1 RAJA
 
Jaku Pemuka
Bup  1 Raja* nampung jerita lama pasal orang Israel ke dipegai raja. Jerita tu terubah ditulis dalam bup  Samuel*. Bup  1 Raja* tau dibagi ngagai tiga iti sitak: (1) Pasal Solomon ke nganti apai iya David nyadi raja, enggau pasal pemati David. (2) Pasal perintah Solomon, enggau utai ti dikereja iya, kelebih agi pasal iya ke ngaga Rumah Sembiang di Jerusalem. (3) Pasal menua Israel ti dibagi ngagai perintah ti di utara enggau perintah ti di selatan, enggau jerita pasal bala raja ke megai perintah di menua dua bengkah nya, nyentuk ngagai kira setengan abad ti kesemilan sebedau pengada Jesus.

Dalam bup  1 Raja* enggau  2 Raja*, siku-siku raja diakim nitihka penaluk sida ke Allah Taala, lalu pemujur menua Israel bepanggai ba penaluk bala raja nya ke Allah Taala. Tang pengawa besembahka engkeramba, enggau pengawa ti enda ngasika TUHAN, mai penusah. Semua raja ke merintah di utara nadai mujur siku, lalu sida ke merintah di selatan bisi mujur, tang bisi ga enda.

Utai ti nyengala nyata dalam bup  1 Raja* nya pasal bala nabi TUHAN ti berani madahka jaku Allah Taala ngagai orang ke enda ngasika Allah Taala lalu nagang sida besembahka engkeramba. Nabi ti tebilang nya Elijah. Peda bagi 18 alai iya ke ngelaban bala nabi Baal.
 
Ripih Isi Bup Tu
Pengujung perintah David (1.1-2.12)
Solomon nyadi raja (2.13-46)
Perintah Solomon (3.1-11.43)
     a. Maya lebuh Solomon baru apin lama udah nyadi raja (3.1-4.34)
     b. Ngaga Rumah Sembiang (5.1-8.66)
     c. Maya ti nangkanka nya (9.1-11.43)
Menua Israel dibagi dua (12.1-22.53)
     a. Raban bansa ti di utara angkat ngelaban perintah (12.1-14.20)
     b. Raja ke megai perintah di menua Judah enggau menua Israel (14.21-16.34)
     c. Nabi Elijah (17.1-19.21)
     d. Raja Ahap ke menua Israel (20.1-22.40)
     e. Raja Jehosapat ke menua Judah enggau Raja Ahasiah ke menua Israel (22.41-53)
 
Bagi 1
Raja David Lebuh Iya Nyau Tuai
1 Raja David diatu nyau tuai. Taja pen bala orang gaji iya mungkur iya ngena pua, iya seruran chelap tubuh.
2 Nya alai bala pemesai iya bejaku enggau iya, “Tuan Raja, awakka kami ngiga indu ke biak ke nuan, lalu ngintu nuan. Iya deka gali ngimbai nuan, ngambika nuan seruran angat isi.”
3 Sida lalu ngiga siku indu ke bajik di menua Israel. Sida lalu tetemuka siku di Sunem. Nama iya Abisak, lalu sida mai iya ngagai raja.
4 Abisak bajik amat gamal. Iya ngibun sereta ngintu raja, tang raja enda beleman enggau iya.
 
Adonijah Ngambu Diri Nyadi Raja
5-6  Laban Absalom udah mati, Adonijah, anak David seduai Hagit, nyadi anak tuai David ti agi meruan idup. Adonijah tu sigat amat gamal. David nadai kala nganu iya, lalu iya pen bisi amat ati deka nyadi raja. Iya nyendiaka kerita perang ke diri empu, kuda, enggau lima puluh iku orang ke nyaga iya lebuh iya bejalai.
7 Iya bejaku enggau Joap (indai Joap nya Seruiah). Iya mega bejaku enggau Imam Abiatar, lalu seduai iya besetuju deka nyukung iya.
8 Tang Imam Sadok, Benaiah anak Jehoiada, nabi Natan, Simei, Rei, enggau bala soldadu ke nyaga David, enggai nyukung Adonijah.
9 Nyadi sekali, Adonijah ngenjuk piring jelu bedus, sapi ti lelaki, enggau anak sapi ti gemu ba Batu Ular, semak mata ai di En-rogel. Iya mai anak lelaki David ti bukai, enggau bala pemesai raja ari menua Judah ngagai pengerami nya.
10 Tang iya enda mai menyadi-tiri iya Solomon tauka nabi Natan, tauka Benaiah, tauka bala soldadu ke nyaga raja.
 
Solomon Dichiri Nyadi Raja
11  Udah nya Natan lalu mansang ngagai Batseba, indai Solomon, lalu nanya ngagai iya, “Kati nuan nadai udah ninga pasal anak Hagit ke benama Adonijah, ti udah nyiri diri nyadi raja, lalu Raja David enda nemu pasal pekara nya?
12 Enti nuan deka ngidupka nyawa diri, enggau nyawa anak nuan Solomon, aku meri nuan siti jaku lalau. Mansang nuan
13 ngagai Raja David diatu, lalu tanya ngagai iya, ‘Tuan Raja, ukai enda nuan udah besemaya ngena sumpah madahka anak aku Solomon deka nganti nuan nyadi raja? Enti nuan amat udah besemaya, nama kebuah Adonijah diatu udah nyadi raja?’
14 Udah nya, lebuh nuan benung bejaku enggau Raja, aku tama, lalu madahka pengamat berita ti dibai nuan.”
15 Batseba lalu mansang betemu enggau raja dalam bilik tinduk raja. Raja udah tuai amat, lalu iya diintu Abisak, indu ke ari Sunem.
16 Batseba nyungkurka diri di mua raja. Raja lalu nanya, “Nama utai ti dikedekaka nuan?”
17 Batseba lalu nyaut, “Tuan Raja, nuan udah besumpah enggau aku dalam nama TUHAN Allah Taala nuan, madahka anak aku Solomon deka nganti nuan nyadi raja.
18 Tang diatu Adonijah udah nyadi raja, lalu nuan nadai nemu pasal pekara nya.
19 Iya udah meri sapi ti lelaki, bedus, enggau anak sapi ti gemu nyadika piring, lalu iya udah ngambi bala anak lelaki nuan, Imam Abiatar, enggau Joap ti nyadi tuai soldadu nuan, ngagai pengerami nya, tang iya enda mai anak nuan Solomon.
20 Tuan Raja, semua orang di menua Israel nganti nuan madahka sapa ti deka nganti nuan nyadi raja.
21 Enti nuan enda, lebuh nuan mati ila, kami duai Solomon deka digaga nyadi baka orang ke nyual bansa.”
22 Lebuh Batseba agi benung bejaku, Natan pen datai di istana.
23 Orang lalu madahka ngagai David, “Nabi Natan!” Natan tama, lalu nyungkurka diri di mua raja.
24 Udah nya Natan lalu bejaku, “Tuan Raja, kati nuan bisi udah madahka Adonijah deka nganti nuan nyadi raja?
25 Sehari tu iya udah mansang lalu ngenjuk piring jelu sapi ti lelaki, bedus enggau anak sapi ti gemu. Semua bala anak lelaki nuan, Joap ti nyadi tuai soldadu nuan, enggau Imam Abiatar udah diambi iya ngabang. Diatu sida benung ngintu pengerami makai besai enggau iya, sereta manjung ‘Gayu-guru Raja Adonijah!’
26 Tang, tuan, iya nadai ngambi aku, tauka Imam Sadok, tauka Benaiah, tauka Solomon ngagai pengerami nya.
27 Kati Tuan Raja bisi udah ngemendarka pengawa nya, lalu enda madahka ngagai bala pemesai nuan sapa ti deka nganti nuan nyadi raja?”
28 Ku Raja David bejaku, “Asuh Batseba tama kitu baru.” Batseba tama lalu bediri di mua raja.
29 David lalu bejaku enggau Betseba, “Aku besemaya enggau nuan, dalam nama TUHAN ti idup, ti udah ngelepaska aku ari semua penusah aku,
30 sehari tu aku deka ngamatka semaya ti udah digaga aku enggau nuan dalam nama TUHAN Allah Taala ke disembah orang Israel. Anak nuan Solomon deka nganti aku nyadi raja.”
31 Batseba lalu nyungkurka diri, lalu ku iya, “Awakka Tuan Raja aku idup belama iya!”
32 Udah nya raja lalu mesanka Sadok, Natan, enggau Benaiah. Lebuh sida tama,
33 raja lalu bejaku enggau sida, “Bai bala pemesai aku enggau kita. Asuh anak aku Solomon nepan keledai aku empu, lalu iring iya nurun ngagai Mata Ai di Gihon.
34 Dia Sadok, enggau Natan deka nata iya nyadi raja menua Israel. Udah nya sepu terumpit, lalu manjung, ‘Gayu-guru Raja Solomon!’
35 Titihka iya pulai kitu baru, lebuh iya datai lalu duduk ba kerusi diraja aku. Iya deka nganti aku nyadi raja, laban iya endang udah dipilih aku nyadi raja menua Israel enggau menua Judah.”
36 “Utai nya deka dikereja,” ku Benaiah nyaut, “lalu awakka TUHAN Allah Taala nuan ngamatka utai nya!
37 Baka TUHAN ti udah enggau Tuan Raja, awakka Iya mega enggau Solomon, lalu ngasuh perintah Solomon lebih agi kaya-raja ari perintah nuan.”
38 Nya alai Sadok, Natan, Benaiah, enggau bala soldadu ke nyaga raja lalu ngasuh Solomon nepan keledai Raja David, lalu ngiring iya ngagai Mata Ai di Gihon.
39 Sadok mai sarang minyak kana, ti udah dibai iya ari Langkau Kain TUHAN, lalu nata Solomon. Sida nyepu terumpit, lalu semua orang manjung magang, “Gayu-guru Raja Solomon!”
40 Udah nya semua sida lalu nitihka iya pulai, manjung gaga ati, nyepu kesuling, sereta richah, datai ke tanah nyau berenyang.
41 Lebuh Adonijah enggau semua pengabang iya udah tembu ngintu pengerami makai besai, sida lalu ninga utai inggar bemunyi. Lebuh Joap ninga munyi terumpit, iya lalu nanya, “Nama utai ti inggar nya di nengeri nya?”
42 Lebuh iya agi benung bejaku, Jonatan anak Imam Abiatar lalu datai. “Tama,” ku Adonijah bejaku enggau iya. “Nuan tu orang ke badas. Nuan tentu mai berita ti manah.”
43 “Ukai,” ku Jonatan nyaut. “Raja David udah ngaga Solomon nyadi raja.
44 Iya udah ngasuh Sadok, Natan enggau Benaiah enggau bala soldadu ke nyaga raja, ngiring iya. Iya udah ngasuh iya nepan keledai raja,
45 lalu Sadok enggau Natan udah nata iya nyadi raja ba Mata Ai di Gihon. Udah nya sida lalu tama ngagai nengeri, manjung gaga ati, lalu orang mayuh nyau richah magang. Nya utai ti didinga kita.
46 Solomon diatu udah nyadi raja.
47 Nambahka nya, bala pemesai ke bekereja dalam istana raja udah tama ngagai bilik raja, lalu meri tabi basa ngagai Raja David. Ku sida, ‘Awakka Allah Taala nuan ngasuh Solomon tebilang agi ari nuan, lalu awakka perintah Solomon lebih agi kaya-raja ari perintah nuan.’ Udah nya Raja David nyungkurka diri ba atas peninduk iya, nyembah Allah Taala.
48 Ku David besampi, ‘Pujika TUHAN Allah Taala ke disembah orang Israel ti udah sehari tu ngasuh siku ari peturun aku nganti aku nyadi raja, lalu udah ngasuh aku idup meda utai tu nyadi!’ “
49 Udah nya bala pengabang Adonijah lalu takut. Semua sida angkat, lalu mupuk magang.
50 Adonijah lalu takutka Solomon, lalu iya mansang ngagai Langkau Kain TUHAN, lalu megai sukut alta.
51 Orang lalu madahka ngagai Raja Solomon pasal Adonijah ke takutka iya, lalu bepegai ba sukut alta, lalu udah bejaku, “Terubah, aku deka ngasuh Raja Solomon besumpah minta iya enda munuh aku.”
52 Ku Solomon nyaut, “Enti iya taluk, selambar pen nadai meh buk iya deka ditegu. Tang enti iya enda taluk, iya deka mati.”
53 Udah nya Raja Solomon lalu mesanka Adonijah, lalu ngasuh orang mai iya nurun ari alta nya. Adonijah mansang lalu nyungkurka diri di mua raja, lalu ku raja bejaku enggau iya, “Pulai meh nuan ke rumah.”
 
Bagi 2
Atur Ti Penudi Ari David Ngagai Solomon
1 Lebuh David baru deka ngapuska seput, iya mesanka anak iya Solomon, lalu meri jaku ajar ti penudi ngagai iya:
2 “Aku nyau deka mati. Nuan enda tau enda kering sereta berani,
3 lalu kereja semua utai ti diasuh TUHAN Allah Taala nuan. Nuan enda tau enda ngasika semua adat enggau pesan Iya, munyi ti ditulis dalam Adat Moses, ngambika, di sebarang endur nuan bejalai, nuan deka mujur dalam semua utai ti dikereja nuan.
4 Enti nuan ngasika TUHAN, Iya deka ngamatka semua semaya ti udah digaga Iya, lebuh Iya madahka peturun aku deka megai perintah di menua Israel, enti sida bejimat sereta tetap ati ngasika pesan Iya enggau pengabis ati sida sereta enggau pengabis semengat sida.
5  “Siti agi pekara. Nuan ingatka utai ti udah dikereja Joap ngagai aku, lebuh iya munuh dua iku tuai soldadu menua Israel, Abner anak Ner enggau Amasa anak Jeter. Nuan ingatka chara iya munuh seduai nya, lebuh maya nadai pengachau, kena iya bebalaska orang ke dibunuh Abner seduai Amasa lebuh maya beperang. Joap munuh orang ke nadai penyalah. Diatu aku betanggungjawapka utai ti udah dikereja iya, lalu aku kena laban penusah ketegal nya.
6 Nuan nemu utai ti patut dikereja diri. Nuan enda tau nejuka iya mati tuai.
7 Tang nuan enda tau enda manah enggau bala anak Barsilai ari Giliat, lalu ngibun sida, laban sida udah manah enggau aku, lebuh aku ngerarika diri ari menyadi nuan Absalom.
8 “Baka nya mega Simei anak Gera, ari nengeri Bahurim, di menua Benjamin. Iya balat amat nyumpah aku, lebuh aku mansang ngagai Mahanaim, tang lebuh iya betemu enggau aku ba Sungai Jordan, aku besumpah enggau iya dalam nama TUHAN madahka diri enda munuh iya.
9 Tang nuan enda tau enda ngukum iya. Nuan nemu utai ti patut dikereja diri, lalu nuan enda tau enda ngasuh orang munuh iya.”
 
Pemati David
10 David mati lalu dikuburka di Nengeri David.
11 Iya udah nyadi raja empat puluh taun. Iya udah merintah tujuh taun di Hebron, lalu tiga puluh tiga taun di Jerusalem.
12 Solomon lalu nganti apai iya nyadi raja, lalu kuasa iya kukuh.
 
Pemati Adonijah
13 Udah nya Adonijah (indai iya Hagit) lalu mansang ngagai Batseba, indai Solomon. “Kati nuan datai enggau ati ti manah?” ku Batseba nanya. “Enggau ati ti manah,” ku iya nyaut.
14 Lalu ku iya nambahka jaku diri, “Aku bisi utai ti deka dipinta aku ari nuan.” “Nama utai nya?” ku Batseba nanya.
15 Ku Adonijah nyaut, “Nuan nemu, aku endang patut nyadi raja. Semua orang di menua Israel endang ngadang nya magang. Tang utai ti nyadi nya lain agi ari nya, lalu menyadi aku nyadi raja, laban nya endang peneka TUHAN.
16 Nya alai diatu aku bisi utai ti deka dipinta aku. Aku minta nuan meri utai nya ngagai aku.” “Utai nama?” ku Batseba nanya.
17 Ku Adonijah nyaut, “Aku minta nuan nanya Raja Solomon enti aku tau bempu Abisak, indu ke datai ari Sunem, nyadika bini aku. Aku nemu Solomon enggai nyebut ‘enggai’ ngagai nuan.”
18 “Barang ku jaku,” ku Batseba nyaut. “Ila aku bejaku enggau raja ngarika nuan.”
19 Batseba lalu betemu enggau raja, deka bejaku enggau iya, ngarika Adonijah. Raja lalu bediri nyambut penatai indai iya, lalu nyungkurka diri di mua indai iya. Udah nya Solomon lalu duduk ba kerusi diraja iya, lalu ngasuh orang mai siti agi kerusi diraja, alai indai iya ke lalu nudukka diri ari kanan iya.
20 Ku indai iya bejaku, “Aku bisi siti utai ti deka dipinta aku ari nuan. Anang nulak utai ti dipinta aku.” “Utai nama, indai?” ku Solomon nanya. “Nadai aku nulak utai ti dipinta nuan.”
21 Ku indai iya nyaut, “Awakka menyadi nuan Adonijah bempu Abisak nyadika bini iya.”
22 “Nama kebuah nuan ngasuh aku meri Abisak ngagai iya?” ku Solomon nanya. “Manah agi enti nuan ngasuh aku meri kerusi diraja tu ngagai iya. Iya menyadi tuai aku, lalu Imam Abiatar enggau Joap setanah enggau iya!”
23 Udah nya Solomon lalu besumpah dalam nama TUHAN, “Awakka Allah Taala munuh aku enti aku enda munuh Adonijah ketegal iya minta utai tu!
24 TUHAN udah ngasuh aku duduk ba kerusi diraja apai aku David. Iya udah ngamatka semaya Iya, lalu udah meri perintah tu ngagai aku, enggau ngagai peturun aku. Aku besumpah dalam nama TUHAN ti idup, Adonijah deka mati sehari tu!”
25 Raja Solomon lalu meri atur ngagai Benaiah. Benaiah mansang lalu munuh Adonijah.
 
Abiatar Dibuai Ari Jerusalem; Joap Mati
26  Udah nya Raja Solomon lalu bejaku enggau Imam Abiatar, “Pulai nuan ngagai rumah nuan empu di Anatot. Nuan patut dibunuh, tang aku enggai ngasuh orang munuh nuan diatu, laban nuan ngemataka Peti Lampang Batu Adat TUHAN lebuh nuan agi enggau apai aku, lalu nuan udah sama enggau apai aku ngasaika semua penusah iya.”
27 Udah nya Solomon lalu muai Abiatar ari pengawa iya ti nyadi imam TUHAN. Tu ngamatka utai ti udah disebut TUHAN di Siloh, pasal Imam Eli enggau peturun iya.
28 Lebuh Joap ninga berita pasal utai ti udah nyadi, (iya udah nyukung Adonijah, tang enda nyukung Absalom.) iya lalu ngerarika diri ngagai Langkau Kain TUHAN, lalu bepegai ba sukut alta.
29 Lebuh Raja Solomon ninga Joap udah ngerarika diri ngagai Langkau Kain TUHAN, lalu bediri ngimbai alta, Solomon lalu ngasuh siku seruan mansang ngagai Joap, nanyaka kebuah iya ngerarika diri ngagai alta nya. Ku Joap, iya udah ngerarika diri ngagai TUHAN, laban iya takutka Solomon. Nya alai Raja Solomon lalu ngasuh Benaiah munuh Joap.
30 Benaiah lalu mansang ngagai Langkau Kain TUHAN, lalu bejaku enggau Joap, “Raja ngasuh nuan pansut.” “Enggai aku,” ku Joap nyaut. “Awakka aku mati ditu.” Benaiah pulai baru ngagai raja, lalu madahka jaku Joap ngagai iya.
31 “Kereja aja utai ti ku Joap,” ku Solomon nyaut. “Bunuh iya, lalu kuburka iya. Nya baru aku, tauka bala peturun David ti bukai, enda agi betanggungjawapka utai ti udah dikereja Joap lebuh iya munuh orang ke nadai penyalah.
32 TUHAN deka ngukum Joap ketegal iya udah munuh orang nya, lalu enda madahka ngagai apai aku. Joap udah munuh dua iku orang ke nadai penyalah, ke badas agi ari iya empu, Abner, tuai soldadu orang Israel, enggau Amasa, tuai soldadu orang Judah.
33 Ukum ketegal iya ti udah munuh orang nya deka ninggang Joap, enggau peturun iya belama iya. Tang TUHAN deka ngemujurka peturun David ke duduk ba kerusi diraja iya.”
34 Nya alai Benaiah lalu mansang ngagai Langkau Kain TUHAN, lalu munuh Joap. Joap lalu dikuburka di menua iya, ari luar nengeri.
35 Raja lalu ngasuh Benaiah nyadi tuai soldadu, nganti Joap, lalu ngasuh Sadok nyadi imam, nganti Abiatar.
 
Pemati Simei
36 Udah nya raja lalu mesanka Simei, lalu ku iya bejaku enggau Simei, “Gaga sebuah rumah ke diri empu ditu di Jerusalem. Diau dalam rumah nya, lalu anang angkat ari nengeri tu.
37 Enti nuan angkat ari tu ngilah sungai Kidron, nuan tetap deka mati, lalu nuan empu deka betanggungjawapka pemati diri.”
38 “Au, Tuan Raja,” ku Simei nyaut. “Aku deka ngereja utai ti ku nuan.” Nya alai iya diau lama di Jerusalem.
39 Tang tiga taun udah bekau nya, dua iku ulun Simei rari ngagai Raja Akis anak Maakah ti nyadi raja di Gat. Lebuh Simei ninga berita seduai iya bisi di Gat,
40 iya lalu nyendiaka keledai iya, lalu mansang ngagai Raja Akis di Gat, ngiga ulun iya. Iya lalu tetemuka seduai iya, lalu mai seduai iya pulai.
41 Lebuh Solomon ninga berita pasal utai ti udah dikereja Simei,
42 iya lalu mesanka Simei, lalu bejaku, “Aku udah ngasuh nuan besemaya di mua TUHAN, enda ninggalka Jerusalem. Lalu aku udah meri jaku tangkan ngagai nuan, enti nuan ninggalka Jerusalem, nuan tetap deka mati. Lalu nuan udah besetuju enggau nya, lalu madahka diri deka ngasika aku, ukai enda?
43 Nya alai, nama kebuah nuan mungkirka semaya nya, lalu enda ngasika pesan aku?
44 Nuan endang nemu semua utai ti salah, ti udah dikereja nuan ngagai apai aku David. Nya alai, TUHAN deka ngukum nuan ketegal utai nya.
45 Tang Iya deka merekatka aku, lalu deka ngasuh perintah David meruan belama iya.”
46 Udah nya raja lalu bejaku enggau Benaiah. Benaiah mansang, lalu munuh Simei. Nya alai, semua kuasa diatu ba jari Solomon magang.
 
Bagi 3
Solomon Besampi Minta Penemu-dalam
1 Solomon ngaga sempekat enggau raja menua Ejip, lalu jadi enggau anak indu iya. Iya mai indu nya diau dalam Nengeri David, nyentuk ngagai maya iya udah tembu ngaga istana, Rumah Sembiang, enggau dinding kuta ti ngelingi Jerusalem.
2 Lebuh maya nya Rumah Sembiang apin digaga. Nya alai orang Israel agi ngenjuk piring sida ba mayuh bengkah alta.
3 Nyadi Solomon sigi rinduka TUHAN, lalu iya nitihka atur apai iya David, tang iya mega munuh jelu lalu ngenjuk sida nyadika piring ba mayuh bengkah alta.
4 Nyadi sekali, iya mansang ngagai Gibeon, deka ngenjuk piring dia, laban alta dia pemadu tebilang. Iya endang udah meri beratus ratus iti piring tunu ba endur nya dulu ari nya.
5 Malam nya TUHAN pegari di mua iya dalam mimpi, lalu nanya iya, “Nama utai ti dipinta nuan ari Aku?”
6 Solomon lalu nyaut, “Nuan endang seruran mandangka pengerindu ti besai ngagai apai aku David, ke nembiak Nuan, lalu iya orang ke badas, ke taluk, sereta tetap ati ngagai Nuan. Lalu Nuan udah majak ngayanka pengerindu Nuan ti meruan belama iya ngagai iya, lebuh Nuan meri iya siku anak lelaki, ke merintah nganti iya sehari tu.
7 O TUHAN Allah Taala, Nuan udah ngasuh aku nganti apai aku nyadi raja, taja pen aku tu agi biak, lalu enda nemu chara merintah.
8 Aku begulai enggau orang ke udah dipilih Nuan nyadi nembiak Nuan, bansa ti mayuh tubuh, ti enda ulih diitung.
9 Nya alai, beri aku penemu-dalam kena aku merintah bala nembiak Nuan enggau lurus, sereta dikena aku ngelala bagi utai ti manah enggau ti jai. Enti enda baka nya, baka ni ku aku ulih merintah bala nembiak Nuan ke mayuh tu?”
10 TUHAN gaga ati ninga Solomon minta nya.
11 Nya alai, ku Iya bejaku enggau Solomon, “Laban nuan udah minta penemu-dalam kena nuan merintah enggau lurus, lalu enda minta diri gayu-guru, tauka minta pengaya, tauka minta munsuh nuan dibunuh,
12 Aku deka ngereja utai ti udah dipinta nuan. Aku deka meri nuan penemu-dalam enggau pemereti ati lebih ari enggi orang bukai ke dulu tauka dudi ari nuan.
13 Aku deka mega meri ngagai nuan utai ti enda dipinta nuan. Nuan deka bulih pengaya enggau basa seumur idup, lebih ari enggi raja bukai.
14 Lalu enti nuan ngasika Aku, lalu nitihka adat enggau pesan Aku, baka apai nuan David, Aku deka ngasuh nuan panjai umur.”
15 Solomon lalu tedani. Nya baru iya nemu Allah Taala udah bejaku enggau iya dalam mimpi. Udah nya iya mansang ngagai Jerusalem, bediri di mua Peti Lampang Batu Adat TUHAN, lalu ngenjuk piring tunu enggau piring pemaik, ngagai TUHAN. Udah nya iya lalu nyendiaka pengerami makai besai ke semua pemesai iya.
 
Solomon Ngatur Pechara Ti Mar Diputarka
16 Nyadi sekali, dua iku indu sundal datai lalu bediri di mua Raja Solomon.
17 Ku siku bejaku, “Tuan Raja, kami duai indu tu sama begulai diau dalam sebuah rumah, lalu aku ngadaka anak lelaki siku di rumah lebuh indu nya bisi dia.
18 Dua hari udah bekau anak aku ada, iya mega ngadaka anak lelaki siku. Semina kami duai aja bisi di rumah nya. Orang bukai sigi nadai dia.
19 Nyadi sekali, lebuh malam hari, iya bekalih, lalu tetinggangka anak iya, lalu anak iya mati.
20 Iya angkat malam nya, ngambi anak aku ke dikimbit aku lebuh aku tinduk, lalu mai anak aku ngagai peninduk iya empu. Udah nya iya ngengkahka anak iya ti udah mati nya ba peninduk aku.
21 Pagi hari siti, lebuh aku dani, deka nusuka anak aku, aku meda iya udah mati. Aku lalu meresa iya enggau silik. Nya baru aku nemu iya ukai anak aku.”
22 Tang ku indu ke siku nya bejaku, “Ukai baka nya! Anak mit ke idup nya endang anak aku. Anak mit ke mati nya anak nuan!” Ku indu ke terubah bejaku nya nyaut, “Ukai baka nya! Anak mit ke mati nya endang anak nuan. Iya ti agi idup nya endang anak aku!” Nya meh munyi seduai iya bekelikuh di mua raja.
23 Udah nya Raja lalu bejaku, “Seduai sama ngumbai anak mit ke idup nya anak diri, lalu anak mit ke mati nya ukai anak seduai.”
24 Raja lalu ngasuh orang ngambi pedang. Lebuh pedang nya dibai ngagai iya,
25 raja lalu bejaku, “Belah dua anak mit ke idup nya, lalu beri setengah ngagai seduai iya siku-siku.”
26 Laban indai anak mit nya balat sayauka anak iya, nya alai iya lalu bejaku enggau raja, “Tuan Raja, anang munuh anak mit nya! Beri iya ngagai indu nya!” Tang ku indu nya bejaku, “Anang meri iya ngagai kami duai, tang awakka iya dibelah dua.”
27 Udah nya Solomon lalu bejaku, “Anang munuh anak mit nya! Beri iya ngagai indu ke terubah. Iya endang indai iya.”
28 Lebuh orang Israel ninga pasal pemutus penemu Solomon, sida balat amat bebasaka iya, laban sida nemu Allah Taala udah meri iya penemu-dalam kena iya meri atur ti lurus.
 
Bagi 4
Bala Pemesai Ke Bekereja Ke Solomon
1 Raja Solomon merintah semua menua Israel,
2 lalu tu bala pemesai iya ti tinggi pangkat: Imam: Asariah anak Sadok
3 Kerani kot: Elihorep seduai Ahijah, ke sama anak Sisa tukang tulis: Jehosapat anak Ahilut
4 Tuai soldadu: Sadok anak Abiatar
5 Kepala gabenor pelilih menua: Asariah anak Natan, penyanding penemu raja: Imam Sabut anak Natan
6 Orang ke nyadi tuai ngemataka bala orang gaji ke bekereja dalam istana: Ahisar orang ke nyadi tuai ngemataka orang ke dipejalka gawa ngereja pengawa ti berat: Adoniram anak Abda.
7 Solomon ngeletak dua belas iku orang nyadi gabenor ke pelilih menua di menua Israel. Sida tu diberi tanggungjawap meri, ari pelilih menua ti dipegai sida, pemakai ngagai raja enggau sida raja sebilik. Siku-siku sida meri pemakai sebulan aja dalam setaun.
8 Tu nama bala pemesai ke dua belas iku nya, enggau pelilih menua ti dipegai sida: Benhur: menua ti bebukit di menua Epraim
9 Ben-deker: di Makas, Sa-albim, Bet-semes, Elon, enggau Elon-bet-hanan
10 Ben-heset: di Arubot enggau Sokoh, enggau semua menua Heper
11 Ben-abinadap, ke jadi enggau anak indu Solomon ke benama Tapat: semua menua Dor
12 Bana anak Ahilut: di Taanak, Megido, enggau semua menua ti semak Bet-san, semak nengeri Saretan, tunga ke selatan nengeri Jesril, nyentuk ngagai nengeri Abel-meholah enggau nengeri Jokmim
13 Ben-geber: nengeri Ramot-giliat, enggau genturung pendiau di menua Giliat ti diempu raban peturun Jair, siti peturun Manasi, enggau menua Argop di Basan, enam puluh buah nengeri ti besai semua iya ke bisi dinding kuta, enggau alang temaga ba pintu nengeri
14 Ahinadap anak Ido: pelilih menua Mahanaim
15 Ahimas, ke jadi enggau Basemat, siku ari anak indu Solomon: menua Naptali
16 Bana anak Husai: menua Aser enggau nengeri Bealot
17 Jehosapat anak Paruah: menua Isakar
18 Simei anak Ela: menua Benjamin
19 Geba anak Uri: menua Giliat, ti udah dipegai raja orang Amor, Raja Sihon, enggau Raja Og di Basan . Kelimpah ari sida dua belas tu, bisi siku agi gabenor, ti nyadi gabenor ke semua menua Israel.
 
Pemansang Perintah Solomon
20 Orang Judah enggau orang Israel nyau ngemayuh igi pasir ti ba tebing tasik. Sida makai ngirup, lalu lantang diau.
21 Menua ti dipegai Solomon nyengkaum semua menua ari Sungai Eupratis ngagai menua Pilistin, nyentuk ngagai entara menua Ejip. Sida mayar chukai ngagai iya, lalu nunduk ngagai iya seumur iya idup.
22 Utai ti dipeguna Solomon tiap hari nya 5,000 liter tepung ti alus enggau 10,000 liter tepung ti kasar,
23 Sepuluh iku jelu sapi ti ditupi dalam bansal, 20 iku sapi ti ditupi di padang, enggau 100 iku bedus, nambahka rusa, kijang, pelanduk enggau manuk.
24 Solomon merintah serata menua ti tunga ke barat Sungai Eupratis, ari Tipsah ti ba Sungai Eupratis nyentuk ngagai nengeri Gasa di barat. Semua raja tunga ke barat Sungai Eupratis nunduk magang ngagai iya, lalu iya diau bebaik enggau semua menua ti ngelingi menua ti dipegai iya.
25 Lebuh iya agi idup, orang Israel di serata menua Judah enggau menua Israel diau likun. Genap ruang bilik sida bela bisi kebun anggur enggau kebun buah kana ke diri empu.
26 Solomon bisi 40,000 buah bansal alai iya ngandang kuda ti dikena iya narit kerita perang iya, enggau 12,000 iku kuda kena beperang.
27 Ba bulan ti udah diletak, siku-siku gabenor meri pemakai ngagai Raja Solomon empu enggau ngagai semua orang ke makai dalam istana. Sida gabenor tu endang seruran meri utai ti dipeguna raja.
28 Genap iku gabenor mega meri barli enggau rumput ti rangkai, ngagai endur alai utai nya dipeguna, ke kuda ti narit kerita perang enggau ke jelu ti dikena ngereja pengawa.
29 Allah Taala meri Solomon penemu-dalam enggau runding ti dalam, enggau pemandai ti enda ulih disagam.
30 Solomon lebih agi bepenemu-dalam ari orang ke bepenemu-dalam di Timur, tauka ari orang ke bepenemu-dalam di menua Ejip.
31 Iya orang ke pemadu bepenemu-dalam ari semua orang, lebih agi bepenemu-dalam ari sida Etan orang Esrahi, enggau ari Heman, Kalkol, enggau Darda, bala anak lelaki Mahol. Lalu berita pasal iya ngelekai ngagai semua menua ti ngelingi menua iya.
32 Iya nulis tiga ribu iti jaku-dalam, enggau lebih seribu iti lagu.
33 Iya bejakuka pasal kayu enggau utai ti tumbuh, berengkah ari kayu sidar di Lebanon, nyentuk ngagai isop ti tumbuh ba dinding. Iya bejakuka pasal jelu, burung, ular enggau ikan.
34 Raja ari semua menua di dunya tu bela ninga berita pasal penemu-dalam ti dikembuan iya, lalu sida ngasuh orang mansang ngagai iya lalu mendingka iya.
 
Bagi 5
Solomon Sedia Deka Ngaga Rumah Sembiang
1 Raja Hiram ari Tire endang pangan David. Nya alai lebuh iya ninga berita Solomon udah nganti apai iya David nyadi raja, iya lalu ngasuh bala pengari iya betemu enggau Solomon.
2 Solomon lalu ngirumka pesan tu ngagai Hiram:
3 “Nuan nemu, apai aku David endang selalu beperang ngelaban munsuh ke nyerang ari menua ti ngelingi menua kami. Nya alai laban TUHAN apin ngasuh apai aku menang ngelaban semua munsuh iya, iya apin ulih ngaga rumah alai nyembah TUHAN Allah Taala iya.
4 Tang diatu, TUHAN Allah Taala aku udah meri aku pemaik di serata menua ti dipegai aku. Aku nadai munsuh, lalu aku enda agi diserang orang.
5 TUHAN udah besemaya ngagai apai aku David, ku Iya, ‘Anak nuan, ti deka diletak Aku nyadi raja nganti nuan, deka ngaga Rumah ke Aku.’ Nya meh kebuah aku diatu udah mutuska runding deka ngaga rumah alai nyembah TUHAN Allah Taala aku.
6 Nya alai, asuh meh bala nembiak nuan mansang ngagai Lebanon lalu nebang kayu sidar ke aku. Bala nembiak aku deka gawa enggau sida, lalu aku deka mayar gaji ngagai bala nembiak nuan nitihka penyampau ti diletak nuan ke sida siku-siku. Nuan nemu, bala nembiak aku enda landik baka bala nembiak nuan nebang kayu.”
7 Hiram gaga amat ati nerima pesan ari Solomon, lalu ku iya, “Pujika TUHAN sehari tu laban Iya udah meri ngagai David anak ti bepenemu-dalam baka nya nganti iya nyadi raja ke menua ti bekuasa baka nya!”
8 Udah nya Hiram lalu ngirumka pesan tu ngagai Solomon: “Aku udah nerima pesan nuan, lalu aku diatu sedia deka ngereja utai ti dipinta nuan. Aku deka meri ngagai nuan kayu sidar, enggau kayu pain.
9 Bala nembiak aku deka narit kayu nya ari menua Lebanon ngagai tasik, lalu deka ngaga sida nyadi akit lalu beraratka sida nebing tasik ngagai endur ti dipilih nuan. Dia bala nembiak aku deka muka akit nya, lalu bala nembiak nuan deka betanggungjawapka kayu nya. Lalu aku minta nuan meri pemakai ngagai bala nembiak aku.”
10 Hiram lalu meri Solomon semua batang sidar enggau batang pain ti dipeguna iya,
11 lalu Solomon meri ngagai Hiram 322,500 kilogram gandum enggau 400,000 liter minyak kana ti tulin genap taun, kena Hiram meri bala nembiak iya makai.
12 TUHAN ngamatka semaya Iya, lalu meri penemu-dalam ngagai Solomon. Hiram seduai Solomon diau bebaik enggau pangan diri, lalu seduai iya ngaga sempekat enggau pangan diri.
13 Raja Solomon ngambi 30,000 iku orang ari serata menua Israel bekereja ngena jalai pejal,
14 lalu ngasuh Adoniram nyadi tuai sida. Adoniram lalu magi sida ngagai tiga bengkah raban, 10,000 iku dalam siti-siti raban, lalu siti-siti raban bekereja sebulan di Lebanon, enggau dua bulan di menua diri.
15 Solomon mega ngasuh 80,000 iku orang netak batu di menua ti bebukit, enggau 70,000 iku orang mai batu nya,
16 lalu ngasuh 3,300 iku mandur nyadi tuai ngemataka pengawa sida.
17 Nitihka pesan Solomon, sida lalu ningkuh batu ti alus nyadika batu pemun Rumah Sembiang.
18 Bala orang ke bekereja ke Solomon seduai Hiram, enggau bala orang ke datai ari nengeri Gebal lalu nyendiaka batu enggau ramu kena ngaga Rumah Sembiang.
 
Bagi 6
Solomon Ngaga Rumah Sembiang
1 Empat ratus lapan puluh taun udah bekau orang Israel pansut ari menua Ejip, dalam taun ti keempat Solomon udah berengkah megai perintah di menua Israel, dalam bulan ti kedua, iya nya bulan Sib, Solomon lalu berengkah ngaga Rumah Sembiang.
2 Pemanjai iya, disukat ari dalam, 27 meter, buka iya 9 meter, lalu peninggi iya 13.5 meter.
3 Pemanjai bilik penama nya 4.5 meter, lalu buka iya 9 meter, ngemesai Endur ti Kudus empu.
4 Dinding Rumah Sembiang nya ditebuk, lalu lubang nya mit ari luar, besai ari dalam.
5 Dinding Rumah Sembiang ari luar, muak ari tisi sepiak-sepiak enggau ari belakang, digagaka tungking rumah ti tinggi tiga ringkat, peninggi seringkat 2.2 meter.
6 Bilik ti ba tingkat ti di baruh buka 2.2 meter, bilik ti ba tingkat ti kedua 2.7 meter buka, lalu ba tingkat ti di atas 3.1 meter buka. Dinding Rumah Sembiang nya mipau agi ba tingkat ti di atas, ari ba tingkat ti di baruh, ngambika siti-siti bilik nya duduk ba dinding, enda begunaka pengerat.
7 Batu ti dikena ngaga Rumah Sembiang udah digaga ba endur alai orang ke ngulihka batu nya empu, ngambika sida enda ibuh inggar bekenaka tukul, tauka kapak, tauka perengka besi ti bukai lebuh Rumah Sembiang nya benung digaga.
8 Pintu penama ngagai tingkat ti di baruh endar ke tungking rumah nya, nya muak ke tisi selatan Rumah Sembiang, lalu ari nya digagaka tangga nuju ngagai tingkat ti kedua enggau ketiga.
9 Nya meh jalai Raja Solomon nembuka pengawa begagaka Rumah Sembiang. Iya ngaga dek ke Rumah Sembiang ari papan kayu ara enggau papan kayu sidar.
10 Tungking ti tiga tingkat, siti-siti tingkat tinggi 2.2 meter, digaga nungking ba dinding luar Rumah Sembiang, lalu dilekatka ngagai dinding luar Rumah Sembiang nya ngena sanding ti digaga ari kayu sidar.
11 Ku TUHAN bejaku ngagai Solomon,
12 “Enti nuan ngasika semua adat enggau pesan Aku, Aku deka ngereja ke nuan utai ti udah disemaya Aku ngagai apai nuan David.
13 Aku deka diau enggau bala nembiak Aku dalam Rumah Sembiang ti digaga nuan tu, lalu Aku enggai sekali-kali ninggalka sida.”
14 Nya meh chara Solomon nembuka pengawa begagaka Rumah Sembiang nya.
 
Perengka Dalam Rumah Sembiang
15 Dinding ti muak ari dalam dilapis ngena papan kenyau ari geladak nyentuk ngagai dek, lalu geladak nya digaga ari kayu pain.
16 Bilik ti di dalam bendar, ti dikumbai Endur ti Pemadu Kudus, digaga di belakang Rumah Sembiang. Pemanjai iya 9 meter, lalu disapat ngena papan kayu sidar kenyau ari geladak nyentuk ngagai dek.
17 Bilik ti di mua Endur ti Pemadu Kudus nya panjai 18 meter.
18 Papan kayu sidar ti dalam Rumah Sembiang nya diukir enggau gamal randau enggau bungai. Semua dinding dalam Rumah Sembiang nya dilapis magang ngena kayu sidar, datai ke semua batu ti dikena ngaga dinding nya nadai ayan agi.
19 Di belakang Rumah Sembiang nya bisi digagaka sebuah bilik dalam, alai nyimpan Peti Lampang Batu Adat TUHAN.
20 Bilik ti di dalam tu nya panjai 9 meter, buka 9 meter, enggau peninggi 9 meter, lalu semua disampak magang enggau emas ti tulin. Alta nya disampak enggau papan kayu sidar.
21 Muak ari dalam, Rumah Sembiang nya disampak enggau emas. Rantai emas ditarikka meraka penama ngagai bilik ti di dalam. Bilik ti di dalam tu mega disampak enggau emas.
22 Semua utai dalam Rumah Sembiang disampak enggau emas magang, nyengkaum alta ti dalam Endur ti Pemadu Kudus.
23 Dua iku melikat cherub ti besayap, ke digaga ari kayu kana, siku-siku tinggi 4.4 meter, diengkahka dalam Endur ti Pemadu Kudus.
24-26 Dua iku melikat cherub tu sebaka pemesai, sebaka gamal. Siku-siku seduai nya bisi dua iti sayap. Lalu pemanjai siti-siti sayap nya 2.2 meter, ngambika penyauh ari puting sayap siti ngagai puting sayap siti nya 4.4 meter.
27 Melikat cherub ti dua iku tu diengkah berimbai enggau pangan diri dalam Endur ti Pemadu Kudus, ngambika puting sayap seduai iya betemu ba tengah-tengah bilik nya, lalu puting sayap seduai iya ari sepiak negu dinding bilik nya.
28 Dua iku melikat cherub ti besayap tu disampak enggau emas.
29 Dinding bilik besai enggau bilik ti di dalam semua diukir magang enggau gambar bala melikat cherub ti besayap, gambar kayu engkerema, enggau gambar bungai.
30 Indah geladak deh disampak enggau emas.
31 Pintu ti berimbai dua, ti digaga ari kayu kana, diengkahka ba penama ngagai Endur ti Pemadu Kudus. Puchuk penama tu digaga juring.
32 Pintu nya diukir enggau gambar bala melikat cherub ti besayap, gambar kayu engkerema, enggau gambar bungai. Pintu, melikat cherub ti besayap, enggau kayu engkerema nya disampak enggau emas.
33 Langkar pintu ti ba penama ngagai bilik besai nya besegi empat, lalu digaga ari kayu kana.
34 Pintu dia dua iti, belipat dua, digaga ari kayu pain
35 lalu diukir enggau gambar bala melikat cherub ti besayap, gambar kayu engkerema enggau bungai lalu disampak enggau emas, sama penebal.
36 Siti tengah laman bisi digaga di mua Rumah Sembiang, dikelingi dinding. Dinding nya digaga ari selapis kayu sidar beselat enggau tiga lapis batu.
37 Batu pemun ke Rumah Sembiang tu ditanam dalam bulan ti kedua, iya nya bulan Sib, keempat taun Solomon udah berengkah megai menua nya.
38 Dalam bulan ti kelapan, iya nya bulan Bul, kesebelas taun Solomon udah berengkah megai menua nya, Rumah Sembiang nya lalu tembu digaga, betul-betul nitihka pelan. Pengelama Solomon ngaga Rumah Sembiang nya tujuh taun.
 
Bagi 7
Istana Solomon
1 Solomon mega ngaga istana ke iya empu. Pengelama iya ngaga istana nya tiga belas taun.
2-3 Pemanjai balai ti dikumbai Balai Utan Menua Lebanon nya 44 meter, buka iya 22 meter, lalu peninggi iya 13.5 meter. Balai nya bisi tiga iti rintai tiang ti besai ti digaga ari kayu sidar, lima belas batang tiang dalam siti-siti rintai, lalu bisi pengerat ti digaga ari kayu sidar nyengkar ba puchuk tiang nya. Dek nya digaga ari kayu sidar, ti nyengkar ari atas bilik alai nyimpan reta tengkira. Dek tu dipanggaika ba pala tiang nya.
4 Ba dua iti dinding bisi tiga rintai jenila.
5 Lubang pintu enggau lubang jenila bisi langkar ti besegi empat, lalu tiga iti rintai jenila ba dinding ti sepiak betapak enggau jenila ti ari sepiak.
6 Nyadi balai ti dikumbai Balai Tiang nya panjai 22 meter, lalu buka iya 13.5 meter. Balai nya bisi siti serambi ti ditungkat ngena tiang.
7 Bilik alai kerusi diraja, ti mega dikumbai Balai Pechara, alai Solomon ngatur pechara, didinding ngena papan kayu sidar kenyau ari geladak nyentuk ngagai perabung.
8 Rumah Solomon empu, ti ba siti tengah laman di belakang Balai Pechara, digaga baka rumah ti bukai. Iya mega ngaga rumah ti sebaka enggau nya ke bini iya, iya nya anak indu raja menua Ejip.
9 Semua rumah nya, enggau tengah laman ti besai digaga ari batu ti manah, berengkah ari batu pemun nyentuk ngagai kaki atap. Batu nya disediaka ba endur alai orang ke ngulihka batu, lalu ditetak ngena penyayat nitihka sukat ti diguna.
10 Batu pemun ke rumah nya digaga ari batu ti besai ti disediaka ba endur alai orang ke ngulihka batu. Sekeda batu nya 3.5 meter panjai, sekeda 4 meter.
11 Batu ti bukai, ti udah ditetak nitihka pemesai ti diguna, diengkahka ba atas batu ti besai nya, sama enggau sengkar ti digaga ari kayu sidar.
12 Dinding ke tengah laman istana, enggau tengah laman dalam Rumah Sembiang, enggau dinding ke bilik penama ngagai Rumah Sembiang, digaga ari selapis papan kayu sidar beselat enggau tiga lapis batu ti udah ditetak.
 
Pengawa Huram
13 Raja Solomon mesanka orang siku ke benama Huram. Huram tu tukang ke diau di nengeri Tire. Iya landik begagaka utai ari temaga.
14 Niang apai iya datai ari Tire. Lalu apai iya mega landik begagaka utai ari temaga. Indai iya datai ari raban bansa Naptali. Huram tu tukang ke pandai sereta lama udah begagaka utai nya. Nya alai iya nyambut pinta raja ke ngasuh iya nyadi tuai semua orang ke bekereja begagaka utai ari temaga.
 
Tiang Temaga Ti Dua Iti
15 Huram ngaga dua iti tiang temaga ngena chuan. Peninggi siti-siti tiang nya 8 meter, lalu sakap iya 5.3 meter. Tiang nya didirika iya ba penama ngagai Rumah Sembiang.
16 Iya mega ngaga dua iti tutup tiang ari temaga. Peninggi siti-siti tutup nya 2.2 meter. Tutup tu diengkahka ba puchuk tiang nya.
17 Puchuk tiang dua iti nya diukir ngena ukir ti baka rantai
18 enggau dua iti rintai buah delima ti digaga ari temaga.
19 Tutup tiang nya baka gamal bungai bakung, tinggi 1.8 meter,
20 ti dilekatka ngelingi tiang ti segala nya, ari atas ukir ti baka rantai. Dua ratus igi buah delima, berintai dua, melit siti-siti puchuk tiang nya.
21 Huram nirika tiang temaga dua batang nya ba penama ngagai Rumah Sembiang. Tiang ti muak ke selatan nya dikumbai Jachin  lalu tiang ti muak ke utara nya dikumbai Boas.
22 Tutup pala tiang ti digaga ari temaga ti baka gamal bungai bakung nya diengkahka ba pala tiang nya. Nya alai pengawa ngaga tiang nya tembu.
 
Tangki Ti Digaga Ari Temaga
23 Huram ngaga siti tangki ti segala ari temaga. Penalam iya 2.2 meter, buka iya 4.4 meter, lalu sakap iya 13.2 meter.
24 Ngelingi tisi tangki nya ari luar, bisi dua iti rintai buah labu ti digaga ari temaga. Buah tu digaga sama selajur enggau tangki nya empu.
25 Tangki nya duduk ba belakang dua belas iku sapi ti lelaki ti digaga ari temaga, ti nguing tunga ke luar, tiga iku nunga ke selatan, tiga nunga ke timur, tiga nunga ke utara, lalu tiga nunga ke barat.
26 Penebal tangki nya 75 milimeter. Lilit tisi iya baka lilit tisi mangkuk, nyerindak ke luar baka kuntum bungai bakung. Tangki nya ulih ngundan kira 40,000 liter.
 
Kerita Temaga
27 Huram mega ngaga sepuluh buah kerita tarit ari temaga. Genap buah kerita nya 1.8 meter panjai 1.8 meter buka, enggau 1.3 meter peninggi.
28 Kerita nya digaga ari papan ti besegi empat, ti dilekatka ba langkar,
29 enggau gambar singa, sapi ti lelaki, enggau melikat cherub ti besayap diukirka ba papan nya. Lalu ba langkar ti ari atas enggau ari baruh singa, enggau sapi ti lelaki, bisi ukir ti bebelit.
30 Genap kerita nya bisi kaki temaga. Ba empat iti sukut bisi tiang alai ngengkahka bisin. Tiang nya dilagu ngena ukir ti bebelit.
31 Ba puchuk tiang nya bisi siti langkar ti segala alai ngengkahka bisin. Peninggi langkar nya ari atas kerita nya 44 sentimeter, enggau 22 sentimeter masuk ngagai kerita nya.
32 Peninggi kaki kerita nya 66 sentimeter. Kaki nya ari baruh dinding kerita nya, lalu utai ti alai kaki nya lekat, digaga selajur enggau kerita nya empu.
33 Kaki kerita nya baka kaki kerita perang. Semua perengka kaki kerita nya digaga ari temaga magang.
34 Di baruh empat iti sukut ke kerita nya bisi empat iti tungkat. Tungkat tu mega digaga selajur enggau temaga ti dikena ngaga kerita nya.
35 Puchuk siti-siti kerita nya bisi lilit. Buka siti-siti lilit nya 22 sentimeter. Tiang tungkat, enggau dinding kerita nya digaga selajur enggau kerita nya empu.
36 Tiang tungkat, enggau dinding ke kerita nya dilagu ngena gambar bala melikat cherub ti besayap, gambar singa, gambar kayu engkerema, ba sebarang endur ti bisi lapang alai ngengkahka sida, lalu dikelingi enggau ukir ti bebelit.
37 Nya meh chara kerita nya digaga. Semua kerita nya sebaka magang, sama sebaka pemesai, sama sebaka gaya.
38 Huram mega ngaga sepuluh iti bisin, siti bisin ke siti-siti kerita. Siti-siti bisin nya buka 1.8 meter, lalu ulih ngundan lapan ratus liter.
39 Iya ngengkahka lima buah kerita nya ba rusuk selatan Rumah Sembiang, enggau lima buah ti bukai ba rusuk utara. Tangki nya diengkahka iya ba sukut selatan.
 
Pekekas Ti Dikena Dalam Rumah Sembiang
40-45 Huram mega ngaga periuk, sandak enggau mangkuk. Iya nembuka semua pengawa iya ke begagaka pekekas ke Rumah Sembiang ke Raja Solomon. Tu utai ti udah digaga iya:
 Dua batang tiang.
 Dua iti tutup tiang ti baka mangkuk, ti diengkah ba atas puchuk tiang.
 Ukir rantai ti besulam ba tutup tiang.
 Empat ratus igi buah delima ari temaga, dua iti rintai ngelingi siti-siti tutup tiang, empat ratus igi ba siti-siti rintai.
 Sepuluh buah kerita tarit.
 Sepuluh iti bisin.
 Sigi tangki.
 Dua belas iku sapi ti lelaki alai tangki nya duduk.
 Periuk, sandak, enggau mangkuk.
Semua perengka ke Rumah Sembiang, ti digaga Huram ke Raja Solomon, digaga magang ari temaga ti udah dipugar.
46 Raja ngasuh semua utai nya digaga ba endur alai orang ke ngeluluhka besi, ba entara Sukut enggau Saretan, di Lebak Jordan.
47 Solomon nadai ngasuh orang nimbang utai ti digaga ari temaga nya, laban utai nya kelalu mayuh. Nya alai semua utai nya nadai ditimbang.
48 Solomon mega ngasuh orang ngaga pekekas ari emas ke Rumah Sembiang. Pekekas nya nyengkaum alta, mija alai engkah roti ti diberi ngagai Allah Taala,
49 sepuluh iti penuduk lampu, ti bediri di mua Endur ti Pemadu Kudus, lima muak ke selatan, enggau lima muak ke utara, bungai, lampu, penyepit,
50 mangkuk, utai ti dikena madamka lampu, mangkuk, pinggai alai engkah menyan, enggau talam kena mai bara api, insil pintu ke Endur ti Pemadu Kudus, enggau insil ke pintu luar ke Rumah Sembiang. Semua perengka tu digaga ari emas magang.
51 Lebuh Raja Solomon udah nembuka semua pengawa begagaka Rumah Sembiang, iya lalu nyimpan semua utai ti udah diserahka apai iya David ngagai TUHAN, dalam bilik ti alai nyimpan semua utai. Utai nya nyengkaum pirak, emas enggau utai bukai.
 
Bagi 8
Peti Lampang Batu Adat Dibai Ngagai Rumah Sembiang
1 Udah nya Raja Solomon lalu mesanka semua tuai raban bansa enggau tuai peturun orang Israel datai ngagai iya di Jerusalem laban iya deka mai Peti Lampang Batu Adat TUHAN ari Sion, iya nya nengeri David, ngagai Rumah Sembiang.
2 Semua sida lalu begempuru lebuh Gawai Belangkau dalam bulan ti ketujuh, iya nya bulan Etanim.
3 Lebuh semua bala tuai udah begempuru magang, bala imam lalu ngesan Peti Lampang Batu Adat
4 lalu mai iya ngagai Rumah Sembiang. Bala orang Lewi enggau bala sida imam mega mindahka Langkau Kain TUHAN, enggau semua pekekas Langkau Kain nya ngagai Rumah Sembiang.
5 Raja Solomon enggau semua orang Israel begempuru di mua Peti Lampang Batu Adat nya, lalu meri mayuh jelu bedus enggau jelu sapi nyadika piring, datai ke sida nyau enda ulih diitung agi.
6 Udah nya bala imam lalu mai Peti Lampang Batu Adat nya ngagai Rumah Sembiang, lalu ngengkahka iya ba Endur ti Pemadu Kudus, di baruh melikat cherub ti besayap.
7 Sayap ti dikerembaika dua iku melikat cherub nya mungkur Peti enggau kayu ti dikena ngesan Peti nya.
8 Puting kayu nya ulih dipeda orang ke bediri di mua Endur ti Pemadu Kudus, tang enda ulih dipeda ari endur bukai. (Kayu ti dikena ngaling peti nya agi mengkang dia nyentuk ngagai sehari tu.)
9  Utai bukai nadai disimpan dalam Peti Lampang Batu Adat nya, kelimpah ari dua iti lampang batu ti udah diengkah Moses dalam Peti nya ba Bukit Sinai, lebuh TUHAN ngaga sempekat enggau orang Israel, lebuh sida pansut ari menua Ejip.
10  Lebuh bala imam ninggalka Rumah Sembiang nya, mua hari lalu tekala nya ngemenuhka Rumah nya
11 datai ke sida imam nyau enda ulih bekereja dalam Rumah Sembiang nya ketegal mua hari nya; laban mulia TUHAN ngemenuhka Rumah Sembiang nya.
12 Udah nya Solomon lalu besampi: “Nuan, TUHAN, udah ngengkahka mata hari di langit, tang taja pia, Nuan milih mua hari enggau pemetang alai Nuan diau.
13 Diatu aku udah ngaga Rumah Sembiang ti manah tu ke Nuan, alai Nuan diau belama iya.”
 
Jaku Solomon Ngagai Orang Mayuh
14 Lebuh orang mayuh agi benung bediri dia, Raja Solomon lalu nguing ngagai sida, lalu minta Allah Taala merekatka sida.
15 Ku iya bejaku, “Pujika TUHAN Allah Taala ke disembah orang Israel! Iya udah ngamatka semaya ti udah digaga Iya enggau apai aku David, lebuh Iya madahka ngagai David,
16  ‘Kenyau ari lebuh Aku mai bala nembiak Aku pansut ari menua Ejip, Aku apin milih nengeri di serata menua Israel, alai Rumah Sembiang patut digaga, alai kita deka nyembah Aku. Tang Aku milih nuan, David, merintah bala nembiak Aku.’ “
17 Ku Solomon nampung sampi iya, “Apai aku David udah bekira deka ngaga Rumah Sembiang alai orang tau nyembah TUHAN Allah Taala ke disembah orang Israel,
18 tang ku TUHAN bejaku ngagai iya, ‘Ngena amat nuan bisi ati deka ngaga Rumah Sembiang ke Aku,
19 tang ukai nuan ti deka ngaga Rumah Sembiang nya. Anak nuan, anak nuan empu, ti deka ngaga Rumah Sembiang nya ke Aku.’
20 “Diatu TUHAN udah ngamatka semaya Iya. Aku udah nganti apai aku nyadi raja menua Israel, lalu aku udah ngaga Rumah Sembiang alai TUHAN Allah Taala ke disembah orang Israel deka disembah.
21 Aku mega udah nyendiaka siti endur dalam Rumah Sembiang alai ngengkahka Peti Lampang Batu Adat ti ngundan lampang batu sempekat. Sempekat nya udah digaga TUHAN enggau bala aki ini kitai, lebuh Iya mai sida pansut ari menua Ejip.”
 
Sampi Solomon
22 Udah nya, di mua orang mayuh, Solomon lalu mansang bediri di mua alta. Iya ngangkatka jari iya
23 lalu besampi, “TUHAN Allah Taala ke disembah orang Israel, nadai petara bukai ti baka Nuan, nemuka di serega di atas tauka di dunya di baruh! Nuan ngamatka sempekat Nuan enggau bala nembiak Nuan, lalu ngayanka pengerindu Nuan ke sida, lebuh sida ngasika Nuan enggau pengabis ati sida.
24 Nuan udah ngamatka semaya ti udah digaga Nuan enggau apai aku David. Sehari tu semua jaku nya udah dikamatka magang.
25 Nya alai diatu, TUHAN Allah Taala ke disembah orang Israel, aku besampi minta Nuan mega ngamatka semaya ti udah digaga Nuan enggau apai aku David, lebuh Nuan madahka siku ari peturun iya deka merintah nyadi raja di menua Israel, asal ga sida bejimat ngasika Nuan baka iya.
26 Nya alai, O Allah Taala ke disembah orang Israel, awakka semua utai ti udah disemaya Nuan ngagai apai aku David, dikamatka magang.
27 “Tang kati Nuan, O Allah Taala, amat ulih diau di dunya tu? Indah semua serega deh enda chukup alai Nuan diau. Nya alai, baka ni ku Rumah Sembiang tu, ti udah digaga aku, tau chukup alai Nuan diau?
28 TUHAN Allah Taala aku, aku tu nembiak Nuan. Pendingka sampi aku, lalu saut meh sampi ti disebut aku ngagai Nuan sehari tu.
29 Jaga meh Rumah Sembiang tu siang malam, endur ti udah dipilih Nuan alai Nuan deka disembah. Dingaka aku, lebuh aku ngadap ngagai Rumah Sembiang tu, lalu besampi.
30 Dingaka sampi aku, enggau sampi bala nembiak Nuan, lebuh sida ngadap ngagai endur tu, lalu besampi. Dingaka kami ari rumah Nuan di serega, lalu ampun meh kami.
31 “Lebuh orang kena dawa laban sida ngereja utai ti salah ngagai pangan diri, lalu dibai ngagai alta Nuan dalam Rumah Sembiang tu ngambika iya besumpah madahka diri nadai penyalah,
32 pendingka bala nembiak Nuan ari serega, O TUHAN, lalu akim meh iya. Ukum meh sapa ke salah, nitihka penyalah iya, lalu lepaska orang ke nadai penyalah.
33 “Lebuh bala nembiak Nuan Israel alah laban munsuh ketegal sida udah bedosa ngelaban Nuan, lalu lebuh sida nguing lalu datai ngagai Rumah Sembiang tu enggau ati ti baruh lalu besampi minta pengampun,
34 pendingka sida ari serega. Ampun dosa bala nembiak Nuan, lalu bai sida pulai baru ngagai menua ti udah diberi Nuan ngagai aki ini sida.
35 “Lebuh Nuan nagang hari ujan, ketegal bala nembiak Nuan udah bedosa ngelaban Nuan, lalu lebuh sida nesal ati lalu ngadap ngagai Rumah Sembiang tu enggau ati ti baruh lalu besampi ngagai Nuan,
36 pendingka sida ari serega. Ampun dosa raja enggau orang Israel, lalu ajar sida ngereja utai ti ngena. Udah nya, TUHAN, asuh hari ujan ba menua Nuan tu, ti udah diberi Nuan ngagai bala nembiak Nuan, nyadika pesaka sida belama iya.
37 “Lebuh lapar pungkang nyadi di menua tu, tauka penyakit bisi berampit, tauka utai ti ditanam bisi rusak laban ribut ti angat, tauka diserang raban buntak, tauka bala nembiak Nuan kena serang munsuh, tauka penyakit tauka pemedis bisi nyadi ba bala sida,
38 pendingka sampi sida. Enti orang Israel bisi ngangkatka jari besampi ngadap ngagai Rumah Sembiang tu, enggau ati ti tusah,
39 dingaka sampi sida. Dingaka sida ari rumah Nuan di serega, ampun sida, lalu tulung sida, laban semina Nuan siku aja ke nemu utai ti dalam ati mensia. Kereja meh utai ba siku-siku kami nitihka pematut,
40 ngambika bala nembiak Nuan seruran ngasika Nuan lebuh sida diau di menua ti udah diberi Nuan ngagai aki ini sida.
41-42 “Lebuh orang bansa bukai ke diau jauh di menua bukai, ninga pemanah berita pasal Nuan, enggau pasal utai ti besai ti udah dikereja Nuan ke bala nembiak Nuan, lalu iya datai nyembah Nuan, lalu besampi ba Rumah Sembiang tu,
43 pendingka sampi iya. Dingaka iya ari serega, alai Nuan ti diau, lalu kereja meh utai ti dipinta iya ari Nuan, ngambika semua orang di dunya tu nemu Nuan, lalu ngasika Nuan, baka bala nembiak Nuan orang Israel. Nya baru sida deka nemu, Rumah Sembiang ti udah digaga aku ba endur tu nya alai Nuan patut disembah.
44 “Lebuh Nuan ngasuh bala nembiak Nuan mansang beperang ngelaban munsuh sida, lalu sida besampi ngagai Nuan, di sebarang endur sida diau lalu nguingka diri tunga ngagai nengeri tu, ti udah dipilih Nuan alai Rumah Sembiang tu udah digaga aku ke Nuan,
45 pendingka sampi sida. Dingaka sida ari serega, lalu asuh sida menang.
46 “Lebuh bala nembiak Nuan bedosa ngelaban Nuan, laban nadai siku mensia ti enda bedosa, lalu Nuan ringat, lalu ngasuh munsuh sida ngalahka sida lalu nabanka sida nyadi orang tangkap ngagai menua bukai, taja pen menua nya jauh,
47 pendingka sampi bala nembiak Nuan. Enti di menua nya sida nesal ati, lalu besampi ngagai Nuan, ngaku pemesai penyalah enggau penyai sida, dingaka sampi sida, O TUHAN.
48 Enti di menua nya sida amat bebendar nesal ati lalu besampi ngagai Nuan, lebuh sida malik tunga ngagai menua tu ti udah diberi Nuan ngagai aki ini sida, tunga ngagai nengeri tu ti udah dipilih Nuan, enggau tunga ngagai Rumah Sembiang tu ti udah digaga aku ke Nuan,
49 pendingka sampi sida. Dingaka sida ari Rumah Nuan di serega, lalu ampun sida.
50 Ampun semua dosa sida, enggau penyalah sida ke udah angkat ngelaban Nuan, lalu asuh munsuh sida nelap enggau sida.
51 Sida tu bala nembiak Nuan Empu, ti udah dibai Nuan pansut ari menua Ejip, menua alai sida ke udah balat diperinsa.
52 “TUHAN ti Pemadu Tinggi, awakka Nuan seruran kasihka bala nembiak Nuan enggau raja sida, lalu dingaka sampi sida, lebuh sida ngangauka Nuan.
53 Nuan udah milih sida ari semua bansa, ngambika sida nyadi nembiak Nuan, munyi ti udah dipadahka Nuan ngagai sida ngena Moses, lebuh Nuan mai bala aki ini sida pansut ari menua Ejip.”
 
Sampi Ti Penudi
54 Lebuh Solomon udah badu besampi ngagai TUHAN, iya bediri di mua alta, alai iya ti udah besugang ngangkatka jari iya.
55 Iya bejaku enggau nyawa ti inggar minta Allah Taala meri berekat ngagai semua orang ke begempuru dia. Ku iya,
56 “Pujika TUHAN ti udah meri pemaik ngagai bala nembiak Iya, munyi ti udah disemaya Iya. Iya udah ngamatka semua semaya ti udah digaga Iya nengah nembiak Iya Moses.
57 Awakka TUHAN Allah Taala kitai diau enggau kitai, baka Iya ti udah begulai enggau bala aki ini kitai. Awakka Iya enda ngelengkaka kitai, tauka ninggalka kitai.
58 Awakka Iya ngasuh kitai ngasika Iya, ngambika kitai deka seruran diau nitihka gaya ti dikedekaka Iya, ngasika semua adat enggau pesan ti diberi Iya ngagai aki ini kitai.
59 Awakka TUHAN Allah Taala kitai seruran ingatka sampi tu enggau peminta ti udah dibai aku ngagai Iya. Awakka Iya seruran ngampun bala nembiak Iya orang Israel, enggau raja sida, nitihka utai ti diguna sida tiap hari.
60 Nya baru semua bansa deka nemu, semina TUHAN siku aja ti Allah Taala, lalu nadai petara bukai.
61 Awakka kita ke nembiak Iya, seruran tetap ati ngagai TUHAN Allah Taala kitai, ngasika semua adat enggau pesan Iya, baka ke dikereja kita sehari tu.”
 
Nyerahka Rumah Sembiang
62 Udah nya Raja Solomon enggau semua orang mayuh ke bisi dia lalu ngenjuk piring ngagai TUHAN.
63 Raja Solomon meri 22,000 iku sapi enggau 120,000 iku jelu bedus nyadika piring pemaik. Nya meh chara raja enggau semua orang mayuh nyerahka Rumah Sembiang nya.
64 Ba hari nya mega iya nyerahka endur ti ba tengah laman nya ngagai TUHAN, iya nya endur ti di mua Rumah Sembiang, lalu udah nya ngenjuk piring tunu segala ba endur nya, piring tepung, enggau lemak ari jelu nyadika piring pemaik. Iya ngereja nya laban alta ti digaga ari temaga nya kelalu mit, lalu enda ulih ngundan semua piring nya.
65 Rumah Sembiang nya meh endur alai Solomon enggau semua orang Israel ngerami Gawai Belangkau tujuh hari. Mayuh amat orang datai. Sida datai ari Lebo-hamat di utara, nyentuk ngagai ari gari entara menua enggau orang Ejip di selatan.
66 Ba hari ti kelapan, Solomon lalu ngasuh orang mayuh pulai. Semua sida bela muji Solomon, lalu pulai enggau ati ti lantang, ketegal semua berekat ti udah diberi TUHAN ngagai nembiak Iya David, enggau ngagai bala nembiak Iya orang Israel.
 
Bagi 9
Allah Taala Pegari Baru Ngagai Solomon
1 Lebuh Raja Solomon udah tembu ngaga Rumah Sembiang, enggau istana, enggau semua utai bukai ti deka digaga iya,
2 TUHAN lalu pegari baru ngagai iya, baka ke nyadi di Gibeon.
3 Ku TUHAN bejaku ngagai iya, “Aku udah ninga sampi nuan. Aku udah nguduska Rumah Sembiang tu ti udah digaga nuan nyadi endur alai kita deka nyembah Aku belama iya. Aku deka ngemataka endur tu, lalu nyaga iya belama iya.
4 Enti nuan deka betuaika Aku ngena ati ti betul sereta rentang, baka apai nuan David, lalu enti nuan ngasika adat Aku, lalu ngereja semua utai ti udah dipadahka Aku ngagai nuan,
5 Aku deka ngamatka semaya ti udah digaga Aku enggau apai nuan David, lebuh Aku madahka orang Israel deka diperintah bala peturun iya.
6 Tang enti nuan, tauka peturun nuan badu agi nitihka Aku, enda ngasika adat enggau jaku ti dipesanka Aku ngagai nuan, lalu nyembah petara bukai,
7 Aku deka muai bala nembiak Aku orang Israel ari menua ti udah diberi Aku ngagai sida. Aku deka mega ninggalka Rumah Sembiang tu, ti udah dikuduska Aku alai kita deka nyembah Aku. Orang di semua endur deka ngelanyaika orang Israel, lalu enda bebasaka sida.
8 Rumah Sembiang tu deka nyadi tembawai, lalu semua orang ke mansa deka tekenyit sereta alit ati. ‘Nama kebuah TUHAN ngereja utai tu ngagai menua tu, enggau ngagai Rumah Sembiang tu?’ ku sida deka nanya.
9 Orang deka nyaut, ‘Laban sida udah ninggalka TUHAN Allah Taala sida ke udah mai aki ini sida pansut ari menua Ejip. Sida udah arapka lalu nyembah petara bukai. Nya kebuah TUHAN udah ngasuh penusah ti besai tu ninggang sida.’ “
 
Sempekat Solomon Enggau Hiram
10 Solomon ngaga Rumah Sembiang enggau istana iya empu dua puluh taun.
11 Raja Hiram di Sidon udah meri ngagai iya semua kayu sidar enggau kayu pain enggau semua emas ti diguna iya kena iya ngereja pengawa nya. Lebuh pengawa nya udah tembu, Raja Solomon meri ngagai Hiram dua puluh buah nengeri di menua Galili.
12 Hiram mansang meda nengeri nya, lalu iya enda rinduka nengeri nya.
13 Nya alai ku iya bejaku enggau Solomon, “Kati tu nengeri ti diberi nuan ngagai aku, menyadi!” Nya kebuah menua nya dikumbai Kabul nyentuk ngagai diatu.
14 Hiram udah ngirumka nyau deka bulih 5 tan emas ngagai Solomon.
 
Utai Bukai Ti Dikereja Solomon
15 Raja Solomon mejalka orang ngaga Rumah Sembiang enggau istana, nambun tanah ba tisi timur nengeri nya, lalu ngaga dinding kuta ke nengeri nya. Iya mega mejalka sida ngaduka nengeri Hasor, Megido, enggau Geser. (
16 Raja menua Ejip endang udah nyerang lalu ngalahka nengeri Geser, munuh orang ke diau dia, lalu nunu nengeri nya. Udah nya iya lalu meri nengeri nya nyadika derian ngagai anak indu iya lebuh anak indu iya jadi enggau Solomon,
17 lalu Solomon nirika nengeri nya baru.) Solomon mega mejalka bala orang ngaduka nengeri Bet-horon Ili,
18 Baalat, Tamar ti di menua puang dalam menua Judah,
19 nyadi endur alai iya nyimpan semua utai ti diguna iya, alai iya nyimpan kuda enggau kerita perang iya, enggau semua utai bukai ti diguna iya kena iya ngaga utai di Jerusalem, di Lebanon, enggau ba endur bukai dalam menua ti dipegai iya.
20-21 Nyadi orang ke dipejalka Solomon bekereja ke iya nya peturun orang Kanaan, ti enda dibunuh orang Israel lebuh sida ngerampas menua nya. Orang Kanaan nyengkaum orang Amor, orang Iti, orang Peris, orang Ibi, enggau orang Jebus. Peturun sida tu mengkang nyadi ulun nyentuk ngagai sehari tu.
22 Solomon nadai ngaga orang Israel nyadi ulun iya. Sida nyadi bala soldadu iya, nyadi bala pemesai, tuai soldadu, orang ke nyadi kepala ke orang ke nepan kerita perang iya, enggau nyadi soldadu ke nepan kuda.
23 Lima ratus lima puluh iku pemesai nyadi kepala ngemataka bala orang ke dipejalka Solomon gawa begagaka rumah iya.
24 Solomon nambun tanah ba tisi ti muak ke timur nengeri nya, udah bekau bini iya, iya nya anak indu raja menua Ejip, ke mindah ari Nengeri David ngagai istana ti udah digaga Solomon ke iya.
25 Tiga kali dalam setaun Solomon ngenjuk piring tunu enggau piring pemaik, ba alta ti udah digaga iya ke TUHAN. Iya mega nunu menyan ke TUHAN. Nya meh chara iya nembuka Rumah Sembiang.
26 Raja Solomon mega ngaga berapa buah kapal di Esion-geber, enda jauh ari Elat ba tebing Teluk Akaba, di menua Edom.
27 Raja Hiram ngirumka bala kelasi ke bisi peneleba ari berapa buah kapal iya empu, ngambika sida bekereja enggau bala Solomon.
28 Sida belayar ngagai menua Opir, lalu mai ngagai Solomon kira 16 tan emas.
 
Bagi 10
Penemuai Kuin Menua Sheba
1 Lebuh kuin menua Sheba ninga Solomon tebilang amat nama, iya lalu mansang ngagai Jerusalem deka nguji Solomon ngena tanya ti mar disaut.
2 Kuin nya mai mayuh bala pengiring, enggau raban jelu unta ti mai rempah, batu ti berega, enggau mayuh emas. Lebuh iya betemu enggau Solomon, iya lalu mantaika semua tanya ti dalam runding iya, ngagai Solomon.
3 Solomon nyaut semua tanya nya. Nadai utai ti enda ulih diterangka Solomon.
4 Kuin menua Sheba mendingka penemu-dalam ti disebut Solomon, lalu meda istana ti udah digaga iya.
5 Kuin nya meda pemakai ti disediaka ba mija Solomon, rumah alai bala pemesai iya diau, chara bala orang ke bekereja dalam istana nya diatur, enggau pekayan ti dikena sida, bala orang gaji ke bekereja ke iya lebuh iya ngintu pengerami makai besai, enggau piring ti diberi iya ba Rumah Sembiang. Kuin nya nyau alit ati.
6 Ku iya bejaku enggau Raja Solomon, “Utai ti udah didinga aku di menua aku empu pasal nuan enggau penemu-dalam ti dikembuan nuan, endang amat magang!
7 Tang aku enda arapka nya, sebedau aku empu datai lalu meda semua utai nya ke diri empu. Tang utai ti udah didinga aku nya ukai setengah ari utai ti dipeda enggau didinga aku. Penemu-dalam ti dikembuan nuan enggau pengaya nuan jauh besai agi ari utai ti udah dipadahka orang ngagai aku.
8 Naka meh penguntung bala bini nuan! Naka meh penguntung bala orang gaji nuan, ke seruran di mua nuan, lalu seruran bisi peluang mendingka penemu-dalam ti dibantaika nuan!
9 Pujika TUHAN Allah Taala nuan! Iya udah ngayanka pemesai pengaga ati Iya ke nuan, lebuh Iya ngaga nuan nyadi raja menua Israel. Laban pengerindu Iya ke orang Israel endang meruan belama iya, Iya udah ngaga nuan nyadi raja sida, ngambika nuan bejalaika atur ti lurus sereta betul.”
10 Kuin nya lalu meri Raja Solomon pemeri ti udah dibai iya. Pemeri nya nyengkaum nyau deka bulih lima tan emas, mayuh amat rempah, enggau batu ti berega. Pemayuh rempah ti diberi iya ngagai Solomon nya jauh mayuh agi ari ti udah kala diterima Solomon sekali. (
11 Kapal Raja Hiram, ti udah mai emas ari Opir, mega mai ari menua nya mayuh kayu juniper enggau batu ti berega.
12 Solomon ngena kayu nya begagaka lalau dalam Rumah Sembiang enggau dalam istana, enggau begagaka belikan, enggau engkeratung ke bala orang ke nebah musik. Kayu juniper nya kayu juniper ti pemadu manah udah kala dibeli menua Israel ari menua bukai. Nadai kayu ti ngemanah nya agi bisi dipeda udah lepas nya.)
13 Raja Solomon, enggau ati ti gerah mudah, lalu meri ngagai kuin menua Sheba semua utai ti dipinta kuin nya, nambahka pemeri bukai ti diberi Solomon ngagai iya. Udah nya kuin nya enggau bala pengiring iya lalu mulaika diri ngagai menua Sheba.
 
Pengaya Raja Solomon
14 Raja Solomon nerima lebih 25 tan emas tiap taun,
15 nambahka chukai  ti dibayar orang dagang, untung ari pengawa dagang, enggau chukai ti dibayar bala raja bansa Arab, enggau ari bala gabenor ke megai pelilih menua di menua Israel.
16 Solomon ngaga dua ratus iti terabai ti besai. Genap iti terabai nya disampak enggau kira 7 kilogram emas.
17 Iya mega ngaga tiga ratus iti terabai ti mit agi, nyampak genap iti terabai nya enggau kira dua kilogram emas. Semua terabai nya diengkah iya dalam Balai Utan Menua Lebanon.
18 Iya mega ngasuh orang ngaga siti kerusi diraja ti besai. Kerusi nya disampak enggau gading, sereta enggau emas ti tulin.
19-20 Enam iti tangkal tangga digaga nuju ngagai kerusi diraja nya. Ba dua iti puting ke genap iti tangkal nya bisi gamal jelu singa, dua belas iku semua iya. Di belakang kerusi diraja nya bisi siti gamal pala jelu sapi, lalu ngimbai dua iti tisi kerusi nya, ba endur alai ti manggaika lengan, bisi gamal singa. Nadai menua bukai bisi kerusi diraja ti baka nya.
21 Semua mangkuk ti dikena Solomon ngirup digaga ari emas magang, lalu semua pekekas dalam Balai Utan Lebanon digaga ari emas ti tulin magang. Pirak endang enda dikena, laban orang ngumbai pirak enda berega lebuh maya Solomon menya.
22 Iya mayuh kapal ti tau belayar ba tasik, lalu kapal nya belayar sama enggau kapal Hiram. Kapal iya pulai tiap tiga taun, mai emas, pirak, gading, nyumbuh enggau kera.
23 Raja Solomon lebih agi kaya, sereta dalam agi penemu ari semua raja bukai,
24 lalu semua dunya bisi ati deka datai lalu mendingka penemu-dalam ti udah diberi Allah Taala ngagai iya.
25 Genap iku orang ke datai bela mai pemeri ngagai iya. Pemeri nya nyengkaum pirak, emas, baju ti panjai, senyata, rempah, kuda, enggau keledai. Utai tu nyadi tiap-tiap taun.
26 Solomon bisi seribu empat ratus buah kerita perang, enggau dua belas ribu iku kuda kena beperang. Sekeda sida nya disimpan iya di Jerusalem, lalu sida ti bukai diasuh iya bepalan ba nengeri bukai.
27 Lebuh maya Solomon nyadi raja, pirak nyau mayuh baka batu, lalu kayu sidar nyau ngemayuh kayu sikamur ba kaki bukit menua Judah.
28 Orang dagang ke bekereja ke raja diberi kuasa meli kuda ari menua Musri  enggau Silisia,
29 enggau meli kuda ari menua Ejip. Sida lalu nyual kuda enggau kerita perang nya ngagai raja orang Iti enggau raja orang Siria, ngena rega 600 singkap pirak ke sebuah kerita perang, enggau 150 singkap pirak ke siku kuda.
 
Bagi 11
Raja Solomon Ninggalka TUHAN
1 Solomon rinduka mayuh indu orang bansa bukai. Kelimpah ari anak indu raja menua Ejip, iya mega jadi enggau indu orang Iti, indu orang Moap, Amon, Edom, enggau Sidon.
2 Iya jadi enggau sida taja pen TUHAN udah nagang orang Israel jadi enggau bansa orang nya, laban sida deka mai orang Israel taluk ngagai petara bukai.
3 Solomon jadi enggau tujuh ratus iku anak indu raja, lalu iya bisi mega tiga ratus iku indu simpan. Sida indu nya ke nyungkak iya ninggalka Allah Taala,
4 lalu lebuh umur iya nyau tuai, sida nguluka iya besembahka petara orang bansa bukai. Iya enda tetap ati ngagai TUHAN Allah Taala iya, enda baka apai iya David.
5 Iya nyembah Astarte, petara indu orang Sidon, enggau Molek, petara orang Amon.
6 Iya bedosa ngelaban TUHAN, lalu iya enda taluk ngagai TUHAN, enda baka apai iya David.
7 Ba bukit sigi muak ke timur nengeri Jerusalem iya ngaga siti palan alai nyembah Kemos, petara orang Moap, enggau siti palan alai nyembah Molek, petara orang Amon.
8 Iya mega ngaga mayuh bengkah endur alai semua bini iya ke ari bansa bukai ulih nunu menyan enggau ngenjuk piring ngagai petara sida.
9-10 Taja pen TUHAN Allah Taala ke disembah orang Israel udah ngayanka Diri dua kali ngagai Solomon, lalu udah nagang iya nyembah petara orang bansa bukai, Solomon mengkang enda ngasika TUHAN, tang ninggalka Iya. Nya alai TUHAN ringat ngagai Solomon
11 lalu bejaku enggau iya, “Laban nuan udah sengaja mungkir ari sempekat Aku enggau nuan, lalu enda ngasika pesan Aku, Aku deka ngerampas perintah orang Israel ari jari nuan, lalu meri perintah nya ngagai siku ari bala pemesai nuan.
12 Tang, ketegal apai nuan David, Aku enda ngereja nya lebuh nuan empu agi idup, tang lebuh anak nuan megai perintah.
13 Lalu Aku enda ngambi semua menua ti dipegai iya ari iya, tang Aku deka ninggalka siti aja raban bansa ke iya, ketegal nembiak Aku David, enggau ketegal Jerusalem, nengeri ti udah digaga Aku nyadika nengeri Aku Empu.”
 
Munsuh Solomon
14 Nya alai TUHAN ngasuh Hadat, siku orang ari ruang bilik raja Edom, ngelaban Solomon.
15-16 Sebedau nya, lebuh David udah ngalahka Edom, Joap ti nyadi tuai soldadu iya bisi udah bejalai ngagai menua nya deka nguburka orang ke mati. Iya enggau bala iya mengkang di menua nya enam bulan, lalu sekumbang sida ke dia, sida munuh semua orang ke lelaki di menua Edom.
17 Tang Hadat ti agi biak lebuh maya nya, enggau sekeda orang Edom ti nyadi orang gaji apai iya, ngerarika diri ngagai menua Ejip.
18 Sida angkat ari Midian lalu mansang ngagai Paran. Sekeda orang bukai mupuk enggau sida. Udah nya sida lalu bejalai ngagai menua Ejip, lalu betemu enggau raja menua nya. Raja nya meri tanah, sebuah rumah enggau pemakai ngagai Hadat.
19 Hadat nyau bepangan enggau raja, lalu raja meri ipar indu iya, iya nya menyadi indu kuin Papenes, nyadika bini Hadat.
20 Papenes ngadaka anak lelaki siku. Nama iya Genubat, lalu iya diibun kuin nya dalam istana, alai iya ti diau begulai enggau bala anak raja.
21 Lebuh Hadat ninga David, enggau Joap ti nyadi tuai soldadu orang Israel udah mati, Hadat lalu bejaku enggau raja, “Awakka aku pulai ngagai menua aku empu.”
22 “Lapa?” ku raja nanya. “Kati aku bisi udah enda meri nuan utai? Kati nya kebuah nuan keran deka pulai ngagai menua nuan empu?”
“Awakka aku mupuk,” ku Hadat nyaut raja. Iya lalu pulai ngagai menua iya empu. Lebuh Hadat nyadi raja menua Edom, iya lalu bemunsuh enggau orang Israel.
23 Allah Taala mega ngasuh Reson anak Eliada ngelaban Solomon. Reson udah rari ninggalka tuan iya, iya nya Raja Hadadeser ke merintah di Sobah,
24 lalu udah nyadi tuai bala orang ke enda beradat. (Utai tu nyadi udah bekau David ngalahka Hadadeser lalu udah munuh bala orang Siria ke setanah enggau Hadadeser.) Reson enggau bala iya mansang lalu diau di Damaskus. Dia orang ke nitihka iya lalu nyiri iya nyadi raja menua Siria.
25 Iya nyadi munsuh menua Israel sekumbang Solomon agi idup.
 
Semaya Allah Taala Ngagai Jeroboam
26 Siku agi orang angkat ngelaban Raja Solomon. Orang nya siku ari pemesai iya empu, ke benama Jeroboam anak Nebat, ari Seredah di menua Epraim. Indai iya Seruah, lalu Seruah balu.
27 Tu cherita pasal Jeroboam ke angkat ngelaban perintah. Nyadi Solomon agi benung nambun tanah ba tisi timur nengeri Jerusalem, sereta ngaduka dinding kuta nengeri.
28 Jeroboam agi biak umur sereta nemu gawa, lalu lebuh Solomon meda iya rajin gawa, iya lalu ngasuh iya nyadi tuai ngemataka semua orang ke dipejalka gawa dalam menua Manasi enggau Epraim.
29 Nyadi sekali, lebuh Jeroboam bejalai ari Jerusalem, nabi Ahijah ari Siloh betemu enggau iya kediri ba jalai raya di menua pesisir.
30 Ahijah lalu muka baju panjai ari tubuh iya empu, nyarikka baju nya ngagai dua belas iti chebik,
31 lalu bejaku enggau Jeroboam, “Bai sepuluh iti chebik ke nuan empu, laban tu utai ti disebut TUHAN Allah Taala ke disembah orang Israel ngagai nuan, ‘Aku deka ngerampas menua ti diperintah Solomon ari jari iya, lalu Aku deka meri sepuluh bengkah raban bansa ngagai nuan.
32 Solomon deka merintah siti aja raban bansa ketegal nembiak Aku David, enggau ketegal Jerusalem, nengeri ti udah dipilih Aku ari semua menua Israel nyadika nengeri Aku Empu.
33 Aku deka ngereja tu laban Solomon udah nulak Aku, lalu udah nyembah petara orang bansa bukai - petara Astarte, petara indu orang Sidon; Kemos, petara orang Moap; enggau Molek, petara orang Amon. Solomon udah enda ngasika Aku. Iya udah ngereja utai ti salah, lalu enda agi nitihka adat enggau pesan Aku, enda baka apai iya David.
34 Tang Aku enda ngerampas semua menua ti diperintah Solomon ari jari iya, lalu Aku deka ngasuh iya megai perintah sepemanjai umur iya. Aku deka ngereja tu ketegal nembiak Aku David, ti udah dipilih Aku, lalu udah ngasika adat enggau pesan Aku.
35 Aku deka ngerampas menua ti diperintah Solomon ari jari anak iya, lalu deka meri sepuluh bengkah raban bansa ngagai nuan,
36 tang Aku deka nejuka anak Solomon merintah siti raban bansa, ngambika Aku deka seruran bisi siti peturun ari nembiak Aku David merintah di Jerusalem, nengeri ti udah dipilih Aku nyadika palan alai Aku disembah.
37 Jeroboam, Aku deka ngaga nuan nyadi raja menua Israel, lalu nuan deka merintah semua menua ti dikinginka nuan.
38 Enti nuan ngasika Aku enggau pengabis ati nuan, idup nitihka jalai Aku, lalu ngereja utai ti ngena nitihka adat enggau pesan Aku, baka nembiak Aku David, Aku deka seruran enggau nuan. Aku deka ngaga nuan nyadi raja menua Israel, lalu Aku deka netapka peturun nuan merintah ngentudika nuan, baka ke udah dikereja Aku ngagai David.
39 Ketegal dosa Solomon, Aku deka ngukum peturun David, tang enda belama iya.’ “
40 Solomon lalu nguji munuh Jeroboam, tang Jeroboam ngerarika diri ngagai Raja Sisak di menua Ejip, lalu diau dia nyentuk ngagai pemati Solomon.
 
Pemati Solomon
41 Semua utai ti udah dikereja Solomon, jalai pengidup iya, penemu-dalam ti dikembuan iya bisi dituliska magang dalam Jerita Lama Pasal Solomon.
42 Iya nyadi raja di Jerusalem merintah semua menua Israel empat puluh taun.
43 Iya mati lalu dikuburka di Nengeri David, lalu anak iya Rehoboam nganti iya nyadi raja.
 
Bagi 12
Raban Bansa Ti Di Utara Angkat Ngelaban
1 Rehoboam mansang ngagai Sekem, alai semua orang Israel ti di utara udah begempuru deka nyiri iya nyadi raja.
2 Lebuh Jeroboam anak Nebat, ti udah rari ari Raja Solomon ngagai menua Ejip, ninga berita nya, iya lalu mulaika diri ari menua Ejip.
3 Orang Israel ari raban bansa ti di utara lalu mesanka Jeroboam, lalu Jeroboam enggau semua bala sida mansang deka betemu enggau Rehoboam, lalu bejaku enggau iya,
4 “Apai nuan Solomon udah kasar bendar enggau kami, lalu ngasuh kami ngereja pengawa ti berat. Enti nuan ngasuh pengawa kami lempung agi, lalu ngasuh pengidup kami nyamai agi, kami deka taluk ngagai nuan.”
5 “Aku minta kita datai kitu baru tiga hari da agi, nya baru aku meri saut aku ngagai kita,” ku iya nyaut. Sida lalu mupuk.
6 Raja Rehoboam lalu betanya ngagai orang ke tuai, ti udah bekereja nyadi penyanding penemu ke apai iya Solomon. “Dalam runding kita, nama saut ti patut diberi aku ngagai orang tu?” ku iya nanya.
7 Ku sida nyaut, “Enti nuan deka betuaika orang tu enggau manah, nuan enda tau enda meri saut ti menyana ngagai peminta sida. Nya baru sida deka seruran taluk betuaika nuan.”
8 Tang iya enda begunaka jaku lalau bala orang ke tuai. Iya mansang ngagai bala orang ke biak, ti udah besulu enggau iya kenyau ari mit, ti nyadi penyanding penemu iya diatu.
9 “Dalam runding kita, nama utai ti patut dikereja aku?” ku iya nanya sida. “Nama utai ti patut dikereja aku ngagai orang ke minta aku ngasuh pengawa sida lempung agi?”
10 Disaut sida, “Tu utai ti patut dipadahka nuan ngagai sida: ‘Tunjuk aku besai agi ari punggung apai aku!’
11 Padahka ngagai sida, ‘Apai aku udah ngasuh kita ngereja pengawa ti berat. Aku deka ngasuh pengawa kita berat agi ari nya. Iya udah nyipat kita ngena penyipat. Aku deka nyipat kita ngena penyipat ti bedurika besi!’ “
12 Tiga hari udah bekau nya, Jeroboam enggau semua orang lalu datai baru ngagai Raja Rehoboam, nitihka asuh Rehoboam empu.
13 Raja Rehoboam enda begunaka jaku lalau ti diberi orang ke tuai, lalu iya bejaku kasar enggau orang mayuh,
14 nitihka jaku lalau ari bala orang ke biak. Ku iya, “Apai aku ngasuh kita ngereja pengawa ti berat. Aku deka ngasuh pengawa kita berat agi. Iya udah nyipat kita ngena penyipat, tang Aku deka nyipat kita ngena penyipat ti bedurika besi!”
15 TUHAN endang deka ngamatka utai ti udah disebut Iya ngagai Jeroboam anak Nebat ngena Ahijah ke datai ari Siloh. Nya kebuah raja enggai ibuhka orang mayuh.
16 Lebuh orang mayuh meda raja nya enggai mendingka sida, sida lalu manjung, “Tumbangka David enggau peturun iya! Sida nadai udah ngereja utai ke kitai! Orang Israel, aram kitai pulai! Awakka Rehoboam ngidupka diri empu!” Nya alai, orang Israel angkat ngelaban,
17 lalu Rehoboam semina nyadi raja ke orang ke diau di menua Judah aja.
18 Udah nya Raja Rehoboam lalu ngasuh Adoniram, ti nyadi tuai ngemataka orang ke dipejalka ngereja pengawa ti berat, mansang ngagai orang Israel, tang sida nuku iya ngena batu datai ke mati. Rehoboam lalu beguai-guai nepan kerita perang iya lalu rari ngagai Jerusalem.
19 Kenyau ari nya, orang ke di utara menua Israel seruran ngelaban perintah peturun David.
20 Lebuh orang Israel ninga Jeroboam udah pulai ari menua Ejip, sida mai iya ngagai aum besai bala mayuh, lalu nyiri iya nyadi raja menua Israel. Semina raban bansa Judah aja agi taluk ngagai peturun David.
 
Semaiah Benabi
21 Lebuh Rehoboam anak Solomon datai di Jerusalem, iya lalu ngempuruka 180,000 iku soldadu ti pemadu kering ari raban bansa Judah enggau Benjamin, deka nyerang raban bansa ti di utara laban iya deka ngambi pulai baru kuasa iya ti nyadi raja atas raban bansa ti di utara.
22 Tang Allah Taala ngasuh nabi Semaiah
23 meri pesan tu ngagai Rehoboam anak Solomon, enggau ngagai semua orang ke ari raban bansa Judah enggau Benjamin:
24 “Anang nyerang kaban belayan kita orang Israel. Pulai semua kita. Utai nya nyadi ari asuh Aku.” Semua sida ngasika pesan TUHAN, lalu pulai.
 
Jeroboam Ninggalka Allah Taala
25 Raja Jeroboam menua Israel lalu ngaga kuta ngelingi nengeri Sekem di menua ti bebukit di menua Epraim, lalu iya diau dia enda lama. Udah nya iya angkat ari Sekem lalu ngaga kuta ngelingi nengeri Penuel.
26-27 Ku runding iya, “Nitihka gaya utai ti diatu, enti bala nembiak aku mansang ngagai Jerusalem, lalu ngenjuk piring ngagai TUHAN dalam Rumah Sembiang din, sida deka taluk ngagai Raja Rehoboam menua Judah, lalu munuh aku.”
28 Lebuh iya udah berundingka pekara nya, iya lalu ngaga dua iku anak sapi ti lelaki ari emas, lalu ku iya bejaku enggau bala nembiak iya, “Orang Israel, kita udah chukup lama nyembah Allah Taala di Jerusalem. Nya alai, tu petara kita ke udah mai kita pansut ari menua Ejip!”
29 Iya lalu ngengkahka siku anak sapi emas di Betel, lalu siku di Dan.
30 Nya alai orang mayuh bedosa laban sida nyembah engkeramba nya di Betel enggau di Dan.
31 Jeroboam mega ngaga mayuh bengkah palan alai besembiang ba tuchung bukit, lalu iya milih orang ke ukai ari ruang bilik Lewi nyadi imam.
 
Orang Ke Nyembah Di Betel Kena Ukum
32  Jeroboam mega numbuhka siti gawai pengarap ti diintu kena lima belas hari bulan ti kelapan, baka gawai ti di menua Judah. Iya ngenjuk piring ba alta ngagai anak sapi emas ti udah digaga iya di Betel, lalu iya mega ngasuh bala imam gawa ba palan alai besembiang ti udah digaga iya.
33 Kena lima belas hari bulan ti kelapan, hari ti udah diletak iya empu, iya mansang ngagai Betel lalu ngenjuk piring ba alta, kena iya ngerami gawai ti udah ditumbuhka iya ke orang Israel.
 
Bagi 13
1 Ari asuh TUHAN, siku nabi lalu bejalai ari menua Judah ngagai Betel. Iya datai dia lebuh Jeroboam benung bediri ngimbai alta, deka ngenjuk piring.
2 Ari asuh TUHAN, nabi nya lalu bejaku ngagai alta nya: “O alta, alta, tu utai ti disebut TUHAN: Siku anak mit ke benama Josiah, deka diadaka ari peturun David. Iya deka munuh ba atas nuan bala imam ke bekereja ba alta orang kapir ke ngenjuk piring ba atas nuan, lalu iya deka nunu tulang mensia ba atas nuan.”
3 Lalu ku nabi nya nampung jaku iya, “Alta tu deka diruntuhka, lalu amau ti ba atas iya deka diachirka. Nya baru nuan deka nemu TUHAN udah bejaku ngena aku.”
4 Lebuh Raja Jeroboam ninga nya, iya nunjuk ngagai nabi nya, lalu bejaku, “Tangkap orang nya!” Tekala nya lengan raja lalu enda ulih engkebut agi datai ke nyau enda ulih nekuka lengan iya pulai baru.
5 Alta nya lalu tekala nya runtuh, lalu amau labuh ke tanah, munyi ti udah dipadahka nabi nya dalam nama TUHAN.
6 Ku Raja Jeroboam bejaku enggau nabi nya, “Aku minta nuan besampika aku ngagai TUHAN, minta iya ngeraika lengan aku!” Nabi nya lalu besampi ngagai TUHAN, lalu lengan raja nya gerai.
7 Udah nya raja lalu bejaku enggau nabi nya, “Aram makai enggau aku. Aku deka ngupah nuan ketegal utai ti udah dikereja nuan.”
8 Disaut nabi nya, “Enti sema nuan meri aku setengah ari pengaya nuan, enggai meh aku bejalai enggau nuan, tauka makai, tauka ngirup enggau nuan,
9 laban TUHAN udah nagang aku makai, tauka ngirup, tauka pulai nengah jalai aku mansang.”
10 Nya alai nabi nya enda pulai nengah jalai iya mansang, tang nengah jalai bukai.
 
Nabi Ti Tuai Di Betel
11 Lebuh maya nya, siku nabi bisi diau di Betel. Bala anak lelaki iya  datai lalu nusui ngagai iya utai ti udah dikereja nabi ke datai ari menua Judah di Betel sehari nya, enggau jaku ti disebut nabi nya ngagai Raja Jeroboam.
12 “Ni jalai ditengah iya mupuk tadi?” ku nabi ke tuai nya nanya sida. Sida lalu nunjukka jalai nya ngagai iya.
13 Nabi ke tuai nya lalu ngasuh sida nyendiaka keledai iya. Sida ngereja nya lalu iya mupuk
14 nengah jalai nya, nitihka nabi ke datai ari menua Judah nya, lalu nemu iya duduk di baruh sepun kayu oak. “Kati nuan tu nabi ke datai ari menua Judah?” ku nabi ke tuai nya nanya. “Aku meh tu,” ku nabi ari menua Judah nya nyaut.
15 “Aram pulai lalu makai enggau aku,” ku nabi ke tuai nya bejaku.
16 Tang ku nabi ari menua Judah nya nyaut, “Aku enda tau pulai enggau nuan, tauka makai enggau nuan. Lalu aku enggai makai ngirup enggau nuan ditu,
17 laban TUHAN udah bejaku nagang aku makai, tauka ngirup, tauka pulai nengah jalai ti ditengah aku mansang.”
18 Ku nabi ke tuai ari Betel nya bejaku enggau iya, “Aku pen nabi baka nuan. Nitihka pesan TUHAN, siku melikat udah bejaku ngagai aku, ngasuh aku mai nuan ke rumah, lalu mai nuan makai enggau aku.” Tang nabi ke tuai nya bejaku bula.
19 Nabi ke datai ari menua Judah nya lalu pulai enggau nabi ke tuai nya, lalu makai enggau iya.
20 Lebuh seduai iya benung makai, jaku TUHAN lalu datai ba nabi ke tuai nya,
21 lalu ku nabi nya bejaku enggau nyawa ti inggar ngagai nabi ke datai ari menua Judah nya, “TUHAN madahka nuan enda ngasika Iya, lalu enda ngereja utai ti diasuh Iya.
22 Nuan udah pulai lalu makai ba endur ti enda disagi Iya. Ketegal nya, nuan deka dibunuh, lalu bangkai nuan deka dikuburka ba kubur kita sebilik.”
23 Lebuh seduai iya udah badu makai, nabi ke tuai nya lalu nyendiaka keledai ke nabi ke datai ari menua Judah nya.
24 Nabi nya lalu mupuk. Di rantau jalai, siku singa nerekam lalu nyamah iya. Bangkai iya lalu garing-garing ba tengah jalai raya nya, lalu keledai enggau singa nya sama bediri semak bangkai iya.
25 Sekeda orang bisi mansa, lalu meda bangkai nya ba jalai raya nya, enggau singa nya bediri semak bangkai nya. Sida majakka pejalai sida ngagai Betel lalu madahka pasal utai ti udah dipeda sida.
26 Lebuh nabi ke tuai nya ninga berita nya, iya lalu bejaku, “Nya nabi ti enda ngasika pesan TUHAN! Nya kebuah TUHAN ngasuh singa nya nerekam lalu nyamah iya, munyi ti udah dipadahka TUHAN.”
27 Udah nya iya lalu bejaku enggau bala anak lelaki iya, “Sediaka keledai aku.” Sida lalu nyendiaka keledai iya.
28 Iya lalu nepan keledai nya, mupuk, lalu nemu bangkai nabi nya garing-garing ba tengah jalai raya, enggau keledai enggau singa nya sama bediri semak bangkai nya. Singa nya enda makai bangkai orang nya, tauka nyambarka keledai nya.
29 Nabi ke tuai nya lalu nanggung bangkai nya, manggaika iya ba keledai iya empu, lalu mai bangkai nya pulai ngagai Betel, ngulit sereta nguburka iya.
30 Nabi tuai nya nguburka iya dalam kubur sida sebilik. Iya enggau bala anak iya lalu ngulitka nabi nya, ku iya, “O menyadi! O menyadi!”
31 Lebuh sida udah nguburka iya, nabi ke tuai nya lalu bejaku enggau bala anak iya, “Lebuh aku mati ila, kuburka aku ba kubur tu ngimbai bangkai iya.
32 Jaku ti disebut iya ari asuh TUHAN kena ngelaban alta ti di Betel, enggau kena ngelaban semua palan alai besembiang di menua Samaria, tetap deka dikamatka magang.”
 
Jeroboam Bedosa Besai
33 Raja Jeroboam agi mengkang enggai ngelengkaka jalai iya ti jai, tang majak milih bala imam ari orang ke ukai ari peturun imam bekereja ba alta ti udah digaga iya. Iya nyiri sebarang orang ke bisi ati deka nyadi imam.
34 Dosa iya empu ti ngerusak semua perintah iya.
 
Bagi 14
Pemati Anak Lelaki Jeroboam
1 Ba urung maya nya, anak lelaki Jeroboam ke benama Abijah, sakit.
2 Ku Jeroboam bejaku enggau bini iya, “Nuan patut ngeluluka diri nyadi orang bukai, ngambika orang enda ngelala nuan. Udah nya bejalai nuan ngagai Siloh, alai nabi Ahijah diau, nabi ti udah madahka aku deka nyadi raja menua Israel.
3 Bai ngagai iya sepuluh iti tuku roti, kek, enggau sekebuk ai manyi, lalu bejalai nuan ngagai iya. Iya deka madahka ngagai nuan utai ti deka nyadi ba anak tua tu.”
4 Bini Jeroboam lalu mansang ngagai rumah Ahijah di Siloh. Nyadi Ahijah buta, laban iya nyau tuai.
5 TUHAN udah madahka ngagai iya pasal bini Jeroboam ti deka datai lalu nanya ngagai iya pasal anak Jeroboam ke sakit. TUHAN lalu madahka ngagai Ahijah utai ti patut disebut iya. Bini Jeroboam datai, ngeluluka diri nyadi orang bukai.
6 Tang lebuh Ahijah ninga iya tama, Ahijah lalu bejaku, “Tama meh, bini Jeroboam. Nama kebuah nuan ngeluluka gamal diri baka gamal orang bukai? Aku bisi berita ti enda manah ti deka dipadahka aku ngagai nuan.
7 Mupuk meh nuan, lalu padahka jaku TUHAN Allah Taala ke disembah orang Israel ngagai Jeroboam: ‘Aku udah milih nuan ari semua orang bukai, lalu ngasuh nuan merintah bala nembiak Aku Israel.
8 Aku udah ngambi perintah ari jari peturun David, lalu meri perintah nya ngagai nuan. Tang nuan enda baka nembiak Aku David, ke taluk ngagai Aku enggau pengabis ati iya, lalu ngasika pesan Aku, lalu semina ngereja utai ti dikemendarka Aku.
9 Nuan udah bedosa lebih ari orang ke dulu ari nuan nyadi raja. Nuan udah nulak Aku, lalu udah nyungkak Aku ringat, lebuh nuan ngaga engkeramba enggau anak patung ari besi ke disembah nuan.
10 Ketegal nya, Aku deka ngasuh penusah ti besai ninggang kita sebilik, lalu deka munuh semua peturun nuan ti lelaki, ke tuai enggau ke biak. Aku deka muai ruang bilik nuan baka ke muai tai sapi.
11 Kita sebilik ke mati di nengeri deka diempa ukui, lalu bala kita ke mati di menua pesisir, deka diempa burung ti bepakaika bangkai. Aku ti TUHAN, udah bejaku.’ “
12 Ku Ahijah nampung jaku iya ngagai bini Jeroboam, “Nya alai, pulai nuan diatu. Anak nuan deka mati lebuh nuan tama ngagai nengeri nya lagi.
13 Semua orang Israel deka ngulitka iya, lalu nguburka iya. Semina iya siku aja ari ruang bilik Jeroboam ti deka dikuburka ngena chara ti menyana, laban semina iya siku aja ke dikerinduka TUHAN Allah Taala ke disembah orang Israel.
14 TUHAN deka ngeletak siku raja megai perintah di menua Israel, ti deka madamka peturun Jeroboam nyadi raja.
15 TUHAN deka ngukum Israel, lalu Israel deka begetar baka bemban ti diteruju ai. TUHAN deka nyabut orang Israel ari menua ti manah tu, ti udah diberi Iya ngagai aki ini sida, lalu Iya deka ngachirka sida ngagai menua ngilah Sungai Eupratis, laban sida udah nyungkak TUHAN ringat, lebuh sida begagaka engkeramba ke petara indu Aserah.
16 TUHAN deka ninggalka orang Israel laban Jeroboam udah bedosa, lalu nguluka orang Israel bedosa.”
17 Bini Jeroboam lalu pulai ngagai Tirsah. Lebuh iya baru datai di rumah, anak mit nya lalu mati.
18 Orang Israel nyenggai lalu nguburka anak mit nya, munyi ti udah dipadahka TUHAN ngena nembiak Iya, nabi Ahijah.
 
Pemati Jeroboam
19 Semua utai bukai ti udah dikereja Raja Jeroboam, pasal iya ke beperang, chara iya merintah, bisi dituliska magang dalam Jerita Lama Pasal Raja Menua Israel.
20 Jeroboam merintah nyadi raja dua puluh dua taun. Iya mati lalu dikuburka, lalu anak iya Nadap nganti iya nyadi raja.
 
Raja Rehoboam Menua Judah
21 Rehoboam anak Solomon, umur empat puluh satu taun lebuh iya nyadi raja menua Judah, lalu iya merintah tujuh belas taun di Jerusalem, nengeri ti udah dipilih TUHAN ari semua menua Israel nyadika palan alai Iya disembah. Indai Rehoboam nya Naamah ari Amon.
22 Orang Judah udah bedosa ngelaban TUHAN, lalu udah nyungkak TUHAN ringat ngena mayuh agi dosa, ari ti udah dikereja bala aki ini sida.
23 Sida udah ngaga palan alai nyembah petara ti pelesu, lalu udah nirika tiang batu enggau tanda Aserah ngambika bisi disembah ba bukit enggau ba palan ti lindung di baruh kayu.
24 Tang utai ti pemadu jai nya baka tu: orang ke lelaki enggau orang ke indu ke bekereja nyadi sundal ba endur alai orang kapir nyembah petara sida. Orang Judah ngereja semua utai ti ngemalu, ti dikereja orang ke diburu TUHAN ari menua nya, lebuh orang Israel nyerang.
25 Dalam taun ti kelima Rehoboam nyadi raja, Raja Sisak ari menua Ejip nyerang Jerusalem.
26 Raja Sisak nabanka semua utai ti berega ari Rumah Sembiang enggau ari istana, nyengkaum terabai emas ti digaga Solomon.
27 Kena iya nganti utai nya, Raja Rehoboam ngaga terabai temaga, lalu nyerahka utai nya ngagai bala pemesai ke betanggungjawap nyaga pintu penama ngagai istana nya.
28 Genap kali Raja Rehoboam mansang ngagai Rumah Sembiang, bala jejaga lalu mai terabai nya, lalu udah nya, mulaika terabai nya baru ngagai bilik jejaga.
29 Semua utai bukai ti udah dikereja Raja Rehoboam bisi dituliska magang dalam Jerita Lama Pasal Raja Menua Judah.
30 Sekumbang maya nya, Rehoboam enggau Jeroboam endang seruran beperang ngelaban pangan diri.
31 Rehoboam mati lalu dikuburka ba lumbung raja di Nengeri David, lalu anak iya Abijah nganti iya nyadi raja.
 
Bagi 15
Raja Abijah Menua Judah
1 Dalam taun ti kelapan belas Jeroboam anak Nebat nyadi raja menua Israel, Abijah lalu berengkah nyadi raja menua Judah.
2 Iya merintah tiga taun di Jerusalem. Indai iya Maakah anak Absalom.
3 Iya bedosa baka apai iya, lalu iya enda tentu taluk ngagai TUHAN Allah Taala iya, enda baka aki ichit iya David.
4 Tang ketegal David, TUHAN Allah Taala iya meri iya anak lelaki siku, ngambika bisi nganti iya megai perintah di Jerusalem lalu mai pengelikun ngagai Jerusalem.
5 TUHAN ngereja nya laban David udah ngereja utai ti ngerinduka ati TUHAN, lalu enda kala enda ngasika pesan Iya, kelimpah ari pekara pasal Uriah orang Iti.
6 Perang ti endang udah belabuh entara Rehoboam enggau Jeroboam, majak nyadi sepemanjai umur Abijah.
7 Lalu semua utai bukai ti udah dikereja Abijah bisi dituliska magang dalam  Jerita Lama Pasal Raja Menua Judah.
8 Abijah mati, lalu dikuburka di Nengeri David, lalu anak iya Asa nganti iya nyadi raja.
 
Raja Asa Menua Judah
9 Dalam taun ti kedua puluh Jeroboam nyadi raja menua Israel, Asa lalu berengkah nyadi raja menua Judah.
10 Iya merintah di Jerusalem empat puluh satu taun. Nama ini iya Maakah anak Absalom.
11 Asa ngereja utai ti ngerinduka ati TUHAN, baka aki iya David.
12 Iya muai ari menua nya semua lelaki enggau indu ke bekereja nyadi sundal ba palan alai orang kapir nyembah petara sida, lalu iya muai semua engkeramba ti udah digaga sida raja ke dulu agi ari iya.
13 Iya mega muai ini iya Maakah ari pangkat iya ti nyadi indai raja, laban iya udah ngaga engkeramba ke petara ti ngasuh peridi ke benama Aserah. Asa nebang engkeramba nya, lalu nunu iya ba Lebak Kidron.
14 Taja pen Asa enda ngerusak semua palan alai orang kapir nyembah petara sida, iya mengkang tetap ati ngagai TUHAN sepemanjai umur iya.
15 Iya ngengkahka dalam Rumah Sembiang semua utai ti udah diserahka apai iya ngagai Allah Taala, nyengkaum perengka emas enggau perengka pirak, ti udah diserahka iya empu.
16 Raja Asa menua Judah enggau Raja Baasa menua Israel endang seruran beperang ngelaban pangan diri sekumbang seduai iya ke megai kuasa.
17 Raja Baasa nyerang menua Judah lalu belabuh nguta nengeri Ramah, kena nagang orang tama-pansut ari menua Judah.
18 Nya alai Raja Asa lalu ngambi semua pirak enggau emas ti disimpan dalam Rumah Sembiang, enggau dalam istana, lalu ngirumka utai nya ngena sekeda bala pemesai iya ngagai Damaskus, ngagai raja menua Siria, Benhadat anak Tabrimom, uchu Hesion. Baka tu ku pesan Raja Asa:
19 “Manah tua beserakup baka apai tua menya. Pirak enggau emas tu diberi aku ngagai nuan. Anang agi beserakup enggau Raja Baasa menua Israel, ngambika iya mai bala soldadu iya pulai ari menua aku.”
20 Raja Benhadat besetuju enggau penemu Asa. Iya lalu ngasuh bala tuai soldadu iya enggau bala soldadu sida nyerang nengeri di menua Israel. Sida ngalahka Ijon, Dan, Abel Bet-maakah, menua ti semak Tasik Galili, enggau semua menua Naptali.
21 Lebuh Raja Baasa ninga pasal utai ti udah nyadi, iya lalu badu agi nguta Ramah, lalu mansang ngagai Tirsah.
22 Udah nya Raja Asa lalu ngirumka atur ngagai serata menua Judah ngasuh semua orang, enda milih sapa-sapa, mai ari Ramah batu enggau ramu ti udah dikena Raja Baasa nguta nengeri nya. Asa lalu ngena utai nya nguta nengeri Mispah enggau nengeri Geba, sebuah nengeri di menua Benjamin.
23 Semua utai bukai ti udah dikereja Raja Asa, pemerani iya, enggau nengeri ti dikuta iya, bisi dituliska magang dalam  Jerita Lama Pasal Raja Menua Judah. Tang lebuh iya nyau tuai, iya enda ulih bejalai laban kaki iya diempa penyakit.
24 Asa mati lalu dikuburka ba lumbung raja di Nengeri David, lalu anak iya Jehosapat nganti iya nyadi raja.
 
Raja Nadap Menua Israel
25 Dalam taun ti kedua Raja Asa megai menua Judah, Nadap anak Raja Jeroboam berengkah nyadi raja menua Israel. Iya merintah dua taun.
26 Baka apai iya ke dulu ari iya, iya bedosa ngelaban TUHAN, lalu iya nguluka orang Israel bedosa.
27 Baasa anak Ahijah, ari raban bansa Isakar, lalu begigaka akal kena ngelaban Nadap, lalu iya munuh Nadap lebuh Nadap enggau bala soldadu iya benung ngelulung nengeri Gibeton di menua Pilistin.
28 Pekara tu nyadi dalam taun ti ketiga Raja Asa megai menua Judah. Nya alai Baasa nganti Nadap nyadi raja menua Israel.
29 Iya lalu tekala nya belabuh bebunuhka semua sida Jeroboam sebilik. Nitihka jaku ti udah disebut TUHAN ngena nembiak Iya nabi Ahijah ari Siloh, semua sida Jeroboam sebilik dibunuh magang. Nadai siku sida idup.
30 Pekara tu nyadi laban Jeroboam udah ngeringatka TUHAN Allah Taala ke disembah orang Israel, laban iya udah bedosa, lalu udah mai orang Israel bedosa.
31 Semua utai bukai ti udah dikereja Nadap bisi dituliska magang dalam  Jerita Lama Pasal Raja Menua Israel.
32 Raja Asa menua Judah enggau Raja Baasa menua Israel endang seruran beperang ngelaban pangan diri lebuh seduai iya agi megai kuasa.
 
Raja Baasa Menua Israel
33 Dalam taun ti ketiga Raja Asa megai perintah di menua Judah, Baasa anak Ahijah berengkah nyadi raja ke semua menua Israel, lalu iya merintah di Tirsah dua puluh taun.
34 Baka Raja Jeroboam ke dulu agi ari iya, iya mega bedosa ngelaban TUHAN, lalu iya mega nguluka orang Israel bedosa.
 
Bagi 16
1 TUHAN bejaku ngagai nabi Jehu anak Hanani, ngasuh iya meri pesan tu ngagai Baasa:
2 “Dulu suba nuan enda dikelala orang, tang Aku udah ngaga nuan nyadika tuai bansa orang Israel ti nembiak Aku. Lalu diatu nuan udah bedosa baka Jeroboam, lalu udah nguluka bala nembiak Aku bedosa. Dosa sida udah nyungkak Aku ringat.
3 Nya alai Aku deka muai nuan enggau kita sebilik, baka ke udah dikereja Aku ngagai Jeroboam.
4 Kita sebilik ke mati di nengeri, deka diempa ukui, lalu kita sebilik ke mati di menua pesisir, deka diempa burung.”
5 Semua utai bukai ti udah dikereja Raja Baasa, enggau pemerani iya, bisi dituliska magang dalam  Jerita Lama Pasal Raja Menua Israel.
6 Raja Basa mati lalu dikuburka di Tirsah, lalu anak iya Elah nganti iya nyadi raja.
7 Pesan kena TUHAN ngelaban Baasa enggau sida sebilik, udah diberi nabi Jehu laban Baasa udah bedosa ngelaban TUHAN. Iya udah nyungkak TUHAN ringat, ukai semina laban utai ti jai ti udah dikereja iya, baka ke udah dikereja Raja Jeroboam dulu ari iya, tang mega laban iya udah munuh semua sida Jeroboam sebilik.
 
Raja Elah Menua Israel
8 Dalam taun ti kedua puluh enam Raja Asa megai perintah di menua Judah, Elah anak Baasa berengkah nyadi raja menua Israel, lalu iya merintah di Tirsah dua taun.
9 Simri, iya nya siku ari pemesai iya ti nyadi tuai ngemataka setengah ari kerita perang iya, lalu begigaka akal kena ngelaban iya. Nyadi sekali di Tirsah, Elah mabuk ba rumah Arsa ti nyadi tuai ngemataka istana.
10 Simri tama ngagai rumah nya, lalu munuh Elah. Iya lalu nganti Elah nyadi raja. Pekara tu nyadi dalam taun ti kedua puluh tujuh Raja Asa megai perintah di menua Judah.
11 Sepengelengkas Simri nyadi raja, iya lalu munuh semua sida Baasa sebilik. Semua kaban belayan enggau pangan Baasa ti lelaki dibunuh iya magang.
12 Nya alai, nitihka jaku ti disebut TUHAN ngagai Baasa ngena nabi Jehu, Simri munuh semua sida Baasa sebilik.
13 Laban sida besembahka engkeramba, enggau laban sida udah nguluka orang Israel bedosa, Baasa enggau anak iya Elah udah ngeringatka TUHAN Allah Taala ke disembah orang Israel.
14 Semua utai bukai ti udah dikereja Elah bisi dituliska magang dalam  Jerita Lama Pasal Raja Menua Israel.
 
Raja Simri Menua Israel
15 Dalam taun ti kedua puluh tujuh Raja Asa megai menua Judah, Simri lalu belabuh megai perintah di menua Israel di Tirsah. Iya megai perintah tujuh hari aja. Lebuh maya nya bala soldadu orang Israel benung ngelulung nengeri Gibeton di menua Pilistin.
16 Lalu lebuh sida ninga Simri udah bepekat ngelaban raja, lalu udah munuh iya, sida lalu tekala nya, ba endur nya, nyiri tuai soldadu sida ke benama Omri nyadi raja menua Israel.
17 Omri enggau bala soldadu iya lalu angkat ari Gibeton, mansang ngagai Tirsah lalu ngelulung nengeri nya.
18 Lebuh Simri meda nengeri nya udah alah, iya lalu tama ngagai kuta ti dalam istana, nunu istana nya, lalu iya mati diempa api.
19 Utai tu nyadi laban Simri udah bedosa ngelaban TUHAN. Baka Jeroboam ke dulu ari iya, iya udah nyungkak TUHAN ringat laban dosa iya, enggau laban iya udah nguluka orang Israel bedosa.
20 Semua utai bukai ti udah dikereja Simri, nyengkaum cherita pasal iya ke angkat ngelaban, bisi dituliska magang dalam  Jerita Lama Pasal Raja Menua Israel.
 
Raja Omri Menua Israel
21 Nyadi orang Israel beserekang penemu: sekeda sida deka nyiri Tibni anak Ginat nyadi raja, lalu sida ti bukai dekaka Omri.
22 Ke pengujung iya, sida ke dekaka Omri menang. Tibni mati, lalu Omri nyadi raja.
23 Nya alai dalam taun ti ketiga puluh satu Raja Asa megai perintah di menua Judah, Omri berengkah nyadi raja menua Israel, lalu iya merintah dua belas taun. Dalam enam taun ti keterubah, iya merintah di Tirsah.
24 Udah nya iya lalu meli bukit Samaria ngena enam ribu singkap duit pirak ari orang siku ke benama Semer. Omri lalu ngaga kuta ngelingi bukit nya, ngaga sebuah nengeri dia, lalu iya ngumbai nengeri nya Samaria, ngangkatka Semer, ke bempu bukit nya dulu ari nya.
25 Omri bedosa ngelaban TUHAN lebih agi ari orang ke dulu ari iya.
26 Baka Jeroboam ke dulu agi ari iya, iya ngeringatka TUHAN Allah Taala ke disembah orang Israel laban dosa iya, enggau laban iya nguluka orang Israel bedosa enggau besembahka engkeramba.
27 Semua utai bukai ti udah dikereja Omri, enggau semua utai ti ulih iya bisi dituliska magang dalam  Jerita Lama Pasal Raja Menua Israel.
28 Omri mati lalu dikuburka di Samaria. Iya lalu diganti anak iya Ahap nyadi raja.
 
Raja Ahap Menua Israel
29 Dalam taun ti ketiga puluh lapan Raja Asa megai perintah di menua Judah, Ahap anak Omri berengkah nyadi raja menua Israel, lalu iya merintah di Samaria dua puluh dua taun.
30 Iya bedosa ngelaban TUHAN lebih agi ari semua orang ke dulu agi ari iya.
31 Iya enda puas ati bedosa baka Raja Jeroboam. Iya ngereja utai ti lebih agi jai ari ti udah dikereja Jeroboam: iya jadi enggau Jesebel, anak indu Raja Etbaal menua Sidon, lalu nyembah Baal.
32 Iya ngaga rumah sembiang Baal di Samaria, ngaga siti alta ke Baal, lalu ngengkahka alta nya dalam rumah sembiang nya.
33 Iya mega nirika siti engkeramba petara indu Aserah. Iya ngereja lebih mayuh agi dosa ari semua raja menua Israel ti bukai ke dulu agi ari iya. Ketegal nya TUHAN Allah Taala ke disembah orang Israel ringat.
34 Lebuh Ahap megai perintah, Hil ari Betel lalu nirika nengeri Jeriko baru. Munyi ti udah dipadahka TUHAN dulu ari nya ngena Josua anak Nun, anak tuai Hil ke benama Abiram mati lebuh iya nudukka batu pemun nengeri Jeriko, lalu anak bunsu iya ke benama Segup mega mati, lebuh iya ngaga pintu nengeri nya.
 
Bagi 17
Elijah Enggau Kemarau Panjai
1  Siku nabi ke benama Elijah, ke datai ari Tisbe di menua Giliat, bejaku ngagai Raja Ahap. Ku iya, “Dalam nama TUHAN Allah Taala ti idup, ke disembah orang Israel sereta dipetuaika aku, aku madahka ngagai nuan, menua Israel nadai ambun tauka ujan dalam dua tauka tiga taun ti deka datai tu, nyentuk ngagai maya aku ngasuh hari ujan.”
2 Udah nya TUHAN lalu bejaku ngagai Elijah,
3 “Angkat ari tu, lalu bejalai tunga ke timur, lalu belalai semak sungai Cherit, tunga ke timur ari Sungai Jordan.
4 Nuan deka ngirup ari sungai nya, lalu Aku udah ngasuh burung kak mai pemakai ngagai nuan dia.”
5 Elijah ngasika pesan TUHAN, mansang ngagai sungai Cherit, lalu diau dia.
6 Iya ngirup ari sungai nya, lalu burung kak mai roti enggau dagin tiap pagi enggau tiap lemai ngagai iya.
7 Nyau kelama, sungai nya pen rangkai, laban hari nadai ujan.
 
Elijah Enggau Siku Indu Balu Di Sarepat
8 Udah nya TUHAN lalu bejaku ngagai Elijah,
9 “Alai nuan mansang diatu ngagai nengeri Sarepat, semak Sidon, lalu diau dia. Aku udah ngasuh siku indu balu, ti diau dia, nupi nuan.”
10 Nya alai Elijah mansang ngagai nengeri Sarepat. Lebuh iya datai ba mua pintu nengeri nya, iya tepedaka siku indu ke balu ngumpul kayu api. “Endu, uji bai ai irup ngagai aku,” ku Elijah bejaku enggau iya.
11 Lebuh indu nya baru deka mansang ngambi ai, Elijah lalu ngangau, “Lalu bai mega roti ke aku.”
12 Ku indu nya nyaut, “Aku besumpah dalam nama TUHAN Allah Taala nuan ti idup, aku nadai roti. Utai ti dikemisi aku nya semina segenggam aja tepung dalam sigi mangkuk, enggau minyak kana mimit dalam kebuk. Aku datai ditu deka ngumpul kayu api, lalu aku baru deka pulai ke rumah lalu nyendiaka utai ti mimit nya ke anak aku enggau ke aku empu. Nya meh naka kami duai ulih makai. Udah nya kami duai deka mati keberuran.”
13 “Anang irau, Endu,” ku Elijah bejaku enggau iya. “Mupuk meh nuan lalu sediaka pemakai nuan. Tang gaga dulu siti tuku roti ti mit ari utai ti dikemisi nuan, lalu bai utai nya ngagai aku. Udah nya baru nuan nyendiaka teda utai nya ke seduai menyanak.
14 Laban tu utai ti disebut TUHAN Allah Taala ke disembah orang Israel, ‘Mangkuk nya deka seruran bisi tepung, lalu kebuk nya deka seruran bisi minyak, sebedau Aku, ti TUHAN, ngasuh hari ujan.’ “
15 Indu balu nya mupuk lalu ngereja utai ti diasuh Elijah, lalu semua sida nadai kala suntuk pemakai.
16 Munyi jaku ti udah disebut TUHAN ngena Elijah, mangkuk nya enda kala nadai tepung, lalu kebuk nya enda kala nadai minyak.
17 Nyau kelama udah bekau nya, anak indu balu nya sakit. Iya majak balat-sebalat, lalu mati.
18 Ku indu nya bejaku enggau Elijah, “Nabi, nama kebuah nuan ngereja utai tu ngagai aku? Kati nuan datai ditu deka ngasuh Allah Taala ngingatka dosa aku, lalu ngasuh anak aku mati?”
19 “Beri nembiak nya ngagai aku,” ku Elijah bejaku. Iya lalu ngambi nembiak nya ari jari indu nya, mai iya ke sadau ngagai bilik ti alai Elijah diau, lalu ngalika nembiak nya ba katil.
20 Udah nya iya lalu besampi enggau nyawa ti inggar, “O TUHAN Allah Taala aku, nama kebuah Nuan udah ngereja utai ti ngenyai tu ngagai indu ke balu tu? Iya udah manah enggau aku lalu ngintu aku, lalu diatu Nuan udah munuh anak iya!”
21 Udah nya Elijah lalu nyuntaika diri atas nembiak nya tiga kali, lalu besampi, “O TUHAN Allah Taala aku, asuh nembiak tu idup baru!”
22 TUHAN nyaut sampi Elijah. Nembiak nya belabuh enseput baru, lalu idup.
23 Elijah lalu mai nembiak nya nurun ke baruh ngagai indai iya. Lalu ku Elijah bejaku enggau indai nembiak nya, “Tu anak nuan. Iya idup!”
24 Disaut indu nya, “Diatu baru aku nemu nuan tu amat nabi, lalu TUHAN sigi amat bejaku ngena nuan!”
 
Bagi 18
Elijah Enggau Bala Nabi Baal
1 Nyau kelama udah bekau nya, dalam taun ti ketiga menua nya udah kena laban kemarau, TUHAN bejaku ngagai Elijah, “Alai nuan betemu enggau Raja Ahap. Aku deka ngasuh hari ujan.”
2 Elijah lalu mupuk. Lapar pungkang di menua Samaria endang balat amat nyadi.
3 Nya alai Ahap ngangauka Obadiah, ti nyadi tuai ngemataka istana. (Obadiah nya orang ke angkunka TUHAN,
4 lalu lebuh Jesebel benung bebunuhka bala nabi TUHAN, Obadiah mai seratus iku bala nabi TUHAN, magi sida ngagai dua iti raban, lima puluh iku dalam siti-siti raban, ngelalaika sida dalam lubang gua, lalu meri sida pemakai enggau ai.)
5 Ku Ahap bejaku enggau Obadiah, “Aram kitai mupuk ngagai semua mata ai, enggau semua sungai di menua tu, nyangka ukur kitai bisi tetemuka rumput ke kuda enggau keledai, ngambika kitai enda ibuh munuh jelu kitai.”
6 Sida lalu magi menua ti deka dipatau sida siku-siku. Ahap mupuk kediri nuju ngagai endur siti, lalu Obadiah mupuk kediri nuju endur bukai.
7 Lebuh Obadiah benung di rantau jalai, Elijah betemu enggau iya. Obadiah ngelala Elijah, meremi di mua Elijah, lalu nanya, “Kati tu amat nuan, Elijah?”
8 “Aku meh tu,” ku Elijah nyaut. “Mupuk nuan, lalu padahka ngagai tuan nuan, ‘Elijah bisi ditu.’ “
9 Ku Obadiah nyaut, “Nama utai ti udah dikereja aku alai nuan ngasuh aku minta diri dibunuh Raja Ahap?
10 Dalam nama TUHAN ti idup, ti Allah Taala nuan, aku besumpah madahka ngagai nuan, raja nya udah begigaka nuan di semua menua di dunya tu. Lebuh orang ke merintah nengeri siti-siti madahka nuan nadai di nengeri nya, Ahap lalu ngasuh orang nya besumpah madahka nuan nadai ulih digiga di menua nya.
11 Lalu diatu nuan ngasuh aku mupuk lalu madahka nuan bisi ditu?
12 Kati enti Roh TUHAN nabanka nuan ngagai endur ti enda ditemu orang lebuh aku mupuk ari endur tu? Udah nya, lebuh aku madahka ngagai Ahap nuan bisi ditu, lalu iya nadai tetemuka nuan, iya deka munuh aku. Nuan ingat, aku tu orang ke angkun nyembah TUHAN kenyau ari aku agi biak.
13 Kati nuan nadai udah kala ninga pasal Jesebel ti munuh bala nabi TUHAN, lalu aku ngelalaika seratus iku sida dalam lubang gua, dalam dua iti raban, lima puluh iku dalam siti-siti raban, lalu meri sida pemakai enggau ai?
14 Nya alai, baka ni ku nuan tau ngasuh aku mupuk lalu madahka ngagai raja pasal nuan ke bisi ditu? Iya tentu deka munuh aku!”
15 Disaut Elijah, “Dalam nama TUHAN ti Pemadu Bekuasa, ke dipetuaika aku, aku besemaya deka betemu enggau raja sehari tu.”
16 Nya alai, Obadiah mansang ngagai Raja Ahap, lalu madahka ngagai Ahap. Ahap lalu mupuk, mansang betemu enggau Elijah.
17 Lebuh Ahap meda Elijah, Ahap lalu bejaku, “Nya orang ke ngaga pengachau di menua Israel!”
18 “Ukai aku ke ngaga pengachau,” ku Elijah nyaut. “Nuan empu ke ngaga pengachau - nuan enggau apai nuan. Nuan enda ngasika pesan TUHAN, lalu nyembah engkeramba Baal.
19 Nya alai, asuh semua orang Israel betemu enggau aku ba Bukit Karmel. Bai 450 iku bala nabi Baal, enggau 400 iku bala nabi petara Aserah ke sama begulai makai enggau Kuin Jesebel.”
20 Ahap lalu mesanka semua orang Israel enggau bala nabi Baal, ngasuh sida begempuru ba Bukit Karmel.
21 Elijah lalu mansang ngagai orang mayuh, lalu bejaku, “Ni pengelama baru kita deka ngaga pemutus penemu kita? Enti TUHAN nya Allah Taala, sembah meh Iya. Tang enti Baal nya Allah Taala, sembah meh iya!” Tang orang mayuh enda nyaut.
22 Udah nya Elijah bejaku, “Semina aku aja nabi TUHAN ti agi tinggal, tang Baal bisi 450 iku nabi.
23 Bai dua iku sapi ti lelaki. Awakka bala nabi Baal ngambi siku sapi, munuh iya, netak iya, lalu manggaika iya ba atas kayu, tang anang nyelup kayu nya. Aku deka ngereja baka nya ke sapi siku.
24 Udah nya awakka bala nabi Baal besampi ngagai petara sida, lalu aku deka besampi ngagai TUHAN. Iya ke nyaut ngena api, nya meh Allah Taala.” Orang mayuh manjung madahka sida besetuju.
25 Udah nya Elijah bejaku enggau bala nabi Baal, “Laban kita mayuh tubuh, awakka kita meh dulu ngambi siku sapi ti lelaki, lalu nyendiaka iya. Awakka kita besampi ngagai petara kita, tang anang nyelup kayu nya ngena api.”
26 Sida lalu ngambi sapi ti lelaki ti udah dibai ngagai sida, nyendiaka sapi nya, lalu besampi ngagai Baal nyentuk ngagai tengah hari. Ku sida ngangau enggau nyawa ti inggar, “Saut kami, Baal!” Sida majak betanda ngelingi alta ti udah digaga sida. Tang Baal nadai nyaut sida.
27 Ba urung tengah hari, Elijah lalu belabuh ngeleseka sida. “Besampi inggar agi! Iya petara, ukai enda? Kada enda iya benung bemimpi, tauka bira, tauka udah bejalai ngagai menua bukai! Enti iya tinduk, gerak iya!”
28 Bala nabi Baal lalu besampi inggar agi, lalu ngurik tubuh diri ngena duku enggau lungga, nitihka adat sida besembah, datai ke darah nyau nelusur tubuh sida.
29 Sida majak rauh-rauh besampi nyentuk ngagai ngalih hari. Tang nadai ga Baal nyaut sida. Siti pen nadai meh saut didinga.
30 Udah nya Elijah lalu bejaku ngagai orang mayuh, “Datai semak kitu ke agi ngagai aku.” Semua sida lalu begempuru ngelingi iya. Iya lalu belabuh ngaduka alta TUHAN ti udah runtuh.
31 Iya ngambi dua belas igi batu, sigi ke genap raban bansa orang Israel ti ngangkatka nama bala anak lelaki Jakop. Jakop udah diberi TUHAN nama Israel.
32 Iya lalu ngena batu nya ngaduka alta alai nyembah TUHAN. Iya ngeruang parit ngelingi alta nya. Parit nya ulih ngundan kira 15 liter ai.
33 Udah nya iya nusun kayu ba alta nya, netak sapi ti lelaki nya, lalu manggaika lampang sapi nya ba atas kayu nya. Ku iya, “Isi penuhka empat igi tepayan enggau ai, lalu tuang ai nya ba piring enggau ba kayu tu.” Sida lalu ngereja nitihka asuh iya,
34 lalu ku Elijah, “Beri mayuh agi ai.” Sida lalu nurutka jaku iya. “Kereja nya sekali agi,” ku iya bejaku. Sida lalu nurutka jaku iya baru.
35 Ai nya nyau lilih ari alta nya, lalu ngemenuhka parit ti ngelingi alta nya.
36 Ba urung ngalih hari, endang maya ngenjuk piring, nabi Elijah mansang ngagai alta, lalu besampi. Ku iya, “O TUHAN Allah Taala ke disembah Abraham, Isak enggau Jakop, beri tanda kena mandangka Nuan endang amat Allah Taala ke disembah orang Israel, lalu aku tu endang amat nembiak Nuan, ti udah ngereja semua utai tu nitihka pesan Nuan.
37 Saut aku, TUHAN, saut aku, ngambika orang tu nemu Nuan endang TUHAN Allah Taala, lalu Nuan deka mai sida pulai baru ngagai Nuan.”
38 TUHAN lalu ngasuh api nurun ari langit. Api nya lalu nganguska piring, kayu, enggau batu nya, ngasuh tanah dia angat, lalu ngerangkaika ai ti dalam parit nya.
39 Lebuh orang mayuh meda nya, sida lalu nyungkurka diri ke tanah, lalu bejaku enggau nyawa ti inggar, “TUHAN meh Allah Taala. Semina TUHAN siku aja ti Allah Taala!”
40 Elijah lalu bejaku ngagai sida, “Tangkap bala nabi Baal. Anang nejuka sida rari!” Orang mayuh lalu nangkap semua nabi Baal. Elijah lalu mai sida ngagai anak sungai Kison, lalu munuh sida dia.
 
Hari Badu Agi Kemarau
41 Udah nya Elijah lalu bejaku ngagai Raja Ahap, “Alai nuan makai. Aku bisi ninga munyi auh ujan datai.”
42 Lebuh Ahap mansang makai, Elijah niki ngagai tuchung Bukit Karmel. Dia iya lalu meremika diri ke tanah. Pala iya ba entara patung iya.
43 Ku iya bejaku ngagai orang gaji iya, “Uji perening tunga ke tasik.” Orang gaji iya mupuk, lalu pulai baru. Ku iya, “Nadai aku meda utai.” Elijah ngasuh iya ninjau tujuh kali.
44 Chukup ketujuh kali, orang gaji nya pulai, lalu ku iya, “Aku bisi meda siti mua hari mesai tapa jari, datai ari tasik.”Elijah lalu bejaku ngagai orang gaji iya, “Alai nuan mansang ngagai Raja Ahap, lalu asuh iya nepan kerita perang iya, lalu pulai, enggai ke iya tepagang laban ujan.”
45 Enda lama udah nya langit nyau chelum laban mua hari. Ribut belabuh muput, lalu hari bangat amat ujan. Ahap nepan kerita perang iya, lalu mupuk pulai ngagai Jesril.
46 Kuasa TUHAN lalu datai ngagai Elijah. Iya nyintalka gari iya erat ba punggung iya, lalu belanda dulu ari Ahap nyentuk ngagai Jesril.
 
Bagi 19
Elijah Ba Bukit Sinai
1 Raja Ahap lalu madahka ngagai bini iya Jesebel pasal semua utai ti udah dikereja Elijah, enggau chara iya munuh semua nabi Baal.
2 Jesebel lalu ngirumka pesan ngagai Elijah, “Awakka bala petara munuh aku enti aku, lebuh maya tu pagila, enda ngereja ngagai nuan utai ti udah dikereja nuan ngagai bala nabi Baal.”
3 Elijah takut, lalu rari. Iya mai orang gaji iya, lalu mansang ngagai Beer-seba di menua Judah.
Iya lalu ninggalka orang gaji iya dia.
4 Elijah bejalai sehari nya ngagai menua puang. Iya ngetu lalu duduk belindung di baruh sepun kayu, ngajihka diri mati. “Utai tu kelalu balat, TUHAN,” ku iya besampi. “Ambi nyawa aku. Manah agi aku mati!”
5 Iya gali di baruh kayu nya, lalu tinduk. Tekala nya siku melikat lalu negu iya, lalu ku melikat nya bejaku, “Dani, lalu makai.”
6 Elijah malik lalu tepedaka siti tuku roti enggau sigi kebuk ai semak pala iya. Iya makai, ngirup, lalu gali baru.
7 Melikat TUHAN datai baru, lalu ngerak iya kedua kali. Ku melikat nya bejaku, “Angkat lalu makai, enggai ke nuan enda ulih bejalai.”
8 Elijah angkat, makai, ngirup, lalu pemakai nya chukup ngasuh iya kering bejalai empat puluh hari ngagai Sinai, bukit ti kudus.
9 Iya lalu tama ngagai siti lubang gua, lalu bemalam dia. Tekala nya TUHAN lalu bejaku ngagai iya, “Elijah, nama pengawa nuan ditu?”
10 Ku Elijah nyaut, “TUHAN ti Pemadu Bekuasa, aku endang seruran betuaika Nuan siku aja. Tang orang Israel udah ngelanggar sempekat sida enggau Nuan, udah ngeruntuhka alta Nuan, lalu udah munuh semua bala nabi Nuan. Ka semina aku aja ti agi idup, lalu sida nguji munuh aku!”
11 “Pansut nuan, lalu bediri di mua Aku ba atas bukit,” ku TUHAN bejaku ngagai iya. Udah nya TUHAN mansa, lalu ngasuh ribut ti deras datai, ti mechahka bukit, lalu mambarka batu, tang TUHAN nadai dalam ribut nya. Ribut nya ngetu muput. Udah nya tanah lalu berenyang, tang TUHAN nadai dalam tanah ti berenyang nya.
12 Udah bekau tanah berenyang, api lalu datai, tang TUHAN nadai dalam api nya. Lebuh api udah datai, nyawa lalu bisi betelai.
13 Lebuh Elijah ninga nya, iya mampul mua diri ngena kelambi iya, lalu pansut, lalu bediri ba mua lubang gua nya. Nyawa siti lalu bejaku enggau iya, “Elijah, nama pengawa nuan ditu?”
14 Ku Elijah nyaut, “TUHAN ti Pemadu Bekuasa, aku endang seruran betuaika Nuan siku aja. Tang orang Israel udah ngelanggar sempekat sida enggau Nuan, udah ngeruntuhka alta Nuan, lalu munuh semua bala nabi Nuan. Ka semina siku aku aja agi tinggal, lalu sida nguji munuh aku.”
15 Ku TUHAN bejaku, “Alai nuan pulai ngagai menua puang semak Damaskus, udah nya tama ngagai nengeri nya, lalu tata Hasael nyadi raja menua Siria.
16 Tata mega Jehu anak Nimsi nyadi raja menua Israel, lalu tata mega Elisa anak Sapat ari Abel-meholah nganti nuan nyadi nabi.
17 Barang sapa enda kena bunuh Hasael, deka dibunuh Jehu, lalu barang sapa enda kena bunuh Jehu, deka dibunuh Elisa.
18 Tang Aku deka ngasuh tujuh ribu iku orang idup di menua Israel, iya nya semua orang ke taluk ngagai Aku, orang ke enda meremi ngagai Baal, tauka nyium engkeramba iya.”
 
Elisa Dikangauka
19 Elijah angkat lalu nemu Elisa benung ngeradu tanah ngena sepasang jelu sapi ti lelaki. Sebelas pasang jelu sapi bejalai dulu ari iya. Pasang ti dikena iya ngeradu tanah nya pasang ti penudi. Elijah muka kelambi iya, lalu ngerasukka kelambi nya ba Elisa.
20 Elisa lalu ninggalka jelu sapi iya, belanda nitihka Elijah. Ku iya, “Awakka aku meri selamat tinggal ngagai apai enggau indai aku. Udah nya baru aku bejalai enggau nuan.” Disaut Elijah, “Pulai meh nuan dulu. Enda aku nagang nuan!”
21 Udah nya Elisa mansang ngagai sapi iya, munuh sapi dua iku nya, lalu manduk dagin jelu nya, ngena kungkung sapi nya empu nyadika kayu api. Iya meri dagin nya ngagai orang mayuh, lalu sida makai. Udah nya iya mupuk, lalu nitihka Elijah, lalu nyadi penulung iya.
 
Bagi 20
Perang Ngelaban Menua Siria
1 Raja Benhadat menua Siria lalu ngempuruka semua bala soldadu iya. Iya disukung tiga puluh dua iku raja ti bukai enggau kuda enggau kerita kuda sida. Iya datai, ngelulung lalu nyerang nengeri Samaria.
2 Iya ngasuh bala seruan tama ngagai nengeri nya betemu enggau Raja Ahap menua Israel, mai pesan tu, “Raja Benhadat minta
3 nuan nyerahka ngagai iya pirak enggau emas nuan, bala indu kita, enggau bala anak kita ke pemadu kering.”
4 Raja Ahap lalu nyaut, “Padahka ngagai tuan aku, Raja Benhadat, aku besetuju. Iya tau bempu aku enggau semua utai aku.”
5 Udah nya bala seruan datai baru ngagai Ahap, mai siti agi peminta ari Benhadat, “Aku udah ngirumka pesan ngagai nuan, ngasuh nuan nyerahka ngagai aku pirak enggau emas nuan, bala indu ke diempu nuan, enggau bala anak nuan.
6 Tang diatu aku deka ngasuh bala pemesai aku nyerungkai istana nuan enggau rumah bala pemesai nuan, lalu ngambi semua utai ti dikira sida berega. Sida deka datai dia ba urung maya tu pagila.”
7 Raja Ahap lalu mesanka semua bala tuai dalam menua nya, lalu ku iya bejaku, “Kita nemu, orang tu deka ngerusak kitai. Iya udah ngirumka pesan ngagai aku, minta aku meri bala bini enggau bala anak aku, perengka pirak enggau perengka emas aku, lalu aku udah besetuju.”
8 Bala tuai enggau orang mayuh lalu nyaut, “Anang mendingka iya. Anang ngalahka diri.”
9 Nya alai Ahap lalu nyaut bala seruan Benhadat, “Padahka ngagai tuan raja aku, aku besetuju enggau peminta iya ti keterubah, tang aku enda besetuju enggau peminta iya ti kedua.” Bala seruan nya mupuk, lalu udah nya datai baru mai siti agi pesan
10 ari Benhadat: “Awakka bala petara munuh aku enti aku enda ngaga nengeri Samaria nyadi amau chukup kena ngisi tapa jari semua soldadu aku!”
11 Disaut Raja Ahap, “Padahka ngagai Raja Benhadat, orang ke amat nyadi soldadu semina temegah udah lepas perang, ukai sebedau beperang.”
12 Benhadat nerima saut ari Ahap lebuh iya, enggau sida raja ti bukai ke setanah enggau iya, agi benung ngirup dalam langkau kain sida. Iya lalu ngasuh bala soldadu iya sedia nyerang nengeri nya. Sida lalu belatur.
13 Lebuh maya nya, siku nabi betemu enggau Raja Ahap, lalu bejaku, “TUHAN bisi nyebut, ‘Anang takutka soldadu ti mayuh nya! Aku deka ngasuh nuan menang ngelaban bala soldadu nya sehari tu, ngambika nuan nemu, Aku tu endang TUHAN.’ “
14 “Sapa nguluka bala nyerang?” ku Ahap nanya.
Disaut nabi nya, “TUHAN madahka, bala soldadu ti agi biak, ke dipegai tuan gabenor pelilih menua deka nguluka bala.” Lalu ku Ahap nanya, “Sapa deka dulu ngelabuhka jari?” “Nuan,” ku nabi nya nyaut.
15 Raja lalu mesanka bala soldadu ti agi biak, ke diuluka bala gabenor pelilih menua, dua ratus tiga puluh dua iku semua sida. Udah nya iya lalu mesanka bala soldadu orang Israel, tujuh ribu iku semua sida.
16 Sida lalu nyerang munsuh ba urung tengah hari, lebuh Benhadat enggau tiga puluh dua iku raja bukai ke setanah enggau iya benung mabuk dalam langkau kain sida.
17 Bala soldadu ti agi biak bejalai dulu. Bala pematau ke diasuh Benhadat bejalai, madahka siti raban soldadu bisi pansut ari nengeri Samaria.
18 Benhadat lalu meri atur, “Tangkap sida idup-idup, nemuka sida nya datai deka nyerang, tauka mai kitai bebaik.”
19 Bala soldadu ti agi biak nya lalu nguluka orang nyerang, dientudika bala soldadu orang Israel,
20 lalu genap iku sida munuh orang ke dilaban sida. Orang Siria rari, digagai bala orang Israel, tang Benhadat rari nepan kuda, disempulang sekeda soldadu iya ke nepan kuda.
21 Raja Ahap lalu enggau orang betempuh, ngerampas kuda enggau kerita perang, lalu balat amat ngalahka orang Siria.
22 Udah nya nabi nya lalu mansang ngagai Raja Ahap, lalu bejaku, “Pulai nuan, tambahka bala soldadu nuan, lalu bejimat begagaka pelan, laban raja menua Siria deka nyerang baru lebuh musin bungai ti deka datai tu ila.”
 
Orang Siria Nyerang Kedua Kali
23 Ku bala pemesai Raja Benhadat bejaku enggau iya, “Bala petara orang Israel nya bekuasa di menua ti bebukit. Nya kebuah orang Israel ngalahka kitai. Tang kitai tetap deka ngalahka sida, enti kitai belaban enggau sida ba emperan.
24 Nya alai, anang agi ngasuh tiga puluh dua iku raja nyadi tuai bala. Ganti sida enggau bala tuai soldadu.
25 Udah nya pesanka bala soldadu ngemayuh sida ke udah rari ninggalka nuan, sereta enggau ngemayuh nya mega kuda enggau kerita perang. Kitai deka ngelaban orang Israel ba menua ti emperan. Sekali tu kitai deka ngalahka sida.” Raja Benhadat besetuju lalu nitihka jaku lalau sida.
26 Lebuh musin panas taun siti udah bekau nya, iya lalu mesanka bala iya, lalu bejalai enggau sida ngagai nengeri Apek, deka nyerang orang Israel.
27 Bala orang Israel lalu ditesau, lalu diberi senyata. Sida bejalai, dibagi ngagai dua iti raban, lalu nirika kem sida, betunga enggau bala soldadu orang Siria. Bala orang Israel baka dua raban kambin, enti dibandingka enggau bala orang Siria, ke ngachir ba sebelah endur ari luar nengeri nya.
28 Siku nabi lalu mansang ngagai Raja Ahap, lalu bejaku enggau iya, “Tu utai ti disebut TUHAN: ‘Laban orang Siria ngumbai Aku tu petara ti bekuasa di menua ti bebukit, lalu enda bekuasa ba menua ti emperan, Aku deka ngasuh kita menang, lalu ngalahka bala soldadu sida ke mayuh tu. Nya baru nuan enggau bala nuan deka nemu Aku endang TUHAN.”
29 Bala soldadu orang Siria enggau bala soldadu orang Israel diau dalam kem tujuh hari, betunga enggau pangan diri. Ba hari ti ketujuh sida lalu belabuh belaban, lalu bala orang Israel munuh seratus ribu iku orang Siria.
30 Bala orang Siria ti agi idup lalu rari ngagai nengeri Apek, alai dua puluh tujuh ribu iku sida ditinggang dinding kuta ti runtuh. Benhadat mega rari ngagai nengeri nya, lalu belalai dalam bilik di belakang sebuah rumah.
31 Bala pemesai iya betemu enggau iya, lalu ku sida bejaku, “Kami bisi udah ninga raja orang Israel nemu ngampun orang. Beri kami pemendar betemu enggau raja orang Israel, melitka kain guni ba punggung kami, enggau nanchangka tali ba rekung kami, nyangka ukur iya deka ngelakka nuan idup.”
32 Nya alai sida lalu melitka kain guni ba punggung sida, lalu nanchangka tali ba rekung sida, mansang ngagai Ahap, lalu bejaku, “Ulun nuan Benhadat minta nuan kasihka iya, lalu enda munuh iya.” Disaut Ahap, “Kati iya agi idup? Manah meh nya! Kami duai endang baka diri menyadi enggau pangan diri!”
33 Bala pemesai Benhadat endang nganti tanda ti manah. Nya alai, lebuh Ahap nyebut “menyadi,” sida lalu bepegai ba leka jaku nya, lalu ku sida, “Munyi ti ku nuan, Benhadat endang menyadi nuan!” “Bai iya ngagai aku,” ku Ahap bejaku enggau sida. Lebuh Benhadat datai, Ahap lalu mai iya nepan kerita perang iya.
34 Ku Benhadat bejaku enggau iya, “Aku deka mulaika ngagai nuan nengeri ti udah dirampas apai aku ari apai nuan, lalu nuan tau nirika siti endur alai bedagang di Damaskus, baka ke dikereja apai aku di Samaria.” Disaut Ahap, “Laban nuan deka ngereja utai nya, nya alai aku ngelepaska nuan.” Iya lalu ngaga siti sempekat enggau Benhadat, lalu ngelepaska iya.
 
Siku Nabi Besalah Ahap
35 Ari asuh TUHAN, siku ari bala sida nabi bejaku enggau pangan iya, ku iya, “Palu aku!” Tang orang nya enggai malu iya.
36  Lalu ku nabi nya bejaku enggau orang nya, “Laban nuan enda ngasika pesan TUHAN, siku jelu singa deka munuh nuan, lebuh nuan angkat ari tu.” Lebuh nabi nya mupuk, siku singa datai, lalu nerekam iya. Lalu iya mati.
37 Udah nya nabi ti udah ngasuh orang nya malu iya, mansang ngagai siku agi orang bukai, lalu bejaku, “Palu aku!” Orang nya lalu malu iya. Balat amat orang nya malu iya, lalu ngemediska iya.
38 Nabi nya lalu malut mua diri ngena kain, ngambika orang enda ngelala iya. Udah nya iya mupuk lalu bediri ba tisi jalai, nganti raja menua Israel mansa.
39 Lebuh raja mansa, nabi nya lalu ngangauka raja, ku iya, “Tuan Raja, aku udah enggau orang beperang. Siku soldadu udah mai ngagai aku siku munsuh ti udah kena tangkap, lalu ku soldadu nya bejaku enggau aku, ‘Jaga orang tu. Enti iya rari, nuan deka bebayarka nyawa iya ngena nyawa nuan empu, tauka diukum tiga ribu singkap duit pirak.’
40 Tang lebuh aku benung kiruh ngereja utai bukai, orang nya rari.”Disaut Raja Ahap, “Nuan udah ngukum diri empu. Nya alai nuan enda tau enda mayar ukum nya.”
41 Nabi nya lalu muka balut mua iya, lalu tekala nya Raja Ahap ngelala iya nya siku ari sida nabi.
42 Udah nya nabi nya lalu bejaku enggau raja, “Tu jaku TUHAN: ‘Laban nuan udah ngelepaska orang ke udah diasuh Aku bunuh nuan, nyawa nuan empu deka dikena nganti nyawa orang nya, lalu nyawa bala soldadu nuan deka dikena nganti nyawa bala soldadu orang nya.’ “
43 Raja Ahap lalu pulai ngagai nengeri Samaria, ringat pedis ati.
 
Bagi 21
Kebun Anggur Nabot
1 Semak istana Raja Ahap di Jesril bisi sebidang kebun anggur ti diempu orang siku ke benama Nabot.
2 Nyadi sekali Ahap bejaku enggau Nabot, “Beri kebun anggur nuan ngagai aku, laban kebun nuan semak istana aku, lalu aku deka ngena tanah nya alai aku nanam sayur. Aku deka meri nuan kebun anggur ti manah agi ari nya kena aku nyilih kebun nuan nya. Tauka, enti nuan deka, aku meli kebun nya enggau rega ti patut.”
3 “Kebun anggur nya pesaka ari aki ini aku,” ku Nabot nyaut. “Aku enda tau meri kebun nya ngagai Raja!”
4 Ahap lalu pulai, tusah ati sereta ringat ketegal jaku Nabot. Iya gali ba peninduk iya, nunga ngagai dinding, lalu enggai makai.
5 Bini iya Jesebel mansang ngagai iya, lalu nanya, “Nama kebuah nuan tusah ati, lalu enggai makai?”
6 Disaut Ahap, “Laban jaku Nabot enggau aku. Aku madahka diri deka meli kebun anggur iya, tauka, enti iya deka, aku meri iya sebidang kebun anggur ti bukai, kena aku nyilih kebun nya, tang iya madahka diri enggai!”
7 Disaut Jesebel, “Kati nuan tu raja tauka ukai? Angkat ari katil nya, lalu makai. Anang tusah ati. Ila aku ngulihka kebun anggur Nabot nya ke nuan!”
8 Udah nya Jesebel lalu nulis surat, nyain semua surat nya ngena nama Ahap, lalu ditanggam iya ngena chop Ahap. Udah nya iya lalu ngirumka surat nya ngagai bala pemesai enggau orang ke tinggi pangkat di Jesril.
9 Tu utai ti disebut dalam surat nya, “Letak hari alai bepasa. Kangauka orang mayuh begempuru, lalu asuh Nabot duduk ba penuduk orang ke tinggi pangkat.
10 Giga dua iku orang ke jai, lalu asuh seduai nya bedawaka iya mua mata madahka iya udah nyumpah Allah Taala sereta nyumpah raja. Udah nya, bai Nabot ke luar ari nengeri, lalu tuku iya ngena batu datai ke mati.”
11 Bala pemesai enggau orang ke tinggi pangkat di Jesril lalu ngereja utai ti diasuh Jesebel.
12 Sida ngeletak hari alai bepasa, ngangauka orang mayuh begempuru, lalu ngasuh Nabot duduk ba penuduk orang ke tinggi pangkat.
13 Orang dua iku ti jai nya lalu bedawaka Nabot di mua orang mayuh, madahka iya udah nyumpah Allah Taala sereta nyumpah raja. Nya alai Nabot dibai ke luar ari nengeri, dituku ngena batu, datai ke mati.
14 Pesan lalu dikirumka ngagai Jesebel, “Nabot udah dibunuh.”
15 Lebuh Jesebel nerima pesan nya, iya lalu bejaku enggau Ahap, “Nabot udah mati. Alai ambi kebun anggur iya.”
16 Ahap lalu tekala nya mansang ngagai kebun anggur nya lalu ngambu kebun nya ke iya empu.
17 Udah nya TUHAN lalu bejaku ngagai Elijah, siku nabi ari Tisbe,
18 “Alai nuan mansang ngagai Raja Ahap di Samaria. Nuan deka nemu iya ba kebun anggur Nabot, lebuh iya baru deka ngambu kebun nya.
19 Sebut ngagai iya munyi tu, ‘Ku TUHAN bejaku: Kati nuan udah munuh orang lalu ngerampas pesaka iya?’ Udah nya sebut ngagai iya, ‘Ku TUHAN bejaku: Ba endur alai ukui ti nilat darah Nabot, dia mega ukui deka nilat darah nuan!’ “
20 Lebuh Ahap meda Elijah, iya lalu bejaku, “O munsuh! Diatu baru nuan tetemuka aku.” “Amat,” ku Elijah nyaut. “Nuan udah, enggau pengabis ati nuan, angkun ngereja utai ti salah di mua TUHAN.
21 Nya alai TUHAN nyebut ngagai nuan, ‘Aku deka ngasuh penusah ti besai ninggang nuan. Aku deka muai nuan, lalu muai semua orang ke lelaki, ke tuai enggau ke biak ari ruang bilik nuan.
22 Ruang bilik nuan deka nyadi baka ruang bilik Raja Jeroboam anak Nebat, enggau baka ruang bilik Raja Baasa anak Ahijah, laban nuan udah ngeringatka ati Aku ketegal nuan udah nguluka orang Israel bedosa.’
23 Nyadi pasal Jesebel, TUHAN madahka ukui deka makai bangkai iya di nengeri Jesril.
24 Barang sapa ari bala kaban belayan nuan mati di nengeri Jesril, sida deka diempa ukui, lalu sida ke mati ari luar nengeri, deka diempa burung.”
25 (Nadai orang bukai udah kala ngemendar Ahap angkun ngereja utai ti salah di mua TUHAN - semua utai nya nyadi magang ari ansak bini iya Jesebel.
26 Iya ngereja dosa ti pemadu ngasuh malu, laban iya besembahka engkeramba, baka orang  Amor ti udah diburu TUHAN ari menua nya, lebuh orang Israel nyerang.)
27 Lebuh Elijah udah tembu bejaku, Ahap lalu nyarikka gari diri, lalu ngerasukka kain guni. Iya enggai makai. Iya tinduk ngena kain guni. Mua iya berupai tusah.
28 Ku TUHAN bejaku ngagai nabi Elijah,
29 “Kati nuan bisi meda chara Ahap ngemaruhka diri di mua Aku? Laban iya udah ngemaruhka diri di mua Aku, Aku enggai ngasuh penusah ti besai ninggang iya lebuh iya agi idup. Penusah ti besai nya deka ninggang ruang bilik iya lebuh maya anak iya ila.”
 
Bagi 22
Nabi Mikaiah Meri Jaku Tangkan Ngagai Ahap
1 Dalam kandang dua taun udah bekau nya, menua Israel enggau menua Siria nadai beperang ngelaban pangan diri agi,
2 tang dalam taun ti ketiga Raja Jehosapat menua Judah betemu enggau Raja Ahap menua Israel.
3 Ahap lalu nanya ngagai bala pemesai iya, “Nama kebuah kitai lalu enda ngerampas pulai baru nengeri Ramot-giliat ari raja menua Siria? Nengeri nya endang enggi kitai!”
4 Ahap lalu nanya Jehosapat, “Kati nuan deka enggau aku nyerang Ramot?” “Aku sedia, enti nuan sedia,” ku Jehosapat nyaut. “Bala soldadu enggau bala soldadu ke nepan kuda mega sedia.
5 Tang manah kitai betanya dulu ngagai TUHAN.”
6 Ahap lalu mesanka bala nabi, kira empat ratus iku bala sida. Iya lalu nanya sida, “Kati patut tauka enda aku nyerang Ramot?” “Serang,” ku sida nyaut, “laban TUHAN deka ngasuh nuan menang.”
7 Tang ku Jehosapat nanya, “Ukai enda bisi siku agi nabi ti tau diasuh kitai betanya ngagai TUHAN?”
8 Ahap lalu nyaut, “Bisi. Mikaiah anak Imlah. Tang aku begedika iya, laban iya nadai kala benabika utai ti manah ke aku. Iya selalu nyebut utai ti jai.” “Nuan enda tau bejaku munyi nya!” ku Jehosapat nyaut.
9 Udah nya Ahap lalu mesanka siku pemesai ke bekereja dalam istana lalu ngasuh iya mesanka Mikaiah tekala nya.
10 Raja dua iku nya, ke ngena pekayan raja, duduk ba kerusi diraja seduai iya ba endur alai orang ke ngindik gandum, di luar pintu nengeri Samaria. Semua nabi lalu benabi di mua seduai iya.
11 Siku ari bala sida, Sedekiah anak Chenaana, ngaga berapa iti tanduk besi, lalu bejaku enggau Ahap, ku iya, “Tu utai ti disebut TUHAN: ‘Nuan deka ngena tanduk besi tu nyerang lalu ngalahka semua orang Siria.’ “
12 Semua nabi ti bukai bela nyebut nya magang. Ku sida, “Serang meh Ramot. Nuan deka menang. TUHAN deka ngasuh nuan menang.”
13 Lebuh maya nya mega, pemesai ti udah bejalai ngambi Mikaiah, benung bejaku enggau iya, “Semua nabi bukai udah benabi magang madahka raja deka mujur, nya alai manah nuan mega benabi baka sida.”
14 Tang ku Mikaiah nyaut, “Aku besumpah dalam nama TUHAN ti idup, aku besemaya deka nyebut semina utai ti diasuh TUHAN!”
15 Lebuh iya bediri di mua Raja Ahap, raja nya lalu nanya iya, “Mikaiah, kati kami duai Raja Jehosapat patut nyerang Ramot, tauka enda?” “Serang aja!” ku Mikaiah nyaut. “Seduai endang tetap deka menang. TUHAN deka ngasuh seduai menang.”
16 Tang ku Ahap nyaut, “Lebuh nuan bejaku ngagai aku dalam nama TUHAN, sebut utai ti bendar! Berapa kali aku enda tau enda madahka nya ngagai nuan?”
17 Mikaiah lalu nyaut, “Aku bisi meda bala soldadu orang Israel ngachir ba sebelah bukit baka raban jelu bedus ti nadai orang ngibun. Lalu ku TUHAN bejaku, ‘Orang tu nadai kepala. Asuh sida pulai enggau selamat.’ “
18 Ku Ahap bejaku enggau Jehosapat, “Nya utai ti ku aku tadi. Iya nadai kala benabika utai ti manah ke aku. Iya seruran nyebut utai ti jai!”
19 Lalu ku Mikaiah nampung jaku iya, “Diatu pendingka utai ti disebut TUHAN! Aku meda TUHAN duduk ba kerusi diraja Iya di serega, lalu semua melikat Iya bediri ngimbai Iya.
20 Ku TUHAN nanya, ‘Sapa deka nipu Ahap ngambika iya mupuk lalu dibunuh di Ramot?’ Sekeda bala melikat nyebut tu, sekeda sida ti bukai nyebut nya.
21 Udah nya siku roh mansang ke mua ngagai TUHAN, lalu bejaku, ‘Awakka aku nipu Ahap.’
22 ‘Baka ni ku chara nuan deka nipu iya?’ ku TUHAN nanya. Ku roh nya nyaut, ‘Aku deka mupuk lalu ngasuh semua bala nabi ke bekereja ke Ahap madahka utai ti bula.’ Lalu ku TUHAN bejaku, ‘Mupuk meh nuan. Tipu meh iya. Nuan deka mujur.’ “
23 Ku Mikaiah ngujungka jaku iya, “Tu meh utai ti udah nyadi. TUHAN udah ngasuh bala nabi nuan ngemulaka nuan. Tang TUHAN Empu udah ngeletak nuan deka dituntung penusah!”
24 Udah nya Sedekiah lalu mansang ngagai Mikaiah, nampar mua iya, lalu nanya, “Kemaya Roh TUHAN udah kala ninggalka aku, lalu bejaku enggau nuan?”
25 Disaut Mikaiah, “Nuan deka nemu nya lebuh nuan tama ngagai bilik di belakang rumah, deka belalai.”
26 Udah nya Raja Ahap lalu bejaku enggau siku ari bala pemesai iya. Ku iya, “Tangkap Mikaiah, lalu bai iya ngagai Amon, tuan gabenor nengeri nya, enggau ngagai Anak Raja Joas.
27 Asuh sida nutup iya dalam rumah jil, lalu asuh sida meri iya semina roti enggau ai aja, nyentuk ngagai maya aku udah pulai beperang enggau selamat.”
28 Ku Mikaiah, “Enti nuan ulih pulai baru enggau selamat, reti nya, TUHAN nadai udah bejaku ngena aku!” Lalu ku iya nambahka jaku iya, “Pendingka ulih semua kita, utai ti udah disebut aku!”
 
Pemati Ahap
29 Udah nya Raja Ahap menua Israel enggau Raja Jehosapat menua Judah mansang nyerang nengeri Ramot-giliat.
30 Ku Ahap bejaku enggau Jehosapat, “Lebuh kitai nyerang, aku deka ngeluluka diri baka orang bukai, tang nuan ngena pekayan diraja nuan empu.” Nya alai raja menua Israel mansang beperang ngaga diri baka gamal orang bukai.
31 Nyadi raja menua Siria udah meri atur ngagai tiga puluh dua iku orang ke nyadi tuai bala ke nepan kerita perang, enda ngasuh sida nyerang orang bukai, tang semina raja menua Israel aja.
32 Nya alai, lebuh sida meda Raja Jehosapat, semua sida ngumbai iya raja menua Israel. Sida lalu nyerang iya. Tang lebuh iya nyerauh,
33 sida lalu nemu iya ukai raja menua Israel, lalu sida enda nyadi nyerang iya.
34 Tang seninjik amat, siku soldadu orang Siria nimbakka laja. Laja nya lalu kena ba sambung baju kebal Raja Ahap. “Bakal aku!” ku Ahap ngangau ngagai orang ke ngemudika kerita perang iya. “Nikal tua. Anang agi nyerang munsuh!”
35 Lebuh bala soldadu agi benung bamuk, Raja Ahap agi nyandih duduk dalam kerita perang iya, nunga ngagai bala orang Siria. Darah ari bakal iya pansut nelusur tubuh iya, lalu ngachir ba sebelah geladak kerita perang nya. Lemai nya iya mati.
36 Lebuh padam mata panas, atur lalu diberi ngagai semua soldadu orang Israel, “Pulai semua kita ngagai menua enggau nengeri kita empu!”
37 Nya meh gaya pemati Raja Ahap. Bangkai iya dibai ngagai Samaria, lalu dikuburka.
38 Kerita perang iya lalu dituchi ba siti telaga di Samaria. Ukui lalu bedilatka darah iya, ba endur alai bala indu sundal mandi, munyi ti udah disebut TUHAN.
39 Semua utai bukai ti udah dikereja Raja Ahap, nyengkaum cherita pasal istana iya ke dilagu iya ngena gading, enggau pasal semua nengeri ti udah digaga iya, bisi dituliska magang dalam  Jerita Lama Pasal Raja Menua Israel.
40 Lebuh iya mati, anak iya Ahasiah nganti iya nyadi raja.
 
Raja Jehosapat Menua Judah
41 Dalam taun ti keempat Raja Ahap megai perintah di menua Israel, Jehosapat anak Asa nyadi raja menua Judah,
42 lebuh umur iya tiga puluh lima taun. Lalu iya merintah di Jerusalem dua puluh lima taun. Indai iya Asubah anak Silhi.
43 Baka apai iya Asa ke dulu ari iya, iya mega ngereja utai ti ngena di mua TUHAN. Tang semua palan alai besembiang enda dirusak, lalu orang mayuh majak ngenjuk piring lalu nunu menyan ba endur nya.
44 Jehosapat bebaik enggau raja menua Israel.
45 Semua utai bukai ti udah dikereja Jehosapat, enggau pasal pemerani iya beperang, bisi dituliska magang dalam  Jerita Lama Pasal Raja Menua Judah.
46 Iya muai semua lelaki enggau indu ke bekereja nyadi sundal ba alta petara orang kapir ti agi tinggal ari maya apai iya Raja Asa.
47 Menua Edom nadai raja. Menua nya diperintah siku penulung raja ke diletak raja menua Judah.
48 Raja Jehosapat ngasuh orang ngaga kapal, ngambika bisi belayar ngagai menua Opir ngambi emas. Tang kapal nya karam di Esion-geber, lalu nadai kala belayar.
49 Udah nya Raja Ahasiah menua Israel madahka diri deka ngasuh bala kelasi iya nulung bala nembiak Jehosapat belayar. Tang Jehosapat enda nerima tulung nya.
50 Jehosapat mati lalu dikuburka ba lumbung bala raja di Nengeri David, lalu anak iya Jehoram nganti iya nyadi raja.
 
Raja Ahasiah Menua Israel
51 Dalam taun ti ketujuh belas Raja Jehosapat megai perintah di menua Judah, Ahasiah anak Ahap berengkah nyadi raja menua Israel, lalu iya merintah di Samaria dua taun.
52 Iya bedosa ngelaban TUHAN, nitihka teladan ti jai ari apai iya, ari indai iya Jesebel, enggau Raja Jeroboam, ti udah nguluka orang Israel bedosa.
53 Iya nyembah sereta betuaika Baal, lalu baka apai iya ke dulu ari iya, iya ngeringatka ati TUHAN Allah Taala ke disembah orang Israel.