2 BANSA ISRAEL
 
Jaku Pemuka
Bup 2 Bansa Israel* nampung bup  1 Bansa Israel*. Bup tu nusui pasal perintah Raja Solomon, pasal raban bansa ke di utara angkat ngelaban perintah, diuluka Jeroboam ngelaban Rehoboam, anak lelaki Raja Solomon ke nganti iya nyadi raja, enggau jerita lama pasal perintah menua Judah, nyentuk ngagai maya Jerusalem alah dalam taun ti kelima ratus lapan puluh enam sebedau pengada Jesus.
 
Ripih Isi Bup Tu
Perintah Solomon (1.1-9.31)
     a. Taun ti keterubah (1.1-17)
     b. Rumah Sembiang digaga (2.1-7.10)
     c. Taun udah bekau nya (7.11-9.31)
 Raban Bansa ke di utara angkat ngelaban perintah (10.1-19)
 Raja menua Judah (11.1-36.12)
 Jerusalem alah (36.13-23)
 
Bagi 1
Raja Solomon Besampi Minta Penemu-dalam (1 Raja 3.1-15)
1 Solomon anak Raja David negapka diri megai perintah, lalu TUHAN Allah Taala merekatka iya, lalu ngasuh iya balat bekuasa.
2 Raja Solomon meri pesan ngagai semua pemesai ti nyadi tuai ke seribu iku soldadu, nyadi tuai ke seratus iku, semua pemesai perintah, semua tuai bilik, enggau semua orang mayuh ti bukai,
3 ngasuh sida bejalai enggau iya ngagai endur alai besembiang di Gibeon. Sida mansang ngagai Gibeon laban Langkau Kain TUHAN, ti udah digaga Moses di menua puang, bisi dia.
4 (Tang Peti Lampang Batu Adat di Jerusalem, disimpan dalam langkau kain ti udah didirika Raja David lebuh iya mai Peti nya ari Kiriat-jearim.)
5 Alta temaga ti udah digaga Besalel anak Uri, uchu Hur, bisi mega di Gibeon di mua Langkau Kain TUHAN ti Pemadu Tinggi. Solomon enggau semua orang mayuh lalu nyembah TUHAN dia.
6 Raja ngenjuk piring ba alta temaga ti ba Langkau Kain TUHAN kena iya nyembah TUHAN. Iya ngasuh orang munuh seribu iku jelu lalu nunu jelu nya segala ba alta nya.
7 Malam nya Allah Taala pegari di mua Solomon, lalu bejaku ngagai iya, “Pinta ari Aku sebarang utai ti dikedekaka nuan.”
8 Ku Solomon nyaut, “Nuan seruran ngayanka pengerindu ti besai ngagai apai aku David, lalu diatu Nuan udah ngasuh aku nganti iya nyadi raja.
9 O TUHAN Allah Taala, awakka Nuan ngamatka semaya ti udah digaga Nuan enggau apai aku. Nuan udah ngasuh aku nyadi raja megai orang ke ngemayuh tu datai ke sida nyau enda ulih diitung agi.
10 Nya alai, beri aku penemu-dalam enggau pemandai kena aku merintah sida. Enti enda, baka ni ku aku ulih merintah bala nembiak Nuan ti kering tu?”
11 Ku Allah Taala nyaut Solomon, “Nuan udah milih utai ti ngena. Nuan nadai minta pengaya tauka reta tengkira, tauka nama ti tebilang, tauka minta munsuh nuan dibunuh, tauka minta umur diri panjai, tang nuan udah minta penemu-dalam enggau pemandai ngambika nuan ulih merintah bala nembiak Aku ti udah diasuh Aku ibun nuan.
12 Aku deka meri ngagai nuan penemu-dalam enggau pemandai. Lalu nambahka nya, Aku deka meri nuan mayuh agi pengaya, reta tengkira, lalu ngasuh nuan lebih agi tebilang ari semua raja bukai ke dulu tauka dudi agi ari nuan.”
 
Kuasa Enggau Pengaya Raja Solomon (1 Raja 10.26-29)
13 Solomon lalu ninggalka endur alai besembiang di Gibeon, alai Langkau Kain TUHAN ti bediri, lalu pulai ngagai Jerusalem. Iya megai perintah di menua Israel ari Jerusalem.
14 Iya ngempuruka 1,400 buah kerita perang, enggau 12,000 iku kuda perang. Sekeda sida nya diengkah iya di Jerusalem, lalu sida ti bukai diengkah iya ba mayuh bengkah nengeri bukai.
15 Lebuh iya megai perintah, pirak enggau emas mayuh amat di Jerusalem, datai ke sida nyau baka utai ngapa, lalu kayu sidar nyau ngemayuh kayu sikamur ba kaki bukit di menua Judah.
16 Kuda Raja Solomon dibeli iya ari menua Ejip enggau ari Kue; orang ke bedagang ngarika raja meli kuda nya ari Kue ngena rega ti dikena lebuh maya nya.
17 Sida meli kerita perang ari menua Ejip, lalu udah nya nyual kerita perang nya ngagai raja orang Iti enggau raja bansa Aram ngena rega 600 singkap duit pirak ke sebuah kerita. Sida nyual siku kuda ngena rega 150 singkap duit pirak.
 
Bagi 2
Sedia Deka Ngaga Rumah Sembiang (1 Raja 5.1-18)
1 Raja Solomon lalu mutuska runding deka ngaga Rumah Sembiang, enggau ngaga sebuah istana ke iya empu.
2 Iya ngasuh 70,000 iku orang ngangkut barang kena ngaga rumah nya, enggau 80,000 iku ningkuh batu ba menua ti bebukit, dikemataka 3,600 iku mandur.
3 Solomon ngirumka pesan tu ngagai Raja Hiram di Tire: “Dulu menya nuan bekaul enggau apai aku David, lalu nuan ngirumka kayu sidar ngagai iya kena iya ngaga rumah iya empu.
4 Aku diatu baru deka ngaga sebuah Rumah Sembiang kena ngemesaika TUHAN Allah Taala aku. Rumah nya deka nyadi endur ti kudus alai bala nembiak aku enggau aku empu nyembah TUHAN, betunuka menyan ti digaga ari rempah ti bebau rengut, endur alai kami deka seruran meri roti ti kudus nyadika piring kami, ngenjuk piring tunu genap pagi lemai, enggau lebuh Hari Sabat, lebuh Gawai Anak Bulan, enggau ba mayuh bengkah hari ti kudus kena kami ngemesaika TUHAN Allah Taala kami, munyi ti udah diasuh TUHAN kereja orang Israel belama iya.
5 Aku deka ngaga Rumah Sembiang ti besai, laban Allah Taala kami besai agi kuasa ari petara bukai.
6 Tang iya ti bendar, nadai orang ulih ngaga rumah ke Allah Taala. Indah semua langit luar deh enda ulih ngundan Iya. Nya alai, Rumah Sembiang ti deka digaga aku nya semina nyadi endur alai betunuka menyan ke Allah Taala.
7 Nya alai kirumka ngagai aku siku orang ke landik ngukir, landik bekereja ngena emas, pirak, temaga, enggau besi, landik begagaka kain ti biru, ungu enggau mirah. Iya deka bekereja sama enggau bala tukang tempa ti udah dipilih apai aku ari menua Judah enggau ari Jerusalem.
8 Aku nemu bala nuan endang landik beramu. Nya alai, kirumka lumpung kayu sidar, saipris, enggau juniper ari Lebanon. Aku sedia deka ngirumka bala aku nulung bala nuan
9 nyendiaka kayu ramu enggau naka pemayuh, laban Rumah Sembiang ti deka digaga aku nya besai sereta manah tukuh.
10 Aku deka ngirumka bekal ke bala nuan: 2,000 tan gandum, 2,000 tan barli, 400,000 liter wain, enggau 400,000 liter minyak kana.”
11 Raja Hiram lalu ngirumka saut iya ngagai Solomon. Ku iya nulis, “Laban TUHAN rinduka bala nembiak Iya, Iya udah ngasuh nuan nyadi raja sida.
12 Pujika TUHAN Allah Taala ke disembah orang Israel ti udah ngaga langit enggau dunya! Iya udah meri ngagai Raja David anak ti bepenemu-dalam, ke penuh laban pemereti ati enggau pengelandik, ke bekira deka ngaga sebuah Rumah Sembiang TUHAN, enggau sebuah istana ke iya empu.
13 Aku ngirumka ngagai nuan siku tukang besi ke pandai sereta landik. Nama iya Huram.
14 Indai iya ari raban bansa Dan, lalu apai iya endang asal ari nengeri Tire. Iya nemu begagaka utai ari emas, pirak, temaga, ari besi, batu enggau ari kayu. Iya nemu begagaka utai ari kain ti biru, ungu enggau kain ti mirah, enggau ari linin. Iya nemu ngaga sebarang macham ukir, lalu ulih nitihka sebarang pelan ti diasuh titihka iya. Awakka iya sama bekereja enggau bala nuan ti landik, sereta enggau bala orang ke udah bekereja ke apai nuan, Raja David.
15 Nya alai, kirumka kitu gandum, barli, wain, enggau minyak kana ti udah disemaya nuan.
16 Kami deka nebang ba Bukit Lebanon semua kayu sidar ti dipeguna nuan, ngaga kayu nya nyadi akit, lalu beraratka akit nya nengah tasik nyentuk ngagai Jopa. Ari nya nuan tau mai kayu nya ngagai Jerusalem.”
 
Pengawa Begagaka Rumah Sembiang Berengkah (1 Raja 6.1-38)
17 Raja Solomon ngitung tubuh semua orang bansa bukai ke diau di menua Israel, baka ke udah dikereja apai iya David. Pemayuh orang bansa bukai ke diau di menua nya: 153,000 iku.
18 Tujuh puluh ribu iku ari bala sida nya diasuh iya ngangkut barang kena begagaka Rumah Sembiang, 80,000 iku ningkuh batu ba bukit, lalu ngasuh 3,600 nyadi mandur ngambika pengawa nya mujur dikereja.
 
Bagi 3
1 Nyadi Raja David, apai Solomon, udah nyendiaka endur alai Rumah Sembiang nya deka didirika. Endur nya di Jerusalem, ba Bukit Moriah, alai TUHAN ti udah pegari di mua David, ba endur ti udah alai Araunah, orang Jebus, ngindik gandum. Raja Solomon belabuh ngaga Rumah Sembiang nya
2 ba bulan ti kedua dalam taun ti keempat iya udah nyadi raja.
3 Pemanjai Rumah Sembiang ti digaga Raja Solomon nya 27 meter, lalu buka iya 9 meter.
4 Bilik penama nya sebaka enggau pemesai buka Rumah Sembiang nya empu, 9 meter, lalu peninggi iya 54 meter. Dinding bilik nya disampak enggau emas ti tulin.
5 Dinding bilik besai dilapis ngena kayu sidar, lalu disampak enggau emas ti alus, ti udah diukir neladan kayu engkerema enggau rantai.
6 Raja Solomon ngelagu Rumah Sembiang nya ngena batu ti berega, enggau ngena emas ti dibeli ari menua Parbaim.
7 Emas nya dikena iya nyampak dinding Rumah Sembiang, kasau, pintu penama, enggau pintu. Tukang ukir ngukir ba dinding nya gambar bala melikat cherub ti besayap.
8 Bilik ti di dalam, ti dikumbai Endur ti Pemadu Kudus, nya panjai 9 meter lalu buka iya 9 meter, iya nya sebaka enggau pemesai buka Rumah Sembiang empu. Dua puluh lima tan emas dikena nyampak dinding Endur ti Pemadu Kudus;
9 enggau 570 gram emas dikena ngaga paku lawang. Dinding sadau mega disampak enggau emas.
10  Raja mega ngasuh bala orang ke gawa ke iya ngaga ari besi dua iku melikat cherub ti besayap, nyampak seduai nya enggau emas, lalu ngengkahka seduai iya dalam Endur ti Pemadu Kudus,
11-13 alai seduai iya ke bediri berimbai nunga ngagai pintu penama. Siku-siku seduai nya bisi dua iti sayap. Pemanjai siti-siti sayap nya 2.2 meter. Sayap seduai iya dikerembaika lalu besatup puting ba tengah-tengah bilik nya, lalu puting sepiak nuntung ngagai dinding, meraka bilik ti buka 9 meter nya.
14 Tirai ke Endur ti Pemadu Kudus digaga ari kain linin enggau ari utai bukai, ti udah disamak ngena samak ti biru, ungu, enggau mirah, lalu gambar bala melikat cherub ti besayap disulamka ba tirai nya.
 
Tiang Temaga Dua Iti Ti Besai(1 Raja 7.15-22)
15 Raja Solomon ngasuh orang ngaga dua iti tiang ti besai. Peninggi siti-siti tiang nya 15.5 meter, lalu didirika di mua Rumah Sembiang. Siti-siti tiang nya bisi tutup, lalu peninggi tutup nya 2.2 meter.
16 Tutup tiang ti besai dua iti nya dilagu ngena ukir gamal rantai ti dianyam, enggau seratus igi buah delima ti digaga ari temaga.
17 Tiang besai dua iti nya didirika ba tisi penama ngagai Rumah Sembiang. Tiang besai ti ba tisi ari selatan nya diberi nama Jachin  lalu tiang ti besai ti ba tisi utara nya diberi nama Boas.
 
Bagi 4
Pekekas Rumah Sembiang (1 Raja 7.23-51)
1 Raja Solomon ngasuh orang ngaga siti alta temaga, 9 meter besegi, lalu peninggi iya 4.5 meter.
2 Iya mega ngaga, ari temaga, sigi tangki ti segala, penalam 2.2 meter, buka 4.4 meter, lalu sakap iya 13.2 meter.
3 Ngelingi tisi tangki nya ari luar bisi dua iti rintai ukir ti beranggung dua. Ukir nya digaga neladan gamal sapi ti lelaki, lalu digaga ari temaga ti dikena ngaga tangki nya empu.
4 Tangki nya diengkah ba atas belakang dua belas iku sapi ti lelaki ti digaga ari temaga, ti nunga ke luar, tiga nunga ke utara, tiga nunga ke barat, tiga nunga ke selatan lalu tiga nunga ke timur.
5 Penebal dinding tangki nya 75 milimeter. Lilit tisi tangki nya baka lilit tisi mangkuk, melebir ke luar baka kuntum bungai. Tangki nya ulih ngundan kira 60,000 liter.
6 Sida mega ngaga sepuluh iti bisin, lima deka diengkah ba tisi selatan Rumah Sembiang, lalu lima ba tisi ti muak ke utara. Bisin nya dikena masu perengka tubuh jelu ti deka ditunu nyadika piring. Ai ti dalam tangki nya dikena bala imam masu diri.
7-8 Sida ngaga sepuluh iti penuduk lampu ari emas nitihka gamal ti selama, enggau sepuluh iti mija, lalu ngengkahka utai nya dalam bilik besai Rumah Sembiang, lima iti penuduk lampu enggau lima iti mija ba siti-siti tisi. Sida mega ngaga seratus igi mangkuk emas.
9 Sida ngaga siti tengah laman ti di dalam ke bala imam, enggau tengah laman ti di luar. Pintu ti ba lubang pintu ti nyeraraka tengah laman dua iti nya disampak enggau temaga.
10 Tangki nya diengkah semak sukut ti muak ke timur selatan.
11-16 Huram mega ngaga periuk, sandak, enggau mangkuk. Nitihka semaya iya enggau Raja Solomon, tu bagi semua utai ti tembu digaga iya ke Rumah Sembiang:
Tiang besai ti dua batang
Tutup tiang ti baka mangkuk ba puchuk tiang ti dua batang nya
Ukir rantai ti dianyam, ti ba siti-siti tutup tiang
Empat ratus igi buah delima ti digaga ari temaga ti ditusun berintai dua ngelingi ukir ti ba tutup tiang siti-siti
Sepuluh buah kerita tarit
Sepuluh iti bisin
Tangki
Dua belas iku sapi ti lelaki alai manggaika tangki nya
Periuk, sandak enggau serampang
Huram, ke endang amat landik begagaka utai, ngaga semua utai nya ari temaga magang, nitihka jaku Raja Solomon. Semua utai nya deka dikena dalam Rumah Sembiang.
17 Raja ngasuh semua utai nya digaga ba endur alai orang ke ngeluluhka besi ba entara Sukot enggau Seredah ba Lebak Jordan.
18 Mayuh amat utai digaga, datai ke orang nyau enggai agi kiruh ngira pemayuh temaga ti dikena.
19 Raja Solomon mega ngasuh pekekas emas digagaka Rumah Sembiang: alta enggau mija alai engkah roti ti diberi ngagai Allah Taala;
20 penuduk lampu, enggau lampu, ari emas ti alus. Lampu nya deka menyadi di mua Endur ti Pemadu Kudus nitihka atur;
21 ukir bungai, lampu, enggau penyepit;
22 pekekas kena madamka api, mangkuk, pinggai alai engkah menyan, enggau talam kena mai bara api. Semua utai tu digaga ari emas ti tulin magang. Pintu luar ke Rumah Sembiang, enggau pintu ngagai Endur ti Pemadu Kudus disampak enggau emas magang.
 
Bagi 5
1 Lebuh Raja Solomon udah nembuka semua pengawa begagaka Rumah Sembiang, iya lalu nyimpan dalam bilik setor Rumah Sembiang semua utai ti udah diserahka apai iya David ngagai TUHAN, iya nya pirak, emas enggau utai bukai.
 
Peti Lampang Batu Adat Dibai Ngagai Rumah Sembiang (1 Raja 8.19)
2 Udah nya Raja Solomon mesanka semua tuai raban bansa enggau tuai peturun orang Israel ngasuh sida begempuru di Jerusalem, deka mindahka Peti Lampang Batu Adat TUHAN ari Sion, Nengeri David, ngagai Rumah Sembiang.
3 Semua sida begempuru lebuh maya Gawai Belangkau.
4 Lebuh semua bala tuai udah sampal datai, bala orang Lewi lalu nanggung Peti Lampang Batu Adat TUHAN
5 lalu ngesan iya ngagai Rumah Sembiang. Bala imam enggau orang Lewi mega mindahka Langkau Kain TUHAN, enggau semua pekekas dia ngagai Rumah Sembiang.
6 Raja Solomon enggau semua orang Israel begempuru di mua Peti Lampang Batu Adat nya, lalu meri mayuh amat jelu bedus enggau jelu sapi nyadika piring, datai ke jelu nya nyau enda ulih diitung agi.
7 Udah nya bala imam lalu ngesan Peti Lampang Batu Adat nya ngagai Rumah Sembiang, lalu ngengkahka iya dalam Endur ti Pemadu Kudus, di baruh dua iku melikat cherub ti besayap.
8 Sayap melikat cherub dua iku nya dikerembaika mungkur Peti nya, enggau kayu ti dikena ngaling iya.
9 Puting kayu nya ulih dipeda orang ke bediri di mua Endur ti Pemadu Kudus, tang enda ulih dipeda ari endur bukai. (Kayu ti dikena ngesan Peti nya agi bisi dia datai ke sehari tu.)
10 Peti Lampang Batu Adat nya nadai ngundan utai bukai tang semina dua iti lampang batu ti udah diengkah Moses dalam Peti nya ba Bukit Sinai, lebuh TUHAN ngaga sempekat enggau bala nembiak Iya orang Israel, lebuh sida pansut ari menua Ejip.
 
Mulia Allah Taala
11-14 Semua imam ke bisi dia, enda milih raban, bela udah nuchi diri empu magang. Semua orang Lewi ke nebah musik, iya nya, Asap, Heman, Jedutun, enggau semua raban peturun sida, sama ngena kain linin magang. Bala orang Lewi bediri semak tisi timur alta nya mai bebendai enggau belikan. Sama enggau sida nya bisi 120 iku bala imam ke nyepu terumpit. Bala orang ke belagu nya diumba ngena munyi terumpit, bebendai, enggau pekekas musik ti bukai, lebuh sida belagu muji TUHAN: “Pujika TUHAN, laban Iya endang manah, lalu pengerindu Iya meruan belama iya.”
Lebuh bala imam angkat ari Rumah Sembiang nya, Rumah nya lalu ngenyit penuh laban mua hari ti beperenching laban penampak mulia TUHAN, lalu sida enda ulih nampung pengawa sida ke nyembah TUHAN.
 
Bagi 6
Solomon Bejaku Enggau Orang Mayuh(1 Raja 8.12-21)
1 Udah nya Raja Solomon besampi, “TUHAN, Nuan rindu diau dalam mua hari enggau pemetang.
2 Diatu aku udah ngaga sebuah rumah ti manah ke Nuan, alai Nuan diau belama iya.”
3 Semua orang bela bediri dia. Raja nguing ngagai sida, lalu minta Allah Taala merekatka sida.
4 Ku iya bejaku, “Pujika TUHAN Allah Taala ke disembah orang Israel! Iya udah ngamatka semaya ti udah digaga Iya enggau apai aku David lebuh Iya bejaku munyi tu,
5 ‘Kenyau ari maya Aku udah mai bala nembiak Aku pansut ari menua Ejip nyentuk ngagai diatu, Aku apin milih nengeri di menua Israel nyadi endur alai sebuah rumah deka digaga, alai kita deka nyembah Aku, lalu Aku apin milih sapa orang ke deka nguluka nembiak Aku Israel.
6 Tang diatu Aku udah milih Jerusalem nyadi endur alai kita deka nyembah Aku, lalu nuan, David, deka merintah bala nembiak Aku.’ “
7 Lalu ku Solomon nampung jaku iya, “Apai aku David udah bekira deka ngaga sebuah rumah alai nyembah TUHAN Allah Taala ke disembah orang Israel,
8 tang ku TUHAN bejaku ngagai iya, ‘Ati nuan ti deka ngaga rumah ke Aku endang ngena,
9 tang ukai nuan ti deka ngaga rumah nya. Anak nuan, anak nuan empu, deka ngaga rumah Aku.’
10 “Diatu TUHAN udah ngamatka semaya Iya. Aku udah nganti apai aku nyadi raja menua Israel, lalu aku udah ngaga sebuah rumah alai nyembah TUHAN Allah Taala ke disembah orang Israel.
11 Aku udah ngengkahka dalam Rumah Sembiang Peti Lampang Batu Adat ti ngundan lampang batu sempekat ti udah digaga TUHAN enggau orang Israel.”
 
Sampi Solomon (1 Raja 8.22-53)
12 Udah nya, di mua orang mayuh, Solomon mansang lalu bediri di mua alta, ngangkatka jari iya lalu besampi.
13 (Solomon udah ngaga siti panggau temaga, lalu udah ngengkahka panggau nya ba tengah laman. Panggau nya 2.2 meter besegi, enggau 1.3 meter peninggi. Iya niki ngagai panggau nya, besugang di mua semua orang mayuh, lalu ngangkatka jari iya tunga ke langit.)
14 Ku iya besampi, “TUHAN Allah Taala ke disembah orang Israel, nadai petara ti baka Nuan di langit enggau di dunya. Nuan ngamatka semaya Nuan enggau bala nembiak Nuan, lalu ngayanka pengerindu Nuan ke sida, lebuh sida diau ngasika Nuan enggau pengabis ati sida.
15 Nuan udah ngamatka semaya ti udah digaga Nuan enggau apai aku David. Sehari tu semua leka jaku semaya nya udah dikamatka magang.
16 Nya alai, TUHAN Allah Taala ke disembah orang Israel, kamatka meh semaya ti udah digaga Nuan enggau apai aku lebuh Nuan madahka siku ari peturun iya deka seruran merintah nyadi raja orang Israel, enti iya bejimat ngasika Adat Nuan, baka David empu.
17 Nya alai diatu, TUHAN Allah Taala ke disembah orang Israel, awakka semua utai ti udah disemaya Nuan enggau nembiak Nuan David, dikamatka magang.
18 “Tang kati Nuan, O TUHAN, amat ulih diau di dunya tu begulai enggau orang lelaki enggau indu? Indah semua langit deh enda ulih ngundan Nuan, nya alai baka ni ku Rumah Sembiang tu ulih ngundan Nuan?
19 TUHAN Allah Taala aku, aku tu nembiak Nuan. Pendingka sampi aku, lalu beri utai ti dipinta aku ari Nuan.
20 Ibun Rumah Sembiang tu siang malam. Nuan udah besemaya madahka Diri deka disembah ba endur tu, nya alai dingaka aku lebuh aku ngadap ngagai Rumah Sembiang tu lalu besampi.
21 Dingaka sampi aku enggau sampi bala nembiak Nuan orang Israel, lebuh sida ngadap ngagai endur tu lalu besampi. Dingaka kami ari rumah Nuan ti di serega, lalu ampun kami.
22 “Lebuh orang kena dawa ngereja penyalah, lalu dibai ngagai alta Nuan dalam Rumah Sembiang tu, alai sida deka besumpah madahka diri nadai penyalah,
23 pendingka sida ari serega, O TUHAN, lalu akim meh bala nembiak Nuan. Ukum meh orang ke salah, nitihka pematut, lalu lepaska orang ke nadai penyalah.
24 “Lebuh bala nembiak Nuan orang Israel alah laban munsuh, laban sida udah bedosa ngelaban Nuan, lalu udah nya, lebuh sida nguingka diri ngagai Nuan, lalu datai ngagai Rumah Sembiang tu, sereta ngemaruhka diri besampi minta nuan ngampun sida,
25 pendingka sida ari serega. Ampun dosa sida, lalu bai sida pulai baru ngagai menua ti udah diberi Nuan ngagai aki ini sida.
26 “Lebuh Nuan nagang hari ujan laban bala nembiak Nuan udah bedosa ngelaban Nuan, lalu udah nya, lebuh sida nesal ati lalu ngadap ngagai Rumah Sembiang tu, sereta ngemaruhka diri besampi ngagai Nuan,
27 pendingka sida ari serega, O TUHAN, lalu ampun dosa sida orang Israel, lalu ajar sida ngereja utai ti ngena. Udah nya, O TUHAN, asuh hari ujan di menua Nuan tu, ti udah diberi Nuan ngagai bala nembiak Nuan nyadika pesaka sida belama iya.
28 “Lebuh lapar pungkang nyadi di menua tu, tauka penyakit, tauka utai ti ditanam rusak laban ribut ti angat, tauka rusak laban raban buntak, tauka lebuh bala nembiak Nuan diserang munsuh, tauka lebuh penyakit tauka pemedis bisi nyadi ba bala sida,
29 pendingka sampi sida. Enti bala nembiak Nuan Israel, ari ati ti balat tusah, ngangkatka jari sida besampi ngadap ngagai Rumah Sembiang tu,
30 dingaka sampi sida. Dingaka sida ari rumah Nuan di serega, lalu ampun sida. Semina Nuan siku aja ke nemu runding enggau ati mensia. Kereja utai ba kami nitihka pematut,
31 ngambika bala nembiak Nuan deka seruran nangi sereta ngasika Nuan lebuh sida diau di menua ti udah diberi Nuan ngagai aki ini sida.
32 “Lebuh orang bansa bukai ke diau di menua ti jauh, ninga pasal pemesai kuasa Nuan, enggau pasal Nuan ke seruran sedia deka nulung, lalu udah nya sida datai ngagai Rumah Sembiang tu lalu besampi,
33 pendingka sampi sida. Dingaka sida ari serega, alai Nuan ti diau, lalu kereja utai ti dipinta sida, ngambika semua orang di dunya tu nemu Nuan lalu ngasika Nuan, baka bala nembiak Nuan Israel. Nya baru sida deka nemu Rumah Sembiang ti udah digaga aku tu endang endur alai Nuan patut disembah.
34 “Lebuh Nuan ngasuh bala nembiak Nuan mansang beperang ngelaban munsuh sida, lalu sida besampi ngagai Nuan, enda milih endur alai sida, lalu sida nguing tunga ngagai nengeri ti udah dipilih Nuan tu, enggau ngagai Rumah Sembiang tu ti udah digaga aku ke Nuan,
35 pendingka sampi sida. Dingaka sida ari serega, lalu beri sida pemenang.
36 “Lebuh bala nembiak Nuan bedosa ngelaban Nuan, laban nadai siku mensia ti enda bedosa, lalu Nuan ringat lalu nejuka munsuh sida ngalahka sida, lalu nabanka sida nyadi orang tangkap ngagai menua bukai, taja pen menua nya jauh,
37 pendingka sampi sida. Enti sida nesal ati lebuh sida di menua nya, lalu besampi ngagai Nuan, ngaku dosa enggau penyai sida, dingaka sampi sida, O TUHAN.
38 Enti sida amat nesal ati lebuh sida di menua nya, lalu besampi ngagai Nuan, lalu sida nguingka mua sida tunga ngagai menua tu ti udah diberi Nuan ngagai aki ini sida, nengeri tu ti udah dipilih Nuan, enggau Rumah Sembiang tu ti udah digaga aku ke Nuan,
39 pendingka sampi sida. Dingaka sida ari rumah Nuan di serega. Kasihka sida lalu ampun semua dosa sida.
40 “Peda meh kami tu diatu, O Allah Taala aku, lalu pendingka sampi ti diberi ba endur tu.
41 Angkat meh Nuan, TUHAN Allah Taala, lalu tama ngagai Rumah Nuan, sama enggau Peti Lampang Batu Adat, lalu diau dia belama iya. Berekatka bala imam Nuan dalam semua utai ti dikereja sida, lalu awakka semua nembiak Nuan lantang laban pemadas Nuan enggau sida.
42 TUHAN Allah Taala, anang nulak raja ti udah dipilih Nuan. Kingatka pengerindu Nuan ke nembiak Nuan David.”
 
Bagi 7
Nyerahka Rumah Sembiang (1 Raja 8.62-66)
1 Lebuh Raja Solomon udah badu besampi, api lalu nurun ari langit, lalu nganguska piring ti udah diberi, lalu mulia TUHAN ngemenuhka Rumah Sembiang nya.
2 Laban Rumah Sembiang nya nyau penuh laban mulia TUHAN, bala imam enda ulih tama kia.
3 Lebuh orang Israel meda api nya nurun ari langit, lalu Rumah Sembiang nya penuh laban penampak mulia TUHAN, sida lalu nyungkurka diri ba geladak nya, nyembah Allah Taala sereta muji Iya ketegal pemanah enggau pengerindu Iya ti meruan belama iya.
4 Udah nya Solomon enggau semua orang mayuh lalu ngenjuk piring ngagai TUHAN.
5 Iya meri 22,000 iku jelu sapi enggau 120,000 iku jelu bedus nyadika piring pemaik. Nya meh chara Raja Solomon enggau semua orang mayuh nyerahka Rumah Sembiang ngagai Allah Taala.
6 Bala imam bediri ba endur ti udah diletak ke sida, betunga mua enggau bala orang Lewi, muji TUHAN ngena perengka musik ti udah diberi Raja David, lalu nyanyi siti pantun, “Pengerindu Iya meruan belama iya!” munyi ti udah diatur Raja David. Lebuh semua orang bediri, bala imam lalu nyepu terumpit.
7 Solomon lalu nyerah ngagai TUHAN puak tengah laman ti di mua Rumah Sembiang, lalu udah nya, ngenjuk piring tunu segala, piring tepung, enggau lemak ari piring pemaik, ba endur nya laban alta temaga ti udah digaga nya kelalu mit alai ngengkahka semua piring nya.
8 Solomon enggau semua orang Israel lalu ngintu Gawai Belangkau tujuh hari. Mayuh amat orang datai kenyau ari Genting Hamas di utara enggau ari garis entara menua enggau menua Ejip di selatan.
9 Sida begempuru tujuh hari nyerahka alta nya, lalu udah nya, tujuh hari da agi kena ngintu gawai. Ba hari ti pengujung sida lalu muka pengerami kena nutup gawai nya.
10 Hari siti, iya nya kena dua puluh tiga hari bulan ti ketujuh, Solomon lalu ngasuh orang mayuh pulai. Sida lantang ati ke semua berekat ti udah diberi TUHAN ngagai bala nembiak Iya orang Israel, ngagai David, enggau ngagai Solomon.
 
Allah Taala Pegari Ngagai Solomon Baru (1 Raja 9.1-9)
11 Lebuh Raja Solomon udah tembu ngaga Rumah Sembiang enggau ngaga istana, enggau semua utai ti udah diperambu iya,
12 TUHAN lalu pegari di mua iya lebuh malam hari, lalu bejaku ngagai iya, “Aku udah ninga sampi nuan, lalu Aku nerima Rumah tu nyadi endur alai orang ngenjuk piring ngagai Aku.
13 Genap kali aku nagang hari ujan, tauka ngasuh buntak makai utai ti ditanam, tauka ngasuh penyakit nyerang bala nembiak Aku,
14 enti nembiak Aku ngemaruhka diri, besampi ngagai Aku, lalu ngelengkaka jalai sida ke jai, nya baru Aku deka ninga sida ari serega, lalu ngampun dosa sida, sereta ngeraika menua sida.
15 Mata Aku deka tebuka lalu pending Aku deka mendingka sampi ti diberi ba endur tu.
16 Laban Aku udah milih sereta nguduska Rumah tu ngambika nama Aku meruan dia belama iya. Aku deka ngemataka Rumah tu lalu nyaga iya belama iya.
17 Ba pasal nuan empu, enti nuan tetap ati betuaika Aku baka apai nuan David, ngasika Adat Aku, lalu ngereja semua utai ti diasuh Aku kereja nuan,
18 nya baru Aku deka ngamatka semaya ti udah digaga Aku enggau apai nuan David, lebuh Aku madahka orang Israel ti deka seruran diperintah peturun iya.
19 Tang enti nuan enggau bala nembiak nuan enda ngasika adat enggau pesan ti udah diberi Aku ngagai nuan, lalu nuan nyembah petara bukai,
20 Aku deka muai nuan ari menua ti udah diberi Aku ngagai nuan, lalu Aku deka ninggalka Rumah tu ti udah dikuduska Aku nyadi endur alai Aku disembah. Semua orang di semua endur deka mechat Rumah tu, lalu enda bebasaka iya.
21 “Diatu Rumah Sembiang tu balat dibasa, tang lebuh maya nya ila, semua orang ke mansa deka alit ati lalu nanya, ‘Nama kebuah TUHAN ngereja utai baka tu ngagai menua tu, enggau ngagai Rumah Sembiang tu?’
22 Orang mayuh deka nyaut, ‘Laban sida udah ninggalka TUHAN Allah Taala sida, ti udah mai sida pansut ari menua Ejip. Sida udah taluk ngagai, nyembah, sereta betuaika petara bukai. Nya kebuah TUHAN udah ngasuh penusah tu ninggang sida.’ “
 
Bagi 8
Utai Ti Udah Dikereja Solomon (1 Raja 9.10-28)
1 Solomon ngaga Rumah Sembiang enggau istana dalam pengelama dua puluh taun.
2 Iya mega nirika baru nengeri ti udah diberi Raja Hiram ngagai iya, lalu ngasuh orang Israel ngentapka diri di nengeri nya.
3 Iya ngalahka menua Hamat enggau Sobah,
4 lalu nirika kuta ke nengeri Palmira di menua puang. Iya nirika baru semua nengeri di menua Hamat alai nyimpan barang.
5 Solomon mega nirika baru semua nengeri Bet-horon Ulu enggau Bet-horon Ili (nengeri ti bekuta, ti bisi pintu kuta ti ulih dikalang),
6 nengeri Baalat, semua nengeri alai iya nyimpan barang, enggau nengeri alai raban kuda enggau kerita perang iya disimpan. Iya udah bejalaika semua pelan iya ti deka ngaga rumah di Jerusalem, di Lebanon, enggau di serata menua ti diperintah iya.
7-8 Solomon mejalka semua peturun orang Kanaan bekereja ke iya. Sida tu peturun orang Kanaan ti enda dibunuh sida, lebuh sida ngerampas menua nya. Bansa orang tu nyengkaum orang Iti, orang Amor, orang Peris, orang Ibi, enggau orang Jebus. Peturun orang tu agi nyadi ulun nyentuk ngagai diatu.
9 Orang Israel nadai dipejalka ngereja pengawa ti berat, tang sida bekereja nyadi soldadu, nyadi pemesai, nyadi tuai ke orang ke nepan kerita perang, enggau nyadi soldadu ke nepan kuda.
10 Dua ratus lima puluh iku pemesai ngemataka bala ulun ke bekereja begagaka mayuh bengkah rumah nya.
11 Solomon mai bini iya, anak raja menua Ejip, pindah ari Nengeri David ngagai sebuah rumah ti digaga David ke bini iya. Ku Solomon, “Bini aku enda tau diau dalam istana David raja orang Israel, laban semua endur ti udah alai Peti Lampang Batu Adat diengkah, nyadi kudus magang.”
12 Solomon ngenjuk piring ngagai TUHAN ba alta ti udah digaga di mua Rumah Sembiang.
13 Iya ngenjuk piring tunu nitihka Adat Moses ba genap hari ti kudus, iya nya, Hari Sabat, Gawai Anak Bulan, enggau tiga bengkah gawai genap taun, iya nya Gawai Roti Ti Enda Beragi, Gawai Ngetau, enggau Gawai Belangkau.
14 Nitihka atur ti udah diletak apai iya David, iya lalu ngatur pengawa ti dikereja bala imam tiap hari, enggau pengawa orang Lewi ke nulung bala imam belagu ngena pantun, enggau ngereja pengawa sida. Iya mega ngatur raban orang ke nyaga Rumah Sembiang ngambika sida bisi ngereja pengawa nyaga pintu siti-siti, nitihka jaku David, ke nembiak Allah Taala.
15 Atur ti udah diberi David ngagai bala imam enggau ngagai orang Lewi ba pasal bilik setor enggau pasal pekara bukai, udah dikereja enggau silik.
16 Lebuh maya nya, semua projek Solomon udah tembu magang. Semua pengawa udah mujur magang dikereja, kenyau ari nudukka batu pemun nyentuk ngagai penembu Rumah Sembiang nya.
17 Udah nya Solomon lalu mansang ngagai Esion-geber enggau Elat, iya nya dua bengkah penyangkai kapal ti ba Teluk Akaba, di menua Edom.
18 Raja Hiram ngirumka ngagai Raja Solomon berapa buah kapal, dipejalaika bala pemesai enggau kelasi iya empu ke endang chukup peneleba. Sida belayar enggau bala pemesai Raja Solomon ngagai menua Opir, lalu mai ngagai Raja Solomon kira enam belas tan emas.
 
Bagi 9
Penemuai Kuin Menua Sheba(1 Raja 10.1-13)
1 Lebuh kuin menua Sheba ninga Raja Solomon tebilang bendar nama, iya lalu mansang ngagai Jerusalem deka ngabas penalam penemu Raja Solomon ngena tanya ti mar. Iya datai mai mayuh bala pengiring, enggau mayuh jelu unta ti ngundan mayuh amat rempah, batu ti berega, enggau emas. Lebuh kuin nya betemu enggau Solomon, iya lalu nanyaka semua tanya ti ba ati iya.
2 Solomon nyaut semua tanya iya. Nadai utai ti enda ulih diterangka Solomon.
3 Kuin menua Sheba ninga penemu-dalam ti disebut Solomon, sereta meda istana ti udah digaga iya.
4 Iya meda gaya pemakai Solomon, rumah alai bala pemesai iya diau, gaya atur pengawa ke bala orang ke bekereja dalam istana, enggau pekayan ti dikena sida, gaya gari ti dikena bala orang gaji ke ngintu Solomon lebuh pengerami makai besai, enggau piring ti diberi iya dalam Rumah Sembiang. Lebuh kuin nya meda semua utai nya, iya nyau enda tesintakka seput laban iya balat alit ati.
5 Ku iya bejaku enggau Raja Solomon, “Utai ti didinga aku di menua aku pasal nuan enggau pasal penalam penemu nuan, endang amat magang!
6 Aku enda arapka berita ti dipadahka sida ngagai aku, sebedau aku empu meda utai nya ke diri empu. Utai ti didinga aku nya enda bulih setengah ari penemu-dalam ti dikembuan nuan. Nuan lebih agi bepenemu-dalam ari ti ditusui orang.
7 Naka meh penguntung orang ke betuaika nuan, ke seruran begulai enggau nuan, lalu ninga penemu-dalam ti disebut nuan!
8 Pujika TUHAN Allah Taala nuan! Iya udah ngayanka pengaga ati Iya ke nuan, lalu ngaga nuan nyadi raja, ngambika nuan merintah dalam nama Iya. Laban Iya rinduka bala nembiak Iya Israel, lalu deka ngasuh sida meruan belama iya, Iya udah ngaga nuan nyadi raja, ngambika nuan bejalaika atur ti lurus sereta betul.”
9 Iya lalu meri ngagai Raja Solomon pemeri ti udah dibai iya, iya nya 5,000 kilogram emas, mayuh rempah enggau batu ti berega. Nadai rempah bukai ti lebih alus agi ari rempah ti diberi kuin menua Sheba ngagai Raja Solomon.
10 (Bala kelasi Raja Hiram enggau bala kelasi Raja Solomon ke mai emas ari Opir, mega mai kayu juniper enggau batu ti berega.
11 Solomon ngena kayu nya begagaka tangga Rumah Sembiang, istana iya, belikan enggau engkeratung ke bala orang ke nebah musik. Nadai utai baka nya bisi udah kala dipeda di menua Judah.)
12 Raja Solomon lalu meri ngagai kuin menua Sheba semua utai ti dipinta iya, nambahka utai ti udah diberi Solomon lebuh iya besilihka pemeri enggau kuin nya. Udah nya kuin nya enggau bala pengiring iya lalu mulaika diri ngagai menua Sheba.
 
Pengaya Raja Solomon(1 Raja 10.14-25)
13 Raja Solomon nerima lebih 25,000 kilogram emas tiap taun,
14 nambahka chukai ti dibayar orang ke bedagang enggau orang sedagar. Bala raja menua Arabia enggau bala tuan gabenor ke megai pelilih menua di menua Israel, mega mai pirak enggau emas ngagai iya.
15 Solomon ngaga 200 iti terabai ti besai. Genap iti terabai nya disampak enggau 7 kilogram emas ti ditempa,
16 enggau 300 iti terabai ti mit agi, ti disampak enggau kira 3.6 kilogram emas ti ditempa. Iya ngasuh semua terabai nya disimpan dalam Balai Utan Lebanon.
17 Raja mega ngasuh orang ngaga siti kerusi diraja ti besai. Sebagi ari kerusi nya disampak enggau gading, lalu sebagi ti bukai disampak enggau emas ti tulin.
18 Tangga niki ngagai kerusi diraja nya bisi enam iti tangkal, sereta bisi pelasar ti lekat ngagai kerusi nya, lalu disampak enggau emas. Kerusi nya bisi lengan, enggau anak patung singa bediri ba tisi sepiak-sepiak.
19 Tangga nya bisi dua belas iku anak patung singa, siku ba puting siti-siti tangkal tangga nya. Nadai kerusi diraja bisi baka nya di menua bukai.
20 Semua mangkuk ti dikena Raja Solomon ngirup digaga ari emas magang, lalu semua pekekas dalam Balai Utan Lebanon digaga ari emas ti tulin magang. Pirak dikira nadai rega lebuh maya Solomon menya.
21 Raja Solomon mayuh kapal ti besai, ti belayar sama enggau kapal Raja Hiram. Kapal iya pulai tiap-tiap tiga taun, mai emas, pirak, gading, nyumbuh, enggau kera.
22 Raja Solomon lebih agi kaya, sereta dalam agi penemu ari semua raja bukai di dunya tu.
23 Semua raja bukai betanya ngagai iya magang, laban sida ingin deka ningaka penemu-dalam ti udah diberi Allah Taala ngagai iya.
24 Genap iku sida bela mai pemeri ngagai Solomon. Pemeri nya nyengkaum utai ti digaga ari pirak enggau emas, baju panjai, senyata, rempah, kuda enggau keledai. Utai tu nyadi ari taun siti ngagai taun siti.
25 Raja Solomon mega bisi 4,000 bansal alai nyimpan kerita perang enggau kuda iya, lalu iya bisi 12,000 iku kuda kena beperang. Sekeda kuda nya disimpan iya di Jerusalem, lalu sida ti bukai disimpan iya ba nengeri bukai.
26 Iya bekuasa atas semua raja dalam menua nya, kenyau ari Sungai Eupratis nyentuk ngagai menua Pilistin enggau ngagai garis entara menua Ejip.
27 Lebuh iya megai perintah, pirak nyau baka utai ngapa di Jerusalem, lalu kayu sidar nyau ngemayuh kayu sikamur ti ba kaki bukit menua Judah.
28 Solomon meli kuda ari Musri enggau ari semua menua bukai.
 
Perintah Solomon Ditusui Enggau Ngelansa (1 Raja 11.41-43)
29 Cherita lama ti bukai pasal Solomon, kenyau ari pun datai ke ujung, bisi dituliska magang dalam Jerita Lama Pasal Nabi Natan, dalam Jaku Ti Benabi ti Disebut Ahijah ke datai ari Siloh, enggau dalam Genera Nabi Ido, ti bisi mega ngenang pasal perintah Raja Jeroboam menua Israel.
30 Solomon merintah semua menua Israel ari Jerusalem empat puluh taun.
31 Iya mati lalu dikuburka di Nengeri David, lalu anak iya Rehoboam nganti iya nyadi raja.
 
Bagi 10
Raban Bansa Ti Di Utara Angkat Ngelaban Perintah (1 Raja 12.1-20)
1 Rehoboam mansang ngagai Sekem, alai semua orang ke di utara menua Israel udah begempuru, deka nyiri iya nyadi raja.
2 Lebuh Jeroboam anak Nebat, ti udah rari ari Raja Solomon ngagai menua Ejip, ninga berita pasal Rehoboam, iya lalu pulai baru ngagai menua Israel.
3 Raban bansa ti di utara lalu mesanka Jeroboam, lalu semua sida mansang betemu enggau Rehoboam, lalu bejaku enggau iya,
4 “Apai nuan udah balat amat ngasuh kami gawa. Enti nuan ngasuh pengawa kami lempung agi, nya baru kami deka taluk ngagai nuan.”
5 Ku Rehoboam nyaut, “Beri aku tiga hari alai aku berundingka utai tu. Udah nya kita datai ditu baru.” Bala sida lalu mupuk.
6 Raja Rehoboam lalu betanya ngagai orang ke tuai, ti udah bekereja nyadi penyanding penemu ke apai iya Solomon. “Nama saut asuh kita beri aku ngagai bala orang tu?” ku iya nanya sida.
7 Disaut sida, “Enti nuan nelap enggau orang tu lalu nguji meri sida saut ti siru, sida deka lantang ati, lalu sida deka seruran taluk ati betuaika nuan.”
8 Tang iya enggai mendingka jaku lalau ari orang ke tuai. Iya lalu mansang ngagai orang bala orang ke sama serambau enggau iya, ke digaga iya nyadika penyanding penemu iya diatu.
9 “Ba runding kita, nama utai ti patut dikereja aku?” ku iya nanya sida. “Nama utai ti patut disebut aku ngagai orang tu ke minta aku ngasuh pengawa sida lempung agi?”
10 Ku sida nyaut, “Tu utai ti patut dipadahka nuan ngagai sida: ‘Tunjuk anak aku tu besai agi ari punggung apai aku.’
11 Padahka ngagai sida, ‘Apai aku udah ngasuh pengawa kita berat. Aku deka ngasuh pengawa kita lebih berat agi ari nya. Iya udah nyipat kita ngena penyipat. Aku deka nyipat kita ngena penyipat ti bedurika besi!”
12 Tiga hari udah bekau nya Jeroboam enggau semua orang mayuh lalu mansang baru ngagai Raja Rehoboam, munyi ti udah diasuh iya.
13 Raja Rehoboam enggai mendingka jaku lalau ari orang ke tuai, lalu iya bejaku kasar enggau orang mayuh,
14 nitihka jaku lalau ari penyanding penemu ti agi biak. Ku iya, “Apai aku udah ngasuh kita ngereja pengawa ti berat. Aku deka ngasuh pengawa kita lebih berat agi ari nya. Iya udah nyipat kita ngena penyipat. Aku deka nyipat kita ngena penyipat ti bedurika besi!”
15 Utai tu nyadi kena TUHAN Allah Taala ngamatka jaku ti udah disebut Iya ngagai Jeroboam anak Nebat ngena nabi Ahijah ari Siloh. Nya kebuah raja enggai mendingka orang mayuh.
16 Lebuh orang mayuh meda Raja Rehoboam enggai mendingka sida, sida lalu manjung, “Anang taluk ngagai David enggau ruang bilik iya! Nama utai ti bisi udah dikereja sida ke kitai? O Orang Israel! Aram kitai pulai! Awakka Rehoboam ngaduka diri empu!” Orang Israel lalu angkat ngelaban perintah,
17 ninggalka Rehoboam nyadi raja semina ke orang ke diau di menua Judah aja.
18 Udah nya Raja Rehoboam lalu ngasuh Adoniram, ti nyadi tuai ngemataka pengawa bala ulun, mansang ngagai orang Israel. Tang sida nuku iya ngena batu datai ke mati. Lebuh Rehoboam ninga nya, iya lalu beguai-guai nepan kerita perang iya lalu rari ngagai Jerusalem.
19 Berengkah ari nya orang ke diau di utara menua Israel semampai ngelaban raja ke datai ari peturun David.
 
Bagi 11
Semaiah Benabi (1 Raja 12.21-24)
1 Lebuh Raja Rehoboam datai di Jerusalem, iya lalu ngempuruka 180,000 iku soldadu ke pemadu kering ari raban bansa Benjamin enggau Judah. Iya deka mansang beperang ngelaban raban bansa orang Israel ke di utara kena iya mulaika sida ngagai perintah iya empu baru.
2 Tang TUHAN ngasuh nabi Semaiah
3 meri pesan tu ngagai Raja Rehoboam, enggau ngagai semua orang ke ari raban bansa Judah enggau Benjamin:
4 “Anang nyerang kaban belayan kita empu. Pulai semua kita. Utai ti udah nyadi nya endang ari peneka Aku.” Sida ngasika pesan TUHAN, lalu enda nyadi nyerang Jeroboam.
Rehoboam Nguta Mayuh Bengkah Nengeri
5 Rehoboam mengkang diau di Jerusalem, lalu ngasuh orang nguta mayuh bengkah nengeri di menua Judah enggau di menua Benjamin, iya nya nengeri
6 Betlehem, Etam, Tekoa,
7 Bet-sur, Soko, Adulam,
8 Gat, Maresah, Sip,
9 Adoraim, Lakis, Asekah,
10 Sorah, Aijalon, enggau Hebron.
11 Iya ngasuh orang ngaga kuta ti tegap ke semua nengeri nya, lalu ngeletak siku orang nyadi tuai ke tiap buah nengeri nya, lalu dalam genap buah nengeri nya iya nyimpan pemakai, minyak kana, enggau wain,
12 terabai, enggau sangkuh. Nya meh chara Raja Rehoboam ngetanka kuasa iya di menua Benjamin enggau di menua Judah.
 
Bala Imam Enggau Orang Lewi Datai Ngagai Menua Judah
13 Bala imam enggau bala orang Lewi datai ari serata menua Israel ngagai menua Judah di selatan.
14 Orang Lewi ninggalka padang rumput enggau tanah sida, lalu pindah ngagai menua Judah enggau Jerusalem, laban Raja Jeroboam menua Israel enggau orang ke nganti iya nyadi raja, enggai ngelakka sida bekereja nyadi imam TUHAN.
15  Jeroboam lalu ngeletak bala imam iya empu, ngambika sida bisi bekereja ba endur alai orang kapir nyembah petara sida, lalu nyembah antu, enggau nyembah engkeramba ti udah digaga iya baka gamal anak sapi ti lelaki.
16 Orang ke endang amat deka nyembah TUHAN Allah Taala ke disembah orang Israel lalu datai ari semua raban bansa orang Israel, lalu nitihka orang Lewi mansang ngagai Jerusalem, ngambika sida ulih ngenjuk piring ngagai TUHAN Allah Taala aki ini sida.
17 Utai tu ngukuhka perintah menua Judah. Sida nyukung Rehoboam anak Solomon tiga taun, lalu diau dia baka lebuh sida ke dipegai Raja David enggau Raja Solomon menya.
 
Ruang Bilik Rehoboam
18 Rehoboam jadi enggau Mahalat anak Jerimot. Jerimot nya anak David. Indai Mahalat nya Abihail, anak indu Eliap, uchu Jesi.
19 Rehoboam enggau bini iya bisi tiga iku anak lelaki: Jeus, Semariah, enggau Saham.
20 Udah nya Rehoboam jadi enggau Maakah anak Absalom, lalu seduai iya bisi empat iku anak lelaki: Abijah, Atai, Sisa enggau Selomit.
21 Rehoboam bisi lapan belas iku bini, enggau enam puluh iku indu simpan. Anak lelaki iya dua puluh lapan iku, lalu anak indu iya enam puluh iku. Bini ke balat dikerinduka iya ari semua bini iya, enggau indu simpan iya, nya Maakah.
22 Lalu iya rinduka anak Maakah ke benama Abijah lebih agi ari semua anak iya ti bukai, lalu milih iya nganti iya nyadi raja.
23 Rehoboam landik meri tanggungjawap ngagai bala anak lelaki iya, lalu ngengkahka sida di serata menua Judah enggau menua Benjamin dalam nengeri ti bekuta. Enggau ati ti gerah mudah, iya meri sida utai ti dipeguna sida, lalu iya ngiga bini ke sida.
 
Bagi 12
Orang Ejip Nyerang Menua Judah (1 Raja 14.25-28)
1 Lebuh Rehoboam udah negapka diri nyadi raja, iya enggau semua nembiak iya lalu ngelengkaka Adat TUHAN.
2 Dalam taun ti kelima Rehoboam nyadi raja, TUHAN ngukum sida laban sida enda taluk ngagai TUHAN. Raja Sisak menua Ejip nyerang Jerusalem
3 ngena 1,200 buah kerita perang, 60,000 iku bala soldadu ke nepan kuda, enggau mayuh soldadu bukai ti enda ulih diitung, nyengkaum soldadu orang Libia, Suki-im, enggau Etiopia.
4 Iya ngalahka nengeri ti bekuta di menua Judah, lalu nyerang nyentuk ngagai Jerusalem.
5 Imam Semaiah lalu mansang ngagai Raja Rehoboam enggau ngagai bala tuai orang Judah ti udah begempuru di Jerusalem laban sida ngerarika diri ari Sisak. Ku iya bejaku enggau sida, “Tu pesan TUHAN ngagai kita: ‘Kita udah ninggalka Aku, nya alai diatu Aku ninggalka kita. Awakka Sisak ngalahka kita.’ “
6 Raja enggau bala tuai ngaku diri udah bedosa, lalu ku sida, “Utai ti dikereja TUHAN endang lurus.”
7 Lebuh TUHAN meda nya, Iya bejaku baru enggau Semaiah. Ku Iya, “Laban sida ngaku dosa diri, Aku enggai ngerusak sida. Tang lebuh Sisak nyerang, sida semina ulih ngidupka nyawa diri aja. Jerusalem enda dirusak,
8 tang Sisak deka ngalahka sida, lalu sida deka nemu bida entara betuaika Aku enggau betuaika raja mensia.”
9  Raja Sisak nyerang Jerusalem, lalu ngerampas utai ti berega ari Rumah Sembiang, enggau ari istana. Iya ngerampas semua utai, nyengkaum terabai emas ti udah digaga Raja Solomon.
10 Kena iya nganti terabai nya, Rehoboam ngaga terabai temaga, lalu nyerahka utai nya ngagai pemesai ti nyadi tuai nyaga pintu istana.
11 Genap kali raja mansang ngagai Rumah Sembiang, bala jejaga mai terabai nya, lalu udah nya mulaika terabai nya baru ngagai bilik jejaga.
12 Laban iya nunduk ngagai TUHAN, TUHAN enda ngerusak iya abis lengis, lalu utai di menua Judah nyadi menyana baru.
 
Perintah Rehoboam Disebut Enggau Ngelansa
13 Rehoboam merintah di Jerusalem lalu kuasa iya ti nyadi raja nambah-menambah. Umur iya empat puluh satu taun lebuh iya nyadi raja, lalu iya merintah tujuh belas taun di Jerusalem, nengeri ti udah dipilih TUHAN ari semua menua Israel nyadi endur alai TUHAN patut disembah. Indai Rehoboam nya Namah, ari menua Amon.
14 Rehoboam ngereja utai ti jai, laban iya enggai nguji ngiga peneka TUHAN.
15 Utai ti dikereja Rehoboam ari pun datai ke ujung, enggau cherita pasal ruang bilik iya tau ditemu dalam Jerita Lama Pasal Nabi Semaiah enggau Jerita Lama Pasal Nabi Ido. Rehoboam enggau Jeroboam endang seruran beperang ngelaban pangan diri.
16 Rehoboam mati lalu dikuburka ba lumbung bala raja di Nengeri David, lalu anak iya Abijah nganti iya nyadi raja.
 
Bagi 13
Abijah Beperang Ngelaban Jeroboam (1 Raja 15.1-8)
1 Dalam taun ti kelapan belas Raja Jeroboam udah nyadi raja menua Israel, Abijah nyadi raja menua Judah,
2 lalu iya merintah tiga taun di Jerusalem. Indai iya Mikaiah anak Uriel, ari nengeri Gibe-ah.
Perang nyadi entara Abijah enggau Jeroboam.
3 Abijah ngempuruka 400,000 iku bala soldadu, lalu Jeroboam nyatup iya ngena 800,000 iku soldadu.
4 Soldadu dua bengkah nya lalu besatup ba menua ti bebukit di menua Epraim. Raja Abijah niki ngagai Bukit Semaraim lalu ngangauka Jeroboam enggau orang Israel: “Pendingka aku!” ku iya bejaku.
5 “Kati kita enda nemu, TUHAN Allah Taala ke disembah orang Israel udah ngaga sempekat ti enda tau dilanggar enggau David, kena Iya meri David enggau peturun iya kuasa nyadi raja menua Israel belama iya?
6 Jeroboam anak Nebat udah angkat ngelaban Solomon, raja iya empu.
7 Udah nya iya ngempuruka seraban orang ke nadai guna, lalu sida ngalahka Rehoboam ti agi kelalu biak sereta nadai peneleba, lalu iya enda ulih ngelaban sida.
8 Diatu kita nguji beperang ngelaban kuasa diraja ti udah diberi TUHAN ngagai peturun David. Bala soldadu kita amat mayuh, lalu kita mai mayuh anak sapi ti lelaki ti udah digaga Jeroboam ari emas nyadika petara kita.
9 Kita udah muru bala imam TUHAN, bala peturun Aron, lalu kita udah muru orang Lewi. Kita udah nganti sida ngena bala imam ke diletak kita ngena chara orang bansa bukai. Barang sapa datai mai sapi ti lelaki tauka tujuh iku jelu bedus, tau nuchi diri empu nyadi imam ke utai ti dikumbai kita petara.
10 “Tang kami mengkang betuaika TUHAN Allah Taala kami, lalu enda ninggalka Iya. Imam ke datai ari peturun Aron ngereja pengawa sida, ditulung orang Lewi.
11 Genap pagi enggau genap lemai sida meri TUHAN menyan enggau piring jelu ti ditunu segala. Sida ngenjuk piring ba mija ti tuchi, lalu genap lemai sida nungkun lampu ba penuduk lampu ti digaga ari emas. Kami ngereja utai ti udah diasuh TUHAN kereja kami, tang kita udah ninggalka Iya.
12 Allah Taala Empu nyadi tuai kami, lalu bala imam Iya bisi ditu mai terumpit sida, sedia deka nyepu terumpit sida nesau kami mansang beperang ngelaban kita. Kita orang Israel! Anang ngelaban TUHAN Allah Taala aki ini kita! Kita enda ulih menang!”
13 Lebuh maya nya Jeroboam udah ngasuh sekeda bala soldadu iya ngeramka ipa laban sida deka nyerang bala soldadu orang Judah ari belakang, lalu bala soldadu sida ti bukai nyatup sida ari mua.
14 Orang Judah malik lalu meda diri nyau dikelulung munsuh. Sida lalu nyabak ngangauka TUHAN minta saup Iya, lalu bala imam nyepu terumpit sida.
15 Orang Judah, diuluka Abijah manjung lalu nyerang. Allah Taala ngalahka Jeroboam enggau bala soldadu orang Israel.
16 Orang Israel rari, lalu Allah Taala nejuka orang Judah ngalahka sida.
17 Abijah enggau bala soldadu iya balat amat ngalahka orang Israel. Setengah juta bala soldadu Israel ti kering dibunuh.
18 Nya alai orang Judah menang ngelaban orang Israel, laban sida manggaika pengarap sida ba TUHAN Allah Taala aki ini sida.
19 Abijah lalu begagaika bala soldadu Jeroboam, lalu nguan sekeda nengeri iya, iya nya, Betel, Jesanah, enggau Epron, enggau genturung pendiau ti semak nengeri nya.
20 Jeroboam nadai ulih bekuasa agi lebuh Abijah nyadi raja. Ke pengujung iya, TUHAN munuh iya, lalu iya mati.
21 Tang Abijah, mansang kering-sekering. Iya bisi empat belas iku bini, lalu iya bisi dua puluh dua iku anak lelaki, enggau enam belas iku anak indu.
22 Cherita lama pasal Abijah, utai ti disebut iya, enggau utai ti dikereja iya, bisi dituliska magang dalam Jerita Lama Pasal Nabi Ido.
 
Bagi 14
Raja Asa Ngalahka Orang Etiopia
1 Raja Abijah mati lalu dikuburka ba lumbung bala raja di Nengeri David. Anak iya Asa nganti iya nyadi raja. Lebuh Asa megai perintah, menua nadai pengachau sepuluh taun
2 Asa ngerinduka ati TUHAN Allah Taala iya, laban iya ngereja utai ti ngena sereta manah.
3 Iya muai semua alta orang kapir enggau endur alai orang bansa bukai besembah, mechahka tiang batu keramat, lalu nebang semua engkeramba petara indu Aserah.
4 Iya ngasuh orang Judah ngereja utai ti dikedekaka TUHAN Allah Taala aki ini sida, lalu ngasika ajar enggau pesan Iya.
5 Laban iya muai endur alai orang kapir nyembah petara sida, enggau alta alai nunu menyan ari semua nengeri di menua Judah, menua nya bisi pemaik lebuh iya megai perintah.
6 Iya nguta nengeri di menua Judah lebuh iya megai perintah. Perang nadai kala nyadi dalam dua tiga taun, laban TUHAN meri iya pemaik.
7 Ku iya madahka ngagai orang Judah, “Aram kitai nguta nengeri ngena dinding enggau kuta, enggau pintu ti tau ditikupka sereta dikalang. Kitai ulih megai menua tu laban kitai udah ngereja peneka TUHAN Allah Taala kitai. Iya udah nyaga kitai, lalu ngasuh kitai likun ari semua munsuh kitai.” Nya alai sida ngaga kuta, lalu bulih utai.
8 Raja Asa bisi 300,000 iku soldadu ari menua Judah. Sida besenyataka terabai enggau sangkuh. Iya mega bisi 280,000 soldadu ari menua Benjamin. Sida tu besenyataka terabai enggau panah. Semua sida nya berani magang, sereta chukup dilatih.
9 Siku orang Etiopia ke benama Serah nyerang menua Judah ngena sejuta iku soldadu enggau tiga ratus buah kerita perang. Iya nyerang naka Maresah.
10 Asa mansang ngelaban iya. Bala soldadu dua bengkah nya sama belatur ba Emperan Sepatah semak Maresah.
11 Asa besampi ngagai TUHAN Allah Taala iya, ku iya, “O TUHAN, Nuan ulih nyaup bala soldadu ti lemi baka Nuan ke nyaup bala soldadu ti kering, Tulung kami diatu, O TUHAN Allah Taala kami, laban kami manggaika diri ba Nuan, lalu kami udah datai dalam nama Nuan, deka ngelaban bala soldadu ti mayuh tu. TUHAN, Nuan endang Allah Taala kami. Nadai orang tau ngarapka diri ulih ngalahka Nuan.”
12 TUHAN ngalahka bala soldadu orang Etiopia lebuh Asa enggau bala soldadu orang Judah ngelaban sida. Orang Etiopia rari,
13 lalu Asa enggau bala soldadu iya begagaika sida nyentuk ngagai Gerar. Mayuh amat orang Etiopia dibunuh, datai ke sida nyau enda ulih ngempuruka bala lalu ngelaban. Sida alah dilaban TUHAN enggau bala soldadu Iya. Sida bulih mayuh amat perapasan.
14 Udah nya sida lalu ulih ngalahka nengeri ti besai di menua ngelingi Gerar, laban orang dia balat amat takutka TUHAN. Bala soldadu orang Judah ngerampas reta tengkira ari nengeri nya, lalu bulih mayuh amat perapasan.
15 Sida mega nyerang kem sekeda orang ke ngibun bedus, ngerampas mayuh amat jelu bedus enggau jelu unta. Udah nya sida pulai ngagai Jerusalem.
 
Bagi 15
Asa Ngaga Atur Ti Baru
1 Roh Allah Taala bekuasa ba Asariah anak Odet.
2 Asariah lalu mansang ngagai Raja Asa. Ku iya ngangau, “Pendingka aku ulih kita, Raja Asa, enggau semua orang Judah enggau orang Benjamin! TUHAN bisi enggau kita, seagi-agi kita meruan enggau Iya. Enti kita ngiga Iya, Iya deka ngasuh kita nemu Iya, tang enti kita ninggalka Iya, Iya deka ngelengkaka kita.
3 Orang Israel lama udah nadai nyembah Allah Taala ti bendar, nadai imam ngajar, nadai adat.
4 Tang lebuh sida dituntung penusah, sida nguingka diri ngagai TUHAN Allah Taala ke disembah orang Israel. Sida ngiga Iya lalu nemu Iya.
5 Lebuh maya nya menya, orang nadai likun lebuh sida tama-pansut, laban menua balat dituntung pengachau enggau penyarut.
6 Bansa siti nekanka pengidup bansa siti, lalu nengeri siti nekanka pengidup orang di nengeri siti, laban Allah Taala ngasuh penusah enggau pemerinsa ninggang sida.
7 Tang kita enda tau enda kering, lalu anang lemi semengat. Kita deka nerima upah ke pengawa ti dikereja kita.”
8 Lebuh Asa ninga jaku ti benabi nya, jaku ti dipansutka Asariah anak Odet, iya berasai diperansang. Iya lalu muai semua engkeramba di menua Judah enggau Benjamin, enggau semua engkeramba dalam nengeri ti udah dialahka iya di menua ti bebukit di menua Epraim. Iya mega ngaduka alta TUHAN ti bediri ba tengah laman Rumah Sembiang.
9 Mayuh orang ari Epraim, Manasi, enggau Simeon udah ngalih ari Asa, lalu diau di menua ti diperintah iya, laban sida meda TUHAN bisi enggau iya. Asa mesanka semua sida, enggau orang ari menua Judah enggau Benjamin.
10 Sida begempuru di Jerusalem dalam bulan ti ketiga, dalam taun ti kelima belas Asa nyadi raja.
11 Ba hari nya sida ngenjuk piring ngagai TUHAN ari perapasan ti udah dibai sida pulai, iya nya, tujuh ratus iku sapi, enggau tujuh ribu iku bedus.
12 Sida ngaga siti sempekat madahka diri besetuju deka nyembah TUHAN Allah Taala aki ini sida, enggau pengabis ati enggau semengat sida.
13 Barang sapa enda nyembah TUHAN, nemuka orang nya biak tauka tuai, lelaki tauka indu, deka bunuh.
14 Sida lalu besumpah dalam nama TUHAN enggau nyawa ti inggar madahka diri deka nitihka sempekat nya. Udah nya sida manjung lalu nyepu terumpit.
15 Semua orang di menua Judah lantang ati magang laban sida udah ngaga sempekat nya enggau pengabis ati sida. Sida gaga ati nyembah TUHAN, lalu Iya nerima sida, lalu ngasuh serata menua nya likun.
16 Raja Asa lalu muai ini iya Maakah ari pangkat iya ti nyadi indai kuin, laban ini iya udah ngaga engkeramba ke petara indu Aserah. Asa nebang engkeramba nya, mepat iya, lalu nunu repik iya ba Lebak Kidron.
17 Taja pen Asa enda ngerusak semua endur alai orang kapir nyembah petara sida, iya mengkang tetap ati ngagai TUHAN sepemanjai umur iya.
18 Iya ngengkahka dalam Rumah Sembiang semua utai ti udah diserahka apai iya Abijah ngagai Allah Taala, sereta enggau utai ti digaga ari emas enggau ari pirak ti udah diserahka iya empu.
19 Perang nadai agi nyadi nyentuk ngagai ketiga puluh lima taun iya nyadi raja.
 
Bagi 16
Pengachau Enggau Orang Israel(1 Raja 15.17-22)
1 Dalam taun ti ketiga puluh enam Raja Asa megai perintah di menua Judah, Raja Baasa menua Israel nyerang menua Judah lalu belabuh nguta nengeri Ramah kena mempang jalai semua orang ke tama-pansut ari menua Judah.
2 Nya alai Asa lalu ngambi pirak enggau emas ari sarang reta Rumah Sembiang, enggau ari istana, lalu ngirumka utai nya ngagai Damaskus, ngagai Raja Benhadat menua Siria, sama enggau pesan tu:
3 “Awakka kitai beserakup baka apai kitai suba. Pirak enggau emas tu diberi ngagai nuan. Nya alai, putuska kaul nuan enggau Raja Baasa menua Israel, ngambika iya nyurutka diri ari menua aku.”
4 Benhadat besetuju enggau penemu Asa, lalu iya ngasuh bala pemesai enggau bala soldadu iya nyerang nengeri di menua Israel. Sida ngalahka Ijon, Dan, Abel Bet-maakah, enggau semua nengeri di menua Naptali alai pemakai disimpan.
5 Lebuh Raja Baasa ninga utai ti nyadi, iya lalu badu agi nguta Ramah, lalu ngelengkaka pengawa nya.
6 Udah nya Raja Asa ngempuruka bala iya ari serata menua Judah, lalu ngasuh sida mai batu enggau ramu ti udah dikena Baasa nguta nengeri Ramah, lalu nguta nengeri Geba enggau Mispah ngena batu nya.
 
Nabi Hanani
7 Lebuh maya nya, nabi Hanani mansang ngagai Raja Asa. Ku iya, “Laban nuan ngarapka Raja menua Siria, lalu enda ngarapka TUHAN Allah Taala nuan, bala soldadu raja menua Israel udah ulih ngerarika diri ari nuan.
8 Ukai enda orang Etiopia enggau orang Libia mayuh agi soldadu, enggau mayuh kerita perang enggau soldadu ke nepan kuda? Tang laban nuan udah manggaika pengarap nuan ba TUHAN, Iya udah ngasuh nuan menang ngelaban sida.
9 TUHAN ngemataka semua dunya, lalu meri pengering ngagai orang ke taluk ngagai Iya. Tang nuan udah ngereja utai ti beli. Nya alai, kenyau ari diatu nuan deka seruran beperang.”
10 Jaku nya ngasuh Asa balat amat ringat ngagai nabi Hanani lalu iya nanchang nabi Hanani ngena rantai dalam rumah jil. Tu meh maya Asa belabuh merinsaka sekeda nembiak iya.
 
Pengujung Perintah Asa(1 Raja 15.23-24)
11 Semua utai ti nyadi lebuh Asa megai perintah, kenyau ari pun datai ke ujung, bisi dituliska magang dalam Jerita Lama Pasal Raja Menua Judah Enggau Raja Menua Israel.
12 Dalam taun ti ketiga puluh semilan Asa nyadi raja, iya enda ulih bejalai laban kaki iya balat diempa penyakit. Tang iya enda minta saup ari TUHAN, tang minta saup ari lutur.
13 Dua taun udah bekau nya, iya mati
14 lalu dikuburka dalam kubur batu ti udah ditebuk iya ke iya empu di nengeri David. Sida nyendiaka bangkai iya ngena rempah enggau minyak wangi sebedau iya dikuburka, lalu sida ngidupka api ti mau kena sida ngulitka iya.
 
Bagi 17
Jehosapat Nyadi Raja
1 Jehosapat lalu nganti apai iya Asa nyadi raja, lalu iya ngeringka diri ngelaban Israel.
2 Iya ngasuh bala soldadu nyaga nengeri ti bekuta di menua Judah, di menua pesisir, enggau nengeri ti udah dialahka Asa di menua Epraim.
3 TUHAN merekatka Jehosapat laban iya neladan apai iya, lalu enda nyembah Baal.
4 Iya betuaika Allah Taala ti disembah apai iya, ngasika pesan Allah Taala, lalu enda ngereja utai ti dikereja sida raja menua Israel.
5 TUHAN negapka perintah Jehosapat di menua Judah, lalu semua orang mai pemeri ngagai iya, nya alai iya nyadi kaya sereta balat dibasa orang.
6 Iya gaga ati betuaika TUHAN lalu ngerusak semua endur alai orang kapir nyembah petara sida di menua Judah, enggau tanda petara indu Aserah di menua nya.
7 Dalam taun ti ketiga iya nyadi raja, iya ngasuh bala pemesai, iya nya Benhail, Obadiah, Sekariah, Netanel, enggau Mikaiah, ngajar ba sebelah nengeri di menua Judah.
8 Sida nya disempulang semilan iku orang Lewi ke benama Semaiah, Netaniah, Sebadiah, Asahel, Semiramot, Jehonatan, Adonijah, Tobijah, enggau Tobadonijah. Lalu imam ke enggau sida nya Elisama seduai Jehoram.
9 Sida mai Bup Adat TUHAN, lalu bejalai nengah semua nengeri di menua Judah, ngajar Adat TUHAN ngagai orang mayuh.
 
Pemesai Kuasa Jehosapat
10 TUHAN ngasuh semua perintah ti ngelingi Raja Jehosapat takut nyerang iya.
11 Sekeda orang Pilistin mai mayuh pirak enggau pemeri bukai ngagai Jehosapat, lalu sekeda orang Arab mai 7,700 iku bedus enggau 7,700 iku kambin ngagai iya.
12 Nya alai kuasa Jehosapat nambah-menambah. Iya begagaka kuta enggau nengeri di serata menua Judah,
13 alai nyimpan pemakai. Iya ngasuh pemesai ti tebilang nama nyaga Jerusalem,
14 nitihka ripih raban peturun sida. Orang ke nyadi tuai soldadu ari raban peturun Judah nya Adnah. Iya bisi 300,000 iku soldadu dipegai iya.
15 Pemesai ke lumur dua nya Jehohanan. Iya bisi 280,000 iku soldadu,
16 lalu tuai soldadu ke lumur tiga nya Amasiah anak Sikri. Iya bisi 200,000 iku soldadu. (Amasiah udah nyerahka diri bekereja ke TUHAN.)
17 Tuai soldadu ari raban peturun ti diturunka Benjamin nya Eliada. Iya tu orang ke tebilang nama. Iya nguluka 200,000 iku soldadu ke besenyataka terabai enggau panah.
18 Tuai soldadu ke lumur dua iya nya Jehosabat. Bala iya 180,000 iku. Semua sida nya udah chukup disikap enggau senyata kena beperang.
19 Bala soldadu tu bekereja ke raja di Jerusalem. Nambahka nya, raja mega ngasuh soldadu ti bukai nyaga nengeri ti bukai ti bekuta di menua Judah.
 
Bagi 18
Nabi Mikaiah Meri Jaku Tangkan Ngagai Ahap (1 Raja 22.1-28)
1 Lebuh Raja Jehosapat menua Judah nyau nyadi kaya sereta tebilang nama, iya ngatur siku orang ari ruang bilik iya jadi enggau siku orang ari ruang bilik Raja Ahap menua Israel.
2 Berapa taun udah bekau nya, Jehosapat nemuai ngagai Raja Ahap di nengeri Samaria. Kena Ahap masa Jehosapat enggau orang ke datai enggau iya, Ahap ngasuh orang munuh berapa iku jelu bedus enggau sapi kena nyendiaka pengerami makai besai. Iya nguji ngumbuk Jehosapat enggau iya nyerang nengeri Ramot-giliat.
3 Ku Raja Ahap nanya, “Kati nuan deka enggau aku nyerang Ramot?” Ku Jehosapat nyaut, “Aku sedia, enti nuan sedia. Bala soldadu aku mega sedia. Kami sigi deka enggau nuan.”
4 Lalu ku Raja Jehosapat nampung jaku iya, “Tang manah kitai betanya ngagai TUHAN dulu.”
5 Nya alai Ahap mesanka bala nabi, kira empat ratus iku semua sida, lalu ku iya nanya sida, “Kati patut tauka enda aku nyerang Ramot?” “Serang aja meh nengeri nya,” ku sida nabi nyaut. “Allah Taala deka ngasuh nuan menang.”
6 Tang ku Jehosapat nanya Ahap, “Kati nuan nadai agi nabi bukai ti tau dikena kitai betanya ngagai TUHAN?”
7 Ku Ahap nyaut, “Bisi, Mikaiah ari Imlah. Tang aku begedika iya laban iya nadai kala benabika utai ti manah ke aku, seruran utai ti jai.” “Nuan enda tau bejaku munyi nya!” ku Jehosapat nyaut.
8 Ahap lalu mesanka siku pemesai, lalu ngasuh iya ngambi nabi Mikaiah enggau jampat.
9 Raja dua iku nya duduk ba kerusi diraja seduai iya, ngena pekayan raja, ba endur alai orang ngindik gandum ari luar pintu nengeri Samaria, lalu semua nabi benabi di mua seduai iya.
10 Siku ari bala nabi nya, Sedekiah anak Chenaana, ngaga tanduk besi, lalu bejaku enggau Ahap, “Tu utai ti disebut TUHAN, ‘Nuan deka ngena utai tu ngelaban orang Siria, lalu nuan deka ngalahka semua sida.’ “
11 Semua nabi ti bukai bela nyebut nya magang. “Serang meh Ramot-giliat. Nuan deka menang,” ku sida. “TUHAN deka ngasuh nuan menang.”
12 Nyadi ba urung maya nya, pemesai ti udah mansang ngambi Mikaiah, benung madahka ngagai  Mikaiah, “Semua bala nabi ti bukai udah benabi madahka raja deka mujur. Nya alai manah nuan benabi baka nya mega.”
13 Tang ku Mikaiah nyaut, “Dalam nama Allah Taala ti idup, aku semina nyebut utai ti diasuh Allah Taala sebut aku!”
14 Lebuh iya bediri di mua Raja Ahap, raja lalu nanya iya, “Mikaiah, kati patut tauka enda kami duai Raja Jehosapat nyerang Ramot-giliat?” “Patut” ku Mikaiah nyaut. “Nuan endang tetap deka menang. TUHAN deka ngasuh nuan menang.”
15 Tang ku Ahap nyaut, “Berapa kali aku enda tau enda ngasuh nuan nyebut utai ti bendar dalam nama TUHAN?”
16 Mikaiah lalu bejaku, “Aku meda bala soldadu orang Israel ngachir ba sebelah bukit, baka bedus ti nadai orang ngibun. Lalu ku TUHAN bejaku, ‘Bala orang tu nadai orang ngulu. Awakka sida pulai enggau selamat.’ “
17 Ahap lalu bejaku enggau Jehosapat, “Nya utai ti dipadahka aku ngagai nuan. Iya endang nadai kala benabika utai ti manah pasal aku, seruran utai ti jai!”
18 Mikaiah lalu bejaku, “Diatu pendingka utai ti disebut TUHAN! Aku udah meda TUHAN duduk ba kerusi diraja Iya di serega, lalu bala melikat Iya bediri ari kanan enggau ari kiba Iya.
19 Lalu ku TUHAN bejaku, ‘Sapa deka nipu Ahap ngambika iya nyerang lalu alah di Ramot-giliat?’ Sekeda melikat lalu nyebut tu, sekeda nyebut nya.
20 Udah nya siku roh mansang ngagai TUHAN, lalu bejaku, ‘Awakka aku nipu iya.’ TUHAN lalu nanya iya, ‘Baka ni?’
21 Ku roh nya nyaut, ‘Aku deka mupuk lalu ngasuh semua bala nabi ke bekereja ke Ahap madahka utai ti bula.’ TUHAN lalu bejaku, ‘Mupuk meh nuan lalu tipu iya. Nuan deka mujur.’
22 Nya alai TUHAN udah ngengkahka siku roh pemula dalam nyawa bala nabi nuan; TUHAN udah ngeletak nuan deka dituntung penusah!”
23 Nabi Sedekiah anak Chenaana lalu niki ngagai Mikaiah, nampar mua iya, lalu nanya, “Kemaya Roh TUHAN udah kala ninggalka aku lalu bejaku enggau nuan?”
24 Disaut Mikaiah, “Nuan deka nemu nya lebuh nuan tama ngaga bilik belakang mansang ngelalaika diri.”
25 Raja Ahap lalu bejaku, “Tangkap Mikaiah, lalu asuh iya pulai ngagai Amon, tuan gabenor nengeri, enggau ngagai Joas.
26 Asuh sida nutup iya dalam rumah jil, lalu meri iya semina roti enggau ai aja, nyentuk ngagai maya aku pulai kitu baru enggau selamat.”
27 Ku Mikaiah bejaku, “ Enti nuan pulai enggau selamat, nya deka nunjukka TUHAN nadai bejaku ngena aku!” Lalu ku Mikaiah nambahka jaku iya, “Dinga nya, semua kita!”
 
Pemati Ahap(1 Raja 22.29-35)
28 Udah nya Raja Ahap menua Israel enggau Raja Jehosapat menua Judah lalu mansang nyerang nengeri Ramot-giliat.
29 Ku Ahap bejaku enggau Jehosapat, “Lebuh kitai nyerang, aku deka ngeluluka diri baka orang bukai, tang nuan ngena pekayan raja.” Nya alai raja menua Israel mansang beperang enda ngena pekayan raja.
30 Nyadi raja menua Siria udah bejaku enggau bala tuai soldadu ke nepan kerita perang, enda ngasuh sida nyerang orang bukai, tang semina raja orang Israel aja.
31 Nya alai, lebuh orang Siria meda Raja Jehosapat, semua sida ngumbai iya raja orang Israel. Sida lalu nyerang iya. Tang Jehosapat nyerauh, lalu TUHAN Allah Taala nulung iya. Allah Taala lalu nguingka orang Siria ari iya.
32 Bala tuai kerita perang lalu nemu iya ukai raja orang Israel. Nya alai sida lalu badu agi ngagai iya.
33 Tang lebuh siku soldadu orang Siria nimbakka laja, laja nya kena ba sambung baju kebal Raja Ahap. “Bakal aku!” ku iya ngangau ngagai orang ke ngemudika kerita perang iya. “Putarka kerita tu ditu, anang agi enggau orang belaban!”
34 Lebuh bala orang agi benung belaban, Raja Ahap nyandih dalam kerita perang iya, merening tunga ngagai orang Siria. Lalu iya mati lebuh padam mata panas lemai nya.
 
Bagi 19
Siku Nabi Nganu Jehosapat
1 Lebuh Raja Jehosapat menua Judah pulai enggau selamat ngagai istana iya di Jerusalem,
2 siku nabi ke benama Jehu anak Hanani, mansang betemu enggau raja, lalu ku iya bejaku enggau raja, “Kati nuan ngumbai diri ngereja utai ti ngena nulung orang ke jai, lalu setanah enggau orang ke begedika TUHAN? Utai ti dikereja nuan udah nyungkak TUHAN ringat.
3 Tang taja pia, nuan bisi pemadas ba nuan empu. Nuan udah muai semua tanda petara indu Aserah ti disembah orang mayuh, lalu nuan udah nguji nitihka peneka Allah Taala.”
 
Jehosapat Ngaga Atur Baru
4 Taja pen Raja Jehosapat diau di Jerusalem, tang iya selalu bejalai nemuai ngagai orang mayuh, kenyau ari Beer-seba di selatan nyentuk ngagai tisi menua ti bebukit di menua Epraim di utara, laban iya deka mai orang mayuh pulai baru ngagai TUHAN Allah Taala aki ini sida.
5 Iya ngeletak orang nyadi pengulu dalam siti-siti nengeri ti bekuta di menua Judah,
6 lalu meri jaku ajar ngagai sida munyi tu, “Bejimat kita lebuh kita ngatur pechara. Kita ukai ngakim ngena kuasa mensia, tang ngena kuasa TUHAN, lalu Iya bisi enggau kita lebuh kita meri ukum.
7 Nangika TUHAN, lalu bejimat lebuh kita ngakim, laban TUHAN Allah Taala kitai enggai meda orang meri atur ti enda lurus, tauka bepilih mata, tauka makai suap.”
8 Jehosapat mega ngeletak di Jerusalem sekeda orang Lewi, imam enggau tuai ruang bilik orang Israel, ngasuh sida ngakim ngarika TUHAN, lalu mutarka laya entara orang Israel. Opis sida di Jerusalem.
9 Ku iya bejaku ngagai sida, “Kita enda tau enda nangika TUHAN, tetap ati ngagai Iya enggau pengabis ati kita;
10 Genap kali orang ari bansa kita empu datai ari nengeri bukai mai ngagai kita pekara pasal orang ke udah munuh orang, tauka pasal adat, tauka pesan, atur tauka adat, kita enda tau enda ngajar sida, ngambika sida enda ngereja penyalah enggai ke TUHAN ringat ngagai kita enggau ngagai kaban belayan kita. Kereja nya ulih kita, nya baru kita enda ngereja utai ti salah.
11 Imam Besai Amariah udah diberi aku kuasa nyadi tuai kita ngatur semua pekara TUHAN, lalu Sebadiah anak Ismail, ti nyadi tuan gabenor menua Judah, deka ngatur semua pekara raja, lalu orang Lewi deka bekereja ke kita nyadi pemesai kita. Kereja pengawa kita enggau ati ti berani. Awakka TUHAN setanah enggau orang ke ngereja utai ti ngena!”
 
Bagi 20
Perang Ngelaban Edom
1 Nyau kelama udah bekau nya, bala soldadu orang Moap enggau Amon, enggau bansa bukai ke setanah enggau sida, iya nya orang bansa Meun, nyerang menua Judah.
2 Sekeda bala seruan datai lalu madah ngagai Raja Jehosapat: “Mayuh amat bala soldadu ari Edom udah datai ari tebing seberai Tasik Mati deka nyerang nuan. Sida udah ngalahka Hasason-tamar.” (Tu siti agi nama ke nengeri En-gedi.)
3 Jehosapat lalu takut, lalu iya besampi ngagai TUHAN minta TUHAN ngiring Iya. Udah nya iya lalu meri atur ngasuh semua orang di menua nya bepasa magang.
4 Orang datai ari semua nengeri dalam menua Judah ngagai Jerusalem minta TUHAN ngiring sida,
5 lalu semua sida, enggau semua orang Jerusalem begempuru ba tengah laman ti baru ba Rumah Sembiang. Raja Jehosapat mansang lalu bediri di mua sida
6 lalu besampi, “O TUHAN Allah Taala aki ini kami, Nuan merintah di serega, atas semua bansa ti di dunya tu. Nuan bekuasa sereta kering, lalu nadai orang ulih ngelaban Nuan.
7 Nuan endang Allah Taala kami. Lebuh bala nembiak Nuan Israel pindah ngagai menua tu, Nuan muru orang ke diau di menua tu, lalu meri menua tu ngagai bala peturun pangan Nuan Abraham, nyadika pesaka sida belama iya.
8 Sida udah diau ditu, lalu udah ngaga Rumah Sembiang kena sida ngemesaika Nuan, laban sida nemu,
9 enti penusah ti besai bisi ninggang sida kena Nuan ngukum sida, baka perang, penyakit ti berampit, tauka lapar pungkang, sida tau datai lalu bediri di mua Rumah Sembiang tu alai Nuan ke disembah. Sida tau besampi ngagai Nuan lebuh sida kena laban penusah, lalu Nuan deka ningaka sida, lalu ngidupka sida.
10 “Diatu, orang Amon, Moap enggau Edom udah datai deka nyerang kami. Lebuh bala aki ini kami pansut ari menua Ejip, Nuan enda nyagi sida tama ngagai menua bansa orang nya. Nya alai bala aki ini kami bejalai ngelaungka sida, lalu enda ngerusak sida.
11 Diatu peda Nuan jalai sida malas pemanah kami. Sida datai deka muru kami ari menua ti udah diberi Nuan ngagai kami.
12 O Allah Taala kami! Ukum meh sida, laban kami tu nadai daya ngelaban bala soldadu ti ngemayuh nya nyerang kami. Kami enda nemu utai ti patut dikereja kami, tang kami minta Nuan nulung kami.”
13 Semua orang Judah, sama enggau bini enggau anak sida, bediri magang dia di mua Rumah Sembiang.
14 Roh TUHAN lalu datai ngagai siku orang Lewi ke bisi dalam tekang bala. Nama orang nya Jahasil anak Sekariah. Iya datai ari raban peturun Asap, nengah Mataniah, Jeiel, enggau Benaiah.
15 Ku Jahasil bejaku, “Tuan Raja, enggau semua kitai orang Judah ke di Jerusalem! TUHAN madahka kita enda tau lemi semengat, tauka takut nyatup bala soldadu ti mayuh nya. Perang tu perang Allah Taala, ukai perang kita.
16 Serang sida pagila lebuh sida niki genting tanah ba Sis. Kita deka besatup enggau sida ba ujung lebak ti nuju ngagai menua puang semak Jeruel.
17  Perang tu ukai perang kita. Belatur aja, lalu diau jenuh nengkilaka TUHAN menang beperang ngarika kita orang Judah enggau ngarika Jerusalem. Anang takut tauka tusah ati. Mansang ngelaban sida pagila; TUHAN deka enggau kita.”
18 Udah nya Raja Jehosapat nyungkurka diri ke tanah, lalu semua orang Judah enggau orang ke diau di Jerusalem bela nyungkurka diri nyembah TUHAN.
19 Orang Lewi ke ari raban peturun Kohat enggau Korah bediri, lalu manjung muji TUHAN Allah Taala ke disembah orang Israel.
20 Tumu pagi hari siti, sida mansang ngagai menua puang semak Tekoa. Lebuh sida mupuk, Jehosapat bejaku enggau sida, “Orang Judah enggau orang Jerusalem! Arapka TUHAN Allah Taala kita, nya baru kita tan ngelaban munsuh. Arapka utai ti disebut sida nabi Iya.”
21 Lebuh raja udah betanya ngagai orang mayuh, iya lalu ngasuh sekeda orang ke nebah musik ngerasukka baju panjai ti dikena sida ngereja pengawa ti kudus, lalu bejalai dulu ari bala soldadu, sereta belagu: “Pujika TUHAN. Pengerindu Iya meruan belama iya!”
22 Lebuh sida belabuh belagu, TUHAN lalu ngeramka ipa lalu nyerang orang Amon, orang Moap enggau orang Edom ke datai nyerang orang Judah, lalu bala munsuh nya rari.
23 Laban orang Amon enggau orang Moap nyerang orang Edom, ngeluska semua sida. Lebuh sida udah ngeluska orang Edom, sida lalu bebunuh diri sama diri.
24 Lebuh bala orang Judah datai ba siti menara jejaga di menua puang, sida malik ngagai bala munsuh lalu meda bangkai munsuh betegaring ba sebelah tanah. Nadai siku sida ulih ngerarika diri.
25 Lebuh Jehosapat enggau bala soldadu iya mansang ngambi perapasan, sida tetemuka mayuh amat jelu sapi pemakai, gari, enggau barang ti berega. Sida begumpulka perapasan nya tiga hari. Tang utai nya kelalu mayuh, datai ke sida nyau enda ulih mai semua utai nya.
26 Ba hari ti keempat, sida lalu begempuru ba Lebak Berakah, lalu muji TUHAN ketegal semua utai ti udah dikereja Iya. Nya kebuah lebak nya dikumbai “Lebak Barakah.”
27 Jehosapat nguluka bala soldadu iya pulai menang ngagai Jerusalem, laban TUHAN udah ngalahka munsuh sida.
28 Lebuh sida datai di Jerusalem, sida mansang ngagai Rumah Sembiang, diumba ngena munyi belikan enggau terumpit.
29 Semua bansa ti ninga chara TUHAN udah ngalahka bala munsuh orang Israel, takut magang.
30 Nya alai menua nadai agi pengachau lebuh Jehosapat megai perintah, lalu Allah Taala ngasuh semua menua nya likun.
 
Pengujung Perintah Jehosapat (1 Raja 22.41-50)
31 Jehosapat berengkah nyadi raja menua Judah lebuh umur iya tiga puluh lima taun, lalu iya merintah di Jerusalem dua puluh lima taun. Indai iya Asubah anak Silhi.
32 Baka apai iya ke dulu ari iya, iya ngereja utai ti ngena di mua TUHAN;
33 Tang endur alai orang kapir nyembah petara sida, enda dirusak. Orang Judah enda nyembah Allah Taala aki ini sida enggau pengabis ati sida.
34 Semua utai bukai ti udah dikereja Jehosapat, kenyau ari pun nyentuk ngagai pengujung perintah iya, bisi dituliska magang dalam Jerita Lama Pasal Jehu Anak Hanani, siti ari Jerita Lama Pasal Raja Menua Israel.
35 Raja Jehosapat udah sekali beserakup enggau Raja Ahasiah menua Israel, ti udah ngereja mayuh macham penyai.
36 Ba penyangkai kapal di Esion-geber sida bisi udah ngaga kapal ti ulih belayar di tasik.
37 Tang Elieser anak Dodabahu, ari nengeri Meresah, bisi meri jaku tangkan ngagai Jehosapat, “TUHAN deka ngerusak utai ti udah digaga nuan, laban nuan udah setanah enggau Ahasiah.” Semua kapal iya pechah magang lalu nadai kala belayar.
 
Bagi 21
1 Jehosapat mati lalu dikuburka ba lumbung bala raja di Nengeri David, lalu anak iya Jehoram nganti iya nyadi raja.
 
Raja Jehoram Menua Judah (2 Raja 8.17-24)
2 Jehoram anak Jehosapat menua Judah bisi enam iku menyadi lelaki: Asariah, Jehiel, Sekariah, Asariahu, Mikael, enggau Sepatiah.
3 Apai sida udah meri sida mayuh emas, pirak enggau utai ti berega nyadika pesaka sida, sama enggau nengeri ti bekuta di menua Judah. Tang iya nyerahka perintah ngagai Jehoram, laban Jehoram nya anak tuai iya.
4 Lebuh Jehoram udah negapka diri nyadi raja, iya lalu ngasuh orang munuh sida menyadi lelaki iya, enggau sekeda bala pemesai orang Israel.
5 Jehoram berengkah nyadi raja lebuh umur iya tiga puluh dua taun, lalu iya merintah di Jerusalem lapan taun.
6 Iya neladan penyai ulah Raja Ahap, enggau sida raja menua Israel ti bukai, laban iya jadi enggau siku ari anak indu Ahap. Iya bedosa ngelaban TUHAN,
7  tang TUHAN enggai ngerusak perintah David, laban Iya udah ngaga sempekat enggau David, lalu besemaya deka ngasuh peturun iya nampung perintah iya.
8 Lebuh Jehoram megai perintah, Edom angkat ngelaban perintah orang Judah, lalu merintah diri empu.
9 Jehoram enggau bala pemesai iya mai kerita perang sida lalu nyerang Edom. Bala soldadu Edom lalu ngelulung sida, tang malam nya sida ulih ngebuska kelulung munsuh lalu rari.
10 Kenyau ari nya Edom mengkang merintah diri lalu enda agi diperintah menua Judah. Lebuh maya nya, nengeri Libnah mega angkat ngelaban perintah orang Judah, laban Jehoram udah ninggalka TUHAN Allah Taala aki ini iya.
11 Iya begagaka endur alai orang kapir nyembah petara sida ba menua ti bebukit di menua Judah, lalu iya nguluka orang Judah enggau orang Jerusalem bedosa ngelaban TUHAN.
12 Nabi Elijah ngirumka siti surat ngagai Jehoram munyi tu: “TUHAN Allah Taala aki nuan David, ngukum nuan, laban nuan enda neladan apai nuan, Raja Jehosapat, tauka neladan aki nuan Raja Asa.
13 Nuan udah nunda sida raja menua Israel ti bukai, lalu udah nguluka orang Judah enggau orang ke diau di Jerusalem enda tetap ati ngagai Allah Taala, baka Ahap enggau orang ke nganti iya, nguluka orang Israel enda tetap ati ngagai Allah Taala. Laban nuan udah munuh sida menyadi nuan, enggau bala ruang bilik apai nuan, ti manah agi ari nuan empu,
14 TUHAN deka balat ngukum bala nembiak nuan, bala anak nuan enggau bala bini nuan, lalu deka ngerusak pesaka nuan,
15 lalu nuan empu deka ngidapka penyakit pedis perut, ti deka majak balat-sebalat ari hari siti ngagai hari siti.”
16 TUHAN lalu nyungkak orang Pilistin enggau orang Arab ti diau semak orang Etiopia ti udah ngentapka diri ba tebing tasik, angkat ngelaban Jehoram.
17 Sida mansang ngelaban menua Judah, nyerang menua nya, lalu ngerampas semua utai ari istana, lalu nabanka semua bala bini enggau bala anak raja nyadi orang tangkap, kelimpah ari anak bunsu iya ke benama Ahasiah.
18 Udah nya TUHAN lalu ngasuh Raja Jehoram sakit pedis perut ti enda nemu gerai.
19 Penyakit nya majak balat-sebalat nyau deka bulih dua taun, ti ngujungka iya balat amat pedis datai ke mati. Bala nembiak ke diperintah iya nadai nungkunka api kena ngulitka iya, enda baka lebuh aki ini iya mati menya.
20 Jehoram berengkah nyadi raja lebuh umur iya tiga puluh dua taun, lalu iya merintah di Jerusalem lapan taun. Nadai orang ngulitka iya lebuh iya mati. Sida nguburka iya di Nengeri David, tang ukai ba lumbung bala raja.
 
Bagi 22
Raja Ahasiah Menua Judah (2 Raja 8.25-29; 9.21-28)
1 Orang ke diau di Jerusalem lalu nyiri anak bunsu Jehoram ke benama Ahasiah nyadi raja; laban bala soldadu ke datai ngagai kem sama enggau orang Arab udah munuh semua anak iya ke tuai agi. Nya alai Ahasiah anak Jehoram dichiri nyadi raja menua Judah.
2 Ahasiah umur dua puluh dua taun lebuh iya berengkah nyadi raja; iya merintah setaun di Jerusalem. Indai iya Ataliah uchu Omri.
3 Ahasiah mega neladan ruang bilik Raja Ahap, laban indai iya Ataliah, ke nyadika penyanding iya, nguluka iya ngereja penyai.
4 Iya bedosa ngelaban TUHAN baka Raja Ahap, laban udah bekau pemati apai iya, orang ari ruang bilik Raja Ahap nyadika penyanding penemu iya, ke ngujungka iya dirusak.
5 Iya nitihka jaku lalau sida, lalu beserakup enggau Raja Jehoram anak Raja Ahap orang Israel, nyerang Raja Hasael menua Aram, betempuh enggau bala raja nya ba Ramot-giliat, lalu Joram bakal laban orang Aram lebuh perang nya.
6 Iya lalu pulai ngagai nengeri Jesril nganti bakal diri suman, lalu Ahasiah nemuai ngabas iya.
7 Tang Allah Taala udah ngeletak Ahasiah dibuai ngena penemuai iya ngagai Joram. Lebuh Ahasiah nemuai ngagai Joram, seduai iya betemu enggau Jehu anak Nimsi, ti udah dipilih TUHAN ngerusak ruang bilik Raja Ahap.
8 Lebuh Jehu benung bejalaika ukum Allah Taala ngagai peturun Ahap, iya betemu enggau seraban bala tuai orang Judah enggau bala anak menyadi Ahasiah ti udah sama nemuai enggau Ahasiah. Jehu munuh semua sida.
9 Jehu lalu begigaka Ahasiah, lalu nemu iya belalai di Samaria. Ahasiah lalu dibai ngagai Jehu lalu dibunuh. Tang sida nguburka bangkai iya, laban sida bebasaka aki iya Raja Jehosapat, ke udah enggau naka ulih betuaika TUHAN. Nadai siku sida Ahasiah sebilik agi tinggal megai perintah di menua nya.
 
Kuin Ataliah Menua Judah (2 Raja 11.1-3)
10 Lebuh Ataliah, indai Raja Ahasiah ninga anak iya udah mati, iya lalu ngasuh semua sida raja orang Judah sebilik dibunuh magang.
11 Ahasiah bisi siku menyadi-tiri ti indu ke benama Jehoseba, ke jadi enggau siku imam ke benama Jehoiada. Indu nya, enggau chara belalai, ngidupka siku anak Ahasiah, ke benama Joas, nabanka iya ari bala menyadi iya ke baru deka dibunuh, lalu ngelalaika iya enggau siku orang ke ngibun iya ba bilik tinduk dalam Rumah Sembiang. Iya majak ngelalaika Joas, lalu Ataliah enda ulih munuh iya.
12 Joas dilalaika dia enam bulan, sekumbang Ataliah ke merintah nyadi kuin.
 
Bagi 23
Orang Angkat Ngelaban Kuin Ataliah(2 Raja 11.4-16)
1 Lebuh Imam Jehoiada udah nganti enam taun, iya bepekat enggau lima iku pemesai soldadu, iya nya Asariah anak Jeroham, Ismail anak Jehohanan, Asariah anak Obet, Maseiah anak Adaiah, enggau Elisapat anak Sikri.
2 Sida bejalai ngagai semua nengeri di menua Judah, lalu mai enggau sida pulai ngagai Jerusalem orang Lewi enggau semua tuai peturun.
3 Semua sida lalu begempuru dalam Rumah Sembiang, lalu dia sida ngaga siti sempekat enggau Joas, anak lelaki raja. Ku Jehoiada bejaku enggau sida, “Tu anak lelaki raja. Iya diatu enda tau enda nyadi raja, laban TUHAN udah besemaya deka ngasuh peturun David nyadi raja.
4 Tu utai ti deka dikereja kitai. Lebuh bala imam enggau orang Lewi datai ngereja pengawa sida ba Hari Sabat, sida deka dibagi ngagai tiga bagi. Sebagi deka nyaga mua pintu Rumah Sembiang,
5 sebagi deka nyaga istana, lalu sebagi ti bukai deka nyaga ba mua Pintu Pemun. Lalu semua orang mayuh deka begempuru magang ba tengah laman Rumah Sembiang.
6 Nadai orang tau tama ngagai rumah ti dalam Rumah Sembiang, kelimpah ari bala imam enggau orang Lewi ke endang bekereja dia. Sida tau tama, laban sida udah dikuduska, tang orang bukai enda tau enda ngasika atur TUHAN, lalu diau di luar.
7 Orang Lewi enda tau enda bekelingika raja lalu nyandang pedang nyaga iya, sereta bejalai enggau raja ngagai sebarang endur iya bejalai. Barang sapa nguji tama ngagai Rumah Sembiang enda tau enda dibunuh.”
8 Orang Lewi enggau orang Judah lalu bejalaika atur Jehoiada. Orang ke ngetu gawa ba Hari Sabat, enda dikemendarka pulai ngagai rumah diri, ngambika bala tuai selalu bisi orang ke tau diasuh sida, iya nya sida ke datai mansang gawa enggau sida ke udah ngetu gawa.
9 Jehoiada meri ngagai bala pemesai soldadu sangkuh enggau terabai Raja David, ti udah disimpan dalam Rumah Sembiang.
10 Iya ngasuh orang ke bediri ngelingi mua Rumah Sembiang nyintak lalu nyandang pedang sida nyaga raja.
11 Udah nya Jehoiada nguluka Joas pansut, ngengkahka makota ba pala iya, lalu meri iya siti Bup Adat pasal tanggungjawap raja. Nya alai Joas dichiri nyadi raja. Imam Jehoiada enggau bala anak lelaki iya nata Joas, lalu semua orang manjung, “Gayu-guru meh raja!”
12 Lebuh Ataliah ninga orang mayuh manjung gaga ati ke raja, iya lalu beguai-guai mansang ngagai Rumah Sembiang, alai orang mayuh ke begempuru.
13 Dia iya lalu tepedaka raja ti baru nya ba penama ngagai Rumah Sembiang, bediri ngimbai tiang ti besai ti endang diungkupka bala raja, dikelingi bala pemesai soldadu enggau orang ke nyepu terumpit. Semua orang manjung magang gaga ati, sereta nyepu terumpit, diuluka orang ke nebah musik dalam Rumah Sembiang ngena pekekas musik sida. Ataliah lalu nyarikka gari diri lalu iya manjung, “Penipu! Penipu!”
14 Jehoiada enda nyagi Ataliah dibunuh ba kandang Rumah Sembiang, nya alai iya mesanka bala pemesai soldadu, lalu ku iya bejaku enggau sida, “Bai Ataliah pansut ensaraka rintai bala jejaga, lalu bunuh barang sapa nguji ngelepaska iya.”
15 Sida nangkap Ataliah, mai iya ngagai istana, lalu sida munuh iya dia ba Pintu Kuda.
 
Imam Jehoiada Ngaga Atur Ti Baru (2 Raja 11.17-20)
16 Imam Jehoiada lalu ngasuh Raja Joas enggau orang mayuh enggau iya ngaga siti sempekat madahka diri deka nyadi nembiak TUHAN.
17 Udah nya semua sida lalu mansang ngagai rumah sembiang Baal, lalu ngeruntuhka rumah nya. Sida mechahka alta enggau engkeramba ti ba endur nya, lalu munuh Matan ti nyadi imam Baal, di mua alta.
18 Jehoiada lalu ngeletak bala imam enggau orang Lewi ngereja pengawa dalam Rumah Sembiang. Sida deka ngereja pengawa ti udah diletak Raja David, lalu nunu piring ti diberi ngagai TUHAN nitihka Adat Moses. Sida mega betanggungjawapka musik enggau ngatur pengerami.
19 Jehoiada mega ngasuh bala jejaga nyaga ba pintu Rumah Sembiang, kena nagang orang ke enda tuchi tama.
20 Bala pemesai soldadu, bala tuai bansa, bala pemesai perintah, enggau semua orang mayuh lalu sama bejalai enggau Jehoiada ngiring raja ari Rumah Sembiang ngagai istana. Sida tama nengah pintu besai, lalu raja nudukka diri ba kerusi diraja.
21 Semua orang mayuh gaga ati magang, lalu nengeri nya nadai agi pengachau, laban Ataliah udah dibunuh.
 
Bagi 24
Raja Joas Menua Judah (2 Raja 12.1-16)
1 Joas berengkah nyadi raja menua Judah lebuh umur iya tujuh taun, lalu iya merintah di Jerusalem empat puluh taun. Indai iya Sibiah, ari nengeri Beer-seba.
2 Iya ngereja utai ti ngerinduka ati TUHAN, seagi-agi Imam Jehoiada mengkang idup.
3 Jehoiada milih dua iku indu nyadika bini Raja Joas, lalu bini Joas ke dua iku nya ngadaka anak lelaki enggau anak indu.
4 Lebuh Joas udah lama nyadi raja, iya bekira deka ngaduka Rumah Sembiang.
5 Iya bejaku enggau bala imam enggau orang Lewi ngasuh sida mansang ngagai semua nengeri di menua Judah, mupu duit ari semua orang mayuh chukup kena ngaduka Rumah Sembiang. Iya ngasuh sida berengkah gawa tekala nya. Tang orang Lewi ngerindang diri.
6 Nya alai iya mesanka Jehoiada ti nyadi tuai sida, lalu nanya, “Nama kebuah nuan nadai udah ngasuh orang Lewi mupu duit ari menua Judah enggau ari Jerusalem ti patut dibayar orang mayuh kena melanja Langkau Kain TUHAN nitihka atur Moses, ke nembiak TUHAN?”
7 (Bala orang ke nitihka Ataliah, indu ke jai nya, udah ngerusak Rumah Sembiang, lalu udah nyembah Baal ngena mayuh utai ti kudus dia.)
8 Raja lalu ngasuh orang Lewi ngaga siti peti alai nyimpan duit pupu, lalu ngengkahka peti nya ba mua pintu Rumah Sembiang.
9 Sida lalu ngirumka jaku gerah ngagai serata nengeri Jerusalem enggau menua Judah, ngasuh semua orang mai ngagai TUHAN duit pupu baka ke udah terubah digumpul Moses, ti nembiak TUHAN, di menua puang.
10 Orang mayuh enggau bala tuai sida gaga ati ninga jaku gerah nya, lalu sida mai duit pupu sida lalu ngisi peti nya.
11 Tiap hari orang Lewi mai peti nya ngagai pemesai raja ke betanggungjawapka utai nya. Lebuh peti nya penuh, kerani raja enggau pengari Imam Besai ngambi duit nya ari peti nya, lalu mulaika peti nya ngagai endur peti nya diengkah. Nya alai sida mupu mayuh amat duit.
12 Raja enggau Jehoiada meri duit nya ngagai orang ke nyadi tuai ngaduka Rumah Sembiang, lalu sida ngaji orang ke landik begagaka utai ari batu, tukang kayu, tukang tempa, ngambika sida ngaduka Rumah Sembiang.
13 Semua sida nya bebendar amat gawa, lalu sida ulih ngaduka Rumah Sembiang nya sebaka enggau gamal asal iya, sereta tegap.
14 Lebuh pengawa nya udah tembu, emas enggau pirak ti laluh lalu diberi ngagai raja enggau ngagai Imam Jehoiada. Seduai iya lalu ngasuh orang ngena emas enggau pirak ti laluh nya begagaka mangkuk enggau pekekas bukai ke Rumah Sembiang.
 
Atur Jehoiada Enda Dikena Agi
Lebuh Jehoiada agi idup, piring endang seruran diberi ba Rumah Sembiang.
15 Lebuh umur iya manggai seratus tiga puluh taun, iya mati.
16 Sida nguburka iya ba lumbung bala raja di Nengeri David kena sida ngingatka pemanah pengawa ti udah dikereja iya ke orang Israel, ke Allah Taala, enggau ke Rumah Sembiang.
17 Tang lebuh Jehoiada udah mati, bala tuai orang Judah mujuk Raja Joas mendingka sida.
18 Nya alai orang mayuh badu agi nyembah dalam Rumah TUHAN Allah Taala aki ini sida, lalu sida belabuh nyembah engkeramba, enggau anak patung petara indu Aserah. TUHAN lalu ringat ngagai menua Judah enggau Jerusalem.
19 TUHAN ngasuh bala nabi meri jaku tangkan ngagai sida, ngasuh sida pulai baru ngagai Iya, tang orang mayuh enggai mending.
20 Udah nya Roh Allah Taala lalu bekuasa ba Sekariah anak Imam Jehoiada. Iya bediri ba endur alai iya ulih dipeda orang mayuh, lalu bejaku enggau nyawa ti inggar, “TUHAN Allah Taala nanyaka kebuah kita enda agi ngasika pesan Iya, lalu ngasuh diri ditinggang penusah ti besai tu! Laban kita udah ninggalka Iya, nya alai Iya ninggalka kita!”
21 Orang mayuh lalu bepekat ngelaban Sekariah ari asuh raja. Sida nuku iya ngena batu ba tengah laman Rumah Sembiang.
22 Raja Joas enda ingatka pemanah Jehoiada, apai Sekariah, enggau iya, lalu iya ngasuh orang munuh Sekariah. Lebuh Sekariah nyau deka ngapuska seput, iya ngangau, “Awakka TUHAN meda lalu malas!”
 
Pengujung Perintah Joas
23 Ba pun musin chelap taun nya, bala soldadu orang Siria nyerang menua Judah enggau Jerusalem, munuh semua tuai bansa, lalu nabanka mayuh amat perapasan ngagai Damaskus.
24 Bala soldadu orang Siria enda mayuh, tang TUHAN nejuka sida ngalahka bala soldadu orang Judah ke mayuh agi ari sida, laban orang Judah udah ninggalka TUHAN Allah Taala aki ini sida. Nya meh chara Raja Joas diukum.
25 Iya balat amat bakal, lalu lebuh bala munsuh pulai, dua iku pemesai iya bepekat ngelaban iya, lalu munuh iya lebuh iya gali ba katil, laban iya udah munuh anak Imam Jehoiada. Joas dikuburka di nengeri David, tang ukai ba lumbung bala raja.
26 (Orang ke bepekat ngelaban Joas nya Sabat anak Sime-at, orang Amon, enggau Jehosabat anak Simrit orang bansa Moap.)
27 Cherita pasal bala anak lelaki Joas, jaku ti benabi ti disebut ngelaban iya, enggau cherita pasal chara iya ke ngaduka Rumah Sembiang, bisi dituliska magang dalam Jaku Kenang Pasal Bup Raja. Anak iya ke benama Amasiah nganti iya nyadi raja.
 
Bagi 25
Raja Amasiah Menua Judah (2 Raja 14.2-6)
1 Amasiah berengkah nyadi raja lebuh umur iya dua puluh lima taun, lalu iya merintah di Jerusalem dua puluh semilan taun. Indai iya Jeho-adin datai ari Jerusalem.
2 Iya ngereja utai ti ngerinduka ati TUHAN, tang enggau ati ti lembau.
3 Lebuh iya udah negapka perintah iya, iya lalu munuh bala pemesai ti udah munuh apai iya.
4 Tang iya enda munuh bala anak orang nya, laban iya nitihka pesan TUHAN dalam Adat Moses: “Apai indai enda tau dibunuh ketegal penyalah anak sida, lalu anak enda tau dibunuh ketegal penyalah apai indai sida. Orang semina tau dibunuh ketegal penyalah sida empu.”
 
Perang Ngelaban Edom
5 Udah nya Raja Amasiah ngempuruka semua lelaki ari raban bansa Judah enggau Benjamin nyadi soldadu nitihka raban peturun sida, lalu ngeletak pemesai nyadi tuai ke raban seribu iku enggau raban seratus iku sida. Iya ngempuruka 300,000 iku lelaki ke umur dua puluh taun ke atas, orang ke tau enggau beperang, ke sikar bekenaka sangkuh enggau terabai.
6 Nambahka nya, iya mega ngaji 100,000 soldadu ari menua Israel, ngena ungkus kira empat tan pirak.
7 Tang siku nabi mansang ngagai Raja Amasiah, lalu bejaku enggau iya, “Anang mai bala soldadu orang Israel tu enggau nuan, laban TUHAN nadai enggau orang ke datai ari perintah ti di utara.
8 Enti nuan ngumbai diri kering beperang ngena chara tu, Allah Taala deka ngasuh nuan alah laban munsuh; laban Allah Taala bisi kuasa nulung tauka ngalah.”
9 Amasiah lalu nanya ngagai nabi nya, “Tang kati ku semua pirak ti udah dibayar kena aku ngaji sida?”
Ku nabi nya nyaut, “TUHAN ulih meri nuan mayuh agi pirak ari nya!”
10 Amasiah lalu ngasuh bala soldadu ke digaji nya pulai ngagai menua sida empu. Bala soldadu nya lalu pulai, balat amat ringat ngagai orang Judah.
11 Enggau ati ti berani Amasiah nguluka bala soldadu iya ngagai Lebak Garam. Dia sida ngelaban lalu munuh sepuluh ribu iku soldadu orang Edom.
12 Orang Judah nangkap sepuluh ribu iku ti bukai, lalu mai orang tangkap nya ngagai pala tingkah batu di nengeri Sela, lalu muai sida ke baruh. Semua sida redak magang.
13 Tang bala soldadu orang Israel ti enda disagi Amasiah mansang enggau iya beperang, lalu nyerang nengeri orang Judah entara Samaria enggau Bet-horon, munuh tiga ribu iku lelaki dalam nengeri nya, lalu ngerampas mayuh amat perapasan.
14 Lebuh Amasiah pulai udah bekau iya ti ngalahka orang Edom, iya mai engkeramba sida, nirika engkeramba nya, nyembah lalu meri piring ngagai engkeramba nya.
15 Nya alai TUHAN ringat ngagai Amasiah, lalu ngasuh siku nabi mansang ngagai Amasiah. Nabi nya lalu nanya, “Nama kebuah nuan nyembah petara orang bansa bukai ke enda ulih ngelepaska sida empu ari kuasa nuan?”
16 Tang lebuh nabi nya agi benung bejaku, Amasiah lalu ngelampat jaku iya, ku iya, “Kemaya nuan udah diasuh nyadi penyanding penemu ke raja? Badu agi nuan bejaku, enggai ke aku ngasuh orang munuh nuan!”
Nabi nya lalu badu agi bejaku. Tang sebedau iya badu bejaku, iya sempat nyebut, “Aku nemu Allah Taala udah mutuska runding deka ngerusak nuan laban nuan udah ngereja semua utai tu, lalu enda mendingka jaku lalau aku.”
 
Perang Ngelaban Orang Israel (2 Raja 14.8-20)
17 Udah nya Raja Amasiah enggau bala pemesai iya baum lalu ngirumka pesan ngagai Raja Jehoas anak Jehoahas, uchu Jehu menua Israel, nyakap iya lalu mai iya belaban.
18 Jehoas ngirumka saut ngagai Amasiah raja menua Judah: “Nyadi sekali madang duri di Bukit Lebanon ngirumka pesan ngagai kayu sidar: ‘Awakka anak indu nuan jadi enggau anak lelaki aku.’ Siku jelu babas mansa, lalu ngindik madang duri nya.
19 Nuan Amasiah temegah madahka diri udah ngalahka orang Edom, tang aku ngelalau nuan, anang mindah ari rumah. Nama kebuah ngaga pengachau ti semina deka ngenusahka nuan enggau bala nembiak nuan?”
20 Tang Amasiah enggai mending ari asuh Allah Taala, ngambika sida alah laban munsuh sida, laban sida udah nyembah engkeramba orang Edom.
21 Nya alai Jehoas, raja menua Israel nyerang Amasiah, raja menua Judah. Sida besatup ba Bet-semes di menua Judah.
22 Soldadu orang Judah alah laban bala orang Israel, lalu bala soldadu sida rari ngagai rumah diri empu.
23 Jehoas raja menua Israel nangkap Amasiah raja menua Judah, lalu mai iya ngagai Jerusalem. Dia Raja Jehoas lalu ngeruntuhka kuta nengeri nya sepemanjai 200 meter, berengkah ari Pintu Epraim nyentuk ngagai Pintu Sukut.
24 Iya mai ngagai Samaria nyadika perapasan iya semua emas enggau pirak ti dalam Rumah Sembiang, pekekas ti dikena dalam Rumah Sembiang ti dijaga bala peturun Obet-edom, enggau reta tengkira ti dalam istana. Iya mega mai orang tangkap.
25 Raja Amasiah mengkang idup lima belas taun udah bekau pemati Raja Jehoas menua Israel.
26 Semua utai bukai ti udah dikereja Amasiah ari pun ngagai pengujung perintah iya bisi dituliska magang dalam Jerita Lama Pasal Raja Menua Judah Enggau Raja Menua Israel.
27 Kenyau ari maya iya ninggalka TUHAN, orang udah bepekat ngelaban iya di Jerusalem. Iya lalu rari ngagai nengeri Lakis, tang sida nitihka iya ngagai nengeri nya, lalu munuh iya dia.
28 Bangkai iya ditepanka ba kuda lalu dibai ngagai Jerusalem, lalu iya dikuburka ba lumbung bala raja di Nengeri David.
 
Bagi 26
Raja Usiah Menua Judah(2 Raja 14.21-22; 15.1-7)
1 Semua orang Judah milih anak lelaki Amasiah ke benama Usiah, ke umur enam belas taun, nganti apai iya nyadi raja. (
2 Udah bekau pemati Amasiah, Usiah ngalah lalu nirika nengeri Elat lalu mulaika nengeri nya ngagai Judah.)
3 Usiah nyadi raja lebuh umur iya enam belas taun, lalu iya merintah di Jerusalem lima puluh dua taun. Indai iya Jekoliah, ari Jerusalem.
4 Iya ngereja utai ti ngerinduka ati TUHAN, neladan apai iya.
5 Sekumbang Sekariah, ti nyadi penyanding penemu iya, agi idup, Usiah betuaika TUHAN enggau ati ti tetap, lalu Allah Taala merekatka iya.
6 Usiah nyerang orang Pilistin. Iya ngeruntuhka kuta nengeri Gat, Jabnil, enggau Asdot, lalu iya nirika nengeri ti bekuta semak Asdot, enggau ba endur bukai di menua Pilistin.
7 Allah Taala nulung iya ngalahka orang Pilistin, orang Arab ti diau di Gurbaal, enggau orang Meun.
8 Orang Amon mayar chukai ngagai Usiah, lalu kuasa iya amat besai datai ke berita pasal iya nyau ngelekai nyentuk ngagai menua Ejip.
9 Kena negapka kuta nengeri Jerusalem, Usiah ngaga menara ba Pintu Sukut, Pintu Lebak, enggau ba sukut kuta nya.
10 Iya mega ngaga menara ti bekuta di menua pesisir, lalu numbak berapa buah telaga, laban iya nupi mayuh amat jelu ba kaki bukit di barat enggau ba emperan. Iya rinduka pengawa umai, nya alai iya meransang orang Judah bekebun anggur ba menua ti bebukit, lalu bumai tanah ti ami.
11 Bala soldadu iya mayuh, lalu sida endang seruran sedia deka beperang. Cherita pasal utai ti dikereja bala soldadu iya dituliska magang ulih kerani iya Jeiel seduai Maseiah ari baruh Hananiah, siku ari orang ke bekereja ke raja.
12 Bala soldadu raja diuluka 2,600 iku bala pemesai.
13 Sida pemesai tu nguluka 307,500 iku soldadu ke ulih ngelaban munsuh ngarika raja.
14 Usiah meri ngagai bala soldadu iya terabai, sangkuh, selapuk kebal, baju kebal, panah enggau laja, enggau batu ti deka ditimbakka ngena pangwang.
15 Orang ke diasuh iya begagaka utai di Jerusalem, ngaga semacham pekekas kena nimbakka laja, enggau kena nimbakka batu ari menara enggau ari sukut kuta nengeri. Berita pasal iya ngelekai ngagai semua endur, lalu iya nyadi orang ke besai kuasa ari tulung Allah Taala.
 
Usiah Diukum Ketegal Penyumbung Iya
16 Tang lebuh Usiah nyau udah kering, iya sumbung. Penyumbung iya ngujungka iya dibuai. Iya enda ngasika TUHAN Allah Taala iya laban iya mansang ngagai Rumah Sembiang lalu nunu menyan ba alta ti alai nunu menyan.
17 Imam Asariah, disempulang lapan puluh iku imam ke kering sereta berani, lalu nitihka raja
18 deka nagang iya. Ku sida, “Usiah! Nuan nadai hak nunu menyan ke TUHAN. Semina imam ke ari peturun Aron aja, ti udah dikuduska, tau ngereja pengawa nya. Angkat nuan ari tu. TUHAN Allah Taala udah ringat ngagai nuan, lalu Iya enggai agi merekatka nuan.”
19 Usiah lalu ringat. bediri tegir-tegir dia dalam Rumah Sembiang, ngimbai alta ti alai nunu menyan, megai utai ti dikena nunu menyan. Iya lalu ringat ngagai bala imam. Tekala nya penyakit kulit ti tau ngerampit lalu pegari ba kening iya.
20 Asariah enggau sida imam ti bukai lalu genung-genung merening meda kening raja. Udah nya sida lalu mejalka iya angkat ari Rumah Sembiang. Iya lalu beguai-guai pansut, laban TUHAN udah ngukum iya.
21 Kenyau ari nya, nyentuk ngagai pemati iya, iya nyadi orang ke enda tuchi ketegal penyakit nya. Iya nadai agi tau tama ngagai Rumah Sembiang. Iya diau dalam rumah iya empu. Semua kuasa iya dirampas ari iya, lalu iya diganti anak iya ke benama Jotam megai perintah di menua nya.
22 Nabi Isaiah anak Amos bisi nuliska semua utai bukai ti udah dikereja Raja Usiah lebuh maya Usiah megai perintah.
23  Usiah mati lalu dikuburka ba tanah kubur bala raja, tang laban iya ngidapka penyakit kulit, iya enda dikuburka ba lumbung bala raja empu. Anak iya Jotam nganti iya nyadi raja.
 
Bagi 27
Raja Jotam Menua Judah (2 Raja 15.32-38)
1 Jotam nyadi raja lebuh umur iya dua puluh lima taun, lalu iya merintah di Jerusalem enam belas taun. Indai iya Jerusah anak Sadok.
2 Iya ngereja utai ti ngerinduka ati TUHAN, baka apai iya. Tang iya enda bedosa betunuka menyan dalam Rumah Sembiang baka apai iya. Tang orang mayuh majak bedosa.
3 Jotam nya meh orang ke ngaga Pintu Utara ke Rumah Sembiang, lalu iya mega ngaduka kuta di Jerusalem ba endur ti dikumbai Opel.
4 Iya ngaga mayuh bengkah nengeri di menua ti bebukit di menua Judah. Lalu iya begagaka kuta enggau menara.
5 Iya ngelaban raja menua Amon enggau bala soldadu raja nya, lalu ngalahka sida. Udah nya iya mejalka orang Amon mayar chukai genap taun dalam tiga taun, ngagai iya baka tu: 3,400 kilogram pirak, 1,000 tan gandum, enggau 1,000 tan barli.
6 Jotam bekuasa laban iya tetap ati ngasika TUHAN Allah Taala iya.
7 Utai bukai ti nyadi lebuh Jotam megai perintah, perang enggau polisi iya, bisi dituliska magang dalam Jerita Lama Pasal Raja Menua Israel enggau Menua Judah.
8 Umur Jotam dua puluh lima taun lebuh iya berengkah nyadi raja, lalu iya merintah di Jerusalem enam belas taun.
9 Iya mati lalu dikuburka di nengeri David, lalu anak lelaki iya Ahas nganti iya nyadi raja.
 
Bagi 28
Raja Ahas Menua Judah (2 Raja 16.1-4)
1 Ahas nyadi raja lebuh umur iya dua puluh taun, lalu iya merintah di Jerusalem enam belas taun. Iya enda neladan pemanah pengawa aki iya Raja David, tang ngereja utai ti enda ngerinduka ati TUHAN
2 lalu neladan sida raja menua Israel. Iya ngasuh orang ngaga engkeramba Baal ari besi,
3 betunuka menyan ba Lebak Hinom. Indah anak lelaki iya empu deh diserahka iya nyadika piring tunu ngagai engkeramba nya, nunda utai ti jai ti udah dikereja orang ke udah diburu TUHAN ari menua nya lebuh orang Israel nyerang.
4 Ahas ngenjuk piring sereta nunu menyan ba genap iti endur alai orang kapir nyembah petara sida, ba sebelah bukit enggau ba endur ti lindung di baruh kayu.
 
Perang Ngelaban Orang Siria Enggau Orang Israel (2 Raja 16.5)
5-6 Laban Raja Ahas bedosa, nya alai TUHAN Allah Taala iya nejuka raja menua Siria ngalahka iya, lalu nabanka mayuh orang Judah ngagai Damaskus nyadi orang tangkap. TUHAN mega nejuka Pekah anak Remaliah, raja menua Israel ngalahka Ahas, lalu dalam sehari aja munuh 120,000 soldadu orang Judah ke pemadu berani. TUHAN Allah Taala aki ini sida, ke ngemendarka utai tu nyadi, laban orang Judah udah ninggalka Iya.
7 Siku soldadu orang Israel ke benama Sikri munuh anak lelaki Raja Ahas ke benama Maseiah, ke ngemataka pekara dalam istana, enggau Elkanah, ti nyadi lumur dua raja.
8 Taja pen orang Judah nya raban bansa sida empu, orang Israel nangkap 200,000 iku indu enggau bala nembiak nyadi orang tangkap, enggau mayuh amat perapasan lalu mai semua utai nya ngagai Samaria.
 
Nabi Odet
9 Siku nabi TUHAN ke benama Odet bisi diau di nengeri Samaria. Iya betemu enggau bala soldadu orang Israel ke baru pulai beperang lalu baru deka tama ngagai nengeri, mai orang Judah ke ditangkap sida. Ku nabi nya bejaku, “TUHAN Allah Taala aki ini kita ringat ngagai orang Judah, lalu nejuka kita ngalahka sida, tang diatu Iya udah ninga pasal pemalat kita udah bebunuhka sida.
10 Nyadi diatu kita deka ngaga bala lelaki enggau indu orang Jerusalem enggau Judah nyadi ulun kita. Kati kita enda nemu diri udah mega bedosa ngelaban TUHAN Allah Taala kita?
11 Pendingka aku! Orang tangkap tu sida menyadi lelaki enggau menyadi indu kita. Lepaska sida, enggai ke TUHAN ringat lalu ngukum kita.”
12 Empat iku tuai ari perintah ti di utara, Asariah anak Jehohanan, Berekiah anak Mesilemot, Jehiskiah anak Salum, enggau Amasa anak Hadlai, mega enda besetuju enggau utai ti udah dikereja bala soldadu.
13 Ku sida, “Anang mai orang tangkap tu kitu! Kitai udah bedosa ngelaban TUHAN, lalu udah ngasuh Iya udah chukup ringat, datai ke Iya nyau deka ngukum kitai. Lalu diatu kita deka ngereja utai kena nambahka penyalah kitai.”
14 Nya alai bala soldadu lalu nyerahka orang tangkap enggau perapasan sida ngagai orang mayuh enggau ngagai tuai sida,
15 lalu orang ke empat iku nya diletak meri gari ari perapasan nya ngagai orang tangkap nya. Sida lalu meri sida gari enggau kasut, pemakai ti chukup, lalu ngunsut abi telih sida ngena minyak kana. Sida ke kelalu lembut tulang, sereta enda ulih bejalai, lalu ditepanka sida ba keledai, lalu semua orang tangkap nya dianjung pulai ngagai Jeriko di menua Judah, alai ti mayuh kayu engkerema. Udah nya orang Israel lalu pulai ngagai Samaria.
 
Ahas Minta Tulung Orang Asiria (2 Raja 16.7-9)
16-17 Orang Edom belabuh nyerang menua Judah baru, lalu bulih mayuh amat orang tangkap. Nya alai Raja Ahas minta Tiglat Pileser, raja menua Asiria, nulung iya.
18 Lebuh maya nya orang Pilistin benung nyerang nengeri di menua ti ba kaki bukit di barat enggau di selatan menua Judah. Sida ngalahka nengeri Bet-semes, Aijalon, enggau Gederot, enggau nengeri Soko, Timnah, enggau Gimso, enggau genturung pendiau ti ngelingi nengeri nya, lalu ngentapka diri dia.
19 Laban Raja Ahas menua Judah enda bebasaka hak bala nembiak iya, lalu enda ngasika TUHAN, TUHAN ngasuh penusah ninggang menua Judah.
20 Raja besai menua Asiria enda nulung iya, tang ngelaban iya, lalu ngenusahka iya.
21 Nya alai Ahas ngambi emas ari Rumah Sembiang, ari istana, enggau ari rumah bala tuai bansa, lalu meri emas nya ngagai raja menua Asiria. Tang raja nya mengkang enggai nulung iya.
 
Dosa Ahas
22 Makin balat agi penusah ninggang iya, makin balat agi ga iya bedosa ngelaban TUHAN.
23 Iya ngenjuk piring ngagai petara orang Siria ti udah ngalahka iya. Ku iya, “Bala petara orang Siria udah nulung raja menua Siria. Nya alai, enti aku ngenjuk piring ngagai bala petara nya, kada enda sida deka mega nulung aku.” Utai tu ngasuh penusah ti besai ninggang iya enggau bansa iya empu.
24 Nambahka nya, iya ngambi semua pekekas dalam Rumah Sembiang, lalu mechahka utai nya. Iya nutup Rumah Sembiang, lalu ngaga alta ba genap bengkah endur di Jerusalem.
25 Iya ngaga endur alai orang kapir nyembah petara sida, alai sida betunuka menyan ke petara sida dalam semua nengeri ti besai enggau nengeri ti mit. Nya meh jalai iya ngasuh TUHAN Allah Taala aki ini iya, ringat ngagai iya.
26 Semua utai ti udah nyadi lebuh iya megai perintah, kenyau ari pun nyentuk ke ujung, bisi dituliska magang dalam Jerita Lama Pasal Raja Menua Judah Enggau Menua Israel.
27 Raja Ahas mati lalu dikuburka di Jerusalem, tang ukai ba lumbung bala raja. Iya lalu diganti anak lelaki iya Hesekiah nyadi raja.
 
Bagi 29
Raja Hesekiah Menua Judah (2 Raja 18.1-3)
1 Hesekiah nyadi raja menua Judah lebuh umur iya dua puluh lima taun, lalu iya merintah di Jerusalem dua puluh semilan taun. Indai iya Abijah anak Sekariah.
2 Iya ngereja utai ti ngerinduka ati TUHAN, neladan aki iya Raja David.
 
Nuchi Rumah Sembiang
3 Dalam bulan ti kesatu taun Hesekiah berengkah nyadi raja, iya muka semua pintu Rumah Sembiang, lalu ngasuh pintu nya diaduka baru.
4 Iya ngempuruka bala imam enggau orang Lewi ba tengah laman timur Rumah Sembiang
5 lalu bejaku ngagai sida dia. Ku iya, “Kita orang Lewi enda tau enda nguduska diri, lalu nuchi Rumah Sembiang TUHAN Allah Taala aki ini kita. Buai ari Rumah Sembiang nya semua utai ti ngamahka iya.
6 Sida aki ini kitai udah enda tetap ati ngagai TUHAN Allah Taala kitai, lalu udah ngereja utai ti nyungkak TUHAN ringat. Sida udah ninggalka Iya, lalu nguingka belakang sida ngagai endur alai Iya diau.
7 Sida udah nikupka pintu Rumah Sembiang, nejuka lampu padam, lalu enda nunu menyan tauka ngenjuk piring tunu dalam Rumah Sembiang Allah Taala ke disembah orang Israel.
8 Nya kebuah TUHAN ringat ngagai menua Judah enggau Jerusalem, lalu utai ti udah dikereja Iya ngagai sida udah ngasuh semua orang tekenyit ati sereta takut. Kita empu nemu nya.
9 Bala apai kitai udah mati beperang, lalu bala bini enggau bala anak kitai udah ditabanka munsuh nyadi orang tangkap.
10 “Diatu aku udah mutuska runding deka ngaga siti sempekat enggau TUHAN Allah Taala ke disembah orang Israel, ngambika Iya enda agi ringat ngagai kitai.
11 Anak, anang masau jam. Kita tu orang ke udah dipilih TUHAN nunu menyan ke Iya, sereta nguluka orang mayuh nyembah Iya.”
12-14 Tu nama orang Lewi ke bisi dia:
Ari raban peturun Kohat: Mahat anak Amasai, enggau Joel anak Asariah
Ari raban peturun Merari: Kis anak Abdi, enggau Asariah anak Jehalelel
Ari raban peturun Gerson: Joah anak Simah, enggau Eden anak Joah
Ari raban peturun Elisapan: Simri seduai Jeuel
Ari raban peturun Asap: Sekariah seduai Mataniah
Ari raban peturun Heman: Jehuel seduai Simei
Ari raban peturun Jedutun: Semaiah seduai Usiel
15 Bala sida tu lalu ngempuruka bala orang Lewi ti bukai, lalu semua sida bela nuchi diri magang. Udah nya, nitihka atur ti diberi Raja Hesekiah ngagai sida, sida lalu belabuh nuchi Rumah Sembiang, nitihka Adat TUHAN.
16 Bala imam tama ngagai Rumah Sembiang, deka nuchi rumah nya, lalu sida muai semua utai ti enda tuchi ngagai tengah laman Rumah Sembiang. Ari nya bala orang Lewi lalu mai semua utai nya pansut ari nengeri ngagai Lebak Kidron.
17 Pengawa nuchi Rumah Sembiang berengkah kena satu hari bulan ti kesatu, lalu kena lapan hari bulan nya, semua pengawa nya tembu magang dikereja, nyentuk ngagai bilik penama ti nuju ngagai Rumah Sembiang. Udah nya sida bekereja lapan hari da agi, nyentuk ngagai enam belas hari bulan nya, nyendiaka Rumah Sembiang alai besembiang.
 
Rumah Sembiang Diserahka Baru Ngagai Allah Taala
18 Orang Lewi lalu madahka ngagai Raja Hesekiah: “Kami udah tembu nuchi Rumah Sembiang, nyengkaum alta alai nunu piring, mija alai engkah roti ti kudus, enggau semua pekekas utai nya.
19 Kami udah mega mai pulai baru semua pekekas ti udah diambi Raja Ahas sekumbang iya ti enda tetap ati ngagai Allah Taala, lalu kami udah nyerahka utai nya baru ngagai TUHAN. Semua utai nya bisi di mua alta TUHAN magang.”
20 Raja Hesekiah lalu beguai-guai ngempuruka bala tuai nengeri, lalu semua sida sama mansang ngagai Rumah Sembiang.
21 Sida mai tujuh iku sapi ti lelaki, tujuh iku jelu bedus, tujuh iku anak domba, enggau tujuh iku kambin nyadika piring pengampun dosa sida raja sebilik, enggau dosa orang Judah, enggau kena nuchi Rumah Sembiang. Raja lalu ngasuh bala imam, ke ari peturun Aron, meri jelu nya nyadika piring ba alta.
22 Bala imam munuh sapi ti lelaki dulu, udah nya bedus, lalu udah nya anak domba, lalu sida ngunsaika darah siku-siku jelu nya ba alta nya.
23 Ke pengujung iya sida lalu mai kambin ngagai raja, enggau ngagai orang bukai ke besembiang dia, lalu semua sida bela ngengkahka jari sida ba kambin nya.
24 Udah nya bala imam lalu munuh kambin nya, lalu nuang darah jelu nya ba alta nyadika genselan kena muai dosa semua orang mayuh, laban raja udah ngasuh piring tunu enggau piring pengampun dosa, digagaka semua orang Israel.
25 Raja nitihka atur ti udah diberi TUHAN ngagai Raja David ngena Gat, ti nyadi nabi raja, enggau ngena nabi Natan. Iya ngasuh orang Lewi bepalan ba Rumah Sembiang, mai belikan enggau bebendai,
26 iya nya pekekas baka ke udah dikena Raja David. Bala imam mega bediri dia mai terumpit.
27 Hesekiah lalu ngasuh piring tunu nya dienjuk ba alta. Lalu lebuh pengawa nya berengkah, orang mayuh lalu belagu muji TUHAN, lalu bala orang ke nebah musik belabuh nebah terumpit enggau semua perengka musik ti bukai.
28 Semua orang ke bisi dia bela enggau nyembah TUHAN magang, lalu pengawa belagu enggau nebah musik dikereja enda ngetu-ngetu datai ke semua piring nya udah ditunu magang.
29 Udah nya Raja Hesekiah enggau semua orang mayuh besugang, lalu nyembah Allah Taala.
30 Raja enggau bala tuai bansa lalu ngasuh orang Lewi belagu ke TUHAN ngena lagu puji ti udah ditulis David enggau lagu ti udah ditulis nabi Asap. Semua orang lalu belagu magang enggau ati ti gaga, lebuh sida besugang nyembah Allah Taala.
31 Hesekiah lalu bejaku enggau orang mayuh, “Kita diatu udah nyerahka diri ngagai TUHAN, nya alai bai piring terima kasih kita ngagai TUHAN.” Sida lalu ngereja nya. Sekeda sida mega ngatika diri mai jelu nyadika piring tunu.
32 Sida mai tujuh puluh iku sapi ti lelaki, seratus iku jelu bedus, enggau dua ratus iku anak domba nyadika piring tunu ngagai TUHAN.
33 Sida mega mai enam ratus iku sapi ti lelaki, enggau tiga ribu iku jelu bedus nyadi piring ke diempa bala mayuh.
34 Tang bala imam ti munuh jelu nya enda chukup tubuh niti kulit semua jelu nya, nya alai orang Lewi nulung sida, datai ke pengawa nya tembu. Laban ba urung maya nya mayuh agi bala imam udah nuchi diri. (Orang Lewi lebih agi tetap ati ngintu diri tuchi ari bala sida imam.)
35 Nambahka piring tunu segala, bala sida imam mega betanggungjawap betunuka lemak ti udah diberi ari piring ti diempa orang mayuh, sereta betanggungjawap nuang wain ti diberi sama enggau piring tunu. Nya meh jalai pengawa nyembah TUHAN dalam Rumah Sembiang nyau dikereja baru.
36 Raja Hesekiah enggau orang mayuh bela gaga ati magang, laban Allah Taala udah nulung sida ngereja semua utai nya enggau jampat.
 
Bagi 30
Nyendiaka Gawai Paska
1-3 Orang mayuh enda ulih ngintu Gawai Paska ba maya ti patut dalam bulan ti kesatu, laban sida nadai chukup imam ti udah nuchi diri, enggau laban orang apin mayuh begempuru di Jerusalem. Nya alai Raja Hesekiah, bala pemesai iya, enggau orang ke diau di Jerusalem besetuju deka ngintu Gawai nya dalam bulan ti kedua. Raja Hesekiah lalu ngirumka jaku gerah ngagai semua orang Israel enggau orang Judah. Enggau naka penyimat, iya ngirumka surat ngagai raban bansa Epraim enggau raban bansa Manasi, minta sida datai ngagai Rumah Sembiang di Jerusalem ngintu Gawai Paska kena ngemesaika TUHAN Allah Taala ke disembah orang Israel.
4 Raja enggau orang mayuh gaga ati ke pelan nya,
5 nya alai sida mesanka semua orang Israel, kenyau ari Dan di utara nyentuk ngagai Beer-seba di selatan, minta sida begempuru di Jerusalem mayuh agi ari ti udah, lalu ngintu Gawai Paska nitihka Adat.
6 Bala orang ke mai pesan mupuk, nitihka jaku raja enggau bala pemesai iya, lalu bejalai ngagai serata menua Judah enggau menua Israel, mai pesan tu:
 “Orang Israel, kita udah mujur nan di menua tu lebuh orang Asiria nyerang. Nya alai pulai meh kita baru diatu ngagai TUHAN Allah Taala ke disembah Abraham, Isak, enggau Jakop, ngambika TUHAN pulai baru ngagai kita.
7 Anang baka aki ini kita enggau baka kaban belayan kita orang Israel ti enda tetap ati ngagai TUHAN Allah Taala sida. Kita empu nemu, TUHAN udah balat amat ngukum sida.
8 Anang kieh ati baka sida, tang ngasika TUHAN. Datai ngagai Rumah Sembiang di Jerusalem, ti udah dituchi TUHAN Allah Taala kita belama iya, lalu sembah TUHAN ngambika Iya enda agi ringat ngagai kita.
9 Enti kita pulai baru ngagai TUHAN, nya baru orang ke udah nabanka kaban belayan kita nyadi orang tangkap deka sinu ati ke sida, lalu nejuka sida pulai baru ngagai menua diri. TUHAN Allah Taala kita siru sereta kasih, lalu enti kita pulai baru ngagai Iya, Iya deka nerima kita.”
10 Bala orang ke mai pesan nya bejalai ngagai semua nengeri di menua Epraim enggau Manasi, enggau ngagai menua ti di utara nyentuk ngagai raban bansa Sebulun, tang orang mayuh ketawa sereta beduan sida.
11 Tang taja pia, sekeda orang ari raban bansa Aser, Manasi, enggau Sebulun bisi ati deka datai ngagai Jerusalem.
12 Allah Taala mega bekereja di menua Judah, lalu ngempung orang mayuh lalu ngasuh sida mutus ati ngasika peneka Iya, lebuh sida nitihka atur raja enggau bala pemesai iya.
 
Gawai Paska Diintu
13 Dalam bulan ti kedua mayuh amat orang begempuru di Jerusalem ngerami Gawai Roti Ti Enda Beragi.
14 Sida ngeruntuhka semua alta di Jerusalem ti udah alai orang ngenjuk piring enggau betunuka menyan, lalu muai utai nya ngagai Lebak Kidron.
15 Lalu kena empat belas hari bulan nya, sida nyayat anak domba nyadika piring Gawai Paska. Bala imam enggau orang Lewi ti enda tuchi, nyau berasai malu ke diri empu, datai ke sida nyau nyerahka diri ngagai TUHAN lalu ulih ngenjuk piring tunu dalam Rumah Sembiang.
16 Sida ngambi endur diri dalam Rumah Sembiang nitihka atur dalam Adat nabi Moses. Orang Lewi meri darah ari piring ngagai bala imam, ke lalu ngunsaika darah nya ngagai alta.
17 Nyadi laban orang agi mayuh apin nuchi diri, sida enda tau nyayat anak domba ke Gawai Paska nya. Nya alai bala orang Lewi ngereja pengawa nya ke sida, lalu nyerahka anak domba nya ngagai TUHAN.
18 Nambahka nya, mayuh orang ke udah datai ari raban bansa Epraim, Manasi, Isakar, enggau Sebulun apin nuchi diri, lalu sida ngintu Gawai nya enggau chara ti enda menyana. Raja Hesekiah besampika sida munyi tu:
19 “O TUHAN Allah Taala aki ini kami, enggau pemanah ati Nuan ampun meh orang ke nyembah Nuan enggau pengabis ati sida, taja pen sida enda tuchi.”
20 TUHAN nyaut sampi Hesekiah. Iya ngampun sida, lalu enda ngukum sida.
21 Bala orang mayuh begempuru di Jerusalem ngintu pengerami Gawai Roti Ti Enda Beragi dalam pengelama tujuh hari enggau ati ti gaga, lalu orang Lewi enggau bala imam muji TUHAN tiap hari enggau pengabis pengering sida. \f z \fr 30.21 \ft enggau pengabis pengering sida; \fq Hebrew: \ft ngena perengka musik sida ke inggar\f*
22 Hesekiah muji orang Lewi ketegal pengelandik sida nguluka orang nyembah TUHAN.
 
Pengerami Ti Kedua
Lebuh sida udah ngenjuk piring tujuh hari kena muji TUHAN Allah Taala aki ini sida,
23 semua sida lalu mutuska runding deka nampung pengerami nya tujuh hari da agi. Nya alai sida ngintu pengerami nya tujuh hari da agi enggau ati ti gaga.
24 Raja Hesekiah meri seribu iku sapi ti lelaki enggau tujuh ribu iku bedus ngambika bisi dibunuh sereta diempa orang mayuh, lalu bala pemesai meri sida seribu iku sapi ti lelaki, enggau sepuluh ribu iku bedus. Lalu mayuh amat bala imam ngereja pengawa nuchi diri empu.
25 Semua orang Judah, bala imam, orang Lewi, orang ke datai ari utara, orang kampar ti udah ngentapka diri di menua Israel enggau menua Judah, bela rami gaga magang.
26 Nya alai semua orang di nengeri Jerusalem gaga ati magang, laban nadai utai ti baka nya udah kala nyadi kenyau ari rambau Raja Solomon, anak Raja David.
27 Bala imam enggau orang Lewi minta TUHAN merekatka orang mayuh. Allah Taala ninga sampi sida ari rumah Iya di serega, lalu iya nerima sampi sida.
 
Bagi 31
Hesekiah Ngubah Atur Pasal Pengarap
1 Lebuh Gawai nya udah tembu, semua orang Israel lalu mansang ngagai semua nengeri di serata menua Judah, lalu mechahka tiang batu, nebang tanda petara indu Aserah, lalu ngerusak alta enggau endur alai orang kapir nyembah petara sida. Sida ngereja baka nya mega di serata menua Judah, di menua Benjamin, Epraim, enggau Manasi. Udah nya semua sida pulai ngagai menua diri empu.
2 Raja Hesekiah lalu numbuhka baru atur pengawa bala imam enggau orang Lewi, lalu genap iku sida meruan diberi pengawa. Pengawa nya nyengkaum ngenjuk piring tunu, enggau piring pemaik, enggau nyembah Allah Taala dalam Rumah Sembiang, meri puji enggau meri terima kasih ba mayuh bengkah endur dalam Rumah Sembiang.
3 Ari raban jelu bedus enggau raban jelu sapi iya empu, Raja Hesekiah meri jelu nyadika piring tunu genap pagi enggau lemai, enggau jelu ti diberi lebuh Hari Sabat, lebuh Gawai Anak Bulan, enggau lebuh gawai bukai ti diletak Adat TUHAN.
4  Nambahka nya, raja ngasuh orang Jerusalem mai pemeri ti endang diberi ngagai bala imam enggau orang Lewi, ngambika sida enda ibuh ngereja pengawa bukai tang semina ngereja pengawa ti diletak Adat TUHAN.
5 Lebuh atur nya udah dipadahka, orang Israel lalu mai pemeri ari gandum ti terubah diketau sida, wain, minyak kana, ai manyi, enggau asil bukai ari umai. Sida mega mai pemeri sepuluh peratus  ari semua utai ti dikemisi sida.
6 Semua orang ke diau di nengeri dalam menua Judah bela mai pemeri sepuluh peratus ari jelu sapi enggau jelu bedus sida, lalu sida mega mai mayuh pemeri bukai ti udah diserahka sida ngagai TUHAN Allah Taala sida.
7 Pemeri nya belabuh datai dalam bulan ti ketiga, lalu majak betugung dia empat bulan.
8 Lebuh Raja Hesekiah enggau bala pemesai iya meda pemayuh pemeri nya, sida muji TUHAN, lalu muji orang Israel.
9 Raja bejaku ngagai bala imam sereta enggau orang Lewi pasal pemeri nya,
10 lalu ku Imam Besai Asariah, ke ari peturun Sadok, bejaku enggau iya, “Sekumbang orang mayuh udah berengkah mai pemeri ngagai Rumah Sembiang, utai diempa chukup magang, sereta mayuh belaluh. Kitai bisi semua utai tu laban TUHAN udah merekatka bala nembiak Iya.”
11 Nitihka atur raja, sida lalu nyendiaka siti bilik setor dalam kandang Rumah Sembiang
12 lalu sida nyimpan semua pemeri enggau pemeri sepuluh peratus dalam bilik setor nya, ngambika utai nya disimpan enggau likun. Sida ngasuh siku orang Lewi ke benama Konaniah nyadi tuai ngemataka utai nya, lalu ngasuh menyadi iya Simei nyadi penulung iya.
13 Sepuluh iku orang Lewi diasuh gawa di baruh seduai iya: Jehiel, Asasiah, Nahat, Asahel, Jerimot, Josabat, Eliel, Ismakiah, Mahat, enggau Benaiah. Semua utai tu dikereja atas kuasa nama Raja Hesekiah seduai Imam Besai Asariah.
14 Kore anak Imnah, siku orang Lewi ti nyadi tuai bala jejaga ba Pintu Timur Rumah Sembiang, nyadi tuai nerima pemeri ti diserahka ngagai TUHAN, sereta nyadung utai nya.
15 Ba nengeri bukai ti alai bala imam diau, iya ditulung bala orang Lewi ti bukai ke tetap ati. Tu nama sida nya: Eden, Miniamin, Jesua, Semaiah, Amariah, enggau Sekaniah. Sida nyadung pemakai ngagai sida ke sama orang Lewi, nitihka bagi pengawa sida,
16 lalu ukai nitihka ripih raban peturun. Sida meri siti ungkup ngagai semua lelaki ke umur tiga puluhtaun ke atas, ke betanggungjawap bekereja tiap hari dalam Rumah Sembiang nitihka pengawa sida.
17 Bala imam diberi tanggungjawap nitihka raban peturun sida, lalu orang Lewi ke umur dua puluh taun ke atas diberi pengawa nitihka raban.
18 Semua sida nya dituliska nama magang sama enggau nama bala bini, anak, enggau orang ke ditupi sida, laban sida endang enda tau enda seruran sedia ngereja pengawa ti kudus ba sebarang maya.
19 Nyadi dalam nengeri ti udah diungkup alai peturun Aron diau, tauka ba padang rumput ti ngelingi nengeri nya, orang bisi diberi tanggungjawap nyadung pemakai ngagai semua lelaki dalam ruang bilik bala imam, enggau ngagai semua orang ke bisi nama ditulis dalam list nama orang ke ari raban peturun orang Lewi.
20 Raja Hesekiah ngereja utai ti ngena di serata menua Judah lalu ngerinduka ati TUHAN Allah Taala iya.
21 Iya mujur, laban semua utai ti dikereja iya ke Rumah Sembiang tauka pengawa iya ke nitihka Adat, udah dikereja iya enggau ati ti pemadu taluk sereta angkunka Allah Taala iya.
 
Bagi 32
Orang Asiria Nyerang Jerusalem (2 Raja 18.13-37; 19.14-19, 35-37; Isaiah 36.1-22; 37.8-38)
1 Lebuh Raja Hesekiah udah ngereja semua utai nya lalu nunjukka diri mengkang tetap ati betuaika TUHAN, Senakerip, raja menua Asiria, nyerang menua Judah. Iya ngelulung mayuh bengkah nengeri ti bekuta, lalu ngasuh bala soldadu iya ngeruntuhka kuta lalu tama ngagai nengeri nya.
2 Lebuh Hesekiah meda Senakerip deka nyerang Jerusalem,
3 iya enggau bala pemesai iya mutuska runding deka nutup semua penatai ai di luar nengeri; sida lalu nulung iya.
4 Mayuh amat sida begempuru, lalu sida nutup semua penatai ai ti rarat nengah menua nya. Ku sida bejaku, “Awakka raja menua Asiria nadai tetemuka ai, lebuh iya datai.”
5 Raja Hesekiah lalu bebendar amat gawa ngaduka kuta ti udah runtuh, lalu nirika menara ba kuta nya, lalu ngaga dinding ari luar dinding kuta nya. Nambahka nya, iya mega ngukuhka kuta ti udah digaga ba tanah tambun ba timur nengeri Jerusalem. Iya mega ngasuh orang begagaka sangkuh enggau terabai.
6 Iya ngeletak pemesai soldadu nguluka semua orang ke lelaki di nengeri nya, lalu ngempuruka sida ba tengah padang di mua pintu kuta nengeri, lalu bejaku ngagai sida. Ku iya,
7 “Kita enda tau enda kering sereta berani. Anang takutka raja orang Asiria, tauka bala soldadu ti diuluka iya, laban kuasa ti setanah enggau kitai besai agi ari kuasa ti setanah enggau iya.
8 Iya semina bisi kuasa mensia, tang kitai bisi TUHAN Allah Taala kitai nulung kitai, lalu beperang ngarika kitai.” Orang mayuh berasai diperansang ninga jaku raja sida.
9 Apin tentu lama udah bekau nya, lebuh Senakerip enggau bala soldadu iya agi di Lakis, iya ngirumka pesan tu ngagai Hesekiah enggau ngagai orang Judah ti diau enggau Hesekiah di Jerusalem:
10 “Aku, Senakerip, Raja Besai menua Asiria nanyaka utai ti ngasuh kita kempang ati mengkang di Jerusalem dikelulung kami baka tu.
11 Hesekiah madahka ngagai kita, TUHAN Allah Taala kita deka ngelepaska kita ari jari kami, tang Hesekiah nipu kita, lalu iya deka nejuka kita mati keberuran enggau aus.
12 Iya empu ti udah ngerusak semua endur alai nyembah TUHAN, enggau semua alta, lalu udah nya ngasuh orang Judah enggau orang Jerusalem nyembah sereta nunu menyan ba siti aja alta.
13 Kati kita enda nemu utai ti udah dikereja aki ini aku, enggau utai ti udah dikereja aku empu ngagai orang bansa bukai? Kati petara orang bansa bukai udah kala ngelepaska bansa sida ari raja menua Asiria?
14 Kemaya bala petara orang menua bukai bisi udah kala ngelepaska menua sida ari jari aku? Nya alai, nama utai ti ngasuh kita ngumbai petara kita deka ngelepaska kita ari jari aku?
15 Nya alai anang nejuka Hesekiah nipu kita, tauka nesatka runding kita baka nya, lalu anang arapka iya, laban nadai petara orang bansa bukai udah ulih ngelepaska nembiak iya ari jari raja menua Asiria. Nya alai, petara kita tetap enda ulih ngelepaska kita ari jari aku!”
16 Bala pemesai orang Asiria mega nyebut utai ti jai agi ari nya pasal TUHAN Allah Taala enggau pasal Hesekiah ti nyadi nembiak TUHAN.
17 Raja besai menua Asiria mega nulis surat kena iya ngeleseka TUHAN Allah Taala ke disembah orang Israel, lalu bejaku ngelaban Iya. Ku iya, “Baka bala petara orang bansa bukai ke nadai udah kala ngelepaska bala nembiak sida ari jari aku, baka nya meh Allah Taala ti dikarapka Hesekiah, enda ulih ngelepaska bala nembiak Iya ari jari aku.”
18 Bala pemesai orang Asiria lalu rauh-rauh nyebut utai nya dalam Hebrew kena sida ngemba sereta ngelemika semengat orang Jerusalem ke ba kuta nengeri, ngambika nengeri nya mudah agi alah.
19 Sida bejakuka pasal Allah Taala nengeri Jerusalem baka ke bejakuka pasal petara orang bansa bukai, engkeramba ti digaga jari mensia.
20 Udah nya Raja Hesekiah enggau nabi Isaiah anak Amos lalu besampi ngagai Allah Taala, lalu nyabak minta tulung Iya.
21 TUHAN lalu ngirumka siku melikat. Melikat nya lalu munuh bala soldadu enggau pemesai soldadu orang Asiria. Raja besai orang Asiria lalu pulai ngagai menua iya empu mai ati ti malu. Lebuh iya tama ngagai rumah sembiang petara iya, sekeda bala anak lelaki iya munuh iya ngena pedang.
22 Nya meh jalai TUHAN ngelepaska Raja Hesekiah enggau orang Jerusalem ari jari Senakerip, raja menua Asiria, enggau ari jari semua munsuh iya. TUHAN lalu ngibun sida likun.
23 Mayuh orang datai ngagai Jerusalem mai pemeri ngagai TUHAN, enggau pemeri ngagai Hesekiah. Kenyau ari nya semua bansa bebasaka Hesekiah magang.
 
Penyakit Enggau Penyumbung Hesekiah(2 Raja 20.1-3; 12-9; Isaiah 38.1-3; 39.1-8)
24 Ba urung maya nya, Raja Hesekiah sakit, lalu nyau deka mati. Iya besampi ngagai TUHAN, lalu TUHAN nyaut iya lalu meri iya siti tanda.
25 Tang Hesekiah kelalu sumbung lalu enda meri terima kasihka utai ti udah dikereja TUHAN ba iya. Ketegal nya menua Judah enggau nengeri Jerusalem kena ukum.
26 Tang Hesekiah enggau orang Jerusalem ngemaruhka diri, lalu TUHAN enda nyadi ngukum orang mayuh nyentuk ngagai pemati Hesekiah.
 
Pengaya Enggau Pemanah Hesekiah
27 Raja Hesekiah nyadi kaya bendar, lalu semua orang bebasaka iya. Iya ngasuh orang ngaga bilik setor alai iya nyimpan emas, pirak, batu ti berega, rempah, terabai, enggau utai bukai ti berega ti diempu iya.
28 Nambahka nya, iya mega ngasuh orang ngaga bilik setor alai iya nyimpan gandum, wain, enggau minyak kana, bansal ke jelu sapi iya, enggau kandang ke jelu bedus iya.
29 Kelimpah ari semua utai nya, Allah Taala mega meri iya jelu bedus enggau jelu sapi, enggau pengaya ti amat mayuh, datai ke nyau ulih nirika mayuh bengkah nengeri.
30 Raja Hesekiah nya meh orang ke mempal jalai ai ba Mata Ai Gihon, lalu ngasuh ai nya rarat nengah lubang jalai ai dalam kuta nengeri Jerusalem. Hesekiah mujur magang dalam semua utai ti dikereja iya,
31 lalu lebuh bala pengari perintah menua Babilon datai betanyaka utai ti nyelai ti udah nyadi di menua nya, Allah Taala nejuka Hesekiah ngereja utai nitihka peneka ati iya empu, kena Allah Taala ngabas ati Hesekiah.
 
Pengujung Perintah Hesekiah (2 Raja 20.20-21)
32 Semua utai bukai ti udah dikereja Raja Hesekiah, enggau pengangkun iya ke TUHAN bisi dituliska magang dalam Genera Nabi Isaiah anak Amos enggau dalam Jerita Lama Pasal Raja Menua Judah Enggau Menua Israel
33 Hesekiah mati lalu dikuburka ba sadau lumbung bala raja. Semua orang Judah enggau orang ke diau di Jerusalem balat amat masa iya lebuh pemati iya. Anak iya ke benama Manasi lalu nganti iya nyadi raja.
 
Bagi 33
Raja Manasi Menua Judah (2 Raja 21.1-9)
1 Umur Manasi dua belas taun lebuh iya nyadi raja menua Judah, lalu iya merintah di Jerusalem lima puluh lima taun.
2 Manasi bedosa ngelaban TUHAN laban iya nunda pengawa ti jai ti dikereja bansa orang ke udah diburu TUHAN ari menua nya lebuh bala nembiak TUHAN nyerang.
3 Iya ngaduka endur alai orang kapir nyembah petara sida, ti udah dirusak apai iya Hesekiah. Iya ngaga alta alai nyembah Baal, ngaga engkeramba ke petara Aserah, sereta nyembah bintang.
4 Iya ngaga alta alai orang kapir nyembah petara sida dalam Rumah Sembiang, iya nya endur ti udah diletak TUHAN alai TUHAN Empu patut disembah belama iya.
5 Iya ngaga alta kena nyembah bintang ba dua iti tengah laman Rumah Sembiang.
6 Iya nyerahka bala anak lelaki iya nyadika piring tunu ba Lebak Hinom. Iya beburung, bedukun, bemanang, betanya ngagai orang ke tau tujum, enggau ngagai manang. Iya balat bedosa ngelaban TUHAN, lalu nyungkak TUHAN ringat.
7 Iya ngengkahka siti engkeramba dalam Rumah Sembiang, endur ti udah dipadahka Allah Taala ngagai David enggau ngagai anak iya Solomon munyi tu: “Di Jerusalem ditu, dalam Rumah Sembiang tu meh endur ti udah dipilih Aku, ari semua dua belas bengkah sitak menua ti diempu raban bansa orang Israel, nyadi endur alai Aku patut disembah.
8 Lalu enti orang Israel deka ngasika semua pesan Aku, lalu nitihka semua Adat ti udah diberi nembiak Aku Moses ngagai sida, nya baru Aku enggai nejuka sida dibuai ari menua ti udah diberi Aku ngagai aki ini sida.”
9 Manasi nguluka orang Judah lebih agi bedosa ari bansa orang ke udah diburu TUHAN ari menua nya lebuh bala nembiak TUHAN nyerang.
 
Manasi Nesal Ati
10 Taja pen TUHAN meri jaku tangkan ngagai Manasi, enggau ngagai bala nembiak iya, tang sida enggai mending.
11 Nya alai TUHAN nejuka bala tuai soldadu menua Asiria nyerang menua Judah. Sida nangkap Manasi, ngaitka pengait ba iya, nanchang iya ngena rantai, lalu nabanka iya ngagai menua Babilon.
12 Lebuh iya kena perinsa, iya ngemaruhka diri, nguing ngagai TUHAN Allah Taala iya, lalu minta tulung ari Iya.
13 Allah Taala nerima lalu nyaut sampi Manasi, lalu ngasuh iya pulai baru ngagai Jerusalem lalu merintah baru. Tu meh utai ti ngasuh Manasi arapka TUHAN endang Allah Taala.
14 Udah bekau nya, Manasi ngaga kuta ti di luar ba tisi timur Nengeri David tinggi agi, berengkah ari siti endur ba lebak semak Mata Ai Gihon, nuju ke utara ngagai Pintu Ikan, enggau ngagai endur ti dikumbai Opel dalam nengeri nya. Iya mega ngeletak siku pemesai soldadu nyadi tuai soldadu dalam genap buah nengeri ti bekuta dalam menua Judah.
15 Iya muai semua petara orang bansa bukai enggau engkeramba ari Rumah Sembiang, enggau alta alai orang bansa bukai besembah ba bukit ti alai Rumah Sembiang bediri, enggau ari endur bukai di Jerusalem. Iya mai semua utai nya ke luar ari nengeri nya, lalu muai sida.
16 Iya mega ngaduka alta alai TUHAN ti udah disembah, lalu iya ngenjuk piring pemaik, enggau piring terima kasih ba alta nya. Iya ngasuh semua orang Judah nyembah TUHAN Allah Taala ke disembah orang Israel.
17 Taja pen orang mayuh majak ngenjuk piring ba endur bukai, tang sida semina ngenjuk piring nya ngagai TUHAN siku aja.
 
Pengujung Perintah Manasi (2 Raja 21.17-18)
18 Semua utai bukai ti udah dikereja Manasi, sampi ti disebut iya ngagai Allah Taala, enggau pesan ari bala nabi ke bejaku ngagai iya dalam nama TUHAN Allah Taala ke disembah orang Israel, bisi dituliska magang dalam Jerita Lama Pasal Raja Menua Judah Enggau Raja Menua Israel.
19 Sampi raja, enggau saut Allah Taala ngagai sampi iya, enggau cherita pasal dosa iya sebedau iya nesal ati - penyai ti udah dikereja iya, endur alai orang kapir nyembah petara sida, enggau tanda petara indu Aserah ti udah digaga iya, enggau engkeramba ti udah disembah iya - bisi dituliska magang dalam Jerita Lama Pasal Bala Nabi.
20 Manasi mati lalu dikuburka dalam istana, lalu anak lelaki iya ke benama Amon nganti iya nyadi raja.
 
Raja Amon Menua Judah (2 Raja 21.19-26)
21 Umur Amon dua puluh dua taun lebuh iya nyadi raja menua Judah, lalu iya merintah di Jerusalem dua taun.
22 Iya bedosa ngelaban TUHAN baka apai iya Manasi, sereta besembahka engkeramba ti udah disembah apai iya.
23 Tang iya enda ngemaruhka diri, lalu nguing ngagai TUHAN baka apai iya. Iya balat agi bedosa ari apai iya.
24 Bala pemesai Amon bepekat ngelaban iya, lalu sida munuh iya dalam istana.
25 Orang Judah lalu munuh bala orang ke munuh Amon, lalu ngasuh anak iya ke benama Josiah nyadi raja.
 
Bagi 34
Raja Josiah Menua Judah (2 Raja 22.1-2)
1 Umur Joasih lapan taun lebuh iya nyadi raja menua Judah, lalu iya merintah di Jerusalem tiga puluh satu taun.
2 Iya ngereja utai ti ngerinduka ati TUHAN. Iya neladan aki iya Raja David, terit amat ngasika semua adat Allah Taala.
 
Josiah Ngelaban Pengawa Ti Besembahka Petara Bukai
3 Dalam taun ti kelapan Josiah udah nyadi raja, lebuh iya agi biak, iya belabuh nyembah Allah Taala aki iya Raja David. Empat taun udah bekau nya, iya belabuh ngerusak endur alai orang kapir nyembah petara sida, ngerusak tanda petara indu Aserah, enggau semua engkeramba ti bukai.
4 Nitihka atur ti diberi iya, alta alai nyembah Baal dipechahka, lalu alta ti alai nunu menyan semak alta nya dirubuh. Sida nutuk semua engkeramba Aserah, enggau semua engkeramba bukai, nyadi amau lalu udah nya naburka amau nya ba kubur orang ke udah ngenjuk piring ngagai engkeramba nya.
5 Iya nunu tulang bala imam orang kapir ba alta alai sida ke nyembah engkeramba sida. Nya meh jalai iya nuchi menua Judah enggau nengeri Jerusalem.
6 Iya mega ngereja baka nya ngagai nengeri enggau endur ti udah dirusak di menua Manasi, Epraim, enggau Simeon, nyentuk ngagai Naptali di utara.
7 Di serata menua ti dipegai iya di utara, iya mechahka alta enggau engkeramba Aserah, nutuk engkeramba sida nyadi amau, lalu mechahka alta ti alai sida nunu menyan. Udah nya iya pulai ngagai Jerusalem.
 
Bup Adat Ditemu
8 Dalam taun ti kelapan belas iya udah megai perintah, lebuh iya udah nuchi menua nya enggau Rumah Sembiang lalu nutup semua pengawa orang kapir ke besembahka engkeramba, Raja Josiah lalu ngasuh tiga iku orang ngaduka Rumah Sembiang Allah Taala. Sida tiga nya Sapan anak Asaliah, Maseiah ti nyadi tuan gabenor nengeri Jerusalem, enggau Joah anak Joahas, siku pemesai ti tinggi pangkat.
9 Duit ti udah digumpul orang Lewi ke nyaga Rumah Sembiang lalu diserahka ngagai Imam Besai Hilkiah. (Duit nya udah digumpul ari orang Epraim enggau orang Manasi, enggau ari orang bukai ti diau di menua ti di utara, enggau ari orang ke diau di menua Judah, Benjamin enggau Jerusalem.)
10 Udah nya duit nya lalu diserahka ngagai tiga iku orang ke nyadi tuai ngaduka Rumah Sembiang, ke meri duit nya ngagai
11 bala tukang kayu, enggau tukang rumah kena sida bebelika batu enggau ramu kena ngaduka semua rumah ti udah ditejuka bala raja menua Judah buruk lalu enda diaduka baru ngelamatu.
12 Orang ke ngereja pengawa nya endang tetap tau dikarapka. Sida iya dikemataka empat iku orang Lewi: Jahat seduai Obadiah ari raban peturun Merari, enggau Sekariah seduai Mesulam ari raban peturun Kohat. (Semua orang Lewi landik magang nebah musik.)
13 Orang Lewi ti bukai megai pengawa berangkutka barang kena ngaga rumah nya, sereta ngemataka bala orang ke gawa ngereja mayuh bengkah pengawa. Lalu sida ti bukai bekereja nyadi kerani, tauka nyadi jejaga.
14 Lebuh duit nya benung dipansutka ari bilik setor, Hilkiah bisi tetemuka Bup Adat TUHAN, iya nya Adat ti udah diberi Allah Taala ngagai Moses.
15 Ku iya bejaku enggau Sapan, “Aku bisi tetemuka Bup Adat dalam Rumah Sembiang.” Iya lalu meri bup nya ngagai Sapan.
16 Sapan lalu mai bup nya ngagai raja. Ku Sapan madahka ngagai raja, “Kami udah ngereja semua utai ti diasuh nuan.
17 Kami udah ngambi duit ti disimpan dalam Rumah Sembiang, lalu udah nyerahka duit nya ngagai bala orang ke gawa enggau orang ke ngemataka sida.”
18 Lalu ku Sapan nambahka jaku iya, “Imam Hilkiah udah meri siti bup ngagai aku.” Sapan lalu macha bup nya di mua raja.
19 Lebuh raja ninga bup nya dibacha, iya lalu nyarikka gari diri.
20 Udah nya raja meri atur ngagai Hilkiah, Ahikam anak Sapan, Abdon anak Mikaiah, Sapan ti nyadi kerani kot, enggau ngagai Asaiah, ti nyadi penyaup raja:
21 “Mupuk kita lalu betanya ngagai TUHAN ngarika aku enggau ngarika orang mayuh ti agi tinggal di menua Israel enggau menua Judah. Pansik semua utai pasal ajar dalam bup tu. TUHAN balat ringat ngagai kitai laban aki ini kitai enda ngasika jaku TUHAN, lalu enda ngereja utai ti patut dikereja nitihka bup tu.”
22 Raja lalu ngasuh Hilkiah enggau sida ti bukai mansang betanya ngagai nabi indu siku ke benama Huldah, ti diau ba Jerusalem ti baru. Indu nya bini Salum anak Tokhat, uchu Haras ti nyadi tuai ngintu baju panjai ti dikena dalam Rumah Sembiang. Sida lalu madahka ngagai indu nya utai ti udah nyadi.
23 Iya lalu ngasuh sida pulai ngagai raja lalu meri
24 pesan TUHAN tu ngagai iya: “Aku deka ngukum Jerusalem enggau semua orang ke diau di nengeri tu ngena sumpah ti ditulis dalam bup ti udah dibacha di mua raja.
25 Sida udah nulak Aku, lalu udah ngenjuk piring ngagai petara bukai. Nya alai sida udah nyungkak Aku ringat ketegal semua utai ti udah dikereja sida. Aku ringat ngagai Jerusalem, lalu pengeringat Aku enda nemu padam.
26 Nyadi pasal raja empu, tu utai ti disebut Aku, TUHAN Allah Taala ke disembah orang Israel: Nuan udah mendingka utai ti ditulis dalam bup nya,
27 lalu nuan udah nesal ati sereta ngemaruhka diri di mua Aku, nyarikka gari diri sereta nyabak lebuh nuan ninga Aku deka ngukum Jerusalem enggau orang ke diau dalam nengeri tu. Aku udah ninga sampi nuan,
28 lalu ukum ti deka diasuh Aku ninggang Jerusalem enda nyadi sebedau nuan mati. Aku deka nejuka nuan mati enggau selamat.” Bala orang nya lalu pulai baru ngagai Raja Josiah, mai pesan nya.
 
Josiah Ngaga Sempekat Deka Ngasika TUHAN (2 Raja 23.1-20)
29 Raja Josiah lalu mesanka semua tuai orang Judah enggau tuai di Jerusalem.
30 Sida lalu mansang ngagai Rumah Sembiang, disempulang bala imam enggau orang Lewi, enggau semua orang mayuh, ke kaya enggau ke seranta. Raja lalu macha enggau nyawa ti inggar semua bup sempekat ti udah ditemu dalam Rumah Sembiang.
31 Iya bediri ngimbai tiang diraja  lalu ngaga siti sempekat enggau TUHAN, madahka iya deka ngasika TUHAN, deka nitihka adat enggau pesan TUHAN enggau pengabis ati enggau pengabis semengat iya, lalu ngereja semua atur ti diletak dalam sempekat nya, munyi ti ditulis dalam bup nya.
32 Iya ngasuh semua orang Benjamin enggau semua orang ke bisi di Jerusalem, besemaya deka nitihka sempekat nya. Nya alai orang di Jerusalem ngasika atur sempekat ti udah digaga sida enggau Allah Taala aki ini sida.
33 Raja Josiah ngerusak semua engkeramba di menua ti diempu orang Israel. Seagi-agi iya idup, sida semampai nitihka TUHAN Allah Taala aki ini sida.
 
Bagi 35
Josiah Ngintu Gawai Paska (2 Raja 23.21-23)
1 Raja Josiah ngintu pengerami Gawai Paska di Jerusalem kena ngemesaika TUHAN. Kena empat belas hari bulan ti kesatu, sida lalu nyayat jelu kena ngintu Gawai nya.
2 Iya magi ngagai bala imam pengawa ti deka dikereja sida dalam Rumah Sembiang, lalu meransang sida ngereja pengawa nya.
3 Iya mega meri atur tu ngagai orang Lewi ti nyadi pengajar orang Israel ti udah diserahka ngagai TUHAN: “Simpan Peti Lampang Batu Adat ti kudus nya dalam Rumah Sembiang ti udah digaga Raja Solomon anak David. Kita enda ibuh mai Peti nya ari endur siti ngagai endur siti, tang kita deka bekereja ke TUHAN Allah Taala kita enggau ke nembiak Iya orang Israel.
4 Ambi endur diri dalam Rumah Sembiang, nitihka ripih raban peturun kita, nitihka tanggungjawap ti udah diberi Raja David enggau anak iya Raja Solomon, ngagai kita,
5 lalu belatur, ngambika kita seruran bisi nulung genap ruang bilik orang Israel.
6 Kita deka nyayat anak domba enggau kambin Gawai Paska. Nya alai kita enda tau enda nuchi diri diatu, lalu nyendiaka piring ngambika orang Israel ti bukai ulih nitihka atur ti udah diberi TUHAN ngagai Moses.”
7 Raja Josiah meri tiga puluh ribu iku bedus, anak domba, enggau kambin ti agi biak, enggau tiga ribu iku sapi ti lelaki, ari raban jelu tupi iya empu ngagai orang mayuh ngambika bisi dikena sida ngintu Gawai Paska.
8 Bala pemesai iya mega meri ngagai orang mayuh, ngagai bala imam, enggau ngagai orang Lewi ngambika bisi dikena sida. Lalu bala pemesai ti nyadi tuai ngemataka Rumah Sembiang - Imam Besai Hilkiah, Sekariah, enggau Jehiel - meri ngagai bala imam dua ribu enam ratus iku anak domba enggau kambin ti biak, enggau tiga ratus iku sapi ti lelaki nyadika piring lebuh Gawai nya.
9 Bala tuai orang Lewi - Konaniah, Semaiah enggau menyadi iya Netanel, Hasabiah, Jeiel, enggau Josabat - meri lima ribu iku anak domba enggau kambin ti biak, enggau lima ratus iku sapi ti lelaki nyadika piring orang Lewi.
10 Lebuh semua utai ti dikena ngintu Gawai nya udah diatur magang, bala imam enggau orang Lewi lalu bediri ba endur diri nitihka asuh raja.
11 Sida lalu nyayat anak domba ti dikena ngintu Gawai Paska nya. Sida niti kulit jelu nya, lalu bala imam mechikka darah jelu nya ngagai alta.
12 Udah nya sida lalu bedua jelu nya ngagai orang mayuh, nitihka gempuru ruang bilik, nyadika piring tunu, ngambika sida tau ngenjuk piring nya nitihka atur ti disebut dalam Adat Moses.
13 Orang Lewi lalu manggang piring Gawai Paska nya ba api nitihka atur adat, lalu manduk piring ti kudus dalam periuk, kitil, enggau kali, lalu beguai-guai nyadung dagin nya ngagai orang mayuh.
14 Lebuh pengawa nya udah dikereja, nya baru orang Lewi meri diri empu enggau bala imam ke ari peturun Aron, dagin laban sida imam nya udah kiruh nyentuk ngagai malam betunuka jelu ti ditunu segala, enggau betunuka lemak ari piring nya.
15 Tu nama orang Lewi ari raban peturun Asap ke nebah musik, ti udah ngambi endur diri nitihka atur ti udah diberi Raja David: Asap, Heman, enggau Jedutun ti nyadi imam raja. Orang ke nyaga pintu Rumah Sembiang enda ibuh ninggalka endur alai sida ke jaga, laban orang Lewi ti bukai nyendiaka Gawai Paska ke sida.
16 Nya alai, nitihka atur Raja Josiah, semua utai tembu magang dikereja sehari nya kena nyembah TUHAN, iya nya ngintu Gawai Paska, enggau pengawa beberika piring tunu ba alta.
17 Semua orang Israel ke bisi dia ngerami Gawai Paska enggau Gawai Roti Ti Enda Beragi nya dalam pengelama tujuh hari.
18 Kenyau ari maya nabi Samuel menya, nadai Gawai Paska udah kala diintu enggau pengerami ti baka nya. Nadai siku ari bala raja ke dulu menya udah bisi kala ngerami Gawai Paska baka ke dikereja Raja Josiah, bala imam, orang Lewi, orang Judah, orang Israel enggau orang Jerusalem
19 dalam taun ti kelapan belas Josiah megai perintah.
 
Pengujung Perintah Josiah (2 Raja 23.28-30)
20 Lebuh Raja Josiah udah ngereja semua utai nya ke Rumah Sembiang, Raja Neko menua Ejip nguluka bala soldadu iya nyerang Karkemis di Sungai Eupratis. Josiah nguji nagang iya,
21 tang Neko ngirumka pesan tu ngagai Josiah: “Aku ke mansang beperang tu nadai patut ngiruh nuan, Raja menua Judah. Aku ukai datai deka ngelaban nuan, tang deka ngelaban munsuh aku, lalu Allah Taala udah ngasuh aku beguai ngereja nya. Allah Taala bisi enggau aku, nya alai, anang ngelaban aku, enggai ke Iya ngerusak nuan.”
22 Tang Josiah keras deka ngelaban. Iya enggai mendingka jaku ti disebut Allah Taala ngena Raja Neko. Nya alai Josiah ngeluluka diri baka gamal orang bukai, lalu nyerang Raja Neko ba emperan Megido.
23 Dalam perang nya Raja Josiah kena laban laja orang Ejip. Ku iya bejaku enggau bala orang gaji iya, “Bai aku ari tu. Balat amat aku bakal!”
24 Sida lalu ngangkatka iya ari kerita perang iya, ngengkahka iya ba kerita perang sebuah ti bisi dibai iya, lalu sida mai iya ngagai Jerusalem. Iya mati dia, lalu dikuburka ba lumbung bala raja. Semua orang Judah enggau orang Jerusalem ngulit magang ke iya.
25 Nabi Jeremiah lalu nulis siti sabak kenang ke Raja Josiah. Kenyau ari nya sabak kenang tu digaga nyadika siti adat asal ti dikena orang, nemuka lelaki tauka indu, lebuh sida nyenggai orang ke mati. Pantun tu bisi ditulis dalam bup sabak kenang.
26 Semua utai ti udah dikereja Josiah, pengangkun iya ke TUHAN, pasal iya ke ngasika Adat,
27 enggau jerita lama pasal iya empu kenyau ari pun nyentuk ke ujung, bisi dituliska magang dalam Jerita Lama Pasal Raja Menua Israel Enggau Menua Judah.
 
Bagi 36
Raja Joahas Menua Judah (2 Raja 23.30-35)
1 Orang Israel milih Joahas anak Josiah nyadi raja di Jerusalem, lalu nata iya.
2 Umur Joahas dua puluh tiga taun lebuh iya berengkah nyadi raja menua Judah, lalu iya merintah di Jerusalem tiga bulan.
3 Raja Neko menua Ejip nabanka iya nyadi orang tangkap, lalu mejalka menua Judah mayar 3,400 kilogram pirak enggau 34 kilogram emas nyadika chukai.
4 Neko ngasuh menyadi lelaki Joahas ke benama Eliakim nyadi raja menua Judah, lalu nukar nama Eliakim ngagai Jehoiakim. Joahas udah ditabanka Neko ngagai menua Ejip.
 
Raja Jehoiakim Menua Judah (2 Raja 23.36-24.7)
5 Umur Jehoiakim dua puluh lima taun lebuh iya berengkah nyadi raja menua Judah, lalu iya merintah di Jerusalem sebelas taun. Iya bedosa ngelaban TUHAN Allah Taala iya.
6 Raja Nebukadnesar menua Babilon nyerang menua Judah, nangkap Jehoiakim, lalu nabanka iya ngagai menua Babilon ditanchang ngena rantai.
7 Nebukadnesar nabanka sekeda utai ti berega ari Rumah Sembiang, lalu nyimpan utai nya dalam istana iya empu di Babilon.
8 Semua utai ti udah dikereja Jehoiakim, nyengkaum utai ti jai ti dikereja iya, bisi dituliska magang dalam Jerita Lama Pasal Raja Menua Israel enggau Menua Judah. Anak lelaki iya Jehoiakin nganti iya nyadi raja.
 
Raja Jehoiakin Menua Judah (2 Raja 24.8-17)
9 Umur Jehoiakin lapan belas taun lebuh iya berengkah nyadi raja menua Judah, lalu iya merintah di Jerusalem tiga bulan sepuluh hari. Jehoiakin mega bedosa ngelaban TUHAN.
10 Ba pun musin panas, Raja Nebukadnesar nabanka Jehoiakin ngagai menua Babilon nyadi orang tangkap, lalu nabanka utai ti berega ari Rumah Sembiang. Udah nya Nebukadnesar ngasuh aya Jehoiakin ke benama Sedekiah nyadi raja menua Judah enggau Jerusalem.
 
Raja Sedekiah Menua Judah (2 Raja 24.18-20; Jeremiah 52.1-3a)
11 Umur Sedekiah dua puluh satu taun lebuh iya berengkah nyadi raja menua Judah, lalu iya merintah di Jerusalem sebelas taun.
12 Iya bedosa ngelaban TUHAN, lalu enda ngemaruhka diri mendingka nabi Jeremiah, ke madahka jaku TUHAN.
 
Jerusalem Alah (2 Raja 25.1-21; Jeremiah 52.3b-11)
13 Sedekiah angkat ngelaban Raja Nebukadnesar, ti udah mejalka iya besumpah dalam nama Allah Taala madahka diri deka taluk. Iya kieh amat, enggai nesal ati lalu enggai pulai baru ngagai TUHAN Allah Taala ke disembah orang Israel.
14 Nambahka nya, bala tuai orang Judah, bala imam, enggau orang mayuh nunda teladan ti jai ari bansa orang ke ngelingi sida, besembahka engkeramba, lalu ari nya ngamahka Rumah Sembiang, ti udah dikuduska TUHAN Empu.
15 TUHAN Allah Taala aki ini sida udah majak ngasuh bala nabi Iya meri jaku tangkan ngagai bala nembiak Iya, laban Iya enggai ke sida enggau Rumah Sembiang nya dirusak.
16 Tang sida beduan bala orang ke mai pesan Allah Taala, enda mendingka jaku TUHAN, lalu ketawaka bala nabi Iya. Ke pengujung iya, TUHAN balat amat ringat ngagai bala nembiak Iya, datai ke sida nyau enda ulih ngerarika diri ari ukum Iya.
17 Nya alai TUHAN ngasuh raja menua Babilon nyerang sida. Raja nya munuh bala orang Judah ke bujang, nyengkaum sida ke dalam Rumah Sembiang. Iya nadai kasih mimit ke sida, nemuka sida nya orang ke biak tauka tuai, lelaki tauka indu, sakit tauka bepengerai. Allah Taala nyerahka semua sida ngagai raja menua Babilon.
18 Raja menua Babilon ngerampas utai ari Rumah Sembiang, ari sarang reta Rumah Sembiang, enggau pengaya raja enggau bala pemesai iya, lalu nabanka semua utai nya ngagai menua Babilon.
19 Iya nunu Rumah Sembiang, enggau nengeri Jerusalem, nyengkaum semua istana enggau pengaya nengeri nya, lalu ngeruntuhka kuta nengeri.
20 Iya nabanka semua orang ke enda dibunuh, ngagai menua Babilon. Din sida nyadi ulun bekereja ke iya, enggau ke peturun iya, nyentuk ngagai maya perintah menua Persia ditumbuhka.
21 Nya meh jalai utai ti udah dipadahka TUHAN ngena nabi Jeremiah dikamatka: “Menua nya nadai orang nguan tujuh puluh taun, kena malas pengawa sida ke enda ngintu Hari Sabat.”
 
Sairus Ngasuh Orang Judah Pulai
22 Dalam taun ti kesatu Sairus nyadi raja besai menua Persia, TUHAN ngamatka jaku ti udah disebut Iya ngena nabi Jeremiah. Iya nyungkak Sairus meri atur, lalu ngirumka atur nya ngena surat, ngambika bisi dibacha enggau nyawa ti inggar di serata menua ti diperintah iya:
23 “Tu atur ari Sairus, Raja Besai menua Persia. TUHAN Allah Taala serega, udah ngasuh aku merintah semua dunya, lalu udah meri ngagai aku tanggungjawap ngaga sebuah Rumah Sembiang ke Iya di Jerusalem, di menua Judah. Nya alai semua kita ke nembiak Allah Taala, enda tau enda kin; awakka TUHAN Allah Taala kita meruan enggau kita.”