ESRA
 
Jaku Pemuka
Bup  Esra* nampung cherita ti disebut dalam Bansa Israel. Bup tu madahka pasal pemulai orang Judah ti udah dibuai ngagai menua Babilon, enggau pasal pengawa mai orang Judah pulai baru ngagai pengawa besembahka TUHAN di Jerusalem. Baka tu ku gaya utai ti nyadi nya ditusun dalam bup tu. (1) Raban ti terubah pulai ari menua Babilon nitihka atur Sairus, Raja menua Persia. (2) Rumah Sembiang digaga baru, lalu diserahka ngagai TUHAN, lalu pengawa besembahka Allah Taala belabuh dikereja baru di Jerusalem. (3) Nyau berapa taun udah bekau nya, seraban agi orang Judah pulai ngagai Jerusalem diuluka Esra, orang ke pandai ba pasal Adat Allah Taala, ke nulung orang mayuh ngaduka pengarap enggau pengidup sida, ngambika sida ulih ngetanka pesaka roh orang Israel.
 
Ripih Isi Bup Tu
Orang tangkap ke terubah pulai ari Babilon (1.1-2.70)
Rumah Sembiang digaga baru, lalu diserahka (3.1-6.22)
Esra pulai sama enggau orang tangkap ti bukai (7.1-10.44)
 
Bagi 1
Sairus Ngasuh Orang Judah Pulai
1 Dalam taun ti kesatu Sairus nyadi raja besai menua Persia, TUHAN ngamatka jaku ti udah disebut Iya ngena nabi Jeremiah. Iya nyungkak Sairus mansutka siti atur, lalu ngirumka atur nya ngena surat ngambika dibacha enggau nyawa ti inggar di semua endur dalam menua ti diperintah iya:
2  “Tu atur ari Sairus, Raja Besai menua Persia. TUHAN Allah Taala serega, udah ngasuh aku merintah semua dunya, lalu udah meri ngagai aku tanggungjawap ngaga Rumah Sembiang ke Iya di Jerusalem, di menua Judah.
3 Awakka Allah Taala meruan enggau semua kita ke nembiak Iya. Kita enda tau enda mansang ngagai Jerusalem, lalu nirika baru Rumah TUHAN Allah Taala ke disembah orang Israel, Allah Taala ti disembah di Jerusalem.
4 Enti bala nembiak Iya ti udah dibuai ngagai menua bukai bisi begunaka tulung kena sida pulai, orang ke berimbai pendiau enggau sida enda tau enda nulung sida, meri sida pirak enggau emas, pemakai enggau jelu kena mai barang, sereta enggau piring ngambika bisi diserahka dalam Rumah Sembiang Allah Taala di Jerusalem.”
5 Udah nya bala tuai peturun ari raban bansa Judah enggau Benjamin, bala imam enggau orang Lewi, enggau semua orang bukai ti udah ditegu Allah Taala ati, sedia mupuk lalu nirika Rumah TUHAN baru di Jerusalem.
6 Semua orang ke berimbai pendiau enggau sida meri sida pirak, emas, pemakai, jelu kena mai barang, utai berega ti bukai, enggau piring ke Rumah Sembiang.
7 Raja Besai Sairus meri pulai baru ngagai sida mangkuk ti udah ditabanka Raja Nebukadnesar ari Rumah Sembiang di Jerusalem, lalu udah naruh utai nya dalam rumah sembiang bala petara iya.
8 Raja Besai nyerahka utai nya ngagai Mitredat, tuai ngemataka sarang reta raja. Mitredat lalu nuliska semua utai nya ke Sesbasar, gabenor menua Judah.
9-10 Baka tu ku pemayuh utai nya:
 bisin emas kena meri piring  30
 bisin pirak kena meri piring  1,000
 bisin bukai  29
 mangkuk emas  30
 mangkuk pirak  410
 mangkuk ti bukai  1,000
11 Pemayuh semua bisin emas enggau pirak sereta enggau perengka bukai ti dibai Sesbasar enggau orang bukai ke sama udah dibuai ngagai menua Babilon, lebuh sida mulaika diri ngagai Jerusalem nya 5,400 iti.
 
Bagi 2
Sida Ke Udah Dibuai Pulai Baru Ari Menua Bukai (Nehemiah 7.4-73)
1 Mayuh orang ke udah dibuai ngagai menua Babilon angkat ari menua nya, lalu pulai baru ngagai Jerusalem enggau menua Judah, semua sida bela napatka nengeri diri empu. Sida udah dibuai ngagai menua Babilon lalu diau di menua nya kenyau ari maya Raja Nebukadnesar udah nabanka sida nyadi orang tangkap ngagai menua nya.
2 Tuai sida nya Serubabel, Josua, Nehemiah, Seraiah, Rilaiah, Mordikai, Bilsan, Mispar, Bikbai, Rehum, enggau Banah.
Tu nama raban peturun orang Israel, enggau pemayuh tubuh sida ari siti-siti raban peturun ti udah dibuai ngagai menua Babilon, ke pulai baru ngagai menua diri:
3-20 Paros - 2,172 iku
Sepatiah - 372 iku
Arah - 775 iku
Pahat-moap (peturun Jesua enggau Joap) - 2,812 iku
Elam - 1,254 iku
Sattu - 945 iku
Sakai - 760 iku.
Bani - 642 iku
Bebai - 623 iku
Asgat - 1,222 iku
Adonikam - 666 iku
Bikbai - 2,056 iku
Adin - 444 iku
Atir (mega dikumbai Hesekiah) - 98 iku
Besai - 312 iku
Jorah - 112 iku
Hasum - 223 iku
Gibar - 95 iku
21-35 Peturun orang ke udah diau ba nengeri tu mega pulai baru:
Betlehem - 123 iku
Netopah - 56 iku
Anatot - 128 iku
Asmabet - 42 iku
Kiriat Jearim, Chepirah, enggau Be-erot - 743 iku
Ramah enggau Geba: 621 iku.
Mikmas - 122 iku
Betel enggau Ai - 223 iku
Nebo - 52 iku
Makbis - 156 iku
Elam - 1,254 iku
Harim - 320 iku
Lot, Hadit, enggau Ono - 725 iku
Jeriko - 345 iku
Senaah - 3,630 iku
36-39 Tu bala raban peturun ke pulai baru ari menua bukai:
Jedaiah (peturun Jesua) - 973 iku
Imer - 1,052 iku
Pasur - 1,247 iku
Harim - 1,017 iku
40-42 Raban peturun orang Lewi ke pulai baru ari menua bukai:
Jesua enggau Kadmiel (peturun Hodabiah) - 74 iku
Penebah musik (peturun Asap) - 128 iku
Orang ke nyaga langkau sembiang (peturun Salum, Atir, Talmon, Akup, Hatita, enggau Sobai) - 139 iku
43-54 Raban peturun orang ke gawa dalam Rumah Sembiang ke pulai baru ari menua bukai:
Siha, Hasupa, Tabaot,
Keros, Siaha, Padon,
Lebanah, Hagabah, Akup,
Hagap, Samlai, Hanan,
Gidil, Gahar, Reaiah,
Resin, Nekoda, Gasam,
Usa, Paseah, Besai,
Asnah, Meunim, Nepisim,
Bakbuk, Hakupa, Harhur,
Baslut, Mehida, Harsa,
Barkos, Siseria, Temah,
Nesiah, Hatipa.
55-57 Raban peturun bala ulun Solomon ke pulai baru ari menua bukai:
Sotai, Hasoperet, Peruda,
Jaalah, Darkon, Gidel,
Sepatiah, Hatil, Pocheret-hasebaim, enggau Ami
58 Pemayuh semua raban peturun orang ke gawa dalam Rumah Sembiang enggau bala peturun ulun Solomon ke pulai baru ari menua bukai: 392 iku.
59-60 Enam ratus lima puluh dua iku orang ari raban peturun Delaiah, Tobiah, enggau Nekoda pulai baru ari nengeri Tel-melah, Tel-harsa, Cherub, Addan enggau Immer; tang sida enda ulih nelesaika diri peturun orang Israel.
61-62 Tu nama raban peturun imam ti nadai surat kena nerangka nama orang ke nurunka sida: Habaiah, Hakos, enggau Barsilai. (Siku aki ini raban bansa imam Barsilai udah bebini ngambi siku indu ari raban peturun Barsilai ari Giliat, lalu udah ngangkatka nama raban peturun mentua iya ti lelaki.) Laban sida enda ulih nerangka sapa orang ke nurunka sida, nya alai sida iya enda diterima nyadi imam.
63 Tuan gabenor menua Judah madahka sida enda tau makai pemakai ti diberi ngagai Allah Taala, seagi-agi sida nadai imam ti tau ngena Urim enggau Tumim.
64-67 Pemayuh orang ke udah dibuai ngagai menua Babilon, lalu pulai baru ngagai menua diri nya 42,360 iku.
Ulun ti lelaki enggau ti indu - 7,337
Orang lelaki enggau orang indu ke tukang nebah musik - 200 iku
Kuda - 736 iku
Penakan-keledai - 245 iku
Unta - 435 iku
Keledai - 6,720 iku.
68 Lebuh orang ke udah dibuai ngagai menua Babilon datai ba Rumah Sembiang di Jerusalem, sekeda tuai peturun meri pemeri nitihka peneka ati diri kena nulung begagaka Rumah Sembiang nya baru, ba endur asal iya.
69 Sida meri utai naka ti ulih diberi sida kena ngereja pengawa nya, lalu penyampau utai nya bulih 500 kilogram emas, 2,800 kilogram pirak, enggau 100 lambar baju panjai imam.
70 Bala imam, bala orang Lewi, enggau sekeda orang mayuh lalu ngentapka diri di Jerusalem, tauka semak Jerusalem. Bala orang ke tukang nebah musik, bala orang ke nyaga Rumah Sembiang, enggau orang ke bekereja dalam Rumah Sembiang ngentapka diri ba nengeri semak Jerusalem. Lalu orang Israel ti bukai ngentapka diri ba nengeri ti udah diuan aki ini sida kelia.
 
Bagi 3
Pengawa Besembahka Allah Taala Berengkah Baru
1 Dalam bulan ti ketujuh, semua orang Israel bela udah ngentapka diri magang ba nengeri diri empu. Udah nya semua sida lalu begempuru di Jerusalem,
2 lalu Jesua anak Josadak, enggau sida imam ti bukai, enggau Serubabel anak Sealtiel, enggau kaban belayan iya, lalu ngaga alta Allah Taala baru, ngambika sida ulih nunu piring ba alta nya nitihka atur ti ditulis dalam Adat Moses.
3 Taja pen orang ke pulai nya takutka orang ke diau di menua nya, sida ngaga alta nya ba endur asal iya. Udah nya sida belabuh baru nunu piring tiap pagi, lemai ba alta nya.
4 Sida ngintu Gawai Belangkau nitihka atur. Genap hari sida ngenjuk piring ti diguna ke sehari nya.
5 Nambahka nya, sida ngenjuk piring tunu segala baka selama, enggau piring ti diberi lebuh Gawai Anak Bulan, enggau ba semua gempuru besai alai TUHAN disembah, sereta enggau semua piring ti diserahka ngagai TUHAN nitihka peneka ati diri.
6 Taja pen sida apin belabuh ngaga Rumah Sembiang nya baru, sida belabuh ngenjuk piring tunu ngagai TUHAN berengkah ba hari ti keterubah dalam bulan ti ketujuh.
 
Rumah Sembiang Digaga Baru
7 Orang mayuh lalu meri duit kena ngaji tukang batu enggau tukang kayu, sereta meri pemakai, utai ti diirup, enggau minyak kana ti deka dikirumka ngagai nengeri Tire enggau Sidon kena nyilih kayu sidar ari menua Lebanon. Kayu nya deka dibai nengah tasik ngagai Jopa. Semua utai tu dikereja nitihka pemendar ari Raja Besai Sairus menua Persia.
8 Nya alai dalam bulan ti kedua, kedua taun sida udah pulai ngagai endur asal Rumah Sembiang di Jerusalem, sida lalu belabuh gawa. Serubabel, Jesua, enggau semua orang mayuh ti bukai, bala imam, enggau orang Lewi, iya ti bendar, semua orang ke udah kena buai ngagai menua Babilon, lalu udah pulai baru ngagai Jerusalem, bela enggau gawa magang. Semua orang Lewi ke umur dua puluh taun ke atas bela diasuh nyadi tuai ngereja pengawa begagaka Rumah Sembiang nya baru.
9 Orang Lewi ke benama Jesua enggau bala anak lelaki iya, sereta enggau kaban belayan iya, enggau Kadmi-el enggau bala anak lelaki iya (raban peturun Hodabiah) sama nguluka orang mayuh begagaka Rumah Sembiang nya baru. (Sida ditulung orang Lewi ari raban peturun Henadat.)
10 Lebuh bala tukang belabuh nudukka batu pemun Rumah Sembiang, bala imam ke ngena baju panjai, mai terumpit lalu ngambi endur diri, lalu orang Lewi ari raban peturun Asap bediri dia mai bebendai sida. Sida muji TUHAN nitihka atur ti udah diberi ngagai sida kenyau ari maya Raja David menya.
11 Sida belagu muji TUHAN, ngelembungka pangan diri ngena genteran tu: “TUHAN endang manah, lalu pengerindu iya ke Israel endang meruan belama iya.” Semua orang manjung enggau pengabis penginggar nyawa sida muji TUHAN, laban pengawa nudukka batu pemun Rumah Sembiang nya udah berengkah.
12 Imam ke tuai agi umur, orang Lewi, enggau tuai peturun endang udah meda Rumah Sembiang ti dulu menya, lalu lebuh sida meda batu pemun Rumah Sembiang didudukka, sida lalu bekeduie sereta beterauh nyabak. Tang orang bukai ke dia manjung gaga ati.
13 Nadai orang nemu bagi munyi panjung gaga ati enggau munyi sabak, laban sida inggar amat, datai ke sida nyau ulih didinga berapa batu ari endur nya.
 
Bagi 4
Orang Nagang Pengawa Ngaga Rumah Sembiang
1 Lebuh munsuh orang Judah enggau Benjamin ninga berita orang ke udah dibuai nya udah pulai baru lalu begagaka Rumah TUHAN Allah Taala ke disembah orang Israel,
2 sida lalu betemu enggau Serubabel enggau bala tuai peturun, lalu bejaku, “Awakka kami enggau kita ngaga Rumah Sembiang tu. Kami pen nyembah Allah Taala ti disembah kita, lalu kami udah ngenjuk piring ngagai Iya sekumbang Raja Besai Esar-hadon menua Asiria udah ngasuh kami kitu lalu diau ditu.”
3 Serubabel, Josua, enggau bala tuai peturun lalu madahka ngagai sida, “Kami enda begunaka tulung ari kita begagaka Rumah Sembiang ke TUHAN Allah Taala kami. Kami empu deka ngaga Rumah Sembiang nya, nitihka asuh Raja Besai Sairus menua Persia.”
4 Udah nya orang ke nguan menua nya lalu nguji nagang sereta ngemba orang Judah ngambika sida enda berani ngaga Rumah Sembiang nya.
5 Sida mega nyuap bala pemesai orang Persia ngambika sida nagang pengawa orang Judah nya, lalu sida majak ngereja nya sekumbang Raja Besai Sairus megai perintah, nyentuk ngagai maya perintah Raja Besai Darius.
 
Orang Nagang Pengawa Nirika Nengeri Jerusalem
6 Lebuh Raja Besai Serses baru berengkah megai perintah, bala munsuh orang ke diau di menua Judah enggau di Jerusalem lalu nulis surat bedawaka sida.
7 Lebuh Raja Besai Artaserses menua Persia megai perintah, Bislam, Mitredat, Tabeel, enggau pangan sida mega nulis surat ngagai raja besai. Surat nya ditulis ngena jaku orang bansa Aram lalu enda tau enda disalin lebuh surat nya dibacha.
8 Rehum ti nyadi gabenor, enggau Simsai, ti nyadi kerani ke sitak menua Judah, mega nulis surat tu ngagai Raja Besai Artaserses pasal Jerusalem:
9 “Ari Gabenor Rehum, ari Simsai, kerani ke sitak menua Judah, ari pangan seduai iya, ari bala hakim, enggau ari semua bala pemesai ti bukai, ke asal ari Erek, Babilon, enggau Susa di menua Elam,
10 sereta enggau orang bukai ti udah dipindahka Asurbanipal ke besai sereta bekuasa ari menua sida, lalu diasuh ngentapka diri di nengeri Samaria enggau ba endur bukai di Barat Eupratis.”
11 Surat nya munyi tu: “Ngagai Raja Besai Artaserses, ari bala nembiak iya ti diau di sitak di Barat Eupratis.
12 Kami deka madahka ngagai nuan Tuan Raja pasal orang Judah ke datai ari menua bukai ti dipegai nuan. Sida udah ngentapka diri di Jerusalem, lalu benung nirika baru nengeri ti jai sereta angkat ngelaban nya. Sida udah belabuh ngaga dinding kuta ke nengeri nya baru, lalu deka nembuka pengawa nya enda lama da agi.
13 Tuan Raja, enti nengeri tu digaga baru, lalu dinding kuta tembu digaga, orang tu deka badu agi mayar chukai, lalu penatai belanja nuan deka kurang.
14 Nya alai, laban kami ngasaika diri berutang-budi ketegal pemanah nuan enggau kami, Tuan Raja, kami enggai meda utai tu nyadi, nya alai kami madahka pekara tu ngagai Tuan Raja,
15 ngambika nuan meri atur ngasuh orang mansik semua utai ti udah ditulis bala aki ini nuan. Enti nuan mansik utai nya, nuan deka nemu nengeri tu endang seruran ngelaban, lalu kenyau ari kelia menya nengeri tu endang mai pengachau ngagai bala raja enggau ngagai orang ke merintah ba mayuh bengkah sitak menua. Orang ke diau di nengeri tu endang seruran mar diperintah. Nya kebuah nengeri tu dirusak.
16 Kami madahka ngagai Tuan Raja, enti nengeri tu digaga baru, lalu dinding kuta tembu, nuan Tuan Raja enda ulih agi merintah di Barat Eupratis tu.”
17 Raja besai lalu ngirumka saut tu: “Ngagai Gabenor Rehum, Simsai, kerani ke sitak menua, enggau ngagai bala pangan seduai iya ti diau di Samaria enggau ba endur bukai di Barat Eupratis, tabi.
18 “Surat ti dikirumka kita udah disalin lalu udah dibacha di mua aku.
19 Aku udah ngasuh utai nya dipansik, lalu utai nya endang amat. Kenyau ari kelia menya, Jerusalem endang seruran angkat ngelaban kuasa raja, lalu nengeri nya endang penuh laban orang ke seruran angkat ngelaban, sereta ngaga pengachau.
20 Raja ke bekuasa udah merintah di nengeri nya, lalu udah merintah di serata sitak di Barat Eupratis, begumpulka chukai enggau duit pupu.
21 Nya alai kita enda tau enda meri atur nagang orang nya begagaka nengeri nya baru, nyentuk ngagai maya aku meri atur baru.
22 Kereja utai tu enggau naka penyampat, enggai ke perintah aku dituntung penusah.”
23 Lebuh surat ari Raja Besai Artaserses nya dibacha di mua Rehum, Simsai, enggau bala pangan seduai iya, sida lalu beguai-guai mansang ngagai Jerusalem, lalu mejalka orang Judah badu agi ngaga nengeri nya baru.
 
Pengawa Ngaga Rumah Sembiang Belabuh Baru
24 Pengawa begagaka Rumah Sembiang udah diketuka, lalu enda dipajakka agi nyentuk ngagai taun ti kedua Raja Besai Darius megai perintah di menua Persia.
 
Bagi 5
1 Ba urung maya nya dua iku nabi, Hagai, enggau Sekariah anak Ido, belabuh bejaku dalam nama Allah Taala ke disembah orang Israel, ngagai orang Judah ti diau di menua Judah enggau di Jerusalem.
2 Lebuh Serubabel anak Sealtiel enggau Jesua anak Josadak ninga jaku nabi dua iku nya, sida lalu belabuh nirika Rumah Sembiang baru di Jerusalem, disaup nabi ke dua iku nya.
3 Tatenai ti nyadi gabenor di Barat Eupratis, Setar Bosenai, enggau pemesai ti bukai mansang ngagai Jerusalem, lalu kemaya nya nanya, “Sapa ngemendarka kita ngaga Rumah Sembiang tu lalu ngaga perengka ke Rumah tu?”
4 Sida mega minta nama semua orang ke nulung ngaga Rumah Sembiang nya.
5 Tang Allah Taala ngemataka bala tuai orang Judah, lalu bala pemesai orang Persia mutuska penemu enda ngereja utai ngagai bala tuai orang Judah nya, sebedau sida nulis surat ngagai Raja Besai Darius lalu nerima saut ari iya.
6 Baka tu ku munyi utai ti ditulis sida ngagai raja besai:
7 “Ngagai Raja Besai Darius, awakka nuan merintah dalam pemaik.
8 Kami deka madahka ngagai Tuan Raja, pasal kami ke udah bejalai ngagai sitak menua Judah, lalu nemu Rumah Sembiang ke Allah Taala ti Besai benung digaga ari batu, enggau ngena batang pengerat ti ditebuk ngagai dinding. Pengawa nya benung dikereja enggau bejimat, lalu mansang belama.
9 Udah nya kami nanya ngagai bala tuai orang mayuh, minta sida madahka ngagai kami, sapa ke meri sida kuasa ngaga Rumah Sembiang nya baru, sereta ngaga pekekas ke Rumah nya.
10 Kami mega minta sida madahka nama sida, ngambika kami ulih madahka ngagai nuan sapa ti nyadi tuai ngereja pengawa nya.
11 Ku sida nyaut, ‘Kami tu nembiak Allah Taala ti merintah di serega enggau di dunya, lalu kami ngaga Rumah Sembiang tu baru laban Rumah tu udah digaga sereta disikap dulu menya ulih siku raja ti bekuasa ke megai perintah di menua Israel.
12 Tang laban aki ini kami udah ngeringatka ati Allah Taala ti di serega, nya alai Iya nejuka sida dialahka Raja Nebukadnesar menua Babilon, siku raja ke datai ari peturun raja menua Kaldea. Rumah Sembiang nya dirusak, lalu orang ari bansa kami dibuai ngagai menua Babilon.
13 Udah nya, dalam taun ti keterubah Raja Sairus merintah nyadi raja besai di menua Babilon, Sairus meri atur ngasuh Rumah Sembiang tu digaga baru.
14 Iya mulaika pekekas emas enggau pekekas pirak ti dikena dalam Rumah Sembiang nya, ti udah ditabanka Nebukadnesar ari Rumah Sembiang nya di Jerusalem, lalu udah diengkah iya dalam rumah sembiang di Babilon. Raja Besai Sairus udah nyerahka pekekas nya ngagai siku orang ke benama Sesbasar, ti udah diletak iya nyadi gabenor menua Judah.
15 Raja Besai ngasuh Sesbasar mai utai nya lalu mulaika utai nya ngagai Rumah Sembiang di Jerusalem, lalu ngaga Rumah Sembiang nya baru ba endur asal iya.
16 Nya alai Sesbasar datai lalu nudukka batu pemun ke Rumah Sembiang nya. Pengawa begagaka Rumah Sembiang nya lalu majak dikereja nyentuk ngagai diatu, tang pengawa nya apin tembu.
17 Nya alai, enti Tuan Raja besetuju, awakka orang diasuh mansik utai ti udah ditulis bala raja di menua Babilon, ngambika nemu enti Raja Besai Sairus amat udah ngasuh Rumah Sembiang tu digaga baru. Udah nya, padahka ngagai kami utai ti diasuh nuan kereja kami ba pasal pekara tu.”
 
Bagi 6
Atur Raja Besai Sairus Ditemu
1 Raja Besai Darius lalu ngasuh orang mansik utai ti udah ditulis dalam cherita bala raja ti disimpan di menua Babilon.
2 Tang utai ti udah ditulis nya ditemu di nengeri Ekbatana di sitak menua Media. Utai nya ditulis dalam siti gulung surat. Baka tu ku munyi utai nya ditulis:
3 “Dalam taun ti keterubah Raja Besai Sairus megai perintah, iya ngasuh Rumah Sembiang digaga baru di Jerusalem nyadika endur alai ngenjuk piring enggau nunu piring. Peninggi Rumah Sembiang nya enda tau enda 20 meter, lalu buka iya 27 meter.
4 Dinding iya enda tau enda digaga ari selapis kayu enggau tiga lapis batu. Semua ungkus deka dibayar ari sarang reta raja.
5 Perengka emas enggau pirak ti udah dibai Raja Nebukadnesar ngagai menua Babilon ari Rumah Sembiang di Jerusalem enda tau enda dipulaika baru ngagai endur asal iya dalam Rumah Sembiang di Jerusalem.”
 
Raja Besai Darius Ngasuh Pengawa Nya Dipajakka
6 Udah nya Raja Besai Darius nyaut munyi tu: “Ngagai Tatenai gabenor di Barat Eupratis, Setar Bosenai, enggau bala pemesai bukai di Barat Eupratis; Anang semak Rumah Sembiang nya,
7 lalu anang ngachau pengawa begagaka Rumah Sembiang nya. Awakka gabenor menua Judah enggau bala tuai orang Judah ngaga Rumah Sembiang Allah Taala nya baru, ba endur asal iya.
8 Ngena surat tu aku ngasuh kita nulung sida ngaga Rumah Sembiang nya baru. Ungkus ti dikena sida enda tau enda lengkas dibayar ngena duit perintah, ti diterima ari chukai di Barat Eupratis, ngambika pengawa nya enda tejanggal ngapa.
9 Tiap hari kita enda tau enda meri bala imam di Jerusalem sebarang utai ti dipeguna sida: anak sapi ti lelaki, bedus, tauka anak domba ti deka ditunu nyadika piring ngagai Allah Taala ti di serega, tauka gandum, garam, wain, tauka minyak kana.
10 Utai tu enda tau enda dikereja ngambika sida ulih ngenjuk piring ti ngerinduka ati Allah Taala ti di serega, lalu besampi minta berekat ari Iya ke aku, enggau ke bala anak aku.
11 Aku mega madahka ngagai kita, enti orang ngelanggar atur tu, sebatang kayu pengerat deka dichabut ari rumah sida, dilancham, lalu ditumbukka ngagai tubuh sida. Lalu rumah sida deka digaga nyadi tugung uras.
12 Awakka Allah Taala ti udah milih Jerusalem nyadika endur alai Iya disembah, muai sebarang raja tauka bansa ti ngelaban atur tu, lalu nguji ngerusak Rumah Sembiang nya. Aku, Darius, udah meri atur tu. Atur aku tu enda tau enda dititihka magang.”
 
Rumah Sembiang Diserahka Ngagai Allah Taala
13 Udah nya gabenor Tatenai, Setar Bosenai, enggau bala pemesai ti bukai lalu nitihka jaku raja besai.
14 Bala tuai orang Judah jampat amat ngaga Rumah Sembiang nya. Sida diperansang nabi Hagai enggau nabi Sekariah. Sida tembu ngaga Rumah Sembiang nya nitihka jaku Allah Taala ke disembah orang Israel enggau atur Sairus, Darius, enggau Artaserses, bala raja besai menua Persia.
15 Sida tembu ngaga Rumah Sembiang nya kena tiga hari bulan Adar dalam taun ti keenam Raja Besai Darius megai perintah.
16 Udah nya orang Israel, iya nya bala imam, bala orang Lewi, enggau semua orang ke udah dibuai ngagai menua Babilon, lalu diatu udah pulai baru ngagai menua sida empu, nyerahka Rumah Sembiang nya ngagai Allah Taala enggau ati ti gaga.
17 Kena sida nyerahka Rumah Sembiang nya, sida meri 100 iku sapi ti lelaki, 200 iku bedus, enggau 400 iku anak domba nyadika piring, enggau 12 iku kambin nyadika piring pengampun dosa, siku ke siti-siti raban bansa orang Israel.
18 Sida mega ngatur bala imam enggau orang Lewi ngereja pengawa dalam Rumah Sembiang di Jerusalem, nitihka atur dalam bup Moses.
 
Gawai Paska
19 Orang ke udah pulai baru ari menua Babilon ngintu Gawai Paska kena empat belas hari bulan ti kesatu dalam taun ti nangkanka nya.
20 Semua bala imam enggau orang Lewi bela nuchi diri magang, lalu semua sida nyadi tuchi. Orang Lewi nyayat jelu nyadika piring Gawai Paska ke semua orang ke udah pulai ari menua Babilon, ke bala imam, enggau ke sida empu.
21 Piring nya diempa semua orang Israel ti udah pulai ari menua Babilon, enggau semua orang ke udah ngelengkaka jalai orang kapir ti nguan menua nya lalu datai nyembah TUHAN Allah Taala ke disembah orang Israel.
22 Tujuh hari sida ngerami Gawai Roti Ti Enda Beragi enggau ati ti gaga. Sida balat gaga ati laban TUHAN udah ngasuh raja besai menua Asiria kasihka sida, datai ke nyau nyukung pengawa sida ke begagaka Rumah Sembiang Allah Taala ke disembah orang Israel.
 
Bagi 7
Esra Datai Di Jerusalem
1 Nyau betaun-taun udah bekau nya, lebuh Artaserses nyadi raja besai menua Persia, bisi orang siku benama Esra anak Seraiah, anak Asariah, anak Hilkiah,
2 anak Salum, anak Sadok, anak Ahitup,
3 anak Amariah, anak Asariah, anak Meraiot,
4 anak Serahiah, anak Usi, anak Buki,
5 anak Abisua, anak Pinehas, anak Eleasar, anak Aron.
6-7 Esra nya orang ke bepelajar, ti bepenemu-dalam pasal Adat TUHAN ti udah diberi Allah Taala ke disembah orang Israel ngagai Moses. Laban Esra diberekatka TUHAN Allah Taala iya, raja besai meri iya semua utai ti dipinta iya. Dalam taun ti ketujuh Artaserses megai perintah, Esra angkat ari menua Babilon mansang ngagai Jerusalem enggau seraban orang Israel, nyengkaum bala imam, orang Lewi, bala orang ke nebah musik dalam Rumah Sembiang, orang ke nyaga Rumah Sembiang, enggau bala orang ke gawa.
8-9 Sida angkat ari Babilon kena satu hari bulan ti kesatu. Ari tulung Allah Taala, sida datai di Jerusalem kena satu hari bulan ti kelima.
10 Esra udah nyerahka diri belajarka Adat TUHAN, nitihka Adat nya dalam pengidup iya, sereta ngajar semua adat enggau atur ari Adat nya ngagai orang Israel.
 
Surat Ti Diberi Raja Besai Artaserses Ngagai Esra
11 Raja Besai Artaserses meri surat tu ngagai Esra, ti nyadi imam sereta bepelajar ba pasal Adat enggau pesan ti udah diberi TUHAN ngagai orang Israel:
12 “Ari Raja Besai Artaserses ngagai imam Esra, ti landik pasal Adat Allah Taala ti di serega.
13 Aku meri atur ngagai semua orang Israel, ngagai sida imam, enggau orang Lewi ti diau di serata menua ti dipegai aku, ngasuh sida mupuk sama enggau nuan mansang ngagai Jerusalem, enti sida deka.
14 Aku enggau tujuh iku penyanding penemu aku, ngasuh nuan mansik gaya utai di Jerusalem, enggau di menua Judah, ngambika aku nyamai nemu enti Adat Allah Taala nuan, ti udah diserahka ngagai nuan, dititihka.
15 Nuan enda tau enda mai emas enggau pirak nyadika pemeri ti deka diberi aku enggau bala penyanding penemu aku, ngagai Allah Taala ke disembah orang Israel, ke bempu Rumah Sembiang di Jerusalem.
16 Nuan enda tau enda mega mai semua pirak enggau emas ti udah digumpul nuan di serata sitak menua Babilon, enggau pemeri ti diberi orang Israel enggau bala imam sida ke Rumah Sembiang Allah Taala sida di Jerusalem.
17 Nuan enda tau enda ngena duit tu enggau bejimat, lalu meli sapi ti lelaki, bedus ti lelaki, anak domba, gandum, enggau wain lalu meri utai nya ba alta dalam Rumah Sembiang di Jerusalem.
18 Nuan tau nguna pirak enggau emas ti laluh kena begagaka sebarang utai ti dikedekaka nuan enggau bala nembiak nuan, nitihka peneka Allah Taala nuan.
19 Nuan enda tau enda nyerahka ngagai Allah Taala di Jerusalem semua pekekas ti udah diberi ngagai nuan ngambika bisi dikena ngereja pengawa dalam Rumah Sembiang.
20 Enti nuan agi begunaka utai bukai kena ngereja pengawa dalam Rumah Sembiang nya, nuan tau ngambi utai nya ari sarang reta raja.
21 Aku ngasuh semua pemesai ke bekereja ngemataka sarang reta raja di Barat Eupratis, meri enggau jampat ngagai Imam Esra ti landik pasal Adat Allah Taala ti di serega, semua utai ti dipinta iya,
22 tang enda tau lebih ari 3,400 kilogram pirak, 10,000 kilogram gandum, 2,000 liter wain, 2,000 liter minyak kana, enggau ni penyampau garam ti diguna.
23 Kita enda tau enda bejimat meri semua utai ti diguna Allah Taala ti di serega ke Rumah Sembiang Iya. Kita enda tau enda nentuka Iya enda ringat ngagai aku tauka ringat ngagai orang ke merintah nangkanka aku.
24 Kita enda tau ngumpul chukai ari bala imam, orang Lewi, orang ke nebah musik, jejaga, orang ke gawa, tauka sebarang orang bukai ke bekereja dalam Rumah Sembiang.
25 Nuan, Esra, ngena penemu-dalam ti udah diberi Allah Taala ngagai nuan, enda tau enda ngeletak orang ke bejalaika pengawa perintah enggau nyadi hakim ngambika sida bisi merintah semua orang ke diau di Barat Eupratis, ti diau nitihka Adat Allah Taala nuan. Nuan enda tau enda ngajar Adat nya ngagai sebarang orang ke enda nemu Adat nya.
26 Enti orang enda ngasika Adat Allah Taala nuan, tauka adat perintah menua, sida enda tau enda diukum tekala nya: ngena ukum bunuh, tauka dibuai ngagai menua bukai, tauka reta tengkira sida dirampas, tauka sida ditutup dalam rumah jil.”
 
Esra Muji Allah Taala
27 Ku Esra bejaku, “Puji TUHAN Allah Taala aki ini kitai! Iya udah ngasuh raja besai meri basa ngagai Rumah Sembiang di Jerusalem.
28 Ulih pengasih Allah Taala, raja besai, bala penyanding penemu iya, enggau semua bala pemesai iya ke bekuasa, udah bebasaka aku. TUHAN Allah Taala aku udah meri aku pemerani, lalu aku ulih mujuk mayuh bala tuai peturun orang Israel pulai enggau aku.”
 
Bagi 8
Orang Ke Udah Dibuai Pulai Baru
1 Tu nama bala tuai peturun ti udah dibuai ngagai menua Babilon, lalu pulai baru enggau Esra ngagai Jerusalem lebuh maya Artaserses nyadi raja besai:
2-14 Gersom ari raban peturun Pinehas
Daniel, ari raban peturun Itamar
Hatus anak Sekaniah, ari raban peturun David
Sekariah, ari raban peturun Paros, sama enggau 150 bala raban bansa iya (nama aki ini sida bisi dituliska magang)
Eliehoenai anak Serahiah, ari raban peturun Pahat Moap, sama enggau 200 bala iya
Sekaniah anak Jahasiel, ari raban peturun Satu, sama enggau 300 iku bala iya
Ebet anak Jonatan, ari raban peturun Adin, sama enggau 50 iku bala iya
Jesaiah anak Ataliah, ari raban peturun Elam, sama enggau 70 iku bala iya
Sebadiah anak Mikael, ari raban peturun Sepatiah, sama enggau 80 iku bala iya
Obadiah anak Jehiel, ari raban peturun Joap, sama enggau 218 bala iya
Selomit anak Josipiah, ari raban peturun Bani, sama enggau 160 iku bala iya
Sekariah anak Bebai, ari raban peturun Bebai, sama enggau 28 iku bala iya
Jonatan anak Hakatan, ari raban peturun Asgat, sama enggau 110 iku bala iya
Elipelet, Jeuel, enggau Semaiah, ari raban peturun Adonikam, sama enggau 60 iku bala sida (sida pulai dudi ari sida bukai)
Utai seduai Sakur, ari raban peturun Bikbai, enggau 70 iku bala sida.
 
Esra Ngiga Orang Lewi Gawa Dalam Rumah Sembiang
15 Aku lalu ngempuruka semua bala sida ba tebing sungai  ti rarat mansa nengeri Ahaba, lalu kami diau ba kem dia tiga hari. Aku bisi tetemuka bala imam dalam raban nya, tang nadai tetemuka orang Lewi.
16 Aku lalu mesanka semilan iku bala tuai, iya nya Elieser, Ariel, Semaiah, Elnatan, Jarip, Elnatan, Natan, Sekariah, enggau Mesulam, enggau dua iku pengajar, Joiarip seduai Elnatan.
17 Aku ngasuh sida betemu enggau Ido, ti nyadi tuai di Kasipia, minta iya enggau bala iya, iya nya orang ke bekereja dalam Rumah Sembiang, ngirumka orang ngambika bisi bekereja ke Allah Taala dalam Rumah Sembiang.
18 Ulih pengasih Allah Taala, sida ngirumka Serebiah ngagai kami. Serebiah tu orang ke landik ngereja utai, orang Lewi ari raban peturun Mahli. Lapan belas iku bala anak lelaki enggau sida menyadi lelaki iya datai enggau iya.
19 Sida mega ngirumka Hasabiah seduai Jesaiah ari raban peturun Merari, enggau 20 iku kaban belayan seduai iya.
20 Nambahka nya, 220 iku peturun orang ke udah bekereja dalam Rumah Sembiang bisi mega datai. Aki ini sida tu udah diletak Raja David enggau bala pemesai iya dulu menya nulung orang Lewi. Nama sida nya bisi dituliska magang.
 
Esra Nguluka Orang Mayuh Bepasa Sereta Besampi
21 Ba tebing Sungai Ahaba aku lalu ngasuh semua bala kami bepasa sereta ngemaruhka diri di mua Allah Taala kitai lalu besampi minta Iya nguluka kami bejalai, sereta nyaga kami, nyaga anak kami enggau semua reta tengkira kami.
22 Aku malu minta raja besai meri kami bala soldadu ke nepan kuda nyaga kami ari munsuh lebuh kami di rantau jalai, laban aku udah madahka ngagai iya Allah Taala kitai deka merekatka semua orang ke manggaika pengarap sida ba Iya, tang enda rindu sereta deka ngukum orang ke ninggalka Iya.
23 Nya alai kami bepasa sereta besampi ngagai Allah Taala minta iya nyaga kami, lalu Iya nyaut sampi kami.
 
Pemeri Ke Rumah Sembiang
24 Aku lalu milih Serebiah, Hasabiah, enggau sepuluh iku imam ti bukai ari bala imam ke dibasa orang mayuh.
25 Udah nya aku nimbang pirak, emas enggau pekekas ti udah diberi raja besai, bala penyanding penemu iya, enggau bala pemesai, enggau diberi orang Israel ngambika bisi dikena dalam Rumah Sembiang. Aku lalu meri utai nya ngagai bala imam.
26-27 Tu utai ti diberi aku ngagai sida:
Pirak - 25 meterik ton
Seratus iti pekekas pirak - 70 kilogram
Emas - 3,400 kilogram
Dua puluh igi mangkuk emas - 8.4 kilogram
Mangkuk temaga ti alus, ti sama rega enggau mangkuk emas
28 Ku aku bejaku ngagai sida, “Kita tu orang ke kudus di mua TUHAN Allah Taala aki ini kita, lalu baka nya mega semua pekekas pirak enggau pekekas emas ti udah dibai ngagai Iya nyadika pemeri ti diberi nitihka peneka ati diri.
29 Jaga utai tu enggau manah nyentuk ngagai maya kita datai ba Rumah Sembiang. Timbang utai nya dalam bilik imam, lalu serahka semua utai nya ngagai bala tuai imam, enggau ngagai bala tuai orang Lewi, enggau ngagai bala tuai orang Israel di Jerusalem.”
30 Bala imam enggau orang Lewi lalu nerima pekekas pirak enggau pekekas emas, lalu mai utai nya ngagai Rumah Sembiang di Jerusalem.
 
Pulai Ngagai Jerusalem
31 Kami angkat ari Sungai Ahaba kena dua belas hari bulan ti kesatu, lalu mansang ngagai Jerusalem. Allah Taala kitai bisi enggau kami, lalu nyaga kami ari munsuh, enggau ari ipa orang di rantau jalai.
32 Lebuh kami datai di Jerusalem, kami lalu belelak tiga hari.
33 Udah nya ba hari ti keempat, kami lalu mansang ngagai Rumah Sembiang, nimbang pirak, emas, enggau pekekas, lalu nyerahka utai nya ngagai imam Meremot anak Uriah. Orang ke sama enggau iya nya Eleasar anak Pinehas, enggau dua iku orang Lewi ke benama Josabat anak Jesua enggau Noadiah anak Binui.
34 Semua utai diitung, ditimbang, lalu dituliska tekala nya.
35 Semua orang ke udah pulai ari menua Babilon, mai piring ti deka ditunu nyadika piring ti diberi ngagai Allah Taala ke disembah orang Israel. Sida meri 12 iku sapi ti lelaki ke semua orang Israel, 96 iku bedus ti lelaki, enggau 77 iku anak domba. Sida mega meri 12 iku kambin kena muai dosa ari sida empu. Semua jelu tu ditunu magang nyadika piring ti diberi ngagai TUHAN.
36 Sida mega ngambi surat ti diberi raja besai, lalu meri surat nya ngagai bala tuan gabenor enggau bala pemesai di Barat Eupratis, ke lalu nyukung orang mayuh sereta nyukung pengawa besembahka Allah Taala dalam Rumah Sembiang.
 
Bagi 9
Esra Dipadahka Pasal Orang Judah Ke Jadi Enggau Orang Bansa Bukai
1 Lebuh semua utai nya udah tembu dikereja, sekeda bala tuai orang Israel datai lalu madahka ngagai aku pasal orang mayuh, bala imam, enggau orang Lewi ti enda nyeraraka diri ari orang di menua ti ngelingi sida, iya nya orang ari menua Amon, Moap, enggau menua Ejip, tauka orang Kanaan, orang Iti, orang Peris, orang Jebus, enggau orang Amor. Sida ngereja penyai baka ke dikereja orang bansa bukai.
2 Lelaki orang Judah jadi enggau indu orang bansa bukai. Nya ngamahka nembiak Allah Taala ti kudus. Orang ke balat ngereja pengawa nya, iya nya bala tuai enggau bala pemesai.
3 Lebuh aku ninga nya, aku lalu nyarikka baju aku, ngugut buk enggau ragum aku, lalu nudukka diri laban ati aku balat tusah.
4 Aku duduk dia tusah ati nyentuk ngagai maya ngenjuk piring lemai hari. Orang lalu belabuh bekelingika aku, iya nya semua orang ke nyau takut ketegal utai ti udah disebut Allah Taala ke disembah orang Israel pasal dosa orang ke udah pulai ari menua Babilon.
5 Lebuh maya ngenjuk piring lemai nya, aku lalu angkat ari endur alai aku ti udah balat tusah ati, agi mengkang ngena gari ti udah dicharikka aku, besugang besampi, lalu ngangkatka jari aku ngagai TUHAN Allah Taala aku.
6 Ku aku, “O Allah Taala, aku kelalu malu ngangkatka pala aku di mua Nuan. Dosa kami nyau betugung tinggi agi ari pala kami. Dosa kami nyau bedunjung nyentuk ke langit.
7 Kenyau ari maya aki ini kami kelia nyentuk ngagai diatu, kami ke nembiak Nuan, udah balat bedosa. Ketegal dosa nya, kami empu, bala raja kami, enggau bala imam kami udah alah laban raja menua bukai, lalu kami udah dibunuh, dirumpak, lalu ditabanka nyadi orang tangkap. Kami udah balat amat dipechat nyentuk ngagai sehari tu.
8 Tang diatu, O TUHAN Allah Taala kami, Nuan udah kasihka kami, taja pen enda lama, lalu Nuan udah ngasuh sekeda bala kami rari ari ti nyadi ulun, lalu ngasuh kami diau likun ba endur ti kudus tu. Nuan udah nejuka kami rari ari pengidup kami ke nyadi ulun, lalu udah meri kami pengidup ti baru.
9 Suba kami endang ulun, tang taja pia, Nuan enda ninggalka kami. Nuan udah ngasuh raja besai menua Persia rinduka kami lalu ngemendarka kami majak idup lalu ngaga Rumah Sembiang Nuan baru, ti udah nyadi tembawai, lalu ngasuh kami diau likun di menua Judah enggau di Jerusalem.
10 “Tang diatu, O Allah Taala, baka ni ku kami ulih bejakuka utai ti udah nyadi? Kami enda ngasi baru ke pesan
11 ti udah diberi Nuan ngagai kami nengah bala nembiak Nuan, iya nya sida nabi. Sida udah madahka menua ti deka diempu kami nya menua ti enda tuchi, laban orang ke diau di menua nya udah ngisi serata menua nya enggau kereja ti jai sereta kamah.
12 Sida nabi udah madahka kami enda tau jadi melaki-bini enggau bansa orang nya, lalu enda tau sekali-kali nulung sida ngulihka pengaya tauka ngasuh sida mujur, enti kami deka diau lantang di menua tu, lalu nyerahka menua tu ngagai peturun kami belama iya.
13 Indah lebuh kami udah diukum ketegal dosa enggau penyalah kami, deh kami nemu Nuan, ti Allah Taala kami, udah ngukum kami kurang agi ari ti patut, lalu udah ngemendarka kami idup.
14 Nya alai, baka ni ku kami enggai mendingka pesan Nuan baru, ke nagang kami jadi melaki-bini enggau bansa orang ke jai tu? Enti kami ngereja nya, Nuan tetap deka balat ringat lalu munuh semua kami, datai ke nadai siku kami agi idup.
15 TUHAN Allah Taala ke disembah orang Israel, Nuan endang lurus, tang Nuan udah nejuka kami idup. Kami ngaku penyalah kami ngagai Nuan. Kami enda patut datai di mua Nuan.”
 
Bagi 10
Atur Madamka Pengawa Belaki Bebini Enggau Orang Bansa Bukai
1 Lebuh Esra benung meremi besampi di mua Rumah Sembiang, nyabak sereta ngaku dosa, mayuh orang Israel - ti lelaki, indu, enggau bala anak mit - begempuru ngelingi iya, balat amat nyabak.
2 Udah nya Sekaniah anak Jehiel, ari raban peturun Elam, bejaku enggau Esra, “Kami udah enda ngasika Allah Taala laban kami udah jadi enggau indu bansa bukai. Tang taja pia, orang Israel agi bisi pengadang.
3 Diatu kitai enda tau enda besumpah ngaga semaya enggau Allah Taala kitai, madahka kitai deka muai sida indu tu enggau bala anak sida. Kami deka nitihka ajar nuan, enggau ajar orang bukai ke bebasaka jaku Allah Taala. Kami deka nitihka Adat Allah Taala.
4 Nuan endang betanggungjawap ngereja utai tu. Kami nyukung nuan. Nya alai, pajak lalu tembuka pengawa nuan.”
5 Esra lalu berengkah ngasuh bala tuai imam, tuai orang Lewi, enggau semua orang Israel ti bukai besumpah deka ngereja utai ti disebut Sekaniah.
6 Udah nya Esra angkat ari mua Rumah Sembiang lalu tama ngagai rumah Jehohanan anak Eliasip, lalu bemalam dia tusah ati ngira orang ke pulai ari menua bukai udah enda tetap ati ngagai TUHAN. Iya nadai makai, nadai ngirup.
7 Pesan lalu dikirumka ngagai serata nengeri Jerusalem enggau serata menua Judah, minta semua orang ke udah pulai ari menua bukai, begempuru di Jerusalem
8 nitihka atur bala tuai orang mayuh. Enti orang bisi enda datai dia dalam kandang tiga hari, semua reta tengkira sida deka dirampas, lalu sida nadai agi hak nyadi raban orang Israel.
9 Berengkah ari dua puluh hari bulan ti kesemilan, dalam kandang tiga hari, semua lelaki ti diau di menua Judah enggau menua Benjamin datai di Jerusalem, lalu begempuru ba padang ti di mua Rumah Sembiang. Hari bangat amat ujan, lalu ketegal nya, enggau ketegal pemesai guna gempuru nya, semua orang nyau digak-digak magang laban chelap.
10 Imam Esra bediri, lalu bejaku ngagai sida. Ku iya, “Kita udah enda tetap ati ngagai TUHAN, lalu udah ngasuh penyalah ninggang orang Israel, laban kita udah jadi enggau indu bansa bukai.
11 Nya alai, diatu kita enda tau enda ngaku dosa kita ngagai TUHAN Allah Taala aki ini kita, lalu ngereja utai ti ngerinduka ati Iya. Kita enda tau enda nyeraraka diri ari orang bansa bukai ke diau di menua kitai, lalu muai bini kita ke orang bansa bukai.”
12 Orang mayuh lalu nyaut enggau nyawa ti inggar, “Kami deka ngereja sebarang utai ti diasuh nuan.”
13 Tang ku sida nambahka jaku sida, “Bala kitai tu kelalu mayuh, lalu ujan tu kelalu bangat. Kami enda ulih bediri ditu. Pekara tu ukai utai ti ulih ditembuka kitai dalam sehari dua, laban kami mayuh amat udah kena laban dosa tu.
14 Awakka bala pemesai ti diau di Jerusalem mutarka pekara tu. Udah nya awakka semua orang ke jadi enggau indu bansa bukai, betemu enggau bala tuai enggau bala hakim ari nengeri sida empu, ba maya ti diletak. Nya jalai kitai nyeliahka pengeringat Allah Taala ba pekara tu.”
15 Nadai orang nyakal penemu nya, kelimpah ari Jonatan anak Asahel enggau Jahseiah anak Tikbah ke disukung Mesulam enggau siku orang Lewi ke benama Sabetai.
16 Orang ke udah pulai ari menua bukai, nerima atur nya. Nya alai imam Esra lalu milih lelaki ari bala tuai peturun, nuliska nama sida. Kena satu hari bulan ti kesepuluh, sida lalu belabuh mansik pekara nya,
17 lalu dalam kandang tiga bulan udah bekau nya, sida mansik semua lelaki ke jadi enggau indu bansa bukai.
 
Lelaki Ke Jadi Enggau Indu Bansa Bukai
18 Tu nama lelaki ke jadi enggau indu bansa bukai: Imam, ditusun nitihka raban peturun:
Ari raban peturun Josua enggau sida menyadi lelaki iya ke anak lelaki Jehosadak: Maseiah, Elieser, Jarip, enggau Gedaliah.
19 Sida besemaya deka muai bini sida, lalu sida meri siku bedus ti lelaki nyadika piring pengampun dosa sida.
20 Ari raban peturun Imer: Hanani seduai Sebadiah
21 Ari raban peturun Harim: Maseiah, Elijah, Semaiah, Jehiel, enggau Usiah
22 Ari raban peturun Pasur: Elioenai, Maseiah, Ismail, Netanel, Josabat, enggau Elasah
23 Orang Lewi Josabat, Simei, Kelaiah (kedua bali nama Kelita), Petahiah, Judah, enggau Elieser
24 Orang ke tukang nebah music: Eliasip
Orang ke nyaga Rumah Sembiang: Salum, Telem, enggau Uri
25 Sida ke bukai Raban peturun Paros: Ramiah, Isiah, Malkijah, Mijamin, Eleasar, Malkijah, enggau Benaiah
26 Ari raban peturun Elam: Mataniah, Sekariah, Jehiel, Apdi, Jerimot, enggau Elijah
27 Ari raban peturun Satu: Elioenai, Eliasip, Mataniah, Jerimot, Sabat, enggau Asisa
28 Ari raban peturun Bebai: Jehohanan, Hananiah, Sabai, enggau Atlai
29 Ari raban peturun Bani: Mesulam, Maluk, Adaiah, Jasup, Sil, enggau Jerimot
30 Ari raban peturun Pahat Moap: Adna, Chelal, Benaiah, Maseiah, Mataniah, Besalel, Binui, enggau Manasi
31-32 Ari raban peturun Harim: Elieser, Isijah, Malkijah, Semaiah, Simeon, Benjamin, Maluk, enggau Semariah
33 Ari raban peturun Hasum: Matenai, Matatah, Sabat, Elipelet, Jeremai, Manasi, enggau Simei
34-37 Ari raban peturun Bani: Madai, Amram, Uil, Benaiah, Bedeiah, Cheluhi, Baniah, Meremot, Eliasip, Mataniah, Matenai, enggau Jasu
38-42 Ari raban peturun Binui: Simei, Selemiah, Natan, Adaiah, Meknadebai, Sasai, Sarai, Asarel, Selemiah, Semariah, Salum, Amariah, enggau Josep
43 Ari raban peturun Nebo: Jeiel, Matitiah, Sabat, Sebina, Jadai, Joel, enggau Benaiah

44 Semua orang lelaki tu udah bela jadi enggau indu orang bansa bukai. Sida muai bini sida, lalu muru sida sama enggau bala anak sida.