1 BANSA ISRAEL
 
Jaku Pemuka
Bup  1 Bansa Israel* enggau  2 Bansa Israel* nandu semua cherita ti udah ditulis dalam Bup  Samuel*, Bup  1 Raja*, enggau Bup  2 Raja*, tang tuju bup nya ditulis enda sebaka. Pengawa ti nusui jerita lama pasal bala raja orang Israel dalam Bup  1 Bansa Israel*, enggau  2 Bansa Israel* nya beduduk ba dua bengkah tuju:

1) Ngayanka Allah Taala endang mengkang ingatka pelan Iya ke bala nembiak Iya, taja pen menua Israel enggau menua Judah udah balat ditinggang penusah. Iya ngayanka Diri ingatka semaya Iya ngena sida ke diau di menua Judah. Orang ke nulis bup tu manggaika diri ba pengamat utai nya, utai ti udah dikereja David enggau Solomon, Jehosapat, Hesekiah enggau Joas, enggau orang ke mengkang tetap ati ngagai Allah Taala.

2) Madahka penatai atur kena nyembah Allah Taala dalam Rumah Sembiang di Jerusalem, kelebih agi atur ti enda tau enda dititihka bala imam enggau orang Lewi, ke endang ngereja pengawa besembah. Orang ke nulis bup tu madahka David nya orang ke ngemunka penemu deka ngaga Rumah Sembiang enggau ngaga atur ti deka dipejalaika dalam Rumah Sembiang nya, taja pen Rumah nya didirika Solomon.
 
Ripih Isi Bup Tu
Tusut peturun enggau ripih (1.1-9.44)
Pemati Saul (10.1-14)
Perintah ti dipegai Raja David (11.1-29.30)
     a. Penusah enggau pemujur (11.1-22.1)
     b. Besedia deka ngaga Rumah Sembiang (22.2-29.30)
 
Bagi 1
Ari Adam Ngagai Abraham (Pemungkal 5.1-32; 10.1-32; 11.10-26)
1 Adam, Set, Enos,
2 Kenan, Mahalalel, Jaret,
3 Enok, Metuselah, Lamek,
4 Noah, Sem, Ham, enggau Japet.
5 Bala peturun Japet: Gomer, Magok, Madai, Jaban, Tubal, Mesek, enggau Tiras.
6 Bala peturun Gomer: Askenas, Ripat, enggau Togarmah.
7 Bala peturun Jaban: Elisah, Spain, Saiprus, enggau Rod.
8 Bala peturun Ham: Kus, Ejip, Libia, enggau Kanaan.
9 Bala peturun Kus: Seba, Habilah, Sabtah, Ramah, enggau Sabteka. Bala peturun Ramah: Sheba enggau Dedan.
10 (Kus bisi anak lelaki siku benama Nimrot. Nimrot tu orang ke terubah-rubah ngalahka menua di dunya tu.)
11 Bala peturun Ejip nya orang Lidia, Anam, Lehap, Naptuh,
12 Patrus, Kasluh enggau Krit (ke nurunka orang Pilistin).
13 Dua iku anak lelaki Kanaan - Sidon, anak tuai iya, enggau Het - nyadi aki ini bansa orang ke ngangkatka nama sida.
14 Kanaan mega nyadi aki ini orang Jebus, orang Amor, orang Girgas,
15 orang Ibi, orang Arkit, orang Sin,
16 orang Arbat, Semar, enggau orang Hamat.
17 Bala peturun Sem: Elam, Asur, Arpaksat, Lut, Aram, Us, Hul, Geter, enggau Mesek.
18 Arpaksat nya apai Selah, lalu Selah nya apai Eber.
19 Eber bisi dua iku anak lelaki. Siku benama Pelek, laban lebuh maya nya orang di dunya tu udah bepechah-belah, lalu nama siku nya Joktan.
20 Bala peturun Joktan nya orang Almodat, orang Selep, Hasarmabet, Jerah,
21 Hadoram, Usal, Diklah,
22 Ebal, Abimail, Sheba,
23 Opir, Habilah, enggau Jobap.
24 Purih ari Sem ngagai Abram nya baka tu: Sem, Arpaksat, Selah,
25 Eber, Pelek, Reu,
26 Seruk, Nahor, Terah,
27 enggau Abram (mega dikumbai Abraham).
 
Peturun Ismail (Pemungkal 25.12-16)
28 Abraham bisi dua iku anak lelaki, Isak seduai Ismail.
29 Bala anak Ismail nyadi tuai ke dua belas raban bansa: Nebaiot (ngangkatka nama anak tuai Ismail), Kedar, Adbil, Mipsam,
30 Misma, Dumah, Masa, Hadat, Tema,
31 Jetur, Napis, enggau Kedemah.
32 Nyadi Abraham bisi siku indu simpan benama Keturah, ke ngadaka enam iku anak lelaki ke Abraham: Simram, Joksan, Medan, Midian, Isbak, enggau Suah. Joktan bisi dua iku anak lelaki: Sheba seduai Dedan.
33 Midian bisi lima iku anak lelaki: Epah, Eper, Hanok, Abida enggau Eldaah.
 
Peturun Esau (Pemungkal 36.1-19)
34 Anak Abraham ke benama Isak bisi dua iku anak lelaki: Esau seduai Jakop.
35 Anak lelaki Esau nya Elipas, Reuel, Jeus, Jalam enggau Korah.
36 Elipas nurunka raban bansa Teman, Omar, Sepi, Gatam, Kenas, Timna, enggau Amalek.
37 Lalu Reuel nurunka raban bansa Nahat, Serah, Samah, enggau Misah.
 
Orang Asal Menua Edom  (Pemungkal 36.20-30)
38-42 Orang asal menua Edom nya diturunka bala anak lelaki Seir: Lotan, ke nurunka raban peturun Hori enggau Homam. (Lotan bisi siku menyadi indu benama Timna.) Sobal nurunka raban peturun Alban, Manahat, Ebal, Sepi, enggau Onam. Sibeon bisi dua iku anak lelaki: Aiah seduai Anah. Anah nya apai Dison, lalu Dison nurunka raban peturun Hamran, Esban, Itran enggau Cheran. Eser nurunka raban peturun Bilhan, Saban, enggau Jakan. Disan nurunka raban peturun Us enggau Aran.
 
Raja Menua Edom (Pemungkal 36.31-43)
43-50 Tu nama bala raja ke betangkan-tangkan megai perintah di menua Edom, lebuh menua Israel apin bisi raja:
 Bela anak Beor, ari Dinhabah
 Jobap anak Serah, ari Bosrah
 Husbam ari menua Teman
 Hadat anak Bedat, ari Abit (iya ngalahka orang Midian ba siti perang ti nyadi di menua Moap)
 Samlah ari Masrekah
 Saul ari Rehobot ti ba Sungai
 Baal Hanan anak Akbor
 Hadat ari Pau (bini iya Mehetabel anak Matret, uchu Mesahap)
51 Orang bansa Edom dibagi ngagai suku raban bansa Timna, Albah, Jetet,
52 Oholibamah, Elah, Pinon,
53 Kenas, Teman, Mipsar,
54 Magdil, enggau Iram.
 
Bagi 2
Peturun Judah
1 Jakop bisi dua belas iku anak lelaki: Reuben, Simeon, Lewi, Judah, Isakar, Sebulun,
2 Dan, Josep, Benjamin, Naptali, Gat, enggau Aser.
3 Judah bisi lima iku anak lelaki. Bini iya ke benama Batsua, indu orang Kanaan, ngadaka tiga iku anak lelaki ke Judah: Er, Onan, enggau Selah. Anak tuai iya ke benama Er, jai amat ulah, datai ke TUHAN nyau munuh iya.
4 Menantu iya Tamar ngadaka dua iku anak lelaki ke Judah: Peres seduai Serah.
5 Peres bisi dua iku anak lelaki: Hesron seduai Hamul.
6 Menyadi iya Serah bisi lima iku anak lelaki: Simri, Etan, Heman, Kalkol, enggau Darda.
7  anak Karmi, siku ari peturun Serah, udah ngasuh penusah ti besai ninggang orang Israel, laban iya bisi nyimpan utai ti udah diserahka ngagai Allah Taala.
8 Etan bisi siku anak lelaki. Nama iya Asariah.
 
Tusut Raja David
9 Hesron bisi tiga iku anak lelaki: Jerahmil, Ram, enggau Kalep.
10 Tusun purih ari Ram nyentuk ngagai Jesi nya baka tu: Ram, Aminadap, Nason (orang ke tebilang ari raban bansa Judah),
11 Salmon, Boas,
12 Obet, enggau Jesi.
13 Jesi bisi tujuh iku anak lelaki. Baka tu ku nama sida belabuh ari sida ke tuai ngagai sida ke biak: Eliap, Abinadap, Samah,
14 Netanel, Radai,
15 Osem, enggau David.
16 Iya mega bisi dua iku anak indu: Seruiah seduai Abigail. Anak indu Jesi ke benama Seruiah bisi tiga iku anak lelaki: Abisai, Joap, enggau Asahel.
17 Anak indu iya ke benama Abigail jadi enggau Jeter, siku orang ari peturun Ismail, lalu seduai iya bisi anak lelaki siku benama Amasa.
 
Peturun Hesron
18 Anak lelaki Kalep ke benama Hesron jadi enggau Asubah, lalu bisi anak indu siku benama Jeriot. Iya bisi tiga iku anak lelaki: Jeser, Sobap, enggau Ardon.
19 Udah bekau pemati Asubah, Kalep lalu jadi enggau Eprat, lalu seduai iya bisi siku anak lelaki benama Hur.
20 Nama anak Hur nya Uri, lalu nama uchu iya Besalel.
21 Lebuh Hesron umur enam puluh taun, iya jadi enggau anak indu Machir, menyadi indu Giliat. Seduai iya bisi siku anak lelaki benama Segup,
22 lalu Segup bisi siku anak lelaki benama Jair. Jair merintah dua puluh tiga buah nengeri di menua Giliat.
23 Tang perintah menua Gesur enggau Aram ngalahka enam puluh buah nengeri di menua nya, nyengkaum Tumpuk Pendiau Jair enggau genturung pendiau ti ngelingi Kenat, enggau nengeri ti ngelingi nya dia. Semua orang ke diau dia endang peturun Machir apai Giliat magang.
24 Lebuh Hesron mati, anak iya Kalep jadi enggau Eprat, balu niang apai iya. Seduai iya bisi siku anak lelaki benama Asur. Asur tu orang ke nirika nengeri Tekoa.
 
Peturun Jerahmil
25 Jerahmil, anak tuai Hesron, bisi lima iku anak lelaki: Ram, anak tuai iya, Bunah, Oren, Osem, enggau Ahijah.
26-27 Ram bisi tiga iku anak lelaki: Maas, Jamin, enggau Eker. Jerahmil bisi siku agi bini, benama Atarah, lalu seduai iya bisi siku anak lelaki benama Onam.
28 Onam bisi dua iku anak lelaki: Samai seduai Jada. Samai mega bisi dua iku anak lelaki: Nadap seduai Abisur.
29 Abisur jadi enggau siku indu ke benama Abihail, lalu seduai iya bisi dua iku anak lelaki: Aban seduai Molit.
30 Menyadi Abisur ke benama Nadap bisi dua iku anak lelaki: Selet seduai Apaim, tang Selet mati nadai anak lelaki.
31 Apaim nya apai Ihsi, Ishi nya apai Sesan, lalu Sesan nya apai Ahlai.
32 Jada, menyadi lelaki Samai, bisi dua iku anak lelaki: Jeter seduai Jonatan, tang Jeter mati nadai anak lelaki.
33 Jonatan bisi dua iku anak lelaki: Pelet seduai Sasa. Semua sida nya peturun Jerahmil magang.
34 Sesan nadai anak lelaki, semina anak indu aja. Iya bisi siku orang Ejip nyadika orang gaji iya, nama orang nya Jara.
35 Iya lalu ngasuh Jara jadi enggau siku ari bala anak indu iya. Seduai nya lalu bisi siku anak lelaki benama Atai.
36 Tusun purih ari Atai nyentuk ngagai Elisama nya baka tu: Atai, Natan, Sabat,
37 Epal, Obet,
38 Jehu, Asariah,
39 Heles, Eleasah,
40 Sismai, Salum,
41 Jekamiah, enggau Elisama.
 
Peturun Kalep Ti Bukai
42 Anak tuai Kalep, iya nya menyadi Jerahmil, benama Mesa. Mesa nya apai Sip. Sip nya apai Maresah, lalu Maresah nya apai Hebron.
43 Hebron bisi empat iku anak lelaki: Korah, Tapuah, Rekem, enggau Sema.
44 Sema nya apai Raham, aki Jorkeam. Menyadi lelaki Sema ke benama Rekem, nya apai Samai.
45 Samai nya apai Maon, lalu Maon nya apai Bet-sur.
46 Kalep bisi siku indu simpan benama Epah. Epah ngadaka tiga iku agi anak lelaki ke Kalep: Haran, Mosa, enggau Gases. Haran mega bisi siku anak lelaki benama Gases.
47 (Siku lelaki ke benama Jadai bisi enam iku anak lelaki: Regem, Jotam, Gesan, Pelet, Epah, enggau Sap.)
48 Kalep bisi siku agi indu simpan benama Maakah. Maakah ngadaka dua iku anak lelaki ke Kalep. Nama seduai nya Seber enggau Tiranah.
49 Udah nya Maakah ngadaka dua iku agi anak lelaki: Sap, ke nirika nengeri Matmanah, enggau Sebah ke nirika nengeri Makbenah enggau nengeri Gibea. Nambahka nya, Kalep bisi siku anak indu benama Aksah.
50 Sida tu mega peturun Kalep: Hur, anak tuai Kalep enggau bini iya Eprat. Anak Hur ke benama Sobal nirika nengeri Kiriat-jearim.
51 Anak lelaki iya ke lumur dua nirika nengeri Betlehem, lalu anak iya ke lumur tiga nirika nengeri Bet-gader.
52 Sobal, orang ke nirika nengeri Kiriat-jearim, nurunka orang Haroeh, setengah ari orang ke nguan Menuhot,
53 sereta nurunka raban peturun ti diau di Kiriat-jearim, iya nya orang Itri, Put, Sumat, enggau Misra. (Orang ke diau di nengeri Sorah enggau nengeri Esta-ol nya ari raban bansa tu magang.)
54 Salma, orang ke nirika nengeri Betlehem, nurunka orang Netopat, orang Atrot, Bet Joap, enggau orang Sori, sebengkah ari dua bengkah raban peturun ti diau di Manahat.
55 (Raban peturun ti landik nulis enggau landik nyalinka surat diau di nengeri Jabes. Sida nya orang Tirat, orang Simiat, enggau orang Sukat. Sida tu orang Ken ti udah jadi enggau bansa orang Rekap.)
 
Bagi 3
Bala Anak Raja David
1-3 Tu nama bala anak David, disebut nitihka penuai umur sida ke diadaka lebuh David diau di Hebron: Amnon: Indai iya Ahinoam ari Jesril; Daniel: Indai iya Abigail ari Karmel; Absalom: Indai iya Maakah anak Raja Talmai ari menua Gesur; Adonijah: Indai iya Hagit; Sepatiah: Indai iya Abital; Itri: Indai iya Eglah.
4 Semua sida enam iku tu diadaka di Hebron magang lebuh David merintah dia tujuh taun setengah. Iya merintah nyadi raja di Jerusalem tiga puluh tiga taun
5  lalu mayuh anak lelaki diadaka dia. Bini iya Batseba anak Amil, ngadaka empat iku anak lelaki: Simea, Sobap, Natan, enggau Solomon.
6 Iya bisi semilan iku anak lelaki ti bukai: Ibar, Elisua, Elpelet,
7 Nogah, Nepek, Japia,
8 Elisama, Eliada, enggau Elipelet.
9 Nambahka bala sida nya, David mega bisi anak lelaki ke diadaka bala indu simpan iya. Iya mega bisi siku anak indu benama Tamar.
 
Peturun Raja Solomon
10 Tu ripih peturun Raja Solomon, ari apai ngagai anak: Solomon, Rehoboam, Abijah, Asa, Jehosapat,
11 Jehoram, Ahasiah, Joas,
12 Amasiah, Usiah, Jotam,
13 Ahas, Hesekiah, Manasi,
14 Amon, enggau Josiah.
15 Josiah bisi empat iku anak lelaki: Johanan, Jehoiakim, Sedekiah, enggau Joahas.
16 Jehoiakim bisi dua iku anak lelaki: Jehoiakin, enggau Sedekiah.
 
Peturun Raja Jehoiakin
17 Tu peturun Raja Jehoiakin, iya nya raja ti udah ditabanka orang Babilon nyadi orang tangkap. Jehoiakin bisi tujuh iku anak lelaki: Sealtiel,
18 Malkiram, Pedaiah, Senesar, Jekamiah, Hosama, enggau Nedabiah.
19 Pedaiah bisi dua iku anak lelaki: Serubabel enggau Simei. Serubabel bisi dua iku anak lelaki, Mesulam enggau Hananiah, enggau siku anak indu ke benama Selomit.
20 Iya bisi lima iku agi anak lelaki: Hasubah, Ohel, Berekiah, Hasadiah, enggau Jusap Heset.
21 Hananiah bisi dua iku anak lelaki: Lepatiah seduai Jesaiah. Jesaiah nya apai Repahai. Repaiah nya apai Arnan, Arnan apai Obadiah, Obadiah apai Sekaniah.
22 Sekaniah bisi siku anak lelaki benama Semaiah, enggau lima iku uchu lelaki: Hatus, Igal, Bariah, Niriah, enggau Sapat.
23 Niriah bisi tiga iku anak lelaki: Elioenai, Hiskiah, enggau Asrikam.
24 Elioenai bisi tujuh iku anak lelaki: Hodabiah, Eliasip, Pelaiah, Akup, Johanan, Delaiah, enggau Anani.
 
Bagi 4
Peturun Judah
1 Tu nama sekeda peturun Judah: Peres, Hesron, Karmi, Hur, enggau Sobal.
2 Sobal nya apai Reaiah, ti nyadi apai Jahat, Jahat nyadi apai Ahumai seduai Lahat, iya nyadi aki ini orang ke diau di Sorah.
3-4 Hur nya anak tuai bini Kalep ke benama Eprat, lalu peturun Hur nya orang ke nirika nengeri Betlehem. Hur bisi tiga iku anak lelaki: Etam, Penuel, enggau Eser. Etam bisi tiga iku anak lelaki: Jesril, Isma, enggau Itbas, enggau siku anak indu benama Haseleponi. Penuel nirika nengeri Gedor, lalu Eser nirika nengeri Husah.
5 Asur, orang ke nirika nengeri Tekoa, bisi dua iku bini: Helah seduai Narah.
6 Asur seduai Narah bisi empat iku anak lelaki: Ahusam, Heper, Temeni, enggau Hahastari.
7 Asur seduai Helah bisi tiga iku anak lelaki: Seret, Isar, enggau Etnan.
8 Kos nya apai Anup seduai Sobebah, lalu iya nyadi aki ini ke raban peturun ti diturunka Aharhel anak Harum.
9 Bisi orang siku benama Jabes, ke balat dibasa orang. Indai iya udah meri iya nama Jabes, laban iya mar ada.
10 Tang Jabes besampi ngagai Allah Taala ke disembah orang Israel. Ku iya, “Berekatka aku, Allah Taala, lalu beri aku mayuh tanah. Diau enggau aku, lalu jaga aku ari semua utai ti jai, ti tau ngemediska aku.” Lalu Allah Taala meri iya utai ti dipinta iya.
 
Ripih Ruang Bilik Ti Bukai
11 Kalep, menyadi Suhah, bisi siku anak lelaki. Nama iya Mehir. Mehir nya apai Eston.
12 Eston bisi tiga iku anak lelaki: Betrapa, Pasih, enggau Tehinah. Tehinah nya orang ke nirika nengeri Nahas. Bala peturun orang tiga iku tu diau di Rekah.
13 Kenas bisi dua iku anak lelaki: Otnil enggau Seraiah. Otnil mega bisi dua iku anak lelaki: Hatat enggau Meonotai.
14 Meonotai nya apai Oprah. Seraiah nya apai Joap, lalu Joap nya apai Geharasim  alai semua orang ke landik begagaka utai diau.
15 Kalep anak Jepuneh bisi tiga iku anak lelaki: Iru, Elah, enggau Naam. Elah nya apai Kenas.
16 Jehalelel bisi empat iku anak lelaki: Sip, Sipah, Tiria, enggau Asarel.
17-18 Esrah bisi empat iku anak lelaki: Jeter, Meret, Eper, enggau Jalon. Meret jadi enggau Bitiah anak indu raja menua Ejip, lalu seduai iya bisi siku anak indu benama Miriam, enggau dua iku anak lelaki, Samai enggau Isbah. Isbah nirika nengeri Estemoa. Meret mega jadi enggau siku indu ari raban bansa Judah, lalu seduai iya bisi tiga iku anak lelaki: Jeret, ke nirika nengeri Gedor, Heber ke nirika nengeri Soko, enggau Jekutil ke nirika nengeri Sanoah.
19 Hodiah jadi enggau menyadi indu Naham. Peturun seduai nya nurunka raban peturun Gam, ti diau di nengeri Keilah, enggau raban bansa Makat ti diau di nengeri Estemoa.
20 Simon bisi empat iku anak lelaki: Amnon, Rinah, Benhanan, enggau Tilon. Ishi bisi dua iku anak lelaki: Sohet enggau Bensohet.
 
Peturun Selah
21 Selah nya siku ari bala anak lelaki Judah. Peturun iya nyengkaum Er, ke nirika nengeri Lekah, Ladah ke nirika nengeri Maresah, raban peturun orang ke diau di nengeri Bet Asbea, ti landik nenun kain linin;
22 Jokim enggau orang ke diau di nengeri Koseba, enggau Joas seduai Sarap ke jadi enggau indu orang Moap, lalu udah nya ngentapka diri di Betlehem. (Tu endang jerita lama.)
23 Sida nya tukang periuk ke bekereja ke raja, lalu diau di nengeri Netaim enggau nengeri Gederah.
 
Peturun Simeon
24 Simeon bisi lima iku anak lelaki: Nemuel, Jamin, Jarip, Serah, enggau Saul.
25 Nama anak lelaki Saul nya Salum. Nama uchu iya Mibsam, lalu nama ichit iya Misma.
26 Misma nurunka Hamuel, Sakur, enggau Simei.
27 Simei bisi enam belas iku anak lelaki enggau enam iku anak indu, tang kaban belayan iya nadai mayuh anak, lalu raban bansa Simeon enda mayuh tubuh baka raban bansa Judah.
28 Bala peturun Simeon, nyentuk ngagai maya Raja David, diau di nengeri Beer-seba, Moladah, Hasar-sual,
29 Bilhah, Esem, Tolat,
30 Betuel, Hormah, Siklak,
31 Bet-markabot, Hasasusim, Betbiri, enggau Saraim.
32 Sida mega diau ba lima bengkah endur bukai: Etam, Ain, Rimon, Token, enggau Asan,
33 enggau genturung pendiau ti ngelingi nya dia, nyentuk ngagai nengeri Baalat ti tunga ke selatan-barat. Tu meh cherita ti udah disimpan sida pasal ruang bilik sida, enggau nama menua ti nyadi endur alai sida diau.
34-38 Tu nama orang ke nyadi tuai peturun sida: Mesobap, Jamlek, Josah anak Amasiah, Joel, Jehu (anak Josibiah, uchu Seraiah, ichit Asil), Elioenai, Jakobah, Jesohaiah, Asaiah, Adil, Jesimil, Benaiah, Sisa (anak Sipi, uchu Alon, ti peturun Jedaiah, Simri, enggau Semaiah). Laban ruang bilik sida majak mayuh tubuh,
39 sida lalu ngelekai tunga ke barat, nyau deka nyentuk ngagai Gerar lalu nginang jelu bedus ba tebing timur lebak nya, alai nengeri nya ti bediri.
40 Sida bisi tetemuka tanah ti ami dia, ba menua ti nadai orang nguan, ti nadai pengachau. Orang ke nguan menua nya dulu ari sida nya orang peturun Ham.
41 Lebuh maya Raja Hesekiah megai perintah di menua Judah, orang ke udah disebut nama di atas dia tadi mansang ngagai Gerar lalu ngerusak langkau kain enggau langkau orang ke diau dia. Sida muru orang ari endur nya, lalu sida ngentapka diri dia, laban menua nya mayuh rumput ke jelu bedus sida.
42 Lima ratus agi bala ari raban bansa Simeon mansang tunga ke timur ngagai menua Edom. Sida iya diuluka bala anak Ishi: Pelatiah, Neariah, Repaiah, enggau Usil.
43 Dia sida lalu munuh bala orang Amalek ti agi idup, lalu sida diau dia nyentuk ngagai diatu.
 
Bagi 5
Peturun Reuben
1 Tu nama bala peturun Reuben anak tuai Jakop. (Laban iya udah beleman enggau siku ari indu simpan apai iya, iya udah ngelenyauka hak nyadi anak tuai, lalu hak nya diberi ngagai Josep.
2 Tang raban bansa Judah nyadi raban bansa ti pemadu kering, lalu orang ke nyadi pemerintah ke semua orang Israel datai ari raban bansa Judah.)
3 Reuben, anak tuai Jakop, bisi empat iku anak lelaki: Hanok, Palu, Hesron, enggau Karmi.
4-6 Tu nama peturun Joel ari serak siti ngagai serak siti: Semaiah, Gok, Simei, Mikah, Reaiah, Baal, enggau Birah. Raja besai menua Asiria ke benama Tiglat Pileser nangkap Birah, ti nyadi tuai raban bansa nya, lalu muai iya ari menua nya
7 Cherita pasal ruang bilik bisi nyebut bala tuai peturun ari raban bansa Reuben baka tu: Jeil, Sekariah,
8 enggau Bela, anak Asas, uchu Sema, ari raban peturun Joel. Bala raban bansa tu diau di Aroer, enggau di menua ti berengkah ari endur nya nyentuk ngagai Nebo enggau Baal-meon di utara.
9 Raban jelu sida nyau mayuh amat di menua Giliat. Nya alai sida nguan menua tunga ke timur nyentuk ngagai menua puang, ti mungkur nyentuk ngagai Sungai Eupratis.
10 Lebuh maya Raja Saul, orang ari raban bansa Reuben nyerang orang Hagri, munuh sida, lalu nguan menua orang nya di timur menua Giliat.
 
Peturun Gat
11 Raban bansa Gat diau tunga ke utara raban bansa Reuben, di menua Basan, nyentuk ngagai Salekah di timur.
12 Orang ke nyadi tuai ke raban peturun tu nya Joel, lalu tuai ke raban peturun ke lumur dua nya Sapam. Janai enggau Sapat nyadi tuai ke raban peturun ti bukai di Basan.
13 Orang bukai dalam raban bansa Gat nya orang ari suku raban bansa Mikael, Mesulam, Sheba, Jorai, Jakan, Sia, enggau Eber.
14 Sida tu peturun Abihail anak Huri. Baka tu ku ripih orang ke nurunka Abihail: Abihail, Huri, Jaroah, Giliat, Mikael, Jeshisai, Jahdo, Bus.
15 Ahi anak Abdil, uchu Guni, nyadi tuai ke suku raban bansa tu.
16 Sida diau dalam nengeri di menua Basan enggau di menua Giliat, enggau ba sebelah padang rumput di Saron.
17 (Cherita tu ditulis lebuh maya Raja Jotam megai perintah di menua Judah, enggau maya Jeroboam Ti Kedua megai perintah di menua Israel.)
 
Bala Soldadu Raban Bansa Ke Di Timur Sungai Jordan
18 Pemayuh soldadu dalam raban bansa Reuben, Gat enggau Manasi Timur nya 44,760 iku. Semua sida tu udah chukup dilatih magang ba chara ngena terabai, pedang, enggau panah.
19 Sida mansang nyerang raban bansa Hagri di Jetur, Napis, enggau Nodap.
20 Sida manggaika pengarap sida ba Allah Taala, lalu besampi ngagai Iya minta Iya nulung sida. Allah Taala lalu nyaut sampi sida, lalu ari saup Iya sida ulih ngalahka orang Hagri enggau orang ke setanah enggau orang Hagri.
21 Sida ngerampas ari munsuh 50,000 iku jelu unta, 250,000 iku jelu bedus, enggau 2,000 iku keledai, sereta nangkap 100,000 iku soldadu munsuh.
22 Sida munuh bala munsuh, laban perang nya endang ari peneka Allah Taala. Lalu sida majak diau di menua nya nyentuk ngagai maya sida dibuai ngagai menua bukai.
 
Orang Raban Bansa Manasi Timur
23 Raban bansa Manasi Timur ngentapka diri di menua Basan nyentuk ngagai Baal Hermon, Senir, Bukit Hermon di utara. Lalu bala sida jampat mayuh tubuh.
24 Tu nama tuai suku raban bansa sida: Eper, Ishi, Elil, Asril, Jeremiah, Hadobiah, enggau Jahdil. Semua sida tu soldadu ti tebilang nama magang, sereta nyadi tuai suku raban bansa ti dikelala orang.
 
Raban Bansa Di Timur Ke Dibuai Ari Menua Sida
25 Tang orang Israel enda tetap ati ngagai Allah Taala aki ini sida, lalu sida ninggalka Iya, lalu nyembah petara bansa orang ke udah diburu Allah Taala ari menua nya.
26 Nya alai, Allah Taala lalu ngasuh Raja Besai Pul ari menua Asiria (mega dikumbai Tiglat Pileser) nyerang menua sida. Iya muai raban bansa Reuben, Gat, enggau Manasi Timur ari menua sida, lalu ngasuh sida ngentapka diri belama iya di Halah, Habor, enggau di Hara, enggau semak Sungai Gosan.
 
Bagi 6
Peturun Imam Besai Lewi
1 Lewi bisi tiga iku anak lelaki: Gerson, Kohat, enggau Merari.
2 Kohat bisi empat iku anak lelaki: Amram, Isar, Hebron, enggau Usil.
3 Amram bisi dua iku anak lelaki: Aron seduai Moses, enggau anak indu siku ke benama Miriam. Aron bisi empat iku anak lelaki: Nadap, Abihu, Eleasar, enggau Itamar.
4 Peturun Eleasar nya baka tu: Pinehas, Abisua,
5 Buki, Usi,
6 Serahiah, Meraiot,
7 Amariah, Ahitup,
8 Sadok, Ahimas,
9 Asariah, Johanan,
10 Asariah (orang ke bekereja dalam Rumah Sembiang ti udah digaga Raja Solomon di Jerusalem),
11 Amariah, Ahitup,
12 Sadok, Salum,
13 Hilkiah, Asariah,
14 Seraiah, Jehosadak.
15 Nyadi Raja Nebukadnesar muai Jehosadak ari menua nya ngagai menua bukai, sama enggau orang bukai di menua Judah, enggau di Jerusalem, ti udah diasuh TUHAN kena buai ngagai menua bukai.
 
Peturun Lewi Ti Bukai
16 Lewi bisi tiga iku anak lelaki: Gerson, Kohat, enggau Merari.
17 Genap iku sida nya bisi anak lelaki magang. Gerson nya apai Libni seduai Simei.
18 Kohat nya apai Amram, Isar, Hebron, enggau Usil.
19 Lalu Merari nya apai Mahli seduai Musi.
20 Peturun Gerson nya suku raban bansa: Libni, Jahat, Simah,
21 Joah, Ido, Serah, Jiterai.
22 Peturun Kohat nya: Aminadap, Korah, Asir,
23 Elkanah, Ebiasap, Asir,
24 Tahat, Uril, Usiah, Saul.
25 Elkanah bisi dua iku anak lelaki: Amasai seduai Ahimot.
26 Peturun Ahimot nya: Elkanah, Sopai, Nahat,
27 Eliap, Jehoram, Elkanah.
28 Samuel bisi dua iku anak lelaki: Joel, ke tuai agi, enggau adi iya Abijah.
29 Peturun Merari nya: Mali, Libni, Simei, Usah,
30 Simea, Hagiah, Asaiah.
Bala Orang Ke Nebah Musik Dalam Rumah Sembiang
31 Tu nama orang ke udah diletak Raja David nyadi tuai nebah musik ba endur alai besembiang di Jerusalem, udah bekau Peti Lampang Batu Adat nya dipindahka ngagai endur nya.
32 Sida begintir-gintir bekereja dalam Langkau Kain TUHAN lebuh Raja Solomon apin ngaga Rumah Sembiang.
33 Tu bagi peturun orang ke megai pengawa nya: Raban peturun Kohat: Heman anak Joel, ti nyadi kepala koir ti terubah. Purih sida endang beduduk ari Jakop, baka tu: Heman, Joel, Samuel,
34 Elkanah, Jeroham, Elil, Toah,
35 Sup, Elkanah, Mahat, Amasai,
36 Elkanah, Joel, Asariah, Sepaniah,
37 Tahat, Asir, Ebiasap, Korah,
38 Isar, Kohat, Lewi, Jakop.
39 Asap nyadi kepala koir ti kedua. Purih iya beduduk ari Lewi, baka tu: Asap, Berekiah, Simea,
40 Mikael, Baseiah, Malkijah,
41 Etni, Serah, Adaiah,
42 Etan, Simah, Simei,
43 Jahat, Gerson, Lewi.
44 Etan ari raban peturun Merari nyadi kepala koir ti ketiga. Iya peturun ari Lewi, baka tu: Etan, Kishi, Abdi, Maluk,
45 Hasabiah, Amasiah, Hilkiah,
46 Amsi, Bani, Semer,
47 Mahli, Musi, Merari, Lewi.
48 Orang peturun Lewi ti bukai udah diberi semua pengawa ti bukai ba endur alai besembiang nya.
 
Peturun Aron
49 Aron enggau peturun iya ngenjuk piring menyan enggau ngenjuk piring tunu ba alta. Sida betanggungjawapka semua pengawa besembah dalam Endur ti Pemadu Kudus, enggau betanggungjawapka piring pengampun dosa orang Israel. Sida ngereja semua pengawa nya nitihka atur ti udah diberi Moses, ke nembiak Allah Taala.
50 Tu tusun peturun Aron: Eleasar, Pinehas, Abisua,
51 Buki, Usi, Serahiah,
52 Meraiot, Amariah, Ahitup,
53 Sadok, Ahimas.
Endur Alai Orang Lewi Diau
54 Tu menua ti udah diberi ngagai raban peturun Kohat ke ari peturun Aron. Sida udah nerima ungkup ti terubah ari menua ti diberi ngagai orang Lewi.
55 Menua nya nyengkaum Hebron di menua Judah, enggau padang rumput ti ngelingi nengeri nya.
56 Tang tanah umai enggau genturung pendiau ti diempu nengeri nya udah diberi ngagai Kalep anak Jepuneh.
57-59 Tu nama nengeri ti udah diberi ngagai peturun Aron: Hebron, sebuah nengeri alai ngerarika diri, Jatir, enggau nengeri ti mit ke benama Libnah, Estemoa, Hilen, Debir, Asan, Bet-semes, enggau padang rumput sida.
60 Tu nama nengeri, sama enggau padang rumput, ti udah diberi ngagai sida dalam menua Benjamin: Geba, Alemet, enggau Anatot. Reti nya, sida bisi tiga belas buah nengeri alai semua ruang bilik sida tau diau.
61 Di menua Manasi Barat, semua ruang bilik raban peturun Kohat ti bukai, udah diberi sepuluh buah nengeri, ngena chara bechabut undi.
62 Ruang bilik raban peturun Gerson udah diberi tiga belas buah nengeri di menua Isakar, Aser, Naptali, enggau Manasi Timur di menua Basan.
63 Baka nya mega, dua belas buah nengeri di menua Reuben, Gat, enggau Sebulun udah diberi ngagai ruang bilik raban peturun Merari.
64 Nya meh chara orang Israel meri nengeri alai orang Lewi diau, sama enggau padang rumput ti ngelingi nengeri nya.
65 (Nengeri ti dalam menua Judah, Simeon, enggau Benjamin ti udah disebut di atas dia tadi, diberi ngagai sida ngena chara bechabut undi.)
66 Sekeda ruang bilik raban peturun Kohat ti udah diberi nengeri enggau padang rumput di menua Epraim nya baka tu:
67 Sekem, iya nya sebuah nengeri alai ngerarika diri di menua ti bebukit di menua Epraim, Geser,
68 Jokmin, Bet-horon,
69 Aijalon, enggau Gat-rimon.
70 Di menua Manasi Barat, sida udah diberi nengeri Aner enggau Bilim, sama enggau padang rumput ti ngelingi nengeri nya.
71 Tu nama nengeri, enggau padang rumput sida ke udah diberi ngagai ruang bilik raban peturun Gerson: Di menua Manasi Timur: Golan di menua Basan, enggau Astarot.
72 Di menua Isakar: Kedes, Daberat,
73 Ramot, enggau Anem.
74 Di menua Aser: Masal, Apdon,
75 Hukok, enggau Rehob.
76 Di menua Naptali: Kedes di Galili, Hamon, enggau Kiriataim.
77 Tu nama nengeri, sama enggau padang rumput sida ke udah diberi ngagai ruang bilik ti bukai ari raban peturun Merari: Di menua Sebulun: Rimono enggau Tabor.
78 Di menua Reuben, ti di timur Sungai Jordan, ngilah Jeriko: Beser ba emperan ti ba atas bukit, Jasah,
79 Kedemot, enggau Mepat.
80 Di menua Gat: Ramot-giliat, Mahanaim,
81 Hesbon, enggau Jaser.
 
Bagi 7
Peturun Isakar
1 Isakar bisi empat iku anak lelaki: Tola, Puah, Jasup, enggau Simron.
2 Tola bisi enam iku anak lelaki: Usi, Repaiah, Jeril, Jamai, Ipsam, enggau Shemuel. Sida tu tuai bilik ke raban peturun Tola, lalu sida nya soldadu ti tebilang nama. Lebuh maya Raja David menya, pemayuh peturun sida bisi 22,600 iku.
3 Usi bisi siku anak lelaki ke benama Israiah. Israiah enggau empat iku anak lelaki iya, Mikael, Obadiah, Joel, enggau Issiah, nyadi tuai bilik magang.
4 Sida mayuh amat bini enggau anak, datai ke peturun sida ulih nyerahka 36,000 iku orang nyadi soldadu.
5 Nitihka nama ti udah ditulis, ruang bilik ari raban bansa Isakar bisi 87,000 iku lelaki ti tau enggau beperang.
 
Peturun Benjamin Enggau Dan
6 Benjamin bisi tiga iku anak lelaki: Bela, Beker, enggau Jediael.
7 Bela bisi lima iku anak lelaki: Esbon, Usi, Usil, Jerimot, enggau Iri. Sida nya nyadi tuai bilik dalam raban peturun nya, lalu sida nya soldadu ti tebilang nama magang. Peturun sida nyengkaum 22,034 iku lelaki ti tau enggau beperang.
8 Beker bisi semilan iku anak lelaki: Semirah, Joas, Elieser, Elioenai, Omri, Jerimot, Abijah, Anatot, enggau Alemet.
9 Nitihka ripih nama orang ke dalam ruang bilik peturun sida, sida bisi 20,200 iku lelaki ti tau enggau beperang.
10 Jediael bisi siku anak lelaki ke benama Bilhan. Bilhan bisi tujuh iku anak lelaki: Jeus, Benjamin, Ehut, Kenanah, Setan, Tarsis, enggau Ahisahar.
11 Sida tu nyadi tuai bilik dalam raban peturun nya, lalu sida tu orang ke tebilang nama nyadi soldadu. Peturun sida nyengkaum 17,200 iku lelaki ti tau enggau beperang.
12 Supim enggau Hupim nya anak Ir; lalu Husim nya anak Aher.
 
Peturun Naptali
13 Naptali bisi empat iku anak lelaki: Jahsil, Guni, Jeser, enggau Salum. Sida tu peturun Bilhah. Peturun Manasi
14 Manasi bisi dua iku anak lelaki ari indu simpan iya ti bansa orang Aram. Nama anak lelaki iya: Asril enggau Makir. Makir nya apai Giliat.
15 Makir lalu ngiga bini ke Hupim, enggau siku ke Supim. Nama menyadi indu Makir nya Maakah. Anak lelaki Makir ke lumur dua nya Selopehat, lalu Selopehat semina bisi anak indu.
16 Maakah, iya nya bini Makir, ngadaka dua iku anak lelaki, ke diberi seduai iya nama Peres enggau Seres. Peres bisi dua iku anak lelaki benama Ulam enggau Takem.
17 Ulam bisi siku anak lelaki benama Bedan. Nya meh peturun Giliat anak Makir, uchu Manasi.
18 Menyadi indu Giliat ke benama Hamoleket bisi tiga iku anak lelaki: Isot, Abieser, enggau Mahlah. (
19 Semida bisi empat iku anak lelaki: Ahian, Sekem, Liki, enggau Aniam.)
 
Peturun Eprai
20 Baka tu ku peturun Epraim ari serak siti ngagai serak siti: Sutelah, Beret, Tahat, Eleadah, Tahat,
21 Sabat, Sutelah. Epraim bisi anak lelaki ti bukai kelimpah ari Sutelah: Eser enggau Eleat, ke kena bunuh lebuh seduai iya nguji ngenchuri jelu tupi orang asal ti diau di Gat.
22 Apai seduai iya Epraim ngulitka seduai iya lama amat, lalu bala kaban belayan iya datai merindang iya.
23 Udah nya iya beleman enggau bini iya baru. Bini iya ngandung lalu ngadaka anak lelaki siku. Seduai iya meri iya nama Beriah,  ketegal penusah ti udah ninggang ruang bilik seduai iya.
24 Epraim bisi siku anak indu benama Serah. Anak indu iya tu nirika nengeri Bet-horon Ulu enggau Bet-horon Ili, enggau Usen Serah.
25 Epraim mega bisi siku anak lelaki benama Repah, ke nurunka Resep, Telah, Tahan
26 Ladan, Amihut, Elisama,
27 Nun, Josua.
28 Menua ti udah dialahka sida, lalu diuan sida nyengkaum Betel enggau nengeri ti mit ti ngelingi Betel, nyentuk ngagai Naran di timur, enggau ngagai Geser di barat enggau nengeri ti mit ngelingi Geser. Menua ti udah dialahka sida mega nyengkaum nengeri Sekem enggau Ayah, enggau nengeri ti mit ti ngelingi semua nengeri nya.
29 Peturun Manasi megai nengeri Bet-san, Taanak, Megido, enggau Dor, enggau nengeri ti mit ti ngelingi semua nengeri nya. Semua nengeri tu nyadi endur alai bala peturun Josep anak Jakop diau.
 
Peturun Aser
30 Tu bala peturun Aser. Iya bisi empat iku anak lelaki: Imnah, Isbah, Isbi, enggau Beriah, enggau siku anak indu benama Serah.
31 Beriah bisi dua iku anak lelaki: Heber enggau Malkil. (Malkil nirika nengeri Birsait.)
32 Heber bisi tiga iku anak lelaki: Japlet, Somer, enggau Hotam, enggau siku anak indu benama Sua.
33 Japlet mega bisi tiga iku anak lelaki: Pasak, Bimhal, enggau Asbat.
34 Menyadi lelaki iya ke benama Somer bisi tiga iku anak lelaki: Rohgah, Jehubah, enggau Aram.
35 Menyadi lelaki iya ke benama Hotam  bisi empat iku anak lelaki: Sopah, Imna, Seles, enggau Amal.
36 Peturun Sopah nya Suah, Harneper, Sual, Beri, Imrah,
37 Beser, Hot, Sama, Silsah, Itran, enggau Bera.
38 Peturun Jeter nya Jepuneh, Pispa, enggau Ara,
39 lalu peturun Ula nya Arah, Hanil, enggau Risia.
40 Semua sida tu peturun Aser magang. Sida nya tuai bilik, orang ke tebilang nama nyadi soldadu, landik nyadi tuai. Peturun Aser bisi 26,000 iku lelaki ti tau enggau beperang.
 
Bagi 8
Peturun Benjamin
1 Benjamin bisi lima iku anak lelaki: Bela, ke anak tuai iya, ditangkanka Asbel, Aharah,
2 Nohah, enggau Rapa.
3 Peturun Bela nya Adar, Gera, Abihut,
4 Abisua, Naaman, Ahoah,
5 Gera, Sepupan, enggau Huram.
6-7 Peturun Ehut nya Naaman, Ahijah, enggau Gera. Sida nya tuai bilik ti diau di Geba, tang sida diburu ari nengeri nya lalu diau di Manahat. Gera apai Usa seduai Ahihut, nya orang ke nguluka sida pindah.
8-9 Saharaim muai bini iya Husim seduai Bara. Udah bekau nya, lebuh iya diau di menua Moap, iya lalu jadi enggau Hodes lalu bisi tujuh iku anak lelaki: Jobap, Sibia, Mesa, Malkam,
10 Jeus, Sakia, enggau Mirmah. Semua anak lelaki iya nyadi tuai bilik magang.
11 Iya mega bisi dua iku anak lelaki ke diadaka Husim. Nama seduai nya Ahitup enggau Elpal.
12 Elpal bisi tiga iku anak lelaki: Eber, Misam, enggau Semet. Semet nya meh orang ke nirika nengeri Ono enggau Lod, enggau genturung pendiau ti ngelingi nya dia.
 
Orang Benjamin Di Gat Enggau Di Aijalon
13 Beriah enggau Sema nya tuai bilik ke ngentapka diri di nengeri Aijalon, lalu muru orang ke diau di nengeri Gat.
14 Peturun Beriah nyengkaum Ahio, Sasak, Jerimot,
15 Sebadiah, Arat, Eder,
16 Mikael, Ispah, enggau Joha.
 
Orang Benjamin Di Jerusalem
17 Peturun Elpal nyengkaum Sebadiah, Mesulam, Hiski, Heber,
18 Ismerai, Isliah, enggau Jobap.
19 Peturun Simei nyengkaum Jakim, Sikri, Sapdi,
20 Elienai, Siletai, Eliel,
21 Adaiah, Beraiah, enggau Simrat.
22 Peturun Sasak nyengkaum Ispan, Eber, Elil,
23 Apdon, Sikri, Hanan,
24 Hananiah. Elam, Antotijah,
25 Ipdiah, enggau Penuel.
26 Peturun Jehoram nyengkaum: Samserai, Sehariah, Ataliah,
27 Jarasiah, Elijah, enggau Sikri.
28 Tu meh bala orang ke nyadi tuai bilik, enggau bala peturun sida ke diau di Jerusalem.
 
Orang Benjamin Di Gibeon Enggau Di Jerusalem
29 Jeil nirika nengeri Gibeon, lalu ngentapka diri dia. Bini iya benama Maakah,
30 lalu anak lelaki iya ke tuai nya Abdon. Bala anak lelaki iya ti bukai nya Sur, Kis, Baal, Ner, Nadap,
31 Gedor, Ahio, Sekariah,
32 enggau Miklot, apai Simeah. Peturun sida di Jerusalem diau semak ruang bilik orang bukai ke ari raban peturun sida.
 
Ruang Bilik Raja Saul
33 Ner nya apai Kis, lalu Kis nya apai Raja Saul. Saul bisi empat iku anak lelaki: Jonatan, Malkisua, Abinadap, enggau Esbaal.
34 Jonatan nya apai Meribaal, lalu Meribaal nya apai Mikah.
35 Mikah bisi empat iku anak lelaki: Piton, Melek, Tarea, enggau Ahas.
36 Ahas nya apai Jehoadah. Jehoadah bisi tiga iku anak lelaki: Alemet, Asmabet, enggau Simri. Simri nya apai Mosa,
37 Mosa nya apai Binea, Binea apai Rapah, Rapah apai Eleasah, lalu Eleasah nya apai Asel.
38 Asel bisi enam iku anak lelaki: Asrikam, Bokeru, Ismail, Seariah, Obadiah, enggau Hanan.
39 Menyadi lelaki Asel ke benama Esek bisi tiga iku anak lelaki: Ulam, Jeus, enggau Elipelet.
40 Bala anak lelaki Ulam nyadi soldadu lalu tebilang nama, sereta landik nimbakka panah. Pemayuh bala anak lelaki enggau uchu Ulam nya seratus lima puluh iku. Semua orang ke disebut nama di atas dia tadi nya datai ari raban bansa Benjamin magang.
 
Bagi 9
Orang Tangkap Pulai Ngagai Menua Diri
1 Nama semua orang Israel dituliska magang nitihka ruang bilik sida, lalu nama sida tu bisi ditulis dalam Bup Raja Menua Israel. Orang Judah udah dibuai ngagai menua Babilon kena ngukum sida, ketegal sida udah bedosa.
2 Orang ke terubah pulai ngagai tanah sida empu dalam mayuh bengkah nengeri nyengkaum bala orang Israel, bala imam, bala orang Lewi, enggau bala orang ke bekereja dalam Rumah Sembiang.
3 Raban bansa Judah, Benjamin, Epraim, enggau Manasi lalu diau di Jerusalem.
4-6 Pemayuh ruang bilik ari raban bansa Judah ti diau di Jerusalem nya 690. Bala peturun anak lelaki Judah ke benama Peres ngasuh Utai anak Amihut, uchu Omri nyadi tuai sida. Bala aki ini iya ti bukai nyengkaum Imri enggau Bani. Bala peturun anak lelaki Judah ke benama Selah ngasuh Asaiah nyadi tuai sida, lalu iya mega nyadi tuai ke ruang bilik iya empu. Bala peturun anak lelaki Judah ke benama Serah ngasuh Jeuel nyadi tuai sida.
7-8 Tu nama orang ari raban bansa Benjamin ti diau di Jerusalem: Salu anak Mesulam, uchu Hodabiah, ichit Hasenuah, Ibneah anak Jeroham, Elah anak Usi, uchu Mikri, Mesulam anak Sepatiah, uchu Reuel, ichit Ibnijah
9 Pemayuh ruang bilik ari raban tu ti diau di Jerusalem nya 956. Semua lelaki ti udah disebut nama di atas dia tadi nyadi tuai ruang bilik magang. Bala Imam Ke Diau Di Jerusalem
10-12 Tu nama sida imam ti diau di Jerusalem: Jedaiah, Jehoiarip, enggau Jachin. Asariah anak Hilkiah (pemesai ti nyadi tuai dalam Rumah Sembiang). Aki ini iya nyengkaum Mesulam, Sadok, Meraiot, enggau Ahitup. Adaiah anak Jeroham. Aki ini iya nyengkaum Pasur enggau Malkijah. Masai anak Adil. Aki ini iya nyengkaum Jahserah, Mesulam, Mesilemit, enggau Imer.
13 Pemayuh bala imam ti nyadi tuai bilik nya seribu tujuh ratus enam puluh iku. Sida tu orang ke landik ngereja semua pengawa dalam Rumah Sembiang.
 
Orang Lewi Ke Diau Di Jerusalem
14-16 Tu nama orang Lewi ti diau di Jerusalem: Semaiah anak Hasup. Aki ini iya nyengkaum Asrikam enggau Hasabiah, ari raban peturun Merari. Bakbakar, Heres, enggau Galal. Mataniah anak Mika. Aki ini iya nyengkaum Sikri enggau Asap. Obadiah anak Semaiah. Aki ini iya nyengkaum Galal enggau Jedutun. Berekiah anak Asa, uchu Elkanah, ti diau di menua ti diempu nengeri Netopah.
 
Bala Orang Ke Diau Di Jerusalem Lalu Nyaga Rumah Sembiang
17 Tu nama orang ke nyaga Rumah Sembiang lalu diau di Jerusalem: Salum, Akup, Talmon, enggau Ahiman. Orang ke nyadi tuai sida nya Salum.
18 Nyentuk ngagai maya nya, raban peturun sida udah diasuh nyaga ba Pintu Raja ti muak ke timur. Dulu ari nya, sida udah diasuh jaga ba penama ngagai kem orang Lewi.
19 Salum anak Kore, uchu Ebiasap, enggau sida bukai ke sama datai ari raban peturun Korah, betanggungjawap nyaga penama ngagai Langkau Kain TUHAN, baka aki ini sida kelia lebuh sida agi ngintu kem TUHAN.
20 Pinehas anak Eleasar - awakka TUHAN nyaga iya! udah kala nyadi tuai sida suba.
21 Sekariah anak Meselemiah udah mega kala nyadi jejaga ba penama ngagai Langkau Kain TUHAN.
22 Pemayuh semua orang ke udah dipilih nyaga penama enggau pintu kuta nya 212 iku. Nama sida udah dituliska magang nitihka nama genturung pendiau ti alai sida diau. Aki ini sida udah diletak Raja David enggau nabi Samuel mangku pengawa nya.
23 Sida enggau peturun sida mengkang nyaga pintu Rumah Sembiang.
24 Siti ari pintu nya nunga ngagai utara, siti nunga ngagai selatan, siti ngagai timur lalu siti nunga ngagai barat, lalu tiap-tiap iti pintu nya endang bisi siku tuai jejaga.
25 Bala jejaga tu disaup kaban belayan sida ke diau ba sebelah genturung pendiau sida empu, lalu ngambi gintir diri nyaga pintu nya, tujuh hari sekali.
26 Orang ke nyadi tuai bala jejaga nya endang orang Lewi. Sida nya orang ke betanggungjawapka pengawa nya. Sida mega betanggungjawapka semua bilik dalam Rumah Sembiang, enggau ke semua utai ti ditaruh dia.
27 Sida diau semak Rumah Sembiang, laban sida betanggungjawap nyaga Rumah nya, sereta muka pintu nya tiap pagi.
 
Orang Lewi Ti Bukai
28 Orang Lewi ti bukai betanggungjawapka pekekas ti dikena besembah. Genap kali utai nya dikena, iya enda tau enda ditulis lebuh iya dibai ke luar, lalu dituliska mega lebuh iya dipulaika baru.
29 Sida ke bukai ngemataka pekekas kudus ti bukai, tepung, wain, minyak kana, menyan, enggau rempah.
30 Tang orang ke betanggungjawap ngerakit rempah nya bala imam.
31 Siku orang Lewi ke benama Matitiah, anak tuai Salum, ari raban peturun Korah, betanggungjawap nyendiaka pemeri ti dipanggang.
32 Raban raban peturun Kohat betanggungjawap nyendiaka roti ti kudus
33 Sekeda ruang bilik orang Lewi betanggungjawapka musik dalam Rumah Sembiang. Bala tuai bilik tu diau dalam sekeda rumah dalam Rumah Sembiang, lalu sida iya nadai diasuh ngereja pengawa bukai, laban sida enda tau enda seruran nganti diri dikangauka siang malam.
34 Orang ke disebut nama di atas dia tadi nya tuai bilik orang Lewi, nitihka peturun sida. Sida nya meh orang ke nyadi tuai ke orang ke diau di Jerusalem.
 
Aki ini Enggau Peturun Raja Saul (1 Bansa Israel 8.29-38)
35 Jeiel nirika nengeri Gibeon lalu iya ngentapka diri dia. Nama bini iya Maakah.
36 Anak lelaki iya ke tuai benama Abdon, lalu anak lelaki iya ti bukai nya Sur, Kis, Baal, Ner, Nadap,
37 Gedor, Ahio, Sekariah, enggau Miklot
38 apai Simeah. Peturun sida nya diau di Jerusalem semak ruang bilik ti bukai ke ari raban peturun sida.
39 Ner nya apai Kis, lalu Kis nya apai Saul. Saul bisi empat iku anak lelaki: Jonatan, Malkisua, Abinadap, enggau Esbaal.
40 Jonatan nya apai Meribaal, lalu Meribaal nya apai Mikah.
41 Mikah bisi empat iku anak lelaki: Piton, Melek, Tarea, enggau Ahas.
42 Ahas nya apai Jarah, ti nyadi apai Alemet, Asmabet, enggau Simri. Simri nya apai Mosa,
43 Mosa apai Binea, Binea apai Repaiah, Repaiah apai Eleasah, lalu Eleasah nya apai Asel.
44 Asel bisi enam iku anak lelaki: Asrikam, Bokeru, Ismail, Seariah, Obadiah, enggau Hanan.
 
Bagi 10
Pemati Raja Saul (1 Samuel 31.1-13)
1 Orang Pilistin beperang ngelaban orang Israel ba Bukit Gilboa. Mayuh orang Israel mati ba endur nya, lalu sida ti bukai, nyengkaum Raja Saul enggau bala anak lelaki iya, rari.
2 Tang orang Pilistin ulih ngagai sida, lalu munuh anak lelaki Saul ke tiga iku, iya nya Jonatan, Abinadap, enggau Malkisua.
3 Balat amat orang belaban ngelingi Saul. Iya lalu kena laban laja munsuh, lalu balat amat bakal.
4 Ku iya bejaku enggau orang bujang siku ke mai senyata ke iya, “Sintak pedang nuan, lalu bunuh aku, ngambika orang Pilistin ke kapir nya enda ngayahka aku.” Tang orang bujang nya enda berani munuh Saul. Nya alai Saul nyintak pedang iya empu, lalu ngerejang diri ngena pedang nya.
5 Lebuh orang bujang nya meda Saul udah mati, iya lalu ngerejang diri ngena pedang iya empu, lalu mati.
6 Nya alai Saul enggau tiga iku anak lelaki iya sama mati, lalu nadai siku ari peturun iya bisi kala megai perintah udah lepas nya.
7 Lebuh orang Israel ti diau ba Lebak Jesril ninga berita bala soldadu udah rari, lalu Saul enggau bala anak lelaki iya udah mati, sida lalu ninggalka nengeri sida, lalu rari. Udah nya orang Pilistin datai lalu nguan nengeri nya.
8 Sehari udah bekau perang nya, orang Pilistin lalu ngerampas utai ari bangkai, lalu tetemuka bangkai Saul enggau bangkai anak lelaki iya garing-garing ba Bukit Gilboa.
9 Sida mumpung pala Saul, muka semua senyata ari tubuh iya, lalu ngasuh bala seruan mai utai nya ngagai serata menua Pilistin, madahka berita manah nya ngagai engkeramba enggau ngagai bansa sida empu.
10 Sida nyimpan senyata Saul dalam sebuah rumah sembiang sida, lalu ngantung pala iya dalam rumah sembiang petara Dagon.
11 Lebuh orang Jabes di Giliat ninga pasal utai ti udah dikereja orang Pilistin ngagai Saul,
12 lelaki ke pemadu berani mansang lalu ngambi bangkai Saul enggau bangkai sida anak lelaki iya, lalu mai sida ngagai Jabes, lalu nguburka sida dia di baruh sebatang kayu oak, lalu bepasa tujuh hari.
13 Saul mati laban iya enda tetap ati ngagai TUHAN. Iya enda ngasika pesan TUHAN. Iya nguji minta jaku lalau ari semengat orang ke udah mati,
14 ukai betanya ngagai TUHAN. Nya alai TUHAN munuh iya, lalu nyerahka perintah iya ngagai David anak Jesi.
 
Bagi 11
David Nyadi Raja Menua Israel Enggau Menua Judah (2 Samuel 5.1-10)
1 Semua orang Israel mansang ngagai David di Hebron, lalu bejaku enggau iya, “Kami tu kaban belayan nuan.
2 Dulu menya, lebuh Saul agi nyadi raja kitai, nuan endang udah nguluka orang Israel beperang, lalu TUHAN Allah Taala nuan udah besemaya enggau nuan, madahka nuan deka nguluka bala nembiak Iya, lalu nyadi raja sida.”
3 Nya alai semua tuai bansa orang Israel mansang ngagai Raja David di Hebron. David ngaga siti sempekat ti kudus enggau sida. Sida nyiri iya nyadi raja menua Israel, nitihka jaku ti disebut TUHAN ngena Samuel.
4 Raja David enggau semua orang Israel mupuk lalu nyerang nengeri Jerusalem. Lebuh maya nya menya nengeri nya dikumbai Jebus. Nyadi orang Jebus, iya nya orang asal menua nya agi diau dia.
5 Orang Jebus madahka ngagai David, iya enda ulih tama ngagai nengeri nya. Tang David ngalahka kuta Sion sida, lalu kenyau ari nya nengeri nya dikumbai “Nengeri David.”
6 Ku David, “Orang ke terubah munuh orang Jebus deka nyadi kepala soldadu!” Joap - indai iya Seruiah - nguluka bala nyerang, lalu iya nyadi tuai soldadu.
7 Laban David diau dalam kuta nya, nya alai kuta nya dikumbai “Nengeri David.”
8 Iya ngaga nengeri nya baru, berengkah ba tanah tambun ti ba tisi bukit muak ke timur. Udah nya Joap lalu ngaduka endur bukai ba nengeri nya.
9 David mansang kering-sekering, laban TUHAN ti Pemadu Bekuasa bisi enggau iya.
 
Bala Soldadu David Ke Tebilang Nama (2 Samuel 23.8-39)
10 Tu nama bala soldadu David ti tebilang nama. Bala sida tu, sama enggau orang Israel ti bukai, nyiri iya nyadi raja, munyi ti udah disemaya TUHAN, lalu ngasuh perintah iya kering.
11 Iya ti keterubah nya Jasobim ari raban peturun Hakmon. Iya tu nyadi tuai ke Orang Ti Tiga Iku. Iya ngelaban tiga ratus iku munsuh ngena sangkuh, lalu munuh semua sida dalam sekali betempuh.
12 Orang ke nangkanka iya ari sida tiga ti tebilang nama nya Eleasar anak Dodo, ari raban peturun Ahoh.
13 Iya enggau David ngelaban orang Pilistin lebuh sida betempuh ba Pas-damim. Iya agi benung ba umai barli lebuh orang Israel belabuh rari.
14 Nya alai iya enggau bala iya lalu nan ba umai nya, lalu ngelaban orang Pilistin. TUHAN ngasuh iya balat amat menang.
15 Nyadi sekali, tiga iku ari tiga puluh iku soldadu ti tebilang nama nya mansang ngagai batu alai David ti diau semak gua Adulam. Lebuh maya nya seraban soldadu orang Pilistin bepalan ba Lebak Repaim.
16 Lebuh maya nya David diau ba bukit ti bekuta, lalu seraban orang Pilistin udah ngalahka nengeri Betlehem.
17 David nyau lelengauka menua iya empu, lalu ku iya bejaku, “Naka meh pemanah enti sema orang bisi mai ai irup ngagai aku ari telaga ti semak pintu kuta di Betlehem!”
18 Tiga iku soldadu ti tebilang nya lalu angkat ngerenchah kem orang Pilistin, nyauk ai ari telaga nya, lalu mai ai nya ngagai David. Tang iya enggai ngirup ai nya, lalu iya nuang ai nya nyadika piring ti diberi ngagai TUHAN.
19 Ku iya, “Enggai nyadi aku ngirup ai tu, laban nya baka ke ngirup darah orang ke udah berambunka nyawa!” Nya alai iya enggai ngirup ai nya. Nya meh utai ti udah dikereja orang tiga iku ti tebilang nya tadi, ti udah ngayanka pemerani diri.
20 Menyadi Joap ke benama Abisai nya orang ke nyadi tuai ke Tiga Puluh Iku. Iya bamuk ngena sangkuh ngelaban tiga ratus iku munsuh, lalu munuh sida, lalu iya nyadi orang ke tebilang agi ari sida ke Tiga Puluh Iku.
21 Abisai nya orang ke pemadu tebilang ke semua sida ke Tiga Puluh Iku lalu iya nyadi tuai sida, tang iya kurang agi tebilang ari sida ke tiga iku.
22 Benaiah anak Jehoiada ari Kabsil nya soldadu ti tebilang. Iya suah ngereja utai ti ngayanka pemerani iya, nyengkaum munuh dua iku raja berani orang Moap. Nyadi sekali iya tama ngagai lubang kebung lebuh hari balat amat seleju, lalu munuh siku singa.
23 Iya mega munuh siku orang Ejip ke besai amat gamal, ti tinggi tujuh kaki setengah, ke besenyataka siti sangkuh ti besai bendar. Benaiah ngelaban iya ngena pemalu, ngerampas sangkuh nya ari jari orang Ejip nya, lalu munuh iya ngena sangkuh nya.
24 Nya meh utai ti dikereja Benaiah ti ngayanka pemerani iya. Iya tu siku ari sida ke Tiga Puluh Iku.
25 Iya tebilang agi ari sida ke “Tiga Puluh,” tang kurang agi tebilang ari sida ke “Tiga Iku.” David milih iya nyadi jejaga iya empu.
26-47 Tu nama bala soldadu ti bukai ti tebilang nama:
Asahel, menyadi lelaki Joap
Elhanan anak Dodo, ari Betlehem
Samot ari Harot
Heles ari Pelet
Ira anak Ikes ari Tekoa
Abieser ari Anatot
Sibichai ari Husah
Ilai ari Ahoh
Maharai ari Netopah
Helet anak Banah ari Netopah
Itai anak Ribai ari Gibe-ah di menua Benjamin
Benaiah ari Piraton
Hurai ari lebak ti semak Gas
Abil ari Arbah
Asmabet ari Baharum
Eliaba ari Salbon
Hasem  Jonatan anak Sagi ari Harar
Ahiam anak Sakar ari Harar
Elipal anak Ur
Heper ari Mekerah
Ahijah ari Pelon
Hesro ari Karmel
Narai anak Esbai
Joel menyadi lelaki Natan
Miphar anak Hakri
Selek ari Amon
Naharai, orang ke mai senyata ke Joap, ari Berot
Ira seduai Garep ari Jatir
Uriah, orang Iti
Sabat anak Ahlai
Adina anak Sisa (siku orang ke tampak nama ari raban bansa Reuben, enggau tiga puluh iku bala soldadu iya empu)
Hanan anak Maakah
Josapat ari Mitan
Usia ari Asterah
Sama seduai Jeil, anak Hotam, ari Aroer
Jediael seduai Joha, anak Simri, ari Tis
Elil ari Mahabah
Jeribai seduai Josabiah, anak Elnam
Itmah ari Moap
Elil, Obet, enggau Jasil ari Sobah.
 
Bagi 12
Orang Ke Nyukung David Ari Raban Bansa Benjamin
1 Nyadi David diau di Siklak, udah bekau iya ke ngerarika diri ari Raja Saul. Mayuh bala soldadu ke teleba beperang, sereta tau dikarapka, datai nyukung iya dia.
2 Sida tu orang ari raban bansa Benjamin, iya nya raban bansa Saul empu. Sida landik nimbakka laja enggau nimbakka batu ngena pangwang ngena jari kanan tauka ngena jari kiba.
3-7 Sida diuluka Ahieser seduai Joas, anak Semah, ari Gibe-ah.
Tu nama bala soldadu nya:
Jesil seduai Pelet, anak Asmabet
Berakah seduai Jehu ari Anatot
Ismaiah ari Gibeon, siku soldadu ti tebilang, siku ari tuai sida ke “Tiga Puluh”
Jeremiah, Jahasil, Johanan, enggau Josabat, ari Gederah
Elusai, Jerimot, Bealiah, Semariah, enggau Sepatiah, ari Harip
Elkanah, Isiah, Asarel, Joeser, enggau Jasobim, ari raban peturun Korah
Joelah seduai Sebediah, anak Jeroham, ari Gedor
 
Orang Ke Nyukung David Ari Raban Bansa Gat
8 Tu nama bala soldadu ti tebilang, sereta teleba beperang, ari raban bansa Gat ke enggau raban bala soldadu David, lebuh iya ba kuta di menua puang. Sida tu landik ngena terabai enggau sangkuh, lalu mangah baka singa, sereta sikar baka rusa bukit.
9-13 Tu nama sida ditusun nitihka ripih pangkat sida: Eser, Obadiah, Eliap, Mismanah, Jeremiah, Atai, Elil, Johanan, Elsabat, Jeremiah, enggau Makbanai.
14 Sekeda ari bala soldadu ke datai ari raban bansa Gat, nya pemesai ti tinggi pangkat ke nguluka seribu iku orang, lalu sida ti bukai nya baruh agi pangkat, nguluka seratus iku orang.
15 Dalam bulan ti kesatu, lebuh Sungai Jordan nyau bah ampuh tebing, sida meraka sungai nya. Orang ke diau ba sebelah emperan ti ba tebing timur enggau tebing barat Jordan lalu rari.
 
Orang Ari Benjamin Enggau Ari Judah Ke Nitihka David
16 Nyadi sekali seraban bala orang ari raban bansa Benjamin enggau ari raban bansa Judah mansang ngagai kuta ti alai David diau.
17 David mansang ngambat sida, lalu ku iya, “Enti kita datai mai ati ti manah laban kita deka nulung aku, kami ngelaluka penatai kita. Awakka kita enggau kami. Tang enti kita bisi ati deka nyual aku ngagai munsuh, taja pen aku nadai ati deka ngemediska kita, Allah Taala aki ini kitai deka nemu nya, lalu ngukum kita.”
18 Roh Allah Taala lalu bekuasa ba siku ari bala sida ke benama Amasai, ti deka nyadi tuai sida ke “Tiga Puluh”. Ku Amasai ngangau, “David anak Jesi, kami tu nembiak nuan! Awakka nuan enggau orang ke nyukung nuan mujur magang! Allah Taala setanah enggau nuan.” David lalu ngelaluka sida, lalu ngeletak sida nyadi pemesai bala soldadu iya.
 
Orang Ke Nitihka David Ari Raban Bansa Manasi
19 Sekeda soldadu ari raban bansa Manasi udah ninggalka Saul lalu ngalih ari David lebuh David mansang enggau orang Pilistin nyerang Raja Saul. Iya ti bendar, iya ukai nulung orang Pilistin, tang laban bala raja orang Pilistin takutka iya nyual sida ngagai tuan iya Raja Saul. Nya alai sida ngasuh David pulai baru ngagai Siklak
20 Tu nama bala soldadu ari Manasi ke ngalih ari David lebuh iya pulai: Adnah, Josabat, Jediael, Mikael, Josabat, Elihu enggau Siletai. Semua sida tu endang tuai ke seribu iku orang di menua Manasi.
21 Sida bekereja ke David nyadi pemesai soldadu iya, laban semua sida nya endang soldadu ti tebilang magang. Udah bekau nya sida lalu nyadi pemesai soldadu orang Israel.
22 Orang masuk nyadi soldadu David nyau deka tiap hari. Nya kebuah pemayuh bala soldadu iya jampat betambah.
 
Nama Bala Soldadu David
23-37 Lebuh David agi di Hebron, mayuh soldadu ti udah chukup dilatih masuk nyadi soldadu iya, nyukung iya nyadi raja nganti Saul, munyi ti udah disemaya TUHAN. Pemayuh tubuh sida nya baka tu: Judah: 6,800 iku orang ke besenyataka terabai enggau sangkuh.
Simeon: 7,100 iku orang ke chukup dilatih;
Lewi: 4,600 iku.
Orang ke nitihka Jehoiada, ari peturun Aron: 3,700 iku;
Kaban belayan Sadok, iya nya siku orang ke landik belaban: 22 iku tuai bala;
Benjamin (iya nya raban bansa Saul empu): 3,000 iku. (Nyau ke semua orang Benjamin agi taluk ngagai Saul);
Epraim: 20,800 orang ke tebilang dalam raban peturun sida empu;
Manasi Barat: 18,000 iku orang ke udah dipilih nyiri David nyadi raja;
Isakar: 200 tuai soldadu, sama enggau bala soldadu ke diuluka sida. (Bala tuai soldadu tu nemu utai ti patut dikereja orang Israel, lalu nemu mega maya ti pemadu manah alai utai nya patut dikereja);
Sebulun: 50,000 orang ke taluk sereta tau dikarapka, ke sedia deka belaban, sereta udah dilatih bekenaka semua macham senyata;
Naptali: 1,000 iku tuai soldadu, sama enggau 37,000 iku orang ke besenyataka terabai enggau sangkuh;
Dan: 28,600 iku orang ke udah dilatih;
Aser: 40,000 iku orang ke sedia deka beperang;
Raban bansa ti di timur Sungai Jordan - Reuben, Gat, enggau Manasi Timur: 120,000 iku orang ke udah dilatih bekenaka semua macham senyata.
38 Semua bala soldadu nya sedia deka beperang magang. Lalu sida mansang ngagai Hebron, mutus ati deka nyiri David nyadi raja ke semua menua Israel. Semua orang ke bukai bela begempung ati magang deka ngulihka juluk ati nya.
39 Sida diau enggau David dia tiga hari, ngintu pengerami makai besai, bepakaika pemakai ti udah disediaka kaban belayan sida.
40 Raban bansa ti di utara, iya nya raban bansa Isakar, Sebulun enggau Naptali, datai mai keledai, unta, enggau sapi ti mai pemakai - tepung, buah ara, salai buah anggur, wain, enggau minyak kana. Sida mega mai jelu sapi enggau jelu bedus ngambika bisi dibunuh lalu diempa. Semua utai tu dikena sida ngayanka pengaga ati semua orang di serata menua nya.
 
Bagi 13
Peti Lampang Batu Adat Dipindahka Ari Kiriat-jearim (2 Samuel 6.1-11)
1 Raja David lalu betanya ngagai semua pemesai ti nyadi tuai ke seribu iku, enggau ke seratus iku soldadu.
2 Udah nya iya lalu madahka ngagai semua orang Israel, “Enti kita ngemendar, lalu enti tu peneka TUHAN Allah Taala kitai, awakka kitai ngasuh orang mai pesan ngagai semua bansa kitai, enggau ngagai bala imam, enggau ngagai orang Lewi ti diau di nengeri kita, mai sida begempuru ditu enggau kitai.
3 Udah nya kitai deka ngambi Peti Lampang Batu Adat Allah Taala, ti enda kala dikibuhka Saul lebuh iya nyadi raja.”
4 Orang mayuh gaga ati ninga penemu nya, lalu sida besetuju.
5 Nya alai David ngempuruka orang Israel ari serata menua nya, kenyau ari garis entara menua enggau orang Ejip di selatan, nyentuk ngagai Genting Hamas di utara, laban sida deka mai Peti Lampang Batu Adat nya ari Kiriat-jearim ngagai Jerusalem.
6 David enggau orang mayuh lalu mansang ngagai nengeri Baalah, iya nya Kiriat-jearim, di menua Judah, deka ngambi Peti Lampang Batu Adat Allah Taala ti TUHAN, ke duduk ba kerusi diraja Iya atas melikat cherub ti besayap, ti dikumbai ngena nama TUHAN.
7 Sida lalu ngambi Peti Lampang Batu Adat nya ari rumah Abinadap, lalu mai Peti nya ngena kerita tarit ti agi baru. Usah seduai Ahio lalu ngiring kerita tarit nya,
8 lalu David enggau semua orang mayuh betanda enggau pengabis ati sida ngemesaika Allah Taala. Sida belagu, sereta nebah belikan, dedumbak, bebendai, enggau terumpit.
9 Lebuh sida datai ba endur alai orang ngindik gandum di Chidon, jelu sapi ti narit kerita tarit nya tesangkut. Usah nyapai lalu ngetanka Peti Lampang Batu Adat nya.
10 TUHAN lalu tekala nya ringat ngagai Usah, lalu munuh iya laban iya udah negu Peti nya. Usah lalu mati dia di mua Allah Taala.
11 Nya kebuah endur nya dikumbai Peres-usah nyentuk ngagai diatu. David pedis ati laban TUHAN udah ringat lalu ngukum Usah.
12 Udah nya David takutka Allah Taala, lalu ku iya, “Baka ni ku aku ulih mai Peti Lampang Batu Adat nya diatu?”
13 Nya alai David enda nyadi mai Peti Lampang Batu Adat nya ngagai Jerusalem, tang ninggalka iya ba rumah orang siku ke benama Obet-edom, ke datai ari nengeri Gat.
14 Peti nya mengkang dia tiga bulan, lalu TUHAN merekatka sida Obet-edom sebilik, sereta merekatka semua utai ti diempu iya.
 
Bagi 14
Utai Ti Dikereja David Di Jerusalem (2 Samuel 5.11-16)
1 Raja Hiram di Tire lalu ngasuh seraban orang dagang nemuai ngagai David. Iya ngirumka ngagai David batang kayu sidar, tukang batu, tukang kayu, ngambika sida ngaga sebuah istana ke David.
2 Ari nya David nemu TUHAN udah ngasuh iya tegap nyadi raja menua Israel, lalu udah ngasuh menua ti diperintah iya kaya-raja, ke penguntung bala nembiak iya.
3 Jerusalem nya meh endur alai David ke ngambi mayuh agi bini, lalu mayuh agi anak lelaki enggau anak indu.
4 Tu nama bala anak iya ke ada di Jerusalem: Shamua, Sobap, Natan, Solomon,
5 Ibhar, Elisua, Elpelet,
6 Nogah, Nepek, Japia,
7 Elisama, Biliada, enggau Elipelet.
 
Menang Ngelaban Orang Pilistin (2 Samuel 5.17-25)
8 Lebuh orang Pilistin ninga David udah dichiri nyadi raja ke semua menua Israel, bala soldadu sida lalu mansang deka nangkap iya. Lebuh David ninga nya, iya lalu mansang ngelaban sida.
9 Orang Pilistin datai ba Lebak Repaim, lalu belabuh ngerumpak utai ari menua nya.
10 David lalu betanya ngagai Allah Taala, “Kati tau aku nyerang orang Pilistin? Kati Nuan deka ngasuh aku menang?” TUHAN lalu nyaut, “Serang meh sida! Aku deka ngasuh nuan menang!”
11 Nya alai David nyerang sida di Baal-perasim, lalu ngalahka sida. Ku iya, “Allah Taala udah ngena aku ngalahka bala soldadu munsuh baka ai bah.” Nya alai endur nya dikumbai Baal-perasim.
12 Orang Pilistin rari, lalu ninggalka engkeramba sida. David lalu meri atur ngasuh engkeramba nya ditunu.
13 Enda lama udah bekau nya orang Pilistin pulai baru ngagai emperan nya, lalu belabuh ngerumpak utai dia baru.
14 David lalu betanya ngagai Allah Taala baru. Allah Taala lalu nyaut, “Anang nyerang sida ari tu, tang kelulung sida, lalu serang sida ari sepiak nyin, semak kayu balsam.
15 Lebuh nuan ninga munyi redup kaki orang bejalai ba puchuk kayu, nya baru nuan tau belabuh nyerang, laban Aku deka bejalai dulu ari nuan lalu ngalahka bala soldadu orang Pilistin.”
16 David lalu ngereja nitihka jaku Allah Taala. Nya alai David muru orang Pilistin ari Gibeon nyentuk ngagai Geser.
17 Berita pasal David ngelekai ngagai semua endur, lalu TUHAN ngasuh semua bansa takut magang ke iya.
 
Bagi 15
Sedia Deka Mindahka Peti Lampang Batu Adat
1 David ngaga berapa buah rumah di Nengeri iya empu, ke guna iya empu. Iya mega nyendiaka siti endur alai nyimpan Peti Lampang Batu Adat Allah Taala, lalu nirika sebuah langkau kain ke Peti nya.
2 Udah nya iya bejaku, “Semina orang Lewi aja tau ngesan Peti Lampang Batu Adat nya, laban sida udah dipilih TUHAN ngesan Peti nya, sereta bekereja ke Iya belama iya.”
3 Nya alai David mesanka semua orang Israel datai ngagai Jerusalem, deka mai Peti Lampang Batu Adat nya ngagai endur ti udah disediaka iya.
4 Udah nya iya mesanka bala peturun Aron, enggau bala orang Lewi.
5 Uril, ari raban peturun Kohat, ari peturun Lewi, lalu datai nguluka seratus dua puluh iku kaban belayan iya.
6 Asaiah ari raban peturun Merari, nguluka dua ratus dua puluh iku orang.
7 Joel ari raban peturun Gerson, nguluka seratus tiga puluh iku orang.
8 Semaiah, ari raban peturun Elisapan, nguluka dua ratus iku orang.
9 Elil, ari raban peturun Hebron datai, nguluka lapan puluh iku orang.
10 Lalu Aminadap, ari raban peturun Usil mega datai, nguluka seratus dua belas iku orang.
11 David lalu mesanka Imam Sadok, Imam Abiatar enggau enam iku orang Lewi, iya nya Uril, Asaiah, Joel, Semaiah, Elil enggau Aminadap.
12 Ku iya bejaku enggau orang Lewi, “Kita tu tuai ke raban peturun orang Lewi. Tuchi diri empu, enggau orang Lewi ti bukai, ngambika kita tau mai Peti Lampang Batu Adat TUHAN Allah Taala ke disembah orang Israel ngagai endur ti udah disediaka aku ke iya.
13 Laban kita nadai enggau orang ngesan Peti Lampang Batu Adat nya keterubah iya menya, nya alai TUHAN Allah Taala kitai udah ngukum kitai laban kitai enda nyembah Iya ngena chara ti menyana.”
14 Udah nya bala imam enggau bala orang Lewi lalu nuchi diri empu, ngambika sida tau mai Peti Lampang Batu Adat TUHAN Allah Taala ke disembah orang Israel.
15 Orang Lewi lalu ngesan Peti Lampang Batu Adat nya ngena kayu pengaling, nitihka jaku ti udah disebut TUHAN ngena Moses.
16 David ngasuh bala tuai orang Lewi milih orang ari raban bansa sida empu belagu, lalu nebah musik ngena belikan enggau bebendai.
17-21 Orang ke dipilih nebah bebendai temaga nya datai ari raban peturun ti landik belagu. Sida nya Heman anak Joel, kaban iya Asap anak Berekiah, enggau Etan anak Kusaiah, ari raban peturun Merari. Sida lalu milih orang Lewi ti bukai nulung sida nebah belikan ti mit. Nama sida nya Sekariah, Jasil, Semiramot, Jehiel, Uni, Eliap, Maseiah, enggau Benaiah. Orang Lewi ke dipilih nebah belikan ti besai nya Matitiah, Elipelehu, Mikniah, Asasiah, enggau dua iku orang ke nyaga rumah TUHAN, iya nya Obet-edom seduai Jeiel.
22 Laban Chenaniah landik nebah musik nya alai iya dipilih nyadi tuai ke orang Lewi ke nebah musik.
23-24 Berekiah seduai Elkanah, sama enggau Obet-edom, enggau Jehiah dipilih nyaga Peti Lampang Batu Adat. Imam Sebaniah, Josapat, Netanel, Amasai, Sekariah, Benaiah, enggau Elieser dipilih nyepu terumpit di mua Peti Lampang Batu Adat.
 
Mindahka Peti Lampang Batu Adat Ngagai Jerusalem (2 Samuel 6.12-22)
25 Nya alai Raja David, bala tuai orang Israel, enggau bala tuai soldadu, ngena pengerami ti besai, tama ngagai rumah Obet-edom lalu ngambi Peti Lampang Batu Adat.
26 Sida munuh tujuh iku sapi ti lelaki enggau tujuh iku bedus nyadika piring, kena nentuka Allah Taala deka nulung orang Lewi ke ngesan Peti Lampang Batu Adat nya.
27 David ngena baju panjai ti digaga ari linin ti pemadu alus, lalu baka nya mega bala orang ke nebah musik, Chenaniah ti nyadi tuai sida, enggau orang Lewi ke ngesan Peti Lampang Batu Adat nya. David mega ngena siti epod ti digaga ari linin.
28 Semua orang Israel nyempulang Peti Lampang Batu Adat nya ngagai Jerusalem enggau panjung, nebah terumpit, tanduk, bebendai, enggau belikan.
29 Lebuh Peti Lampang Batu Adat nya benung dibai tama ngagai nengeri nya, Mikael, anak indu Saul, nilik ari jenila, lalu tepedaka Raja David betanda sereta ngingkak gaga ati. Mikael lalu mechat iya dalam ati iya.
 
Bagi 16
1 Sida lalu mai Peti Lampang Batu Adat nya ngagai langkau kain ti udah disediaka David ke Peti nya, lalu ngengkahka Peti nya dalam langkau kain nya. Udah nya sida lalu ngenjuk piring tunu enggau piring pemaik, ngagai Allah Taala.
2 Lebuh David udah tembu ngenjuk piring, iya merekatka orang mayuh dalam nama TUHAN,
3 lalu nyadung pemakai ngagai semua sida. Iya meri ngagai siku-siku lelaki enggau indu di menua Israel setuku roti, siti lampang dagin ti udah dipanggang, enggau salai buah anggur.
4 David ngeletak sekeda orang Lewi nguluka orang nyembah TUHAN Allah Taala ke disembah orang Israel, di mua Peti Lampang Batu Adat nya, belagu sereta muji TUHAN.
5 Asap diletak nyadi tuai sida, lalu Sekariah nyadika penulung iya. Jeil, Semiramot, Jehiel, Matitiah, Eliap, Benaiah, Obet-edom, enggau Jeil nebah belikan. Asap nebah bebendai,
6 lalu imam ke dua iku, iya nya Benaiah seduai Jahasil tiap hari nyepu terumpit di mua Peti Lampang Batu Adat nya.
7 Nya meh terubah iya David meri Asap enggau orang Lewi ti bukai tanggungjawap belagu muji TUHAN.
 
Siti Lagu Puji (Masmur 105.1-15; 96.1-13; 106.1, 47-48)
8 Beri terima kasih ngagai TUHAN, padahka pemesai kuasa Iya. Tusui ngagai semua bansa utai ti udah dikereja Iya.
9 Belagu muji TUHAN. Tusui pasal pengawa ti badas ti udah dikereja Iya.
10 Gaga ati meh kita ke enggi Iya.Awakka semua orang ke nyembah Iya rami gaga magang!
11 Mansang ngagai TUHAN minta saup, lalu seruran nyembah Iya.
12-13 Kita peturun Jakop ke nembiak Allah Taala, peturun Israel, ti udah dipilih Allah Taala, kingatka kereja ajih ti udah dikereja Allah Taala enggau ukum ti udah diletak Iya.
14 TUHAN endang Allah Taala kitai. Pesan Iya endang diberi ngagai semua dunya.
15 Anang enda ingatka sempekat Allah Taala, ti udah digaga Iya meruan belama iya,
16  sempekat ti udah digaga Iya enggau Abraham, semaya ti udah digaga Iya enggau Isak.
17 TUHAN ngaga sempekat enggau Jakop, sempekat ti meruan belama iya.
18 “Aku deka meri menua Kanaan ngagai nuan,” ku Iya bejaku. “Menua nya deka nyadika pesaka nuan.”
19 Nembiak Allah Taala endang enda mayuh, nyadi orang kampar di menua Kanaan.
20 Sida segau-segau bejalai ari menua siti ngagai menua siti, ari perintah siti ngagai perintah siti.
21  Tang Allah Taala enda nejuka orang nekanka pengidup sida. Kena Iya nyaga sida, Iya meri jaku tangkan ngagai bala raja.
22 “Anang ngemediska bala nembiak ti udah dipilih Aku. Anang negu bala nabi Aku.”
23 Belagu ke TUHAN, semua dunya! Padahka tiap hari berita manah pasal Iya ti udah meri kitai pengelepas.
24 Padahka pasal mulia Iya ngagai semua menua, enggau pasal pemesai pengawa ti udah dikereja Iya, ngagai semua bansa.
25 TUHAN endang besai lalu endang patut dipuji. Iya endang patut lebih agi dikenangika ari semua petara.
26 Petara semua bansa nya semina engkeramba aja, tang TUHAN udah ngaga langit.
27 Iya endang bemulia sereta bekuasa. Kuasa enggau pengaga ngemenuhka Rumah Sembiang Iya.
28 Puji meh TUHAN, semua kita ke diau di dunya. Puji meh mulia enggau pengering Iya.
29 Puji meh nama TUHAN ti bemulia. Bai meh piring lalu datai ngagai Rumah Sembiang Iya. Meremi meh kita di mua Iya ti Kudus lebuh Iya pegari.
30 Begetar meh kita di mua Iya, semua dunya! Dunya udah diengkahka ba endur iya, lalu enda ulih dikinsitka agi.
31 Gaga ati meh kita, tanah enggau langit! Padahka ngagai semua bansa TUHAN nya Raja.
32 Begelumbang meh nuan tasik, lalu inggar meh utai ti dalam nuan. Gaga ati meh kita umai, enggau semua utai ti dalam kita!
33 Kayu ti dalam utan deka manjung gaga ati lebuh TUHAN datai lalu merintah dunya.
34 Beri terima kasih ngagai TUHAN, laban Iya endang manah. Pengerindu Iya meruan belama iya.
35 Sebut ngagai Iya, “Selamatka kami, O Allah Taala ti Juruselamat kami. Gempuruka kami. Lepaska kami ari menua bukai, ngambika kami nemu meri terima kasih lalu muji nama Nuan ti kudus.”
36 Pujika TUHAN Allah Taala ke disembah orang Israel! Puji Iya diatu enggau ke belama iya! Udah nya semua orang mayuh nyebut, “Amin,” lalu muji TUHAN.
 
Nyembah Allah Taala Di Jerusalem Enggau Di Gibeon
37 Raja David ngeletak Asap enggau orang Lewi ti bukai bekereja tetap nguluka orang besembiang ba endur alai Peti Lampang Batu Adat disimpan. Sida ngereja pengawa sida dia tiap hari.
38 Sida ditulung Obet-edom anak Jedutun enggau enam puluh lapan iku orang ari raban peturun iya empu. Hosah seduai Obet-edom nyadi tuai nyaga pintu.
39 Tang Imam Sadok enggau bala sida ke sama nyadi imam baka iya, nguluka orang nyembah TUHAN ba endur alai besembiang di Gibeon.
40 Genap pagi enggau genap lemai sida enda tau enda nunu piring segala ba alta nitihka jaku ti udah ditulis dalam Adat ti udah diberi TUHAN ngagai orang Israel.
41 Orang ke enggau sida dia nya Heman seduai Jedutun, enggau sida ti bukai ke endang udah dipilih belagu muji TUHAN ketegal pengerindu Iya ti meruan belama iya.
42 Heman seduai Jedutun mega ngemataka terumpit enggau bebendai, enggau pekekas musik ti bukai ti ditebah lebuh orang muji TUHAN. Raban raban peturun Jedutun nyadi kepala nyaga pintu.
43 Udah nya semua orang pulai magang, lalu David pulai ke rumah ngagai sida sebilik.
 
Bagi 17
Pesan Natan Ngagai David (2 Samuel 7.1-17)
1 Raja David diatu nyau diau dalam istana iya empu. Nyadi sekali iya mesanka nabi Natan, lalu bejaku enggau iya, “Aku diatu diau dalam rumah ti digaga ari kayu sidar, tang Peti Lampang Batu Adat TUHAN disimpan dalam langkau kain!”
2 Disaut Natan, “Kereja aja utai ti ku ati nuan, laban Allah Taala bisi enggau nuan.”
3 Tang malam nya Allah Taala bejaku ngagai Natan,
4 “Alai nuan madahka jaku Aku tu ngagai nembiak Aku David, ‘Nuan ukai orang ke diasuh Aku ngaga Rumah alai Aku diau.
5 Kenyau ari maya Aku ngelepaska orang Israel ari menua Ejip, nyentuk ngagai diatu, Aku nadai kala diau dalam rumah. Aku endang semampai diau dalam langkau kain, lalu mindah ari endur siti ngagai endur siti.
6 Sekumbang Aku ke bejalai enggau orang Israel, Aku nadai kala nanya ngagai bala tuai ti udah diletak Aku, kebuah alai sida enda ngaga rumah ari kayu sidar ke Aku.”
7 “Nya alai padahka ngagai nembiak Aku David, Aku TUHAN ti Pemadu Bekuasa nyebut tu ngagai iya, ‘Aku udah ngambi nuan ari pengawa nuan ke ngibun bedus, lalu ngaga nuan nyadi raja ke bala nembiak Aku Israel.
8 Aku endang seruran enggau nuan di sebarang endur nuan bejalai, lalu Aku udah ngalahka semua munsuh nuan, lebuh nuan majakka pejalai nuan. Aku deka ngaga nuan beberita baka bala tuai ti beberita di dunya tu.
9-10 Aku udah milih siti endur ke bala nembiak Aku Israel, lalu Aku udah ngasuh sida ngentapka diri dia, alai sida deka diau, lalu enda agi ditekanka orang. Kenyau ari maya sida udah tama ngagai menua tu, sida udah diserang orang ke mangah, tang utai ti baka nya nadai agi nyadi. Aku besemaya deka ngalahka semua munsuh nuan, lalu meri ngagai nuan mayuh peturun.
11 Lebuh nuan mati, lalu dikuburka begulai enggau bala aki ini nuan, Aku deka ngasuh siku ari bala anak lelaki nuan nyadi raja, lalu Aku deka ngasuh perintah iya kering.
12 Iya nya meh orang ke deka ngaga rumah Aku, lalu Aku deka nentuka perintah iya meruan belama iya.
13 Aku deka nyadi Apai iya, lalu Iya deka nyadi anak lelaki Aku. Aku enggai badu rinduka iya, enda baka Aku enggau Saul, ti udah dibuai Aku ngambika nuan ulih nyadi raja.
14 Aku deka ngasuh iya nyadi tuai ke bala nembiak Aku, enggau nyadi tuai ke perintah Aku belama iya. Perintah iya enda nemu abis.’ “
15 Natan lalu madahka ngagai David semua utai ti udah dipandangka Allah Taala ngagai iya.
 
David Meri Sampi Terima Kasih (2 Samuel 7.18-29)
16 Udah nya David lalu tama ngagai Langkau Kain TUHAN, duduk lalu besampi, “Aku tauka ruang bilik aku enda patut nerima semua utai ti udah dikereja Nuan ke aku, TUHAN Allah Taala.
17 Tang taja pia, Nuan diatu ngereja lebih agi ari nya. Nuan udah ngaga semaya pasal peturun aku jemah ila, lalu Nuan, TUHAN Allah Taala, udah ngaga aku nyadi orang ke besai.
18 Nama utai bukai ti tau disebut aku ngagai Nuan? Nuan amat nemu aku, tang taja pia, Nuan masa aku, ke nembiak Nuan.
19 Nuan ngereja nya ke aku laban nya endang peneka enggau juluk ati Nuan, kena Nuan nunjukka aku deka nyadi orang ke besai jemah ila.
20 TUHAN, nadai orang baka Nuan. Kami endang nemu, semina Nuan siku aja ti Allah Taala.
21 Nadai bansa bukai di dunya tu baka bansa orang Israel, ti udah dilepaska Nuan ari pengidup sida ke nyadi ulun, ngambika sida nyadi nembiak Nuan. Nuan udah ngereja pengawa ti besai sereta badas ke sida, lalu berita pasal Nuan ngelekai di serata dunya. Nuan udah ngelepaska bala nembiak Nuan ari menua Ejip, lalu udah muru semua bansa bukai lebuh bala nembiak Nuan nyerang.
22 Nuan udah ngaga Israel nyadi nembiak Nuan belama iya, lalu Nuan, TUHAN, nyadi Allah Taala sida.
23 “Nya alai, diatu O TUHAN, kamatka belama iya semaya ti udah digaga Nuan pasal aku enggau pasal peturun aku, lalu kereja meh utai ti ku Nuan.
24 Nama Nuan deka tebilang, lalu orang deka nyebut belama iya, ‘TUHAN ti Pemadu Bekuasa nya Allah Taala ke disembah orang Israel.’ Lalu Nuan deka ngasuh perintah aku meruan belama iya.
25 Aku berani nyebut sampi tu ngagai Nuan, Allah Taala aku, laban Nuan udah mandangka semua utai tu ngagai aku, ke nembiak Nuan, lalu udah madahka ngagai aku pasal Nuan ti deka ngasuh peturun aku nyadi raja.
26 Nuan, TUHAN, endang Allah Taala, lalu Nuan udah ngaga semaya ti manah tu ngagai aku.
27 Aku minta Nuan merekatka peturun aku, ngambika sida deka seruran gaga ati dikerinduka Nuan. Nuan, TUHAN, udah merekatka sida, lalu berekat Nuan deka meruan ba sida belama iya.”
 
Bagi 18
David Menang Beperang (2 Samuel 8.1-18)
1 Nyau kelama udah bekau nya, Raja David nyerang orang Pilistin baru, lalu ngalahka sida. Iya ngerampas nengeri Gat enggau genturung pendiau ti ngelingi nengeri nya ari jari sida.
2 Iya mega ngalahka orang Moap, ke lalu nyadi nembiak iya, sereta mayar chukai ngagai iya.
3 Udah nya, David nyerang Raja Hadadeser sitak menua Sobah di menua Siria, semak menua Hamat, laban Hadadeser udah nguji ngerampas perintah di menua ti ngimbai ulu Sungai Eupratis.
4 David lalu ngerampas seribu buah kerita perang Hadadeser, tujuh ribu iku soldadu ke nepan kuda, enggau dua puluh ribu iku soldadu ke bejalai kaki. David ninggalka kuda semina chukup dikena seratus buah kerita perang, tang mutuska rakat semua kuda ti bukai.
5 Lebuh orang Siria ari Damaskus ngasuh bala soldadu datai nulung Raja Hadadeser, David nyerang sida lalu munuh dua puluh dua ribu iku ari bala sida.
6 Udah nya iya lalu nirika kem soldadu di menua sida, lalu orang Siria nyadi nembiak iya, lalu mayar chukai ngagai iya. TUHAN ngasuh David menang di semua endur.
7 David ngerampas terabai emas ti dibai bala pemesai Hadadeser, lalu mai terabai nya ngagai Jerusalem.
8 Iya mega ngambi mayuh amat perengka temaga ari Tibhat enggau ari Kun, iya nya dua buah nengeri ti dipegai Hadadeser. (Udah bekau nya, Solomon ngena temaga nya begagaka tangki, berapa iti batang tiang ti besai, enggau perengka temaga ti bukai ke Rumah Sembiang.)
9 Lebuh Raja Tou di Hamat ninga David udah ngalahka semua bala soldadu Hadadeser,
10 iya lalu ngasuh anak iya Joram meri tabi basa enggau jaku puji ngagai David ketegal iya udah ngalahka Hadadeser, ke suah udah dilaban Tou. Joram mai ngagai David pemeri ti digaga ari emas, pirak enggau temaga.
11 Raja David lalu nyerahka semua utai nya ngagai TUHAN, sama enggau pirak enggau emas ti udah diambi iya ari semua bansa ti udah dialahka iya, iya nya bansa Edom, Moap, Amon, Pilistin, enggau bansa Amalek.
12 Abisai - indai iya Seruiah - udah ngalahka orang Edom ba Lebak Garam, lalu munuh lapan belas ribu iku bala munsuh.
13 Iya lalu nirika kem soldadu di serata menua Edom, lalu orang Edom nyadi nembiak Raja David magang. TUHAN ngasuh David menang di semua endur.
14 David merintah semua menua Israel, lalu iya bejalaika atur ti lurus sereta betul ngagai semua nembiak iya.
15 Menyadi Abisai ke benama Joap nya tuai soldadu. Jehosapat anak Ahilut nyadi tukang tulis ke semua utai ti nyadi.
16 Sadok anak Ahitup enggau Ahimelek anak Abiatar nyadi imam. Seraiah nyadi kerani kot.
17 Benaiah anak Jehoiada nyadi tuai orang ke nyaga David, lalu bala anak Raja David megai pangkat ti tinggi dalam perintah iya.
 
Bagi 19
David Ngalahka Orang Amon Enggau Orang Siria (2 Samuel 10.1-19)
1 Nyau kelama udah bekau nya, Nahas ti nyadi raja di Amon mati, lalu anak iya Hanun nganti iya nyadi raja.
2 Ku Raja David bejaku, “Aku enda tau enda taluk ngagai Hanun, baka ke udah dikereja apai iya Nahas ngagai aku.” Nya alai David ngasuh bala seruan iya mansang mai pesan penyinu ati ngagai Hanun.
Lebuh bala sida datai di Amon, lalu meri pesan penyinu ati ngagai Raja Hanun,
3 bala tuai orang Amon lalu bejaku enggau raja, “Kati nuan ngumbai David ngasuh bala orang tu datai ditu mai pesan penyinu ati ngagai nuan, ketegal iya bebasaka apai nuan? Ukai! Iya ngasuh sida datai ditu ngambika sida matau lalu meresa lalu ngalahka menua tu!”
4 Hanun lalu nangkap bala seruan David, ngukur ragum sida, netak gari sida naka punggung, lalu ngasuh sida pulai.
5 Nyadi sida nya kelalu malu pulai. Lebuh David ninga berita pasal utai ti udah nyadi, iya lalu ngirumka pesan, ngasuh sida diau di Jeriko, lalu enda tau pulai sebedau ragum sida tumbuh baru.
6 Nya baru Raja Hanun enggau orang Amon nemu diri udah ngaga David nyadi munsuh sida. Nya alai sida lalu ngirumka nyau deka bulih 40,000 kilogram pirak ngagai menua Mesopotamia enggau ngagai menua Maakah enggau menua Sobah di menua Siria, kena sida ngaji orang ke nepan kerita perang enggau nyua kerita perang sida.
7 Tiga puluh dua ribu buah kerita perang ti disua sida, enggau bala soldadu raja Maakah datai lalu nirika kem semak Medeba. Orang Amon mega datai ari semua nengeri sida, lalu nyendiaka diri beperang.
8 Lebuh David ninga nya, iya lalu mesanka Joap enggau semua bala soldadu.
9 Orang Amon angkat, lalu belatur ba penama ngagai Rabah, iya nya indu nengeri sida, lalu bala raja ti udah datai deka nulung, belatur ba luar nengeri.
10 Joap nemu bala munsuh deka nyerang iya ari mua enggau ari belakang. Nya alai iya lalu milih bala soldadu orang Israel ke pemadu kering, lalu ngasuh sida belatur nyatup orang Siria.
11 Iya ngasuh menyadi iya Abisai nguluka bala soldadu ti bukai. Abisai lalu ngatur sida nyatup orang Amon.
12 Ku Joap bejaku enggau Abisai, “Enti nuan meda orang Siria nyau deka ulih ngalahka aku, tulung aku, lalu enti aku meda orang Amon nyau deka ulih ngalahka nuan, aku deka nulung nuan.
13 Kering sereta berani! Awakka kitai bebendar belaban ngarika bansa kitai, enggau ke nengeri Allah Taala. Awakka peneka TUHAN nyadi.”
14 Joap enggau bala iya lalu mansang nyerang. Orang Siria lalu rari.
15 Lebuh orang Amon meda orang Siria rari, sida lalu rari ari Abisai, lalu nyurutka diri ngagai nengeri. Udah nya Joap pulai ngagai Jerusalem.
16 Lebuh orang Siria nemu diri udah alah laban orang Israel, sida lalu mai bala soldadu ari menua Siria ti tunga ke timur Sungai Eupratis, lalu ngasuh sida diuluka Sobak, ti nyadi tuai soldadu Raja Hadadeser di Sobah.
17 Lebuh David ninga nya, iya lalu ngempuruka bala soldadu orang Israel, lalu ngasuh sida belatur nyatup orang Siria. Sida lalu bamuk.
18 Orang Siria lalu rari. David enggau bala iya munuh tujuh ribu iku orang ke nepan kerita perang enggau empat puluh ribu iku soldadu ke bejalai kaki. Sida mega munuh Sobak ti nyadi tuai soldadu orang Siria.
19 Lebuh bala raja ke nitihka Hadadeser nemu diri udah alah laban orang Israel, sida lalu bebaik enggau David, lalu nyadi nembiak iya. Kenyau ari nya, orang
Siria enggai agi nulung orang Amon.
 
Bagi 20
David Ngalahka Rabah (2 Samuel 12.26-31)
1 Dalam musin bungai, iya nya maya bala raja selalu mansang ngayau, Joap nguluka bala soldadu nyerang menua Amon. Tang Raja David tinggal di Jerusalem. Sida ngelulung nengeri Rabah, nyerang, lalu ngerusak nengeri nya.
2 Engkeramba Molek orang Amon  bisi siti makota emas ti berat kira tiga puluh empat kilogram. Dalam makota nya bisi sigi batu ti berega. Batu berega nya diambi David, lalu diengkahka iya ba makota iya empu. Iya mega ngambi mayuh amat perapasan ari nengeri nya.
3 Iya nabanka orang ari nengeri nya lalu mejalka sida bekereja ngena penyayat, changkul besi, enggau kapak. Iya mega ngereja baka nya ngagai orang di semua nengeri bukai di Amon. Udah nya, iya enggau bala iya lalu pulai ngagai Jerusalem.
 
Perang Ngelaban Orang Pilistin Ke Besai Gamal (2 Samuel 21.15-22)
4 Udah bekau nya, perang lalu nyadi baru enggau orang Pilistin di Geser. Tu meh maya Sibichai ari Husah munuh siku orang ke besai gamal ke benama Sipai, lalu orang Pilistin alah.
5  Siti agi perang nyadi enggau orang Pilistin. Nya meh maya Elhanan anak Jair munuh Lahmi, menyadi Goliat ke datai ari Gat, ke bempu sangkuh ti ngemesai tendai ti dikena orang betenun.
6 Siti agi perang nyadi di Gat, alai siku orang ke besai gamal ke bisi enam iti tunjuk ba siti-siti jari, enggau kaki. Iya tu peturun bala orang besai gamal ke dulu kelia.
7 Iya nyakap orang Israel, lalu Jonatan, anak lelaki menyadi David ke benama Samah, munuh iya.
8 Sida tiga iku tu, ke dibunuh David enggau bala iya, endang peturun orang ke besai gamal di Gat.
 
Bagi 21
David Ngitung Tubuh (2 Samuel 24.1-25)
1 Nyadi Sitan deka ngasuh penusah ninggang orang Israel. Nya alai iya nyungkak David ngitung tubuh.
2 David lalu bejaku enggau Joap enggau bala pemesai ti bukai, ku iya, “Bejalai kita ngagai semua menua Israel, berengkah ari ujung siti ngagai ujung siti menua tu, lalu itung semua orang. Aku keran deka nemu pemayuh sida.”
3 Ku Joap nyaut, “Awakka TUHAN ngasuh orang Israel seratus kali mayuh agi ari sida ke diatu! Tuan Raja, semua sida tu nembiak nuan magang. Nama kebuah nuan deka ngereja nya, lalu ngasuh semua orang Israel salah magang?”
4 Tang Raja mejalka Joap ngasika atur nya. Joap lalu mupuk, bejalai nengah serata menua Israel, lalu udah nya pulai baru ngagai Jerusalem.
5 Iya lalu madahka ngagai  Raja David pemayuh lelaki ti tau enggau beperang: 1,100,000 iku di menua Israel, enggau 470,000 di menua Judah.
6 Tang laban Joap enda besetuju enggau atur raja, iya enda ngitung tubuh orang Lewi enggau orang ari raban bansa Benjamin.
7 Allah Taala enda lantang ati ngagai pengawa nya, nya alai Iya ngukum orang Israel.
8 Ku David bejaku enggau Allah Taala, “Aku udah bedosa besai, laban aku udah ngereja utai tu! Aku minta nuan ngampun aku. Aku udah beli ngereja utai tu.”
9 Udah nya TUHAN lalu bejaku ngagai Gat, nabi ke bekereja ke David,
10 “Padahka ngagai David, Aku deka ngasuh iya milih siti ari tiga iti utai. Aku deka ngereja sebarang utai ti dipilih iya.”
11 Gat lalu mansang ngagai David, madahka utai ti udah disebut TUHAN, lalu nanya, “Ni pilih nuan?
12 Sekalika nuan milih tiga taun lapar pungkang? tauka tiga bulan ngerarika diri ari bala munsuh? tauka tiga hari alai TUHAN nyerang nuan ngena pedang Iya, lalu ngasuh penyakit berampit dalam menua nuan, lalu ngena melikat iya munuh orang di serata menua Israel? Nama saut ti patut diberi aku ngagai TUHAN?”
13 Ku David nyaut Gat, “Tusah amat aku laban tu! Tang aku enggai diukum mensia. Awakka TUHAN Empu ngukum aku, laban Iya endang ngembuan pengasih.”
14 Nya alai TUHAN ngasuh penyakit balat berampit ba bala orang Israel, lalu tujuh puluh ribu iku sida mati.
15 Udah nya Iya ngasuh siku melikat ngerusak Jerusalem, tang TUHAN ngubah runding Diri, lalu bejaku ngagai melikat nya, “Badu agi! Umbas meh nya!” Nyadi melikat nya benung bediri ngimbai endur alai orang ngindik gandum ti diempu Araunah, orang Jebus.
16 David bisi meda melikat nya bediri entara dunya enggau langit, megai pedang, sedia deka ngerusak Jerusalem. Udah nya David enggau bala tuai orang mayuh ke sama ngena kain guni, lalu nyungkurka diri ke tanah.
17 David lalu besampi, “O Allah Taala, aku empu ti udah ngereja penyalah tu. Aku tu ti udah bedosa lalu ngasuh orang ngitung tubuh. Tang nama utai ti udah dikereja sida tu? O TUHAN Allah Taala aku, ukum meh aku enggau kami sebilik, tang anang ngukum orang mayuh tu.”
18 Melikat TUHAN lalu ngasuh Gat bejaku enggau David ngasuh iya mupuk lalu ngaga siti alta ke TUHAN ba endur alai ngindik gandum ti diempu Araunah.
19 David ngasika pesan TUHAN lalu mupuk, munyi ti dipadahka Gat ngagai iya.
20 Nyadi Araunah enggau empat iku anak lelaki iya benung ngindik gandum ba endur nya, lalu lebuh sida meda melikat nya, bala anak iya rari lalu belalai.
21 Lebuh Araunah meda Raja David datai, iya ngambat raja, lalu nyungkurka diri ke tanah.
22 Ku David bejaku enggau iya, “Jual ngagai aku endur alai ngindik tu, ngambika aku ulih ngaga siti alta ke TUHAN, kena nagang penyakit tu berampit. Aku
deka mayar semua rega utai nya.”
23 “Ambi aja, Tuan Raja,” ku Araunah bejaku, “lalu kereja aja utai ti deka dikereja nuan. Tu jelu sapi ti tau ditunu nyadika piring ba alta, lalu tu papan pelangka kena menyadika api, enggau gandum nyadika piring. Aku meri semua utai tu ngagai nuan.”
24 Tang ku raja nyaut, “Enda tau baka nya. Aku enda tau enda mayar semua rega utai nya ngagai nuan. Aku enggai meri utai nuan nyadika piring ngagai TUHAN, enti utai nya ukai utai ti dibeli aku empu.”
25 Iya lalu mayar Araunah enam ratus singkap duit emas kena meli endur ti alai ngindik gandum nya.
26 Iya lalu ngaga siti alta dia ke TUHAN, lalu ngenjuk piring tunu enggau piring pemaik. Iya besampi, lalu TUHAN nyaut iya, ngena api ti datai ari serega, ti nganguska piring ti ba alta nya.
27 TUHAN lalu ngasuh melikat nya nyelitka pedang iya.
28 Lebuh David meda TUHAN udah nyaut sampi iya, iya lalu ngenjuk piring ba alta ba endur ti ngindik gandum nya.
29 Langkau Kain TUHAN ti udah digaga Moses di menua puang, enggau alta ti alai nunu piring, agi bisi ba endur alai besembiang di Gibeon lebuh maya nya menya.
30 Tang David enda ulih bejalai kia nyembah Allah Taala, laban iya takutka pedang melikat TUHAN.
 
Bagi 22
1 Nya alai ku David bejaku, “Tu meh endur alai Rumah Sembiang deka didirika. Tu alta alai orang Israel deka ngenjuk piring tunu.”
 
Besedia Deka Nirika Rumah Sembiang
2 Raja David lalu ngasuh semua orang kampar ti diau di menua Israel begempuru, lalu ngasuh sida gawa. Sekeda sida nyendiaka lampang batu kena ngaga Rumah Sembiang.
3 Iya meri mayuh amat besi kena ngaga paku lawang, enggau pengepit ke pintu kuta ti digaga ari kayu, enggau mayuh amat temaga, datai ke orang nyau enda ulih nimbang utai nya agi.
4 Iya ngasuh orang Tire enggau orang Sidon mai ngagai iya mayuh amat batang kayu sidar.
5 Ku pikir David, “Rumah Sembiang ti deka digaga anak aku Solomon enda tau enda chukup manah sereta beberita dalam dunya. Tang iya agi biak, lalu nadai peneleba. Nya alai aku enda tau enda dulu nyendiaka utai nya.” Nya alai David nyendiaka mayuh amat ramu sebedau iya mati.
6 Iya lalu mesanka anak iya Solomon, lalu ngasuh iya ngaga sebuah rumah ke TUHAN Allah Taala ke disembah orang Israel.
7  Ku David bejaku enggau iya, “Anak, aku amat bisi amat ati deka ngaga Rumah Sembiang kena ngemesaika TUHAN Allah Taala aku.
8 Tang TUHAN udah madahka ngagai aku, aku udah munuh kelalu mayuh orang, lalu kelalu suah udah beperang. Nya alai ketegal nya, Iya enda nyagi aku ngaga Rumah Sembiang nya ke Iya.
9 Tang Iya udah ngaga siti semaya enggau aku. Ku Iya, ‘Nuan deka bisi siku anak lelaki, ti deka merintah dalam pemaik, laban Aku deka meri iya pemaik, ngambika iya enda diserang munsuh. Nama anak nuan nya Solomon, laban lebuh iya merintah ila, Aku deka meri pemaik enggau pengelikun ngagai menua Israel.
10 Iya deka ngaga Rumah Sembiang nya ke Aku. Iya deka nyadi anak Aku, lalu Aku deka nyadi Apai iya. Peturun iya deka megai perintah di menua Israel belama iya.’ “
11 Ku David nampung jaku iya, “Nya alai, anak, awakka TUHAN Allah Taala nuan meruan enggau nuan, lalu awakka Iya ngamatka semaya Iya ti deka ngasuh nuan mujur ngaga sebuah Rumah Sembiang nya ke Iya.
12 Lalu awakka TUHAN Allah Taala nuan meri nuan runding ti dalam, enggau penemu-dalam, ngambika nuan ulih megai perintah di menua Israel nitihka Adat Iya.
13 Enti nuan ngasika semua adat ti udah diberi TUHAN ngagai Moses ke orang Israel, nuan deka mujur. Nuan enda tau enda kering sereta berani. Anang takut tauka irau ati.
14 Nyadi pasal Rumah Sembiang nya, aku udah, enggau naka ulih, ngempuruka nyau deka bulih 4,000 tan emas, enggau nyau deka bulih 40,000 tan pirak kena ngaga Rumah Sembiang nya. Nambahka nya, temaga enggau besi endang enda diletak pemayuh. Aku mega udah ngasuh orang nyendiaka ramu enggau batu, tang nuan enda tau enda nambahka nya.
15 Nuan mayuh orang gawa: orang ke betingkuhka batu, tukang batu, tukang kayu, enggau mayuh orang ke landik begagaka semua macham utai
16 ngena emas, pirak, temaga, enggau besi. Nya alai, awakka nuan berengkah ngereja pengawa nya, lalu awakka TUHAN meruan enggau nuan.”
17 David mega ngasuh semua bala tuai orang Israel nulung Solomon.
18 Ku iya bejaku, “TUHAN Allah Taala kita, udah seruran enggau kita, lalu udah meri kita pemaik. Iya udah ngasuh aku ngalahka semua orang ke nguan menua tu, lalu sida nya diatu udah nyadi ulun kita, enggau nyadi nembiak TUHAN.
19 Nya alai, awakka kita betuaika TUHAN Allah Taala kita enggau pengabis ati enggau pengabis semengat kita. Awakka kita berengkah ngaga Rumah Sembiang, ngambika kita ulih nyimpan dalam Rumah nya Peti Lampang Batu Adat TUHAN, enggau semua utai ti kudus ti dikena nyembah Iya.”
 
Bagi 23
1 Lebuh David nyau tuai amat umur, iya lalu nyiri anak iya Solomon nyadi raja menua Israel.
 
Pengawa Ti Dikereja Orang Lewi
2 Raja David ngempuruka semua bala tuai orang Israel, enggau semua bala imam, enggau orang Lewi.
3 Iya ngitung tubuh semua orang Lewi ti lelaki, ari umur tiga puluh taun ke atas. Pemayuh sida nya 38,000 iku.
4 Raja lalu ngeletak 24,000 iku ari bala sida nya bekereja dalam Rumah Sembiang, 6,000 iku nyadi kerani, enggau nyadi hakim, 5 4,000 iku bekereja nyadi jejaga, lalu 4,000 iku muji TUHAN ngena pekekas musik ti diberi raja kena sida ngereja pengawa nya.
6 David magi orang Lewi ngagai tiga bengkah raban, nitihka raban peturun sida, iya nya raban peturun Gerson, Kohat, enggau Merari.
7 Gerson bisi dua iku anak lelaki: Ladan seduai Simei.
8 Ladan bisi tiga iku anak lelaki: Jehiel, Setam, enggau Joel,
9 ti nyadi tuai ke raban peturun ti diturunka Ladan. (Simei bisi tiga iku anak lelaki: Selomot, Hasiel, enggau Haran.)
10-11 Simei bisi empat iku anak lelaki: Jahat, Sina, Jeus, enggau Beriah, nitihka ripih penuai umur sida. Jeus seduai Beriah nadai mayuh peturun. Nya alai seduai iya diitung nyadi siti aja raban peturun.
12 Kohat bisi empat iku anak lelaki: Amram, Isar, Hebron, enggau Usil.
13 Anak lelaki iya ke tuai nya Amran. Amran nya apai Aron seduai Moses. (Aron enggau peturun iya udah diseraraka ngambika sida ngibun utai ti kudus belama iya, nunu menyan lebuh nyembah TUHAN, bekereja ke TUHAN, lalu merekatka orang mayuh dalam nama Iya.
14 Tang anak lelaki nabi Moses disengkaumka dalam raban orang Lewi.)
15 Moses bisi dua iku anak lelaki, Gersom seduai Elieser.
16 Orang ke nyadi tuai ke bala anak Gersom nya Sebuel.
17 Elieser semina bisi siku aja anak lelaki, Rehabiah, tang Rehabiah mayuh peturun.
18 Anak lelaki Kohat ke lumur dua, Isar, bisi siku anak lelaki, benama Selomit, ti nyadi tuai ke raban peturun nya.
19 Anak lelaki Kohat ke lumur tiga, Hebron, bisi empat iku anak lelaki: Jeriah, Amariah, Jahasiel, enggau Jekamim.
20 Anak lelaki Kohat ke lumur empat, Usil, bisi dua iku anak lelaki: Mikah seduai Isiah.
21 Merari bisi dua iku anak lelaki: Mahli seduai Musi. Mahli mega bisi dua iku anak lelaki, Eleasar seduai Kis,
22 tang Eleasar mati nadai anak lelaki, semina anak indu aja. Bala anak indu iya jadi enggau bala petunggal sida empu, iya nya bala anak lelaki Kis.
23 Musi anak lelaki Merari ke lumur dua, bisi tiga iku anak lelaki: Mahli, Eder, enggau Jerimot.
24 Tu meh bala peturun Lewi, nitihka raban peturun enggau ruang bilik sida. Semua nama sida dituliska magang. Genap iku peturun iya ke umur dua puluh taun ke atas, bisi pengawa magang dalam Rumah Sembiang.
25 Ku David, “TUHAN Allah Taala ke disembah orang Israel udah meri pemaik ngagai bala nembiak Iya, lalu Iya Empu deka diau di Jerusalem belama iya.
26 Nya alai bala orang Lewi enda ibuh agi ngesan langkau sembiang nya, enggau semua pekekas ti dikena nyembah Allah Taala.”
27 Nitihka atur ti penudi diberi David, semua orang Lewi dituliska nama magang ngambika sida diberi pengawa lebuh umur sida manggai dua puluh taun.
28  Tu macham pengawa ti diberi ngagai sida: nulung bala imam ke ari peturun Aron ngereja pengawa nyembah Allah Taala dalam Rumah Sembiang, ngintu tengah laman enggau bilik dalam Rumah Sembiang, lalu nyaga utai ti kudus ngambika enda kamah,
29 betanggungjawapka roti ti diberi ngagai Allah Taala, tepung ti dikena ngaga piring, singkap roti ti enda beragi, piring ti dipanggang, enggau tepung ti dichampur enggau minyak kana, nimbang enggau nakar piring ti diberi ngagai Rumah Sembiang,
30 enggau muji sereta ngemuliaka TUHAN pagi lemai
31 enggau genap kali piring ditunu ke TUHAN lebuh Hari Sabat, lebuh Gawai Anak Bulan, enggau lebuh gawai bukai. Atur mega digaga kena ngeletak pemayuh tubuh orang Lewi bekereja sekali-sekali. Orang Lewi nadai diberi pengawa bukai tang semina nyembah TUHAN siku aja.
32 Sida diberi tanggungjawap ngintu Langkau Kain TUHAN enggau Rumah Sembiang, enggau pengawa nulung kaban belayan sida, iya nya bala imam ke ari peturun Aron, nyembah Allah Taala dalam Rumah Sembiang.
 
Bagi 24
Pengawa Ti Diberi Ngagai Bala Imam
1 Tu raban bala peturun Aron. Aron bisi empat iku anak lelaki: Nadap, Abihu, Eleasar, enggau Itamar.
2 Nadap seduai Abihu mati dulu ari apai sida, lalu nadai ninggalka purih, nya alai menyadi seduai iya Eleasar enggau Itamar nyadi imam.
3 Raja David ngatur bala peturun Aron ngagai mayuh bengkah raban nitihka pengawa ti dikereja sida. Iya ngereja nya ditulung Sadok, siku peturun Eleasar, sereta ditulung Ahimelek, siku peturun Itamar.
4 Bala peturun Eleasar dibagi ngagai enam belas bengkah raban, lalu bala peturun Itamar dibagi ngagai lapan bengkah raban. Utai nya digaga baka nya laban lelaki ti nyadi tuai bilik mayuh agi datai ari peturun Eleasar.
5 Nyadi laban orang ari peturun Eleasar enggau Itamar nyadi pemesai dalam Rumah Sembiang, enggau nyadi tuai pengarap, nya alai sida iya diberi pengawa ngena chara bechabut undi.
6 Bala peturun Eleasar enggau bala peturun Itamar begintir-gintir enchabut undi. Udah nya nama sida lalu dituliska Semaiah anak Netanel, siku orang Lewi ti nyadi kerani. Raja, bala pemesai iya, Imam Sadok, Ahimelek anak Abiatar, enggau bala tuai bilik, nyadika saksi magang.
7-18 Tu ripih dua puluh empat iti ruang bilik nya ti diberi pengawa: (1) Jehoiarip; (2) Jedaiah; (3) Harim; (4) Seorim; (5) Malkijah; (6) Mijamin; (7) Hakos; (8) Abijah; (9) Jesua; (10) Sekaniah; (11) Eliasip; (12) Jakim; (13) Hupah; (14) Jesebip; (15) Bilgah; (16) Imer; (17) Hesir; (18) Hapises; (19) Petahiah; (20) Jeheskil; (21) Jachin; (22) Gamul; (23) Delaiah; (24) Masiah.
19 Nama orang tu ditulis nitihka pengawa ti dikereja sida ke datai ngagai Rumah Sembiang lalu ngereja pengawa ti udah diletak aki sida Aron, nitihka pesan TUHAN Allah Taala ke disembah orang Israel.
 
Ripih Nama Orang Lewi
20 Tu nama tuai bilik ti bukai ke datai ari peturun Lewi: Jehdeiah, peturun Amran nengah Sebuel;
21 Isiah, peturun Rehabiah;
22 Jahat, peturun Isar nengah Selomit;
23 Jeriah, Amariah, Jehazil, enggau Jekamim, anak Hebron, nitihka umur sida;
24 Samir, peturun Usil nengah Mikah;
25 Sekariah, peturun Usil nengah Isiah, menyadi Mikah;
26 Mahli, Musi, enggau Jasiah, peturun Merari.
27 Jasiah bisi tiga iku anak lelaki: Soham, Sakur, enggau Ibri.
28-29 Mahli bisi dua iku anak lelaki: Eleasar seduai Kis. Eleasar nadai anak lelaki, tang Kis bisi siku anak lelaki, Jerahmil.
30 Musi bisi tiga iku anak lelaki: Mahli, Eder, enggau Jerimot.
Nya meh ruang bilik orang Lewi.
31 Tuai ke siti-siti ruang bilik enggau siku menyadi iya ke biak agi enchabut undi ke pengawa sida, baka ke udah dikereja kaban belayan sida ti bukai, iya nya bala imam ke diturunka Aron. Raja David, Sadok, Ahimelek, enggau bala tuai bilik orang imam, enggau tuai bilik orang Lewi nyadika saksi magang.
 
Bagi 25
Orang Ke Nebah Musik Dalam Rumah Sembiang
1 Raja David enggau bala tuai orang Lewi lalu milih raban peturun orang Lewi nguluka pengawa besembiang: Asap, Heman, enggau Jedutun. Pengawa sida nya madahka pesan Allah Taala, diumba enggau musik ari belikan enggau bebendai. Tu ripih nama orang ke udah dipilih nguluka pengawa besembiang, enggau bagi pengawa ti dikereja siti-siti raban:
2 Empat iku anak lelaki Asap: Sakur, Josep, Netaniah, enggau Asarelah. Sida tu diuluka Asap, ke madahka pesan Allah Taala, genap kali raja ngasuh iya.
3 Enam iku anak lelaki Jedutun: Gedaliah, Seri, Jesaiah, Simei, Hasabiah, enggau Matitiah. Sida tu diuluka apai sida, madahka pesan Allah Taala, diumba enggau musik ari belikan, enggau lagu puji, enggau lagu terima kasih ngagai TUHAN.
4 Empat belas iku anak lelaki Heman: Bukiah, Mataniah, Usil, Sebuel, Jerimot, Hananiah, Hanani, Eliatah, Gidalti, Romanti-eser, Josbekasah, Maloti, Hotir, enggau Mahasiot.
5 Allah Taala udah meri ngagai Heman, ti nyadi nabi ke raja, empat belas iku anak lelaki tu, enggau tiga iku anak indu, munyi ti udah disemaya Iya, ngambika meri kuasa ngagai Heman.
6 Semua anak lelaki iya tu nebah bebendai enggau belikan, diuluka apai sida, kena ngumba pengawa nyembah Allah Taala dalam Rumah Sembiang.
7 Semua dua puluh empat iku lelaki tu orang ke landik magang. Orang Lewi ti bukai endang orang ke udah dilatih nebah musik. Pemayuh sida 288 iku.
8 Kena nentuka bagi pengawa sida, sida bechabut undi, nemuka sida nya agi biak tauka udah tuai, endang udah bisi pengelandik tauka semina baru deka ngujika diri.
9-31 Orang ke 288 iku nya dibagi, nitihka ruang bilik sida, ngagai dua puluh empat iti raban, dua belas iku dalam siti-siti raban, lalu siti-siti raban diuluka siku tuai. Tu ripih sida ke bekereja: (1) Josep ari ruang bilik Asap; (2) Gedaliah; (3) Sakur; (4) Seri; (5) Netaniah; (6) Bukiah; (7) Asarelah; (8) Jesaiah; (9) Mataniah; (10) Simei; (11) Usil; (12) Hasabiah; (13) Sebuel; (14) Matitiah; (15) Jerimot; (16) Hananiah; (17) Josbekasah; (18) Hanani; (19) Maloti; (20) Eliatah; (21) Hotir; (22) Gidalti; 923) Mahasiot; (24) Romanti-eser.
 
Bagi 26
Bala Orang Ke Nyaga Rumah Sembiang
1 Tu bagi pengawa ke orang Lewi ke bekereja nyadi jejaga ba Rumah Sembiang. Ari raban peturun Korah nya Meselemiah anak Kore, ari ruang bilik Asap.
2 Iya bisi tujuh iku anak lelaki, diripih nitihka penuai sida: Sekariah, Jediael, Sebadiah, Jatnil,
3 Elam, Jehohanan, enggau Eliehoenai.
4 Obet-edom udah diberekatka Allah Taala enggau lapan iku anak lelaki, diripih nitihka penuai sida: Semaiah, Jehosabat, Joah, Sakar, Netanel,
5 Amil, Isakar, enggau Peuletai.
6-7 Anak lelaki Obet-edom ke tuai, Semaiah, bisi enam iku anak lelaki: Othni, Repael, Obet, Elsabat, Elihu, enggau Semakiah. Sida tu orang ke bepangkat dalam raban peturun sida empu, laban sida tu landik. Dua iku ke dudi nya balat amat landik.
8 Ruang bilik Obet-edom mansutka enam puluh dua iku orang ke landik ngereja pengawa tu.
9 Ruang bilik Meselemiah mansutka lapan belas iku orang ke landik.
10 Hosah, ari raban peturun Merari, bisi empat iku anak lelaki: Simri (apai iya ngasuh iya nyadi tuai, taja pen iya ukai anak tuai),
11 Hilkiah, Tebaliah, enggau Sekariah. Semua orang ari ruang bilik Hosah ti nyadi jejaga dalam Rumah Sembiang nya tiga belas iku.
12 Bala orang ke nyaga Rumah Sembiang nya dibagi ngagai raban nitihka ruang bilik, lalu sida iya diberi pengawa dalam Rumah Sembiang, baka orang Lewi ti bukai.
13 Genap ruang bilik, enda milih pemayuh orang dalam ruang bilik nya, bechabut undi kena nentuka pintu ti dijaga sida.
14 Selemiah enchabut undi ke pintu ti muak ke timur, lalu anak iya Sekariah, orang ke selalu meri jaku lalau ti manah, enchabut undi ke pintu ti muak ke utara.
15 Obet-edom udah diberi pintu ti muak ke selatan, lalu bala anak lelaki iya diletak nyaga bilik setor.
16 Supim seduai Hosah diasuh nyaga pintu ti muak ke barat, enggau pintu Saleket ba jalai ti muak ke atas. Orang ke jaga endang meruan diberi jam maya sida jaga, begintir-gintir.
17 Muak ke timur, enam iku jejaga bekereja sehari; muak ke utara, empat; enggau muak ke selatan, empat. Empat iku jejaga nyaga bilik setor tiap hari, dua iku ba siti-siti bilik setor.
18 Semak balai ti besai ti muak ke barat, empat iku orang jaga ngimbai jalai raya, enggau dua iku ba balai nya empu.
19 Nya meh bagi pengawa jejaga ti diberi ngagai raban peturun Korah enggau ngagai raban peturun Merari.
 
Pengawa Bukai Dalam Rumah Sembiang
20 Orang Lewi ti bukai diasuh ngemataka sarang reta Rumah Sembiang, enggau nyaga bilik setor alai nyimpan pemeri ti diserahka ngagai Allah Taala.
21 Ladan, siku ari bala anak lelaki Gerson, nya nurunka dua tiga ruang bilik, nyengkaum ruang bilik anak iya Jehiel.
22 Anak Ladan ti lelaki dua iku, Setam seduai Joel, nyadi tuai ngemataka sarang reta Rumah Sembiang enggau bilik setor.
23 Pengawa mega diletak ngagai peturun Amram, Isar, Hebron enggau Usil.
24 Sebuel, siti raban bansa ari anak Moses ke benama Gersom, nyadi tuai pemesai ke betanggungjawapka sarang reta Rumah Sembiang.
25 Iya bekaban enggau Selomit ari menyadi Gersom ke benama Elieser. Elieser nya apai Rehabiah, ti nyadi apai Jesaiah, apai Joram, apai Sikri, apai Selomit.
26 Selomit enggau sida sebilik ngemataka semua pemeri ti diserahka Raja David, bala tuai bilik, bala tuai peturun, enggau bala pemesai soldadu, ngagai Allah Taala.
27 Sida ngambi sekeda perapasan ti udah ulih sida lebuh sida beperang, lalu nyerahka utai nya ngambika bisi dikena dalam Rumah Sembiang.
28 Selomit enggau sida sebilik nyadi tuai ngemataka semua utai ti udah diserahka ngagai Allah Taala ngambika bisi dikena dalam Rumah Sembiang, nyengkaum pemeri ti dibai nabi Samuel, dibai Raja Saul, dibai Abner anak Ner, enggau dibai Joap anak Seruiah.
 
Pengawa Ke Orang Lewi Ti Bukai
29 Chenaniah enggau bala anak lelaki iya, ari peturun Isar, diasuh ngereja pengawa opis: nyadi pemesai dalam opis, enggau nyadi hakim.
30 Hasabiah enggau 1,700 iku bala kaban belayan iya ti tebilang magang, ke datai ari peturun Hebron, diasuh ngatur semua pekara pengarap enggau semua pekara bukai di menua Israel di barat Sungai Jordan.
31 Jeriah nya orang ke nyadi tuai ke bala peturun Hebron. Dalam taun ti keempat puluh David nyadi raja, purih ari peturun Hebron bisi kena pansik, lalu bala soldadu ti tebilang nama ari ruang bilik nya bisi ditemu diau di Jaser, di menua Giliat.
32 Raja David milih 2,700 iku tuai bilik ti tebilang ari kaban belayan Jeriah, lalu ngasuh sida ngemataka semua pekara pengarap enggau pekara bukai di menua Israel ti di timur Sungai Jordan, iya nya di menua Reuben, Gat, enggau Manasi Timur.
 
Bagi 27
Atur Pengawa Soldadu Enggau Pengawa Perintah
1 Tu list nama tuai bilik orang Israel, enggau tuai peturun, enggau bala pemesai ke bejalaika pengawa perintah. Genap bulan dalam taun siti-siti, 24,000 iku orang bekereja ari baruh tuai ke bulan nya.
2-15 Tu nama orang ke nyadi tuai dalam bulan siti-siti:
Bulan Satu: Jasobim anak Sabdil (iya tu datai ari raban peturun Peres, ari raban bansa Judah)
Bulan Dua: Dodai, ari peturun Ahohi (Orang ke lumur dua iya nya Miklot)
Bulan Tiga: Benaiah anak Imam Jehoiada. Iya tu nyadi tuai ke “Sida Ti Tiga Puluh Iku” (iya diganti anak iya Amisabat nyadi tuai ke raban nya)
Bulan Empat: Asahel, menyadi Joap (iya diganti anak iya Sebadiah)
Bulan Lima: Samhut, ari peturun Isar
Bulan Enam: Ira anak Ikes ari Tekoa
Bulan Tujuh: Heles, ari peturun Epraim, ari Pelon
Bulan Lapan: Sibichai ari Husah (iya tu datai ari raban peturun Serah, ari raban bansa Judah)
Bulan Semilan: Abieser ari Anatot di menua Benjamin
Bulan Sepuluh: Maharai ari Netopah (iya tu ari raban bansa Serah)
Bulan Sebelas: Benaiah ari Piraton di menua raban bansa Epraim
Bulan Dua Belas: Heldai ari Netopah (siku ari peturun Otnil)
 
Ngatur Pekara Ke Raban Bansa Orang Israel
16-22 Baka tu ku nama orang ke nyadi kepala raban bansa orang Israel:
Raban bansa  Kepala
Reuben Elieser anak Sikri
Simeon Sepatiah anak Maakah
Lewi  Hasabiah anak Kemuel
Aron Sadok
Judah  Elihu, siku ari menyadi David
Isakar  Omri anak Mikael
Sebulun  Ismaiah anak Obadiah
Naptali  Jerimot anak Asriel
Epraim  Hosea anak Asasiah
Manasi ke di barat  Joel anak Pedaiah
Manasi ke di Giliat  Ido anak Sekariah
Benjamin  Jaasiel anak Abner
Dan   Asarel anak Jeroham
23 Raja David enda ngitung orang ke baruh ari umur dua puluh taun, laban TUHAN udah besemaya deka ngasuh orang Israel ngemayuh bintang ti di langit.
24  Joap anak Seruiah, belabuh ngitung tubuh, tang iya enda nembuka pengawa nya, laban Allah Taala ngukum orang Israel ketegal pengawa nya. Nya alai pemayuh tubuh ti diitung nadai dituliska dalam cherita pasal Raja David.
 
Orang Ke ngemataka Reta tengkira Raja
25-31 Tu list nama orang ke ngemataka reta tengkira raja:
Bilik setor raja: Asmabet anak Adil
Bilik setor luar: Jonatan anak Usiah
Orang gaji ke gawa di umai: Esri anak Kelup
Kebun anggur: Simei ari Ramah
Setor alai nyimpan wain: Sabdi ari Sepam
Kayu kana enggau kayu saikamur (ba kaki bukit di barat): Baal Hanan ari Geder
Setor minyak kana: Joas
Jelu sapi ti ba emperan Saron: Sitrai ari Saron
Jelu sapi ti ba lebak: Sapat anak Adlai
Jelu unta: Obil, orang Ismail
Keledai: Jehdeiah ari Meronot
Bedus enggau kambin: Jasis, orang Hagri
 
Penyanding Penemu David
32 Aya Raja David ke benama Jonatan nya orang ke landik meri jaku lalau, sereta bepelajar. Iya enggau Jehiel anak Hakmoni ngemataka pelajar bala anak lelaki raja.
33 Ahitopel nya orang ke nyadi penyanding penemu raja, lalu Husai ari bansa Arki nyadi pangan ke alai raja betanya.
34 Lebuh Ahitopel mati, Abiatar enggau Jehoiada anak Benaiah nyadi penyanding penemu. Joap nyadi tuai soldadu.
 
Bagi 28
Atur David Pasal Rumah Sembiang
1 Raja David mesanka semua pemesai di menua Israel begempuru di Jerusalem. Nya alai semua bala pemesai ari semua raban bansa, bala pemesai ke bejalaika pengawa perintah, bala tuai peturun, orang ke ngemataka reta tengkira enggau jelu tupi ti diempu raja enggau bala anak iya, semua bala pemesai ke bekereja dalam istana, bala tuai soldadu, enggau orang ke bepangkat, begempuru di Jerusalem.
2  David bediri di mua sida, lalu bejaku enggau sida, “Menyadi, unggal, pendingka aku. Aku udah bisi amat ati deka ngaga rumah ti tetap ke Peti Lampang Batu Adat, ti nyadika pelasar kaki TUHAN Allah Taala kitai. Aku udah nyendiaka utai kena ngaga sebuah Rumah Sembiang nya kena ngemesaika Iya,
3 tang Iya enda nyagi aku ngaga rumah nya, laban aku tu soldadu, lalu udah munuh mayuh orang.
4 TUHAN Allah Taala ke disembah orang Israel, udah milih aku enggau bala peturun aku megai perintah di menua Israel belama iya. Iya udah milih raban bansa Judah mansutka tuai, lalu ari Judah iya udah milih ruang bilik apai aku. Ari semua ruang bilik nya, Iya udah gaga ati ngambi aku, lalu ngasuh aku nyadi raja ke semua menua Israel.
5 Iya udah meri aku mayuh anak lelaki, lalu ari semua sida nya, Iya udah milih Solomon megai perintah di menua Israel, menua ti endang diperintah TUHAN.
6 “Ku TUHAN bejaku ngagai aku, ‘Anak nuan Solomon deka ngaga Rumah Aku. Aku udah milih iya nyadi anak Aku, lalu Aku deka nyadi Apai iya.
7 Aku deka ngasuh perintah iya meruan belama iya, enti iya bejimat ngasika semua adat enggau pesan Aku, baka ke dikereja iya diatu.’
8 “Nya alai, di mua Allah Taala, enggau di mua semua bala orang Israel tu, ke endang nembiak TUHAN, aku ngasuh kita nitihka lalu ngiga semua pesan TUHAN Allah Taala kita, ngambika kita deka majak bempu menua ti manah tu, lalu nyerahka menua tu ngagai serak ti nangkanka kita belama iya.”
9 Ngagai Solomon iya nyebut jaku tu, “Anak, aku ngasuh nuan ngaku Allah Taala ti disembah apai nuan, nyadika Allah Taala nuan, lalu betuaika Iya enggau enda bebagi ati, sereta enggau runding ti seruran ransing. Iya nemu semua runding enggau pengingin kitai. Enti nuan mansang ngagai Iya, Iya deka nyambut nuan, tang enti nuan ninggalka Iya, Iya deka ngelengkaka nuan belama iya.
10 Nuan enda tau enda nemu, TUHAN udah milih nuan ngaga Rumah Sembiang Iya ti kudus. Gaga Rumah Sembiang nya; nuan enda tau enda kering, lalu ngereja pengawa nya.”
11 David lalu meri ngagai Solomon semua pelan ke rumah dalam Rumah Sembiang nya, pelan ke bilik setor, enggau pelan ke semua bilik bukai, enggau pelan ke Endur ti Pemadu Kudus, alai dosa diampun.
12 Iya mega meri ngagai Solomon pelan ke semua utai ti udah dikira iya ke tengah laman enggau ke bilik ti ngelingi tengah laman nya, pelan ke bilik setor alai nyimpan pekekas Rumah Sembiang, enggau alai nyimpan pemeri ti diserahka ngagai TUHAN.
13 David mega meri ngagai iya pelan kena ngatur bala imam enggau orang Lewi ngereja pengawa sida, ngereja pengawa dalam Rumah Sembiang, sereta ngintu semua pekekas dalam Rumah Sembiang.
14 Iya meri atur pasal pemayuh pirak enggau emas kena begagaka pekekas nya,
15 kena begagaka siti-siti lampu enggau penuduk lampu,
16 kena begagaka mija pirak, enggau siti-siti mija emas alai engkah tuku roti ti diberi ngagai Allah Taala.
17 Iya mega meri atur pasal pemayuh emas ti tulin ti tau dikena begagaka serampang, mangkuk, enggau tepayan, pemayuh pirak enggau emas kena begagaka pinggai,
18 enggau pemayuh emas ti tulin kena begagaka alta alai nunu menyan, enggau kena begagaka kerita perang ke melikat cherub ti besayap, ti ngerembaika sayap seduai iya ari atas Peti Lampang Batu Adat TUHAN.
19 Ku Raja David, “Semua utai nya bisi dalam pelan ti ditulis nitihka atur ti udah diberi TUHAN Empu ngagai aku, ngambika dikereja.”
20 Ku Raja David bejaku ngagai anak iya Solomon, “Nuan enda tau enda kering sereta berani, lalu kereja pengawa nya. Anang takut tauka irau ati; laban TUHAN Allah Taala, ti nyadi Allah Taala aku, bisi enggau nuan. Iya enda ngelebuka nuan, tauka ninggalka nuan, nyentuk ngagai maya semua pengawa begagaka Rumah Sembiang TUHAN udah tembu magang.
21 Bala imam enggau bala orang Lewi udah diberi pengawa ti deka dikereja sida dalam Rumah Sembiang. Orang ke bekereja, ke bisi semua macham pengelandik gagit ati deka nulung nuan, lalu semua orang mayuh enggau bala tuai sida endang nganti atur ari nuan.”
 
Bagi 29
Pemeri Kena Ngaga Rumah Sembiang
1 Ku Raja David madahka ngagai semua orang ke begempuru dia, “Anak aku Solomon udah dipilih Allah Taala, tang iya agi biak lalu kurang peneleba. Utai ti deka dikereja nya pengawa ti besai, laban tu ukai istana alai mensia diau, tang Rumah Sembiang TUHAN Allah Taala.
2 Aku udah, enggau naka ulih nyendiaka utai kena ngaga Rumah Sembiang nya - emas, pirak, temaga, besi, ramu, batu ti berega enggau batu gem, batu kena begagaka geladak, enggau mayuh batu ti alus.
3 Nambahka semua utai ti udah disediaka aku, aku udah meri pirak enggau emas ari reta tengkira aku empu, ketegal pemesai pengerindu aku ke Rumah Sembiang Allah Taala.
4 Aku udah meri 115 tan emas ti pemadu alus enggau 265 tan pirak ti tulin kena ngelagu dinding Rumah Sembiang
5 enggau kena ngaga semua utai ti deka digaga orang ke landik. Kati orang bukai bisi deka meri utai ngagai TUHAN?”
6 Udah nya bala tuai peturun, bala pemesai ari raban bansa, bala tuai soldadu, enggau bala orang ke ngemataka reta tengkira raja lalu madahka diri deka meri
7 utai kena begagaka Rumah Sembiang: 190 tan emas, 380 tan pirak, 675 tan temaga, enggau 3,750 tan besi.
8 Orang ke bisi batu ti berega meri utai nya ngagai sarang reta Rumah Sembiang. Nyadi sarang wang tu dikemataka Jehiel, ke datai ari raban bansa Gersom ari peturun Lewi.
9 Orang mayuh udah meri enggau ati ti gerah mudah ngagai TUHAN, lalu sida gaga ati ke pemayuh utai ti diberi. Raja David mega balat amat gaga ati.
 
David Muji Allah Taala
10 David lalu muji Allah Taala di mua semua orang mayuh. Ku iya, “TUHAN Allah Taala aki kami Jakop, awakka Nuan dipuji belama lama iya!
11 Nuan endang besai sereta bekuasa, bemulia, pemadu manah, lalu endang Raja. Semua utai di serega enggau di dunya endang enggi Nuan magang, lalu Nuan endang Raja, Raja ari atas semua.
12 Semua pengaya enggau basa endang datai ari Nuan. Nuan merintah semua utai ngena pengering enggau kuasa Nuan, lalu Nuan ulih ngaga orang nyadi besai sereta kering.
13 Diatu, Allah Taala kami, kami meri terima kasih ngagai Nuan, lalu kami muji nama Nuan ti bemulia.
14 “Tang taja pia, aku enggau nembiak aku enda tentu ulih meri Nuan utai, laban semua utai endang pemeri ari Nuan, lalu kami semina meri pulai baru utai ti endang enggi Nuan.
15 Nuan nemu, O TUHAN, kami idup ditu baka orang ke udah kena buai ngagai menua bukai, baka orang kampar, baka aki ini kami menya. Seput kami semina tan sekejap aja baka ayuk, lalu kami enda ulih ngerarika diri ari pemati.
16 O TUHAN Allah Taala kami, kami udah ngempuruka semua pengaya tu kena ngaga Rumah Sembiang Nuan, kena ngemesaika nama Nuan ti kudus, tang semua utai tu datai ari Nuan magang, lalu semua utai tu endang enggi Nuan.
17 Aku nemu Nuan ngabas ati genap iku orang, lalu gaga ati ke orang ke rentang ati. Ngena ati ti bendar sereta lurus aku udah abis ati meri semua utai tu ngagai Nuan, lalu aku udah meda bala nembiak Nuan ti begempuru ditu udah lantang ati mai pemeri tu ngagai Nuan.
18 TUHAN Allah Taala aki ini kami Abraham, Isak enggau Jakop, awakka Nuan ngasuh pengangkun ti baka tu seruran kering belama-lama dalam ati bala nembiak Nuan, lalu awakka Nuan ngasuh sida seruran tetap ati ngagai Nuan.
19 Beri meh ngagai anak aku Solomon pengingin ti enda belampung ati ngasika semua pesan, adat, enggau atur Nuan, lalu ngaga Rumah Sembiang ngena utai tu ti udah disediaka aku.”
20 Udah nya David lalu bejaku enggau orang mayuh, “Beri puji ngagai TUHAN Allah Taala kita!” Semua orang ke begempuru lalu muji TUHAN Allah Taala aki ini sida, lalu sida nyungkurka diri ngemesaika TUHAN enggau raja.
21 Hari siti sida munuh jelu nyadika piring, nyerahka jelu nya ngagai TUHAN, lalu udah nya, meri utai nya ke diempa orang mayuh. Nambahka nya, sida mega meri seribu iku sapi ti lelaki, seribu iku bedus ti lelaki, enggau seribu iku anak domba nyadika piring tunu segala ba alta. Sida mega mai piring wain.
22 Nya alai sida gaga ati sehari nya lebuh sida makai ngirup di mua TUHAN. Sida lalu nyiri Solomon nyadi raja kedua kali. Dalam nama TUHAN sida nata iya nyadi raja, lalu Sadok nyadi imam.
23  Nya alai Solomon nganti apai iya nyadi raja ba kerusi diraja ti udah ditumbuhka TUHAN. Iya mujur nyadi raja, lalu semua orang Israel ngasi magang ke iya.
24 Semua bala pemesai enggau bala soldadu, nyengkaum bala anak lelaki David ti bukai, besemaya deka taluk ngagai Raja Solomon.
25 TUHAN ngasuh semua orang Israel bebasaka Solomon, lalu Iya ngaga Solomon bemulia agi ari semua raja bukai ti udah kala megai perintah di menua Israel.
 
Perintah David Ditusui Enggau Ngelansa
26 David anak Jesi merintah semua menua Israel
27 empat puluh taun. Iya merintah di Hebron tujuh taun, lalu di Jerusalem tiga puluh tiga taun.
28 Iya mati lebuh umur iya nyau tuai, bulih pengaya sereta dibasa orang, lalu anak iya Solomon nganti iya nyadi raja.
29 Cherita lama pasal Raja David, ari pun nyentuk ke ujung, bisi dituliska magang dalam cherita pasal tiga iku nabi, Samuel, Natan, enggau Gat.
30 Cherita nya nusui pasal chara iya merintah, pemesai kuasa iya, enggau pasal semua utai ti udah nyadi ba iya, ba orang Israel, enggau ba perintah menua bukai ti bekelingi dia.