PEMUNGKAL
 
Jaku Pemuka
Reti Pemungkal nya ‘Penumbuh’. Bup tu madahka pasal penumbuh langit enggau dunya, asal mensia, asal dosa enggau asal pemerinsa di dunya tu, lalu ngenang pasal orang ke nurunka bansa orang Israel, enggau pasal kaul Allah Taala enggau mensia. Bup Pemungkal tau dibagi ngagai dua iti sitak:
1) Bagi 1-11 ngenang pasal penumbuh langit enggau dunya enggau jerita lama pasal mensia ti dulu kelia. Jerita ba senentang tu ngundan jerita pasal Adam seduai Awa, Kain seduai Abel, Noah enggau bah besai, enggau menara Babel.
2) Bagi 12-50 ngundan jerita lama pasal orang ke nurunka bansa orang Israel. Orang ti keterubah nya Abraham ke tebilang ketegal pengarap iya, enggau pasal iya ke ngasika Allah Taala. Jerita nya lalu ditampung jerita pasal anak iya Isak, enggau uchu iya, Jakop (kedua bali nama, ‘Israel’), enggau anak Jakop ke dua belas iku, ke nurunka dua belas raban bansa orang Israel. Jerita lama dalam bup tu tebal agi ngenang pasal siku ari bala anak Jakop, ke benama Josep. Jerita tu mega ngenang pasal utai ti nyadi, ti ngujungka Jakop enggau anak iya ti bukai, sereta enggau sida sebilik, pindah ngagai menua Ejip lalu diau di menua nya.

Taja pen bup tu nyeritaka pasal mensia, utai ti udu agi dikemeranka nya nusui pasal utai ti udah dikereja Allah Taala. Bup tu bepun ba jerita pasal Allah Taala ti ngaga dunya, lalu diujungka enggau semaya Allah Taala ti deka seruran ngemataka nembiak iya. Bup tu ngenang pasal Allah Taala ti ngakim lalu ngukum orang ke ngereja penyalah, sereta nulung enggau nguluka nembiak Iya nitihka juluk ati Iya. Bup tu ditulis kena ngingatka jerita pasal pengarap orang Israel, lalu dikena negapka pengarap sida.
 
Ripih Isi Bup Tu
Penumbuh langit enggau dunya, enggau asal mensia (1.1-2.25)
Pun dosa enggau pemerinsa (3.1-24)
Ari Adam ngagai Noah (4.1-5.32)
Noah enggau bah besai (6.1-10.32)
Menara Babel (11.1-9)
Ari Sem ngagai Abram (11.10-32)
Aki ini orang Israel: Abraham, Isak, Jakop (12.1-35.29)
Peturun Esau (36.1-43)
Josep enggau sida menyadi iya (37.1-45.28)
Orang Israel di menua Ejip (46.1-50.26)
 
Bagi 1
Penumbuh Dunya
1 Ba pun iya kelia, * lebuh Allah Taala berengkah ngaga langit enggau dunya,
2 dunya endang apin bisi bakal tauka gamal sereta nadai utai nguan. Semina ribut ti deras ari Allah Taala aja ti bepuput atas tasik ti agi petang.
3 Allah Taala lalu bejaku, “Awakka penampak pegari.” Penampak lalu pegari.
4 Allah Taala meda penampak nya manah; lalu Iya nyeraraka penampak nya ari pemetang.
5 Iya ngumbai penampak nya “Siang” lalu pemetang nya dikumbai Iya “Malam.” Lemai abis lalu pagi pen datai. Nya hari ti keterubah.
6 Lalu ku Allah Taala bejaku, “Awakka kebung pegari kena nyeraraka ai ti di atas ari ai ti di baruh.
7 Nya alai Allah Taala ngaga kebung nya lalu nyeraraka ai ti di baruh kebung nya ari ai ti ari atas kebung nya. Utai nya lalu nyadi.
8 Iya ngumbai kebung nya “Langit.” Lemai abis lalu pagi pen datai. Nya hari ti kedua.
9 Udah nya Allah Taala bejaku, “Awakka ai ti di baruh langit begelumu ba siti endur, ngambika tanah pegari.” Utai nya lalu nyadi.
10 Iya ngumbai tanah “Darat,” lalu ai ti begelumu dikumbai Iya “Tasik.” Lalu Allah Taala meda utai nya manah.
11 Udah nya Iya bejaku, “Awakka tanah mansutka semua macham utai ti tumbuh: utai ti mansutka leka, enggau semua macham kayu ti mansutka buah ti bisi leka.” Utai nya lalu nyadi.
12 Nya alai, tanah mansutka semua macham utai ti tumbuh, lalu Allah Taala meda utai nya manah.
13 Lemai abis lalu pagi pen datai. Nya hari ti ketiga.
14 Udah nya Allah Taala bejaku, “Awakka mayuh macham penampak pegari di langit, kena nyeraraka siang ari malam, enggau kena nunjukka maya hari, taun enggau maya gawai belabuh.
15 Sida deka manchar di langit lalu meri penampak ngagai dunya.” Utai nya lalu nyadi.
16 Nya alai Allah Taala ngaga dua igi penampak ti besai, iya nya mata hari ti bekuasa lebuh siang hari, enggau bulan ti bekuasa lebuh malam hari. Iya mega ngaga bintang.
17 Iya ngengkahka semua penampak nya di langit, ngambika sida manchar ngagai dunya,
18 bekuasa lebuh siang enggau lebuh malam hari, sereta nyeraraka penampak ari pemetang. Lalu Allah Taala meda utai nya manah.
19 Lemai abis lalu pagi pen datai. Nya hari ti keempat.
20 Udah nya Allah Taala bejaku, “Awakka ai penuh laban semua bansa utai ti idup, lalu awakka burung terebai di langit.”
21 Nya alai Allah Taala ngaga jelu ti besai sereta nyelai di tasik, semua bansa utai ti idup dalam ai, enggau semua bansa burung. Lalu Allah Taala meda utai nya manah.
22 Iya merekatka semua sida, lalu ngasuh utai ti idup dalam ai beranak betelesak, lalu ngemenuhka tasik. Iya mega ngasuh burung beranak betelesak di dunya.
23 Lemai abis lalu pagi pen datai. Nya hari ti kelima.
24 Udah nya Allah Taala bejaku, “Awakka dunya mansutka semua bansa jelu ti idup: jelu tupi, jelu babas, enggau jelu ti ngerayap.” Utai nya lalu nyadi.
25 Nya alai Allah Taala ngaga semua bansa jelu, lalu Iya meda semua utai nya manah magang.
26 Udah nya Allah Taala bejaku, “Aram Kitai ngaga mensia neladan gamal Kitai Empu, baka gamal Kitai Empu; lalu awakka sida bekuasa atas ikan, burung, enggau semua jelu di dunya tu, enggau semua utai ti ngerayap ba tanah.”
27 Nya alai Allah Taala ngaga mensia neladan gamal Iya Empu; Iya ngaga sida lelaki enggau indu.
28 Allah Taala merekatka sida, lalu bejaku ngagai sida, “Beranak betelesak lalu ngemenuhka dunya meh kita sereta bekuasa atas iya; perintah meh ikan, burung, enggau semua utai ti idup di dunya.”
29 Ku Allah Taala bejaku, “Aku meri kita semua macham leka utai enggau semua macham buah nyadika pemakai kita;
30 lalu ke semua bansa jelu babas ti di dunya, enggau ke semua bansa burung, Aku meri sida rumput enggau utai ti bisi daun nyadika pemakai sida.” Utai nya lalu nyadi.
31 Allah Taala meda semua utai ti udah digaga Iya manah magang. Lemai abis lalu pagi pen datai. Nya hari ti keenam.
 
Bagi 2
1 Nya alai langit enggau dunya, enggau semua utai ti dalam sida tembu magang digaga.
2 Ba hari ti ketujuh Allah Taala tembu ngereja semua pengawa Iya, lalu ngetu gawa.
3 Iya merekatka hari ti ketujuh nya, lalu ngeletak hari nya kudus, laban ba hari nya Iya tembu ngaga semua utai ti digaga Iya, lalu Iya belelak lalu ngetu gawa.
4 Nya meh jalai langit enggau dunya digaga.
 
Kebun Eden
Lebuh TUHAN ngaga langit enggau dunya,
5 nadai utai udah tumbuh di dunya, lalu nadai leka utai udah matuk, laban TUHAN Allah Taala apin ngasuh hari ujan, lalu mensia pen apin mega bisi gawa ba tanah;
6 tang ai deka pansut ari dalam tanah, lalu ngemasahka tanah.
7 Udah nya TUHAN Allah Taala nempa mensia ari amau l tanah m lalu ngesuhka seput pengidup ke dalam lubang idung iya, lalu mensia nya idup.
8 Udah nya TUHAN Allah Taala ngaga siti kebun di menua Eden, ti muak ke timur, lalu ngengkahka orang ke udah ditempa Iya ba kebun nya.
9 TUHAN Allah Taala ngasuh semua bansa kayu ti manah dipeda sereta manah ke pemakai tumbuh dia. Ba tengah-tengah kebun nya bisi mega sepun kayu pengidup, enggau sepun kayu ti meri penemu kena ngelala bida entara utai ti manah ari utai ti jai. n
10 Siti sungai pansut ari Eden ti mai ai ngagai kebun nya, lalu ngilah kebun nya sungai nya bepati empat.
11 Nama pati ti terubah nya Pison. Ai sungai nya rarat nengah menua Habilah.
12 (Emas tulin bisi ditemu dia, lalu pia mega minyak wangi enggau batu ti berega.)
13 Nama pati ti kedua nya Gihon. Ai sungai nya rarat nengah menua Kus.
14 Nama pati ti ketiga nya Tigris. Ai sungai nya rarat tunga ke timur menua Asiria, lalu pati ti keempat nya Eupratis.
15 Udah nya TUHAN Allah Taala ngengkahka orang nya ba kebun Eden, ngambika iya gawa dia lalu nyaga kebun nya.
16 Ku TUHAN Allah Taala bejaku ngagai orang nya, “Nuan tau makai buah ari semua kayu dalam kebun tu,
17 tang nuan enda tau makai buah ari kayu penemu ti tau ngasuh nuan nemu semua utai, laban lebuh nuan makai buah nya, nuan deka mati.”
18 Udah nya TUHAN Allah Taala bejaku, “Enda manah orang tu diau kediri. Aku deka ngaga siku penulung ke iya, nyadika tawing iya.”
19 TUHAN Allah Taala lalu nempa ari tanah semua bansa jelu enggau semua bansa burung. Udah nya Iya lalu mai sida ngagai orang nya, ngambika iya meri sida nama. Nya meh jalai sida bulih nama.
20 Nya alai orang nya meri nama ngagai semua bansa jelu tupi, semua bansa burung, enggau semua bansa jelu babas; tang nadai siku sida nya ditemu tau nyadika penulung enggau kaling iya.
21 Nya alai TUHAN Allah Taala ngasuh orang nya tinduk jenak. Orang nya lalu tinduk. Udah nya TUHAN Allah Taala lalu ngambi siti tulang kerigai orang nya, lalu nampal abi nya ngena isi.
22 TUHAN Allah Taala lalu nempa siku indu ari tulang kerigai nya, lalu mai indu nya ngagai iya.
23 Orang nya lalu bejaku, “Tu baru sedarah, segetah enggau aku saum tulang, saum isi enggau aku. Iya dikumbai “Indu”, laban iya udah diambi ari lelaki.”
24 Nya kebuah lelaki ninggalka apai indai iya, lalu begulai enggau bini iya, lalu seduai iya nyadi siku.
25 Seduai iya sama telanjai, tang seduai iya enda malu.
 
Bagi 3
Penyalah Mensia
1 Nyadi ular nya jelu ti pintar agi ari semua jelu bukai ti udah digaga TUHAN Allah Taala. Ular nya lalu bejaku ngagai indu nya, “Kati amat Allah Taala enda nyagi seduai makai buah ari semua kayu ti dalam kebun tu?”
2 Disaut indu nya, “Kami duai tau makai buah ari sebarang kayu dalam kebun tu,
3 tang Allah Taala madahka kami duai enda tau makai buah ari kayu ti ba tengah-tengah kebun, tauka negu buah kayu nya, enggai ke kami duai mati.”
4 Tang ku ular nya nyaut indu nya, “Enda seduai mati,
5 laban Allah Taala nemu, lebuh seduai makai buah nya, seduai deka nyadi sebaka enggau Allah Taala, nemu ngelala bida entara utai ti manah enggau utai ti jai.”
6 Lebuh indu nya meda buah kayu nya manah ke pemakai sereta manah dipeda, lalu tau ngasuh pintar, iya lalu makai buah nya. Iya mega meri sekeda buah nya ngagai laki iya, ke bisi enggau iya, lalu laki iya mega makai buah nya.
7 Lebuh seduai iya udah makai buah nya, mata seduai iya tebuka, lalu seduai iya nemu diri telanjai. Seduai iya lalu nyait daun kayu ara, kena seduai iya mampul tubuh diri.
8 Lemai nya seduai iya ninga TUHAN Allah Taala bejalai dalam kebun. Seduai iya lalu belalai ari TUHAN Allah Taala ba sebelah madang kayu dalam kebun nya.
9 Ta ng TUHAN Allah Taala ngangauka lelaki nya, ku Iya, “Dini alai nuan?”
10 Lelaki nya lalu nyaut, “Aku ninga Nuan bisi dalam kebun, lalu aku takut, laban aku telanjai. Nya alai aku belalai.”
11 TUHAN Allah Taala lalu nanya iya, “Sapa madahka nuan telanjai? Kati nuan bisi udah makai buah ti enda disagi Aku empa nuan?”
12 Lelaki nya lalu nyaut, “Indu ke diberi Nuan nyadika tawing kaling aku, ke meri buah ari kayu nya ngagai aku, lalu aku makai.”
13 TUHAN Allah Taala lalu bejaku ngagai indu nya, “Nama kebuah nuan ngereja nya?” Indu nya lalu nyaut, “Ular nya ti nipu aku, lalu aku makai buah nya.”
 
Allah Taala Ngeletak Ukum
14 TUHAN Allah Taala lalu bejaku ngagai ular nya, “Laban nuan udah ngereja nya, nuan deka kena sumpah. Ari semua bansa jelu, ka semina nuan aja deka ditinggang sumpah tu. Kenyau ari diatu nuan deka ngerayap ngena perut nuan, lalu nuan deka makai amau seumur idup.
15 Aku deka ngasuh nuan enggau indu tu begedika pangan diri. Anak iya enggau anak nuan deka seruran bemunsuh enggau pangan diri. Anak iya deka ngeredakka pala nuan, lalu nuan deka mantuk tumbit anak iya.” 
16 TUHAN Allah Taala lalu bejaku ngagai indu nya, “Aku deka nambahka pemerinsa nuan lebuh nuan ngandung, lalu nambahka pemedis nuan lebuh nuan beranak, tang taja pia, nuan deka seruran inginka laki nuan, lalu iya deka bekuasa atas nuan.”
17 TUHAN Allah Taala lalu bejaku ngagai lelaki nya, “Laban nuan udah mendingka jaku bini nuan, lalu udah makai buah ti enda disagi Aku, nya alai tanah deka kena sumpah, lalu nuan deka bebendar gawa ngulihka pemakai ari tanah seumur nuan idup.
18 Tanah deka tumbuh rumput enggau duri, lalu nuan deka bepakaika utai ti diambi ari babas.
19 Nuan deka bepeluh tusur ngulihka asil ari tanah, nyentuk ngagai maya nuan pulai baru ngagai tanah, laban nuan endang ditempa ari tanah. Nuan endang digaga ari amau, u r 3. 19 q Tauka: t abus* nya alai ngagai amau meh nuan pulai.”
20 Adam ngumbai bini iya Awa, laban iya indai semua mensia.
21 TUHAN Allah Taala lalu ngaga gari ari kulit jelu ke Adam enggau bini iya, lalu ngerasukka gari nya ba seduai iya.
 
Adam Seduai Awa Diburu Ari Kebun Eden
22 TUHAN Allah Taala lalu bejaku, “Mensia nyau sebaka enggau Kitai, nemu bagi utai ti manah enggau utai ti jai.  Sida enda tau ngambi buah ari kayu pengidup, enggai ke sida makai buah nya, lalu idup belama iya.”
23 Nya alai TUHAN Allah Taala muai seduai iya ari kebun Eden lalu ngasuh seduai iya gawa beridup ba tanah ti udah dikena nempa seduai iya empu.
24 Udah nya TUHAN Allah Taala ngengkahka melikat cherubim enggau pedang ti beapi-api, ti mantap kia-kia, ba tisi timur kebun nya kena nyaga jalai ngagai kayu pengidup nya.
 
Bagi 4
Kain Seduai Abel
1 Udah nya Adam lalu besetubuh enggau bini iya. Bini iya ngandung, lalu ngadaka anak lelaki siku. Ku bini iya bejaku, “Aku ngadaka anak lelaki tu ari saup TUHAN.” Nya alai iya meri iya nama Kain.
2 Udah nya iya ngadaka siku agi anak lelaki benama Abel. Abel nyadi pengibun bedus, lalu Kain nyadi orang bumai.
3 Nyau kelama udah bekau nya, Kain mai sekeda utai ti diketau iya, lalu meri utai nya nyadika piring ngagai TUHAN.
4 Udah nya Abel mai anak bungas ari raban bedus iya, nyayat jelu nya, lalu meri perengka tubuh ti pemadu manah nyadika piring. TUHAN rinduka Abel enggau piring iya,
5 tang Iya enda rinduka Kain enggau piring iya. Kain ringat, lalu mua iya mengut-mengut.
6 Udah nya TUHAN lalu bejaku enggau Kain, “Nama kebuah nuan ringat, lalu mengut-mengut?
7 Enti nuan udah ngereja utai ti ngena, nuan tentu deka tuchum; tang laban nuan udah ngereja utai ti jai, dosa diatu benung ngipa nuan ba mua pintu nuan. Iya keran deka merintah nuan, tang nuan enda tau enda ngalahka iya.”
8 Udah nya Kain bejaku enggau menyadi iya Abel, “Aram tua ke babas.”  Lebuh seduai iya di babas, Kain ngamuk lalu munuh menyadi iya.
9 TUHAN lalu nanya Kain, “Dini alai menyadi nuan Abel?” Disaut Kain, “Nadai aku nemu. Kati aku pengibun menyadi aku?”
10 Udah nya TUHAN lalu bejaku, “Nama utai tu ti udah dikereja nuan? Darah menyadi nuan nyabak ngangauka Aku ari tanah.
11 Lalu diatu nuan kena sumpah ari tanah ti udah merangapka nyawa nerima darah menyadi nuan ti neritik ari jari nuan.
12 Lebuh nuan bumai ba tanah, tanah nya enda mansutka asil. Nuan deka bejalai segau-segau di dunya tu, nadai endur alai diau.”
13 Ku Kain bejaku enggau TUHAN, “Ukum tu kelalu berat ke aku.
14 Sehari tu Nuan muru aku ari menua tu enggau ari mua Nuan. Aku deka bejalai segau-segau di dunya tu, nadai endur alai diau, lalu barang sapa tetemuka aku, deka munuh aku.”
15 Tang ku TUHAN nyaut, “Ukai baka nya. Enti orang munuh nuan, orang nya deka diukum tujuh kali lipat.” TUHAN lalu ngengkahka siti kelai ba Kain, enggai ke orang ke betemu enggau iya munuh iya.
16 Kain lalu beserara ari TUHAN, lalu diau di menua ti dikumbai “Segau-segau,” muak ke timur ari menua Eden.
 
Peturun Kain
17 Kain enggau bini iya bisi siku anak lelaki benama Enok. Udah nya Kain lalu nirika sebuah nengeri, lalu iya ngumbai nengeri nya Enok, ngangkatka nama anak iya.
18 Enok bisi siku anak lelaki benama Irat. Irat nya apai Mehujael. Mehujael bisi siku anak lelaki benama Metusael. Metusael nya apai Lamek.
19 Lamek bisi dua iku bini, Adah enggau Silah.
20 Adah ngadaka Jabal, ke nurunka orang ke betupika jelu, lalu diau dalam langkau kain.
21 Menyadi iya ke benama Jubal, nurunka semua orang ke nebah belikan enggau kesuling.
22 Silah ngadaka Tubal Kain, ke begagaka semua macham pekekas kena gawa ari temaga enggau ari besi. Menyadi indu Tubal Kain nya Naamah.
23 Ku Lamek bejaku enggau bini iya ke dua iku nya, “Adah enggau Silah, pendingka aku: Aku udah munuh siku lelaki, laban iya ngemakalka aku.
24 Enti orang ke munuh Kain diukum tujuh kali lipat, orang ke munuh Lamek deka diukum tujuh puluh tujuh kali lipat.”
 
Set Enggau Enos
25 Adam enggau bini iya bisi siku agi anak lelaki. Ku bini iya bejaku, “Allah Taala udah meri aku siku anak lelaki kena nganti Abel ti udah dibunuh Kain.” Nya alai Awa meri iya nama Set
26 Set bisi siku anak lelaki benama Enos. Nya meh maya mensia belabuh ngangauka nama TUHAN.
 
Bagi 5
Peturun Adam
1 Baka tu ku ripih peturun Adam. (Lebuh Allah Taala ngaga mensia, Iya ngaga sida baka gamal Iya Empu.
2 Iya ngaga sida lelaki enggau indu, merekatka sida, lalu ngumbai sida “Mensia”)
3 Lebuh umur Adam 130 taun, iya bisi siku anak lelaki ke sebaka gamal enggau iya empu, lalu iya meri iya nama Set.
4 Udah nya Adam idup 800 taun. Iya bisi anak ti bukai
5 lalu iya mati umur 930 taun.
6 Lebuh Set umur 105 taun, iya bisi anak lelaki siku benama Enos,
7 lalu Set idup 807 taun udah lepas nya. Iya bisi anak ti bukai
8 lalu iya mati umur 912 taun.
9 Lebuh umur Enos 90 taun, iya bisi siku anak lelaki benama Kenan,
10 lalu Enos idup 815 taun udah lepas nya. Iya bisi anak ti bukai,
11 lalu iya mati umur 905 taun.
12 Lebuh Kenan umur 70 taun, iya bisi siku anak lelaki benama Mahalalel,
13 lalu Kenan idup 840 taun udah lepas nya. Iya bisi anak ti bukai
14 lalu iya mati umur 910.
15 Lebuh Mahalalel umur 65 taun, iya bisi siku anak lelaki benama Jaret,
16 lalu Mahalalel idup 830 taun udah lepas nya. Iya bisi anak ti bukai
17 lalu iya mati umur 895 taun.
18 Lebuh umur Jaret 162 taun, iya bisi anak lelaki siku benama Enok,
19 lalu Jaret idup 800 taun udah lepas nya. Iya bisi anak ti bukai
20 lalu iya mati umur 962 taun.
21 Lebuh umur Enok 65 taun, iya bisi siku anak lelaki benama Metuselah.
22 Udah bekau nya, Enok diau begulai sejalai enggau Allah Taala 300 taun, lalu bisi anak ti bukai.
23 Enok idup datai ngagai umur 365 taun.
24 Iya diau begulai sejalai enggau Allah Taala, lalu udah nya iya lesap, laban Allah Taala ngambi iya.
25 Lebuh Metuselah umur 187 taun, iya bisi siku anak lelaki benama Lamek,
26 lalu Metuselah idup 782 taun udah lepas nya. Iya bisi anak ti bukai
27 lalu iya mati umur 969 taun.
28 Lebuh Lamek umur 182 taun, iya bisi siku anak lelaki
29 lalu ku iya, “Anak mit tu deka ngelantangka kitai ti ngereja pengawa ti mar ba tanah ti udah disumpah TUHAN”. Nya alai iya meri iya nama Noah.
30 Lamek idup 595 taun udah lepas nya. Iya bisi anak ti bukai
31 lalu iya mati umur 777 taun.
32 Lebuh Noah umur 500 taun, iya bisi tiga iku anak lelaki, Sem, Ham enggau Japet.
 
Bagi 6
 Penyai Mensia
1 Lebuh mensia udah diau ngachir di serata dunya, lalu ngadaka anak indu,
2 sekeda anak Allah Taala meda sida indu nya bajik gamal. Nya alai sida lalu jadi enggau indu ke dikerinduka sida.
3 Udah nya TUHAN lalu bejaku, “Aku enda nyagi mensia idup belama iya, laban sida endang tau mati. Belabuh ari diatu sida enda tau idup ngelui 120 taun.”
4 Lebuh maya nya kelia, enggau udah lepas nya, orang ke besai gamal bisi diau di dunya tu. Sida nya peturun indu mensia ti jadi enggau bala anak Allah Taala. Sida nya bujang berani ti tampak nama dulu kelia.
5 Lebuh TUHAN meda penyai semua orang di dunya tu, enggau runding sida ke seruran jai,
6 Iya ngesal udah ngaga sida lalu ngengkahka sida di dunya tu. Iya balat amat ngesalka nya
7 datai ke Iya nyau bejaku, “Aku deka munuh semua mensia ti udah digaga Aku, enggau jelu enggau burung, laban Aku ngesal udah ngaga sida.”
8 Tang Noah ngelantangka ati TUHAN.
 
Noah
9-10 Tu jerita pasal Noah. Iya bisi tiga iku anak lelaki, Sem, Ham, enggau Japet. Noah nya orang ke nadai penyalah. Semina iya siku aja ke lurus lebuh rambau iya kelia. Iya diau begulai sejalai enggau Allah Taala,
11 tang semua orang bukai jai magang di mua Allah Taala, lalu penyai udah ngelekai ngagai semua endur.
12 Allah Taala merening lalu meda penyai dunya, laban semua mensia bela ngereja penyai magang.
13 Allah Taala lalu bejaku enggau Noah, “Aku deka ngeluska semua mensia. Aku deka ngerusak sida abis lengis, laban dunya tu penuh laban pengawa sida ke jai.
14 Gaga sebuah bandung ke diri empu ngena kayu ramu ti manah. Sapat bandung nya ngagai mayuh bengkah bilik, lalu pelali iya ngena tar, ari dalam enggau ari luar.
15 Pemanjai iya seratus tiga puluh tiga meter, buka iya dua puluh dua meter, lalu peninggi iya tiga belas meter.
16 Gaga perabung ke bandung nya, lalu gaga lubang penyenguk empat puluh empat sentimeter peninggi entara perabung enggau gandung bandung nya. Gaga tiga tingkat dalam bandung nya, lalu gaga siti pintu ba tisi bandung nya.
17 Aku deka ngasuh ai bah ngampuhka dunya kena ngerusak semua utai ti idup. Semua utai di dunya tu deka mati magang,
18 tang Aku deka ngaga siti sempekat enggau nuan. Nuan, bini nuan, sida anak nuan, enggau bini sida, enda tau enda tama ngagai bandung nya.
19-20 Lebuh nuan tama ngagai bandung nya, bai siku lelaki enggau siku indu ari semua bansa jelu, enggau semua bansa burung, ngambika sida mengkang idup.
21 Bai semua bansa pemakai ke kita empu, enggau ke sida.”
22 Noah lalu ngereja semua utai nitihka asuh Allah Taala.
 
Bagi 7
 Bah Besai
1 Ku TUHAN bejaku ngagai Noah, “Bai semua kita sebilik tama ngagai bandung nya. Aku nemu, ka semina nuan siku aja dalam dunya tu ti ngereja utai ti ngena.
2 Bai enggau nuan tujuh pasang ari semua bansa jelu ti tuchi, tang semina sepasang aja ari semua jelu ti enda tuchi.
3 Bai mega tujuh pasang ari semua bansa burung. Kereja nya, ngambika semua bansa jelu enggau burung deka mengkang idup lalu beranak betelesak baru di dunya tu.
4 Tujuh hari da agi, Aku deka ngasuh hari ujan 40 hari, 40 malam, kena ngerusak semua utai ti idup, ti udah digaga Aku.”
5 Noah lalu ngereja semua utai nitihka asuh TUHAN.
6 Umur Noah 600 taun lebuh bah besai nya nyadi di dunya tu.
7 Iya enggau bini iya, enggau anak iya, enggau bini sida, tama ngagai bandung nya, ngerarika diri ari bah besai nya.
8 Siku lelaki enggau siku indu ari semua bansa jelu enggau burung, nemuka sida nya tuchi tauka enda,
9 tama ngagai bandung nya sama enggau Noah, munyi ti udah diasuh Allah Taala.
10 Tujuh hari udah bekau nya, bah besai lalu nyadi.
11 Lebuh umur Noah 600 taun, kena hari ti ketujuh belas dalam bulan ti kedua, semua lubang ai ti di baruh tanah lalu pambus tebuka, lalu semua pintu ai ti di langit tebuka magang.
12 Hari lalu enda ngetu-ngetu ujan 40 hari, 40 malam.
13 Ba hari nya Noah enggau bini iya tama ngagai bandung, sama enggau anak seduai iya ke tiga iku, Sem, Ham enggau Japet, enggau bini sida.
14 Semua bansa jelu, jelu tupi enggau jelu babas, ti besai enggau ti mit, enggau semua bansa burung sama tama enggau sida.
15 Siku lelaki enggau siku indu ari genap bengkah bansa utai ti idup, tama ngagai bandung nya sama enggau Noah,
16 nitihka asuh Allah Taala. Udah nya TUHAN lalu nikupka pintu bandung nya ari belakang Noah.
17 Hari lalu enda ngetu-ngetu ujan 40 hari, datai ke ai nya nyau chukup alai bandung nya melepung.
18 Ai mansang dalam-sedalam, lalu bandung nya melepung.
19 Ai nya dalam amat, datai ke iya nyau ngampuhka semua bukit ti tinggi.
20 Ai nya majak dalam-sedalam datai ke penalam iya nyau kira tujuh meter ngampuhka tuchung bukit.
21 Semua utai ti idup di dunya tu mati magang, nyengkaum semua burung, semua jelu enggau semua mensia.
22 Semua utai ti enseput di dunya tu, mati magang.
23 TUHAN ngerusak semua utai ti idup di dunya tu: mensia, jelu, enggau burung. Ka semina Noah, enggau semua orang ke sama enggau iya dalam bandung nya aja agi idup.
24 Ai nya mengkang enda surut dalam pengelama 150 hari.
 
Bagi 8
Pengujung Bah Besai
1 Tang Allah Taala ingatka Noah enggau semua jelu ti sama enggau iya dalam bandung nya. Iya lalu ngasuh ribut bepuput, lalu ai bah nya mupuk surut.
2 Lubang ai ti di baruh tanah, enggau pintu ai ti di langit ditutup. Ujan lalu teduh,
3 lalu ai bah nya majak surut-sesurut dalam pengelama 150 hari.
4 Ba hari ti ketujuh belas dalam bulan ti ketujuh, bandung nya lalu tepanggai ba gerinjing bukit Ararat.
5 Ai majak surut, lalu kena satu hari bulan dalam bulan ti kesepuluh, tuchung bukit lalu belabuh ayan.
6 Empat puluh hari udah bekau nya, Noah muka jenila
7 lalu ngelepaska siku burung kak. Burung nya nadai pulai, tang majak terebai datai ke bah nya nyau udah abis surut.
8 Udah nya Noah ngelepaska siku burung achang, kena nentuka enti ai nya amat udah surut.
9 Tang laban ai bah nya agi ngelamun semua tanah, burung achang nya nadai nemu endur alai inggap, lalu iya pulai baru ngagai bandung nya. Noah nyengkau lalu ngambi burung achang nya ke dalam.
10 Noah nganti tujuh hari da agi udah bekau nya. Udah nya iya ngelepaska burung achang nya baru.
11 Burung achang nya pulai baru ngagai iya lemai nya, manggum daun kana. Nya baru Noah nemu ai bah nya nyau udah abis surut.
12 Udah nya Iya nganti tujuh hari da agi, lalu ngelepaska burung achang nya baru. Sekali tu, burung achang nya nadai pulai.
13 Lebuh umur Noah nyau manggai 601 taun, kena satu hari bulan ti kesatu, ai bah nya nadai agi. Noah lalu muka atap bandung. Iya malik kiba kanan, lalu meda tanah nyau udah mupuk rangkai.
14 Kena dua puluh tujuh hari bulan ti kedua, semua tanah nyau udah rangkai magang.
15 Allah Taala lalu bejaku ngagai Noah,
16 “Pansut nuan enggau bini nuan, anak nuan enggau bini sida ari bandung tu.
17 Bai pansut magang semua burung enggau semua jelu, ngambika sida beranak betelesak lalu ngachir ba sebelah dunya.”
18 Noah lalu pansut ari bandung nya sama enggau bini iya, enggau anak iya sereta enggau bini sida.
19 Semua jelu enggau semua burung pansut magang ari bandung nya, nitihka bansa sida empu.
 
Noah Meri Piring Ngagai Allah Taala
20 Noah lalu ngaga siti alta ke TUHAN. Iya ngambi siku ari genap bengkah bansa jelu enggau burung ti tuchi, lalu nunu sida segala ba alta nya, nyadika piring.
21 Bau piring nya ngerinduka ati TUHAN, lalu ku Iya bejaku dalam ati Diri, “Aku enggai agi nyumpah tanah ketegal mensia, laban Aku nemu, kenyau ari sida agi biak, runding sida endang jai. Aku enggai agi ngerusak semua utai ti idup, baka ke udah dikereja Aku sekali tu.
22 Seagi-agi dunya tu mengkang bisi, maya betanam, enggau maya ngetau endang mengkang bisi. Maya chelap, enggau maya angat endang bisi. Musin panas, musin chelap, siang enggau malam, endang enda nemu abis.”
 
Bagi 9
 Sempekat Allah Taala Enggau Noah
1 Allah Taala lalu merekatka Noah enggau bala anak iya, ku Iya, “Beranak betelesak meh kita, lalu ngemenuhka dunya.
2 Semua jelu, burung, enggau ikan deka takutka kita. Semua sida di baruh kuasa kita magang.
3 Diatu kita tau makai sida, lalu kita tau mega makai utai ti tumbuh. Aku meri semua utai nya nyadika pemakai kita.
4 Tang kita enda tau makai dagin ti agi bedarah, laban darah ngundan seput.
5 Aku deka meri ukum bunuh ngagai sebarang sapa munuh orang. Aku deka meri ukum bunuh ngagai jelu ti munuh mensia.
6 Barang sapa munuh orang deka dibunuh, laban mensia digaga neladan gamal Allah Taala.
7 “Beranak betelesak meh kita, lalu ngemenuhka dunya.”
8 Ku Allah Taala bejaku ngagai Noah enggau bala anak iya,
9 “Aku ngaga sempekat enggau nuan sereta enggau peturun nuan ti nangkanka nuan,
10 sereta enggau semua utai ti idup - semua burung, enggau semua jelu - semua utai ti pansut ari bandung sama enggau nuan.
11 Ngena sempekat tu, Aku besemaya enda agi ngerusak dunya enggau semua utai ti idup di dunya, ngena ai bah.
12 Kena Aku nanda sempekat ti meruan belama iya tu ti digaga Aku enggau nuan, sereta enggau semua utai ti idup,
13 Aku ngengkahka anakraja ba remang nyadika kelai kena nandaka sempekat Aku enggau dunya.
14 Genap kali Aku mungkur langit ngena mua hari, lalu anakraja pegari ba remang,
15 Aku deka ingatka sempekat Aku enggau nuan, sereta enggau semua jelu: ai bah enda agi ngerusak semua utai ti idup di dunya tu.
16 Lebuh anakraja nya ayan ba remang, Aku deka meda iya, lalu ingatka sempekat ti meruan belama iya tu entara Aku enggau semua utai ti idup di dunya tu.
17 Nya meh kelai sempekat ti digaga Aku enggau semua utai ti idup di dunya tu.”
 
Noah Enggau Anak Iya
18 Anak lelaki Noah ke pansut ari bandung nya Sem, Ham, enggau Japet. (Ham nya apai Kanaan.)
19 Anak Noah ke tiga iku nya meh orang ke nurunka semua mensia di dunya tu.
20 Noah nya orang bumai. Iya nya orang ke terubah-rubah numbuhka kebun anggur.
21 Lebuh iya udah ngirup wain, iya mabuk, nelanjaika diri lalu gali dalam langkau kain iya.
22 Lebuh Ham, iya nya apai Kanaan, meda apai iya telanjai, iya lalu pansut ke luar, lalu madahka menyadi iya ke dua iku.
23 Udah nya Sem seduai Japet lalu ngambi baju panjai siti, lalu megai baju panjai nya ari belakang seduai iya, ba bau seduai. Seduai iya lalu bejalai surut tama ngagai langkau kain nya, lalu mungkur apai sida, nguingka mua seduai iya kebukai ngambika seduai iya enda meda apai sida telanjai.
24 Lebuh Noah udah gerai mabuk, lalu nemu pasal utai ti udah dikereja anak bunsu iya ngagai iya,
25 iya lalu bejaku, “Tulah Kanaan! Iya deka nyadi ulun sida menyadi iya.
26 Puji meh TUHAN Allah Taala Sem! Kanaan deka nyadi ulun Sem!
27 Awakka Allah Taala nambahka pemesai menua Japet! Awakka peturun iya diau begulai enggau peturun Sem! Kanaan deka nyadi ulun Japet.”
28 Udah bekau bah besai nya, Noah idup 350 taun da agi.
29 Iya mati umur 950 taun.
 
Bagi 10
Peturun Anak Noah
1 Tu peturun anak lelaki Noah ke benama Sem, Ham enggau Japet. Udah bekau bah besai nya, sida tiga tu bisi anak lelaki.
2 Bala anak lelaki Japet nya Gomer, Magok, Madai, Jaban, Tubal, Mesek, enggau Tiras. Sida tu nurunka bansa ti ngangkatka nama sida.
3 Peturun Gomer nya orang Askenas, Ripat, enggau Togarmah.
4 Bala peturun Jaban nya orang Elisah, Spain, Saiprus enggau Rot.
5 Sida nya meh orang ke nurunka bansa ti diau ba sebelah tebing tasik, enggau ba sebelah pulau di tasik. Nya meh gaya bala peturun Japet ti diau nitihka raban bansa enggau menua sida empu. Genap bengkah raban bansa nya endang bisi jaku ke diri empu.
6 Bala anak lelaki Ham, iya nya Kus, Ejip, Libia, enggau Kanaan, nurunka bansa ti ngangkatka nama sida.
7 Peturun Kus nya orang Seba, Habilah, Sabtah, Ramah, enggau Sapteka. Peturun Ramah nya orang Sheba enggau Dedan.
8 Kus bisi anak lelaki siku ke benama Nimrot, orang ke terubah-rubah nyadi bujang berani di dunya tu.
9 Ari saup TUHAN, iya nyadi orang ke landik ngasu. Nya kebuah orang nyebut, “Awakka TUHAN ngaga nuan nyadi orang ke landik ngasu baka Nimrot!”
10 Menua ti terubah diperintah iya nyengkaum Babel, Erek, enggau Akat, semua menua nya di menua Babilon magang.
11 Ari menua nya iya mansang ngagai menua Asiria lalu nirika nengeri Nineweh, Rihobot Ir, Kalah,
12 enggau Resen, ba entara Nineweh enggau nengeri ti besai ke benama Kalah.
13 Peturun Ejip nya orang Lidia, Anam, Lehap, Naptuh,
14 Patrus, Kasluh, enggau Krit. Tu orang ke nurunka orang Pilistin.
15 Anak Kanaan nya Sidon, anak tuai iya, enggau Het. Seduai tu nurunka bansa ti ngangkatka nama seduai iya.
16 Kanaan mega nurunka orang Jebus, orang Amor, orang Girgas,
17 orang Ibi, orang Arka, orang Sin,
18 orang Arbat, orang Semar, enggau orang Hamat. Raban orang Kanaan ngachir ngagai menua bukai.
19 Menua orang Kanaan berengkah ari Sidon ngerembai tunga ke selatan nuju ngagai Gerar, nyentuk ngagai Gasa, enggau tunga ke timur nyentuk ngagai Sodom, Gomorah, Admah, enggau Seboim semak Lasa.
20 Nya meh gaya peturun Ham. Sida diau nitihka raban bansa enggau menua sida empu, lalu siti-siti raban bansa nya endang bisi jaku ke diri empu.
21 Sem, iya nya aka Japet, nurunka semua orang Hebrew.
22 Bala anak lelaki Sem nya Elam, Asur, Arpaksat, Lut, enggau Aram. Sida tu nurunka bansa ti ngangkatka nama sida.
23 Bala peturun Aram nya orang Us, Hul, Geter, enggau Mesek.
24 Arpaksat nya apai Selah, lalu Selah nya apai Eber.
25 Eber bisi dua iku anak lelaki. Siku benama Pelek, laban lebuh rambau iya kelia, orang di dunya tu nyau bepechah-belah; lalu siku nama Joktan.
26 Bala peturun Joktan nya orang Almodat, Selep, Hasarmabet, Jerah,
27 Hadoram, Usal, Diklah,
28 Obal, Abimael, Sheba,
29 Opir, Habilah, enggau Jobap. Semua sida tu peturun Joktan magang.
30 Menua ti alai sida diau nya berengkah ari Mesa nyentuk ngagai Separ di menua ti bebukit di timur.
31 Nya meh gaya bala peturun Sem, lalu sida diau nitihka raban bansa enggau menua sida empu, lalu genap bengkah raban bansa nya endang bisi jaku ke diri empu.
32 Semua sida nya endang peturun Noah magang, nitihka genap bengkah bansa, enggau peturun sida. Udah bekau bah nya, semua bansa dalam dunya tu endang peturun bala anak lelaki Noah magang.
 
Bagi 11
Menara Babel
1 Terubah iya kelia, orang di dunya tu bejaku ngena siti aja jaku.
2 Lebuh sida segau-segau bejalai di Timur, sida datai ba emperan menua Babilon, lalu ngentapka diri dia.
3 Ku sida berandau enggau pangan diri, “Aram kitai ngaga batu bata, lalu nunu batu bata nya ngambika kering.” Nya alai sida bisi batu bata ti dipejantilka sida ngena tar.
4 Ku sida bejaku, “Aram kitai ngaga sebuah nengeri, enggau sebuah menara ti bediri nyentuk ke langit, ngambika kitai tampak nama, lalu enda pambar di serata dunya.”
5 Udah nya TUHAN nurun, deka meda nengeri enggau menara ti udah digaga sida,
6 lalu ku Iya bejaku, “Sida tu sama sebansa magang, lalu bejaku ngena siti aja jaku. Tu semina pun ke semua utai ti deka dikereja sida. Enda lama da agi sida ulih ngaga sebarang utai ti dikedekaka sida!
7 Aram Kitai nurun lalu nyarutka jaku sida, ngambika sida enda meretika utai ti disebut pangan diri.”
8 Nya alai TUHAN ngachirka sida di serata dunya, lalu sida badu agi ngaga nengeri nya.
9 Nengeri nya dikumbai Babel, laban TUHAN udah nyarutka jaku semua mensia di nengeri nya, lalu ari nya Iya ngachirka sida di serata dunya.
 
Peturun Sem
10 Baka tu ku peturun Sem. Dua taun udah bekau bah besai, lebuh umur Sem 100 taun, iya bisi siku anak lelaki ke benama Arpaksat.
11 Udah bekau nya, iya mengkang idup 500 taun da agi, lalu bisi anak ti bukai.
12 Lebuh Arpaksat umur 35 taun, iya bisi siku anak lelaki benama Selah.
13 Udah bekau nya, iya mengkang idup 403 taun da agi, lalu bisi anak ti bukai.
14 Lebuh Selah umur 30 taun, iya bisi siku anak lelaki benama Eber.
15 Udah bekau nya, iya mengkang idup 403 taun da agi, lalu bisi anak ti bukai.
16 Lebuh Eber umur 34 taun, iya bisi siku anak lelaki benama Pelek.
17 Udah bekau nya, iya mengkang idup 430 taun da agi, lalu bisi anak ti bukai.
18 Lebuh umur Pelek 30 taun, iya bisi siku anak lelaki benama Reu.
19 Udah bekau nya iya mengkang idup 209 taun da agi, lalu bisi anak ti bukai.
20 Lebuh umur Reu 32 taun, iya bisi siku anak lelaki benama Seruk.
21 Udah bekau nya iya mengkang idup 207 taun da agi, lalu bisi anak ti bukai.
22 Lebuh Seruk umur 30 taun, iya bisi siku anak lelaki benama Nahor.
23 Udah nya iya mengkang idup 200 taun da agi, lalu bisi anak ti bukai.
24 Lebuh Nahor umur 29 taun, iya bisi siku anak lelaki benama Terah.
25 Udah nya iya mengkang idup 119 taun da agi, lalu bisi anak ti bukai.
26 Lebuh umur Terah udah manggai 70 taun, iya nyadi apai Abram, Nahor, enggau Haran.
 
Peturun Terah
27 Tu peturun Terah apai Abram, Nahor enggau Haran. Haran nya apai Lot,
28 lalu Haran mati ba nengeri ada iya di Ur, dalam menua Babilon, lebuh apai iya Terah agi idup.
29 Abram jadi enggau Sarai, lalu Nahor jadi enggau Milkah, anak indu Haran. Haran mega apai Iskah.
30 Nyadi Sarai mandul.
31 Terah mai anak iya Abram, uchu iya Lot, iya nya anak Haran, enggau menantu indu iya, Sarai, iya nya bini Abram, angkat ari nengeri Ur di menua Babilon lalu pindah ngagai menua Kanaan. Sida bejalai naka Haran lalu ngentapka diri dia.
32 Dia meh endur alai Terah mati lebuh umur iya 205 taun.
 
Bagi 12
Allah Taala Ngangauka Abram
1  Ku TUHAN bejaku ngagai Abram, “Tinggalka menua nuan, kaban belayan, enggau rumah apai nuan, lalu bejalai ngagai menua ti deka ditunjukka Aku ngagai nuan.
2 Aku deka meri nuan mayuh peturun, lalu sida deka nyadi bansa ti besai; Aku deka merekatka nuan, lalu ngaga nuan nyadi orang ke tampak nama; ngambika nuan nyadi berekat ke orang bukai.
3 Aku deka merekatka orang ke merekatka nuan, lalu Aku deka nyumpah orang ke nyumpah nuan; lalu ngena nuan merekatka semua bansa.
4 Lebuh umur Abram 75 taun, iya angkat ari Haran, nitihka asuh TUHAN, lalu Lot mupuk enggau iya.
5 Abram mai bini iya Sarai, enggau anak menyadi iya Lot, enggau semua reta tengkira, enggau semua ulun ti udah ulih iya di Haran, lalu mupuk ngagai menua Kanaan. Lebuh sida datai di Kanaan,
6 Abram lalu bejalai nengah menua nya lalu datai ba sepun kayu keramat di Moreh, di menua Sekem. (Lebuh maya nya, orang bansa Kanaan agi nguan menua nya.)
7 TUHAN pegari di mua Abram lalu bejaku enggau iya, “Tu meh menua ti deka diberi Aku ngagai bala peturun nuan.” Abram lalu ngaga siti alta ba endur nya ke TUHAN ti udah pegari di mua iya.
8 Udah nya iya pindah tunga ke selatan ngagai menua ti bebukit tunga ke timur ari nengeri Betel, lalu nirika kem iya ba entara nengeri Betel muak ke barat, enggau nengeri Ai muak ke timur. Dia iya mega ngaga siti alta, lalu nyembah TUHAN.
9 Udah nya iya majakka pejalai iya, pindah ari endur siti ngagai endur siti tunga ke selatan menua Kanaan.
 
Abram Di Menua Ejip
10 Nyadi menua Kanaan kena laban lapar pungkang. Nya alai Abram mupuk ngagai menua Ejip, lalu diau nyadi orang kampar di menua nya, laban lapar pungkang balat amat nyadi di menua Kanaan.
11 Lebuh iya baru deka meraka garis entara menua ngagai menua Ejip, iya bejaku enggau bini iya Sarai, “Aku nemu nuan amat bajik.
12 Lebuh orang Ejip meda nuan, sida deka ngumbai nuan bini aku, lalu munuh aku, tang nejuka nuan idup.
13 Padahka ngagai sida, nuan menyadi aku. Nya baru sida deka manah enggau aku, ketegal nuan, lalu nejuka aku idup.”
14 Lebuh Abram meraka garis entara menua ngagai Ejip, orang Ejip meda pemajik bini iya.
15 Sekeda bala pemesai ke gawa dalam istana raja meda Sarai, lalu madahka pasal pemajik iya ngagai raja. Nya alai Sarai lalu dibai ngagai istana.
16 Ketegal Sarai, raja lalu manah enggau Abram, lalu meri Abram raban bedus, kambin, sapi, keledai, ulun enggau unta.
17 Tang laban raja udah ngambi Sarai, TUHAN lalu ngasuh raja enggau semua orang ke bekereja dalam istana nya balat diserang penyakit.
18 Udah nya raja lalu mesanka Abram, lalu nanya iya, “Nama utai tu ti udah dikereja nuan ngagai aku? Nama kebuah nuan enda madahka Sarai nya bini nuan?
19 Nama kebuah nuan ngumbai iya menyadi nuan, lalu nejuka aku ngambi iya nyadika bini aku? Tu bini nuan. Bai iya, lalu angkat ari tu!”
20 Raja lalu meri atur ngagai bala pemesai iya pasal Abram, lalu sida ngasuh Abram angkat ari menua nya, sama enggau bini iya, sereta enggau semua utai ti diempu iya.
 
Bagi 13
Abram Seduai Lot Beserara
1 Abram angkat ari menua Ejip lalu mansang tunga ke utara, nuju ngagai selatan menua Kanaan sama enggau bini enggau semua utai iya. Lot mega mupuk sama enggau iya.
2 Abram tu orang ke kaya bendar. Iya bisi jelu bedus, kambin, enggau jelu sapi, sereta enggau pirak enggau emas.
3 Udah nya iya lalu angkat ari endur nya lalu pindah ari endur siti ngagai endur siti, mansang tunga ngagai Betel. Iya datai ba siti endur entara Betel enggau Ai, ti udah alai iya nirika kem dulu suba
4 lalu udah ngaga siti alta. Dia iya lalu nyembah TUHAN.
5 Lot mega bisi jelu bedus, kambin, enggau jelu sapi, lalu bisi mega ruang bilik iya empu, sereta enggau bala ulun.
6 Nya alai padang rumput dia nyau enda chukup ke seduai iya, enti seduai iya mengkang begulai enggau pangan diri, laban jelu seduai iya nyau kelalu mayuh.
7 Nya alai orang ke ngibun jelu ke Abram, enggau orang ke ngibun jelu ke Lot, belaya. (Lebuh maya nya, orang Kanaan enggau orang Peris agi diau di menua nya.)
8 Udah nya Abram lalu bejaku enggau Lot, “Kitai tu sama diri sekaban, lalu bala nuan enggau bala aku enda patut belaya.
9 Nya alai, manah tua beserara. Pilih ni menua ti dikedekaka nuan. Nuan nguing nengah jalai siti, lalu aku nguing nengah jalai siti.”
10 Lot lalu ninjau menua nya, lalu nemu semua Lebak Jordan, nyentuk ngagai Soar, sigi mayuh ai, baka kebun TUHAN, tauka baka tanah ti di menua Ejip. (Tu sebedau TUHAN ngerusak nengeri Sodom enggau Gomorah.)
11 Nya alai Lot milih semua Lebak Jordan ke iya empu, lalu iya pindah tunga ke timur. Nya meh chara seduai iya beserara ari pangan diri.
12 Abram mengkang diau di menua Kanaan, lalu Lot ngentapka diri ba sebelah nengeri ti ba emperan nya, lalu nirika kem iya semak nengeri Sodom,
13 ti diuan orang ke jai, ke bedosa ngelaban TUHAN.
 
Abram Mindah Ngagai Hebron
14 Lebuh Lot udah mupuk, TUHAN lalu bejaku ngagai Abram, “Ari endur alai nuan ke bediri diatu, tinjau enggau manah semua menua tu.
15 Aku deka meri ngagai nuan, enggau ngagai bala peturun nuan semua menua ti dipeda nuan, lalu menua nya deka diempu nuan belama iya.
16 Aku deka meri ngagai nuan mayuh peturun datai ke sida enda ulih diitung agi, baka ke ngitung igi amau di dunya tu!
17 Nya alai diatu, bejalai nuan lalu peratika semua menua tu, laban Aku deka meri semua menua tu ngagai nuan.”
18 Nya alai Abram mindahka kem iya lalu ngentapka diri semak kayu keramat di Mamre di menua Hebron. Dia iya lalu ngaga siti alta ke TUHAN.
 
Bagi 14
Abram Nyelamatka Lot
1 Empat iku raja, iya nya Raja Amrapel menua Babilon, Raja Ariok ari Elasar, Raja Kedorlaomer ari Elam enggau Raja Tidal ari Goim,
2 nyerang lima iku raja, iya nya Raja Bera di Sodom, Raja Birsa di Gomorah, Raja Sinap di Admah, Raja Semeber di Seboim, enggau raja nengeri Bela (tauka Soar).
3 Raja ke lima iku nya beripih enggau pangan diri, lalu berakupka semua soldadu sida ba Emperan Sidim, iya nya Tasik Mati diatu.
4 Raja ke lima iku nya udah dipegai Kedorlaomer dua belas taun, tang dalam taun ti ketiga belas, sida angkat ngelaban iya.
5 Dalam taun ti keempat belas, Kedorlaomer enggau bala raja ke setanah enggau iya, datai enggau bala soldadu sida, lalu ngalahka orang Repaim di Asterot Karnaim, orang Susim di Ham, orang Emim ba emperan Kiriataim,
6 enggau orang Hori ba sebelah bukit di menua Edom, begagaika sida nyentuk ngagai Elparan, ti ba tisi menua puang.
7 Udah nya sida nikal baru ngagai Kades (ti dikumbai Enmispat lebuh maya nya). Sida ngalahka semua menua orang Amalek, lalu ngalahka orang Amor ti diau di Hasason-tamar.
8 Udah nya raja nengeri Sodom, Gomorah, Admah, Seboim, enggau Bela lalu ngerintai bala soldadu sida, sedia deka beperang ba Emperan Sidim. Sida lalu beperang
9 ngelaban raja menua Elam, Goim, Babilon, enggau Elasar, lima ngelaban empat.
10 Emperan nya penuh laban lubang tar, lalu lebuh raja nengeri Sodom enggau raja nengeri Gomorah nguji ngerarika diri, seduai iya lalu labuh ngagai lubang tar, tang tiga iku raja ti bukai ulih ngerarika diri ngagai bukit.
11 Raja ti empat iku nya ngambi semua utai di nengeri Sodom enggau Gomorah, nyengkaum pemakai, lalu angkat ari nengeri nya. 
12 Nyadi Lot, anak menyadi Abram, diau di nengeri Sodom. Nya alai raja empat iku nya nabanka iya enggau semua reta tengkira iya.
13 Tang siku lelaki ulih ngerarika diri lalu madahka semua utai nya ngagai Abram, iya nya orang Hebrew ti diau semak kayu ti besai ti diempu Mamre orang Amor. Mamre enggau menyadi iya Eskol enggau Aner endang setanah enggau Abram.
14 Lebuh Abram ninga anak menyadi iya udah ditangkap munsuh, iya lalu ngelumuka semua lelaki ke dalam kem, ke tau enggau beperang, 318 iku semua sida, lalu nitihka raja empat iku nya, nyentuk ngagai Dan.
15 Dia Abram lalu magi bala iya ngagai berapa bengkah raban, nyerang munsuh lebuh malam hari, lalu ngalahka sida. Iya begagaika sida nyentuk ngagai Hobah, di utara Damaskus,
16 lalu ngambi pulai baru semua utai ti udah ditabanka munsuh. Iya mega mai pulai baru anak menyadi iya Lot enggau semua orang bukai ti udah ditangkap munsuh.
 
Melkisedek Merekatka Abram
17 Lebuh Abram pulai, udah bekau iya ti ngalahka raja Kedorlaomer, enggau raja ti bukai, raja nengeri Sodom lalu ngambat iya ba Emperan Sabeh (emperan tu mega dikumbai Lebak Raja).
18 Lalu Melkisedek, ke nyadi raja nengeri Salem, sereta nyadi imam Allah Taala ti Pemadu Tinggi, mai roti enggau wain ngagai Abram,
19 lalu merekatka Abram munyi tu, “Awakka Allah Taala ti Pemadu Tinggi, ke ngaga langit enggau dunya, merekatka Abram!
20 Pujika Allah Taala ti Pemadu Tinggi, ti udah ngasuh nuan menang ngelaban munsuh nuan!” Abram lalu meri ngagai Melkisedek sepuluh peratus ari semua perapasan ti udah dirampas iya ari munsuh.
21 Ku raja Sodom bejaku ngagai Abram, “Simpan ulih nuan semua perapasan nya, tang beri pulai ngagai aku semua nembiak aku.”
22 Disaut Abram, “Aku besumpah di mua TUHAN Allah Taala ti Pemadu Tinggi, ke ngaga langit enggau dunya,
23 aku enggai nyimpan utai nuan. Selambar ubung tauka tali kasut nuan pen enggai meh aku nyimpan, ngambika nuan enda ulih nyebut, ‘Aku tu ke ngasuh Abram kaya.’
24 Aku enggai ngambi utai ke aku empu. Aku semina nerima utai ti udah diempa bala nembiak aku. Tang awakka orang ke setanah enggau aku, Aner, Eskol enggau Mamre, ngambi ungkup sida.”
 
Bagi 15
 Sempekat Allah Taala Enggau Abram
 1 Udah bekau nya, Abram bisi genera. Dalam genera nya iya ninga TUHAN bejaku ngagai iya munyi tu, “Anang takut, Abram. Aku deka nyaga nuan, lalu meri nuan upah ti besai.”
2 Tang ku Abram nyaut, “TUHAN ti Pemadu Tinggi, nama guna upah ti deka diberi Nuan ngagai aku? Aku nadai purih, lalu orang ke deka bempu pesaka aku nya semina Elieser ari Damaskus.
3 Nuan nadai udah meri aku purih, lalu siku ari bala ulun aku deka bempu pesaka aku.”
4 Udah nya Abram lalu ninga TUHAN bejaku baru ngagai iya: “Ukai ulun nuan Elieser ti deka bempu pesaka nuan, tang anak lelaki nuan empu.”
5 TUHAN lalu mai Abram pansut, lalu bejaku, “Uji nuan engkadah lalu ngitung bintang ti di langit. Baka nya meh pemayuh peturun nuan.”
6 Abram arapka TUHAN, lalu ketegal nya TUHAN ngumbai iya lurus.
7 Udah nya TUHAN lalu bejaku enggau iya, “Aku tu meh TUHAN ti udah mai nuan pansut ari Ur di menua Babilon, lalu meri ngagai nuan menua tu nyadika pesaka nuan.”
8 Tang ku Abram nanya, “TUHAN ti Pemadu Tinggi, baka ni ku aku tau nemu menua nya deka diempu aku?”
9 Disaut TUHAN, “Bai ngagai Aku siku sapi ti indu, siku kambin, enggau siku bedus ti lelaki, genap iku sida nya umur tiga taun magang, enggau siku burung achang, enggau siku burung puna.”
10 Abram mai semua jelu nya ngagai Allah Taala. Tubuh semua jelu nya lalu dibelah iya dua. Iya lalu ngengkahka bidang tubuh siku-siku jelu nya berimbai, ba dua iti baris; tang tubuh burung enda dibelah.
11 Burung ti bepakaika bangkai lalu datai ngagai bangkai jelu enggau bangkai burung nya, tang Abram muru sida.
12 Lebuh mata hari nyau nurun, Abram jenak amat tinduk. Iya lalu berasai balat amat takut.
13 Ku TUHAN bejaku ngagai iya, “Nuan enda tau enda nemu tu: bala peturun nuan deka nyadi orang kampar di menua bukai. Sida deka nyadi ulun di menua nya, lalu deka kena perinsa empat ratus taun.
14 Tang Aku deka ngukum bansa orang ke ngaga sida nyadi ulun, lalu lebuh sida ninggalka menua nya, sida deka mai mayuh pengaya.
15 Nuan empu deka idup datai ke umur nuan nyau tuai, mati enggau selamat, lalu dikuburka.
16 Empat serak udah bekau nya, nya baru bala peturun nuan deka pulai baru ngagai menua tu, laban Aku enggai muru orang Amor sebedau sida nyadi chukup jai, lalu patut diukum.”
17 Lebuh mata hari nyau udah terunjam, lalu hari pen nyau petang, sigi periuk ti berasap, enggau siti sempun ti mau, pegari lalu bejalai ensaraka bidang tubuh jelu nya.
18 Nya meh maya TUHAN ngaga siti sempekat enggau Abram. Ku TUHAN, “Aku besemaya deka meri semua menua tu ngagai bala peturun nuan, berengkah ari garis entara menua orang Ejip nyentuk ngagai Sungai Eupratis,
19 nyengkaum menua orang Ken, orang Kenis, orang Kadmon,
20 orang Iti, orang Peris, orang Repaim,
21 orang Amor, orang Kanaan, orang Girgas, enggau orang Jebus.”
 
Bagi 16
Hagar Enggau Ismail
1 Sarai, bini Abram, nadai anak. Tang iya bisi siku ulun, indu orang Ejip, ke benama Hagar.
2 Ku Sarai bejaku enggau Abram, “TUHAN udah nagang aku beranak, nya alai manah nuan tinduk enggau ulun aku. Nyangka ukur iya ulih ngadaka siku anak ke aku.” Abram besetuju enggau utai ti disebut Sarai.
3 Nya alai Sarai nyerahka Hagar ngagai Abram nyadika indu simpan iya. (Utai tu nyadi lebuh Abram udah diau di menua Kanaan sepuluh taun.)
4 Abram tinduk enggau Hagar, lalu Hagar ngandung. Lebuh Hagar nemu diri ngandung, iya lalu ngenyumbungka diri, lalu mechat Sarai.
5 Udah nya Sarai lalu bejaku enggau Abram, “Nuan udah salah, nya kebuah Hagar mechat aku.  Aku empu ti udah meri iya ngagai nuan, lalu sekumbang iya ke nemu diri udah ngandung, iya mechat aku. Awakka TUHAN ngakim sapa tua ke ngena, nuan tauka aku!”
6 Disaut Abram, “Barang ku jaku. Iya ulun nuan, lalu iya di baruh kuasa nuan. Kereja aja sebarang utai ti dikedekaka nuan ba iya.” Udah nya Sarai lalu merinsaka Hagar, datai ke Hagar nyau rari.
7 Melikat TUHAN betemu enggau Hagar ba siti mata ai di menua puang, ba jalai ngagai Sur
8 lalu bejaku, “Hagar, ulun Sarai: datai ari ni nuan, lalu kini ke tunga pejalai nuan?” Disaut Hagar, “Aku rari ari Sarai.”
9 Ku melikat TUHAN nya bejaku, “Nuan enda tau enda pulai baru ngagai iya lalu nyadi ulun iya.”
10 Udah nya melikat nya bejaku ngagai iya, “Aku deka meri nuan mayuh peturun, datai ke sida nyau enda ulih diitung.
11 Nuan deka ngadaka siku anak lelaki, lalu nuan deka meri iya nama Ismail, laban TUHAN udah ninga sabak nuan.
12 Tang iya deka idup baka keledai kampung: iya deka ngelaban semua orang, lalu semua orang deka ngelaban iya. Iya deka diau beserekang ari semua kaban belayan iya.”
13 Hagar lalu nanya diri empu, “Kati aku amat udah meda Allah Taala, lalu agi mengkang idup nusui pasal utai nya?”  Nya alai iya ngumbai TUHAN ti udah bejaku enggau iya nya “Allah Taala Ke Meda.”
14 Nya meh kebuah orang ngumbai telaga ti ba entara Kades enggau Beret nya “Telaga Ti Diempu Iya Ti Idup, Ke Meda Aku.”
15 Hagar ngadaka siku anak lelaki ke Abram, lalu Abram meri iya nama Ismail.
16 Umur Abram lapan puluh enam taun lebuh maya nya.
 
Bagi 17
 Betutus Nyadika Tanda Sempekat
 1 Lebuh umur Abram manggai semilan puluh semilan taun, TUHAN pegari di mua iya, lalu bejaku, “Aku tu Allah Taala ti Pemadu Bekuasa. Nuan enda tau enda ngasika Aku, lalu ngereja utai ti ngena.
2 Aku deka ngaga siti sempekat enggau nuan, lalu meri nuan mayuh peturun.”
3 Abram lalu nyungkurka diri ke tanah; lalu ku Allah Taala bejaku,
4 “Tu sempekat ti digaga Aku enggau nuan: Aku besemaya deka ngasuh nuan nyadi apai ke mayuh bengkah bansa.
5 Nama nuan ukai Abram agi, tang Abraham, laban Aku ngaga nuan nyadika apai mayuh bengkah bansa.
6 Aku deka meri nuan mayuh peturun, lalu sekeda sida deka nyadi raja. Peturun nuan mayuh, datai ke sida nyadi mayuh bengkah bansa.
7  “Aku deka ngamatka semaya Aku enggau nuan, sereta enggau peturun nuan, nyadika sempekat ti meruan belama iya. Aku deka nyadi Allah Taala nuan, enggau nyadi Allah Taala ke peturun nuan.
8 Aku deka meri ngagai nuan, enggau ngagai peturun nuan, menua tu, ti alai nuan diau nyadi orang kampar diatu. Semua menua Kanaan deka diempu peturun nuan belama iya, lalu Aku deka nyadi Allah Taala sida.”
9 Ku Allah Taala bejaku ngagai Abraham, “Nuan mega enda tau enda besetuju deka ngasika sempekat tu, nuan enggau semua serak peturun nuan ke jemah ila.
10 Nuan enggau peturun nuan enda tau enda semua besetuju nutus semua bala kita ke lelaki.
11-12 Belabuh ari diatu, nuan enda tau enda nutus semua anak mit ti lelaki lebuh umur sida lapan hari, nyengkaum ulun ke ada dalam rumah kita, enggau ulun ke dibeli kita ari orang bansa bukai. Tu kena nanda sempekat entara Aku enggau nuan.
13 Genap iku orang enda tau enda ditutus, lalu tu deka nyadika kelai ba tubuh kita, kena nunjukka sempekat Aku enggau nuan endang meruan belama iya.
14 Lelaki ti enda ditutus, deka badu agi dikumbai nembiak Aku, laban iya enda nitihka sempekat Aku.”
15 Ku Allah Taala bejaku ngagai Abraham, “Nuan enda tau agi ngumbai bini nuan Sarai. Kenyau ari diatu nama iya Sarah.
16 Aku deka merekatka iya, lalu Aku deka meri ngagai nuan siku anak lelaki ulih iya. Aku deka merekatka iya, lalu iya deka nyadi indai ke mayuh bengkah bansa, lalu sekeda ari peturun iya deka nyadi raja.”
17 Abraham nyungkurka diri ke tanah, tang iya ketawa lebuh iya berunding, “Baka ni ku lelaki ke umur seratus taun tau bisi anak? Baka ni ku Sarah ulih ngadaka anak lebuh umur iya nyau semilan puluh taun?”
18 Iya lalu nanya ngagai Allah Taala, “Nama kebuah enda ngasuh Ismail nampung waris aku?”
19 Tang ku Allah Taala bejaku, “Enda tau. Bini nuan Sarah deka ngadaka siku anak lelaki ke nuan, lalu nuan deka meri iya nama Isak. Aku deka ngingatka sempekat Aku enggau iya, sereta enggau peturun iya belama iya. Sempekat nya deka meruan belama iya.
20 Aku udah ninga peminta nuan pasal Ismail, nya alai Aku deka merekatka iya, lalu meri ngagai iya mayuh anak, enggau mayuh peturun. Iya deka nyadi apai ke dua belas iku raja, lalu Aku deka ngaga siti bansa ti besai ari bala peturun iya.
21 Tang Aku deka ngingatka sempekat Aku enggau anak nuan Isak, ti deka diadaka Sarah ba urung maya tu taun baru tu ila.”
22 Lebuh Allah Taala udah tembu bejaku ngagai Abraham, Iya lalu ninggalka Abraham.
23 Ba hari nya Abraham ngasika Allah Taala, lalu nutus anak iya Ismail, enggau semua lelaki bukai ke dalam ruang bilik iya, nyengkaum bala ulun ke ada dalam rumah iya, sereta enggau ulun ti udah dibeli iya.
24 Umur Abraham semilan puluh semilan taun lebuh iya ditutus,
25 lalu umur anak iya Ismail tiga belas taun.
26 Seduai iya sama ditutus sereta hari,
27 sama enggau semua ulun Abraham empu.
 
Bagi 18
Allah Taala Deka Meri Siku Anak Lelaki Ngagai Abraham
 1 TUHAN pegari di mua Abraham ngimbai kayu ti besai di Mamre. Lebuh maya nya Abraham benung duduk ba penama ngagai langkau kain iya, laban hari balat amat angat.
2 Iya malik lalu tepedaka tiga iku lelaki bediri enda jauh ari iya. Lebuh iya meda sida, iya lalu belanda ngambat sida. Iya nyungkurka diri ke tanah,
3 lalu bejaku, “Tuan, anang semina mansa rumah aku lalu enda ngetu. Aku sedia deka ngintu kita tiga.
4 Awakka aku mai ai kena kita tiga masu kaki. Kita tau ngetu lalu belelak di baruh pun kayu tu.
5 Aku deka mega mai pemakai, ngambika kita kering majakka pejalai diri. Kita udah datai ba rumah aku, nya alai awakka aku ngintu kita tiga.” Ku sida tiga nyaut iya, “Kereja aja utai ti ku nuan.”
6 Abraham lalu beguai-guai tama ngagai langkau kain iya, lalu bejaku enggau Sarah, “Jampat! Ambi tepung nuan ti pemadu alus, lalu panggang roti.”
7 Udah nya iya lalu belanda ngagai raban jelu sapi lalu nangkap siku anak sapi ti gemu, lalu nyerahka jelu nya ngagai ulun iya. Ulun nya lalu beguai-guai mela jelu nya.
8 Iya ngambi lemak tusu, ai tusu, enggau dagin, lalu ngenahka pemakai nya di mua sida tiga. Di baruh pun kayu nya meh endur alai iya ke meri sida tiga makai, lalu sida tiga makai.
9 Udah nya sida lalu nanya iya, “Dini alai bini nuan Sarah?” “Dalam langkau kain,” ku Abraham nyaut.
10 Siku ari sida tiga lalu bejaku, “Ba urung maya tu taun baru tu ila Aku deka datai baru, lalu bini nuan Sarah deka ngadaka anak lelaki siku.” Nyadi Sarah bisi ari belakang orang nya, ba mua pintu langkau kain nya, mendingka orang nya bejaku.
11 Abraham seduai Sarah sama udah tuai amat umur, lalu Sarah udah badu agi datai kain.
12 Nya alai Sarah ketawa dalam ati diri, ku iya, “Aku diatu nyau tuai. Baka ni ku aku agi ulih beleman enggau laki aku? Nambahka nya, laki aku pen nyau tuai.”
13 Udah nya TUHAN lalu nanya Abraham, “Nama kebuah Sarah ketawa lalu nyebut, ‘Baka ni ku aku ulih beranak lebuh aku nyau tuai baka tu?’
14 Kati TUHAN enda ulih ngereja sebarang utai? Munyi ti disebut Aku, semilan bulan ari diatu aku deka datai ditu baru, lalu Sarah deka ngadaka anak lelaki siku.”
 15 Sarah takut lalu besangkalka diri ti udah ketawa. “Nadai aku ketawa,” ku iya bejaku. TUHAN lalu nyaut. “Sigi amat, nuan udah ketawa tadi.” Abraham Bejaku Ngarika Sodom
16 Udah nya sida tiga mupuk, lalu mansang ngagai siti endur alai sida ke ulih ninjau ke baruh ngagai nengeri Sodom, lalu Abraham bejalai enggau sida, deka meda sida tiga mupuk.
17 Lalu ku TUHAN bejaku dalam ati Diri, “Aku enggai ngelalaika ari Abraham utai ti deka dikereja Aku.
18 Peturun iya deka nyadi bansa ti besai sereta kering, lalu Aku deka merekatka semua bansa ngena iya.
19 Aku udah milih iya, ngambika iya ngasuh bala anak iya enggau peturun iya ngasika Aku, lalu ngereja utai ti ngena sereta lurus. Enti sida ngereja nya, nya baru Aku deka ngereja ke Abraham semua utai ti udah disemaya Aku.”
20 Udah nya TUHAN lalu bejaku, “Sodom enggau Gomorah sama udah kena dawa laban seduai iya udah ngereja utai ti amat jai, lalu dosa seduai iya amat besai.
21 Aku enda tau enda nurun kin, deka nentuka enti jaku dawa ti didinga Aku nya amat tauka enda.”
22 Udah nya orang dua iku nya lalu mansang ngagai Sodom, tang TUHAN ninggalka Diri enggau Abraham.
23 Abraham mansang ngagai TUHAN, lalu nanya, “Kati Nuan amat deka munuh orang ke nadai penyalah sama enggau orang ke bepenyalah?
24 Enti sema lima puluh iku orang ke nadai penyalah bisi dalam nengeri nya, kati nuan deka ngerusak semua nengeri nya? Kati Nuan enggai ngalau nengeri nya ngambika sida ke lima puluh iku nya enda kena bunuh?
25 Nuan tentu enggai munuh sida ke nadai penyalah sama enggau sida ke bepenyalah. Enggai nyadi baka nya! Nuan enda tau munuh sida! Enti Nuan munuh sida, orang ke nadai penyalah deka kena ukum sama enggau sida. Enggai nyadi sekali-kali baka nya! Hakim ke ngakim semua dunya enda tau enda ngakim enggau lurus.”
26 Ku TUHAN nyaut, “Enti sema Aku bisi tetemuka lima puluh iku orang ke nadai penyalah di nengeri Sodom, Aku enda nyadi ngerusak nengeri nya ketegal sida.”
27 Abraham lalu bejaku baru: “TUHAN, aku minta Nuan ngampun aku ke changka bejaku ngagai Nuan baka tu. Aku tu semina mensia aja, lalu enda patut bejaku.
28 Tang kada enda semina empat puluh lima iku aja orang ke nadai penyalah, ukai lima puluh iku. Kati Nuan deka ngerusak semua nengeri nya, laban sida kurang lima iku?” Ku TUHAN nyaut, “Aku enggai ngerusak nengeri nya enti Aku bisi tetemuka empat puluh lima iku orang ke nadai penyalah dia.”
29 Abraham lalu bejaku baru, “Kada enda semina empat puluh iku aja orang ke nadai penyalah bisi dia.”
Disaut TUHAN, “Aku enggai ngerusak nengeri nya enti Aku bisi tetemuka empat puluh iku aja orang ke nadai penyalah dia.”
30 Ku Abraham, “Anang ringat, TUHAN, tang aku enda tau enda bejaku baru. Kati enti semina tiga puluh iku aja orang ke nadai penyalah dia?” Ku TUHAN nyaut, “Aku enggai ngerusak nengeri nya enti Aku bisi tetemuka tiga puluh iku aja dia.”
31 Ku Abraham, “TUHAN, ampun aku ke changka bejaku ngagai Nuan baka tu. Kati enti semina dua puluh iku aja bisi ditemu dia?” Ku TUHAN nyaut, “Aku enggai ngerusak nengeri nya enti Aku bisi tetemuka dua puluh iku aja orang ke nadai penyalah dia.”
32 Ku Abraham, “Anang ringat ngagai aku, TUHAN. Aku deka bejaku sekali agi. Kati enti semina sepuluh iku aja bisi ditemu dia?” Ku TUHAN nyaut, “Aku enggai ngerusak nengeri nya enti Aku bisi tetemuka sepuluh iku aja dia.”
33 Lebuh TUHAN udah tembu bejaku enggau Abraham, Iya mupuk, lalu Abraham pulai.
 
Bagi 19
 Dosa Nengeri Sodom
1 Lebuh melikat ke dua iku nya datai di Sodom lemai nya, Lot benung duduk dalam pintu kuta nengeri nya. Lebuh Lot tepedaka seduai iya datai, iya angkat, lalu mansang ngambat seduai iya. Iya meremi di mua seduai iya
2 lalu bejaku, “Tuan, aku sedia deka ngintu seduai. Aram tama ngagai rumah aku. Seduai tau masu kaki seduai, lalu bemalam ditu. Seduai tau angkat tumu pagila, lalu majakka pejalai seduai.” Tang ku seduai iya nyaut, “Enda ibuh. Kami duai deka bemalam ba padang di nengeri.”
3 Lot majak ngumbuk seduai iya. Nyau kelama, seduai iya lalu tama ngagai rumah Lot. Lot lalu ngasuh bala orang gaji iya manggang roti, lalu nyendiaka pemakai ti manah ke temuai dua iku nya. Lebuh pemakai nya udah sedia, sida lalu makai.
4 Sebedau temuai nya nindukka diri, bala lelaki nengeri Sodom lalu datai ngelingi rumah Lot. Semua lelaki di nengeri nya, sida ke biak enggau ke tuai, bela bisi dia magang.
5 Sida ngangauka Lot, lalu nanya ngagai iya, “Dini alai lelaki dua iku ke datai bemalam enggau nuan malam tu? Bai seduai iya pansut ngagai kami!” Bala lelaki di nengeri Sodom bisi ati deka beleman enggau seduai iya.
6 Lot pansut, lalu nikupka pintu ari belakang iya.
7 Ku iya bejaku ngagai sida, “Menyadi, aku minta kita, anang ngereja utai ti jai baka tu!
8 Dinga kita, aku bisi dua iku anak indu ke agi dara bungas. Awakka aku mai seduai iya pansut ke luar kitu ngagai kita, lalu kita tau ngereja sebarang utai ti dikedekaka kita ngagai seduai iya. Tang anang ngereja utai ngagai orang dua iku tu. Seduai iya temuai aku, lalu aku enda tau enda nyaga seduai iya.”
9 Tang ku sida bejaku, “Nuan orang kampar, anang mempang kami! Sapa nuan tu ke berani madahka utai ti patut dikereja kami? Anang mempang jalai kami, enggai ke kami ngereja nuan balat agi ari kami ke deka ngereja seduai iya.” Sida lalu ngejuka Lot surut, lalu mansang deka mechahka pintu.
10 Tang orang dua iku ke dalam rumah nya nyapai Lot, narit iya ke dalam, lalu nikupka pintu.
11 Udah nya seduai iya lalu ngasuh semua orang ke di luar buta magang, ngambika sida enda tetemuka pintu nya.
 
Lot Angkat Ari Sodom
12 Ku lelaki dua iku nya bejaku enggau Lot, “Enti nuan bisi orang bukai - anak lelaki, anak indu, menantu lelaki, tauka kaban belayan ti bukai dalam nengeri tu - bai sida pansut ari nengeri tu,
13 laban kami duai deka ngerusak nengeri tu. TUHAN udah ninga dawa ti jai ngelaban orang di nengeri tu, lalu udah ngasuh kami duai ngerusak iya.”
14 Udah nya Lot lalu mansang ngagai lelaki ti deka jadi enggau anak indu iya ke dua iku nya, lalu bejaku, “Pansut jampat ari nengeri tu, laban TUHAN deka ngerusak nengeri tu.” Tang lelaki dua iku nya ngumbai Lot semina bungah aja.
15 Tumu pagi hari siti, melikat dua iku nya ngansak Lot, “Jampat!” ku seduai iya bejaku. “Bai bini nuan enggau dua iku anak dara nuan, lalu angkat ari nengeri tu, ngambika kita enda mati lebuh nengeri tu dirusak.”
16  Lot kakang. Tang TUHAN kasihka iya. Nya alai temuai ke dua iku nya megai jari Lot lalu ngiring iya, bini iya, enggau dua iku anak indu iya, lalu nguluka sida pansut ari nengeri nya.
17 Siku ari seduai nya lalu bejaku, “Alai kita belanda ngidupka nyawa diri! Anang malik kebelakang, lalu anang ngetu ba sebelah lebak. Belanda ngagai bukit, ngambika kita enda kena bunuh.”
18 Tang ku Lot nyaut, “Tuan, anang ngasuh kami belanda ngagai bukit nya.
19 Seduai udah kasihka aku lalu ngidupka aku. Tang bukit nya jauh amat. Penusah ti besai nya deka ngerusak aku, lalu aku deka mati sebedau aku datai din.
20 Kati nuan bisi meda nengeri ti mit nya? Nengeri nya semak agi. Awakka aku kin. Nuan meda endur nya mit, tang aku deka diau likun dia.”
21 Disaut orang nya, “Au. Aku besetuju. Aku enggai ngerusak nengeri nya.
22 Jampat agi! Belanda! Aku enda ulih ngereja sebarang utai sebedau nuan datai din.” Ketegal Lot udah ngumbai nengeri nya mit, nya alai nengeri nya dikumbai Soar.
 
Sodom Enggau Gomorah Dirusak
23 Mata panas endang udah niki lebuh Lot datai di Soar.
24  TUHAN lalu tekala nya ngujan nengeri Sodom enggau Gomorah ngena api merirang
25 lalu ngerusak nengeri dua buah nya, enggau semua lebak nya, sereta enggau semua orang ke diau dia enggau semua utai ti tumbuh di menua nya.
26 Tang bini Lot malik kebelakang, lalu iya nyadi tiang garam.
27 Tumu pagi hari siti, Abraham beguai-guai mansang ngagai endur alai iya ti udah bediri enggau TUHAN.
28 Iya merening ke baruh ngagai nengeri Sodom enggau Gomorah enggau semua lebak ti di menua nya, lalu meda asap pansut ari menua nya baka ke pansut ari serumbung api.
29 Tang lebuh Allah Taala ngerusak nengeri ti ba lebak nya, ti udah alai Lot diau, Iya ingatka Abraham, lalu nejuka Lot ngerarika diri ngagai endur ti likun.
 
Penatai Bansa Orang Moap, Enggau Orang Amon
30 Nyadi Lot takut diau di Soar, nya alai iya enggau anak indu iya mindah ke atas ngagai bukit, lalu diau dalam lubang gua.
31 Anak indu Lot ke tuai agi lalu bejaku enggau adi iya, “Apai tua nyau tuai, lalu lelaki ke ulih jadi enggau tua, ke tau ngasuh tua beranak, pen nadai mega di serata dunya tu.
32 Aram tua numi apai tua datai ke iya mabuk, ngambika tua ulih tinduk enggau iya, lalu beranak ulih iya.”
33 Malam nya seduai iya lalu numi Lot enggau wain. Anak indu Lot ke tuai agi lalu beleman enggau apai iya. Tang Lot kelalu balat mabuk, lalu nadai nemu utai.
34 Hari siti, anak indu Lot ke tuai agi lalu bejaku enggau adi iya, “Aku udah tinduk enggau iya dimalam. Aram tua numi iya baru malam tu datai ke iya mabuk, lalu nuan tinduk enggau iya. Nya baru tua deka sama bisi anak ulih apai tua.”
35 Nya alai malam nya seduai iya numi Lot datai ke iya mabuk, lalu anak indu iya ke biak agi beleman enggau iya. Sekali nya Lot mega kelalu balat mabuk lalu enda nemu utai.
36 Nya meh chara anak indu Lot ke dua iku nya ngandung ulih apai seduai iya empu.
37 Anak indu iya ke tuai ngadaka siku anak lelaki, lalu iya meri iya nama Moap Moap nya orang ke nurunka orang bansa Moap ke diatu.
38 Anak indu iya ke biak agi mega ngadaka siku anak lelaki, lalu iya meri iya nama Benami Benami nya meh orang ke nurunka orang bansa Amon ke diatu.
 
Bagi 20
 Abraham Enggau Abimelek
1 Abraham pindah ari Mamre ngagai selatan menua Kanaan, lalu diau ba entara Kades enggau Sur. Udah nya, lebuh iya benung diau di Gerar,
2 iya madahka bini iya nya menyadi iya. Nya alai Raja Abimelek ke merintah di nengeri Gerar ngasuh orang mai Sarah ngagai iya.
3 Nyadi sekali, lebuh malam hari, Allah Taala pegari di mua Raja Abimelek dalam mimpi, lalu bejaku, “Nuan deka mati, laban nuan udah ngambi indu tu. Iya udah bisi laki.”
4 Tang Abimelek nadai kala beleman enggau Sarah, lalu ku Abimelek bejaku, “TUHAN, aku nadai penyalah! Kati Nuan deka ngerusak aku enggau bala nembiak aku?
5 Abraham empu ke ngumbai indu nya menyadi iya, lalu indu nya empu mega madahka nya. Aku ngereja utai tu enggau ati ti beresi, lalu aku nadai udah ngereja penyalah.”
6 Ku Allah Taala nyaut Abimelek dalam mimpi nya, “Amat. Aku nemu nuan endang ngereja utai nya enggau ati ti beresi. Nya kebuah Aku nagang nuan bedosa ngelaban Aku, lalu enda nyagi nuan negu iya.
7 Tang diatu, beri indu nya pulai baru ngagai laki iya. Laki iya nya nabi, lalu iya deka besampika nuan, ngambika nuan enda mati. Tang enti nuan enda meri indu nya pulai baru, Aku meri nuan jaku tangkan tu: nuan enggau semua nembiak nuan deka mati.”
8 Tumu pagi hari siti, Abimelek lalu mesanka semua pemesai iya, lalu madahka ngagai sida utai ti udah nyadi. Sida lalu takut.
9 Udah nya Abimelek mesanka Abraham, lalu nanya iya, “Nama utai tu ti udah dikereja nuan ngagai kami? Nama penyalah ti udah dikereja aku ngagai nuan, ti ngujungka nuan ngasuh penusah ti besai tu ninggang aku enggau ninggang menua ti dipegai aku? Nadai orang patut ngereja utai baka ke udah dikereja nuan ngagai aku.
10 Nama kebuah nuan ngereja nya?”
11 Ku Abraham nyaut, “Aku ngumbai orang ditu enda nangika Allah Taala, lalu aku ngumbai sida deka munuh aku, lalu ngerampas bini aku.
12 Iya endang amat menyadi aku. Iya anak apai aku, tang kami duai enda saum indai, lalu aku jadi enggau iya.
13 Nya alai, lebuh Allah Taala ngasuh aku angkat ari rumah apai aku, lalu bejalai ngagai menua bukai, aku bejaku enggau iya, ‘Nuan tau mandangka diri amat taluk ngagai aku, enti nuan madahka ngagai semua orang, aku tu menyadi lelaki nuan.’ “
14 Udah nya Abimelek nyerahka Sarah pulai baru ngagai Abraham. Abimelek lalu meri Abraham jelu bedus, jelu sapi enggau ulun.
15 Ku iya bejaku ngagai Abraham, “Semua tu endang menua aku magang. Nuan tau diau di sebarang endur ti dikedekaka nuan.”
16 Ku Abimelek bejaku ngagai Sarah, “Aku meri ngagai menyadi nuan seribu singkap pirak kena nanda, di mua semua orang ke begulai enggau nuan, nuan nadai penyalah. Semua orang deka nemu nuan nadai udah ngereja utai ti salah.”
17-18 Ketegal utai ti udah nyadi ba Sarah, bini Abraham, TUHAN udah nagang semua indu ke dalam istana Abimelek beranak. Nya alai Abraham besampika Abimelek, lalu Allah Taala ngeraika iya. Allah Taala mega ngeraika bini Abimelek, enggau bala ulun iya ti indu, ngambika sida ulih beranak.
 
Bagi 21
Pengada Isak
1 TUHAN merekatka Sarah munyi ti udah disemaya Iya.
2 Sarah lalu ngandung, lalu ngadaka anak lelaki siku ke Abraham, lebuh Abraham nyau udah tuai amat umur. Anak mit nya ada ba maya ti udah diletak Allah Taala.
3 Abraham meri iya nama Isak,
4 lalu lebuh Isak umur lapan hari, Abraham nutus iya, nitihka atur Allah Taala.
5 Umur Abraham seratus taun lebuh Isak ada.
6 Ku Sarah bejaku, “Allah Taala udah nyungkak aku ketawa. Semua orang ke ninga berita tu deka ketawa sama enggau aku.”
7 Lalu ku Sarah bejaku, “Sapa berani madahka ngagai Abraham Sarah deka nusuka anak? Tang aku udah ngadaka anak ke Abraham lebuh Abraham nyau tuai.”
8 Anak mit nya mansang besai, lalu ba hari iya badu agi nusu, Abraham nyendiaka pengerami makai besai.
 
Hagar Seduai Ismail Diburu
 9 Nyadi sekali, Ismail, anak Abraham ke diadaka indu orang Ejip ke benama Hagar, beduan Isak, anak Sarah.
10 Lebuh Sarah meda nya, iya lalu bejaku enggau Abraham. Ku iya, “Buru ulun nya enggau anak iya. Anak indu tu enda tau enggau bempu pengaya nuan, laban pengaya nya endang pesaka anak aku, Isak.”
11 Jaku nya balat ngenusahka ati Abraham, laban Ismail mega anak iya.
12 Tang ku Allah Taala bejaku ngagai Abraham, “Anang irau ati ke nembiak nya enggau ulun nuan Hagar. Kereja aja sebarang utai ti diasuh Sarah, laban semina nengah Isak aja nuan deka bulih peturun ti udah disemaya Aku.
13 Aku deka mega meri mayuh anak ngagai anak ulun nya, ngambika sida nyadi siti bansa, laban iya mega anak nuan.”
14 Tumu pagi hari siti Abraham meri Hagar bekal enggau sekambut ai. Iya nepanka anak mit nya ba belakang Hagar, lalu ngasuh Hagar mupuk. Hagar mupuk, lalu bejalai segau-segau di menua puang Beer-seba.
15 Lebuh ai dalam kambut nya nyau udah abis, Hagar lalu ninggalka anak mit nya di baruh babas
16 lalu nudukka diri kira seratus meter ari endur alai anak mit nya. Ku Hagar bejaku dalam ati diri, “Aku enda tan meda anak aku mati.” Lebuh iya benung duduk dia, iya lalu nyabak.
17 Allah Taala ninga sabak nembiak nya, lalu melikat Allah Taala bejaku ngagai Hagar ari serega, “Nama kebuah nuan tusah ati, Hagar? Anang takut. Allah Taala udah ninga sabak nembiak nya.
18 Angkat nuan lalu pulai baru ngagai anak nuan, berap iya, lalu perindang iya. Aku deka ngaga peturun iya nyadi siti bansa ti kering.”
19 Udah nya Allah Taala lalu ngasuh mata Hagar tebuka, lalu iya tepedaka siti telaga. Hagar mansang ngagai telaga nya lalu ngisi kambut iya enggau ai, lalu meri anak iya ngirup.
20 Allah Taala bisi enggau nembiak nya lebuh iya mansang besai. Iya diau di menua puang Paran, lalu iya nyadi orang ke landik ngasu.
21 Indai iya ngambi siku indu orang Ejip nyadika bini iya.
 
 Sempekat Entara Abraham Enggau Abimelek
22 Ba urung maya nya, Abimelek seduai Pikol, ti nyadi kepala soldadu iya, mansang ngagai Abraham deka bejaku enggau iya. Ku Abimelek, “Allah Taala bisi enggau nuan lebuh nuan ngereja semua utai.
23 Nya alai gaga siti semaya ditu di mua Allah Taala, lalu padahka diri enda nipu aku, bala anak aku, tauka peturun aku. Aku udah taluk ngagai nuan, nya alai nuan enda tau enda besemaya deka taluk ngagai aku, enggau ngagai menua tu, alai nuan ke ngampar diatu.”
24 Ku Abraham, “Aku besemaya.”
25 Abraham beserebana ngagai Abimelek pasal siti telaga ti udah dirampas bala orang gaji Abimelek.
26 Ku Abimelek, “Aku enda nemu sapa ngereja nya. Nuan nadai madahka tu ngagai aku. Tu meh keterubah iya aku ninga nya.”
27 Udah nya Abraham lalu meri jelu bedus enggau jelu sapi ngagai Abimelek, lalu seduai iya ngaga siti sempekat.
28 Abraham lalu magi tujuh iku anak domba ari raban bedus iya,
29 lalu Abimelek nanya iya, “Nama kebuah nuan ngereja nya?”
30 Disaut Abraham, “Sambut meh tujuh iku anak domba tu, laban enti nuan nyambut sida, reti nya nuan ngaku aku udah numbak telaga nya.”
31 Nya alai endur nya dikumbai Beer-seba, laban nya endur alai seduai iya udah besumpah.
32 Lebuh seduai iya udah ngaga sempekat nya di Beer-seba, Abimelek seduai Pikol lalu pulai baru ngagai menua Pilistin.
33 Udah nya Abraham nanam sepun kayu tamaris di Beer-seba, lalu nyembah TUHAN Allah Taala ti Meruan Belama Iya.
34 Abraham lama diau di menua Pilistin.
 
Bagi 22
 Allah Taala Ngasuh Abraham Nyerahka Isak Nyadika Piring
 1 Nyau kelama udah bekau nya, Allah Taala nguji Abraham. Ku Iya bejaku ngagai Abraham, “Abraham!” Abraham lalu nyaut, “Tu aku!”
2 Ku Allah Taala bejaku, “Bai anak nuan, anak tunggal nuan Isak, ke balat dikerinduka nuan, lalu mansang nuan ngagai menua Moriah, lalu serahka iya dia nyadika piring tunu ba bukit ti deka ditunjukka Aku ngagai nuan.”
3 Nya alai Abraham angkat tumu pagi hari siti, nyendiaka keledai iya, lalu mai dua iku ari orang gaji iya, sama enggau anak iya Isak; iya lalu netak kayu kena nunu piring, lalu mupuk ngagai endur ti jauh ti udah ditunjukka Allah Taala ngagai iya.
4 Ba hari ti ketiga, Abraham tepedaka endur nya ari jauh.
5 Udah nya iya lalu bejaku ngagai orang gaji iya, “Seduai nganti ditu, ngemataka keledai. Aku enggau anak aku deka kin, lalu nyembah Allah Taala, lalu udah nya kami duai deka pulai baru ngagai seduai.”
6 Abraham lalu ngasuh Isak ngesan kayu ti deka dikena nunu piring, lalu iya empu mai sebilah duku, enggau bara api. Lebuh seduai iya benung bejalai,
7 Isak lalu bejaku, “Apai!” “Nama, anak?” ku Abraham nyaut. Isak lalu nanya, “Tua bisi bara api enggau kayu, tang dini alai anak domba nyadika piring tunu?”
8 Disaut Abraham, “Allah Taala Empu deka meri siku anak domba nyadika piring nya.” Seduai iya majak bejalai.
9 Lebuh seduai iya datai ba endur ti udah dipadahka Allah Taala ngagai Abraham, Abraham lalu ngaga siti alta, lalu nugungka kayu api ba alta nya. Iya lalu nanchang anak iya Isak, lalu ngengkahka iya ba atas tugung kayu nya.
10 Udah nya Abraham lalu ngambi duku, deka ngelar anak iya.
11 Tang melikat TUHAN ngangauka iya ari serega, ku iya, “Abraham! Abraham!”  Abraham lalu nyaut, “Tu aku!”
12 “Anang ngemediska nembiak nya, tauka ngereja sebarang utai ngagai iya,” ku melikat nya bejaku, “laban diatu Aku nemu nuan amat nangika Allah Taala, laban nuan enda sayauka anak tunggal nuan tang nyerahka iya ngagai Allah Taala.”
13 Abraham malik, lalu tepedaka siku bedus ti lelaki tekait tanduk ba babas. Iya mansang lalu ngambi bedus nya, lalu nyerahka bedus nya nyadika piring tunu kena nyilih anak iya.
14 Abraham lalu ngumbai endur nya “TUHAN Nyendia.”  Nyentuk ngagai sehari tu, orang agi nyebut, “TUHAN deka nyendiaka utai ba bukit Iya.”
15 Melikat TUHAN lalu ngangauka Abraham ari serega kedua kali,
16 Ku Iya bejaku, “Aku ti TUHAN besumpah atas nama Aku Empu, Aku deka meri berekat ti besai ngagai nuan, laban nuan udah ngereja utai tu, lalu enda sayauka anak tunggal nuan tang nyerahka iya ngagai Aku.
17 Aku besemaya deka meri nuan mayuh peturun, ngemayuh bintang ti di langit, tauka ngemayuh pasir ti ba tebing tasik. Peturun nuan deka ngalahka munsuh sida.
18 Semua bansa deka minta Aku merekatka sida, baka Aku ti udah merekatka peturun nuan, ketegal nuan udah ngasika jaku Aku.”
19 Abraham pulai ngagai orang gaji iya lalu sida sama bejalai ngagai Beer-seba, alai Abraham ke ngentapka diri.
 
Peturun Nahor
 20 Nyau kelama udah bekau nya, Abraham bisi ninga berita pasal Milkah ti udah ngadaka lapan iku anak ke menyadi iya, Nahor, iya nya:
21 Us, anak tuai Nahor, menyadi iya Bus, Kemuel apai Aram,
22 Cheset, Haso, Pildas, Jitlap, enggau Bituel
23 apai Rebekah. Milkah ngadaka lapan iku anak lelaki ke menyadi Abraham ke benama Nahor.
24 Indu simpan Nahor ke benama Reumah ngadaka Tebah, Gaham, Tahas, enggau Maakah.
 
Bagi 23
Sarah Mati: Abraham Meli Tanah Pendam
1 Sarah idup ngagai umur 127 taun.
2 Iya mati di Hebron, di menua Kanaan, lalu Abraham nyenggai iya lalu nyabakka iya.
3 Abraham angkat ari endur alai iya ke ngintu bangkai bini iya, lalu mansang ngagai orang Iti. Ku iya bejaku enggau sida
4 “Aku orang kampar ti diau begulai enggau kita. Jual tanah kita mimit ngagai aku, ngambika aku ulih nguburka bini aku.”
5 Disaut sida,
6 “Dingaka jaku kami, tuan. Nuan tu tuai ti kering ke begulai enggau kami. Kuburka meh bini nuan dalam kubur ti pemadu manah ti dikemisi kami. Semua kami deka gaga ati meri siti kubur ngagai nuan, ngambika nuan ulih nguburka bini nuan.”
7 Abraham angkat lalu meremi di mua sida
8 lalu bejaku, “Enti kita ngasuh aku nguburka bini aku ditu, aku minta kita bejaku enggau Epron anak Sohar
9 minta iya nyual lubang gua Makpelah, ti semak tisi tanah iya. Asuh iya nyual lubang gua nya ngagai aku di mua kita empu ditu, enggau penuh rega, ngambika aku tau bempu endur nya nyadika pendam.”
10 Nyadi Epron empu bisi enggau orang Iti ti bukai duduk ba endur alai ti baum ba pintu kuta nengeri nya. Iya lalu nyaut, didinga semua orang ke bisi dia,
11 “Dinga nuan, tuan. Aku deka meri ngagai nuan semua tanah nya enggau lubang gua ti ba tanah nya. Nya alai di mua semua orang ke ari bansa aku empu ditu, aku meri tanah nya ngagai nuan, ngambika nuan ulih nguburka bini nuan.”
12 Abraham lalu meremi di mua orang Iti
13 lalu bejaku enggau Epron, didinga semua sida, “Aku minta nuan mendingka aku. Aku deka meli semua tanah nya. Sambut meh rega tanah nya ari aku, ngambika aku ulih nguburka bini aku dia.”
14 Disaut Epron,
15 “Tuan, rega tanah nya ka semina empat ratus singkap pirak aja. Mesa ni ga rega nya ba entara tua? Kuburka meh bini nuan dia.”
16 Abraham besetuju enggau Epron; iya lalu nimbang pirak ti udah disebut Epron didinga orang mayuh - empat ratus singkap pirak, nitihka atur pemerat ti dikena orang ke bedagang.
17 Nya meh chara pesaka ti udah diempu Epron di Makpilah, muak ke timur Mamre, nyadi pesaka Abraham. Pesaka nya nyengkaum tanah nya, lubang gua ti ba tanah nya, enggau semua kayu ti ba tanah nya, nyentuk ngagai tisi tanah nya.
18 Tanah nya lalu dikumbai semua orang Iti ke bisi ba aum nya, pesaka Abraham.
19 Udah nya Abraham lalu nguburka bini iya, Sarah, dalam lubang gua nya, di menua Kanaan.
20 Nya alai tanah nya, ti udah diempu orang Iti, sama enggau lubang gua ti ba tanah nya, diempu Abraham nyadika tanah pendam.
 
Bagi 24
Siku Bini Ke Isak
1 Abraham pen nyau tuai, lalu TUHAN udah merekatka iya dalam semua utai ti dikereja iya.
2 Ku iya bejaku enggau ulun iya ke pemadu tuai, ke ngemataka semua utai Abraham, “Engkahka jari nuan ba selepak pah aku
3 laban aku deka ngasuh nuan besumpah dalam nama TUHAN Allah Taala ti bekuasa di serega enggau di dunya, enda nyagi nuan milih indu orang Kanaan nyadika bini anak aku.
4 Nuan enda tau enda mansang ngagai menua ada aku, ngagai kaban belayan aku empu, lalu ngambi siku bini ke anak aku Isak.”
5 Tang ku ulun nya nanya, “Kati enti indu nya enggai mupuk enggau aku ngagai menua tu? Kati tau aku mai anak nuan mansang ngagai menua ada nuan?”
6 Disaut Abraham, “Nuan enda tau mai anak aku kin!
7 TUHAN Allah Taala ti di serega, udah mai aku ari rumah apai aku, ari menua ada aku, lalu udah besemaya enggau aku ngena sumpah, madahka Iya deka meri menua tu ngagai peturun aku. Iya deka ngasuh melikat Iya nguluka nuan, lalu nuan deka ngambi ari menua nya siku bini ke anak aku.
8 Tang enti indu nya enggai mupuk enggau nuan, nuan dilepaska ari jaku sumpah aku tu. Tang nuan enda tau sekali-kali mai anak aku kin.”
9 Nya alai ulun nya ngengkahka jari iya ba selepak pah tuan iya Abraham, lalu besumpah madahka diri deka ngereja utai ti diasuh Abraham.
10 Ulun nya, ke ngemataka reta tengkira Abraham, mai sepuluh iku jelu unta tuan iya, lalu mansang ngagai nengeri ti udah alai Nahor diau, di utara menua Mesopotamia.
11 Lebuh iya datai di menua nya, iya lalu ngetu sereta belelakka jelu unta iya semak telaga ti di luar nengeri. Hari lebuh maya nya endang udah lemai, maya bala indu pansut ari nengeri mansang nyauk.
12 Iya lalu besampi. Ku iya, “TUHAN Allah Taala ke tuan aku, Abraham, asuh aku mujur sehari tu, lalu kingatka semaya Nuan enggau tuan aku.
13 Aku diatu benung bediri semak telaga ti alai bala indu ari nengeri nya deka nyauk.
14 Aku deka bejaku enggau siku ari bala sida munyi tu, ‘Ingkaska tepayan nuan, lalu beri aku ngirup.’ Enti iya nyebut, ‘Ngirup meh, lalu aku deka mai ai ke jelu unta nuan,’ awakka iya nya meh orang ke udah dipilih Nuan ke nembiak Nuan Isak. Enti utai nya nyadi baka nya, nya baru aku deka nemu Nuan udah ngamatka semaya Nuan ngagai tuan aku.”
15 Lebuh iya agi benung besampi, Rebekah datai ngesan tepayan ai. Iya tu anak indu Bituel. Nyadi Bituel tu anak menyadi Abraham ke benama Nahor, enggau bini iya Milkah.
16 Indu nya bajik amat, lalu agi dara bungas. Iya mansang ngagai telaga, ngisi tepayan iya enggau ai, lalu pulai.
17 Ulun Abraham nya lalu belanda ngagai indu nya lalu bejaku, “Beri aku ai irup ari tepayan nuan.”
18 Ku indu nya nyaut, “Ngirup meh, tuan.” Iya lalu beguai-guai ngingkaska tepayan nya ari bau iya, lalu megai tepayan nya, lebuh ulun Abraham nya benung ngirup.
19 Lebuh iya udah ngirup, indu nya lalu bejaku, “Aku deka nyauk ai ke jelu unta nuan, datai ke sida nyau udah puas ngirup.”
20 Iya lalu beguai-guai nuang ai ari tepayan nya ngagai dulang ti alai jelu ngirup, lalu belanda baru ngagai telaga, nyauk mayuh agi ai, datai ke iya udah meri semua jelu unta nya ngirup magang.
21 Lelaki nya majak nengkilaka iya, enda bemunyi, deka nemu enti TUHAN udah ngasuh pejalai iya mujur tauka enda.
22 Lebuh indu nya udah tembu meri unta nya ngirup, lelaki nya lalu ngambi siti tinchin emas, lalu ngelekatka tinchin nya ba idung indu nya, lalu ngerasukka dua iti gelang emas ba lengan iya.
23 Ku ulun Abraham nya bejaku, “Anak sapa nuan tu? Kati tau aku, enggau bala aku, bemalam ba rumah apai nuan malam tu?”
24 “Apai aku Bituel, anak Nahor seduai Milkah,” ku indu nya nyaut.
25 “Kami mayuh rumput rangkai enggau pemakai jelu, lalu kami mega bisi endur alai kita tau bemalam.”
26 Udah nya lelaki nya meremi lalu nyembah TUHAN.
27 Ku iya bejaku, “Pujika TUHAN Allah Taala tuan aku Abraham, laban Iya udah tetap ati ngamatka semaya Iya enggau tuan aku. TUHAN udah nguluka aku terus ngagai kaban belayan tuan aku.”
28 Indu dara nya lalu belanda ngagai rumah indai iya, lalu madahka semua utai ti udah nyadi.
29 Nyadi Rebekah bisi siku menyadi lelaki ke benama Laban. Laban lalu belanda ngagai ulun Abraham semak telaga nya.
30 Laban udah meda tinchin ti ba idung, enggau gelang ti ba lengan menyadi indu iya, lalu udah ninga iya nusui utai ti udah disebut lelaki nya ngagai iya. Nya alai Laban lalu mansang ngagai ulun Abraham, ke benung bediri ngimbai jelu unta iya, semak telaga nya.
31 Iya lalu bejaku enggau ulun Abraham, “Aram ke rumah enggau aku. Nuan tu orang ke udah diberekatka TUHAN. Nadai kebuah nuan agi bediri ditu. Aku bisi bilik ti udah disediaka aku ke nuan dalam rumah aku, lalu aku bisi mega endur ke jelu unta nuan.”
32 Nya alai lelaki nya lalu tama ngagai rumah Laban. Laban lalu mantaika utai ari jelu unta nya, lalu meri jelu nya rumput ti rangkai enggau pemakai jelu. Udah nya iya lalu mai ai kena ulun Abraham, enggau bala iya masu kaki sida.
33 Lebuh pemakai dibai ngagai sida, lelaki nya lalu bejaku, “Aku enda makai sebedau aku madahka pesan ti dibai aku ngagai kita.”
Ku Laban bejaku, “Padahka meh pesan nya.”
34 Lelaki nya lalu belabuh bejaku. Ku iya, “Aku tu ulun Abraham.”
35 “TUHAN udah merekatka tuan aku enggau mayuh macham utai, lalu ngasuh iya kaya. TUHAN udah meri iya raban bedus enggau kambin, jelu sapi, pirak, emas, ulun ti indu enggau ulun ti lelaki, jelu unta, enggau keledai.
36 Sarah, iya nya bini tuan aku, udah ngadaka anak lelaki siku lebuh Sarah nyau tuai, lalu tuan aku udah meri semua pesaka iya ngagai anak iya nya.
37 Tuan aku udah besumpah ngasuh aku ngasika pesan iya. Ku iya, ‘Anang milih bini ke anak aku ari indu di menua Kanaan,
38 tang mansang nuan ngagai bala apai aku, ngagai kaban belayan aku, lalu pilih siku bini ke iya.’
39 Aku lalu nanya tuan aku, ‘Kati enti indu nya enggai mupuk enggau aku?’
40 Ku tuan aku nyaut, ‘TUHAN, ke seruran dipetuaika aku, deka ngasuh melikat Iya bejalai enggau nuan, lalu ngasuh pejalai nuan mujur. Nuan deka bulih siku bini ke anak aku, ari bala aku empu, ari ruang bilik apai aku.
41 Ka semina siti aja jalai nuan tau ngelepaska diri ari sumpah tu: enti nuan mansang ngagai kaban belayan aku, lalu sida enggai nyerahka indu nya ngagai nuan. Nya baru nuan dilepaska ari sumpah tu.’
42 “Lebuh aku datai ba telaga nya sehari tu tadi, aku besampi, ‘TUHAN Allah Taala ke tuan aku Abraham, awakka aku mujur ba utai ti dikereja aku.
43 Aku diatu benung bediri semak telaga tu. Lebuh siku indu datai nyauk lagi, aku deka minta iya meri aku ngirup ari tepayan iya.
44 Enti iya besetuju, lalu deka mega meri jelu unta aku ngirup, awakka iya nya meh orang ke udah dipilih Nuan nyadika bini anak tuan aku.’
45 Sebedau aku sempat badu besampi dalam ati aku, Rebekah lalu datai ngesan tepayan ai, lalu nurun ngagai telaga, mansang nyauk. Aku lalu bejaku enggau iya, ‘Beri aku ngirup.’
46 Iya lalu beguai-guai ngingkaska tepayan ai ari bau iya, lalu ku iya, ‘Ngirup meh. Aku deka mega nyauk ai ke unta nuan.’ Nya alai aku lalu ngirup, lalu iya nyauk ai ke jelu unta aku.
47 Aku lalu nanya iya, ‘Anak sapa nuan tu?’ lalu ku iya nyaut, ‘Apai aku Bituel, anak Nahor seduai Milkah.’ Udah nya aku lalu ngelekatka tinchin ba idung iya, lalu ngerasukka sepasang gelang ba lengan iya kedua piak.
48 Aku lalu meremi lalu nyembah TUHAN. Aku muji TUHAN Allah Taala tuan aku Abraham, laban TUHAN udah nguluka aku terus ngagai kaban belayan tuan aku, alai aku ke tetemuka anak indu iya, ke anak tuan aku.
49 Nya alai, enti kita taluk ngagai tuan aku, lalu manah enggau iya, padahka ngagai aku. Enti kita enggai, padahka mega ngagai aku, ngambika aku berundingka utai ti patut dikereja aku.”
50 Laban seduai Bituel lalu nyaut, “Laban pekara tu datai ari TUHAN, kami enda tau meri pemutus penemu ba pekara tu.
51 Tu Rebekah empu. Bai iya, lalu mupuk. Awakka iya nyadika bini anak tuan nuan, nitihka jaku TUHAN.”
52 Lebuh ulun Abraham ninga nya, iya meremi, lalu nyembah TUHAN.
53 Udah nya iya lalu mantaika kain enggau pirak, enggau perengka emas, lalu meri utai nya ngagai Rebekah. Iya mega meri pemeri ti berega ngagai menyadi lelaki enggau ngagai indai Rebekah.
54 Udah nya ulun Abraham enggau orang ke nyempulang iya, makai ngirup, lalu bemalam dia. Lebuh sida dani pagi hari siti, ulun Abraham lalu bejaku, “Awakka aku pulai ngagai tuan aku.”
55 Tang ku menyadi Rebekah, enggau indai iya bejaku, “Awakka Rebekah diau enggau kami abis kurang seminggu tauka sepuluh hari. Udah nya baru iya tau mupuk.”
56 Tang ku ulun Abraham bejaku, “Anang ngetanka kami. TUHAN udah ngasuh pejalai aku mujur, nya alai awakka aku pulai ngagai tuan aku.”
57 Disaut sida, “Manah kitai ngangauka Rebekah, lalu nanya iya empu.”
58 Sida lalu ngangauka Rebekah, lalu nanya iya, “Kati nuan bisi ati deka mupuk enggau lelaki tu?”
“Ka,” ku Rebekah nyaut.
59 Nya alai sida lalu ngasuh Rebekah enggau siku ulun ari ruang bilik apai iya mupuk sama enggau ulun Abraham, sereta enggau bala iya.
60 Sida lalu merekatka Rebekah munyi tu: “Awakka nuan, menyadi, nyadi indai ke bejuta-juta mensia!
Awakka peturun nuan ngalahka nengeri munsuh sida!”
61 Udah nya Rebekah enggau bala ulun iya ti indu angkat lalu nepan jelu unta, deka mupuk enggau ulun Abraham. Sida lalu mupuk.
62 Nyadi Isak udah datai di menua puang ti dikumbai “Telaga Ti Diempu Iya Ti Idup, Ke Meda Aku” lalu diau di selatan menua Kanaan.
63 Nyadi sekali, lebuh hari nyau lemai, iya pansut deka bejalai ba padang. Iya lalu tepedaka raban jelu unta datai nuju iya.
64 Lebuh Rebekah meda Isak, iya lalu nurun ari jelu unta iya
65 lalu nanya ulun Abraham, “Sapa lelaki nya ke bejalai ngagai kitai ba padang nya?” “Nya meh tuan aku,” ku ulun Abraham nyaut. Rebekah ngambi kain lalu mampul mua diri.
66 Ulun Abraham lalu madahka ngagai Isak semua utai ti udah dikereja iya.
67 Udah nya Isak lalu mai Rebekah ngagai langkau kain ti udah alai Sarah indai iya diau, lalu Rebekah nyadika bini iya. Isak rinduka Rebekah, nya alai iya enda agi tusah ati ke indai iya ti udah mati.
 
Bagi 25
Peturun Abraham Ti Bukai
1 Abraham jadi enggau siku indu bukai ke benama Keturah.
2 Keturah ngadaka Simran, Joksan, Medan, Midian, Isbak enggau Suah.
3 Joksan nya apai Sheba seduai Dedan, lalu peturun Dedan nya orang Asurim, bansa Letusim, enggau bansa Lumim.
4 Anak Midian nya Epah, Eper, Hanok, Abida, enggau Eldaah. Semua sida tu peturun Keturah magang.
5 Abraham meri semua reta tengkira iya ngagai Isak,
6 tang lebuh iya agi idup, iya meri pemeri ngagai bala anak ke diadaka bini iya ti bukai. Udah nya iya lalu ngasuh bala anak iya ti bukai pindah ngagai menua di timur, ngejang ari anak iya Isak.
 
Abraham Mati Lalu Dikuburka
7-8 Abraham mati tuai lebuh umur iya 175 taun.
9 Anak iya Isak enggau Ismail nguburka iya dalam lubang gua di Makpilah, ba padang ti muak ke timur Mamre, ti udah diempu Epron anak Sohar, orang bansa Iti.
10 Padang nya udah dibeli Abraham ari orang Iti. Abraham enggau bini iya Sarah sama dikuburka dia.
11 Udah bekau pemati Abraham, Allah Taala merekatka anak iya Isak ti diau semak “Telaga Ti Diempu Iya Ti Idup, Ke Meda Aku.
 
Peturun Ismail
12 Ismail diadaka Hagar. Hagar tu indu bansa orang Ejip. Iya ulun Sarah, lalu iya ngadaka anak Abraham ke benama Ismail.
13 Baka tu ku bala anak Ismail ditusun nitihka ripih pengada sida: Nebaiot, Kedar, Adbil, Mipsam,
14 Misma, Dumah, Massa,
15 Hadat, Tema, Jetur, Napis enggau Kedemah.
16 Sida tu nurunka dua belas raban bansa, lalu sida meri nama sida empu ngagai genturung pendiau sida enggau ngagai endur alai sida ke nirika kem.
17 Ismail mati lebuh umur 137 taun.
18 Peturun Ismail diau di menua entara Habilah enggau Sur, tunga ke timur menua Ejip, ba jalai ti nuju ngagai menua Asiria. Sida diau beserara ari peturun Abraham ti bukai.
 
Pengada Esau Seduai Jakop
19 Tu jerita pasal anak Abraham ke benama Isak.
20 Isak umur 40 taun lebuh iya jadi enggau Rebekah anak indu Bituel ( orang Aram ari menua Mesopotamia). Rebekah tu menyadi indu Laban.
21 Nyadi ketegal Rebekah ke nadai anak, Isak besampi ngagai TUHAN ke iya. TUHAN nyaut sampi Isak, lalu Rebekah betubuh-bisi.
22 Iya deka ngadaka anak ti besapit dua, lalu sebedau anak iya ke dua iku nya ada, seduai iya belaban enggau pangan diri dalam kandung Rebekah. Ku Rebekah bejaku, “Nama kebuah utai tu nyadi ba aku?” Nya alai iya minta saut ari TUHAN.
23 Ko TUHAN bejaku ngagai iya, “Dalam tubuh nuan bisi dua bengkah bansa. Nuan deka ngadaka dua bengkah bansa ti deka bemunsuh ngelaban pangan diri. Siti bansa deka kering agi ari bansa ti siti, lalu iya ke tuai agi deka bekereja ke iya ke biak agi.”
24 Maya pen chukup alai Rebekah deka beranak, lalu iya ngadaka anak lelaki ke besapit dua.
25 Gamal iya ke dulu agi ada nya mirah, lalu kulit iya baka baju panjai ti bebulu. Nya alai iya diberi nama Esau.
26 Anak ti pansut dudi, ngenggam tumbit Esau. Nya alai iya diberi nama Jakop. Umur Isak enam puluh taun lebuh anak iya dua iku nya ada.
 
 Esau Nyual Waris Iya Ke Nyadi Anak Tuai
27 Nembiak dua iku nya mansang besai, lalu Esau nyadi orang ke landik ngasu, ke rindu bejalai ba sebelah babas, tang Jakop nya orang ke bependiau, ke jarang mindah ari rumah.
28 Isak rindu agi ke Esau, laban iya rindu makai jelu ti ulih Esau ngasu, tang Rebekah rindu agi ke Jakop.
29 Nyadi sekali, lebuh Jakop benung manduk bubur kachang, Esau datai pulai ngasu. Iya lapar
30 lalu ku iya bejaku enggau Jakop, “Lapar amat aku tu. Beri aku mimit utai ti mirah nya.” (Nya kebuah iya diberi nama Edom.)
31 Disaut Jakop, “Aku endang deka meri utai tu ngagai nuan, enti nuan deka meri waris nuan ke nyadi anak tuai ngagai aku.”
32 Ku Esau bejaku, “Barang ku jaku! Aku nyau deka mati lapar. Nama guna aku enggau waris nya?”
33  Ku Jakop nyaut, “Nuan enda tau enda dulu besumpah nyerahka waris nuan ngagai aku.” Esau besumpah, lalu nyerahka waris iya ngagai Jakop.
34 Udah nya Jakop lalu meri iya roti, enggau bubur nya. Esau makai, ngirup, angkat lalu mupuk. Nya meh jalai Esau enda bebasaka waris iya ke nyadi anak tuai.
 
Bagi 26
 Isak Diau Di Gerar
1 Lapar pungkang sekali agi nyadi di menua nya, kelimpah ari lapar pungkang ti udah nyadi lebuh maya Abraham menya. Isak mansang ngagai Abimelek, raja orang Pilistin, ti diau di Gerar.
2 Nyadi TUHAN udah pegari di mua Isak, lalu udah bejaku munyi tu: “Anang bejalai ngagai menua Ejip. Diau di menua tu nitihka asuh Aku.
3 Diau ditu, lalu Aku deka begulai enggau nuan, lalu merekatka nuan. Aku deka meri semua menua tu ngagai nuan, enggau ngagai bala peturun nuan. Aku deka ngamatka semaya ti udah digaga Aku enggau apai nuan, Abraham.
4 Aku deka meri ngagai nuan mayuh peturun, ngemayuh bintang ti di langit, lalu Aku deka meri ngagai sida semua menua tu. Semua bansa deka minta Aku merekatka sida, baka Aku ti udah merekatka peturun nuan.
5 Aku deka merekatka nuan, laban Abraham udah ngasika Aku, lalu udah nitihka semua pesan, atur enggau adat Aku.”
6 Nya alai Isak diau di Gerar.
7 Lebuh orang lelaki ti diau dia nanyaka pasal bini iya, iya madahka bini iya nya menyadi iya. Isak enggai ngaku Rebekah nya bini iya, laban iya enggai ke orang munuh iya lalu ngambi Rebekah, laban Rebekah endang amat bajik.
8 Lebuh Isak udah lama diau dia, Raja Abimelek nyenguk ke baruh ari jenila iya, lalu tepedaka Isak seduai Rebekah benung beberap.
9 Abimelek lalu mesanka Isak, lalu bejaku enggau iya, “Diatu baru aku nemu iya bini nuan! Nama kebuah nuan madahka iya menyadi nuan?”
Ku Isak nyaut, “Laban aku ngumbai orang deka munuh aku enti aku madahka iya bini aku.”
10 Lalu ku Abimelek bejaku enggau Isak, “Peda nuan utai ti udah dikereja nuan ngagai kami! Enti sema siku lelaki ari bala aku bisi tekelanjur tinduk enggau bini nuan, nuan empu betanggungjawapka penyalah kami.”
11 Abimelek lalu meri jaku tangkan ngagai semua orang mayuh, munyi tu: “Barang sapa ngachau orang tu tauka ngachau bini iya, deka diukum bunuh.”
12 Isak lalu naburka benih di menua nya, lalu taun nya iya ngetau seratus kali lipat mayuh agi ari benih ti ditanam iya, laban TUHAN udah merekatka iya.
13 Iya majak bulih utai, lalu nyadi kaya bendar.
14 Raban bedus enggau sapi iya mayuh, lalu bala iya pen mayuh, datai ke orang Pilistin nyau kepapaska iya.
15 Sida ngalitka semua telaga ti udah ditumbak bala ulun apai iya Abraham, lebuh Abraham agi idup menya.
16 Lalu ku Abimelek bejaku enggau Isak, “Angkat nuan ari menua kami laban nuan nyau kering agi ari kami.”
17 Nya alai Isak angkat ari menua nya, nirika kem iya ba Emperan Gerar, lalu ngentapka diri dia.
18 Iya lalu numbak baru telaga ti udah ditumbak lebuh maya Abraham menya, tang ditambun orang Pilistin udah bekau pemati Abraham. Nama ti diberi Isak ngagai telaga nya sebaka enggau nama ti udah diberi apai iya.
19 Bala ulun Isak numbak telaga ba lebak nya, lalu tetemuka ai.
20 Bala pengibun bedus orang Gerar belaya enggau bala pengibun bedus Isak. Ku sida, “Ai nya enggi kami.” Nya alai Isak ngumbai telaga nya “Berebut.”
21 Bala ulun Isak numbak siti agi telaga, lalu sida mega belayaka telaga nya, nya alai iya ngumbai telaga nya “Bemunsuh
22 Iya mindah ari endur nya, lalu numbak siti agi telaga. Sida enda belayaka telaga nya, nya alai iya ngumbai telaga nya “Bisi EndurKu Isak bejaku, “Diatu TUHAN udah meri kitai endur alai diau di menua tu, lalu kitai deka nyadi kaya-raja ditu.”
23 Isak mindah ari nya ngagai Beer-seba.
24 Malam nya TUHAN pegari lalu bejaku enggau iya, “Aku tu Allah Taala apai nuan Abraham. Anang takut. Aku bisi enggau nuan. Aku deka merekatka nuan lalu meri ngagai nuan mayuh peturun ketegal semaya aku enggau nembiak Aku Abraham.”
25 Isak ngaga siti alta dia lalu nyembah TUHAN. Udah nya iya lalu nirika kem iya dia, lalu bala ulun iya numbak siti agi telaga.
 
Sempekat Entara Isak Enggau Abimelek
26 Abimelek lalu datai ari Gerar sama enggau Ahusat, ti nyadi penyanding penemu iya, enggau Pikol, ti nyadi tuai soldadu iya, deka betemu enggau Isak.
27 Isak lalu nanya, “Nama kebuah kita datai ditu betemu enggau aku? Suba kita nadai rinduka aku, lalu muru aku ari menua kita.”
28 Disaut sida, “Diatu kami nemu TUHAN bisi enggau nuan, lalu dalam penemu kami, kitai patut ngaga sempekat. Kami minta nuan besemaya
29 enda ngemediska kami, baka kami ke nadai udah kala ngemediska kita. Kami udah nelap enggau kita, lalu ngasuh kita angkat enggau selamat. Diatu TUHAN terang udah merekatka nuan.”
30 Isak lalu nyendiaka pengerami makai besai ke sida, lalu sida makai ngirup dia.
31 Tumu pagi hari siti, genap iku sida ngaga semaya, lalu nanggam semaya nya ngena sumpah. Isak meda sida mupuk, lalu sida beserara bebaik enggau pangan diri.
32 Sehari nya mega, bala ulun Isak datai lalu madahka ngagai iya pasal telaga ti udah ditumbak sida. Ku sida, “Kami udah tetemuka ai.”
33 Iya lalu ngumbai telaga nya “Besumpah.”   Nya kebuah nengeri nya dikumbai Beer-seba nyentuk ngagai sehari tu.
 
Esau Jadi Enggau Indu Bansa Bukai
34 Lebuh umur Esau empat puluh taun, iya jadi enggau dua iku indu orang Iti. Seduai nya Judit anak Beeri, enggau Basemat anak Elon.
35 Seduai nya balat amat ngenusahka ati Isak seduai Rebekah.
 
Bagi 27
Isak Merekatka Jakop
1 Lebuh Isak nyau tuai, lalu enda ulih meda agi, iya mesanka anak tuai iya Esau, lalu bejaku enggau iya, “Anak!” “Tu aku, apai” ku Esau nyaut.
2 Ku Isak, “Aku nyau tuai. Aku enda nemu maya dirika mati.
3 Nya alai bai panah enggau laja nuan, bejalai ke babas, ngulihka jelu ke aku,
4 lalu sediaka pemakai ti nyamai ti dikerinduka aku, lalu bai pemakai nya ngagai aku, ngambika aku makai, lalu merekatka nuan sebedau aku mati.”
5 Nyadi Rebekah bisi mending lebuh Isak bejaku enggau anak iya Esau. Nya alai lebuh Esau nurun ngasu,
6 Rebekah lalu bejaku enggau anak iya Jakop, “Aku bisi ninga apai nuan bejaku enggau Esau,
7 ‘Bai siku jelu ngagai aku, lalu sediaka pemakai ti nyamai ke aku, ngambika aku makai iya lalu merekatka nuan di mua TUHAN sebedau aku mati.’
8 Nya alai, anak, kereja utai ti diasuh aku.
9 Alai nuan mansang ngagai raban jelu, lalu ambi dua iku kambin ti biak sereta gemu, ngambika aku manduk pemakai ti nyamai, ti balat dikerinduka apai nuan.
10 Nuan enda tau enda mai pemakai nya ngagai apai nuan, ngambika iya makai pemakai nya, lalu merekatka nuan, sebedau iya mati.”
11 Tang ku Jakop bejaku enggau indai iya, “Nuan nemu, Esau bebulu, tang kulit aku alus.
12 Kada enda apai deka ngama aku, lalu aku baka ke nipu iya, lalu minta diri kena sumpah, ukai bulih berekat.”
13 Disaut indai iya, “Awakka semua sumpah ti disebut ngagai nuan, ninggang aku magang, anak. Kereja aja utai ti diasuh aku. Alai mupuk nuan lalu ambi kambin ti agi biak ke aku.”
14 Jakop mupuk lalu ngambi dua iku kambin ti agi biak, lalu mai kambin dua iku nya ngagai indai iya. Indai iya lalu manduk pemakai ti balat dikerinduka Isak.
15 Udah nya indai iya lalu ngambi gari Esau ti pemadu manah, ti disimpan Rebekah di rumah, lalu ngerasukka gari nya ba Jakop.
16 Rebekah ngengkahka kulit kambin nya ba lengan Jakop, enggau ba rekung iya ti nadai bulu.
17 Iya lalu nyuaka ngagai Jakop pemakai ti nyamai nya sama enggau roti ti udah dipanggang iya.
18 Udah nya Jakop lalu mansang ngagai apai iya, lalu bejaku, “Apai!”
Apai iya lalu nyaut, “Tu aku. Sapa nuan nya, anak?”
19 Jakop lalu nyaut, “Aku tu anak tuai nuan, Esau. Aku udah ngereja utai ti diasuh nuan. Uji nuan duduk, lalu makai dagin ti dibai aku ngagai nuan, ngambika nuan merekatka aku.”
20 Tang ku Isak bejaku, “Baka ni ku nuan ngenyampat nya bulih jelu, anak?”
Jakop lalu nyaut, “Laban TUHAN Allah Taala nuan udah ngasuh aku mujur.”
21 Ku Isak bejaku enggau Jakop, “Datai semak kitu agi, ngambika aku ulih ngama nuan. Kati nuan tu amat Esau?”
22 Jakop lalu mansang semak agi ngagai apai iya. Isak lalu ngama iya, lalu bejaku, “Nyawa nuan munyi nyawa Jakop, tang lengan nuan asai lengan Esau.”
23 Isak enda ngelala Jakop, laban lengan iya bebulu baka lengan Esau. Lebuh iya baru deka merekatka Jakop,
24 iya lalu nanya baru, “Kati nuan tu amat anak aku Esau?” “Aku meh tu, apai,” ku Jakop nyaut.
25 Lalu ku Isak bejaku, “Bai dagin nya ngagai aku. Lebuh aku udah makai dagin nya lagi, nya baru aku merekatka nuan.” Jakop lalu mai dagin nya ngagai apai iya, enggau wain mimit.
26 Udah nya apai iya lalu bejaku enggau Jakop, “Datai kitu, lalu sium aku, anak.”
27 Lebuh Jakop mansang deka nyium apai iya, Isak lalu tesiumka bau gari ti dikena Jakop. Isak lalu merekatka Jakop. Ku iya, “Pemanah bau anak aku nyau baka bau padang ti udah diberekatka TUHAN.
28 Awakka TUHAN meri nuan ambun ari langit, lalu ngasuh tanah nuan ami! Awakka TUHAN ngasuh nuan bulih gandum, enggau wain!
29 Awakka orang bansa bukai bekereja ke nuan, lalu awakka orang meremi di mua nuan. Awakka nuan merintah semua kaban belayan nuan, lalu awakka peturun indai nuan meremi ngagai nuan. Awakka orang ke nyumpah nuan, tulah magang, lalu awakka orang ke merekatka nuan, diberekatka magang.”
 
Esau Minta Berekat Ari Isak
30 Lebuh Isak udah tembu merekatka Jakop, lalu Jakop pen baru udah angkat ari endur nya, menyadi iya Esau tama, baru pulai ngasu.
31 Iya mega manduk pemakai ti nyamai, lalu mai pemakai nya ngagai apai iya. Ku iya, “Apai, uji nuan angkat, lalu empa dagin ti dibai aku ke nuan, ngambika nuan merekatka aku.”
32 “Sapa nuan tu?” ku Isak nanya. “Anak tuai nuan, Esau,” ku Esau nyaut.
33 Isak lalu belabuh getar-getar, lalu nanya, “Enti pia, sapa orang nya tadi ti udah bulih jelu, lalu mai jelu nya ngagai aku? Aku udah makai utai nya sebedau nuan datai. Aku udah meri iya berekat ti penudi, nya alai berekat nya mengkang ba iya belama iya.”
34 Lebuh Esau ninga nya, iya lalu duie-duie nyabak sereta pedis ati. Ku iya bejaku, “Berekatka aku mega, apai!”
35 Disaut Isak, “Menyadi nuan udah datai kitu, lalu nipu aku. Iya udah ngambi berekat nuan.”
36 Ku Esau bejaku, “Tu kedua kali iya udah ngakal aku. Indah nama iya deh Jakop Iya ngenchuri waris aku ti nyadi anak tuai, lalu diatu iya udah ngenchuri berekat aku. Kati nuan nadai ngalau berekatka aku, apai?”
37 Disaut Isak, “Aku udah ngaga iya nyadi tuan nuan, lalu aku udah ngaga semua kaban belayan iya, nyadi ulun iya magang. Aku udah meri iya gandum, enggau wain. Diatu aku nadai agi ulih ngereja utai ke nuan, anak!”
38 Esau majak minta berekat ari apai iya: “Kati nuan semina bisi siti aja berekat, apai? Berekatka aku mega, apai!” Iya lalu nyabak.
39 Udah nya Isak lalu bejaku enggau iya, “Nadai ambun ari langit deka ninggang nuan, Nuan nadai tanah ti ami.
40 Nuan deka beridup ngena pedang nuan, tang nuan deka nyadi ulun menyadi nuan. Tang taja pia, lebuh nuan angkat ngelaban iya, nuan deka ngelepaska diri ari kuasa iya.”
41 Esau lalu begedika Jakop, laban apai iya udah merekatka Jakop. Ku iya berunding, “Maya nyenggai apai nyau semak. Nya meh maya aku munuh Jakop.”
42 Tang lebuh Rebekah ninga pasal utai ti deka dikereja Esau, iya lalu mesanka Jakop, lalu bejaku enggau iya, “Dinga nuan. Menyadi nuan, Esau, berunding deka ngiga balas lalu munuh nuan.
43 Nya alai anak, titihka jaku aku. Alai nuan mupuk diatu ngagai Laban, menyadi aku di Haran,
44 lalu diau enggau iya enda lama, nganti menyadi nuan udah badu agi ringat ngagai nuan
45 lalu enda agi ingatka utai ti udah dikereja nuan ngagai iya. Udah nya baru aku deka ngasuh orang ngambi nuan pulai kitu. Nadai kebuah aku lenyau dua iku anak sereta hari.”
 
Isak Ngasuh Jakop Mupuk Ngagai Laban
46 Ku Rebekah bejaku enggau Isak, “Aku nyau leju begulai enggau indu orang bansa bukai ke jadi enggau Esau. Enti Jakop jadi enggau indu orang Iti, manah agi aku mati.”
 
Bagi 28
1 Isak lalu ngangauka Jakop, merekatka iya, lalu bejaku enggau iya munyi tu, “Anang jadi enggau indu orang Kanaan,
2 tang mansang nuan ngagai menua Mesopotamia, ngagai rumah aki nuan Bituel, lalu ambi siku ari indu ke dia nyadika bini nuan, siku ari anak indu aya nuan Laban.
3 Awakka Allah Taala ti Pemadu Bekuasa merekatka nuan, lalu ngasuh nuan beranak betelesak lalu nurunka mayuh bengkah bansa!
4 Awakka Iya merekatka nuan enggau peturun nuan baka Iya ti udah merekatka Abraham, lalu awakka nuan bempu menua tu, ti udah alai nuan diau, lalu udah diberi Allah Taala ngagai Abraham!”
5 Isak lalu ngasuh Jakop mupuk ngagai menua Mesopotamia, ngagai Laban anak Bituel, orang Aram, menyadi lelaki Rebekah indai Jakop seduai Esau.
 
Esau Bebini Baru
6 Esau nemu Isak udah merekatka Jakop, lalu udah ngasuh Jakop mupuk ngagai menua Mesopotamia, ngiga bini. Esau mega nemu, lebuh Isak merekatka Jakop, iya nagang Jakop jadi enggau indu orang Kanaan.
7 Esau nemu Jakop udah ngasika apai enggau indai iya, lalu udah mupuk ngagai menua Mesopotamia.
8 Ari nya Esau nemu apai iya Isak sigi enggai nyagi iya jadi enggau indu orang Kanaan.
9 Nya alai iya mansang ngagai Ismail anak Abraham, lalu jadi enggau anak indu Ismail ke benama Mahalat, menyadi indu Nebaiot.
 
Jakop Bemimpi Di Betel
10 Jakop angkat ari Beer-seba mansang ngagai menua Haran.
11 Padam mata hari lemai nya iya datai ba siti endur ti kudus, lalu bemalam dia. Iya gali deka tinduk, lalu iya bepanggalka sigi batu.
12 Iya bemimpi meda siti tangga berindik ari tanah nyentuk ke langit, lalu bala melikat nurun niki nengah tangga nya.
13 Udah nya iya lalu meda TUHAN bediri ngimbai iya. Ku TUHAN bejaku ngagai iya, “Aku tu TUHAN Allah Taala ke disembah Abraham enggau Isak. Aku deka meri menua ti alai nuan gali tu ngagai nuan, enggau ngagai peturun nuan.
14 Peturun nuan deka ngemayuh abus tanah ti di dunya. Sida deka nangkir rampa menua sida ngagai semua endur, lalu Aku deka merekatka semua bansa ngena nuan enggau peturun nuan.
15 Ingat, Aku deka seruran enggau nuan, lalu nyaga nuan di sebarang endur nuan bejalai, lalu Aku deka mai nuan pulai baru ngagai menua tu. Aku enda ninggalka nuan sebedau Aku tembu ngereja semua utai ti udah disemaya Aku enggau nuan.”
16 Jakop lalu tedani, lalu ku iya, “TUHAN bisi ditu! Iya bisi ba endur tu, tang aku enda nemu nya!”
17 Jakop berasai takut, lalu ku iya, “Takut amat aku ba endur tu! Tu tentu rumah Allah Taala. Tu tetap pintu ke serega.”
18 Pagi hari siti Jakop angkat tumu, ngambi batu ti udah nyadika panggal iya, lalu nirika batu nya nyadika batu pengingat. Udah nya iya nuang minyak kana ngagai batu nya, kena iya nyerahka batu nya ngagai Allah Taala.
19 Jakop lalu ngumbai endur nya Betel. (Dulu menya, nengeri ba endur nya dikumbai Lus.)
20 Udah nya, Jakop lalu ngaga siti sumpah enggau TUHAN. Ku iya, “Enti Nuan deka meruan enggau aku, lalu nyaga aku dalam pejalai aku, sereta meri aku pemakai enggau gari,
21 lalu enti aku pulai baru enggau likun ngagai rumah apai aku, Nuan meh nyadika Allah Taala aku.
22 Batu pengingat ti udah didirika aku tu, deka nyadi endur alai Nuan disembah, lalu aku deka meri ngagai Nuan sepuluh peratus ari semua utai ti diberi Nuan ngagai aku.”
 
Bagi 29
 Jakop Datai Ba Rumah Laban
1 Jakop lalu majakka pejalai iya, lalu datai ba menua orang di timur.
2 Iya lalu tepedaka siti telaga ba padang, enggau tiga bengkah raban bedus tingkap ngelingi telaga nya, laban raban bedus nya diberi ngirup ari telaga nya. Nyadi batu ti dikena nutup mua telaga nya besai amat.
3 Lebuh semua raban bedus udah datai magang, nya baru bala pengibun bedus maringka batu nya ke tisi, lalu meri raban bedus nya ngirup. Udah nya sida maringka batu nya pulai baru ngagai mua telaga nya.
4 Jakop lalu nanya bala pengibun bedus nya, “Unggal, ari ni penatai kita?” “Ari Haran,” ku sida nyaut.
5 Iya lalu nanya, “Kati kita ngelala Laban uchu Nahor?” “Ngelala,” ku sida pengibun bedus nya nyaut.
6 “Kati iya agi gerai nyamai?” ku Jakop nanya. “Agi,” ku sida nyaut. “Nyin anak indu iya Rachel mai raban bedus apai iya kitu.”
7 Ku Jakop, “Hari agi tinggi, apin maya alai mai jelu tu pulai. Manah meri jelu tu ngirup, lalu mai sida ngagai padang baru.”
8 Disaut sida pengibun bedus, “Kami enda tau ngereja nya, sebedau semua raban bedus udah datai magang, lalu batu nya dibaring ke tisi. Udah nya baru kami meri jelu ngirup.”
9 Lebuh Jakop agi benung bejaku enggau sida, Rachel pen datai mai raban bedus apai iya.
10 Lebuh Jakop meda Rachel mai raban bedus aya iya Laban, iya mansang ngagai telaga, maringka batu nya ke tisi, lalu meri raban jelu bedus nya ngirup.
11 Udah nya iya nyium Rachel, lalu nyabak gaga ati.
12 Ku Jakop madahka ngagai Rachel, “Aku tu anak Rebekah, kaban apai nuan.” Rachel lalu belanda, madahka apai iya.
13 Lebuh apai Rachel ninga Jakop nya anak menyadi iya Rebekah, iya lalu belanda ngambat Jakop, merap lalu nyium iya, lalu mai iya ke rumah. Lebuh Jakop madahka pasal semua utai ti udah nyadi,
14 Laban lalu bejaku, “Nuan tu endang darah-getah aku empu.” Jakop lalu diau dia sebulan.
 
Jakop Bekereja Ke Laban Kena Iya Ngulihka Rachel Seduai Leah
15 Ku Laban bejaku enggau Jakop, “Nuan kaban belayan aku, tang aku enda tau ngasuh nuan bekereja ke aku enda begaji. Nya alai, ni pemesai gaji dipinta nuan?”
16 Nyadi Laban bisi dua iku anak dara. Iya ke tuai agi benama Leah, lalu iya ke biak agi benama Rachel.
17 Leah numbas pemajik, tang Rachel manah raras tubuh sereta bajik gamal.
18 Jakop rinduka Rachel, nya alai ku iya, “Aku bekereja ke nuan tujuh taun kena aku ngulihka Rachel.”
19 Ku Laban nyaut, “Manah agi aku meri iya ngagai nuan, ari ke meri iya ngagai orang bukai. Diau ditu enggau aku.”
20 Jakop lalu bekereja tujuh taun, kena iya ngulihka Rachel, lalu ba Jakop tujuh taun nya asai ti dua tiga hari aja laban iya rinduka Rachel.
21 Udah nya Jakop lalu bejaku enggau Laban, “Awakka aku jadi enggau Rachel laban timpuh udah chukup.”
22 Laban lalu nyendiaka gawai tikah, lalu ngambi semua orang ngabang.
23 Tang malam nya, iya enda mai Rachel, tang mai Leah, ngagai Jakop, lalu Jakop beleman enggau Leah.
24 (Laban meri ulun iya ti indu ke benama Silpah ngagai Leah nyadika ulun Leah.)
25 Pagi hari siti nya baru Jakop nemu indu nya Leah. Iya lalu bejaku ngagai Laban, “Nama kebuah nuan ngereja utai baka tu ngagai aku? Aku udah bekereja ke nuan kena aku ngulihka Rachel. Nama kebuah nuan nipu aku?”
26 Ku Laban nyaut, “Nitihka adat kami di menua tu, anak indu ke biak enda tau ditikah dulu agi ari anak indu ke tuai.
27 Nganti udah tembu gawai tikah seminggu tu, nya baru aku meri Rachel ngagai nuan, enti nuan deka bekereja ke aku tujuh taun da agi.”
28 Jakop besetuju, lalu lebuh gawai tikah seminggu nya udah tembu, Laban lalu meri anak iya Rachel nyadika bini Jakop.
29 (Laban lalu meri ulun iya ti indu ke benama Bilhah ngagai Rachel nyadika ulun Rachel.)
30 Jakop mega beleman enggau Rachel, lalu iya balat agi rinduka Rachel, ari iya ti rinduka Leah. Udah nya Jakop lalu bekereja ke Laban tujuh taun da agi.
 
 Bala Anak Jakop
31 Lebuh TUHAN meda Jakop rindu agi ke Rachel ari iya ti rinduka Leah, TUHAN lalu ngasuh Leah beranak mayuh, tang Rachel mengkang nadai anak.
32 Leah ngandung, lalu ngadaka anak lelaki siku. Ku iya, “TUHAN udah meda penusah aku. Diatu baru laki aku deka rinduka aku.” Nya alai Leah meri iya nama Reuben.
33 Leah ngandung baru, lalu ngadaka siku agi anak lelaki. Ku iya, “TUHAN udah meri aku siku agi anak lelaki, laban Iya udah ninga aku enda dikerinduka Jakop.” Nya alai Leah meri anak iya nya nama Simeon.
34 Leah ngandung baru, lalu ngadaka siku agi anak lelaki. Ku iya, “Diatu laki aku tentu deka rindu agi ke aku, laban aku udah ngadaka tiga iku anak lelaki ke iya.” Nya alai Leah meri iya nama Lewi.
35 Udah nya Leah ngandung baru, lalu ngadaka siku agi anak lelaki. Ku iya, “Sekali tu aku deka muji TUHAN.” Nya alai iya meri iya nama Judah. Udah nya iya enda agi beranak.
 
Bagi 30
1 Tang Rachel mengkang nadai anak. Nya alai iya kepapaska menyadi iya, lalu ku iya bejaku enggau Jakop, “Beri aku anak. Enti enda, manah agi aku mati.”
2 Jakop lalu ringat ngagai Rachel. Ku iya, “Aku ukai Allah Taala, laban Iya ke nagang nuan bisi anak.”
3 Ku Rachel, “Tu ulun aku, Bilhah. Manah agi enti nuan tinduk enggau iya, ngambika iya tau ngadaka anak ke aku, ngambika aku tau nyadi indai, ulih iya.”
4 Rachel lalu nyerahka Bilhah ngagai laki iya Jakop, lalu Jakop beleman enggau Bilhah.
5 Bilhah lalu ngandung, lalu ngadaka siku anak lelaki ke Jakop.
6 Ku Rachel, “Allah Taala udah kasihka aku. Iya udah ninga sampi aku, lalu udah meri aku siku anak lelaki.” Nya alai iya meri anak nya nama Dan.
7 Bilhah ngandung baru, lalu ngadaka anak lelaki ti kedua ke Jakop.
8 Ku Rachel, “Aku bebendar amat bepekit mayuh anak ngelaban menyadi aku, tang aku udah menang.” Nya alai iya meri anak mit nya nama Naptali.
9 Lebuh Leah nemu diri nyau badu agi beranak, iya lalu nyerahka ulun iya, Silpah, ngagai Jakop, nyadika bini Jakop.
10 Udah nya Silpah lalu ngadaka siku anak lelaki ke Jakop.
11 Ku Leah, “Aku udah bulih berekat.” Nya alai iya meri iya nama Gat.
12 Silpah lalu ngadaka siku agi anak lelaki ke Jakop,
13 lalu ku Leah, “Ati aku lantang amat! Diatu sida ke indu deka ngumbai aku lantang ati.” Nya alai iya meri iya nama Aser.
14 Lebuh maya orang ngetau gandum, Reuben nurun ke umai, lalu tetemuka kayu pengerindu. Iya lalu mai kayu nya ngagai indai iya, Leah. Ku Rachel bejaku enggau Leah, “Beri aku mimit kayu pengerindu anak nuan nya.”
15 Disaut Leah, “Nuan udah ngambi laki aku: kati nya enda chukup ke nuan, lalu diatu nuan deka mega ngambi kayu pengerindu anak aku?” Ku Rachel, “Enti nuan meri aku kayu pengerindu anak nuan nya, aku deka nejuka nuan tinduk enggau Jakop malam tu.”
16 Lebuh Jakop pulai ari umai lemai nya, Leah lalu mansang ngambat iya, ku iya, “Nuan tinduk enggau aku malam tu, laban aku udah meli nuan ngena kayu pengerindu anak aku.” Nya alai malam nya Jakop beleman enggau Leah.
17 Allah Taala lalu nyaut sampi Leah. Iya ngandung, lalu ngadaka anak lelaki ti kelima.
18 Ku Leah, “Allah Taala udah meri aku upah, laban aku udah nyerahka ulun aku ngagai laki aku.” Nya alai iya meri anak iya nya nama Isakar.
19 Leah ngandung baru, lalu ngadaka anak lelaki ti keenam.
20 Ku Leah, “Allah Taala udah meri aku pemeri ti manah. Diatu baru laki aku deka nerima aku, laban aku udah ngadaka enam iku anak lelaki ke iya.” Nya alai iya meri anak mit nya nama Sebulun.
21 Udah nya iya ngadaka siku anak indu ke diberi iya nama Dinah.
22 Udah nya Allah Taala ingatka Rachel. Iya nyaut sampi Rachel, lalu ngasuh Rachel ulih beranak.
23 Rachel ngandung, lalu ngadaka siku anak lelaki. Ku iya, “Allah Taala udah muai pemalu aku, laban iya udah meri aku siku anak lelaki.
24 Awakka TUHAN meri aku siku agi anak lelaki.” Nya alai iya meri iya nama Josep.
 
Jakop Betawar Enggau Laban
25 Udah bekau pengada Josep, Jakop bejaku enggau Laban, “Awakka aku mupuk, lalu pulai ngagai menua aku empu.
26 Beri ngagai aku semua bini enggau anak aku, ti udah ulih aku bekereja ke nuan, ngambika aku angkat ari menua tu. Nuan nemu pemendar aku udah bekereja ke nuan.”
27 Ku Laban bejaku enggau Jakop, “Awakka aku nyebut tu: Ari tujum aku empu, aku nemu TUHAN udah merekatka aku, ketegal nuan.
28 Sebut aja upah nuan, ngambika aku mayar nuan.”
29 Disaut Jakop, “Nuan nemu pemendar aku udah bekereja ke nuan, lalu raban jelu bedus nuan udah nambah-menambah sekumbang aku ke ngibun sida.
30 Jelu nuan mimit aja sebedau aku datai, tang diatu sida udah mayuh amat, lalu TUHAN udah merekatka nuan, di sebarang endur aku bejalai. Diatu maya udah datai alai aku patut ngira pengidup diri empu.”
31 “Nama utai ti patut dibayar aku ngagai nuan?” ku Laban nanya. Disaut Jakop, “Aku enda minta gaji. Aku deka majak ngintu raban jelu nuan, enti nuan besetuju enggau penemu aku:
32 Awakka aku bejalai nengah semua raban jelu nuan sehari tu, lalu ngambi semua anak domba ti chelum enggau semua anak kambin ti beselat bulu, tauka perintik. Nya aja gaji ti dipinta aku.
33 Ila nuan deka nemu enti aku manah ati enggau nuan tauka enda. Lebuh nuan datai meresa gaji aku, lalu nemu aku bisi kambin ti enda perintik tauka beselat bulu, tauka bedus ti enda chelum, nuan deka nemu utai nya udah ulih aku ngenchuri.”
34 Disaut Laban, “Aku besetuju. Aram tua ngereja nitihka atur ti ku nuan.”
35 Tang sehari nya, Laban mindahka semua kambin ti lelaki, ti besurik, tauka beselat bulu, enggau semua kambin ti indu ke perintik, tauka beselat bulu, tauka bisi chura burak ba sida. Iya mega mindahka semua jelu bedus ti chelum, lalu ngasuh bala anak lelaki iya ngibun raban jelu nya.
36 Iya lalu ninggalka Jakop, mai raban jelu nya kira pejalai tiga hari ari endur nya. Jakop lalu ngibun teda raban jelu Laban ti bukai.
37 Jakop lalu ngambi dan kayu poplar, kayu almon, enggau kayu plan ti agi idup, lalu ngelitika sekeda kulit ba dan kayu nya siti-siti, ngambika dan nya besurik burak.
38 Iya lalu ngengkahka dan kayu nya di mua raban jelu nya, ba dulang alai sida ngirup. Iya ngengkahka dan kayu nya dia, laban jelu nya bung lebuh sida datai ngirup.
39 Nya alai, lebuh kambin beranak di mua dan kayu nya, sida ngadaka anak ti besurik, perintik, enggau beselat bulu.
40 Jakop nyeraraka jelu bedus ari jelu kambin, lalu ngasuh sida bediri nunga jelu ti besurik, enggau ti bechura chelum, ti ari raban jelu Laban. Nya meh chara iya nambahka pemayuh jelu ngagai raban jelu iya empu, lalu nyeraraka jelu nya ari raban jelu Laban.
41 Lebuh jelu ti bepengerai nya bung, Jakop ngengkahka dan kayu nya di mua sida, ba dulang alai sida ngirup, ngambika sida beranak ba sebelah dan kayu nya.
42 Tang iya enda ngengkahka dan kayu nya di mua jelu ti lemi. Enda lama udah nya, Laban semina bisi jelu ti lemi, lalu Jakop bempu semua jelu ti bepengerai.
43 Nya meh jalai Jakop nyadi kaya amat. Raban jelu iya mayuh, ulun iya mayuh, jelu unta, enggau keledai iya pen mayuh.
 
Bagi 31
 Jakop Rari Ari Laban
1 Jakop bisi ninga bala anak Laban bejaku, “Jakop udah ngambi semua utai apai kitai. Iya bulih pengaya ari semua utai apai kitai.”
2 Jakop mega meda Laban nyau enda agi manah enggau iya baka suba.
3 TUHAN lalu bejaku enggau Jakop, “Pulai nuan ngagai menua aki ini nuan, ngagai kaban belayan nuan. Aku deka meruan enggau nuan.”
4 Jakop lalu mesanka Rachel seduai Leah, minta seduai iya betemu enggau iya ba padang ti alai raban jelu iya ngulam.
5 Ku Jakop bejaku enggau Leah seduai Rachel, “Aku meda apai seduai nyau enda agi manah enggau aku baka suba. Tang Allah Taala apai aku bisi enggau aku.
6 Seduai sama nemu, aku udah bekereja ke apai kita enggau pengabis pengering aku.
7 Tang taja pia, iya udah ngakal aku, lalu udah ngubah gaji aku sepuluh kali. Tang Allah Taala enda nyagi iya ngemediska aku,
8 nya alai genap kali Laban nyebut, ‘Kambin ti perintik deka nyadika gaji nuan,’ semua raban jelu kambin nya lalu ngadaka anak ti perintik. Lebuh iya nyebut, ‘Kambin ti besurik deka nyadika gaji nuan,’ semua raban jelu nya lalu ngadaka anak ti besurik.
9 Allah Taala udah ngambi raban jelu ari apai seduai, lalu meri sida ngagai aku.
10 “Lebuh maya jelu bung, aku bemimpi, lalu aku meda kambin ti lelaki, ti benung bung, semua besurik, beselat bulu enggau perintik magang.
11 Ku melikat Allah Taala bejaku ngagai aku dalam mimpi nya, ‘Jakop!’ Aku lalu nyaut, ‘Tu aku!’
12 Ku melikat nya bejaku, ‘Peda nuan, kambin ti lelaki, ti bung, semua besurik, beselat bulu, enggau perintik magang. Aku ngasuh utai tu nyadi, laban Aku udah meda semua utai ti dikereja Laban ngagai nuan.
13 Aku tu Allah Taala ti udah pegari di mua nuan di Betel, ba endur alai nuan ke nyerahka sigi batu nyadika batu pengingat, lalu nuang minyak kana ba batu nya, sereta ngaga siti semaya enggau Aku. Nya alai diatu nuan enda tau enda sedia, lalu pulai ngagai menua ada nuan.’ “
14 Rachel seduai Leah lalu nyaut Jakop, “Kami endang nadai agi ungkup ari pesaka apai kami.
15 Iya ngaga kami baka orang kampar. Iya udah nyual kami duai, lalu diatu iya udah ngabiska semua duit rega kami duai ti udah dibayar ngagai iya.
16 Semua pengaya tu, ti udah diambi Allah Taala ari apai kami, endang enggi kami enggau enggi anak kami. Kereja aja sebarang utai ti udah diasuh Allah Taala kereja nuan.”
17-18 Nya alai Jakop lalu nyendiaka diri pulai ngagai apai iya di menua Kanaan. Iya nepanka bala anak iya, enggau bala bini iya ba jelu unta, lalu ngasuh semua raban jelu iya bejalai dulu di mua iya, mai semua utai ti udah ulih iya di Mesopotamia.
19 Nyadi Laban udah mupuk laban iya deka ngukur bedus. Lebuh iya benung nadai di rumah, Rachel lalu ngenchuri engkeramba ti disembah sida sebilik, ti diempu apai iya.
20 Jakop nipu Laban, enda madahka diri deka mupuk.
21 Jakop mai semua utai diri, lalu beguai-guai mupuk. Iya meraka Sungai Eupratis, lalu bejalai nuju ngagai menua ti bebukit di Giliat.
 
 Laban Ngagai Jakop
22 Tiga hari udah bekau nya, orang bisi madahka ngagai Laban pasal Jakop ti udah rari.
23 Laban lalu mai bala iya lalu ngagai Jakop. Iya bejalai tujuh hari nitihka Jakop, datai ke iya nyau ulih tetitihka Jakop ba menua ti bebukit di Giliat.
24 Malam nya Allah Taala pegari di mua Laban dalam mimpi, lalu bejaku ngagai iya, “Bejimat, nuan. Nuan enda tau sekali-kali ngemba Jakop.”
25 Nyadi Jakop udah nirika kem iya ba bukit sigi, lalu Laban nirika kem iya begulai enggau kaban belayan iya ba menua ti bebukit di Giliat.
26 Ku Laban bejaku enggau Jakop, “Nama kebuah nuan nipu aku, lalu nabanka anak indu aku baka ke nabanka indu ke ditangkap lebuh beperang?
27 Nama kebuah nuan nipu aku, lalu enda madahka diri mupuk? Enti nuan madahka diri mupuk, aku tetap deka ngerami pengangkat nuan ngena lagu, tamborin enggau belikan.
28 Nuan nadai ngasuh aku nyium bala uchu enggau anak aku lebuh sida mupuk. Beli amat pengawa baka nya!
29 Aku bisi kuasa ngemediska nuan, tang malam tadi Allah Taala apai nuan bisi meri jaku tangkan ngagai aku, enda nyagi aku ngemba nuan.
30 Aku sigi nemu nuan udah mupuk, laban nuan balat amat keran deka pulai baru ngagai menua nuan empu, tang nama kebuah nuan ngenchuri engkeramba kami sebilik?”
31 Disaut Jakop, “Aku takut, laban dalam runding aku, nuan deka ngerampas anak indu nuan ari aku.
32 Tang enti nuan tetemuka orang ditu bisi naruh engkeramba nuan, awakka iya diukum bunuh. Awakka bala aku nyadika saksi. Giga lalu ambi aja utai nuan empu.” Nyadi Jakop enda nemu engkeramba Laban nya udah dichuri Rachel.
33 Laban lalu mansang ngiga utai nya dalam langkau kain Jakop. Udah nya iya mansang ngagai langkau kain Leah, enggau ngagai langkau kain indu ke ulun ke dua iku, tang iya nadai tetemuka engkeramba nya. Udah nya iya lalu mansang ngagai langkau kain Rachel.
34 Nyadi engkeramba sida sebilik nya udah diambi Rachel, lalu disimpan iya dalam kambut ba atas jelu unta, di baruh Rachel ke duduk. Laban nyerungkai langkau kain Rachel, tang nadai tetemuka engkeramba nya.
35 Ku Rachel bejaku enggau apai iya, “Anang pedis ati ngagai aku, tuan, ketegal aku ti enda ulih angkat bediri masa nuan. Aku benung datai kain.” Laban begigaka engkeramba nya, tang nadai tetemuka iya.
36 Jakop lalu ringat, “Nama penyalah ti udah dikereja aku?” ku iya nanya. “Adat ni ti udah dilanggar aku, ti ngasuh kita begagaika aku baka tu?
37 Diatu nuan udah nyerungkai semua utai aku, ni utai nuan ti udah ditemu nuan? Engkahka utai nya di luar ditu ngambika bala nuan enggau bala aku meda utai nya. Awakka sida meri pemutus penemu pasal sapa tua ke ngena.
38 Aku udah begulai enggau nuan dua puluh taun. Jelu bedus enggau jelu kambin nuan nadai kala enda beranak, lalu aku nadai kala makai bedus ti lelaki ari raban bedus nuan.
39 Genap kali jelu bedus nuan diempa jelu babas, aku nadai kala mai bangkai jelu nya ngagai nuan, tang nganti jelu nya, laban nuan empu udah mejalka aku nganti semua utai ti dichuri orang lebuh siang tauka malam hari.
40 Aku suah udah merinsa natka diri laban panas lebuh siang hari, lalu natka diri chelap lebuh malam hari. Aku suah enda ulih tinduk.
41 Nya meh gaya pengidup aku dalam dua puluh taun aku ke begulai enggau nuan. Empat belas taun aku bekereja ngulihka anak indu nuan ke dua iku nya, enggau enam taun ngulihka raban jelu nuan. Tang taja pia, nuan ngubah gaji aku sepuluh kali.
42 Enti Allah Taala aki ini aku, Allah Taala ke disembah Abraham seduai Isak, nadai enggau aku, nuan tentu udah muru aku pulai puang. Tang Allah Taala udah meda penusah aku, enggau pengawa ti udah dikereja aku, lalu malam tu tadi Iya udah meri atur.”
 
Sempekat Entara Jakop Enggau Laban
43 Ku Laban nyaut Jakop, “Sida ke indu tu endang anak aku. Anak sida endang enggi aku, lalu raban jelu tu endang enggi aku. Iya ti bendar, semua utai ti dipeda nuan ditu, endang enggi aku magang. Tang laban aku enda ulih ngetanka anak indu enggau anak sida,
44 aku sedia deka ngaga siti sempekat enggau nuan. Nya alai, aram tua ngaga siti tugung batu, kena tua ngingatka sempekat tua.”
45 Nya alai Jakop ngambi sigi batu lalu nirika batu nya nyadika batu pengingat.
46 Iya lalu ngasuh bala iya ngumpul batu lalu nugungka batu nya. Udah nya sida lalu makai ngimbai tugung batu nya.
47 Laban ngumbai tugung batu nya Jegar Sahadusta, tang Jakop ngumbai tugung batu nya Galeed.
48 Ku Laban bejaku enggau Jakop, “Tugung batu tu deka nyadika batu pengingat tua.” Nya kebuah endur nya dikumbai Galeed.
49 Ku Laban mega bejaku, “Awakka TUHAN ngemataka tua lebuh tua beserara ari pangan diri.” Nya alai endur nya mega dikumbai Mispah.
50 Ku Laban nampung jaku iya, “Enti nuan merinsaka anak aku, tauka jadi enggau indu bukai, taja pen aku enda nemu pasal utai nya, nuan enda tau enda ingat, Allah Taala ngemataka tua.
51 Tu batu ti udah ditugungka aku entara tua, lalu tu batu pengingat.
52 Tugung batu tu, enggau tiang batu pengingat tu kena nulung tua ingat. Aku enda tau mansang ngelui tugung batu tu nyerang nuan, lalu nuan enda tau sekali-kali mansang ngelui batu pengingat tu nyerang aku.
53 Allah Taala ke disembah Abraham enggau Allah Taala ke disembah Nahor  deka ngakim tua.” Udah nya, Jakop lalu besumpah dalam nama Allah Taala ti disembah apai iya, Isak, madahka diri deka ingatka semaya nya.
54 Iya munuh siku jelu nyadika piring ba atas bukit nya, lalu iya mai bala iya makai jelu nya. Lebuh sida udah badu makai, sida lalu bemalam ba bukit nya.
55 Tumu pagi hari siti, Laban nyium bala uchu iya, enggau anak indu iya, merekatka sida, mupuk lalu pulai ngagai menua iya empu.
 
Bagi 32
 Jakop Sedia Deka Betemu Enggau Esau
1 Lebuh Jakop benung di rantau jalai, bala melikat Allah Taala betemu enggau iya.
2 Lebuh iya meda sida, iya lalu bejaku, “Tu kem Allah Taala.” Nya alai iya ngumbai endur nya Mahanaim.
3 Jakop lalu ngasuh bala seruan iya bejalai dulu ari iya, ngagai menyadi iya Esau di menua Edom.
4 Iya ngasuh sida bejaku munyi tu ngagai Esau: ‘Aku, Jakop, ti ulun nuan, madahka ngagai tuan aku, Esau, aku udah diau enggau Laban lalu apin ulih mulaika diri nyentuk ngagai ke diatu.
5 Diatu aku bisi jelu sapi, keledai, bedus, kambin enggau ulun. Aku ngirumka pesan tu ngagai nuan, tuan, ngarapka nuan deka kasihka aku.”
6 Lebuh bala seruan nya pulai baru ngagai Jakop, sida lalu bejaku, “Kami udah betemu enggau menyadi nuan, Esau, lalu iya diatu benung di rantau jalai deka betemu enggau nuan. Iya mai empat ratus iku orang enggau iya.”
7 Jakop takut sereta irau ati. Iya lalu magi bala orang ke enggau iya, sereta enggau raban jelu bedus, kambin, jelu sapi enggau jelu unta iya, ngagai dua bengkah raban.
8 Ku runding iya, “Enti Esau datai lalu nyerang raban ti keterubah, raban ti sebengkah nyangka ulih ngerarika diri.”
9 Udah nya Jakop lalu besampi, “Allah Taala aki aku Abraham, enggau Allah Taala apai aku Isak, dingaka aku! Nuan TUHAN udah ngasuh aku pulai ngagai menua aku, ngagai kaban belayan aku, lalu Nuan deka ngasuh aku mujur dalam semua utai.
10 Aku enda patut nerima semua pemanah enggau penetap ati ti udah ditunjukka Nuan ngagai aku ti ulun Nuan, laban dulu menya lebuh aku meraka Sungai Jordan aku semina mai siti tungkat aja, tang diatu aku pulai mai raban dua bengkah tu.
11 Aku besampi, minta Nuan ngelepaska aku ari kuasa menyadi aku, Esau. Aku takut, enggai ke iya datai nyerang, lalu munuh semua bala kami, nyengkaum indu nembiak.
12 Kingatka Diri ti udah besemaya deka ngasuh aku mujur dalam semua utai, lalu deka meri aku peturun ngemayuh igi pasir ti ba tebing tasik, ti enda ulih diitung.”
13-15 Lebuh iya udah bemalam dia semalam, Jakop lalu milih jelu ari raban jelu iya nyadika pemeri ti deka diberi iya ngagai menyadi iya, Esau: 200 iku kambin ti indu, enggau 20 iku kambin ti lelaki, 200 iku bedus ti indu enggau 20 iku jelu bedus ti lelaki, 30 iku jelu unta ti agi nusuka anak, sama enggau anak sida, 40 iku indu sapi enggau 10 iku sapi ti lelaki, 20 iku keledai ti indu, enggau 10 iku keledai ti lelaki.
16 Iya lalu magi sida ngagai berapa iti raban, lalu ngasuh bala ulun iya mai siti-siti raban. Ku iya bejaku enggau sida, “Kita bejalai dulu ari aku, lalu gaga takah entara raban ti dulu ari raban ti dudi.”
17 Ku iya bejaku enggau ulun iya ti terubah, “Lebuh menyadi aku Esau betemu enggau nuan, lalu iya nanya, ‘Sapa nama tuan nuan? Kini ke tunga pejalai kita? Sapa bempu jelu ti di mua nuan tu?’
18 nuan enda tau enda nyaut, ‘Sida tu diempu ulun nuan Jakop. Iya ngirumka jelu tu nyadika pemeri ngagai tuan iya Esau. Jakop empu deka datai nunda-udi kami.’ “
19 Iya mega meri atur ti sebaka enggau nya ngagai ulun iya ti kedua, ketiga, enggau semua sida bukai ke mai raban jelu: “Tu utai ti enda tau enda disebut kita ngagai Esau, lebuh kita betemu enggau iya.
20 Kita enda tau enda nyebut, ‘Ulun nuan, Jakop, deka datai dudi ari kami.’ “ Ku pikir Jakop, “Aku deka ngasuh iya rinduka aku ngena pemeri. Lebuh aku betemu enggau iya, aku ngarapka iya deka ngampun aku.”
21 Iya ngirumka pemeri nya dulu ari iya, tang malam nya iya empu bemalam ba kem nya.
 
Jakop Bibat Di Penil
22 Malam nya Jakop angkat, mai bini iya ke dua iku, indu simpan iya ke dua iku, enggau anak iya ke sebelas iku, lalu meraka Sungai Jabok.
23 Lebuh iya udah nganjung sida meraka sungai nya, iya mega nganjung semua reta tengkira iya ke seberai,
24 tang iya empu ninggalka diri ba kem nya. Udah nya siku lelaki datai, lalu bibat enggau iya, nyentuk ngagai rerak tawas pagi hari siti.
25 Lebuh orang nya nemu diri enda ulih ngalahka Jakop, iya lalu mukut punggung Jakop. Tulang punggung Jakop lalu tebelingkah.
26 Ku orang nya bejaku, “Anang megai aku agi. Hari nyau tawas.” “Aku enggai ngelengkaka nuan, enti nuan enda merekatka aku,” ku Jakop nyaut iya.
27 “Sapa nama nuan?” ku orang nya nanya. “Jakop,” ku Jakop nyaut.
28 Ku orang nya, “Nama nuan ukai Jakop agi. Nuan udah bibat ngelaban Allah Taala, enggau ngelaban mensia, lalu nuan udah menang. Nya alai, nama nuan Israel.” 
29 Ku Jakop, “Padahka nama nuan ngagai aku.” Tang ku orang nya nyaut, “Nama kebuah nuan keran deka nemu nama aku?” Udah nya iya lalu merekatka Jakop.
30 Ku Jakop, “Aku udah betemu betunga mua enggau Allah Taala, lalu aku agi mengkang idup.” Nya alai, iya ngumbai endur nya Penil.
31 Mata panas endang udah niki lebuh Jakop angkat ari Penil, lalu iya bejalai pinchat laban punggung iya.
32 Nyentuk ngagai sehari tu bala peturun Israel enda makai gumpal isi ti ba punggung jelu, laban Jakop udah kena bukut ba gumpal isi nya.
 
Bagi 33
 Jakop Betemu Enggau Esau
1 Jakop meda Esau datai enggau empat ratus iku bala iya. Nya alai iya lalu magi bala anak mit entara Leah, Rachel enggau dua iku indu simpan iya.
2 Iya ngasuh indu simpan iya enggau anak sida bejalai dulu, ditangkanka Leah enggau bala anak iya, lalu ke penudi iya, Rachel enggau Josep di belakang.
3 Jakop bejalai dulu ari sida, lalu meremi ke tanah tujuh kali lebuh iya mansang ngagai menyadi iya.
4 Tang Esau belanda ngambat iya, merap iya, lalu nyium iya. Seduai iya sama nyabak.
5 Lebuh Esau malik, lalu tepedaka sida ke indu enggau sida ke mit, iya lalu nanya, “Sapa orang enggau nuan tu?” “Tuan, tu bala anak ti udah diberi Allah Taala ngagai aku,” ku Jakop nyaut.
6 Udah nya indu simpan iya ke dua iku lalu mansang ke mua, sama enggau anak seduai iya, lalu meremi.
7 Udah nya Leah enggau bala anak iya mansang ke mua, lalu ke penudi iya bendar, Josep seduai Rachel mansang ke mua, lalu meremi.
8 Ku Esau nanya, “Kati ku pasal raban siti nya ti udah betemu enggau aku tadi? Nama reti utai nya?”
Ku Jakop nyaut, “Kena minta pengasih ari nuan.”
9 Tang ku Esau, “Aku endang udah chukup mayuh utai, menyadi. Simpan nuan aja meh utai nuan nya.”
10 Ku Jakop, “Anang baka nya. Enti nuan kasihka aku, terima aja meh pemeri aku tu. Lebuh aku meda mua nuan, aku asai ke meda mua Allah Taala, laban nuan udah manah enggau aku.
11 Nya alai aku minta nuan nyambut pemeri tu, ti udah dibai aku ke nuan, laban Allah Taala udah kasihka aku, lalu udah meri aku semua utai ti dipeguna aku.” Jakop majak ngumbuk Esau, datai ke Esau nyambut pemeri nya.
12 Ku Esau, “Aram kitai mupuk ari endur tu. Aku deka bejalai enggau nuan.”
13 Disaut Jakop, “Nuan nemu, bala anak mit tu lemi, lalu aku enggai nyadi enda ngira raban jelu bedus, enggau raban jelu tupi enggau anak sida. Enti sida dipejalka bejalai bebendar sehari, semua sida deka mati.
14 Mupuk dulu meh nuan. Awakka aku nitihka nuan belubah-lubah enggau naka ulih aku sama enggau raban jelu enggau bala sida ke mit, datai ke tua ulih betemu baru di Edom.”
15 Ku Esau, “Enti pia, awakka aku ninggalka sekeda bala aku enggau nuan.” Tang ku Jakop nyaut, “Enda ibuh baka nya, asal nuan lantang ati enggau aku.”
16 Nya alai, Esau mupuk sehari nya ngagai Edom.
17 Tang Jakop mupuk ngagai Sukot. Dia iya lalu ngaga sebuah rumah ke diri empu, enggau bansal ke jelu tupi iya. Nya kebuah endur nya dikumbai Sukot.
18 Lebuh Jakop pulai ari Mesopotamia, iya datai enggau selamat ba nengeri Sekem, di menua Kanaan, lalu nirika kem iya ba padang semak nengeri nya.
19 Iya meli padang nya ari peturun Hamor, apai Sekem, ngena seratus singkap pirak.
20 Iya lalu ngaga siti alta dia, lalu ngumbai alta nya El-Elohe-Israel.
 
Bagi 34
Dinah Dipasung Sekem anak Hamor
1 Nyadi sekali, Dinah, anak dara Jakop seduai Leah, mansang nemuai ngagai indu orang  Kanaan.
2 Lebuh Sekem, anak Hamor, orang Ibi, ti nyadi tuai di menua nya, meda Dinah, iya lalu masung iya.
3 Iya rinduka Dinah anak indu Jakop, lalu iya bejaku manah enggau Dinah.
4 Ku Sekem bejaku enggau apai iya, “Aku bisi amat ati deka ngambi Dinah nyadika bini aku.”
5 Nyadi Jakop sigi nemu anak indu iya endang udah dipasung orang, tang laban bala anak lelaki iya agi di padang ngemataka jelu tupi iya, iya nadai ngereja sebarang utai sebedau sida pulai.
6 Hamor, apai Sekem lalu mansang berandau enggau Jakop.
7 Ba urung maya nya mega bala anak Jakop datai di rumah pulai ari umai. Lebuh sida ninga berita nya, sida ringat lalu pedis ati ngagai Sekem ti udah ngereja nya, lalu udah mechat orang Israel masung anak indu Jakop.
8 Ku Hamor bejaku enggau Jakop, “Anak aku Sekem rinduka anak indu nuan. Aku minta nuan ngemendarka iya jadi enggau anak indu nuan.
9 Awakka tua ngaga siti sempekat kena ngemendarka orang ari bansa kami jadi enggau orang ari bansa kita.
10 Nya baru kita ulih diau begulai enggau kami di menua kami tu. Kita tau diau di sebarang endur kita deka, lalu bedagang enggau sepeneka ati kita, lalu ngulihka reta tengkira ke diri empu.”
11 Udah nya Sekem empu lalu bejaku enggau apai Dinah, sereta enggau sida menyadi lelaki Dinah, “Aku minta kasih ngagai kita. Aku deka meri kita sebarang utai ti dipinta kita.
12 Padahka ngagai aku pemeri ti dipinta kita, lalu letak derian nitihka peneka ati kita. Aku deka meri ngagai kita sebarang utai ti dipinta kita, asal ga kita deka nejuka aku jadi enggau Dinah.”
13 Nyadi laban Sekem udah ngemaluka Dinah, menyadi indu sida, bala anak lelaki Jakop lalu nyaut Sekem enggau apai iya Hamor, ngena jalai tipu.
14 Ku sida bejaku enggau Sekem, “Kami enda nyagi menyadi indu kami jadi enggau lelaki ti enda ditutus, laban nya ngemaluka kami.
15 Kami semina ulih besetuju enti kita deka nyadi baka kami, nutus semua bala kita ke lelaki.
16 Nya baru kami deka besetuju jadi enggau orang ari bansa kita. Kami deka diau mendam begulai enggau kita, lalu nyadi sebansa enggau kita.
17 Tang enti nuan enda nerima atur kami tu, lalu ditutus, kami deka mai Dinah angkat ari tu.”
18 Atur nya baka ke manah ba penemu Hamor enggau anak iya, Sekem,
19 lalu orang bujang nya terus ngereja utai ti disebut sida, laban iya rinduka anak indu Jakop. Orang bujang nya endang orang ke pemadu dibasa dalam ruang bilik iya.
20 Hamor enggau anak iya Sekem lalu mansang ngagai endur alai baum ba pintu penama nengeri nya, lalu bejaku ngagai orang nengeri nya:
21 “Orang tu manah enggau kitai begulai. Awakka sida diau di menua tu begulai enggau kitai, lalu bejalai kia-kia sepeneka ati sida. Menua tu chukup mega besai ke sida. Awakka kitai jadi enggau anak indu sida, lalu kitai nyerahka anak indu kitai jadi enggau sida.
22 Tang orang tu semina deka besetuju diau begulai enggau kitai, lalu nyadi sama sebansa enggau kitai, enti kitai besetuju nutus semua bala kitai ti lelaki, baka sida empu.
23 Nya baru semua jelu tupi enggau semua utai sida, deka diempu kitai. Nya alai, awakka kitai besetujuka sida diau begulai enggau kitai.”
24 Semua orang di nengeri nya besetuju magang enggau penemu ti dibantaika Hamor seduai Sekem, lalu semua lelaki ditutus magang.
25 Tiga hari udah bekau nya, lebuh sida ke lelaki agi natka abi tutus sida, dua iku anak Jakop, Simeon seduai Lewi, menyadi lelaki Dinah, mai pedang lalu belalai tama ngagai nengeri nya, lalu munuh semua orang ke lelaki,
26 nyengkaum Hamor enggau anak iya, Sekem. Udah nya seduai iya lalu ngambi Dinah ari rumah Sekem, lalu angkat ari nya.
27 Anak lelaki Jakop ti bukai lalu ngerampas utai ari nengeri nya kena malas pemalu menyadi indu sida.
28 Sida ngambi raban jelu bedus, sapi, keledai, enggau semua utai ti dalam nengeri nya, enggau utai ti di padang.
29 Sida ngambi semua utai ti berega, nangkap semua orang ke indu, enggau bala anak mit, lalu nabanka semua utai ari rumah orang.
30 Ku Jakop bejaku enggau Simeon seduai Lewi, “Seduai udah ngasuh aku ditinggang penusah, laban diatu orang Kanaan, orang Peris, enggau semua orang bukai di menua tu deka begedika aku magang. Bala kitai enda mayuh. Enti sida beserakup ngelaban kitai, lalu nyerang kitai, semua kitai sebilik deka mati magang.”
31 Tang ku seduai iya nyaut, “Kami enggai sekali-kali nejuka menyadi kami digaga orang baka indu sundal.”
 
Bagi 35
 Allah Taala Merekatka Jakop Di Betel
1  Ku Allah Taala bejaku ngagai Jakop, “Alai nuan mansang ngagai Betel diatu, lalu diau dia. Gaga siti alta dia ke Allah Taala ti udah pegari di mua nuan lebuh nuan rari ari menyadi nuan, Esau.”
2 Nya alai Jakop lalu bejaku enggau sida sebilik, sereta enggau semua orang ke enggau iya. Ku iya, “Buai semua petara orang bansa bukai ke disimpan kita. Tuchi diri empu, lalu rasukka gari ti beresi.
3 Kitai deka angkat ari endur tu, lalu mansang ngagai Betel. Din aku deka ngaga siti alta ke Allah Taala, ti udah nyaup aku lebuh aku dituntung penusah, lalu udah enggau aku di semua endur ti udah alai aku bejalai.”
4 Nya alai sida lalu nyerahka ngagai Jakop semua petara orang bansa bukai ke udah disimpan sida, sereta enggau semua antin ti dikena sida. Jakop lalu numbakka utai nya di baruh sepun kayu oak semak Sekem.
5 Lebuh Jakop, enggau bala anak lelaki iya baru deka mupuk, orang ke diau dalam nengeri ti semak nya dia bela takut magang, lalu sida enda begagaika Jakop enggau bala anak iya.
6 Jakop, enggau semua bala iya datai di Lus, ti dikumbai Betel diatu, di menua Kanaan.
7 Iya ngaga sebuah alta dia, lalu ngumbai endur nya Allah Taala ti di Betel, laban Allah Taala udah pegari di mua iya dia lebuh iya rari ari menyadi iya Esau.
8 Ulun Rebekah ke benama Deborah mati, lalu dikuburka di baruh sepun kayu oak ti muak ke selatan nengeri Betel. Nya alai endur nya dikumbai, “Kayu Oak Alai Nyabak.”
9 Lebuh Jakop pulai ari Mesopotamia, Allah Taala pegari baru di mua iya, lalu merekatka iya.
10 Ku Allah Taala bejaku ngagai iya, “Nama nuan Jakop, tang belabuh ari diatu, nama nuan Israel.” Nya alai iya diberi nama Israel.
11 Lalu ku Allah Taala bejaku ngagai iya, “Aku tu Allah Taala ti Pemadu Bekuasa. Beranak betelesak meh nuan. Nuan deka nurunka mayuh bengkah bansa, lalu nuan deka nyadi aki ini ke bala raja.
12 Aku deka meri ngagai nuan menua ti udah diberi Aku ngagai Abraham enggau Isak, lalu Aku deka mega meri menua nya ngagai peturun nuan, ti deka nangkanka nuan.
13 Udah nya Allah Taala lalu ninggalka iya.
14 Ba endur alai Allah Taala ti bejaku enggau iya, dia meh endur alai Jakop nirika siti tiang batu pengingat lalu nuang wain enggau minyak kana ba batu nya.
15 Jakop lalu ngumbai endur nya Betel.
 
Pemati Rachel
16 Jakop enggau sida sebilik angkat ari Betel, lalu lebuh sida agi jauh ari Eprat, Rachel muat pedis perut deka beranak. Tang iya mar amat beranak.
17 Lebuh iya balat amat pedis perut, indu bidan lalu bejaku enggau iya, “Anang takut, Rachel. Anak nuan lelaki.”
18 Tang Rachel nyau deka mati, lalu lebuh iya baru deka ngapuska seput, iya meri anak iya nama Benonitang Jakop meri anak nya nama Benjamin.
19 Lebuh Rachel udah mati, iya lalu dikuburka ba tisi jalai ngagai Eprat, ti dikumbai Betlehem diatu.
20 Jakop nirika siti tiang batu pengingat ba endur nya, lalu batu nya mengkang ngelai endur alai kubur Rachel nyentuk ngagai sehari tu.
21 Jakop mindah ari endur nya, lalu nirika kem iya sepiak menara Eder.
 
Bala Anak Jakop
22 Lebuh Jakop diau di menua nya, Reuben beleman enggau Bilhah, siku indu simpan apai iya. Lebuh Jakop ninga nya iya pedis ati. Nyadi Jakop bisi dua belas iku anak lelaki.
23 Anak lelaki ke diadaka Leah nya Reuben (anak tuai Jakop), Simeon. Lewi, Judah, Isakar, enggau Sebulun.
24 Anak lelaki Rachel: Josep seduai Benjamin.
25 Anak lelaki ke diadaka ulun Rachel ke benama Bilhah: Dan enggau Naptali.
26 Anak lelaki ke diadaka ulun Leah ke benama Silpah: Gat seduai Aser. Tu bala anak lelaki ke ada di Mesopotamia.
 
 Pemati Isak
27 Jakop bejalai ngagai apai iya di Mamre, semak Hebron, alai Abraham enggau Isak ti diau menya.
28 Isak idup nyentuk ngagai umur iya seratus lapan puluh taun
29 lalu iya mati lebuh umur iya nyau tuai amat. Anak iya Esau seduai Jakop, lalu nguburka iya.
 
Bagi 36
Peturun Esau
1 Baka tu ku peturun Esau. (Iya mega dikumbai Edom).
2 Esau jadi enggau indu orang Kanaan. Sida nya: Adah anak Elon orang Iti; Oholibamah anak Anah, uchu Sibeon, orang Ibi;
3 enggau Basemat anak Ismail, menyadi Nebaiot.
4 Adah ngadaka Elipas; Basemat ngadaka Reuel;
5 lalu Oholibamah ngadaka Jeus, Jalam, enggau Kurah. Semua anak lelaki tu ada di menua Kanaan magang.
6 Udah nya Esau lalu mai sida bini iya, enggau bala anak lelaki iya, bala anak indu iya, enggau semua orang ke diau dalam rumah iya, sereta enggau semua raban jelu tupi iya enggau semua reta tengkira ti udah ulih iya di menua Kanaan, angkat ninggalka menyadi iya Jakop, lalu mindah jauh ngagai menua bukai.
7 Iya angkat laban menua ti alai seduai iya Jakop diau, enda chukup alai seduai iya beridup. Jelu tupi seduai iya nyau kelalu mayuh, lalu seduai iya enda agi ulih diau begulai.
8 Nya alai Esau diau di menua ti bebukit di Edom.
9 Baka tu ku bala peturun Esau, ti nurunka orang  Edom.
10-13 Bini Esau ke benama Adah ngadaka siku anak lelaki, Elipas, lalu Elipas bisi lima iku anak lelaki: Teman, Omar, Sepo, Gatam, enggau Kenas. Ari bini iya ke benama Timna, Esau bisi siku agi anak lelaki, ke benama Amalek. Bini Esau ke benama Basemat ngadaka anak lelaki siku, Reuel, lalu Reuel bisi empat iku anak lelaki: Nahat, Serah, Samah, enggau Misah.
14 Bini Esau ke benama Oholibamah anak Anah, uchu Sibeon, ngadaka tiga iku anak lelaki: Jeus, Jalam, enggau Kurah.
15 Baka tu ku suku raban bansa ti diturunka Esau: anak lelaki Esau ke tuai, ke benama Elipas, nurunka suku raban bansa Teman, Omar, Sepo, Kenas,
16 Kurah, Gatam, enggau Amalek. Semua sida tu peturun Esau magang ari bini iya Adah.
17 Anak lelaki Esau ke benama Reuel nurunka suku raban bansa Nahat, Serah, Samah, enggau Misah. Sida tu diturunka bini Esau ke benama Basemat.
18 Baka tu ku suku raban bansa ti diturunka Esau ari bini iya ke benama Oholibamah anak Anah: Jeus, Jalam enggau Kurah.
19 Semua suku raban bansa tu diturunka Esau (iya nya Edom) magang.
 
Peturun Edom
20-21 Orang ke dulu nguan menua Edom, dibagi ngagai berapa bengkah suku raban bansa. Sida tu peturun Edom, orang  Hori. Raban bansa nya nyengkaum raban peturun Lotan, Sobal, Sibeon, Anah, Dison, Eser, enggau Disan.
22 Lotan nurunka raban peturun Hori, enggau raban bansa Heman. (Lotan bisi menyadi indu siku ke benama Timna.)
23 Sobal nurunka raban peturun Alban, Manahat, Ebal, Sepo, enggau Onam.
24 Sibeon bisi dua iku anak lelaki, Aiah seduai Anah. (Anah tu orang ke tetemuka mata ai ti angat di menua puang lebuh iya ngibun raban keledai apai iya.)
25-26 Anah nya apai Dison, ke nurunka raban peturun Hemdan, Esban. Itran, enggau Cheran. Anah mega bisi siku anak indu ke benama Oholibamah.
27 Eser nurunka raban peturun Bilhan, Saban, enggau Akan.
28 Disan nurunka raban peturun Us enggau bala raban bansa Aran.
29-30 Tu suku raban bansa orang Hori ke diau di menua Edom: Lotan, Sobal, Sibeon, Anah, Dison, Eser, enggau Disan.
 
 Raja Menua Edom
31-39 Sebedau menua Israel bisi raja, tu nama sida raja ke betangkan-tangkan megai perintah di menua Edom:  Bela, anak lelaki Beor, ari Dinhabah Jobap, anak lelaki Serah, ari Bosrah Husam ari menua Teman Hadat, anak lelaki Bedat ari Abit (iya udah ngalahka orang Midian ba siti perang ti nyadi di menua Moap)  Samlah, ari Masrekah Saul, ari Rihobot-ti-ba-Sungai Baal Hanan, anak lelaki Akbor Hadat, ari Pau (bini iya Mehetabel, anak indu Matret, uchu Mesahap)
40-43 Esau nurunka suku raban bansa: Timna, Albah, Jetet, Oholibamah, Elah, Pinon, Kenas, Teman, Mipsar, Makdil, enggau Iram. Menua ti diuan siti-siti suku raban bansa tu ngangkatka nama suku raban bansa nya empu.
 
Bagi 37
Josep Enggau Bala Menyadi Iya
1 Jakop mengkang diau di menua Kanaan, ti udah alai apai iya diau,
2 lalu tu jerita pasal ruang bilik Jakop. Lebuh Josep umur tujuh belas taun, iya enggau menyadi iya ke diadaka Bilhah enggau Silpah, iya nya indu simpan apai iya, ngibun raban bedus enggau raban kambin. Josep mai berita ti enda manah ngagai apai iya, pasal utai ti dikereja bala menyadi iya.
3 Jakop rindu agi ke Josep ari iya ke rinduka anak iya ti bukai, laban Josep udah diperanakka lebuh umur Jakop nyau tuai. Iya ngaga baju panjai, ti panjai lengan, ke Josep.
4 Lebuh bala menyadi Josep meda apai sida rindu agi ke Josep ari iya ti rinduka sida, sida begedika Josep, datai ke sida nyau enggai bejaku manah enggau iya.
5 Nyadi sekali, Josep bemimpi. Lebuh iya madahka mimpi diri ngagai bala menyadi iya, sida lalu balat agi begedika iya.
6 Ku iya, “Dinga kita mimpi aku.
7 Semua kitai bisi di umai, nanchang tangkai gandum. Tanchang tangkai gandum aku angkat lalu bediri chegit-chegit. Tanchang tangkai gandum kita lalu ngelingi tanchang tangkai gandum aku, lalu meremi ngagai iya.”
8 “Kati nuan ngumbai dirika nyadi raja kami?” ku bala menyadi iya bejaku. Nya alai sida balat agi begedika iya ketegal mimpi nya, enggau ketegal utai ti disebut iya.
9 Udah nya Josep lalu bemimpi baru, lalu madahka mimpi nya ngagai bala menyadi iya, “Aku udah bemimpi baru. Aku bemimpi meda mata hari, bulan, enggau sebelas igi bintang meremi ngagai aku.”
10 Iya mega nusui mimpi nya ngagai apai iya, lalu apai iya nganu iya: “Mimpi nama utai baka nya? Kati nuan ngumbai indai nuan, bala menyadi nuan, enggau aku deka meremi ngagai nuan?”
11 Bala menyadi Josep kepapaska iya, tang apai iya majak berundingka semua pekara nya.
 
Josep Dijual Lalu Dibai Ngagai Menua Ejip
12 Nyadi sekali, lebuh bala menyadi Josep udah bejalai ngagai Sekem, ngibun raban jelu apai sida,
13 Jakop bejaku enggau Josep, “Aku ngasuh nuan mupuk ngagai bala menyadi nuan ke ngibun raban bedus di Sekem.” Disaut Josep, “Au.”
14 Ku apai iya, “Mupuk nuan, lalu abas bala menyadi nuan enggau raban jelu ti diibun sida. Udah nya pulai kitu baru, lalu bai berita ngagai aku.” Nya alai apai iya ngasuh iya mupuk ari Emperan Hebron. Josep lalu datai di Sekem
15 lalu lebuh iya benung segau-segau ba sebelah menua nya, orang siku tepedaka iya, lalu nanya iya, “Nama utai digiga nuan?”
16 “Aku ngiga bala menyadi aku, ke ngibun raban jelu sida,” ku iya nyaut. “Kati nuan ulih madahka endur alai sida?”
17 Ku orang nya, “Sida udah angkat ari tu. Aku ninga sida madahka diri deka bejalai ngagai Dotan.” Josep lalu mupuk nitihka bala menyadi iya, lalu tetemuka sida di Dotan.
18 Lebuh sida tepedaka iya ari jauh, sebedau iya datai, sida lalu bepekat deka munuh iya.
19 Ku sida bejaku enggau pangan diri, “Nyin bujang ke bemimpi nya datai.
20 Aram kitai munuh iya lalu muai bangkai iya ke dalam telaga ti rangkai. Kitai tau madahka iya udah mati laban jelu. Nya baru kitai nemu namaka penyadi mimpi iya nya.”
21 Tang lebuh Reuben ninga nya, iya nguji nagang sida. Ku iya, “Anang munuh iya.
22 Buai iya aja ngagai telaga di menua puang tu, tang anang ngemediska iya.” Reuben bejaku munyi nya laban iya deka ngidupka nyawa Josep, lalu mai iya pulai baru ngagai apai iya.
23 Lebuh Josep datai ba bala menyadi iya, sida lalu nyarikka baju panjai ari tubuh iya.
24 Udah nya sida mai iya, lalu muai iya ngagai telaga ti nadai agi ai.
25 Lebuh sida benung makai, sida tepedaka seraban orang Ismail datai ari Giliat mansang ngagai menua Ejip. Jelu unta sida nyau sarat laban rempah enggau dambar.
26 Ku Judah bejaku enggau bala menyadi iya, “Nama utai ti ulih kitai enti kitai munuh menyadi kitai tu, lalu bepelamka pemati iya?
27 Aram kitai nyual iya ngagai orang Ismail nya. Nya baru kitai enda ibuh ngemediska iya, laban iya endang menyadi, endang darah-getah kitai empu.” Sida menyadi iya lalu besetuju.
28 Lebuh bala orang dagang ari menua Midian mansa, bala menyadi Josep narit Josep pansut ari telaga nya, lalu nyual iya ngagai orang Ismail nya. Rega iya dua puluh singkap pirak. Orang bansa Ismail nya lalu mai iya ngagai menua Ejip.
29 Lebuh Reuben pulai baru ngagai telaga nya, iya lalu nemu Josep nadai agi dia, lalu iya nyarikka gari diri laban kelalu tusah ati.
30 Iya pulai baru ngagai sida menyadi, ku iya, “Nembiak nya nadai agi dia! Baka ni ku aku enggau nya?”
31 Udah nya sida munuh siku kambin, lalu nyepuhka baju panjai Josep ke dalam darah kambin nya.
32 Sida mai baju panjai nya ngagai apai sida, ku sida, “Kami bisi nemu utai tu. Kati tu gari anak nuan?”
33 Jakop ngelala baju panjai nya, lalu ku iya, “Baju Josep meh tu! Jelu babas udah makai iya. Anak aku, Josep, udah dipecharikka jelu!”
34 Jakop lalu nyarikka gari diri laban iya kelalu tusah ati, lalu ngerasukka kain guni. Lama amat iya ngulitka anak iya.
35 Semua anak lelaki iya, enggau anak indu iya, datai merindang iya, tang iya enggai diperindang sida. Ku iya, “Aku deka ngulitka anak aku datai ke aku mati.” Nya alai iya majak ngulitka anak iya, Josep.
36 Nyadi ba urung maya nya di menua Ejip, orang Midian nya udah nyual Josep ngagai Potipar, siku pemesai raja, ti nyadi kepala ke bala soldadu ke nyaga istana raja.
 
Bagi 38
Judah Enggau Tamar
1 Ba urung maya nya, Judah ninggalka sida menyadi iya lalu diau enggau lelaki siku ke benama Hirah, ke datai ari nengeri Adulam.
2 Nya meh endur alai Judah betemu enggau indu bansa Kanaan siku ti agi biak. Nama apai indu nya Sua. Judah lalu jadi enggau indu nya,
3 lalu indu nya ngadaka anak lelaki siku ke Judah, lalu Judah meri iya nama Er.
4 Bini iya ngandung baru, lalu ngadaka siku agi anak lelaki, lalu bini iya meri anak mit nya nama Onan.
5 Indu nya lalu ngadaka siku agi anak lelaki, lalu iya diberi nama Selah. Judah agi di Aksip lebuh anak mit nya ada.
6 Judah ngambi siku bini ke anak tuai iya Er. Nama indu nya Tamar.
7 Tang Er jai ulah, lalu nya nyungkak TUHAN ringat. Nya alai TUHAN munuh iya.
8 Udah nya Judah lalu bejaku enggau menyadi Er ke benama Onan, “Alai nuan tinduk enggau balu menyadi nuan. Kereja tanggungjawap nuan nyadi laki ke balu menyadi nuan, ngambika menyadi nuan bisi purih.”
9 Tang Onan nemu, enti iya enggau balu menyadi iya bisi anak, anak mit nya ila ukai dikumbai enggi iya. Nya alai lebuh iya beleman enggau balu menyadi iya, iya nejuka ai mani iya nyaya, ngambika menyadi iya nadai purih.
10 Utai ti dikereja Onan nyungkak TUHAN ringat, lalu TUHAN mega munuh iya.
11 Udah nya Judah lalu bejaku enggau menantu iya, Tamar, “Alai nuan pulai ngagai rumah apai nuan, lalu mengkang nyadi orang ke balu nyentuk ngagai maya anak aku, Selah, udah besai.” Iya nyebut nya laban iya enggai ke Selah kena bunuh, baka menyadi iya ke dua iku. Nya alai Tamar pulai ngagai rumah apai iya empu.
12 Nyau kelama udah bekau nya, bini Judah mati. Lebuh Judah udah badu ngulit, iya enggau pangan iya, Hirah, orang Adulam, mansang ngagai Timnah, alai jelu bedus iya benung dikukur.
13 Orang bisi madahka ngagai Tamar pasal mentua lelaki iya ti deka datai di Timnah, laban iya deka ngukur bedus iya.
14 Tamar lalu nukar pekayan ulit iya, nambai mua diri ngena kain, lalu nudukka diri ba pintu penama ngagai Enaim, sebuah nengeri ti ba tisi jalai ti nuju ngagai Timnah. Tamar sigi nemu Selah, anak bunsu Judah endang udah besai, tang Selah lalu apin diasuh jadi enggau iya.
15 Lebuh Judah tepedaka Tamar, iya ngumbai Tamar nya indu sundal, laban Tamar udah nambai mua diri.
16 Judah mansang ngagai iya ba tisi jalai nya, lalu bejaku, “Berapa pinta nuan?” (Judah enda nemu indu nya menantu iya empu.) Ku indu nya nyaut, “Nama utai ti deka diberi nuan ngagai aku?”
17 Ku Judah nyaut, “Aku deka ngirumka ngagai nuan siku kambin ti agi biak ari raban jelu aku.” Ku indu nya bejaku, “Barang ku jaku, enti nuan deka meri aku utai nyadika gadai, nganti nuan ke ngirumka kambin nya ngagai aku.”
18 “Nama gadai ti patut diberi aku ngagai nuan?” ku Judah nanya. Disaut indu nya, “Tinchin ti dikena nuan ngechop, enggau tali iya, enggau tungkat ti dibai nuan nya.” Judah lalu meri utai nya ngagai iya. Udah nya seduai iya lalu beleman enggau pangan diri. Tamar lalu ngandung.
19 Tamar pulai, muka tambai mua iya, lalu ngerasukka pekayan ulit iya.
20 Judah lalu ngasuh pangan iya, Hirah, mai siku kambin, lalu ngambi pulai baru ari indu nya utai ti udah dikena nyadika gadai. Tang Hirah nadai tetemuka indu nya.
21 Iya nanya sekeda lelaki di Enaim. Ku iya, “Dini alai indu sundal ke ba tisi jalai tu suba?” “Nadai indu sundal udah kala bisi ditu.” ku sida nyaut.
22 Hirah pulai ngagai Judah, ku iya, “Aku nadai tetemuka iya. Bala lelaki ke dia madahka, nadai indu sundal udah bisi kala dia.”
23 Ku Judah, “Awakka iya nyimpan utai nya, enggai ke orang ketawaka kitai. Aku amat nguji mayar iya, tang nuan nadai tetemuka iya.”
24 Kira tiga bulan udah bekau nya, orang bisi madahka ngagai Judah munyi tu: “Menantu nuan, Tamar, nyau ngulah diri baka indu sundal, lalu iya diatu ngandung.”  Judah lalu bejaku, “Bai iya ke luar, lalu tunu iya datai ke iya mati.”
25 Lebuh Tamar benung dibai ke luar, iya lalu ngasuh orang madahka mentua lelaki iya, “Aku ngandung laban orang ke bempu utai tu. Peda utai tu, lalu giga sapa orang ke bempu utai tu, tinchin ti kena ngechop, enggau tali iya, enggau tungkat tu.”
26 Judah ngelala utai nya, lalu ku iya, “Iya nadai penyalah. Aku empu ti enda ngereja tanggungjawap aku ke iya. Aku patut udah ngasuh anak lelaki aku Selah jadi enggau iya.” Judah nadai agi beleman enggau iya udah bekau nya.
27 Lebuh Tamar nyau chukup bulan, iya ditemu bisi dua iku anak dalam kandung iya.
28 Lebuh iya benung radai, siku ari anak mit nya mansutka siti jari. Indu bidan lalu nangkap jari nya, lalu nanchangka ubung mirah ba jari nya, ku iya, “Iya tu dulu ada.”
29 Tang anak mit nya narit jari iya ke dalam baru, lalu menyadi iya dulu agi ada. Udah nya ku indu bidan nya bejaku, “Nya chara nuan ada!” Nya alai anak mit nya diberi nama Peres.
30 Udah nya, menyadi iya ada, mai ubung mirah ba jari iya, lalu iya diberi nama Serah.
 
Bagi 39
Josep Enggau Bini Potipar
1 Nyadi orang  Ismail nya udah mai Josep ngagai menua Ejip, lalu nyual iya ngagai Potipar, siku pemesai raja, ti nyadi kepala orang ke nyaga istana.
2 TUHAN bisi enggau Josep, lalu ngasuh iya mujur dalam semua utai. Iya diau dalam rumah tuan iya.
3 Lebuh Potipar nemu TUHAN bisi enggau Josep, lalu ngasuh iya mujur dalam semua utai ti dikereja iya,
4 Potipar gaga ati ke Josep, lalu ngasuh Josep ngemataka rumah iya, enggau semua reta tengkira iya.
5 Belabuh ari nya, ketegal Josep, TUHAN merekatka ruang bilik orang Ejip nya, enggau semua utai ti dikemisi iya dalam rumah enggau ba umai iya.
6 Potipar ngasuh Josep ngemataka semua utai iya. Nya alai iya enda ibuh ngiruh diri agi bekiraka utai, kelimpah ari pemakai iya empu. Nyadi Josep tu orang ke tegap sereta sigat gamal.
7 Nyau ke lama, bini Potipar lalu bisi ati ke Josep, lalu nguji mai Josep tinduk.
8 Tang Josep enggai. Ku iya bejaku enggau bini Potipar, “Laki nuan nadai agi ibuh ngiruh diri bekiraka sebarang utai dalam rumah tu, laban aku bisi ditu. Iya udah ngasuh aku ngemataka semua utai iya.
9 Kuasa aku dalam rumah tu ngemesai kuasa iya empu, lalu iya nadai nagang aku ngena semua utai dalam rumah tu, kelimpah ari nuan empu. Nya alai, baka ni ku aku tau ngereja utai ti kamah tu, lalu bedosa ngelaban Allah Taala?”
10 Nya alai, taja pen bini Potipar tiap hari ngumbuk Josep, tang Josep mengkang enggai.
11 Tang sekali, lebuh Josep tama ngagai rumah nya deka mansang gawa, bala orang gaji nadai dia.
12 Bini Potipar lalu narit Josep ba baju panjai iya, ku iya, “Aram tinduk enggau aku.” Tang Josep ngerarika diri, lalu belanda ke luar. Tang baju panjai iya ditarit bini Potipar ari tubuh Josep lalu tinggal ba jari indu nya.
13 Lebuh bini Potipar meda Josep udah ninggalka baju panjai iya, lalu belanda ke luar ari rumah nya,
14 iya lalu ngangauka bala orang gaji. Ku iya, “Peda kita! Orang Hebrew ke dibai laki aku ngagai rumah tu, udah ngeleseka kitai. Iya tama ngagai bilik aku, lalu nguji masung aku, tang aku nyerauh enggau naka penginggar nyawa aku.
15 Lebuh iya ninga aku nyerauh, iya belanda ke luar, ninggalka baju panjai iya ngimbai aku.”
16 Bini Potipar nyimpan baju panjai Josep, nyentuk ngagai maya Potipar datai di rumah.
17 Udah nya iya lalu nusui cherita nya ngagai laki iya. Ku iya, “Orang Hebrew ti nyadi ulun, ke dibai nuan kitu, tama ngagai bilik aku, lalu masung aku.
18 Tang lebuh aku nyerauh, iya belanda ke luar, ninggalka baju panjai iya ngimbai aku.”
19 Potipar lalu pedis ati.
20 Iya lalu ngasuh orang nangkap Josep, lalu nutup iya dalam rumah jil, ba endur alai bala orang jil ke ditutup raja. Dia meh endur alai Josep diau.
21 Tang TUHAN bisi enggau Josep lalu merekatka iya, datai ke kepala orang ke nyaga rumah jil nya nyau rinduka iya.
22 Orang nya ngasuh Josep nyadi tuai ke bala orang jil ti bukai, lalu ngasuh iya betanggungjawapka semua utai ti dikereja dalam rumah jil nya.
23 Kepala rumah jil nya enda agi ibuh ngemataka pengawa Josep, laban TUHAN bisi enggau Josep, lalu ngasuh iya mujur dalam semua utai ti dikereja iya.
 
Bagi 40
Josep Madahka Reti Mimpi Orang Tutup
1 Nyau ke lama udah bekau nya, orang ke nyaga wain raja, enggau kepala orang ke ngaga roti raja, bisi ngereja penyalah.
2 Raja ringat ngagai seduai iya
3 lalu nutup seduai iya dalam rumah jil. Rumah tutup nya dalam rumah kepala orang ke nyaga rumah jil, ba endur alai Josep ke ditutup.
4 Lama amat seduai iya ditutup dalam rumah jil, lalu kepala orang ke nyaga rumah jil nya ngasuh Josep nyadi ulun seduai iya.
5 Nyadi sekali, lebuh malam hari, orang ke nyaga wain raja, enggau kepala orang ke ngaga roti raja, sama bisi mimpi, tang mimpi seduai iya enda sebaka.
6 Lebuh Josep datai ngagai seduai iya pagi nya, seduai iya berupai tusah ati.
7 Iya lalu nanya seduai iya, “Nama kebuah seduai baka ke irau ati sehari tu?”
8 Disaut seduai iya, “Kami duai sama bisi mimpi, lalu orang ditu nadai ulih nerangka reti mimpi nya.”
Ku Josep, “Allah Taala aja ke meri penau kena nerangka mimpi. Padahka mimpi seduai ngagai aku.”
9 Orang ke nyaga wain raja lalu bejaku, “Dalam mimpi aku, aku tepedaka sebatang anggur di mua aku.
10 Batang anggur nya bisi tiga iti dan. Lebuh batang anggur nya mansutka daun, iya bebungai, lalu buah anggur nya mansau.
11 Aku megai mangkuk raja ba jari aku. Nya alai aku ngambi lalu merah buah anggur nya dalam mangkuk. Aku lalu nyuaka mangkuk nya ngagai raja.”
12 Ku Josep bejaku, “Tu reti mimpi nya: tiga iti dan nya tiga hari.
13 Tiga hari da agi, raja deka ngelepaska nuan, ngampun nuan, lalu ngasuh nuan pulai baru ngagai pengawa nuan. Nuan deka nyuaka mangkuk raja ngagai raja empu, baka ke dikereja nuan suba lebuh nuan mai mangkuk wain iya.
14 Tang lebuh nuan udah pansut ila, anang enda ingatka aku. Kenang pasal aku ngagai raja, lalu tulung aku pansut ari rumah jil tu.
15 Laban dulu menya aku udah ditangkap lalu ditabanka orang ari menua orang Hebrew. Indah di menua Ejip ditu deh aku nadai udah ngereja penyalah ti tau ngasuh aku patut kena tutup.”
16 Lebuh kepala orang ke ngaga roti ke raja ninga penerang pasal mimpi orang ke nyaga wain raja nya munyi ti betul, iya lalu bejaku enggau Josep, “Aku pen bisi mega mimpi. Aku bemimpi mai tiga iti bakul ba atas pala aku.
17 Bakul ti di atas bendar ngundan semua macham pemakai ti udah dipanggang ke raja. Burung datai lalu makai utai nya.”
18 Disaut Josep, “Tu reti mimpi nya: tiga iti bakul nya tiga hari.
19 Tiga hari da agi, raja deka ngelepaska nuan, lalu iya deka ngasuh orang mumpung pala nuan! Udah nya iya deka ngantung bangkai nuan ari siti tiang, lalu burung deka datai lalu makai isi nuan.”
20 Ba hari pengada raja tiga hari udah bekau nya, raja nyendiaka pengerami makai besai ke semua bala pemesai iya. Iya lalu ngelepaska orang ke nyaga wain iya, enggau kepala orang ke ngaga roti ke raja, lalu mai seduai iya ngagai mua bala pemesai iya.
21 Raja lalu ngasuh orang ke mai mangkuk wain iya pulai baru ngagai pengawa iya ti dulu suba,
22 tang iya munuh kepala orang ke ngaga roti ke iya. Semua utai nya nyadi munyi ti dipadahka Josep.
23 Tang orang ke mai mangkuk wain raja nadai berundingka pasal Josep. Iya terus enda ingatka Josep.
 
Bagi 41
 Josep Nerangka Reti Mimpi Raja
1 Dua taun udah bekau nya, raja menua Ejip bemimpi asai ke bediri ba tebing Sungai Nile,
2 lalu tujuh iku sapi ti indu ke gemu sereta manah gaya, pansut ari sungai nya, lalu belabuh ngulam rumput.
3 Udah nya tujuh iku sapi ti bukai pansut. Sida tu kurus, datai ke tulang sida nyau ayan. Sida datai lalu bediri ngimbai sapi ti bukai nya ba tebing sungai nya.
4 Sapi ti kurus nya lalu makai sapi ti gemu. Udah nya raja lalu tedani.
5 Iya tinduk baru, lalu bemimpi baru. Tujuh iti tangkai gandum ti perisi sereta mansau bisi ba sebatang gandum.
6 Udah nya tujuh iti tangkai gandum ti bukai tumbuh. Sida tu upang sereta layu laban sida dipuputka ribut ti datai ari menua puang.
7 Tangkai tujuh iti ti upang nya lalu nelan tujuh iti tangkai ti perisi. Raja lalu tedani. Nya baru iya nemu diri udah bemimpi.
8 Pagi nya iya irau ati. Nya alai iya mesanka semua orang ke tau keramat, enggau semua orang ke bepenemu-dalam di menua Ejip. Iya madahka mimpi iya
ngagai sida, tang nadai siku sida ulih nerangka reti mimpi nya ngagai iya.
9 Udah nya orang ke mai mangkuk wain raja lalu bejaku enggau raja, “Aku enggai enda ngaku sehari tu, aku udah salah.
10 Nuan udah ringat ngagai kepala orang ke ngaga roti, enggau ngagai aku, lalu nutup kami duai dalam rumah jil, ba rumah kepala orang ke nyaga istana.
11 Nyadi sekali, kami duai sama bisi mimpi, lalu mimpi nya enda sebaka reti.
12 Siku orang Hebrew, ti agi biak umur, bisi dia enggau kami. Iya tu nyadi kepala ulun ke orang ke nyaga istana. Kami duai madahka mimpi kami duai ngagai iya, lalu iya nerangka reti mimpi nya ngagai kami duai.
13 Utai ti ku iya udah nyadi magang. Nuan udah ngasuh aku pulai baru ngagai pengawa aku, lalu kepala orang ke ngaga roti ke raja, udah dibunuh.”
14 Raja lalu mesanka Josep. Josep lalu tekala nya dibai ari rumah jil. Lebuh iya udah ngukur ragum iya, lalu nukar gari iya, iya lalu mansang betemu enggau raja.
15 Raja lalu bejaku enggau iya, “Aku bisi mimpi, tang nadai siku orang ulih nerangka reti mimpi nya. Orang bisi udah madahka nuan nemu nerangka reti mimpi.”
16 Disaut Josep, “Aku enda nemu nerangka reti mimpi, Tuan Raja, tang Allah Taala deka nerangka reti mimpi nya enggau betul.”
17 Ku raja, “Aku bemimpi asai ke bediri ba tebing Sungai Nile,
18 lalu tujuh iku sapi ti indu ke gemu sereta manah gaya, pansut ari sungai nya, lalu belabuh ngulam rumput.
19 Udah nya tujuh iku agi sapi ti indu pansut. Sida tu kurus datai ke sida nyau ayan tulang. Nadai aku kala meda sapi ngemalat nya kurus di menua Ejip.
20 Sapi ti kurus nya lalu makai sapi ti gemu,
21 tang nadai orang nemu nya udah nyadi, laban sapi ti kurus nya agi mengkang kurus baka ke sebedau nya. Udah nya aku lalu tedani.
22 Aku mega bemimpi meda tujuh iti tangkai gandum ti perisi sereta mansau ba siti batang gandum.
23 Udah nya tujuh iti tangkai gandum tumbuh. Tangkai tu upang sereta layu laban sida dipuputka ribut ti datai ari menua puang.
24 Tangkai gandum ti upang nya lalu nelan tangkai gandum ti perisi. Aku udah madahka mimpi nya ngagai orang ke tau keramat, tang nadai siku sida ulih nerangka reti mimpi nya ngagai aku.”
25 Ku Josep bejaku enggau raja, “Mimpi dua bengkah nya sama sebaka reti. Allah Taala udah madahka ngagai nuan utai ti deka dikereja Iya.
26 Sapi tujuh iku ti gemu nya tujuh taun, lalu tujuh iti tangkai gandum ti perisi nya mega tujuh taun. Utai nya sama sebaka reti.
27 Sapi tujuh iku ti kurus nya, ti datai dudi, enggau tujuh iti tangkai gandum ti upang nya tujuh taun lapar pungkang.
28 Utai tu munyi ti udah dipadahka aku ngagai nuan: Allah Taala udah madahka ngagai nuan utai ti deka dikereja Iya.
29 Dalam tujuh taun, orang deka bulih mayuh utai di serata menua Ejip.
30 Udah nya, tujuh taun lapar pungkang deka nyadi, datai ke orang nyau nadai agi teingatka taun sida bulih utai, laban lapar pungkang nya deka ngerusak menua tu.
31 Orang nyau enda agi teingatka maya sida udah bulih utai, laban lapar pungkang ti ngentudika nya deka balat amat ngasuh sida merinsa.
32 Mimpi nuan ti betandu baka nya, nunjukka utai tu udah diletak Allah Taala, lalu Iya deka ngasuh utai nya nyadi enda lama da agi.
33 “Diatu nuan patut milih orang siku ti pintar sereta bepenemu-dalam, lalu ngasuh iya nyadi tuai megai menua tu.
34 Nuan mega enda tau enda ngeletak bala pemesai ti bukai, lalu ngambi dua puluh peratus ari semua utai ti ulih ari umai, dalam tujuh taun sida ke bulih utai.
35 Asuh sida ngumpul semua pemakai nya dalam taun orang ke bulih utai ti deka datai tu, lalu beri sida kuasa nyimpan gandum nya dalam semua nengeri, lalu nyaga utai nya.
36 Pemakai nya deka digalau ke menua tu, ngambika bisi diempa dalam tujuh taun lapar pungkang nya nyadi di menua Ejip, ngambika orang mayuh enda mati keberuran.”
 
Josep Diletak Nyadi Gabenor Menua Ejip
37 Raja enggau bala pemesai iya lalu ngemendarka pelan nya,
38 lalu ku raja bejaku enggau sida, “Kitai nadai nemu orang bukai ke patut agi ari Josep, ke bisi roh Allah Taala.”
39 Ku raja bejaku enggau Josep, “Allah Taala udah mandangka semua utai tu ngagai nuan. Nya alai nuan terang amat lebih agi bepenemu-dalam sereta dalam agi runding ari semua orang bukai.
40 Aku deka ngasuh nuan nyadi kepala megai menua aku, lalu semua nembiak aku deka ngasi magang ke atur nuan. Nuan deka bekuasa nyadi lumur dua aku.
41 Aku diatu ngeletak nuan nyadi gabenor ke semua menua Ejip.”
42 Raja nya lalu merurutka tinchin ari tunjuk iya. Ba tinchin tu bisi dituliska chop diraja. Iya lalu ngerasukka tinchin nya ba tunjuk Josep. Iya ngerasukka kain linin ti alus ba Josep, lalu ngerasukka tenggak emas ba rekung Josep.
43 Iya meri Josep kerita perang diraja ti lumur dua, lalu bala soldadu ke nyaga Josep bejalai dulu ari iya enggau panjung, “Anang mempang! Anang mempang!” Nya meh jalai iya ngeletak Josep nyadi gabenor ke semua menua Ejip.
44 Ku raja bejaku enggau Josep, “Aku tu raja, lalu nadai orang dalam menua Ejip tau ngangkatka jari tauka kaki enti aku enda ngemendarka iya.”
45-46 Iya meri Josep nama orang Ejip, Sapenat-paniah, lalu iya meri Josep siku bini, Asenat, anak Potipera, siku imam di nengeri Heliopolis. Umur Josep tiga puluh taun lebuh iya berengkah bekereja ke raja menua Ejip. Iya mupuk ari istana raja, lalu bejalai nengah serata menua Ejip.
47 Mayuh amat asil ulih di menua nya dalam kandang tujuh taun.
48 Semua utai nya digumpul lalu disimpan Josep dalam semua nengeri. Utai ti ulih ari umai ti ngelingi genap buah nengeri, disimpan iya dalam nengeri nya empu.
49 Gandum ti digumpul endang amat mayuh, datai ke Josep nyau badu agi nakar utai nya. Pemayuh gandum nya nyau baka pasir ti ba tebing tasik.
50 Sebedau lapar pungkang nyadi, Josep bisi dua iku anak lelaki diadaka Asenat.
51 Ku Josep, “Allah Taala udah ngasuh aku badu agi ingatka pemerinsa aku, enggau pemerinsa ruang bilik apai aku.” Nya alai iya meri nama Manasi ngagai anak iya ke tuai.
52 Ku iya mega bejaku, “Allah Taala udah meri aku anak lelaki, dalam menua ti alai aku kena perinsa.” Nya alai iya meri nama Epraim  ngagai anak iya ke lumur dua.
53 Tujuh taun alai orang di menua Ejip bulih utai pen apus,
54 lalu tujuh taun lapar pungkang belabuh nyadi, munyi ti udah dipadahka Josep. Semua menua bukai kena magang laban lapar pungkang nya, tang menua Ejip enda suntuk pemakai.
55 Lebuh orang Ejip belabuh natka diri lapar, sida minta pemakai ngagai raja. Iya lalu ngasuh sida mansang ngagai Josep, sereta ngasuh sida ngereja utai ti diasuh Josep.
56 Lapar pungkang nya nyau mansang balat-sebalat, lalu ngelekai ngagai semua menua nya. Nya alai Josep muka semua tibang gandum, lalu nyual gandum nya ngagai orang Ejip.
57 Orang ari serata dunya datai ngagai menua Ejip, mansang meli gandum ari Josep, laban lapar pungkang balat amat nyadi di semua endur.
 
Bagi 42
Bala Menyadi Josep Meli Gandum Ngagai Menua Ejip
1 Lebuh Jakop ninga menua Ejip bisi gandum, iya lalu bejaku enggau bala anak iya. Ku iya, “Nama kebuah kita dugau-dugau ngapa nadai ngereja utai?
2 Aku ninga menua Ejip bisi gandum. Alai kita kin, lalu beli gandum ke kitai ngambika kitai enda mati keberuran.”
3 Menyadi tiri Josep ke sepuluh iku lalu mupuk ngagai menua Ejip deka meli gandum.
4 Tang Jakop enda nyagi menyadi tampung pala Josep ke benama Benjamin mupuk enggau sida, enggai ke Benjamin bebadi.
5 Bala anak Jakop lalu bejalai sama enggau orang bukai, mansang meli gandum, laban menua Kanaan kena laban lapar pungkang.
6 Josep, ti nyadi gabenor menua Ejip, nyual gandum ngagai orang ke datai ari serata dunya. Nya alai bala menyadi Josep datai, lalu nyungkurka diri ke tanah di mua iya.
7 Lebuh Josep meda bala menyadi iya, iya ngelala sida, tang iya ngaga diri baka ke enda ngelala sida. Iya bejaku kasar lebuh iya nanya sida. Ku iya, “Datai ari ni kita tu?” “Kami tu datai ari menua Kanaan, deka meli pemakai,” ku sida nyaut.
8 Josep ngelala bala menyadi iya, tang sida enda ngelala iya.
9 Iya teingatka mimpi diri pasal sida, lalu ku iya, “Kita tu pematau. Kita datai ditu laban kita keran deka nemu pengelemi menua kami.”
10 “Ukai baka nya, tuan,” ku sida nyaut. “Kami ke ulun nuan tu datai laban kami deka meli pemakai.
11 Semua kami tu diri menyadi magang. Kami tu ukai pematau, tuan. Kami tu manah ati.”
12 Ku Josep bejaku enggau sida, “Kita datai laban kita keran deka nemu pengelemi menua kami.”
13 Ku sida, “Semua kami tu dua belas iku diri menyadi, tuan. Kami tu anak orang siku di menua Kanaan. Siku menyadi kami udah mati, lalu iya ke bunsu tinggal enggau apai kami.”
14 Josep lalu bejaku ngagai sida, “Munyi ti ku aku, semua kita tu pematau magang.
15 Aku deka ngabas pengamat jaku kita. Aku besumpah atas nama raja, kita enda tau angkat ari tu, enti menyadi bunsu kita enda datai ditu.
16 Siku ari bala kita enda tau enda mupuk lalu ngambi iya. Kita ti bukai deka kena tan lalu ditutup dalam rumah jil ditu, nyentuk ngagai maya utai ti ku kita nya udah ditentuka amat magang. Enti enda, seagi-agi tuan raja idup, kita tu endang amat bala pematau.”
17 Lebuh iya udah tembu bejaku, iya lalu nutup sida tiga hari dalam rumah jil.
18 Ba hari ti ketiga, Josep bejaku enggau sida, “Aku tu orang ke nangika Allah Taala, lalu aku enda munuh kita enti kita ngereja utai ti diasuh aku.
19 Kena aku ngabas pemetul ati kita, siku ari bala kita deka ditutup dalam rumah jil, alai kita ke udah kena tan. Kita ti bukai tau mupuk, lalu mai gandum ti udah dibeli kita, ngagai kita sebilik ke lapar.
20 Udah nya kita enda tau enda mai menyadi bunsu kita ngagai aku, kena nunjukka kita amat madahka utai ti bendar, ngambika aku enda munuh kita.” Sida besetujuka atur nya
21 lalu bejaku enggau pangan diri, “Sigi amat. Diatu baru kita natka pemerinsa ketegal utai ti udah dikereja kita ngagai menyadi kitai. Kitai meda pemalat ati iya tusah lebuh iya minta kasih ari kitai, tang kitai enggai mendingka iya. Nya meh kebuah kita dituntung penusah tu diatu.”
22 Ku Reuben, “Aku nagang kita ngemediska nembiak nya, tang kita enggai mending. Diatu kitai nerima balas ke pemati iya.”
23 Josep meretika utai ti disebut sida, tang sida enda nemu nya, laban sida udah bejaku enggau iya ngena siku penyalin jaku.
24 Josep ninggalka sida lalu nyabak. Lebuh iya nyau ulih bejaku baru, iya lalu pulai baru ngagai sida, ngambi Simeon, lalu ngasuh orang nanchang iya di mua sida.
 
Bala Menyadi Josep Pulai Ngagai Menua Kanaan
25 Josep lalu ngasuh orang ngisi ma bala menyadi iya enggau gandum, lalu mulaika duit sida ngagai guni sida siku-siku, lalu meri sida pemakai nyadika bekal sida di rantau jalai. Semua utai nya lalu dikereja magang.
26 Bala menyadi iya lalu manggaika gandum ti udah dibeli sida, ba keledai sida, lalu mupuk.
27 Lebuh siku ari bala sida muka guni iya, deka meri keledai iya makai, iya lalu tetemuka duit ba mua guni iya.
28 “Duit aku udah diberi pulai baru,” ku iya ngangau ngagai bala menyadi iya.”Tu duit aku dalam guni aku!” Sida lalu tusah ati, sereta takut, lalu nanya pangan diri, “Nama utai ti udah dikereja Allah Taala ngagai kitai?”
29 Lebuh sida datai ngagai Jakop apai sida di menua Kanaan, sida nusui ngagai iya semua utai ti udah nyadi ba sida.
30 “Gabenor menua Ejip bejaku kasar amat enggau kami, lalu ngumbai kami matau menua iya.
31 Kami lalu nyaut iya, ‘Kami tu ukai pematau. Kami tu manah ati.
32 Kami dua belas iku diri menyadi, sama saum apai. Siku menyadi kami udah mati, lalu iya ke bunsu tinggal di menua Kanaan enggau apai kami.’
33 Ku orang nya nyaut, ‘Tu jalai aku deka nemu enti kita amat manah ati. Siku ari bala kita deka tinggal enggau aku. Kita ti bukai deka mupuk lalu mai gandum ngagai kita sebilik ke lapar.
34 Bai menyadi bunsu kita ngagai aku. Nya baru aku deka nemu enti kita tu amat ukai pematau, tang orang ke manah ati. Aku deka meri menyadi kita pulai baru ngagai kita, lalu kita tau diau lalu bedagang di menua tu.’ “
35 Udah nya, lebuh sida nuang guni sida, genap iku sida lalu tetemuka kandi duit diri dalam guni sida siku-siku. Lebuh sida meda duit nya, sida enggau apai sida, Jakop, lalu takut.
36 Ku apai sida bejaku enggau sida, “Kati kita ngasuh aku ngelenyauka semua anak aku? Josep nadai agi. Simeon nadai agi. Lalu diatu kita deka mai Benjamin. Tulah meh aku tu!”
37 Reuben lalu bejaku enggau apai iya, “Enti aku enda mai Benjamin pulai baru ngagai nuan, nuan tau munuh anak lelaki aku ke dua iku. Awakka aku nyaga Benjamin, lalu mai iya pulai baru.”
38 Tang ku Jakop, “Enda! Anak aku enda tau mupuk enggau kita. Menyadi iya udah mati. Ka semina siku iya aja ti agi tinggal. Kada enda iya bebadi di rantau jalai. Aku nyau tuai, lalu enti kita ngenusahka ati aku baka nya, aku deka mati.”
 
Bagi 43
Bala Menyadi Josep Pulai Baru Ngagai Menua Ejip, Mai Benjamin.
1 Lapar pungkang di menua Kanaan majak balat-sebalat,
2 lalu lebuh gandum ti udah dibeli sida Jakop sebilik ari menua Ejip nyau abis, Jakop lalu bejaku enggau bala anak iya, “Alai kita kin ke baru lalu meli pemakai ke kitai.”
3 Ku Judah bejaku enggau iya, “Orang nya nangkan kami enggau jaku, madahka kami enda tau betemu enggau iya, enti kami enda mai menyadi kami.
4 Enti nuan deka ngasuh Benjamin enggau kami, nya baru kami deka mupuk lalu meli pemakai ke nuan.
5 Enti nuan enda nyagi Benjamin enggau kami, kami enggai kin, laban orang nya madahka kami enda ulih betemu enggau iya, enti menyadi kami nya enda enggau kami.”
6 Ku Jakop, “Nama kebuah kita ngenusahka aku ngemalat tu, madahka diri bisi menyadi bukai?”
7 Ku sida nyaut, “Orang nya majak nanyaka pasal kami enggau pasal kitai sebilik, ‘Kati apai kita agi meruan? Kati kita bisi siku agi menyadi?’ Kami nadai chara bukai, tang nyaut tanya iya. Baka ni ku kami nemu iya deka ngasuh kami mai menyadi kami ngagai iya?”
8 Ku Judah bejaku enggau apai iya, “Awakka nembiak nya enggau aku, ngambika kami mupuk diatu. Nya baru bala kitai enda mati keberuran.
9 Aku ngadai nyawa aku empu, lalu nuan tau ngumbai aku betanggungjawapka iya. Enti aku enda mai iya pulai baru enggau likun ngagai nuan, aku meh betanggungjawapka penyalah nya.
10 Enti kami enda betangguh ngelama nya, ngendua kali pen ulih meh kami udah kin.”
11 Apai sida lalu bejaku enggau sida, “Enti utai nya enda tau enda baka nya, bai meh utai ti pemadu manah ari umai kitai dalam ma kita, nyadika pemeri ke tuan gabenor nya, dambar, ai manyi, rempah, kachang, enggau buah almon.
12 Bai mega dua kali mayuh agi duit, laban kita enda tau enda mulaika duit ti udah diberi pulai ngagai kita ba mua guni kita. Nyangka sida saru.
13 Bai menyadi kita, lalu pulai kitu enggau naka pengelengkas.
14 Awakka Allah Taala ti Pemadu Bekuasa ngasuh orang nya kasihka kita, ngambika iya meri Benjamin enggau menyadi kita pulai baru. Enti aku enda tau enda lenyau anak, nadai ku enggau meh.”
15 Sida menyadi lalu mai pemeri, enggau dua kali mayuh agi duit, lalu mupuk ngagai menua Ejip, mai Benjamin. Sida lalu betemu enggau Josep.
16 Lebuh Josep meda Benjamin datai enggau sida, iya lalu bejaku enggau kepala ulun ke ngemataka rumah iya, “Bai sida tu ngagai rumah aku. Sida deka merarau enggau aku tengah hari tu lagi. Sayat lalu bela siku jelu.”
17 Ulun nya lalu ngereja nitihka asuh Josep, lalu mai sida menyadi ngagai rumah Josep.
18 Lebuh sida benung dibai ngagai rumah nya, sida takut. Ku pikir sida, “Kitai dibai kitu ketegal duit ti udah dipulaika baru ngagai guni kitai lebuh kitai kitu terubah iya suba. Sida deka ngamuk kitai, ngambi keledai kitai, lalu ngaga kitai nyadi ulun iya.”
19 Nya alai, lebuh sida datai ba mua pintu rumah nya, sida lalu bejaku enggau kepala ulun nya,
20 “Tuan, kami sekali udah datai ditu suba, deka meli pemakai.
21 Lebuh kami ngetu bemalam di rantau jalai lebuh kami pulai, kami muka guni kami, lalu genap iku kami tetemuka duit ba mua guni kami. Semua duit kami bisi dia magang. Kami udah mai duit nya pulai baru ngagai kita.
22 Kami udah mega mai duit mayuh agi ari nya kena kami meli pemakai. Kami enda nemu sapa nyimpan duit nya dalam guni kami.”
23 Disaut ulun nya, “Anang irau. Anang takut. Allah Taala kita, Allah Taala apai kita, tentu udah nyimpan duit nya dalam guni kita. Aku sigi bisi udah nerima
bayar ari kita.” Udah nya iya lalu mai Simeon ngagai sida.
24 Ulun nya lalu mai sida menyadi tama ngagai rumah Josep. Iya meri sida ai kena sida masu kaki, lalu meri keledai sida makai.
25 Sida lalu nyendiaka pemeri ti deka diberi sida ngagai Josep lebuh iya datai tengah hari nya, laban sida udah dipadahka sida deka merarau enggau iya.
26 Lebuh Josep datai di rumah, sida lalu mai pemeri sida ke dalam rumah, ngagai iya, lalu sida nyungkurka diri ke tanah di mua iya.
27 Iya nanyaka pengerai sida sebuat, lalu ku iya, “Kita bisi madahka pasal apai kita ke nyau tuai. Kati ku baka iya diatu? Kati iya agi meruan gerai nyamai?”
28 Disaut sida, “Ulun nuan, iya nya apai kami, agi meruan gerai nyamai.” Sida besugang lalu meremi di mua iya.
29 Lebuh Josep meda menyadi iya Benjamin, iya lalu bejaku, “Kati tu menyadi bunsu kita ke dipadahka kita ngagai aku? Allah Taala merekatka nuan, anak.”
30 Udah nya Josep lalu tekala nya ninggalka sida, laban ati iya balat rinduka menyadi iya. Iya nyau deka nyabak, nya alai iya tama ngagai bilik iya empu, lalu nyabak.
31 Lebuh iya udah empungas mua diri, iya pansut, lalu enggau naka ulih nagang diri nyabak. Iya lalu ngasuh orang nyendiaka pemakai.
32 Josep makai ba mija siti, lalu bala menyadi iya ba mija siti. Orang Ejip ke makai dia, makai ba mija siti, laban sida ngumbai sida ngemaruhka pangkat diri enti sida begulai makai enggau orang Hebrew.
33 Sida menyadi lalu diasuh duduk, betunga mua enggau Josep, nitihka penuai umur sida, belabuh ari iya ke pemadu tuai ngagai iya ke bunsu. Lebuh sida meda chara sida diatur duduk, sida beperening ngagai pangan diri, alit ati.
34 Pemakai lalu disadung ngagai sida ari mija Josep, lalu Benjamin diberi lima kali mayuh agi pemakai ari semua sida bukai. Sida makai ngirup enggau Josep datai ke sida nyau mabuk.
 
Bagi 44
Mangkuk Ti Lenyau
1 Josep lalu bejaku enggau kepala ulun ke ngemataka rumah iya. Ku iya, “Isi guni sida enggau pemakai, naka ti ulih bai sida, lalu engkahka duit sida ba mua guni sida siku-siku.
2 Engkahka mangkuk pirak aku ba mua guni menyadi bunsu sida, sama enggau duit ti dikena iya meli gandum.” Ulun nya lalu ngereja nitihka asuh Josep.
3 Tumu pagi hari siti, sida menyadi lalu diasuh mupuk, mai keledai sida.
4 Lebuh sida baru apin jauh udah ngejang ari nengeri nya, Josep lalu bejaku enggau kepala ulun ke ngemataka rumah iya, “Alai nuan nitihka sida. Lebuh nuan betemu enggau sida, tanya sida munyi tu, ‘Nama kebuah kita malas pemanah ngena penyai?
5 Nama kebuah kita ngenchuri mangkuk pirak tuan aku? Mangkuk nya dikena iya ngirup, enggau nilit nasit. Besai amat penyalah kita tu!’ “
6 Lebuh ulun nya nyau udah tetitihka sida, iya lalu nyebut jaku nya ngagai sida.
7 Ku sida nyaut iya, “Nama kebuah nuan bejaku munyi nya, tuan? Kami besumpah, kami nadai ngereja utai nya.
8 Nuan nemu, kami udah mai pulai baru ngagai nuan, ari menua Kanaan, duit ti ditemu kami ba mua guni kami. Nya alai, nama kebuah kami ngenchuri pirak tauka emas ari rumah tuan nuan?
9 Tuan, enti siku ari bala kami bisi ditemu nyimpan utai nya, iya deka diukum bunuh, lalu semua kami ke bukai deka nyadi ulun kita.”
10 Ku ulun nya bejaku, “Aku besetuju. Tang semina orang ke ngenchuri mangkuk nya aja deka nyadi ulun aku. Kita ti bukai tau mupuk.”
11 Sida lalu beguai-guai ngulurka guni sida ke tanah, lalu genap iku sida bela muka guni diri.
12 Ulun Josep lalu begigaka mangkuk nya enggau silik, belabuh ba menyadi sida ke pemadu tuai, nyentuk ngagai menyadi bunsu sida. Mangkuk nya lalu ditemu dalam guni Benjamin.
13 Bala sida menyadi lalu nyarikka gari diri, manggaika guni sida ba keledai sida, lalu nikal ngagai nengeri nya.
14 Lebuh Judah enggau bala menyadi iya datai ba rumah Josep, Josep agi mengkang dia. Sida meremi di mua iya,
15 lalu ku Josep bejaku enggau sida, “Nama utai tu ti dikereja kita? Kati kita enda nemu, orang ke bepangkat baka aku tu, tau nilit utai ti dikereja kita?”
16 Ku Judah nyaut, “Kami nadai nemu jalai bejaku agi, tuan. Kami sigi nadai jalai bejaku. Kami enda ulih ngumbai diri nadai penyalah, laban Allah Taala udah ngayanka penyalah kami. Diatu semua kami tu nyadi ulun nuan magang, ukai semina iya ke ditemu nyimpan mangkuk nuan.”
17 Ku Josep bejaku, “Aku enggai ngereja baka nya! Semina iya ke nyimpan mangkuk nya aja deka nyadi ulun aku. Kita ti bukai tau pulai enggau selamat ngagai apai kita.”
 
Judah Minta Josep Kasihka Benjamin
18 Judah lalu mansang ngagai Josep, lalu bejaku, “Tuan, awakka aku bejaku beterus-terang enggau nuan. Anang ringat ngagai aku, laban ba aku nuan tu baka reti raja.
19 Tuan, nuan suba bisi nanya kami munyi tu, ‘Kati kita bisi apai, tauka menyadi bukai?’
20 Lalu ku kami nyaut, ‘Kami bisi apai, tang iya nyau tuai. Lalu kami bisi siku agi menyadi ke diadaka lebuh apai kami nyau tuai. Menyadi nembiak nya udah mati, lalu ka semina siku iya aja ti agi idup ari anak indai iya. Lalu apai iya balat rinduka iya.’
21 Tuan, nuan ngasuh kami mai iya kitu, ngambika nuan ulih meda iya,
22 lalu kami madahka nembiak nya enda ulih ninggalka apai iya. Enti iya ninggalka apai iya, apai iya deka mati.
23 Udah nya nuan nyebut, ‘Kita enda tau agi betemu enggau aku enti menyadi bunsu kita enda datai enggau kita.’
24 “Lebuh kami pulai baru ngagai apai kami, kami madahka utai ti disebut nuan.
25 Udah nya apai kami lalu ngasuh kami pulai kitu ke baru, meli pemakai.
26 Ku kami nyaut, ‘Kami enda tau kin. Kami enda tau betemu enggau orang nya enti menyadi bunsu kami enda enggau kami. Kami semina tau kin, enti menyadi bunsu kami mupuk enggau kami.’
27 Ku apai kami bejaku, ‘Kita nemu, bini aku Rachel semina ngadaka dua iku anak.
28 Siku ari seduai nya udah ninggalka aku. Iya tetap udah dipecharikka jelu babas, laban aku nadai agi kala meda iya sekumbang iya ti udah ninggalka aku.
29 Enti kita mai anak aku tu ari aku, lalu iya bebadi, ati aku deka balat tusah, lalu aku deka mati, laban aku nyau tuai.’
30-31 “Nya alai, tuan,” ku Judah nampung jaku iya, “enti aku pulai baru ngagai apai aku lalu apai aku meda nembiak nya nadai enggau aku, iya deka mati. Apai kami rapat amat enggau nembiak tu, lalu iya nyau kelalu tuai, lalu enti iya tusah ati, iya deka mati.
32 Nambahka nya, aku udah ngadai nyawa diri ngagai apai aku, ke nembiak tu. Aku madahka ngagai apai aku, enti aku enda mai nembiak tu pulai baru ngagai iya, aku empu deka betanggungjawapka penyalah nya seumur idup.
33 Nya alai, tuan, aku minta diri tinggal ditu nyadi ulun nuan, nganti nembiak tu. Awakka iya pulai enggau bala menyadi iya.
34 Baka ni ku aku tau pulai ngagai apai aku, enti nembiak tu enda pulai sama enggau aku? Aku enda tan meda apai aku merinsa laban penusah tu.”
 
Bagi 45
Josep Madahka Diri Ngagai Bala Menyadi Iya
1 Josep nyau enda ulih natka ati diri agi di mua bala orang gaji iya. Nya alai iya lalu ngasuh semua ulun iya pansut ari bilik nya. Nadai orang bukai bisi enggau iya dia lebuh Josep madahka diri ngagai sida menyadi iya.
2 Iya nyabak inggar amat, datai ke orang Ejip nyau tedingaka iya, lalu berita nya dibai ngagai istana raja.
3 Ku Josep bejaku enggau bala menyadi iya, “Aku tu Josep. Kati apai agi idup?” Tang lebuh bala menyadi iya ninga nya, sida balat amat takut, datai ke sida nyau enda ulih nyaut iya.
4 Udah nya Josep lalu bejaku enggau sida, “Datai semak agi ngagai aku.” Sida mansang semak agi ngagai iya, lalu ku iya, “Aku tu Josep, menyadi kita ke dijual kita ngagai menua Ejip.
5 Anang tusah ati tauka ngutuk diri ketegal kita udah nyual aku kitu. Allah Taala udah ngasuh aku datai ditu dulu ari kita ngambika ngidupka nyawa orang mayuh.
6 Diatu lapar pungkang baru dua taun udah nyadi di menua tu. Lapar pungkang tu deka majak lima taun da agi. Dalam kandang maya nya, nadai orang ngeradu tanah umai, tauka ngetau.
7 Allah Taala udah ngasuh aku datai ditu dulu ari kita, ngambika ngidupka nyawa kita ngena chara ti nyelai tu, kena nentuka kita enggau peturun kita idup.
8 Nya alai, iya ti bendar, ukai kita ke ngirumka aku kitu, tang Allah Taala. Iya udah ngaga aku nyadi pemesai ti pemadu tinggi pangkat dalam perintah raja. Aku tu nyadi tuai ngemataka semua menua tu. Aku tu meh orang ke merintah semua menua Ejip.
9 Nya alai, pulai kita enggau jampat ngagai apai, lalu padahka ngagai iya utai ti disebut anak iya Josep: ‘Allah Taala udah ngasuh aku megai perintah di menua Ejip. Datai ngagai aku kitu enggau naka pengelengkas.
10 Nuan tau diau di menua Gosen, ngambika kita diau semak aku - nuan, bala anak nuan, bala uchu nuan, raban bedus nuan, kambin nuan, jelu sapi nuan, enggau semua utai ti dikemisi nuan.
11 Enti nuan diau di Gosen, aku ulih ngintu nuan. Lapar pungkang tu deka majak nyadi lima taun da agi, lalu aku enggai ke nuan, kita sebilik, enggau raban jelu tupi nuan, mati keberuran.’ “
12 Ku Josep nampung jaku iya, “Diatu semua kita, enggau nuan empu Benjamin, udah meda aku lalu nemu aku tu endang amat Josep.
13 Padahka ngagai apai pemesai kuasa aku di menua Ejip, lalu padahka ngagai iya semua utai ti udah dipeda kita. Udah nya bai iya kitu enggau jampat.”
14 Iya lalu merap menyadi iya Benjamin, lalu nyabak. Benjamin mega merap iya, lalu nyabak.
15 Udah nya, lebuh iya agi benung sikuk-sikuk nyabak, iya lalu merap genap iku bala menyadi iya, lalu nyium sida. Udah nya, bala menyadi iya lalu berandau enggau iya.
16 Lebuh berita pasal penatai bala menyadi Josep bisi didinga orang di istana, raja enggau bala pemesai iya gaga ati.
17 Ku raja bejaku enggau Josep, “Asuh sida menyadi nuan manggaika utai nya ba jelu sida, lalu pulai baru ngagai menua Kanaan.
18 Asuh sida ngambi apai sida, enggau semua sida sebilik, lalu pulai kitu. Aku deka meri ngagai sida menua ti pemadu manah di menua Ejip, lalu sida deka bisi menua ti lebih ari chukup alai sida beridup.
19 Asuh bala menyadi nuan mega mai kerita ari menua Ejip, kena ngundan bini anak, enggau apai sida.
20 Sida enda tau irau ati ninggalka reta tengkira sida, laban sida deka bempu utai ti pemadu manah di menua Ejip.”
21 Bala anak Jakop lalu ngereja utai ti diasuh kereja sida. Josep meri sida kerita, nitihka pesan raja, enggau bekal kena sida di rantau jalai.
22 Iya meri sida gari kena besilih, tang meri ngagai Benjamin tiga ratus singkap pirak, enggau lima lambar gari kena besilih.
23 Iya ngirumka barang ti pemadu manah ari menua Ejip, ti diundan ke iya ba sepuluh iku keledai. Iya mega ngundanka gandum, roti, enggau bekal ti bukai ke sida ba sepuluh iku keledai ti bukai.
24 Iya lalu ngasuh sida menyadi iya mupuk, lalu ku iya bejaku enggau sida lebuh sida bekejang, “Anang belaya di rantau jalai.”
25 Sida angkat ari menua Ejip, lalu pulai ngagai Jakop, apai sida di menua Kanaan.
26 Lalu ku sida madahka ngagai  Jakop, “Josep agi idup! Iya nyadi gabenor menua Ejip!” Jakop lalu temati-kutu enda arapka sida.
27 Tang lebuh sida madahka semua utai ti udah disebut Josep ngagai sida, lalu iya mega meda semua kerita ti dikirumka Josep kena mai iya ngagai menua Ejip, nya baru iya enda agi temati-kutu tekenyit ati.
28 “Anak aku Josep agi idup!” ku iya bejaku. “Nya aja meh utai ti dipinta aku! Aku enda tau enda betemu enggau iya sebedau aku mati.”
 
Bagi 46
Sida Jakop Sebilik Mansang Ngagai Menua Ejip
1 Jakop lalu nyikap semua reta tengkira iya, lalu mansang ngagai Beer-seba. Dia iya lalu ngenjuk piring ngagai Allah Taala apai iya Isak.
2 Lalu ku Allah Taala bejaku ngagai iya dalam genera, “Jakop! Jakop!” “Tu aku,” ku iya nyaut.
3 Lalu ku Allah Taala bejaku,”Aku tu Allah Taala, ke disembah apai nuan. Anang takut mansang ngagai menua Ejip, laban Aku deka ngaga peturun nuan nyadi bansa ti kering di menua nya.
4 Aku deka bejalai enggau nuan ngagai menua Ejip, lalu Aku deka mai peturun nuan pulai baru ngagai menua tu. Josep bisi enggau nuan lebuh nuan mati ila.”
5 Jakop lalu angkat ari Beer-seba. Bala anak iya lalu nepanka iya, bala anak sida, enggau bala bini sida dalam kerita ti udah dikirumka raja menua Ejip.
6 Sida mai jelu tupi sida, enggau reta tengkira ti udah ulih sida di menua Kanaan, lalu mupuk ngagai menua Ejip. Jakop mai semua peturun iya enggau iya, iya nya:
7 bala anak iya, bala uchu lelaki iya, bala anak indu iya, enggau bala uchu indu iya.
8 Baka tu ku raban sida Jakop sebilik ke mansang enggau iya ngagai menua Ejip: Reuben, anak tuai Jakop
9 enggau bala anak Reuben: Hanok, Pallu, Hesron, enggau Karmi.
10 Simeon enggau bala anak iya: Jemuel, Jamin, Ohat, Jachin, enggau Saul, ke diadaka siku indu orang Kanaan.
11 Lewi enggau bala anak iya: Gerson, Kohat, enggau Merari.
12 Judah enggau bala anak iya: Selah, Peres, enggau Serah. (Anak lelaki Judah ti bukai, Er enggau Onan, udah mati di menua Kanaan.) Anak Peres nya Hesron enggau Hamul.
13 Isakar enggau bala anak iya: Tola, Puah, Jasup, enggau Simron.
14 Sebulun enggau bala anak iya: Seret, Elon enggau Jahleel.
15 Tu meh bala anak Jakop ke diadaka Leah di menua Mesopotamia, kelimpah ari anak indu iya ke benama Dinah. Semua peturun Jakop ari Leah, tiga puluh tiga iku.
16 Gat enggau bala anak iya: Sepon, Hagi, Suni, Esbon, Eri, Arot, enggau Areli.
17 Aser enggau bala anak iya: Imnah, Isbah, Isbi, Beriah, enggau menyadi sida ke benama Serah. Anak lelaki Beriah nya Heber seduai Malkil.
18 Sida enam belas iku tu peturun Jakop, ari Silpah, indu ke ulun ke diberi Laban ngagai anak indu iya Leah.
19 Bini Jakop ke benama Rachel ngadaka dua iku anak: Josep seduai Benjamin.
20 Josep bisi dua iku anak di menua Ejip, Manasi seduai Epraim, ke diadaka Asenat anak indu Potipera. Potipera nya siku imam di Heliopolis.
21 Bala anak Benjamin: Bela, Beker, Asbel, Gera, Naaman, Ehi, Ros, Mupim, Hupim, enggau Art.
22 Sida empat belas iku tu peturun Jakop, ari Rachel.
23 Dan enggau anak iya Husim.
24 Naptali enggau bala anak iya: Jahseel, Guni, Jeser, enggau Silem.
25 Sida tujuh iku tu peturun Jakop ari Bilah, indu ke ulun ke diberi Laban ngagai anak indu iya Rachel.
26 Penyampau peturun Jakop ari tubuh iya empu ke pindah ngagai menua Ejip nya enam puluh enam iku, enda ngitung bini bala anak iya.
27 Pemayuh sida Jakop sebilik di menua Ejip nya tujuh puluh iku, nyengkaum anak Josep dua iku ke diadaka di menua nya.
 
Jakop Enggau Sida Sebilik Di Menua Ejip
28 Jakop ngasuh Judah bejalai dulu minta Josep ngambat sida di Gosen. Lebuh sida datai dia,
29 Josep nepan kerita perang iya, lalu mansang ngagai Gosen, ngambat apai iya. Lebuh seduai iya betemu, Josep merap apai iya, lalu nyabak lama amat.
30 Ku Jakop bejaku enggau Josep, “Aku sedia deka mati, laban aku udah meda nuan, lalu nemu nuan agi idup.”
31 Udah nya Josep lalu bejaku enggau sida menyadi iya, sereta enggau semua sida apai iya sebilik, “Aku deka mupuk lalu madahka ngagai  raja, munyi tu, ‘Bala menyadi aku, enggau sida apai sebilik, ti udah diau di menua Kanaan suba, diatu udah datai ngagai aku.
32 Sida nya pengibun bedus, laban sida endang beridup nginang jelu tupi, lalu sida udah mai raban bedus, enggau raban jelu sapi sida, enggau semua reta tengkira sida.’
33 Lebuh raja mesanka kita, lalu nanyaka pengawa ti dikereja kita,
34 kita enda tau enda madahka diri endang orang ke nginang jelu tupi seumur idup, baka aki ini kita kelia. Nya baru iya deka ngasuh kita diau di menua Gosen.” Josep nyebut nya laban orang Ejip keji begulai enggau orang ke pengibun bedus.
 
Bagi 47
1 Josep betemu enggau raja lalu madahka ngagai raja munyi tu, “Apai aku, enggau sida menyadi aku udah datai ari menua Kanaan, sama enggau raban bedus, jelu sapi enggau semua reta tengkira sida. Sida diatu di menua Gosen.”
2 Udah nya iya lalu mai lima iku ari sida menyadi iya betemu enggau raja.
3 Raja lalu nanya sida, “Nama pengawa ti dikereja kita?”
“Tuan, kami tu orang ke nginang bedus, baka aki ini kami kelia,” ku sida nyaut.
4 “Kami datai ditu laban kami deka diau di menua tu, laban di menua Kanaan, lapar pungkang balat amat nyadi, lalu kami nadai agi rumput din ke jelu tupi kami. Nya alai kami minta tuan raja ngemendarka kami diau di Gosen.”
5 Raja lalu bejaku enggau Josep, “Apai nuan enggau sida menyadi nuan udah datai ngagai nuan.
6 Menua Ejip tu nyadika menua sida. Awakka sida ngentapka diri ba menua ti pemadu manah. Awakka sida diau di menua Gosen. Lalu enti nuan bisi tetemuka orang ari bala sida ke landik gawa, asuh sida ngemataka raban jelu tupi aku.”
7 Udah nya Josep lalu mai apai iya, Jakop, betemu enggau raja. Jakop lalu merekatka raja.
8 Ku raja nanya Jakop, “Berapa umur nuan?”
9 Disaut Jakop, “Aku udah idup segau-segau seratus tiga puluh taun. Umur aku enda panjai, sereta penuh laban pemerinsa, enda baka pemanjai umur sida aki ini aku ke idup segau-segau kelia.”
10 Udah nya Jakop merekatka raja, lalu mupuk ari nya.
11 Udah nya Josep ngentapka apai iya enggau bala menyadi iya diau di menua Ejip, meri sida tanah di menua ti pemadu manah, semak nengeri Rameses, nitihka atur raja.
12 Josep meri pemakai ngagai apai iya, ngagai bala menyadi iya, enggau ngagai semua sida apai iya sebilik, nyengkaum sida ke pemadu biak.
 
Lapar Pungkang
13 Lapar pungkang balat amat nyadi, datai ke pemakai nyau abis di semua endur, lalu orang di menua Kanaan enggau di menua Ejip nyau lepi laban lapar pungkang nya.
14 Lebuh orang meli gandum, Josep ngumpul semua rega gandum nya, lalu mai duit nya ngagai istana.
15 Lebuh duit di menua Ejip enggau di menua Kanaan nyau abis, orang Ejip datai lalu bejaku enggau Josep. Ku sida, “Beri kami pemakai! Anang nejuka kami mati. Duit kami udah abis.”
16 Disaut Josep, “Bai jelu tupi kita kitu. Aku deka meri kita pemakai kena nyilih jelu tupi kita, enti duit kita udah abis.”
17 Sida lalu mai jelu tupi sida ngagai Josep, lalu iya meri sida pemakai kena iya nyilih kuda, bedus, kambin, sapi enggau keledai sida. Dalam taun nya, iya meri sida pemakai kena iya nyilih jelu tupi sida.
18 Taun siti, sida datai lalu bejaku enggau iya. Ku sida, “Tuan, kami enda ulih melamka pekara tu agi: duit kami udah abis, lalu jelu tupi kami nyau diempu nuan magang. Kami nadai agi utai diberi ngagai nuan, kelimpah ari tubuh enggau tanah kami.
19 Anang nejuka kami mati. Kereja sebarang utai kena ngidupka kami. Anang nejuka tanah kami puang. Beli kami enggau tanah kami kena nyilih pemakai. Kami deka nyadi ulun raja, lalu iya deka bempu tanah kami. Beri kami gandum ke pemakai kami, enggau ke benih kami, ngambika kami ulih nanam utai ba tanah kami.”
20 Josep lalu meli semua tanah di menua Ejip. Semua orang Ejip nyual tanah sida, laban lapar pungkang balat amat nyadi; lalu semua menua nya udah nyadi pesaka raja magang.
21 Josep ngaga orang nyadi ulun di serata menua Ejip.
22 Semina tanah ti diempu bala imam aja ti enda dibeli iya. Sida imam enda ibuh nyual tanah sida, laban raja meri sida elaun kena sida beridup.
23 Ku Josep bejaku enggau orang mayuh, “Aku diatu udah meli kita enggau tanah kita, ke raja. Tu benih ti tau ditanam kita ba tanah kita.
24 Lebuh maya ngetau, kita enda tau enda meri dua puluh peratus ngagai raja. Kita tau ngena teda utai nya nyadika benih, enggau ke pemakai kita.”
25 Ku sida nyaut, “Nuan udah ngidupka nyawa kami. Nuan udah manah enggau kami, tuan, lalu kami deka nyadi ulun raja.”
26 Nya alai Josep ngaga siti adat, ngasuh dua puluh peratus ari utai ti diketau, diempu raja. Adat tu mengkang dipejalaika nyentuk ngagai sehari tu. Semina tanah bala imam aja enda digaga nyadi pesaka raja.
 
Peminta Jakop Ti Penudi
27 Orang Israel diau di Gosen, di menua Ejip, alai sida ke nyadi kaya-raja, sereta beranak betelesak.
28 Jakop diau di menua Ejip tujuh belas taun, datai ngagai umur iya seratus empat puluh tujuh taun.
29 Lebuh iya nyau deka ngapuska seput, iya mesanka Josep, lalu bejaku enggau iya, “Engkahka jari nuan ba selepak pah aku lalu besumpah enda nguburka aku di menua Ejip.
30 Aku minta diri dikuburka ba endur alai bala apai aku dikuburka. Bai aku pansut ari menua Ejip, lalu kuburka aku ba pendam sida.”
Disaut Josep, “Aku deka ngereja utai ti diasuh nuan.”
31 Ku Jakop, “Besumpah nuan deka ngereja utai nya.” Josep lalu besumpah, lalu Jakop meri terima kasih lebuh iya benung gali ba peninduk iya.
 
Bagi 48
Jakop Merekatka Epraim Seduai Manasi
1 Nyau ke lama udah bekau nya, orang madahka ngagai Josep apai iya sakit. Iya lalu mai anak iya ke dua iku, Manasi seduai Epraim, lalu mansang ngabas Jakop.
2 Lebuh orang madahka ngagai Jakop anak iya Josep bisi datai ngabas iya, iya lalu ngeringka diri duduk ba peninduk iya.
3 Ku Jakop bejaku enggau Josep, “Allah Taala ti Pemadu Bekuasa udah pegari di mua aku di Lus, di menua Kanaan, lalu merekatka aku.
4 Ku Iya bejaku enggau aku, ‘Aku deka meri ngagai nuan mayuh anak, ngambika peturun nuan nyadi mayuh bengkah bansa. Aku deka meri menua tu ngagai peturun nuan, nyadika pesaka sida belama iya.’ “
5 Ku Jakop nampung jaku iya, “Josep, anak nuan Epraim seduai Manasi, ke diadaka di menua Ejip sebedau aku datai ditu, diambu aku nyadika anak, baka anak aku Reuben seduai Simeon.
6 Enti nuan bisi anak lelaki bukai nangkanka seduai iya, sida nya enda dikumbai anak aku, lalu sida deka bulih pesaka ari Epraim seduai Manasi.
7 Aku ngereja tu ketegal indai nuan Rachel. Ati aku balat sinu lebuh iya mati di menua Kanaan, enda jauh ari Eprat, lebuh aku pulai ari Mesopotamia. Aku nguburka iya ba tisi jalai ngagai Eprat.” (Eprat nya dikumbai Betlehem diatu.)
8 Lebuh Jakop meda anak Josep, iya lalu nanya, “Anak sapa tu?”
9 Ku Josep nyaut, “Seduai iya anak aku, ke diberi Allah Taala ngagai aku di menua Ejip.” Ku Jakop, “Bai seduai iya kitu ngagai aku, ngambika aku merekatka seduai iya.”
10 Mata Jakop nyau rabun, laban iya nyau tuai, lalu enda lansik agi. Josep mai nembiak dua iku nya ngagai Jakop. Jakop lalu merap sereta nyium seduai iya.
11 Ku Jakop bejaku enggau Josep, “Aku enda ngadang diri ulih betemu enggau nuan, lalu diatu Allah Taala udah ngasuh aku meda anak nuan.”
12 Udah nya Josep lalu ngambi seduai iya ari serungkung Jakop, lalu nyungkurka diri ke tanah di mua iya.
13 Josep ngengkahka Epraim ari kiba Jakop, lalu Manasi ari kanan iya.
14 Tang Jakop ngengkahka jari kanan iya ba pala Epraim, taja pen iya biak agi, lalu ngengkahka jari kiba iya ba pala Manasi, ke tuai agi.
15 Udah nya iya lalu merekatka Josep: “Awakka Allah Taala, ke disembah apai aku Abraham enggau Isak, merekatka nembiak dua iku tu! Awakka Allah Taala, ti udah nguluka aku nyentuk ngagai sehari tu, merekatka seduai iya!
16 Awakka melikat, ti udah ngelepaska aku ari semua utai ti tau ngemediska aku, merekatka seduai iya!  Awakka nama aku, enggau nama apai aku, Abraham enggau Isak, meruan belama iya ulih nembiak dua iku tu! Awakka seduai iya beranak betelesak, mayuh peturun!”
17 Josep enda lantang ati meda apai iya ngengkahka jari kanan iya atas pala Epraim, nya alai iya ngambi jari apai iya, lalu mindahka jari nya ari pala Epraim ngagai pala Manasi.
18 Ku Josep bejaku enggau apai iya, “Ukai baka nya, apai. Iya tu tuai agi. Engkahka jari kanan nuan ba pala iya.”
19 Tang apai iya enggai, ku iya, “Aku nemu, anak, aku nemu. Peturun Manasi deka mega nyadi bansa ti kering. Tang adi iya deka kering agi ari iya, lalu peturun iya deka nurunka mayuh bengkah bansa ti kering.”
20 Nya alai sehari nya iya merekatka Epraim seduai Manasi. Ku iya, “Orang Israel deka ngena nama seduai lebuh sida merekatka orang. Sida deka nyebut munyi tu, ‘Awakka Allah Taala ngaga nuan baka Epraim seduai Manasi.’ “ Nya meh chara Jakop ngasuh Epraim dulu ari Manasi.
21 Lalu ku Jakop bejaku enggau Josep, “Nuan nemu, aku nyau deka mati, tang Allah Taala deka meruan enggau nuan, lalu deka mai nuan pulai ngagai menua aki ini nuan.
22 Aku meri Sekem ngagai nuan, ukai ngagai bala menyadi nuan. Menua nya ami, lalu udah dirampas aku ari orang Amor ngena pedang enggau panah aku.”
 
Bagi 49
 Jaku Jakop Ti Penudi
1 Jakop mesanka bala anak iya, lalu bejaku, “Begempuru ngelingi aku laban aku deka madahka ngagai kita utai ti deka nyadi ba kita jemah ila:
2 “Begempuru ditu, lalu pendingka aku, kita anak Jakop. Dingaka apai kita Israel.
3 “Reuben, anak tuai aku, nuan nyadika pengering aku Anak tuai aku, Anak ke pemadu sumbung sereta pemadu kering ari semua anak aku.
4 Nuan tu baka ai bah ti deras, tang nuan enda tentu diguna orang, laban nuan udah tinduk enggau indu simpan aku lalu enda bebasaka peninduk apai nuan.
5 “Simeon seduai Lewi endang diri menyadi. Seduai iya ngena senyata bebunuhka orang.
6 Aku enggai bepekat enggau seduai iya, lalu aku enggai mega baum enggau seduai iya, laban seduai iya munuh orang ketegal seduai iya ringat. Lalu seduai iya merinsaka jelu sapi ti lelaki kena seduai iya ngelantangka diri.
7 Awakka sumpah ninggang pengeringat seduai iya, laban pengeringat nya balat amat, lalu awakka sumpah nya ninggang pemangah seduai iya, laban pemangah seduai iya kasar amat. Aku deka naburka seduai iya ngagai serata menua Israel. Aku deka ngachirka seduai iya ngagai semua orang Israel.
8 Judah, menyadi nuan deka muji nuan. Nuan deka nyekal rekung munsuh nuan. Bala menyadi nuan deka meremi ngagai nuan.
9 Judah baka singa, ti munuh utai ti deka diempa iya, lalu pulai baru ngagai lubang iya, ngeliat lalu gali. Nadai orang berani ngachau iya.
10 Judah deka megai tungkat ti diraja, lalu peturun iya deka seruran merintah. Semua bansa deka mai chukai sida ngagai iya lalu meremi di mua iya, laban sida ngasika iya.
11 Iya nanchangka keledai iya ti agi biak ngagai batang anggur, ngagai randau ti pemadu manah. Iya masu gari iya ngena wain ti mirah baka darah.
12 Mata iya nyau mirah laban iya ngirup wain, ngeli iya burak laban iya ngirup ai tusu.
13 “Sebulun deka diau ba tebing tasik. Kapal deka sangkai ba tebing iya. Rampa menua iya nyentuk ngagai Sidon.
14 “Isakar enda lebih ari keledai ti gali unjur dalam kandang bedus.
15 Tang iya meda menua nya manah alai belelak lalu menua nya ngerinduka ati. Nya alai iya lalu ngenjingka belakang iya ngesan utai lalu iya nyadi ulun ke dipejalka ngereja pengawa ti berat.
16 “Dan deka merintah bansa iya empu, baka raban bansa orang Israel ti bukai.
17 Dan nya ular ti ba tisi jalai raya, ular ti bisa ba tisi jalai, ti mantuk tumbit kuda, ngambika orang ke nepan kuda nya labuh telentang kebelakang.
18 “Aku nganti pengelepas ari Nuan, TUHAN.
19 “Gat deka diserang bala perumpak, tang iya deka mutar, lalu begagaika sida.
20 “Menua Aser deka mansutka pemakai ti manah. Iya deka mansutka pemakai ke raja.
21 “Naptali nya rusa ti belanda enda ditanchang, ti ngadaka anak ti manah gamal.
22 “Josep nya baka keledai kampung ti bediri ngimbai mata ai, anak keledai kampung ti ba serimbing bukit.
23 Munsuh iya bebendar amat nyerang iya lalu begagaika iya ngena panah enggau laja.
24 Tang panah iya mengkang enda beguyat, lalu lengan iya kering Ulih kuasa Allah Taala ti Pemadu Bekuasa ke disembah Jakop, ulih Pengibun Domba, ke nyaga orang Israel.
25 Allah Taala ti disembah apai nuan deka nyaup nuan, Allah Taala ti Pemadu Bekuasa deka merekatka nuan ngena ai ujan ti labuh ari langit enggau ngena ai ti dalam ti di baruh tanah, meri nuan mayuh jelu sapi enggau mayuh anak,
26 Berekat ti diberi apai kita kering agi ari berekat ti datai ari bukit ti meruan belama iya ari pengaya ti datai ari munggu ti meruan belama iya awakka semua berekat nya meruan ba atas pala Josep, ba kening iya ti udah diseraraka ari bala menyadi iya.
27 “Benjamin nya baka ukui kampung ti mangah. Pagi lemai iya munuh lalu makai.”
28 Tu meh dua belas raban bansa orang Israel, lalu tu meh utai ti disebut apai sida, lebuh iya bejaku meri selamat tinggal ngagai siku-siku anak iya.
 
Jakop Mati Lalu Dikuburka
29 Udah nya Jakop lalu bejaku enggau bala anak lelaki iya munyi tu, “Aku nyau deka mati. Kuburka aku begulai enggau bala apai aku, dalam lubang gua ti ba padang ti udah diempu Epron, orang Iti,
30 di Makpilah, tunga ke timur Mamre, di menua Kanaan. Abraham udah meli lubang gua enggau padang nya ari Epron, nyadika tanah pendam.
31 Nya meh endur alai Abraham nguburka bini iya, Sarah. Dia meh sida nguburka Isak enggau bini iya Rebekah. Lalu nya mega endur alai aku nguburka Leah.
32 Padang enggau lubang gua nya udah dibeli ari orang Iti. Dia meh alai kita deka nguburka aku.”
33 * Lebuh Jakop udah tembu meri semua atur ngagai bala anak iya, iya gali lalu ngapuska seput.
 
Bagi 50
1 Josep lalu ningkapka diri ba apai iya lalu merap iya, nyabak sereta nyium mua iya.
2 Udah nya Josep lalu ngasuh orang ngintu bangkai apai iya ngambika iya enda but.
3 Pengawa nya dikereja dalam pengelama empat puluh hari. Tu endang pengelama orang nyendiaka tubuh orang ke mati ngambika bangkai nya enda but. Orang Ejip lalu ngulitka iya tujuh puluh hari.
4 Lebuh maya ngulit udah tembu, Josep lalu bejaku enggau bala pemesai raja, “Aku minta kita mai pesan tu ngagai raja:
5 ‘Lebuh apai aku baru deka ngapuska seput, iya ngasuh aku besemaya nguburka iya ba lubang kubur ti udah disediaka iya di menua Kanaan. Nya alai, awakka aku mupuk lalu nguburka apai aku. Udah nya aku deka pulai kitu baru.’ “
6 Disaut raja, “Mupuk meh nuan, lalu kuburka apai nuan, munyi ti udah disemaya nuan enggau iya.”
7 Nya alai Josep mupuk, deka nguburka apai iya. Semua bala pemesai raja, orang ke tinggi pangkat dalam opis raja, enggau semua bala orang ke tampak nama di menua Ejip, mupuk magang enggau Josep.
8 Sida sebilik, bala menyadi iya, enggau bala sida ke ari ruang bilik apai iya, semua mupuk magang enggau iya. Ka semina sida ke agi mit, enggau jelu bedus, kambin, jelu sapi aja ti tinggal di menua Gosen.
9 Orang ke nepan kerita perang, enggau orang ke nepan kuda, mega mupuk enggau iya. Mayuh amat bala sida.
10 Lebuh sida datai ba endur alai nungku gandum di Atat, muak ke timur Sungai Jordan, sida ngulitka Jakop dia tujuh hari.
11 Lebuh orang Kanaan meda sida ngulit di Atat, sida lalu bejaku, “Bebendar amat orang Ejip ngulit!” Nya kebuah endur nya dikumbai Abel Misraim.
12 Nya alai bala anak Jakop ngereja utai nitihka pesan iya.
13 Sida mai bangkai iya ngagai menua Kanaan, lalu nguburka iya dalam lubang gua di Makpilah, tunga ke timur Mamre, ba tanah ti udah dibeli Abraham ari Epron, orang Iti, nyadika tanah pendam.
14 Lebuh Josep udah nguburka apai iya, iya pulai ngagai menua Ejip sama enggau bala menyadi iya, sereta enggau semua orang ke udah enggau iya nguburka apai iya.
 
Josep Enda Ngasuh Sida Menyadi Iya Irau Ati
15 Udah bekau pemati apai sida, bala menyadi Josep lalu bejaku, “Kati enti Josep begedika kitai, lalu bekira deka malas kitai ti udah ngemediska iya?”
16 Sida lalu ngirumka pesan ngagai Josep, “Sebedau apai kitai mati,
17 iya ngasuh kami nyebut ngagai nuan munyi tu, ‘Ampun penyalah ti udah dikereja bala menyadi nuan ngagai nuan.’ Nya alai kami minta nuan ngampun penyalah ti udah dikereja kami ke nembiak Allah Taala ti disembah apai nuan.” Josep nyabak lebuh iya nerima pesan nya.
18 Udah nya bala menyadi iya empu datai lalu meremi di mua iya, “Kami datai ditu laban kami deka nyerahka diri nyadi ulun nuan,” ku sida bejaku.
19 Tang ku Josep bejaku enggau sida, “Anang takut. Aku enda nemu ngaga diri nyadi Allah Taala.
20 Kita ngiga akal ti jai kena kita ngelaban aku, tang Allah Taala udah mutarka utai nya nyadi utai ti manah, ngambika ngidupka nyawa orang mayuh, lalu orang mayuh agi mengkang idup diatu, ketegal utai nya udah nyadi.
21 Nya alai, anang takut. Aku deka ngintu kita enggau bala anak kita.” Iya bejaku siru amat enggau sida, minta sida badu agi irau ati. Jaku iya negu ati sida.
 
Pemati Josep
22 Josep mengkang diau di menua Ejip begulai enggau raban ruang bilik apai iya. Umur iya seratus sepuluh taun lebuh iya mati.
23 Iya idup meda bala anak enggau bala uchu Epraim. Iya mega agi idup lebuh bala anak Makir, iya nya uchu Manasi, ada dalam ruang bilik iya.
24 Ku iya bejaku enggau bala menyadi iya, “Aku diatu nyau deka mati, tang Allah Taala tetap deka ngemataka kita, lalu mai kita pansut ari menua tu ngagai menua ti udah disemaya Iya ngena sumpah ngagai Abraham, Isak enggau Jakop.”
25 Udah nya Josep lalu ngasuh bala iya besumpah. Ku iya, “Kita enda tau enda besemaya deka mai bangkai aku enggau kita, lebuh Allah Taala nguluka kita ngagai menua nya.”
26 Josep mati umur 110 taun di menua Ejip. Sida lalu ngintu tubuh iya ngambika iya enda but, lalu nyimpan iya dalam sentubung.