri ngagai sida semua menua Raja Sihon ke merintah di Hesbon enggau menua Raja Og ke merintah di Basan.
23 Nuan ngasuh peturun sida nambah-menambah ngemayuh bintang ti di langit; lalu ngasuh sida ngalahka lalu diau di menua ti udah disemaya deka diberi Nuan ngagai aki ini sida.
24  Nya alai sida tama lalu ngalahka menua Kanaan, lalu Nuan ngalahka orang ke diau di menua nya, iya nya orang Kanaan, lalu nyerahka orang Kanaan ngagai jari sida, sama enggau raja enggau semua orang di menua nya, ngambika sida ngereja utai ngagai orang nya sepeneka ati sida.
25 Lalu sida ngalahka nengeri ti bekuta, menua ti ami, rumah ti penuh laban pengaya, telaga ti udah digaga, kebun anggur, kebun buah kana, mayuh kayu buah; Nya alai sida makai utai, kenyang lalu gemu, lalu ngelantangka diri ngena semua utai ti manah ti udah diberi Nuan ngagai sida.
26  Tang bala nembiak Nuan enda ngasi lalu sida angkat ngelaban Nuan; Sida ngelengkaka Adat Nuan, lalu munuh bala nabi ti meri sida jaku tangkan ti ngasuh sida pulai baru ngagai Nuan, lalu sida bejaku busung ngelaban Nuan.
27 Nya alai Nuan nyerahka sida ngagai jari munsuh ke merinsaka sida. Udah nya, lebuh sida merinsa, sida nyabak ngagai Nuan, lalu Nuan ninga sida ari serega, lalu laban Nuan enda penuh pengasih, Nuan meri sida bala tuai ke ngelepaska sida ari jari munsuh sida.
28 Tang lebuh menua nyau nadai agi pengachau, sida lalu bedosa baru, lalu Nuan nyerahka sida ngagai jari munsuh sida, ngambika munsuh sida merintah sida; tang lebuh sida nesal ati, lalu nyabak ngagai Nuan, Nuan ninga sida ari serega, lalu Nuan suah ngelepaska sida laban Nuan kasihka sida.
29 Nuan meri sida jaku tangkan ngasuh sida pulai baru ngagai Adat Nuan, tang sida sumbung lalu enda ngasika pesan Nuan, tang bedosa ngelaban Adat Nuan, Adat ti ulih nyelamatka sida. Sida kieh lalu enggai ngasi.
30  Berapa taun Nuan udah liat ati enggau sida, lalu ulih Roh Nuan meri jaku tangkan ngena bala sida nabi Nuan; tang sida enggai mending. Nya alai Nuan nyerahka sida ngagai jari orang ke di menua nya.
31 Tang laban pengasih Nuan endang besai, Nuan enda ngerusak sida tauka ninggalka sida, laban Nuan endang Allah Taala ti siru sereta kasih!
32  “Nya alai diatu, O Allah Taala kami, Allah Taala ti besai kuasa, ke diketakutka kami, ke ngingatka sempekat sereta meruan rinduka kami, anang enda merening ngagai semua pemerinsa ti udah ninggang kami ninggang raja kami, bala pemesai, imam, nabi enggau aki ini kami enggau semua nembiak Nuan kenyau ari maya bala raja menua Asiria udah nekanka pengidup kami, nyentuk ngagai diatu.
33 Nuan endang ngereja utai ti ngena lebuh Nuan ngukum kami, laban Nuan udah tetap ati lalu ngereja utai ti ngena, lalu kami pen udah mega bedosa.
34 Bala aki ini kami, raja kami, bala tuai enggau bala imam kami enda nitihka Adat Nuan. Sida enda mendingka pesan enggau jaku tangkan Nuan.
35 Sida ke nyadi raja ngasuh bala nembiak Nuan ngena berekat ti diberi Nuan, lebuh sida diau di menua ti luas, ti udah diberi Nuan ngagai sida. Tang sida enda nesal ati ke dosa sida lalu enda betuaika Nuan.
36 Nyadi diatu kami tu nyadi ulun di menua ti udah diberi Nuan ngagai kami, menua ti ami tu, ti meri kami pemakai.
37 Asil ti ulih kami ari tanah, pulai ngagai raja ti udah diasuh Nuan merintah kami, laban kami udah bedosa. Sida sepeneka ati ngayahka kami, sereta ngayahka jelu tupi kami, lalu kami tu balat tusah!”
 
Orang Israel Nyain Sempekat
38 Ketegal semua utai ti udah nyadi, kami orang Israel diatu ngaga sempekat ti tetap, lalu bala tuai, bala orang Lewi enggau bala imam kami nanggam sempekat nya ngena chop tambit sida.
 
Bagi 10
1 Orang ke terubah nyain nya Tuan Gabenor Nehemiah anak Hakaliah, ditangkanka Sedekiah. Bala orang tu mega nyain:
2-8 Imam:
Seraiah, Asariah, Jeremiah,
Pasur, Amariah, Malkijah,
Hatus, Sebaniah, Maluk,
Harim, Meremot, Obadiah,
Daniel, Gineton, Baruk,
Mesulam, Abijah, Mijamin,
Masiah, Bilgai, enggau Semaia.
9-13 Orang Lewi:
Jesua anak Asaniah,
Binui ari raban bansa Hanadat,
Kadmi-el, Sebaniah, Hodiah,
Kelita, Pelaiah, Hanan,
Mika, Rehob, Hasabiah,
Sakur, Serebiah, Sebaniah,
Hodiah, Bani, enggau Beninu.
14-27 Bala tuai bansa:
Paros, Pahat Moap,
Elam, Satu, Bani,
Buni, Asgat, Bebai,
Adonijah, Bikbai, Adin,
Ater, Hesekiah, Asur,
Hodiah, Hasum, Besai,
Harip, Anatot, Nebai,
Makpias, Mesulam, Hesir,
Mesesabel, Sadok, Jadua,
Pelatiah, Hanan, Anaiah,
Hosea, Hananiah, Hasup,
Halohes, Pilha, Sobek,
Rehum, Hasapnah, Maseiah,
Ahiah, Hanan, Anan,
Maluk, Harim, enggau Banah.
 
Sempekat
28 Kami, orang Israel, bala imam, orang Lewi, bala orang ke nyaga Rumah Sembiang, bala orang ke nebah musik dalam Rumah Sembiang, orang ke bekereja dalam Rumah Sembiang, enggau semua orang bukai ke ngasika Adat Allah Taala, iya nya kami empu, enggau bini kami, sereta enggau semua anak kami ke udah chukup tuai lalu nemu reti utai, udah nyeraraka diri ari orang bansa bukai ke diau di menua kami.
29 Diatu kami, enggau bala tuai bansa kami besumpah deka diau nitihka Adat ti udah diberi Allah Taala nengah nembiak Iya Moses. Kami besumpah deka ngasika semua jaku ti disebut TUHAN ngagai kami, lalu kami deka nitihka semua adat enggau atur Adat Iya. Awakka kami tulah enti kami ngelanggar jaku sumpah tu.
30 Kami enggai jadi enggau orang bansa bukai ke diau di menua kami.
31 Enti orang bansa bukai mai gandum tauka sebarang utai bukai lalu nyual utai nya ngagai kami lebuh Hari Sabat, tauka lebuh hari kudus ti bukai, kami enggai meli utai nya ari sida. Genap taun ti ketujuh, kami deka ngetu bumai tanah kami, lalu deka muai semua utang orang ba kami.
32 Genap taun kami deka meri 5 gram pirak kena nulung mayar ungkus ngintu Rumah Sembiang.
33 Kami deka meri utai ti disebut di baruh tu lagi ngambika utai nya bisi dikena nyembah Allah Taala dalam Rumah Sembiang: Roti ti kudus, gandum nyadika piring ti diberi tiap hari, jelu ti ditunu nyadika piring tiap hari, piring ti kuduska Hari Sabat, ke Gawai Anak Bulan, enggau ke gawai bukai, pemeri ti kudus, piring pengampun dosa orang Israel, enggau sebarang utai bukai ti diguna dalam Rumah Sembiang.
34 Bala kami tu, bala imam, enggau orang Lewi, deka bechabut undi genap taun kena nentuka raban peturun ti deka meri kayu api kena nunu piring ti diberi ngagai TUHAN Allah Taala kami, nitihka atur Adat.
35 Kami deka mai ngagai Rumah Sembiang tiap taun piring ari buah bungas, gandum ti terubah diketau kami, enggau buah bungas ti terubah mansau ba puchuk kayu kami.
36 Genap iku kami deka mai ngagai bala imam dalam Rumah Sembiang, anak tuai kami, lalu nyerahka iya dia ngagai Allah Taala nitihka atur Adat. Kami deka mega nyerahka anak ti terubah diadaka jelu sapi kami, enggau anak domba ti terubah diadaka bedus kami enggau anak kambin ti terubah diadaka kambin kami.
37 Kami deka mai ngagai imam dalam Rumah Sembiang, tuku roti ti digaga ari gandum ti terubah diketau kami genap taun, enggau piring wain, minyak kana, enggau semua macham buah. Kami deka mai ngagai orang Lewi ke ngumpul pemeri sepuluh peratus dalam genturung pendiau kami, pemeri sepuluh peratus ari utai ti ditanam ba tanah kami.
38 Imam ari peturun Aron deka bejalai enggau orang Lewi lebuh pemeri sepuluh peratus nya digumpul. Orang Lewi deka nyimpan sepuluh peratus ari semua pemeri sepuluh peratus nya dalam setor Rumah Sembiang ngambika bisi dikena dalam Rumah Sembiang nya.
39 Orang Israel enggau orang Lewi enda tau enda mai gandum, wain, enggau minyak kana ti diberi orang mayuh, ngagai bilik setor alai pekekas rumah TUHAN ditaruh. Dia mega endur alai imam ke bekereja, orang ke nyaga Rumah Sembiang, enggau raban orang ke belagu dalam Rumah Sembiang, diau. Kami enggai nejuka Rumah Sembiang Allah Taala kami enda diintu.
 
Bagi 11
Orang Ke Diau Di Jerusalem
1 Bala tuai bansa ngentapka diri di Jerusalem, lalu semua orang bukai enda tau enda bechabut undi kena milih siti ruang bilik ari genap sepuluh buah, ti deka diau di nengeri Jerusalem ti kudus. Orang ke bukai deka diau di nengeri ti bukai, enggau ba nengeri ti mit.
2 Orang mayuh balat amat muji orang ke sanggup diau di Jerusalem.
3 Di nengeri Jerusalem enggau di nengeri ti bukai, orang Israel, bala imam, orang Lewi, bala orang ke bekereja dalam Rumah Sembiang, enggau bala peturun orang gaji Solomon, bela diau ba tanah diri empu di nengeri diri empu. Tu nama orang ke tinggi pangkat di sitak menua Judah ti diau di Jerusalem:
4 Raban bansa Judah:
Ataiah anak Usiah, uchu Sekariah. Aki ini iya ti bukai nyengkaum Amariah, Sepatiah, enggau Mahalalel, peturun anak lelaki Judah ke benama Peres.
5 Maseiah anak Baruk, uchu Kolhoseh. Aki ini iya ti bukai nyengkaum Hasaiah, Adaiah, Joiarip, enggau Sekariah, diturunka anak lelaki Judah ke benama Selah.
6 Ari peturun Peres, 468 iku diau di Jerusalem. Semua sida tu soldadu ti tebilang nama:
7 Raban bansa Benjamin: Salu anak Mesulam, uchu Joet. Aki ini iya ti bukai nyengkaum Pedaiah, Kolaiah, Maseiah, Itiel, enggau Jesaiah.
8 Gabai seduai Salai nya kaban nyempil Salu. Pemayuh semua orang Benjamin ti diau di Jerusalem nya 928 iku.
9 Orang ke nyadi tuai sida nya Joel anak Sikri, lalu Judah anak Hasenuah nyadi pemesai ti lumur dua di nengeri nya.
10 Bala Imam: Jedaiah anak Joiarip, enggau Jachin.
11 Seraiah anak Hilkiah, uchu Mesulam. Aki ini iya nyengkaum Sadok, Maraiot, enggau Imam Besai Ahitup.
12 Pemayuh semua orang ari raban peturun tu ke bekereja dalam Rumah Sembiang nya 822 iku.
Adaiah anak Jeroham, uchu Pelaiah. Aki ini iya nyengkaum Amsi, Sekariah, Pasur, enggau Malkijah.
13 Pemayuh semua tuai bilik ari raban peturun tu nya 242 iku.
Amasai anak Asarel, uchu Ahsai. Aki ini iya nyengkaum Mesilemot enggau Imer.
14 Seratus dua puluh lapan iku orang ari raban peturun tu nya endang soldadu ti tebilang. Tuai sida nya Sapdiel, ari ruang bilik orang ke tinggi pangkat. 
15 Orang Lewi: Semaiah anak Hasup, uchu Asrikam. Aki ini iya nyengkaum Hasabiah enggau Buni.
16 Sabetai enggau Josabat, orang Lewi ti tebilang, ti nyadi tuai ngatur pengawa ari luar Rumah Sembiang.
17 Mataniah anak Mika, uchu Sapdi, peturun Asap. Iya nguluka raban orang belagu meri sampi terima kasih dalam Rumah Sembiang. Bakbukiah, ti nyadi penulung Mataniah. Apda anak Shamua, uchu Galal, peturun Jedutun.
18 Pemayuh semua orang Lewi ti diau di Jerusalem nya 284 iku.
19 Orang Ke Nyaga Rumah Sembiang: Akup, Talmon, enggau kaban belayan seduai iya. Pemayuh semua sida: 172 iku.
20 Orang Israel ti bukai, bala imam enggau bala orang Lewi ti bukai diau ba tanah diri empu di nengeri bukai ti besai enggau ti mit di menua Judah.
21 Orang ke bekereja dalam Rumah Sembiang, diau ba endur ti dikumbai Opel di Jerusalem, lalu sida bekereja di baruh Siha seduai Gispa.
22 Orang ke nyadi tuai ke bala orang Lewi ti diau di Jerusalem nya Usi anak Bani, uchu Hasabiah. Aki ini iya nyengkaum Matniah enggau Mika, lalu iya datai ari raban peturun Asap, iya nya raban peturun ke betanggungjawap nebah musik lebuh orang besembiang dalam Rumah Sembiang.
23 Atur ti diberi raja netapka semua raban peturun nya begintir-gintir nebah musik tiap hari dalam Rumah Sembiang.
24 Petahiah anak Mesesabel, ari raban peturun Serah ke ari raban bansa Judah, nyadika pengari bansa orang Israel di istana raja besai menua Persia.
 
Orang Ke Diau Dalam Nengeri Ti Mit Enggau Ti Besai
25 Mayuh orang Israel diau ba nengeri semak umai sida empu. Raban bansa Judah diau di Kiriat-arba, Dibon, enggau Jekapseel, enggau ba genturung pendiau semak nengeri nya.
26 Sida mega diau di nengeri Jesua, Moladah, Bet-pelet,
27 Hasar-sual, enggau Beer-seba enggau ba sebelah genturung pendiau ti ngelingi nengeri nya.
28 Sida diau di nengeri Siklak, Mekonah enggau genturung pendiau ti ngelingi nengeri nya,
29 di En-rimon, Sorah, Jarmut,
30 Sanoah, Adulam, enggau ba genturung pendiau ti semak semua nengeri nya. Sida diau di Lakis, enggau ba umai semak nya, enggau di Asekah enggau ba genturung pendiau ti semak nengeri nya. Reti nya, orang Judah diau di menua entara Beer-seba di selatan enggau Lebak Hinom di utara.
31 Raban bansa Benjamin diau di Geba, Mikmas, Ai, Betel, enggau ba genturung pendiau semak nya,
32 Anatot, Nop, Ananiah,
33 Hasor, Ramah, Gitaim,
34 Hadit, Seboim, Nebalat,
35 Lod, enggau Ono, enggau ba Emperan Tukang.
36 Sekeda raban orang Lewi ti diau di menua Judah, diasuh pindah lalu diau begulai enggau raban bansa Benjamin.
 
Bagi 12
Nama Bala Imam Enggau Orang Lewi
1 Tu nama bala imam enggau orang Lewi ke sama pulai enggau Serubabel anak Sealtiel, enggau Imam Besai Jesua, ari menua Babilon:
2-7 Imam:
Seraiah, Jeremiah, Esra, Amariah, Maluk, Hatus, Sekaniah, Rehum, Meremot, Ido, Ginetoi, Abijah, Mijamin, Madiah, Bilgah, Semaiah, Joiarip, Jedaiah, Salu, Amok, Hilkiah, enggau Jedaiah.
Orang tu udah nyadi tuai ke bala imam lebuh maya Jesua.
8 Orang Lewi:
Tu nama orang ke nguluka orang belagu meri terima kasih: Jesua, Binui, Kadmi-el, Serebiah, Judah, enggau Mataniah.
9 Tu nama orang ke ngelembungka sida: Bakbukiah, Uno, enggau orang Lewi ti bukai.
 
Peturun Imam Besai Jesua
10 Jesua nya apai Joiakim. Joiakim nya apai Eliasip. Eliasip nya apai Joiada.
11 Joiada nya apai Jonatan, lalu Jonatan nya apai Jadua.
 
Bala Tuai Raban peturun Imam
 12-21 Baka tu ku nama imam ti nyadi tuai ke genap bengkah raban peturun imam lebuh Joiakim nyadi Imam Besai:
Imam Raban peturun
Meraiah Seraiah
Hananiah  Jeremiah
Mesulam  Esra
Jehohanan  Amariah
Jonatan Maluchi
Josep  Sebaniah
Adna Meraiot Harim Helkai
Sekariah    Ido
Mesulam Gineton
Sikri Abijah
Piltai  Miniamin enggau raban peturun Moadiah
Shamua Bilgah
Jehonatan Semaiah
Matenai Joiarip
Usi  Jedaiah
Kalai Salai
Eber  Amok
Hasabiah  Hilkiah
Netanel  Jedaiah
 
Ruang Bilik Bala Imam Enggau Ruang Bilik Orang Lewi
22 Nama tuai bilik orang Lewi enggau tuai bilik bala imam bisi ditulis sekumbang sida Imam Besai Eliasip, Joiada, Jonatan, enggau Jadua agi idup. Semua nama nya tembu dituliska magang lebuh Darius nyadi raja besai menua Persia.
23 Tang nama tuai bilik orang Lewi ditulis semina nyentuk ngagai maya Jonatan, uchu Eliasip aja.
 
Magi Pengawa Dalam Rumah Sembiang
24 Nitihka atur Hasabiah, Serebiah, Jesua anak Kadmi-el, orang Lewi dibagi ngagai mayuh bengkah raban. Dua bengkah raban sekali-sekali muji Allah Taala. Raban dua bengkah nya besaut-saut muji sereta meri terima kasih ngagai Allah Taala nitihka atur ti udah diberi Raja David, ke nembiak Allah Taala.
25 Tu nama jejaga Rumah Sembiang ti nyadi tuai nyaga bilik setor semak pintu Rumah Sembiang: Mataniah, Bakbukiah, Obadiah, Mesulam, Talmon, enggau Akup.
26 Orang tu idup lebuh maya Joiakim anak Jesua, uchu Jehosadak, enggau lebuh maya Nehemiah nyadi gabenor, enggau lebuh maya Esra, iya nya imam ti landik pasal Adat.
 
Nehemiah Nyerahka Dinding Kuta Nengeri
27 Lebuh dinding kuta nengeri Jerusalem diserahka, orang Lewi lalu dibai ngagai nengeri nya ari sebarang endur sida diau, ngambika sida ulih enggau ngerami pengawa nyerahka dinding kuta nya ngena lagu terima kasih, ngena bebendai enggau belikan.
28 Ruang bilik orang Lewi ti landik belagu lalu datai ari endur alai sida ke udah ngentapka diri ngelingi Jerusalem, enggau ari nengeri ti mit ngelingi Netopah,
29 enggau ari Betgilgal, Geba, enggau Asmabet.
30 Bala imam enggau orang Lewi lalu nuchi diri, nuchi orang mayuh, nuchi pintu, enggau dinding kuta nengeri.
31 Aku ngempuruka bala tuai orang Judah ba atas dinding kuta nengeri, lalu ngasuh sida nguluka dua bengkah raban ti besai bejalai ngelingi nengeri, meri terima kasih ngagai Allah Taala. Raban ti keterubah bejalai musin ke kanan ba atas dinding kuta nya tunga ngagai Pintu Uras.
32 Hosaiah bejalai ngentudika sida, dititihka setengah ari bala tuai orang Judah.
33-35 Tu nama bala imam ke bejalai ngentudika sida, besepuka terumpit: Asariah, Esra, Mesulam, Judah, Benjamin, Semaiah, enggau Jeremiah. Sida lalu dititihka Sekariah anak Jonatan, uchu Semaiah. (Bala aki ini iya nyengkaum Mataniah, Mikaiah, enggau Sakur, ari raban peturun Asap.)
36 Sekariah lalu dititihka bala ari raban peturun iya empu, iya nya sida Semaiah, Asarel, Milalai, Gilalai, Mai, Netanel, Judah, enggau Hanani. Semua sida nya mai pekekas musik magang sebaka enggau pekekas ti ditebah Raja David, ke nembiak Allah Taala. Esra, ti landik pasal Adat, nguluka raban iya ba pejalai nya.
37 Lebuh sida datai ba Pintu Ai Ti Engkeching sida lalu niki tangga ti nuju ngagai Nengeri David, mansa istana David, lalu pulai baru ngagai dinding kuta ba Pintu Ai, ti ba tisi timur nengeri nya.
38 Raban sebengkah ke meri terima kasih, bejalai musin ke kiba nengah puchuk dinding kuta, lalu aku nitihka sida disempulang setengah ari bala mayuh. Kami bejalai mansa Menara Dapur ngagai Dinding Kuta Ti Besai Buka,
39 lalu ari nya kami bejalai mansa Pintu Epraim, Pintu Jesanah, Pintu Ikan, Menara Hananel, enggau Menara Seratus, ngagai Pintu Bedus. Kami nembuka pejalai kami semak pintu Rumah Sembiang.
40 Nya alai raban ti dua bengkah ti meri terima kasih ngagai Allah Taala, sama datai ba kandang Rumah Sembiang. Nambahka bala tuai ke bejalai enggau aku,
41 raban aku nyengkaum bala imam ke nyepu terumpit. Sida nya: Eliakim, Maseiah, Miniamin, Mikaiah, Elioenai, Sekariah, enggau Hananiah.
42 Sida dititihka Maseiah, Semaiah, Eleasar, Usi, Jehohanan, Malkijah, Elam, enggau Eser. Bala orang ke belagu, ke diuluka Jesrahiah, belagu enggau naka penginggar nyawa sida.
43 Mayuh amat piring diberi sehari nya, lalu orang mayuh gaga ati magang, laban Allah Taala udah ngasuh ati sida lantang. Sida ke indu enggau bala anak mit sama enggau rami, lalu nyawa orang ke rami ulih didinga berapa batu ari endur nya.
 
Meri Utai Kena Besembah Dalam Rumah Sembiang
44 Lebuh maya nya, orang bisi udah diletak ngemataka bilik setor alai naruh semua utai ti diberi ngagai Rumah Sembiang. Utai ti diberi nya nyengkaum pemeri sepuluh peratus, enggau gandum ti terubah diketau, buah ti mansau ti terubah diketau genap taun. Orang tu betanggungjawap ngumpul pemeri ari umai ti semak semua nengeri, enggau ari bala imam enggau ari orang Lewi nitihka atur Adat. Semua orang Judah gaga ati ke bala imam enggau ke orang Lewi,
45  laban sida udah ngereja pengawa nuchi orang mayuh enggau pengawa bukai ti udah dipesanka Allah Taala. Bala orang ke nebah musik dalam Rumah Sembiang enggau bala orang ke nyaga Rumah Sembiang, mega ngereja pengawa sida nitihka atur ti digaga Raja David enggau anak iya Solomon.
46 Kenyau ari maya Raja David, enggau maya Asap nyadi tukang nebah musik dulu menya, bala orang ke nebah musik endang udah seruran nguluka orang mai lagu puji enggau lagu terima kasih ngagai Allah Taala.
47 Lebuh maya Serubabel, enggau lebuh maya Nehemiah, semua orang Israel tiap hari meri pemeri kena nulung bala orang ke nebah musik, enggau bala jejaga Rumah Sembiang. Orang Israel ngenjuk piring ti kudus ngagai orang Lewi, lalu orang Lewi, nitihka penyampau ti udah diletak, meri sebagi ari piring ti kudus nya ngagai bala imam.
 
Bagi 13
Nyeraraka Diri Ari Orang Bansa Bukai
1  Lebuh Adat Moses benung dibacha enggau nyawa ti inggar ngagai orang mayuh, sida lalu datai ba genteran ti madahka orang Amon enggau orang Moap enda tau sekali-kali ditejuka begulai enggau bala nembiak Allah Taala.
2 Atur tu diberi laban orang Amon enggau orang Moap enggai meri pemakai enggau ai irup ngagai orang Israel lebuh sida di rantau jalai pansut ari menua Ejip. Lalu orang Moap udah mega ngaji Balaam nyumpah orang Israel. Tang Allah Taala kitai udah ngalihka sumpah nya nyadi berekat.
3 Lebuh orang Israel ninga adat nya dibacha, sida lalu nyeraraka diri ari semua orang bansa bukai.
 
Nehemiah Ngubah Atur
4 Imam Eliasip, ti nyadi tuai ngemataka bilik setor Rumah Sembiang, endang lama udah bepangan enggau Tobiah.
5 Iya ngemendarka Tobiah ngena siti bilik ti besai ti udah alai sida naruh pemeri gandum enggau menyan, pekekas ti dikena dalam Rumah Sembiang, pemeri ke bala imam, enggau pemeri sepuluh peratus ari gandum, wain, enggau minyak kana ti diberi ngagai orang Lewi, ngagai bala orang ke nebah musik, enggau ngagai bala jejaga Rumah Sembiang.
6 Lebuh Imam Eliasip ngemendarka Tobiah ngena bilik nya, aku nadai di Jerusalem, laban dalam taun ti ketiga puluh dua Artaserses  nyadi raja besai menua Babilon, aku udah pulai ngagai menua Babilon madahka berita ngagai raja besai. Nyau kelama udah bekau nya, nya baru aku bulih pemendar
7 pulai baru ngagai Jerusalem. Lebuh aku datai di Jerusalem, aku tekenyit ati lebuh aku nemu Eliasip udah ngemendarka Tobiah ngena siti bilik dalam Rumah Sembiang.
8 Aku pedis ati lalu muai semua utai Tobiah ari bilik nya.
9 Aku meri atur ngasuh bilik nya dituchi, lalu semua pekekas Rumah Sembiang, pemeri ari gandum, enggau menyan dipulaika baru ngagai bilik nya.
10 Aku mega ninga berita madahka ungkup ti patut diberi ngagai orang Lewi, enda diberi ngagai sida. Nya alai sida enggau bala orang ke nebah musik, ke bekereja dalam Rumah Sembiang, udah pulai ngagai umai diri.
11 Nya alai aku nganu bala pemesai laban sida nadai ibuhka Rumah Sembiang. Lalu aku mai bala orang Lewi enggau bala orang ke nebah musik pulai baru ngagai Rumah Sembiang, lalu ngasuh sida gawa baru.
12 Udah nya semua orang Israel lalu belabuh baru mai pemeri sepuluh peratus ari gandum, wain, enggau minyak kana sida ngagai bilik setor Rumah Sembiang.
13 Aku ngeletak orang nyadi tukang wang ngemataka bilik setor. Tu nama sida: Imam Selemiah; Sadok, ti landik pasal Adat; enggau siku orang Lewi ke benama Pedaiah. Hanan anak Sakur, uchu Mataniah, nyadika penulung sida. Aku nemu diri tau ngarapka sida deka nyadung pemakai enggau ati ti lurus ngagai orang bukai ke sama bekereja enggau sida.
14 O Allah Taala aku, kingatka semua utai ti udah dikereja aku ke Rumah Sembiang Nuan, enggau pengawa ti besembah dalam Rumah Sembiang nya.
15 Lebuh maya nya aku bisi meda orang Judah mitan buah anggur lebuh Hari Sabat. Sida ke bukai mai gandum, wain, buah anggur, buah ara, enggau mayuh utai bukai ngena keledai sida ngagai Jerusalem. Aku meri sida jaku tangkan nagang sida bejualka utai lebuh Hari Sabat.
16 Sekeda orang ari nengeri Tire bisi diau di Jerusalem, lalu sida mai ikan enggau semua macham barang ngagai nengeri Jerusalem, deka nyual utai nya lebuh Hari Sabat.
17 Aku nganu bala tuai orang Judah, lalu madahka ngagai sida, “Peda penyai utai ti dikereja kita! Kita udah ngamahka Hari Sabat.
18 Tu meh kebuah Allah Taala udah ngukum aki ini kita, lebuh Iya ngerusak nengeri tu. Tang agi ga kita deka majak ngamahka Hari Sabat lalu nyungkak Allah Taala ringat ngagai orang Israel.”
19 Nya alai aku lalu meri atur ngasuh pintu nengeri ditutup ba pun tiap-tiap Hari Sabat, lebuh padam mata panas, lalu pintu nya enda tau dibuka datai ke lepas Hari Sabat. Aku ngasuh sekeda orang ari bala aku jaga ba pintu nengeri, kena nagang utai dibai tama ngagai nengeri lebuh Hari Sabat.
20 Nyadi sekali dua iku orang dagang ke bejualka semua macham utai, tinduk di luar dinding kuta nengeri malam hari Lima.
21 Ku jaku tangkan aku enggau seduai iya, “Nadai guna seduai diau di luar nganti hari siang. Enti seduai agi ngereja tu, aku deka muru seduai.” Belabuh ari nya, seduai iya nadai agi datai lebuh Hari Sabat.
22 Aku ngasuh orang Lewi nuchi diri empu, lalu ngasuh sida mansang nyaga pintu nengeri, kena nentuka Hari Sabat meruan kudus. Kingatka aku, O Allah Taala, ketegal utai tu mega, lalu kasihka aku laban pengerindu Nuan endang besai.
23 Lebuh maya nya mega aku bisi nemu mayuh lelaki orang Judah jadi enggau indu ari Asdot, Amon, enggau Moap.
24 Setengah ari bala anak sida nya bejaku ngena jaku orang Asdot, tauka jaku orang bansa bukai, lalu enda nemu jaku kami empu.
25 Aku nganu sida ke lelaki, minta sida ditinggang sumpah, malu sida, lalu ngeruntun buk sida. Udah nya aku ngasuh sida besumpah dalam nama Allah Taala, madahka diri enggau anak sida enda agi jadi enggau orang bansa bukai.
26 Ku aku bejaku enggau sida, “Raja Solomon bedosa ketegal indu orang bansa bukai. Solomon besai agi ari raja menua bukai. Allah Taala udah rinduka iya, lalu ngasuh iya nyadi raja ke semua menua Israel, tang taja pia, iya bedosa laban iya jadi enggau indu orang bansa bukai.
27 Kati kita mai kami nitihka teladan kita, enda ngasika Allah Taala kitai, lalu jadi enggau indu bansa bukai?”
28 Joiada nya anak lelaki Imam Besai Eliasip, tang siku ari bala anak lelaki iya jadi enggau anak indu Sanbalat, ari nengeri Bet-horon. Nya alai aku ngasuh Joiada angkat ari Jerusalem.
29 Allah Taala, kingatka chara orang tu udah ngamahka pengawa imam enggau sempekat ti udah digaga Nuan enggau bala imam enggau bala orang Lewi.
30 Nya alai aku lalu nuchi orang mayuh ari semua utai ti ukai enggi orang Judah. Aku nyendiaka atur ke bala imam, enggau ke orang Lewi, ngambika semua sida nemu pengawa diri.
31 Aku meri atur, minta kayu ti dikena nunu piring dibai ba maya ti patut, lalu orang mayuh mai piring sida ke digaga ari gandum enggau buah sida ke terubah mansau. Kingatka semua utai tu, O Allah Taala, lalu berekatka aku ketegal utai nya.